JKW-KABUM-18-TSHA-001-012

🚧 This website is under continued development. We appreciate your patience!

Previous Text Back to Volume PageNext Text

Wylie title	yang de dag gi skabs su maN+Dal gyi rnam bshad lta bu sbyar bar spro na
Location	mkhyen brtse'i bka' 'bum Volume 18, sde tshan 1, Text 12, Pages 161-174 (Folios 81a2 to 87b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang de dag gi skabs su maN+Dal gyi rnam bshad lta bu sbyar bar spro na. In 'jam dbyangs mkhyen brtse'i dbang po'i bka' 'bum, Vol. 18: 161-174. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

12 161-174	ཡང་དེ་དག་གི་སྐབས་སུ་མཎྜལ་གྱི་རྣམ་བཤད་ལྟ་བུ་སྦྱར་བར་སྤྲོ་ན། yang de dag gi skabs su maN+Dal gyi rnam bshad lta bu sbyar bar spro na Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཡང་དེ་དག་གི་སྐབས་སུ་མཎྜལ་གྱི་རྣམ་བཤད་ལྟ་བུ་སྦྱར་བར་སྤྲོ་ན། བརྗོད་བྱ་རྒྱས་པ་ནི་གཞན་དུ་ཤེས་པར་བྱ་བ་ལས་ཡི་གེའི་ངལ་བས་སྤྲོ་བར་མ་ནུས་ཤིང་ཤིན་ཏུ་ཉུང་ངུ་ཙམ་ཞིག་བརྗོད་པའི་དབང་དུ་བྱས་ན། གོང་གི་བཤད་པ་ལས། འཕགས་པ་ཀུན་ཏུ་བཟང་པོའི་མཆོད་སྤྲིན་དུ་དད་པས་སྤྲུལ་ཏེ། ཞེས་པའི་མཚམས་འབུལ་བ་ལ། ཐོག་མར་སྐབས་སུ་བབས་པ་ཞིང་ཁམས་ཀྱི་མཆོད་སྤྲིན་མཎྜལ་དབུལ་ཚུལ་ལས་འཕྲོས་པའི་བརྗོད་པ་ཉུང་ངུ་ཞིག་སྙན་དུ་གསོལ་ན་རྣམ་པ་ལྔ་སྟེ། དང་པོ་གང་ལས་བརྩམས་ཏེ་བྱུང་བའི་ཚུལ་གྱི་གླེང་གཞི་ནི། མདོ་སྡེ་བསྐལ་པ་བཟང་པོ་ལས། བདེར་གཤེགས་སྐྱེས་དབང་འཁོར་ལོས་སྒྱུར་བའི་ཚེ། །དེ་བཞིན་གཤེགས་པ་ཀུན་ཏུ་འོད་དེ་ལ། །གླིང་བཞི་དག་ནི་དབུལ་བར་བྱས་ནས་ཀྱང་། །དང་པོར་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་དང་། འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྒྱལ་པོ་ལེགས་པར་བྱུང་བ་ཛམ་གླིང་དུ། །རིན་ཆེན་ཆར་པ་འབེབས་པ་དེ་མཐོང་ནས། །གླིང་བཞི་རིན་ཆེན་གང་བར་བྱས་ནས་ཀྱང་། །རིན་ཆེན་གཙུག་ཏོར་ཅན་གྱི་བསྟན་ལ་ཕུལ། །ཞེས་དང་། དཔལ་གསང་བ་འདུས་པའི་རྩ་བའི་རྒྱུད་ལས། ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀངས་ཏེ། །བསོད་ནམས་འདོད་པས་བསོད་ནམས་ཕྱིར། །ཉིན་རེ་ཤེས་རབ་ཅན་གྱིས་དབུལ། །ཞེས་པ་ལ་སོགས་པས་མཚོན་མདོ་རྒྱུད་བསྟན་བཅོས་ཐམས་ཅད་ལས་ལན་གཅིག་མ་ཡིན་པར་བསྟན་ཅིང་། དེ་ཡང་སྲས་དང་བཅས་པའི་ཕྱོགས་བཅུ་དུས་བཞིའི་རྣམ་འདྲེན་ཐམས་ཅད་གང་གིས་གཤེགས་པའི་ལམ་ལྔར་གྲགས་པ་ལས། འདིར་ཐོས་བསམ་དང་བསོད་ནམས་ཀྱི་ཚོགས་ལ་རྒྱ་ཆེར་སྤྱོད་པས་ཚོགས་ལམ་གྱི་རྣམ་གྲངས་སུ་འདུ་བ་གང་ཞིག་སློབ་པའི་སས་བསྡུས་པའོ།། །།གཉིས་པ་སྒྲ་དོན་འབྲེལ་པ་ནི། རྒྱུ་ཕ་རོལ་ཏུ་ཕྱིན་པའི་ཐེག་པ་དང་སྦྱར་ན། མཎྜལ་ཞེས་པ་མ་ཌི་རྒྱན་བྱེད་པའི་བྱིངས་དོན་ལས་དྲངས་ཏེ་གཞི་དུས་སུ་ཀུན་རྫོབ་ཀྱི་བདེན་པའི་སྣང་ཚུལ་ལ་གནས་སྐབས་སུ་མི་བསླུ་བའི་ངེས་པ་རྙེད་པས། ལམ་དུས་རྒྱུ་བསོད་ནམས་ཀྱི་ཚོགས་མཐའ་ཀླས་པ་ལ་འབད་པའི་སྟོབས་ཀྱིས། འབྲས་བུའི་དུས་ན་གཞན་དོན་དུ་སྨོན་ལམ་རྟེན་འབྲེལ་གྱི་མཐུ་འགོག་པ་མེད་པས་མཚན་དང་དཔེ་བྱད་ཀྱིས་བརྒྱན་པའི་གཟུགས་སྐུ་རྣམ་པ་གཉིས་ཐོབ་པའི་ཉེར་ལེན་དུ་གྱུར་པའི་ཕྱིར་འབྲས་མིང་རྒྱུ་ལ་བཏགས་པ་སྟེ། དེ་སྐད་དུའང་། སློབ་དཔོན་ནཱ་ག་རྫུ་ནས། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་སྐྱེས་པ་སྟེ། །ཞེས་སམ། ཁྱད་པར་འབྲས་བུ་གསང་སྔགས་རྡོ་རྗེ་ཐེག་པ་ལྟར་ན་ཡེ་ཤེས་ཐིག་ལེ་ལས། མ་ནི་ཡིག་འབྲུ་འདབ་མར་བརྗོད། །ཎ་ནི་ཡིག་འབྲུ་ལྟེ་བར་དྲན། །ཌ་ནི་ཡིག་འབྲུ་གེ་སར་ཏེ། །ལ་ནི་ཡིག་འབྲུ་དེ་དེར་བལྟ། ཞེས་པ་ལྟར། ཕྱི་ལྟར་དུ་ཆུ་སྐྱེས་ཀྱི་གེ་སར། ནང་ལྟར་ན་རྡོ་རྗེ་བཙུན་མོའི་མཁའ་དབྱིངས། གསང་བ་ལྟར་ན་ཡུལ་སྟོང་པ་ཉིད་ལ་ཡུལ་ཅན་བདེ་བ་ཆེན་པོའི་ཡེ་ཤེས་ཀྱིས་རོལ་པས་གཟུང་འཛིན་གྱི་འཆིང་བ་མཚུངས་པར་ལྡན་པའི་ས་བོན་དང་བཅས་པ་བཙན་ཐབས་སུ་གྲོལ་ཏེ། ས་བཅུ་ལམ་ལྔའི་ཡོན་ཏན་ཐམས་ཅད་གཅིག་ཅར་དུ་སྨིན་པས་འབྲས་བུ་ཟུང་འཇུག་རྣམ་ཀུན་མཆོག་ལྡན་གྱི་གོ་འཕང་ལ་སྦྱོར་བར་བྱེད་པའི་ཕྱིར་དེ་སྐད་དུ་བརྗོད་ལ། གཞན་ཡང་ཐུན་མོང་དུ། བླ་མ་དང་། ཡི་དམ་གྱི་ལྷ་སོགས་ཞིང་ཁྱད་པར་ཅན་གྱི་མདུན་དུ་རང་གཞན་བསོད་ནམས་ཀྱི་ཚོགས་རྫོགས་པའི་སླད་དུ། དངོས་ཡིད་ཀྱི་མཆོད་སྤྲིན་མཐའ་ཀླས་པ་ཞིག་འབུལ་དུ་ཡོད་པ་ལས། ཐམས་ཅད་ཀྱི་རབ་དང་། མཆོག་དང་། ཕུལ་ཉིད་ཀྱི་ཕྱིར་རྒྱན་ལྟ་བུར་གྱུར་པ་ནི་མཎྜལ་སྟེ། དཀྱིལ་འཁོར་ཞེས་སུའང་གྲགས་པའི་དཀྱིལ་ནི་དབུས་ཀྱི་ལྷུན་པོ་དང་། འཁོར་ནི་གླིང་བཞི་གླིང་ཕྲན་ལ་སོགས་པ་ཇི་སྙེད་པ་ལའང་བཤད་དུ་ཡོད་དོ།། །།གསུམ་པ་དག་པ་སྦྱོར་བ་ནི་སློབ་དཔོན་ཆེན་པོ་གཉིས་སུ་མེད་པའི་རྡོ་རྗེས། བ་ལྕི་ཆུ་དང་བཅས་པ་སྦྱིན་པ་སྟེ། །ལེགས་པར་བྱུགས་པ་ཚུལ་ཁྲིམས་བཟོད་པ་ནི། །སྲོག་ཆགས་ཕྲ་མོ་སེལ་བར་བྱེད་པའོ། །བརྩོན་འགྲུས་བྱ་བ་དག་ལ་འཇུག་པ་སྟེ། །བསམ་གཏན་དུས་དེར་རྩེ་གཅིག་བྱེད་པའི་སེམས། །ཤེས་རབ་ཚོགས་སོགས་ལེགས་པར་འབར་བ་ཡིན། །ཞེས་བྱང་ཆུབ་སེམས་དཔའ་ལས་དང་པོ་པ་སེམས་ཐོག་མར་བསྐྱེད་པ་ནས་བཟུང་སྟེ་མཐར་གྱིས་བླ་ན་མེད་པའི་ཡེ་ཤེས་བརྙེས་ཀྱི་བར་དུ་ཇི་ལྟར་སྤྱོད་པར་བྱ་བའི་ངོ་བོ་ནི་ཕ་རོལ་ཏུ་ཕྱིན་པ་དྲུག་སྟེ། དེ་ཉིད་འདིར་དྲི་ཡི་ཐིག་ལེ་བྱུགས་པ་ནས་བཟུང་སྟེ་ཚོམ་བུའི་དཀྱིལ་འཁོར་ཡོངས་སུ་རྫོགས་པའི་བར་ལ་ལེགས་པར་ཚང་བ་ཉིད་དོ།། །།བཞི་པ་ཚུལ་ལམ་རྣམ་པ་ནི། མངོན་པ་མཛོད་ལས། གླིང་བཞི་དང་ནི་ཉི་ཟླ་ཟུང་། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་གི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །མཉམ་དུ་འཇིག་ཅིང་འབྱུང་བར་འགྱུར། །ཞེས་པ་ལྟར་གྱི་སྟོང་གསུམ་མི་མཇེད་བྱེ་བ་ཕྲག་བརྒྱ་ཡོངས་སུ་རྫོགས་པའི་ས་གཞི་ཐམས་ཅད་ཙནྡན་དང་། ཨ་ག་རུ་དང་། ག་བུར་ལ་སོགས་པའི་དྲི་བཟང་པོའི་ཆུས་བྱུགས་ཏེ། ལྷའི་མེ་ཏོག་མནྡཱ་ར་བ་དང་། པུཎྜ་རཱི་ཀ་དང་། ཨུཏྤལ་དང་། ཨུཏྤལ་ཆེན་པོ་ལ་སོགས་སིལ་མར་བཀྲམས་ཤིང་། ནོར་བུ་རིན་པོ་ཆེ་བཻཌཱུཪྻ་དང་། ཨིནྡྲ་ནཱི་ལ་དང་། མརྒད་སོགས་ཀྱིས་མཛེས་པར་བྱས་པའི་གོ་མཚམས་རྣམས་སུ། འབྱོར་པ་དང་རིན་ཐང་གིས་ཁྱད་པར་དུ་བྱས་པའི་རིན་པོ་ཆེའི་རི་བོ། དཔག་བསམ་གྱི་ལྗོན་ཤིང་། འདོད་པ་འཇོ་བའི་བ་མོ། མ་རྨོས་པའི་ལོ་ཏོག་གི་དགའ་ཚལ་ཏེ་བཞི། མངོན་པ་འབྱུང་བ་སོགས་ནས་བཤད་པའི་འཁོར་ལོས་སྒྱུར་བ་ཆེན་པོ་ལ་འོས་པའི་རིན་པོ་ཆེ་སྣ་བདུན། གཏེར་ཆེན་པོས་ཡོངས་སུ་གང་བའི་བུམ་པ། སྒེག་སོགས་ཕྱི་ནང་གི་མཆོད་པའི་ལྷ་མོ་བརྒྱད། ཉི་མ་དང་ཟླ་བའི་སྣང་བྱེད། རིན་པོ་ཆེའི་གདུགས་དཀར་པོས་ནམ་མཁའ་ཁྱབ་པར་ཁེབས་པའི་བླ་བྲེ། ཕས་རྒོལ་གྱི་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་རྣམས་དང་། གཞན་ཡང་ལེགས་བྲིས་དང་། གདེངས་ཅན་དང་། མི་ཡི་འགྲོ་བ་དག་གིས་བདག་ཏུ་བཟུང་བ་དང་མ་བཟུང་བའི་དཔལ་དང་འབྱོར་པའི་ཕུང་པོ་ཕུན་སུམ་ཚོགས་པ་མ་ཚང་བ་མེད་པས་ཕྱུར་བུར་བཀང་ཞིང་དེ་ཡང་རྡུལ་ཕྲ་རབ་རེའི་ཁོངས་དེ་ལྟ་བུའི་མཎྜལ་རྡུལ་སྙེད་དུ་སྤྲོ་བས་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་རྣམ་པར་ཐར་པ་དང་རྗེས་སུ་མཐུན་པ་ཉིད་བྱེད་པ་པོ་རང་གིས་བྱང་དྲངས་པའི་སེམས་ཅན་ཐམས་ཅད་མི་གནས་པའི་བྱང་ཆུབ་དམ་པ་བླ་ན་མེད་པའི་གོ་འཕང་ལ་འགོད་པའི་སླད་དུ་ཕྱོགས་བཅུ་དུས་བཞིའི་མཆོད་འོས་ཐམས་ཅད་གཅིག་ཏུ་འདུས་པའི་མངའ་བདག་རྗེ་བཙུན་བླ་མ་འདིར་འབུལ་ཡུལ་དམིགས་གསལ་གྱི་ཁ་བསྒྱུར་ཇི་ལྟར་འོས་པ་བྱ། དམ་པ་གང་གི་ཞབས་པད་དུ་ཕུལ་ནས། བརྩེ་ཆེན་སྙིང་རྗེའི་གཟིགས་པས་བདག་གིར་མཛད་པར་གསོལ་བ་འདེབས་པ་སྟེ། དེ་སྐད་དུའང་། རྒྱལ་བའི་སྲས་པོ་ཞི་བ་ལྷས། །བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་ཁྱོད་ཀྱིས། །བདག་གི་དོན་སླད་ཉིད་ཀྱི་མཐུས་བཞེས་ཤིག །ཅེས་གསུངས་པ་ལྟ་བུའོ།། །།ལྔ་པ་ཕན་ཡོན་ནི། སློབ་དཔོན་དཔའ་བོས། སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་ལ། །འགྲོ་བའི་བདག་པོ་ཚེ་རིང་ཞིང་། །སྣ་ཚོགས་ནད་ཀྱི་འཇིགས་གྲོལ་བ། །གང་ནི་དེ་ཡིས་སྐད་ཅིག་ཐོབ། །ཅེས་དང་། །སྣ་ཚོགས་བསོད་ནམས་ཀྱིས་བརྒྱན་པའི། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་འགྱུར་ཞིང་། །མིར་སྐྱེ་གསེར་ལས་ལྷག་པ་ཡི། ཁ་དོག་དང་ལྡན་མཛེས་པ་དང་། །པདྨའི་མདོག་ལྟར་ཡན་ལག་ཚང་། །མིག་གི་དཀྱུས་རིང་མཛེས་པར་འགྱུར། །ཞེས་པ་ལ་སོགས་པའི་བརྗོད་བྱ་ཟད་མི་ཤེས་པ་དང་ལྡན་པ་དེ་ལ་ཡང་། གནས་སྐབས་ལག་ཏུ་ལེན་པའི་དབང་དུ། ཚོམ་བུ་ལྔ་པ། བདུན་པ། བཅོ་ལྔ་པ། སོ་བདུན་པ་སོགས་དབྱེ་བསྡུ་ཐ་དད་པ་འབྱུང་བ་ལས་འདིར་ཕྱོགས་ཕྱི་མ་ལྟར་འབུལ་ན། ཞེས་པའི་མཚམས་མཎྜལ་དངོས་དབུལ་ཞིང་། མཐར། དེ་ལྟར་ཡིད་སྤྲུལ་མཎྜལ་གྱི་མཆོད་སྤྲིན་འབུལ་བ་སྔོན་དུ་སོང་ནས། གཉིས་པ་དེ་ཉིད་མཚོན་བྱེད་དངོས་འབྱོར་གྱི་བདོག་པ་ཕྲ་མོ་རྣམས་ཡེ་ཤེས་གཟིགས་པ་དམ་པའི་སྤྱན་ལམ་དུ་བསྟར་བ་ལ། ཐོག་མར་དྲི་མ་མེད་པའི་སོགས་དཀྱུས་ལྟར་སྤྲོ་བར་བྱ་ཞིང་། གལ་ཏེ་དེ་ལས་ཅུང་ཟད་ཞིབ་ཏུ་བཤད་པར་འདོད་ན། གཞན་སྔར་ལྟར་ལ། བཞི་པ་ཚུལ་ལམ་རྣམ་པ་ནི། ཞེས་པའི་མཚམས། ལྷུན་པོ་གླིང་བཞི་གླིང་ཕྲན་ལྕགས་རི་དང་བཅས་པའི་དབུས་སུ་འབྱོར་པའི་ཁྱད་པར་སྣ་ཚོགས་པས་ཡོངས་སུ་གཏམས་པ་སྟེ་དེ་ཡང་གང་ལ་བརྟེན་པའི་གཞི་རླུང་གིས་དཀྱིལ་འཁོར་སྔོན་པོ་རྔམས་སུ་དཔག་ཚད་ས་ཡ་གཅིག་དང་དྲུག་འབུམ། རྒྱར་གྲངས་མེད་པ། དེའི་སྟེང་དུ་ཆུའི་དཀྱིལ་འཁོར་དཀར་པོ་དཔངས་སུ་དཔག་ཚད་འབུམ་ཕྲག་བརྒྱད། དེའི་སྟེང་དུ་དབང་ཆེན་གསེར་གྱི་ས་གཞི་སེར་པོ་རྔམས་སུ་དཔག་ཚད་སུམ་འབུམ་ཉི་ཁྲི་གཉིས་ཀའི་ཐད་ཀར་དཔག་ཚད་འབུམ་ཕྲག་བཅུ་གཉིས་དང་སུམ་སྟོང་བཞི་བརྒྱ་ལྔ་བཅུ། ཁོར་ཡུག་ཏུ་ས་ཡ་གསུམ་དང་དྲུག་འབུམ་ཆིག་ཁྲི་སུམ་བརྒྱ་ཡོད་པའི་མཐར་ལྕགས་ཀྱི་རི་བོ་གྲུ་བཞི་པ་དཔངས་སུ་དཔག་ཚད་སུམ་བརྒྱ་བཅུ་གཉིས་རྒྱང་གྲགས་བཞི་དང་ལྡན་པས་ཡོངས་སུ་བསྐོར་བའི་དབུས་སུ། ས་འཛིན་རྣམས་ཀྱི་མཆོག་ཏུ་གྱུར་པ་ཤར་རིན་པོ་ཆེ་ཀཱནྟ། ལྷོ་བཻཌཱུཪྻ། ནུབ་པདྨཱ་རཱ་ག །བྱང་སུ་བརྞྞ་ལས་གྲུབ་པ་འཕངས་སུ་དཔག་ཚད་ཆིག་འབུམ་དྲུག་ཁྲི་ལས་བརྒྱད་ཁྲི་མཚོར་ནུབ་ཅིང་། ལྷག་མ་སྟེང་དུ་འཕགས་པའི་ཕྱེད་མན་ལའང་བང་རིམ་བཞི་ཡོད་པའི་དང་པོར་གནོད་སྦྱིན་ལག་ན་གཞོང་ཐོགས། གཉིས་པར་ཕྲེང་ཐོགས། གསུམ་པར་སྟག་མྱོས། བཞི་པར་རྒྱལ་ཆེན་རིགས་བཞིའི་ལྷ་རྣམས་རང་རང་གི་དཔུང་དང་བཅས་ཏེ་འཁོད་པའི་སྟེང་གི་གཞིར་སུམ་ཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་བལྟ་ན་སྡུག་ཅེས་ཀུན་ནས་གྲུ་བཞིར་སྣང་བའི་ངོས་རེར་དཔག་ཚད་ཉིས་སྟོང་ལྔ་བརྒྱ་རེ། ཁོར་ཡུག་ཏུ་ཁྲི་ཕྲག་གཅིག་ཡོད་ཅིང་། འབྱོར་པ་དང་ལོངས་སྤྱོད་ཀྱི་ཁྱད་པར་བསམ་གྱིས་མི་ཁྱབ་པའི་དབུས་སུ་ལེགས་བྲིས་ཀྱི་དབང་པོ་རང་གི་བསྟི་གནས་རྣམ་པར་རྒྱལ་བའི་ཁང་བཟང་ངོས་རེར་དཔག་ཚད་ཉིས་བརྒྱ་ལྔ་བཅུ་དང་། སྲིད་དུ་ལྟ་ན་སྡུག་ལས་དཔག་ཚད་ཕྱེད་ཀྱི་འཕགས་པ། ཕྱི་རོལ་གྱི་ཕྱོགས་བཞིར་ཚལ་ཆེན་པོ་བཞི། བྱང་ཤར་མཚམས་སུ་འདོད་དགུ་ཐམས་ཅད་འབྱུང་བའི་ལྗོན་ཤིང་ཡོངས་འདུ་ས་བརྟོལ། །ལྷོ་ནུབ་ཏུ་སྦྱིན་སྐྱེས་ཀྱི་ཚོགས་འདུན་གྲོས་བྱེད་པའི་གནས་ཆོས་བཟང་ལྷའི་མདུན་ས་སོགས་ཏེ་བཀོད་པ་ཕུན་སུམ་ཚོགས་པས་བརྒྱན་པ། དེའི་སྟེང་དུ་དཔག་ཚད་བརྒྱད་ཁྲི་འདས་པའི་ནམ་མཁར་མས་ནས་རིམ་པར་འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་དེ་འདོད་ཁམས་ཀྱི་ལྷའི་གནས་རྣམས་དང་། དེ་ནས་ཀྱང་ཚངས་རིས་སོགས་བསམ་གཏན་བཞིའི་ལྷ་གནས་བཅུ་གཉིས་དང་། མི་ཆེ་བ་སོགས་གཙང་རིགས་ཀྱི་ལྷ་གནས་ལྔ་སྟེ་གཟུགས་ཁམས་གནས་རིགས་བཅུ་བདུན་པོ་རིམ་པ་བཞིན་དུ་གནས་པར་བཤད་ལ། གཞན་དུ་ཏིང་ངེ་འཛིན་གྱི་བྱེ་བྲག་གི་འཕེན་པ་ལས་བྱུང་བའི་ནམ་མཁའ་མཐའ་ཡས་སོགས་གཟུགས་མེད་སྐྱེ་མཆེད་མུ་བཞི་པོའི་གནས་ནི་གོང་འོག་དང་ཕན་ཚུན་མེད་དོ། །དེ་ལྟར་གྱི་ལྷུན་པོའི་ཕྱི་རོལ་ནས་གསེར་གྱི་རི་བདུན་དང་། རོལ་པའི་མཚོ་བདུན་གྱིས་རིམ་པར་བསྐོར་བ་དང་། མཐའི་ལྕགས་རིའི་མཚམས་སུ་བ་ཚྭ་ཅན་གྱི་མཚོ་ཞེངས་སུ་དཔག་ཚད་སུམ་འབུམ་དང་ཉི་ཁྲི་ཡོད་པའི་ནང་ཁོངས་སུ། ཤར་དུ་ལུས་འཕགས་གླིང་དབྱིབས་ཟླ་གམ་བཅད་ཁ་རི་རབ་ལ་བསྟན་པའི་ངོས་རིང་བ་དཔག་ཚད་ཉིས་སྟོང་དང་། འབུར་ངོས་ཐུང་བ་དཔག་ཚད་སུམ་བརྒྱ་ལྔ་བཅུ་པ། ལྷོར་ཛམ་བུ་གླིང་སོག་ཁའི་དབྱིབས་ཀྱི་ཞིང་ཆེ་བ་རི་རབ་ལ་བསྟན་པའི། ངོས་རིང་བ་གསུམ་ལ་དཔག་ཚད་ཉིས་སྟོང་དང་། ཡུ་བའི་ཕྱོགས་ལ་དཔག་ཚད་ཕྱེད་དང་བཞི་ཡོད་པ། ནུབ་བ་གླང་སྤྱོད་དབྱིབས་ཟླུམ་པོ། ཐད་ཀར་དཔག་ཚད་ཉིས་སྟོང་ལྔ་བརྒྱ་ལ་ཁོར་ཡུག་ཏུ་དཔག་ཚད་བདུན་སྟོང་ལྔ་བརྒྱ་ཡོད་པ། བྱང་སྒྲ་མི་སྙན་དབྱིབས་གྲུ་བཞི་པའི་ངོས་རེར་དཔག་ཚད་སྟོང་ཕྲག་གཉིས་གཉིས་རེ་ཡོད་པ། དེ་དག་གི་གཡས་གཡོན་དུ་གླིང་ཕྲན་ཀྱང་། ལུས་འཕགས་པོའི་གཡས་སུ་ལུས་དང་། གཡོན་དུ་ལུས་འཕགས། ཛམྦུ་གླིང་གི་གཡས་སུ་རྔ་ཡབ་དང་། གཡོན་དུ་རྔ་ཡབ་གཞན། བ་གླང་སྤྱོད་ཀྱི་གཡས་སུ་གཡོ་ལྡན་དང་། གཡོན་དུ་ལམ་མཆོག་འགྲོ། སྒྲ་མི་སྙན་གྱི་གཡས་སུ་སྒྲ་མི་སྙན་དང་། གཡོན་དུ་སྒྲ་མི་སྙན་གྱི་ཟླ་སྟེ། དེ་དག་ཀྱང་དབྱིབས་སོ་སོའི་གླིང་ཆེན་རྣམས་དང་མཚུངས་ཤིང་། ཆེ་ཆུང་ནི་ཕྱེད་ཕྱེད་དུ་ཡོད་ལ། སོ་སོའི་བདེ་འབྱོར་གྱི་ཁྱད་པར་སྣ་ཚོགས་པ་ལོངས་སྤྱོད་པ་དང་བཅས་པའི་ངང་ཚུལ་ཅན་ཏེ། དེ་སྐད་དུའང་མངོན་པ་མཛོད་ལས། གླིང་བཞི་དང་ནི་ཉི་ཟླ་ཟུང་། །ཞེས་སོགས་དཀྱུས་བཞིན་ལ། མཛེས་པར་བྱས་པའི། ཞེས་པའི་མཚམས་སུ། ཤར་གླིང་གི་ནང་ནས་བརྩམས་ཏེ་རིན་པོ་ཆེ་སྣ་ཚོགས་ཕུང་པོར་སྤུངས་པའི་རི་བོ། ལྷོ་གླིང་གི་ནང་དུ་རི་རབ་རྩེ་མོའི་བྱང་ཤར་དུ་སྐྱེས་པའི་དཔག་བསམ་གྱི་ལྗོན་ཤིང་། ནུབ་གླིང་གི་ནང་དུ་བཟའ་བཏུང་འདོད་པ་འཇོ་བའི་བ། བྱང་གླིང་གི་ནང་དུ་སྐྱེས་བུའི་རྩོལ་བས་མ་རྨོས་མ་བཏབ་པར་རང་བཞིན་དུ་འཁྲུངས་པའི་ལོ་ཏོག །དེ་ནས་ཀྱང་ཤར་ནས་ཕྱོགས་བཞིར་འཁོར་ལོ་ནས་བརྩམས་པ་དང་། ཤར་ལྷོ་ནས་མཚམས་བཞིར་གླང་པོ་ནས་བརྩམས་ཏེ་རྒྱལ་སྲིད་རིན་པོ་ཆེ་སྣ་བདུན། གཏེར་གྱི་བུམ་བཟང་དང་བཅས་པ་སྟེ། དེ་ཡང་ཤར་དུ་འཁོར་ལོ་རིན་པོ་ཆེ་ནི། ལྷ་རྫས་ཀྱི་དྭངས་མའི་གསེར་བཟང་པོ་ལས་བྱས་ཤིང་དབྱིབས་དང་། ལྟེ་བ་ཟླུམ་ལ་རྩིབས་སྟོང་དང་ལྡན་པ། འཁོར་ཡུག་ཏུ་མུ་ཁྱུད་མཉམ་ཞིང་བཟང་བ། ཕས་ཀྱི་རྒོལ་བའི་ཕྱོགས་ཐམས་ཅད་ལས་རྣམ་པར་རྒྱལ་བའི་བྱེད་པ་དང་ལྡན་པའོ། །ལྷོར་ནོར་བུ་རིན་པོ་ཆེ་ནི། ལྷ་རྫས་ཀྱི་རང་བཞིན་བཻཌཱུཪྻ་ལས་གྲུབ་ཅིང་དབྱིབས་ཟུར་བརྒྱད་པ། དེའི་འོད་ཀྱིས་དཔག་ཚད་ཙམ་དུ་ཁྱབ་ཅིང་། མུན་པའི་རབ་རིབ་ཐམས་ཅད་འཕྲོག་པས་མཚན་ཡང་ཉིན་མོ་ལྟར་གསལ་བའི་བྱེད་ལས་ཅན། ནུབ་ཏུ་བཙུན་མོ་རིན་པོ་ཆེ་ནི། གཟུགས་མཛེས་ཤིང་ལྟ་ན་སྡུག་པ། ངང་ཚུལ་རང་བཞིན་གྱིས་བཟང་བ། ལྤགས་པའི་མདོག་དཀར་ལ་དམར་བའི་མདངས་དང་ལྡན་པས་ལེགས་ཤིང་། རེག་བྱ་འཇམ་པ། ཁ་ནས་ཨུཏྤ་ལ་ཡི་བསུང་ཞིམ་འཐུལ་ཞིང་ཡིད་དུ་འོང་བ། ཚ་བས་ཉེན་པའི་ཚེ་བསིལ་བ་དང་། བསིལ་བས་ཉེན་པའི་ཚེ་ཚ་བ་སྟེ་འདོད་དགུའི་རེག་བྱ་དང་ལྡན་པའོ། །བྱང་དུ་བློན་པོ་རིན་པོ་ཆེ་ནི། རྒྱལ་པོས་གང་སེམས་དེ་ཉིད་ཤེས་ནས་མ་བསྒོས་པར་ཡང་ལས་བྱེད་པ། ཤིན་ཏུ་ཕུན་སུམ་ཚོགས་ཀྱང་ཆོས་མིན་གྱི་ལས་སྤངས་པ། ཉོན་མོངས་པ་མེད་པ། གཞན་ལ་གནོད་པ་མེད་པ། སྐྱེ་བོ་ལ་མི་འཚེ་བ། ཆོས་ཀྱི་བྱ་བ་དང་ལྡན་ཞིང་མ་འོངས་པའི་བྱ་བ་ཤེས་པ་དང་ལྡན་པ། ཐམས་ཅད་ཡོངས་སུ་འབུལ་བ་སོགས་ཀྱི་ཁྱད་ཆོས་ཅན་ནོ། །ཤར་ལྷོར་གླང་པོ་རིན་པོ་ཆེ་ནི། ཡན་ལག་བདུན་པོ་ས་ལ་ལེགས་པར་གནས་ཤིང་། གངས་རིའི་ཕུང་པོ་འགྲོ་ཤེས་པ་ལྟ་བུ་སྟེ། གཡུལ་ལས་རྣམ་པར་རྒྱལ་བར་འདོད་པའི་རྒྱལ་པོ་ལ་འོས་པའི་ནོར་གྱི་མཆོག་གོ །ལྷོ་ནུབ་ཏུ་རྟ་མཆོག་རིན་པོ་ཆེ་ནི། ཐོ་རངས་ཀྱིས་མཚོན་ཏེ་ཡུན་ཐུང་ངུ་ཙམ་ལའང་ཕྱོགས་མ་ལུས་པ་བསྐོར་ནས་སླར་རང་ཁྱིམ་དུ་ལྡོག་པའི་སྟོབས་དང་ལྡན་ལ། རྨ་བྱའི་མགྲིན་པའི་སྤུ་སྡུག་ལྟར་ཁ་དོག་ཡིད་དུ་འོང་བས་བརྒྱན་པའོ། །ནུབ་བྱང་དུ་དམག་དཔོན་རིན་པོ་ཆེ་ནི། བདུད་དང་བདུད་ཀྱི་ཕྱོགས་སུ་གཏོགས་པའི་དཔུང་གང་དག་གཞན་གླགས་བལྟ་བའི་ཕྱིར་འགྲོ་བ་དང་། ལྡང་བ་དང་། འོང་བ་མ་ལུས་པ་འཇོམས་པར་བྱེད་པའི་མཐུ་སྟོབས་ཀྱི་དཔལ་དང་། འབྱོར་བའི་དཔུང་དང་། ཕ་རོལ་གནོན་པའི་སྙིང་སྟོབས་སོགས་ཁྱད་ཆོས་དུ་མས་འཕགས་པའོ། །བྱང་ཤར་དུ་གཏེར་ཆེན་པོའི་བུམ་པ་ནི། གང་གིས་རེག་པ་ཙམ་ནས་ཟས་དང་། གོས་དང་། མལ་ཆ་ལ་སོགས་པ་ནམ་མཁའ་མཛོད་ཀྱི་ལོངས་སྤྱོད་ལྟར་འཛད་མེད་དུ་འབྱུང་བའོ། །དེ་ནས་ཀྱང་ཤར་ནས་བརྩམས་ཏེ་སྒེག་སོགས་བཞི་དང་། ཤར་ལྷོ་ནས་བརྩམས་ཏེ་མེ་ཏོག་མ་སོགས་བཞི་སྟེ། དེ་ཡང་ཤར་དུ་སྒེག་མོ་མ་ནི། མཛེས་སྡུག་གི་རྣམ་འགྱུར་ཕ་མཐའ་ཡས་པས་ཡིད་ཀྱི་ཆོམ་རྐུན་དུ་བྱེད་པ། ལྷོར་ཕྲེང་བ་མ་ནི་ནོར་བུ་རིན་པོ་ཆེ་སྣ་ཚོགས་པའི་དོ་ཤལ་འཛིན་པ། ནུབ་ཏུ་གླུ་མ་ནི། དབྱངས་ཀྱི་ཡན་ལག་བདུན་དང་ལྡན་པའི་གདངས་སྙན་པོ་རྣ་བའི་བཅུད་ལེན་དུ་སྟོབ་པ། བྱང་དུ་གར་མ་ནི། སྒེག་པ་དང་། ཞི་བ་ལ་སོགས་པའི་གར་གྱི་ཉམས་འགྱུར་མཐའ་ཀླས་པས་མཆོད་པ། ཤར་ལྷོར་མེ་ཏོག་མ་ནི། ཆུ་སྐྱེས་དང་། ཐང་སྐྱེས་དང་། གཞན་ཡང་ལྷ་རྫས་ཀྱིས་མེ་ཏོག་མནྡཱ་ར་བ་ལ་སོགས་པ་ཆར་དུ་བསྙིལ་བ། ལྷོ་ནུབ་ཏུ་བདུག་སྤོས་མ་ནི། ལྷན་ཅིག་སྐྱེས་པ་དང་། རྗེས་སུ་སྦྱང་བ་ལས་བྱུང་བའི་བསུང་ཞིམ་གྱི་སྤྲིན་ཕུང་འཐུལ་བ། ནུབ་བྱང་དུ་སྣང་གསལ་མ་ནི། རང་བྱུང་དང་། སྦྱང་བ་ལས་བྱུང་བའི་སྒྲོན་མེ་ས་ཕྱོགས་ཀྱི་ཁོར་ཡུག་ཐམས་ཅད་ཡོངས་སུ་སྣང་བར་བྱེད་པ། བྱང་ཤར་དུ་དྲི་ཆབ་མ་ནི། ཙནྡན་དང་། གསུར་དང་། གུར་གུམ་ལ་སོགས་པའི་དྲི་ཞིམ་པོའི་སྤོས་ཆུས་སྐུ་ལ་བྱུགས་པའོ། །དེ་ནས་ཤར་གླིང་གི་ནམ་མཁར་ལྷུན་པོའི་ཕྱེད་ཀྱི་ཐད་དུ་ཉི་མའི་དཀྱིལ་འཁོར་ཐད་ཀར་དཔག་ཚད་ལྔ་བཅུ་རྩ་གཅིག་པ། འོག་གཞི་མེ་ཤེལ་དང་། མཐའ་གསེར་གྱི་ར་བས་བསྐོར་བ། ནང་ན་ལྷའི་བུ་ཉི་མ་འཁོར་དང་བཅས་པ་གྲོང་ཁྱེར་གྱི་བཀོད་པ་ཕུན་སུམ་ཚོགས་པ་དང་བཅས་པ། ལྷོ་གླིང་གི་ནམ་མཁར་སྔར་ལྟར་ཟླ་བའི་དཀྱིལ་འཁོར་འོག་གཞི་ཆུ་ཤེལ་དང་མཐའ་ཆུ་ཤེལ་གྱི་ར་བས་བསྐོར་བའི་ནང་དུ་ལྷའི་བུ་ཟླ་བ་འཁོར་དང་བཅས་པའི་གྲོང་ཁྱེར། ནུབ་གླིང་གི་ནང་དུ་གདུགས་དཀར་པོ་གསེར་གྱི་ཡུ་བ་ཅན་ཐུར་མ་བརྒྱ་དང་ལྡན་པ་སོགས་ཆེན་པོ་ལ་འོས་པའི་ཡོ་བྱད། བྱང་གླིང་གི་ནང་དུ་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་ནམ་བ་དན་དཀར་པོ་ཕས་རྒོལ་གྱི་མཚན་མ་ལས་རིང་དུ་བྱས་པའི་དགེ་མཚན་གྱི་མཚོན་བྱེད་དུ་བསྒྲེང་བ་རྣམས་དང་། གཞན་ཡང་ལེགས་བྲིས་དང་། གདེངས་ཅན་དང་། སོགས་དཀྱུས་ལྟར་འདྲེན་པར་བྱ་བ་ཉིད་དོ། ། ༈

[edit]

yang de dag gi skabs su maN+Dal gyi rnam bshad lta bu sbyar bar spro na/ yang de dag gi skabs su maN+Dal gyi rnam bshad lta bu sbyar bar spro na/__brjod bya rgyas pa ni gzhan du shes par bya ba las yi ge'i ngal bas spro bar ma nus shing shin tu nyung ngu tsam zhig brjod pa'i dbang du byas na/__gong gi bshad pa las/__'phags pa kun tu bzang po'i mchod sprin du dad pas sprul te/__zhes pa'i mtshams 'bul ba la/__thog mar skabs su babs pa zhing khams kyi mchod sprin maN+Dal dbul tshul las 'phros pa'i brjod pa nyung ngu zhig snyan du gsol na rnam pa lnga ste/__dang po gang las brtsams te byung ba'i tshul gyi gleng gzhi ni/__mdo sde bskal pa bzang po las/__bder gshegs skyes dbang 'khor los sgyur ba'i tshe/__/de bzhin gshegs pa kun tu 'od de la/__/gling bzhi dag ni dbul bar byas nas kyang /__/dang por byang chub mchog tu sems bskyed do/__/zhes dang /__'phags pa gser 'od dam pa mdo sde'i dbang po'i rgyal po las/__rgyal po legs par byung ba dzam gling du/__/rin chen char pa 'bebs pa de mthong nas/__/gling bzhi rin chen gang bar byas nas kyang /__/rin chen gtsug tor can gyi bstan la phul/__/zhes dang /__dpal gsang ba 'dus pa'i rtsa ba'i rgyud las/__zhing 'di rin chen sna bdun