JKW-KABUM-05-CA-004-013

🚧 This website is under continued development. We appreciate your patience!

Previous Text Back to Volume PageLast text in section.

Wylie title	grub mtha' rnam par bshad pa'i snying po
Location	mkhyen brtse'i bka' 'bum Volume 5, sde tshan 4, Text 13, Pages 627-632 (Folios 28a3 to 30b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. grub mtha' rnam par bshad pa'i snying po. In 'jam dbyangs mkhyen brtse'i dbang po'i bka' 'bum, Vol. 5: 627-632. Khams sde dge rdzong sar dgon: Rdzong sar blo gros phun tshogs, 2020.
Genre	Doxographies - grub mtha'  ·  Detailed Classification - rnam bzhag
Colophon	།ཞེས་པའང་མཉྫུ་གྷོ་ཥས་སོ།།
	zhes pa'ang many+dzu g+ho Shas so

1 Texts in this Section (sde tshan or chos tshan)

13 627-632	གྲུབ་མཐའ་རྣམ་པར་བཤད་པའི་སྙིང་པོ། grub mtha' rnam par bshad pa'i snying po Doxographies - grub mtha'   ·   Detailed Classification - rnam bzhag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

གྲུབ་པའི་མཐའ་རྣམ་པར་དཔྱད་པའི་སྙིང་པོ་ཞེས་བྱ་བ་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །རེ་ཞིག་གྲུབ་པའི་མཐའ་ནི་རྣམ་པ་གཉིས་ཏེ། གཞན་སྡེ་དང་། རང་སྡེའོ། །དང་པོ་ལ། སྤྱིར་ལོག་རྟོག་གི་འདོད་པ་བསམ་གྱིས་མི་ཁྱབ་ཀྱང་། མཆོག་ཏུ་གྱུར་པ་བྲམ་ཟེ་མཆོག་གི་རྒྱུད་དག །བདག་རྟག་པ། ཁྱབ་པ། ལུས་མེད་པ། གཅིག་པུ་ཞིག་ཡོད་པར་འདོད་དོ། །དེ་ནི་མི་འཐད་དེ། བདག་དེ་ཕུང་པོ་ཉིད་དམ། དེ་ལས་རྫས་གཞན་པ་གང་། དང་པོ་ནི་མི་འཐད་དེ། བདག་རྟག་ལ་ཕུང་པོ་མི་རྟག་པའི་ཕྱིར། ཕྱི་མ་མི་འཐད་དེ། ཕུང་པོ་ལྔ་བསལ་བའི་འོག་ཏུ་བདག་ཅེས་རྫས་གཞན་པ་སྟོན་རྒྱུ་ཡོད་དགོས་པའི་ཕྱིར། གལ་ཏེ་སུས་ཀྱང་མངོན་དུ་མ་གྱུར་པ་ཞིག་ཡོད་དོ་ཞེ་ན། རི་རྭ་དང་མོ་གཤམ་གྱི་བུ་ཡང་ཡོད་པར་ཁས་ལོངས་ཤིག །དེ་བས་ན་བདག་དེ་ཕུང་པོ་དང་དེ་ལས་རྫས་གཞན་པར་མ་དམིགས་ན། དེ་མ་ཡིན་པའི་ཕུང་པོ་གསུམ་པར་ཁས་བླང་དུ་མི་རུང་བས་མེད་པར་གྲུབ་བོ། །ཡང་། རྟེན་དང་བརྟེན་པར་ཡོད་དོ་ཞེ་ན། དེ་འདྲ་བའི་ཆོས་མ་དམིགས་པའི་ཕྱིར། བདག་གིས་ཕུང་པོ་ལ་ཁྱབ་བོ་ཞེ་ན། བདག་ནི་གཅིག་ལ་ཕུང་པོ་ནི་དུ་མ་ཡིན་པས་རྫས་འགལ་བའི་ཕྱིར། བདག་ཕུང་པོ་དང་ལྡན་པར་ཡང་མེད་དེ། དེ་གཉིས་འབྲེལ་པ་མ་གྲུབ་པའི་ཕྱིར། བདག་གཅིག་པུ་མ་ཡིན་ཏེ། དེས་ཁྱབ་ཀྱི་དངོས་པོ་རྣམས་ཐ་དད་པའི་ཕྱིར། འདོད་ན། གང་ཟག་གཅིག་བཅིངས་པས་ཐམས་ཅད་བཅིངས་པར་འགྱུར་རོ། །བདག་རང་དབང་ཅན་མ་ཡིན་ཏེ། བདེ་སྡུག་སོགས་མི་འདོད་བཞིན་དུ་འབྱུང་བའི་ཕྱིར། ལུས་མེད་པ་ཡང་མི་འཐད་དེ། ལུས་ལས་གཞན་དུ་ཡོད་པ་ནི་བཟློག་ཟིན། ལུས་ཉིད་དེར་འདོད་ན་ནི་ལུས་མེད་པའི་དམ་བཅའ་ཉམས་ལ། ཕུང་པོ་གསུམ་པ་ནི་མ་གྲུབ་པའི་ཕྱིར། དེ་བས་ན་བརྟགས་པ་འདི་ནི་ཐག་པ་ལ་སྦྲུལ་དུ་ནན་གྱིས་བསྒྲུབས་པ་དང་མཚུངས་སོ། །གཉིས་པ་ལ། ཉན་ཐོས་དག །ཕྱི་དོན་རྡུལ་ཕྲ་རབ་དང་། དེའང་བར་དང་བཅས་པ་དང་། བར་མེད་པ་དང་། བར་མེད་པ་ལ་མ་འབྱར་བར་ཡོད་པར་འདོད་དོ། །དེ་མི་འཐད་དེ། འདི་ལྟར་ཐག་པ་ལ་སྦྲུལ་དུ་འཛིན་པ་ནི་འཁྲུལ་ཏེ། ཐག་པ་ཉིད་དོ། །དེའང་འཁྲུལ་ཏེ། ཐག་པ་མ་ཡིན་ཏེ་ཉིས་སྒྲིལ་དང་། དེའང་མ་ཡིན་ཏེ་རྩྭ་འདུས་པ་དང་། རྩྭ་ཡང་མེད་དེ་རྡུལ་ཕྲ་རབ་ཚོགས་པའོ། །རྡུལ་ཕྲ་རབ་ཡོད་དམ་ཞེ་ན། མེད་དེ་ཕྱོགས་ཆ་དབྱེ་བ་མེད་པའི་ཕྱིར། ཕྱོགས་ཆ་ཐ་དད་པས་དེ་མེད་པའི་རྡུལ་ཕྲ་རབ་གཅིག་པ་ཉིད་མི་འགྲུབ་བོ། །གལ་ཏེ་འདི་ལ་དབྱེར་མེད་དོ་ཞེ་ན། །དབུས་རྡུལ་གཅིག་ལ་ཕྱོགས་རྡུལ་དྲུག་གིས་བསྐོར་བའི་ཚེ་ན། ནུབ་ཕྱོགས་ན་གནས་པའི་རྡུལ་ཕྲ་རབ་དང་ལྡན་པའི་ཆ་དེ་ཉིད་ཀྱིས་བྱང་ཕྱོགས་ན་གནས་པའི་རྡུལ་ཕྲ་རབ་རྣམས་དང་ལྡན་པ་ཡིན་ནམ། མ་ཡིན། དང་པོ་ལྟར་ན་ཕྱོགས་རྡུལ་དྲུག་པོ་དབུས་ན་གནས་པའི་རྡུལ་ཕྲ་རབ་ཁོ་ནའི་བདག་ཉིད་ཡིན་པས་དེས་བརྩམས་པའི་དངོས་པོ་ཐམས་ཅད་ཀྱང་རྡུལ་ཕྲ་རབ་ཏུ་འགྱུར་རོ། །ཕྱི་མ་ལྟར་ན། ཆ་ཤས་མེད་པའི་དམ་བཅའ་ཉམས་སོ། །དེ་བས་ན་རྡུལ་ཕྲ་རབ་གཅིག་མ་གྲུབ་པས་དུ་མ་མེད། དེ་མེད་པས་བར་མེད་དང་། རེག་ལ་མ་འབྱར་བ་སོགས་བློས་བརྟགས་པ་ཁོ་ནར་ཟད་དོ། །ཁ་ཅིག་དངོས་པོ་རྣམས་ཕྲེང་བ་དང་སྐུད་པ་ལྟར་ཡན་ལག་ཅན་དུ་ཡོད་པར་འདོད་དོ། །དེ་ནི་མི་འཐད་དེ། ཡན་ལག་དང་ཡན་ལག་ཅན་གཉིས་གཅིག་གམ་ཐ་དད། དང་པོ་མི་འཐད་དེ། གང་གི་ཐོག་མའི་ཆ་དམར་པོ་ལ་སོགས་པ་ཡིན་པ་དེ་ཉིད་ཀུན་དབུས་མའི་ཆ་དང་། ཐོག་མའི་ཆ་གཅིག་ཤོས་ཀྱང་དམར་པོ་ལ་སོགས་པ་ཡིན་པར་ཐལ་བར་འགྱུར་ཏེ་གཅིག་པའི་ཕྱིར། ཕྱི་མ་མི་འཐད་དེ། ཡན་ལག་རྣམས་ལས་གཞན་པའི་ཡན་ལག་ཅན་འགའ་ཡང་མ་དམིགས་ཏེ། སྐུད་པ་ཉིས་སྒྲིལ་དང་སྤུ་རེ་རེ་ལས་གཞན་པའི་ཡན་ལག་ཅན་ཉིད་སུས་མཐོང་། དེ་ལ་སེམས་ཙམ་པ་དག །བདག་དང་རྡུལ་སོགས་མེད་ཀྱང་། སེམས་དང་ཡེ་ཤེས་སྐད་ཅིག་མ་རྒྱུན་ཆགས་སུ་འབྱུང་བ་ཡོད་དོ། །ཞེའོ། །དེ་མི་འཐད་དེ། སྐད་ཅིག་མ་མ་གྲུབ་པའི་ཕྱིར། དེའང་འདས་པའི་སྐད་ཅིག་མ་ཞིག་ལ། མ་འོངས་པ་མ་གྲུབ་པས་མེད་ཅིང་། དེ་གཉིས་མེད་པས་འབྲས་བུའི་སྐྱེ་བ་ད་ལྟར་བའི་སྐད་ཅིག་མ་ག་ལ་ཡོད། ཡང་སེམས་དེ་རྒྱུ་འབྲས་དུས་ཐ་དད་པ་ལས་སྐྱེས་སམ། དུས་མཉམ་ལས་སྐྱེ། དང་པོ་ལྟར་ན་དུས་གཞན་གྱིས་བར་དུ་ཆོད་པ་ལས་སྐྱེའམ། མ་ཆོད་པར་སྐྱེ། དང་པོ་མི་འཐད་དེ། འདས་པ་ཁོ་ན་ལས་སྐྱེད་གོས་པས། དེ་ཞིག་པའི་དངོས་མེད་ཡིན་པའི་ཕྱིར། ཕྱི་མ་མི་འཐད་དེ། དུས་ཐམས་ཅད་སྐད་གཅིག་མ་གཅིག་གི་ནང་དུ་ཞུགས་པར་འགྱུར་བས། བསྐལ་པའང་སྐད་ཅིག་མ་ཙམ་ཉིད་དུ་ཐལ་པ་དང་། སྐད་ཅིག་མའང་དུས་ཀྱི་ཆ་ཤས་ཡོད་པར་འགྱུར་རོ། །གཉིས་པ་ལྟར་ནའང་མི་འཐད་དེ། རྒྱུ་དེས་འབྲས་བུ་ལ་ཅི་ཞིག་ཕན། གཡས་གཡོན་ལྟ་བུ་དུས་མཉམ་པ་རྣམས་ལ་རྒྱུ་འབྲས་ཀྱི་དབྱེ་བ་མ་དམིགས་པའི་ཕྱིར་རོ། །ཡང་སེམས་དེ་ཡོད་པ་ལས་སྐྱེ་ན་བུམ་པ་ལས་ཀྱང་བུམ་པ་སྐྱེ་བར་འགྱུར་ལ། མེད་པ་ལས་སྐྱེ་ན་རི་རྭའང་སྐྱེ་བར་ཐལ་ལོ། །རྒྱུ་མེད་པ་ལས་སྐྱེ་ན་བེམས་པོ་ལས་ཀྱང་སེམས་འབྱུང་བར་ཐལ་ལོ། །རྒྱུ་གཅིག་ལས་གཅིག་སྐྱེ་ན། འབྲས་བུ་དག་ནི་རྒྱུ་རྐྱེན་དུ་མ་ལ་རག་ལས་པར་མཐོང་སྟེ། རྫ་བུམ་བཞིན་ནོ། །གཅིག་ལས་དུ་མའོ་ཞེ་ན། རྒྱུ་འབྲས་མི་མཐུན་ཏེ། རྒྱུ་ལ་ལྟོས་ན་འབྲས་བུ་མང་ལ། འབྲས་བུ་ལ་ལྟོས་ན་རྒྱུ་ཉུང་བའི་ཕྱིར། དུ་མ་ལས་གཅིག་ཅེ་ནའང་སྔ་མའི་ཉེས་པ་གོ་ལྡོག་པར་འགྱུར་རོ། །དུ་མ་ལས་དུ་མའོ་ཞེ་ན། གཅིག་གིས་གཅིག་བསྐྱེད་མི་ནུས་ན། དུ་མ་ནི་གཅིག་འདུས་པ་ཡིན་པའི་ཕྱིར་རོ། །དེ་བས་ན་ཁྱེད་འདོད་པའི་སེམས་དེ་རྒྱུ་གང་ལས་ཀྱང་མི་སྐྱེ། ཚུལ་ཇི་ལྟར་ཡང་མི་སྐྱེ་བ་ཁོ་ནའོ། །གཞན་ཡང་ངེས་པར་ཡོད་ན་རང་གི་ངོ་བོ་གཅིག་ཏུ་ཡོད་དམ། དུ་མར་ཡོད། དང་པོ་ལྟར་ན་དུ་མར་དམིགས་པའི་མཐུ་མེད་པར་འགྱུར་ལ། ཕྱི་མ་ལྟར་ན་རྫས་རྡུལ་ཕྲ་རབ་དང་། སྐད་ཅིག་མ་དུ་མ་གང་རུང་ཡིན་དགོས་ཏེ། དེ་ནི་བསྟན་ཟིན་ཏོ། །རྣམ་རྫུན་པ་དག །སེམས་རྣམ་པ་མེད་པ་ཙམ་རིག་པས་བེམས་པོ་ལས་ལོག་པ་དཔྱད་དུ་མེད་པ་བརྗོད་དུ་མེད་པ་ཞིག་ཡོད་ལོ། དེ་མི་འཐད་དེ། གཟུགས་ཅན་དུ་ཡོད་ན་བསྟན་དུ་ཡོད་དགོས་ལ། གཟུགས་མེད་དུ་ཡོད་ན་གང་གིས་དམིགས་པར་འགྱུར། དེ་བཞིན་དུ་ཡེ་ཤེས་རྒྱུན་དུ་འབྱུང་བའང་དཔྱད་པར་བྱ་སྟེ། རྣམ་བདེན་ལྟར། དམིགས་པ་རྣམ་པར་དག་པ་དང་ལྡན་པའི་ཡེ་ཤེས་ཡོད་པ་མི་འཐད་དེ། ནོར་པ་ཐམས་ཅད་སྤངས་པ་དང་མཚན་མར་སྐྱེ་བ་འགལ་ལོ། །རྣམ་རྫུན་ལྟར་ན། འདས་དང་ད་ལྟ་བ་མེད་པའི་མ་འོངས་པ་མ་གྲུབ་པས། གང་གནས་འགྱུར་བའི་སེམས་ཉིད་མེད་ན། དེ་གནས་གྱུར་པའི་ཡེ་ཤེས་ཇི་ལྟར་ཡོད། འོ་ན་ཡེ་ཤེས་མེད་ན་སེམས་ཅན་གྱི་དོན་ཇི་ལྟར་འབྱུང་ཞེ་ན། མར་མེ་ཟད་པ་བཞིན་སེམས་སེམས་བྱུང་གི་འཇུག་པ་རྒྱུན་ཆད་པ་སྟེ། དེའང་གཟོད་མ་ནས་ཞི་བ་ཉིད་ཀྱིས་ཆད་པར་མི་འགྱུར་ལ། གཞན་དོན་ནི་སྨོན་ལམ་གྱི་མཐུ་ཁོ་ནས་སོ། །ཞེས་པའང་མཉྫུ་གྷོ་ཥས་སོ།། །།

[edit]

