JKCL-KABUM-03-GA-048

🚧 This website is under continued development. We appreciate your patience!

Previous Text Back to Volume PageNext Text

དཔལ་ལྡན་བླ་མ་འཇམ་མགོན་ཆོས་ཀྱི་རྒྱལ་པོ་ངག་དབང་ལེགས་པ་ལ་བསྟོད་པ་མོས་གུས་ཀྱི་ཏམྦུ་རའི་དབྱངས་སྙན།

Wylie title	dpal ldan bla ma 'jam mgon chos kyi rgyal po ngag dbang legs pa la bstod pa mos gus kyi tam+bu ra'i dbyangs snyan
Location	chos kyi blo gros bka' 'bum Volume 3, Text 48, Pages 177-181 (Folios 1a1 to 3a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	སྒ་སྟོན་ངག་དབང་ལེགས་པ་ (sga ston ngag dbang legs pa)
Citation	'jam dbyangs mkhyen brtse chos kyi blo gros. dpal ldan bla ma 'jam mgon chos kyi rgyal po ngag dbang legs pa la bstod pa mos gus kyi tam+bu ra'i dbyangs snyan. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: 177-181. Bir, H.P.: Khyentse Labrang, 2012.
Genre	Supplications - gsol 'debs  ·  Verses of Praise - bstod pa
Colophon	།ཅེས་པའང་ལྷུན་གྲུབ་སྟེང་གི་ཁྲོ་ངེ་མཁན་མཁྱེན་རབ་བསྟན་འཛིན་ནས་གསུང་བསྐུལ་དང་། རང་གི་དད་པའི་གསོས་སུ་བཀའ་འབངས་ཀྱི་ཐ་ཆུང་འཇམ་དབྱངས་ཆོས་ཀྱི་བློ་གྲོས་པས་གསོལ་བ་བཏབ་པ་སིདྡྷིར་བྷ་ཝནྟུ། དགེའོ།།
	ces pa'ang lhun grub steng gi khro nge mkhan mkhyen rab bstan 'dzin nas gsung bskul dang /__rang gi dad pa'i gsos su bka' 'bangs kyi tha chung 'jam dbyangs chos kyi blo gros pas gsol ba btab pa sid+d+hir b+ha wan+tu/__dge'o//

1 Texts in this Section (sde tshan or chos tshan)

177-181	དཔལ་ལྡན་བླ་མ་འཇམ་མགོན་ཆོས་ཀྱི་རྒྱལ་པོ་ངག་དབང་ལེགས་པ་ལ་བསྟོད་པ་མོས་གུས་ཀྱི་ཏམྦུ་རའི་དབྱངས་སྙན། dpal ldan bla ma 'jam mgon chos kyi rgyal po ngag dbang legs pa la bstod pa mos gus kyi tam+bu ra'i dbyangs snyan Supplications - gsol 'debs   ·   Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

དཔལ་ལྡན་བླ་མ་འཇམ་མགོན་ཆོས་ཀྱི་རྒྱལ་པོ་ངག་དབང་ལེགས་པ་ལ་བསྟོད་པ་མོས་གུས་ཀྱི་ཏམྦུ་རའི་དབྱངས་སྙན་ཞེས་བྱ་བ་བཞུགས་སོ། །བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ངག་དབང་འཇམ་མགོན་དགྱེས་པའི་ལེགས་བཤད་ཀྱིས། །ཀུན་དགའི་བསྟན་པ་ཉིན་མོར་བྱེད་པའི་གཉེན། །ལེགས་པའི་འབྱུང་གནས་ཡེ་ཤེས་རྒྱལ་མཚན་དཔལ། །ཕྲིན་ལས་བཟང་པོའི་ཞབས་ལ་ཕྱག་འཚལ་ལོ། །གང་གི་མཚན་ཙམ་རྣ་བར་ལྷུང་པའི་མོད། །སྲིད་ཞིའི་འཇིགས་པའི་མེ་དཔལ་ཞི་མཛད་པ། །དཔལ་ལྡན་བླ་མ་ཆོས་ཀྱི་རྒྱལ་པོ་ཡི། །ཞབས་མཐིལ་རྡུལ་དམར་ཚངས་གནས་འཁོར་ལོས་མཆོད། །དབང་ཕྱུག་ཁྱབ་འཇུག་མིག་སྟོང་ལྡན་པ་སོགས། །ཐོར་གཙུག་ནོར་བུ་འདར་ཞིང་ཞབས་རྟེན་གྱི། །པདྨོར་གུས་པས་འདུད་པར་བྱེད་པ་ཡི། །ལྷ་ཡི་བླ་མ་མཆོག་ལ་ཕྱག་འཚལ་བསྟོད། །རྡོ་རྗེ་སེམས་དཔའ་དགྱེས་མཛད་ཧེ་རུ་ཀ །འཁོར་ལོ་སྡོམ་པ་རྣལ་འབྱོར་མ་དཔལ་སོགས། །གང་དང་དབྱེར་མེད་གཅིག་ཉིད་དུ་མར་ཤར། །དཔལ་ལྡན་རྡོ་རྗེ་འཆང་ལ་ཕྱག་འཚལ་བསྟོད། །རབ་ཞི་བསྐལ་མང་སྔོན་ནས་མངོན་མཛད་ཀྱང་། །སྲིད་པར་རྗེས་སུ་ཆགས་པའི་སྒྱུ་ཐབས་ཀྱིས། །ཡེ་ཤེས་སྐུ་ཉིད་ཟ་མ་ཏོག་ཏུ་སྦས། །དགེ་བའི་བཤེས་སུ་སྟོན་ལ་ཕྱག་འཚལ་བསྟོད། །འཇམ་པའི་དཔལ་ནི་ཐུགས་ཀའི་དཔལ་བཻའུར་བཞུགས། །མི་བརྗེད་གཟུངས་ཐོབ་ཏིང་འཛིན་སྒོ་མང་མངའ། །མདོ་དང་སྔགས་ཀྱི་ཟབ་རྒྱས་རྣམ་མང་དོན། །མ་འདྲེས་ས་ལེར་མཁྱེན་ལ་ཕྱག༴ །བརྩེ་ཆེན་སྙིང་རྗེའི་ཆུ་འཛིན་དཀར་པོ་ལས། །བྱང་ཆུབ་སེམས་ཀྱི་ཀླུ་དབང་འབྲུག་སྒྲ་སྒྲོགས། །འགྲོ་བའི་ཞིང་སར་གྲུ་ཆར་འབེབས་པ་ལས། །སྐུ་བཞིའི་མྱུ་གུ་བསྐྱེད་ལ༴ །རབ་ཏུ་དཔའ་བའི་མཐུ་སྟོབས་ནུས་པའི་ཤུགས། །བདུད་སྡེའི་ཚོགས་ལ་ཕྱུངས་པ་དེ་ཡི་མོད། །མིང་གི་མཐར་བྱེད་དོན་སྙིང་ལྐོགས་མར་ལྷུང་། །འཇམ་དཔལ་ཁྲོས་པའི་རྒྱལ་པོར༴ །ཕྱི་རུ་རྣམ་དག་ཁྲིམས་ཀྱིས་ལེགས་སྡོམ་ཞིང་། །ནང་དུ་བྱང་ཆུབ་སེམས་གཉིས་དཔལ་གྱིས་ཕྱུག །གསང་བ་རྣལ་འབྱོར་གྲུབ་པ་ཆེན་པོ་སྟེ། །སྡོམ་གསུམ་ལྡན་པའི་དབང་པོར༴ །མཁས་པའི་རྣམ་དཔྱོད་ཙནྡྲ་གོ་མི་དང་། །བཙུན་པའི་ཁྱུ་མཆོག་ཉེ་བར་འཁོར་ཇི་བཞིན། །བཟང་པོའི་དཔལ་མངའ་ཀུན་དགའ་རྒྱལ་མཚན་དངོས། །བསྟན་འཛིན་མཁའ་ལྡིང་དབང་པོར༴ །མཁས་དང་གྲུབ་པ་གཉིས་ལྡན་ཁྱེད་ཉིད་ཙམ། །བིཪྺའི་ཐུགས་བཅུད་གསུང་ངག་གདམས་པ་རྣམས། །མ་ནོར་ཇི་བཞིན་མངོན་དུ་མཛད་པ་ཡི། །རྣལ་འབྱོར་དབང་ཕྱུག་ཞབས་ལ༴ །ཅིར་སྣང་ཐམས་ཅད་བདེ་ཆེན་ལྷ་སྐུར་གཟིགས། །སྒྲ་གྲགས་གཞོམ་མེད་རྡོ་རྗེའི་སྔགས་སུ་ཤར། །རྟོག་ཚོགས་སྤྲོས་པའི་རྦ་རླབས་ཞི་བ་ཡི། །འགྱུར་མེད་དེ་བཞིན་ཉིད་ལ༴ །ཕྱི་ཡི་སྤྲོས་པ་ནང་དུ་ལུས་ལ་རྫོགས། །དེ་ཉིད་སེམས་རྫོགས་འཁོར་འདས་དབྱེར་མི་ཕྱེད། །བདེ་དང་སྟོང་པ་ཟུང་འཇུག་རྡོ་རྗེའི་བདག །བརྟན་གཡོ་ཀུན་ཁྱབ་བླ་མར༴ །ཨ་ཧཾ་མི་འགྱུར་དྷུ་ཏིའི་སྲོག་ཏུ་ཞུགས། །འགྱུར་མེད་བྱང་ཆུབ་སེམས་གང་དེ་རྡོ་རྗེ། །ཤེས་རབ་སྟོང་ཉིད་པདྨར་རོལ་མཛད་པ། །བླ་མ་ཀྱཻ་ཡི་རྡོ་རྗེར་ཕྱག་འཚལ་བསྟོད། །ཡིད་འཕྲོག་གཟུགས་མཛེས་སྙན་པའི་སྒྲ་དབྱངས་དང་། །ལྷ་ཡི་སྤོས་དང་རོ་མཆོག་བདུད་རྩིའི་ཟས། །འཇམ་མཉེན་འཁྲིལ་ཆགས་བདེ་བའི་མཆོག་སྟེར་བའི། །རེག་བྱ་སོགས་ཀྱིས་རྟག་ཏུ་མཆོད་པ་བགྱི། །བཅས་དང་རང་བཞིན་ཁ་ན་མ་ཐོ་བའི། །ཉེས་པའི་ཚོགས་རྣམས་སྟོབས་བཞིའི་སྒོ་ནས་བཤགས། །གང་གིས་བྱས་དང་བྱེད་འགྱུར་བྱེད་བཞིན་པའི། །བསོད་ནམས་ཀུན་ལ་སྙིང་ནས་ཡིད་རང་ངོ་། །ཐབས་ལ་མཁས་པའི་ཡོངས་འཛིན་ཐམས་ཅད་ཀྱིས། །དམ་ཆོས་བདུད་རྩི་ཀུན་ལ་བསྟན་དུ་གསོལ། །མྱ་ངན་འདའ་ཚུལ་ནམ་ཡང་མི་སྟོན་པར། །འགྲོ་བའི་གཉེན་དུ་བཞུགས་པར་གསོལ་བ་འདེབས། །དགེ་བ་འདི་དང་དགེ་བའི་རྩ་བ་གཞན། །བདག་དང་གཞན་གྱིས་ལེགས་པར་གང་བསྒྲུབ་པ། །ཡོད་མེད་ལ་སོགས་དམིགས་པའི་དུག་སྤོང་སྟེ། །ཀུན་མཁྱེན་འགྲོ་བའི་རྩ་ལག་ཐོབ་པར་ཤོག །དེ་ལྟར་བསྟོད་ཅིང་གསོལ་བ་བཏབ་པ་ལས། །དཔལ་ལྡན་བླ་མ་མཆོག་དང་མི་འབྲལ་ཞིང་། །གསུང་གི་བདུད་རྩི་ཅི་དགར་ཐོབ་པ་དང་། །གསང་བ་གསུམ་གྱི་བྱིན་རླབས་རྒྱུད་ལ་ཞུགས། །སྐྱབས་གནས་ཀུན་འདུས་རྩ་བའི་བླ་མ་ལ། །དད་གསུམ་གདུང་བའི་དབྱངས་ཀྱིས་གསོལ་འདེབས་ན། །བརྩེ་ཆེན་ཐུགས་རྗེའི་ལྕགས་ཀྱུས་ལེགས་བཟུང་ནས། །འཇིགས་རུང་སྲིད་པའི་མཚོ་ལས་བསྒྲལ་དུ་གསོལ། །འཁོར་བའི་ཉེས་ཀུན་མཐོང་བའི་ངེས་འབྱུང་དང་། །འགྲོ་ཀུན་ཕ་མར་ཤེས་པའི་ལྷག་བསམ་གྱིས། །རྣམ་གྲོལ་ཚེ་འདིར་ཐོབ་ལ་ཆེས་རིངས་པའི། །གོང་མའི་ལམ་ལ་འཇུག་པར་བྱིན་གྱིས་རློབས། །གཞི་རྒྱུད་སྤྲོས་བྲལ་གནས་ལུགས་ལེགས་རྟོགས་ནས། །ལམ་རྒྱུད་དབང་བཞིའི་མངོན་རྟོགས་མཐར་ཕྱིན་ཏེ། །འབྲས་རྒྱུད་སྐུ་དང་ཡེ་ཤེས་དབྱེར་མེད་པའི། །གོ་འཕང་ཚེ་འདིར་ཐོབ་པར་བྱིན་གྱིས་རློབས། །བསླུ་མེད་བླ་མ་མཆོག་གསུམ་ཐུགས་རྗེ་དང་། །ཆོས་ཉིད་བདེན་དང་ཆོས་ཅན་མི་བསླུའི་མཐུས། །ཇི་ལྟར་སྨོན་པའི་གནས་ཀུན་འགྲུབ་པ་དང་། །རང་གཞན་དོན་གཉིས་མཐའ་རུ་ཕྱིན་པར་ཤོག །ཅེས་པའང་ལྷུན་གྲུབ་སྟེང་གི་ཁྲོ་ངེ་མཁན་མཁྱེན་རབ་བསྟན་འཛིན་ནས་གསུང་བསྐུལ་དང་། རང་གི་དད་པའི་གསོས་སུ་བཀའ་འབངས་ཀྱི་ཐ་ཆུང་འཇམ་དབྱངས་ཆོས་ཀྱི་བློ་གྲོས་པས་གསོལ་བ་བཏབ་པ་སིདྡྷིར་བྷ་ཝནྟུ། དགེའོ།། །།

