JKW-KABUM-02-KHA-001-002

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 2, sde tshan 1, Text 2, Pages 16- (Folios 8b6 to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 2: 16-. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

2 16-27	འཕགས་པ་འཇམ་དཔལ་གྱི་ཐུགས་རྗེ་ལ་བསྐུལ་བའི་གཏམ། 'phags pa 'jam dpal gyi thugs rje la bskul ba'i gtam Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཕགས་པ་འཇམ་དཔལ་གྱི་ཐུགས་རྗེ་ལ་བསྐུལ་བའི་གཏམ། རྒྱ་གར་སྐད་དུ། ཨཱཪྻ་མཉྫུ་ཤྲི་ཡཿཀཱ་རུ་ཎེ་ཀྵེ་པ་ཀཱ་ཐ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་ཐུགས་རྗེ་ལ་སྐུལ་བའི་གཏམ་ཞེས་བྱ་བ། བཅོམ་ལྡན་འདས་གསུང་གི་རྡོ་རྗེ་ལ་ཕྱག་འཚལ་ལོ། །འཇམ་དང་འབར་རྒྱས་ཆགས་པའི་སྐུ་ནི་སྣ་ཚོགས་མོས་པའི་རྗེས་སུ་འཆེལ། །འཇམ་མཉེན་དབྱངས་ཀྱི་པུཎྜ་རཱི་ཀས་ཆོས་ཕུང་རྒྱ་མཚོའི་རྡུལ་དམར་སྤྲོ། །འཇམ་པའི་ཐུགས་ནི་གློ་བུར་སྒྲིབ་བྲལ་འོད་གསལ་རྟག་པ་དམ་པའི་དངོས། །འཇམ་དཔལ་མགོན་ཁྱོད་དེང་ནས་བྱང་ཆུབ་བར་དུ་དགེ་བའི་བཤེས་སུ་མཛོད། ༡ །འདི་ན་འགའ་ཞིག་ཁྱོད་ཀྱི་རྣམ་ཐར་ཟླ་བ་གཞོན་ནུར་འཁྲུལ་གྱུར་ཏེ། །ཐུགས་རྗེའང་སིམ་འོད་ཟག་པ་ལ་ཆགས་སླར་ཡང་ཤར་གྱི་ཐིག་ལེའི་གཟུགས། །མཐོང་བས་དད་པའི་སྤུ་ལངས་དཀར་པོས་ལང་ཚོའི་ཆུ་བུར་དམ་འཁྱུད་པ། །འཇམ་དཔལ་མགོན་ཁྱོད༴ ༢ གལ་ཏེ་རྫབ་ཀྱིས་དཀྲིས་པའི་པདྨར་མཚན་དཔེའི་འཇོ་སྒེག་རབ་འབར་ཞིང་། །འཛུམ་སྒྲོས་ཡིད་འོང་རྒྱས་པའི་ཁོང་ནས་ལུང་རྟོགས་སྦྲང་རྩི་སྐྱུགས་མཁས་ན། །ཁྱོད་ཀྱི་སྤུན་ཟླར་འོས་པ་ཉིད་ཅེས་ཕལ་ཆེར་ག་ཞའི་ཚིག་འབྱིན་པ། །འཇམ་དཔལ༴ ༣ ཤིན་ཏུ་ཡིད་འོང་སཱ་ཧ་ཀ་ར་མཛེས་པས་བཟུང་ཡང་རྡུལ་གྱིས་གཏམས། །ཀིཾ་ཤུའི་འཁྲི་ཤིང་རྒྱས་པའི་ཅོད་པན་བྲལ་བས་ཉེན་ལ་གདུང་བའི་རྒྱུ། །དེ་སླད་གཞོན་ནུའི་སེན་མོའི་འཛུམ་འོད་སྐྱོན་གྱི་རྣམ་པ་རིང་བཅད་པ། །འཇམ་དཔལ༴ ༤ དགའ་བ་བརྒྱ་པའི་གདོང་པ་རྣམ་བཞིས་མིག་མི་འཛུམ་པར་ལྟ་བགྱིད་ཅིང་། །གྲགས་པའི་མུ་ཁྱུད་འདྲེན་བྱེད་ཇི་སྙེད་ཞབས་རྡུལ་དག་ལ་རིང་ཆགས་བཞིན། །སྣ་ཚོགས་གཟུགས་ཀྱང་ཞུམ་པ་ལྷུར་ལེན་དེ་སླད་ལྷར་བཅས་འགྲོ་བའི་སྐྱབས། །འཇམ་དཔལ༴ ༥ གང་གི་རང་གཟུགས་བལྟ་བའི་ཡུལ་ལས་རིང་དུ་སོན་པའི་ཕ་རོལ་ནས། །ཡེ་ཤེས་མཆོག་གི་རྩེ་དགའ་བཟུང་ལ་སྙིང་རྗེའི་ལང་ཚོ་དར་བབས་ཕྱིར། །དྲན་པ་ཙམ་གྱིས་ཕྲ་རྒྱས་རིང་བཅད་དགྱེས་ཞལ་དག་པའི་ཀེ་ཏ་ཀ །འཇམ་དཔལ༴ ༦ བདེ་ཆེན་བཅུ་དྲུག་རོ་ཡིས་རབ་སིམ་མི་འགྱུར་མཆོག་དེའི་ཨུཏྤ་ལ། །རྡོ་རྗེའི་ཉི་མ་འབར་བའི་འཛུམ་རླབས་ཚོན་ཆགས་གསར་བའི་དོག་པ་དང་། །རྡོ་རྗེ་ཟླ་བ་དྲི་མེད་འོད་འཕྲོ་ཟུང་འཇུག་གྲུབ་པའི་གྲིབ་བསིལ་ཅན། །འཇམ་དཔལ༴ ༧ ལག་ལྡན་མྱོས་པའི་འདུལ་སྦྱོང་ལ་མཁས་འཕྲོག་བྱེད་དྲེགས་པའི་རྒྱུད་མང་ཡང་། །སྙིང་པོའི་ལྕིད་ཀྱིས་ནོན་པ་སྤངས་ན་གང་གསུང་དབྱངས་བདུན་ཡོངས་རྫོགས་པ། །ཅི་ཕྱིར་ཕྱོགས་ལས་རྣམ་པར་མི་རྒྱལ་རྡོ་རྗེ་ནཱ་དས་སྒེག་པའི་ཕྱིར། །འཇམ་དཔལ༴ ༨ འདི ་ན་སྲིད་པའི་ཡུལ་ལ་ཆགས་ཀྱང་ཀུན་ཏུ་སྦྱོར་བ་འདུ་མི་བགྱིད། །ཞི་བ་དམ་པའི་རོ་ཡིས་སེམས་ཀྱང་འཇུག་དང་ལྡང་བ་ཡོངས་སུ་སྤངས། །གཅིག་པུའི་ཐིག་ལེར་བཤེས་པ་ཉིད་མོད་དུ་མའི་གར་དུ་རྣམ་རོལ་པ། །འཇམ་དཔལ༴ ༩ བྱིས་པ་རྣམས་ཀྱིས་བྱེ་བྲག་རྟོག་མིན་འདི་ཞེས་བརྗོད་པའང་སྤངས་པ་ཉིད། །ནར་སོན་འགའ་ཞིག་གཏམ་དུ་གླེང་བའང་ཕྱོགས་རེར་འཆེལ་ལ་སྐྲག་གྱུར་ནས། །འཆི་མེད་རྫིང་རིང་གསར་དུ་སྤྲུལ་སྙམ་རྣམ་པ་ཀུན་ལྡན་ཡེ་ཤེས་ཐུགས། །འཇམ་དཔལ༴ ༡༠ འགའ་ཞིག་རྣ་བའི་གྲགས་པ་ལ་བརྐམས་རྒྱ་མཚོའི་གོས་ཅན་མཐར་འགྲོ་ཞིང་། །ཕལ་ཆེར་གདུག་པའི་དཔུང་པས་ཉེར་བཟུང་ས་འཛིན་ལ་ཡང་རེ་བ་མཐོང་། །བདག་སོགས་གང་གི་ཡོན་ཏན་ལ་ཆགས་དེ་ལའང་འདོད་པ་ཇི་བཞིན་འཇོ། །འཇམ་དཔལ༴ ༡༡ རིང་པོར་ཟིམ་བུའི་མིག་གིས་བལྟ་བའི་མཁུར་ཚོས་བནྡྷུའི་ཐིག་ལེ་ཅན། །འཆི་མེད་བུ་མོའི་ལག་པད་ཀྱིས་གཏོར་གསེར་གྱི་ཆུ་སྐྱེས་གཡོ་བས་ཀྱང་། །ཞབས་མཐིལ་ཙམ་ཡང་བརྟེན་པར་རྙེད་དཀའ་འདི་ནི་ཨེ་མ་ངོ་མཚར་ཞེས། །འཇམ་དཔལ༴ ༡༢ སྦྲང་རྩིས་མྱོས་པའི་བུང་བ་མ་ལགས་ཁྱོད་ཞབས་སེན་མོའི་དོག་པ་ནི། །རྐང་པས་འཐུང་བའི་གེ་སར་མ་ལགས་ཨུཏྤལ་གདན་ལ་མཉམ་བཀོད་པས། །བསུང་ཞིམ་སྤྲིན་གྱི་ཕྱག་རྒྱ་མ་ལགས་འདི་ན་ངལ་འཚོའི་སླད་རྒྱུ་བས། །འཇམ་དཔལ༴ ༡༣ གང་གི་བྱང་ཆུབ་སྤྱད་པའི་ཚུལ་ནི་གླང་པོའི་མཆེ་བ་ལྟ་བུར་དཀར། །དེ་ཡང་གཞན་ཕན་བརླན་ལ་ཆགས་དང་བནྡྷུ་ཛཱི་བ་ཇི་བཞིན་སྒེག །དེས་ཀྱང་ཀུན་དགའི་ཚོར་བ་སྦོམ་འདི་དཔྱིད་ཀྱི་དུས་སྟོན་ལ་ཆགས་པ། །འཇམ་དཔལ༴ ༡༤ ཉིན་མོའི་ཐིགས་པ་ལན་འགའ་བཏུང་ངམ་རྒྱ་མཚོའི་ཐིག་ལེའི་སིམ་འོད་དམ། །མཛེས་མའི་རྐང་རྩེས་བསྣུན་པ་མིན་མོད་གང་ཞབས་ཐུགས་རྗེའི་ཐུགས་བཟུང་བས། །བློ་མཆོག་སྤོབས་པའི་དགའ་ཚལ་དར་བབས་དེ་ཚེ་བསྔགས་འོས་མཛོད་འཛིན་པས། །འཇམ་དཔལ༴ ༡༥ ཅི་འདི་མཛེས་པའི་མིག་སྨན་རྒྱས་པས་ནེའུ་གསིང་གདེངས་ཀ་ཁེབས་པའམ། །རབ་དྭངས་རྫིང་བུའི་པདྨོ་གཞོན་ནུར་བུམ་རྒྱ་སྐྱེས་ཀྱིས་བྱུགས་སམ་ཅི། །གཞན་དུ་སྨྲ་བའི་ཟླ་བ་གཅིག་པུའི་མཆུ་སྒྲོས་གཡོ་ཞེས་འཁྲུལ་བསྐྱེད་པའི། །འཇམ་དཔལ༴ ༡༦ འགའ་ཞིག་དེ་ལས་བྱུང་བའི་བཅུད་ནི་ལག་འགྲོའི་སྙིང་པོར་རྟོག་བྱེད་ལ། །ཕལ་ཆེར་ཐང་ཆུ་དཀར་པོའི་ཆུ་རྒྱུན་རྣ་བར་སིམ་ཞེས་བ་བཅོལ་སྨྲ། །དོན་དུ་ཐོས་པས་རིན་ཐང་ཆེར་བྱེད་ལེགས་གསུང་མཆོག་ཏུ་ངེས་རྙེད་པ། །འཇམ་དཔལ༴ ༡༧ མཐའ་ཀླས་རྒྱལ་བ་སྲས་བཅས་ཀུན་གྱི་མཁྱེན་རབ་ཕུང་པོ་གཅིག་བསྡུས་ན། །ཁྱོད་ཀྱི་སྤོབས་པའི་ལྕིད་དང་མཉམ་མོད་དེ་ལས་གཞན་པའང་དེ་ཉིད་ཀྱིས། །རྣམ་འདྲེན་ཡོངས་ཀྱི་ཡེ་ཤེས་ལ་འཁུ་གྲགས་དཀར་ཟླ་ཚེས་གསར་པ་ཅན། །འཇམ་དཔལ༴ ༡༨ ལ་ལ་གཡོ་སྒྱུས་འཇུག་པ་རྩུབ་མོས་འཇིག་རྟེན་གསུམ་འདི་ཡོངས་བཟུང་བའི། །བིཥྞུའི་ངོ་མཚར་གཏམ་དུ་གླེང་མོད་ཁོ་བོས་བྱང་སེམས་འཇམ་པོ་ཡིས། །སྲིད་དང་ཞི་བའི་ཕྱོགས་ལས་རྣམ་རྒྱལ་གང་ཚུལ་ཁོ་ནར་སེམས་ཆགས་པ། །འཇམ་དཔལ༴ ༡༩ གསེར་གྱི་མངལ་ཅན་རྟོགས་པ་བརྗོད་ཚེ་སྐྱོན་གྱི་རྣམ་པ་ཕྲག་བརྒྱ་ཡིས། །གཞར་ཡང་སྟོང་མིན་སྲིད་འདི་སྤྲུལ་ཅེས་ཡི་གེའི་གྲགས་པ་འགོག་པའི་སླད། །གང་གི་སྙིང་རྗེའི་ཉི་མ་འབར་བས་ཡིད་ཅན་ཉོན་མོངས་བརླན་སྐེམས་པའི། །འཇམ་དཔལ༴ ༢༠ ཕལ་ཆེར་ལྷ་ཆེན་ཁྲོས་པའི་ཞུགས་ཀྱིས་ཡིད་སྲུབས་ལུས་མེད་གནས་སྦྱར་བའི། །རྣམ་ཐར་ཁོ་ནར་གླེང་བར་བརྩམས་མོད་བདག་ཅག་བྱམས་པའི་བདུད་རྩི་ཡིས། །མེ་ཏོག་མདེའུ་རྣོན་རྟུལ་པོར་བགྱིས་པའི་ཁྱོད་ཞབས་བསྔགས་ལ་མི་ཕྱེད་པའི། །འཇམ་དཔལ༴ ༢༡ རྨོངས་དང་མ་རིག་རླུང་ཐོབ་སར་ལྡན་ལྡང་བས་ཟོས་པའི་དེ་མ་ཐག །ཡེ་ཤེས་མཆོག་གི་གཟི་བརྗིད་འབར་བས་ཤེས་དང་ཤེས་བྱའི་ཆུ་ཀླུང་འབུམ། །བཏུང་ནས་སླར་ཡང་འགྲོ་བའི་ཉེར་འཚོ་བདུད་རྩིར་སྐྱུགས་མཁས་བུམ་པ་སྐྱེས། །འཇམ་དཔལ༴ ༢༢ གཞན་གྱིས་མི་བརྫི་མཚོན་པའི་དཔེ་བྲལ་གཟུགས་སུ་སྣང་བའི་ཕྱོགས་ཀྱིས་བཏང་། །རང་བཞིན་འོད་གསལ་དག་པ་ཟུང་ནི་ཤིན་ཏུ་སད་པ་སད་པའི་བདག །མཁྱེན་གཉིས་རབ་རྫོགས་རྣམ་ཀུན་མཆོག་ལྡན་ཆོས་དབྱིངས་རྟག་པའི་ཡེ་ཤེས་སྐུ། །འཇམ་དཔལ༴ ༢༣ ཐོག་མཐའ་དབུས་བྲལ་བྱང་ཆུབ་ཀྱིས་སེམས་ལས་ཀྱི་དྲི་བཞོན་དག་པ་ལས། །རྡུལ་བྲལ་སྟོང་པའི་རང་གཟུགས་གཞོན་ནུ་འཆར་ཀའི་མེ་ཏོག་དར་བབས་པའི། །རྣ་རྒྱན་འོག་མིན་གྲུབ་པའི་འགྲམ་བཀོད་ལོངས་སྤྱོད་རྫོགས་ཞེས་གྲགས་འབར་བ། །འཇམ་དཔལ༴ ༢༤ ཤེས་རབ་ཉིད་དང་སྲིད་ལ་བལྟ་བས་དེ་དེར་ཆགས་པའི་ལམ་བཅད་ནས། །ལྷན་སྐྱེས་གྲུབ་པའི་ཐིག་ལེ་ལ་འཆེལ་དེ་ཚེ་རྒྱུ་དང་མི་རྒྱུ་བའི། །དངོས་པོ་ཀུན་ཀྱང་གཅིག་ཏུ་བསྡམས་པའི་སྤྲུལ་པ་སྣ་ཚོགས་སྐུ་འཆང་བ། །འཇམ་དཔལ༴ ༢༥ མཆོག་ཏུ་མི་འགྱུར་སྦྱིན་པའི་རྡོ་རྗེ་ཡང་དག་མཐའ་ཡི་ཕ་རོལ་སོན། །སངས་རྒྱས་བྱང་ཆུབ་གཉིས་སྣང་རྟོག་བྲལ་སྟོང་པ་ཉིད་ལས་ལྡང་གྱུར་པ། །དག་པ་ཉིད་ཀྱང་པྲ་ཕབས་གཟུགས་བརྙན་མེ་ལོང་ལྟ་བུའི་ཡེ་ཤེས་ཆེ། །འཇམ་དཔལ༴ ༢༦ རྣམ་ཀུན་མཐའ་བྲལ་ཡུལ་ལ་ཆགས་གྱུར་ཟག་མེད་མཆོག་བདེའི་འདོད་པས་བརླན། །འགྱུར་བཅས་མཐའ་དག་ཕམ་པ་ལ་དགྱེས་དེ་ཚེ་རྩེ་དགའི་ལག་པ་ཡིས། །རྟག་པ་རྒྱུན་གྱི་འཁོར་ལོར་དམ་འཁྱུད་ཆོས་དབྱིངས་ཡེ་ཤེས་མངོན་གྱུར་པས། །འཇམ་དཔལ༴ ༢༧ རྡུལ་དང་ཤེས་བྱའི་ཆོས་ཀྱི་སྟོང་གཟུགས་ཕྱག་རྒྱ་ཆེན་མོའི་བཞིན་དཔལ་འཛུམ། །ཡང་དག་དོན་གྱི་སྦྲང་རྩིས་རོས་མྱོས་འཕོ་མེད་གསུང་གི་རྒྱུད་མང་ཅན། །དེ་ཁོ་ཉིད་ཀྱིས་མཛའ་བས་གཏོང་མིན་སོ་སོར་རྟོག་པའི་མེ་ནཱ་ཀ །འཇམ་དཔལ༴ ༢༨ རང་བཞིན་མེད་པའི་སྦྱོར་བ་ལས་བྱུང་བདེ་མཆོག་སྐད་ཅིག་གཅིག་རྫོགས་པས། །མཁའ་ལྟར་མཚན་མའི་ཡུལ་ལས་རིང་སོང་རང་རིག་ཡེ་ཤེས་སྒྱུ་མའི་འཕྲུལ། །དངོས་ཀུན་མཐའ་དག་མཉམ་པ་ཉིད་གྱུར་མཆོག་གི་ཆུ་གཏེར་ལ་ཆགས་པ། །འཇམ་དཔལ་མགོན་ཁྱོད༴ ༢༩ །སྒྱུ་མ་ལྟ་བུའི་གཟུགས་སྐུའི་དྲྭ་བས་སངས་རྒྱས་མཛད་པ་རྣམ་རོལ་པའི། །ཡོན་ཏན་ཟད་མེད་བསྟོད་འོས་མཆོག་སྟེ་ལྷན་ཅིག་སྐྱེས་སྐུའི་འཇོ་སྒེག་ནི། །བྱ་བ་གྲུབ་པའི་རྣམ་པ་ལ་ཆགས་དེ་ཚེ་སྲིད་ཞིའི་གཙུག་མཛེས་པ། །འཇམ་དཔལ༴ ༣༠ ལ་ལ་འཁྲུལ་པ་བདེན་པར་འཛིན་ཅིང་འགའ་ཞིག་རྟག་ཆད་སྦྱོར་བས་འཁྱུད། །ཕལ་ཆེར་རྡུལ་དང་ཤེས་བྱ་ཉིད་དམ་སེམས་སམ་ཕུང་པོ་རྣམ་དཔྱད་པའི། །སྟོང་པ་ཉིད་ཀྱི་ཚིག་གིས་རིག་མིན་རྒྱལ་བ་ཀུན་གྱི་ཡེ་ཤེས་སྐུ། །འཇམ་དཔལ༴ ༣༡ མདོར་ན་བསྔགས་པའི་ཕ་རོལ་ལས་བརྒལ་དེ་བཞིན་གཤེགས་ཀུན་རིགས་ཀྱི་དབང་། །མིང་ཙམ་གྱིས་ཀྱང་དོན་ཆེན་ཁོང་ཆུད་དག་པས་སྤངས་པ་ཕུན་ཚོགས་ཤིང་། །མཚན་མའི་སྡིག་ལས་ཡང་དག་འདས་གྱུར་རྨད་བྱུང་རྟོགས་པའི་མཆོག་བསྐྱེད་པ། །འཇམ་དཔལ༴ ༣༢ དེ་ལྟར་བདེན་དོན་ཉི་མ་གཅིག་པུ་སྐུ་ལྔའི་ཟུར་ཕུད་སྒེག་ལྡན་པར། །ལྷ་དང་དྲང་སྲོང་གྲུབ་པའི་གཙོ་བོ་བྱང་ཆུབ་སངས་རྒྱས་སྲས་བཅས་ཀྱིས། །གུས་པའི་པདྨོ་གཅིག་ཏུ་འཛུམ་ན་ཁོ་བོ་དེ་དེའི་རྗེས་ཕྱོགས་ཀྱིས། །འཇམ་དཔལ༴ ༣༣ ཤེས་པས་ཞི་བསིལ་ཆུ་གཏེར་ལ་ཞུགས་རྙོགས་པའི་རྡུལ་གྱིས་ཀུན་ནས་སངས། །སྙིང་རྗེའི་མཆེ་བའི་འཛུམ་འོད་འབར་བས་སྲིད་པའི་ཀུན་བཟོད་དབུགས་རབ་འབྱིན། །མི་གནས་འཇུག་པ་གསུམ་པའི་གཟུགས་ཅན་ཡང་སྲིད་ཀུན་ཏུ་བསྟེན་བགྱིད་ན། །འཇམ་དཔལ༴ ༣༤ གཞོན་ནུ་འགའ་ཞིག་འཆར་ཀས་དམར་བའི་གོས་ཀྱིས་བཀླུབས་བྱས་རྩ་ལག་འཚོའི། །མཆུ་སྒྲོས་ཟླ་བས་ཟུམ་པ་ལ་འཁྲུལ་ཐལ་མོའི་བསྟི་སྟངས་སྒེག་ལྡན་པས། །ཆེར་རློམས་ཀུན་གྱིས་གཙུག་གིས་རྙེད་དཀའ་ཞབས་སེན་སྤྲིན་གྱི་ཕྱོགས་དུད་ནས། །འཇམ་དཔལ༴ ༣༥ རབ་འབྱམས་རྒྱ་མཚོ་མུ་མཐའ་མེད་པའི་མནྡཱ་ར་ཡི་འགྲམ་པ་རུ། །མངོན་འདོད་གཟུགས་ཀྱི་རྣམ་པ་མང་ལྡན་འདོད་རྒུའི་སྒོ་འཕར་བྱེ་བའི་དཔྱ། །དམན་བདག་བསོད་ནམས་གྲུབ་པ་འཛིན་སླད་གུས་པ་མཆོག་གིས་སྟོབ་བགྱིད་ན། །འཇམ་དཔལ༴ ༣༦ དུས་གསུམ་ཀུན་ཏུ་གནག་པའི་རྗེས་སོང་སྒྲིབ་གཉིས་ཚ་གདུང་སྟུག་ལྡན་པ། །རྒྱ་མཚོའི་སྟོབས་ཀྱིས་ལམ་གསུམ་འབབས་པས་ལྷག་མ་མེད་པར་འཇིལ་བྱས་ནས། །སླར་ལ་དག་པའི་ཆུ་སྐྱེས་རྒོད་ན་སྙིང་རྗེའི་ཟུར་མིག་ཆགས་ལྡན་པ། །འཇམ་དཔལ༴ ༣༧ གང་ཞིག་དང་པོའི་ཤུལ་ལམ་ཞུགས་ནས་མཐར་གྱིས་སློབ་པ་མིན་པའི་བར། །ལེགས་སྤྱད་མཆོག་གི་ཐལ་གོང་དཀར་ལྡན་སྤྲིན་གྱི་དུམ་བུའི་ཚོགས་རྣམས་ལ། །རྗེས་སུ་ཡི་རངས་པད་རྩ་མངར་པོའི་དགའ་སྟོན་སར་པ་སྦྱིན་བགྱིད་ན། །འཇམ་དཔལ༴ ༣༨ འདི་ན་ཕལ་ཆེར་དོན་དང་ལྡན་མིན་འགའ་ཞིག་ལོག་པར་ལྟ་བས་ཉེན། །ཕལ་ཆེར་སྙིང་པོའི་ལྕིད་ཀྱིས་ནོན་སྤངས་དེ་སླད་ལེགས་གསུང་ནོར་བུའི་ཆར། །དགེ་ལེགས་རྟག་པའི་སྤྲིན་ལས་བྱུང་ཞེས་དབྱངས་ཀྱི་ཡན་ལག་གིས་བསྐུལ་ན། །འཇམ་དཔལ༴ ༣༩ ཐོག་མར་སྐྱེ་བའི་ཕ་རོལ་ཟད་ན་མཐར་གྱིས་འགག་པའི་ཚུ་རོལ་དང་། །ནམ་ཡང་མཛའ་བའི་གོ་སྐབས་སྦེད་ནས་རྡོ་རྗེའི་སྐུ་ནི་གཅིག་པུ་བ། །ཆ་མེད་རྡུལ་བྲལ་ཁྱབ་ཅིང་རྟག་པར་བཞུགས་ཞེས་གསོལ་བའི་ཚིག་སྨྲེངས་ཚེ། །འཇམ་དཔལ༴ ༤༠ དེ་ལྟར་ཅུང་ཟད་བསྔགས་ལས་བྱུང་བའི་ལེགས་བྱས་ཆུ་སྐྱེས་ཀུནྡཱའི་ཚལ། །ཁ་བའི་དུམ་བུའི་ཕྲེང་བ་འཁྲུགས་དང་གཉིས་འཐུང་ཕྲག་གོང་ལྟར་དཀར་ལ། །གང་གི་མཁྱེན་པའི་ཡོངས་བསྔོའི་རྗེས་འབྲངས་བརྟུལ་ཞུགས་བཟང་པོ་ལྷུར་ལེན་ན། །འཇམ་དཔལ༴ ༤༡ བདག་དང་གཞན་གྱིས་བསྡུས་པའི་ཡིད་ཅན་མ་ལུས་ལུས་པ་མེད་པ་ཡིས། །ཆོས་ཀྱི་མིག་ནི་རྡུལ་བྲལ་དམ་པ་ཉིན་མོས་རྩེན་པའི་དཔག་བསམ་གྱིས། །དོ་ཤལ་ར་བ་ཚར་དུ་དངར་ལས་ཀུན་མཁྱེན་གྲིབ་བསིལ་སྣུམ་ལྡན་སླད། །འཇམ་དཔལ་མགོན་ཁྱོད་དེང་ནས་བྱང་ཆུབ་བར་དུ་དགེ་བའི་བཤེས་སུ་མཛོད། ༤༢ །དེ་ལས་བྱུང་བའི་གྲུབ་པའི་གཟི་ཡིས་འཕོ་འགྱུར་མཚན་མ་རིང་དུ་བཅད། །དེས་ཀྱང་རྣམ་མེད་ཤེས་རབ་མར་འཁྱུད་དེ་ཡིས་རྣམ་བཅས་ཤེས་བྱའི་ཚུལ། །དེ་དེར་འདུལ་བའི་གཟུགས་སུ་བཟུང་བས་གང་དང་མཉམ་པ་ཉིད་གྱུར་པའི། །བཀྲ་ཤིས་སྣང་བ་དམ་པའི་ངལ་གསོ་ཁམས་གསུམ་ཀུན་ཏུ་འགྲོ་གྱུར་ཅིག ༤༣ །འདི་ནི་བླ་མ་འཇམ་པའི་དཔལ་གྱི་ཞབས་སེན་ནོར་བུའི་འཁྲི་ཤིང་གིས། །རེག་པས་བློ་གྲོས་ཆུ་གཏེར་གཡོ་བ་གསར་དུ་དྭངས་པ་ལས་བྱུང་ཕྱིར། །མཐོང་ངམ་ཐོས་སམ་ཡིད་ལ་བྱེད་དམ་རྗེས་སུ་ཡི་རངས་ཐོབ་ཀུན་ཀྱང་། །གསུང་གི་རྡོ་རྗེའི་རྣམ་ཐར་རྒྱ་མཚོར་དེང་ནས་བཟུང་སྟེ་འཇུག་པར་ཤོག ༤༤ །དེ་ལྟར་མཐོང་བ་རྗུན་ལས་རྙེད་པའི་ཕྱིན་ཅི་ལོག་གི་བློ་དང་། རྟག་པ་དང་། ཆད་པ་དང་། ཕུང་པོ་དང་། ཁམས་དང་། སྐྱེ་མཆེད་དང་། རྡུལ་དང་། ཤེས་བྱ་དང་། རྣམ་རིག་དང་། སྟོང་པ་ཙམ་གྱི་ཕ་རོལ་ལས་ཀྱང་ཆེས་ཕ་རོལ་ཏུ་སོན་པ་རྣམ་པ་ཀུན་གྱི་མཆོག་དང་ལྡན་པའི་ཡེ་ཤེས་ཀྱི་སྐུ་ཅན་བཅོམ་ལྡན་འདས་འཇམ་དཔལ་རྡོ་རྗེའི་ཐུན་མོང་དང་། ཐུན་མོང་མ་ཡིན་པའི་རྣམ་པར་ཐར་པའི་ཆ་ཤས་ཕྲ་མོ་འགའ་ཞིག་བརྗོད་བྱར་བྱས་ཏེ་སྙན་པར་དངགས་ཀྱི་དབྱངས་ཀྱིས་བསྟོད་པ་དང་། ཚད་མེད་པའི་ཐུགས་རྗེ་ལ་བསྐུལ་ཏེ་འདིས་ཀྱང་བྱང་ཆུབ་བར་དུ་དགེ་བའི་བཤེས་སུ་དམ་བཅས་པའི་གཏམ་གྱི་ཕྲེང་བ་ཉུང་ངུ་འདིའང་། འཇམ་མགོན་བླ་མའི་ཡོན་ཏན་གྱིས་དད་པའི་ཆུ་གཏེར་གློ་བུར་དུ་གཡོས་པ་ལས་ཚིག་རྒྱན་གྱི་མེ་ཏོག་ཆལ་ཆིལ་དུ་དགོད་པའང་གང་ཤར་ཤུགས་འབྱུང་གི་ཚུལ་ལས་གཅིག་ཏུ་རྟོག་གེའི་བློས་མ་བརྟགས་པར་ཡུལ་མཐའ་འཁོབ་ཏུ་སྐྱེས་པའི་རྒྱལ་ཁམས་ཉུལ་བའི་ད་རི་དཱ་གཙུག་ལག་སྨྲ་པའི་ཉི་མར་འབོད་པས། ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝྃ་ཆོས་ལྡན་གྱི་རི་ཁྲོད་བླ་བྲང་ཐར་པ་རྩེར་ས་ཟླའི་དཀར་ཕྱོགས་ཀྱི་སྟོང་པ་དང་པོ་རྒྱལ་བའི་དུས་ཀྱི་ཡོད་པ་བཞི་ལྡན་གྱི་མཚན་མོར་སྣང་གསལ་ཞིག་གི་ངོགས་སུ་ཤར་མར་སྤེལ་པའི་མཐུ་ལས་ཇི་ལྟར་སྨོན་པའི་དོན་རྣམས་ཀྱིས་རེ་བའི་ཤིང་རྟ་ཡོངས་སུ་འགེངས་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

'phags pa 'jam dpal gyi thugs rje la bskul ba'i gtam/__ rgya gar skad du/_AR+Ya many+dzu shri yaHkA ru Ne k+She pa kA tha nA ma/_bod skad du/_'phags pa 'jam dpal gyi thugs rje la skul ba'i gtam zhes bya ba/_bcom ldan 'das gsung gi rdo rje la phyag 'tshal lo/_/'jam dang 'bar rgyas chags pa'i sku ni sna tshogs mos pa'i rjes su 'chel/_/'jam mnyen dbyangs kyi puN+Da rI kas chos phung rgya mtsho'i rdul dmar spro/_/'jam pa'i thugs ni glo bur sgrib bral 'od gsal rtag pa dam pa'i dngos/_/'jam dpal mgon khyod deng nas byang chub bar du dge ba'i bshes su mdzod/_1__/'di na 'ga' zhig khyod kyi rnam thar zla ba gzhon nur 'khrul gyur te/_/thugs rje'ang sim 'od zag pa la chags slar yang shar gyi thig le'i gzugs/_/mthong bas dad pa'i spu langs dkar pos lang tsho'i chu bur dam 'khyud pa/_/'jam dpal mgon khyod=__2__gal te rdzab kyis