JKW-KABUM-21-ZHA-014-002

🚧 This website is under continued development. We appreciate your patience!

Previous Text Back to Volume PageLast text in section.

སློབ་དཔོན་ཆེན་པོ་སྒེག་པའི་རྡོ་རྗེའི་ལུགས་ཀྱི་བླ་བསླུའི་གླུད་བསྔོ།

Wylie title	slob dpon chen po sgeg pa'i rdo rje'i lugs kyi bla bslu'i glud bsngo
Location	mkhyen brtse'i bka' 'bum Volume 21, sde tshan 14, Text 2, Pages 459-463 (Folios 3a5 to 5a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. slob dpon chen po sgeg pa'i rdo rje'i lugs kyi bla bslu'i glud bsngo. In 'jam dbyangs mkhyen brtse'i dbang po'i bka' 'bum, Vol. 21: 459-463. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

2 459-463	སློབ་དཔོན་ཆེན་པོ་སྒེག་པའི་རྡོ་རྗེའི་ལུགས་ཀྱི་བླ་བསླུའི་གླུད་བསྔོ། slob dpon chen po sgeg pa'i rdo rje'i lugs kyi bla bslu'i glud bsngo Ransom Rites to Extend Lifespan - 'chi bslu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །སློབ་དཔོན་ཆེན་པོ་སྒེག་པའི་རྡོ་རྗེའི་ལུགས་ཀྱི་བླ་བསླུའི་གླུད་བསྔོ་བཞུགས་སོ། །ན་མོ་གུ་རུ། ནད་པའི་བླ་ཚེ་བསླུ་བའི་གླུད་ནི། རིན་པོ་ཆེའི་སྣོད་དུ་བླ་གླུད་ཆེ་བ་དང་དཀོར་ཆས་གཏམས། ལོགས་སུ་གླུད་ཕྲན་ཆང་བུ་སོགས་མང་དུ་བསགས། རྟེན་འབྲེལ་བརྟགས་ན་བླ་རྟེན་མདའ་དར་བླ་གཡུས་བརྒྱན་པ་དང་། ལུང་པ་དགུའི་ཆུ་སྣའི་སྣོད་དུ་རྒྱ་ཕོར་གཙང་མར་བླ་ལུག་སྐྱེ་མཆེད་དོད་པ་བཞག །དེ་ནས་སྔགས་པས་ཡི་དམ་བསྒོམ་ཞེས་འབྱུང་བས། སྐྱབས་སེམས་དང་། སྭ་བྷཱ་ཝ་སོགས། སྟོང་པའི་ངང་ལས་ཕག་བདུན་གྱིས། །དྲངས་པའི་ཤིང་རྟར་པད་ཉིའི་སྟེང་། །མྃ་ལས་རང་ཉིད་འོད་ཟེར་ཅན། །སེར་པོ་ཕྱག་གཡས་མཆོག་སྦྱིན་གཡོན། །མྱ་ངན་མེད་ཤིང་ཡལ་ག་བསྣམས། །དར་དང་རིན་ཆེན་རྒྱན་གྱིས་བརྒྱན། །ཅུང་ཟད་ཁྲོ་ཞིང་འཛུམ་པའི་ཉམས། །ཕྱེད་སྐྱིལ་འོད་ཕུང་ཀློང་ན་བཞུགས། །ཐུགས་ཀར་ཉི་སྟེང་མྃ་ཡིག་མཐར། །སྔགས་ཕྲེང་འཁོར་བའི་འོད་ཟེར་གྱིས། །འཕགས་མཆོད་གདོན་བགེགས་ཚར་བཅད་གྱུར། ཨོཾ་མཱ་རཱི་ཙྱཻ་མཱྃ་སྭཱ་ཧཱ། སྟོང་ལས་མི་ཉུང་བར་བཟླས། གླུད་ཡས་རྣམས་སྔགས་དྲུག་ཕྱག་དྲུག་གིས་བྱིན་གྱིས་བརླབས་པའམ། བསྡུ་ན་ནམ་མཁའ་མཛོད་ཀྱིས་སྤེལ་ཏེ་བསྔོ་བ་ནི། ཧཱུྃ། འབྱུང་བ་ཆེན་པོ་རྣམ་ལྔ་ནི། །སྐྱེ་འགྲོ་སེམས་ཅན་ཀུན་གྱི་རྟེན། །དེ་ཉིད་ལ་ནི་བརྟེན་བཅས་པའི། །སྤར་སྨེ་གཟའ་སྐར་ཚེས་གྲངས་ལྷ། །སྡེ་བརྒྱད་བགེགས་རིགས་འབྱུང་པོའི་ཚོགས། །ཁྱད་པར་འཇིག་རྟེན་སྐྱོང་བ་བཅུ། །བཙུན་མོ་སྲས་དང་སྡེ་དཔུང་བཅས། །སྟོབས་ཆེན་གཟི་བརྗིད་ཆེ་བའི་ཚོགས། །རེ་ཏེ་འགོང་ཡག་བྱིས་པའི་བདུད། །ལི་བྱིན་ཧ་ར་སྲོག་གི་བདག །འཁོར་དང་བཅས་པ་ཇི་སྙེད་ཀུན། །རྩ་བ་གསུམ་གྱི་བཀའ་བྱུང་གིས། །གླུད་དང་གཏོར་མ་ལེན་པའི་ཕྱིར། །ཞི་ཞིང་ཕན་པའི་སེམས་ཀྱིས་སུ། །ད་ལྟ་ཉིད་དུ་གནས་འདིར་བྱོན། །བཤམས་པའི་གླུད་གཏོར་གསེར་སྐྱེམས་འདི། །མང་པོར་ཏིང་ངེ་འཛིན་གྱིས་སྤེལ། །སོ་སོར་ཐོབ་པ་སྔགས་ཀྱིས་བྱས། །ཕྱག་རྒྱས་ཕམ་རྒྱལ་འཐབ་རྩོད་མེད། །ཁྱེད་རྣམས་མཉེས་པའི་རྫས་སུ་འབུལ། །ཁར་སོང་ཁར་གྱི་ཉི་མ་ལ། །རྒྱུ་འབྱོར་མིའུ་རིན་ཆེན་འདིའི། །བླ་ལ་བརྐུས་སམ་གཞོམ་སྲིད་ན། །བླ་གླུད་གསེར་སྐྱེམས་འདི་བཞེས་ལ། །བཟུང་བ་ཐོངས་ལ་བཅིངས་པ་ཁྲོལ། །བསྡོམ་པ་གློད་ལ་མནན་པ་ཐེག །ཞི་བ་ཆེན་པོའི་ངང་དུ་བཞུགས། བཀྲ་ཤིས་བདེ་ལེགས་མཛད་དུ་གསོལ། །ཞེས་སྤྱིར་བསྔོ། དེ་ནས་གླུད་ཕྲན་རྣམས་རེ་རེ་ནས། ཨོཾ་ཨཱཿཧཱུྃ་གིས་བརླབས། ན་མསྶརྦ་སོགས་ཀྱི་བསྔོ། དེ་བཞིན་གཤེགས་པ་བཞིའི་མཚན་བརྗོད། ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང་། །དྲན་དང་བཟུང་དང་བསམ་དང་རེག །གློད་དང་གྲོལ་དང་ཞི་བར་མཛོད། །ཅེས་བཀའ་བསྒོ། དེ་འདྲ་ལོ་གྲངས་སོགས་སོང་མཐར། རང་ཡི་དམ་དུ་གསལ་བའི་ཐུགས་ཀ་ནས་འོད་ཟེར་ལྕགས་ཀྱུའི་རྣམ་པ་ལྟ་བུ་གྲངས་མེད་པ་འཕྲོས་པས། འཁོར་འདས་ཀྱི་ཚེ་བསོད་དཔལ་འབྱོར་ཡེ་ཤེས་ཀྱི་དྭངས་བཅུད་ཐམས་ཅད་དང་། ཁྱད་པར་བསྒྲུབ་བྱའི་བླ་ཚེ་ཆད་ཉམས་ཡར་བ་ཐམས་ཅད་འོད་ཟེར་ཐིག་ལེ་ཨ་ཧྲཱི་བྷྲཱུྃ་སོགས་ཀྱི་རྣམ་པར་རང་དབང་མེད་པར་བཀུག་སྟེ་བསྒྲུབ་བྱ་ལ་ཐིམ་པས་བླ་ཚེ་སྲོག་དབུགས་ཉམས་པ་སོར་ཆུད། གནས་པ་གོང་དུ་འཕེལ། ཚེ་བསོད་དཔལ་འབྱོར་སྟོབས་རྩལ་ཐམས་ཅད་རྒྱས་པར་གྱུར། ཡི་དམ་གྱི་སྔགས་མཐར། ཨོཾ་རྫབ་རྫབ། རྫུབ་རྫུབ། བྷ་ཏྲ་སློང་སློང་། ནྲྀ་ཁུག་ཛཿཛཿ ཞེས་ངག་བཅད་ལ་བཟླས། ཡང་ཐུན་མཚམས་སུ་གླུད་གཏོར་ཅི་ལྟར་རིགས་པས་འབུལ། སྐབས་སུ་དམོད་པ་དང་བཅས་བླ་ལུག་བསྐོར་བས་ལན་གཅིག་མིན་པར་བླ་རྟེན་གྱི་ཕྱོགས་ལ་ཁ་གྱུས་ན་ཁུག་པའི་རྟགས་ཡིན། མཐར། ཆོས་རྣམས་གང་དག་སོགས་ཀྱིས་ཆོས་སྦྱིན་བྱ། བྱང་ཆུབ་ཀྱི་སེམས་གཉིས་བསྒོམ་ལ་ཟབ་མདོ་འདོན། མཆོད་སྦྱིན་གནས་འདིར་གང་ལྷགས་པའི། །སོགས་ཀྱིས་མགྲོན་རྣམས་གཤེགས། ནག་ཕྱོགས་པ་སྡོད་སྲིད་པས་དྲག་སྔགས་ཀྱིས་མཚམས་བཅད་ལ། གླུད་གཏོར་ཆུ་བོ་ཆེན་པོའི་གཞུང་དུ་བསྐྱལ། །བླ་གཡུ་བསྒྲུབ་བྱའི་མགུལ་དུ་གདགས་ལ་བཀྲ་ཤིས་བྱའོ། །ཞེས་ཡིག་རྙིང་ལས་འདོན་བདེར་བྲིས་པ་དགེ་ལེགས་སུ་གྱུར་ཅིག། །། ༈ ཕན་ཆེའི་འཁོར་ལོ་བརྒྱ་རྩ་བརྒྱད་ཀྱི་ནང་ནས་ལྟས་ངན་ཟློག་པའི་མན་ངག་འདི་སློབ་དཔོན་རིན་པོ་ཆེ་ནས་ཕྱུངས་ཏེ་མངའ་བདག་གི་དོན་དུ་མཛད་པས་ཤིན་ཏུ་ཟབ་བོ། །དེ་ཡང་རང་ལ་ལྟས་ངན་གང་བྱུང་བ་དེའི་གཟུགས་དང་། ཤིང་སྣ་རྙེད་ཚད་ཐམས་ཅད་སྒྱེ་མོ་ནག་པོ་ཞིག་གི་ནང་དུ་བླུགས། ཞགས་པ་ནག་པོས་ཁ་དམ་པར་བསྡོམས། སྔགས་པ་རང་གི་ཡི་དམ་གྱི་གཞུང་བསྲང་། ལྟས་ངན་པ། ཉམ་ང་བ། ཆགས་ཆེ་བ་སོགས་མི་ཤིས་པ་ཐམས་ཅད་སྒྱེ་ནག་གི་རྫས་ལ་དགུག་གཞུག་དྲག་ཏུ་བྱ། རང་ཡི་དམ་དུ་གསལ་བའི་ཞབས་ཀྱིས་བརྫིས་ནས་རྨེགས་མེད་དུ་བཅོམ། ཐལ་བ་བུན་བུན་སོང་བར་བསམས་ལ་སྔགས་བརྒྱ་རྩ་བརྒྱད་བཟླ། སྒོ་དྲུང་གི་བར་རྡོག་པས་བསྒྲིལ་ལ་ཆུ་བོ་ཆེན་པོའི་གཞུང་དུ་བསྐྱལ། ཡང་ན་ལམ་གྲུ་གསུམ་དུ་མནན། ཕྱི་མིག་མི་བལྟ་བར་ལོག་ལ་མཚམས་བཅད་དོ། །སྔགས་ནི་ཡི་དམ་གང་ཡིན་གྱི་དྲག་སྔགས་དང་། ཨོཾ་མ་ཧཱ་ཧུར་ཐུམ་རྦད་རྦད། དགྲ་བོ་ཐུམ་ཐུམས། ཤིག་ཤིག །རྦད་རྦད། དྲིལ་དྲིལ། བྷྱོ་བྷྱོ་ཟློག་ཟློག །ཅེས་བཟླས་དུས་སྒྱེ་ནག་རྡོག་པས་བརྫིའོ། །ཡི་དམ་གྱི་ང་རྒྱལ་དྲག་པོ་གལ་ཆེ། འདི་ལྟར་བགྱིས་པས་ལྟས་ངན་ཐམས་ཅད་བཟློག་པར་ཐེ་ཚོམ་མེད། ཁྱད་པར་མི་དང་ཕྱུགས་ལ་མི་ཤིས་པའི་རིགས་སྐྱེས་པ་དང་། མེ་ཤོར་བ་དང་། ས་གཡོས་པ་དང་། ཤྭ་བརྡོལ་བ། གཞན་ཡང་ཀེག་སྲི་ལངས་པ། གོད་ཁ་བྱུར་ཁ། མི་ཁ་བྲ་མཆུ་ཐམས་ཅད་ལ་ཕན་ནོ། །མདོར་ན་བཀྲ་མི་ཤིས་པའི་རིགས་ཐམས་ཅད་ཟློག་པའི་གདམས་པ་སྒྱེ་ནག་རྡོག་དྲིལ་མ་ཞེས་ཟབ་པར་གདམས་སོ། །ས་མ་ཡ། ། ༈ ཕྱག་རྒྱ་འདི་ཤིང་བྱང་ལ་བྲིས་ཏེ་གནས་ཁང་གི་ཕྱོགས་བཞིར་བཙུགས། ཕྱོགས་བཞིར་ཟབ་མདོ་བདུད་བཟློག་དང་བཅས་པ་ཚར་རེ་དང་བཀྲ་ཤིས་བརྩེགས་པ་སྒྲོགས་པས། བྱ་ཐན། འབུ་ཐན་སོགས་ཐན་དང་ལྟས་ངན་གི་རིགས་ཐམས་ཅད་བཟློག་པར་འགྱུར་རོ། ། ༈ ཡང་རྒྱ་ཤོག་ལ་རྒྱ་སྣག་གི་ཡི་གེ་འདི་་བྲིས་ཏེ་ཡུངས་ཀར་འབྲུ་བདུན་དང་ལྷན་ཅིག་ཏུ་རྟེན་འབྲེལ་སྙིང་པོའི་སྔགས་སྟོང་ཚོ་དང་བཅས་ཟོས་ན་ལྟས་ངན་ཐམས་ཅད་འཕྲལ་དུ་ཟློག་པའི་མན་ངག་ཟབ་ཁྱད་མའོ།། ཨྠིྀ།

