JKW-KABUM-03-GA-001-036

🚧 This website is under continued development. We appreciate your patience!

Previous Text Back to Volume PageLast text in section.

Wylie title	byang gter thugs sgrub kyi lo rgyus las sogs
Location	mkhyen brtse'i bka' 'bum Volume 3, sde tshan 1, Text 36, Pages 701-711 (Folios 351a3 to 356a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. byang gter thugs sgrub kyi lo rgyus las sogs. In 'jam dbyangs mkhyen brtse'i dbang po'i bka' 'bum, Vol. 3: 701-711. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Notes - zin bris

1 Texts in this Section (sde tshan or chos tshan)

36 701-711	བྱང་གཏེར་ཐུགས་སྒྲུབ་ཀྱི་ལོ་རྒྱུས་ལས་སོགས། byang gter thugs sgrub kyi lo rgyus las sogs History Texts - lo rgyus   ·   Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

བྱང་གཏེར་ཐུགས་སྒྲུབ་ཀྱི་ལོ་རྒྱུས་ལས། བོད་ཁ་བ་ཅན་གྱི་ཁམས་འདི༔ མཐའ་འཁོབ་བྱོལ་སོང་གི་བག་ཆགས་ཤས་ཆེ་བས༔ ངའི་ཡོན་ཏན་བློར་མི་ཤོང་སྟེ༔ དེའི་ཕྱིར་ངའི་མཛད་པ་ཐམས་ཅད་བར་མའི་རིག་འཛིན་གྱི་ཚུལ་དུ་བསྟན་ཏོ༔ ལྔ་བརྒྱ་སྙིགས་མའི་ཚེ༔ བོད་ཁམས་སྡུག་བསྔལ་གྱིས་ཉམ་ཐག་པའི་ཚེ༔ ལས་ཅན་གྱི་གང་ཟག་འགའི་བློ་རུང་གི་ཡོན་ཏན་ཤོང་བར་འགྱུར་གྱི༔ དཔལ་མཆོག་ཧེ་རུ་ཀའི་ཐུགས་ཀྱི་སྲས་ཉིད་དོ༔ ངའི་རྣམ་ཤེས་ཚོགས་བརྒྱད་ལས་སྒྲུབ་པ་ཆེན་པོ་བཀའ་བརྒྱད་འཕྲོས་པ་ཡིན་ནོ༔ ངའི་བ་སྤུའི་བུ་ག་རེ་རེ་ནས་ཀྱང་སྤྲུལ་པ་བྱེ་བ་ཕྲག་བརྒྱ་འགྱེད་ནུས་པས༔ ལྷའི་སྒྲུབ་ཐབས་ཐུབ་པའི་བསྟན་པ་འདི་ལ་བྱོན་པ་ཐམས་ཅད་ངའི་ཐུགས་རྗེའི་རྣམ་འཕྲུལ་ཡིན་པས་བློ་ཕྱིན་ཅི་ལོག་ཏུ་ལྟ་བར་མ་བྱེད༔ ངའི་ཐུགས་སྒྲུབ་ལ་རྩེ་གཅིག་ཏུ་བསྒྲུབས་པས༔ ཡི་དམ་ཐམས་ཅད་ང་ལ་འདུས་པས་ལྷ་གང་དང་གང་ལ་མོས་ཤིང་དད་པའི་རྟགས་ཐམས་ཅད་རྩོལ་མེད་དུ་ཐོན་ནོ༔ ལས་ཅན་མིན་པ་སུ་རུང་རུང་དང་ང་ཡི་ཐུགས་སྒྲུབ་འདི་མི་འཕྲད་དོ༔ ཞེས་སོ། ། ༈

ཆོས་དབང་རིན་པོ་ཆེ་སློབ་དཔོན་དང་དངོས་སུ་མཇལ་བའི་ཞུ་ལན་ལས། དེ་ཇི་ལྟར་སྐྱོང་ཐབས་མཉམ་སྦྱོར་གྱི་རྒྱུད་ལས། འགྱུ་བ་རྗེས་མེད་ཐམས་ཅད་མཁྱེན་པའི་རྒྱུ། །ཞེས་གསུངས་པའི་དོན་ནི། འགྱུ་བ་ཚོགས་དྲུག་གི་སྣང་བ་རང་སྣང་གཏན་ལ་ཝལ་རྩེར་ཕེབས་རྗེས་སུ། འགྱུ་བྱེད་ངོས་བཟུང་བས་འགྱུ་བ་རང་སེམས་རྗེས་མེད་དུ་སོང་། དེ་བསྐྱངས་པས་རྟོག་མི་རྟོག་གཉིས་ཀྱི་དགོངས་པ་ཐམས་ཅད་མཁྱེན་པར་འཆར་ཏེ། དེ་ལྟར་འགྱུ་བ་རྗེས་མེད་དུ་གྲོལ་བས་རྟོག་པ་བླང་དོར་ག་ན་དགོས། རང་སར་ཆོད་དེ་སངས་རྒྱས་པས། དྲན་པ་ཡེངས་མེད་བྱ་རེས་འགྱུ་བྱེད་དྲན་པ་རང་གྲོལ་དུ་སྐྱོང་། ལས་དང་བག་ཆགས་ཀྱི་སྐྱོན་ལས་གྲོལ་ནས། བྱང་མ་ཆུབ་ན་ཨོ་རྒྱན་ངས་ཆོས་དབང་ཁྱོད་བསླུས་བ་ཡིན་ནོ་གསུངས་སོ།། །། ༈ སྨྲ་བ་ཀུན་སྤྱོད་ལས། འགྲོ་ལྔ་འདི་དག་སངས་རྒྱས་ལྔ་བདག་ཉིད། །གར་མཁན་དག་དང་རི་མོ་བཟང་ལྟར་གནས། །གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་བུའི་ཉམས་ཀྱིས་དུ་མའི་གར་མཛད་དོ། །ཞེས་སོ། ། ༈ གཏེར་ཆེན་ནི་བླ་རྫོགས་ཐུགས་གསུམ་ཚང་བ་སྟེ། དེ་ཡང་ཞི་དྲག་མ་ངེས་པའི་བླ་མའི་སྒྲུབ་སྐོར། རྫོགས་པ་ཆེན་པོ་གསུམ་ལ་མཚན་གཞི་བྱེད་ཅིང་། དེར་མ་ཟད་ཆོས་བཀའ་གང་ཡང་གང་ཟག་གཅིག་འཚང་རྒྱ་བར་བྱེད་པའི་ལམ་ཆ་ལག་ཚང་པ་གཏེར་ཆེན་དང་། དེ་མིན་མན་ངག་སྣ་རེ་དང་། རྫས་གཏེར་ཙམ་དྲངས་པ་ལ་གཏེར་ཕྲན་ཞེས་བྱ་བར་གཏེར་བདག་གླིང་པས་བཞེད། ། ༈ གཏེར་ཆེན་རིན་པོ་ཆེའི་དག་སྣང་ལས། ཌཱ་ཀིས། བོད་ཀྱི་བདེ་བ་མ་ལུས་པ། །པདྨ་འབྱུང་གནས་མཐུ་ལས་བྱུང་། །དེ་ཕྱིར་དེ་ཡི་རིང་ལུགས་ལ། །བརྩོན་པ་བསྐྱེད་ཅིང་གསོལ་བ་ཐོབ། །ཅེས་གསུངས། ། ༈ སྒྲོན་གསལ་ལས། རྡོ་རྗེ་སེམས་དཔའི་ཚེ་ནི་ནད་མེད་པ་དང་། འཚོ་བ་དང་ལྡན་པ་དང་། བར་ཆད་མེད་པའོ། །ཞེས་གསུངས་པའོ། ། ༈ ལས་དང་པོ་པ་ནི། དགྲ་ནག་གི་འགྲེལ་པར། དེ་ཡང་ལས་དང་པོ་པའི་རྣལ་འབྱོར་པ་ཇི་སྲིད་ལྷའི་ཡན་ལག་རགས་པར་སྣང་བ་ཙམ་མངོན་སུམ་ལྟར་གྱུར་གྱི་བར་དུ་ནི། ཐུན་མཚམས་གསུམ་དུ་རྣལ་འབྱོར་བཞི་ཆར་བསྒོམས་ཏེ། ཞེས་སོ། ། ༈ བྱིན་པ་གཡས་སྟེང་གཡོན་ལ་བཞག་སྟེ་པུས་མོ་གཉིས་དམད་པ་ནི་པདྨའི་སྐྱིལ་ཀྲུང་། བརླ་གཡོན་གྱི་སྟེང་དུ་རྐང་གཡས་དང་། གཡོན་སྟེང་གཡས་པ་བཞག་པ་ནི་སེམས་དཔའི་སྐྱིལ་ཀྲུང་ངོ་། །གཞན་ཡང་དེ་རིགས་མང་པོ་ལྷོ་བྲག་སྨན་ཐང་པས་མཛད་པའི་ཆ་ཚད་ཡིད་བཞིན་ནོར་བུར་ཡོད་དོ། ། ༈ བི་མ་ལའི་གསེར་ཕྲེང་ལས། བླ་མེད་ཐེག་པའི་ཡང་རྩེ་འདི་ནི་སྐལ་ལྡན་གྱི་སྐྱེས་བུ་བསྐལ་པ་དཔག་ཏུ་མེད་པའི་སྔོན་རོལ་ནས། སངས་རྒྱས་མང་པོ་ལ་བསྙེན་བཀུར་ཞིང་། ལས་ཀྱི་སྒྲིབ་པ་མཐར་ཟད་པ། སྲིད་པ་ཐ་མའི་བྱང་ཆུབ་སེམས་དཔའ་འགའ་དང་འགའི་སྤྱོད་ཡུལ་ཡིན་གྱི། གང་རུང་རུང་གི་སྤྱོད་ཡུལ་ནི་མ་ཡིན་ཏེ། ཐེག་པ་དམན་པ་དང་། བསོད་ནམས་དམན་པ་དང་། ཤེས་རབ་དམན་པ་དང་། ཡུལ་དང་དུས་དང་ལམ་ལ་ལྟོས་པའི་གང་ཟག་རྣམས་ནི་འཕྲད་པར་མི་འགྱུར། འཕྲད་ཀྱང་མོས་པར་མི་འགྱུར། ཞེས་སོ། ། ༈ ཨེགཔྲེམཙྪ་གཅིག་ཞུས། ། ༈ དག་སྣང་ལུང་བསྟན་སོགས་ཀྱང་རེ་དོགས་སྐྱེས་ན་དངོས་གྲུབ་བར་ཆད་གང་རུང་ཞིག་མི་འགྱུར་མི་སྲིད་པས་ཐམས་ཅད་ཆོས་ཉིད་མཉམ་པ་ཆེན་པོའི་ངང་དུ་བཞག་གོ། །འདིའི་ལོ་རྒྱུས་དཔའ་བོའི་ཆོས་འབྱུང་དུ་བཤད། ། ༈ དཀྱིལ་འཁོར་གྱི་ཕྱི་རོལ་དུར་ཁྲོད་བརྒྱད་དུ་གྲུབ་ཐོབ་བརྒྱད་གནས་པ་ནི་འགའ་ཞིག་ཏུ་ངེས་བཟུང་མེད་པར་བཤད། དཾཥྟ་སེ་ན་ནི་སློབ་དཔོན་དཔའ་བོའི་མཚན་གྱི་རྣམ་གྲངས་སུ་བཤད་ཀྱང་། དོན་ལ་མཆེ་བའི་སྡེ་སྟེ་སློབ་དཔོན་སེང་གེ་བཟང་པོ་སོགས་དང་དུས་མཉམ་མམ་སྙམ། ༈ ། པཎྜི་ཏ་ཤྲཱི་མ་ཧཱ་ཛ་ནས། དེའི་རྒྱལ་པོ་ནི་རིག་པའི་གནས་ལྔ་སྟེ། དེའི་ཁབ་ནི་ཆོས་ཀྱི་སྐུ་ཞེས་པའི་དོན་ཏོ། །བྱ་རྒོད་ཅེས་བྱ་བ་ནི་ཆོག་མི་ཤེས་པ་ཉེ་བར་མཚོན་པ་སྟེ། མཐའ་མེད་པ་ལ་འཇུག་པའོ། །ཕུང་པོ་ཞེས་བྱ་བ་ནི་མི་ཟད་པའི་དོན་ནོ། །ཞེས་དང་། ། ༈ གསང་སྔགས་ནི། ཁ་སྦྱོར་ཐིག་ལེར། ཁྱབ་འཇུག་དང་། དབང་ཕྱུག་ཆེན་པོ་དང་། ཚངས་པ་དང་། ཉན་ཐོས་དང་། རང་སངས་རྒྱས་ཀྱི་སྤྱོད་ཡུལ་མ་ཡིན་པའི་ཕྱིར་གསང་བ་དང་། ཞེས་དང་། རིག་སྔགས་ནི། རྡོ་རྗེ་རྩེ་མོར། འདོད་ཆགས་མུན་པ་རྣམས་བཏུལ་ཅིང་། །ཉོན་མོངས་རྣམས་ཀྱང་རྣམ་པར་བཏུལ། །མ་རིག་པ་ནི་ཟློག་བྱེད་པ། །དེ་ནི་རིག་སྔགས་རྣམ་པར་བརྗོད། །ཅེས་དང་། གཟུངས་སྔགས་ནི། སྔ་མར། སངས་རྒྱས་ཆོས་རྣམས་འཛིན་བྱེད་ཅིང་། །ཆོས་རྣམས་འཛིན་པར་བྱེད་པ་དང་། །དགེ་བ་ཞེས་བྱ་འཛིན་བྱེད་པ། །གཟུངས་སྔགས་ཀྱི་ནི་མཚན་ཉིད་དོ། །ཞེས་སོ། །དེ་གསུམ་ཡང་ངོ་བོ་གཅིག་ལས་གནས་སྐབས་ཀྱི་ཡོན་ཏན་གཙོ་ཆེ་པའི་ལྡོག་ཆས་བཏགས་པར་བཞེད་དོ། །ཨོཾ་སརྦ་དྲ་བྱཾ་ཤོ་དྷ་ན་ཧཱུྃ་ཕཊ། འདོད་ཡོན་ཐམས་ཅད་རྣམ་པར་དག་པ། ཞེས་པའོ། ། ༈ དབུ་སྐྲ་ལི་བ་དང་ལིང་བ་དོན་གཅིག ། ༈ སའི་སྙིང་པོ་འཁོར་ལོ་བཅུ་པའི་མདོ་ལས། དོན་དམ་པའི་དགེ་སློང་དང་། ཀུན་རྫོབ་ཀྱི་དགེ་སློང་དང་། ལུག་དང་ལྐུགས་པ་ལྟ་བུའི་དགེ་སློང་དང་། །ཁྲེལ་དང་ངོ་ཚ་མེད་པའི་དགེ་སློང་དང་། ཞེས་བཞིར་གསུངས་པའི་དང་པོ་ནི་རྟགས་དང་ཆོ་ག་ལ་མ་བལྟོས་པའོ། །ཆོས་ཉིད་ཀྱི་བདེན་པ་མཐོང་ཚེ། ། ༈ རྒྱལ་དབང་ལྔ་པས། མཛད་པའི་ལས་ཆོག་རྣམ་རྒྱལ་གསེར་འདི་གལ་ཆེ། མདོག་ལས། མ་ནིང་དེ་རྣམ་པ་ལྔ་ཡོད་དེ། སྐྱེས་ཙམ་ནས་ཕོ་མོ་གཉིས་ཀའི་མཚན་མ་ཡོད་པ་དང་། ཟླ་བའི་སྟོད་སྨད་ལ་ཕོ་མོའི་འདོད་ཆགས་སོ་སོར་ཕྱེ་བ་ཟླ་བ་ཕྱེད་པ་དང་། ཕོ་མོ་གང་རུང་གིས་རང་ལ་མ་འཁྱུད་བར་དུ་ཆགས་པ་མི་སྐྱེ་བར་འཁྱུད་ནས་ལྡང་བ་དང་། དེ་གནས་ཟག་པའི་སྦྱོར་བ་བྱེད་པ་མ་མཐོང་བར་དུ་མི་སྐྱེ་བ་ཕྲག་དོག་ཅན་དང་། མཚན་མ་མཚོན་གྱིས་བཅད་པ་སོགས་ཀྱིས་ཉམས་པའོ། །ཞེས་བཤད། ། ༈ རཏྣའི་རྫོགས་ཆེན་ཀློང་གསལ་སྙིང་ཐིག་གི་ཞུས་ལན་སྙིང་གི་མེ་ལོང་ལས། ཡང་སློབ་དཔོན་ལ་ཞུས་པ༔ དེ་ལྟར་སྒོམ་པའི་རྣལ་འབྱོར་པས༔ བསྒོམས་ཀྱང་རྟོགས་པ་མ་ཤར༔ སྒོམ་འཕྲོ་ལ་ཤི་ན་ཇི་ལྟར་སྐྱེ་ཞུས་པས༔ སློབ་དཔོན་གྱིས་གསུངས་པ༔ ངེས་འབྱུང་གཤའ་མ་སྒོམ་པ་དེ་མིར་མི་སྐྱེ་སྟེ༔ སྐྱེ་བ་དེས་འཁོར་བ་ལས་ལྡོག་པ་ཐོབ༔ ཉམས་སྐྱེས་ཏེ་མི་གཡོ་བ་ཙམ་ལ་སྐྱེ་བ་ནི་ལྷ་ཡི་རིག་འཛིན་དུ་སྐྱེ་བ་དེར་སངས་རྒྱའོ༔ ཉམས་རྟོགས་ཤིན་ཏུ་བརྟན་ཅིང་མི་གཡོ་བ་ཐོབ་པ་ནི༔ སྲིད་པ་བར་དོ་ལ་ཏིང་འཛིན་ཟིན་ཏེ་འཚང་རྒྱ་བ་ཡིན་གསུངས༔ ཞེས་དང་། འོ་ན་ཡི་དམ་ལྷའི་བསྙེན་སྒྲུབ་ཇི་ལྟར་བྱས་ན་ཉེ་ཞུས་པས༔ སློབ་དཔོན་གྱིས་གསུངས་པ༔ རང་དང་ཡི་དམ་གཉིས་སུ་མེད་པར་སྐུ་གསུང་ཐུགས་ལྷུན་གྲུབ་ཏུ་རྟོགས་ཤིང་བཟླས་བརྗོད་ཐེམ་ན་ཉེ༔ དོན་ལ་རང་རིག་ཡི་དམ་ཆོས་སྐུར་རྟོགས་ན་ཉེའོ་གསུངས༔ ཞེས་སོ། ། ༈ འཇམ་དཔལ་གྱིས། ཕུང་པོ་རྣམ་དཔྱད་སྟོང་ཉིད་ནི། ཞེས་སོགས་འདི་གཞན་སྟོང་གི་ལྟ་བའི་ཁུངས་ཆེ་བ་ཞིག་ཀྱང་མཛད་འདུག །བདེ་མཆོག་སྡོམ་འབྱུང་གི་རྒྱུད་དེ་བླ་མེད་སྤྱི་ལ་གལ་ཆེ་བར་ཡོད་པས་ཞིབ་ཏུ་རྟོགས་པར་བྱའོ། ། ༈ གསང་བ་ཐམས་ཅད་གཅོད་པའི་རྒྱུད་ཀྱི་རྒྱལ་པོ་ལས། ཐེག་པ་གསུམ་གྱི་ངེས་འབྱུང་ཞིང་། །རིག་འཛིན་ཐེག་པ་འབྲས་བུར་གནས། །འབྲས་བུ་འདིར་གནས་རྣལ་འབྱོར་པ། །ཁྱིམ་པའི་རྡོ་རྗེ་འཛིན་པ་ཡི། །ཆ་ལུགས་སུ་ནི་གནས་བྱས་ལ། །དབང་བསྐུར་རབ་གནས་ལ་སོགས་བྱ། །ཐེག་པ་གསུམ་གྱི་ཆ་ལུགས་ཀྱིས། །གསང་བའི་སྤྱོད་པ་མ་གསུངས་ཏེ། །དཔེར་ན་རྡོ་ལས་ཟངས་སུ་འགྱུར། །ཟངས་ལས་གསེར་གྱི་རྡོ་བ་སྟེ། །ཟངས་ཀྱི་དུས་ན་རྡོ་མེད་དེ། །གསེར་དུ་གྱུར་པས་རྡོ་མི་སྣང་། །རིག་འཛིན་ཉིད་ཀྱི་དགེ་སློང་ལ། །སོ་སོར་ཐར་དང་བྱང་ཆུབ་སེམས། །གཉིས་པོ་གནས་པ་ཉིད་དུ་ནི། །སངས་རྒྱས་ཀྱིས་ཀྱང་མ་གསུངས་སོ། །ཞེས་སོ། ། ༈ དགོངས་པ་ལུང་བསྟན་པའི་རྒྱུད་ལས། སྲོག་དང་གྱེན་རྒྱུ་ཐུར་སེལ་དང་། །མཉམ་གནས་ཁྱབ་བྱེད་ཅེས་བྱ་དང་། །ཁམས་དང་རུས་སྦལ་གཙང་པ་དང་། །ལྷ་བྱིན་གཞུ་རྒྱལ་ཞེས་བྱ་བ། །ཞེས་བཅུའོ། ། ༈ བྱ་རྒྱུད་རིག་པ་མཆོག་གི་རྒྱུད་དུ། ལོག་འདྲེན་པའི་གཙུག་ཕུད་སོགས་ཀྱི་བར་གཅོད་འབྱུང་ཚུལ་འདུལ་ཐབས་དང་བཅས་པ་ཡོད། ། ༈ གནུབས་ཀྱི་བསམ་གཏན་མིག་སྒྲོན་ལས། ངེས་ཚིག་བརྗོད་པའི་དུས་ཉིད་ན། ཀུན་ནི་དོན་དམ་པ། རྫོབ་ནི་སྒྲིབ་པ་སྟེ། ཞེས་དང་། དེ་ལྟ་བུའི་ཉོན་ཀུན་བྱ་བ་དང་བྲལ་བར་གསོལ་བསང་གཉིས་སུ་མེད་པར་མ་ཤེས་སོ། །གལ་ཏེ་གཉིས་སུ་མེད་པར་སྨྲ་ན་ཡང་། དོན་དམ་པའི་བདེན་པ། སྟོང་པ་མ་སྐྱེས་པར་ལྟ་བ་དེར་གཅིག་པར་འདོད་དོ། འོན་ཀྱང་རང་རེས་འཇོག་ཅན་དེས་རྣལ་འབྱོར་ཆེན་པོའི་དེ་བཞིན་བདེན་པ་དབྱེར་མེད་མ་མཐོང་སྟེ། རང་གི་ལྟ་བས་བསྒྲིབས་སོ། །ཞེས་སོགས་དང་། འདིའི་ནང་དུ་ཀཱ་མ་ལ་ཤཱི་ལ་དང་། ཧཱ་ཤང་མ་ཧཱ་ཡཱ་ནའི་ལྟ་སྒོམ་སོགས་ཞིབ་པར་ཡོད། ཐུགས་གཏེར་ལྔ་ནི། སྤར་རྗེར་མཁའ་འགྲོ། གཏམ་ཟིས་ན་བླ་མ། སྒྲགས་ཡོངས་རྫོང་ན་རྒྱུད་དང་རྫོགས་རིམ། ཧས་པོ་གང་ན་དམ་རྫས་གཙོ་བོར་སྟོན་པ། མཆིམས་ཕུ་ན་ངན་སྔགས་དང་དྲག་སྔགས་རྣམས་ཡོད་པ། དང་པོ་ཉང་། གཉིས་པ་ཆོས་དབང་། གསུམ་པ་རྡོར་གླིང་། བཞི་པ་མདོ་སྔགས་གླིང་པ་ལ་སྐལ་པར་བབས་ཀྱང་མ་ཐོབ། ལྔ་པ་པད་གླིང་ནས་སྤྱན་དྲངས་པ་རྣམས་སོ། ། ༈ ཉང་གཏེར་དྲག་དམར་ལས། སྡེ་བརྒྱད་སྲོག་གི་སྙིང་པོ་ནི༔ ཡ་ནི་གཤིན་རྗེ་མ་མ་མོ༔ ན་ནི་ཀླུ་ལ་དུ་ནི་བདུད༔ ཤ་ནི་གནོད་སྦྱིན་རུ་ནི་བཙན༔ ཙ་ནི་རྒྱལ་པོ་ཨ་ནི་ལྷ༔ ཞེས་དང་། སོ་སོའི་བླ་རྡོ་ཡང་། རྡོ་རྗེ་གཙུག་ལག་གི་རྒྱུད་ལས། སྤྱི་ལ་གྲི་ལྕགས་སྡིག་པ་སོར་བཞི་པ༔ རང་བཞིན་དྲག་པོ་བཙན་གསུམ་མཚལ་དུ་བྲི༔ ཁྱད་པར་གཟའ་དང་མུ་སྟེགས་གཤིན་རྗེ་ཡིན༔ མ་མོ་བུད་མེད་བརླ་གཡོན་རྐང་༔ བདུད་ལ་ཁབ་ཟུར་གསུམ་པ་ལ༔ ལྷ་ལ་གཡག་དཀར་རྭ་རྩེ་སྟེ༔ གནོད་སྦྱིན་སྲིན་སྡེ་ལྗང་གུའོ༔ རཱུ་དྲ་ཐལ་ཆེན་རྒྱལ་པོ་ཤེལ་རྡོ་ཡིན༔ བཙན་ལ་མཆོང་དམར་དམུ་ལ་མཆོང་སྨུག་ཡིན༔ ཐེའུ་རང་འགོང་པོ་དམ་སྲི་ཕ་ཝང་ལོང་༔ ཀླུ་ལ་བླ་རྡོ་རིན་ཆེན་སྣ་ལྔ་ཡིན༔ ཅེས་སོ། །རྡོར་བྲག་པད་ཕྲིན་གྱིས་མཛད་པའི་རང་བྱུང་རང་ཤར་གྱི་བསྙེན་སྒྲུབ་ཀྱི་ཡི་གེ་རྒྱུད་དོན་རབ་གསལ་དང་། ཕྲིན་ལས་ཀྱི་རྣམ་བཤད་རབ་གསལ་ཉིན་བྱེད་སྣང་བ་གཉིས་ཤིན་ཏུ་གལ་ཆེ། ༈ ། སརྦ་དུཥྟཾ། གདུག་པ་ཅན་ཐམས་ཅད། ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་ཐ་བྷཉྫ། གཤིན་རྗེ་གཤེད་པོས་བསྣུན་ཞིག་ཆོམ་ཞིག་ཐུལ་ཅིག །པདྨནྟ་ཀྲཾ་ཏ་ནི་པདྨ་མཐར་བྱེད། ཧུ་ལུ་ཧུ་ལུ། འབད་པ་འབད་པ། བཾ། ཆིངས་ཤིག །ཀྲོ་དྷཱི་ཤྭ་རི་སྟྭཾ་ཧཱུྃ་ཧ་ཧེ་ཕ྄ཊ་མ་མ་ཡོ་གི་ནི་རུ་ལུ་བྷྱོ། ཁྲོ་མོ་དབང་ཕྱུག་ཁྱོད་བསྡུས་དགྱེས་སྤྲོས་རྣལ་འབྱོར་མ་དབབ་ཅིག་མ་མོ། སརྦ་དུཥྟཱཾ་ཧྲཱིཿམྱགས་ཧྲྀ་ད་ཡ། སྡང་བ་ཐམས་ཅད་ཆོད་ཅིག་སྤུ་གྲིའི་སྙིང་པོ། ཨ་ཏི་ཤ་ཞེས་བ་ནི། ཕུལ་དུ་བྱུང་བ་ཞེས་པ་པཎྜི་ཏས་གཞན་ལས་ལྷག་པའི་དོན་ནོ། །ཞེས་བཤད། རིན་ཆེན་སྤུངས་པར། མེད་པ་ཉིད་དང་ཕྱལ་བ་དང་། །ལྷུན་གྱིས་གྲུབ་དང་གཅིག་པུ་ཉིད། །ཅེས་བཤད་དོ། ། ༈ བམ་གྱི་གཙོ་བོ་རྣམ་གསུམ་རྒྱལ་དབང་གི་དགོངས་འགྲེལ་ལུང་རིགས་གཏེར་མཛོད་ལས། ཕྱི་རོལ་གྱི་ཕྱག་རྒྱ་མཚན་ཉིད་དང་ལྡན་པ་ནི་ལས་ཀྱི་ཕྱག་རྒྱ། དེ་ལ་བརྟེན་ནས་ཨ་ཝ་དྷཱུ་ཏིར་སྟོང་པ་ཉིད་དང་རོ་གཅིག་པའི་ལྷན་ཅིག་སྐྱེས་པའི་དགའ་བ་ནི་དམ་ཚིག་ཕྱག་རྒྱ། དེའི་རང་བཞིན་ཆོས་ཀྱི་དབྱིངས་ནི་ཆོས་ཀྱི་ཕྱག་རྒྱ། དེ་དག་གི་འབྲས་བུ་རང་བྱུང་གི་ཡེ་ཤེས་ནི། ཕྱག་རྒྱ་ཆེན་པོ་ཡིན་པར་གསང་སྔགས་ཀྱི་རྒྱུད་ལ་ཇི་སྐད་གསུངས་པ་བཞིན་ཡིན་ལ། ཞེས་སོ།། ༈ །། མདོ་སྡེ་རྨ་གཅད་ནི། འཆད་ཚུལ་གོང་དུ་སྣང་སྟེ། འགའ་ཞིག་གིས་ཆད་པ་བཅད་པ་ཡིན་ཟེར་བ་ཡང་། དོན་ལ་ཤིན་ཏུ་རྒྱས་པ་ཟེར་བ་ཡིན་ཅེས་བླ་མས་གསུངས་སོ།། །།སརྦ་དཱ་ཀ་ལྱཱ་ཎཾ་བྷ་བ་ཏུ།། །།

[edit]

byang gter thugs sgrub kyi lo rgyus las sogs/ byang gter thugs sgrub kyi lo rgyus las/__bod kha ba can gyi khams 'di:__mtha' 'khob byol song gi bag chags shas che bas:__nga'i yon tan blor mi shong ste:__de'i phyir nga'i mdzad pa thams cad bar ma'i rig 'dzin gyi tshul du bstan to:__lnga brgya snyigs ma'i tshe:__bod khams sdug bsngal gyis nyam thag pa'i tshe:__las can gyi gang zag 'ga'i blo rung gi yon tan shong bar 'gyur gyi:__dpal mchog he ru ka'i thugs kyi sras nyid do:__nga'i rnam shes tshogs brgyad las sgrub pa chen po bka' brgyad 'phros pa yin no:__nga'i ba spu'i bu ga re re nas kyang sprul pa bye ba phrag brgya 'gyed nus pas:__lha'i sgrub thabs thub pa'i bstan pa 'di la byon pa thams cad nga'i thugs rje'i rnam 'phrul yin pas blo phyin ci log tu lta bar ma byed:__nga'i thugs sgrub la rtse gcig tu bsgrubs pas:__yi dam thams cad nga la 'dus pas lha gang dang gang la mos shing dad pa'i rtags thams cad rtsol med du thon no:__las can min pa su rung rung dang nga yi thugs sgrub 'di mi 'phrad do:__zhes so/___/__!