dkris pa'i pad+mar mtshan dpe'i 'jo sgeg rab 'bar zhing /_/'dzum sgros yid 'ong rgyas pa'i khong nas lung rtogs sbrang rtsi skyugs mkhas na/_/khyod kyi spun zlar 'os pa nyid ces phal cher ga zha'i tshig 'byin pa/_/'jam dpal=__3__shin tu yid 'ong sA ha ka ra mdzes pas bzung yang rdul gyis gtams/_/kiM shu'i 'khri shing rgyas pa'i cod pan bral bas nyen la gdung ba'i rgyu/_/de slad gzhon nu'i sen mo'i 'dzum 'od skyon gyi rnam pa ring bcad pa/_/'jam dpal=__4__dga' ba brgya pa'i gdong pa rnam bzhis mig mi 'dzum par lta bgyid cing /_/grags pa'i mu khyud 'dren byed ji snyed zhabs rdul dag la ring chags bzhin/_/sna tshogs gzugs kyang zhum pa lhur len de slad lhar bcas 'gro ba'i skyabs/_/'jam dpal=__5__gang gi rang gzugs blta ba'i yul las ring du son pa'i pha rol nas/_/ye shes mchog gi rtse dga' bzung la snying rje'i lang tsho dar babs phyir/_/dran pa tsam gyis phra rgyas ring bcad dgyes zhal dag pa'i ke ta ka__/'jam dpal=__6__bde chen bcu drug ro yis rab sim mi 'gyur mchog de'i ut+pa la/_/rdo rje'i nyi ma 'bar ba'i 'dzum rlabs tshon chags gsar ba'i dog pa dang /_/rdo rje zla ba dri med 'od 'phro zung 'jug grub pa'i grib bsil can/_/'jam dpal=__7__lag ldan myos pa'i 'dul sbyong la mkhas 'phrog byed dregs pa'i rgyud mang yang /_/snying po'i lcid kyis non pa spangs na gang gsung dbyangs bdun yongs rdzogs pa/_/ci phyir phyogs las rnam par mi rgyal rdo rje nA das sgeg pa'i phyir/_/'jam dpal=__8__'di_ na srid pa'i yul la chags kyang kun tu sbyor ba 'du mi bgyid/_/zhi ba dam pa'i ro yis sems kyang 'jug dang ldang ba yongs su spangs/_/gcig pu'i thig ler bshes pa nyid mod du ma'i gar du rnam rol pa/_/'jam dpal=__9__byis pa rnams kyis bye brag rtog min 'di zhes brjod pa'ang spangs pa nyid/_/nar son 'ga' zhig gtam du gleng ba'ang phyogs rer 'chel la skrag gyur nas/_/'chi med rdzing ring gsar du sprul snyam rnam pa kun ldan ye shes thugs/_/'jam dpal=__10__'ga' zhig rna ba'i grags pa la brkams rgya mtsho'i gos can mthar 'gro zhing /_/phal cher gdug pa'i dpung pas nyer bzung sa 'dzin la yang re ba mthong /_/bdag sogs gang gi yon tan la chags de la'ang 'dod pa ji bzhin 'jo/_/'jam dpal=__11__ring por zim bu'i mig gis blta ba'i mkhur tshos ban+d+hu'i thig le can/_/'chi med bu mo'i lag pad kyis gtor gser gyi chu skyes g.yo bas kyang /_/zhabs mthil tsam yang brten par rnyed dka' 'di ni e ma ngo mtshar zhes/_/'jam dpal=__12__sbrang rtsis myos pa'i bung ba ma lags khyod zhabs sen mo'i dog pa ni/_/rkang pas 'thung ba'i ge sar ma lags ut+pal gdan la mnyam bkod pas/_/bsung zhim sprin gyi phyag rgya ma lags 'di na ngal 'tsho'i slad rgyu bas/_/'jam dpal=__13__gang gi byang chub spyad pa'i tshul ni glang po'i mche ba lta bur dkar/_/de yang gzhan phan brlan la chags dang ban+d+hu dzI ba ji bzhin sgeg__/des kyang kun dga'i tshor ba sbom 'di dpyid kyi dus ston la chags pa/_/'jam dpal=__14__nyin mo'i thigs pa lan 'ga' btung ngam rgya mtsho'i thig le'i