JKW-KABUM-22-ZA-012-056

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 56, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

56 515-519	ཟབ་གསང་རྫོགས་པ་ཆེན་པོའི་རྡོ་རྗེའི་ཐོལ་གླུ་འོད་གསལ་སྤྲིན་གྱི་རོལ་མོ། zab gsang rdzogs pa chen po'i rdo rje'i thol glu 'od gsal sprin gyi rol mo Dzogchen - rdzogs pa chen po   ·   Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཟབ་གསང་རྫོགས་པ་ཆེན་པོའི་རྡོ་རྗེའི་ཐོལ་གླུ་འོད་གསལ་སྤྲིན་གྱི་རོལ་མོ། ཟབ་གསང་རྫོགས་པ་ཆེན་པོའི་རྡོ་རྗེའི་ཐོལ་གླུ་འོད་གསལ་སྤྲིན་གྱི་རོལ་མོ་ཞེས་བྱ་བ། ཨེ་མ་ཧོ། ཚོགས་བརྒྱད་འཁྲུལ་པ་དབུ་མར་ཐིམ་པ་ཡི་གྲོང་ཁྱེར། །རྔ་ཡབ་དཔལ་རི་འཇའ་ཟེར་ཐིག་ལེ་ཡི་ཀློང་ནས། །སྐུ་གསུམ་བདེ་བ་ཆེན་པོའི་ངོ་བོ་རུ་བཞུགས་པའི། །འཆི་མེད་པདྨ་ཀཱ་ར་སྙིང་དབུས་ནས་དྲན་བྱུང་། །ང་ཡི་སྣང་བ་དག་པ་རབ་འབྱམས་ལ་སྐྱོལ་ཐོང་། །རྩ་གསུམ་འཁོར་ལོ་ལྔ་ལྡན་ཌཱ་ཀི་ཡི་གྲོང་ཁྱེར། །སྲོག་རྩོལ་བདུད་རྩིའི་ཐིགས་ཕྲེང་འཆི་མེད་ཀྱི་ཆུ་རྒྱུན། །བརྒྱད་ཁྲི་བཞི་སྟོང་དྲི་བཞོན་ལྷན་སྐྱེས་ཀྱི་གར་མཁན། །རྡོ་རྗེ་ཕུང་པོའི་ངོ་བོ་མཚོ་སྐྱེས་རྗེ་དྲན་བྱུང་། །ང་ཡི་རྟོག་ཚོགས་ཡེ་ཤེས་ཆེན་པོ་རུ་སྦྱོར་ཐོང་། །ལྟ་བ་མཐའ་བརྒྱད་སྤྲོས་བྲལ་ཀ་དག་གི་ཀློང་ནས། །སྒོམ་པ་མ་བཅོས་ལྷུན་གྲུབ་ཚོགས་གཉིས་ཀྱི་ལམ་མཆོག །སྤྱོད་པ་ཤར་གྲོལ་དུས་མཉམ་ཁྱབ་གདལ་གྱི་ཡེ་ཤེས། །འབྲས་བུ་འཁོར་འདས་གཉིས་མེད་མཚོ་སྐྱེས་རྗེ་དྲན་བྱུང་། །ང་ཡི་མྱོང་བ་བློ་བྲལ་ཆེན་པོ་རུ་སྐྱོལ་ཐོང་། །སྒྲོན་མ་རྣམ་བཞིའི་འཇའ་ཟེར་འཛུམ་དཀར་གྱི་ཀློང་ནས། །སྣང་བཞིའི་ཆོས་ཉིད་ཡིད་དཔྱོད་མཐའ་གྲོལ་གྱི་ངོ་བོ། །རྟོག་ཚོགས་གཞོན་ནུ་བུམ་སྐུའི་ཕྱག་རྒྱ་རུ་བཅིངས་པའི། །འཕོ་མེད་འཇིགས་བྲལ་མཚོ་སྐྱེས་རྡོ་རྗེ་དེ་དྲན་བྱུང་། །ང་ཡི་ལས་རླུང་ཅོག་གཞག་འཁྱིལ་བ་རུ་སྐྱོལ་ཐོང་། །རྣམ་ཐར་གསུམ་ལྡན་བདེ་སྟོང་པདྨོ་ཡི་ཀློང་དུ། །ཟག་བཅས་འཁྲུལ་པའི་ཕུང་ཁམས་སྐྱེ་མཆེད་ཀུན་བཅིངས་པས། །དུས་གསུམ་རྒྱལ་ཀུན་དགྱེས་པའི་མཆོད་སྤྲིན་དུ་སྤྲོ་བའི། །ཤེས་རབ་ཕ་རོལ་ཕྱིན་ཡུམ་མཚོ་རྒྱལ་རྗེ་དྲན་བྱུང་། །ང་ཡི་ཀུན་བརྟགས་ལྷན་སྐྱེས་ཆེན་པོ་རུ་སྐྱོལ་ཐོང་། །ཀུན་གཞི་ཕྱོགས་ལྷུང་བྲལ་བའི་གདོད་མ་ཡི་ཀློང་ནས། །རྣམ་ཤེས་འཁྲུལ་པའི་རྟོག་ཚོགས་ཕྱག་རྒྱ་རུ་བཅིངས་པའི། །ཆོས་དབྱིངས་ཡེ་ཤེས་དཔའ་བོ་ཌཱ་ཀི་ཡི་ཚོམ་བུ། །རིག་པ་རང་གསལ་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་སེམས་ཀ་དག་གཞི་དབྱིངས་སུ་སྐྱོལ་ཐོང་། །དབྱིངས་རིག་མཉམ་པར་སྦྱོར་བའི་བདེ་ཆེན་གྱི་ཀློང་ནས། །ཕུང་ཁམས་སྐྱེ་མཆེད་གདན་གསུམ་ཕྱག་རྒྱ་རུ་བཅིངས་པའི། །མེ་ལོང་ཡེ་ཤེས་རིག་འཛིན་ཌཱ་ཀི་ཡི་ཚོམ་བུ། །ཤེས་རབ་རང་བྱུང་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་ཆོས་ཉིད་མངོན་སུམ་དུ་འཁྲིད་དང་། །རང་བྱུང་གསང་བའི་ལམ་