JKW-KABUM-22-ZA-007-030

🚧 This website is under continued development. We appreciate your patience!

Previous Text Back to Volume PageLast text in section.

འཇམ་དབྱངས་མཁྱེན་བརྩེའི་དབང་པོའི་རྣམ་ཐར་སྙིང་པོར་དྲིལ་བ།

Wylie title	'jam dbyangs mkhyen brtse'i dbang po'i rnam thar snying por dril ba
Location	mkhyen brtse'i bka' 'bum Volume 22, sde tshan 7, Text 30, Pages 282-291 (Folios 49b6 to 54a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. 'jam dbyangs mkhyen brtse'i dbang po'i rnam thar snying por dril ba. In 'jam dbyangs mkhyen brtse'i dbang po'i bka' 'bum, Vol. 22: 282-291. Khams sde dge rdzong sar dgon: Rdzong sar blo gros phun tshogs, 2020.
Genre	Biographies - Hagiography - rnam thar  ·  Supplications - gsol 'debs
Colophon	First colophon: །ཞེས་རྣམ་འདྲེན་གྲུབ་ཐོབ་མཆོག་གི་སྤྲུལ་པའི་སྐུ་དམ་པ་དང་། དད་ལྡན་ཚེ་དབང་ལྷ་མོའི་བཞེད་སྐོང་དུ་མཁྱེན་བརྩེའི་དབང་པོས་བྲིས་པ་དགེ་ཞིང་བཀྲ་ཤིས། Second colophon: །ཞེས་པའང་མཁྱེན་བརྩེའི་དབང་པོས་བྲིས་པ་དགེ།
	First colophon: /zhes rnam 'dren grub thob mchog gi sprul pa'i sku dam pa dang /__dad ldan tshe dbang lha mo'i bzhed skong du mkhyen brtse'i dbang pos bris pa dge zhing bkra shis/___ Second colophon: /zhes pa'ang mkhyen brtse'i dbang pos bris pa dge/
Notes	The colophons recorded here are from the two supplications included at the end of this work

1 Texts in this Section (sde tshan or chos tshan)

30 282-291	འཇམ་དབྱངས་མཁྱེན་བརྩེའི་དབང་པོའི་རྣམ་ཐར་སྙིང་པོར་དྲིལ་བ། 'jam dbyangs mkhyen brtse'i dbang po'i rnam thar snying por dril ba Biographies - Hagiography - rnam thar   ·   Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །འཇམ་དབྱངས་མཁྱེན་བརྩེའི་དབང་པོའི་རྣམ་ཐར་སྙིང་པོར་དྲིལ་བ་བཞུགས་སོ། །དཀོན་མཆོག་རྩ་གསུམ་རྒྱ་མཚོའི་བདག །དཔལ་ལྡན་བླ་མར་གུས་བཏུད་ནས། །རང་ཚུལ་སྒྲོ་སྐུར་མ་མཆིས་པར། །དམ་པའི་གསུང་ངོར་མདོར་བསྡུས་བརྗོད། །ཁོ་བོ་བོད་ཆེན་སྡེ་དགེའི་ཤར། །གཏེར་ལྷུང་ཞེས་པའི་ས་ཡི་ཆར། །ཁྱུང་ཆེན་བྲག་གི་འདབས་རོལ་ཏུ། །གཉོས་ཀྱི་རིགས་སུ་གྲགས་པ་ལས། །རབ་ཡིད་ལྕགས་ཕོ་འབྲུག་གི་ལོའི། །དབྱར་ཐ་ཆུ་སྟོད་ཟླ་བ་ཡི། །ཆོས་འཁོར་བསྐོར་བའི་དུས་ཚེས་དང་། །ཉེ་བ་དཀར་ཕྱོགས་རྫོགས་པའི་ཉིན། ངོ་མཚར་ལྟས་བཅས་བཙས་སོ་སྐད། །དྲན་ཙམ་དུས་སུ་ཡེ་ཤེས་ཀྱི། །མགོན་པོ་ཕྱག་དྲུག་ཨེ་ཀ་ཛས། །ཡང་ཡང་བརྩེ་ཞིང་སྐྱོང་བ་དང་། །ཚེ་སྔོན་བག་ཆགས་འལ་འོལ་དྲན། །ཆུང་ནས་རབ་བྱུང་ཕྱོགས་སུ་བསྙེན། །ཉེར་གཅིག་ལོ་ཡི་གུང་སོན་ཚེ། །སྨིན་གྲོལ་ཆོས་ཀྱི་གླིང་ཆེན་པོར། །བརྟན་མཁས་རྫོགས་པའི་དགེ་བའི་བཤེས། །རིག་འཛིན་བཟང་པོར་བསྙེན་པར་རྫོགས། །ཁྲི་ཆེན་སངས་རྒྱས་ཀུན་དགའ་ལས། །དབུ་མ་ལུགས་ཀྱི་སེམས་བསྐྱེད་དང་། །དཔལ་ཆེན་ཡང་དག་སོ་ལུགས་དང་། །རིག་འཛིན་ཐུགས་ཏིག་དབང་བསྐུར་ནོས། །སྡོམ་པ་གསུམ་དང་ལྡན་པར་བྱས། །སྔ་ཕྱིར་ཁམས་དབུས་གཙང་གསུམ་དུ། །མི་ལོ་བཅུ་གསུམ་ཐོས་པ་བཙལ། །རྡོ་རྗེ་འཛིན་དང་དགེ་བའི་བཤེས། །རིག་བྱེད་གཞུང་ལ་མཁས་པ་སོགས། །གཙུག་ནོར་བརྒྱ་དང་ལྔ་བཅུ་བསྟེན། །བཟོ་གསོ་སྒྲ་ཚད་ཡན་ལག་བཅས། །འདུལ་མཛོད་དབུ་ཕར་བཤད་སྲོལ་ཐོས། །གསར་རྙིང་རྡོ་རྗེ་ཐེག་པ་ཡི། །དབང་དང་བྱིན་རླབས་རྗེས་གནང་སོགས། །བཀའ་གཏེར་བཀའ་གདམས་ས་སྐྱ་པ། །འབྲི་སྟག་མཚུར་དང་གདན་འབྲུག་གི། །སྔོན་གྱི་ལུགས་སྲོལ་མ་ཉམས་པར། །བཞུགས་པའི་སྨིན་གྲོལ་གདམས་ངག་དང་། །བདེ་དགྱེས་གསང་གསུམ་དུས་འཁོར་ལོ། །སྒྱུ་འཕྲུལ་གསང་བ་སྙིང་པོ་སོགས། །རྒྱབ་བརྟེན་རྒྱུད་ཀྱི་བཤད་པ་དང་། །བཀའ་བསྟན་དམ་པའི་གསུང་རབ་ལུང་། །གླེགས་བམ་བདུན་བརྒྱ་ལྷག་ཙམ་ཉན། །མདོར་ན་བཤད་རྒྱུད་ཤིང་རྟ་བཅུའི། །རིང་ལུགས་རྒྱུན་བཞུགས་ཕལ་ཆེར་ཐོས། །ཅུང་ཟད་སྦྱངས་ཤིང་ཕྱོགས་ཙམ་ཤེས། །རང་གཞན་གྲུབ་མཐའི་ཁས་ལེན་དང་། །ཆོས་རྒྱུས་ཤིན་ཏུ་ཆེ་བ་བྱུང་། །ཐོས་པས་དེ་རྣམས་ཕལ་ཆེར་ཞིག །ཡང་ནས་ཡང་དུ་འཆད་པ་དང་། །ལན་རེ་མ་འཆད་མེད་པ་ལྟར། །དམ་པའི་སྐྱེས་བུ་མཆོག་རྣམས་དང་། །ཕལ་པ་མུ་ཏོ་ཡན་ཆད་ལ། །ཉིན་མཚན་ཆོས་སྦྱིན་ཅི་ནུས་སྤེལ། །བསྟན་པའི་རྒྱུན་ཙམ་འབྱུང་རེ་བའི། །ལྷག་བསམ་སྨོན་པ་སྙིང་ནས་བགྱིས། །གསེར་ཟངས་འབའ་ཞིག་ལས་གྲུབ་པའི། །སྐུ་རྟེན་སྟོང་ཕྲག་གཉིས་ཙམ་དང་། །ཁྱད་པར་གསུང་རྟེན་གླེགས་བམ་ནི། །པུ་སྟི་བཞི་བཅུ་ཉེ་བའི་སྤར། །བྲིས་དང་སྤར་ལ་བསྡོམས་པ་ཡི། །གླེགས་བམ་སྟོང་ཕྲག་གཉིས་ཙམ་བཞེངས། །དེ་རྣམས་བཞུགས་པའི་ལྷ་ཁང་ཁག །བཅུ་གསུམ་ཙམ་ཞིག་བཀོད་མཛེས་བསྐྲུན། །ཐུགས་རྟེན་མཆོད་སྡོང་ཆེན་མོས་གཙོས། །གསེར་ཟངས་ལས་གྲུབ་བརྒྱ་ཕྲག་ལྷག །བཞེངས་ཤིང་ཅི་ནུས་མཆོད་འབུལ་བགྱིས། །གནས་གཞི་གསར་དུ་བཞེངས་པ་ནི། །དུས་ཀྱིས་མཐར་འཁྱོལ་དཀའ་བས་ན། །བསྐྲུན་པའི་རྩོལ་བ་མ་མཆིས་ཀྱང་། །ཕྱོགས་འདིར་སྟོད་སྨད་འཁྲུགས་ལོང་གིས། །དགོན་གནས་ཕལ་ཆེར་ཉམས་པ་རྣམས། །རྒྱ་བོད་ཆོས་རྒྱལ་སྡེ་དགེ་བཅས། །དཔོན་བློན་རྣམས་ཀྱི་རྒྱུད་བསྐུལ་ནས། །ཉམས་གསོས་ཞལ་འདེབས་ཞལ་བསྐོས་དང་། །རང་ངོས་མཛུབ་མགོའི་མཆོད་པའི་དཔེས། །དངོས་ཇ་སུམ་སྟོང་ལྷག་པ་ཕུལ། །ཕལ་ཆེར་གསར་བཞེངས་ཉམས་གསོ་སོགས། །ཚགས་སུ་ཚུད་པའི་བྱ་བ་བསྒྲུབས། །ཕན་ཚུན་ཆོས་ཀྱི་སྡེ་རྣམས་སུ། །ལོ་རེ་བཞིན་དུ་ཡོན་སྦྱར་ནས། །གཟུངས་སྔགས་བསྔོ་བ་སྨོན་ལམ་རྟེན། །སྔ་རྗེས་དངོས་ཇ་བཞི་སྟོང་གི །རྩ་བ་ཉམས་པ་མེད་ཕུལ་ནས། །འབྲེལ་ཚད་དོན་ལྡན་སྨོན་པ་བགྱིས། །ས་ཀར་རྙིང་མ་དགེ་ལུགས་ཀྱི། །བསྟན་འཛིན་སྐྱེས་མཆོག་དམ་པ་སོགས། །དགེ་བའི་བཤེས་གཉེན་མཐའ་ཡས་དང་། །རྒྱ་བོད་དཔོན་ཆེན་གཙོར་གྱུར་པའི། །འདུས་པ་ཚད་བཟུང་མེད་པ་ལ། །ཆོས་ཀྱི་མཆོད་པ་འབུལ་བ་དང་། །རྐྱེན་སེལ་དབང་དང་བྱིན་རླབས་སོགས། །བློ་སྣ་སུན་སུན་རེ་བ་བསྐངས། །གོང་མའི་ཡུལ་རྣམས་ཐམས་ཅད་ལ། །ཅི་ནུས་མཆོད་པའི་སྤྲིན་ཡང་སྤྲོས། །རང་ཉིད་གྲུབ་མཐའ་གང་ལ་ཡང་། །གུས་ཤིང་དད་པ་མ་གཏོགས་པ། །ལོག་རྟོག་ཅུང་ཟད་མེད་པའི་མཐུས། །གཡུང་དྲུང་བོན་ལུགས་ཚུན་ཆོད་ཀྱི། །སློབ་འབྲེལ་རྒྱ་ཆེ་མུ་མེད་བྱུང་། །སྤོང་བ་བསམ་གཏན་དེ་ཁོ་ནར། །མཉམ་པར་འཇོག་པ་དཀའ་ན་ཡང་། །ཆུང་ནས་གདུལ་བྱ་གྲོང་ཆོག་སོགས། །རྨི་ལམ་དུ་ཡང་མ་དྲན་ཅིང་། །ཚེ་འདི་བློ་ཡིས་ཐོངས་པ་ཡིས། །བྱ་བཏང་ཁོ་ནའི་ཚུལ་དུ་འཁུམས། །མཆོག་དམན་སུ་ལའང་ངོ་སྲུང་དང་། །རེ་དོགས་སྤྲོས་པ་དམར་ཐག་བཅད། །སྔ་ཕྱིར་མི་ལོ་བཅུ་གསུམ་ཙམ། །ལྷག་པའི་ལྷ་ཡི་བསྙེན་སྒྲུབ་དང་། །ཟབ་ཁྲིད་བརྒྱ་རྩ་ཤར་སྒོམ་བགྱིས། །ཉམས་དང་རྟོགས་པས་དབེན་མོད་ཀྱང་། །ཁས་བླངས་ཆ་ཙམ་བསྒྲུབས་པ་ཡིས། །སྙིགས་དུས་སྐལ་བཟང་གྲལ་ཚུད་ཙམ། །བྱུང་བས་ཡིད་བདེ་འབའ་ཞིག་ཤར། །དེ་ལྟར་འཁོར་ལོ་རྣམ་གསུམ་གྱི། །ཕྱི་ཡི་རྣམ་ཐར་མདོར་བསྡུས་སོ།། །།