_ chos dbang rin po che slob dpon dang dngos su mjal ba'i zhu lan las/__de ji ltar skyong thabs mnyam sbyor gyi rgyud las/__'gyu ba rjes med thams cad mkhyen pa'i rgyu/__/zhes gsungs pa'i don ni/__'gyu ba tshogs drug gi snang ba rang snang gtan la wal rtser phebs rjes su/__'gyu byed ngos bzung bas 'gyu ba rang sems rjes med du song /__de bskyangs pas rtog mi rtog gnyis kyi dgongs pa thams cad mkhyen par 'char te/__de ltar 'gyu ba rjes med du grol bas rtog pa blang dor ga na dgos/__rang sar chod de sangs rgyas pas/__dran pa yengs med bya res 'gyu byed dran pa rang grol du skyong /__las dang bag chags kyi skyon las grol nas/__byang ma chub na o rgyan ngas chos dbang khyod bslus ba yin no gsungs so//___//_! smra ba kun spyod las/__'gro lnga 'di dag sangs rgyas lnga bdag nyid/__/gar mkhan dag dang ri mo bzang ltar gnas/__/gang du bde chen zhes bya gcig pu nyid/__/gcig bu'i nyams kyis du ma'i gar mdzad do/__/zhes so/___/__!_ gter chen ni bla rdzogs thugs gsum tshang ba ste/__de yang zhi drag ma nges pa'i bla ma'i sgrub skor/__rdzogs pa chen po gsum la mtshan gzhi byed cing /__der ma zad chos bka' gang yang gang zag gcig 'tshang rgya bar byed pa'i lam cha lag tshang pa gter chen dang /__de min man ngag sna re dang /__rdzas gter tsam drangs pa la gter phran zhes bya bar gter bdag gling pas bzhed/___/__!_ gter chen rin po che'i dag snang las/__DA kis/__bod kyi bde ba ma lus pa/__/pad+ma 'byung gnas mthu las byung /__/de phyir de yi ring lugs la/__/brtson pa bskyed cing gsol ba thob/__/ces gsungs/___/__!_ sgron gsal las/__rdo rje sems dpa'i tshe ni nad med pa dang /__'tsho ba dang ldan pa dang /__bar chad med pa'o/__/zhes gsungs pa'o/___/__!_ las dang po pa ni/__dgra nag gi 'grel par/__de yang las dang po pa'i rnal 'byor pa ji srid lha'i yan lag rags par snang ba tsam mngon sum ltar gyur gyi bar du ni/__thun mtshams gsum du rnal 'byor bzhi char bsgoms te/__zhes so/___/__!_ byin pa g.yas steng g.yon la bzhag ste pus mo gnyis dmad pa ni pad+ma'i skyil krung /__brla g.yon gyi steng du rkang g.yas dang /__g.yon steng g.yas pa bzhag pa ni sems dpa'i skyil krung ngo /__/gzhan yang de rigs mang po lho brag sman thang pas mdzad pa'i cha tshad yid bzhin nor bur yod do/___/__!