JKCL-KABUM-08-NYA-009

🚧 This website is under continued development. We appreciate your patience!

Previous Text Back to Volume PageNext Text

གསུང་ངག་རིན་པོ་ཆེ་ལས་འཕྲོས་པའི་ཟབ་མོའི་དེ་ཁོ་ན་ཉིད་ཀྱི་ཡེ་ཤེས་མདོ་ཙམ་སྟོན་པའི་ཟིན་བྲིས་བླ་མའི་ཞལ་ལུང་།

Wylie title	gsung ngag rin po che las 'phros pa'i zab mo'i de kho na nyid kyi ye shes mdo tsam ston pa'i zin bris bla ma'i zhal lung
Location	chos kyi blo gros bka' 'bum Volume 8, Text 9, Pages 229-235 (Folios 1a1 to 4a6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. gsung ngag rin po che las 'phros pa'i zab mo'i de kho na nyid kyi ye shes mdo tsam ston pa'i zin bris bla ma'i zhal lung. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 229-235. Bir, H.P.: Khyentse Labrang, 2012.
Genre	Notes - zin bris
Cycle	གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ (gsung ngag rin po che lam 'bras bu dang bcas pa)
Colophon	།ཅེས་པའང་སྡེ་གཞུང་མཆོག་སྤྲུལ་རིན་པོ་ཆེར་ནན་གྱིས་ཞུས་ཏེ། རྗེ་དེ་ཉིད་ཀྱིས་གསུང་རིམ་བཞིན་དུ་རྒྱལ་བ་ལྷ་ལས་བབ་པའི་དུས་བཟང་པོར་ཆོས་ཀྱི་བློ་གྲོས་པས་བྲིས་པ་འདིས་ཀྱང་སྙན་བརྒྱུད་ཟབ་མོའི་བསྟན་པ་རྒྱས་པའི་རྒྱུར་གྱུར་ཅིག། སརྦ་དཱ་མངྒ་ལཾ།།
	/ces pa'ang sde gzhung mchog sprul rin po cher nan gyis zhus te/__rje de nyid kyis gsung rim bzhin du rgyal ba lha las bab pa'i dus bzang por chos kyi blo gros pas bris pa 'dis kyang snyan brgyud zab mo'i bstan pa rgyas pa'i rgyur gyur cig/__sarba dA mang+ga laM//

1 Texts in this Section (sde tshan or chos tshan)

229-235	གསུང་ངག་རིན་པོ་ཆེ་ལས་འཕྲོས་པའི་ཟབ་མོའི་དེ་ཁོ་ན་ཉིད་ཀྱི་ཡེ་ཤེས་མདོ་ཙམ་སྟོན་པའི་ཟིན་བྲིས་བླ་མའི་ཞལ་ལུང་། gsung ngag rin po che las 'phros pa'i zab mo'i de kho na nyid kyi ye shes mdo tsam ston pa'i zin bris bla ma'i zhal lung Notes - zin bris	