JKW-KABUM-02-KHA-001-027

🚧 This website is under continued development. We appreciate your patience!

Previous Text Back to Volume PageNext Text

སྤྱན་རས་གཟིགས།

Wylie title	spyan ras gzigs
Location	mkhyen brtse'i bka' 'bum Volume 2, sde tshan 1, Text 27, Pages 108-113 (Folios 54b5 to 57a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. spyan ras gzigs. In 'jam dbyangs mkhyen brtse'i dbang po'i bka' 'bum, Vol. 2: 108-113. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

27 108-113	སྤྱན་རས་གཟིགས། spyan ras gzigs Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཕགས་པ་སྤྱན་རས་གཟིགས་དབང་ཕྱུག་ནི། སྒྲོན་བསྐལ་འདིའི་དགུ་བརྒྱ་དགུ་བཅུ་རྩ་གཅིག་གི་སྔོན་བསྐལ་པ་འཛིན་པ་ཞེས་བྱ་བར་སངས་རྒྱས་ཡེ་ཤེས་ཏོག་ལ་བྱང་ཆུབ་མཆོག་ཏུ་ཐུགས་བསྐྱེད་ནས་ཚོགས་གཉིས་བསགས་པས་དེ་བཞིན་གཤེགས་པ་འོད་ཟེར་ཀུན་འཕགས་དཔལ་བརྩེགས་རྒྱལ་པོ་ཞེས་བྱ་བར་སངས་རྒྱས་ཤིང་། བསྐལ་བཟང་སངས་རྒྱས་སྟོང་རྩ་གཉིས་ཀྱང་འདིའི་ངོ་བོར་བཞུགས་པ་ཡིན་ལ། རྣམ་པ་ཙམ་དུ་བྱང་ཆུབ་སེམས་དཔའ་སློབ་ལམ་པའི་ཚུལ་གྱིས་རིགས་དྲུག་གི་ཡིད་ཅན་སྤྱི་དང་། ཁྱད་པར་བོད་ཁམས་ཁ་བ་ཅན་གྱི་སེམས་ཅན་ཐམས་ཅད་ལ་བུ་གཅིག་པའི་མ་ལྟར་ལྷག་པར་བརྩེ་བར་མཛད་པའི་ཚུལ་མདོ་རྒྱུད་བསྟན་བཅོས་རྣམས་ནས་རྒྱ་ཆེར་གསུངས་པ་ལྟར་དང་། བདེ་བ་ཅན་དུ་འོད་དཔག་མེད་པའི་ཉེ་གནས་ཀྱི་ཚུལ་གྱིས་བཞུགས་ཤིང་། ནམ་ཞིག་འོད་དཔག་མེད་ཞི་བར་གཤེགས་པའི་ཚེ་སངས་རྒྱས་འོད་ཟེར་ཀུན་འཕགས་དཔལ་བརྩེགས་རྒྱལ་པོར་འགྱུར་བ་སོགས་སྒྱུ་མ་ལྟ་བུའི་རྣམ་འཕྲུལ་མཐའ་ཀླས་ཤིང་། ལྷོ་ཕྱོགས་རྒྱ་མཚོའི་འགྲམ་པོ་ཏཱ་ལ་སྟེ་གྲུ་འཛིན་གྱི་རི་བོར་བཞུགས་པའི་ཚེ། སྒྲིབ་པ་རྣམ་སེལ་གྱིས་བསྐུལ་ནས་བོད་རྗེ་གཉའ་ཁྲི་བཙན་པོར་གྱུར་ནས་བོད་ཁམས་བྱིན་གྱིས་བརླབས། ཀུན་ཏུ་བཟང་པོས་བསྐུལ་ནས་ལྷ་ཐོ་ཐོ་རི་སྙན་བཙན་དུ་གྱུར་ནས་དམ་པའི་ཆོས་ཀྱི་དབུ་བརྙེས། ཐུགས་རྗེ་ཆེན་པོས་བསྐུལ་ནས་སྲོང་བཙན་སྒམ་པོར་གྱུར་ཏེ་ཆོས་ཀྱི་སྲོལ་བཏོད། འཇམ་པའི་དབྱངས་ཀྱིས་བསྐུལ་ནས་ཁྲི་སྲོང་ལྡེའུ་བཙན་དུ་གྱུར་ཏེ་ཆོས་དར་ཞིང་རྒྱས་པར་མཛད། གཞན་ཡང་བྱང་ཕྱོགས་ཤམྦྷ་ལའི་རིགས་ལྡན་ཆོས་རྒྱལ་པདྨ་དཀར་པོ་དང་། བོད་ཡུལ་དུ་བསྟན་པ་ཕྱི་དར་ལ་འབྲོམ་སྟོན་པ་སོགས་མདོར་ན་སྐྱེས་ཆེན་དུ་མར་སྤྲུལ་ནས་འགྲོ་བ་སྲིད་པའི་མཚོ་ལས་སྒྲོལ་བའི་དམ་བཅའ་གཞན་གྱིས་བསྒྲུན་དུ་མེད་པའི་ཕྱིར་སྙིང་རྗེའི་དབང་ཕྱུག་ཅེས་མཚན་གྱི་ཡི་གེས་བརྗིད་པ་དེ་ཉིད་ཀྱི་མངོན་བརྗོད་སུ་ཞིག་གི་རྣ་ལམ་དུ་སོང་ཡང་དོན་ཆེན་པོ་དང་ལྡན་པའི་ཚུལ་སྙིང་རྗེ་པདྨ་དཀར་པོར་སྤྱན་རས་གཟིགས་དབང་ཕྱུག་བྱང་ཆུབ་ཏུ་ལུང་བསྟན་པའི་ཚེ་སྨོན་ལམ་འདི་སྐད་ཅེས་བཏབ་སྟེ། བདག་གི་མིང་གང་གིས་ཐོས་པ་ལ་ངན་འགྲོའི་འཇིགས་པ་མེད་པ་དང་། མི་ཁོམས་པར་མི་ལྟུང་བ་དང་། བདེ་བ་ཅན་དུ་སྐྱེ་བར་གྱུར་ཅིག །ཅེས་གསུངས་སོ། །ཞེས་དང་། དམ་ཆོས་པད་དཀར་ལས། གང་གིས་སངས་རྒྱས་བཅོམ་ལྡན་འདས་གདྒཱའི་ཀླུང་དྲུག་ཅུ་རྩ་བཞིའི་བྱེ་མ་སྙེད་ལ་ཕྱག་འཚལ་ཞིང་མཚན་འཛིན་པ་དང་། གང་བྱང་ཆུབ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་མཚན་འཛིན་པའི་བསོད་ནམས་ཀྱི་ཕུང་པོ་དེ་གཉིས་ཀ་མཉམ་སྟེ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་ཟད་པར་སླ་བ་མ་ཡིན་ནོ། །ཞེས་དང་། མཚན་རབ་ཡོངས་སུ་བསྟན་པའི་མདོ་ལས། ང་ཐུགས་རྗེ་ཆེན་པོ་ནི་འགྲོ་བ་ཐམས་ཅད་དབང་དུ་སྡུད་ཅིང་སྡུག་བསྔལ་ཐམས་ཅད་སྐྱོབ་པ་ཡིན། ངའི་མིང་དྲན་པར་གྱུར་ན་ཕ་རོལ་པོས་མདའ་འཕངས་པར་གྱུར་ཀྱང་ཟུག་པར་མི་འགྱུར། མཚོན་རྣོན་པོས་བཏབ་ཀྱང་དེ་ལ་ཟུག་པར་མི་འགྱུར། གྲགས་པ་ཆེ་ཞིང་རིགས་བརྒྱུད་འཕེལ་བར་འགྱུར། ཟས་ནོར་གྱིས་མི་ཕོངས་ཤིང་ལོངས་སྤྱོད་རྒྱས་པར་འགྱུར། ངའི་མིང་དྲན་པ་དེ་སུས་ཀྱང་ཐུབ་པར་མི་འགྱུར། འབྲོག་དགོན་པའམ། ནགས་ཁྲོད་དུ་སོང་ཡང་སེང་གེ་དང་། སྟག་དང་། གཟིག་དང་། དོམ་དང་། དྲེད་དང་། གཡག་རྒོད་དང་སྦྲུལ་གདུག་པས་མི་གཡེང་། ངའི་མིང་དྲན་པ་ཙམ་གྱིས་དེ་དག་འབྲོས་པར་འགྱུར། མེ་དཔུང་འབར་བའི་ནང་དུ་ཤོར་ན་ཡང་མིང་དྲན་པས་པདྨ་གང་བའི་རྫིང་བུར་འགྱུར། ངའི་མཚན་ཐོས་པ་ཙམ་གྱིས་ཆུར་མི་བྱིངས། ཆུས་མི་ཁྱེར། མེས་མི་འཚིག །གང་ཞིག་ངའི་མིང་དྲན་པར་བྱེད་པ་དེ་དག་ཐར་པ་ཐོབ་པར་འགྱུར། ཞེས་སོགས་རྒྱ་ཆེར་གསུངས་ཤིང་། ཕྱག་སྟོང་སྤྱན་སྟོང་གི་གཟུངས་ལས་ཀྱང་། སྤྱན་རས་གཟིགས་ཀྱི་མཚན་བརྗོད་ན་ཡང་སྡིག་པ་གྲངས་མེད་པ་བྱང་ཞིང་། བསོད་ནམས་དཔག་ཏུ་མེད་པ་ཐོབ་སྟེ། འདི་ནས་ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཞེས་སོགས་བསམ་གྱིས་མི་ཁྱབ་པར་བཀའ་སྩལ་ལ། དེ་བཞིན་དུ་གང་གིས་རིག་སྔགས་ཡི་གེ་དྲུག་བཟླས་པ་ལ་སོགས་པའི་ཕན་ཡོན་ཀྱང་། པདྨ་ཅོད་པན་གྱི་རྒྱུད་ལས། ང་ཡིད་ལ་བྱས་ནས། ཨོཾ་མ་ཎི་པདྨེ་ཧཱུྃ། ཞེས་པའི་རིག་སྔགས་འདི་ཟློས་པའི་རིགས་ཀྱི་བུའམ། རིགས་ཀྱི་བུ་མོ་གང་ཡིན་པ་དེས། ལན་གཅིག་རྗོད་པར་བྱེད་དམ་ཡིད་ལ་བྱས་ནས་ལུས་ལ་བཅངས་ན། མཚམས་མེད་པ་ལྔ་དང་། དེ་དང་ཉེ་བ་ལྔ་དང་། སྡིག་པ་ཐམས་ཅད་བྱང་ནས། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། མི་ཁོམས་པའི་གནས་བརྒྱད་སྤངས་ཤིང་ལུས་ངག་ཡིད་གསུམ་སྡུག་བསྔལ་བར་མི་འགྱུར་རོ། །གཅན་གཟན་དང་། སྲིན་པོ་དང་། མི་དང་། མི་མ་ཡིན་པ་ཐམས་ཅད་དང་། ནད་དང་འཇིགས་པ་ཐམས་ཅད་ལས་ཐར་བར་འགྱུར་རོ། །ཆོས་ཀྱི་སྐུའི་དོན་རྟོགས་ནས་གཟུགས་ཀྱི་སྐུ་ཐུགས་རྗེ་