JKW-KABUM-17-TSA-001-016

🚧 This website is under continued development. We appreciate your patience!

Previous Text Back to Volume PageNext Text

Wylie title	don bsdu dang phan yon
Location	mkhyen brtse'i bka' 'bum Volume 17, sde tshan 1, Text 16, Pages 112-114 (Folios 56b2 to 57b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. don bsdu dang phan yon. In 'jam dbyangs mkhyen brtse'i dbang po'i bka' 'bum, Vol. 17: 112-114. Khams sde dge rdzong sar dgon: Rdzong sar blo gros phun tshogs, 2020.
Genre	Crafts - bzo rig pa

1 Texts in this Section (sde tshan or chos tshan)

16 112-114	དོན་བསྡུ་དང་ཕན་ཡོན། don bsdu dang phan yon Crafts - bzo rig pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

དེ་ལྟར་སྐུ་གསུང་ཐུགས་ཀྱི་རྟེན་གྱི་ཕྱག་ཚད་ཀྱི་རྣམ་བཞག་ནི། དཔལ་དུས་ཀྱི་འཁོར་ལོ་རྩ་འགྲེལ། སྡོམས་འབྱུང་རྩ་འགྲེལ། ཤཱ་རིའི་བུས་ཞུས་པ། ཀྲྀ་ཡ་ས་མུཙྪའི་དཀྱིལ་ཆོག །མཆོད་རྟེན་གྱི་ཆ་དབྱེ་རྣམས་དང་། བརྒྱད་སྟོང་འགྲེལ་ཆེན། ཀོ་ས་ལའི་རྒྱན་སོགས་ལས་རྒྱ་ཆེར་གསུངས་པ་ལྟར་བོད་དུའང་ལྷོ་བྲག་སྨན་༡ཐང་པ། མཁྱེན་བརྩེ་ཆེན་མོ་འཇམ་མགོན་སུདྷཱི་ཀིརྟི་སྤྲུལ་སྐུ་འཕྲང་ཁ་བ་དཔལ་ལྡན་བློ་གྲོས་བཟང་པོ། རྗེ་ཀརྨ་པ་མི་བསྐྱོད་རྡོ་རྗེ་དགའ་བའི་དབྱངས། ཨ་ཀྱ་སྐུ་སྐྱེ་བློ་བཟང་བསྟན་རྒྱན་སོགས་ཀྱིས་མཛད་པའི་ལྷ་སྐུའི་ཐིག་གི་ཡི་གེ་ཇི་སྙེད་པ་དང་། ཀུན་མཁྱེན་བུ་སྟོན། སྟག་ཚང་ལོ་ཙཱ་བ། པཎ་ཆེན་ནམ་བཟང་སོགས་ཀྱི་མཆོད་རྟེན་བརྒྱད་ཀྱི་ཐིག་རྩ། མཁས་པ་རོང་པོ་རྒྱལ་མཁར་རྩེ་པས་མཛད་པའི་ཡི་གེའི་དག་སྦྱོར་སོགས་བསྟན་བཅོས་མཐའ་ཀླས་ཤིང་། དེ་ལྟར་ཚད་དང་ལྡན་པར་སྐུ་གསུང་ཐུགས་ཀྱི་རྟེན་བཞེངས་པའི་ཕན་ཡོན་ཡང་། བསླབ་བཏུས་ལས། མི་མཇེད་འཇིག་རྟེན་གྱི་ཁམས་ཐམས་ཅད་ལ་འདོད་ཡོན་ལྔའི་སྦྱིན་པ་བྱིན་པ་བས་དགེ་བསྙེན་རྣམ་དག་གཅིག་ལ་བསྙེན་བསྐུར་བའོ། །དེ་ཐམས་ཅད་ལས་ནི་དགེ་ཚུལ་གཅིག་ལའོ། །དེ་ཐམས་ཅད་ལས་ནི་དགེ་སློང་གཅིག་ལའོ། །དེ་ཐམས་ཅད་ལས་ནི་གསང་སྔགས་ཀྱི་རྡོ་རྗེ་འཛིན་པ་གཅིག་ལའོ། །དེ་ཐམས་ཅད་ལས་ནི་སྐུ་གཟུགས་མཚན་ཉིད་དང་ལྡན་པ་ཚོན་གང་བ་ཞིག་བཞེངས་པ་བསོད་ནམས་ཁྱད་པར་དུ་འཕགས་སོ། །ཞེས་དང་། བརྒྱད་སྟོང་པ་ལས། དེ་བཞིན་གཤེགས་པའི་བྱིན་གྱི་རླབས་ཀྱིས་གླེགས་བམ་ཆེན་པོ་ཡི་གེ་གསལ་ཞིང་ལེགས་པར་བྲིས་ཏེ། མེ་ཏོག་དང་། ཞེས་སོགས་ནས། ཀུན་དགའ་བོ་ངས་ནི་རྗེས་སུ་བསྟན་པའམ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་གྱུར་ཏོ། །ཞེས་དང་། འཇམ་དཔལ་རྩ་རྒྱུད་ལས། ལུས་སྦྱང་པར་བྱས་ནས་རང་གི་ལག་གིས་མཆོད་རྟེན་བྱས་ན་མཚམས་མེད་པ་ལྔ་བྱས་པས་ཀྱང་གྲུབ་བོ། །མཆོད་རྟེན་འབུམ་བྱས་ན་རིག་པ་འཛིན་པའི་འཁོར་ལོས་སྒྱུར་བར་འགྱུར་ཏེ། བསྟན་བཅོས་ཐམས་ཅད་མངོན་པར་ཤེས་ལ་ཐབས་དང་ཤེས་པ་དང་ལྡན་ཞིང་བསྐལ་བར་གནས་ལ་ཤི་ནས་ཀྱང་སྐྱེ་བ་རྣམས་སུ་རྒྱལ་པོ་བྱེད་ཅིང་ངན་སོང་དུ་མི་འགྲོ་ཡུལ་དབུས་སུ་ཉི་མ་ཤར་བ་ལྟ་བུའི་དབང་པོ་ཐམས་ཅད་དང་ལྡན་པར་འགྱུར་རོ། །ཐོས་པ་འཛིན་པ་དང་སྐྱེ་བ་དྲན་པར་འགྱུར་རོ། །ཞེས་སོགས་མདོ་རྒྱུད་བསྟན་བཅོས་དུ་མ་ནས་གསུངས་པ་བཞིན་དང་། དེ་ལས་ལྡོག་སྟེ་ཚད་དང་མི་ལྡན་ན། སྡོམས་འབྱུང་ལས། ཀོས་ཀོ་མགྲིན་པ་བྱིན་པ་སྟེ། །གསུམ་པོ་རིང་ན་སྐྱོན་ཆེན་པོ། །སྔགས་པ་བདག་ཉིད་ངེས་པར་ནི། །གནས་ལས་ཉམས་ཤིང་བསྒྲད་པར་འགྱུར། །ཞེས་སོགས་བཀྲ་མི་ཤིས་ཤིང་རྣམ་སྨིན་ལྕི་བ་སོགས་ཤེས་པར་བྱས་ནས་རྣམ་པ་ཀུན་ཏུ་དྲི་མ་མེད་པའི་ལུང་དང་མན་ངག་གི་རྗེས་སུ་འབྲངས་ནས་དཔྱད་པར་བྱའོ། །གཞན་ཡང་རྒྱུད་སྡེ་རྒྱ་མཚོ་ནས་བཤད་པའི་བློས་སློང་དང་དཀྱིལ་འཁོར་བྲི་བའི་ཐིག་ཚད། ཐབས་དང་། དགང་བླུགས། རྡོ་རྗེ་དྲིལ་བུ་ལ་སོགས་པའི་ཕྱག་ཚད་རྣམས་དང་། འདུལ་བ་གནས་མལ་གྱི་གཞི་ལས་གསུངས་པའི་གཙུག་ལག་ཁང་བརྩེགས་པའི་ཚུལ་སོགས་དང་། དུས་འཁོར་མཁའ་འགྲོ་རྒྱ་མཚོ་རྡོ་རྗེ་གུར་དང་ཡོ་ག་རྡོར་ཕྲེང་སོགས་ནས་བཤད་པའི་ས་གར་དང་། མཆོད་གར། ཞི་ཁྲོ་སྒྱུ་འཕྲུལ། བཀའ་བརྒྱད་ཕུར་པ་སོགས་ནས་བཤད་པའི་རྩ་འཆམ་དང་འབྲུབ་འཆམ་ལ་སོགས་པ་ཉམས་དགུ་དང་ལྡན་པའི་རིགས་རྣམས་སོ། །