sim 'od dam/_/mdzes ma'i rkang rtses bsnun pa min mod gang zhabs thugs rje'i thugs bzung bas/_/blo mchog spobs pa'i dga' tshal dar babs de tshe bsngags 'os mdzod 'dzin pas/_/'jam dpal=__15__ci 'di mdzes pa'i mig sman rgyas pas ne'u gsing gdengs ka khebs pa'am/_/rab dwangs rdzing bu'i pad+mo gzhon nur bum rgya skyes kyis byugs sam ci/_/gzhan du smra ba'i zla ba gcig pu'i mchu sgros g.yo zhes 'khrul bskyed pa'i/_/'jam dpal=__16__'ga' zhig de las byung ba'i bcud ni lag 'gro'i snying por rtog byed la/_/phal cher thang chu dkar po'i chu rgyun rna bar sim zhes ba bcol smra/_/don du thos pas rin thang cher byed legs gsung mchog tu nges rnyed pa/_/'jam dpal=__17__mtha' klas rgyal ba sras bcas kun gyi mkhyen rab phung po gcig bsdus na/_/khyod kyi spobs pa'i lcid dang mnyam mod de las gzhan pa'ang de nyid kyis/_/rnam 'dren yongs kyi ye shes la 'khu grags dkar zla tshes gsar pa can/_/'jam dpal=__18__la la g.yo sgyus 'jug pa rtsub mos 'jig rten gsum 'di yongs bzung ba'i/_/biSh+Nu'i ngo mtshar gtam du gleng mod kho bos byang sems 'jam po yis/_/srid dang zhi ba'i phyogs las rnam rgyal gang tshul kho nar sems chags pa/_/'jam dpal=__19__gser gyi mngal can rtogs pa brjod tshe skyon gyi rnam pa phrag brgya yis/_/gzhar yang stong min srid 'di sprul ces yi ge'i grags pa 'gog pa'i slad/_/gang gi snying rje'i nyi ma 'bar bas yid can nyon mongs brlan skems pa'i/_/'jam dpal=__20__phal cher lha chen khros pa'i zhugs kyis yid srubs lus med gnas sbyar ba'i/_/rnam thar kho nar gleng bar brtsams mod bdag cag byams pa'i bdud rtsi yis/_/me tog mde'u rnon rtul por bgyis pa'i khyod zhabs bsngags la mi phyed pa'i/_/'jam dpal=__21__rmongs dang ma rig rlung thob sar ldan ldang bas zos pa'i de ma thag__/ye shes mchog gi gzi brjid 'bar bas shes dang shes bya'i chu klung 'bum/_/btung nas slar yang 'gro ba'i nyer 'tsho bdud rtsir skyugs mkhas bum pa skyes/_/'jam dpal=__22__gzhan gyis mi brdzi mtshon pa'i dpe bral gzugs su snang ba'i phyogs kyis btang /_/rang bzhin 'od gsal dag pa zung ni shin tu sad pa sad pa'i bdag__/mkhyen gnyis rab rdzogs rnam kun mchog ldan chos dbyings rtag pa'i ye shes sku/_/'jam dpal=__23__thog mtha' dbus bral byang chub kyis sems las kyi dri bzhon dag pa las/_/rdul bral stong pa'i rang gzugs gzhon nu 'char ka'i me tog dar babs pa'i/_/rna rgyan 'og min grub pa'i 'gram bkod longs spyod rdzogs zhes grags 'bar ba/_/'jam dpal=__24__shes rab nyid dang srid la blta bas de der chags pa'i lam bcad nas/_/lhan skyes grub pa'i thig le la 'chel de tshe rgyu dang mi rgyu ba'i/_/dngos po kun kyang gcig tu bsdams pa'i sprul pa sna tshogs sku 'chang ba/_/'jam dpal=__25__mchog tu mi 'gyur sbyin pa'i rdo rje yang dag mtha' yi pha rol son/_/sangs rgyas byang chub gnyis snang rtog bral stong pa nyid las ldang gyur pa/_/dag pa nyid kyang pra phabs gzugs brnyan me long lta bu'i ye shes che/_/'jam dpal=__26__rnam kun mtha' bral yul la chags gyur zag