ཐུགས་ཀྱི་དབེན་གནས་ལྷོ་བྲག་མཁར་ཆུ་རྡོ་རྗེའི་ཕོ་བྲང་ལ་བསྔགས་པའི་གཏམ་རྡོ་རྗེ་སྒྲ་མའི་རོལ་མོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	thugs kyi dben gnas lho brag mkhar chu rdo rje'i pho brang la bsngags pa'i gtam rdo rje sgra ma'i rol mo
Location	mkhyen brtse'i bka' 'bum Volume 2, sde tshan 1, Text 18, Pages 56-57 (Folios 28b2 to 29a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. thugs kyi dben gnas lho brag mkhar chu rdo rje'i pho brang la bsngags pa'i gtam rdo rje sgra ma'i rol mo. In 'jam dbyangs mkhyen brtse'i dbang po'i bka' 'bum, Vol. 2: 56-57. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam
Colophon	།ཅེས་པའང་མཁར་ཆུ་དཔལ་གྱི་ཕུག་རིང་དུ། དཔལ་ཆེན་པོ་ཡང་དག་ཧེ་རུ་ཀ་མར་མེ་དགུ་པས་རྡོ་རྗེ་གསུམ་གྱི་རྣལ་འབྱོར་ལ་མཉམ་པར་བཞག་པའི་རྗེས་དེ་མ་ཐག་བར། གྲུབ་པའི་དཔྱིད་འཇིགས་པ་མེད་པས་གང་ཤར་གསོལ་བ་བཏབ་པ་ཤུ་བྷཾ།།
	ces pa'ang mkhar chu dpal gyi phug ring du/_dpal chen po yang dag he ru ka mar me dgu pas rdo rje gsum gyi rnal 'byor la mnyam par bzhag pa'i rjes de ma thag bar/_grub pa'i dpyid 'jigs pa med pas gang shar gsol ba btab pa shu b+haM

1 Texts in this Section (sde tshan or chos tshan)

18 56-57	ཐུགས་ཀྱི་དབེན་གནས་ལྷོ་བྲག་མཁར་ཆུ་རྡོ་རྗེའི་ཕོ་བྲང་ལ་བསྔགས་པའི་གཏམ་རྡོ་རྗེ་སྒྲ་མའི་རོལ་མོ། thugs kyi dben gnas lho brag mkhar chu rdo rje'i pho brang la bsngags pa'i gtam rdo rje sgra ma'i rol mo Discourses - gtam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཐུགས་ཀྱི་དབེན་གནས་ལྷོ་བྲག་མཁར་ཆུ་རྡོ་རྗེའི་ཕོ་བྲང་ལ་བསྔགས་པའི་གཏམ་རྡོ་རྗེ་སྒྲ་མའི་རོལ་མོ་ཞེས་བྱ་བ། ན་མོ་གུ་རུ་ཤྲཱི་ཧེ་རུ་ཀཱ་ཡ། ཀུན་ཏུ་རྟོག་པའི་མཐའ་ལ་མི་གནས་ཆོས་དབྱིངས་ཤིན་ཏུ་ཞི་བའི་དངོས། །ཟུང་འཇུག་སྒྱུ་མའི་རྩེ་དགའ་ལ་ཆགས་དེ་ཚེ་རྟེན་དང་བརྟེན་པར་བཅས། །ཕྱི་རོལ་ཡུལ་གྱི་སྣང་ཆར་ཤར་བས་ཡིད་ཅན་རྒྱ་མཚོ་དབུགས་འབྱིན་པར། །ཨེ་མ་དེ་བཱི་ཀོ་ཊ་ཉིད་ཅེས་ཌཱ་ཀིའི་ཚོགས་རྣམས་རྟག་ཏུ་བསྙེན། ༡ །འོད་སྣང་མཐའ་ཡས་མཚོ༷་སྐྱེས༷་རྒྱ༷ལ་བ༷་ཡིས། །ཡེ་ཤེས་གཟིགས་པ་དམ་པ་ཕྱོགས་འདི་རུ། །ལྷུང་བའི་མོད་ནས་སྲས་བཅས་རྣམ་འདྲེན་ཀུན། །དགྱེས་པ་མཆོག་གི་བདུད་རྩིའི་གྲུ་ཆར་འབེབས།༢ །དེ་ན་དཔལ་ཆེན་གྲུབ་པའི་སློ༷བ་དཔོ༷ན་གྱིས། །རྡོ་རྗེ་ན༷མ་མཁའི་དཀྱིལ་ལྟར་རྣམ་དག་པའི། །སྙི༷ང་པོའི་བདེན་པ་གཟིགས་པའི་ངོ་མཚར་ཡང་། །ཚུར་མཐོང་འགྲོ་བའི་དཔྱིད་དུ་ལྷག་པར་འབར། ༣ །གཞན་ཡང་ལམ་ལྔ་ས་བཅུའི་ཐེམ་སྐས་ལ། །འཛེགས་པའི་འཕགས་དང་མཁས་པ་བྱེ་སྙེད་ཀྱིས། །ཤིས་པ་སྒྲུབ་པའི་གཏམ་གྱི་རོལ་མོ་ནི། །ཕྱོགས་ཀྱི་བུ་མོའི་རྣ་བའི་རྒྱན་དུ་རྔམས། ༤ །སྲ་མཁྲེགས་བྲག་རིའི་བ་གམ་བརྗིད་ཆགས་ཤིང་། །ལྷུང་ལྷུང་འབབས་ཆུའི་རྒྱུད་མང་མཆོག་ཏུ་སྙན། །དགའ་ཚལ་མེ་ཏོག་ཕྲེང་བས་རབ་མཛེས་པའི། །བསམ་གཏན་གྲུབ་པ་རྣམས་ཀྱི་ངལ་འཚོའི་གཞི། ༥ །གང་འདིར་དད་པས་རྐང་སེན་བཀོད་བྱས་ནས། །དྭངས་པའི་ལྷག་བསམ་དྲི་མེད་ཆུ་གཏེར་ལས། །རབ་འཁྲུངས་མཆོད་པའི་སྤྲིན་གྱི་དཔག་བསམ་གྱིས། །རྣམ་འདྲེན་སྲས་བཅས་དགྱེས་པ་བསྐྱེད་པ་དང་། ༦ །དཔལ་ཆེན་ཡང་དག་གྲུབ་པའི་རྡོ༷་རྗེ༷འི་ཕུག༷ །རི༷ང་ནས་མོས་པས་བསྙེན་པའི་དོན་མཐུན་གྱིས། །ཧེ་རུ་ཀ་དཔལ་འབར་པའི་རྡོ་རྗེའི་དབྱིག །རྣལ་འབྱོར་གསུམ་གྱི་རྒྱལ་མཚན་རྩེ་མོར་བཀོད། ༧ །དེ་ལས་བྱུང་པའི་ཡེ་ཤེས་གཟི་ཡིས་མཐའ་གཉིས་ལྟ་བའི་འཛིན་སྟངས་ཞི། །དེ་ཡིས་རྣམ་བཅས་ཁ་སྦྱོར་ལ་འཁྱུད་དེས་ཀྱང་ཟུང་འཇུག་གྲུབ་པའི་མོད། །རྒྱུ་དང་མི་རྒྱུའི་དངོས་ཀུན་རོ་མཉམ་སྲིད་པ་མཐར་བྱེད་ཧེ་རུ་ཀའི། །བཀྲ་ཤིས་རྟག་པ་དམ་པའི་དཔལ་གྱིས་གྲོང་ཁྱེར་གསུམ་ཀུན་དབུགས་འབྱིན་ཤོག ༨ །ཅེས་པའང་མཁར་ཆུ་དཔལ་གྱི་ཕུག་རིང་དུ། དཔལ་ཆེན་པོ་ཡང་དག་ཧེ་རུ་ཀ་མར་མེ་དགུ་པས་རྡོ་རྗེ་གསུམ་གྱི་རྣལ་འབྱོར་ལ་མཉམ་པར་བཞག་པའི་རྗེས་དེ་མ་ཐག་བར། གྲུབ་པའི་དཔྱིད་འཇིགས་པ་མེད་པས་གང་ཤར་གསོལ་བ་བཏབ་པ་ཤུ་བྷཾ།། །། ༈

[edit]

thugs kyi dben gnas lho brag mkhar chu rdo rje'i pho brang la bsngags pa'i gtam rdo rje sgra ma'i rol mo/__ thugs kyi dben gnas lho brag mkhar chu rdo rje'i pho brang la bsngags pa'i gtam rdo rje sgra ma'i rol mo zhes bya ba/_na mo gu ru shrI he ru kA ya/_kun tu rtog pa'i mtha' la mi gnas chos dbyings shin tu zhi ba'i dngos/_/zung 'jug sgyu ma'i rtse dga' la chags de tshe rten dang brten par bcas/_/phyi rol yul gyi