JKW-KABUM-22-ZA-012-055

🚧 This website is under continued development. We appreciate your patience!

Previous Text Back to Volume PageNext Text

ཆེད་དུ་བརྗོད་པའི་རྡོ་རྗེའི་ཐོལ་གླུ་ལུང་དང་རྟོགས་པའི་རོལ་མོ།

Wylie title	ched du brjod pa'i rdo rje'i thol glu lung dang rtogs pa'i rol mo
Location	mkhyen brtse'i bka' 'bum Volume 22, sde tshan 12, Text 55, Pages 512-515 (Folios 84b6 to 86a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ched du brjod pa'i rdo rje'i thol glu lung dang rtogs pa'i rol mo. In 'jam dbyangs mkhyen brtse'i dbang po'i bka' 'bum, Vol. 22: 512-515. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

55 512-515	ཆེད་དུ་བརྗོད་པའི་རྡོ་རྗེའི་ཐོལ་གླུ་ལུང་དང་རྟོགས་པའི་རོལ་མོ། ched du brjod pa'i rdo rje'i thol glu lung dang rtogs pa'i rol mo Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཆེད་དུ་བརྗོད་པའི་རྡོ་རྗེའི་ཐོལ་གླུ་ལུང་དང་རྟོགས་པའི་རོལ་མོ་ཞེས་བྱ་བ། ཨ་ཧོ། སྐུ་གསུམ་བདེ་བ་ཆེན་པོའི་ངོ་བོ་རུ་བཞུགས་པས། །རྣམ་གསུམ་སྣང་བའི་ཉམས་མྱོང་ཡེ་ཤེས་སུ་དག་པའི། །བརྒྱུད་གསུམ་རིག་འཛིན་བླ་མ་སྙིང་དབུས་ནས་མཁྱེན་ནོ། །སྒོ་གསུམ་སྤྲོས་དང་བྲལ་བར་བྱིན་གྱིས་རང་རློབས་ཤིག །ད་ལྟ་དལ་འབྱོར་མི་ལུས་རིན་ཆེན་འདི་ཐོབ་ཚེ། །བླ་མེད་གཏན་གྱི་འདུན་མ་གཅིག་ཅར་དུ་བསྒྲུབ་ཕྱིར། །ང་ཡི་དེད་དཔོན་བཤེས་གཉེན་སྐྱོ་གྲོགས་ལ་ཕེབས་དང་། །རི་ཁྲོད་དབེན་པར་རྩེ་གཅིག་སྒྲུབ་པ་ལ་བསྒྲིལ་གཏོང་། །ཆོས་བརྒྱད་འཆིང་བའི་སྙི་ལས་ཐར་པ་ཡི་དུས་འདིར། །སྐུ་གསུམ་བདེ་བ་ཆེན་པོའི་མཁའ་དབྱིངས་སུ་རོལ་ཕྱིར། །ང་ཡི་བརྩོན་འགྲུས་རྒོད་དཀར་སྐྱོ་གྲོགས་ལ་ཕེབས་དང་། །ཟབ་གསང་རྫོགས་པ་ཆེན་པོའི་ལམ་སྣང་ལ་འབད་གཏོང་། །རྟག་འཛིན་ཚ་གདུང་སྟུག་པོ་གཏད་མེད་དུ་བཟློག་པས། །སྐྱོ་ཤས་ངེས་པར་འབྱུང་བའི་ཆུ་ཀླུང་གི་ངོགས་སུ། །ང་ཡི་མི་ཚེའི་གསེར་ཉ་སྐྱོ་གྲོགས་ལ་ཕེབས་དང་། །ཉིན་མཚན་བར་མེད་དགེ་བའི་གཤོག་རྩལ་རང་བསྒྱུར་གཏོང་། །འདུ་འཛི་ཁྱིམ་པའི་འཚོ་བ་ཞེན་ལོག་གིས་བཟློག་ནས། །ཐབས་ཤེས་ཟུང་འཇུག་འདེགས་འཇོག་བར་མེད་དུ་བསྒྱུར་བས། །ང་ཡི་བློ་སྣ་དབེན་རི་སྐྱོ་གྲོགས་ལ་ཕེབས་དང་། །བགྱི་བ་དོན་ལྡན་དམ་པའི་ལྷ་ཆོས་ལ་འབད་གཏོང་། །ཉེས་བྱས་དགུན་གྱི་ཕོ་ཉ་བསླབ་གསུམ་དུ་བསྡམས་པས། །སྤངས་དང་འཇུག་པའི་ཚུལ་ཁྲིམས་སྨན་ལྗོངས་ཀྱི་དོ་རར། །ང་ཡི་སྤྱོད་ལམ་རི་དྭགས་སྐྱོ་གྲོགས་ལ་ཕེབས་དང་། །ཁོར་ཡུག་རིག་གྲོལ་གཉིས་ལྡན་འཚོ་བ་རང་སྦྱར་གཏོང་། །འཁོར་བ་སྡུག་བསྔལ་དཔག་མེད་གཟའ་སྐར་ལས་བཟློག་སྟེ། །འདུན་པ་དགེ་བར་སྤྱོད་པའི་སྐྱ་རེངས་ཀྱིས་དྲངས་ཚེ། །ང་ཡི་བསྐྱེད་རྫོགས་ཉིད་བྱེད་སྐྱོ་གྲོགས་ལ་ཕེབས་དང་། །བསྐལ་པར་གོམས་པའི་ལས་ཉོན་མུན་པ་འདི་བཟད་གཏོང་། །འཆད་རྩོད་རྩོམ་པའི་གྲགས་སྙན་དྲི་བཞོན་ལས་བཟློག་པས། །བཟླས་བརྗོད་ཆོས་སྤྱོད་དབྱར་རྔའི་ང་རོ་རུ་བསྒྲགས་ཚེ། །ང་ཡི་རླུང་སེམས་རྨ་བྱ་སྐྱོ་གྲོགས་ལ་ཕེབས་དང་། །ཡང་དག་དབུ་མར་སྨིན་པའི་ཟློས་གར་རང་བསྒྱུར་གཏོང་། །གཉིས་འཛིན་ཕྱོགས་ཆའི་དགུན་གྱི་གྲང་ངར་ལས་བཟློག་པས། །སྨོན་སེམས་དཔྱིད་ཀྱི་ཕོ་ཉ་ཅི་དགའ་རུ་རྒྱུ་བར། །ང་ཡི་འཇུག་པ་ཁུ་བྱུག་སྐྱོ་གྲོགས་ལ་ཕེབས་དང་། །ཚོགས་གཉིས་ཟུང་འབྲེལ་དབྱར་གྱི་དུས་སྟོན་ལ་སྦྱར་གཏོང་། །ཐ་མལ་འཁྲུལ་པའི་མུན་པ་ཕ་མཐའ་རུ་བཟློག་པས། །སྣང་སྟོང་ཟུང་དུ་འཇུག་པའི་གདན་གསུམ་གྱི་འོད་དཀར། །ང་ཡི་བསྐྱེད་རིམ་ཟླ་བ་སྐྱོ་གྲོགས་ལ་ཕེབས་དང་། །རིག་འཛིན་རྣམ་པ་བཞི་ཡི་ཀུནྡཱ་རང་བཞད་གཏོང་། །འདོད་ཆགས་རྟོག་པའི་སྒྲོན་མེ་བདེ་ཆེན་དུ་བཟློག་པས། །ཆགས་བྲལ་དགའ་བའི་ལང་ཚོ་ཟུར་མིག་གིས་མཛེས་པ། །ང་ཡི་བྱང་སེམས་ཌཱ་ཀི་སྐྱོ་གྲོགས་ལ་ཕེབས་དང་། །དབབ་བཟློག་འབེབས་སྐྱིལ་དགའ་བཞིའི་ངལ་བསོ་ལ་སྦྱར་གཏོང་། །མཐའ་བརྒྱད་སྤྲོས་པའི་རི་དྭགས་ཆོས་དབྱིངས་སུ་བཟློག་པས། །ཉམས་མྱོང་སྒོམ་པའི་གཡུ་རལ་སྟུག་པོ་ཡིས་བརྗིད་པ། །ང་ཡི་གཉུག་མ་སེང་ལྕམ་སྐྱོ་གྲོགས་ལ་ཕེབས་དང་། །ཁྱད་ཆོས་དྲུག་ལྡན་གངས་རིའི་ལ་ཐོད་ལ་སྦྱར་གཏོང་། །ཡིད་བྱེད་ལས་འདས་སྒྲོན་བཞིའི་འཛུམ་ཟེར་གྱིས་ཕྱེས་པའི། །ཐེག་བརྒྱད་རྩོལ་སྒྲུབ་ངལ་བསོའི་ཆུ་སྐྱེས་ཀྱི་ཟེ་འབྲུར། །ང་ཡི་དབྱིངས་རིག་བུང་བ་སྐྱོ་གྲོགས་ལ་ཕེབས་དང་། །སྣང་བཞི་གོང་འཕེལ་སྦྲང་རྩིའི་དགའ་སྟོན་ལ་སྦྱར་གཏོང་། །དགེ་ཚོགས་བདག་ཏུ་འཛིན་པའི་དྲི་བཞོན་ལས་བཟློག་པས། །འཁོར་གསུམ་རྣམ་པར་དག་པའི་གློག་ཕྲེང་གི་དོ་ཤལ། །ང་ཡི་བསྔོ་སྨོན་སྦྲང་ཆར་སྐྱོ་གྲོགས་ལ་ཕེབས་དང་། །ཆོས་དབྱིངས་མཐའ་བྲལ་ཆུ་གཏེར་ཆེན་པོ་རང་འཕེལ་གཏོང་། །སྣ་ཚོགས་ཀུན་བརྟགས་མཚན་མའི་སྤྲོས་པ་ཀུན་བཟློག་པས། །མགྲིན་པ་རྡོ་རྗེའི་ཐོལ་གླུའི་དཀོར་མཛོད་ཀྱི་ཀློང་ནས། །ང་ཡི་ཉམས་དགའི་སྒྲ་དབྱངས་སྐྱོ་གྲོགས་སུ་ཕེབས་པས། །གཟུང་འཛིན་ལས་འདས་ཆོས་ཉིད་མཐོང་བ་རུ་ཤོག་ཅིག ། ༈

