JKW-KABUM-14-PHA-001-001

🚧 This website is under continued development. We appreciate your patience!

First text in section. Back to Volume PageNext Text

སྔ་འགྱུར་རྡོ་རྗེ་ཐེག་པའི་དབང་བསྐུར་སྤྱི་ལ་འཇུག་པའི་མཚམས་སྦྱོར་ཉུང་ངུར་བསྡུས་པ་བློ་གསལ་ངག་གི་འདོད་འཇོ།

Wylie title	snga 'gyur rdo rje theg pa'i dbang bskur spyi la 'jug pa'i mtshams sbyor nyung ngur bsdus pa blo gsal ngag gi 'dod 'jo
Location	mkhyen brtse'i bka' 'bum Volume 14, sde tshan 1, Text 1, Pages 1-22 (Folios 1a to 11b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཀློང་གསལ་སྙིང་པོ་ (klong gsal snying po)
Citation	'jam dbyangs mkhyen brtse'i dbang po. snga 'gyur rdo rje theg pa'i dbang bskur spyi la 'jug pa'i mtshams sbyor nyung ngur bsdus pa blo gsal ngag gi 'dod 'jo. In 'jam dbyangs mkhyen brtse'i dbang po'i bka' 'bum, Vol. 14: 1-22. Khams sde dge rdzong sar dgon: Rdzong sar blo gros phun tshogs, 2020.
Genre	Empowerment Ritual - dbang chog - dbang skur
Colophon	།དེ་ལྟར་སྔ་འགྱུར་རྡོ་རྗེ་ཐེག་པའི་གཏེར་མའི་ཕྱོགས་སྤྱི་དང་། རིག་འཛིན་ཀློང་གསལ་སྙིང་པོའི་ཟབ་གཏེར་རྣམས་ལ་ཁྱད་པར་དུ་སྦྱར་བའི་དབང་བསྐུར་ཕྲན་ བུའི་རིགས་ཀྱི་བར་མཚམས་རྣམས་སུ་གླེངས་པར་འོས་པའི་གཏམ་ཉུང་ངུ་འདི་ཡང་། །གསང་བདག་རྡོ་རྗེ་འཛིན་པ་ཆེན་པོ་སོགས་ཡོངས་འཛིན་དམ་པ་རྣམས་ཀྱི་གསུངས་དང་གསུངས་རབ་ལས་བཏུས་ཏེ་ཤཱཀྱའི་དགེ་སློང་མཚོ་སྐྱེས་བླ་མ་དགྱེས་པའི་འབངས་ཀྱིས་སྦྱར་བ་ཤིན་ཏུ་དགེ་ཤིང་བཀྲ་ཤིས་པར་གྱུར་ཅིག །སརྦ་དཱ་ཤྲེ་ཡོ་བྷ་ཝ་ཏུ།
	de ltar snga 'gyur rdo rje theg pa'i gter ma'i phyogs spyi dang /__rig 'dzin klong gsal snying po'i zab gter rnams la khyad par du sbyar ba'i dbang bskur phran _bu'i rigs kyi bar mtshams rnams su glengs par 'os pa'i gtam nyung ngu 'di yang /__/gsang bdag rdo rje 'dzin pa chen po sogs yongs 'dzin dam pa rnams kyi gsungs dang gsungs rab las btus te shAkya'i dge slong mtsho skyes bla ma dgyes pa'i 'bangs kyis sbyar ba shin tu dge shing bkra shis par gyur cig_/sarba dA shre yo b+ha wa tu/

1 Texts in this Section (sde tshan or chos tshan)

1 1-22	སྔ་འགྱུར་རྡོ་རྗེ་ཐེག་པའི་དབང་བསྐུར་སྤྱི་ལ་འཇུག་པའི་མཚམས་སྦྱོར་ཉུང་ངུར་བསྡུས་པ་བློ་གསལ་ངག་གི་འདོད་འཇོ། snga 'gyur rdo rje theg pa'i dbang bskur spyi la 'jug pa'i mtshams sbyor nyung ngur bsdus pa blo gsal ngag gi 'dod 'jo Empowerment Ritual - dbang chog - dbang skur	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །སྔ་འགྱུར་རྡོ་རྗེ་ཐེག་པའི་དབང་བསྐུར་སྤྱི་ལ་འཇུག་པའི་མཚམས་སྦྱོར་ཉུང་ངུར་བསྡུས་པ་བློ་གསལ་ངག་གི་འདོད་འཇོ་ཅེས་བྱ་བ་བཞུགས་སོ།། །། སྲིད་ཞིའི་དགེ་མཚན་བདུད་རྩིའི་དོ་ཤལ་ནི། །སྙིང་རྗེའི་ཟླ་བ་གཞོན་ནུ་ལ་ཆགས་པས། །གྲུབ་གཉིས་ངལ་འཚོས་ཡིད་ཅན་གདུང་སེལ་བ། །ཁྱབ་བདག་རྡོ་རྗེ་སེམས་དཔས་དགེ་ལེགས་མཛོད། དེ་ལ་འདིར་དབང་ཐོབ་ཅིང་དམ་ཚིག་ལ་གནས་པའི་སྔགས་པས་བསྙེན་བསྒྲུབས་ལས་སུ་རུང་བ་སྔོན་དུ་སོང་ནས། །ཟང་ཟིང་མེད་པའི་བྱམས་པ་དང་། འཁོར་བ་ལས་སྒྲོལ་འདོད་ཀྱི་སྙིང་རྗེ་ཆེན་པོ་སོགས་གཞན་ལ་གཅིག་ཏུ་ཕན་པ་དང་བདེ་བའི་ཡིད་ཀྱིས་གནས་སྐབས་དང་མཐར་ཐུག་གི་དངོས་གྲུབ་རླབ་པོ་ཆེའི་གནས་སུ་དབུགས་དབྱུང་བའི་སླད། རྡོ་རྗེའི་སློབ་མ་རྣམས་དཀྱིལ་འཁོར་ཆེན་པོར་འཇུག་ཅིང་སྨིན་པར་འདོད་པས། གནས་དབེན་ཞིང་ཡིད་དང་མཐུན་པར་སྟེགས་བུའི་ཁར་ལྷག་པའི་ལྷ་གང་ལ་བརྟེན་པའི་དཀྱིལ་འཁོར་དང་། དབང་རྫས། མཆོད་པའི་ཡོ་བྱད་སོགས་མ་ཚང་བ་མེད་པ་འདུ་བྱས་ནས་བདག་མདུན་དབྱེར་མེད་ཀྱི་བསྐྱེད་བཟླས་དང་། རྣམ་བུམ་ལ་དམིགས་ཀྱིས་བསལ་བའི་བཟླས་པ། ལས་བུམ་བསྒྲུབས་པ་བཅས་ཀྱི་མཐར་རིག་པའི་མེ་ཏོག་དོར་བ་ཙམ་གྱིས་བདག་ཉིད་འཇུག་པ་དང་། སློབ་མ་འཇུག་པར་གསོལ་བ་གདབ་པ་རྣམས་གྲུབ་ནས། སྒྲུབས་བྱ་རྣམས་གྲལ་ལ་འཁོད་པར། ལས་བུམ་ཐོགས་ཏེ། ཧྲཱིཿ བདེར་གཤེགས་རྒྱལ་བ་རྣམས་ཀྱི་ཐུགས་རྗེའི་ཆུས། །སྐལ་ལྡན་སློབ་མའི་ལུས་ངག་ཡིད་གསུམ་ལ། །གནས་པའི་ཉོན་མོངས་བག་ཆགས་དྲི་མའི་ཚོགས། །བཀྲུ་བར་བགྱིའོ་བྱང་ཞིང་དག་གྱུར་ཅིག །ལས་སྔགས་དང་ཡི་གེ་བརྒྱ་པ་སོགས་ཀྱི་མཐར། རྡོ་རྗེ་སློབ་མ་རྣམས་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་ལས་དང་ཉོན་མོངས་པ་སྡིག་པ་དང་སྒྲིབ་པ་ཐམས་ཤཱིནྟཾ་ཀུ་རུ་ཡེ་སྭཱ་ཧཱ། །ཅེས་བརྗོད་ཅིང་ཁྲུས་བྱ། དེ་ནས་བགེགས་གཏོར་བཏང་བ་ནི། །རང་ཉིད་སྐད་ཅིག་གིས་དབང་ཆེན་ཧེ་རུ་ཀར་གསལ་བའི་ཐུགས་ཀ་ནས་འོད་ཟེར་འཕྲོས་པས་ནམ་མཁའ་མེ་རླུང་འཁྲུགས་པའི་དུར་ཁྲོད་དུ་ཁྲོ་བོའི་རྒྱལ་པོ་རྟ་མགྲིན་ཡེ་ཤེས་པ་དཔའ་བརྗིད་ཀྱི་ཉམས་དང་ལྡན་པར་གྱུར་བ་ཨོཾ་བཛྲ་ས་མཱ་ཡ་ཛ་ཛཿ ཞེས་པས་སྤྱན་དྲངས་ཏེ་བདག་དང་གཉིས་མེད་ཀྱི་ང་རྒྱལ་བསྐྱེད། ཧཱུྃཿ ཕྱོགས་བཞི་མཚམས་བཞི་སྟེང་འོག་ཐམས་ཅད་དང་། ས་འོག་ས་སྟེང་ས་བླར་རྒྱུ་བ་ཡིཿ བགེགས་དང་ལོག་འདྲེན་ལན་ཆགས་འབྱུང་པོའི་ཚོགསཿ བགེགས་འདུལ་ཁྲོ་རྒྱལ་འབར་བའི་བཀའ་བྱུང་གི༔ སྐད་ཅིག་ཡུད་ཙམ་ཞིག་གིས་འདིར་ཁུག་ལཿ བདག་གིས་བསྒོ་བའི་བཀའ་ལ་ཉན་པར་བྱོས༔ བཛྲ་ཊཱཀྐིརཱ་ཛ་ཧཱུྃ་ཛཿ ཛཿཧཱུྃ་བྃ་ཧོཿ བཛྲ་ཨངྐུ་ཤ་ཛཿས། བགེགས་དང་ལོག་འདྲེན་འབྱུང་པོ་ཐམས་ཅད་འདུས་པར་བསམ། གཏོར་མ་ལས་སྔགས་སམ། །ཨོཾ་བཛྲ་ཡཀྵ་ཧཱུྃ། གིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཏྲཱཾཿ ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ལན་ཆགས་བགེགས་ཀྱི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ། ནམ་མཁའ་ལས་འཕང་མཐོ་བ། རྒྱ་མཚོ་ལས་གཏིང་ཟབ་པ། རྩི་ཤིང་ལས་ལྷུན་སྟུག་པ། ཞིང་རྡུལ་ལས་གྲངས་མང་བ། རང་རང་ལ་གང་མཁོ་བའི་འདོད་འབྱུང་གི་ལོངས་སྤྱོད་ཟད་མི་ཤེས་པའི་གཏེར་ཆེན་པོ་གཅིག་ཏུ་གྱུར་པར་བསམས་ལ་ཨོཾ་ཨཱཿཧཱུྃ་ཧོཿས་བརླབས། ཨོཾ་སརྦ་བིགྷྣན་ན་མསྶརྦ་ཏ་ཐཱ་ག་ཏ་བྷྱོ་བི་ཤྭ་སོགས་ཀྱིས་བསྔོས། ཧཱུྃ་ཧཱུྃ་ཧཱུྃཿ ང་ནི་དབང་ཆེན་ཁྲོས་པའི་སྐུ༔ ཁམས་གསུམ་འདི་ན་སུ་ཡང་རུང་༔ གསང་སྔགས་ལྟ་བར་མི་དབང་བའིཿ ལོག་པར་ལྟ་བ་ཕྱིར་དེངས་ཤིགཿ ན་མོ། བླ་ན་མ་མཆིས་པའི་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུའང་ཡི་དམ་དབང་ཆེན་ཧེ་རུ་ཀའི་ལྷ་ཚོགས་བཀའ་སྡོད་ཕྱག་བརྙན་སྤྲུལ་པ་ཡང་སྤྲུལ་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། དེངས་འདིར་རྡོ་རྗེ་སློབ་མ་འདི་རྣམས་ལ་སྨིན་བྱེད་ཀྱི་དབང་བསྐུར་ཟབ་མོ་བགྱི་བ་དང་། ལུས་ངག་ཡིད་གསུམ་ཚེ་སྲོག་བསམ་སྦྱོར་དང་བཅས་པ་ལ་བར་དུ་གཅོད་ཅིང་གླགས་ལྟ་བའི་འབྱུང་པོ་གདོན་བགེགས་ཀྱི་རིགས་གང་ཡིན་པ་དེ་དག་ཐམས་ཅད་མཆོད་སྦྱིན་གྱི་གཏོར་མ་རྒྱ་ཆེན་པོ་བྱིན་པ་འདིས་ཚིམས་པར་གྱིས་ལ་སའི་ཕྱོགས་འདིར་མ་གནས་པར་སོ་སོ་རང་རང་གི་གནས་སུ་བདེ་བར་དེངས་ཤིག །གལ་ལྟེ་མི་འགྲོ་ཞིང་འདུས་པར་གྱུར་ན་བདག་ཉིད་དབང་ཆེན་ཁྲོ་བོའི་རྒྱལ་པོ་ཐུགས་ཁྲོས་ཏེ་སྤྲུལ་པའི་ཁྲོ་ཚོགས་གྲངས་མེད་པས་ལུས་ངག་ཡིད་གསུམ་ཐལ་བའི་རྡུལ་ཕྲན་བཞིན་དུ་བརླགས་པར་གདོན་མི་ཟའོ། །ཨོཾ་ཧྲཱིཿཔདྨཱནྟ་ཀྲྀ་ཏ་བཛྲ་ཀྲོ་དྷི་ཧྱ་གྷྲཱི་ཝ་ཧུ་ལུ་ཧུ་ལུ་ཧཱུྃ་ཕ྄ཊ། ཨོཾ་སུམྦྷ་ནི་སོགས་བརྗོད་ཅིང་བསྐྲད། གུ་གུལ་གྱིས་བདུག །ཡུངས་ཀར་གྱི་བྲབས། གཏོར་མ་ཕྱི་རོལ་དུ་བསྐྱལ། ཧྲཱིཿ །ཕྱི་སྣོད་གཞལ་ཡས་ནང་བཅུད་ལྷཿ ཐབས་ཤེས་ཉི་ཟླའི་གའུ་དང་༔ ཕྱི་རོལ་མཚོན་ཆ་མེ་རིའི་གུར༔ སྲུང་བའི་ཚོགས་ཁང་ལྷུན་གྱིས་གྲུབ། བྷྲཱུྃ་བཛྲ་ཀྲོ་དྷ་རཀྵ་རཀྵ་ཧཱུྃ༔ སློབ་དཔོན་གྱི་ཐུགས་ཀ་ནས་སྤྲོས་པའི་ཁྲོ་ཚོགས་གྲངས་མེད་པས་བགེགས་རྣམས་རྒྱ་མཚོའི་ཕ་མཐར་ཕྱིར་བསྐྲད། འོད་ཟེར་ཚུར་འདུས་པ་ལས་བྱུང་བའི་ཐར་པ་ཆེན་པོའི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་འོག་ཐམས་ཅད་རྡོ་རྗེའི་ས་གཞི། ཁོར་ཡུག་ཐམས་ཅད་རྡོ་རྗེའི་རྭ་བ་དང་དྲ་བ། སྟེང་ཐམས་ཅད་རྡོ་རྗེའི་གུར་དང་བླ་བྲེ། ཕྱི་རོལ་ཐམས་ཅད་ཡེ་ཤེས་ཀྱི་མེ་དཔུང་ཁ་དོག་ལྔ་ལྡན་དུ་འབར་བའི་ཀློང་དུ་རྡོ་རྗེའི་ཁྲོ་བོ་འཆོལ་པའི་ཚོགས་དང་། ཕྱག་མཚན་དང་མཚོན་ཆ་སྣ་ཚོགས་པས་གཏམས་པའི་སྲུང་བའི་འཁོར་ལོ་ཅིས་ཀྱང་མི་ཆོད་མི་ཤིག་པར་གྱུར་པ་ལ། ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་རྣམས་དང་། བདེན་ཚིག་གྲུབ་པའི་ལྷ་དང་དྲང་སྲོང་རིག་པ་འཛིན་པའི་ཚོགས་ཀྱིས་རབ་ཏུ་གནས་ཤིང་རབ་ཏུ་བརྟན་པར་བྱས་པའི་མོས་པ་མཛོད། །རྟེན་འབྲེལ་སྙིང་པོ་བརྗོད་ཅིང་མེ་ཏོག་འཐོར། །དེ་ནས་ལས་རྡོར་གྱིས་མེ་ཏོག་བཀྱེ་བསྡུ་བྱ་ཞིང་། སློབ་དཔོན་གྱིས། འོ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་སྨིན་བྱེད་དབང་བསྐུར་གྱི་རིམ་པ་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླངས་བར་བགྱིའོ་སྙམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པའང་ཐེག་པ་ཆེན་པོའི་མདོ་རྒྱུད་བསྟན་བཅོས་དྲི་མ་མེད་པ་རྣམས་ནས་ཇི་ལྟར་འབྱུང་བ་བཞིན་ལེགས་པར་གསལ་བཏབ་སྟེ་གསན་འཚལ། །དེ་ལ་འདིར་གང་གསན་པར་བྱ་བའི་ཆོས་ནི། སློབ་དཔོན་ཆེན་པོ་ཞི་བ་ལྷས། །དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །ཞེས་གསུངས་པ་ལྟར། ད་རེས་རང་རེ་རྣམས་ཀྱིས་ཡིད་བཞིན་ཀྱི་ནོར་བུ་ལག་ཏུ་ལོན་པའི་དཔེས་བརྒྱ་སྟོང་གི་ཆར་ཡང་མི་ཕོད་ཅིང་རྙེད་དཀའ་ལ་ཕན་ཡོན་བསམ་གྱིས་མི་ཁྱབ་པ་དང་ལྡན་པའི་དལ་འབྱོར་གྱི་མི་ལུས་རིན་པོ་ཆེ་འདི་ལྟ་བུ་ཐོབ་ཏུ་ཟིན་ཀྱང་། མདོ་རྒྱ་ཆེ་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློགས་འདྲ་སྟེ། །རི་གཟར་འབབས་ཆུ་བཞིན་དུ་མྱུར་མགྱོགས་འགྲོ། །ཞེས་གསུངས་པ་ལྟར། ཕྱི་ནང་སྣོད་བཅུད་དགྲ་གཉེན་བར་མའི་འགྱུར་ལྡོག་གང་ལ་བསམ་ཀྱང་ངེས་པར་འཆི་ཞིང་། ནམ་འཆི་ཆ་མེད། འཆི་བའི་ཚེ་ལུས་ལོངས་སྤྱོད་ཉེ་འབྲེལ་ལ་སོགས་པ་གང་ཡང་རྗེས་སུ་མི་འབྲང་ཞིང་། ལས་དཀར་ནག་འབའ་ཞིག་གི་རྗེས་སུ་འབྲང་ནས་བདེ་སྡུག་གི་འབྲས་བུ་མི་བསླུ་བར་སྨིན་པའི་ཚུལ། རྒྱལ་པོ་ལ་གདམས་པའི་མདོ་ལས། དུས་ཀྱི་ཉེན་ཏེ་རྒྱལ་པོ་འགྲོ་གྱུར་ན། །ལོངས་སྤྱོད་མཛའ་དང་བཤེས་གཉེན་རྗེས་མི་འབྲང་། །སྐྱེས་བུ་དག་ནི་གང་ནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །ཞེས་གསུངས། དེ་ལྟ་བུའི་ལས་དང་ཉོན་མོངས་པའི་གཞན་དབང་ལ་བརྟེན་ནས་འཁོར་བའི་གནས་རིས་མཐོ་ད མན་གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན་ཁོ་ན་ལས་མ་འདས་སྟེ། འདུལ་བ་ལུང་ལས། སྲེད་སྲིད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་འཁོར་བ་བཞིན། །སྲིད་གསུམ་རྒ་དང་ནད་ཀྱིས་སྡུག་བསྔལ་འབད། །འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །ཞེས་གསུངས་པས་ན། །རང་གཞན་མཁའ་ཁྱབ་ཀྱི་ཡིད་ཅན་ཐམས་ཅད་སྡུག་བསྔལ་ཅན་གྱི་འཁོར་བ་ལས་ཐར་པའི་ཐབས་སུ་དམ་པའི་ཆོས་རྣམ་པར་དག་པ་ཞིག་བསྒྲུབ་དགོས། དེ་ལའང་། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས། གདུལ་བྱ་སེམས་ཅན་རྣམས་ཀྱིས་ཁམས་དང་། །དབང་པོ་དང་། བསམ་པ་དང་། བག་ལ་ཉལ་གྱི་རིམ་པ་དང་རྗེས་སུ་མཐུན་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་དེ་ཐམས་ཅད་ཀྱང་བསྡུ་ན་ཐེག་པ་དམན་པ་དང་། ཐེག་པ་ཆེན་པོ་གཉིས་སུ་འདུས་པ་ལས། འདིར་ནི་མགོན་པོ་བྱམས་པས། དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་དག་དང་། །ཡེ་ཤེས་བརྩོན་འགྲུས་བརྩམས་པ་དང་། །ཐབས་ལ་མཁས་པར་གྱུར་པ་དང་། །ཡང་དག་གྲུབ་པ་ཆེན་པོ་དང་། །སངས་རྒྱས་ཕྲིན་ལས་ཆེན་པོ་སྟེ། །ཆེན་པོ་འདི་དག་དང་ལྡན་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཅེས་གསུངས་པ་ལྟར་ཐེག་དམན་ལས་ཁྱད་ཆོས་བདུན་ལྡན་གྱི་སྒོ་ནས་ཁྱད་པར་དུ་འཕགས་པའི་ཐེག་པ་ཆེན་པོ་ཡིན། ཐེག་པ་ཆེན་པོ་ལའང་། ཇི་སྐད་དུ། རྡོ་རྗེ་རྩེ་མོ་ལས། མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེ་ཐེག་པའོ། །ཞེས་གསུངས་པ་ལྟར། རྒྱུ་ལམ་དུ་བྱེད་པ་ཕ་རོལ་ཏུ་ཕྱིན་པའི་ཐེག་པ་དང་། འབྲས་བུ་ལམ་དུ་བྱེད་པ་རིག་པ་འཛིན་པ་སྔགས་ཀྱི་ཐེག་པ་སྟེ། རྣམ་པ་གཉིས་སུ་ཡོད་པ་ལས། འདིར་ནི། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར་རྒྱུའི་ཐེག་པ་ལས་ཁྱད་ཆོས་བཞི་ལྡན་གྱི་སྒོ་ནས་ཁྱད་པར་དུ་འཕགས་པ་རིག་པ་འཛིན་པ་སྔགས་ཀྱི་ཐེག་པ་ཡིན། དེ་ལའང་རྒྱ་གར་འཕགས་པའི་ཡུལ་དུ་དེ་ལྟ་བུའི་དབྱེ་བ་མེད་ཀྱང་། གངས་ཅན་གྱི་ལྗོངས་འདིར་ལོ་ཙཱ་བའི་འགྱུར་སྔ་ཕྱིའི་བྱེ་བྲག་ལས་རྡོ་རྗེ་ཐེག་པ་གསར་རྙིང་གཉིས་སུ་སྒྲོ་བཏགས་པ་ལས། འདིར་ནི་ཕྱི་འགྱུར་རྡོ་རྗེ་ཐེག་པ་གསར་མ་ལས། ཁྱད་ཆོས་དྲུག་ལྡན་གྱི་སྒོ་ནས་ཁྱད་པར་དུ་འཕགས་པའི་སྔ་འགྱུར་རྡོ་རྗེ་ཐེག་པ་རྙིང་མ་ཡིན། དེ་ལའང་རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་མ་སྟེ་བརྒྱུད་པའི་བཀའ་སྲོལ་ཆེན་པོ་གསུམ་དུ་ཡོད་པ་ལས། ད་ལམ་འདིར་ནི། ཞེས་པའི་མཚམས། བཀའ་མ་དང་དག་སྣང་མ་སོ་སོའི་ཁྱད་ཆོས་སྦྱར་ཞིང་། འདིར་གཏེར་མའི་དབང་དུ་བྱས་ན། བཀའ་མ་ལས་བཀའ་བབས་ལུང་བསྟན་སྨོན་ལམ་དབང་བསྐུར་མཁའ་འགྲོ་གཏད་རྒྱ་སྟེ་ཁྱད་པར་གྱི་བརྒྱུད་པ་གསུམ་དང་། གཙོ་བོར་བརྒྱུད་ཐག་ཉེ་བས་བྱིན་རླབས་ཀྱི་ཚན་ཁ་ཆེ་ཞིང་། གཏེར་ཡིག་གི་དཔེ་དཔངས་མངའ་བས་ཁུངས་བཙུན་པ་དང་། གང་ལ་གང་འདུལ་གྱིས་དུས་དང་མཚམས་པར་མངོན་པར་སྣང་བའི་ཟབ་ལམ་ནུབ་པ་མེད་པས། ཁྱད་པར་དུ་འཕགས་པ་གཏེར་གྱི་ཕྱོགས་སུ་གཏོགས་པ་ཡིན། དེ་ལའང་བཀའ་སྲོལ་མི་འདྲ་བ་དུ་མ་ཞིག་ཡོད་པ་ལས། ད་ལམ་འདིར་སྐབས་སུ་བབ་པ་ནི། ཞེས་པའི་མཚམས། ཀློང་གསལ་གཏེར་བྱོན་ལྟ་བུ་ལ་མཚོན་ན། རིག་འཛིན་འགྱུར་མེད་རྡོ་རྗེའི་གཏེར་ལུང་ལས། །ལང་གྲོའི་སྤྲུལ་པ་པདྨ་དྲག་པོའི་མིང་༔ མདོ་ཁམས་ཕྱོགས་འབྱུང་དེ་ལ་གཏད་རྒྱ་གྱིས༔ ཅེས་དང་། གཏེར་ཆེན་ནུས་ལྡན་རྡོ་རྗེའི་ལུང་བྱང་ལས། བུ་འབོར་ཕྱོགས་སུ་པདྨ་མདོ་གླིང་ཞེས༔ དཔའ་བོ་ཐབས་ལྡན་གུར་དྲག་གདམས་པ་སྤེལ༔ ཐུགས་རྗེའི་ཕྱིན་རླབས་གཞན་ལས་ཁྱད་པར་འཕགས༔ དུས་འགོངས་དམ་ལོག་ནད་མཚོན་མུ་གེ་བཟློགཿ ཞེས་སོགས་རྡོ་རྗེའི་ལུང་གིས་དཔང་པོར་བྱས་པ་བཞིན། དུས་གསུམ་མཁྱེན་པ་དཔལ་ཨོ་རྒྱན་ཆོས་ཀྱི་རྒྱལ་པོའི་ཐུགས་ཀྱི་སྲས་མཆོག་ལང་གྲོ་ལོ་ཙཱ་བ་དཀོན་མཆོག་འབྱུང་གནས་དང་། པཎ་ཆེན་དྲི་མེད་བཤེས་གཉེན་གྱི་སྙན་བརྒྱུད་རྒྱ་མཚོའི་མངའ་བདག་རྨ་རིན་ཆེན་མཆོག་ཟུང་དུ་འཇུག་པའི་ཡེ་ཤེས་སྒྱུ་འཕྲུལ་དྲྭ་བའི་རོལ་གར། ལྔ་བརྒྱའི་ཐ་མར་པདྨ་དྲག་པོ་ཧེ་རུ་ཀ་དང་གཉིས་སུ་མེད་པའི་ཕྲིན་ལས་ཅན་གཏེར་ཆེན་ཆོས་ཀྱི་རྒྱལ་པོ་རིག་འཛིན་ཀློང་གསལ་སྙིང་པོའམ། པདྨ་མདོ་སྔགས་གླིང་པ་ཞེས་མཚན་ཉི་ཟླ་ལྟར་ཡོངས་སུ་གྲགས་པ་དེ་ཉིད་ཀྱིས་རྫུ་འཕྲུལ་རྡོ་རྗེའི་བཀོད་པ་ཟད་མི་ཤེས་པ་ལ་བརྟེན་ནས་ཟབ་གཏེར་རྒྱ་མཚོ་ལྟ་བུ་ཞིག་སྤྱན་དྲངས་ཏེ་སྐལ་ལྡན་རྣམས་སྨིན་གྲོལ་གྱི་ས་ལ་འགོད་པར་མཛད་པ་ལས། ཞེས་པ་ཡན་སྤྱིར་བཏང་ནས། བྱེ་བྲག་རྩ་གསུམ་གྱི་སྐོར་ལྟ་བུ་ལ། བོད་ཆེན་པོའི་ལྗོངས་ཀྱི་ཐིག་ལེ་གྲུབ་པའི་གནས་མཆོག་ཁ་མི་འགྱུར་རྡོ་རྗེའི་གསང་སྒྲོམ་ནས་བར་ཆད་མེད་པར་སྤྱན་དྲངས་པའི་རྩ་གསུམ་རྡོ་རྗེ་སྙིང་པོ་ཞེས་བྱིན་བརླབས་ཀྱི་ཚན་ཁ་གཞན་ལས་ཆེས་ཁྱད་པར་དུ་གྱུར་པའི༷་སྐོར༷་ཡིན། དེ་ལའང་རྩ་བ་དང་ཡན་ལག་གི་སྒྲུབ་སྐོར་གཉིས་ལ༷ས། རྩ་བའི་སྒྲུབ་པ་ཡི༷་དམ༷་དབང་ཆེན་རྟ་མཆོག་རོལ་པའི་དཀྱིལ་འཁོར་དུ། ཞེས་སོགས་སྐབས་ཐོབ་སྦྱར་ལ། སྨིན་བྱེད་ཀྱི་དབང་བསྐུར་བ་ཟབ་མོ་སྒྲུབས་པ་ལའང་། སྔོན་འགྲོ་སློབ་དཔོན་གྱི་བྱ་བ་དང་། དངོས་གཞི་སློབ་མ་ལ་བྱ་བ་རྣམ་པ་གཉིས་སུ་ཡོད་པ་ལས། བདག་ཉིད་ཀྱིས་བགྱི་བར་འོས་པའི་ཆོས་རྣམས་སྔོན་དུ་ལེགས་པར་གྲུབ་ཟིན་ནས། ད་ཁྱེད་རང་རྣམས་ཀྱིས་ངོ་སྐལ་དུ་གྱུར་བ་ལའང་མཎྜལ་ཕུལ་ཞིང་གསོལ་བ་འདེབས་པ་སོགས་སྔོན་དུ་འགྲོ་དགོས་པས། ཐོག་མར་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་སྤྱན་སྔར་བྱིན་རླབས་དབང་བསྐུར་གྱི་རིམ་པ་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། །ཅེས་བརྡ་སྦྱར་ལ་མཎྜལ་ཕུལ། དེ་ལྟར་མཎྜལ་ཕུལ་ནས། ས་ཕྱོགས་འདི་ཉིད་དག་པ་རབ་འབྱམས་ཡེ་ཤེས་ཀྱི་དཀྱིལ་འཁོར་ཆེན་པོར་གྱུར་པའི་ནང་དུ། སློབ་དཔོན་ཉིད་དུས་གསུམ་སངས་རྒྱས་ཐམས་ཅད་ཀྱི་ངོ་བོ་ལྷག་པའི་ལྷའི་རྣམ་པར་བཞུགས་པ་ལ་མི་ཕྱེད་དད་པའི་གདུང་ཤུགས་དྲག་པོས་ཕྱག་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་གདབས་པ་འདིའི་རྗེས་ཟློས་ལན་གསུམ་མཛོད། །རང་གཞུང་གི་གསོལ་འདེབས་བྱ། །དེ་ལྟར་གསོལ་བ་བཏབ་པས་བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་པས་མཁྱེན་བརྩེའི་སྒོ་ཕྱེ་ནས་བཀའ་ཡི་གནང་བ་སྦྱིན་པ་ནི་འདི་ལ་གསན་པས་ཁྱབ་པར་གདའ་སྟེ། ཞེས་མཚམས་སྦྱར་ལ་རང་གཞུང་གི་གནང་བ་སྦྱིན། དེ་ནས་རྒྱུད་དག་པར་བྱ་བའི་སླད་དུ། མདུན་གྱི་ནམ་མཁར་བླ་མ་དང་དཀྱིལ་འཁོར་གྱི་ལྷ་ཚོགས་ཐ་མི་དད་པ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་མངོན་སུམ་ལྟ་བུར་བཞུགས་པའི་སྤྱན་སྔར་སྐྱབས་སུ་འགྲོ་བ་དང་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམས་པའི་ཡིད་ཀྱིས་འདིའི་རྗེས་ཟློས་ལན་གསུམ་མཛོད། །རང་རང་གི་གཞུང་ལས་འབྱུང་བ་ལྟར་རམ། ཡང་ན། རྒྱུན་བཤགས་སྔོན་དུ་འགྲོ་བ་ཅན་གྱིས་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམ་པའི་ཡིད་ཀྱིས་འདིའི་རྗེས་ཟློས་ལན་གསུམ་མཛོད། །དཀོན་མཆོག་གསུམ་ལ་བདག་སྐྱབས་འཆི། །སོགས་ལན་གསུམ། སླར་ཡང་ཚོགས་ཞིང་དེ་རྣམས་ཀྱི་སྤྱན་སྔར་ཕྱི་སོ་སོར་ཐར་པའི་སྡོམ་པ། ནང་བྱང་ཆུབ་སེམས་དཔའི་བསླབས་པ་དང་། གསང་བ་རིག་པ་འཛིན་པ་སྔགས་ཀྱི་དམ་ཚིག་སྟེ་སྤྱི་དང་ཁྱད་པར་གྱི་སྡོམ་པ་གསུམ་པོ་ཚུལ་བཞིན་དུ་བཟུང་བར་བགྱིའོ་སྙམ་པའི་ཡིད་ཀྱིས་འདིའི་རྗེས་ཟློས་ལན་གསུམ་མཛོད། །རང་གཞུང་གི་སྡོམ་པ་ཟུང་ངམ། སྤྱི་ཙམ་དུ། བདེར་གཤེགས་སྲས་བཅས་བདག་ལ་དགོངས༔ རིག་པ་འཛིན་པ་བདག་གིས་ནི༔ བྱང་ཆུབ་སྙིང་པོར་མཆིས་ཀྱི་བར༔ སོ་སོར་ཐར་དང་བྱང་ཆུབ་སེམས༔ རིག་འཛིན་ནང་གི་སྡོམ་པའི་ཚོགས༔ མ་ལུས་ཡོངས་སུ་བཟུང་བར་བགྱི༔ ལན་གསུམ། ཡེ་ཤེས་དབབས་པའི་སྔོན་འགྲོ་དམ་བཞག་ཡོད་ན་འདིར་བྱ། དེ་ལྟར་རྒྱུད་དག་པར་བྱས་ནས། ནང་འཇུག་གི་དངོས་གཞི་དབང་གི་གཞི་བརྟན་པར་བྱེད་པ་ཡེ་ཤེས་དབབས་པ་ཡིན་པས། ཁྱེད་རང་རྣམས་ལུས་གནད་སྐྱིལ་ཀྲུངས་དྲང་པོར་བསྲངས་ངག་གནད་རླུང་ཁ་སྦྱོར་དུ་འཆིང་། སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། །ཨ་མྲྀ་ཏས་བསང་། སྭ་བྷཱ་ཝས་སྦྱང་། ཁྱེད་རང་རྣམས་ཀྱི་ཕུང་པོ་ཁམས་དང་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་སྦྱང་། སྟོང་པའི་ངང་ལས་སེམས་ཉིད་གདོད་ནས་སྤྲོས་པའི་མཐའ་ཐམས་ཅད་དང་བྲལ་བའི་རོལ་རྩལ་འོད་གསལ་སྒྱུ་མ་ལྟ་བུའི་སྣང་ཆ་ལྟའི་སྐུར་གྱུར་པ་ནི། རང་རང་གི་མངོན་རྟོགས་ལྟར་གསལ་གདབ་ལ། དེ་ལྟར་དུ་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་རྣམས་ཀྱིས་མཚན་པ་ལས་འོད་ཟེར་འཕྲོས་པས་བླ་མ་དང་དཀྱིལ་འཁོར་པའི་ཐུགས་བརྒྱུད་བསྐུལ། དེ་དག་གི་ཐུགས་ཀ་ནས་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས་པས་ཕྱོགས་བཅུ་དུས་བཞིའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མའི་ཚོགས་ཐམས་ཅད་ལྷག་པའི་ལྷའི་སྐུ་ཕྱག་རྒྱ། གསུངས་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་དང་བུ་ཡུག་འཚུབ་པ་བཞིན་སྤྱན་དྲངས་ཏེ་ཁྱེད་རང་རྣམས་ཀྱི་སྤྱི་བོ་ཚངས་པའི་སྒོ། བ་སྤུའི་བུ་ག །དབང་པོའི་སྒོ་རྣམས་ནས་རྡོ་ཚན་མོ་ལ་ཁ་བབས་པའམ། རྒྱ་མཚོ་ཆེན་པོ་ལ་ཆར་བབས་པ་བཞིན་སིབ་སིབ་ཐིམ་པས་རྒྱུད་བྱིན་གྱིས་རླབས་པའི་ཐུགས་མོས་མཛོད། །ཅེས་བརྡ་སྦྱར་ལ། རང་གཞུང་གི་བྱིན་འབེབས་སམ། བབས་དྲུག་གི་མཐར་རྩ་སྔགས་དང་། བཛྲ་ཛྙཱ་ན་ཨཱ་བེ་ཤ་ཡ་ཕེཾ་ཕེཾ་ཛ་ཛཿ ཛ་ཧཱུྃ་བཾ་ཧོཿ ཞེས་པས་བྱིན་དབབས། བྱིན་དབབས་པའི་ཡེ་ཤེས་པ་དེ་ཉིད་འདི་ནས་བྱང་ཆུབ་མ་ཐོབ་ཀྱི་བར་དུ་ཁྱེད་རང་རྣམས་ཀྱི་སྒོ་གསུམ་རྡོ་རྗེ་གསུམ་དང་དབྱེར་མེད་རོ་གཅིག་ཏུ་བརྟན་པར་བྱས་པའི་མོས་པ་མཛོད། ཏིཥྛ་བཛྲ། ཅེས་བརྗོད་མེ་ཏོག་འཐོར། དེ་ལྟར་ཡེ་ཤེས་དབབས་ཅིང་བརྟན་པར་བྱ་བ་སྔོན་དུ་སོང་ནས། དངོས་གཞིའི་དབང་བསྐུར་བ་ལའང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། སློབ་དཔོན་གསང་བ་ཤེས་རབ་དང་། དེ་མ་ཐག་པ་བཞི་པ་སྟེ། །ཞེས་གསུངས་པ་ལྟར་བདག་མདུན་དཀྱིལ་འཁོར་གྱི་ལྷ་ཚོགས་ཐ་མི་དད་པས་བུམ་གསང་ཤེས་རབ་ཡེ་ཤེས་བཞི་པ་སྟེ་དབང་བཞི་རིམ་པ་བཞིན་དུ་སྩོལ་བྱུང་སྙམས་པའི་མོས་པ་དུང་དུང་མཛོད་ཅིག །ཅེས་བརྡ་སྦྱར་ལ་དབང་བཞི་གཞུངས་ལྟར་དང་། ཡང་སྐུ་གསུང་ཐུགས་ཀྱི་དབང་བསྐུར་གྱི་རིགས་ལ། །དངོས་གཞི་བདག་མདུན་དཀྱིལ་འཁོར་གྱི་ལྷ་ཚོགས་ཐ་མི་དད་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་རྣམས་རིམ་པ་བཞིན་དུ་སོགས་སྦྱར་ལ་རང་གཞུང་ལྟར་བསྐུར། མཐར་དབང་བཞིའི་རིགས་ལ། དེ་ལྟར་ན་ཁྱེད་རྣམས་ཀྱིས་ཕྱི་ནང་གསང་བ་དེ་ཁོ་ན་ཉིད་ཀྱི་དཀྱིལ་འཁོར་དུ་དབང་བཞི་ཐོབ། ལུས་ངག་ཡིད་གསུམ་ཀྱི་སྒྲིབ་པ་བག་ཆགས་དང་བཅས་པ་སྦྱངས། གནས་སྐབས་སུ་ལམ་བཞི་བསྒོམ་པ་དབང་ཞིང་། མཐར་ཐུག་སྐུ་བཞིའི་གོ་འཕང་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །ཞེས་དང་སྐུ་གསུང་ཐུགས་དབང་ཀྱི་རིགས་ལ། དེ་ལྟར་ན་ཁྱེད་རྣམས་ཀྱི་བཅོམ་ལྡན་འདས་འདི་ཞེས་བྱ་བའི། སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་བསྐུར་བ་ཐོབ། ལུས་ངག་ཡིད་གསུམ་བྱ་བྱེད་དང་བཅས་པའི་སྒོ་ནས་བསགས་པའི་སྡིག་པ་དང་སྒྲིབ་པ་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱས། གནས་སྐབས་སུ་སྣང་གྲགས་རིག་གསུམ་རྡོ་རྗེ་གསུམ་གྱི་རྣམ་རོལ་ཏུ་བསྒོམ་པ་དང་། ཕྲིན་ལས་རབ་འབྱམས་ཀྱིས་གཞན་ཕན་སྒྲུབ་པ་ལ་དབང་། མཐར་ཐུག་ཡེ་ཤེས་ལྷའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་དང་ནུས་པ་མཉམ་པར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། །ཅེས་དག་པ་བརྗོད། དེ་ནས་མཐའ་རྟེན་ཤིས་པར་བྱ་བའི་སླད་དུ། བཀྲ་ཤིས་པའི་རྫས་བརྒྱད་དང་། རྟགས་བརྒྱད། རྒྱལ་སྲིད་རིན་པོ་ཆེ་སྣ་བདུན་རྣམས་སོ་སོའི་བྱེད་ལས་གྲུབ་པའི་དངོས་པོ་ཅན་ལག་ཏུ་གཏད་པ་ལ་བརྟེན་ནས་ཁམས་གསུམ་ཆོས་ཀྱི་རྒྱལ་པོར་མངའ་གསོལ་བའི་མོས་པ་མཛོད། །རྫས་བརྒྱད་གཏད་ལ། ཧྲཱི༔ དུརྦས་ཚེ་འཕེལ་ཡུངས་ཀར་བགེགས་རྣམས་འཇོམས། །བིལ་བས་དོན་འགྲུབ་གི་ཝང་སྡུག་བསྔལ་ཞི། །ཞོ་ཡིས་དོན་རྟོགས་ལི་ཁྲིས་ཆོས་སྲིད་བརྟན། །མེ་ལོང་སྒྲིབ་དག་དུང་གིས་ཆོས་སྒྲ་སྒྲོགས། །རྒྱལ་བའི་བྱིན་རླབས་བཀྲ་ཤིས་རྫས་བརྒྱད་ཀྱིས། །སྐལ་ལྡན་སློབ་མ་ཁྱོད་ལ་དབང་བསྐུར་བས། །དུས་རྣམས་རྟག་ཏུ་ཤིན་ཏུ་བཀྲ་ཤིས་ཤོག །མངྒ་ལཾ་དྲ་བྱ་ཨ་བྷི་ཥཱིཉྩ་ཧཱུྃ། །རྟགས་བརྒྱད་གཏད་ལ། །རྒྱལ་བའི་དབུ་ལ་གསེར་གདུགས་སྤྱན་ལ་ཉ། །ཚེམས་ལ་དུང་དཀར་ལྗགས་ལ་པདྨ་དང་། །མགྲིན་པར་བུམ་པ་ཕྱག་ཞབས་འཁོར་ལོས་མཚན། །སྐུ་ལ་རྒྱལ་མཚན་ཐུགས་ལ་དཔལ་བེའུ། །ཕུན་སུམ་ཚོགས་པའི་བཀྲ་ཤིས་རྟགས་བརྒྱད་ཀྱིས། །དེངས་འདིར་སྐལ་ལྡན་སློབ་མར་དབང་བསྐུར་བས། །དགེ་ལེགས་ཡོན་ཏན་ཕུན་སུམ་ཚོགས་པར་ཤོག །ཨཥྟ་མངྒ་ལཾ་ཨ་བྷི་ཥཱིཉྩ་ཧཱུྃ། །རྒྱལ་སྲིད་སྣ་བདུན་གཏད་ལ། །རྩིབས་སྟོང་འཁོར་ལོ་དགོས་འདོད་ཡིད་བཞིན་ནོར། །འདོད་འབྱུང་བཙུན་མོ་འབྱོར་ལྡན་བློན་པོ་དང་། །སྟོབས་ཆེན་གླང་པོ་རྫུ་འཕྲུལ་ཅང་ཤེས་རྟ། །ཕ་རོལ་གཡུལ་ལས་རྒྱལ་བའི་དམག་དཔོན་ཏེ། །རྒྱལ་སྲིད་རིན་ཆེན་བདུན་གྱིས་དབང་བསྐུར་བས། །ཚེ་དཔལ་མངའ་ཐང་ལོངས་སྤྱོད་གོང་འཕེལ་ནས། །ཚོགས་གཉིས་མི་ནུབ་རབ་ཏུ་བརྟན་གྱུར་ཅིག །སཔྟ་རཏྣ་ཨ་བྷི་ཥཱིཉྩ་ཧཱུྃ། །ཞེས་སམ་ཡང་ན། སྔོན་ཚེ་བཅོམ་ལྡན་རྒྱལ་བའི་དབང་པོ་ལ། །བསོད་ནམས་མཐུ་ལྡན་ཚངས་པ་ལ་སོགས་ཀྱིས། །ཕུལ་བའི་ཡོན་ཏན་རྫས་མཆོག་བཀྲ་ཤིས་སྟེ། །དེང་འདིར་སྐལ་ལྡན་ཁྱོད་ལ་དབང་བསྐུར་རོ། །མངྒ་ལཾ་དྲ་བྱ་ཨ་བྷི་ཥིཉྩ་ཧཱུྃ། །སངས་རྒྱས་བསོད་ནམས་རྫོགས་པའི་མཚན་དཔེ་ལས། །ལེགས་པར་བྱུང་བའི་བཀྲ་ཤིས་རྟགས་བརྒྱད་འདིས། །དེང་འདིར་སྐལ་ལྡན་ཁྱོད་ལ་དབང་བསྐུར་བས། །བཀྲ་ཤིས་ཡོན་ཏན་ཕུན་སུམ་ཚོགས་པར་ཤོག །ཨཥྟ་མངྒ་ལཾ་ཨ་བྷི་ཥིཉྩ་ཧཱུྃ། །འཁོར་ལོའི་བསྒྱུར་རྒྱལ་མཐུས་བྱུང་རྒྱལ་སྲིད་བདུན། །དེང་འདིར་སྐལ་ལྡན་ཁྱོད་ལ་མངའ་གསོལ་ཞིང་། །དབང་མཆོག་བསྐུར་བའི་བསོད་ནམས་ལས་ཚོགས་སྟེ། །འཁོར་ལོས་བསྒྱུར་བའི་ཡོན་ཏན་ཐོབ་པར་ཤོག །སཔྟ་རཏྣ་ཨ་བྷི་ཥིཉྩ་ཧཱུྃ། །བསྡུ་ན། སྔོན་ཚེ་སྟོན་པས་བྱིན་རླབས་རྫས་མཆོག་བརྒྱད། །རྒྱལ་བའི་མཚན་དཔེ་ལས་བྱུང་བཀྲ་ཤིས་རྟགས། །བསོད་ནམས་མཐུ་ལས་བྱུང་བའི་རྒྱལ་སྲིད་བདུན། །དེང་འདིར་སྐལ་ལྡན་སློབ་མར་དབང་བསྐུར་བས། །སྲིད་ཞིའི་བདེ་ལེགས་ཕུན་སུམ་ཚོགས་པར་ཤོག །མངྒ་ལཾ་རཏྣ་ཨ་བྷི་ཥིཉྩ་ཧཱུྃ། །སླར་ཡང་ཤིས་པར་བྱ་བའི་སླད་དུ། མདུན་གྱི་ནམ་མཁའི་གནས་སུ་ཕྱོགས་དུས་ཀྱི་རྒྱལ་བ་སྲས་དང་བཅས་པ་རྣམས་དང་། ལྷ་དང་དྲང་སྲོང་བདེན་ཚིག་གྲུབ་པའི་ཚོགས་ཀྱིས་སློབ་དཔོན་དང་ལྷན་ཅིག་ཏུ་ཤིས་པ་བརྗོད་པའི་གླུ་དབྱངས་དི་རི་རི་སྒྲོགས་ཅིང་མེ་ཏོག་མནྡཱར་བའི་ཆར་ཆེན་པོ་ཕབས་པས་ཤིན་ཏུ་བཀྲ་ཤིས་པར་བྱས་པའི་ཐུགས་མོས་མཛོད། །ཅེས་བརྡ་སྦྱར་ལ་ཤིས་བརྗོད་རྒྱས་བསྡུས་ཇི་ལྟར་རིགས་པ་བྱ། །དེས་དབང་གི་དངོས་གཞི་མཐའ་རྟེན་དང་བཅས་པ་ལེགས་པར་གྲུབ་ནས། གནས་སྐབས་དེ་དག་ཏུ་ཐོབ་ཅིང་ཁས་བླངས་བའི་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་དུ་བགྱིའོ་སྙམས་པས་འདིའི་རྗེས་ཟློས་ལན་གསུམ་མཛོད། །གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །དབང་བསྐུར་ཟབ་མོ་ལེགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། །མཎྜལ་ཕུལ་ནས། དེ་ལྟར་མཎྜལ་དུ་མ་ཟད་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་ཐམས་ཅད་ཀྱང་འཁོར་ལོའི་བསྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ཏེ་ཕུལ་ན་ཆ་ཤས་ནས་བཞེས་ལ་ལོངས་སྤྱོད་དུ་གསོལ་སྙམས་པས་འདིའི་རྗེས་ཟློས་ལན་གསུམ་མཛོད། །དེང་ནས་བརྩམས་ཏེ་བདག་བྲན་དུ། །ཁྱོད་ལ་བདག་ནི་འབུལ་ལགས་ན། །ཁྱོད་ཀྱིས་སློབ་མར་བཟུང་བ་དང་། །ཆ་ཤས་ཀྱིས་ཀྱང་སྤྱད་དུ་གསོལ། །དེ་རྣམས་ཀྱི་སྒོ་ནས་ལྷག་པའི་ལྷའི་འདི་ཞེས་བྱ་བའི། དཀྱིལ་འཁོར་དུ་དབང་བསྐུར་ལ་ཟབ་མོ་ལེགས་པར་གསན་པ་ཡིན་པས། དེ་ལས་བྱུང་བའི་དགེ་བའི་རྩ་བས་མཚོན། དུས་གསུམ་དུ་བསགས་པའི་དགེ་བའི་རྩ་བ་ཅི་མཆིས་པ་རྣམས་རང་གཞན་མཁའ་ཁྱབ་སེམས་ཅན་ཐམས་ཅད་ཀྱི་དོན་དུ་ཟག་པ་མེད་པའི་བསྔོ་བས་རྒྱས་འདེབས་མཛད་པར་ཞུ། །བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་བཏང་། སློབ་དཔོན་གྱི་རྗེས་ཀྱི་ཆོ་ག་ལས་གཞུང་ལྟར་བྱའོ། །དེ་རྣམས་ཀྱིས་ནི་དོན་དབང་མདོར་བསྡུས་པའི་ཚུལ་གྱིས་བསྐུར་བའི་མཚམས་སྦྱོར་འཇུག་པ་དེ་སྙིང་པོར་དྲིལ་བ་སྟེ། འདི་ཙམ་གྱིས་ཀྱང་ལས་དང་པོའི་བློ་ཅན་རྣམས་ལ་ཅུང་ཟད་ཕན་པའི་སྐབས་རྙེད་པར་འགྱུར་ལ་གཞན་དུ་སྟ་གོན་དང་འཇུག་པ་སྔོན་དུ་འགྲོ་བའི་དབང་རྒྱས་པར་བསྐུར་པའི་ཚུལ་ནི་ལོགས་སུ་རྟོགས་པར་བྱ་བ་ཁོ་ནའོ། །སྨིན་བྱེད་མཚམས་སྦྱོར་ཟླ་བའི་ས་འཛིན་གྱིས། །ངག་གི་ཆུ་གཏེར་བདུད་རྩིར་སྲུབས་པ་ལས། །བྲལ་སྨིན་ནོར་བུའི་སྙེ་མ་གཡུར་ཟ་བའི། །དགེ་མཚན་འཇིག་རྟེན་གསུམ་ན་འབར་གྱུར་ཅིག །དེ་ལྟར་སྔ་འགྱུར་རྡོ་རྗེ་ཐེག་པའི་གཏེར་མའི་ཕྱོགས་སྤྱི་དང་། རིག་འཛིན་ཀློང་གསལ་སྙིང་པོའི་ཟབ་གཏེར་རྣམས་ལ་ཁྱད་པར་དུ་སྦྱར་བའི་དབང་བསྐུར་ཕྲན་ བུའི་རིགས་ཀྱི་བར་མཚམས་རྣམས་སུ་གླེངས་པར་འོས་པའི་གཏམ་ཉུང་ངུ་འདི་ཡང་། །གསང་བདག་རྡོ་རྗེ་འཛིན་པ་ཆེན་པོ་སོགས་ཡོངས་འཛིན་དམ་པ་རྣམས་ཀྱི་གསུངས་དང་གསུངས་རབ་ལས་བཏུས་ཏེ་ཤཱཀྱའི་དགེ་སློང་མཚོ་སྐྱེས་བླ་མ་དགྱེས་པའི་འབངས་ཀྱིས་སྦྱར་བ་ཤིན་ཏུ་དགེ་ཤིང་བཀྲ་ཤིས་པར་གྱུར་ཅིག །སརྦ་དཱ་ཤྲེ་ཡོ་བྷ་ཝ་ཏུ། ། ༈

[edit]

snga 'gyur rdo rje theg pa'i dbang bskur spyi la 'jug pa'i mtshams sbyor blo gsal ngag gi 'dod 'jo/__ @#/_/snga 'gyur rdo rje theg pa'i dbang bskur spyi la 'jug pa'i mtshams sbyor nyung ngur bsdus pa blo gsal ngag gi 'dod 'jo ces bya ba bzhugs so//__//_ srid zhi'i dge mtshan bdud rtsi'i do shal ni/__/snying rje'i zla ba gzhon nu la chags pas/__/grub gnyis ngal 'tshos yid can gdung sel ba/__/khyab bdag rdo rje sems dpas dge legs mdzod/__de la 'dir dbang thob cing dam tshig la gnas pa'i sngags pas bsnyen bsgrubs las su rung ba sngon du song nas/__/zang zing med pa'i byams pa dang /__'khor ba las sgrol 'dod kyi snying rje chen po sogs gzhan la gcig tu phan pa dang bde ba'i yid kyis gnas skabs dang mthar thug gi dngos grub rlab po che'i gnas su dbugs dbyung ba'i slad/__rdo rje'i slob ma rnams dkyil 'khor chen por 'jug cing smin par 'dod pas/__gnas dben zhing yid dang mthun par stegs bu'i khar lhag pa'i lha gang la brten pa'i dkyil 'khor dang /__dbang rdzas/__mchod pa'i yo byad sogs ma tshang ba med pa 'du byas nas bdag mdun dbyer med kyi bskyed bzlas dang /__rnam bum la dmigs kyis bsal ba'i bzlas pa/__las bum bsgrubs pa bcas kyi mthar rig pa'i me tog dor ba tsam gyis