JKW-KABUM-13-PA-023-026

🚧 This website is under continued development. We appreciate your patience!

Previous Text Back to Volume PageLast text in section.

སིནྡྷུ་རའི་སྒྲུབ་པ་མཁའ་སྤྱོད་གྲུབ་སྟེར།

Wylie title	sin+d+hu ra'i sgrub pa mkha' spyod grub ster
Location	mkhyen brtse'i bka' 'bum Volume 13, sde tshan 23, Text 26, Pages 626-632 (Folios 82b5 to 85b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཉང་རལ་ཉི་མ་འོད་ཟེར་ (nyang ral nyi ma 'od zer)
Citation	'jam dbyangs mkhyen brtse'i dbang po. sin+d+hu ra'i sgrub pa mkha' spyod grub ster. In 'jam dbyangs mkhyen brtse'i dbang po'i bka' 'bum, Vol. 13: 626-632. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Offering Rituals - mchod sbyin
RTZ	In the Rinchen Terdzö: https://rtz.tsadra.org/index.php/Terdzo-THI-031
Colophon	ཅེས་ཉང་གཏེར་མཁའ་འགྲོ་ཆེན་མོའི་གཞུང་སོགས་ལས་ཉེར་མཁོ་སྙིང་པོར་དྲིལ་བ་དགེ། །ཤུ་བྷཾ།། སརྦ་དཱ་མངྒ་ལཾ་བྷ་བ་ཏུ
	ces nyang gter mkha' 'gro chen mo'i gzhung sogs las nyer mkho snying por dril ba dge/__/shu b+haM//__sarba dA mang+ga laM b+ha ba tu

1 Texts in this Section (sde tshan or chos tshan)

26 626-632	སིནྡྷུ་རའི་སྒྲུབ་པ་མཁའ་སྤྱོད་གྲུབ་སྟེར། sin+d+hu ra'i sgrub pa mkha' spyod grub ster Ritual and Liturgical Texts - cho ga phyag len   ·   Offering Rituals - mchod sbyin	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །སིནྡྷཱུ་རའི་སྒྲུབ་པའི་མན་ངག་མཁའ་སྤྱོད་གྲུབ་སྟེར་ཞེས་བྱ་བ་བཞུགས་སོ། །ཨོཾ་སྭ་སྟི། །བདེ་ཆེན་སིནྡྷཱུ་བཱ་རའི་གཟི། །གང་དུ་སྣང་བས་ལྷན་སྐྱེས་ཀྱི། །ཡེ་ཤེས་སྟེར་མཛད་རྣལ་འབྱོར་མར། །བཏུད་ནས་དེ་ཡི་མན་ངག་འབྲི། །འདི་ལ་གསུམ། ཡོ་བྱད་ཀྱི་ཤོམས། སྒྲུབ་པའི་ཐབས། གྲུབ་པའི་འབྲས་བུའོ། །དང་པོ་ནི། །ཏི་སེ་དང་། ཙཱ་རི་སོགས་གྲུབ་པའི་གནས་ཆེན་ནས་འབྱུང་བའི་སིནྡྷཱུ་ར་ལ་གཞི་བྱས་ཏེ། གཞན་ཡང་རང་བྱུང་གི་སིནྡྷཱུ་ར་ཇི་ལྟར་རིགས་པ་བདུད་རྩི་དང་བཅས་པའི་མ་ད་ནས་སྦོལ་བ་ཐོད་པའི་སྣོད་དུ་བླུགས་པ་སྟེགས་བུའི་དབུས་སུ་མཉྫིའི་ཁར་བཞག་པ་དང་དར་དམར་གྱིས་ཁ་བཅད། སྟེང་ནས་དར་དམར་གྱི་གུར་དང་། མཐར་མཆོད་གཏོར་གྱིས་བསྐོར། གཉིས་པ་ནི། ཞལ་གཉིས་མ་དང་ཁྲོས་ནག་ལྟ་བུ་ཕག་མོའི་བདག་བསྐྱེད་རིགས་གང་རུང་བཟླས་པ་བཅས་