མགོན་པོ་ཚེ་དཔག་ཏུ་མེད་པ་ལ་མངོན་པར་འདུད་པའི་རྡོ་རྗེའི་གླུ་འཆི་མེད་རྟག་པའི་རོལ་མོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	mgon po tshe dpag tu med pa la mngon par 'dud pa'i rdo rje'i glu 'chi med rtag pa'i rol mo
Location	mkhyen brtse'i bka' 'bum Volume 23, sde tshan 1, Text 65, Pages 126-128 (Folios 63b4 to 64b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mgon po tshe dpag tu med pa la mngon par 'dud pa'i rdo rje'i glu 'chi med rtag pa'i rol mo. In 'jam dbyangs mkhyen brtse'i dbang po'i bka' 'bum, Vol. 23: 126-128. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་ཟབ་མོ་དགོངས་གཏེར་གྱི་བཀའ་རྒྱ་འགྲོལ་བ་དང་ལྷན་ཅིག་ཏུ་གང་ཤར་གསོལ་བ་བཏབ་པས་འབྲེལ་ཚད་དོན་དང་ལྡན་པར་གྱུར་ཅིག།
	zhes pa'ang mtsho skyes bla ma dgyes pa'i 'bangs pad+ma 'od gsal mdo sngags gling pas zab mo dgongs gter gyi bka' rgya 'grol ba dang lhan cig tu gang shar gsol ba btab pas 'brel tshad don dang ldan par gyur cig

Tibetan Text

Wylie

[edit]

མགོན་པོ་ཚེ་དཔག་ཏུ་མེད་པ་ལ་མངོན་པར་འདུད་པའི་རྡོ་རྗེའི་གླུ་འཆི་མེད་རྟག་པའི་རོལ་མོ་ཞེས་བྱ་བ། ཨ་ཧོ། ཨོཾ་ཡིག་མཆོག་ཏུ་མི་འགྱུར་བདེ་ཆེན་གྱི་ཡེ་ཤེས། །རྣམ་ཀུན་སྟོང་པའི་གཟུགས་བརྙན་ཟུང་འཇུག་ཏུ་སྣང་བ། །སྐུ་ཡི་རྡོ་རྗེ་ཚེ་དཔག་མེད་མགོན་ལ་འདུད་དོ། །རྩ་ཁམས་ལྷ་སྐུར་དག་པའི་དངོས་གྲུབ་ཅིག་སྩོལ་དང་། །ཨ་མཱ་ར་ཎི་འཆི་མེད་རྟག་པ་ཡི་དབྱངས་སྙན། །བརྒྱད་ཁྲི་བཞི་སྟོང་ཆོས་ཚུལ་རྒྱ་མཚོ་རུ་ཤར་བ། །གསུང་གི་རྡོ་རྗེ་ཚེ་དཔག་མེད་མགོན་ལ་འདུད་དོ། །ལས་རླུང་སྔགས་སུ་རྫོགས་པའི་དངོས་གྲུབ་ཅིག་སྩོལ་དང་། །ཛཱི་བནྟི་ཞེས་འཕོ་མེད་གཉུག་མ་ཡི་འཚོ་བ། །བརྟན་གཡོ་སྲིད་ཞི་ཀུན་གྱི་ཁྱབ་བྱེད་དུ་རོལ་པ། །ཐུགས་ཀྱི་རྡོ་རྗེ་ཚེ་དཔག་མེད་མགོན་ལ་འདུད་དོ། །ཐིག་ལེ་བདེ་བར་སྨིན་པའི་དངོས་གྲུབ་ཅིག་སྩོལ་དང་། །ཡེ་ཞེས་གང་ལ་དགོངས་པའི་སྐལ་བཟང་གི་ཚོགས་ཀུན། །ཡིད་བཞིན་འདོད་པ་འཇོ་བའི་དཔག་བསམ་གྱི་ཤིང་ཆེན། །ཡོན་ཏན་རྡོ་རྗེ་ཚེ་དཔག་མེད་མགོན་ལ་འདུད་དོ། །སྤངས་རྟོགས་རྩལ་ཆེན་རྫོགས་པའི་དངོས་གྲུབ་ཅིག་སྩོལ་དང་། །སྭཱ་ཧཱ་མངོན་མཐོ་ངེས་ལེགས་གྲུབ་པ་ཡི་ད པལ་ཀུན། །གང་འདུལ་ཅིར་ཡང་སྦྱིན་པའི་སྒྱུ་འཕྲུལ་དུ་འཆར་བ། །ཕྲིན་ལས་རྡོ་རྗེ་ཚེ་དཔག་མེད་མགོན་ལ་འདུད་དོ། །གཞན་ཕན་མཁའ་ཁྱབ་རྟག་པའི་དངོས་གྲུབ་ཅིག་སྩོལ་དང་། །ཕུན་སུམ་ཚོགས་པ་ལྔ་ལྡན་འོག་མིན་གྱི་ཞིང་ལྟར། །ཁྱབ་བདག་བླ་མ་ཞབས་པད་བསྐལ་བརྒྱ་རུ་བརྟན་ཅིང་། །ཐེག་མཆོག་འདུས་པའི་ཚོགས་ལ་སྨིན་གྲོལ་གྱི་བདུད་རྩིས། །གྲུབ་གཉིས་པདྨོ་རྒྱས་པའི་དངོས་གྲུབ་ཅིག་སྩོལ་དང་། །འཕགས་པའི་དགེ་འདུན་བྱེ་བས་ས་ཆེན་ཀུན་ཁྱབ་ཅིང་། །བཤད་སྒྲུབ་ལས་ཀྱི་སྣང་བ་སྲིད་མཐའ་རུ་རྟག་པས། །འགྲོ་རྣམས་རྫོགས་ལྡན་གསར་པའི་དུས་སྟོན་ལ་སྤྱོད་བཞིན། །སྐུ་གསུམ་ལྷུན་གྱིས་གྲུབ་པའི་སྨོན་ལམ་ཞིག་ཞུའོ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་ཟབ་མོ་དགོངས་གཏེར་གྱི་བཀའ་རྒྱ་འགྲོལ་བ་དང་ལྷན་ཅིག་ཏུ་གང་ཤར་གསོལ་བ་བཏབ་པས་འབྲེལ་ཚད་དོན་དང་ལྡན་པར་གྱུར་ཅིག། ། ༈

[edit]

mgon po tshe dpag tu med pa la mngon par 'dud pa'i rdo rje'i glu 'chi med rtag pa'i rol mo/ mgon po tshe dpag tu med pa la mngon par 'dud pa'i rdo rje'i glu 'chi med rtag pa'i rol mo zhes bya ba/__a ho/__oM yig mchog tu mi 'gyur bde chen gyi ye shes/__/rnam kun stong pa'i gzugs brnyan zung 'jug tu snang ba/__/sku yi rdo rje tshe dpag med mgon la 'dud do/__/rtsa khams lha skur dag pa'i dngos grub cig stsol dang /__/a mA ra Ni 'chi med rtag pa yi dbyangs snyan/__/brgyad khri bzhi stong chos tshul rgya mtsho ru shar ba/__/gsung gi rdo rje tshe dpag med mgon la 'dud do/__/las rlung sngags su rdzogs pa'i dngos grub cig stsol dang /__/dzI ban+ti zhes 'pho med gnyug ma yi 'tsho ba/__/brtan g.yo srid zhi kun gyi khyab byed du rol pa/__/thugs kyi rdo rje tshe dpag med mgon la 'dud do/__/thig le bde bar smin pa'i dngos grub cig stsol dang /__/ye zhes gang la dgongs pa'i skal bzang gi tshogs kun/__/yid bzhin 'dod pa 'jo ba'i dpag bsam gyi shing chen/__/yon tan rdo rje tshe dpag med mgon la 'dud do/__/spangs rtogs rtsal chen rdzogs pa'i dngos grub cig stsol dang /__/swA hA mngon mtho nges legs grub pa yi da_pal kun/__/gang 'dul cir yang sbyin pa'i sgyu 'phrul du 'char ba/__/phrin las rdo rje tshe dpag med mgon la 'dud do/__/gzhan phan mkha' khyab rtag pa'i dngos grub cig stsol dang /__/phun sum tshogs pa lnga ldan 'og min gyi zhing ltar/__/khyab bdag bla ma zhabs pad bskal brgya ru brtan cing /__/theg mchog 'dus pa'i tshogs la smin grol gyi bdud rtsis/__/grub gnyis pad+mo rgyas pa'i dngos grub cig stsol dang /__/'phags pa'i dge 'dun bye bas sa chen kun khyab cing /__/bshad sgrub las kyi snang ba srid mtha' ru rtag pas/__/'gro rnams rdzogs ldan gsar pa'i dus ston la spyod bzhin/__/sku gsum lhun gyis grub pa'i smon lam zhig zhu'o/__/zhes pa'ang mtsho skyes bla ma dgyes pa'i 'bangs pad+ma 'od gsal mdo sngags gling pas zab mo dgongs gter gyi bka' rgya 'grol ba dang lhan cig tu gang shar gsol ba btab pas 'brel tshad don dang ldan par gyur cig/__/__!_