bdag nyid 'jug pa dang /__slob ma 'jug par gsol ba gdab pa rnams grub nas/__sgrubs bya rnams gral la 'khod par/__las bum thogs te/__hrIH__bder gshegs rgyal ba rnams kyi thugs rje'i chus/__/skal ldan slob ma'i lus ngag yid gsum la/__/gnas pa'i nyon mongs bag chags dri ma'i tshogs/__/bkru bar bgyi'o byang zhing dag gyur cig__/las sngags dang yi ge brgya pa sogs kyi mthar/__rdo rje slob ma rnams kyis tshe 'khor ba thog ma med pa nas bsags pa'i las dang nyon mongs pa sdig pa dang sgrib pa thams shIn+taM ku ru ye swA hA/__/ces brjod cing khrus bya/__de nas bgegs gtor btang ba ni/__/rang nyid skad cig gis dbang chen he ru kar gsal ba'i thugs ka nas 'od zer 'phros pas nam mkha' me rlung 'khrugs pa'i dur khrod du khro bo'i rgyal po rta mgrin ye shes pa dpa' brjid kyi nyams dang ldan par gyur ba oM badz+ra sa mA ya dza dzaH__zhes pas spyan drangs te bdag dang gnyis med kyi nga rgyal bskyed/__hU~MH__phyogs bzhi mtshams bzhi steng 'og thams cad dang /__sa 'og sa steng sa blar rgyu ba yiH__bgegs dang log 'dren lan chags 'byung po'i tshogasaH__bgegs 'dul khro rgyal 'bar ba'i bka' byung gi:__skad cig yud tsam zhig gis 'dir khug laH__bdag gis bsgo ba'i bka' la nyan par byos:__badz+ra TAk+kirA dza hU~M dzaH__dzaHhU~M ba~M hoH__badz+ra ang+ku sha dzaHsa/__bgegs dang log 'dren 'byung po thams cad 'dus par bsam/__gtor ma las sngags sam/__/oM badz+ra yak+Sha hU~M/__gis bsang /__swa b+hA was sbyang /__stong pa'i ngang las trAMH__las rin po che'i snod yangs shing rgya che ba'i nang du lan chags bgegs kyi gtor ma kha dog dri ro nus pa phun sum tshogs pa/__nam mkha' las 'phang mtho ba/__rgya mtsho las gting zab pa/__rtsi shing las lhun stug pa/__zhing rdul las grangs mang ba/__rang rang la gang mkho ba'i 'dod 'byung gi longs spyod zad mi shes pa'i gter chen po gcig tu gyur par bsams la oM AHhU~M hoHsa brlabs/__oM sarba big+h+nan na mas+sarba ta thA ga ta b+h+yo bi shwa sogs kyis bsngos/__hU~M hU~M hU~MH__nga ni dbang chen khros pa'i sku:__khams gsum 'di na su yang rung :__gsang sngags lta bar mi dbang ba'iH__log par lta ba phyir dengs shigaH__na mo/__bla na ma mchis pa'i rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas kyi=__chos kyi=__dge 'dun gyi=__chos nyid rnam par dag pa'i bden pa dang /__chos can rgyu 'bras bslu ba med pa'i bden pa dang /__khyad par du'ang yi dam dbang chen he ru ka'i lha tshogs bka' sdod phyag brnyan sprul pa yang sprul dang bcas pa rnams kyi bden pa dang /__bden pa chen po'i byin gyi rlabs kyis/__dengs 'dir rdo rje slob ma 'di rnams la smin byed kyi dbang bskur zab mo bgyi ba dang /__lus ngag yid gsum tshe srog bsam sbyor dang bcas pa la bar du gcod cing glags lta ba'i 'byung po gdon bgegs kyi rigs gang yin pa de dag thams cad mchod sbyin gyi gtor ma rgya chen po byin pa 'dis tshims par gyis la sa'i phyogs 'dir ma gnas par so so rang rang gi gnas su bde bar dengs shig__/gal lte mi 'gro zhing 'dus par gyur na bdag nyid dbang chen khro bo'i rgyal po thugs khros te sprul pa'i khro tshogs grangs med pas lus ngag yid gsum thal ba'i rdul phran bzhin du brlags par gdon mi za'o/__/oM hrIHpad+mAn+ta kr-i ta badz+ra kro d+hi h+ya g+h+rI wa hu lu hu lu hU~M pha?T/__oM sum+b+ha ni sogs brjod cing bskrad/__gu gul gyis bdug__/yungs kar gyi brabs/__gtor ma phyi rol du bskyal/__hrIH__/phyi snod gzhal yas nang bcud lhaH__thabs shes nyi zla'i ga'u dang :__phyi rol mtshon cha me ri'i gur:__srung ba'i tshogs khang lhun gyis grub/__b+h+rU~M badz+ra kro d+ha rak+Sha rak+Sha hU~M:__slob dpon gyi thugs ka nas spros pa'i khro tshogs grangs med pas bgegs rnams rgya mtsho'i pha mthar phyir bskrad/__'od zer tshur 'dus pa las byung ba'i thar pa chen po'i gzhal yas khang tshad dang mtshan nyid thams cad yongs su rdzogs pa'i 'og thams cad rdo rje'i sa gzhi/__khor yug thams cad rdo rje'i rwa ba dang dra ba/__steng thams cad rdo rje'i gur dang bla bre/__phyi rol thams cad ye shes kyi me dpung kha dog lnga ldan du 'bar ba'i klong du rdo rje'i khro bo 'chol pa'i tshogs dang /__phyag mtshan dang mtshon cha sna tshogs pas gtams pa'i srung ba'i 'khor lo cis kyang mi chod mi shig par gyur pa la/__phyogs bcu dus bzhi'i rgyal ba sras dang bcas pa rnams dang /__bden tshig grub pa'i lha dang drang srong rig pa 'dzin pa'i tshogs kyis rab tu gnas shing rab tu brtan par byas pa'i mos pa mdzod/__/rten 'brel snying po brjod cing me tog 'thor/__/de nas las rdor gyis me tog bkye bsdu bya zhing /__slob dpon gyis/__'o na/__nam mkha' dang mnyam pa'i sems can thams cad kyi don du bla na med pa yang dag par rdzogs pa'i sangs rgyas kyi go 'phang rin po che thob par bya/__de'i ched du smin byed dbang bskur gyi rim pa zab mo gsan la don tshul bzhin du nyams su blangs bar bgyi'o snyam pa byang chub kyi mchog tu thugs bskyed pa dang /__chos gsan pa'i kun tu spyod pa'ang theg pa chen po'i mdo rgyud bstan bcos dri ma med pa rnams nas ji ltar 'byung ba bzhin legs par gsal btab ste gsan 'tshal/__/de la 'dir gang gsan par bya ba'i chos ni/__slob dpon chen po zhi ba lhas/__/dal 'byor 'di ni shin tu rnyed par dka'/__/skyes bu'i don sgrub thob par gyur pa la/__/gal te 'di la phan pa ma bsgrub na/__/phyis 'di yang dag 'byor par ga la 'gyur/__/zhes gsungs pa ltar/__da res rang re rnams kyis yid bzhin kyi nor bu lag tu lon pa'i dpes brgya stong gi char yang mi phod cing rnyed dka' la phan yon bsam gyis mi khyab pa dang ldan pa'i dal 'byor gyi mi lus rin po che 'di lta bu thob tu zin kyang /__mdo rgya che rol pa las/__srid gsum mi rtag ston ka'i sprin dang 'dra/__/'gro ba'i skye 'chi gar la blta dang mtshungs/__/skyes bu'i tshe 'gro nam