མཆོག་ཤེལ་སྦུག་གི་ཀློང་ནས། །བདེ་སྡུག་བར་མའི་ཚོར་བ་ཕྱག་རྒྱ་རུ་བཅིངས་པའི། །མཉམ་ཉིད་ཡེ་ཤེས་རིག་འཛིན་ཌཱ་ཀི་ཡི་ཚོམ་བུ། །རྒྱངས་ཞགས་འོད་གསལ་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་རླུང་སེམས་ཉམས་སྣང་གོང་འཕེལ་དུ་སྦྱོར་ཐོང་། །འཇའ་ཟེར་ཐིག་ལེས་སྤྲས་པའི་འོད་གསལ་གྱི་ཀློང་ནས། །རྟོག་དཔྱོད་འདུ་ཤེས་རང་གྲོལ་ཕྱག་རྒྱ་རུ་བཅིངས་པའི། །སོར་རྟོག་ཡེ་ཤེས་དཔའ་བོ་ཌཱ་ཀི་ཡི་ཚོམ་བུ། །དག་པ་དབྱིངས་ཀྱི་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་རིག་པ་ཚད་ཕེབས་སུ་སྐྱོལ་ཐོང་། །ལས་རླུང་འཁྲུལ་པ་ཟད་པའི་བུམ་སྐུ་ཡི་ཀློང་ནས། །སེམས་བྱུང་འདུ་བྱེད་རྟོག་ཚོགས་ཕྱག་རྒྱ་རུ་བཅིངས་པའི། །བྱ་གྲུབ་ཡེ་ཤེས་དཔའ་བོ་ཌཱ་ཀི་ཡི་ཚོམ་བུ། །ཐིག་ལེ་སྟོང་པའི་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་བློ་བྲལ་ཆོས་ཟད་ལ་སྐྱོལ་ཐོང་། །སྒྲ་ཚིག་ལས་འདས་ཟག་བྲལ་ལོངས་སྤྱོད་ཀྱི་འཁོར་ལོ། །ཉི་ཁྲི་ཆིག་སྟོང་དྲི་བཞོན་དག་པ་ཡི་ཀློང་ནས། །བདེ་སྟོང་འོད་གསལ་ཡི་གེའི་རོལ་མོ་རུ་བཀྲོལ་བའི། །ལུང་དང་རྟོགས་པ་གཉིས་ལྡན་སྐྱོ་གྲོགས་དེ་དྲན་བྱུང་། །ང་ཡི་སྣང་བ་བརྡ་དང་དཔེ་ཆ་རུ་སྐྱོལ་ཐོང་། །ཆོས་བརྒྱད་རེ་དོགས་འཆིང་བ་བྲལ་བ་ཡི་ཀློང་ནས། །རང་བྱུང་བྲག་སྐྱིབས་མེ་ཏོག་འབྲས་བུ་ཡིས་བརྒྱན་ཅིང་། །ཐབས་ཤེས་རི་དྭགས་ཁྱོ་ཤུག་རྩེ་དགའ་ལ་རོལ་པའི། །འདུ་འཛིའི་སྤྱོད་པ་བྲལ་བའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་ཟབ་མོའི་སྒོམ་སྒྲུབ་ལ་སྐྱོལ་ཐོང་། །སྨིན་གྲོལ་བདུད་རྩིའི་རྒྱུན་བཟང་ཟད་མེད་དུ་བཏུང་བས། །ཕན་ཚུན་དམ་ཚིག་ཕྱག་རྒྱ་གཅིག་པ་རུ་སྦྲེལ་ཞིང་། །བདེ་དང་སྟོང་པའི་སྙིང་པོས་རྟོག་ཚོགས་ཀུན་མྱོས་པའི། །ཕན་བདེའི་དགའ་སྟོན་སྤེལ་བའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་འོད་གསལ་ཆོས་སྐུ་རུ་སྐྱོལ་ཐོང་། །གནས་བཟང་མི་མེད་སྔར་འདས་གྲུབ་ཐོབ་ཀྱི་ཤུལ་ལམ། །བྱ་བ་དགུ་ཕྲུགས་གཏད་སྐྱེ་ཚད་ཕེབས་ཀྱི་ལམ་སྟེགས། །སྣང་བཞི་གོང་དུ་བགྲོད་པ་རྫོགས་ཆེན་གྱི་ཉམས་ལེན། །ཟག་བཅས་འོད་སྐུར་འགྲུབ་པའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་གཞོན་ནུ་བུམ་སྐུ་རུ་སྐྱོལ་མཛོད། །འོན་ཀྱང་བརྩོན་འགྲུས་ལས་འཕྲོའི་མཐུ་སྟོབས་ཀྱིས་དམན་ནས། །དོན་གཉིས་ལྷུན་གྲུབ་ཕྱོགས་མེད་འགྲོ་དོན་ལ་སྤྱོད་ན། །སྐྱོ་གྲོགས་གཅིག་ཏུ་རྗེས་བཟུང་དྲིན་ཆེན་རྗེ་དྲན་བྱུང་། །ང་ཡི་སྣང་བ་མཁའ་སྤྱོད་དབུ་མ་རུ་ཁྲིད་མཛོད། །དེ་སྐད་རང་སྣང་དག་པ་རབ་འབྱམས་ཀྱི་ཀློང་ནས། །གང་ཤར་སྣང་བ་གཏད་མེད་ཆོས་སྐུ་རུ་གྲོལ་ཏེ། །དོན་བརྒྱུད་བྱིན་གྱིས་བརླབས་པའི་མཚན་མ་ཡིས་སྤྲད་ཚེ། །ང་ཡི་སྐྱོ་གྲོགས་ཌཱ་ཀིའི་དབྱངས་རྟ་ལ་དྲངས་སོ།། །། ༈

[edit]

zab gsang rdzogs pa chen po'i rdo rje'i thol glu 'od gsal sprin gyi rol mo/__ zab gsang rdzogs pa chen po'i rdo rje'i thol glu 'od gsal sprin gyi rol mo zhes bya ba/__e ma ho/__tshogs brgyad 'khrul pa dbu mar thim pa yi grong khyer/__/rnga yab dpal ri 'ja' zer thig le yi klong nas/__/sku gsum bde ba chen po'i ngo bo ru bzhugs pa'i/__/'chi med pad+ma kA ra snying dbus nas dran byung /__/nga yi snang ba dag pa rab 'byams la skyol thong /__/rtsa gsum 'khor lo lnga ldan DA ki yi grong khyer/__/srog rtsol bdud rtsi'i thigs phreng 'chi med kyi chu rgyun/__/brgyad khri bzhi stong dri bzhon lhan skyes kyi gar mkhan/__/rdo rje phung po'i ngo bo mtsho skyes rje dran byung /__/nga yi rtog tshogs ye shes chen po ru sbyor thong /__/lta ba mtha' brgyad spros bral ka dag gi klong nas/__/sgom pa ma bcos lhun grub tshogs gnyis kyi lam mchog__/spyod pa shar grol dus mnyam khyab gdal gyi ye shes/__/'bras bu 'khor 'das gnyis med mtsho skyes rje dran byung /__/nga yi myong ba blo bral chen po ru skyol thong /__/sgron ma rnam bzhi'i 'ja' zer 'dzum dkar gyi klong nas/__/snang bzhi'i chos nyid yid dpyod mtha' grol gyi ngo bo/__/rtog tshogs gzhon nu bum sku'i phyag rgya ru bcings pa'i/__/'pho med 'jigs bral mtsho skyes rdo rje de dran byung /__/nga yi las rlung cog gzhag 'khyil ba ru skyol thong /__/rnam thar gsum ldan bde stong pad+mo yi klong du/__/zag bcas 'khrul pa'i phung khams skye mched kun bcings pas/__/dus gsum rgyal kun dgyes pa'i mchod sprin du spro ba'i/__/shes rab pha rol phyin yum mtsho rgyal rje dran byung /__/nga yi kun brtags lhan skyes chen po ru skyol thong /__/kun gzhi phyogs lhung bral ba'i gdod ma yi klong nas/__/rnam shes 'khrul pa'i rtog tshogs phyag rgya ru bcings pa'i/__/chos dbyings ye shes dpa' bo DA ki yi tshom bu/__/rig pa rang gsal sgron ma'i skyo grogs de dran byung /_/nga yi snang sems ka dag gzhi dbyings su skyol thong /__/dbyings rig mnyam par sbyor ba'i bde chen gyi klong nas/__/phung khams skye mched gdan gsum phyag rgya ru bcings pa'i/__/me long ye shes rig 'dzin DA ki yi tshom bu/__/shes rab rang byung sgron ma'i skyo grogs de dran byung /___/nga yi snang ba chos nyid mngon sum du 'khrid dang /__/rang byung gsang ba'i lam mchog shel sbug gi klong nas/__/bde sdug bar ma'i tshor ba phyag rgya ru bcings pa'i/__/mnyam nyid ye shes rig 'dzin DA ki yi tshom bu/__/rgyangs zhags 'od gsal sgron ma'i