JKW-KABUM-02-KHA-001-019

🚧 This website is under continued development. We appreciate your patience!

Previous Text Back to Volume PageNext Text

ཡོན་ཏན་གྱི་དབེན་གནས་བསམ་འགྲུབ་ཤེལ་གྱི་བྲག་ཕུག་ལ་བསྔགས་པའི་གཏམ་རྡོ་རྗེ་སྒྲ་མའི་མཆོད་སྤྲིན།

Wylie title	yon tan gyi dben gnas bsam 'grub shel gyi brag phug la bsngags pa'i gtam rdo rje sgra ma'i mchod sprin
Location	mkhyen brtse'i bka' 'bum Volume 2, sde tshan 1, Text 19, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yon tan gyi dben gnas bsam 'grub shel gyi brag phug la bsngags pa'i gtam rdo rje sgra ma'i mchod sprin. In 'jam dbyangs mkhyen brtse'i dbang po'i bka' 'bum, Vol. 2: . Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam
Colophon	ཅེས་པའང་རང་ལོ་ཉི་ཤུ་པ་ཀུན་ལྡན་ལོའི་དབང་ཆེན་སྤྲེའུ་ཟླ་བའི་དཀར་ཕྱོགས་ཀྱི་ཚེས་བཅུ་དུས་ཀྱི་དགེ་མཚན་ཕུན་སུམ་ཚོགས་པའི་ཉིན་གྲུབ་པའི་བསྟི་གནས་དེ་ཉིད་དུ་ཤར་མདོ་ཁམས་ཀྱི་བཙུན་པ་འཇིགས་མེད་མཁྱེན་བརྩེའི་ཟློས་གར་གྱིས་གང་ཤར་གསོལ་བ་བཏབ་པ་སིདྡྷི་རསྟུ།།
	ces pa'ang rang lo nyi shu pa kun ldan lo'i dbang chen spre'u zla ba'i dkar phyogs kyi tshes bcu dus kyi dge mtshan phun sum tshogs pa'i nyin grub pa'i bsti gnas de nyid du shar mdo khams kyi btsun pa 'jigs med mkhyen brtse'i zlos gar gyis gang shar gsol ba btab pa sid+d+hi rastu

1 Texts in this Section (sde tshan or chos tshan)

19 57-61	ཡོན་ཏན་གྱི་དབེན་གནས་བསམ་འགྲུབ་ཤེལ་གྱི་བྲག་ཕུག་ལ་བསྔགས་པའི་གཏམ་རྡོ་རྗེ་སྒྲ་མའི་མཆོད་སྤྲིན། yon tan gyi dben gnas bsam 'grub shel gyi brag phug la bsngags pa'i gtam rdo rje sgra ma'i mchod sprin Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཡོན་ཏན་གྱི་དབེན་གནས་བསམ་འགྲུབ་ཤེལ་གྱི་བྲག་ཕུག་ལ་བསྔགས་པའི་གཏམ་རྡོ་རྗེ་སྒྲ་མའི་མཆོད་སྤྲིན་ཅེས་བྱ་བ། ན་མོ་གུ་རུ་པདྨཱ་ཀ་ར་ཡ། སྲིད་དང་ཞི་བའི་མཐའ་ལ་མི་གནས་བྱང་ཆུབ་དམ་པའི་རང་བཞིན་ནི། །བྲལ་སྨིན་ཡོན་ཏན་རྒྱ་མཚོའི་རང་གཟུགས་ཡིད་ཅན་ཀུན་གྱི་ངལ་འཚོའི་དཔྱིད། །རེ་ཞིག་ཚུ་རོལ་མཐོང་བའི་སླད་དུ་ངོ་མཚར་རྡོ་རྗེའི་གནས་ཆེན་པོར། །བསྔགས་པའི་དགེ་མཚན་སྲིད་ན་རབ་འབར་བས༷མ་འགྲུབ༷་ཤེལ་གྱི་ཕུག་པར་སྣང་། ༡ །ཨེ་མ་རིག་འཛིན་ཌཱ་ཀི་བྱེ་སྙེད་ཀྱིས། །མཚན་གྱི་ནོར་བུའི་ཅོད་པན་གུས་མཛད་པ། །མཚོ་སྐྱེས་པདྨ་ཐོད་ཕྲེང་ཡེ་ཤེས་སྐུའི། །བྱིན་རླབས་གྲགས་དཀར་ཡི་གེ་སྲིད་ན་བརྗིད། ༢ །གང་དེས་ལྷག་པར་གནས་པའི་མེ་ཏོག་གིས། །འཁྱུད་པའི་ངོ་མཚར་རྫོགས་པར་བཟུང་བ་ནི། །གཞན་མིན་གྲུབ་པའི་བསྟི་གནས་འདིའོ་ཞེས། །མཁའ་སྤྱོད་མིག་ཡངས་མ་རྣམས་ཅ་ཅོ་སྒྲོག ༣ །ཁྱད་པར་ནང་རྒྱུད་སྡེ་གསུམ་རྡོ་རྗེའི་གླུ། །ཐོག་མར་ལེན་མཁས་དྲི་མེད་ཟླ་ཤར་གྱིས། །བདེ་ཆེན་བདུད་རྩིའི་ཆུ་རྒྱུན་རབ་གཡོ་བ། །སྐལ་བཟང་འཆི་མེད་གྲུབ་པའི་དཔྱིད་དུ་གྱུར། ༤ །དབུས་ན་ཡེ་ཤེས་རང་སྣང་ལས་གྲུབ་པའི། །ཞིང་ཁམས་མངོན་སུམ་ཉིད་དུ་སར་འཕོས་པར། །རིགས་འདུས་མ་ཧཱ་གུ་རུའི་སྣང་བརྙན་མཆོག །མཐོང་བའི་མོད་ནས་གཟུང་འཛིན་རང་སར་གྲོལ། ༥ །གཡས་ཕྱོགས་བྲག་རིའི་བ་གམ་བརྗིད་ཆགས་པར། །འཇའ་ལུས་རྡོ་རྗེའི་བཙུན་མོ་མཚོ་རྒྱལ་མས། །ཡུན་རིང་བསམ་གཏན་དགའ་བས་སྙེམས་པའི་གནས། །ཐོས་པ་ཙམ་གྱིས་བདེ་སྟོང་རྟོགས་པ་སྤོར། ༦ །གཡོན་ན་ལྷུན་གྲུབ་རིག་འཛིན་པ༷དྨ༷་ཡིས། །བྱིན་རླབས་ཡ་མཚན་ཤེལ༷་གྱི་ཕུ༷ག་པ་ཞེས། །ཡོན་ཏན་བརྒྱ་ཕྲག་དུ་མས་གཏམས་པའི་ཚུལ། །དྲན་པས་དོན་གཉིས་འདོད་པ་ཅིར་ཡང་འཇོ། ༦ །དེ་སོགས་ཀུན་རྫོབ་སྤྲོས་པའི་ངོ་མཚར་གྱིས། །དོན་དམ་སྤྲོས་མེད་བདེན་དོན་ལ་སྦྱོར་བའི། །བདེན་གཉིས་དབྱེར་མེད་འོད་གསལ་རྡོ་རྗེའི་ཞིང་། །གྲུབ་རི་འདི་ནི་ལྷན་སྐྱེས་ཆོས་སྐུའི་གྲོང་། ༧ །ཀུན་བརྟགས་བྲག་རིའི་བ་གམ་ལྷུན་སྟུག་པར། །གཞན་དབང་དག་པ་རབ་འབྱམས་ཡེ་ཤེས་སེམས། །ཡོངས་གྲུབ་འདུ་འབྲལ་མེད་པར་རྟག་བཞུགས་པའི། །གྲུབ་རི་འདི་ནི་ཟུང་འཇུག་ལོངས་སྐུའི་གནས། ༨ །རྣམ་མང་འཕགས་དང་མཁས་པའི་ཚོགས་རྣམས་ཀྱིས། །བྱིན་རླབས་བཀྲ་ཤིས་སྣང་བ་རབ་འབར་ཞིང་། །དཔའ་བོ་མཁའ་འགྲོའི་འདུ་བ་མི་ཟད་པའི། །གྲུབ་རི་འདི་ནི་འགྲོ་འདུལ་སྤྲུལ་སྐུའི་ཞིང་།༩ །ཡིད་འཕྲོག་འཇའ་ཟེར་ཐིག་ལེའི་དྲ་བའི་དབུས། །རྩ་གསུམ་རྒྱལ་བ་རྒྱ་མཚོའི་དཀྱིལ་འཁོར་གྱིས། །སྐལ་ལྡན་མངོན་སུམ་བྱིན་རློབས་དབུགས་དབྱུང་བའི། །གྲུབ་རི་འདི་ནི་དག་པ་མཁའ་སྤྱོད་གྲོང་།༡༠ །ལྷག་པར་རྒྱལ་དབང་མཚོ་སྐྱེས་བླ་མ་ཉིད། །དུས་གསུམ་དུས་མེད་ཆེན་པོར་ཞབས་བཀོད་ནས། །བསིལ་ལྗོངས་ཕན་བདེའི་དགའ་སྟོན་སྤེལ་བའི་ཕྱིར། །གྲུབ་རི་འདི་ནི་པདྨ་དྲྭ་བའི་གླིང་། ༡༡ །དེ་སླད་མཐོང་ཐོས་དྲན་རེག་ཡིད་ཅན་ཀུན། །དོན་གཉིས་འདོད་དགུ་ལྷུག་པར་འཇོ་བའི་གཞི། །སྔོན་མེད་ནོར་བུའི་ཆུ་གཏེར་ཉམས་དགའ་བར། །ཞུགས་པའི་རྣལ་འབྱོར་གཞོན་ནུའི་ལྷག་བསམ་གྱིས། ༡༢ །ཕྱི་ནང་མཆོད་སྤྲིན་སྤྱི་དང་ཁྱད་པར་དུ། །བདེ་གཤེགས་ཀུན་འདུས་པདྨ་ཐོད་ཕྲེང་གི །ལམ་ཟབ་རྡོ་རྗེའི་རྣལ་འབྱོར་ལྷུར་བླངས་ཤིང་། །དགའ་སྟོན་ཚོགས་ཀྱི་འདུ་བས་ལྷག་པར་མཆོད། ༡༣ །ཨ་ཧོ་རྔ་ཡབ་གླིང་དངོས་གནས་མཆོག་འདིར། །དཀར་ཕྱོགས་ཌཱ་ཀི་འདུ་བའི་དུས་ཀྱི་ཚེ། །ཨོ་རྒྱན་བླ་མའི་གོ་འཕང་དོན་གཉེར་བ། །སྐྱེ་བ་དུ་མར་གོམས་པའི་ལེགས་བྱས་མཐུ། ༡༤།དེ་སླད་རྣམ་དཀར་དགེ་ཚོགས་གདྒཱའི་ཀླུང་། །བྱང་ཆུབ་སྙིང་པོའི་ལམ་གསུམ་ལ་ཆགས་པས། །ཡིད་ཅན་སྒྲིབ་གཉིས་དྲི་མ་ཀུན་སྦྱངས་ནས། །ཕན་བདེའི་འཛུམ་དཀར་མཆོག་ཏུ་གྲོལ་གྱུར་ཅིག ༡༥ །གཞན་ཡང་བརྒྱད་གཉིས་འཇིགས་པའི་གདུང་བ་ཞི། །ཚེ་བསོད་དཔལ་འབྱོར་ལུང་རྟོགས་ཡོན་ཏན་རྒྱས། །སྣང་གསུམ་འཕོ་ཆགས་དབུ་མར་དབང་བྱས་ནས། །གཟུང་འཛིན་ཡིད་སྲུབས་དཔུང་ཚོགས་མཐར་བྱེད་ཤོག ༡༦ །ནམ་ཞིག་འདིར་སྣང་ནུབ་པའི་དེ་མ་ཐག །སྙིང་དབུས་པདྨ་འོད་ཀྱི་དཀྱིལ་འཁོར་དུ། །རང་རིག་མཚོ་སྐྱེས་རྡོ་རྗེ་མངོན་གྱུར་ནས། །སྐུ་གསུམ་གོ་འཕང་མྱུར་དུ་འགྲུབ་གྱུར་ཅིག ༡༧ །མདོར་ན་ཡོན་ཏན་བདུད་རྩིའི་དོ་ཤལ་མཁའ་དང་མཉམ་པར་བཀོད་པའི་ཕུལ། །མཐའ་གཉིས་བཅོམ་པའི་གྲགས་དཀར་རབ་མཛེས་ཟླ་བ་ནོར་བུའི་སྙེམས་འཆང་བ། །ཐམས་ཅད་མཁྱེན་པའི་སྒྱུ་འཕྲུལ་རྨད་བྱུང་པདྨཱ་ཀ་རའི་རྣམ་ཐར་གྱིས། །ས་གསུམ་བཀྲ་ཤིས་སྣང་བ་སྦྱིན་ལ་རྟག་པ་དམ་པའི་མཆོག་བརྙེས་ཤོག ༡༨ །ཅེས་པའང་རང་ལོ་ཉི་ཤུ་པ་ཀུན་ལྡན་ལོའི་དབང་ཆེན་སྤྲེའུ་ཟླ་བའི་དཀར་ཕྱོགས་ཀྱི་ཚེས་བཅུ་དུས་ཀྱི་དགེ་མཚན་ཕུན་སུམ་ཚོགས་པའི་ཉིན་གྲུབ་པའི་བསྟི་གནས་དེ་ཉིད་དུ་ཤར་མདོ་ཁམས་ཀྱི་བཙུན་པ་འཇིགས་མེད་མཁྱེན་བརྩེའི་ཟློས་གར་གྱིས་གང་ཤར་གསོལ་བ་བཏབ་པ་སིདྡྷི་རསྟུ།། །། ༈

[edit]

yon tan gyi dben gnas bsam 'grub shel gyi brag phug la bsngags pa'i gtam rdo rje sgra ma'i mchod sprin/__ yon tan gyi dben gnas bsam 'grub shel gyi brag phug la bsngags pa'i gtam rdo rje sgra ma'i mchod sprin ces bya ba/_na mo gu ru pad+mA ka ra ya/_srid dang zhi ba'i mtha' la mi gnas byang chub dam pa'i rang bzhin ni/_/bral smin yon tan rgya mtsho'i rang gzugs yid can kun gyi ngal 'tsho'i dpyid/_/re zhig tshu rol mthong ba'i slad du ngo mtshar rdo rje'i gnas chen por/_/bsngags pa'i dge mtshan srid na rab 'bar bsaXm 'grubaX shel gyi phug par snang /_1_/e ma rig 'dzin DA ki bye snyed kyis/_/mtshan gyi nor bu'i cod pan gus mdzad pa/_/mtsho skyes pad+ma thod phreng ye shes sku'i/_/byin rlabs grags dkar yi ge srid na brjid/_2_/gang des lhag par gnas pa'i me tog gis/_/'khyud pa'i ngo mtshar rdzogs par bzung ba ni/_/gzhan min grub pa'i bsti gnas 'di'o zhes/_/mkha' spyod mig yangs ma rnams ca co sgrog__3__/khyad par nang rgyud sde gsum rdo rje'i glu/_/thog mar len mkhas dri med zla shar gyis/_/bde chen bdud rtsi'i chu rgyun rab g.yo ba/_/skal bzang 'chi med grub pa'i dpyid du gyur/_4__/dbus na ye shes rang snang las grub pa'i/__/zhing khams mngon sum nyid du sar 'phos par/_/rigs 'dus ma hA gu ru'i snang brnyan mchog__/mthong ba'i mod nas gzung 'dzin rang sar grol/_5__/g.yas phyogs brag ri'i ba gam brjid chags par/_/'ja' lus rdo rje'i btsun mo mtsho rgyal mas/_/yun ring bsam gtan dga' bas snyems pa'i gnas/_/thos pa tsam gyis bde stong rtogs pa spor/_6__/g.yon na lhun grub rig 'dzin paXd+maX yis/_/byin rlabs ya mtshan shelaX gyi phuXg pa zhes/_/yon tan brgya phrag du mas gtams pa'i tshul/_/dran pas don gnyis 'dod pa cir yang 'jo/_6__/de sogs kun rdzob spros pa'i ngo mtshar gyis/_/don dam spros med bden don la sbyor ba'i/_/bden gnyis dbyer med 'od gsal rdo rje'i zhing /_/grub ri 'di ni lhan skyes chos sku'i grong /_7_/kun brtags brag ri'i ba gam lhun stug par/_/gzhan dbang dag pa rab 'byams ye shes sems/_/yongs grub 'du 'bral med par rtag bzhugs pa'i/_/grub ri 'di ni zung 'jug longs sku'i gnas/_8__/rnam mang 'phags dang mkhas pa'i tshogs rnams kyis/_/byin rlabs bkra shis snang ba rab 'bar zhing /_/dpa' bo mkha' 'gro'i 'du ba mi zad pa'i/_/grub ri 'di ni 'gro 'dul sprul sku'i zhing /9_/yid 'phrog 'ja' zer thig le'i dra ba'i dbus/_/rtsa gsum rgyal ba rgya mtsho'i dkyil 'khor gyis/_/skal ldan mngon sum byin rlobs dbugs dbyung ba'i/_/grub ri 'di ni dag pa mkha' spyod grong /10_/lhag par rgyal dbang