mkha'i glogs 'dra ste/__/ri gzar 'babs chu bzhin du myur mgyogs 'gro/__/zhes gsungs pa ltar/__phyi nang snod bcud dgra gnyen bar ma'i 'gyur ldog gang la bsam kyang nges par 'chi zhing /__nam 'chi cha med/__'chi ba'i tshe lus longs spyod nye 'brel la sogs pa gang yang rjes su mi 'brang zhing /__las dkar nag 'ba' zhig gi rjes su 'brang nas bde sdug gi 'bras bu mi bslu bar smin pa'i tshul/__rgyal po la gdams pa'i mdo las/__dus kyi nyen te rgyal po 'gro gyur na/__/longs spyod mdza' dang bshes gnyen rjes mi 'brang /__/skyes bu dag ni gang nas gar 'gro yang /__/las ni grib ma bzhin du rjes su 'brang /__/zhes gsungs/__de lta bu'i las dang nyon mongs pa'i gzhan dbang la brten nas 'khor ba'i gnas ris mtho da_man gang du skyes kyang sdug bsngal gsum gyi rang bzhin kho na las ma 'das ste/__'dul ba lung las/__sred srid ma rig dbang gis skye bo rnams/__/mi dang lha dang ngan song rnam gsum po/__/'gro ba lnga po dag tu mi mkhas 'khor/__/dper na rdza mkhan 'khor lo 'khor ba bzhin/__/srid gsum rga dang nad kyis sdug bsngal 'bad/__/'di na 'chi me rab 'bar mgon med de/__/srid las byung la 'gro ba rtag tu rmongs/__/bum par chud pa'i bung ba 'khor ba bzhin/__/zhes gsungs pas na/__/rang gzhan mkha' khyab kyi yid can thams cad sdug bsngal can gyi 'khor ba las thar pa'i thabs su dam pa'i chos rnam par dag pa zhig bsgrub dgos/__de la'ang /__bdag cag gi ston pa thabs mkhas la thugs rje chen po dang ldan pa de nyid kyis/__gdul bya sems can rnams kyis khams dang /__/dbang po dang /__bsam pa dang /__bag la nyal gyi rim pa dang rjes su mthun par dam pa'i chos kyi bdud rtsi bsam gyis mi khyab pa zhig gsungs pa de thams cad kyang bsdu na theg pa dman pa dang /__theg pa chen po gnyis su 'dus pa las/__'dir ni mgon po byams pas/__dmigs pa che ba nyid dang ni/__/de bzhin sgrub pa gnyis dag dang /__/ye shes brtson 'grus brtsams pa dang /__/thabs la mkhas par gyur pa dang /__/yang dag grub pa chen po dang /__/sangs rgyas phrin las chen po ste/__/chen po 'di dag dang ldan phyir/__/theg chen zhes ni nges par brjod/__/ces gsungs pa ltar theg dman las khyad chos bdun ldan gyi sgo nas khyad par du 'phags pa'i theg pa chen po yin/__theg pa chen po la'ang /__ji skad du/__rdo rje rtse mo las/__mtshan nyid rgyu yi theg pa dang /__/'bras bu rdo rje theg pa'o/__/zhes gsungs pa ltar/__rgyu lam du byed pa pha rol tu phyin pa'i theg pa dang /_'bras bu lam du byed pa rig pa 'dzin pa sngags kyi theg pa ste/__rnam pa gnyis su yod pa las/__'dir ni/__tshul gsum sgron me las/__don gcig na yang ma rmongs dang /__/thabs mang dka' ba med pa dang /__dbang po rnon po'i dbang byas pas/__/sngags kyi theg pa khyad par 'phags/__/zhes gsungs pa ltar rgyu'i theg pa las khyad chos bzhi ldan gyi sgo nas khyad par du 'phags pa rig pa 'dzin pa sngags kyi theg pa yin/__de la'ang rgya gar 'phags pa'i yul du de lta bu'i dbye ba med kyang /__gangs can gyi ljongs 'dir lo tsA ba'i 'gyur snga phyi'i bye brag las rdo rje theg pa gsar rnying gnyis su sgro btags pa las/__'dir ni phyi 'gyur rdo rje theg pa gsar ma las/__khyad chos drug ldan gyi sgo nas khyad par du 'phags pa'i snga 'gyur rdo rje theg pa rnying ma yin/__de la'ang ring brgyud bka' ma/__nye brgyud gter ma/__zab mo dag snang ma ste brgyud pa'i bka' srol chen po gsum du yod pa las/__da lam 'dir ni/__zhes pa'i mtshams/__bka' ma dang dag snang ma so so'i khyad chos sbyar zhing /__'dir gter ma'i dbang du byas na/__bka' ma las bka' babs lung bstan smon lam dbang bskur mkha' 'gro gtad rgya ste khyad par gyi brgyud pa gsum dang /_gtso bor brgyud thag nye bas byin rlabs kyi tshan kha che zhing /__gter yig gi dpe dpangs mnga' bas khungs btsun pa dang /__gang la gang 'dul gyis dus dang mtshams par mngon par snang ba'i zab lam nub pa med pas/__khyad par du 'phags pa gter gyi phyogs su gtogs pa yin/__de la'ang bka' srol mi 'dra ba du ma zhig yod pa las/__da lam 'dir skabs su bab pa ni/__zhes pa'i mtshams/__klong gsal gter byon lta bu la mtshon na/__rig 'dzin 'gyur med rdo rje'i gter lung las/__/lang gro'i sprul pa pad+ma drag po'i ming :__mdo khams phyogs 'byung de la gtad rgya gyis:__ces dang /__gter chen nus ldan rdo rje'i lung byang las/__bu 'bor phyogs su pad+ma mdo gling zhes:__dpa' bo thabs ldan gur drag gdams pa spel:__thugs rje'i phyin rlabs gzhan las khyad par 'phags:__dus 'gongs dam log nad mtshon mu ge bzlogaH__zhes sogs rdo rje'i lung gis dpang por byas pa bzhin/__dus gsum mkhyen pa dpal o rgyan chos kyi rgyal po'i thugs kyi sras mchog lang gro lo tsA ba dkon mchog 'byung gnas dang /__paN chen dri med bshes gnyen gyi snyan brgyud rgya mtsho'i mnga' bdag rma rin chen mchog zung du 'jug pa'i ye shes sgyu 'phrul drwa ba'i rol gar/__lnga brgya'i tha mar pad+ma drag po he ru ka dang gnyis su med pa'i phrin las can gter chen chos kyi rgyal po rig 'dzin klong gsal snying po'am/__pad+ma mdo sngags gling pa zhes mtshan nyi zla ltar yongs su grags pa de nyid kyis rdzu 'phrul rdo rje'i bkod pa zad mi shes pa la brten nas zab gter rgya mtsho lta bu zhig spyan drangs te skal ldan rnams smin grol gyi sa la 'god par mdzad pa las/__zhes pa yan spyir btang nas/__bye brag rtsa gsum gyi skor lta bu la/__bod chen po'i ljongs kyi thig le grub pa'i gnas mchog kha mi 'gyur rdo rje'i gsang sgrom nas bar chad med par spyan drangs pa'i rtsa gsum rdo rje snying po zhes byin brlabs kyi tshan kha gzhan las ches khyad par du gyur pa'iX skoraX yin/__de la'ang rtsa ba dang yan lag gi sgrub skor gnyis laXs/_rtsa ba'i sgrub pa yiX dmaX dbang chen rta mchog rol pa'i dkyil 'khor du/__zhes sogs skabs thob sbyar la/__smin byed kyi