[edit]

ched du brjod pa'i rdo rje'i thol glu lung dang rtogs pa'i rol mo/__ ched du brjod pa'i rdo rje'i thol glu lung dang rtogs pa'i rol mo zhes bya ba/__a ho/__sku gsum bde ba chen po'i ngo bo ru bzhugs pas/__/rnam gsum snang ba'i nyams myong ye shes su dag pa'i/__/brgyud gsum rig 'dzin bla ma snying dbus nas mkhyen no/__/sgo gsum spros dang bral bar byin gyis rang rlobs shig__/da lta dal 'byor mi lus rin chen 'di thob tshe/__/bla med gtan gyi 'dun ma gcig car du bsgrub phyir/__/nga yi ded dpon bshes gnyen skyo grogs la phebs dang /__/ri khrod dben par rtse gcig sgrub pa la bsgril gtong /__/chos brgyad 'ching ba'i snyi las thar pa yi dus 'dir/__/sku gsum bde ba chen po'i mkha' dbyings su rol phyir/__/nga yi brtson 'grus rgod dkar skyo grogs la phebs dang /__/zab gsang rdzogs pa chen po'i lam snang la 'bad gtong /__/rtag 'dzin tsha gdung stug po gtad med du bzlog pas/__/skyo shas nges par 'byung ba'i chu klung gi ngogs su/__/nga yi mi tshe'i gser nya skyo grogs la phebs dang /__/nyin mtshan bar med dge ba'i gshog rtsal rang bsgyur gtong /__/'du 'dzi khyim pa'i 'tsho ba zhen log gis bzlog nas/__/thabs shes zung 'jug 'degs 'jog bar med du bsgyur bas/__/nga yi blo sna dben ri skyo grogs la phebs dang /__/bgyi ba don ldan dam pa'i lha chos la 'bad gtong /__/nyes byas dgun gyi pho nya bslab gsum du bsdams pas/__/spangs dang 'jug pa'i tshul khrims sman ljongs kyi do rar/__/nga yi spyod lam ri dwags skyo grogs la phebs dang /__/khor yug rig grol gnyis ldan 'tsho ba rang sbyar gtong /__/'khor ba sdug bsngal dpag med gza' skar las bzlog ste/__/'dun pa dge bar spyod pa'i skya rengs kyis drangs tshe/__/nga yi bskyed rdzogs nyid byed skyo grogs la phebs dang /__/bskal par goms pa'i las nyon mun pa 'di bzad gtong /__/'chad rtsod rtsom pa'i grags snyan dri bzhon las bzlog pas/__/bzlas brjod chos spyod dbyar rnga'i nga ro ru bsgrags tshe/__/nga yi rlung sems rma bya skyo grogs la phebs dang /__/yang dag dbu mar smin pa'i zlos gar rang bsgyur gtong /__/gnyis 'dzin phyogs cha'i dgun gyi grang ngar las bzlog pas/__/smon sems dpyid kyi pho nya ci dga' ru rgyu bar/__/nga yi 'jug pa khu byug skyo grogs la phebs dang /__/tshogs gnyis zung 'brel dbyar gyi dus ston la sbyar gtong /__/tha mal 'khrul pa'i mun pa pha mtha' ru bzlog pas/__/snang stong zung du 'jug pa'i gdan gsum gyi 'od dkar/__/nga yi bskyed rim zla ba skyo grogs la phebs dang /__/rig 'dzin rnam pa bzhi yi kun+dA rang bzhad gtong /__/'dod chags rtog pa'i sgron me bde chen du bzlog pas/__/chags bral dga' ba'i lang tsho zur mig gis mdzes pa/__/nga yi byang sems DA ki skyo grogs la phebs dang /__/dbab bzlog 'bebs skyil dga' bzhi'i ngal bso la sbyar gtong /__/mtha' brgyad spros pa'i ri dwags chos dbyings su bzlog pas/__/nyams myong sgom pa'i g.yu ral stug po yis brjid pa/__/nga yi gnyug ma seng lcam skyo grogs la phebs dang /__/khyad chos drug ldan gangs ri'i la thod la sbyar gtong /__/yid byed las 'das sgron bzhi'i 'dzum zer gyis phyes pa'i/__/theg brgyad rtsol sgrub ngal bso'i chu skyes kyi ze 'brur/__/nga yi dbyings rig bung ba skyo grogs la phebs dang /__/snang bzhi gong 'phel sbrang rtsi'i dga' ston la sbyar gtong /__/dge tshogs bdag tu 'dzin pa'i dri bzhon las bzlog pas/__/'khor gsum rnam par dag pa'i glog phreng gi do shal/__/nga yi bsngo smon sbrang char skyo grogs la phebs dang /__/chos dbyings mtha' bral chu gter chen po rang 'phel gtong /__/sna tshogs kun brtags mtshan ma'i spros pa kun bzlog pas/__/mgrin pa rdo rje'i thol glu'i dkor mdzod kyi klong nas/__/nga yi nyams dga'i sgra dbyangs skyo grogs su phebs pas/__/gzung 'dzin las 'das chos nyid mthong ba ru shog cig_/__!