grub mtha' rnam par bshad pa'i snying po/ grub pa'i mtha' rnam par dpyad pa'i snying po zhes bya ba bzhugs so/__/thams cad mkhyen pa la phyag 'tshal lo/__/re zhig grub pa'i mtha' ni rnam pa gnyis te/__gzhan sde dang /__rang sde'o/__/dang po la/__spyir log rtog gi 'dod pa bsam gyis mi khyab kyang /__mchog tu gyur pa bram ze mchog gi rgyud dag__/bdag rtag pa/__khyab pa/__lus med pa/__gcig pu zhig yod par 'dod do/__/de ni mi 'thad de/__bdag de phung po nyid dam/__de las rdzas gzhan pa gang /__dang po ni mi 'thad de/__bdag rtag la phung po mi rtag pa'i phyir/__phyi ma mi 'thad de/__phung po lnga bsal ba'i 'og tu bdag ces rdzas gzhan pa ston rgyu yod dgos pa'i phyir/__gal te sus kyang mngon du ma gyur pa zhig yod do zhe na/__ri rwa dang mo gsham gyi bu yang yod par khas longs shig__/de bas na bdag de phung po dang de las rdzas gzhan par ma dmigs na/__de ma yin pa'i phung po gsum par khas blang du mi rung bas med par grub bo/__/yang /__rten dang brten par yod do zhe na/__de 'dra ba'i chos ma dmigs pa'i phyir/__bdag gis phung po la khyab bo zhe na/__bdag ni gcig la phung po ni du ma yin pas rdzas 'gal ba'i phyir/__bdag phung po dang ldan par yang med de/__de gnyis 'brel pa ma grub pa'i phyir/__bdag gcig pu ma yin te/__des khyab kyi dngos po rnams tha dad pa'i phyir/__'dod na/__gang zag gcig bcings pas thams cad bcings par 'gyur ro/__/bdag rang dbang can ma yin te/__bde sdug sogs mi 'dod bzhin du 'byung ba'i phyir/__lus med pa yang mi 'thad de/__lus las gzhan du yod pa ni bzlog zin/__lus nyid der 'dod na ni lus med pa'i dam bca' nyams la/__phung po gsum pa ni ma grub pa'i phyir/__de bas na brtags pa 'di ni thag pa la sbrul du nan gyis bsgrubs pa dang mtshungs so/__/gnyis pa la/__nyan thos dag__/phyi don rdul phra rab dang /__de'ang bar dang bcas pa dang /__bar med pa dang /__bar med pa la ma 'byar bar yod par 'dod do/__/de mi 'thad de/__'di ltar thag pa la sbrul du 'dzin pa ni 'khrul te/__thag pa nyid do/__/de'ang 'khrul te/__thag pa ma yin te nyis sgril dang /__de'ang ma yin te rtswa 'dus pa dang /__rtswa yang med de rdul phra rab tshogs pa'o/__/rdul phra rab yod dam zhe na/__med