JKW-KABAB-16-MA-018

🚧 This website is under continued development. We appreciate your patience!

Previous Text Back to Volume PageNext Text

རྩ་གསུམ་འོད་གསལ་སྙིང་ཐིག་གི་རྡོ་རྗེ་ཕག་མོ་བདེ་ཆེན་དཀར་མོའི་ཚེ་དབང་གི་རིམ་པ།

Wylie title	rtsa gsum 'od gsal snying thig gi rdo rje phag mo bde chen dkar mo'i tshe dbang gi rim pa
Location	mkhyen brtse'i bka' babs Volume 16, Text 18, Pages 735-745 (Folios 1a to 6a2)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Khyentse, Dilgo. rtsa gsum 'od gsal snying thig gi rdo rje phag mo bde chen dkar mo'i tshe dbang gi rim pa. In Rdzong sar 'jam dbyangs mkhyen brtse'i dbang po'i bka' babs, Vol. 16: 735-745. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Longevity Empowerment - tshe dbang
Cycle	རྩ་གསུམ་འོད་གསལ་སྙིང་ཏིག་ (rtsa gsum 'od gsal snying tig)
Deity	phag dkar
Karchag page	JKW-KABAB-Volume-16-MA-Karchag

Tibetan Text

Wylie

[edit]

༄༅། །རྩ་གསུམ་འོད་གསལ་སྙིང་ཐིག་གི་རྡོ་རྗེ་ཕག་མོ་བདེ་ཆེན་དཀར་མོའི་ཚེ་དབང་གི་རིམ་པ་བཞུགས་སོ།

༄༅། །བདེ་ཆེན་འོད་དཀར་བདུད་རྩིའི་མྱོས་པའི་མ། །རྡོ་རྗེ་ཚེ་དང་ཡེ་ཤེས་གཟི་བརྗིད་དཔལ། །ལྷན་སྐྱེས་དཀྱིལ་འཁོར་རྫོགས་པའི་ལྷར་འཆར་བར། །བཏུད་ནས་འཆི་མེད་དབང་གི་དགའ་སྟོན་འགྱེད། །རྩ་གསུམ་འོད་གསལ་སྙིང་ཐིག་གི་རྡོ་རྗེ་ཕག་མོ་བདེ་ཆེན་དཀར་མོའི་ཚེ་དང་ཡེ་ཤེས་སྤེལ་བའི་བྱིན་རླབས་དབང་གི་རིམ་པ་གཉིས་སུ་བཞུགས་པ་ལས། སྔ་མ་ཇི་ལྟར་བྱ་བའི་ཚུལ་ནི་གཞུང་མཐུན་གྱི་དཀྱིལ་འཁོར་དབུས་སུ་ཚེ་འབྲང་ཐབས་ཤེས་ཀྱི་རྫས་ཚེ་རིལ་ཆང་གཡས་གཡོན་དུ་བཀོད་ལ། ཉེར་སྤྱོད་མཆོད་པས་བསྐོར། སྨན་རག་གཏོར་མ། དཀར་བགེགས་ཚོགས་མཆོད་སོགས་ཉེར་མཁོ་འདུ་བྱས་ལ་ལས་གཞུང་བསྲང་ལ། བདག་མདུན་གྱི་དམིགས་བཟླས་ཚེ་སྒྲུབ་ལྟར་སྦྱར་ལ། མཆོད་བསྟོད་དང་ཚེ་འགུགས་རྒྱས་གདབ་མཐར། ལས་ཐམས་ཅད་པའི་བསང་ཆུ། ཨོཾ་ས་ཀརྨ་དྷཱ་ཀི་ནི་ཕཊ། བརྒྱ་རྩ་བཟླས་པས་ནུས་ལྡན་དུ་སྒྲུབ། མདུན་བསྐྱེད་ལས་འོད་ཟེར་ཆུ་རྒྱུན་གཅིག་པའི་དབང་བླང་ལ་གནང་བ་ཞུ། དོན་དུ་གཉེར་བའི་སློབ་མ་ཁྲུས་ནས་དབྱུང༌། བགེགས་བསྐྲད། སྲུང་འཁོར་གསལ་བཏབ་རྗེས། རྡོ་རྗེ་ཐེག་པའི་དངོས་གྲུབ་ཀྱི་སྒོ་ཐམས་ཅད་ཀྱི་རྩ་བ་ནི་ལྷན་ཅིག་སྐྱེས་པའི་ཡེ་ཤེས་ཆེན་པོའི་གསང་བ་མངོན་དུ་བྱེད་པ་འབའ་ཞིག་ལ་རགས་ལས་ཤིང༌། ཡེ་ཤེས་ཆེན་པོ་ནམ་མཁའི་གཟུགས་ཅན་དེ་མངོན་དུ་གྱུར་ན་ཇི་ལྟར་འདོད་པའི་ལས་རབ་འབྱམས་ཐོགས་མེད་དུ་སྒྲུབ་པ་ལ་དཀའ་བ་མེད་པ་བདེ་བླག་ཏུ་དབང་འབྱོར་བར་འགྱུར་བས་ཡེ་ཤེས་ཉིད་ཀྱང་དོན་གྱི་རྡོ་རྗེ་བཙུན་མོ་ཆོས་སྐུ་རྡོ་རྗེ་ཕག་མོའམ་འཕགས་བཞིའི་འབྱུང་གནས་ཡུམ་ཆེན་མོའི་དེ་ཉིད་སྟེ། དེ་མངོན་དུ་བྱ་ཕྱིར་བརྡ་དང་རྟགས་ཀྱི་རྡོ་རྗེ་ཕག་མོ་ཟབ་གསལ་མཁའ་འགྲོའི་ལྷ་སྔགས་ཏིང་ངེ་འཛིན་གྱི་མྱུར་ལམ་ཟབ་མོའི་ཐབས་ལ་བརྟེན་ནས་མྱུར་དུ་རྟོགས་ནུས་པའི་ཕྱིར་མཁའ་འགྲོ་སྒྲུབ་པའི་དབང་དང་སྒྲུབ་ཐབས་དུ་མ་འབྱུང་ཞིང༌། དེ་ལའང་རིགས་དང་ཡེ་ཤེས་ཕྲིན་ལས་ཀྱི་དབྱེ་བས་མཚན་དང་སྐུ་ཡི་བཀོད་པ་དཀྱིལ་འཁོར་གྱི་སྤྲོ་བསྡུའི་ཆོ་འཕྲུལ་ཟད་མི་ཤེས་པ་བཞུགས་པ་ལས། འདིར་བཅོམ་ལྡན་འདས་མ་སྐུ་དེ་བཞིན་གཤེགས་པའི་རིགས་རྡོ་རྗེ་ཕག་མོ་ཞི་བྱེད་དཀར་མོའི་ཚེ་དང་ཡེ་ཤེས་སྤེལ་བའི་ལྷ་སྔགས་ཟབ་མྱུར་བྱིན་བརླབ་ཀྱི་ཚན་ཀ་མཚུངས་པ་མེད་པ་འདི་ཉིད་ཤིན་ཏུ་རྣམ་པར་དག་པའི་དགོངས་མཛོད་ཡེ་ཤེས་ཀྱི་རང་སྣང༌། ཆོས་རྒྱུན་གྱི་ཏིང་ངེ་འཛིན་གྱི་བྱེད་ལས་སྐད་ཅིག་རེ་རེར་ཡང་སངས་རྒྱས་དང་བྱང་སེམས། ལྷ་དང་ཌཱ་ཀིའི་ཟབ་རྒྱས་ཀྱི་རྒྱུད་ལུང་མན་ངག་གི་མཛོད་གཏད་པས་གསང་བ་ཟབ་མོ་སྤེལ་བ་དང་སྡུད་པའི་བྱིན་རླབས་ཀྱི་མཚན་མ་བརྙེས་པའི་ངོ་མཚར་ཟད་མི་ཤེས་པའི་བདག་ཉིད་ཆེན་པོ་འོད་གསལ་སྤྲུལ་པའི་རྡོ་རྗེ་ལ་བཀའ་བབས་བདུན་དུ་བཞུགས་པའི་བྱེ་བྲག །དགོངས་གཏེར་རྩ་གསུམ་འོད་གསལ་སྙིང་ཐིག་གི་ཕྲིན་ལས་རྩ་བ་མཁའ་འགྲོའི་སྒྲུབ་ཐབས། རིགས་ལྔ་ཡེ་ཤེས་ཀྱི་ཌཱ་ཀི་སྤྱི་དང་བྱེ་བྲག་གིས་ལས་དང་དངོས་གྲུབ་སྒྲུབ་པའི་ཐབས་ཟབ་རྒྱས་སུ་བཞུགས་པ་ལས་རྡོ་རྗེ་ཕག་མོ་དཀར་མོའི་འཆི་མེད་ཚེ་སྒྲུབ་པའི་དབང་གི་ཆོ་ག་བགྱིད་པ་ལ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། ཧོ༔ བདེ་ཆེན་ཡེ་ཤེས་སྣང་བ་ཅན༔ ཁྱབ་བདག་རྡོ་རྗེ་བཙུན་མོ་དང་༔ དབྱེར་མེད་དཔལ་ལྡན་བླ་མ་ཡིས༔ ཚེ་དང་ཡེ་ཤེས་དབང་མཆོག་སྩོལ༔ ལན་གསུམ། མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྗེ་བཙུན་རྡོ་རྗེ་ཕག་མོའི་ལྷ་ཚོགས་ལ་བདག་གཞན་ཡིད་ཅན་ཐམས་ཅད་བྱང་ཆུབ་མ་ཐོབ་བར་སྐྱབས་སུ་འགྲོ་བས་ཐུགས་རྗེས་བཟུང་དུ་གསོལ་སྙམ་པས་འདིའི་རྗེས་ཟློས་མཛོད། ན་མོ༔ ཕྱོགས་དུས་རྒྱལ་བ་རབ་འབྱམས་ཀྱི༔ ཡེ་ཤེས་ཆེན་པོའི་ངོ་བོ་ཉིད༔ བླ་མ་རྡོ་རྗེ་རྣལ་འབྱོར་མར༔ མི་ཕྱེད་གུས་པས་སྐྱབས་སུ་མཆི༔ ལན་གསུམ། མཁའ་ཁྱབ་ཀྱི་སེམས་ཅན་བླ་ན་མེད་པའི་བྱང་ཆུབ་ལ་འགོད་པའི་ཆེད་དུ་ཡེ་ཤེས་མཁའ་འགྲོའི་དཀྱིལ་འཁོར་ལ་ཞུགས་ནས་དབང་གིས་སྨིན་པར་སློབ་སྙམ་པས་སེམས་བསྐྱེད་པའི་རྗེས་ཟློས་མཛོད། ཧོ༔ གཟུང་འཛིན་འཁྲུལ་པའི་འགྲོ་བ་རྣམས༔ འོད་གསལ་རྣམ་ཀུན་མཆོག་ལྡན་དབྱིངས༔ འཕོ་འགྱུར་མེད་པ་རོ་གཅིག་ཕྱིར༔ རྡོ་རྗེ་བཙུན་མོར་བསྒོམ་པར་བགྱི༔ ལན་གསུམ། བསགས་སྦྱང་གི་སྙིང་པོ་རྒྱུན་བཤགས་ཡན་ལག་བརྒྱད་པ་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བརྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་འཕྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་བགེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང༌། །དག་པ་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབ་བགྲང་བའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། ལན་གསུམ། དེ་ནས་དབང་གི་གཞི་འགོད་པའི་ཕྱིར་ཡེ་ཤེས་དབབ་པ་ལ་དམིགས་པ་འདི་བཞིན་མཛོད། ལས་སྔགས་ཀྱིས་བསང༌། སྭཱ་བྷཱ་ཝས་སྦྱངས། གཟུང་འཛིན་གྱི་སྣང་བ་ཐམས་ཅད་འོད་གསལ་སྟོང་ཉིད་ཀྱི་དབྱིངས་སུ་སྦྱངས། སྟོང་པའི་ངང་ལས་སྣོད་རྣམ་པར་དག་པ་འོག་མིན་བདེ་ཆེན་མཁའ་ལ་སྤྱོད་པའི་ཞིང་ཁམས་ངོ་མཚར་བཀོད་པ་འབྱམས་ཀླས་པའི་དབུས་སུ་བཅུད་རྣམ་པར་དག་པ་ཁྱེད་རང་རྣམས་གང་དུ་གནས་པའི་གོ་སར་པདྨ་རབ་ཏུ་རྒྱས་པའི་ལྟེ་བར་ཉི་མའི་དཀྱིལ་འཁོར་བམ་རོ་དང་བཅས་པའི་གདན་གྱི་སྟེང་དུ། རང་རིག་བདེ་བ་ཆེན་པོའི་ངོ་བོ་བྃ་ཡིག་དཀར་པོ་ལས་འོད་ཟེར་འཕྲོ་འདུས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ཁྱེད་རང་རྣམས་རྗེ་བཙུན་རྡོ་རྗེ་ཕག་མོ་སྟོན་ཀའི་ཟླ་བ་རྒྱས་པའི་མདངས་ཅན། ཞལ་གཅིག་ཁྲོ་ཞིང་འཛུམ་པའི་དབུ་གཙུག་ཏུ་ཕག་ཞལ་ངུར་སྒྲ་སྒྲོགས་པ་ཕྱག་གཉིས་ཀྱི་གཡས་རྡོ་རྗེའི་གྲི་གུག་ཕྱར་སྟབས་སུ་འཛིན་ཞིང༌། གཡོན་པས་ཐོད་ཁྲག་ཐུགས་ཀར་བསྣམས་པ། མཆན་ཁུང་གཡོན་ན་ཁ་ཊྭཱཾ་ག་རྩེ་གསུམ་པས་མཚན་པ་གཞོན་ཚུལ་ཆགས་པའི་ཉམས་ཅན་མཚན་དཔེའི་གཟི་མདངས་འབར་བ། དར་དང་རིན་པོ་ཆེ་རུས་པའི་རྒྱན་གྱིས་སྤྲས་ཤིང་ཞབས་གཡས་བསྐུམ་གཡོན་བརྐྱང་པའི་གར་སྟབས་ཀྱིས་རྟོག་མེད་བམ་རོའི་སྙིང་གར་བརྫིས་པ། སྐུ་ལས་སྐྱེས་པའི་ཡེ་ཤེས་ཀྱི་མེ་འོད་འབར་བའི་ཀློང་ན་བཞུགས་པའི་རྩ་གསུམ་དུ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་ཨོཾ་ཨཱཿཧཱུྃ་གིས་མཚན་པར་གསལ་ཐོབ་ལ། རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ། སློབ་དཔོན་ལ་རྣལ་འབྱོར་མ་དངོས་ཡིན་སྙམ་པའི་མོས་གུས་དྲག་པོ་བྱས་པས་ཐུགས་ཀ་ནས་བདེ་བ་ཆེན་པོའི་ཡེ་ཤེས་ཀྱི་འོད་ཟེར་མཁའ་ཁྱབ་ཏུ་འཕྲོས། སྐུ་གསུམ་གྱི་ཞིང་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་རྣམས་དང༌། ཁྱད་པར་ཀུན་བཟང་རྡོ་རྗེ་རྣལ་འབྱོར་མའི་ཐུགས་རྒྱུད་རང་དབང་མེད་པར་བསྐུལ་ཏེ་གསང་བ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་ཁ་ཆར་བུ་ཡུག་འཚུབས་པ་བཞིན་བྱོན་ཏེ་ཁྱེད་རང་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཅེས་བརྡ་སྦྱར་ལ་སྤོས་རོལ་ཌཱ་དྲིལ་དབྱངས་དང་བཅས་པས། ཧྲཱི༔ བཞེངས་ཤིག་སྐུ་གསུམ་ཞིང་ཁམས་ནས༔ དབྱིངས་དང་ཡེ་ཤེས་དྷཱ་ཀའི་ཚོགས༔ ཧེ་རུ་ཀ་ཡི་གནས་མཆོག་འདིར༔ དབང་བསྐུར་བྱིན་ཕོབ་ཉམས་རྟོགས་སྤོར༔ ཨོཾ་ཨཱཿཧཱུྃ་སརྦ་ཛྙཱ་ན་དྷཱ་ཀི་ནཱི་ས་མ་ཡ་ཨཱ་བེ་ཤ་ཡ་ཧྲཱིཾ་ཧྲཱིཾ་ཕེཾ་ཕེཾ༔ ཅེས་བརྗོད་སྟེ་དབབ། ཏིཥྛ་བཛྲས་བརྟན་པར་བྱ། དེ་ནས་འཆི་མེད་རྡོ་རྗེ་ཚེ་ཡི་དབང་བསྐུར་བ་ལ། ཐོག་མར་ཚེ་འགུགས་ཤིང་བཅུད་བསྡུ་བའི་སླད་དུ། བདག་མདུན་གྱི་ལྷ་ཚོགས་རྣམས་ཀྱི་སྐུ་ལས་འོད་ཟེར་འཕྲོས་པས་ཕྱོགས་བཅུའི་ཞིང་རབ་འབྱམས་ཐམས་ཅད་དུ་ཁྱབ། ཕྱོགས་དུས་རྒྱལ་བ་སྲས་དང་བཅས་པའི་མཁྱེན་བརྩེ་ནུས་པའི་ཡེ་ཤེས་དང་ཡོན་ཏན། ཕྱི་སྣོད་འབྱུང་བ་བཞིའི་དྭངས་མ། ནང་བཅུད་སྐྱེ་འགྲོའི་ཚེ་བསོད་དཔལ་འབྱོར་དབང་ཐང༌། ཆུས་སྲིད། སྒྲུབ་བྱ་རང་རང་གི་བླ་ཚེ་འཁྱམས་པ། ཡར་བ། གདོན་གྱི་ཁྱེར་བ། བརྐུས་པ། གཞོམ་པ་དང༌། བན་བོན་མཐུ་བོ་ཆེའི་ངན་སྔགས་ཀྱི་སྦྱོར་བས་ཚེ་སྲོག་འཕྲོག་པ་སོགས་རང་དབང་མེད་པར་འཆི་མེད་ཡེ་ཤེས་ཀྱི་བདུད་རྩིའི་ཟེག་མའི་རྣམ་པར་བསྡུས་ཏེ། སློབ་མ་དང་ཚེ་ཡི་རྫས་རྣམས་ལ་བསྟིམས་པས་འཆི་མེད་ཡེ་ཤེས་ཀྱི་བདུད་རྩིར་གྱུར་ཞིང༌། སློབ་མ་རྣམས་ལ་ཐིམ་པས་བདུད་རྩིའི་དྭངས་མ་སྲོག་གི་ཟུང་དུ་སྨིན་ཅིང༌། རྡོ་རྗེ་གསུམ་གྱི་གསང་བ་གཞོམ་མེད་ཡེ་ཤེས་ཀྱི་ཕྱག་རྒྱར་གྲུབ་པར་མོས་ཤིག །མདའ་དར་གཡབ་སྟེ། ཨོཾ༔ མེ་ལོང་ལྟ་བུའི་ཡེ་ཤེས་ལས༔ ཕྱག་རྒྱའི་གཟུགས་སུ་རང་ཤར་བ༔ བདེ་ཆེན་དཀར་མོ་ཚེ་ཡི་ལྷ༔ འབུམ་ཕྲག་ཡངས་པའི་འཁོར་དང་བཅས༔ རྩེ་གཅིག་གུས་པས་བསྒྲུབ་ལགས་ན༔ ཐུགས་རྗེ་ཐུགས་དམ་རྩལ་ཆེན་ཕྱུངས༔ ཕོ་ཉ་སྤྲུལ་པ་མཁའ་ཁྱབ་སྤྲོས༔ བདག་གཞན་བླ་ཚེ་ཆད་ཡར་དང་༔ འཁོར་འདས་སྲོག་གི་དྭངས་མའི་བཅུད༔ འཆི་མེད་བདུད་རྩིའི་རྣམ་པར་བསྡུས༔ བདག་དང་སྒྲུབ་པའི་རྫས་ལ་བསྟིམས༔ བླ་སྲོག་ཆད་ཉམས་རང་སོར་ཆུད༔ འགྱུར་བ་མེད་པ་རྡོ་རྗེའི་སྐུ༔ གཞོམ་དུ་མེད་པ་གཉུག་མའི་སྲོག༔ མི་ཕྱེད་རྒྱུན་གྱིས་རྟག་པ་ཡི༔ ཡེ་ཤེས་ཆེན་པོའི་དངོས་གྲུབ་སྩོལ༔ ཨོཾ་བྃ་བཛྲ་ཝཱ་ར་ཧཱི་པྲ་ཛྙཱ་ཛྙཱ་ན་སརྦ་སིདྡྷི་ཧྲཱིཾ་ཛཿ བཛྲ་ཨཱ་ཡུ་ཥེ་སྭཱ་ཧཱ༔ ཚེ་འགུགས་བསྐུལ་མཐར། ཚེ་འབྲང་འཆི་མེད་རྡོ་རྗེ་ཚེ་ཡི་ཕོ་བྲང་གི་དབུས་སུ་བཅོམ་ལྡན་འདས་མ་རྡོ་རྗེ་ཕག་མོ་འཆི་མེད་ཚེ་ཡི་ལྷ་ཚོགས་བཞུགས་པའི་སྐུ་ལས་ཡེ་ཤེས་བདུད་རྩིའི་ཟིལ་མངར་བར་མ་ཆད་པ་བྱུང༌། མ་ཤོང་བ་ཁ་ནས་ལུད་བཞིན་སྤྱི་བོར་བཞག་པས་ཚངས་བུག་ནས་ལུས་ཀྱི་ནང་ཐམས་ཅད་གང༌། ཟག་བཅས་སྐྱེ་འཆིའི་རྒུད་པ་གསོས། ནད་གདོན་བར་ཆད་མ་ལུས་པ་གསལ། སྣང་སྟོང་སྒྱུ་མ་ལྟ་བུའི་བདེ་ཆེན་རྡོ་རྗེའི་སྐུ་འགྲུབ་པར་མོས་མཛོད། ཚེ་འབྲང་སྤྱི་བོར་བཞག་ལ། ཨོཾ། མི་འགྱུར་རྟག་པའི་ཡེ་ཤེས་སྐུ༔ བདེ་གཤེགས་ཚེ་ཡི་དབང་བསྐུར་བས༔ ལུས་ཀྱི་སྒྲིབ་པ་ཀུན་དག་ནས༔ འཕོ་མེད་རྡོ་རྗེའི་སྐུ་འགྲུབ་ཤོག༔ ཀཱ་ཡ་ཨ་བྷི་ཥིཉྩ་ཨོཾ༔ སྟོང་ཉིད་དབྱིངས་ཀྱི་བྷཉྫར་བདེ་ཆེན་བྱང་ཆུབ་སེམས་ཀྱི་བདུད་རྩི་བྱིན་པས་རླུང་གི་འཕོ་བ་དྷུ་ཏིའི་སྲོག་ཏུ་ཞུགས་གནས་ཐིམ་གསུམ་གྱིས་གཞོམས་མེད་རྡོ་རྗེ་ནཱ་དའི་ཚེ་ཡི་དངོས་གྲུབ་ཐོབ་པར་མོས་མཛོད། བདུད་རྩི་བྱིན་ལ། ཨཱ༔ འགགས་མེད་ནཱ་དའི་ཡེ་ཤེས་གསུང་༔ པདྨ་ཚེ་ཡི་དབང་བསྐུར་བས༔ ངག་གི་སྒྲིབ་པ་ཀུན་དག་ནས༔ མི་ཕྱེད་རྡོ་རྗེའི་གསུང་འགྲུབ་ཤོག༔ ཝཱ་ཀ་ཨ་བྷི་ཥིཉྩ་ཨཱ༔ སྙིང་དབུས་མི་ཤིག་དྭངས་མ་ལྔ་འདུས་ཀྱི་རིལ་བུ་བྱིན་པ་རྡོ་རྗེ་ལྕེ་ཡི་ལམ་བརྒྱུད་སྙིང་ཀར་ཡེ་ཤེས་སེམས་དཔའ་སྐྱེ་འཆི་བགྲེས་བརྒུད་དང་བྲལ་བར་བཞུགས་ནས་ཡེ་ཤེས་རྡོ་རྗེ་ཚེ་ཡི་དངོས་གྲུབ་མངོན་སུམ་དུ་འགྲུབ་པར་མོས་མཛོད། རིལ་བུ་སྙིང་གར་བཏུགས་ཤིང་ཁར་བྱིན་ལ། ཧཱུྃ༔ འོད་གསལ་གཉུག་མའི་ཡེ་ཤེས་ཐུགས༔ རྡོ་རྗེ་ཚེ་ཡི་དབང་བསྐུར་བས༔ ཡིད་ཀྱི་སྒྲིབ་པ་ཀུན་དག་ནས༔ མཁའ་ཁྱབ་རྡོ་རྗེའི་ཐུགས་འགྲུབ་ཤོག༔ ཙིཏྟ་ཨ་བྷི་ཥིཉྩ་ཧཱུྃ༔ ཧཱུྃ༔ དེ་ལྟར་རྡོ་རྗེ་གསུམ་གྱི་བྱིན༔ བདུད་རྩིའི་ལུས་ཀྱི་ནང་གང་བས༔ ཚེ་དང་ཡེ་ཤེས་མཆོག་འགྲུབ་ཅིང་༔ དྭངས་མ་སྙིང་དབུས་ཧྲཱི་ལ་ཐིམ༔ མི་ཕྱེད་རྡོ་རྗེའི་སྲོག་ཐོབ་གྱུར༔ ཚེ་མདའ་སྤྱི་བོར་རྒྱ་གྲམ་དུ་བཀོད་ལ། ཨཿ སྲིད་ཞི་དྭངས་བཅུད་སྙིང་དབུས་ཀྱི༔ མི་ཤིག་ཐུགས་སྲོག་ལྷ་ལ་ཐིམ༔ རྡོ་རྗེའི་གོ་ཆས་རྒྱས་བཏབ་པས༔ འཕོ་མེད་གཉུག་མའི་སྲོག་འགྲུབ་ཤོག༔ ཛྙཱ་ན་བཛྲ་རཀྵ་རཀྵ་ཧཱུྃ༔ སྐབས་སུ་བབས་པའི་ཤིས་པ་བརྗོད་ཅིང་མེ་ཏོག་འཐོར། དེ་དག་གིས་ཞི་བྱེད་དཀར་མོ་རྡོ་རྗེ་མཁའ་འགྲོའི་ཚེ་ཡི་དབང་བསྐུར་གྲུབ་པ་ཡིན་པས་དམ་ཚིག་ཁས་བླང་གཏང་རཀ་མཎྜལ་ལུས་འབུལ་བྱ་ཞིང་དགེ་བ་བསྔོ། ཚོགས་མཆོད་སོགས་ལས་བྱང་གི་རྗེས་རིམ་མཐར་དབྱུང་བས་གྲུབ་པའོ། །རྡོ་རྗེ་ལྟ་བུའི་ཡེ་ཤེས་གསུང༌། །གཟུ་ལུམ་ཚིག་གིས་བསླད་མིན་ཡང༌། །ཐུགས་མཆོག་དྭངས་མ་གསང་བའི་ཚིག །མཛེས་བརྒྱན་སྲིད་ཞུའི་བསྙེན་བསྐུར་ཕུལ།། །།

[edit]

____@#/__/rtsa gsum 'od gsal snying thig gi rdo rje phag mo bde chen dkar mo'i tshe dbang gi rim pa bzhugs so/_@#/__/bde chen 'od dkar bdud rtsi'i myos pa'i ma/__/rdo rje tshe dang ye shes gzi brjid dpal/__/lhan skyes dkyil 'khor rdzogs pa'i lhar 'char bar/__/btud nas 'chi med dbang gi dga' ston 'gyed/__/rtsa gsum 'od gsal snying thig gi rdo rje phag mo bde chen dkar mo'i tshe dang ye shes spel ba'i byin rlabs dbang gi rim pa gnyis su bzhugs pa las/__snga ma ji ltar bya ba'i tshul ni gzhung mthun gyi dkyil 'khor dbus su tshe 'brang thabs shes kyi rdzas tshe ril chang g.yas