སྔོན་དུ་འགྲོ་བས། བདུད་རྩིས་སྒྲུབ་པ། སྐྱིལ་བ་དབབ་པ། དངོས་གྲུབ་བླང་བ་རྣམས་སོ། །དང་པོ་ནི། མདུན་རྟེན་བསང་སྦྱང་། སྟོང་པའི་ངང་ལས་ཡྃ་རྃ་ཀྃ་ཡིག་ལས། །རླུང་མེ་ཐོད་པའི་སྒྱེད་པུ་གསུམ་གྱི་སྟེང་། །ཨ་ལས་བྱུང་བའི་ཡེ་ཤེས་ཀ་པཱ་ལ། །ཡངས་ཤིང་རྒྱ་ཆེ་མཚན་ཉིད་ཀུན་རྫོགས་པའི། །དབུས་སུ་ཨ་ལས་དྲི་ཆེན་ཨ་ཡིས་མཚན། །ཤར་དུཀྵ་ལས་བྱང་སེམས་དཀར་པོ་ཀྵ། །ལྷོ་རུ་མ་ལས་རཀྟ་མ་ཡིས་མཚན། །ནུབ་ཏུ་བི་ལས་དྲི་ཆུར་བི་ཡིག་དང་། །བྱང་དུ་མ་ལས་རྐང་མར་མས་མཚན་པ། །ཤར་ལྷོ་ནས་བརྩམས་ན་དང་དྷ་ཡིག་དང་། །གྷ་དང་ཀུ་ཡིག་ཡོངས་གྱུར་ཤ་ཆེན་པོ། །གླང་ཆེན་རྟ་དང་ཁྱི་ཡི་ཤ་རྣམས་ལ། །རང་རང་ཡི་གེས་མཚན་པའི་ཁ་ཆོད་ནི། །ཧཱུྃ་ལས་རྡོ་རྗེ་རྒྱ་གྲམ་ཧཱུྃ་གིས་མཚན། །རང་གི་ཐུགས་སྲོག་ལས་བྱུང་འོད་ཟེར་གྱིས། །རླུང་གཡོས་མེ་སྦར་ཐོད་པའི་རྫས་རྣམས་ཀུན། །ཞུ་ཞིང་ཁོལ་བས་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ་སརྦ་པཉྩ་ཨ་མྲྀཏ་ཧཱུྃ་ཧྲཱིཿཋ༔ ཞེས་ཅི་ནུས་སུ་བཟླའོ། །གཉིས་པ་ནི། ཧཱུྃ༔ ཐོད་པ་རིན་ཆེན་སྣོད་ཀྱི་མཆོག༔ སྨན་ལྔ་བདུད་རྩི་ལྔ་དང་ཤ་ཆེན་རྣམ་པ་ལྔ༔ རིགས་ལྔ་ཡེ་ཤེས་ལྔ་ཡི་མཆོད་པའི་རྫས༔ བདུད་རྩི་ཆེན་པོར་བྱིན་གྱིས་བརླབས་ནས་ཀྱང་༔ དུས་གསུམ་བདེ་གཤེགས་ཐམས་ཅད་མཆོད་པའི་རྫས༔ མ་མོ་མཁའ་འགྲོ་བསྟེན་ཅིང་མཆོད་པའི་རྫས༔ དམ་རྫས་བདུད་རྩི་པཉྩ་ཨ་མྲྀ་ཏ༔ མུ་ཏིག་དཀར་པོ་དྲི་མེད་བྱང་ཆུབ་སེམས༔ སྨན་གྱི་དམ་པ་འཆི་མེད་བདུད་རྩིའི་མཆོག༔ དཀར་གསལ་འོད་ཟེར་སྣ་ལྔ་རབ་འཁྲུགས་པ༔ ཡེ་ཤེས་བདུད་རྩི་རྒྱ་མཚོ་ཆེན་པོར་འཁྱིལ༔ ཨོཾ་ཨཱཿཧཱུྃ་སརྦ་པཉྩ་ཨ་མྀ་ཏ་ཧཱུྃ་ཧྲཱིཿཋ༔ ཞེས་བཟླ། གསུམ་པ་ནི། བདུད་རྩིའི་སྟེང་མཁར་འབྲུ་གསུམ་མཚན་པ་ལས། །འོད་འཕྲོས་དཔའ་བོ་ཌཱ་ཀི་རྒྱ་མཚོའི་སྤྲིན། །སྤྱན་དྲངས་སྙོམས་འཇུག་བྱང་སེམས་བདུད་རྩིར་ཐིམ། །འཁོར་འདས་དྭངས་བཅུད་འཆི་མེད་ཐིག་ལེར་གྱུར། །ཨོཾ་ཨཱཿཧཱུྃ་ཧྲཱིཿམ་ཧ་རི་ནི་ས་ར་ཙ་ཧྲི་ཡ་བོདྷི་ཙིཏྟ་ཨཱ་ར་ལླི་ཧོ་ཛཿ ཞེས་བཟླ། ཐུན་བསྡུ་བ་ན། ཐོད་པའི་བདུད་རྩི་ཡོངས་སུ་གྱུར་པ་ལས་དམ་ཚིག་གི་རྫས་མཆོག་སིནྡྷཱུ་རའི་ཕུང་པོ་དངོས་གྲུབ་རྣམ་གཉིས་ཐོགས་པ་མེད་པར་སྟེར་བའི་མཐུ་བྱིན་ཐམས་ཅད་ཡོངས་སུ་རྫོགས་པར་གྱུར། ཅེས་བརྗོད་ཅིང་བསམས་ལ། ཚོགས་དང་གཏོར་མའི་ཆོ་ག་སོགས་ནས་བཟུང་རྗེས་ཀྱི་བྱ་བ་ཐམས་ཅད་བདག་བསྐྱེད་གང་ལ་བརྟེན་པའི་ལས་གཞུང་ལྟར་བྱའོ། །དེ་ལྟར་ཐུན་བཞིའི་རིམ་པས་ཞག་བདུན་སོགས་རྩེ་གཅིག་ཏུ་བསྒྲུབས་པས། རྫས་ལ་འོད་འཕྲོ་བ། དུ་བ་འཐུལ་བ། མང་དུ་འཕེལ་བ་དང་། དངོས་ཉམས་རྨི་ལམ་དུ་མཁའ་འགྲོ་འདུ་བའི་རྟགས་མཐོང་བ་ན། བཞི་པ་དངོས་གྲུབ་བླང་བ་ནི། བདུད་རྩི་དབབ་པ་ཡན་གོང་དུ་སྨོས་ལྟར་བཏང་རྗེས། ཧཱུྃ༔ བདུད་རྩི་ཆེན་པོ་རིགས་ལྔའི་སྐུ༔ དྲི་ཆེན་སངས་རྒྱས་རིགས་ཀྱི་སྐུ༔ བྱང་སེམས་རྡོ་རྗེ་རིགས་ཀྱི་སྐུ༔ ཤ་ཆེན་རིན་ཆེན་རིགས་ཀྱི་སྐུ༔ རཀྟ་པདྨ་རིགས་ཀྱི་སྐུ༔ དྲི་ཆུ་ལས་ཀྱི་རིགས་ཀྱི་སྐུ༔ ཡབ་ལྔ་ཡུམ་ལྔ་བདུད་རྩི་ཆེན་པོ་ལྔ༔ ཡེ་ཤེས་ལྔ་དང་སྐུ་ལྔ་རིགས་ལྔའི་ངང་༔ བདུད་རྩི་ཆེན་པོའི་དངོས་གྲུབ་སྩལ་དུ་གསོལ༔ འགྱུར་བ་མེད་པ་སྐུ་ཡི་དངོས་གྲུབ་སྩོལ༔ འགག་པ་མེད་པ་གསུང་གི་དངོས༴ སྐྱེ་ཤི་མེད་པ་ཐུགས་ཀྱི་དངོས་གྲུབ༴ ཚེ་དབང་ལོངས་སྤྱོད་ཡོན་ཏན༴ འགྲོ་དོན་མཐར་ཕྱིན་ཕྲིན་ལས༴ མི་འགྱུར་རྡོ་རྗེ་རིགས་ཀྱི༴ རང་བྱུང་དེ་བཞིན་རིགས་ཀྱི༴ དགོས་འདོད་རིན་ཆེན་རིགས་ཀྱི༴ ཆགས་མེད་པདྨ་རིགས་ཀྱི༴ དོན་གྲུབ་ལས་ཀྱི་རིགས་ཀྱི་དངོས་གྲུབ་སྩོལ༔ ཨོཾ་ཨཱཿཧཱུྃ་ཧྲཱིཿམ་ཧ་རི་ནི་ས་ར་ཙ་ཧྲི་ཡ་སརྦ་པཉྩ་ཨ་མྲྀཏ་སིདྡྷི་སིདྡྷི་ཧཱུྃ་ཧྲཱིཿཋ༔ ཞེས་བརྗོད་ལ་སིནྡྷཱུ་རའི་སྣོད་སྤྱི་བོ། མགྲིན་པ། སྙིང་ག །ལྟེ་བ་རྣམས་སུ་གཏུགས་ལ། ཀཱ་ཡ་སིདྡྷི་ཨོཾ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ། སརྦ་སིདྡྷི་ཧྲཱིཿ ཞེས་བརྗོད། བདུད་རྩིའི་དྭངས་མ་འོད་ཟེར་དཀར་དམར་མཐིང་གསུམ་གྱི་རྣམ་པར་བྱུང་སྟེ། རང་གི་གནས་རྣམས་སུ་ཐིམ་པར་བསམ། སིནྡྷཱུ་རའི་སྣོད་ཞལ་ཕྱེ། ཀ་པཱ་ལ་ཆང་གིས་བཀང་བར་བསྒྲུབས་པའི་སིནྡྷཱུ་ར་ནས་བླངས་ཏེ་ཅུང་ཟད་བཏབ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ༔ ཞེས་ཉེར་གཅིག་གིས་བདུད་རྩིར་བྱིན་གྱིས་བརླབས་ཏེ། ཀ་པཱ་ལ་ལག་པ་གཡས་པར་ཐོགས། །གཡོན་པའི་མཐེ་བོང་ལ་ཉི་མ་ཨོཾ་གྱིས་མཚན་པ་དང་། སྲིན་ལག་ལ་ཟླ་བ་ཨཱཿ ས་མཚན་པ། ཉི་ཟླ་གའུ་ཁ་སྦྱོར་གྱི་བར་དུ་རྡོ་རྗེ་སྦུ་གུ་ཅན་གྱི་དཀྱིལ་དུ་ཧཱུྃ་ཡིག་གིས་མཚན་པས་བདུད་རྩི་ནས་གཏོར་བས་ནམ་མཁའ་གང་བའི་མཁའ་འགྲོའི་ལྷ་ཚོགས་རྣམས་མཉེས་ཤིང་སྐུ་གསུང་ཐུགས་ཀྱི་དམ་ཚིག་ཉམས་ཆགས་རྣམས་དག །དངོས་གྲུབ་ཐམས་ཅད་ཐོབ་པར་བསམས་ལ། ལས་གཞུང་གང་ལ་བརྟེན་པའི་བདུད་རྩི་ལག་མཆོད་རྒྱས་པར་བྱས་རྗེས། ཐོད་པའི་བདུད་རྩི་ཡོངས་སུ་གྱུར་པ་ལས་ཞེས་སོགས་གོང་ལྟར་བརྗོད་ཅིང་བཀྲ་ཤིས་ཀྱིས་མངའ་གསོལ། །གསུམ་པ་ནི། སློབ་དཔོན་དགའ་རབ་རྡོ་རྗེས། རང་བྱུང་རྫས་མཆོག་སིནྡྷཱུར། །བདུད་རྩི་ཆེན་པོར་བྱིན་རླབས་པ། །དངོས་གྲུབ་ཀུན་གྱི་སྙིང་པོ་སྟེ། །ཐིག་ལེ་བྱས་པས་མཁའ་འགྲོ་འདུ། །ཁོང་དུ་ཟོས་པས་ཡེ་ཤེས་འདུ། །ལུས་ལ་བཅངས་པས་དངོས་གྲུབ་འདུ། །ཞེས་སོགས་རྒྱ་ཆེར་གསུངས་པ་ལྟར། །གྲུབ་པའི་རྫས་དེས་དཔྲལ་བར་ཐིག་ལེ་བགྱིས་བས་མཁའ་འགྲོ་མ་ཐམས་ཅད་ཀྱིས་མས་བུ་གཅིག་པ་ལ་བརྩེ་བ་ལྟར་དགོངས་པར་འགྱུར་རོ། །མེ་ལོངས་ལ་ཆང་དང་སྦྱར་ཏེ་བྱུགས་པ་ནས་འཐོར་བ་དང་། མི་རུང་བ་མ་ཡིན་པའི་འབུར་གྱི་སྐུ་གཟུགས་བཀུར་རུང་བ་རྣམས་དང་། རིགས་ལྡན་མ་ལ་སོགས་པའི་ཤེས་རབས་རྣམས་ཡེ་ཤེས་ཀྱི་མཁའ་འགྲོ་མར་མོས་ཏེ། སིནྡྷཱུརའི་ཐིག་ལེ་བཏབ་ནས་མཆོད་པར་བྱས་ན་གང་འདོད་པའི་དོན་འགྲུབ་པར་འགྱུར་རོ། །བུད་མེད་ཀྱི་འདོམས་དཀྲིས་ཟླ་མཚན་ཅན་གྱི་སྒྱེ་འུར་བླུགས་ཏེ། མེ་ལོང་ལ་བརྡབས་པར་ཆོས་འབྱུང་དང་རྩ་སྔགས་བྲིས་པའི་དཀྱིལ་འཁོར་གྱིས་གསུམ་པའི་དབང་བསྐུར་དང་འབྲེལ་བར་དབང་བསྐུར་བས་ཕོ་ཉའི་ལམ་བསྒོམ་པ་ལ་དབང་བར་བྱེད་ཅིང་། དོན་དམ་འོད་གསལ་གྱི་རྫོགས་རིམ་གྱི་རྟོགས་པ་སྐྱེ་བའི་རྒྱུད་སྨིན་བྱེད་དུ་འགྱུར་ལ་ཐུགས་རྡོ་རྗེ་འགྲུབ་པར་འགྱུར་རོ། །རྡུལ་གྱིས་སྦགས་པའི་རས་སམ་དར་རས་དམར་སྨུག་གི་ཁུག་མར་བླུགས་ཏེ་མགུལ་ལམ་མཆན་དུ་བཏགས་ན་མཁའ་འགྲོ་མ་ལུས་དང་གྲིབ་མ་བཞིན་དུ་འགྲོགས་ཏེ་ཕྲིན་ལས་རྣམ་པ་བཞི་ལྷུན་གྱིས་གྲུབ་པར་འགྱུར་རོ། །གནས་གསུམ་མཁའ་འགྲོ་འདུ་བའི་རྫས། །སྒྲུབ་ཚུལ་སྙིང་པོར་དྲིལ་བའི་དགེས། །མཁའ་སྤྱོད་གྲུབ་པ་མཆོག་སྟེར་བའི། །དགེ་མཚན་རྟག་ཏུ་གང་གྱུར་ཅིང་། །ཅེས་ཉང་གཏེར་མཁའ་འགྲོ་ཆེན་མོའི་གཞུང་སོགས་ལས་ཉེར་མཁོ་སྙིང་པོར་དྲིལ་བ་དགེ། །ཤུ་བྷཾ།། སརྦ་དཱ་མངྒ་ལཾ་བྷ་བ་ཏུ།། །།

[edit]

sin+d+hu ra'i sgrub pa mkha' spyod grub ster/ @#/_/sin+d+hU ra'i sgrub pa'i man ngag mkha' spyod grub ster zhes bya ba bzhugs so/__/oM swa sti/__/bde chen sin+d+hU bA ra'i gzi/__/gang du snang bas lhan skyes kyi/__/ye shes ster mdzad rnal 'byor mar/__/btud nas de yi man ngag 'bri/__/'di la gsum/__yo byad kyi shoms/__sgrub pa'i thabs/__grub pa'i 'bras bu'o/__/dang po ni/__/ti se dang /__tsA ri sogs grub pa'i gnas chen nas 'byung ba'i sin+d+hU ra la gzhi byas te/__gzhan yang rang byung gi sin+d+hU ra ji ltar rigs pa bdud rtsi dang bcas pa'i ma da nas sbol ba thod pa'i snod du blugs pa stegs bu'i dbus su many+dzi'i khar bzhag pa dang dar dmar gyis kha bcad/__steng nas dar dmar gyi gur dang /__mthar mchod gtor gyis bskor/__gnyis pa ni/__zhal gnyis ma dang khros nag lta bu phag mo'i bdag bskyed rigs gang rung bzlas pa bcas sngon du 'gro bas/__bdud rtsis sgrub pa/__skyil ba dbab pa/__dngos grub blang ba rnams