med mchog bde'i 'dod pas brlan/_/'gyur bcas mtha' dag pham pa la dgyes de tshe rtse dga'i lag pa yis/_/rtag pa rgyun gyi 'khor lor dam 'khyud chos dbyings ye shes mngon gyur pas/_/'jam dpal=__27__rdul dang shes bya'i chos kyi stong gzugs phyag rgya chen mo'i bzhin dpal 'dzum/_/yang dag don gyi sbrang rtsis ros myos 'pho med gsung gi rgyud mang can/_/de kho nyid kyis mdza' bas gtong min so sor rtog pa'i me nA ka__/'jam dpal=__28__rang bzhin med pa'i sbyor ba las byung bde mchog skad cig gcig rdzogs pas/_/mkha' ltar mtshan ma'i yul las ring song rang rig ye shes sgyu ma'i 'phrul/_/dngos kun mtha' dag mnyam pa nyid gyur mchog gi chu gter la chags pa/_/'jam dpal mgon khyod=__29__/sgyu ma lta bu'i gzugs sku'i drwa bas sangs rgyas mdzad pa rnam rol pa'i/_/yon tan zad med bstod 'os mchog ste lhan cig skyes sku'i 'jo sgeg ni/_/bya ba grub pa'i rnam pa la chags de tshe srid zhi'i gtsug mdzes pa/_/'jam dpal=__30__la la 'khrul pa bden par 'dzin cing 'ga' zhig rtag chad sbyor bas 'khyud/_/phal cher rdul dang shes bya nyid dam sems sam phung po rnam dpyad pa'i/_/stong pa nyid kyi tshig gis rig min rgyal ba kun gyi ye shes sku/_/'jam dpal=__31__mdor na bsngags pa'i pha rol las brgal de bzhin gshegs kun rigs kyi dbang /_/ming tsam gyis kyang don chen khong chud dag pas spangs pa phun tshogs shing /_/mtshan ma'i sdig las yang dag 'das gyur rmad byung rtogs pa'i mchog bskyed pa/_/'jam dpal=__32__de ltar bden don nyi ma gcig pu sku lnga'i zur phud sgeg ldan par/_/lha dang drang srong grub pa'i gtso bo byang chub sangs rgyas sras bcas kyis/_/gus pa'i pad+mo gcig tu 'dzum na kho bo de de'i rjes phyogs kyis/_/'jam dpal=__33__shes pas zhi bsil chu gter la zhugs rnyogs pa'i rdul gyis kun nas sangs/_/snying rje'i mche ba'i 'dzum 'od 'bar bas srid pa'i kun bzod dbugs rab 'byin/_/mi gnas 'jug pa gsum pa'i gzugs can yang srid kun tu bsten bgyid na/_/'jam dpal=__34__gzhon nu 'ga' zhig 'char kas dmar ba'i gos kyis bklubs byas rtsa lag 'tsho'i/_/mchu sgros zla bas zum pa la 'khrul thal mo'i bsti stangs sgeg ldan pas/_/cher rloms kun gyis gtsug gis rnyed dka' zhabs sen sprin gyi phyogs dud nas/_/'jam dpal=__35__rab 'byams rgya mtsho mu mtha' med pa'i man+dA ra yi 'gram pa ru/_/mngon 'dod gzugs kyi rnam pa mang ldan 'dod rgu'i sgo 'phar bye ba'i dpya/_/dman bdag bsod nams grub pa 'dzin slad gus pa mchog gis stob bgyid na/_/'jam dpal=__36__dus gsum kun tu gnag pa'i rjes song sgrib gnyis tsha gdung stug ldan pa/_/rgya mtsho'i stobs kyis lam gsum 'babs pas lhag ma med par 'jil byas nas/_/slar la dag pa'i chu skyes rgod na snying rje'i zur mig chags ldan pa/_/'jam dpal=__37__gang zhig dang po'i shul lam zhugs nas mthar gyis slob pa min pa'i bar/_/legs spyad mchog gi thal gong dkar ldan sprin gyi dum bu'i tshogs rnams la/_/rjes su yi rangs pad rtsa mngar po'i dga' ston sar pa sbyin bgyid na/_/'jam dpal=__38__'di na phal cher don dang ldan min 