g.yon du bkod la/__nyer spyod mchod pas bskor/__sman rag gtor ma/__dkar bgegs tshogs mchod sogs nyer mkho 'du byas la las gzhung bsrang la/__bdag mdun gyi dmigs bzlas tshe sgrub ltar sbyar la/__mchod bstod dang tshe 'gugs rgyas gdab mthar/__las thams cad pa'i bsang chu/__oM sa karma d+hA ki ni phaT/__brgya rtsa bzlas pas nus ldan du sgrub/__mdun bskyed las 'od zer chu rgyun gcig pa'i dbang blang la gnang ba zhu/__don du gnyer ba'i slob ma khrus nas dbyung*/__bgegs bskrad/__srung 'khor gsal btab rjes/__rdo rje theg pa'i dngos grub kyi sgo thams cad kyi rtsa ba ni lhan cig skyes pa'i ye shes chen po'i gsang ba mngon du byed pa 'ba' zhig la rags las shing*/__ye shes chen po nam mkha'i gzugs can de mngon du gyur na ji ltar 'dod pa'i las rab 'byams thogs med du sgrub pa la dka' ba med pa bde blag tu dbang 'byor bar 'gyur bas ye shes nyid kyang don gyi rdo rje btsun mo chos sku rdo rje phag mo'am 'phags bzhi'i 'byung gnas yum chen mo'i de nyid ste/__de mngon du bya phyir brda dang rtags kyi rdo rje phag mo zab gsal mkha' 'gro'i lha sngags ting nge 'dzin gyi myur lam zab mo'i thabs la brten nas myur du rtogs nus pa'i phyir mkha' 'gro sgrub pa'i dbang dang sgrub thabs du ma 'byung zhing*/__de la'ang rigs dang ye shes phrin las kyi dbye bas mtshan dang sku yi bkod pa dkyil 'khor gyi spro bsdu'i cho 'phrul zad mi shes pa bzhugs pa las/__'dir bcom ldan 'das ma sku de bzhin gshegs pa'i rigs rdo rje phag mo zhi byed dkar mo'i tshe dang ye shes spel ba'i lha sngags zab myur byin brlab kyi tshan ka mtshungs pa med pa 'di nyid shin tu rnam par dag pa'i dgongs mdzod ye shes kyi rang snang*/__chos rgyun gyi ting nge 'dzin gyi byed las skad cig re rer yang sangs rgyas dang byang sems/__lha dang DA ki'i zab rgyas kyi rgyud lung man ngag gi mdzod gtad pas gsang ba zab mo spel ba dang sdud pa'i byin rlabs kyi mtshan ma brnyes pa'i ngo mtshar zad mi shes pa'i bdag nyid chen po 'od gsal sprul pa'i rdo rje la bka' babs bdun du bzhugs pa'i bye brag__/dgongs gter rtsa gsum 'od gsal snying thig gi phrin las rtsa ba mkha' 'gro'i sgrub thabs/__rigs lnga ye shes kyi DA ki spyi dang bye brag gis las dang dngos grub sgrub pa'i thabs zab rgyas su bzhugs pa las rdo rje phag mo dkar mo'i 'chi med tshe sgrub pa'i dbang gi cho ga bgyid pa la maN+Dal phul/__gsol ba gdab pa 'di'i rjes zlos mdzod/__ho:__bde chen ye shes snang ba can:__khyab bdag rdo rje btsun mo dang :__dbyer med dpal ldan bla ma yis:__tshe dang ye shes dbang mchog stsol:__lan gsum/__mdun gyi nam mkhar bla ma dang gnyis su med pa'i rje btsun rdo rje phag mo'i lha tshogs la bdag