ཆེན་པོའི་ཞལ་མཐོང་བར་འགྱུར་རོ། །ཞེས་སོགས་རྒྱ་ཆེར་གསུངས་ཤིང་། མདོར་ན་རྟག་ཏུ་བཟླས་བརྗོད་བྱེད་པ་དེས་ཆུ་བོའི་ངོགས་སུ་ཁྲུས་བྱས་ན་ཆུ་དེ་ལ་འཐུང་ཚད་འཁོར་བ་ལས་ཐར་བ་དང་། དེའི་ལུས་ལ་འཕོག་པའི་རླུང་གིས་ཁྱབ་པས་རེག་པའི་འགྲོ་བ་སྡིག་སྒྲིབ་དག་ནས་ངན་སོང་དུ་མི་སྐྱེ་བར་གསུངས་ན། གཞན་ལྟ་སྨོས་ཀྱང་ཅི་དགོས། དེར་མ་ཟད་ལུས་ལ་གང་གིས་བཅངས་པ་དེ་རྡོ་རྗེའི་ལུས་སུ་འགྱུར་བ་དང་། མཐོང་བ་ཙམ་གྱིས་རྣམ་པར་གྲོལ་བ་དང་། འདི་ལ་འཇུག་པའི་གང་ཟག་དེ་ཆོས་ཕུང་བརྒྱད་ཁྲི་བཞི་སྟོང་ལ་འཇུག་པ་དང་། འདི་བཟུང་བས་གསུང་རབས་ཡན་ལག་བཅུ་གཉིས་བཟུང་བར་འགྱུར་བ་དང་། ཚེ་འདི་ནད་གདོན་དུས་མིན་གྱི་འཆི་བ་ཐམས་ཅད་སྲུང་ཞིང་། ཤི་འཕོས་ནས་ཀྱང་སངས་རྒྱས་ཀུན་གྱིས་བསྔགས་པའི་ཞིང་བདེ་བ་ཅན་དུ་སྐྱེ་བར་འགྱུར་བ་སོགས་ཕན་ཡོན་བསམ་གྱིས་མི་ཁྱབ་པའི་ཕྱིར། འཕགས་པ་ཐུགས་རྗེ་ཆེན་པོའི་སྐུ་གསུང་ཐུགས་ཀྱི་རྟེན་བཞེངས་པ་དང་། རྡོ་རྗེ་གསུམ་གྱི་རྣལ་འབྱོར་ལ་བརྩོན་པ་དང་། ཐ་ན་མཚན་བརྗོད་ཅིང་ཕྱག་འཚལ་བ་དང་། ཡི་གེ་དྲུག་པ་ཐུགས་དམ་དུ་བྱ་བར་བསྐུལ་བ་ཡིན་ནོ།། །། ༈

[edit]

spyan ras gzigs/ 'phags pa spyan ras gzigs dbang phyug ni/_sgron bskal 'di'i dgu brgya dgu bcu rtsa gcig gi sngon bskal pa 'dzin pa zhes bya bar sangs rgyas ye shes tog la byang chub mchog tu thugs bskyed nas tshogs gnyis bsags pas de bzhin gshegs pa 'od zer kun 'phags dpal brtsegs rgyal po zhes bya bar sangs rgyas shing /_bskal bzang sangs rgyas stong rtsa gnyis kyang 'di'i ngo bor bzhugs pa yin la/_rnam pa tsam du byang chub sems dpa' slob lam pa'i tshul gyis rigs drug gi yid can spyi dang /_khyad par bod khams kha ba can gyi sems can thams cad la bu gcig pa'i ma ltar lhag par brtse bar mdzad pa'i tshul mdo rgyud bstan bcos rnams nas rgya cher gsungs pa ltar dang /_bde ba can du 'od dpag med pa'i nye gnas kyi tshul gyis bzhugs shing /_nam zhig 'od dpag med zhi bar gshegs pa'i tshe sangs rgyas 'od zer kun 'phags dpal brtsegs rgyal por 'gyur ba sogs sgyu ma lta bu'i rnam 'phrul mtha' klas shing /_lho phyogs rgya mtsho'i 'gram po tA la ste gru 'dzin gyi ri bor bzhugs pa'i tshe/_sgrib pa rnam sel gyis bskul nas bod rje gnya' khri btsan por gyur nas bod khams byin gyis brlabs/_kun tu bzang pos bskul nas lha tho tho ri snyan btsan du gyur nas dam pa'i chos kyi dbu brnyes/_thugs rje chen pos bskul