_ bi ma la'i gser phreng las/__bla med theg pa'i yang rtse 'di ni skal ldan gyi skyes bu bskal pa dpag tu med pa'i sngon rol nas/__sangs rgyas mang po la bsnyen bkur zhing /__las kyi sgrib pa mthar zad pa/__srid pa tha ma'i byang chub sems dpa' 'ga' dang 'ga'i spyod yul yin gyi/__gang rung rung gi spyod yul ni ma yin te/__theg pa dman pa dang /__bsod nams dman pa dang /__shes rab dman pa dang /__yul dang dus dang lam la ltos pa'i gang zag rnams ni 'phrad par mi 'gyur/__'phrad kyang mos par mi 'gyur/__zhes so/___/__!_ egapremats+tsha gcig zhus/___/__!_dag snang lung bstan sogs kyang re dogs skyes na dngos grub bar chad gang rung zhig mi 'gyur mi srid pas thams cad chos nyid mnyam pa chen po'i ngang du bzhag go/__/'di'i lo rgyus dpa' bo'i chos 'byung du bshad/___/__!_dkyil 'khor gyi phyi rol dur khrod brgyad du grub thob brgyad gnas pa ni 'ga' zhig tu nges bzung med par bshad/__daMSh+ta se na ni slob dpon dpa' bo'i mtshan gyi rnam grangs su bshad kyang /__don la mche ba'i sde ste slob dpon seng ge bzang po sogs dang dus mnyam mam snyam/___!__/ paN+Di ta shrI ma hA dza nas/__de'i rgyal po ni rig pa'i gnas lnga ste/__de'i khab ni chos kyi sku zhes pa'i don to/__/bya rgod ces bya ba ni chog mi shes pa nye bar mtshon pa ste/__mtha' med pa la 'jug pa'o/__/phung po zhes bya ba ni mi zad pa'i don no/__/zhes dang /___/__!_ gsang sngags ni/__kha sbyor thig ler/__khyab 'jug dang /__dbang phyug chen po dang /__tshangs pa dang /__nyan thos dang /__rang sangs rgyas kyi spyod yul ma yin pa'i phyir gsang ba dang /__zhes dang /__rig sngags ni/__rdo rje rtse mor/__'dod chags mun pa rnams btul cing /__/nyon mongs rnams kyang rnam par btul/__/ma rig pa ni zlog byed pa/__/de ni rig sngags rnam par brjod/__/ces dang /__gzungs sngags ni/__snga mar/__sangs rgyas chos rnams 'dzin byed cing /__/chos rnams 'dzin par byed pa dang /__/dge ba zhes bya 'dzin byed pa/__/gzungs sngags kyi ni mtshan nyid do/__/zhes so/__/de gsum yang ngo bo gcig las gnas skabs kyi yon tan gtso che pa'i ldog chas btags par bzhed do/___/oM sarba dra byaM sho d+ha na hU~M phaT/__'dod yon thams cad rnam par dag pa/__zhes pa'o/___/_!__dbu skra li ba dang ling ba don gcig___/_!__sa'i snying po 'khor lo bcu pa'i mdo las/___don dam pa'i dge slong dang /__kun rdzob kyi dge slong dang /__lug dang lkugs pa lta bu'i dge slong dang /__/khrel dang ngo tsha med pa'i dge slong dang /__zhes bzhir gsungs pa'i dang po ni rtags dang cho ga la ma bltos pa'o/__/chos nyid kyi bden pa mthong tshe/___/__!_ rgyal dbang lnga pas/__mdzad pa'i las chog rnam rgyal gser 'di gal che/__mdog las/__ma ning de rnam pa lnga yod de/__skyes tsam nas pho mo gnyis ka'i mtshan ma yod pa dang /__zla ba'i stod smad la pho mo'i 'dod chags so sor phye ba zla ba phyed pa dang /__pho mo gang rung gis rang la ma 'khyud bar du chags pa mi skye bar 'khyud nas ldang ba dang /__de gnas zag pa'i sbyor ba byed pa ma mthong bar du mi skye ba phrag dog can dang /__mtshan ma mtshon gyis bcad pa sogs kyis nyams pa'o/__/zhes bshad/___/__!