[edit]

dpal ldan bla ma 'jam mgon chos kyi rgyal po ngag dbang legs pa la bstod pa mos gus kyi tam+bu ra'i dbyangs snyan zhes bya ba bzhugs so/____/bla ma dang 'jam pa'i dbyangs la phyag 'tshal lo/____/ngag dbang 'jam mgon dgyes pa'i legs bshad kyis/____/kun dga'i bstan pa nyin mor byed pa'i gnyen/____/legs pa'i 'byung gnas ye shes rgyal mtshan dpal/____/phrin las bzang po'i zhabs la phyag 'tshal lo/____/gang gi mtshan tsam rna bar lhung pa'i mod/____/srid zhi'i 'jigs pa'i me dpal zhi mdzad pa/____/dpal ldan bla ma chos kyi rgyal po yi/____/zhabs mthil rdul dmar tshangs gnas 'khor los mchod/____/dbang phyug khyab 'jug mig stong ldan pa sogs/____/thor gtsug nor bu 'dar zhing zhabs rten gyi/____/pad+mor gus pas 'dud par byed pa yi/____/lha yi bla ma mchog la phyag 'tshal bstod/____/rdo rje sems dpa' dgyes mdzad he ru ka__/'khor lo sdom pa rnal 'byor ma dpal sogs/____/gang dang dbyer med gcig nyid du mar shar/____/dpal ldan rdo rje 'chang la phyag 'tshal bstod/____/rab zhi bskal mang sngon nas mngon mdzad kyang /____/srid par rjes su chags pa'i sgyu thabs kyis/____/ye shes sku nyid za ma tog tu sbas/____/dge ba'i bshes su ston la phyag 'tshal bstod/____/'jam pa'i dpal ni thugs ka'i dpal bai'ur bzhugs/____/mi brjed gzungs thob ting 'dzin sgo mang mnga'/____/mdo dang sngags kyi zab rgyas rnam mang don/____/ma 'dres sa ler mkhyen la phyag=____/brtse chen snying rje'i chu 'dzin dkar po las/____/byang chub sems kyi klu dbang 'brug sgra sgrogs/____/'gro ba'i zhing sar gru char 'bebs pa las/____/sku bzhi'i myu gu bskyed la=____/rab tu dpa' ba'i mthu stobs nus pa'i shugs/____/bdud sde'i tshogs la phyungs pa de yi mod/____/ming gi mthar byed don snying lkogs mar lhung /____/'jam dpal khros pa'i rgyal por=____/phyi ru rnam dag khrims kyis legs sdom zhing /____/nang du byang chub sems gnyis dpal gyis phyug__/gsang ba rnal 'byor grub pa chen po ste/____/sdom gsum ldan pa'i dbang por=____/mkhas pa'i rnam dpyod tsan+d+ra go mi dang /____/btsun pa'i khyu mchog nye bar 'khor ji bzhin/____/bzang po'i dpal mnga' kun dga' rgyal mtshan dngos/____/bstan 'dzin mkha' lding dbang por=____/mkhas dang grub pa gnyis ldan khyed nyid tsam/____/biR+Wa'i thugs bcud gsung ngag gdams pa rnams/____/ma nor ji bzhin mngon du mdzad pa yi/____/rnal 'byor dbang phyug zhabs la=____/cir snang thams cad bde chen lha skur gzigs/____/sgra grags gzhom med rdo rje'i sngags su shar/____/rtog tshogs spros pa'i rba rlabs zhi ba yi/____/'gyur med de bzhin nyid la=____/phyi yi spros pa nang du lus la rdzogs/____/de nyid sems rdzogs 'khor 'das dbyer mi phyed/____/bde dang stong pa zung 'jug rdo rje'i bdag__/brtan g.yo kun khyab bla mar=____/a haM mi 'gyur d+hu ti'i srog tu zhugs/____/'gyur med byang chub sems gang de rdo rje/____/shes rab stong nyid pad+mar rol mdzad pa/____/bla ma kyai yi rdo rjer phyag 'tshal bstod/____/yid 'phrog gzugs mdzes snyan pa'i sgra dbyangs dang /____/lha yi spos dang ro mchog bdud rtsi'i zas/____/'jam mnyen 'khril chags bde ba'i mchog ster ba'i/____/reg bya sogs kyis rtag tu mchod pa bgyi/____/bcas dang rang bzhin kha na ma tho ba'i/____/nyes pa'i tshogs rnams stobs bzhi'i sgo nas bshags/____/gang gis byas dang byed 'gyur byed bzhin pa'i/____/bsod nams kun la snying nas yid rang ngo /____/thabs la mkhas pa'i yongs 'dzin thams cad kyis/____/dam chos bdud rtsi kun la bstan du gsol/____/mya ngan 'da' tshul nam yang mi ston par/____/'gro ba'i gnyen du bzhugs par gsol ba 'debs/____/dge ba 'di dang dge ba'i rtsa ba gzhan/____/bdag dang gzhan gyis legs par gang bsgrub pa/____/yod med la sogs dmigs pa'i dug spong ste/____/kun mkhyen 'gro ba'i rtsa lag thob par shog__/de ltar bstod cing gsol ba btab pa las/____/dpal ldan bla ma mchog dang mi 'bral zhing /____/gsung gi bdud rtsi ci dgar thob pa dang /____/gsang ba gsum gyi byin rlabs rgyud la zhugs/____/skyabs gnas kun 'dus rtsa ba'i bla ma la/____/dad gsum gdung ba'i dbyangs kyis gsol 'debs na/____/brtse chen thugs rje'i lcags kyus legs bzung nas/____/'jigs rung srid pa'i mtsho las bsgral du gsol/____/'khor ba'i nyes kun mthong ba'i nges 'byung dang /____/'gro kun pha mar shes pa'i lhag bsam gyis/____/rnam grol tshe 'dir thob la ches rings pa'i/____/gong ma'i lam la 'jug par byin gyis rlobs/____/gzhi rgyud spros bral gnas lugs legs rtogs nas/____/lam rgyud dbang bzhi'i mngon rtogs mthar phyin te/____/'bras rgyud sku dang ye shes dbyer med pa'i/____/go 'phang tshe 'dir thob par byin gyis rlobs/____/bslu med bla ma mchog gsum thugs rje dang /____/chos nyid bden dang chos can mi bslu'i mthus/____/ji ltar smon pa'i gnas kun 'grub pa dang /____/rang gzhan don gnyis mtha' ru phyin par shog__/ces pa'ang lhun grub steng gi khro nge mkhan mkhyen rab bstan 'dzin nas gsung bskul dang /__rang gi dad pa'i gsos su bka' 'bangs kyi tha chung 'jam dbyangs chos kyi blo gros pas gsol ba btab pa sid+d+hir b+ha wan+tu/__dge'o//____//__