JKCL-KABUM-10-THA-077

🚧 This website is under continued development. We appreciate your patience!

Previous Text Back to Volume PageNext Text

མ་འོངས་ལུང་བསྟན་གསལ་བྱེད་སྒྲོན་མེ།

Wylie title	ma 'ongs lung bstan gsal byed sgron me
Location	chos kyi blo gros bka' 'bum Volume 10, Text 77, Pages 587-603 (Folios 1a to 9a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. ma 'ongs lung bstan gsal byed sgron me. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 587-603. Bir, H.P.: Khyentse Labrang, 2012.
Genre	Collections of Scriptural Citations - lung btus  ·  Printing Colophon Prayers - par byang smon tshig  ·  Sūtras - mdo
Lotsawa House Link	https://www.lotsawahouse.org/words-of-the-buddha/clarifying-light-prophecy https://www.lotsawahouse.org/tibetan-masters/jamyang-khyentse-chokyi-lodro/benedictory-verses-for-clarifying-light-prophecy
Colophon	ཅེས་མཁྱེན་སྤྲུལ་པས་སྨོན་པ་དགེ་ལེགས་འཕེལ།། །།སྭསྟི། དུས་གསུམ་གཟིགས་པ་སྟོན་པ་མཆོག་དེ་ཡིས། །འབྱུང་འགྱུར་ལུང་བསྟན་གསལ་བར་གསུངས་པ་རྣམས། །རྡོ་རྗེ་འཆང་དངོས་ཆོས྄༵་ཀྱ྄ི༷་བླ྄ོ༷་གྲོས྄༵་ཀྱིས། །སྙིགས་དུས་འགྲོ་ལ་བརྩེ་བས་ཕྱོགས་བསྡུས་མཛད། །བསྟན་འགྲོར་ལྷག་བསམ་གཅིག་ཏུ་དཀར་བ་ཡི། །དད་ཅིང་གུས་པས་འདི་སྒྲུབ་འགྲོ་བ་ཀུན། །གནས་སྐབས་འཇིགས་ཆེན་བཅུ་ལས་རབ་གྲོལ་ནས། །མཐར་ཐུག་རྣམ་མཁྱེན་གོ་འཕང་མྱུར་ཐོབ་ཤོག །མངྒ་ལཾ།།
	ces mkhyen sprul pas smon pa dge legs 'phel//___//swasti/__dus gsum gzigs pa ston pa mchog de yis/__/'byung 'gyur lung bstan gsal bar gsungs pa rnams/__/rdo rje 'chang dngos chosX kyiX bloX grosX kyis/__/snyigs dus 'gro la brtse bas phyogs bsdus mdzad/__/bstan 'gror lhag bsam gcig tu dkar ba yi/__/dad cing gus pas 'di sgrub 'gro ba kun/__/gnas skabs 'jigs chen bcu las rab grol nas/__/mthar thug rnam mkhyen go 'phang myur thob shog__/mang+ga laM//

1 Texts in this Section (sde tshan or chos tshan)

587-603	མ་འོངས་ལུང་བསྟན་གསལ་བྱེད་སྒྲོན་མེ། ma 'ongs lung bstan gsal byed sgron me Collections of Scriptural Citations - lung btus   ·   Printing Colophon Prayers - par byang smon tshig   ·   Sūtras - mdo	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །མ་འོངས་ལུང་བསྟན་གསལ་བྱེད་སྒྲོན་མེ་ཞེས་བྱ་བ་བཞུགས་སོ། ། དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་དུས་ངན་བསྐལ་པ་འབྱུང་བའི་དུས། དེ་ལ་ཕན་པའི་ཡི་གེ་འདི་གསུངས་པ་ནི། ཆོས་འདི་ཞེས་བྱ་བའི་ལམ་དང་འདྲའོ། །དེ་ཅི་ཡི་ཕྱིར་ཞེ་ན། ལམ་འདི་ལ་སྐྱེ་འགྲོ་སེམས་ཅན་ཐམས་ཅད་དང་འདྲའོ། །དེའི་ཕྱིར་ཆོས་འདི་ནི་ལམ་དང་འདྲ་ཞེས་བྱའོ། །བཅོམ་ལྡན་འདས་བྱང་ཆུབ་ཤིང་དྲུང་ན་བཞུགས་དུས། འཛམ་བུ་གླིང་གི་སྐྱེ་འགྲོ་སེམས་ཅན་ཐམས་ཅད་ལ་གཟིགས་ནས། ལྔ་བརྒྱ་དུས་ཀྱི་ཐ་མ་ལ། དུས་ངན་བསྐལ་པ་འབྱུང་བའི་དུས། སྐྱེ་འགྲོ་ཀུན་གྱི་བྱ་བ་རྟོག་པ་ནི། རྣམ་པར་དག་པ་བཅུའི་སྒོ་ནས་ཡི་གེ་འདི་དང་འཕྲད་པའི་མི་རྣམས་བསོད་ནམས་ཆེའོ། །ཆོས་འདི་དང་མ་འཕྲད་པའི་མི་རྣམས་ནི་བསོད་ནམས་ཆུང་བ་དང་། ཉོན་མོངས་པའི་སྡུག་བསྔལ་ཤིན་ཏུ་ཆེའོ། །ས་སྟེང་གི་མི་རྣམས་ནི་མཚོན་ཆའི་འོག་ཏུ་གཏུབས་པ་འདྲ་བར་སྣང་། དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཁྱེད་ཀྱིས་མི་རྣམས་སྙིང་རེ་རྗེ་དགོངས་པའི་དོན་དུ་སྡུག་བསྔལ་འདི་ལས་ཐར་བར་མཛད་དུ་གསོལ་ཞེས་ཞུས་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ངས་ཁྱེད་ལ་བཤད་དོ། །ང་ནམ་མཁའི་དབྱིངས་ན་བཞུགས་པ་ཡིན། འཛམ་བུ་གླིང་གི་སྐྱེ་འགྲོ་རྣམས་ལ་ངས་གཟིགས་པར་དགོངས་པ་ཡིན། ཁྱེད་རྣམས་ང་ཡི་བཀའ་ལ་ཉོན། ཆོས་ཀྱི་ཡི་གེ་འདི་དུས་ངན་བསྐལ་པ་འབྱུང་བའི་དུས་སུ་ཕན་པའི་ཆོས་ཡིན་ནོ། །འདི་བྲིས་པ་དང་འདོན་པ་དང་ཐུགས་རྗེ་ཆེན་པོའི་བསྒོམས་བཟླས་བྱས་ན་མྱུར་དུ་སྡིག་སྒྲིབ་བྱང་བར་འགྱུར་རོ། །ཆོས་ཀྱི་ཡི་གེ་འདི་ལ་སྤོས་དང་མེ་ཏོག་གིས་ལེགས་པར་མཆོད་ན་སེམས་ཅན་ཀུན་ཀྱང་བདེ་བ་ལ་འགོད། ཡི་གེ་འདི་བྲི་འདོན་བྱས་ན་ཚེ་རབས་ཐམས་ཅད་དུ་སྐྱེ་བ་བཟང་པོ་ཐོབ། དེ་ནས་ཤིང་དེའི་རྩ་བར་མཚོ་ཆེན་པོ་ཞིག་ཡོད་དོ། །དེའི་འགྲམ་དུ་ཐུགས་རྗེ་ཆེན་པོའི་སྤྲུལ་པ་བཞུགས་པས་སྐྱེ་འགྲོ་སེམས་ཅན་ཐམས་ཅད་སྙིང་རེ་རྗེ་ཐུགས་རྗེས་དགོངས་པར་མཛད་ནས་སྤྱན་ཆབ་དྲག་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཐུགས་རྗེ་ཆེན་པོ་ཁྱེད་ལེགས་པར་ཉོན་དང་སྤྱན་ཆབ་འཆོར་མི་དགོས་གསུངས་འདི་ལ་ལེགས་པར་ཉོན་དང་ལོ་གསར་སྟག་གི་ཟླ་བའི་ནང་དུ་མིའི་ཡུལ་དུ་བྱོན་པར་དགོངས་པ་ཡིན། དེའི་དུས་སུ་བསྐལ་པ་ངན་པའི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ། སྡིག་པ་ཐམས་ཅད་སྤོང་བ་ཡིན། དམྱལ་བར་ལྟུང་བའི་སེམས་ཅན་ཐམས་ཅད་ཀྱང་ངས་འདྲེན་པ་ཡིན། དེའི་དུས་སུ་ཆོས་ཀྱི་ཡི་གེ་འདི་དར་