gyis/__/mkhas pa dag gis yongs bkangs te/__/bsod nams 'dod pas bsod nams phyir/__/nyin re shes rab can gyis dbul/__/zhes pa la sogs pas mtshon mdo rgyud bstan bcos thams cad las lan gcig ma yin par bstan cing /__de yang sras dang bcas pa'i phyogs bcu dus bzhi'i rnam 'dren thams cad gang gis gshegs pa'i lam lngar grags pa las/__'dir thos bsam dang bsod nams kyi tshogs la rgya cher spyod pas tshogs lam gyi rnam grangs su 'du ba gang zhig slob pa'i sas bsdus pa'o//__//gnyis pa sgra don 'brel pa ni/__rgyu pha rol tu phyin pa'i theg pa dang sbyar na/__maN+Dal zhes pa ma Di rgyan byed pa'i byings don las drangs te gzhi dus su kun rdzob kyi bden pa'i snang tshul la gnas skabs su mi bslu ba'i nges pa rnyed pas/__lam dus rgyu bsod nams kyi tshogs mtha' klas pa la 'bad pa'i stobs kyis/__'bras bu'i dus na gzhan don du smon lam rten 'brel gyi mthu 'gog pa med pas mtshan dang dpe byad kyis brgyan pa'i gzugs sku rnam pa gnyis thob pa'i nyer len du gyur pa'i phyir 'bras ming rgyu la btags pa ste/__de skad du'ang /__slob dpon nA ga rdzu nas/__sangs rgyas rnams kyi gzugs kyi sku/__/bsod nams tshogs las skyes pa ste/__/zhes sam/__khyad par 'bras bu gsang sngags rdo rje theg pa ltar na ye shes thig le las/__ma ni yig 'bru 'dab mar brjod/__/Na ni yig 'bru lte bar dran/__/Da ni yig 'bru ge sar te/__/la ni yig 'bru de der blta/__zhes pa ltar/__phyi ltar du chu skyes kyi ge sar/__nang ltar na rdo rje btsun mo'i mkha' dbyings/__gsang ba ltar na yul stong pa nyid la yul can bde ba chen po'i ye shes kyis rol pas gzung 'dzin gyi 'ching ba mtshungs par ldan pa'i sa bon dang bcas pa btsan thabs su grol te/__sa bcu lam lnga'i yon tan thams cad gcig car du smin pas 'bras bu zung 'jug rnam kun mchog ldan gyi go 'phang la sbyor bar byed pa'i phyir de skad du brjod la/__gzhan yang thun mong du/__bla ma dang /__yi dam gyi lha sogs zhing khyad par can gyi mdun du rang gzhan bsod nams kyi tshogs rdzogs pa'i slad du/__dngos yid kyi mchod sprin mtha' klas pa zhig 'bul du yod pa las/__thams cad kyi rab dang /__mchog dang /__phul nyid kyi phyir rgyan lta bur gyur pa ni maN+Dal ste/__dkyil 'khor zhes su'ang grags pa'i dkyil ni dbus kyi lhun po dang /__'khor ni gling bzhi gling phran la sogs pa ji snyed pa la'ang bshad du yod do//__//gsum pa dag pa sbyor ba ni slob dpon chen po gnyis su med pa'i rdo rjes/_ba lci chu dang bcas pa sbyin pa ste/__/legs par byugs pa tshul khrims bzod pa ni/__/srog chags phra mo sel bar byed pa'o/__/brtson 'grus bya ba dag la 'jug pa ste/__/bsam gtan dus der rtse gcig byed pa'i sems/__/shes rab tshogs sogs legs par 'bar ba yin/__/zhes byang chub sems dpa' las dang po pa sems thog mar bskyed pa nas bzung ste mthar gyis bla na med pa'i ye shes brnyes kyi bar du ji ltar spyod par bya ba'i ngo bo ni pha rol tu phyin pa drug ste/__de nyid 'dir dri yi thig le byugs pa nas bzung ste tshom bu'i dkyil 'khor yongs su rdzogs pa'i bar la legs par tshang ba nyid do//__//bzhi pa tshul lam rnam pa ni/__mngon pa mdzod las/__gling bzhi dang ni nyi zla zung /__/ri rab dang ni 'dod lhar bcas/__/tshangs pa'i 'jig rten stong la ni/__/stong gi spyi phud yin par 'dod/__/de stong la ni stong gnyis pa/__/bar ma'i 'jig rten khams yin no/__/de stong la ni stong gsum ste/__/mnyam du 'jig cing 'byung bar 'gyur/__/zhes pa ltar gyi stong gsum mi mjed bye ba phrag brgya yongs su rdzogs pa'i sa gzhi thams cad tsan+dan dang /__a ga ru dang /__ga bur la sogs pa'i dri bzang po'i chus byugs te/__lha'i me tog man+dA ra ba dang /__puN+Da rI ka dang /__ut+pal dang /__ut+pal chen po la sogs sil mar bkrams shing /__nor bu rin po che baiDUR+Ya dang /__in+d+ra nI la dang /__margad sogs kyis mdzes par byas pa'i go mtshams rnams su/__'byor pa dang rin thang gis khyad par du byas pa'i rin po che'i ri bo/__dpag bsam gyi