PJCW-KABUM-04-NGA-035

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	dpal sprul bka' 'bum Volume 4, Text 35, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

Tibetan Text

[edit]

༄༅། །ཐེག་མཆོག་ཨ་ཏིའི་མན་ངག་གནས་ལུགས་གསལ་སྟོན་བཞུགས་སོ། །

བླ་མ་དམ་པ་རྣམས་ལ་ཕྱག་འཚལ་ལོ། །གང་ཟག་དབང་པོ་རབ་འབྲིང་ཐ་མའི་རིམ་པ་གསུམ་སོ་སོ་བས་རང་བཞིན་རྫོགས་པ་ཆེན་པོའི་གནས་ལུགས་སྐྱོང་ཚུལ་ནི། དང་པོ་སེམས་འཚོལ་གྱི་རིམ་པས་གདར་ཤ་ལེགས་པར་བཅད་ཅིང་བརྗོད་མེད་ཀྱི་དོན་ངོ་ལེགས་པར་འཕྲོད་པ་གཞིར་བཞག་ནས། སྐྱོང་ཚུལ་དངོས་ནི། དབང་པོ་རབ་ཀྱིས་སེམས་ཁོ་རང་གནས་རུང་སེམས་ཡིན། འགྱུ་རུང་སེམས་ཡིན། སེམས་སྟོང་པར་ཐག་ཆོད་ཕྱིན་ཆད་ནས། གནས་འགྱུ་གཉིས་ལ་ཁྱད་པར་ཅི་ཡང་མེད་པས། རྣམ་རྟོག་གང་ཤར་གང་སྣང་ཐམས་ཅད་ཡེ་ཤེས་ཀྱི་རོལ་པ་རྒྱལ་བའི་དགོངས་པ་ཟབ་མོ་སྟོང་པ་ཉིད་ཡིན། དེ་ལ་བཅོས་སླད་གང་ཡང་མ་བྱེད་པར་དེ་ཁའི་ངང་ལ་ཞོག །གནས་སྐབས་སུ་རྣམ་རྟོག་རང་ག་མར་འདུག་ནའང་། ངང་ངམ་ཤུགས་ཀྱིས་གྲོལ་ཡོད་པས་ཏིང་ངེ་འཛིན་ཁོ་ན་ཡིན། ཆོས་སྐུ་ཡིན། རང་བྱུང་གི་ཡེ་ཤེས་ཡིན། ཕྱག་རྒྱ་ཆེན་པོ་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་ཡིན། དཔེ་ཐག་པ་མེས་ཚིག་པ་དང་འདྲ། དེས་འཆིང་མི་ནུས། ཁོ་རང་གི་ངོ་བོ་སྟོང་པ་ཡིན། རྣམ་རྟོག་ལྟར་སྣང་བ་དེ་སྟོང་པའི་གདངས་ཤར་བ་ཡིན། རྣམ་རྟོག་དང་སྟོང་པ་ལ་ཁྱད་པར་མི་འདུག་པས། ཨོ་རྒྱན་ཆེན་པོས། རྣམ་རྟོག་ངོ་བོ་སྟོང་པས་ཆོས་སྐུར་རོ། །ཞེས་གསུངས། སྒོམ་ན་བློ་ཡིན་པས་བསྒོམ་རྒྱུ་ཅི་ཡང་མེད། རྣམ་རྟོག་རང་ག་མར་ཞོག །དེ་ལ་བཅས་བཅོས་བྱས་ན་རྣམ་རྟོག་རང་རྒྱུད་པ་འཁྲུལ་པ་ལུ་གུ་རྒྱུད་ཡིན་པས་བཅས་བཅོས་གང་ཡང་མི་བྱ། རང་ཐོག་ཏུ་འཇོག་པ་དེ་ལས་ཡེངས་ན་འཁྲུལ་པ་དངོས་ཡིན་པས་མ་ཡེངས་པ་དགོས་ཏེ་དེ་གཅིག་པུས་ཆོག །དམིགས་པ་གང་ལ་ཡང་མ་གཏད་ཅིང་མ་ཡེངས་པ་གཅིག་གོ །རྫོགས་ཆེན་གུ་རུ་ཞི་བ་ལས། །སྒོམ་མ་མྱོང་དང་འབྲལ་མ་མྱོང་། །མི་སྒོམ་དོན་དང་མི་འབྲལ་བ། །ཞེས་པ་གང་ཤར་སྒོམ་ཡིན་པས་ན་བློས་བཅོས་པའི་སྒོམ་རྒྱུ་མེད་པས་སྒོམ་མ་མྱོང་། ཡེ་ནས་དོན་མེད་འཆལ་བ་མིན་པས་རང་ཐོག་ཏུ་འཇོག་པ་དེ་དང་འབྲལ་མ་མྱོང་། མི་སྒོམ་དོན་དེ་ལྟ་བུ་དང་རྒྱུན་དུ་མི་འབྲལ་བར་གྱིས་ཞེས་པའི་དོན་ནོ། །འདི་ལ་དབང་པོའི་ཁྱད་པར་གྱིས་ཞག་བདུན་ནམ་བཅུ་བཞིའམ་ཟླ་བ་གཅིག་ལས་ཆེད་འཛིན་གྱིས་མ་ཡེངས་པ་དེ་ལ་བརྩོན་མི་དགོས་པར་གང་ཤར་རྩོལ་མེད་དུ་འཇོག་ཐུབ་པ་གཅིག་འོང་། འདི་ལ་རྫོགས་ཆེན་པ་ཡེ་གྲོལ་ཀློང་ཡངས་ཀྱི་དགོངས་པ་ཟེར། ཕྱག་ཆེན་པ་རང་གསལ་གྱི་དྲན་པ་ཟེར་བ་རང་གདའ། དེའི་རྒྱུན་མ་ཆད་པར་བསྐྱངས་པས་རྣམ་པ་ཐ་མལ་གྱི་ཤེས་པ་འཇིག་རྟེན་པའི་རང་ག་དང་ཁྱད་པར་སྤུ་ཙམ་ཡང་མེད་ལ། ངོ་བོ་དེར་འཛིན་མེད་པའི་ས་ལེ་ཧྲིག་གེ་བ་མཉམ་བཞག་ཡུལ་ཕུད། རྗེས་ཐོབ་རྐང་སྟོང་། བག་ཆགས་གཡའ་དག་པའི་ཤེས་པ་ངོས་བཟུང་དང་བྲལ་ཀྱང་རྣམ་རྟོག་ལྟར་སྣང་བ་ཅིག་འོང་། དེ་ཆོས་སྐུ་དངོས་ཡིན། རྫོགས་ཆེན་སེམས་ཕྱོགས་པས། རྣམ་རྟོག་མི་མངའ་ཅིར་ཡང་སལ་ལེར་མཁྱེན་བྱ་བའང་འདི་ལ་ཟེར་ཏེ། གྲུབ་ཆེན་མི་ཏྲ་ཛོ་ཀིས། ཅིར་སྣང་དྲང་པོར་བཞག་ན་བྱ་བྲལ་ལྷུན་གྱིས་གྲུབ། །ཅེས་གསུངས། དེ་ལྟར་འཛིན་པའི་རྣམ་རྟོག་རང་གིས་རང་གྲོལ་བ་ན། ཕྱི་གཟུང་བའི་ཡུལ་གཟུགས་སྒྲ་ལ་སོགས་པའང་རང་གྲོལ་དུ་ཤུགས་ཀྱིས་འགྲོ་སྟེ་མིག་གི་ཡུལ་དུ་གཟུགས་བཟང་ངན། རྣ་བར་སྒྲ་སྙན་མི་སྙན་དེ་བཞིན་དུ་དྲི་རོ་རེག་བྱ་རྣམས་ཀྱི་བཟང་ངན་དང་། སེམས་བདེ་སྡུག་ཆགས་སྡང་། དགྲ་གཉེན་ས་ཆུ་མེ་རླུང་ལ་སོགས་པ་མདོར་ན་གང་ཤར་གང་སྣང་དེ་ཀ་ལ་བཟོ་བཅོས་མེད་པར་འཇོག་པ་ཡིན་ཏེ། རྫོགས་ཆེན་ལས། སྒོ་ལྔའི་རྣམ་ཤེས་གསལ་བ་ལ། །ཡིད་ཀྱི་ཞེན་རྟོག་མ་ཞུགས་ན། །རྒྱལ་བའི་དགོངས་པ་དེ་ཀ་རང་། །ཞེས་དང་། ཞི་བྱེད་པས། དོན་གོ་རྟོག་པའི་མཚང་རིག་ན། །རྣམ་རྟོག་ཤར་ཚེ་གནས་པ་ཆེ། །ཉོན་མོངས་རགས་ཚེ་ཡེ་ཤེས་གསལ། །ཅེས་བཞེད་དོ། །དེ་བས་ན་རྫོགས་པ་ཆེན་པོའི་དགོངས་པ་ནི། གང་ཤར་དེ་སྤོངས་ཡང་མི་སྤོངས། དེའི་རྗེས་སུ་ཡང་མི་འབྲང་། དེ་ཀ་ལ་བཅས་བཅོས་མི་བྱེད་པར་འཇོག་པ་འདི་ཀ་ཡིན་ནོ། །དེ་ཡིན་པས་དེ་ལ་སྤང་བྱ་མེད། གཉེན་པོ་མེད། དགག་སྒྲུབ་བླང་དོར་ལ་སོགས་པ་བློ་བྱས་ཀྱི་ཆོས་གང་ཡང་མེད་པས་ན། བློ་འདས་ཆོས་སྐུ་དེ་བཞིན་ཉིད། །ཅེས་པའང་དེ་ཡིན། དེ་དག་ནི་དབང་པོ་རབ་ཀྱི་དབང་དུ་བྱས་པ་ཡིན་པས། རབ་ཀྱི་རབ་འབྲིང་ཐ་མ་གསུམ་ལ་སོ་སོའི་བློ་ནུས་དང་སྦྱར་ཏེ་འཁྲིད་ཤེས་པར་བྱའོ། །དབང་པོ་འབྲིང་གསུམ་ནི་ཞི་ལྷག་ཟུང་འབྲེལ་གྱི་སྒོ་ནས་འཁྲིད་པར་བྱ་སྟེ། དེ་ཡང་རྒྱལ་བ་ཡང་དགོན་པས། ཡེ་བསྒོམ་ལ་བློ་ཡིས་མ་བསྒོམ་མཛོད། །རང་བབས་ལ་བཟོ་ཡིས་མ་བཅོས་མཛོད། །བློ་རྟོག་ལ་སྐྱོན་དུ་མ་ལྟ་བར། །མི་རྟོག་པ་ཆེད་དུ་མ་སྒོམ་པར། ། སེམས་རང་ལུགས་སུ་ཞོག་ལ་རྒྱངས་སོ་ཚུག །སྒོམ་ཞི་གནས་ཀྱི་མཐིལ་དུ་ཕེབས་པ་གཅིག་འོང་གི། ཞེས་དེ་ཀ་ལྟར་གོམས་འདྲེས་བྱེད་པ་ལ། གཉུགས་བསྲིངས་པས་འགྱུ་བ་ཇེ་ཉུང་ལ་སོང་། སེམས་ཀྱི་གནས་པ་ཇེ་བརྟན་ལ་འགྲོ། འདི་ལ་དྲན་པ་སླེབ་ན་ཞི་ལྷག་ཟུང་འབྲེལ་ཡིན། དེའི་རྒྱུན་བསྐྱངས་ནས་སྒོམ་པས་རྣམ་རྟོག་ཕྲ་རག་ཀུན། འགགས་ཏེ་ཏིང་ངེ་འཛིན་གྱི་ངོ་བོ་གང་དུའང་མ་གྲུབ་པའི་སྟོང་བ་གསལ་ལ་རྟོག་པ་མེད་པ་ལུས་སེམས་ཡོད་དུ་མི་ཚོར་ལ། ཏིང་ངེ་འཛིན་དེ་དང་འབྲལ་མི་ཕོད་པའི་བདེ་ཉམས་ཅན་གཅིག་འཆར། དེ་མུ་མཐུད་ནས་བསྒོམ་པས་སྤྱན་ལྔ་དང་། མངོན་ཤེས་ཀྱི་ཡོན་ཏན་ཀྱང་འབྱུང་སྟེ་བསམ་གཏན་ཟེར། ཞི་གནས་འཐུག་པོ་དེ་བསྒོམ་ནས་བསམ་གཏན་བཞི་དང་སྐྱེ་མཆེད་མུ་བཞིའི་ཏིང་ངེ་འཛིན་རྩེ་གཅིག་པ་སྟེ། མཐར་གྱིས་གནས་པའི་སྙོམས་པར་འཇུག་པ་དགུ་ཟེར། དགུ་བོ་འདི་མུ་སྟེགས་པ་ལའང་ཡོད་པས་ཕྱི་ནང་ཐུན་མོང་གི་ལམ་ཡིན་ཡང་། རྣམ་རྟོག་འཕྲོ་མང་ནས་ཁ་བྲི་མ་ཐུབ་པ་དེ་ལ་ཐོག་མར་ཞི་གནས་བཙལ་དགོས་པ་ཡིན། དེ་ལ་ཡང་ལྷག་མཐོང་མེད་ནས་ལམ་མི་བགྲོད་པས་སེམས་ཀྱི་གནས་ཆ་ཙམ་རྙེད་ནས་རྣམ་རྟོག་འདི་མ་འཕྲོས་ན་དགའ་བ་ལ་སྙམ་པའི་དུས་དེར་རྣམ་རྟོག་དེ་རང་ངོ་ཤེས་ཙམ་བྱས་ལ་ཁོ་རང་གི་ངོ་ལ་བལྟས་པས་ཡལ་ཏེ་གནས་པ་དང་གཅིག་ཏུ་སོང་བ་ནི་ཞི་ལྷག་ཟུང་འཇུག་གམ་ཟུང་འབྲེལ་བྱ་བ་ཡིན། དྭགས་པོ་བཀའ་རྒྱུད་པས་གནས་འགྱུའི་བར་ལག་འགྱེལ་བ་ཟེར། ངོ་བོ་བློས་བྱས་པའི་བསྒོམ་ཡིན། འདི་ལ་ངོ་ཤེས་ཀྱི་དྲན་པ་དང་མ་བྲལ་བར་དགོས་པས་བཀའ་བརྒྱུད་པས་སྟོང་ཉིད་གཟུང་དྲན་ཟེར། འདི་ཀ་རྒྱུན་བསྐྱངས་ནས་བསྒོམ་པས་གཟུང་དྲན་དེ་རང་གསལ་གྱི་དྲན་པར་འགྲོ། མ་ཡེངས་པར་རང་བྱས་ན་འདི་ཡང་ཁ་གཟོ་མོ་གཅིག་ཡིན་ཏེ། ཟླ་བ་གཅིག་ཙམ་ནས་ཉིན་སྣང་འདྲེས་ཐུབ། རྒྱལ་བ་རྒོད་ཚངས་པས། སྣང་བ་ཐམས་ཅད་སྟོང་པར་མི་བསྒོམ། མི་སྟོང་བར་ཡང་མི་བསྒོམ་གང་ཤར་དེ་ལ་དྲན་པས་བཟུང་ན་ཟླ་བ་གཅིག་རང་གིས་ཆོག་སྟེ། སྤྲོས་བྲལ་དང་པོ་རང་གནས་འོང་། ཞེས་གསུངས་པར། ཧྲིལ་གྱིས་དྲིལ་ན། སྔར་གྱི་ཞི་གནས་ཀྱི་ཏིང་ངེ་འཛིན་དེ་རང་ངོ་ཤེས་པས་ཞི་ལྷག་ཟུང་འབྲེལ་ལ། ཕྱག་རྒྱ་ཆེན་པོ་རྫོགས་པ་ཆེན་པོ་ཞེས་ཟེར་ཏེ། ཡང་དགོན་པས། བློ་རྟོག་པ་འགྱུ་བ་གནས་ལུགས་ཀྱི་སྒོ། རང་ངོ་ཤེས་པ་ཉམས་ལེན་གྱི་གནད། ཅེས་གསུངས་པ་ལ་འདུའོ། །འདི་ལ་འབྲིང་གི་འབྲིང་དང་ཐ་མ་གཉིས་ཀྱིས་རྣམ་རྟོག་རང་ག་མ་དེ་སྒོམ་ཡིན་པར་ཡིད་ལ་མི་བྱེད་ན། རྣམ་རྟོག་གང་ཤར་དེ་ལ་བལྟས་པས་ཐམས་ཅད་སྟོང་པར་ཡལ། ཡལ་བ་དེའི་ངང་ནས་གཅིག་རྟིང་ལ་གཅིག་འཆར། དེ་ལ་ཡང་བལྟས་པས་སྔར་ལྟར་ཡལ་དེ་ཁའི་རྒྱུད་སྐྱོང་བ་ཡིན་ཏེ། མགུར་ལས། སེམས་ངོས་བཟུང་མེད་པ་སྟོང་བའི་དབྱིངས། །སྣ་ཚོགས་སུ་འཆར་བ་རིག་པའི་སྒོ། །བློ་བྲལ་གྱི་གསལ་སྟོང་རྗེན་པ་འདིའི། །ངང་ལ་བཞག་བཞིན་དབྱིངས་ལ་ལྟོས་དང་། བསྒོམ་ལྷག་མཐོང་གི་མཐིལ་དུ་ཕེབས་པ་གཅིག་འོང་གི། ཞེས་གསུངས་པ་བཞིན་ཉམས་སུ་ལེན། འདི་ལ་མི་ཏྲ་ཛོ་ཀིས། གང་ཤར་ངོ་ཡིས་བཟུང་བ་རིག་པ་རང་སར་གྲོལ། ཞེས་པས། ལས་སླ་ལ་ཆུན་ཆེ་བ་གཅིག་ཡིན་ནོ། །རབ་འབྲིང་གསུམ་ཀའི་ཐུན་མོང་དུ་སྒོམ་ལུགས་ནི། མགུར་ལས། མ་ཡེངས་དྲན་པ་སོ་མ་ཤོར། མ་བསྒོམ་པའི་གནས་ལུགས་བཟོ་མ་བྱས། བསམ་མེད་ཀྱི་རིག་པ་སྨྲ་མ་འདོད། རྟག་ཆད་ཀྱི་མ་བསླད་ཡུན་དུ་སྐྱོངས་དང་། བསྒོམ་ཞི་ལྷག་ཟུང་དུ་ཆུད་པ་གཅིག་འོང་གི། ཞེས་གསུངས་པ་གོ་སླ་ཡང་། དྲན་པ་མ་ཡེངས་པས་གང་ཤར་ལ་བཟོ་བཅོས་མི་བྱེད། ཤར་ཡང་ཡོད་པར་མི་བལྟ། ཡལ་ཡང་མེད་པར་མི་འཛིན། རྣམ་རྟོག་གི་སྣ་མི་བསྐྱིལ་བར་འགྲོ་བཅུག་ནས་ངོ་ཤེས་ཙམ་བྱེད་པའོ། །རྫོགས་ཆེན་སེམས་སྡེ་ལས། གདོད་ནས་དག་པ་དབྱིངས་ཀྱི་ངང་ཉིད་ནས། །རིག་པ་ཐང་སྐྱེས་སྐད་ཅིག་དྲན་པ་དེ། །རྒྱ་མཚོའི་གཏིང་ནས་ནོར་བུ་རྙེད་པ་འདྲ། །སུས་ཀྱང་མ་བཅོས་མ་བྱས་ཆོས་ཀྱི་སྐུ། །ཞེས་གསུངས་པ་ལྟར་ངོ་སྤྲད་དོ། །དབང་པོ་ཐ་མ་གསུམ་ནི། ཕལ་ཆེར་ལྷག་མཐོང་ལ་ཡིད་མི་ཆེས། །ཞི་གནས་གཤའ་མ་ཡང་སྐྱེ་མི་ཐུབ་སྟེ། །རེས་བྱིངས། རེས་རྒོད་ནས་སྒོམ་མི་འཆར་བས། སྔོན་འགྲོ་མཐར་ཕྱིན་རྫོགས་པ་དང་། སྟན་བདེ་བར་རྐང་པ་སྐྱིལ་ཀྲུང་། ལག་པ་མཉམ་བཞག་ལྕེ་ཡར་རྐན་ལ་སྦྱར། མིག་སྣ་རྩེར་ཕབ་པ་སོགས་ཆོས་བདུན་ཚང་བར་བྱས་ཤིང་། རླུང་རོ་དགུ་སྤྲུགས་སུ་བུས་ལ། སྤྱི་བོའམ་སྙིང་ཁར་བླ་མ་བསྒོམ་ཞིང་གསོལ་བ་བཏབ། ལུས་སེམས་ལྷོད་ཀྱིས་སློད་པའི་ངང་ནས་རྣམ་རྟོག་གང་ཤར་དེ་ཀ་ལ་བལྟས་ནས་དེ་རང་གི་ཐོག་ཏུ་ལྷོད་ཀྱིས་སློད། ཡང་ཤར་ན་དེའི་ཐོག་ཏུ་སྔར་ལྟར་སླད། ཡལ་ནས་སྟོང་པར་སོང་བ་དེའི་དགའ་བྲོད་མི་བྱ། རྣམ་རྟོག་མང་པོར་སོང་བ་ལ་སྐྱོན་དུ་མི་བལྟ། སྒོམ་ཡོང་དུ་རེ་བ་དང་མ་བྱུང་བའི་དོགས་པ་གཉིས་ཀ་མི་བྱ། གང་ཤར་གྱི་སྟེང་དུ་ལྷོད་དེ་འཇོག །ལྷོད་ཆེ་ན་རྣམ་རྟོག་མེད་པའི་མི་རྟོག་པ་འདྲ་མོ་འགྱུ་དྲན་གང་ཡང་མེད་པ་གཅིག་འོང་བས། དེ་དྲན་པས་གྲིམ་གྱིས་སྒྲིམ་ཏེ་ངོ་ཤེས་པ་མ་བྱས་ན་རང་གིས་མི་ཚོར་བར་རྟོག་པ་འོག་འགྱུ་ཕུབ་མའི་འོག་གི་ཆུ་དོང་ལྟ་བུ་གཅིག་ཡོད། དེས་འཕྲལ་དུ་མི་གནོད་པ་ལྟར་ལ་ཕུགས་སུ་ཁོ་རྒྱལ་ནས་སྒོམ་ཡོངས་སུ་མི་སྟེར་བས་སྒྲིམ་དགོས། རྟོག་པ་ཁ་གྱུ་ནི་ངོས་ཟིན་པའི་འགྱུ་དྲན་ཚོ་ཡིན་པས་དེ་ཐོག་ཏུ་སློད་ནས་འཇོག །ཇི་ཞིག་ནས་རྣམ་རྟོག་མང་དུ་སོང་ནས་རང་ཚིག་པ་ཟ། ང་ལ་སྒོམ་མི་ཡོང་བར་འདུག་སྙམ་པ་འོང་སྟེ་སྐྱོན་མེད། ཉམས་དང་པོ་རི་གཟར་གྱི་ཆུ་ལྟ་བུ་བྱ་བ་དེ་བཀའ་བརྒྱུད་པས་རྩེ་གཅིག་རྟོག་པའི་རྦ་ལ་གཡེང་ཟེར་ཏེ་རྩེ་གཅིག་ཆུང་ངུའི་སྐབས་ཡིན། དེ་ཀ་ལ་སྲན་བསྐྱེད་དེ་སྒོམ་པས། སྐབས་རེ་སྡོད། སྐབས་རེ་འཕྲོ་བ་ཆུ་ནང་གི་བྱིའུ་ཆུ་ལ་རེས་འཛུལ་རེས་འཐོན། སྐབས་རེ་རྡོ་སྟེང་དུ་བག་རེ་སྡོད་པ་དང་འདྲ། ཉམས་གཉིས་པའི་སྐྱེ་ལུགས་ཡིན། ཡང་མུ་མཐུད་དེ་སྒོམ་ན་རེ་ཞིག་ནས་སྐབས་རེ་འཕྲོ་ཡང་། ཤས་ཆེར་གནས་པ་འདྲ་བ་གཅིག་འོང་། དཔེ་མི་རྒན་དང་འདྲ་སྟེ་སྡོད་པ་ཤས་ཆེ། ཉམས་གསུམ་པའི་སྐྱེ་ལུགས་ཡིན། ཡང་རྒྱུན་མཐུད་པས་རེ་ཞིག་ན་སྦུབ་ནང་གི་ཡུར་བའི་ཆུ་ལྟར་འཕྲོ་བ་མི་མངོན་པའོ། །འདི་དུས་ཀྱང་དྲན་པ་ཅུང་ཟད་སྒྲིམ་དགོས། ཉམས་བཞི་བའི་སྐྱེ་ལུགས་ཡིན། དེ་རྒྱུན་མཐུད་པས་ཇི་ཞིག་ན་སེམས་གང་དུ་མི་འཕྲོ་བར་ཉིན་མཚན་ཀུན་ཏུ་གནས་པས་སྐོམ་དང་གོས་ཀྱི་སྲེད་པ་ཡང་མི་འབྱུང་ཞིང་། གཡོ་འགུལ་མེད་པ་ཞག་དང་ཟླ་བ་སྒྲོལ་བར་གནས་པས་དཔེ་རི་བོ་ལྟ་བུ་སྟེ། འདི་ཉེས་ན་ཁ་ཐལ་ན་ཉན་ཐོས་འགོག་པར་འགྲོ། ལེགས་ན་ལུས་ཤིན་སྦྱངས་ཐོབ་ནས་ཞི་གནས་ཕུལ་དུ་ཕྱིན་པ་ཡིན། ཉམས་ལྔ་བའི་སྐྱེ་ལུགས་ཡིན། འདི་དག་ཀྱང་གཙོ་ཆེ་བའི་དབང་དུ་བྱས་ཀྱི། གང་ཟག་སོ་སོའི་རྩ་ཁམས་དང་དབང་པོའི་རིམ་པ་ལ་གཅིག་ཏུ་མ་ངེས་པ་ཡང་སྲིད་དོ། །དེ་ཚོ་དབང་པོ་ཐ་མའི་རབ་ལ་རིམ་པས་ཡོང་མོད་ཀྱིས་འབྲིང་ཐ་གཉིས་ལ་གནས་པ་སྐྱེ་དཀའ་བས། ལུས་གནད་སྔར་ལྟར་ལ། མདུན་དུ་སྨིན་མཚམས་ཀྱི་ཐད་འདོམས་གང་ཙམ་གྱི་སར་ཤིང་བུ་གཅིག་བཙུགས་ནས། དེ་ལ་ཡིད་དམིགས་རླུང་གསུམ་དྲིལ་ལ་གཏད་དེ། སེམས་མི་འཕྲོ་བའི་རྟེན་ཙམ་དུ་བྱས་ལ། སྒྲིམ་ཆེ་ན་སུན་སྐྱེན། ལྷོད་ཆེ་ན་སྒོམ་འཆོར་བས་རན་པར་ཐུན་ཆུང་ལ་གྲངས་མང་བར་བྱ། དེ་ནས་རིམ་པར་ཐུན་ཆེ་ལ་གྲངས་ཉུང་ངུ་བཏང་། སེམས་གནས་པར་སོང་ན་ཤིང་བུ་དེའི་རྩེ་མོར་ཨ་དཀར་པོ་གཅིག་བསམ་ལ་སྔར་ལྟར་བསྒོམ། དེ་ནས་ཐིག་ལེ་དཀར་པོ་དང་སེར་པོ་ལ་སོགས་རིམ་པས་སྤོ་ཞིང་དམིགས་རྟེན་རེ་ལ་ཞག་གཅིག་གམ་གསུམ་ལ་སོགས་པར་མ་སུན་པར་བྱས་ལ་ཅི་རིགས་སུ་བསྒོམ། ཡང་ཤིང་བུའི་ཤུལ་དུ་རྡེའུ་གཅིག་བཞག་ལ་སྔར་ལྟར་རིམ་པས་བསྒོམ། དེ་ནས་རང་ལུས་ཀྱི་གནས་གསུམ་དང་། ནང་གི་མགྲིན་པ་སྙིང་ཁ་རྣམས་སུ་ཡིག་འབྲུ་དང་ཐིག་ལེ་སོགས་གང་རིགས་ལ་དམིགས་རྟེན་བཅས་ཏེ་བསྒོམས་པས་རིམ་གྱིས་གནས་པ་བརྟན་པར་འགྱུར་རོ། ། དེ་ཡང་ངང་ཐུང་མི་བྱ་བར་རིམ་གྱིས་གོམས་བཅུག་ཅིང་མི་སུན་པ་བྱ་བ་གལ་ཆེའོ། །ཞི་གནས་ཀྱི་སྐབས་འདིར་སྡུག་བཙིར་དུ་མ་སོང་བར་སྔར་གྱི་འཇོག་ལུགས་ལ་མ་ཡེངས་པ་རལ་སྐོར་མཁན་གཡུལ་དུ་ཞུགས་པ་ལྟ་བུ་གསུངས། དེ་ཡང་རལ་བསྐོར་མཁན་སྐད་ཅིག་ཀྱང་མ་ཡེངས་ན་མདའ་མཁན་གྱི་མདའ་འཕང་ཚད་རལ་གྲིས་བླངས་ཏེ་ཁོ་ལ་མི་ཕོག་པ་ལ། བུད་མེད་མཛེས་མའི་སྤྱོད་ལམ་ལ་མིག་སྐད་ཅིག་ཡེངས་བས་ཁོ་ལ་མདའ་ཕོག་སྟེ་འཆི་ཁ། མདའ་ཡིས་མ་ལན་ཡེངས་པས་ལན། །ཕྱིན་ཆད་རལ་བསྐོར་མཁན་པོ་ཀུན། །སྐད་ཅིག་ཙམ་ཡང་མ་ཡེངས་ཅིག །ཡེངས་ན་ང་བཞིན་སྲོག་དང་བྲལ། །ཟེར་ནས་ཤིའོ། །དཔེ་བཞིན་དུ་མ་ཡེངས་པ་གལ་ཆེའོ། །ད་ནི་ལྷག་མཐོང་སྟོན་ཏེ། ལྷག་མཐོང་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ཡིན་ཏེ། འདི་མེད་ན་ས་ལམ་མི་བགྲོད་པས་ཕར་ཕྱིན་གཞན་རྣམས་མིག་མེད་པ་དང་འདྲ་བར་བཤད་ཅིང་། རྗེ་སྒམ་པོ་པས། མཉམ་བཞག་གཅིག་གིས་ཞག་བདུན་ཐུབ་པ་བྱུང་གསུངས་པ་ལ་རྗེ་མི་ལས་བསམ་གཏན་བཞིའི་ལྷའི་ཏིང་ངེ་འཛིན་དུ་སྤྲད་པ་ལྟ་བུའོ། ། ལྷག་མཐོང་ལ་གསུམ་སྟེ། ཆོས་རབ་ཏུ་རྣམ་པར་འབྱེད་པའི་ལྷག་མཐོང་ནི། མདོ་སྔགས་ཐམས་ཅད་ཀྱི་དགོངས་དོན་གང་ཡིན་པའི་ལྷག་མཐོང་ཕྱིན་ཅི་མ་ལོག་པ་ཤེས་པ་ལ་ཟེར། སེམས་རང་བཞིན་གྱིས་རྣམ་པར་དག་པའི་གནས་ལུགས་ཇི་ལྟར་ཤེས་པའི་ལྷག་མཐོང་ནི། ད་ལྟ་ངོ་སྤྲད་ཅིང་བསྒོམ་པ་འདི་ཡིན། འདི་གོམས་པས་གནས་ལུགས་ཕྱིན་ཅི་མ་ལོག་པ་མངོན་དུ་གྱུར་པའི་ལྷག་མཐོང་ནི། འབྲས་བུ་སངས་རྒྱས་ཐོབ་པའི་དུས་དེར་འབྱུང་ངོ་། །ད་ཞི་གནས་ཀྱི་སྐབས་ལྟར་རྣམ་རྟོག་མཉམ་བཞག་ཏུ་བཤད་འདུག་ཀྱང་དེ་ངོ་ཤེས་ཙམ་ལ་བཞག་པས་ཆོག །རྣམ་རྟོག་སྣ་ཚོགས་སུ་འགྱུ་ན་ཡང་དེ་ངོ་ཤེས་ཙམ་གྱི་ངང་དུ་འཇོག །མདོར་ན་གང་ཤར་གང་བྱུང་ངོ་ཤེས་ཙམ་གྱི་ངང་དུ་འཇོག་པ་འདི་ཀ་ཡིན། བསྒོམ་ནས་བསྒོམ་རྒྱུ་ཅི་ཡང་མེད་དོ། །སྤང་གཉེན་དུ་བལྟས་ནས་རྩོལ་སྒྲུབ་གང་བྱས་འཁོར་བའི་རྒྱུ་འབྲས་ལས་མ་འདས་སོ། །དེ་ཡང་ཏིང་ངེ་འཛིན་གྱི་མི་མཐུན་པའི་ཕྱོགས་ནི་རྣམ་རྟོག་ཡིན་ལ། དེ་སྤངས་མི་དགོས་ཁོ་བའི་སྟེང་དུ་ཁོ་རང་བཞག་བཞག་པས་རང་དག་ལ་འགྲོ་བ་ཡིན། འཁྲུལ་སྣང་འཛིན་པ་བཟློག་སྤངས་མིན། །མི་མཐུན་པ་ཉིད་གཉེན་པོར་རྫོགས། །ཞེས་སོ། །དབང་པོ་ཐ་མའི་ཐབས་དེ་ལྟར་བྱས་ཀྱང་སེམས་ལས་སུ་མ་རུང་ན་རྣམ་རྟོག་གང་སྐྱེས་དེ་ངོས་བཟུང་ནས་དེ་ཇི་ལྟར་འདུག་དང་། གར་འགྲོ་བལྟས་པས་རང་དག་ཏུ་འགྲོ་ཞིང་། དེའི་རྒྱུན་བསྐྱངས་པས་ཕྱིས་ཆེད་དུ་རྩད་གཅོད་མི་དགོས་པར་རྣམ་རྟོག་ཁོས་ཁོ་རང་གྲོལ་བར་བྱེད་དེ་རང་བྱུང་གི་ཡེ་ཤེས་ཞེས་བྱའོ། །འགྱུ་བའི་རྩ་གདར་བཅད་ན་དེ་གཅིག་པོས་དྲན་རྟོག་དབྱིངས་སུ་ཡལ། ཞེས་པའི་དོན་ཏོ། །སྤྱིར་ན་ཐ་མལ་གྱི་ཤེས་པ་ཞེས་བྱ་བ་རྣམ་རྟོག་གང་ཤར་ཀྱི་ངོ་བོ་ལ་བཟོ་བཅོས་མི་བྱེད་པ་འདི་ལས་མ་ཡེངས་ན་དེ་གཅིག་པུས་ཆོག་སྟེ། དབང་པོ་ཐ་མས་དེ་ལྟར་མི་འོང་བས་རྩོལ་བཅས་ཀྱི་མཉམ་བཞག་སྐྱོང་བ་ཡིན། རྣམ་རྟོག་གང་ཤར་ལ་བལྟས་ཀྱང་ཞི་མ་ནུས་པར་འཕྲོ་ཆེ་ན། ལུས་གནད་བཤིག །འཕྲོ་མཁན་ཁོ་རང་འཕྲོ་བཅུག་ནས་ཁོའི་ངང་དེ་ལ་བལྟས་པས་ཞི་མལ་གྱིས་འགྲོ། འཕྲོ་བ་དང་གནས་པ་གཉིས་ཀ་སེམས་ཡིན་པས་རང་མལ་དུ་གཅིག་ཏུ་འགྱུར་ཏེ། སྒོམ་སྲན་བསྐྱེད་པས་གཏིང་ཚུགས་པར་འགྱུར་རོ། །དེ་ཡང་། ཇི་ལྟར་གཟིང་ལས་འཕུར་བའི་བྱ་རོག་ནི། །བསྐོར་ཞིང་བསྐོར་ཞིང་སླར་ཡང་དེ་རུ་འབབ། ། ཅེས་པའི་དཔེས་སྟོན་ཏེ། རྒྱ་མཚོའི་ཟུར་ནས་བྱ་རོག་གི་རྐང་པར་ལྕགས་ཐག་ཕྲ་མོས་གཏོང་དགོས་ལ། མཚོ་དཀྱིལ་དུ་སླེབ་ནས་ཡར་འཕུར་ན་ནམ་མཁའ་སྟོང་པ་ཕར་ཚུར་ནི་བར་སྣང་སྟོང་པ། འོག་ཏུ་ནི་ཆུ་ལས་མ་འདས་པས་ཡར་མར་ཕྱོགས་མཚམས་གང་དུ་འཕུར་ཀྱང་འགྲོ་ས་དང་སླེབ་ས་མ་རྙེད་པས། སྔར་གྱི་ཤུལ་གཟིང་ཐོག་ཏུ་འབབ་པ་བཞིན་དུ། རྣམ་རྟོག་ཁོ་རང་འཕྲོ་རུང་སྟོང་པ། མི་འཕྲོ་རུང་སྟོང་པ། གནས་རུང་འགྱུ་རུང་སྟོང་པ་ལས་མ་འདས་པས། ཁོ་རང་གང་ཤར་དེ་ཁའི་ངང་དུ་བབས་པས་དབང་པོ་ཐ་མས་ཀྱང་རབ་ཀྱིས་སོར་འཇོག་ཏུ་འགྱུར་བས་ནན་ལྟར་གཟབ་པས་དཔྱད་ནས་འདི་ལ་བསླབ་ན་ལེགས་སོ། །དེ་ལྟར་དབང་པོ་རབ་འབྲིང་ཐ་གསུམ་དགུ་ཕྲུགས་སུ་ཕྱེ་ནས་ཉམས་སུ་ལེན་ཚུལ་བསྟན་པ་སྟེ་རྫོགས་ཆེན་སྙན་བརྒྱུད་ལས། དབང་པོ་རབ་ལྟ་ཐོག་ནས་བསྒོམ་ནུས། འབྲིང་བསྒོམ་ཐོག་ནས་བསྒོམ་ནུས་ལ། ཐ་མ་སྤྱོད་ཐོག་ནས་སྒྲུབ་ནུས་པའོ། །ཞེས་གསུངས་པའི་དགོངས་པའོ། །དེ་ཡང་བསྒོམ་ལ་སྙིང་རུས་བསྐྱེད་དགོས་སྟེ། ཆོས་ཟབ་ཀྱང་མ་སྒོམ་ན་གདམས་ངག་ཟབ་མོ་དཔེ་ཆའི་ལོགས་ལ་ལུས་ཟེར་བ་དེ་ཡིན་མོད། ད་རེས་སྒོམ་རྒྱུད་ལ་ཐེབས་ཀྱང་། དུས་རྒྱུན་དུ་མ་བསྒོམ་ན་བློ་དྲེད་ཆོས་དྲེད་ཉམས་ལེན་དྲེད་ནས་འཆི་དུས་མི་ཕན་པས་གཟབ་དགོས། རྒྱལ་བ་རྒོད་ཚངས་པས། ཕྱི་འཚམས་རི་ཁྲོད་དུ་སྡོད་ཚུགས་པ། ནང་འཚམས་སྤྱིལ་བུར་སྡོད་ཚུགས་པ། གསང་འཚམས་མལ་དུ་སྡོད་ཚུགས་པ། གཉིས་མེད་ལྟ་བའི་སྟེང་དུ་སྡོད་ཚུགས་པ། ཡེངས་མེད་བསྒོམ་པའི་སྟེང་དུ་སྡོད་ཚུགས་པ། ཆགས་མེད་སྤྱོད་པའི་སྟེང་དུ་སྡོད་ཚུགས་པ་དང་དྲུག་ཚང་དགོས་གསུངས། སྤྱིར་སྒོམ་ལ་ཕར་འཇུས་དང་ཚུར་འཇུས་གཉིས་ཡིན། སེམས་ལས་སུ་མ་རུང་བར་ལ་ཕར་འཇུས་བྱེད་དགོས་པས་དྲན་པ་དང་མི་བྲལ། དེ་ནས་རྣམ་རྟོག་ཁོ་རང་གིས་ཚུར་འཇུས་ནས་གང་ཤར་ཐམས་ཅད་སྒོམ་དུ་འགྲོ་བ་ཡིན། དེ་ཡང་ཐ་མལ་གྱི་ཤེས་པ་ཁོ་རང་ལ་འཛིན་པ་མེད་པའི་ངང་དུ་འགྲོ་བ་ཡིན་ནོ། །བསྒོམ་ཆེན་པས་བསྒོམ་བཏང་ཡང་། བསྒོམ་གྱིས་བསྒོམ་ཆེན་པ་མི་གཏོང་བའི་དུས་ཟེར། དེ་འོང་པ་ལ་བར་མ་ཆད་དུ་བསྒོམ་དགོས། མ་བསྒོམ་ན་ད་ལྟ་ཉམས་མྱོང་ཕྲན་བུ་རེ་སྐྱེས་ཀྱང་ཡལ་འགྲོ་བས་བསྒོམ་འཇའ་ཚོན་མ་བྱ་བ་ཡིན། ལྕགས་ཀྱུ་མ་བྱ་བ་དྲན་པས་ཟིན་དུས་ཡོད་ལ། མ་ཟིན་ན་མེད་པ་ཡིན་དེ་ལ་མ་ཡེངས་པ་བྱར་བསྒྲིམ་དགོས། ཡ་བྲལ་མ་བྱ་བ། དྲན་པ་ཡོད་ལ་སྙིང་རྗེ་དང་མ་འབྲེལ་བ་ཡིན། དེ་ལ་ཐུན་འགོར་སེམས་ཅན་ཐམས་ཅད་ཀྱི་དོན་དུ་བསྒོམ་མོ་སྙམ་པ་དང་། ཐུན་མཐར་དགེ་བས་སེམས་ཅན་ཐམས་ཅད་སངས་རྒྱས་ཐོབ་པར་གྱུར་ཅིག་པར་བསྔོ། ཨོ་རྒྱ༵ན་ཆེན་པོས། སྙིང་རྗེ་མེད་ན་ཆོས་ཀྱི་རྩ་བ་རུལ། །ཞེས་གསུངས་པས་གལ་ཤིན་ཏུ་ཆེ། བདག་མེད་མ་བྱ་བ་སྒོམ་སྐྱེས་ནས་མ་བསྐྱངས་པར་བོར་བ་ལ་ཟེར། བློ་ནང་དུ་བཀུག་ནས་སྒོམ་དུ་བཅུག །རེས་འཇོག་མ་བྱ་བ་རེས་སྒོམ་འོང་། རེས་མི་འོང་བ་དེ་ཡིན། དེ་ལ་བྱུང་མ་བྱུང་ཁྱད་པར་མེད་པའི་ཐོག་ཏུ་འཇོག་ཅིང་ཉམས་སུ་བླངས། འཁོར་ཡུག་མ་བྱ་བ་ཉིན་མོའི་དྲན་པ་མཚན་མོ་ཡང་འོང་བ་དེ་ཡིན། འདི་སྒོམ་གྱིས་ཚུར་འཇུས་པའི་དུས་དེ་ཡིན། རྣལ་འབྱོར་མཆོག་ཅེས་པ་རྫོགས་པ་ཆེན་པོ་བྱ་རྩོལ་དང་བྲལ་བའི་དུས་ཞེས་བྱ་བ་དེ་ཡིན། ཕྱག་རྒྱ་ཆེན་པོ་བསྒོམ་མེད་ཟེར་བ་ཡིན་ནོ། །ཡང་གང་ཟག་རིགས་ཆད་ཅེས་པ་ཁྲེགས་ཆོད་ཐོད་རྒལ་གྱི་སྣོད་དུ་མ་གྱུར་པ་དག་ཀྱང་ཡོད་པས། དེ་འདྲའི་རིགས་ལ་དབང་བསྐུར་རྩ་རླུང་སྦྱངས་ནས་ལས་ཀྱི་ཕྱག་རྒྱ་གཏད། དབང་པོ་གཉིས་སྦྱོར་གྱིས་དགའ་བཞི་འགྲོས་འདེད་ཀྱིས་བདེ་བའི་ངོ་བོ་སྟོང་པར་ངོ་སྤྲོད་དེ་གོང་བཞིན་སེམས་ཁྲིད་ལ་འཇུག །བར་གསུངས་ལ། དེའང་མི་ནུས་པ་ལ་ནི་བཏགས་གྲོལ་མཐོང་གྲོལ་མྱོང་གྲོལ་ལ་སོགས་པའི་ཐབས་ཀྱིས་རིམ་གྱིས་གྲོལ་བར་འགྱུར་བའི་ཚུལ་ལ་འཇུག་པར་བྱའོ། །སྤྱིར་སེམས་ཕྱོགས་དང་། ཕྱག་རྒྱ་ཆེན་པོ་ནི། ཡེ་ཤེས་སྤྱིར་གསལ་ཞེས་བྱ་སྟེ། བརྟན་པ་མ་ཐོབ་བར་དུ་ཡིད་དཔྱོད་འཛིན་པའི་ལྟ་བ་ཞེས་བཤད། འོན་ཀྱང་རྫོགས་ཆེན་པ་དེ་ངོ་སྤྲོད་ནས་བསྒོམ་ན་ཕྱི་སྣང་བའི་ཡུལ་དང་། ནང་འཛིན་པའི་སེམས་ཀྱི་འཕྲོ་གནས་ཐམས་ཅད་ཡེ་ཤེས་སུ་འཆར་བས། རྫོགས་ཆེན་རང་སྣང་རིས་མེད་ཀྱི་དགོངས་པ་ཟེར་གཡེར་པོ་ཆེ་བྱེད། གང་ལྟར་རུང་སྟེ། སེམས་ངོ་འཕྲོད་ཕྱིན་ཆད་སྣང་ཐོག་ཏུ་ཉམས་ལེན་སྐྱོང་བ་ལ། ཐོད་རྒལ་ལ་ཞུགས་ཏེ་མུན་ཁྲིད་དམ། སྣང་ཁྲིད་བྱས་ནས་འོད་གསལ་སྟོང་གཟུགས་ཀྱི་ཐོག་ཏུ་ཉམས་ལེན་བསྐྱངས་ན་རང་བྱུང་གི་ཡེ་ཤེས་མངོན་སུམ་དུ་འགྱུར་ཏེ། ཆོས་ཉིད་ཀྱི་བར་དོ་ལ་གྲོལ་བར་ཐེ་ཚོམ་མེད་དོ། །བདག་ལྟ་བུའི་བསྒོམ་པའི་ཉམས་མྱོང་མེད་ཅིང་། ཐོས་པ་ཕལ་ཆེར་ཀྱང་བརྗེད་པའི་མན་ངག་ལ་མྱོང་བ་མེད་པ་འདི་འདྲ་བ། རྗེ་འབའ་ར་བས། བསྒོམ་པའི་ཉམས་མྱོང་མེད་པའི། །ཡིག་ནག་དཔེ་ཆའི་སྟེང་ནས། །བསྒོམ་ཁྲིད་འདེབས་བློ་བྱས་ཀྱང་། །ལམ་ལོག་གོམ་པར་སྒྱུར་ཏོ། །ཞེས་གསུངས་པ་བཞིན་དང་། ཡང་དེས་ས་ཐོབ་ཡོན་ཏན་མེད་ཀྱང་། །བཟོད་ཐོབ་ལས་བཞི་འགྲུབ་ཅིང་། ། སྙིང་རྗེའི་རྩ་བ་བརྟན་པས། །འགྲོ་དོན་བྱས་ཀྱང་ཆོག་གོ །ཞེས་གསུངས་པས། བཟོད་པ་མ་ཐོབ་ཀྱང་རུང་རྒྱུད་ལ་སྙིང་རྗེ་ཅུང་ཟད་ཅིག་ཡོད་པ་དང་། ཁྱད་པར་དུ་སེམས་དང་ཆོས་སུ་འདྲེས་ཤིང་། ཏིང་འཛིན་ལས་སུ་རུང་བ་དང་། སངས་རྒྱས་ལྟ་བུའི་བླ་མ་དམ་པ་རྣམས་ཀྱི་གསུང་རྒྱུན་གང་དྲན་བཀོད་པ་ཡིན་ནོ། །སློབ་དཔོན་ཤྲཱི་སེང་ཧས། དང་པོ་ཐུག་སར་གཏུག ། བར་དུ་འཇོག་སར་ཞོག །ཐ་མར་འགྲོ་སར་ཐོང་གསུངས། དེ་ལ་དང་པོ་ནི་ཁྲིད་སྟོན་ཤེས་པའི་བླ་མ་ལ་གཏུགས་ནས་སེམས་ཀྱི་རྩད་གདར་བཅད་དེ་ཞུན་གཏུག་བྱེད་པའོ། །བར་དུ་གང་ཤར་བཟོ་བཅོས་མེད་པར་འཇོག་པའོ། །ཐ་མ་ཉམས་མྱོང་ཏིང་ངེ་འཛིན་གྱི་རོ་ལ་ཞེན་པ་མེད་པར་འཛིན་མེད་དུ་གཏོང་བའོ། །རྫོགས་ཆེན་སེམས་སྡེའི་ཁྲིད་ཡིག་ལས་བཏུས་པའོ། ། ཀུན་ལ་ཕན་པར་ཤོག ། ༈ གཞན་ཡང་ཞལ་ཤེས་འཐོར་བུ་ནི། ཉམས་རྟགས་སྣ་ཚོགས་སུ་ཤར་བ་བསྒོམས་པའི་ལག་རྗེས་བཟང་རྟོག་གི་མཐུ་བརྟས་པ་ཡིན་ཀྱང་རྟག་པ་མེད་པས་བདེན་འཛིན་མ་ཞུགས་པ་གནད་དུ་ཆེ། ད་ལྟ་གཟུང་དྲན་ལ་མ་ལྟོས་པར་གང་ཤར་རང་གྲོལ་རྗེན་པར་འགྲོ་བ་དེ་དག་རྣམ་དག་ལེགས་པའི་ལམ་དུ་གོ །བླ་མའི་སྐུའི་སྣང་བ་དང་ཡི་དམ་གྱི་བསྐྱེད་རིམ་སོགས་ཀྱང་སྣང་མེད་དུ་ཝ་ལེ་རྗེན་ནེ་བའི་ངང་ནས་བཟླས་པ་སོགས་བྱེད་པ་ལས། སྐུའི་སྣང་བ་དེ་དག་སྣང་ལ་རང་བཞིན་མེད་པ་གསལ་ལ་རྟོག་པ་མེད་པ། བདེ་ལ་ཞེན་པ་མེད་པ་སྟེ་མཚན་ཉིད་གསུམ་ལྡན་སྟོང་པ་ཉིད་ཀྱི་རང་གདངས་སུ་མ་འགགས་པར་ས་ལེར་སྣང་བའི་ངང་ནས་བཟླས་བརྗོད་སོགས་གནང་ན་རྩལ་ཆེ་ཞིང་ཆེད་དུ་བླ་མ་སྤྱི་བོར་བསྒོམ་པ་སོགས་མི་དགོས། ལམ་དུས་ཀྱི་གཞི་ལམ་འབྲས་བུའི་བཞག་མཚམས་ནི། ལམ་གྱི་དུས་སུའང་སེམས་ཉིད་རྩ་བྲལ་རིས་མེད་ཁྱབ་གདལ་དེ་གཞི། དེའི་ངང་ལ་བསལ་བཞག་མེད་པར་ཡུལ་མེད་རང་གསལ་དུ་སྐྱོང་བ་དེ་ལམ། དེས་འབྲས་བུའི་རྫོགས་རིམ་གྱི་ལྷ་སྐུ་ཞུ་བདེ་དང་མཚུངས་ལྡན་དུ་རང་ཤར་བ་ནས་ལམ་གྱི་འབྲས་བུའི་གྲངས་སུ་འགྲོ་བ་ཡིན་ནོ། ། དེ་འང་རྫོགས་ཆེན་གྱི་གཞུང་ནས་ངོ་རང་ཐོག་ཏུ་སྤྲད་པ་ཞེས་པ་ནི། དུས་གསུམ་རྟོག་པ་དང་བྲལ་བའི་ད་ལྟའི་ཤེས་པ་ལ་བཅོས་སླད་མ་བྱས་པར་གཉུག་མའི་ངང་དུ་ཝལ་ལེ་སང་ངེ་། ཆམ་བརྡལ་བ་ཉིད་བཙན་ཐབས་སུ་ངོས་བཟུང་ནས་རང་བྱུང་གི་ཡེ་ཤེས་ངོ་སྤྲོད་པ་དང་། ཐག་གཅིག་ཐོག་ཏུ་བཅད་པ་ཞེས་པ་ནི་དྲན་བསམ་སྔ་མ་འགགས། ཕྱི་མ་མ་སྐྱེས། ད་ལྟའི་ཤེས་པ་རྟོག་བཅས་དྲན་བསམ་གྱི་བློ་འགགས་ནས་བཞི་ཆ་གསུམ་བྲལ་གྱི་རིག་པ་སོ་མ་རྣམ་པར་མི་རྟོག་པའི་ཡེ་ཤེས་རིག་གོ །སང་ངེ་། ཡེར་རེ། ཝལ་ལེ་བར་གནས་པ་འདི་ཉིད་དོ། ། བཞི་ཆ་གསུམ་བྲལ་ཞེས་པ་ནི། འདས་མ་འོངས་ད་ལྟ་བ་སྟེ་རྟོག་བཅས་ཀྱི་དུས་གསུམ་དང་། རྟོག་མེད་ད་ལྟ་བའི་དུས་གསུམ་དྲན་བསམ་གྱིས་བཅོས་སླད་མེད་པའི་སོ་མ་སྟེ་ཆ་བཞི་ལས་རྟོག་བཅས་ཀྱི་དུས་གསུམ་དང་བྲལ་བའི་རྣམ་པར་མི་རྟོག་པའི་དུས་དེ་བཞི་ཆ་གསུམ་བྲལ་ཆོས་སྐུ་བློ་འདས་ཀྱི་དགོངས་པའོ། །གདེངས་གྲོལ་ཐོག་ཏུ་བཅའ་ཞེས་པ་ནི་གང་ཤར་གྱི་རང་ངོ་ལ་བཅོས་བསླད་མེད་པར་ཅེར་རེ་བལྟས་ཏེ་དེའི་ངང་ལ་གློད་པས། དྲན་རྟོག་རྗེས་མེད་དུ་ཡལ་བས་རྦ་རླབས་ཆུར་ཐིམ་པ་ལྟར་གང་ཤར་རང་གྲོལ་སྤང་གཉེན་དང་བྲལ་བའི་ངང་ལ་གདེངས་འཆོས་པའོ། ། ༈ རྫོགས་ཆེན་སེམས་ཀློང་གཉིས་ཀྱི་གནད་མན་ངག་གི་སྡེར་འདུས་སྟེ། ཀ་དག་གི་ངང་ལ་མཉམ་པར་བཞག་པས། སྣོད་བཅུད་ཀྱི་སྣང་བ་ཐམས་ཅད་སེམས་ཉིད་རང་བྱུང་གི་ཡེ་ཤེས་བརྗོད་བྲལ་ཆོས་སྐུར་ཐག་ཆོད་པས་སེམས་སྡེའི་གནད་འདུ་ལ། དེ་ཉིད་གང་ལའང་བྱ་རྩོལ་བྲལ་བའི་ཆོས་ཉིད་ཀྱི་ཀློང་དུ་ཐག་ཆོད་པས་ཀློང་སྡེ་འདུ། དེའི་ཕྱིར་སེམས་ཀློང་གཉིས་ཀྱི་ཉམས་ལེན་ཐམས་ཅད་མན་ངག་གི་སྡེའི་ཁྲེགས་ཆོད་ཀྱི་ཉམས་ལེན་གྱི་ཁོངས་སུ་འདུས་པས་རྫོགས་པ་ཆེན་པོའི་ལམ་གྱི་མཆོག་རྩེ་མོ་ནི་མན་ངག་གི་སྡེ་སྟེ། འཁོར་འདས་སྤང་བླང་དང་བྲལ་བའི་ཡིན་ལུགས་གནད་ཐོག་ཏུ་འབེབས་པའི་ཐབས་ཀྱིས་བློ་འདས་རང་བྱུང་གི་ཡེ་ཤེས་སྐད་ཅིག་ལ་འཆར་བར་བྱེད་པས། དོན་ལ་ཆོས་ཐམས་ཅད་ཀྱི་ཆོས་ཉིད་རང་གསལ་གྱི་གནས་ལུགས་མངོན་སུམ་དུ་གཏན་ལ་ཕབ་ནས་ཡེ་ཤེས་འོད་གསལ་ལྷུན་གྲུབ་གཞི་གནས་སུ་ངོ་སྤྲོད་པའི་ཐབས་མཆོག་བླ་ན་མེད་པའོ། །ཚོགས་དྲུག་གི་སྣང་བ་གང་ཤར་རང་གྲོལ་དུ་ལམ་དུ་འཁྱེར་བ་དང་ལྷ་སྔགས་སུ་རྒྱས་བཏབ་པ་གཉིས་སྔ་མ་ནུས་པ་ཆེ་མོད། འོན་ཀྱང་རང་གྲོལ་གཉུག་མའི་རྩལ་སྣང་ལྷ་སྔགས་ཀྱི་རང་གདངས་སུ་བྱ་རྩོལ་མེད་པར་ལམ་དུ་ཁྱེར་ཤེས་པ་ཟུང་འབྲེལ་གྱི་ལམ་ཁྱད་པར་ཅན་དུ་འགྲོ་བ་ལགས། ༈ རིག་པ་རྗེན་པར་འཆར་སྒོ་སྣ་ཚོགས་སུ་འཆར་ཡང་གང་ཤར་ཐམས་ཅད་དྲན་པ་ཁོ་རང་ལས་མ་གཡོས་པ་གཟུང་དྲན་ལ་མ་ལྟོས་པར་སྐྱོང་ཐུབ་པ་དེ། རྫོགས་ཆེན་པའི་ལུགས་ལ་ཉམས་ཀྱི་སྐྱེ་རིམ་བཞི་ལས་གནས་པའི་ཉམས་དང་། ཕྱག་ཆེན་པའི་ལུགས་ཀྱི་རྩེ་གཅིག་ཏུ་གནས་པ་ཕྱོགས་འདྲ་བས་སེམས་ཀྱི་ངོ་བོའི་ཕྱོགས་མཐོང་ཙམ་ལོས་ཡིན། འོན་ཀྱང་བརྟན་པ་ཐོབ་མ་ཐོབ་ཙམ་ལས་འདི་བས་ལྷག་པ་ཞིག་མཐོང་རྒྱུའམ་རྟོགས་རྒྱུ་མེད་དམ་སྙམས་པ་དེ། ཡིན་ལུགས་དང་མཐུན་པའི་གོ་མྱོང་གི་ཆ་ནས་བློ་མ་འཁྲུལ་པའི་ཡེ་ཤེས་འདྲ་ཡང་། འདི་ལས་ལྷག་པ་མེད་དམ་སྙམ་པའི་ཆོས་ཀྱི་བདག་འཛིན་གྱི་བློ་དང་བཅས་པའི་རྣམ་རྟོག་ཅན་དུ་འགྱུར་བས། རང་གི་རིག་པ་ལ་རྗེན་ཅེར་བལྟས་པའི་དུས་ཀྱི་གཤིས་སྤྲོས་བྲལ་ལ་བློས་གང་དུ་ཡང་གཟུང་དུ་མེད་པ་དེ་དང་། གོ་བའི་སྟོང་ཉིད་གཉིས་ལ་མྱོང་ལུགས་མི་འདྲ་བ་མཁྱེན་དགོས། འོན་ཀྱང་སེམས་ཀྱི་ངོ་བོ་མཐོང་བ་ཞེས་པ་ཡང་དོན་སྤྱི་ཙམ་མཐོང་བའི་དཔེའི་ཡེ་ཤེས་ལ་རང་ངོ་སྤྲོད་པའི་ཐབས་མཁས་ལས། རང་རིག་པའི་ཡེ་ཤེས་རྣམ་པར་མི་རྟོག་པའི་ངོ་བོ་རང་མཚན་པ་ནི་འཕགས་པའི་ས་ཐོབ་ན་མ་གཏོགས་སྒོམ་བྱུང་ལ་རང་དབང་འབྱོར་བའི་སྤྱོད་ལམ་ངེས་འབྱེད་ཀྱི་དུས་སུའང་མེད་ན་ཚོགས་ལམ་པ་དང་ལམ་མ་ཞུགས་ཀྱི་བསམ་གཏན་པའི་རྒྱུད་ལ་ལྟ་ཅི་སྨོས། དེས་ན་ཤན་ཕྱེད་དགོས། རྨི་ལམ་རང་ངོ་ཤེས་པའི་དྲན་པའི་ངང་ནས་རྩལ་སྦྱོང་དང་རྨི་ལམ་མི་སྙམ་པའི་དྲན་ཤེས་མེད་པར་རྩལ་སྦྱོང་ཉིན་མོ་ལས་གསལ་དངས་ཆེ་བ་ཡོང་བ་དེ་རྨི་ལམ་ཟིན་སྦྱོང་སྤེལ་སྒྱུར་གྱི་ངོས་ནས་སྔ་མ་མི་འགྱུར་ཞིང་བརྟན་ལ་ཕྱིས་བོགས་ཆེ། ཕྱི་མ་དེ་ཉིན་མོའི་དགེ་སྦྱོར་གྱི་ཤུགས་ཀྱིས་སླེབ་པའི་ཉམས་སྣང་ཙམ་དུ་ཟད་པས་རྨི་ལམ་ཟིན་སྦྱོང་བརྟན་ཆགས་ཀྱི་གནད་དུ་འགྲོ་བ་ཉུང་། ཕལ་ནས་གཉིད་འཐུག་གི་སྐབས་སུ་གསལ་སྟོང་གི་རིག་པ་རྣམ་རྟོག་གི་གཡའ་དང་བྲལ་ཞིང་རང་ངོ་སྐྱོང་ཐུབ་ལ། དེའི་རྩལ་སྣང་རྨི་ལམ་གྱི་སྤྲུལ་བསྒྱུར་དུ་ལྡང་ཐུབ་པ་ཞིག་ཀྱང་འབྱུང་སྟེ། གཉིད་ཀྱི་འོད་གསལ་ལ་ཟིན་པའི་གྲངས་སུ་འགྲོ་ཞིང་། དེ་འདྲ་དེ་རྨི་ལམ་དུ་ལངས་ནས་ཀྱང་རྨི་ལམ་དུས་ཀྱི་དྲན་ཤེས་ཀྱིས་མ་ཟིན་ནའང་གནད་དུ་འགྲོ། ཐོད་རྒལ་གྱི་དུས་སྟོང་གཟུགས་ཀྱི་རྟགས་སྣང་ལ་ལྟ་སྣང་ཀྱི་ལམ་ནས་དྲངས་ཏེ་རྣམ་པར་རྟོག་མེད་ཀྱི་ངང་དུ་འཇོག་པ་དེ་ལ་གོམས་པས་ཞི་གནས་ཙམ་ལས་སོ་སོར་རྟོག་པའི་ཤེས་རབ་ཀྱི་དཔྱད་པ་མེད་པས་ལྷག་མཐོང་མི་འགྲོ་བར་སྙམས་མཁན་མང་ནའང་། རྣམ་པར་མི་རྟོག་པའི་ཏིང་ངེ་འཛིན་ལ་གོམས་པ་ལས་མི་རྟོག་པའི་ཡེ་ཤེས་སྐྱེས་པར་གྱུར་པ་དེ་ཀ་སོ་སོར་རྟོག་པའི་ཤེས་རབ་ཀྱི་ལྷག་མཐོང་སྐྱེས་པ་ཡིན་པར་དུས་འཁོར་སོགས་ལས་ཀྱང་བཤད་ཅིང་། ཁྱད་པར་རྫོགས་པ་ཆེན་པོ་རང་གི་ལུགས་ལ། ལུས་བཞུགས་སྟངས། མིག་ལྟ་སྟངས། རླུང་མི་འགུལ་བ་གསུམ་ལ་གཞི་བཅས་པས་རིམ་པར་རྩ་རླུང་ལ་གནད་དུ་བསྣུན་པས་རྣམ་རྟོག་འགགས། མངོན་སུམ་ཡུལ་ལ་གསལ་བས་ཡིད་དཔྱོད་ཚིག་གི་སྒྲོ་འདོགས་དང་བྲལ། ཆོས་ཉིད་རང་ངོར་གནས་པས་མ་བུ་འདྲེས་ཏེ་གདོད་མའི་དབྱིངས་སུ་ལ་ཟློ་བ་ཡིན་པས་ཐིག་ལེ་ལུ་གུ་རྒྱུད་བཅས་པའི་རྟགས་སྣང་ལ་ལྟ་སྟངས་ཀྱིས་ཅེར་རེ་གཏད་དེ། རྟགས་སྣང་དེ་ཁའི་རང་བཞིན་ཧྲིག་གེ་བ་ངང་ལ་བཟོ་མེད་ཡེངས་མེད་དུ་འཇོག་པ་ཁོ་ནས་གནད་དུ་འགྲོ་བ་ལགས། ཆོས་ཉིད་བར་དོའི་སྐབས་ཀྱི་བསམ་གཏན་གྱི་ཞག་གི་ཚད་མཉམ་རྗེས་འདྲེས་ནས་ཏིང་ངེ་འཛིན་ཐུན་ཚོད་ལས་འདས་པ་ཡེ་ཤེས་ལྷུན་གྲུབ་ཀྱི་ཉམས་སྐྱེས་པ་ལ་མཐའ་འདི་ཙམ་ཞེས་ཚོད་འཛིན་དཀའ་མོད། སྤྱི་ཙམ་དུ་བསམ་གཏན་ལ་མཉམ་པར་བཞག་པས་རྣམ་རྟོག་གིས་བར་མ་ཆོད་པར་ཇི་ཙམ་གནས་པའི་ཡུན་དེ་ཙམ་དུ་འཇོག །ཆོས་ཉིད་བར་དོར་དེ་གྲོལ་ནུས་ཀྱི་ཚད་འོད་གསལ་སྣང་བ་བཞི་ལ་ད་ལྟ་ནས་རང་བྱན་ཆུད་པ་ཞིག་གལ་ཆེ་བས། རྨི་ལམ་གྱི་ཉམས་ལེན་ཚད་དུ་སོང་མ་སོང་གིས་འཛིན་པ་ལགས། མཉམ་བཞག་གི་ངོར་འཕྲོ་བར་སྣང་ཡང་དྲན་པ་ཁོ་རེ་འཁྱོངས་ཙམ་བདེ་གསལ་གྱི་ཉམས་དང་བཅས་ཤར་བ་དེ་ལ་མྱོང་བྱ་མྱོང་འདོད་ཀྱི་འཛིན་པ་མ་ཞུགས་ན་གནད་དུ་འགྲོ། གང་ཤར་རང་སེམས་སུ་ཐག་ཆོད་ཅིང་སེམས་ཉིད་རྩ་བྲལ་གསལ་སྟོང་འཛིན་མེད་དུ་ཤར་བས་མཉམ་བཞག་གི་ངོ་ནས་ལུས་སྣང་སེམས་སོགས་ཐ་དད་དུ་འཛིན་པ་རང་དག་ནས་ཕྱི་ནང་བར་མེད་ཧར་སང་རྗེན་པར་གནས་པས་རྣམ་རྟོག་རང་ག་མ་མི་འཆར་ལ། ཤར་ཡང་ངོ་ཤེས་ཙམ་གྱིས་ཆོག་པར་སྣང་བ་དེ། སྣང་སེམས་འདྲེས་ཏེ་སྣང་བ་སྒོམ་དུ་ཤར་ཤར་འདྲ་ཡང་ད་དུང་སྟོང་ཉིད་གཟུང་དྲན་མ་ལ་ལྟོས་དགོས་མི་དགོས་ཤན་འབྱེད་དགོས་པས། སྣང་རིག་སོ་མ་འདི་རང་རིག་རང་གསལ་ལ་རྩོལ་སྒྲིབ་དང་དགག་སྒྲུབ་བྲལ་བ་ཞིག་བྱུང་ན་སྣང་བ་སྒོམ་དུ་ཤར་བས་གཟུང་དྲན་ལ་རག་མ་ལུས་ལགས། དེས་བྱ་རྩོལ་བཅས་ཀྱང་འཛིན་པ་མ་ཞུགས་གང་ཤར་རང་གྲོལ་དུ་ཡངས་སུ་འཆར་ན་གནད་དུ་འགྲོ་ཞིང་། ལར་ནི་ཅོག་བཞག་གསུམ་གྱིས་རང་གི་དགེ་སྦྱོར་རྒྱུན་བསྐྱངས་ཏེ་དེ་རྟོགས་པའི་ངོ་བོ་ལ་ཅེར་གྲོལ་གྱིས་བལྟས་ནས། ཕྱི་ཆོས་ཅན་ལ་བལྟས་པས་འཁྲུལ་སྣང་བདེན་མེད་དུ་སྣང་བ་སྒྱུ་མ་ལྟ་བུར་རྟོགས་པའི་ངང་ལ་ཞེན་འཛིན་མེད་པར་གློད། ནང་ཆོས་ཉིད་ལ་བལྟས་པས་ཡུལ་མེད་ནམ་མཁའ་ལྟ་བུར་རྟོགས་པའི་ངང་ལ་འཛིན་མེད་དུ་གློད། གསང་བ་རིག་པའི་ངོ་བོ་ལ་བལྟས་པས་སྟོང་གསལ་འགགས་མེད་དུ་རྟོགས་ནས་དེའི་ངང་རྩོལ་སྒྲུབ་མེད་པར་གློད་དེ་མཉམ་པར་བཞག་པས་གནས་སྐབས་སུ་སྤྱན་དང་མངོན་ཤེས་སོགས་ཡོན་ཏན་དཔག་ཏུ་མེད་པ་ལ་རང་དབང་བསྒྱུར་ནུས་ཤིང་ཉོན་མོངས་པ་རང་སར་གྲོལ་བ་ལ་དཀའ་ཚེགས་མེད། དེའང་ལས་དང་པོ་དང་ཡོངས་སུ་སྦྱང་བ་བྱས་པ་དང་། གོམས་པ་ཀློང་དུ་གྱུར་པའི་ཡོན་ཏན་རྣམས་སྐྱེ་རིམ་གྱིས་འཕེལ་ནས་སངས་རྒྱས་ཀྱི་ཡེ་ཤེས་འགྲུབ་པའི་ཐབས་ཟབ་མོར་འགྲོ་ཞེས་རྗེ་བླ་མ་དམ་པའི་ཞལ་ནས་མང་དུ་ཐོས་ཤིང་གསུང་དེ་ལ་ཡིད་ཆེས་ཀྱིས་ཚད་མར་བཟུང་ནས་གཞན་ལའང་འདོམས་པ་ལགས་པས་ཐུགས་ལ་བཅག་འཚལ། ལྟ་བའི་ངོ་བོ་གཉིས་ཆོས་སུ་སྣང་བ་ཐམས་ཅད་སོ་སོར་མ་དམིགས་པར་རང་རིག་ཡེ་གྲོལ་ལྷུན་གྲུབ་སྟོང་གསལ་སྤྲོས་བྲལ་རྒྱ་ཆད་ཕྱོགས་ལྟུང་བྲལ་བ་དུ་མ་རོ་གཅིག་ཏུ་རྟོགས་པས་ཅི་ལའང་ཡ་ང་བག་ཚ་མེད་པར་སྣང་ཡང་། ཡུལ་ལ་བརྟེན་ནས་ཆགས་སྡང་སོགས་འཆར་འཆར་འདྲ་བ་བྱུང་བ་བདག་འཛིན་གྱི་བློ་མ་ནུབ་ཀྱི་བར་ལྟ་བའི་གོ་ཡུལ་བཟང་ཡང་མྱོང་ཐོག་ཏུ་དེ་དང་འགལ་བ་ལྟར་སྣང་བའང་ཆོས་ཉིད་པས། དེ་ཚེ་གང་ཤར་རང་གྲོལ་རྗེན་པར་ལམ་དུ་ཁྱེར་བས་གནད་དུ་འགྲོ། དེས་ན་གྲུབ་མཐའི་རྟོག་དཔྱོད་དང་། ཞེན་པའི་སྣང་ཡུལ་དང་། ཡིད་ཀྱི་སྤྱོད་ཡུལ་ལས་འདས་པའི་རང་བཞིན་མཐའ་གྲོལ་ཀློང་ཡངས་ཆེན་པོར་ཡེ་ནས་གནས་པ་ལྟར་དེའི་ངང་བསྐྱངས་པ་གནད་དུ་ཡིན། གང་ལྟར་ཡང་དབྱར་དུས་ཀྱི་ས་གཞི་ལ་མྱུ་གུ་གང་ཡང་སྐྱེ་བ་ལྟར་རྣལ་འབྱོར་པའི་ཉམས་ལ་མཐོ་དམན་མཐའ་གཅིག་ཏུ་མ་ངེས་པའི་བཟང་རྟོག་ངན་རྟོག་གིས་བསྡུས་པའི་རྟོག་པའི་རི་མོ་ལྟ་ཅི་སྨོས། མི་རྟོག་པའི་རང་གདངས་ཀྱི་རྩལ་ལ་མཐའ་དང་བྲལ་བའི་ལྟ་བ། གཉེན་པོས་མ་བཅིངས་པའི་སྒོམ་པ། གང་ཤར་རང་གྲོལ་དུ་གཏོང་བའི་སྤྱོད་པ། རེ་དོགས་གཉིས་འཛིན་དང་བྲལ་བའི་འབྲས་བུའི་སྣང་བ་གང་ཤར་ཡང་མྱོང་འདོད་ཀྱི་བློ་ཞུགས་ན་སྨན་མ་ཞུ་བ་དུག་ཏུ་སོང་བ་དང་འདྲ་བས། དེའི་ཚེ་ཐག་ཆོད་པའི་དོན་དེ་ཁོའི་ངང་ལ་འཛིན་ཞེན་གྱིས་མ་བཅིངས་པར་མ་ཡེངས་མི་སྒོམ་པའི་རང་འགྲོས་ཀྱིས་རྟག་ཏུ་འཚོ་བར་མཛད་ན་འཚེངས་པ་ལགས། རྨི་ལམ་རགས་པ་རྟག་ཏུ་ཟིན་པ་འདྲ་བ་དེའང་ཟིན་པ་ཙམ་གྱིས་མི་ཆོག་པས། ད་དུང་ཉིན་སྣང་ཚོགས་དྲུག་གི་སྣང་བ་ལ་འཛིན་པ་མ་ཞུགས་པར་འབད་རྩོལ་གྱིས་འཆུན་པར་མཛད་ནས་གཉིད་དུ་འགྲོ་དུས་ཉིན་པར་གྱི་དྲན་ཤུགས་ཤོར་བར་གཉིད་ལོག་པས་ཉམས་དང་རྟོགས་པ་འོད་གསལ་རྣམས་རིམ་པར་འཆར་བ་ཡིན་ནོ། །

༈ ཉམས་གང་ལྟར་སྐྱེས་ཀྱང་དགག་སྒྲུབ་དང་བླང་དོར་གྱི་རྟོག་པས་མ་བསླད་པར་གང་ཤར་གྱི་རང་ངོ་བསྐྱངས་པས་གཟུང་འཛིན་གྱི་རྟོག་ཚོགས་ནམ་མཁའ་ལ་སྤྲིན་དེངས་པ་ལྟར་སངས་ཤིང་འཁོར་བའི་ས་བོན་ཟད་དེ། དབྱིངས་རང་བཞིན་གྱིས་རྣམ་པར་དག་པའི་ཀློང་དུ་རིག་པ་རང་བཞིན་གྱིས་རྣམ་པར་དག་པ་ཐིམ་པས་མ་བུ་འདྲེས་ནས་གཟུང་འཛིན་གཉིས་མེད་ཀྱི་ཡེ་ཤེས་འགྱུར་མེད་ཀྱི་དབྱིངས་སུ་གཏན་ལ་ཕེབས་ཏེ། རྦ་རླབས་ཆུར་ཐིམ་པ་བཞིན་དུ་རྣམ་རྟོག་དབྱིངས་སུ་དག་པས་འཁོར་འདས་ཀྱི་བར་ལག་འགྱེལ། ལམ་ལྔ་ས་བཅུ་རིམ་གྱིས་ལམ་ཅིག་ཅར་དུ་བགྲོད་དེ་གྲོལ་བར་འགྱུར་རོ། །