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །གསུང་ངག་རིན་པོ་ཆེ་ལས་འཕྲོས་པའི་ཟབ་མོའི་དེ་ཁོ་ན་ཉིད་ཀྱི་ཡེ་ཤེས་མདོ་ཙམ་སྟོན་པའི་ཟིན་བྲིས་བླ་མའི་ཞལ་ལུང་བཞུགས་སོ། ། བླ་མ་ལ་ཕྱག་འཚལ་ལོ། །འདིར་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་སྒོ་ནས་གདུལ་བྱ་རྣམས་དཀྲི་བ་ལ། ཐོག་མར་སྣང་བ་གསུམ་ལམ་གྱི་གཞི་བཅའ་ལྟར་ཁྲིད་སྦྱོང་བྱས། དེ་ནས་དབང་གིས་རྒྱུད་སྨིན་པར་བྱས། དམ་ཚིག་སྡོམ་པའི་རྣམ་དབྱེ་ཁོང་དུ་ཆུད་དེ་བསྙེན་བསྒྲུབ་ལ་འབད། བླ་མ་ལས་འཁོར་འདས་དབྱེར་མེད་ཀྱི་ཁྲིད་ཞུས་ཏེ། འཁོར་འདས་གཉིས་ཀྱི་སྣང་བ་སེམས་སུ་ཐག་ཆོད། དེ་ཡང་གཅིག་དང་ཐ་དད་ལྷན་ཅིག་དམིགས་ངེས་ཀྱི་རྟགས་སོགས་ཐུན་མོང་གི་རིག་པ་ལ་མ་ལྟོས་པར་རང་གི་ཉམས་མྱོང་གི་རྣམ་རྟོག་ཁ་ཡན་དུ་མ་ཤོར་བ་བསྐྱང་ཚེ་འཁྲུལ་སྣང་གདུགས་ནམ་མཁའ་ལ་འཕྱར་བའི་གྲིབ་མ་དང་འདྲ་བའི་འཁྲུལ་རྟོག་ཐམས་ཅད་སེམས་སྣང་སུ་ཤེས་ཐག་ཆོད་པར་འགྱུར་བ་སྟེ། རྗེ་དཀོན་མཆོག་ལྷུན་གྲུབ་ཀྱིས། གཟུགས་བརྙན་ལ་བྱད་བཞིན་དུ་ཞེན་པ་ལྟར་སྡུག་པ་ལ་འདོད་ཆགས་སྐྱེ། གྲིབ་མ་ལ་འདྲེར་འཛིན་པ་བཞིན་མི་སྡུག་པ་ལ་ཞེ་སྡང་སྐྱེ། ཞེས་གསུངས་པ་ལྟར་ཤེས་དགོས། སེམས་དེའང་སྒྱུ་མ་རང་བཞིན་མེད་པར་ཡིད་ཆེས་རྙེད་པར་བྱ། ཐོས་བསམ་གོ་ཡུལ་གྱི་ལྟ་བའི་རྩི་དང་མ་བྲལ་བ་རིམ་གཉིས་སྒོམ་པ་ལ་ཞུགས། དེའང་བཀའ་སྲོལ་འདིའི་དབང་ལམ་དུ་བྱ་བ་ལུས་དཀྱིལ་གསལ་བཏབ་ནས་ཐུན་བཞིར་དབང་བཞི་བླང་ནས་བསྒོམ་པ་འདི་ཡིན། དེའང་དབང་བཞི་ངོ་སྤྲོད་ལས། བསྐྱེད་པའི་རིམ་པའི་ཡེ་ཤེས་ཀྱིས། །སྣང་བའི་དངོས་པོ་བྱིན་གྱིས་རློབས། །རང་བྱུང་ཡེ་ཤེས་བྱིན་རླབས་ཀྱི། །སེམས་ཉིད་རིག་པར་བྱིན་གྱིས་བརླབས། །ལྷན་ཅིག་སྐྱེས་པའི་ཡེ་ཤེས་ཀྱིས། །ལུས་ལ་བདེ་བར་བྱིན་གྱིས་བརླབས། །ངག་པ་བདེ་སྟོང་ཆེན་པོ་ཡི། །ཐམས་ཅད་བྱིན་གྱིས་བརླབས་པ་ཡིན། །ཞེས་གསུངས་པ་ལྟར་སྟན་ཐོག་གཅིག་ཏུ་དབང་བཞིའི་ལམ་བཞི་བསྒོམས་པས་ལྟ་བ་བཞི་རྒྱུད་ལ་སྐྱེས་ནས། རིམ་གྱིས་དབང་བཞི་པའི་ཡེ་ཤེས་ངོ་འཕྲོད་དེ། གྲུབ་མཐའ་སྙོགས་པ་ཡིན་ལ། དེའང་བུམ་དབང་སྣང་སྟོང་ཟུང་འཇུག་ལ་ངོ་བོ་ཉིད་གསུམ་དང་། གསང་དབང་གསལ་སྟོང་ཟུང་འཇུག་ལ་རང་བྱུང་བཞི་དང་། གསུམ་པ་ལ་བདེ་སྟོང་ཟུང་འཇུག་ལ་དགའ་བ་བཞི། བཞི་པ་ལའང་དེ་བཞིན་དུ་ཡོད་པ་ལས། རྣལ་འབྱོར་པའི་རྒྱུད་ལ་ཐ་མལ་འཕྲོ་རྒོད་དུག་ལྔའི་རྟོག་པ་དང་། སྣང་སྟོང་གསལ་སྟོང་བདེ་སྟོང་ཟུང་འཇུག་གསུམ་ལ་སོགས་ཉམས་བཟང་ངན་གང་ཤར་ཡང་བྱུང་རྒྱལ་དུ་གཏོང་གསུངས་པ། ཉམས་གང་བྱུང་ལ་རེ་དོག་དང་རྩིས་གདབ་མི་བྱེད་པར་རྒྱུ་དུས་ཀྱི་ལྟ་བའི་ངང་མ་ཤོར་བར་བསྐྱངས་ཐུབ་དགོས། སྤྱིར་དབང་བཞི་པའི་ཡེ་ཤེས་ངོ་སྤྲོད་དེ་ཚེ་འདིར་གྲུབ་མཐའ་སྙོགས་པ་ལ་སྔོན་གྱི་ལས་འཕྲོ་དང་། བླ་མ་ལ་སངས་རྒྱས་དངོས་སུ་མཐོང་བའི་མོས་གུས་དང་། དྲག་ལ་རྒྱུན་མི་འཆད་པའི་བརྩོན་འགྲུས་གསུམ་ཀ་འཛོམ་དགོས་པར་གསུངས་པས། བླ་མ་ལ་མོས་གུས་བསྐྱེད་པ་གལ་ཆེ། བླ་མ་ལ་སངས་རྒྱས་དངོས་ཀྱི་འདུ་ཤེས་སྐྱེ་ན་བླ་མ་དང་ཡི་དམ་ཐ་དད་དུ་མི་འཆོར། དེའང་ལྟ་བའི་དབང་གི་རང་སེམས་ལས་ལོགས་ན་མེད་པར་གོ་ན་རང་སེམས་སངས་རྒྱས་སུ་ངོ་ཤེས་པ་འོང་། དེའི་ངང་ནས་དགེ་སྦྱོར་བྱས་ཚེ་ལམ་ཐམས་ཅད་བླ་མའི་རྣལ་འབྱོར་དང་། སྣང་སྲིད་ཐམས་ཅད་བླ་མའི་རོལ་པར་འཆར་བ་ཞིག་འབྱུང་བ་ཡིན་པས། དེ་ལྟ་བུའི་མོས་གུས་ཀྱི་ཉེ་རྒྱུ་བྱས་ནས་བླ་མ་དང་ཐུགས་ཡིད་དབྱེར་མེད་དུ་འདྲེས་ཏེ་ཕྱག་རྒྱ་ཆེན་པོ་དབང་བཞིའི་ཡེ་ཤེས་མངོན་དུ་གྱུར་པ་ཡིན་ཏེ། ཁོ་བོས་བྱས་པའི་ལམ་རིམ་སྨོན་ལམ་ལས་དྲི་མེད་སེམས་ཀྱི་ཆོས་ཉིད་བྱང་ཆུབ་སེམས། །བློ་དང་ཚིག་གིས་མ་བཅོས་གདོད་མའི་གཤིས། །སྟོང་གསལ་ཕྱོགས་རིས་བྲལ་བའི་བླ་མ་ལས། །ནམ་ཡང་གཡོ་བ་མེད་པར་བྱིན་གྱིས་རློབས། །ཞེས་པ་ལྟར་རྣམ་ཐར་སྒོ་གསུམ་འདུས་མ་བྱས་པའི་དབྱིངས་མངོན་དུ་གྱུར་ནས་གྲུབ་མཐའ་སྙོགས་པ་ཡིན་ནོ། །དེ་ལྟ་བུའི་ཆོས་སྐུ་མངོན་དུ་གྱུར་ན་ཆོས་རྗེ་ས་པཎ་གྱིས། ཆོས་ཀྱི་དབྱིངས་ཀྱི་ཕོ་བྲང་དུ། །རྒྱལ་བ་རྣམས་ལ་ཆོས་སྐུར་སྣང་། །ཞེས་གསུངས་པ་ལྟར་སངས་རྒྱས་རྣམས་དང་དགོངས་པ་དབྱེར་མེད་དུ་གྱུར། །སྟུག་པོ་བཀོད་པའི་ཞིང་ཁམས་སུ། །རྒྱལ་སྲས་རྣམས་ལ་ལོངས་སྐུར་སྣང་། །ཞེས་སོགས་པ་ལྟར་གདུལ་བྱ་མཆོག་དམན་རྣམས་ལ་གཟུགས་སྐུའི་སྣང་བ་འཁོར་བ་མ་སྟོངས་གི་བར་རྒྱུན་མི་འཆད་པར་སྣང་ནས་འགྲོ་བའི་དོན་མཛད་པ་ཡིན་ནོ། །དབང་བཞི་པའི་ཡེ་ཤེས་ཀྱི་ངོ་བོ་སྟོན་བྱེད་རྒྱུད་ལས་གསུངས་པ་ཤིན་ཏུ་མང་ཞིང་། རྗེ་ས་པཎ་གྱི་ཕྱག་ཆེན་མིག་ཐུར་ལས། ཡོད་དང་མེད་པ་ལ་སོགས་པ། །དངོས་པོའི་གནས་ལུགས་དེ་ལ་མེད། །བསྒོམ་བྱ་སྒོམ་བྱེད་ལ་སོགས་པ། །བསྒོམ་པར་བྱ་བ་ཡོད་མ་ཡིན། །སེམས་ལ་ངོ་བོ་མ་གྲུབ་པའི། །སེམས་ཀྱི་ངོ་སྤྲོད་ག་ལ་ཡོད། །ཅེས་སོགས་དང་། རྟོགས་རྒྱུ་མེད་པའི་དོན་རྟོགས་ན། །གྲོལ་རྒྱུ་མེད་པའི་སེམས་ཉིད་གྲོལ། །ཞེས་དང་། རྗེ་བཙུན་གྱིས། དབུ་མ་སེམས་ཙམ་ལ་སོགས་པ། །ཚིག་ཏུ་བརྗོད་པ་སྤྲོས་པ་ཡིན། །ཡིད་ལ་བསམ་པ་རྣམ་རྟོག་ཡིན། །རང་བཞིན་བརྗོད་མེད་བསམ་མེད་ཡིན། །ཞེས་སོགས་ཤིན་ཏུ་མང་ངོ་། །དེའང་བླ་མ་ལ་སྐྱབས་གནས་ཀུན་འདུས་སུ་ཤེས་ནས་མོས་གུས་ཀྱི་གསོལ་བ་འདེབས་པ་སངས་རྒྱས་ཀུན་འདུས་ཕྱི་ཡི་བླ་མ་དང་། བླ་མ་ལ་མོས་གུས་ཀྱིས་དྲན་བཞིན་པའི་སེམས་ཀྱི་གསལ་ཆ་དེ་སེམས་ཉིད་འོད་གསལ་ནང་གི་བླ་མ་ཡིན། སེམས་ཀྱི་གསལ་ཆ་དེ་བཅས་བཅོས་དགག་སྒྲུབ་མ་ཤོར་བར་དབྱིངས་རིག་བསྲེས་ནས་མཉམ་པར་འཇོག་ཐུབ་ན་ཐུགས་ཡིད་དབྱེར་མེད་འདྲེས་ནས་རྟོག་པ་ནང་ནས་འཆར་བ་ཡིན་ནོ། །ལམ་དུས་ཀྱི་དབང་བཞི་པའི་སྐུ་བཞི་ངོ་སྤྲོད། སེམས་ཀྱི་གཤིས་ཅི་ཡང་མ་གྲུབ་པ་ཆོས་སྐུ། གདངས་བདེ་ཆེན་སུ་མ་འགགས་པ་ལོངས་སྐུ། རྩལ་ལྷ་སྐུར་འཆར་བ་སྤྲུལ་སྐུ། །དེ་གསུམ་དབྱེར་མི་ཕྱེད་པ་བསྒོམ་བྱ་སྒོམ་བྱེད་དང་བྲལ་བ་ངོ་བོ་ཉིད་ཀྱི་སྐུར་ངོ་སྤྲད་པ་ཡིན། བླ་མ་དང་ཐུགས་ཡིད་དབྱེར་མེད་བསྲེས་ནས་མཉམ་པར་འཇོག་ཚེ། གཤིས་ཅིར་ཡང་མ་གྲུབ་པའི་སྟོང་ཉིད་ཆོས་སྐུ། གདངས་གང་དུའང་མ་འགགས་པའི་ཕྱོགས་རིས་དང་བྲལ་བའི་གསལ་ཆ་ལོངས་སྐུ། རྩལ་མོས་གུས་སུ་དུང་ངེ་བ་སྤྲུལ་སྐུ། བསྒོམ་བྱ་སྒོམ་བྱེད་དང་བྲལ་བ་ངོ་བོ་ཉིད་སྐུར་འཇོག་པ་ཡིན་པས་སྔ་མ་ལ་བདེ་བ་ལམ་དུ་ཁྱེར་བ་དང་། ཕྱི་མ་ལ་མོས་གུས་ལམ་དུ་ཁྱེར་བ་ཡིན་ཅིང་། མདོར་ན་བླ་མའི་བྱིན་རླབས་ཞུགས་ན་ཆོས་ཅན་གྱི་སྣང་བ་གང་སྣང་ཐམས་ཅད་ལམ་དུ་ཁྱེར་ཤེས་ན་ཕྱག་རྒྱ་ཆེན་པོ་རྟོགས་པའི་ཉེ་རྒྱུར་འགྲོ་བ་ཡིན་ནོ། །ཅེས་པའང་སྡེ་གཞུང་མཆོག་སྤྲུལ་རིན་པོ་ཆེར་ནན་གྱིས་ཞུས་ཏེ། རྗེ་དེ་ཉིད་ཀྱིས་གསུང་རིམ་བཞིན་དུ་རྒྱལ་བ་ལྷ་ལས་བབ་པའི་དུས་བཟང་པོར་ཆོས་ཀྱི་བློ་གྲོས་པས་བྲིས་པ་འདིས་ཀྱང་སྙན་བརྒྱུད་ཟབ་མོའི་བསྟན་པ་རྒྱས་པའི་རྒྱུར་གྱུར་ཅིག། སརྦ་དཱ་མངྒ་ལཾ།། །།

[edit]

@#/__/gsung ngag rin po che las 'phros pa'i zab mo'i de kho na nyid kyi ye shes mdo tsam ston pa'i zin bris bla ma'i zhal lung bzhugs so/__/ bla ma la phyag 'tshal lo/__/'dir gsung ngag rin po che lam 'bras bu dang bcas pa'i sgo nas gdul bya rnams dkri ba la/__thog mar snang ba gsum lam gyi gzhi bca' ltar khrid sbyong byas/__de nas dbang gis rgyud smin par byas/__dam tshig sdom pa'i rnam dbye khong du chud de bsnyen bsgrub la 'bad/__bla ma las 'khor 'das dbyer med kyi khrid zhus te/__'khor 'das gnyis kyi snang ba sems su thag chod/__de yang