བ་ཡིན་ནོ། །ཡི་གེ་འདི་བྲི་འདོན་བྱས་ན་ནད་ཐམས་ཅད་ཆད། མི་གཅིག་གིས་བྲིས་ན་གྲོང་ཁྱེར་གཅིག་ལ་ཕན། གྲོང་ཁྱེར་གཅིག་གིས་བྲིས་ན་རྒྱལ་ཁམས་ཀུན་ལ་ཕན། མི་རྣམས་བསོད་ནམས་འཕེལ་བ་དང་རྐྱེན་ངན་བར་ཆད་བཟློག་པ་དང་དམྱལ་བའི་སྡུག་བསྔལ་ལས་ཐར་བར་འགྱུར་རོ། །ཚེ་འདི་དང་ཕྱི་མ་གཉིས་ཀ་ལ་ཕན། འགྲོ་བ་རིགས་དྲུག་གི་སེམས་ཅན་ཐམས་ཅད་ལ་མཁོ་བའི་ལམ་ཡིན་ནོ། །དཔེར་ན་མཚོ་དང་ཆུ་ལ་གྲུ་གཟིངས་འགྲོ་བ་ལྟ་བུ་ཡིན། ཡི་གེ་འདི་ལ་དད་པ་དང་མོས་གུས་རྣམ་པར་དག་པ་གལ་ཆེའོ། །བྱམས་པ་མི་ཡུལ་དུ་མ་བྱོན་བར་དུ་ཕན་པའི་ཡི་གེ་རྒྱ་ཆེན་འདི་ཡིན་ནོ། །ཆོས་འདི་བྲིས་ཞིང་གཞན་ལ་སྤེལ་ན་ཚེ་གཅིག་ལུས་གཅིག་ལ་བསོད་ནམས་དཔག་ཏུ་མེད་པ་འཕེལ་ལོ། །འཁོར་བ་ཁྲག་གི་རྒྱ་མཚོ་སྐེམས་པར་འགྱུར་རོ། །སེམས་རྣམ་པར་མ་དག་པ་བཅུའི་སྒོ་ནས་དང་པོ་ཉོན་མོངས་པའི་དབང་དུ་འགྱུར། སེམས་ཅན་ཐམས་ཅད་སྙིང་རེ་རྗེ། འདིའི་རྒྱབ་ཏུ་གཉིས་པ་མིའི་ཡུལ་དུ་ཁྲག་གིས་ལུང་པ་གང་། གསུམ་པ་ལོ་ཏོག་སོ་ནམ་བྱས་པ་རང་གི་སྤྱོད་དབང་མེད། བཞི་པ་མི་རྣམས་སྡུག་བསྔལ་ཤིན་ཏུ་མང་། ལྔ་པ་ལམ་ལ་འགྲོ་བའི་མི་མི་མཐོང་། དྲུག་པ་གཅན་གཟན་སྣ་ཚོགས་ཀྱིས་གྲོང་ཁྱེར་བཀང་བར་འགྱུར། བདུན་པ་རྒྱལ་ཁམས་དང་ཁང་པ་རྣམས་སྟོང་པར་འགྱུར། བརྒྱད་པ་གཅན་གཟན་གར་འོང་ཆ་མེད་དུ་འགྲོ་བ་མཐོང་། དགུ་པ་མི་རེ་རེ་ཙམ་ཡོད་ཀྱང་འདུག་མི་ཕོད། བཅུ་པ་ཡི་དྭགས་གདོན་གྱི་གྲོང་ཁྱེར་ཉུལ་བ་སྣང་། རྣམ་པར་མ་དག་པ་བཅུའི་སྒོ་ནས་དེ་འདྲ་འབྱུང་ངོ་། །གཅིག་གིས་གཅིག་ལ་མ་གུས་པ་དང་རང་བསྟོད་གཞན་སྨད་བྱེད་པར་སྣང་། མིའི་ནང་རིགས་བཞི་ཡོད་དོ། །རྒྱལ་རིགས་དང་རྗེ་རིགས་དམངས་རིགས་བྲམ་ཟེའི་རིགས་ཏེ། དེ་དག་ཀུན་ཀྱང་ཡི་གེ་འདི་ལ་དད་པ་དང་མོས་གུས་བྱས་ན་དུས་བསྐལ་པ་བཟང་པོ་འོང་། བཅོམ་ལྡན་འདས་ཀྱི་བཀའ་སྩལ་པ། ཡི་གེ་འདི་ལ་དད་ལོག་བྱས་ན་གཅིག་གིས་གཅིག་ཁྲིད་ནས་དམྱལ་བ་མནར་མེད་དུ་ལྟུང་། ཆོས་ཀྱང་མི་ཐོས་ངུ་འབོད་ཀྱིས་གནམ་ས་གང་། ཚེ་འདི་ལ་ཡང་ནད་རིམས་བསྐལ་པ་འོང་། ཆོས་ཀྱི་ཡི་གེ་འདི་ཐོས་མ་ཐག་ཏུ་འབྲི་འདོན་བྱས་ན་ནད་རིམས་དང་མུ་གེ་ཀུན་ཞི་བར་འགྱུར། སྐྱེ་བ་བཟང་པོ་ཐོབ་པར་འགྱུར་རོ། །གཞན་ཡང་འཇིག་རྟེན་ན་སྡུག་བསྔལ་བདུན་ཡོད། དམྱལ་བ་ཚ་གྲང་གི་སྡུག་བསྔལ་དང་གཅིག །ཡི་དྭགས་བཀྲེས་སྐོམ་གྱི་སྡུག་བསྔལ་དང་གཉིས། དུད་འགྲོ་བླུན་རྨོངས་ཀྱི༴ མི་ལ་སྐྱེ་རྒ་ན་འཆི་དང་མི་ཁོམ་པ་དང་དབུལ་འཕོང་ལྟ་བ་ལོག་འཛིན་གྱི་སྡུག་བསྔལ༴ ལྷ་མ་ཡིན་འཐབ་རྩོད་གྱི༴ ལྷ་འཆི་འཕོ་ལྟུང་གྱི༴ སྲིད་པ་བར་དོའི་སྡུག་བསྔལ་དང་བདུན་ཡོད་དོ། །དེ་རྣམས་ལ་ཕན་པའི་ཡི་གེ་འདི་ལ་དད་པ་བྱས་ན་བསམ་པ་ཐམས་ཅད་འགྲུབ་ཅིང་ནད་རིམས་ཐམས་ཅད་ཆད་པར་འགྱུར། སྔོན་གྱི་བསྐལ་པ་བཟང་པོ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། མེ་ཕོ་རྟའི་ལོར་ནམ་མཁའི་དབྱིངས་ནས་རྡོ་བོང་བ་ཙམ་ཞིག་བབས་ནས་མཚོ་ཆེན་པོ་གཅིག་གི་འགྲམ་དུ་ཕོག །གནམ་རྡོ་དེ་གས་པས་ཡི་གེ་འདི་བྱོན། ཆོས་ཀྱི་ཡི་གེ་འདི་སྦ་གསང་མེད་པར་གཅིག་གིས་གཅིག་ལ་སྟོན་པ་གལ་ཆེའོ། །འདི་གཅིག་དང་གཉིས་ཀྱི་དོན་མ་ཡིན། འགྲོ་བ་སེམས་ཅན་ཐམས་ཅད་ཀྱི་དོན་དུ་བཀོད་པ་ཡིན། འཁོར་བའི་སྡུག་བསྔལ་ཐམས་ཅད་ཟད་པར་ཤོག །མ་འོངས་ལྔ་བརྒྱ་དུས་ཀྱི་ཐ་མ་ལ། །སངས་རྒྱས་བསྟན་པ་མར་འགྲིབ་དུས། །དགེ་སློང་ཚུལ་ཁྲིམས་ཉམས་པའི་དུས། །བསམ་ངན་ཡིད་ལ་དྲན་པའི་དུས། །མནའ་སྡིག་ཁ་ཟས་ཟ་བའི་དུས། །མི་དགེ་བཅུ་ལ་སྤྱོད་པའི་དུས། །སྔགས་པས་ངན་སྔགས་འདོན་པའི་དུས། །དུག་ལྔ་ཁོག་དུ་བཅུག་པའི་དུས། །ལུས་ངག་ལོག་པར་སྤྱོད་པའི་དུས། །ཆོས་སྟོན་མར་མར་འགྲོ་བའི་དུས། །བྱ་སྤུ་རི་ལ་སྐྱེས་པའི་དུས། །ཤིང་ལྕགས་སྣོད་ལ་བཅུག་པའི་དུས། །སྐྱེ་བོས་ལས་ངན་བྱེད་པའི་དུས། །ལས་ངན་ཉེས་རྐྱེན་དེ་རྣམས་ཀྱིས། །འཇིགས་པའི་དུས་ངན་ངེས་པར་འོང་། །དུས་ངན་རྐྱེན་བཟློག་ཡི་གེ་འདི། །མཐོང་བ་ཙམ་གྱིས་བྲི་འདོན་བྱ། །དུས་ངན་བཟློག་པར་ཐེ་ཚོམ་མེད། །ཨི་བདེན་མི་བདེན་ལྟོས་དང་ཆོག །བདེན་པར་སྨྲ་ཞིང་བརྗོད་པར་བགྱི། །མི་བདེན་ཟེར་བའི་མི་རྣམས་ཀུན། །སྐྲ་ཡི་རྩེ་མོ་མན་ཆོད་དང་། །རྐང་པའི་མཐིའུ་ཆུང་ཡན་ཆོད་ལ། །ཁ་རྟགས་ནད་ཀྱིས་ཐེབ་པར་འོང་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཐུགས་རྗེ་ཆེན་པོ་དང་། བྱམས་པ་དང་། ཀུན་དགའ་བོ་དང་། མི་དང་། ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱི་གསུངས་པ་ལ་མངོན་པར་བསྟོད་དོ། །དེ་ནས་བཅོམ་ལྡན་འདས་ཀྱིས་མཚན་དང་དཔེ་བྱད་ཀྱིས་ལེགས་པར་བརྒྱན་པའི་ཕྱག་གཡས་པ་ས་ལ་བརྡབ་སྟེ། ནག་པོ་བདུད་རིགས་འཁོར་དང་བཅས་པ་འཇོམས་པར་བྱས་སོ། །བདག་དགའ་བ་དང་ཡིད་བདེ་བ་བསམ་གྱིས་མི་ཁྱབ་པ་ཐོབ་པ་དང་། ནད་དང་བདུད་ཐམས་ཅད་རབ་ཏུ་ཞི་བས་འདུལ་བར་བྱེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསླབ་པར་བྱའོ། །དེ་ནས་སངས་རྒྱས་བཅོམ་ལྡན་འདས་གང་གི་ཏིང་ངེ་འཛིན་ལ་བཞུགས་ནས་གསུངས་རབ་མདོ་སྡེ་ཐམས་ཅད་ནས་བསྡུས་པའི་ཡི་གེ་འདི་གསུངས། ཡང་ཀུན་དགའ་བོས་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཁྱེད་ཆོས་གསུངས་པ་འདི་དོན་འཁོར་བའི་རྐྱེན་ངན་བར་ཆད་བཟློག །ས་ཕོ་སྤྲེལ་གྱི་ལོ་ལ་ནད་ཡམས་ནི་འོང་། དེ་ལ་ཕན་པའི་རིམ་གྲོ་ཟབ་མོ་གལ་ཆེའོ། །སེམས་ཅན་རྣམས་ཀྱི་འདི་འདྲ་མི་བདེན་བསམ་ནས་ཡི་གེ་འདི་ལ་མ་དད་པ་དང་བཏང་སྙོམས་སུ་ལུས་ནས་དར་མ་ཐུབ་ན་ནག་པོ་བདུད་རིགས་རྣམས་དགའ་བར་འགྱུར་རོ། །ཡི་གེ་འདི་བྲིས་པ་དང་དད་པ་བྱས་ན་ཤིན་ཏུ་བདེ་བ་འོང་། ཆོས་ཀྱི་ཡི་གེ་འདི་ཡིས་ཕན་པར་འགྱུར་རོ། །བཅོམ་ལྡན་འདས་ཀྱིས་ལེགས་སོ་ལེགས་སོ་ཤིན་ཏུ་ལེགས་སོ། སྔོན་ནས་ཀུན་ཏུ་སྟོན་པར་བགྱི། །དགེ་བ་ཕུན་སུམ་ལེགས་པར་འགྱུར། །བསོད་ནམས་ཡོན་ཏན་ཀུན་ཏུ་རྒྱས། །རྫོགས་པའི་སངས་རྒྱས་ཀུན་གྱིས་གསུངས། །དགའ་བོ་ཉེར་དགའ་ཁྱེད་རྣམས་ཀྱིས། །འགྲོ་ལ་ཕན་དོན་འདི་བརྩོན་དང་། །མ་འོངས་དུས་ཀྱི་ཐ་མ་ལ། །འདི་ཡི་ཡོན་ཏན་བསམ་མི་ཁྱབ། །འདི་ལ་དད་པ་སུས་བྱས་ན། །འདོད་པ་ཐམས་ཅད་འགྲུབ་པར་འགྱུར། །རྐྱེན་ངན་བར་ཆད་བཟློག་པར་འགྱུར། །སངས་རྒྱས་བསྟན་ལ་དད་པའི་མི། །སྤོས་དང་མེ་ཏོག་མཆོད་པར་བགྱི། །དེ་ནས་བྱམས་པ་མགོན་པོས་ནམ་མཁའི་དབྱིངས་ནས་གཟིགས་པས། མི་རྣམས་ཀྱི་མིག་ནས་ཁྲག་གི་འཆི་མ་བྱུང་བ་མཐོང་ནས། བཅོམ་ལྡན་འདས་ཀྱི་དྲུང་དུ་ཕྱིན་ནས་ཞུས་པ། བཅོམ་ལྡན་འདས་མ་འོངས་པ་ལ་ཚིག་ཉུང་ལ་དོན་འདུས་པ་བྱིན་རླབས་ཆེ་བའི་ཆོས་གནང་བར་མཛད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ལེགས་སོ། །ཁྱེད་ཀྱིས་ང་ཡི་བཀའ་ལ་ཉོན། །ཚངས་པ་དང་ནི་བརྒྱ་བྱིན་སོགས། །སེམས་ཅན་དོན་དུ་བསྐོས་པ་ཡིན། །སྐྱེ་འགྲོ་ཀུན་ལ་ཕན་པའི་ཕྱིར། །ང་ཡི་ཚིག་དོན་འདི་དག་གསུངས། །འདི་ལ་གུས་ཤིང་བརྩོན་པར་གྱིས། །དགེ་བ་ཕུན་སུམ་ཚོགས་པ་ཡིན། དེ་ནས་མེ་ཕོ་རྟ་ཡི་ལོ་སྟོན་ཟླ་ར་བ་དང་། ས་ཕོ་སྤྲེལ་ལོ་ལ་ཡི་གེ་འདི་ལ་དད་པ་མེད་པའི་མི་སྡིག་ཅན་རྣམས་འཆི་བར་འགྱུར་རོ། །ཡི་གེ་འདི་བྲི་འདོན་བྱས་ན་མི་རྣམས་ཚེ་རིང་བ་དང་། ནད་མེད་པ་དང་བསོད་ནམས་ཆེ་བར་འགྱུར་རོ། །དུས་ངན་གནོད་བྱེད་ཀུན་ཀྱང་གྲོང་ཁྱེར་ལ་ཉུལ་བ་འོང་། མིའི་མི་མཐོང་བར་གང་ཡོད་ཆ་མེད་དུ་འགྲོ་ཞིང་གབ། དེའི་དུས་སུ་ཆོས་ཀྱི་ཡི་གེ་འདི་ཡི་བྱིན་རླབས་ཀྱིས་འདྲེ་གདོན་གནོད་བྱེད་ཐམས་ཅད་ཀྱང་འདར་ཅིང་བྲོས་པར་འགྱུར་རོ། །ཡི་གེ་འདི་རྒྱལ་ཁམས་ཀུན་ལ་སྤེལ་བ་གལ་ཆེ། མི་བདེན་བསམ་ནས་ཐེ་ཚོམ་མ་བྱེད། སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེའི་གསུངས་པའི་ཆོས་འདི་ལ་མ་དད་པ་རྣམས་ནི། མེ་རྟའི་ལོ་ལ་ས་འགུལ་ཆེན་པོ་ནི་འབྱུང་། དེའི་དུས་སུ་དུས་ངན་ཤར་ནས་མེ་མོ་ལུག་གི་ལོ་ལ་འགྲིལ་ནས་འཆི། ལ་ལ་ནི་འགྲོ་ལམ་དུ་འཆི། ལ་ལ་ནི་དྲན་པ་ཉམས་ནས་འཆི། ས་ཕོ་སྤྲེལ་གྱི་ལོ་ལ་ཆུའི་འཇིགས་པ་འོང་། དབྱར་ལ་མུ་གེའི་ནད་ཀྱིས་འཆི། དེའི་དུས་སུ་གདོན་རིགས་ཀྱིས་རྒྱལ་ཁམས་གང་། ཆོས་འདི་འབྲི་འདོན་བྱས་ན་གདོན་བགེགས་ཐམས་ཅད་ཀྱིས་མི་ཚུགས་སོ། །ས་མོ་བྱའི་ལོར་གཞན་ལ་གནོད་པ་མི་བྱེད། ཤ་ཁྲག་མི་ཟ་སྡོམ་པ་བསྲུང་བ་གལ་ཆེ། ལྕགས་ཕོ་ཁྱིའི་ལོ་ལ་སྟག་གཟིག་དོམ་དྲེད་འཕར་སྤྱང་སོགས་གཅན་གཟན་གྱིས་རྒྱལ་ཁམས་དང་གྲོང་ཁྱེར་ཐམས་ཅད་གང་ནས་དེའི་དུས་སུ་མི་རྣམས་གྲོལ་བའི་ཐབས་ཆོས་འདི་འབྲི་འདོན་བྱེད་པ་གལ་ཆེ། ལྕགས་མོ་ལུག་གི་ལོ་ལ་འགྲོ་བ་སེམས་ཅན་ཐམས་ཅད་ཤོག་སྐྱ་རླུང་གིས་སྐྱོད་པ་ལྟར་འདུག་པའི་རང་དབང་མེད་པར་འོང་། མཚོ་ཆེན་པོ་འཕྱུར་བ་དང་འདྲའོ། །དེའི་དུས་སུ་ཡི་གེ་འདི་ལ་མི་དད་པའི་མི་རྣམས་འཆི། དེ་ནས་བཅོམ་ལྡན་འདས་ཀྱིས་ཐུགས་རྗེ་ཆེན་པོ་ལ་བཀའ་སྩལ་པ། བྱི་བའི་ལོ་ལ་ནམ་མཁའི་དབྱིངས་ནས་ཆོས་ཀྱི་སྒྲ་སྙན་པ་ཞིག་འོང་། ཉི་ཟླའི་འོད་བཞིན་དུ་སངས་རྒྱས་ཀྱི་བྱིན་རླབས་ནུས་མཐུས་ཕྱོགས་བཞི་མཚམས་བརྒྱད་ཀུན་ལ་གསལ་བའི་ཡི་གེ་འདི་འབྲི་འདོན་བྱས་ན། བྱམས་པ་མ་བྱོན་བར་དུ་ཕན་པའི་ཡི་གེ་འདི་ཡིན་ནོ། །འདི་འབྲི་འདོན་བྱས་ན། །བསོད་ནམས་རི་བོ་ལྟ་བུ་ཐོབ། །རི་བོ་པོ་ཏཱ་ལ་ཡི་ཕོ་བྲང་ན། །སངས་རྒྱས་གསུང་གི་སྤྲུལ་པ་བཞུགས། །བྱང་ཆུབ་སེམས་དཔའི་འཁོར་གྱིས་བསྐོར། །སྟེང་འོག་ཕྱོགས་བཅུ་མ་ལུས་པའི། །སྐྱེ་འགྲོ་སེམས་ཅན་བདེ་ལ་བཀོད། །ཡང་ཐུགས་རྗེ་ཆེན་པོས་མི་རྣམས་ཐམས་ཅད་སྙིང་རེ་རྗེ་དགོངས་ནས་འགྲོ་བ་སེམས་ཅན་གྱི་དོན་དུ་སྤེལ་བ་ཡིན། མི་བདེན་བསམ་ནས་ཐེ་ཚོམ་བྱས་ན། དབྱར་ཟླ་ར་བ་དང་འབྲིང་པོ་གཉིས་ལ་ནད་རིམས་དར་ནས་འོང་། སྔ་དྲོ་ན་ནས་དགོང་མོ་འཆི། དེའི་དུས་སུ་དུས་ངན་གྱི་བསྐལ་པ་དར་ནས་རྩི་ཤིང་ནགས་ཚལ་ཐམས་ཅད་ཀྱང་རྐེད་པ་ནས་ཆད། བྲག་རི་ཐམས་ཅད་རྩ་བ་ནས་ཞིག །ས་གཞི་ཐམས་ཅད་འདར་ནས་འདུག་བཟོད་མེད། མི་བཅུ་ཡི་ནང་ནས་གཅིག་ལས་མི་ལུས། འདི་མི་བདེན་མ་བསམ་བཅོམ་ལྡན་འདས་ཀྱི་བཀའ་ཡིན། སེམས་ཅན་ཐམས་ཅད་སྙིང་རེ་རྗེ། དེ་ནས་མེ་མོ་ལུག་གི་ལོ་དང་ས་ཕོ་སྤྲེལ་ལོ་ལ་ལྔ་བརྒྱའི་དུས་ངན་འཆར་བ་ཡིན། ཕྱོགས་བཞི་མཚམས་བརྒྱད་ཀུན་ནས་འཁྲུགས་པ་འོང་། མི་རྣམས་འཁྲུགས་རྩོད་ནང་རྨེ་བྱེད་ནས་ཟད། དུས་ངན་དག་ལས་ཐར་པའི་ཆོས་འདི་ནི། མཐོང་བ་ཙམ་གྱིས་འབྲི་འདོན་དེ་ལྟར་བྱས་ན་འཁྲུགས་པ་འཇོམ། ཤིན་ཏུ་བདེ་བ་ཐོབ། དགེ་བ་དཔག་མེད་འབྱུང་ཞིང་འཇིགས་སྐྲག་ཀུན་ལས་ཐར། ཆོས་ཀྱི་ཡི་གེ་འདི་གཅིག་དང་གཉིས་ཀྱི་དོན་མ་ཡིན། འགྲོ་བ་སེམས་ཅན་ཐམས་ཅད་ཀྱི་དོན་དུ་མཛད་པ་ཡིན། ཆོས་ཀྱི་ཡི་གེ་འདི་རྒྱལ་ཁམས་ཕྱོགས་ཀུན་དུ་དར་ན་མི་རྣམས་ལ་བདེ་སྐྱིད་བཟང་པོ་འོང་། དགེ་བ་ཕུན་སུམ་ཚོགས་པ་ཡིས། །སེམས་ཅན་སྡུག་བསྔལ་མེད་པར་མཛོད། ཟླ་བ་ལྔ་དྲུག་ལ་ཡི་གེ་འདི་རྗེས་སུ་དྲན་ནས་བརྩོན་པར་མ་གྱུར་ན་ནད་རིམས་ཀྱི་བསྐལ་པ་འོང་། ལ་ལ་ནི་ཚ་བ་ན་ནས་འཆི། ལ་ལ་ནི་གྲང་བ་ན་སྟེ་འཆི། ལ་ལ་སྨྱོ་ནས་འཆི། ལ་ལ་ནི་ལྐོག་མ་ན་ནས་འཆི། ལ་ལ་སྙིང་ན་ནས་འཆི། ལ་ལ་རྒྱུ་གཟེར་ནད་ཀྱིས་འཆི། ལ་ལ་ནི་མཆིན་པ་ན་ནས་འཆི་བ་སོགས་འོང་། ནད་གདོན་འདི་རྣམས་ལ་ཕན་པའི་བསྲུང་བའི་ཡི་གེ་འདི་རིགས་ཀྱི་བུ་དང་བུ་མོ་གང་ལ་ལ་ཞིག་གི་ལུས་ལ་འཆང་ན་ལྷའི་གདོན་དང་། ཀླུའི་གདོན་དང་། འབྱུང་པོའི་གདོན་དང་ནད་རིམས་དེ་དག་ཐམས་ཅད་ལས་ཐར་བར་སྲུང་བའི་སྔགས། ཨེ་མ་ཧོ། ཕན་ནོ་ཕན་ནོ་སྭཱ་ཧཱ། ཕོའི་གཡས་དང་མོའི་གཡོན་དུ་བཏགས་སོ། དེ་ལྟར་བྱས་ན་ནད་རིམས་ཐམས་ཅད་ལས་ཐར། སྐྱེ་བ་བཟང་པོ་ཐོབ་པར་འགྱུར། འདི་འབྲི་འདོན་དང་དད་པ་བྱས་ན་འཁོར་བ་སྡུག་བསྔལ་ཁྲག་གི་རྒྱ་མཚོ་ལས་ཐར་བར་ཐེ་ཚོམ་མེད་དོ། །འཇིག་རྟེན་ཁམས་ཀྱི་མི་རྣམས་སྙིང་རེ་རྗེ། མི་རྣམས་དུས་མིན་འཆི་བའི་ནད་ཐམས་ཅད་རབ་ཏུ་ཞི་བར་གྱུར་ཅིག །སྔོན་གྱི་བསྐལ་པ་བཟང་པོ་དང་ལྡན་པར་གྱུར་ཅིག །བསོད་ནམས་དཔག་ཏུ་མེད་པ་ཐོབ་པར་གྱུར་ཅིག །ཆོས་ཀྱི་ཡི་གེ་འདི་ལ་མ་དད་པའི་འགྲོ་བ་རྣམས་ནི་ཐར་པའི་དུས་མེད། གྲོང་ཁྱེར་ལ་ཡང་གདོན་རིགས་ཀྱིས་གང་བ་འོང་། དེ་དུས་མི་རྣམས་ངུ་འབོད་ཀྱིས་གནམ་ས་གང་། འབྲུ་བཅུད་ཡོད་ཀྱང་ཟ་དབང་མེད། །མི་གྲངས་མང་པོས་བདུད་ཟས་བྱེད། །དེ་ནས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་སེམས་ཅན་གྱི་རྒྱུད་ལ་སྙིང་རྗེ་སྐྱེ་བའི་དོན་དུ་ཡན་ལག་འདི་གསུངས་སོ། བཅོམ་ལྡན་འདས་ཁྱེད་ཀྱིས་ཡི་གེ་འདི་ཉིད་བྱིན་གྱིས་བརླབས་དུ་གསོལ། དབང་དུ་བསྡུ་བའི་རབ་གནས་མཛད་དུ་གསོལ། ཡང་བཅོམ་ལྡན་འདས་ཀྱི་བཀའ་སྩལ་པ། ཡི་གེ་འདི་ལ་མོས་གུས་དང་དད་པ་བསྙེན་བཀུར་བྱས་ན། དུས་ངན་ཐམས་ཅད་ཟད་དོ། །ས་ཡི་སྟེང་གི་མི་རྣམས་ཀུན། དུས་ངན་ནད་མུག་མཚོན་འཁྲུགས་མི་བདེ་བ་ཐམས་ཅད་ལས་ཐར་ནས་བསོད་ནམས་དཔག་ཏུ་མེད་པར་ཐོབ། བསྐལ་པ་བཟང་པོ་དང་ལྡན་པར་གྱུར་ཅིག །ཅེས་སྨོན་ལམ་བཏབ་པ་བཞིན་དུ་དགེ་བའི་ཕྱིར། ཁྱད་པར་དུ་རྟ་ཟླ་དང་ཡོས་ཟླ་གཉིས་ལ་འདོན་ན་ཕན་པའི་ཡོན་ཏན་བསམ་གྱིས་མི་ཁྱབ་པ་ཡོད་དེ། ཡི་གེ་འདི་འབྲི་འདོན་བྱས་ན་མི་རྣམས་ཚེ་རིང་བ་དང་། ནད་མེད་པ་དང་། བདེ་སྐྱིད་དང་ལྡན་པར་གྱུར་ཅིག །འདི་ཆ་གཅིག་བྲིས་ན་བསྐལ་པ་ངན་པའི་གནོད་བྱེད་ཐམས་ཅད་རང་སར་ཞིའོ། །འདི་སྔོན་བྱུང་འབྲུག་ལོ་ལ་གཅིག་དར། འཇིག་རྟེན་ཁམས་སུ་དར་མ་ཐུབ་པར་སྣང་། དུས་ངན་ཤར་སྟོབས་དེ་ལས་བྱུང་། དེའི་རྗེས་སུ་མེ་ཕོ་རྟའི་ལོ་ལ་ཆོས་ཀྱི་ཡི་གེ་འདི་སྤེལ་བ་ཡིན། ཆོས་ཀྱི་ཡི་གེ་འདི་དུས་ངན་བཟློག་པའི་ཐབས་ཡིན། རྒྱལ་ཁམས་ཀུན་ལ་དར་མ་ཐུབ་ན། ལོ་ཏོག་བཙའ་སད་སེར་གསུམ་གྱིས་ཁྱེར་ནས་མུ་གེ་འོང་བ་དང་། ནད་ངོས་མི་ཟིན་པའི་རིམས་ནད་འོང་ནས་སྡུག་བསྔལ་ཞིང་ཡིད་མི་བདེ་བ་འོང་། འདི་བྲི་འདོན་བྱས་ན་སྡུག་བསྔལ་ཀུན་ལས་ཐར་བར་ཐེ་ཚོམ་མེད་དོ། །རྒྱལ་བ་བྱམས་པ་མགོན་པོ་འཇིག་རྟེན་ཁམས་སུ་མ་བྱོན་གྱི་བར་དུ་འགྲོ་བའི་སྐྱབས་བྱེད་པའི་ཆོས་ཀྱི་ཡི་གེ་འདི་ཡིན་ཏེ། དེ་ལ་དད་པ་དང་མོས་གུས་བྱས་ན་སྡིག་སྒྲིབ་དང་བག་ཆགས་ཐམས་ཅད་བྱང་ཞིང་དག་པར་གྱུར་ཅིག །ལོ་འབྲས་རྟག་ཏུ་ལེགས་པར་གྱུར་ཅིག །དགེ་བ་ཕུན་སུམ་ཚོགས་པར་གྱུར་ཅིག །ནོར་བུའི་དགོས་འདོད་འབྱུང་བར་གྱུར་ཅིག །འདི་བཞུགས་རྒྱལ་ཁམས་ཐམས་ཅད་བཀྲ་ཤིས་པར་གྱུར་ཅིག །ས་ཕྱོགས་སུ་བྱིན་ཆགས་པར་གྱུར་ཅིག །རྒྱལ་ཁམས་ནད་མུག་འཁྲུགས་རྩོད་ཉེར་ཞི་ནས། །ལོ་ལེགས་ཆར་འབེབས་ཅི་བསམ་ལྷུན་འགྲུབ་ཤོག །རྒྱལ་བའི་ཞིང་ཁམས་དཔལ་འབྱོར་རབ་རྒྱས་ནས། །ཆོས་འཁོར་བསྐོར་ཞིང་རྟག་ཏུ་བརྟན་གྱུར་ཅིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། །ཐུགས་རྗེ་ཆེན་པོ་དང་བྱམས་པ་དང་ཀུན་དགའ་བོ་དང་། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱི་གསུངས་པ་ལ་མངོན་པར་བསྟོད་དོ། །མ་འོངས་ལུང་བསྟན་གསལ་བྱེད་སྒྲོན་མེ་ཞེས་བྱ་བ་རྫོགས་སོ།། །། ༈ མཉམ་མེད་རྫོགས་པའི་སངས་རྒྱས་ཀྱིས། །གསུངས་པའི་མ་འོངས་ལུང་བསྟན་འདི། །དད་ལྡན་རྣམས་ཀྱི་འཆང་བྱེད་དུ། །པར་བསྐྲུན་ཞུས་པ་རྣམ་དཀར་གྱི། །དགེ་བས་སྙིགས་དུས་རྒུད་པ་སེལ། །རྫོགས་ལྡན་བསྐལ་པའི་དབུག་དབྱུང་ཐོབ། །བདེ་སྐྱིད་ནམ་མཁའི་ནོར་བུ་ཤར། །གཏན་བཟང་བླ་མེད་མྱུར་ཐོབ་ཤོག །ཅེས་མཁྱེན་སྤྲུལ་པས་སྨོན་པ་དགེ་ལེགས་འཕེལ།། །།སྭསྟི། དུས་གསུམ་གཟིགས་པ་སྟོན་པ་མཆོག་དེ་ཡིས། །འབྱུང་འགྱུར་ལུང་བསྟན་གསལ་བར་གསུངས་པ་རྣམས། །རྡོ་རྗེ་འཆང་དངོས་ཆོས྄༵་ཀྱ྄ི༷་བླ྄ོ༷་གྲོས྄༵་ཀྱིས། །སྙིགས་དུས་འགྲོ་ལ་བརྩེ་བས་ཕྱོགས་བསྡུས་མཛད། །བསྟན་འགྲོར་ལྷག་བསམ་གཅིག་ཏུ་དཀར་བ་ཡི། །དད་ཅིང་གུས་པས་འདི་སྒྲུབ་འགྲོ་བ་ཀུན། །གནས་སྐབས་འཇིགས་ཆེན་བཅུ་ལས་རབ་གྲོལ་ནས། །མཐར་ཐུག་རྣམ་མཁྱེན་གོ་འཕང་མྱུར་ཐོབ་ཤོག །མངྒ་ལཾ།། །།

[edit]