mtsho skyes bla ma nyid/_/dus gsum dus med chen por zhabs bkod nas/_/bsil ljongs phan bde'i dga' ston spel ba'i phyir/_/grub ri 'di ni pad+ma drwa ba'i gling /_11__/de slad mthong thos dran reg yid can kun/_/don gnyis 'dod dgu lhug par 'jo ba'i gzhi/_/sngon med nor bu'i chu gter nyams dga' bar/_/zhugs pa'i rnal 'byor gzhon nu'i lhag bsam gyis/_12__/phyi nang mchod sprin spyi dang khyad par du/_/bde gshegs kun 'dus pad+ma thod phreng gi__/lam zab rdo rje'i rnal 'byor lhur blangs shing /_/dga' ston tshogs kyi 'du bas lhag par mchod/_13__/a ho rnga yab gling dngos gnas mchog 'dir/_/dkar phyogs DA ki 'du ba'i dus kyi tshe/_/o rgyan bla ma'i go 'phang don gnyer ba/_/skye ba du mar goms pa'i legs byas mthu/_14/de slad rnam dkar dge tshogs gad+gA'i klung /_/byang chub snying po'i lam gsum la chags pas/_/yid can sgrib gnyis dri ma kun sbyangs nas/_/phan bde'i 'dzum dkar mchog tu grol gyur cig__15_/gzhan yang brgyad gnyis 'jigs pa'i gdung ba zhi/_/tshe bsod dpal 'byor lung rtogs yon tan rgyas/_/snang gsum 'pho chags dbu mar dbang byas nas/_/gzung 'dzin yid srubs dpung tshogs mthar byed shog_16_/nam zhig 'dir snang nub pa'i de ma thag__/snying dbus pad+ma 'od kyi dkyil 'khor du/_/rang rig mtsho skyes rdo rje mngon gyur nas/_/sku gsum go 'phang myur du 'grub gyur cig__17_/mdor na yon tan bdud rtsi'i do shal mkha' dang mnyam par bkod pa'i phul/_/mtha' gnyis bcom pa'i grags dkar rab mdzes zla ba nor bu'i snyems 'chang ba/_/thams cad mkhyen pa'i sgyu 'phrul rmad byung pad+mA ka ra'i rnam thar gyis/_/sa gsum bkra shis snang ba sbyin la rtag pa dam pa'i mchog brnyes shog__18__/ces pa'ang rang lo nyi shu pa kun ldan lo'i dbang chen spre'u zla ba'i dkar phyogs kyi tshes bcu dus kyi dge mtshan phun sum tshogs pa'i nyin grub pa'i bsti gnas de nyid du shar mdo khams kyi btsun pa 'jigs med mkhyen brtse'i zlos gar gyis gang shar gsol ba btab pa sid+d+hi rastu//___//_!_