ljon shing /__'dod pa 'jo ba'i ba mo/__ma rmos pa'i lo tog gi dga' tshal te bzhi/__mngon pa 'byung ba sogs nas bshad pa'i 'khor los sgyur ba chen po la 'os pa'i rin po che sna bdun/__gter chen pos yongs su gang ba'i bum pa/__sgeg sogs phyi nang gi mchod pa'i lha mo brgyad/__nyi ma dang zla ba'i snang byed/__rin po che'i gdugs dkar pos nam mkha' khyab par khebs pa'i bla bre/__phas rgol gyi phyogs thams cad las rnam par rgyal ba'i rgyal mtshan rnams dang /__gzhan yang legs bris dang /__gdengs can dang /__mi yi 'gro ba dag gis bdag tu bzung ba dang ma bzung ba'i dpal dang 'byor pa'i phung po phun sum tshogs pa ma tshang ba med pas phyur bur bkang zhing de yang rdul phra rab re'i khongs de lta bu'i maN+Dal rdul snyed du spro bas 'phags pa kun tu bzang po'i mchod pa'i sprin gyi rnam par thar pa dang rjes su mthun pa nyid byed pa po rang gis byang drangs pa'i sems can thams cad mi gnas pa'i byang chub dam pa bla na med pa'i go 'phang la 'god pa'i slad du phyogs bcu dus bzhi'i mchod 'os thams cad gcig tu 'dus pa'i mnga' bdag rje btsun bla ma 'dir 'bul yul dmigs gsal gyi kha bsgyur ji ltar 'os pa bya/__dam pa gang gi zhabs pad du phul nas/__brtse chen snying rje'i gzigs pas bdag gir mdzad par gsol ba 'debs pa ste/__de skad du'ang /__rgyal ba'i sras po zhi ba lhas/__/bdag ni bsod nams mi ldan bkren chen te/__/mchod pa'i nor gzhan bdag la cang ma mchis/__/des na gzhan don dgongs pa'i mgon khyod kyis/__/bdag gi don slad nyid kyi mthus bzhes shig__/ces gsungs pa lta bu'o//__//lnga pa phan yon ni/__slob dpon dpa' bos/__sangs rgyas la ni gang zhig 'dir/__/maN+Dal me tog bcas byed la/__/'gro ba'i bdag po tshe ring zhing /__/sna tshogs nad kyi 'jigs grol ba/__/gang ni de yis skad cig thob/__/ces dang /__/sna tshogs bsod nams kyis brgyan pa'i/__/sa gzhi bris pa 'bul byed pa/__/lha yi bde ba thams cad dang /__/longs spyod mchog dang ldan 'gyur zhing /__/mir skye gser las lhag pa yi/__kha dog dang ldan mdzes pa dang /__/pad+ma'i mdog ltar yan lag tshang /__/mig gi dkyus ring mdzes par 'gyur/__/zhes pa la sogs pa'i brjod bya zad mi shes pa dang ldan pa de la yang /__gnas skabs lag tu len pa'i dbang du/__tshom bu lnga pa/__bdun pa/__bco lnga pa/__so bdun pa sogs dbye bsdu tha dad pa 'byung ba las 'dir phyogs phyi ma ltar 'bul na/__zhes pa'i mtshams maN+Dal dngos dbul zhing /__mthar/__de ltar yid sprul maN+Dal gyi mchod sprin 'bul ba sngon du song nas/__gnyis pa de nyid mtshon byed dngos 'byor gyi bdog pa phra mo rnams ye shes gzigs pa dam pa'i spyan lam du bstar ba la/__thog mar dri ma med pa'i sogs dkyus ltar spro bar bya zhing /__gal te de las cung zad zhib tu bshad par 'dod na/__gzhan sngar ltar la/__bzhi pa tshul lam rnam pa ni/__zhes pa'i mtshams/__lhun po gling bzhi gling phran lcags ri dang bcas pa'i dbus su 'byor pa'i khyad par sna tshogs pas yongs su gtams pa ste de yang gang la brten pa'i gzhi rlung gis dkyil 'khor sngon po rngams su dpag tshad sa ya gcig dang drug 'bum/__rgyar grangs med pa/__de'i steng du chu'i dkyil 'khor dkar po dpangs su dpag tshad 'bum phrag brgyad/__de'i steng du dbang chen gser gyi sa gzhi ser po rngams su dpag tshad sum 'bum nyi khri gnyis ka'i thad kar dpag tshad 'bum phrag bcu gnyis dang sum stong bzhi brgya lnga bcu/__khor yug tu sa ya gsum dang drug 'bum chig khri sum brgya yod pa'i mthar lcags kyi ri bo gru bzhi pa dpangs su dpag tshad sum brgya bcu gnyis rgyang grags bzhi dang ldan pas yongs su bskor ba'i dbus su/__sa 'dzin rnams kyi mchog tu gyur pa shar rin po che kAn+ta/__lho baiDUR+Ya/__nub pad+mA rA ga__/byang su bar+N+Na las grub pa 'phangs su dpag tshad chig 'bum drug khri las brgyad khri mtshor nub cing /__lhag ma steng du 'phags pa'i phyed man la'ang bang rim bzhi yod pa'i dang por gnod sbyin lag na gzhong thogs/__gnyis par phreng