_ rat+na'i rdzogs chen klong gsal snying thig gi zhus lan snying gi me long las/__yang slob dpon la zhus pa:__de ltar sgom pa'i rnal 'byor pas:__bsgoms kyang rtogs pa ma shar:__sgom 'phro la shi na ji ltar skye zhus pas:__slob dpon gyis gsungs pa:__nges 'byung gsha' ma sgom pa de mir mi skye ste:__skye ba des 'khor ba las ldog pa thob:__nyams skyes te mi g.yo ba tsam la skye ba ni lha yi rig 'dzin du skye ba der sangs rgya'o:__nyams rtogs shin tu brtan cing mi g.yo ba thob pa ni:__srid pa bar do la ting 'dzin zin te 'tshang rgya ba yin gsungs:__zhes dang /__'o na yi dam lha'i bsnyen sgrub ji ltar byas na nye zhus pas:__slob dpon gyis gsungs pa:__rang dang yi dam gnyis su med par sku gsung thugs lhun grub tu rtogs shing bzlas brjod them na nye:__don la rang rig yi dam chos skur rtogs na nye'o gsungs:__zhes so/___/__!_ 'jam dpal gyis/__phung po rnam dpyad stong nyid ni/__zhes sogs 'di gzhan stong gi lta ba'i khungs che ba zhig kyang mdzad 'dug__/bde mchog sdom 'byung gi rgyud de bla med spyi la gal che bar yod pas zhib tu rtogs par bya'o/___/__!_ gsang ba thams cad gcod pa'i rgyud kyi rgyal po las/__theg pa gsum gyi nges 'byung zhing /__/rig 'dzin theg pa 'bras bur gnas/__/'bras bu 'dir gnas rnal 'byor pa/__/khyim pa'i rdo rje 'dzin pa yi/__/cha lugs su ni gnas byas la/__/dbang bskur rab gnas la sogs bya/__/theg pa gsum gyi cha lugs kyis/__/gsang ba'i spyod pa ma gsungs te/__/dper na rdo las zangs su 'gyur/__/zangs las gser gyi rdo ba ste/__/zangs kyi dus na rdo med de/__/gser du gyur pas rdo mi snang /__/rig 'dzin nyid kyi dge slong la/__/so sor thar dang byang chub sems/__/gnyis po gnas pa nyid du ni/__/sangs rgyas kyis kyang ma gsungs so/__/zhes so/___/__!_ dgongs pa lung bstan pa'i rgyud las/__srog dang gyen rgyu thur sel dang /__/mnyam gnas khyab byed ces bya dang /___/khams dang rus sbal gtsang pa dang /__/lha byin gzhu rgyal zhes bya ba/__/zhes bcu'o/___/__!_ bya rgyud rig pa mchog gi rgyud du/__log 'dren pa'i gtsug phud sogs kyi bar gcod 'byung tshul 'dul thabs dang bcas pa yod/___/__!_ gnubs kyi bsam gtan mig sgron las/__nges tshig brjod pa'i dus nyid na/__kun ni don dam pa/__rdzob ni sgrib pa ste/__zhes dang /__de lta bu'i nyon kun bya ba dang bral bar gsol bsang gnyis su med par ma shes so/__/gal te gnyis su med par smra na yang /__don dam pa'i bden pa/__stong pa ma skyes par lta ba der gcig par 'dod do/__'on kyang rang res 'jog can des rnal 'byor chen po'i de bzhin bden pa dbyer med ma mthong ste/__rang gi lta bas bsgribs so/__/zhes sogs dang /__'di'i nang du kA ma la shI la dang /__hA shang ma hA yA na'i lta sgom sogs zhib par yod/__thugs gter lnga ni/__spar rjer mkha' 'gro/__gtam zis na bla ma/__sgrags yongs rdzong na rgyud dang rdzogs rim/__has po gang na dam rdzas gtso bor ston pa/__mchims phu na ngan sngags dang drag sngags rnams yod pa/__dang po nyang /__gnyis pa chos dbang /__gsum pa rdor gling /__bzhi pa mdo sngags gling pa la skal par babs kyang ma thob/__lnga pa pad gling nas spyan drangs pa rnams so/___/__!