snang char shar bas yid can rgya mtsho dbugs 'byin par/_/e ma de bI ko Ta nyid ces DA ki'i tshogs rnams rtag tu bsnyen/_1__/'od snang mtha' yas mtshoX skyesaX rgyaXl baX yis/_/ye shes gzigs pa dam pa phyogs 'di ru/_/lhung ba'i mod nas sras bcas rnam 'dren kun/_/dgyes pa mchog gi bdud rtsi'i gru char 'bebs/2__/de na dpal chen grub pa'i sloXb dpoXn gyis/_/rdo rje naXm mkha'i dkyil ltar rnam dag pa'i/_/snyiXng po'i bden pa gzigs pa'i ngo mtshar yang /_/tshur mthong 'gro ba'i dpyid du lhag par 'bar/_3__/gzhan yang lam lnga sa bcu'i them skas la/_/'dzegs pa'i 'phags dang mkhas pa bye snyed kyis/_/shis pa sgrub pa'i gtam gyi rol mo ni/_/phyogs kyi bu mo'i rna ba'i rgyan du rngams/_4_/sra mkhregs brag ri'i ba gam brjid chags shing /_/lhung lhung 'babs chu'i rgyud mang mchog tu snyan/_/dga' tshal me tog phreng bas rab mdzes pa'i/_/bsam gtan grub pa rnams kyi ngal 'tsho'i gzhi/_5_/gang 'dir dad pas rkang sen bkod byas nas/_/dwangs pa'i lhag bsam dri med chu gter las/_/rab 'khrungs mchod pa'i sprin gyi dpag bsam gyis/_/rnam 'dren sras bcas dgyes pa bskyed pa dang /_6__/dpal chen yang dag grub pa'i rdoX rjeX'i phugaX_/riXng nas mos pas bsnyen pa'i don mthun gyis/_/he ru ka dpal 'bar pa'i rdo rje'i dbyig__/rnal 'byor gsum gyi rgyal mtshan rtse mor bkod/_7__/de las byung pa'i ye shes gzi yis mtha' gnyis lta ba'i 'dzin stangs zhi/_/de yis rnam bcas kha sbyor la 'khyud des kyang zung 'jug grub pa'i mod/_/rgyu dang mi rgyu'i dngos kun ro mnyam srid pa mthar byed he ru ka'i/_/bkra shis rtag pa dam pa'i dpal gyis grong khyer gsum kun dbugs 'byin shog_8_/ces pa'ang mkhar chu dpal gyi phug ring du/_dpal chen po yang dag he ru ka mar me dgu pas rdo rje gsum gyi rnal 'byor la mnyam par bzhag pa'i rjes de ma thag bar/_grub pa'i dpyid 'jigs pa med pas gang shar gsol ba btab pa shu b+haM//___//_!_