@#/__/ma 'ongs lung bstan gsal byed sgron me zhes bya ba bzhugs so/__/ dkon mchog gsum la phyag 'tshal lo/__/bcom ldan 'das kyis dus ngan bskal pa 'byung ba'i dus/__de la phan pa'i yi ge 'di gsungs pa ni/__chos 'di zhes bya ba'i lam dang 'dra'o/__/de ci yi phyir zhe na/__lam 'di la skye 'gro sems can thams cad dang 'dra'o/__/de'i phyir chos 'di ni lam dang 'dra zhes bya'o/__/bcom ldan 'das byang chub shing drung na bzhugs dus/__'dzam bu gling gi skye 'gro sems can thams cad la gzigs nas/__lnga brgya dus kyi tha ma la/__dus ngan bskal pa 'byung ba'i dus/__skye 'gro kun gyi bya ba rtog pa ni/__rnam par dag pa bcu'i sgo nas yi ge 'di dang 'phrad pa'i mi rnams bsod nams che'o/__/chos 'di dang ma 'phrad pa'i mi rnams ni bsod nams chung ba dang /__nyon mongs pa'i sdug bsngal shin tu che'o/__/sa steng gi mi rnams ni mtshon cha'i 'og tu gtubs pa 'dra bar snang /__de nas tshe dang ldan pa kun dga' bos bcom ldan 'das la zhus pa/__bcom ldan 'das khyed kyis mi rnams snying re rje dgongs pa'i don du sdug bsngal 'di las thar bar mdzad du gsol zhes zhus pa dang /__bcom ldan 'das kyis tshe dang ldan pa kun dga' bo la bka' stsal pa/__ngas khyed la bshad do/__/nga nam mkha'i dbyings na bzhugs pa yin/__'dzam bu gling gi skye 'gro rnams la ngas gzigs par dgongs pa yin/__khyed rnams nga yi bka' la nyon/__chos kyi yi ge 'di dus ngan bskal pa 'byung ba'i dus su phan pa'i chos yin no/__/'di bris pa dang 'don pa dang thugs rje chen po'i bsgoms bzlas byas na myur du sdig sgrib byang bar 'gyur ro/__/chos kyi yi ge 'di la spos dang me tog gis legs par mchod na sems can kun kyang bde ba la 'god/__yi ge 'di bri 'don byas na tshe rabs thams cad du skye ba bzang po thob/__de nas shing de'i rtsa bar mtsho chen po zhig yod do/__/de'i 'gram du thugs rje chen po'i sprul pa bzhugs pas skye 'gro sems can thams cad snying re rje thugs rjes dgongs par mdzad nas spyan chab drag tu byung ngo /__/de nas bcom ldan 'das kyis bka' stsal pa/__thugs rje chen po khyed legs par nyon dang spyan chab 'chor mi dgos gsungs 'di la legs par nyon dang lo gsar stag gi zla ba'i nang du mi'i yul du byon par dgongs pa yin/__de'i dus su bskal pa ngan pa'i sems can thams cad 'khor ba sdug bsngal gyi rgya mtsho las sgrol/__sdig pa thams cad spong ba yin/__dmyal bar ltung ba'i sems can thams cad kyang ngas 'dren pa yin/__de'i dus su chos kyi yi ge 'di dar ba yin no/__/yi ge 'di bri 'don byas na nad thams cad chad/__mi gcig gis bris na grong khyer gcig la phan/__grong khyer gcig gis bris na rgyal khams kun la phan/__mi rnams bsod nams 'phel ba dang rkyen ngan bar chad bzlog pa dang dmyal ba'i sdug bsngal las thar bar 'gyur ro/__/tshe 'di dang phyi ma gnyis ka la phan/__'gro ba rigs drug gi sems can thams cad la mkho ba'i lam yin no/__/dper na mtsho dang chu la gru gzings 'gro ba lta bu yin/__yi ge 'di la dad pa dang mos gus rnam par dag pa gal che'o/__/byams pa mi yul du ma byon bar du phan pa'i yi ge rgya chen 'di yin no/__/chos 'di bris zhing gzhan la spel na tshe gcig lus gcig la bsod nams dpag tu med pa 'phel lo/__/'khor ba khrag gi rgya mtsho skems par 'gyur ro/__/sems rnam par ma dag pa bcu'i sgo nas dang po nyon mongs pa'i dbang du 'gyur/__sems can thams cad snying re rje/__'di'i rgyab tu gnyis pa mi'i yul du khrag gis lung pa gang /__gsum pa lo tog so nam byas pa rang gi spyod dbang med/__bzhi pa mi rnams sdug bsngal shin tu mang /__lnga pa lam la 'gro ba'i mi mi mthong /__drug pa gcan gzan sna tshogs kyis grong khyer bkang bar 'gyur/__bdun pa rgyal khams dang khang pa rnams stong par 'gyur/__brgyad pa gcan gzan gar 'ong cha med du 'gro ba mthong /__dgu pa mi re re tsam yod kyang 'dug mi phod/__bcu pa yi dwags gdon gyi grong khyer nyul ba snang /__rnam par ma dag pa bcu'i sgo nas de 'dra 'byung ngo /__/gcig gis gcig la ma gus pa dang rang bstod gzhan smad byed par snang /__mi'i nang rigs bzhi yod do/__/rgyal rigs dang rje rigs dmangs rigs bram ze'i rigs te/__de dag kun kyang yi ge 'di la dad pa dang mos gus byas na dus bskal pa bzang po 'ong /__bcom ldan 'das kyi bka' stsal pa/__yi ge 'di la dad log byas na gcig gis gcig khrid nas dmyal ba mnar med du ltung /__chos kyang mi thos ngu 'bod kyis gnam sa gang /__tshe 'di la yang nad rims bskal pa 'ong /__chos kyi yi ge 'di thos ma thag tu 'bri 'don byas na nad rims dang mu ge kun zhi bar 'gyur/__skye ba bzang po thob par 'gyur ro/__/gzhan yang 'jig rten na sdug bsngal bdun