so/__/dang po ni/__mdun rten bsang sbyang /__stong pa'i ngang las ya~M ra~M ka~M yig las/__/rlung me thod pa'i sgyed pu gsum gyi steng /__/a las byung ba'i ye shes ka pA la/__/yangs shing rgya che mtshan nyid kun rdzogs pa'i/__/dbus su a las dri chen a yis mtshan/__/shar duk+Sha las byang sems dkar po k+Sha/__/lho ru ma las rak+ta ma yis mtshan/__/nub tu bi las dri chur bi yig dang /__/byang du ma las rkang mar mas mtshan pa/__/shar lho nas brtsams na dang d+ha yig dang /__/g+ha dang ku yig yongs gyur sha chen po/__/glang chen rta dang khyi yi sha rnams la/__/rang rang yi ges mtshan pa'i kha chod ni/__/hU~M las rdo rje rgya gram hU~M gis mtshan/__/rang gi thugs srog las byung 'od zer gyis/__/rlung g.yos me sbar thod pa'i rdzas rnams kun/__/zhu zhing khol bas bdud rtsi'i rgya mtshor gyur/__/oM AHhU~M sarba pany+tsa a mr-ita hU~M hrIHTha:__zhes ci nus su bzla'o/__/gnyis pa ni/__hU~M:__thod pa rin chen snod kyi mchog:__sman lnga bdud rtsi lnga dang sha chen rnam pa lnga:__rigs lnga ye shes lnga yi mchod pa'i rdzas:__bdud rtsi chen por byin gyis brlabs nas kyang :__dus gsum bde gshegs thams cad mchod pa'i rdzas:__ma mo mkha' 'gro bsten cing mchod pa'i rdzas:__dam rdzas bdud rtsi pany+tsa a mr-i ta:__mu tig dkar po dri med byang chub sems:__sman gyi dam pa 'chi med bdud rtsi'i mchog:__dkar gsal 'od zer sna lnga rab 'khrugs pa:__ye shes bdud rtsi rgya mtsho chen por 'khyil:__oM AHhU~M sarba pany+tsa a m-i ta hU~M hrIHTha:__zhes bzla/__gsum pa ni/__bdud rtsi'i steng mkhar 'bru gsum mtshan pa las/__/'od 'phros dpa' bo DA ki rgya mtsho'i sprin/__/spyan drangs snyoms 'jug byang sems bdud rtsir thim/__/'khor 'das dwangs bcud 'chi med thig ler gyur/__/oM AHhU~M hrIHma ha ri ni sa ra tsa hri ya bod+hi tsit+ta A ra l+li ho dzaH__zhes bzla/__thun bsdu ba na/__thod pa'i bdud rtsi yongs su gyur pa las dam tshig gi rdzas mchog sin+d+hU ra'i phung po dngos grub rnam gnyis thogs pa med par ster ba'i mthu byin thams cad yongs su rdzogs par