ནང་གི་རྣམ་པར་ཐར་པ་ནི། །སྔ་༡འགྱུར་བཀའ་༢གདམས་ས་སྐྱ་༣པ། །མར་ཤངས་བཀའ་བརྒྱུད་༤སྦྱོར་བ་༥དྲུག །ཞི་༦གཅོད་༧བསྙེན་སྒྲུབ་༨དང་བཅས་པའི། །སྒྲུབ་བརྒྱུད་ཤིང་རྟ་ཆེ་བརྒྱད་ལ། །ཤིན་ཏུ་མོས་ཤིང་དད་པའི་བློས། །སྔོན་གྱི་ལུགས་སྲོལ་མ་ཉམས་པ། །དཀའ་བ་འབད་པ་བརྒྱ་ཕྲག་གིས། །མང་དུ་ཚོལ་ཞིང་ཐོས་པར་བྱས། །དེ་ལྟའི་ཐོས་བསམ་སྒོམ་པའི་སྐབས། །དངོས་ཉམས་རྨི་ལམ་ཅི་རིགས་པར། །བླ་མ་ལྷ་དང་མཁའ་འགྲོ་ཡིས། །ཉེ་བརྒྱུད་གདམས་པ་སྩལ་བ་དང་། །བྱིན་བརླབས་མཚན་མ་ཅི་ཡང་མཐོང་། །དངོས་གྲུབ་ཐོབ་པ་དཀའ་མོད་ཀྱི། །ཚིག་དོན་སྒོམ་ཚུལ་ཕལ་ཆེར་ཞིག །ཤེས་ཤིང་ཁོང་དུ་ཆུད་པ་བྱུང་། །འོན་ཀྱང་གཞན་བློར་ཤོངས་དཀའ་བས། །མདོ་ཙམ་ཡིན་གྱི་རྒྱས་པར་ནི། །བརྗོད་ཀྱིས་མི་ལོངས་དགོས་པ་བསྐྱུང་། །རེ་ཞིག་ནང་གི་རྣམ་ཐར་གྱི། །ས་བོན་ཙམ་དུ་སྨོས་པའོ།། །། གསང་བ་བཀའ་བབས་བདུན་འབྱུང་ཞེས། །ཨོ་རྒྱན་ཆེན་པོའི་ལུང་བྱང་ལས། །ཡང་ཡང་བསྔགས་པར་མཛད་པ་ལྟར། །རང་ལོ་བརྒྱད་པའི་དུས་ཀྱི་ཚེ། །འདུ་འཁྲུགས་དྲག་པོས་མནར་བ་ན། །པདྨ་ཐོད་ཕྲེང་ཡབ་ཡུམ་གྱིས། །རྡོ་རྗེ་ཕུར་པའི་དཀྱིལ་འཁོར་དུ། །དབང་བསྐུར་བྱིན་བརླབས་གེགས་ལས་གྲོལ། །བཅོ་ལྔའི་དུས་སུ་ཉིང་འཁྲུལ་དང་། །མངོན་སུམ་གང་ཡིན་འབྱེད་དཀའ་བའི། །ཉམས་ཀྱི་གསལ་སྣང་བརྟན་པ་ལ། །རྒྱ་གར་བཛྲ་ཨཱ་ས་ནའི། །ཀེའུ་ཚང་དགུ་རིམ་དྲུང་དུ་སླེབ། །རིམ་གྱིས་འཛེགས་ནས་བརྒྱད་པའི་ནང་། །སློབ་དཔོན་འཇམ་དཔལ་བཤེས་གཉེན་ནི། །གཡས་གཡོན་གླེགས་བམ་དང་བཅས་པ། །པཎྜི་ཏ་ཡི་ཚུལ་དུ་མཇལ། །གུས་པས་བཏུད་ཅིང་གསོལ་བཏབ་པས། །ཐོག་མར་གཡོན་གྱི་གླེགས་བམ་ཉིད། །ཤེར་ཕྱིན་སྡུད་པའི་རྒྱ་དཔེར་སྣང་། །དེ་ཉིད་སྤྱི་བོར་བཀོད་ནས་ཀྱང་། །མཚན་ཉིད་ཆོས་ཀྱི་བཀའ་ལུང་གི །བྱིན་རླབས་རྫོགས་པ་ཡིན་ནོ་གསུངས། །གཡས་ཀྱི་གླེགས་བམ་རྫོགས་པ་ཆེ། །རྡོར་སེམས་སྙིང་གི་མེ་ལོང་གིས། །བྱིན་བརླབས་སྔགས་ཀྱི་ཚུལ་སྤྱི་དང་། །སྡེ་གསུམ་རྫོགས་པ་ཆེན་པོ་ཡི། །ཚིག་དོན་བྱིན་རླབས་རྫོགས་པར་སྩལ། །ལུང་བསྟན་འགའ་ཞིག་མཛད་པའི་མཐར། །དགྱེས་པས་འོད་ཞུ་རང་ལ་ཐིམ། །རྟོག་མེད་ངང་དུ་དར་ཅིག་ལུས། །ཕྱིར་འོང་སྒོ་དྲུང་མེ་ཆེན་པོར། །འབར་བའི་ནང་དུ་དབང་མེད་ཞུགས། །རགས་པའི་ལུས་ཕུང་བསྲེགས་པའི་མོད། །བི་མ་མི་ཏྲ་ཡིན་སྙམ་པའི། །འོད་ཀྱི་ལུས་སུ་ལམ་མེར་སྣང་། །གཞན་ཡང་གྲུབ་ཐོབ་ཐང་སྟོང་སོགས། །མང་པོས་རྗེས་སུ་བཟུང་བ་དང་། །དབང་དང་བྱིན་རླབས་ཐོབ་པ་སོགས། །གྲུབ་ཆེན་སྙིང་གི་ཐིག་ལེར་བསྡུས། །བཅུ་དྲུག་ས་ཟླའི་ཚེས་བཅུ་ཡི། །ཐོ་རངས་པདྨ་འོད་དུ་སླེབ། །དེ་ཡང་སྤྱིར་བཏང་བཀོད་པ་དང་། །མི་མཐུན་བྲག་རི་ལྷུན་ཆགས་ཕུག །སྤྲིན་དཀར་ཤིན་ཏུ་མཛེས་པའི་ཁྲོད། །མཚོ་སྐྱེས་མཁའ་འགྲོའི་ཚོགས་བཅས་མཇལ། །དགོངས་པས་བྱིན་བརླབས་བརྡ་དབང་བསྩལ། །བཀའ་བབས་བདུན་གྱི་དབུགས་དབྱུང་ཐོབ། །དེ་མཐར་ལྟ་སྟངས་དང་བཅས་ཏེ། །གཟུང་བའི་ཡུལ་གྱིས་མ་གོས་ཤིང་། །འཛིན་པའི་རྟོག་པས་མ་བསླད་པར། །རིག་སྟོང་རྗེན་པར་བསྐྱང་བ་ནི། །སངས་རྒྱས་ཀུན་གྱི་དགོངས་པའོ། །ཞེས་གསུངས་རང་ལ་ཐིམ་པ་ཡིས། །ཐུགས་ཡིད་དབྱེར་མེད་འདྲེས་པའི་ངང་། །གནས་ལུགས་རང་སོ་ཟིན་ཙམ་བྱུང་། །དེ་ལ་སྤྲོ་བ་སྐྱེས་ནས་ཀྱང་། །དད་པས་རྩེ་གཅིག་གསོལ་བཏབ་མཐུས། །སྔ་འགྱུར་བཀའ་མའི་རྒྱུན་༡ཀུན་ཐོབ། །ས་༢གཏེར་དངོས་དང་༣ཡང་གཏེར་དང་། །དགོངས་༤གཏེར་དག་༥སྣང་སྙན་བརྒྱུད་༦སྡེ། །རྗེས་༧སུ་དྲན་པའི་གཏེར་བཅས་པའི། །བཀའ་བབས་བརྒྱུད་མར་ཐོབ་པ་རྣམས། །ལོ་ཆེན་བཻ་རོ་དངོས་བྱོན་པ། །རིགས