JKW-KABUM-23-'A-001-066

🚧 This website is under continued development. We appreciate your patience!

Previous Text Back to Volume PageNext Text

སྒྲོལ་མ་ཡིད་བཞིན་འཁོར་ལོའི་གསང་བ་བསམ་གྱིས་མི་ཁྱབ་པ་རྗེས་སུ་དྲན་པའི་གླུ་འཆི་མེད་རྟག་པ་དམ་པའི་དབྱངས་སྙན།

Wylie title	sgrol ma yid bzhin 'khor lo'i gsang ba bsam gyis mi khyab pa rjes su dran pa'i glu 'chi med rtag pa dam pa'i dbyangs snyan
Location	mkhyen brtse'i bka' 'bum Volume 23, sde tshan 1, Text 66, Pages 128-129 (Folios 64b1 to 65a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sgrol ma yid bzhin 'khor lo'i gsang ba bsam gyis mi khyab pa rjes su dran pa'i glu 'chi med rtag pa dam pa'i dbyangs snyan. In 'jam dbyangs mkhyen brtse'i dbang po'i bka' 'bum, Vol. 23: 128-129. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་འཕགས་མ་ཡིད་བཞིན་ཟླ་བའི་སྒྲུབ་མཆོད་ཀྱི་སྐབས་གསང་བ་བསམ་གྱིས་མི་ཁྱབ་པ་རྗེས་སུ་དྲན་པའི་ཚུལ་གྱིས་གསོལ་བ་འདེབས་པའི་ངག་གི་གླིང་བུ་གང་ཤར་ཡིད་ཀྱི་སོར་མོས་བསྒྲེངས་པ་སྟེ་དགེ་ལེགས་ཀྱི་སྣང་བ་འཇིག་རྟེན་ཀུན་ཏུ་ཁྱབ་ཅིང་རྟག་པར་གྱུར་ཅིག །
	zhes pa'ang mtsho skyes bla ma dgyes pa'i 'bangs pad+ma 'od gsal mdo sngags gling pas 'phags ma yid bzhin zla ba'i sgrub mchod kyi skabs gsang ba bsam gyis mi khyab pa rjes su dran pa'i tshul gyis gsol ba 'debs pa'i ngag gi gling bu gang shar yid kyi sor mos bsgrengs pa ste dge legs kyi snang ba 'jig rten kun tu khyab cing rtag par gyur cig

Tibetan Text

Wylie

[edit]

རྗེ་བཙུན་སྒྲོལ་མ་ཡིད་བཞིན་འཁོར་ལོའི་གསང་བ་བསམ་གྱིས་མི་ཁྱབ་པ་རྗེས་སུ་དྲན་པའི་གླུ་འཆི་མེད་རྟག་པ་དམ་པའི་དབྱངས་སྙན་ཞེས་བྱ་བ། ཨ་ཧོ། ཨོཾ་ཡིག་བཀྲ་ཤིས་བྱེ་བའི་དགེ་ལེགས་ཀྱི་རེ་ཁཱ། །མཚན་བཟང་སྐུ་ཡི་ཆ་ཤས་རེ་རེ་ལ་རྫོགས་པས། །མཐོང་བས་ཡིད་འཕྲོག་ཡིད་བཞིན་འཁོར་ལོ་དེ་དྲན་བྱུང་། །འགྱུར་མེད་རྟག་པ་དམ་པའི་དངོས་གྲུབ་ཅིག་སྩོལ་དང་། །ཏཱ་རེ་སྲིད་མཚོ་སྒྲོལ་བའི་ཟབ་རྒྱས་ཀྱི་ཆོས་ཀུན། །འཕགས་མའི་གསུང་གི་གསང་བའི་རྒྱུད་མངས་ལས་ཤར་བ། །ཐོས་པས་རྣམ་གྲོལ་ཡིད་བཞིན་འཁོར་ལོ་དེ་དྲན་བྱུང་། །འགགས་མེད་རྡོ་རྗེ་ནཱ་དའི་དངོས་གྲུབ་ཅིག་སྩོལ་དང་། །ཏུཏྟཱ་རེ་ཞེས་གཟུང་འཛིན་གདུང་བ་ལས་སྐྱོབ་པའི། །ཤེས་རབ་ཕ་རོལ་ཕྱིན་མའི་ཡེ་ཤེས་ཀྱི་སྣང་བ། །དྲན་པས་མཆོག་སྟེར་ཡིད་བཞིན་འཁོར་ལོ་དེ་དྲན་བྱུང་། །འཁྲུལ་མེད་འོད་གསལ་སྙིང་པོའི་དངོས་གྲུབ་ཅིག་སྩོལ་དང་། །ཏུ་རེ་གློག་ལྟར་མྱུར་བའི་ཐུགས་རྗེ་ཡི་ལང་ཚོ། །སྤངས་རྟོགས་བྱེ་བས་སྒེག་པའི་བདེ་ཆེན་གྱི་དགའ་མ། །དོན་གཉིས་ཆར་འབེབས་ཡིད་བཞིན་འཁོར་ལོ་དེ་དྲན་བྱུང་། །རྩོལ་མེད་ཡོན་ཏན་མཐའ་ཡས་དངོས་གྲུབ་ཅིག་སྩོལ་དང་། །སྭཱ་ཧཱ་དགེ་ལེགས་དངོས་ཀུན་ཇི་བཞིན་དུ་སྦྱིན་པའི། །ཞི་རྒྱས་དབང་དྲག་མཆོག་གི་སྒྱུ་འཕྲུལ་གྱི་གཟི་བརྗིད། །སྲིད་ཞི་ཀུན་ཁྱབ་ཡིད་བཞིན་འཁོར་ལོ་དེ་དྲན་བྱུང་། །ཐོགས་མེད་ཕྲིན་ལས་འདོད་དགུའི་དངོས་གྲུབ་ཅིག་སྩོལ་དང་། །བསྟན་འཛིན་མཆོག་རྣམས་ཞབས་པད་བསྐལ་བརྒྱ་རུ་རྟག་ཅིང་། །བཤད་སྒྲུབ་ལས་གསུམ་སྣང་བས་ས་ཆེན་ཀུན་ཁྱབ་སྟེ། །ཆོས་ལྡན་རྒྱལ་བློན་འབངས་བཅས་དགེ་བཅུ་ལ་སྤྱོད་བཞིན། །བསམ་དོན་ལྷུན་གྱིས་གྲུབ་པའི་དངོས་གྲུབ་ཅིག་སྩོལ་དང་། །མཁའ་ལ་ཡེ་ཤེས་ལྔ་ལྡན་འཇའ་སྤྲིན་དུ་འཁྲིགས་ཤིང་། །བར་སྣང་དགེ་ལེགས་མེ་ཏོག་ཆར་ཟིལ་དུ་འབེབས་པས། །ས་སྟེང་སྐྱེ་དགུ་བདེ་སྐྱིད་བཀྲ་ཤིས་ཀྱི་རྒྱངས་གླུས། །འཇིག་རྟེན་ཀུན་ཏུ་དགེ་བའི་སྨོན་ལམ་ཞིག་ཞུའོ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་འཕགས་མ་ཡིད་བཞིན་ཟླ་བའི་སྒྲུབ་མཆོད་ཀྱི་སྐབས་གསང་བ་བསམ་གྱིས་མི་ཁྱབ་པ་རྗེས་སུ་དྲན་པའི་ཚུལ་གྱིས་གསོལ་བ་འདེབས་པའི་ངག་གི་གླིང་བུ་གང་ཤར་ཡིད་ཀྱི་སོར་མོས་བསྒྲེངས་པ་སྟེ་དགེ་ལེགས་ཀྱི་སྣང་བ་འཇིག་རྟེན་ཀུན་ཏུ་ཁྱབ་ཅིང་རྟག་པར་གྱུར་ཅིག ། ༈