nas srong btsan sgam por gyur te chos kyi srol btod/_'jam pa'i dbyangs kyis bskul nas khri srong lde'u btsan du gyur te chos dar zhing rgyas par mdzad/_gzhan yang byang phyogs sham+b+ha la'i rigs ldan chos rgyal pad+ma dkar po dang /_bod yul du bstan pa phyi dar la 'brom ston pa sogs mdor na skyes chen du mar sprul nas 'gro ba srid pa'i mtsho las sgrol ba'i dam bca' gzhan gyis bsgrun du med pa'i phyir snying rje'i dbang phyug ces mtshan gyi yi ges brjid pa de nyid kyi mngon brjod su zhig gi rna lam du song yang don chen po dang ldan pa'i tshul snying rje pad+ma dkar por spyan ras gzigs dbang phyug byang chub tu lung bstan pa'i tshe smon lam 'di skad ces btab ste/_bdag gi ming gang gis thos pa la ngan 'gro'i 'jigs pa med pa dang /_mi khoms par mi ltung ba dang /_bde ba can du skye bar gyur cig__/ces gsungs so/_/zhes dang /_dam chos pad dkar las/_gang gis sangs rgyas bcom ldan 'das gad+gA'i klung drug cu rtsa bzhi'i bye ma snyed la phyag 'tshal zhing mtshan 'dzin pa dang /_gang byang chub sems dpa' chen po spyan ras gzigs dbang phyug la phyag 'tshal zhing mtshan 'dzin pa'i bsod nams kyi phung po de gnyis ka mnyam ste/_bskal pa bye ba khrag khrig brgya stong du yang zad par sla ba ma yin no/_/zhes dang /_mtshan rab yongs su bstan pa'i mdo las/_nga thugs rje chen po ni 'gro ba thams cad dbang du sdud cing sdug bsngal thams cad skyob pa yin/_nga'i ming dran par gyur na pha rol pos mda' 'phangs par gyur kyang zug par mi 'gyur/_mtshon rnon pos btab kyang de la zug par mi 'gyur/_grags pa che zhing rigs brgyud 'phel bar 'gyur/_zas nor gyis mi phongs shing longs spyod rgyas par 'gyur/_nga'i ming dran pa de sus kyang thub par mi 'gyur/_'brog dgon pa'am/_nags khrod du song yang seng ge dang /_stag dang /_gzig dang /_dom dang /_dred dang /_g.yag rgod dang sbrul gdug pas mi g.yeng /_nga'i ming dran pa tsam gyis de dag 'bros par 'gyur/_me dpung 'bar ba'i nang du shor na yang ming dran pas pad+ma gang ba'i rdzing bur 'gyur/_nga'i mtshan thos pa tsam gyis chur mi byings/_chus mi khyer/_mes mi 'tshig__/gang zhig nga'i ming dran par byed pa de dag thar pa