་བརྒྱའི་ཁྱབ་བདག་བཀའ་དྲིན་ཅན། །ཛམ་གླིང་ཆོས་ཀྱི་ཤིང་རྟ་ཆེ། །འཇམ་མགོན་བློ་གྲོས་མཐའ་ཡས་ཀྱིས། །ཤིན་ཏུ་དོན་གཉེར་དགོངས་གཏད་པས། །ཕལ་ཆེར་གཏན་ལ་ཕབ་ནས་ཀྱང་། །དགྱེས་པའི་མཆོད་སྤྲིན་མཆོག་ཏུ་སྤྲོས། །རིན་ཆེན་གཏེར་གྱི་མཛོད་ཆེན་པོར། །རྒྱབ་བརྟེན་ལེགས་བཤད་རྨད་བྱུང་བཅས། །བཞུགས་སུ་གསོལ་ཞིང་སྤར་དུ་བསྐྲུན། །བསྙེན་སྒྲུབ་འཆད་སྤེལ་མཛད་པ་ཡིས། །བགྱི་བ་དོན་དང་ལྡན་པར་གྱུར། །གཞན་ཡང་རིས་མེད་སྐྱེས་ཆེན་ལ། །ཅི་རིགས་ཕུལ་ཞིང་དགྱེས་པ་བསྐྱེད། །འདི་རྣམས་ཐོག་མར་ལུང་བསྟན་དང་། །ཁ་བྱང་ཇི་ལྟར་བྱུང་བ་དང་། །བར་དུ་གཏན་ལ་ཕབ་ཚུལ་དང་། །ཐ་མར་འབྲེལ་འཇོག་ཉམས་བླངས་སྐབས། །སློབ་དཔོན་ཡི་དམ་མཁའ་འགྲོ་ཡིས། །དབང་བསྐུར་བྱིན་གྱིས་བརླབས་པའི་ཚུལ། །ཤིན་ཏུ་ཞིབ་པར་ཡོད་ན་ཡང་། །འགའ་ཞིག་ཆོས་ཚན་སོ་སོའི་སྐབས། །ཟུར་ཙམ་གསལ་བས་མཁྱེན་བྱ་ཡི། །རྒྱས་པར་སྤྲོ་བར་མ་ནུས་མོད། །སླད་ནས་སྤྲོ་བའི་རྟེན་འབྲེལ་འཚལ། །དེ་ལྟར་ད་ལྟའི་རྣམ་པར་ཐར། །དོན་གྱི་སྙིང་པོ་ས་བོན་ཙམ། །མདོར་བསྡུས་ཉིད་དུ་གསོལ་བ་སྟེ།། །། སྔ་མ་དྲན་པའི་མཐུ་ཆུང་ཡང་། །གཏེར་ལུང་རྣམས་སུ་གསལ་བ་དང་། །དམ་པ་རྣམས་ཀྱིས་དམན་པ་ལ། །སྤྲོ་བ་བསྐྱེད་ཕྱིར་དབུགས་དབྱུང་བ། །དཔལ་ལྡན་ཀརྨ་པ་སོགས་ཀྱིས། །གསོལ་འདེབས་ཚིགས་སུ་བཅད་པར་གསལ། །རང་གི་བག་ཆགས་འལ་འོལ་ཙམ། །རྒྱ་གར་ཡུལ་དུ་གྲུབ་པའི་དབང་། །རྡོ་རྗེ་དྲིལ་བུ་པ་དང་ནི། །སྒོ་མཐའ་ཡས་པའི་བློ་གྲོས་དང་། །པཎ་ཆེན་ནགས་ཀྱི་རིན་ཆེན་སོགས། །པཎ་གྲུབ་འགའ་ཞིག་གསལ་བ་དང་། །བོད་ཡུལ་ཁྲི་སྲོང་མཆོག་གྲུབ་རྒྱལ། །ཆོས་དབང་མངའ་རིས་པཎྜི་ཏ། །ཐང་སྟོང་ལྷ་བཙུན་ཆེན་པོ་སོགས། །འལ་འོལ་དྲན་ཡང་ཡིད་བརྟན་ཅི།། །། མ་འོངས་བི་མའི་བླ་སྒྲུབ་སྐབས། །ཚེ་འདི་འཕོས་མ་ཐག་པ་ནས། །སྤྲུལ་གཞི་རི་བོ་རྩེ་ལྔ་རུ། །པཎ་ཆེན་བི་མའི་ཐུགས་ཀར་ཐིམ། །སྤྲུལ་པ་ལྔ་འབྱུང་སྨོན་ལམ་མཐུས། །རིས་མེད་བསྟན་པར་ཕན་ཅེས་གསུངས། །དེ་ལྟར་དུས་གསུམ་རྟོགས་བརྗོད་འདི། །ལྷ་སྲས་དམ་འཛིན་སྐྱེ་བའི་མཐའ། །འགྲན་བྲལ་གྲུབ་པའི་འཁོར་ལོས་སྒྱུར། །འཇིགས་མེད་ཕྲིན་ལས་འོད་ཟེར་གྱི། །རྣམ་འཕྲུལ་མཁས་བཙུན་བཟང་པོའི་ཕུལ། །འཇིགས་མེད་བསྟན་པའི་ཉི་མ་ཡིས། །ལྷ་རྫས་རིན་ཆེན་སྐྱེས་དང་བཅས། །ནན་ཏན་བསྐུལ་ངོ་མི་ལྡོག་ཙམ། །ཤིན་ཏུ་མདོར་བསྡུས་ས་བོན་དུ། །འཇམ་དབྱངས་མཁྱེན་བརྩེའི་དབང་པོས་བྲིས། །དགེ་བས་བྱང་ཆུབ་སྙིང་པོའི་བར། །ཐེག་མཆོག་བཤེས་དང་མི་འབྲལ་ཞིང་། །མྱུར་དུ་བྱང་ཆུབ་ཐོབ་པར་ཤོག །མངྒ་ལཾ།། །། འཇམ་དབྱངས་བླ་མ་མཁྱེན་བརྩེའི་དབང་པོ་ལ། །སྙིང་ནས་མོས་གདུང་དྲག་པོས་གསོལ་འདེབས་ན། །བྱང་ཆུབ་བར་དུ་འབྲལ་མེད་རྗེས་བཟུང་ནས། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །ཞེས་རྣམ་འདྲེན་གྲུབ་ཐོབ་མཆོག་གི་སྤྲུལ་པའི་སྐུ་དམ་པ་དང་། དད་ལྡན་ཚེ་དབང་ལྷ་མོའི་བཞེད་སྐོང་དུ་མཁྱེན་བརྩེའི་དབང་པོས་བྲིས་པ་དགེ་ཞིང་བཀྲ་ཤིས། ། ༈

སྐྱབས་གནས་ཀུན་འདུས་དཔལ་ལྡན་བླ་མ་ལ། །གསོལ་བ་འདེབས་སོ་ནད་གདོན་བར་ཆད་སོལ། །ཚེ་བསོད་དཔལ་འབྱོར་ཡེ་ཤེས་རྒྱས་པ་དང་། །རྣམ་མཁྱེན་གོ་འཕང་ཐོབ་པར་བྱིན་གྱིས་རློབས། །ཞེས་པའང་མཁྱེན་བརྩེའི་དབང་པོས་བྲིས་པ་དགེ། །།

[edit]

rje bla ma nyid kyi rnam thar snying por dril ba zhal gsung ma dang /__gsol 'debs sh+lo ka gnyis bcas/ @#/_/'jam dbyangs mkhyen brtse'i dbang po'i rnam thar snying por dril ba bzhugs so/__/dkon mchog rtsa gsum rgya mtsho'i bdag__/dpal ldan bla mar gus btud nas/__/rang tshul sgro skur ma mchis par/__/dam pa'i gsung ngor mdor bsdus brjod/__/kho bo bod chen sde dge'i shar/__/gter lhung zhes pa'i sa yi char/__/khyung chen brag gi 'dabs rol tu/__/gnyos kyi rigs su grags pa las/__/rab yid lcags pho 'brug gi lo'i/__/dbyar tha chu stod zla ba yi/__/chos 'khor bskor ba'i dus tshes dang /__/nye ba dkar phyogs rdzogs pa'i nyin/__ngo mtshar ltas bcas btsas so skad/__/dran tsam dus su ye shes kyi/__/mgon po phyag drug e ka dzas/__/yang yang brtse zhing skyong ba dang /__/tshe sngon bag chags 'al 'ol dran/__/chung nas rab byung phyogs su bsnyen/__/nyer gcig lo yi gung son tshe/_/smin grol chos kyi gling chen por/__/brtan mkhas rdzogs pa'i dge ba'i bshes/__/rig 'dzin bzang por bsnyen par rdzogs/__/khri chen sangs rgyas kun dga' las/__/dbu ma lugs kyi sems bskyed dang /__/dpal chen yang dag so lugs dang /__/rig 'dzin thugs tig dbang bskur nos/__/sdom pa gsum dang ldan par byas/__/snga phyir khams dbus gtsang gsum du/__/mi lo bcu gsum thos pa btsal/__/rdo rje 'dzin dang dge ba'i bshes/__/rig byed gzhung la mkhas pa sogs/__/gtsug nor brgya dang lnga bcu bsten/__/bzo gso sgra tshad yan lag bcas/__/'dul mdzod dbu phar bshad srol thos/__/gsar rnying rdo rje theg pa yi/__/dbang dang byin rlabs rjes gnang sogs/__/bka' gter bka' gdams sa skya pa/__/'bri stag mtshur dang gdan 'brug gi/__/sngon gyi lugs srol ma nyams par/__/bzhugs pa'i smin grol gdams ngag dang /__/bde dgyes gsang gsum dus 'khor lo/__/sgyu 'phrul gsang ba snying po sogs/__/rgyab brten rgyud kyi bshad pa dang /__/bka' bstan dam pa'i gsung rab lung /__/glegs bam bdun brgya lhag tsam nyan/__/mdor na bshad rgyud shing rta bcu'i/__/ring lugs rgyun bzhugs phal cher thos/__/cung zad sbyangs shing phyogs tsam shes/__/rang gzhan grub mtha'i khas len dang /__/chos rgyus shin tu che ba byung /__/thos pas de rnams phal cher zhig__/yang nas yang du 'chad pa dang /__/lan re ma 'chad med pa ltar/__/dam pa'i skyes bu mchog rnams dang /__/phal pa mu to yan chad la/__/nyin mtshan chos sbyin ci nus spel/__/bstan pa'i rgyun tsam 'byung re ba'i/__/lhag bsam smon pa snying nas bgyis/__/gser zangs 'ba' zhig las grub pa'i/__/sku rten stong phrag gnyis tsam dang /__/khyad par gsung rten glegs bam ni/__/pu sti bzhi bcu nye ba'i spar/__/bris dang spar la bsdoms pa yi/__/glegs bam stong phrag gnyis tsam bzhengs/__/de rnams bzhugs pa'i lha khang khag__/bcu gsum tsam zhig bkod mdzes bskrun/__/thugs rten mchod sdong chen mos gtsos/__/gser zangs las grub brgya phrag lhag__/bzhengs shing ci nus mchod 'bul bgyis/__/gnas gzhi gsar du bzhengs pa ni/__/dus kyis mthar 'khyol dka' bas na/__/bskrun