dbang bskur ba zab mo sgrubs pa la'ang /__sngon 'gro slob dpon gyi bya ba dang /__dngos gzhi slob ma la bya ba rnam pa gnyis su yod pa las/__bdag nyid kyis bgyi bar 'os pa'i chos rnams sngon du legs par grub zin nas/__da khyed rang rnams kyis ngo skal du gyur ba la'ang maN+Dal phul zhing gsol ba 'debs pa sogs sngon du 'gro dgos pas/__thog mar bla ma dang dkyil 'khor gyi gtso bo tha mi dad pa'i spyan sngar byin rlabs dbang bskur gyi rim pa zab mo zhu ba'i yon du dmigs te maN+Dal zhig phul mdzod/__/ces brda sbyar la maN+Dal phul/__de ltar maN+Dal phul nas/__sa phyogs 'di nyid dag pa rab 'byams ye shes kyi dkyil 'khor chen por gyur pa'i nang du/__slob dpon nyid dus gsum sangs rgyas thams cad kyi ngo bo lhag pa'i lha'i rnam par bzhugs pa la mi phyed dad pa'i gdung shugs drag pos phyag snyim pa me tog dang bcas pas thal mo sbyar te gsol ba gdabs pa 'di'i rjes zlos lan gsum mdzod/__/rang gzhung gi gsol 'debs bya/__/de ltar gsol ba btab pas bla ma dang dkyil 'khor gyi gtso bo dbyer med pas mkhyen brtse'i sgo phye nas bka' yi gnang ba sbyin pa ni 'di la gsan pas khyab par gda' ste/__zhes mtshams sbyar la rang gzhung gi gnang ba sbyin/__de nas rgyud dag par bya ba'i slad du/__mdun gyi nam mkhar bla ma dang dkyil 'khor gyi lha tshogs tha mi dad pa la phyogs bcu dus bzhi'i skyabs yul ma tshang ba med pas bskor ba mngon sum lta bur bzhugs pa'i spyan sngar skyabs su 'gro ba dang byang chub mchog tu sems bskyed par bgyi'o snyams pa'i yid kyis 'di'i rjes zlos lan gsum mdzod/__/rang rang gi gzhung las 'byung ba ltar ram/__yang na/__rgyun bshags sngon du 'gro ba can gyis byang chub mchog tu sems bskyed par bgyi'o snyam pa'i yid kyis 'di'i rjes zlos lan gsum mdzod/__/dkon mchog gsum la bdag skyabs 'chi/__/sogs lan gsum/__slar yang tshogs zhing de rnams kyi spyan sngar phyi so sor thar pa'i sdom pa/__nang byang chub sems dpa'i bslabs pa dang /__gsang ba rig pa 'dzin pa sngags kyi dam tshig ste spyi dang khyad par gyi sdom pa gsum po tshul bzhin du bzung bar bgyi'o snyam pa'i yid kyis 'di'i rjes zlos lan gsum mdzod/__/rang gzhung gi sdom pa zung ngam/__spyi tsam du/__bder gshegs sras bcas bdag la dgongs:__rig pa 'dzin pa bdag gis ni:__byang chub snying por mchis kyi bar:__so sor thar dang byang chub sems:__rig 'dzin nang gi sdom pa'i tshogs:__ma lus yongs su bzung bar bgyi:__lan gsum/__ye shes dbabs pa'i sngon 'gro dam bzhag yod na 'dir bya/__de ltar rgyud dag par byas nas/__nang 'jug gi dngos gzhi dbang gi gzhi brtan par byed pa ye shes dbabs pa yin pas/__khyed rang rnams lus gnad skyil krungs drang por bsrangs ngag gnad rlung kha sbyor du 'ching /__sems kyi gnad gzhan du ma yengs par dmigs pa 'di bzhin du mdzod/__/a mr-i tas bsang /__swa b+hA was sbyang /__khyed rang rnams kyi phung po khams dang skye mched kyis mtshon pa'i ma dag pa'i snang ba thams cad mi dmigs te stong pa nyid du sbyang /__stong pa'i ngang las sems nyid gdod nas spros pa'i mtha' thams cad dang bral ba'i rol rtsal 'od gsal sgyu ma lta bu'i snang cha lta'i skur gyur pa ni/__rang rang gi mngon rtogs ltar gsal gdab la/__de ltar du gsal ba'i spyi bor oM dkar po/__mgrin par AHdmar po/__thugs kar hU~M sngon po rnams kyis mtshan pa las 'od zer 'phros pas bla ma dang dkyil 'khor pa'i thugs brgyud bskul/__de dag gi thugs ka nas 'od zer gyi tshogs bsam gyis mi khyab pa 'phros pas phyogs bcu dus bzhi'i sangs rgyas dang byang chub sems dpa' dpa' bo dang rnal 'byor ma'i tshogs thams cad lhag pa'i lha'i sku phyag rgya/__gsungs yig 'bru/__thugs phyag mtshan gyi rnam par kha char dang bu yug 'tshub pa bzhin spyan drangs te khyed rang rnams kyi spyi bo tshangs pa'i sgo/__ba spu'i bu ga__/dbang po'i sgo rnams nas rdo tshan mo la kha babs pa'am/__rgya mtsho chen po la char babs pa bzhin sib sib thim pas rgyud byin gyis rlabs pa'i thugs mos mdzod/__/ces brda sbyar la/__rang gzhung gi byin 'bebs sam/__babs drug gi mthar rtsa sngags dang /__badz+ra dz+nyA na A be sha ya pheM pheM dza dzaH__dza hU~M baM hoH__zhes pas byin dbabs/__byin dbabs pa'i ye shes pa de nyid 'di nas byang chub ma thob kyi bar du khyed rang rnams kyi sgo gsum rdo rje gsum dang dbyer med ro gcig tu brtan par byas pa'i mos pa mdzod/__tiSh+Tha badz+ra/__ces brjod me tog 'thor/__de ltar ye shes dbabs cing brtan par bya ba sngon du song nas/__dngos gzhi'i dbang bskur ba la'ang /__rdo rje sems dpa' sgyu 'phrul drwa ba las/__slob dpon gsang ba shes rab dang /__de ma thag pa bzhi pa ste/__/zhes gsungs pa ltar bdag mdun dkyil 'khor gyi lha tshogs tha mi dad pas bum gsang shes rab ye shes bzhi pa ste dbang bzhi rim pa bzhin du stsol byung snyams pa'i mos pa dung dung mdzod cig__/ces brda sbyar la dbang bzhi gzhungs ltar dang /__yang sku gsung thugs kyi dbang bskur gyi rigs la/__/dngos gzhi bdag mdun dkyil 'khor gyi lha tshogs tha mi dad pas sku gsung thugs yon tan phrin las kyi dbang rnams rim pa bzhin du sogs sbyar la rang gzhung ltar bskur/__mthar dbang bzhi'i rigs la/__de ltar na khyed rnams kyis phyi nang gsang ba de kho na nyid kyi dkyil 'khor du dbang bzhi thob/__lus ngag yid gsum kyi sgrib pa bag chags dang bcas pa sbyangs/__gnas skabs su lam bzhi bsgom pa dbang zhing /__mthar thug sku bzhi'i go 'phang 'grub pa'i skal ba can du byas pa yin no/__/zhes dang sku gsung thugs dbang kyi rigs la/__de ltar na khyed rnams kyi bcom ldan 'das 'di zhes bya ba'i/__sku gsung thugs yon tan phrin las kyi dbang bskur ba thob/__lus ngag yid gsum bya byed dang bcas pa'i sgo nas bsags pa'i sdig pa dang sgrib pa bag chags dang bcas pa thams cad byang zhing dag par byas/__gnas skabs su snang grags