'ga' zhig log par lta bas nyen/_/phal cher snying po'i lcid kyis non spangs de slad legs gsung nor bu'i char/_/dge legs rtag pa'i sprin las byung zhes dbyangs kyi yan lag gis bskul na/_/'jam dpal=__39__thog mar skye ba'i pha rol zad na mthar gyis 'gag pa'i tshu rol dang /_/nam yang mdza' ba'i go skabs sbed nas rdo rje'i sku ni gcig pu ba/_/cha med rdul bral khyab cing rtag par bzhugs zhes gsol ba'i tshig smrengs tshe/_/'jam dpal=__40__de ltar cung zad bsngags las byung ba'i legs byas chu skyes kun+dA'i tshal/_/kha ba'i dum bu'i phreng ba 'khrugs dang gnyis 'thung phrag gong ltar dkar la/_/gang gi mkhyen pa'i yongs bsngo'i rjes 'brangs brtul zhugs bzang po lhur len na/_/'jam dpal=__41__bdag dang gzhan gyis bsdus pa'i yid can ma lus lus pa med pa yis/_/chos kyi mig ni rdul bral dam pa nyin mos rtsen pa'i dpag bsam gyis/_/do shal ra ba tshar du dngar las kun mkhyen grib bsil snum ldan slad/_/'jam dpal mgon khyod deng nas byang chub bar du dge ba'i bshes su mdzod/_42__/de las byung ba'i grub pa'i gzi yis 'pho 'gyur mtshan ma ring du bcad/_/des kyang rnam med shes rab mar 'khyud de yis rnam bcas shes bya'i tshul/_/de der 'dul ba'i gzugs su bzung bas gang dang mnyam pa nyid gyur pa'i/_/bkra shis snang ba dam pa'i ngal gso khams gsum kun tu 'gro gyur cig__43__/'di ni bla ma 'jam pa'i dpal gyi zhabs sen nor bu'i 'khri shing gis/_/reg pas blo gros chu gter g.yo ba gsar du dwangs pa las byung phyir/_/mthong ngam thos sam yid la byed dam rjes su yi rangs thob kun kyang /_/gsung gi rdo rje'i rnam thar rgya mtshor deng nas bzung ste 'jug par shog__44_/de ltar mthong ba rjun las rnyed pa'i phyin ci log gi blo dang /_rtag pa dang /_chad pa dang /_phung po dang /_khams dang /_skye mched dang /_rdul dang /_shes bya dang /_rnam rig dang /_stong pa tsam gyi pha rol las kyang ches pha rol tu son pa rnam pa kun gyi mchog dang ldan pa'i ye shes kyi sku can bcom ldan 'das 'jam dpal rdo rje'i thun mong dang /_thun mong ma yin pa'i rnam par thar pa'i cha shas phra mo 'ga' zhig brjod byar byas te snyan par dngags kyi dbyangs kyis bstod pa dang /_tshad med pa'i thugs rje la bskul te 'dis kyang byang chub bar du dge ba'i bshes su dam bcas pa'i gtam gyi phreng ba nyung ngu 'di'ang /_'jam mgon bla ma'i yon tan gyis dad pa'i chu gter glo bur du g.yos pa las tshig rgyan gyi me tog chal chil du dgod pa'ang gang shar shugs 'byung gi tshul las gcig tu rtog ge'i blos ma brtags par yul mtha' 'khob tu skyes pa'i rgyal khams nyul ba'i da ri dA gtsug lag smra pa'i nyi mar 'bod pas/_yon tan rin po che du ma'i 'byung gnas dpal e wa~M chos ldan gyi ri khrod bla brang thar pa rtser sa zla'i dkar phyogs kyi stong pa dang po rgyal ba'i dus kyi yod pa bzhi ldan gyi mtshan mor snang gsal zhig gi ngogs su shar mar spel pa'i mthu las ji ltar smon pa'i don rnams kyis re ba'i shing rta yongs su 'gengs pa'i rgyur gyur cig__/sarba dA ka l+yA NaM b+ha ba tu//___//_!