thogs/__gsum par stag myos/__bzhi par rgyal chen rigs bzhi'i lha rnams rang rang gi dpung dang bcas te 'khod pa'i steng gi gzhir sum cu rtsa gsum pa'i lha rnams kyi grong khyer blta na sdug ces kun nas gru bzhir snang ba'i ngos rer dpag tshad nyis stong lnga brgya re/__khor yug tu khri phrag gcig yod cing /__'byor pa dang longs spyod kyi khyad par bsam gyis mi khyab pa'i dbus su legs bris kyi dbang po rang gi bsti gnas rnam par rgyal ba'i khang bzang ngos rer dpag tshad nyis brgya lnga bcu dang /__srid du lta na sdug las dpag tshad phyed kyi 'phags pa/__phyi rol gyi phyogs bzhir tshal chen po bzhi/__byang shar mtshams su 'dod dgu thams cad 'byung ba'i ljon shing yongs 'du sa brtol/__/lho nub tu sbyin skyes kyi tshogs 'dun gros byed pa'i gnas chos bzang lha'i mdun sa sogs te bkod pa phun sum tshogs pas brgyan pa/__de'i steng du dpag tshad brgyad khri 'das pa'i nam mkhar mas nas rim par 'thab bral/__dga' ldan/__'phrul dga'/__gzhan 'phrul dbang byed de 'dod khams kyi lha'i gnas rnams dang /__de nas kyang tshangs ris sogs bsam gtan bzhi'i lha gnas bcu gnyis dang /__mi che ba sogs gtsang rigs kyi lha gnas lnga ste gzugs khams gnas rigs bcu bdun po rim pa bzhin du gnas par bshad la/__gzhan du ting nge 'dzin gyi bye brag gi 'phen pa las byung ba'i nam mkha' mtha' yas sogs gzugs med skye mched mu bzhi po'i gnas ni gong 'og dang phan tshun med do/__/de ltar gyi lhun po'i phyi rol nas gser gyi ri bdun dang /__rol pa'i mtsho bdun gyis rim par bskor ba dang /__mtha'i lcags ri'i mtshams su ba tshwa can gyi mtsho zhengs su dpag tshad sum 'bum dang nyi khri yod pa'i nang khongs su/__shar du lus 'phags gling dbyibs zla gam bcad kha ri rab la bstan pa'i ngos ring ba dpag tshad nyis stong dang /__'bur ngos thung ba dpag tshad sum brgya lnga bcu pa/__lhor dzam bu gling sog kha'i dbyibs kyi zhing che ba ri rab la bstan pa'i/__ngos ring ba gsum la dpag tshad nyis stong dang /__yu ba'i phyogs la dpag tshad phyed dang bzhi yod pa/__nub ba glang spyod dbyibs zlum po/__thad kar dpag tshad nyis stong lnga brgya la khor yug tu dpag tshad bdun stong lnga brgya yod pa/__byang sgra mi snyan dbyibs gru bzhi pa'i ngos rer dpag tshad stong phrag gnyis gnyis re yod pa/__de dag gi g.yas g.yon du gling phran kyang /__lus 'phags po'i g.yas su lus dang /__g.yon du lus 'phags/__dzam+bu gling gi g.yas su rnga yab dang /__g.yon du rnga yab gzhan/__ba glang spyod kyi g.yas su g.yo ldan dang /__g.yon du lam mchog 'gro/__sgra mi snyan gyi g.yas su sgra mi snyan dang /__g.yon du sgra mi snyan gyi zla ste/__de dag kyang dbyibs so so'i gling chen rnams dang mtshungs shing /__che chung ni phyed phyed du yod la/__so so'i bde 'byor gyi khyad par sna tshogs pa longs spyod pa dang bcas pa'i ngang tshul can te/__de skad du'ang mngon pa mdzod las/__gling bzhi dang ni nyi zla zung /__/zhes sogs dkyus bzhin la/__mdzes par byas pa'i/__zhes pa'i mtshams su/__shar gling gi nang nas brtsams te rin po che sna tshogs phung por spungs pa'i ri bo/__lho gling gi nang du ri rab rtse mo'i byang shar du skyes pa'i dpag bsam gyi ljon shing /__nub gling gi nang du bza' btung 'dod pa 'jo ba'i ba/__byang gling gi nang du skyes bu'i rtsol bas ma rmos ma btab par rang bzhin du 'khrungs pa'i lo tog__/de nas kyang shar nas phyogs bzhir 'khor lo nas brtsams pa dang /__shar lho nas mtshams bzhir glang po nas brtsams te rgyal srid rin po che sna bdun/__gter gyi bum bzang dang bcas pa ste/__de yang shar du 'khor lo rin po che ni/__lha rdzas kyi dwangs ma'i gser bzang po las byas shing dbyibs dang /__lte ba zlum la rtsibs stong dang ldan pa/__'khor yug tu mu khyud mnyam zhing bzang ba/__phas kyi rgol ba'i phyogs thams cad las rnam par rgyal ba'i byed pa dang ldan pa'o/__/lhor nor bu rin po che ni/__lha rdzas kyi rang bzhin baiDUR+Ya las grub