JKCL-KABUM-12-NA-077

🚧 This website is under continued development. We appreciate your patience!

Previous Text Back to Volume PageNext Text

བར་དོའི་སྨོན་ལམ་དྲན་པའི་གསོས་འདེབས་འཁྲུལ་སྣང་གདུང་སེལ།

Wylie title	bar do'i smon lam dran pa'i gsos 'debs 'khrul snang gdung sel
Location	chos kyi blo gros bka' 'bum Volume 12, Text 77, Pages 347-349 (Folios 1a1 to 2a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bar do'i smon lam dran pa'i gsos 'debs 'khrul snang gdung sel. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 347-349. Bir, H.P.: Khyentse Labrang, 2012.
Genre	Prayers - smon lam
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/bardo-aspiration
Colophon	།ཅེས་པའང་དགེ་སློང་ངག་དབང་དཔལ་འབྱོར་ནས་གསུང་བསྐུལ་ངོར་ཆོས་ཀྱི་བློ་གྲོས་པས་བྲིས་པའོ།།
	/ces pa'ang dge slong ngag dbang dpal 'byor nas gsung bskul ngor chos kyi blo gros pas bris pa'o//

1 Texts in this Section (sde tshan or chos tshan)

347-349	བར་དོའི་སྨོན་ལམ་དྲན་པའི་གསོས་འདེབས་འཁྲུལ་སྣང་གདུང་སེལ། bar do'i smon lam dran pa'i gsos 'debs 'khrul snang gdung sel Prayers - smon lam	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