yod/__dmyal ba tsha grang gi sdug bsngal dang gcig__/yi dwags bkres skom gyi sdug bsngal dang gnyis/__dud 'gro blun rmongs kyi=__mi la skye rga na 'chi dang mi khom pa dang dbul 'phong lta ba log 'dzin gyi sdug bsngal=__lha ma yin 'thab rtsod gyi=__lha 'chi 'pho ltung gyi=__srid pa bar do'i sdug bsngal dang bdun yod do/__/de rnams la phan pa'i yi ge 'di la dad pa byas na bsam pa thams cad 'grub cing nad rims thams cad chad par 'gyur/__sngon gyi bskal pa bzang po dang ldan par 'gyur ro/__/de ci'i phyir zhe na/__me pho rta'i lor nam mkha'i dbyings nas rdo bong ba tsam zhig babs nas mtsho chen po gcig gi 'gram du phog__/gnam rdo de gas pas yi ge 'di byon/__chos kyi yi ge 'di sba gsang med par gcig gis gcig la ston pa gal che'o/__/'di gcig dang gnyis kyi don ma yin/__'gro ba sems can thams cad kyi don du bkod pa yin/__'khor ba'i sdug bsngal thams cad zad par shog__/ma 'ongs lnga brgya dus kyi tha ma la/__/sangs rgyas bstan pa mar 'grib dus/__/dge slong tshul khrims nyams pa'i dus/__/bsam ngan yid la dran pa'i dus/__/mna' sdig kha zas za ba'i dus/__/mi dge bcu la spyod pa'i dus/__/sngags pas ngan sngags 'don pa'i dus/__/dug lnga khog du bcug pa'i dus/__/lus ngag log par spyod pa'i dus/__/chos ston mar mar 'gro ba'i dus/__/bya spu ri la skyes pa'i dus/__/shing lcags snod la bcug pa'i dus/__/skye bos las ngan byed pa'i dus/__/las ngan nyes rkyen de rnams kyis/__/'jigs pa'i dus ngan nges par 'ong /__/dus ngan rkyen bzlog yi ge 'di/__/mthong ba tsam gyis bri 'don bya/__/dus ngan bzlog par the tshom med/__/i bden mi bden ltos dang chog__/bden par smra zhing brjod par bgyi/__/mi bden zer ba'i mi rnams kun/__/skra yi rtse mo man chod dang /__/rkang pa'i mthi'u chung yan chod la/__/kha rtags nad kyis theb par 'ong /__/bcom ldan 'das kyis de skad ces bka' stsal pa dang /__thugs rje chen po dang /__byams pa dang /__kun dga' bo dang /__mi dang /__lha ma yin dang dri zar bcas pa'i 'jig rten yi rangs te bcom ldan 'das kyi gsungs pa la mngon par bstod do/__/de nas bcom ldan 'das kyis mtshan dang dpe byad kyis legs par brgyan pa'i phyag g.yas pa sa la brdab ste/__nag po bdud rigs 'khor dang bcas pa 'joms par byas so/__/bdag dga' ba dang yid bde ba bsam gyis mi khyab pa thob pa dang /__nad dang bdud thams cad rab tu zhi bas 'dul bar byed pa'i shes rab kyi pha rol tu phyin pa 'di la bslab par bya'o/__/de nas sangs rgyas bcom ldan 'das gang gi ting nge 'dzin la bzhugs nas gsungs rab mdo sde thams cad nas bsdus pa'i yi ge 'di gsungs/__yang kun dga' bos bcom ldan 'das la zhus pa/__bcom ldan 'das khyed chos gsungs pa 'di don 'khor ba'i rkyen ngan bar chad bzlog__/sa pho sprel gyi lo la nad yams ni 'ong /__de la phan pa'i rim gro zab mo gal che'o/__/sems can rnams kyi 'di 'dra mi bden bsam nas yi ge 'di la ma dad pa dang btang snyoms su lus nas dar ma thub na nag po bdud rigs rnams dga' bar 'gyur ro/__/yi ge 'di bris pa dang dad pa byas na shin tu bde ba 'ong /__chos kyi yi ge 'di yis phan par 'gyur ro/__/bcom ldan 'das kyis legs so legs so shin tu legs so/__sngon nas kun tu ston par bgyi/__/dge ba phun sum legs par 'gyur/__/bsod nams yon tan kun tu rgyas/__/rdzogs pa'i sangs rgyas kun gyis gsungs/__/dga' bo nyer dga' khyed rnams kyis/__/'gro la phan don 'di brtson dang /__/ma 'ongs dus kyi tha ma la/__/'di yi yon tan bsam mi khyab/__/'di la dad pa sus byas na/__/'dod pa thams cad 'grub par 'gyur/__/rkyen ngan bar chad bzlog par 'gyur/__/sangs rgyas bstan la dad pa'i mi/__/spos dang me tog mchod par bgyi/__/de nas byams pa mgon pos nam mkha'i dbyings nas gzigs pas/__mi rnams kyi mig nas khrag gi 'chi ma byung ba mthong nas/__bcom ldan 'das kyi drung du phyin nas zhus pa/__bcom ldan 'das ma 'ongs pa la tshig nyung la don 'dus pa byin rlabs che ba'i chos gnang bar mdzad du gsol/__/bcom ldan 'das kyis bka' stsal pa/__byams pa legs so/__/khyed kyis nga yi bka' la nyon/__/tshangs pa dang ni brgya byin sogs/__/sems can don du bskos pa yin/__/skye 'gro kun la phan pa'i phyir/__/nga