_ nyang gter drag dmar las/__sde brgyad srog gi snying po ni:__ya ni gshin rje ma ma mo:__na ni klu la du ni bdud:__sha ni gnod sbyin ru ni btsan:__tsa ni rgyal po a ni lha:__zhes dang /__so so'i bla rdo yang /__rdo rje gtsug lag gi rgyud las/__spyi la gri lcags sdig pa sor bzhi pa:__rang bzhin drag po btsan gsum mtshal du bri:__khyad par gza' dang mu stegs gshin rje yin:__ma mo bud med brla g.yon rkang :__bdud la khab zur gsum pa la:__lha la g.yag dkar rwa rtse ste:__gnod sbyin srin sde ljang gu'o:__rU dra thal chen rgyal po shel rdo yin:__btsan la mchong dmar dmu la mchong smug yin:__the'u rang 'gong po dam sri pha wang long :__klu la bla rdo rin chen sna lnga yin:__ces so/__/rdor brag pad phrin gyis mdzad pa'i rang byung rang shar gyi bsnyen sgrub kyi yi ge rgyud don rab gsal dang /__phrin las kyi rnam bshad rab gsal nyin byed snang ba gnyis shin tu gal che/___!___/ sarba duSh+taM/__gdug pa can thams cad/__a kro te ka ya man+ta ka ha na ma tha b+hany+dza/__gshin rje gshed pos bsnun zhig chom zhig thul cig__/pad+man+ta kraM ta ni pad+ma mthar byed/__hu lu hu lu/__'bad pa 'bad pa/__baM/__chings shig__/kro d+hI shwa ri s+t+waM hU~M ha he pha?T ma ma yo gi ni ru lu b+h+yo/__khro mo dbang phyug khyod bsdus dgyes spros rnal 'byor ma dbab cig ma mo/__sarba duSh+tAM hrIHmyags hr-i da ya/__sdang ba thams cad chod cig spu gri'i snying po/__a ti sha zhes ba ni/__phul du byung ba zhes pa paN+Di tas gzhan las lhag pa'i don no/__/zhes bshad/_rin chen spungs par/__med pa nyid dang phyal ba dang /__/lhun gyis grub dang gcig pu nyid/__/ces bshad do/__/__! bam gyi gtso bo rnam gsum rgyal dbang gi dgongs 'grel lung rigs gter mdzod las/__phyi rol gyi phyag rgya mtshan nyid dang ldan pa ni las kyi phyag rgya/__de la brten nas a wa d+hU tir stong pa nyid dang ro gcig pa'i lhan cig skyes pa'i dga' ba ni dam tshig phyag rgya/__de'i rang bzhin chos kyi dbyings ni chos kyi phyag rgya/__de dag gi 'bras bu rang byung gi ye shes ni/__phyag rgya chen po yin par gsang sngags kyi rgyud la ji skad gsungs pa bzhin yin la/__zhes so//__!_//_ mdo sde rma gcad ni/__'chad tshul gong du snang ste/__'ga' zhig gis chad pa bcad pa yin zer ba yang /__don la shin tu rgyas pa zer ba yin ces bla mas gsungs so//__//sarba dA ka l+yA NaM b+ha ba tu//__// shes rab nas zhu bcug thengs pa byas/