gcig dang tha dad lhan cig dmigs nges kyi rtags sogs thun mong gi rig pa la ma ltos par rang gi nyams myong gi rnam rtog kha yan du ma shor ba bskyang tshe 'khrul snang gdugs nam mkha' la 'phyar ba'i grib ma dang 'dra ba'i 'khrul rtog thams cad sems snang su shes thag chod par 'gyur ba ste/__rje dkon mchog lhun grub kyis/__gzugs brnyan la byad bzhin du zhen pa ltar sdug pa la 'dod chags skye/__grib ma la 'drer 'dzin pa bzhin mi sdug pa la zhe sdang skye/__zhes gsungs pa ltar shes dgos/__sems de'ang sgyu ma rang bzhin med par yid ches rnyed par bya/__thos bsam go yul gyi lta ba'i rtsi dang ma bral ba rim gnyis sgom pa la zhugs/__de'ang bka' srol 'di'i dbang lam du bya ba lus dkyil gsal btab nas thun bzhir dbang bzhi blang nas bsgom pa 'di yin/__de'ang dbang bzhi ngo sprod las/__bskyed pa'i rim pa'i ye shes kyis/__/snang ba'i dngos po byin gyis rlobs/__/rang byung ye shes byin rlabs kyi/__/sems nyid rig par byin gyis brlabs/__/lhan cig skyes pa'i ye shes kyis/__/lus la bde bar byin gyis brlabs/__/ngag pa bde stong chen po yi/__/thams cad byin gyis brlabs pa yin/__/zhes gsungs pa ltar stan thog gcig tu dbang bzhi'i lam bzhi bsgoms pas lta ba bzhi rgyud la skyes nas/__rim gyis dbang bzhi pa'i ye shes ngo 'phrod de/__grub mtha' snyogs pa yin la/__de'ang bum dbang snang stong zung 'jug la ngo bo nyid gsum dang /__gsang dbang gsal stong zung 'jug la rang byung bzhi dang /__gsum pa la bde stong zung 'jug la dga' ba bzhi/__bzhi pa la'ang de bzhin du yod pa las/__rnal 'byor pa'i rgyud la tha mal 'phro rgod dug lnga'i rtog pa dang /__snang stong gsal stong bde stong zung 'jug gsum la sogs nyams bzang ngan gang shar yang byung rgyal du gtong gsungs pa/__nyams gang byung la re dog dang rtsis gdab mi byed par rgyu dus kyi lta ba'i ngang ma shor bar bskyangs thub dgos/__spyir dbang bzhi pa'i