[edit]

sgrol ma yid bzhin 'khor lo'i gsang ba bsam gyis mi khyab pa rjes su dran pa'i glu 'chi med rtag pa dam pa'i dbyangs snyan/ rje btsun sgrol ma yid bzhin 'khor lo'i gsang ba bsam gyis mi khyab pa rjes su dran pa'i glu 'chi med rtag pa dam pa'i dbyangs snyan zhes bya ba/__a ho/__oM yig bkra shis bye ba'i dge legs kyi re khA/__/mtshan bzang sku yi cha shas re re la rdzogs pas/__/mthong bas yid 'phrog yid bzhin 'khor lo de dran byung /__/'gyur med rtag pa dam pa'i dngos grub cig stsol dang /__/tA re srid mtsho sgrol ba'i zab rgyas kyi chos kun/__/'phags ma'i gsung gi gsang ba'i rgyud mangs las shar ba/__/thos pas rnam grol yid bzhin 'khor lo de dran byung /__/'gags med rdo rje nA da'i dngos grub cig stsol dang /__/tut+tA re zhes gzung 'dzin gdung ba las skyob pa'i/__/shes rab pha rol phyin ma'i ye shes kyi snang ba/__/dran pas mchog ster yid bzhin 'khor lo de dran byung /__/'khrul med 'od gsal snying po'i dngos grub cig stsol dang /__/tu re glog ltar myur ba'i thugs rje yi lang tsho/__/spangs rtogs bye bas sgeg pa'i bde chen gyi dga' ma/__/don gnyis char 'bebs yid bzhin 'khor lo de dran byung /__/rtsol med yon tan mtha' yas dngos grub cig stsol dang /__/swA hA dge legs dngos kun ji bzhin du sbyin pa'i/__/zhi rgyas dbang drag mchog gi sgyu 'phrul gyi gzi brjid/__/srid zhi kun khyab yid bzhin 'khor lo de dran byung /__/thogs med phrin las 'dod dgu'i dngos grub cig stsol dang /__/bstan 'dzin mchog rnams zhabs pad bskal brgya ru rtag cing /__/bshad sgrub las gsum snang bas sa chen kun khyab ste/__/chos ldan rgyal blon 'bangs bcas dge bcu la spyod bzhin/__/bsam don lhun gyis grub pa'i dngos grub cig stsol dang /__/mkha' la ye shes lnga ldan 'ja' sprin du 'khrigs shing /__/bar snang dge legs me tog char zil du 'bebs pas/__/sa steng skye dgu bde skyid bkra shis kyi rgyangs glus/__/'jig rten kun tu dge ba'i smon lam zhig zhu'o/__/zhes pa'ang mtsho skyes bla ma dgyes pa'i 'bangs pad+ma 'od gsal mdo sngags gling pas 'phags ma yid bzhin zla ba'i sgrub mchod kyi skabs gsang ba bsam gyis mi khyab pa rjes su dran pa'i tshul gyis gsol ba 'debs pa'i ngag gi gling bu gang shar yid kyi sor mos bsgrengs pa ste dge legs kyi snang ba 'jig rten kun tu khyab cing rtag par gyur cig__/__!