བར་དོའི་སྨོན་ལམ་དྲན་པའི་གསོས་འདེབས་འཁྲུལ་སྣང་གདུང་སེལ་ཞེས་བྱ་བ་བཞུགས་སོ། །དཔལ་ལྡན་བླ་མ་རྒྱལ་བ་སྲས་དང་བཅས་པ་རྣམས་ཀྱི་ཞབས་ལ་ཕྱག་འཚལ་ལོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་ཞིང་འདི་ཕྱི་བར་དོའི་འཁྲུལ་སྣང་འཇིགས་སྐྲག་ཐམས་ཅད་ལས་དབུགས་དབྱུང་ཞིང་བར་དོ་རང་ངོ་ཤེས་པ་དང་། དག་པའི་ཞིང་དུ་འདྲེན་པར་བྱིན་གྱིས་བརླབ་ཏུ་གསོལ། །སྲིད་པའི་ཚ་གདུང་ཀུན་ལས་སྐྱོབ་མཛད་ཅིང་། །དྲན་པ་ཙམ་གྱིས་ངན་སོང་སྒོ་འགེགས་པ། །ཐར་པའི་ལམ་སྟོན་དྲིན་ཅན་ཆོས་ཀྱི་རྗེ། །འདྲེན་མཆོག་སྐྱབས་ཀུན་འདུས་ཞལ་ཆེན་པོ་མཁྱེན། །བདག་ཅག་རྩེ་གཅིག་མོས་གུས་ཤུགས་དྲག་པོས། །ཁ་ཞེ་ངོས་ལྐོག་མེད་པར་གསོལ་འདེབས་ན། །འདི་ཕྱི་བར་དོ་ཀུན་ཏུ་ཐུགས་རྗེས་གཟིགས། །བསླུ་མེད་སྐྱབས་ཀྱི་སྙིང་པོ་བླ་མ་མཁྱེན། །འཆི་བའི་ཚེ་ན་གནད་གཅོད་མི་འབྱུང་ཞིང་། །ཤེས་པ་རང་ས་ཟིན་ཅིང་བླ་མ་ལ། །དད་མོས་གདུང་བས་གསོལ་བ་འདེབས་བཞིན་དུ། །འཆི་ཁའི་གདམས་པ་ལམ་དུ་ལོངས་པར་ཤོག །དེ་ལྟར་མཉམ་རྗེས་ཀུན་ཏུ་དྲན་ཤེས་ཀྱི། །ལྕགས་ཀྱུས་བཟུང་ནས་འཁྲུལ་སྣང་འདི་དག་རྣམས། །བར་དོའི་སྣང་བ་ཡིན་པའི་འདུ་ཤེས་ཀྱིས། །སྐྱེ་ཤི་བར་དོ་ལམ་དུ་ཁྱེར་བར་ཤོག །སྣོད་བཅུད་སྣང་བ་ཇི་ལྟར་ཤར་བ་རྣམས། །ཤར་ཡང་བདེན་པས་སྟོང་པའི་རང་བཞིན་དུ། །ཤེས་ནས་ཡི་དམ་ལྷ་དང་ཡེ་ཤེས་སུ། །བསྒྱུར་བས་རྨི་ལམ་བར་དོ་ལམ་བྱེད་ཤོག །ཚེ་འདིའི་སྣང་བ་ནུབ་པར་ཉེ་བ་ན། །རླུང་ལྔ་ཐིམ་ཞིང་འཁོར་ལོ་ལྔ་ཞིག་པས། །ལུས་ཀྱི་སྟོབས་ཉམས་ངག་གི་སྒྲ་མི་གསལ། །དྲན་ཉམས་ཤེས་པ་ཟ་ཟིར་འཕྱོ་བ་དང་། །དབང་ཤེས་ཐིམ་ཞིང་འདོད་ཡོན་རོ་མི་མྱོང་། །དུ་བ་སྨིག་རྒྱུ་མེ་ཁྱེར་མར་མེ་ཡི། །སྣང་བའི་རྟགས་རྣམས་རང་ངོ་ཤེས་པ་དང་། །འདའ་ཀ་གསུམ་གྱི་གདམས་པ་ལམ་བྱེད་ཤོག །ཕྲ་བའི་ཐིམ་རིམ་སྣང་མཆེད་ཐོབ་གསུམ་སྟེ། །འདི་ལྟར་རྣམ་ཤེས་སྣང་བ་ལ་ཐིམ་ཚེ། །དཀར་ཆ་ཐུར་བབ་དཀར་ལམ་འཆར་བ་དང་། །འདོད་ཆགས་ལས་གྱུར་རྟོག་པ་བཞི་བཅུ་འགགས། །དེ་ཚེ་སྣང་བའི་ཡེ་ཤེས་ངོས་ཟིན་ཤོག །དེ་ནས་སྣང་བ་མཆེད་པ་ལ་ཐིམ་ཚེ། །དམར་ཆ་གྱེན་གཡོས་དམར་ལམ་སྣང་བ་འཆར། །ཞེ་སྡང་ལས་གྱུར་རྟོག་པ་སོ་གསུམ་འགགས། །མཆེད་པའི་ཡེ་ཤེས་རང་ངོ་ཤེས་པར་ཤོག །དེ་ནས་དཀར་དམར་བར་དུ་རྣམ་ཤེས་བརྒྱལ། །གཏི་མུག་ལས་གྱུར་རྟོག་པ་བདུན་འགགས་ཏེ། །ནག་ལམ་བརྒྱལ་བར་ཕྱོགས་པ་དེ་ཡི་ཚེ། །ཐོབ་པའི་ཡེ་ཤེས་རང་ངོ་ཟིན་པར་ཤོག །དེ་ནས་ཉེར་ཐོབ་གཞི་ཡི་འོད་གསལ་ནི། །བློ་ཡི་ཡུལ་འདས་སྟོན་གནམ་དྭངས་པ་ལྟར། །འཆར་ཚེ་ལམ་གྱི་འོད་གསལ་བུ་ལྟ་བུ། །གཞི་ཡི་འོད་གསལ་མ་དང་འཕྲད་པར་ཤོག །གལ་ཏེ་དུས་དེར་གོམས་འདྲིས་ཆུང་བ་ཡིས། །རང་ངོ་མ་ཤེས་དེ་ཡི་མོད་ཉིད་ལ། །སྲིད་པ་བར་དོའི་སྣང་བ་ཤར་བ་ན། །འཇིགས་པའི་སྒྲ་བཞི་ཉམ་ངའི་གཡང་ས་གསུམ། །མ་ངེས་རྟགས་དྲུག་སྣོམ་བྱ་ཤར་བའི་ཚེ། །བླ་མ་ལྷ་དང་ལྟ་བ་རྗེས་དྲན་ནས། །དག་པ་མཁའ་སྤྱོད་ཞིང་དུ་སྐྱེ་བར་ཤོག །གལ་ཏེ་སྐྱེ་གནས་འཛིན་པར་གྱུར་ནའང་། །མངལ་སྒོ་ངན་པ་དགག་ཅིང་ཆོས་ལྡན་གྱི། །རྟེན་བཟང་བཙལ་ནས་ཁམས་དྲུག་ལྡན་པའི་ལུས། །ཐོབ་ནས་སྐྱེས་མ་ཐག་པ་དེ་ཉིད་དུ། །དགེ་བའི་བཤེས་དང་མཇལ་ནས་དམ་པའི་ཆོས། །མ་ནོར་ཚུལ་བཞིན་སྤྱོད་པ་ཉིད་གྱུར་ཅིག །མདོར་ན་སྐྱེ་དང་ཚེ་རབས་ཐམས་ཅད་དུ། །རྒྱལ་བས་བསྔགས་པའི་ལམ་ལ་རབ་ཞུགས་ཏེ། །ཐེག་ཆེན་མདོ་སྔགས་ཆོས་ལ་ལོངས་སྤྱོད་ནས། །སྐུ་བཞིའི་འབྲས་བུ་མངོན་དུ་ཐོབ་པར་ཤོག །ཅེས་པའང་དགེ་སློང་ངག་དབང་དཔལ་འབྱོར་ནས་གསུང་བསྐུལ་ངོར་ཆོས་ཀྱི་བློ་གྲོས་པས་བྲིས་པའོ།། །།