pa'i rtsol ba ma mchis kyang /__/phyogs 'dir stod smad 'khrugs long gis/__/dgon gnas phal cher nyams pa rnams/__/rgya bod chos rgyal sde dge bcas/__/dpon blon rnams kyi rgyud bskul nas/__/nyams gsos zhal 'debs zhal bskos dang /__/rang ngos mdzub mgo'i mchod pa'i dpes/__/dngos ja sum stong lhag pa phul/__/phal cher gsar bzhengs nyams gso sogs/__/tshags su tshud pa'i bya ba bsgrubs/__/phan tshun chos kyi sde rnams su/__/lo re bzhin du yon sbyar nas/__/gzungs sngags bsngo ba smon lam rten/__/snga rjes dngos ja bzhi stong gi__/rtsa ba nyams pa med phul nas/__/'brel tshad don ldan smon pa bgyis/__/sa kar rnying ma dge lugs kyi/__/bstan 'dzin skyes mchog dam pa sogs/__/dge ba'i bshes gnyen mtha' yas dang /__/rgya bod dpon chen gtsor gyur pa'i/__/'dus pa tshad bzung med pa la/__/chos kyi mchod pa 'bul ba dang /__/rkyen sel dbang dang byin rlabs sogs/__/blo sna sun sun re ba bskangs/__/gong ma'i yul rnams thams cad la/__/ci nus mchod pa'i sprin yang spros/__/rang nyid grub mtha' gang la yang /__/gus shing dad pa ma gtogs pa/__/log rtog cung zad med pa'i mthus/__/g.yung drung bon lugs tshun chod kyi/__/slob 'brel rgya che mu med byung /__/spong ba bsam gtan de kho nar/__/mnyam par 'jog pa dka' na yang /__/chung nas gdul bya grong chog sogs/__/rmi lam du yang ma dran cing /__/tshe 'di blo yis thongs pa yis/__/bya btang kho na'i tshul du 'khums/__/mchog dman su la'ang ngo srung dang /__/re dogs spros pa dmar thag bcad/__/snga phyir mi lo bcu gsum tsam/__/lhag pa'i lha yi bsnyen sgrub dang /__/zab khrid brgya rtsa shar sgom bgyis/__/nyams dang rtogs pas dben mod kyang /__/khas blangs cha tsam bsgrubs pa yis/__/snyigs dus skal bzang gral tshud tsam/__/byung bas yid bde 'ba' zhig shar/__/de ltar 'khor lo rnam gsum gyi/__/phyi yi rnam thar mdor bsdus so//__// nang gi rnam par thar pa ni/__/snga 1'gyur bka' 2gdams sa skya 3pa/__/mar shangs bka' brgyud 4sbyor ba 5drug__/zhi 6gcod 7bsnyen sgrub 8dang bcas pa'i/__/sgrub brgyud shing rta che brgyad la/__/shin tu mos shing dad pa'i blos/__/sngon gyi lugs srol ma nyams pa/__/dka' ba 'bad pa brgya phrag gis/__/mang du tshol zhing thos par byas/__/de lta'i thos bsam sgom pa'i skabs/__/dngos nyams rmi lam ci rigs par/__/bla ma lha dang mkha' 'gro yis/__/nye brgyud gdams pa stsal ba dang /__/byin brlabs mtshan ma ci yang mthong /__/dngos grub thob pa dka' mod kyi/__/tshig don sgom tshul phal cher zhig__/shes shing khong du chud pa byung /__/'on kyang gzhan blor shongs dka' bas/__/mdo tsam yin gyi rgyas par ni/__/brjod kyis mi longs dgos pa bskyung /__/re zhig nang gi rnam thar gyi/__/sa bon tsam du smos pa'o//__// gsang ba bka' babs bdun 'byung