[edit]

don bsdu dang phan yon/ de ltar sku gsung thugs kyi rten gyi phyag tshad kyi rnam bzhag ni/__dpal dus kyi 'khor lo rtsa 'grel/__sdoms 'byung rtsa 'grel/__shA ri'i bus zhus pa/__kr-i ya sa muts+tsha'i dkyil chog__/mchod rten gyi cha dbye rnams dang /__brgyad stong 'grel chen/__ko sa la'i rgyan sogs las rgya cher gsungs pa ltar bod du'ang lho brag sman 1thang pa/__mkhyen brtse chen mo 'jam mgon sud+hI kirti sprul sku 'phrang kha ba dpal ldan blo gros bzang po/__rje karma pa mi bskyod rdo rje dga' ba'i dbyangs/__a kya sku skye blo bzang bstan rgyan sogs kyis mdzad pa'i lha sku'i thig gi yi ge ji snyed pa dang /__kun mkhyen bu ston/__stag tshang lo tsA ba/__paN chen nam bzang sogs kyi mchod rten brgyad kyi thig rtsa/__mkhas pa rong po rgyal mkhar rtse pas mdzad pa'i yi ge'i dag sbyor sogs bstan bcos mtha' klas shing /__de ltar tshad dang ldan par sku gsung thugs kyi rten bzhengs pa'i phan yon yang /__bslab btus las/__mi mjed 'jig rten gyi khams thams cad la 'dod yon lnga'i sbyin pa byin pa bas dge bsnyen rnam dag gcig la bsnyen bskur ba'o/__/de thams cad las ni dge tshul gcig la'o/__/de thams cad las ni dge slong gcig la'o/__/de thams cad las ni gsang sngags kyi rdo rje 'dzin pa gcig la'o/__/de thams cad las ni sku gzugs mtshan nyid dang ldan pa tshon gang ba zhig bzhengs pa bsod nams khyad par du 'phags so/__/zhes dang /__brgyad stong pa las/__de bzhin gshegs pa'i byin gyi rlabs kyis glegs bam chen po yi ge gsal zhing legs par bris te/__me tog dang /__zhes sogs nas/__kun dga' bo ngas ni rjes su bstan pa'am thams cad mkhyen pa'i ye shes yongs su rdzogs par gyur to/__/zhes dang /__'jam dpal rtsa rgyud las/__lus sbyang par byas nas rang gi lag gis mchod rten byas na mtshams med pa lnga byas pas kyang grub bo/__/mchod rten 'bum byas na rig pa 'dzin pa'i 'khor los sgyur bar 'gyur te/__bstan bcos thams cad mngon par shes la thabs dang shes pa dang ldan zhing bskal bar gnas la shi nas kyang skye ba rnams su rgyal po byed cing ngan song du mi 'gro yul dbus su nyi ma shar ba lta bu'i dbang po thams cad dang ldan par 'gyur ro/__/thos pa 'dzin pa dang skye ba dran par 'gyur ro/__/zhes sogs mdo rgyud bstan bcos du ma nas gsungs pa bzhin dang /__de las ldog ste tshad dang mi ldan na/__sdoms 'byung las/__kos ko mgrin pa byin pa ste/__/gsum po ring na skyon chen po/__/sngags pa bdag nyid nges par ni/__/gnas las nyams shing bsgrad par 'gyur/__/zhes sogs bkra mi shis shing rnam smin lci ba sogs shes par byas nas rnam pa kun tu dri ma med pa'i lung dang man ngag gi rjes su 'brangs nas dpyad par bya'o/__/gzhan yang rgyud sde rgya mtsho nas bshad pa'i blos slong dang dkyil 'khor bri ba'i thig tshad/__thabs dang /__dgang blugs/__rdo rje dril bu la sogs pa'i phyag tshad rnams dang /__'dul ba gnas mal gyi gzhi las gsungs pa'i gtsug lag khang brtsegs pa'i tshul sogs dang /__dus 'khor mkha' 'gro rgya mtsho rdo rje gur dang yo ga rdor phreng sogs nas bshad pa'i sa gar dang /_mchod gar/_zhi khro sgyu 'phrul/__bka' brgyad phur pa sogs nas bshad pa'i rtsa 'cham dang 'brub 'cham la sogs pa nyams dgu dang ldan pa'i rigs rnams so/__/