ye shes ngo sprod de tshe 'dir grub mtha' snyogs pa la sngon gyi las 'phro dang /__bla ma la sangs rgyas dngos su mthong ba'i mos gus dang /__drag la rgyun mi 'chad pa'i brtson 'grus gsum ka 'dzom dgos par gsungs pas/__bla ma la mos gus bskyed pa gal che/__bla ma la sangs rgyas dngos kyi 'du shes skye na bla ma dang yi dam tha dad du mi 'chor/__de'ang lta ba'i dbang gi rang sems las logs na med par go na rang sems sangs rgyas su ngo shes pa 'ong /__de'i ngang nas dge sbyor byas tshe lam thams cad bla ma'i rnal 'byor dang /__snang srid thams cad bla ma'i rol par 'char ba zhig 'byung ba yin pas/__de lta bu'i mos gus kyi nye rgyu byas nas bla ma dang thugs yid dbyer med du 'dres te phyag rgya chen po dbang bzhi'i ye shes mngon du gyur pa yin te/__kho bos byas pa'i lam rim smon lam las dri med sems kyi chos nyid byang chub sems/__/blo dang tshig gis ma bcos gdod ma'i gshis/__/stong gsal phyogs ris bral ba'i bla ma las/__/nam yang g.yo ba med par byin gyis rlobs/__/zhes pa ltar rnam thar sgo gsum 'dus ma byas pa'i dbyings mngon du gyur nas grub mtha' snyogs pa yin no/__/de lta bu'i chos sku mngon du gyur na chos rje sa paN gyis/__chos kyi dbyings kyi pho brang du/__/rgyal ba rnams la chos skur snang /__/zhes gsungs pa ltar sangs rgyas rnams dang dgongs pa dbyer med du gyur/__/stug po bkod pa'i zhing khams su/__/rgyal sras rnams la longs skur snang /__/zhes sogs pa ltar gdul bya mchog dman rnams la gzugs sku'i snang ba 'khor ba ma stongs gi bar rgyun mi 'chad par snang nas 'gro ba'i don mdzad pa yin no/__/dbang bzhi pa'i ye shes kyi ngo bo ston byed rgyud las gsungs pa shin tu mang zhing /__rje sa paN gyi phyag chen mig thur las/__yod dang med pa la sogs pa/__/dngos po'i gnas lugs de la med/__/bsgom bya sgom byed la sogs pa/__/bsgom par bya ba yod ma yin/__/sems la ngo bo ma grub