cing dbyibs zur brgyad pa/__de'i 'od kyis dpag tshad tsam du khyab cing /__mun pa'i rab rib thams cad 'phrog pas mtshan yang nyin mo ltar gsal ba'i byed las can/__nub tu btsun mo rin po che ni/__gzugs mdzes shing lta na sdug pa/__ngang tshul rang bzhin gyis bzang ba/__lpags pa'i mdog dkar la dmar ba'i mdangs dang ldan pas legs shing /__reg bya 'jam pa/__kha nas ut+pa la yi bsung zhim 'thul zhing yid du 'ong ba/__tsha bas nyen pa'i tshe bsil ba dang /__bsil bas nyen pa'i tshe tsha ba ste 'dod dgu'i reg bya dang ldan pa'o/__/byang du blon po rin po che ni/__rgyal pos gang sems de nyid shes nas ma bsgos par yang las byed pa/__shin tu phun sum tshogs kyang chos min gyi las spangs pa/__nyon mongs pa med pa/__gzhan la gnod pa med pa/__skye bo la mi 'tshe ba/__chos kyi bya ba dang ldan zhing ma 'ongs pa'i bya ba shes pa dang ldan pa/__thams cad yongs su 'bul ba sogs kyi khyad chos can no/__/shar lhor glang po rin po che ni/__yan lag bdun po sa la legs par gnas shing /__gangs ri'i phung po 'gro shes pa lta bu ste/__g.yul las rnam par rgyal bar 'dod pa'i rgyal po la 'os pa'i nor gyi mchog go__/lho nub tu rta mchog rin po che ni/__tho rangs kyis mtshon te yun thung ngu tsam la'ang phyogs ma lus pa bskor nas slar rang khyim du ldog pa'i stobs dang ldan la/__rma bya'i mgrin pa'i spu sdug ltar kha dog yid du 'ong bas brgyan pa'o/__/nub byang du dmag dpon rin po che ni/__bdud dang bdud kyi phyogs su gtogs pa'i dpung gang dag gzhan glags blta ba'i phyir 'gro ba dang /__ldang ba dang /__'ong ba ma lus pa 'joms par byed pa'i mthu stobs kyi dpal dang /__'byor ba'i dpung dang /__pha rol gnon pa'i snying stobs sogs khyad chos du mas 'phags pa'o/__/byang shar du gter chen po'i bum pa ni/__gang gis reg pa tsam nas zas dang /__gos dang /__mal cha la sogs pa nam mkha' mdzod kyi longs spyod ltar 'dzad med du 'byung ba'o/__/de nas kyang shar nas brtsams te sgeg sogs bzhi dang /__shar lho nas brtsams te me tog ma sogs bzhi ste/__de yang shar du sgeg mo ma ni/__mdzes sdug gi rnam 'gyur pha mtha' yas pas yid kyi chom rkun du byed pa/__lhor phreng ba ma ni nor bu rin po che sna tshogs pa'i do shal 'dzin pa/__nub tu glu ma ni/__dbyangs kyi yan lag bdun dang ldan pa'i gdangs snyan po rna ba'i bcud len du stob pa/__byang du gar ma ni/__sgeg pa dang /__zhi ba la sogs pa'i gar gyi nyams 'gyur mtha' klas pas mchod pa/__shar lhor me tog ma ni/__chu skyes dang /__thang skyes dang /__gzhan yang lha rdzas kyis me tog man+dA ra ba la sogs pa char du bsnyil ba/__lho nub tu bdug spos ma ni/__lhan cig skyes pa dang /__rjes su sbyang ba las byung ba'i bsung zhim gyi sprin phung 'thul ba/__nub byang du snang gsal ma ni/__rang byung dang /__sbyang ba las byung ba'i sgron me sa phyogs kyi khor yug thams cad yongs su snang bar byed pa/__byang shar du dri chab ma ni/__tsan+dan dang /__gsur dang /__gur gum la sogs pa'i dri zhim po'i spos chus sku la byugs pa'o/__/de nas shar gling gi nam mkhar lhun po'i phyed kyi thad du nyi ma'i dkyil 'khor thad kar dpag tshad lnga bcu rtsa gcig pa/__'og gzhi me shel dang /__mtha' gser gyi ra bas bskor ba/__nang na lha'i bu nyi ma 'khor dang bcas pa grong khyer gyi bkod pa phun sum tshogs pa dang bcas pa/__lho gling gi nam mkhar sngar ltar zla ba'i dkyil 'khor 'og gzhi chu shel dang mtha' chu shel gyi ra bas bskor ba'i nang du lha'i bu zla ba 'khor dang bcas pa'i grong khyer/__nub gling gi nang du gdugs dkar po gser gyi yu ba can thur ma brgya dang ldan pa sogs chen po la 'os pa'i yo byad/__byang gling gi nang du phyogs thams cad las rnam par rgyal ba'i rgyal mtshan nam ba dan dkar po phas rgol gyi mtshan ma las ring du byas pa'i dge mtshan gyi mtshon byed du bsgreng ba rnams dang /__gzhan yang legs bris dang /__gdengs can dang /__sogs dkyus ltar 'dren par bya ba nyid do/__/_!_