de phyogs cha dbye ba med pa'i phyir/__phyogs cha tha dad pas de med pa'i rdul phra rab gcig pa nyid mi 'grub bo/__/gal te 'di la dbyer med do zhe na/__/dbus rdul gcig la phyogs rdul drug gis bskor ba'i tshe na/__nub phyogs na gnas pa'i rdul phra rab dang ldan pa'i cha de nyid kyis byang phyogs na gnas pa'i rdul phra rab rnams dang ldan pa yin nam/__ma yin/__dang po ltar na phyogs rdul drug po dbus na gnas pa'i rdul phra rab kho na'i bdag nyid yin pas des brtsams pa'i dngos po thams cad kyang rdul phra rab tu 'gyur ro/__/phyi ma ltar na/__cha shas med pa'i dam bca' nyams so/__/de bas na rdul phra rab gcig ma grub pas du ma med/__de med pas bar med dang /__reg la ma 'byar ba sogs blos brtags pa kho nar zad do/__/kha cig dngos po rnams phreng ba dang skud pa ltar yan lag can du yod par 'dod do/__/de ni mi 'thad de/__yan lag dang yan lag can gnyis gcig gam tha dad/__dang po mi 'thad de/__gang gi thog ma'i cha dmar po la sogs pa yin pa de nyid kun dbus ma'i cha dang /__thog ma'i cha gcig shos kyang dmar po la sogs pa yin par thal bar 'gyur te gcig pa'i phyir/__phyi ma mi 'thad de/__yan lag rnams las gzhan pa'i yan lag can 'ga' yang ma dmigs te/__skud pa nyis sgril dang spu re re las gzhan pa'i yan lag can nyid sus mthong /__de la sems tsam pa dag__/bdag dang rdul sogs med kyang /__sems dang ye shes skad cig ma rgyun chags su 'byung ba yod do/__/zhe'o/__/de mi 'thad de/__skad cig ma ma grub pa'i phyir/__de'ang 'das pa'i skad cig ma zhig la/__ma 'ongs pa ma grub pas med cing /__de gnyis med pas 'bras bu'i skye ba da ltar ba'i skad cig ma ga la yod/__yang sems de rgyu 'bras dus tha dad pa las skyes sam/__dus mnyam las skye/__dang po ltar na dus gzhan gyis bar du chod pa las skye'am/__ma chod par skye/__dang po mi 'thad de/__'das pa kho na las skyed gos pas/__de zhig pa'i dngos med yin pa'i phyir/__phyi ma mi 'thad de/__dus thams cad skad gcig ma gcig gi nang du zhugs par 'gyur bas/__bskal pa'ang skad cig ma tsam nyid du thal pa dang /____skad cig ma'ang dus kyi cha shas