PJCW-KABUM-02-KHA-028

🚧 This website is under continued development. We appreciate your patience!

Previous Text Back to Volume PageNext Text

Wylie title	ngo sprod gnad kyi me btsa'
Location	dpal sprul bka' 'bum Volume 2, Text 28, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Key Points - gnad yig
Colophon	ཞེས་དཔལ་སྤྲུལ་པས་སོ།
	zhes dpal sprul pas so/

Tibetan Text

[edit]

༄༅། །ངོ་སྤྲོད་གནད་ཀྱི་མེ་བཙའ་བཞུགས།

དུས་དང་རྣམ་པ་ཐམས་ཅད་དུ་བཟང་ངན་གྱི་རྟོག་ཚོགས་གང་ཤར་གྱི་ངོ་བོ་ལ་ཕར་བལྟས་པས་སྟོང་ཞིང་སྟོང་པ་ཉིད་དོ་སྙམ་པའི་བློ་དེ་ཉིད་ལས་མ་འདས་པའི་ངང་གིས་ཡུལ་སྟོང་པ་འཁོར་ཡུག་གི་རང་བཞིན་ཅན་འདྲའི་སྟོང་ཆ་ཆེན་པོ་སྟོང་པའི་ཕྱོགས་ནས་སྣང་བ་གཏད་མེད་རྒྱ་ཡན་ལྷུག་པ་འདྲ་བ་ཞིག་ནམ་ཡང་འདུག་པའི་དུས་སྐབས་སུ་དེ་ཡི་ངང་དུ་མཉམ་བཞག་བྱེད་པ་དེ་ལ་དགོས་པ་ཅི་ཡང་མི་འདུག་སྟེ། སྟོང་ཆ་དེ་ཉིད་ཡོད་ཀྱང་ཆོག་སྟེ་མེད་ཀྱང་ཆོག། དོན་ལ་སྒོམ་པ་ཁ་ཕྱིར་བལྟས་སུ་ཤོར་བའི་སྟོབས་ཀྱིས་ཡུལ་སྟོང་ཕྱོགས་སུ་སྣང་བ་ཙམ་རེ་འདྲའོ། །མདོར་ན་ཁ་ཕྱི་རུ་རྣམ་རྟོག་གི་ཆ་ལ་མི་བལྟ། ཁ་ནང་དུ་ངོ་བོ་རང་རིག་གི་གཤིས་སུ་ལྟོས་ལ་ཡང་ནས་ཡང་དུ་རིག་པ་ཧུར་ཕྱུང་བ་ནི་གནད་ཆེའོ། །ལྟ་སྒོམ་ལ་ཉམས་ལེན་གནད་དུ་དེ་ལྟར་བྱས་ནས་རིག་གདངས་གསལ་བའི་མདངས་ལ་དར་བའི་ཆ་དང་བཅས་པའི་གཤིས་དེར་རྣམ་རྟོག་འཆར་དུ་མེད་པས་བཟང་ངན་གྱི་རྟོག་པ་ལ་རེས་སུ་ཕྱེ་རྒྱུ་མེད་པ་དེའོ། །དེ་སྟོང་ངོ་བསམ་རྒྱུ་སྤུ་ཙམ་མེད་དེ་སྤང་ལ་བེ་ཕུར་བཏབ་པ་བཞིན་དུ་ལྷན་ནེར་སྡོད་ཚུགས་པ་ཞིག་བྱུང་བར་གྱུར་ན་དེ་ནི་གནད་ཆེ་སྟེ། ཤེས་རིག་རང་ཚུགས་ཟིན་པ་མཆོག་ཏུ་ལྷག། ཅེས་གསུངས་པས། དེ་ལྟར་དུ་ངོ་བོ་རང་ཚུགས་སྐྱོང་བའི་མུ་བྱས་པས་མི་ཆོག་པ་ནི་ནམ་ཡང་ཨོས་ཡོད་དེ། དེས་མི་ཆོག་ན་ནི་ངས་ཅང་མི་ཤེས་སོ། །ལར་ལམ་བསླབ་པ་གསུམ་པོ་ཇི་བཞིན་དུ་གོ་དགོས། དེ་ཡང་གོ་བ་ཙམ་གྱིས་མི་ཆོག་སྟེ་གནད་དུ་ཐེབ་དགོས། གནད་དུ་མ་ཐེབ་པའི་ཆོས་ཐོས་བསམ་སྒོམ་གསུམ་གྱིས་ཅི་བྱེད་དོན་མེད་དོ། །དེ་ཡང་མདོ་དོན་ནི། ཉེས་སྤྱོད་སྡོམ་པའི་ཚུལ་ཁྲིམས་རྣམ་པར་དག་པས་རང་རྒྱུད་དོན་ཡོད་དུ་བསྡམ་པར་བྱ་བ་གལ་ཆེས་ཆེ། ནང་པ་སངས་རྒྱས་ཀྱི་བསྟན་པའི་སྒོར་ཞུགས་པའི་རྩ་བའི་དོན་དམ་གང་ཡིན་པ་དེ་ནི་ལེགས་པར་ངོ་ཤེས་དགོས། དེ་མ་ཤེས་ན་རྒྱལ་བའི་རྗེས་འཇུག་མིན་པས། དེ་ཤེས་ནས་དོན་གྱི་རྩ་བ་དེ་ཉམས་སུ་ལེན་པར་བྱ་དགོས་ངེས། རྣལ་འབྱོར་རང་བཅའ་བ་རྔ་རང་ལྕགས་ཟེར་བའི་དཔེ་དོན་ལྟར་ཡིན་པ་ནི་ལོས་གོ། དེ་གོ་ནས་བཟུང་སྟེ་དགྲ་འདུལ་གཉེན་སྐྱོང་སོགས་འཇིག་རྟེནའཁོར་བའི་བྱ་བྱེད་ཕལ་ཆེར་ཐམས་ཅད་རྣལ་འབྱོར་བའི་ཐུགས་དམ་མིན་ཏེ་ཉམས་ལེན་གྱི་རྩ་བ་མ་ཡིན་མོད། རྣལ་འབྱོར་པའི་ཉམས་ལེན་ཐུགས་དམ་གྱི་རྩ་བ་གང་ལ་མཛད་ན་རྒྱལ་བའི་བསྟན་པ་རིན་པོ་ཆེ་ལམ་བསླབ་པ་གསུམ་སྟེ་ལུང་རྟོགས་ཀྱི་ཆོས་རྣམས་ཉམས་ལེན་ཞིབ་ཏུ་མཛད་དགོས། དེ་ཡང་སངས་རྒྱས་ཀྱི་རྗེས་འཇུག་ཡིན་པ་ལ་ཡིན་པའི་རྟགས་ཡོད་དགོས་པས། གྲུབ་ཐོབ་གོང་མའི་ཉམས་མགུར་དང་རྣམ་ཐར་སོགས་ལ་བལྟས་ཏེ། ལེགས་པར་དེའི་རྗེས་སུ་སྙོག་པ་ནི་དོན་གྱི་གལ་ཆེའོ། །ཞེས་དཔལ་སྤྲུལ་པས་སོ། །