yi tshig don 'di dag gsungs/__/'di la gus shing brtson par gyis/__/dge ba phun sum tshogs pa yin/__de nas me pho rta yi lo ston zla ra ba dang /__sa pho sprel lo la yi ge 'di la dad pa med pa'i mi sdig can rnams 'chi bar 'gyur ro/__/yi ge 'di bri 'don byas na mi rnams tshe ring ba dang /__nad med pa dang bsod nams che bar 'gyur ro/__/dus ngan gnod byed kun kyang grong khyer la nyul ba 'ong /__mi'i mi mthong bar gang yod cha med du 'gro zhing gab/__de'i dus su chos kyi yi ge 'di yi byin rlabs kyis 'dre gdon gnod byed thams cad kyang 'dar cing bros par 'gyur ro/__/yi ge 'di rgyal khams kun la spel ba gal che/__mi bden bsam nas the tshom ma byed/__sangs rgyas rig pa dang zhabs su ldan pa bde bar gshegs pa/__'jig rten mkhyen pa/__skyes bu 'dul ba'i kha lo sgyur ba/__bla na med pa lha dang mi rnams kyi ston pa sangs rgyas bcom ldan 'das de'i gsungs pa'i chos 'di la ma dad pa rnams ni/__me rta'i lo la sa 'gul chen po ni 'byung /__de'i dus su dus ngan shar nas me mo lug gi lo la 'gril nas 'chi/__la la ni 'gro lam du 'chi/__la la ni dran pa nyams nas 'chi/__sa pho sprel gyi lo la chu'i 'jigs pa 'ong /__dbyar la mu ge'i nad kyis 'chi/__de'i dus su gdon rigs kyis rgyal khams gang /__chos 'di 'bri 'don byas na gdon bgegs thams cad kyis mi tshugs so/__/sa mo bya'i lor gzhan la gnod pa mi byed/__sha khrag mi za sdom pa bsrung ba gal che/__lcags pho khyi'i lo la stag gzig dom dred 'phar spyang sogs gcan gzan gyis rgyal khams dang grong khyer thams cad gang nas de'i dus su mi rnams grol ba'i thabs chos 'di 'bri 'don byed pa gal che/__lcags mo lug gi lo la 'gro ba sems can thams cad shog skya rlung gis skyod pa ltar 'dug pa'i rang dbang med par 'ong /__mtsho chen po 'phyur ba dang 'dra'o/__/de'i dus su yi ge 'di la mi dad pa'i mi rnams 'chi/__de nas bcom ldan 'das kyis thugs rje chen po la bka' stsal pa/__byi ba'i lo la nam mkha'i dbyings nas chos kyi sgra snyan pa zhig 'ong /__nyi zla'i 'od bzhin du sangs rgyas kyi byin rlabs nus mthus phyogs bzhi mtshams brgyad kun la gsal ba'i yi ge 'di 'bri 'don byas na/__byams pa ma byon bar du phan pa'i yi ge 'di yin no/__/'di 'bri 'don byas na/__/bsod nams ri bo lta bu thob/__/ri bo po tA la yi pho brang na/__/sangs rgyas gsung gi sprul pa bzhugs/__/byang chub sems dpa'i 'khor gyis bskor/__/steng 'og phyogs bcu ma lus pa'i/__/skye 'gro sems can bde la bkod/__/yang thugs rje chen pos mi rnams thams cad snying re rje dgongs nas 'gro ba sems can gyi don du spel ba yin/__mi bden bsam nas the tshom byas na/__dbyar zla ra ba dang 'bring po gnyis la nad rims dar nas 'ong /__snga dro na nas dgong mo 'chi/__de'i dus su dus ngan gyi bskal pa dar nas rtsi shing nags tshal thams cad kyang rked pa nas chad/__brag ri thams cad rtsa ba nas zhig__/sa gzhi thams cad 'dar nas 'dug bzod med/__mi bcu yi nang nas gcig las mi lus/__'di mi bden ma bsam bcom ldan 'das kyi bka' yin/__sems can thams cad snying re rje/__de nas me mo lug gi lo dang sa pho sprel lo la lnga brgya'i dus ngan 'char ba yin/__phyogs bzhi mtshams brgyad kun nas 'khrugs pa 'ong /__mi rnams 'khrugs rtsod nang rme byed nas zad/__dus ngan dag las thar pa'i chos 'di ni/__mthong ba tsam gyis 'bri 'don de ltar byas na 'khrugs pa 'jom/__shin tu bde ba thob/__dge ba dpag med 'byung zhing 'jigs skrag kun las thar/__chos kyi yi ge 'di gcig dang gnyis kyi don ma yin/__'gro ba sems can thams cad kyi don du mdzad pa yin/__chos kyi yi ge 'di rgyal khams phyogs kun du dar na mi rnams la bde skyid bzang po 'ong /__dge ba phun sum tshogs pa yis/__/sems can sdug bsngal med par mdzod/__zla ba lnga drug la yi ge 'di rjes su dran nas brtson par ma gyur na nad rims kyi bskal pa 'ong /__la la ni tsha ba na nas 'chi/__la la ni grang ba na ste 'chi/__la la smyo nas 'chi/__la la ni lkog ma na nas 'chi/__la la snying na nas 'chi/__la la rgyu gzer nad kyis 'chi/__la la ni mchin pa na nas 'chi ba sogs 'ong /__nad gdon 'di rnams la phan pa'i bsrung ba'i yi ge 'di rigs kyi bu dang bu mo gang la la zhig