JKCL-KABUM-12-NA-052

🚧 This website is under continued development. We appreciate your patience!

Previous Text Back to Volume PageNext Text

ཨོཾ་སྭསྟི། ཆོས་ཀུན་བདེན་གཉིས་དབྱེར་མེད་པ་སོགས།

Wylie title	oM swasti/ chos kun bden gnyis dbyer med pa sogs
Location	chos kyi blo gros bka' 'bum Volume 12, Text 52, Pages 263-264 (Folios 1a1 to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. oM swasti chos kun bden gnyis dbyer med pa sogs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 263-264. Bir, H.P.: Khyentse Labrang, 2012.
Genre	Prayers - smon lam
Colophon	།ཅེས་པའང་སྙིང་ཐག་པ་ནས་སྨོན་ལམ་བཏབ་པ་འདི་ཡང་ཟླ་བ་གཉིས་པའི་ཚེས་ཉེར་དྲུག་ཟླ་བ་གྲོ་བཞིན་གྱི་འགྲུབ་སྦྱོར་ལའོ།།
	/ces pa'ang snying thag pa nas smon lam btab pa 'di yang zla ba gnyis pa'i tshes nyer drug zla ba gro bzhin gyi 'grub sbyor la'o//

1 Texts in this Section (sde tshan or chos tshan)

263-264	ཨོཾ་སྭསྟི། ཆོས་ཀུན་བདེན་གཉིས་དབྱེར་མེད་པ་སོགས། oM swasti/ chos kun bden gnyis dbyer med pa sogs Prayers - smon lam	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ཨོཾ་སྭསྟི། ཆོས་ཀུན་བདེན་གཉིས་དབྱེར་མེད་པ། །རྡུལ་བྲལ་མཁའ་ལྟར་དག་པ་ཡི། །བྱང་ཆུབ་སེམས་ཀྱི་རྡོ་རྗེ་ལ། །འདུ་འབྲལ་མེད་པར་ཕྱག་བགྱིའོ། །ལྷ་དང་བཅས་པའི་འཇིག་རྟེན་གྱི། །ཐུབ་ཆེན་དོན་ཀུན་གྲུབ་པ་དང་། །བཅོམ་ལྡན་མགོན་པོ་འོད་དཔག་མེད། །བདེ་གཤེགས་བདུན་དང་མཚན་ཐོས་པས། །ངན་སོང་ཀུན་སྐྱོབས་སྨན་གྱི་བླ། །མི་འཁྲུགས་པ་སོགས་སངས་རྒྱས་དང་། །འཕགས་མཆོག་སྙིང་རྗེའི་དབང་ཕྱུག་ཆེ། །རྒྱལ་སྲས་འཇམ་དཔལ་དཔའ་བོ་སོགས། །སེམས་དཔའ་ཆེ་རྣམས་དགོངས་སུ་གསོལ། །བདག་གི་སྨོན་ལམ་འདི་དག་རྣམས། །མྱུར་དུ་འགྲུབ་པར་མཛད་དུ་གསོལ། །བྱེ་བ་བདག་ལུས་གྲངས་མེད་ཀྱི། །མ་གྱུར་སེམས་ཅན་ཐམས་ཅད་དང་། །ཁྱད་པར་དལ་འབྱོར་འདི་ཉིད་ཀྱི། །རྟེན་བཟང་བསྐྱེད་པའི་དྲིན་མོ་ཆེ། །བར་དོའི་འཇིགས་ལས་གྲོལ་བར་ཤོག །སྐྱེ་གནས་ངན་པའི་རྒྱུན་ལྡོག་ཅིང་། །དག་པའི་ཞིང་དུ་པདྨོ་ལས། །བརྫུས་སྐྱེས་རྒྱལ་བའི་ཞལ་མཐོང་ནས། །བྱང་ཆུབ་ལུང་བསྟན་ཐོབ་པར་ཤོག །གལ་ཏེ་འཁོར་བར་སྐྱེས་གྱུར་ཀྱང་། །རིགས་བཟང་དལ་འབྱོར་ལུས་ཐོབ་ཅིང་། །སྐྱེས་མ་ཐག་ཏུ་ཆོས་དང་འཕྲད། །ཡང་དག་བཤེས་དང་འཕྲད་གྱུར་ཅིག །འཕགས་པའི་ནོར་གྱི་ཕྱུགས་པ་དང་། །མཐོ་རིས་ཡོན་ཏན་དཔལ་མངའ་ཞིང་། །སྐྱེ་བ་དེ་ཡི་སྲིད་རྒྱུན་གཅོད། །ཕྱིར་མི་ལྡོག་པའི་ས་ཐོབ་ཤོག །བདག་ཀྱང་མ་གྱུར་སེམས་ཅན་རྣམས། །སངས་རྒྱས་ས་ལ་འགོད་པ་དང་། །ཚུལ་ཁྲིམས་ཆོས་ཀྱི་སྒྲོལ་མ་ནི། །བྱང་ཆུབ་དམ་པ་མ་ཐོབ་བར། །དེ་སྲིད་བདག་ནི་འཁོར་བ་འདིར། །མི་ངལ་དོན་རབ་སྒྲུབ་པ་དང་། །སྲིད་པའི་སྐྱོན་གྱིས་མ་གོས་ཤིང་། །ཕྲིན་ལས་མཁའ་དང་མཉམ་པར་ཤོག །རྩ་བརྒྱུད་བླ་མའི་བྱིན་རླབས་དང་། །སྲས་བཅས་རྒྱལ་བའི་བདེན་སྟོབས་ཀྱིས། །ཇི་ལྟར་སྨོན་པའི་གནས་འདི་རྣམས། །འབད་མེད་མྱུར་དུ་འགྲུབ་གྱུར་ཅིག །བདག་ནི་མཐོང་ཐོས་དྲན་རེག་ཀུན། །ཐར་པའི་ས་བོན་ཐེབས་པ་དང་། །བྱང་ཆུབ་མྱུ་གུ་རབ་སྨིན་ནས། །སྐུ་བཞིའི་འབྲས་བཟང་ཐོབ་པར་ཤོག །ཅེས་པའང་སྙིང་ཐག་པ་ནས་སྨོན་ལམ་བཏབ་པ་འདི་ཡང་ཟླ་བ་གཉིས་པའི་ཚེས་ཉེར་དྲུག་ཟླ་བ་གྲོ་བཞིན་གྱི་འགྲུབ་སྦྱོར་ལའོ།། །།

[edit]

oM swasti/__chos kun bden gnyis dbyer med pa/__/rdul bral mkha' ltar dag pa yi/__/byang chub sems kyi rdo rje la/__/'du 'bral med par phyag bgyi'o/__/lha dang bcas pa'i 'jig rten gyi/__/thub chen don kun grub pa dang /__/bcom ldan mgon po 'od dpag med/__/bde gshegs bdun dang mtshan thos pas/__/ngan song kun skyobs sman gyi bla/__/mi 'khrugs pa sogs sangs rgyas dang /__/'phags mchog snying rje'i dbang phyug che/__/rgyal sras 'jam dpal dpa' bo sogs/__/sems dpa' che rnams dgongs su gsol/__/bdag gi smon lam 'di dag rnams/__/myur du 'grub par mdzad du gsol/__/bye ba bdag lus grangs med kyi/__/ma gyur sems can thams cad dang /__/khyad par dal 'byor 'di nyid kyi/__/rten bzang bskyed pa'i drin mo che/__/bar do'i 'jigs las grol bar shog__/skye gnas ngan pa'i rgyun ldog cing /__/dag pa'i zhing du pad+mo las/__/brdzus skyes rgyal ba'i zhal mthong nas/__/byang chub lung bstan thob par shog__/gal te 'khor bar skyes gyur kyang /__/rigs bzang dal 'byor lus thob cing /__/skyes ma thag tu chos dang 'phrad/__/yang dag bshes dang 'phrad gyur cig__/'phags pa'i nor gyi phyugs pa dang /__/mtho ris yon tan dpal mnga' zhing /__/skye ba de yi srid rgyun gcod/__/phyir mi ldog pa'i sa thob shog__/bdag kyang ma gyur sems can rnams/__/sangs rgyas sa la 'god pa dang /__/tshul khrims chos kyi sgrol ma ni/__/byang chub dam pa ma thob bar/__/de srid bdag ni 'khor ba 'dir/__/mi ngal don rab sgrub pa dang /__/srid pa'i skyon gyis ma gos shing /__/phrin las mkha' dang mnyam par shog__/rtsa brgyud bla ma'i byin rlabs dang /__/sras bcas rgyal ba'i bden stobs kyis/__/ji ltar smon pa'i gnas 'di rnams/__/'bad med myur du 'grub gyur cig__/bdag ni mthong thos dran reg kun/__/thar pa'i sa bon thebs pa dang /__/byang chub myu gu rab smin nas/__/sku bzhi'i 'bras bzang thob par shog__/ces pa'ang snying thag pa nas smon lam btab pa 'di yang zla ba gnyis pa'i tshes nyer drug zla ba gro bzhin gyi 'grub sbyor la'o//___//