zhes/__/o rgyan chen po'i lung byang las/_/yang yang bsngags par mdzad pa ltar/__/rang lo brgyad pa'i dus kyi tshe/__/'du 'khrugs drag pos mnar ba na/__/pad+ma thod phreng yab yum gyis/__/rdo rje phur pa'i dkyil 'khor du/__/dbang bskur byin brlabs gegs las grol/__/bco lnga'i dus su nying 'khrul dang /__/mngon sum gang yin 'byed dka' ba'i/__/nyams kyi gsal snang brtan pa la/__/rgya gar badz+ra A sa na'i/__/ke'u tshang dgu rim drung du sleb/__/rim gyis 'dzegs nas brgyad pa'i nang /__/slob dpon 'jam dpal bshes gnyen ni/__/g.yas g.yon glegs bam dang bcas pa/__/paN+Di ta yi tshul du mjal/__/gus pas btud cing gsol btab pas/__/thog mar g.yon gyi glegs bam nyid/__/sher phyin sdud pa'i rgya dper snang /__/de nyid spyi bor bkod nas kyang /__/mtshan nyid chos kyi bka' lung gi__/byin rlabs rdzogs pa yin no gsungs/__/g.yas kyi glegs bam rdzogs pa che/__/rdor sems snying gi me long gis/__/byin brlabs sngags kyi tshul spyi dang /__/sde gsum rdzogs pa chen po yi/__/tshig don byin rlabs rdzogs par stsal/__/lung bstan 'ga' zhig mdzad pa'i mthar/__/dgyes pas 'od zhu rang la thim/__/rtog med ngang du dar cig lus/__/phyir 'ong sgo drung me chen por/__/'bar ba'i nang du dbang med zhugs/__/rags pa'i lus phung bsregs pa'i mod/__/bi ma mi tra yin snyam pa'i/__/'od kyi lus su lam mer snang /__/gzhan yang grub thob thang stong sogs/__/mang pos rjes su bzung ba dang /__/dbang dang byin rlabs thob pa sogs/__/grub chen snying gi thig ler bsdus/__/bcu drug sa zla'i tshes bcu yi/__/tho rangs pad+ma 'od du sleb/__/de yang spyir btang bkod pa dang /__/mi mthun brag ri lhun chags phug__/sprin dkar shin tu mdzes pa'i khrod/__/mtsho skyes mkha' 'gro'i tshogs bcas mjal/__/dgongs pas byin brlabs brda dbang bstsal/__/bka' babs bdun gyi dbugs dbyung thob/__/de mthar lta stangs dang bcas te/__/gzung ba'i yul gyis ma gos shing /__/'dzin pa'i rtog pas ma bslad par/__/rig stong rjen par bskyang ba ni/__/sangs rgyas kun gyi dgongs pa'o/__/zhes gsungs rang la thim pa yis/_/thugs yid dbyer med 'dres pa'i ngang /__/gnas lugs rang so zin tsam byung /_/de la spro ba skyes nas kyang /__/dad pas rtse gcig gsol btab mthus/__/snga 'gyur bka' ma'i rgyun 1kun thob/__/sa 2gter dngos dang 3yang gter dang /__/dgongs 4gter dag 5snang snyan brgyud 6sde/__/rjes 7su dran pa'i gter bcas pa'i/__/bka' babs brgyud mar thob pa rnams/__/lo chen bai ro dngos byon pa/__/rigs brgya'i khyab bdag bka' drin can/__/dzam gling chos kyi shing rta che/__/'jam mgon blo gros mtha' yas kyis/__/shin tu don gnyer dgongs gtad pas/__/phal cher gtan la phab nas kyang /_/dgyes pa'i mchod sprin mchog tu spros/__/rin chen gter gyi mdzod chen por/__/rgyab brten