yod par 'gyur ro/___/gnyis pa ltar na'ang mi 'thad de/__rgyu des 'bras bu la ci zhig phan/__g.yas g.yon lta bu dus mnyam pa rnams la rgyu 'bras kyi dbye ba ma dmigs pa'i phyir ro/__/yang sems de yod pa las skye na bum pa las kyang bum pa skye bar 'gyur la/__med pa las skye na ri rwa'ang skye bar thal lo/__/rgyu med pa las skye na bems po las kyang sems 'byung bar thal lo/__/rgyu gcig las gcig skye na/__'bras bu dag ni rgyu rkyen du ma la rag las par mthong ste/__rdza bum bzhin no/__/gcig las du ma'o zhe na/__rgyu 'bras mi mthun te/__rgyu la ltos na 'bras bu mang la/__'bras bu la ltos na rgyu nyung ba'i phyir/__du ma las gcig ce na'ang snga ma'i nyes pa go ldog par 'gyur ro/__/du ma las du ma'o zhe na/__gcig gis gcig bskyed mi nus na/__du ma ni gcig 'dus pa yin pa'i phyir ro/__/de bas na khyed 'dod pa'i sems de rgyu gang las kyang mi skye/__tshul ji ltar yang mi skye ba kho na'o/__/gzhan yang nges par yod na rang gi ngo bo gcig tu yod dam/__du mar yod/__dang po ltar na du mar dmigs pa'i mthu med par 'gyur la/__phyi ma ltar na rdzas rdul phra rab dang /__skad cig ma du ma gang rung yin dgos te/__de ni bstan zin to/__/rnam rdzun pa dag__/sems rnam pa med pa tsam rig pas bems po las log pa dpyad du med pa brjod du med pa zhig yod lo/__de mi 'thad de/__gzugs can du yod na bstan du yod dgos la/__gzugs med du yod na gang gis dmigs par 'gyur/__de bzhin du ye shes rgyun du 'byung ba'ang dpyad par bya ste/__rnam bden ltar/__dmigs pa rnam par dag pa dang ldan pa'i ye shes yod pa mi 'thad de/__nor pa thams cad spangs pa dang mtshan mar skye ba 'gal lo/__/rnam rdzun ltar na/__'das dang da lta ba med pa'i ma 'ongs pa ma grub pas/__gang gnas 'gyur ba'i sems nyid med na/__de gnas gyur pa'i ye shes ji ltar yod/__'o na ye shes med na sems can gyi don ji ltar 'byung zhe na/__mar me zad pa bzhin sems sems byung gi 'jug pa rgyun chad pa ste/__de'ang gzod ma nas zhi ba nyid kyis chad par mi 'gyur la/__gzhan don ni smon lam gyi mthu kho nas so/__/zhes pa'ang many+dzu g+ho Shas so//__//