pa'i/__/sems kyi ngo sprod ga la yod/__/ces sogs dang /__rtogs rgyu med pa'i don rtogs na/__/grol rgyu med pa'i sems nyid grol/__/zhes dang /__rje btsun gyis/__dbu ma sems tsam la sogs pa/__/tshig tu brjod pa spros pa yin/__/yid la bsam pa rnam rtog yin/__/rang bzhin brjod med bsam med yin/__/zhes sogs shin tu mang ngo /__/de'ang bla ma la skyabs gnas kun 'dus su shes nas mos gus kyi gsol ba 'debs pa sangs rgyas kun 'dus phyi yi bla ma dang /__bla ma la mos gus kyis dran bzhin pa'i sems kyi gsal cha de sems nyid 'od gsal nang gi bla ma yin/__sems kyi gsal cha de bcas bcos dgag sgrub ma shor bar dbyings rig bsres nas mnyam par 'jog thub na thugs yid dbyer med 'dres nas rtog pa nang nas 'char ba yin no/__/lam dus kyi dbang bzhi pa'i sku bzhi ngo sprod/__sems kyi gshis ci yang ma grub pa chos sku/__gdangs bde chen su ma 'gags pa longs sku/__rtsal lha skur 'char ba sprul sku/__/de gsum dbyer mi phyed pa bsgom bya sgom byed dang bral ba ngo bo nyid kyi skur ngo sprad pa yin/__bla ma dang thugs yid dbyer med bsres nas mnyam par 'jog tshe/__gshis cir yang ma grub pa'i stong nyid chos sku/__gdangs gang du'ang ma 'gags pa'i phyogs ris dang bral ba'i gsal cha longs sku/__rtsal mos gus su dung nge ba sprul sku/__bsgom bya sgom byed dang bral ba ngo bo nyid skur 'jog pa yin pas snga ma la bde ba lam du khyer ba dang /__phyi ma la mos gus lam du khyer ba yin cing /__mdor na bla ma'i byin rlabs zhugs na chos can gyi snang ba gang snang thams cad lam du khyer shes na phyag rgya chen po rtogs pa'i nye rgyur 'gro ba yin no/__/ces pa'ang sde gzhung mchog sprul rin po cher nan gyis zhus te/__rje de nyid kyis gsung rim bzhin du rgyal ba lha las bab pa'i dus bzang por chos kyi blo gros pas bris pa 'dis kyang snyan brgyud zab mo'i bstan pa rgyas pa'i rgyur gyur cig/__sarba dA mang+ga laM//___//