legs bshad rmad byung bcas/__/bzhugs su gsol zhing spar du bskrun/__/bsnyen sgrub 'chad spel mdzad pa yis/__/bgyi ba don dang ldan par gyur/__/gzhan yang ris med skyes chen la/__/ci rigs phul zhing dgyes pa bskyed/__/'di rnams thog mar lung bstan dang /__/kha byang ji ltar byung ba dang /__/bar du gtan la phab tshul dang /__/tha mar 'brel 'jog nyams blangs skabs/__/slob dpon yi dam mkha' 'gro yis/__/dbang bskur byin gyis brlabs pa'i tshul/__/shin tu zhib par yod na yang /__/'ga' zhig chos tshan so so'i skabs/__/zur tsam gsal bas mkhyen bya yi/__/rgyas par spro bar ma nus mod/__/slad nas spro ba'i rten 'brel 'tshal/__/de ltar da lta'i rnam par thar/__/don gyi snying po sa bon tsam/__/mdor bsdus nyid du gsol ba ste//__// snga ma dran pa'i mthu chung yang /__/gter lung rnams su gsal ba dang /__/dam pa rnams kyis dman pa la/__/spro ba bskyed phyir dbugs dbyung ba/__/dpal ldan karma pa sogs kyis/__/gsol 'debs tshigs su bcad par gsal/__/rang gi bag chags 'al 'ol tsam/__/rgya gar yul du grub pa'i dbang /__/rdo rje dril bu pa dang ni/__/sgo mtha' yas pa'i blo gros dang /__/paN chen nags kyi rin chen sogs/__/paN grub 'ga' zhig gsal ba dang /_/bod yul khri srong mchog grub rgyal/__/chos dbang mnga' ris paN+Di ta/__/thang stong lha btsun chen po sogs/__/'al 'ol dran yang yid brtan ci//__// ma 'ongs bi ma'i bla sgrub skabs/__/tshe 'di 'phos ma thag pa nas/__/sprul gzhi ri bo rtse lnga ru/__/paN chen bi ma'i thugs kar thim/__/sprul pa lnga 'byung smon lam mthus/__/ris med bstan par phan ces gsungs/__/de ltar dus gsum rtogs brjod 'di/__/lha sras dam 'dzin skye ba'i mtha'/__/'gran bral grub pa'i 'khor los sgyur/__/'jigs med phrin las 'od zer gyi/__/rnam 'phrul mkhas btsun bzang po'i phul/__/'jigs med bstan pa'i nyi ma yis/__/lha rdzas rin chen skyes dang bcas/__/nan tan bskul ngo mi ldog tsam/__/shin tu mdor bsdus sa bon du/__/'jam dbyangs mkhyen brtse'i dbang pos bris/__/dge bas byang chub snying po'i bar/__/theg mchog bshes dang mi 'bral zhing /__/myur du byang chub thob par shog__/mang+ga laM//__// 'jam dbyangs bla ma mkhyen brtse'i dbang po la/__/snying nas mos gdung drag pos gsol 'debs na/__/byang chub bar du 'bral med rjes bzung nas/__/thugs yid gcig tu 'dres par byin gyis rlobs/__/zhes rnam 'dren grub thob mchog gi sprul pa'i sku dam pa dang /__dad ldan tshe dbang lha mo'i bzhed skong du mkhyen brtse'i dbang pos bris pa dge zhing bkra shis/__/__!__ skyabs gnas kun 'dus dpal ldan bla ma la/__/gsol ba 'debs so nad gdon bar chad sol/__/tshe bsod dpal 'byor ye shes rgyas pa dang /__/rnam mkhyen go 'phang thob par byin gyis rlobs/__/zhes pa'ang mkhyen brtse'i dbang pos bris pa dge/__//