[edit]

bar do'i smon lam dran pa'i gsos 'debs 'khrul snang gdung sel zhes bya ba bzhugs so/__/dpal ldan bla ma rgyal ba sras dang bcas pa rnams kyi zhabs la phyag 'tshal lo/__/brtse ba chen pos dus thams cad du rjes su bzung zhing 'di phyi bar do'i 'khrul snang 'jigs skrag thams cad las dbugs dbyung zhing bar do rang ngo shes pa dang /__dag pa'i zhing du 'dren par byin gyis brlab tu gsol/__/srid pa'i tsha gdung kun las skyob mdzad cing /__/dran pa tsam gyis ngan song sgo 'gegs pa/__/thar pa'i lam ston drin can chos kyi rje/__/'dren mchog skyabs kun 'dus zhal chen po mkhyen/__/bdag cag rtse gcig mos gus shugs drag pos/__/kha zhe ngos lkog med par gsol 'debs na/__/'di phyi bar do kun tu thugs rjes gzigs/__/bslu med skyabs kyi snying po bla ma mkhyen/__/'chi ba'i tshe na gnad gcod mi 'byung zhing /__/shes pa rang sa zin cing bla ma la/__/dad mos gdung bas gsol ba 'debs bzhin du/__/'chi kha'i gdams pa lam du longs par shog__/de ltar mnyam rjes kun tu dran shes kyi/__/lcags kyus bzung nas 'khrul snang 'di dag rnams/__/bar do'i snang ba yin pa'i 'du shes kyis/__/skye shi bar do lam du khyer bar shog__/snod bcud snang ba ji ltar shar ba rnams/__/shar yang bden pas stong pa'i rang bzhin du/__/shes nas yi dam lha dang ye shes su/__/bsgyur bas rmi lam bar do lam byed shog__/tshe 'di'i snang ba nub par nye ba na/__/rlung lnga thim zhing 'khor lo lnga zhig pas/__/lus kyi stobs nyams ngag gi sgra mi gsal/__/dran nyams shes pa za zir 'phyo ba dang /__/dbang shes thim zhing 'dod yon ro mi myong /__/du ba smig rgyu me khyer mar me yi/__/snang ba'i rtags rnams rang ngo shes pa dang /__/'da' ka gsum gyi gdams pa lam byed shog__/phra ba'i thim rim snang mched thob gsum ste/__/'di ltar rnam shes snang ba la thim tshe/__/dkar cha thur bab dkar lam 'char ba dang /__/'dod chags las gyur rtog pa bzhi bcu 'gags/__/de tshe snang ba'i ye shes ngos zin shog__/de nas snang ba mched pa la thim tshe/__/dmar cha gyen g.yos dmar lam snang ba 'char/__/zhe sdang las gyur rtog pa so gsum 'gags/__/mched pa'i ye shes rang ngo shes par shog__/de nas dkar dmar bar du rnam shes brgyal/__/gti mug las gyur rtog pa bdun 'gags te/__/nag lam brgyal bar phyogs pa de yi tshe/__/thob pa'i ye shes rang ngo zin par shog__/de nas nyer thob gzhi yi 'od gsal ni/__/blo yi yul 'das ston gnam dwangs pa ltar/__/'char tshe lam gyi 'od gsal bu lta bu/__/gzhi yi 'od gsal ma dang 'phrad par shog__/gal te dus der goms 'dris chung ba yis/__/rang ngo ma shes de yi mod nyid la/__/srid pa bar do'i snang ba shar ba na/__/'jigs pa'i sgra bzhi nyam nga'i g.yang sa gsum/__/ma nges rtags drug snom bya shar ba'i tshe/__/bla ma lha dang lta ba rjes dran nas/__/dag pa mkha' spyod zhing du skye bar shog__/gal te skye gnas 'dzin par gyur na'ang /__/mngal sgo ngan pa dgag cing chos ldan gyi/__/rten bzang btsal nas khams drug ldan pa'i lus/__/thob nas skyes ma thag pa de nyid du/__/dge ba'i bshes dang mjal nas dam pa'i chos/__/ma nor tshul bzhin spyod pa nyid gyur cig__/mdor na skye dang tshe rabs thams cad du/__/rgyal bas bsngags pa'i lam la rab zhugs te/__/theg chen mdo sngags chos la longs spyod nas/__/sku bzhi'i 'bras bu mngon du thob par shog__/ces pa'ang dge slong ngag dbang dpal 'byor nas gsung bskul ngor chos kyi blo gros pas bris pa'o//___//