skyo grogs de dran byung /__/nga yi rlung sems nyams snang gong 'phel du sbyor thong /__/'ja' zer thig les spras pa'i 'od gsal gyi klong nas/__/rtog dpyod 'du shes rang grol phyag rgya ru bcings pa'i/__/sor rtog ye shes dpa' bo DA ki yi tshom bu/__/dag pa dbyings kyi sgron ma'i skyo grogs de dran byung /__/nga yi snang ba rig pa tshad phebs su skyol thong /__/las rlung 'khrul pa zad pa'i bum sku yi klong nas/__/sems byung 'du byed rtog tshogs phyag rgya ru bcings pa'i/__/bya grub ye shes dpa' bo DA ki yi tshom bu/__/thig le stong pa'i sgron ma'i skyo grogs de dran byung /__/nga yi snang ba blo bral chos zad la skyol thong /__/sgra tshig las 'das zag bral longs spyod kyi 'khor lo/__/nyi khri chig stong dri bzhon dag pa yi klong nas/__/bde stong 'od gsal yi ge'i rol mo ru bkrol ba'i/__/lung dang rtogs pa gnyis ldan skyo grogs de dran byung /__/nga yi snang ba brda dang dpe cha ru skyol thong /__/chos brgyad re dogs 'ching ba bral ba yi klong nas/__/rang byung brag skyibs me tog 'bras bu yis brgyan cing /__/thabs shes ri dwags khyo shug rtse dga' la rol pa'i/__/'du 'dzi'i spyod pa bral ba'i skyo grogs de dran byung /__/nga yi snang ba zab mo'i sgom sgrub la skyol thong /__/smin grol bdud rtsi'i rgyun bzang zad med du btung bas/__/phan tshun dam tshig phyag rgya gcig pa ru sbrel zhing /__/bde dang stong pa'i snying pos rtog tshogs kun myos pa'i/__/phan bde'i dga' ston spel ba'i skyo grogs de dran byung /__/nga yi snang ba 'od gsal chos sku ru skyol thong /__/gnas bzang mi med sngar 'das grub thob kyi shul lam/__/bya ba dgu phrugs gtad skye tshad phebs kyi lam stegs/__/snang bzhi gong du bgrod pa rdzogs chen gyi nyams len/__/zag bcas 'od skur 'grub pa'i skyo grogs de dran byung /_/nga yi snang ba gzhon nu bum sku ru skyol mdzod/__/'on kyang brtson 'grus las 'phro'i mthu stobs kyis dman nas/__/don gnyis lhun grub phyogs med 'gro don la spyod na/__/skyo grogs gcig tu rjes bzung drin chen rje dran byung /__/nga yi snang ba mkha' spyod dbu ma ru khrid mdzod/__/de skad rang snang dag pa rab 'byams kyi klong nas/__/gang shar snang ba gtad med chos sku ru grol te/__/don brgyud byin gyis brlabs pa'i mtshan ma yis sprad tshe/__/nga yi skyo grogs DA ki'i dbyangs rta la drangs so//__//___!_