gyur/__ces brjod cing bsams la/__tshogs dang gtor ma'i cho ga sogs nas bzung rjes kyi bya ba thams cad bdag bskyed gang la brten pa'i las gzhung ltar bya'o/__/de ltar thun bzhi'i rim pas zhag bdun sogs rtse gcig tu bsgrubs pas/__rdzas la 'od 'phro ba/__du ba 'thul ba/__mang du 'phel ba dang /__dngos nyams rmi lam du mkha' 'gro 'du ba'i rtags mthong ba na/__bzhi pa dngos grub blang ba ni/__bdud rtsi dbab pa yan gong du smos ltar btang rjes/__hU~M:__bdud rtsi chen po rigs lnga'i sku:__dri chen sangs rgyas rigs kyi sku:__byang sems rdo rje rigs kyi sku:__sha chen rin chen rigs kyi sku:__rak+ta pad+ma rigs kyi sku:__dri chu las kyi rigs kyi sku:__yab lnga yum lnga bdud rtsi chen po lnga:__ye shes lnga dang sku lnga rigs lnga'i ngang :__bdud rtsi chen po'i dngos grub stsal du gsol:__'gyur ba med pa sku yi dngos grub stsol:__'gag pa med pa gsung gi dngos=__skye shi med pa thugs kyi dngos grub=__tshe dbang longs spyod yon tan=__'gro don mthar phyin phrin las=__mi 'gyur rdo rje rigs kyi=__rang byung de bzhin rigs kyi=__dgos 'dod rin chen rigs kyi=__chags med pad+ma rigs kyi=__don grub las kyi rigs kyi dngos grub stsol:__oM AHhU~M hrIHma ha ri ni sa ra tsa hri ya sarba pany+tsa a mr-ita sid+d+hi sid+d+hi hU~M hrIHTha:__zhes brjod la sin+d+hU ra'i snod spyi bo/__mgrin pa/__snying ga__/lte ba rnams su gtugs la/__kA ya sid+d+hi oM/__wA ka sid+d+hi AH__tsit+ta sid+d+hi hU~M/__sarba sid+d+hi hrIH__zhes brjod/__bdud rtsi'i dwangs ma 'od zer dkar dmar mthing gsum gyi rnam par byung ste/__rang gi gnas rnams su thim par bsam/__sin+d+hU ra'i snod zhal phye/__ka pA la chang gis bkang bar bsgrubs pa'i sin+d+hU ra nas blangs te cung zad btab/__oM AHhU~M sarba pany+tsa a mr-i ta hU~M hrIHTha:__zhes nyer gcig gis bdud rtsir byin gyis brlabs te/__ka pA la lag pa g.yas par thogs/__/g.yon pa'i mthe bong la nyi ma oM gyis mtshan pa dang /__srin lag la zla ba AH_sa mtshan pa/__nyi zla ga'u kha sbyor gyi bar du rdo rje sbu gu can gyi dkyil du hU~M