rig gsum rdo rje gsum gyi rnam rol tu bsgom pa dang /__phrin las rab 'byams kyis gzhan phan sgrub pa la dbang /__mthar thug ye shes lha'i sku gsung thugs yon tan phrin las mi zad pa rgyan gyi 'khor lo dang nus pa mnyam par byin gyis brlabs pa yin snyam du mos pa mdzod/__/ces dag pa brjod/__de nas mtha' rten shis par bya ba'i slad du/__bkra shis pa'i rdzas brgyad dang /__rtags brgyad/__rgyal srid rin po che sna bdun rnams so so'i byed las grub pa'i dngos po can lag tu gtad pa la brten nas khams gsum chos kyi rgyal por mnga' gsol ba'i mos pa mdzod/__/rdzas brgyad gtad la/__hrI:__durbas tshe 'phel yungs kar bgegs rnams 'joms/__/bil bas don 'grub gi wang sdug bsngal zhi/__/zho yis don rtogs li khris chos srid brtan/__/me long sgrib dag dung gis chos sgra sgrogs/__/rgyal ba'i byin rlabs bkra shis rdzas brgyad kyis/__/skal ldan slob ma khyod la dbang bskur bas/__/dus rnams rtag tu shin tu bkra shis shog__/mang+ga laM dra bya a b+hi ShIny+tsa hU~M/__/rtags brgyad gtad la/__/rgyal ba'i dbu la gser gdugs spyan la nya/__/tshems la dung dkar ljags la pad+ma dang /__/mgrin par bum pa phyag zhabs 'khor los mtshan/__/sku la rgyal mtshan thugs la dpal be'u/__/phun sum tshogs pa'i bkra shis rtags brgyad kyis/__/dengs 'dir skal ldan slob mar dbang bskur bas/__/dge legs yon tan phun sum tshogs par shog__/aSh+ta mang+ga laM a b+hi ShIny+tsa hU~M/__/rgyal srid sna bdun gtad la/__/rtsibs stong 'khor lo dgos 'dod yid bzhin nor/__/'dod 'byung btsun mo 'byor ldan blon po dang /__/stobs chen glang po rdzu 'phrul cang shes rta/__/pha rol g.yul las rgyal ba'i dmag dpon te/__/rgyal srid rin chen bdun gyis dbang bskur bas/__/tshe dpal mnga' thang longs spyod gong 'phel nas/__/tshogs gnyis mi nub rab tu brtan gyur cig__/sap+ta rat+na a b+hi ShIny+tsa hU~M/__/zhes sam yang na/__sngon tshe bcom ldan rgyal ba'i dbang po la/__/bsod nams mthu ldan tshangs pa la sogs kyis/__/phul ba'i yon tan rdzas mchog bkra shis ste/__/deng 'dir skal ldan khyod la dbang bskur ro/__/mang+ga laM dra bya a b+hi Shiny+tsa hU~M/__/sangs rgyas bsod nams rdzogs pa'i mtshan dpe las/__/legs par byung ba'i bkra shis rtags brgyad 'dis/__/deng 'dir skal ldan khyod la dbang bskur bas/__/bkra shis yon tan phun sum tshogs par shog__/aSh+ta mang+ga laM a b+hi Shiny+tsa hU~M/__/'khor lo'i bsgyur rgyal mthus byung rgyal srid bdun/__/deng 'dir skal ldan khyod la mnga' gsol zhing /__/dbang mchog bskur ba'i bsod nams las tshogs ste/__/'khor los bsgyur ba'i yon tan thob par shog__/sap+ta rat+na a b+hi Shiny+tsa hU~M/__/bsdu na/__sngon tshe ston pas byin rlabs rdzas mchog brgyad/__/rgyal ba'i mtshan dpe las byung bkra shis rtags/__/bsod nams mthu las byung ba'i rgyal srid bdun/__/deng 'dir skal ldan slob mar dbang bskur bas/__/srid zhi'i bde legs phun sum tshogs par shog__/mang+ga laM rat+na a b+hi Shiny+tsa hU~M/__/slar yang shis par bya ba'i slad du/__mdun gyi nam mkha'i gnas su phyogs dus kyi rgyal ba sras dang bcas pa rnams dang /__lha dang drang srong bden tshig grub pa'i tshogs kyis slob dpon dang lhan cig tu shis pa brjod pa'i glu dbyangs di ri ri sgrogs cing me tog man+dAr ba'i char chen po phabs pas shin tu bkra shis par byas pa'i thugs mos mdzod/__/ces brda sbyar la shis brjod rgyas bsdus ji ltar rigs pa bya/__/des dbang gi dngos gzhi mtha' rten dang bcas pa legs par grub nas/__gnas skabs de dag tu thob cing khas blangs ba'i dam tshig dang sdom pa la srung sdom tshul bzhin du bgyi'o snyams pas 'di'i rjes zlos lan gsum mdzod/__/gtso bos ji ltar bka' stsal pa/__/de dag thams cad bdag gis bgyi/_/dbang bskur zab mo legs par thob pa'i bka' drin gtang rag gi yon du dmigs te maN+Dal zhig phul mdzod/__/maN+Dal phul nas/__de ltar maN+Dal du ma zad lus longs spyod dge tshogs rgya mtsho dang bcas pa thams cad kyang 'khor lo'i bsgyur ba'i rgyal srid kyi 'byor pa ltar sprul te phul na cha shas nas bzhes la longs spyod du gsol snyams pas 'di'i rjes zlos lan gsum mdzod/__/deng nas brtsams te bdag bran du/__/khyod la bdag ni 'bul lags na/__/khyod kyis slob mar bzung ba dang /__/cha shas kyis kyang spyad du gsol/__/de rnams kyi sgo nas lhag pa'i lha'i 'di zhes bya ba'i/__dkyil 'khor du dbang bskur la zab mo legs par gsan pa yin pas/__de las byung ba'i dge ba'i rtsa bas mtshon/__dus gsum du bsags pa'i dge ba'i rtsa ba ci mchis pa rnams rang gzhan mkha' khyab sems can thams cad kyi don du zag pa med pa'i bsngo bas rgyas 'debs mdzad par zhu/__/bsod nams 'di yis sogs brjod la slob ma rnams rang gnas su btang /__slob dpon gyi rjes kyi cho ga las gzhung ltar bya'o/__/de rnams kyis ni don dbang mdor bsdus pa'i tshul gyis bskur ba'i mtshams sbyor 'jug pa de snying por dril ba ste/__'di tsam gyis kyang las dang po'i blo can rnams la cung zad phan pa'i skabs rnyed par 'gyur la gzhan du sta gon dang 'jug pa sngon du 'gro ba'i dbang rgyas par bskur pa'i tshul ni logs su rtogs par bya ba kho na'o/__/smin byed mtshams sbyor zla ba'i sa 'dzin gyis/__/ngag gi chu gter bdud rtsir srubs pa las/__/bral smin nor bu'i snye ma g.yur za ba'i/__/dge mtshan 'jig rten gsum na 'bar gyur cig__/de ltar snga 'gyur rdo rje theg pa'i gter ma'i phyogs spyi dang /__rig 'dzin klong gsal snying po'i zab gter rnams la khyad par du sbyar ba'i dbang bskur phran _bu'i rigs kyi bar mtshams rnams su glengs par 'os pa'i gtam nyung ngu 'di yang /__/gsang bdag rdo rje 'dzin pa chen po sogs yongs 'dzin dam pa rnams kyi gsungs dang gsungs rab las btus te shAkya'i dge slong mtsho skyes bla ma dgyes pa'i 'bangs kyis sbyar ba shin tu dge shing bkra shis par gyur cig_/sarba dA shre yo b+ha wa tu/__/_!