gzhan yid can thams cad byang chub ma thob bar skyabs su 'gro bas thugs rjes bzung du gsol snyam pas 'di'i rjes zlos mdzod/__na mo:__phyogs dus rgyal ba rab 'byams kyi:__ye shes chen po'i ngo bo nyid:__bla ma rdo rje rnal 'byor mar:__mi phyed gus pas skyabs su mchi:__lan gsum/__mkha' khyab kyi sems can bla na med pa'i byang chub la 'god pa'i ched du ye shes mkha' 'gro'i dkyil 'khor la zhugs nas dbang gis smin par slob snyam pas sems bskyed pa'i rjes zlos mdzod/__ho:__gzung 'dzin 'khrul pa'i 'gro ba rnams:__'od gsal rnam kun mchog ldan dbyings:__'pho 'gyur med pa ro gcig phyir:__rdo rje btsun mor bsgom par bgyi:__lan gsum/__bsags sbyang gi snying po rgyun bshags yan lag brgyad pa 'di'i rjes zlos mdzod/__rdo rje slob dpon sangs rgyas dpal/__/dus gsum bzhugs la phyag 'tshal lo/__/mchog gsum brten pa'i zhing gyur la/__/gnyis med yid kyis skyabs su mchi/__/dngos 'byor yid kyis rnam 'phrul pa'i/__/dag pa'i mchod pa bzhes su gsol/__/dngos grub chu bo gcod pa'i bgegs/__/nyes byas ma lus bshags par bgyi/__/phyogs bcu 'khor gsum dag pa'i chos/__/ma chags spyod la rjes yi rang*/__/dag pa mtha' bzhi dri ma med/__/rdzogs pa'i byang chub sems bskyed do/__/bde gshegs dbang phyug sems can la/__/dgos pa gsum phyir lus 'bul lo/__/tshe rab bgrang ba'i las rnams kun/__/bsdus te byang chub chen por bsngo/__lan gsum/__de nas dbang gi gzhi 'god pa'i phyir ye shes dbab pa la dmigs pa 'di bzhin mdzod/__las sngags kyis bsang*/__swA b+hA was sbyangs/__gzung 'dzin gyi snang ba thams cad 'od gsal stong nyid kyi dbyings su sbyangs/__stong pa'i ngang las snod rnam par dag pa 'og min bde chen mkha' la spyod pa'i zhing khams ngo mtshar bkod pa 'byams klas pa'i dbus su bcud rnam par dag pa khyed rang rnams gang du gnas pa'i go sar pad+ma rab tu rgyas pa'i lte bar nyi ma'i dkyil 'khor bam ro dang bcas pa'i gdan gyi steng du/__rang rig bde ba chen po'i ngo bo ba~M yig dkar po las 'od zer 'phro 'dus don gnyis byas/__tshur 'dus yongs su gyur pa las khyed rang rnams rje btsun rdo rje phag mo ston ka'i zla ba rgyas pa'i mdangs can/__zhal gcig khro zhing 'dzum pa'i dbu gtsug tu phag zhal ngur sgra sgrogs pa phyag gnyis kyi g.yas rdo rje'i gri gug phyar stabs su 'dzin zhing*/__g.yon pas thod khrag thugs kar bsnams pa/__mchan khung g.yon na kha T+wAM ga rtse gsum pas mtshan pa gzhon tshul chags pa'i nyams can mtshan dpe'i gzi mdangs 'bar ba/__dar dang rin po che rus pa'i rgyan gyis spras shing zhabs g.yas bskum g.yon brkyang pa'i gar stabs kyis rtog med bam ro'i snying gar brdzis pa/__sku las skyes pa'i ye shes kyi me 'od 'bar ba'i klong na bzhugs pa'i rtsa gsum du sangs rgyas thams cad kyi rdo rje gsum gyi rang bzhin oM AHhU~M gis mtshan par gsal thob la/__rgyud rnam par dag pa ye shes lha'i gzi byin dbab pa'i slad du/__slob dpon la rnal 'byor ma dngos yin snyam pa'i mos gus drag po byas pas thugs ka nas bde ba chen po'i ye shes kyi 'od zer mkha' khyab tu 'phros/__sku gsum gyi zhing rab 'byams na bzhugs pa'i rgyal ba sras dang bcas pa rnams dang*/__khyad par kun bzang rdo rje rnal 'byor ma'i thugs rgyud rang dbang med par bskul te gsang ba gsum gyi byin rlabs dang dngos grub thams cad sku phyag rgya/__gsung yig 'bru/__thugs phyag mtshan gyi rnam pa kha char bu yug 'tshubs pa bzhin byon te khyed rang la sib sib thim pas rgyud byin gyis brlabs pa'i mos pa mdzod/__ces brda sbyar la spos rol DA dril dbyangs dang bcas pas/__hrI:__bzhengs shig sku gsum zhing khams nas:__dbyings dang ye shes d+hA ka'i tshogs:__he ru ka yi gnas mchog 'dir:__dbang bskur byin phob nyams rtogs spor:__oM AHhU~M sarba dz+nyA na d+hA ki nI sa ma ya A be sha ya hrIM hrIM pheM pheM:__ces brjod ste dbab/__tiSh+Tha badz+ras brtan par bya/__de nas 'chi med rdo rje tshe yi dbang bskur ba la/__thog mar tshe 'gugs shing bcud bsdu ba'i slad du/__bdag mdun gyi lha tshogs rnams kyi sku las 'od zer 'phros pas phyogs bcu'i zhing rab 'byams thams cad du khyab/__phyogs dus rgyal ba sras dang bcas pa'i mkhyen brtse nus pa'i ye shes dang yon tan/__phyi snod 'byung ba bzhi'i dwangs ma/__nang bcud skye 'gro'i tshe bsod dpal 'byor dbang thang*/__chus srid/__sgrub bya rang rang gi bla tshe 'khyams pa/__yar ba/__gdon gyi khyer ba/__brkus pa/__gzhom pa dang*/__ban bon mthu bo che'i ngan sngags kyi sbyor bas tshe srog 'phrog pa sogs rang dbang med par 'chi med ye shes kyi bdud rtsi'i zeg ma'i rnam par bsdus te/__slob ma dang tshe yi rdzas rnams la bstims pas 'chi med ye shes kyi bdud rtsir gyur zhing*/__slob ma rnams la thim pas bdud rtsi'i dwangs ma srog gi zung du smin cing*/__rdo rje gsum gyi gsang ba gzhom med ye shes kyi phyag rgyar grub par mos shig__/mda' dar g.yab ste/__oM:__me long lta bu'i ye shes las:__phyag rgya'i gzugs su rang shar ba:__bde chen dkar mo tshe yi lha:__'bum phrag yangs pa'i 'khor dang bcas:__rtse gcig gus pas bsgrub lags na:__thugs rje thugs dam rtsal chen phyungs:__pho nya sprul pa mkha' khyab spros:__bdag gzhan bla tshe chad yar dang :__'khor 'das srog gi dwangs ma'i bcud:__'chi med bdud rtsi'i rnam par bsdus:__bdag dang sgrub pa'i rdzas la bstims:__bla srog chad nyams rang sor chud:__'gyur ba med pa rdo rje'i sku:__gzhom du med pa gnyug ma'i srog:__mi phyed rgyun gyis rtag pa yi:__ye shes chen po'i dngos grub stsol:__oM ba~M badz+ra wA ra hI pra dz+nyA dz+nyA na sarba sid+d+hi hrIM dzaH__badz+ra A yu She swA hA:__tshe 'gugs bskul mthar/__tshe 'brang 'chi med rdo rje tshe yi pho brang gi dbus su bcom ldan 'das ma rdo rje phag mo 'chi med tshe yi lha tshogs bzhugs pa'i sku las ye shes bdud rtsi'i zil mngar bar ma chad pa byung*/__ma shong ba kha nas lud bzhin spyi bor bzhag pas tshangs bug nas lus kyi nang thams cad gang*/__zag bcas skye 'chi'i rgud pa gsos/__nad gdon bar chad ma lus pa gsal/__snang stong sgyu ma lta bu'i bde chen rdo rje'i sku 'grub par mos mdzod/__tshe 'brang spyi bor bzhag la/__oM/__mi 'gyur rtag pa'i ye shes sku:__bde gshegs tshe yi dbang bskur bas:__lus kyi sgrib pa kun dag nas:__'pho med rdo rje'i sku 'grub shog:__kA ya a b+hi Shiny+tsa oM:__stong nyid dbyings kyi b+hany+dzar bde chen byang chub sems kyi bdud rtsi byin pas rlung gi 'pho ba d+hu ti'i srog tu zhugs gnas thim gsum gyis gzhoms med rdo rje nA da'i tshe yi dngos grub thob par mos mdzod/__bdud rtsi byin la/__A:__'gags med nA da'i ye shes gsung :__pad+ma tshe yi dbang bskur bas:__ngag gi sgrib pa kun dag nas:__mi phyed rdo rje'i gsung 'grub shog:__wA ka a b+hi Shiny+tsa A:__snying dbus mi shig dwangs ma lnga 'dus kyi ril bu byin pa rdo rje lce yi lam brgyud snying kar ye shes sems dpa' skye 'chi bgres brgud dang bral bar bzhugs nas ye shes rdo rje tshe yi dngos grub mngon sum du 'grub par mos mdzod/___ril bu snying gar btugs shing khar byin la/__hU~M:__'od gsal gnyug ma'i ye shes thugs:__rdo rje tshe yi dbang bskur bas:__yid kyi sgrib pa kun dag nas:__mkha' khyab rdo rje'i thugs 'grub shog:__tsit+ta a b+hi Shiny+tsa hU~M:__hU~M:__de ltar rdo rje gsum gyi byin:__bdud rtsi'i lus kyi nang gang bas:__tshe dang ye shes mchog 'grub cing :__dwangs ma snying dbus hrI la thim:__mi phyed rdo rje'i srog thob gyur:__tshe mda' spyi bor rgya gram du bkod la/__aH__srid zhi dwangs bcud snying dbus kyi:__mi shig thugs srog lha la thim:__rdo rje'i go chas rgyas btab pas:__'pho med gnyug ma'i srog 'grub shog:__dz+nyA na badz+ra rak+Sha rak+Sha hU~M:__skabs su babs pa'i shis pa brjod cing me tog 'thor/__de dag gis zhi byed dkar mo rdo rje mkha' 'gro'i tshe yi dbang bskur grub pa yin pas dam tshig khas blang gtang raka maN+Dal lus 'bul bya zhing dge ba bsngo/__tshogs mchod sogs las byang gi rjes rim mthar dbyung bas grub pa'o/__/rdo rje lta bu'i ye shes gsung*/__/gzu lum tshig gis bslad min yang*/__/thugs mchog dwangs ma gsang ba'i tshig__/mdzes brgyan srid zhu'i bsnyen bskur phul//__//___________________