yig gis mtshan pas bdud rtsi nas gtor bas nam mkha' gang ba'i mkha' 'gro'i lha tshogs rnams mnyes shing sku gsung thugs kyi dam tshig nyams chags rnams dag__/dngos grub thams cad thob par bsams la/__las gzhung gang la brten pa'i bdud rtsi lag mchod rgyas par byas rjes/__thod pa'i bdud rtsi yongs su gyur pa las zhes sogs gong ltar brjod cing bkra shis kyis mnga' gsol/__/gsum pa ni/__slob dpon dga' rab rdo rjes/__rang byung rdzas mchog sin+d+hUr/__/bdud rtsi chen por byin rlabs pa/__/dngos grub kun gyi snying po ste/__/thig le byas pas mkha' 'gro 'du/__/khong du zos pas ye shes 'du/__/lus la bcangs pas dngos grub 'du/__/zhes sogs rgya cher gsungs pa ltar/__/grub pa'i rdzas des dpral bar thig le bgyis bas mkha' 'gro ma thams cad kyis mas bu gcig pa la brtse ba ltar dgongs par 'gyur ro/__/me longs la chang dang sbyar te byugs pa nas 'thor ba dang /__mi rung ba ma yin pa'i 'bur gyi sku gzugs bkur rung ba rnams dang /__rigs ldan ma la sogs pa'i shes rabs rnams ye shes kyi mkha' 'gro mar mos te/__sin+d+hUra'i thig le btab nas mchod par byas na gang 'dod pa'i don 'grub par 'gyur ro/__/bud med kyi 'doms dkris zla mtshan can gyi sgye 'ur blugs te/__me long la brdabs par chos 'byung dang rtsa sngags bris pa'i dkyil 'khor gyis gsum pa'i dbang bskur dang 'brel bar dbang bskur bas pho nya'i lam bsgom pa la dbang bar byed cing /__don dam 'od gsal gyi rdzogs rim gyi rtogs pa skye ba'i rgyud smin byed du 'gyur la thugs rdo rje 'grub par 'gyur ro/__/rdul gyis sbags pa'i ras sam dar ras dmar smug gi khug mar blugs te mgul lam mchan du btags na mkha' 'gro ma lus dang grib ma bzhin du 'grogs te phrin las rnam pa bzhi lhun gyis grub par 'gyur ro/__/gnas gsum mkha' 'gro 'du ba'i rdzas/__/sgrub tshul snying por dril ba'i dges/__/mkha' spyod grub pa mchog ster ba'i/__/dge mtshan rtag tu gang gyur cing /__/ces nyang gter mkha' 'gro chen mo'i gzhung sogs las nyer mkho snying por dril ba dge/__/shu b+haM//__sarba dA mang+ga laM b+ha ba tu//__//