gi lus la 'chang na lha'i gdon dang /__klu'i gdon dang /__'byung po'i gdon dang nad rims de dag thams cad las thar bar srung ba'i sngags/__e ma ho/__phan no phan no swA hA/__pho'i g.yas dang mo'i g.yon du btags so/__de ltar byas na nad rims thams cad las thar/__skye ba bzang po thob par 'gyur/__'di 'bri 'don dang dad pa byas na 'khor ba sdug bsngal khrag gi rgya mtsho las thar bar the tshom med do/__/'jig rten khams kyi mi rnams snying re rje/__mi rnams dus min 'chi ba'i nad thams cad rab tu zhi bar gyur cig__/sngon gyi bskal pa bzang po dang ldan par gyur cig__/bsod nams dpag tu med pa thob par gyur cig__/chos kyi yi ge 'di la ma dad pa'i 'gro ba rnams ni thar pa'i dus med/__grong khyer la yang gdon rigs kyis gang ba 'ong /__de dus mi rnams ngu 'bod kyis gnam sa gang /__'bru bcud yod kyang za dbang med/__/mi grangs mang pos bdud zas byed/__/de nas thugs rje chen po 'phags pa spyan ras gzigs dbang phyug gis sems can gyi rgyud la snying rje skye ba'i don du yan lag 'di gsungs so/__bcom ldan 'das khyed kyis yi ge 'di nyid byin gyis brlabs du gsol/__dbang du bsdu ba'i rab gnas mdzad du gsol/__yang bcom ldan 'das kyi bka' stsal pa/__yi ge 'di la mos gus dang dad pa bsnyen bkur byas na/__dus ngan thams cad zad do/__/sa yi steng gi mi rnams kun/__dus ngan nad mug mtshon 'khrugs mi bde ba thams cad las thar nas bsod nams dpag tu med par thob/__bskal pa bzang po dang ldan par gyur cig__/ces smon lam btab pa bzhin du dge ba'i phyir/__khyad par du rta zla dang yos zla gnyis la 'don na phan pa'i yon tan bsam gyis mi khyab pa yod de/__yi ge 'di 'bri 'don byas na mi rnams tshe ring ba dang /__nad med pa dang /__bde skyid dang ldan par gyur cig__/'di cha gcig bris na bskal pa ngan pa'i gnod byed thams cad rang sar zhi'o/__/'di sngon byung 'brug lo la gcig dar/__'jig rten khams su dar ma thub par snang /__dus ngan shar stobs de las byung /__de'i rjes su me pho rta'i lo la chos kyi yi ge 'di spel ba yin/__chos kyi yi ge 'di dus ngan bzlog pa'i thabs yin/__rgyal khams kun la dar ma thub na/__lo tog btsa' sad ser gsum gyis khyer nas mu ge 'ong ba dang /__nad ngos mi zin pa'i rims nad 'ong nas sdug bsngal zhing yid mi bde ba 'ong /__'di bri 'don byas na sdug bsngal kun las thar bar the tshom med do/__/rgyal ba byams pa mgon po 'jig rten khams su ma byon gyi bar du 'gro ba'i skyabs byed pa'i chos kyi yi ge 'di yin te/__de la dad pa dang mos gus byas na sdig sgrib dang bag chags thams cad byang zhing dag par gyur cig__/lo 'bras rtag tu legs par gyur cig__/dge ba phun sum tshogs par gyur cig__/nor bu'i dgos 'dod 'byung bar gyur cig__/'di bzhugs rgyal khams thams cad bkra shis par gyur cig__/sa phyogs su byin chags par gyur cig__/rgyal khams nad mug 'khrugs rtsod nyer zhi nas/__/lo legs char 'bebs ci bsam lhun 'grub shog__/rgyal ba'i zhing khams dpal 'byor rab rgyas nas/__/chos 'khor bskor zhing rtag tu brtan gyur cig__/bcom ldan 'das kyis de skad ces bka' stsal nas/__/thugs rje chen po dang byams pa dang kun dga' bo dang /__lha dang mi dang lha ma yin dang dri zar bcas pa'i 'jig rten yi rangs te bcom ldan 'das kyi gsungs pa la mngon par bstod do/__/ma 'ongs lung bstan gsal byed sgron me zhes bya ba rdzogs so//___//__!__mnyam med rdzogs pa'i sangs rgyas kyis/__/gsungs pa'i ma 'ongs lung bstan 'di/__/dad ldan rnams kyi 'chang byed du/__/par bskrun zhus pa rnam dkar gyi/__/dge bas snyigs dus rgud pa sel/__/rdzogs ldan bskal pa'i dbug dbyung thob/__/bde skyid nam mkha'i nor bu shar/__/gtan bzang bla med myur thob shog__/ces mkhyen sprul pas smon pa dge legs 'phel//___//swasti/__dus gsum gzigs pa ston pa mchog de yis/__/'byung 'gyur lung bstan gsal bar gsungs pa rnams/__/rdo rje 'chang dngos chosa?~X kyi?X blo?X grosa?~X kyis/__/snyigs dus 'gro la brtse bas phyogs bsdus mdzad/__/bstan 'gror lhag bsam gcig tu dkar ba yi/__/dad cing gus pas 'di sgrub 'gro ba kun/__/gnas skabs 'jigs chen bcu las rab grol nas/__/mthar thug rnam mkhyen go 'phang myur thob shog__/mang+ga laM//___//