thob par 'gyur/_zhes sogs rgya cher gsungs shing /_phyag stong spyan stong gi gzungs las kyang /_spyan ras gzigs kyi mtshan brjod na yang sdig pa grangs med pa byang zhing /_bsod nams dpag tu med pa thob ste/_'di nas shi 'phos nas kyang 'jig rten gyi khams bde ba can du skye bar 'gyur ro/_/zhes sogs bsam gyis mi khyab par bka' stsal la/_de bzhin du gang gis rig sngags yi ge drug bzlas pa la sogs pa'i phan yon kyang /_pad+ma cod pan gyi rgyud las/_nga yid la byas nas/_oM ma Ni pad+me hU~M/_zhes pa'i rig sngags 'di zlos pa'i rigs kyi bu'am/_rigs kyi bu mo gang yin pa des/_lan gcig rjod par byed dam yid la byas nas lus la bcangs na/_mtshams med pa lnga dang /_de dang nye ba lnga dang /_sdig pa thams cad byang nas/_sems can dmyal ba dang /_dud 'gro'i skye gnas dang /_mi khoms pa'i gnas brgyad spangs shing lus ngag yid gsum sdug bsngal bar mi 'gyur ro/_/gcan gzan dang /_srin po dang /_mi dang /_mi ma yin pa thams cad dang /_nad dang 'jigs pa thams cad las thar bar 'gyur ro/_/chos kyi sku'i don rtogs nas gzugs kyi sku thugs rje chen po'i zhal mthong bar 'gyur ro/_/zhes sogs rgya cher gsungs shing /_mdor na rtag tu bzlas brjod byed pa des chu bo'i ngogs su khrus byas na chu de la 'thung tshad 'khor ba las thar ba dang /_de'i lus la 'phog pa'i rlung gis khyab pas reg pa'i 'gro ba sdig sgrib dag nas ngan song du mi skye bar gsungs na/_gzhan lta smos kyang ci dgos/_der ma zad lus la gang gis bcangs pa de rdo rje'i lus su 'gyur ba dang /_mthong ba tsam gyis rnam par grol ba dang /_'di la 'jug pa'i gang zag de chos phung brgyad khri bzhi stong la 'jug pa dang /_'di bzung bas gsung rabs yan lag bcu gnyis bzung bar 'gyur ba dang /_tshe 'di nad gdon dus min gyi 'chi ba thams cad srung zhing /_shi 'phos nas kyang sangs rgyas kun gyis bsngags pa'i zhing bde ba can du skye bar 'gyur ba sogs phan yon bsam gyis mi khyab pa'i phyir/_'phags pa thugs rje chen po'i sku gsung thugs kyi rten bzhengs pa dang /_rdo rje gsum gyi rnal 'byor la brtson pa dang /_tha na mtshan brjod cing phyag 'tshal ba dang /_yi ge drug pa thugs dam du bya bar bskul ba yin no//___//_!