[edit]

slob dpon chen po sgeg pa'i rdo rje'i lugs kyi bla bslu'i glud bsngo/ @#/_/slob dpon chen po sgeg pa'i rdo rje'i lugs kyi bla bslu'i glud bsngo bzhugs so/__/na mo gu ru/__nad pa'i bla tshe bslu ba'i glud ni/__rin po che'i snod du bla glud che ba dang dkor chas gtams/__logs su glud phran chang bu sogs mang du bsags/__rten 'brel brtags na bla rten mda' dar bla g.yus brgyan pa dang /__lung pa dgu'i chu sna'i snod du rgya phor gtsang mar bla lug skye mched dod pa bzhag__/de nas sngags pas yi dam bsgom zhes 'byung bas/__skyabs sems dang /__swa b+hA wa sogs/__stong pa'i ngang las phag bdun gyis/__/drangs pa'i shing rtar pad nyi'i steng /__/ma~M las rang nyid 'od zer can/__/ser po phyag g.yas mchog sbyin g.yon/__/mya ngan med shing yal ga bsnams/__/dar dang rin chen rgyan gyis brgyan/__/cung zad khro zhing 'dzum pa'i nyams/__/phyed skyil 'od phung klong na bzhugs/__/thugs kar nyi steng ma~M yig mthar/__/sngags phreng 'khor ba'i 'od zer gyis/__/'phags mchod gdon bgegs tshar bcad gyur/__oM mA rI ts+yai mA~M swA hA/__stong las mi nyung bar bzlas/__glud yas rnams sngags drug phyag drug gis byin gyis brlabs pa'am/__bsdu na nam mkha' mdzod kyis spel te bsngo ba ni/__hU~M/__'byung ba chen po rnam lnga ni/__/skye 'gro sems can kun gyi rten/__/de nyid la ni brten bcas pa'i/__/spar sme gza' skar tshes grangs lha/__/sde brgyad bgegs rigs 'byung po'i tshogs/__/khyad par 'jig rten skyong ba bcu/__/btsun mo sras dang sde dpung bcas/__/stobs chen gzi brjid che ba'i tshogs/_/re te 'gong yag byis pa'i bdud/__/li byin ha ra srog gi bdag__/'khor dang bcas pa ji snyed kun/__/rtsa ba gsum gyi bka' byung gis/__/glud dang gtor ma len pa'i phyir/__/zhi zhing phan pa'i sems kyis su/__/da lta nyid du gnas 'dir byon/__/bshams pa'i glud gtor gser skyems 'di/__/mang por ting nge 'dzin gyis spel/__/so sor thob pa sngags kyis byas/__/phyag rgyas pham rgyal 'thab rtsod med/__/khyed rnams mnyes pa'i rdzas su 'bul/__/khar song khar gyi nyi ma la/__/rgyu 'byor mi'u rin chen 'di'i/__/bla la brkus sam gzhom srid na/__/bla glud gser skyems 'di bzhes la/__/bzung ba thongs la bcings pa khrol/__/bsdom pa glod la mnan pa theg__/zhi ba chen po'i ngang du bzhugs/_bkra shis bde legs mdzad du gsol/__/zhes spyir bsngo/__de nas glud phran rnams re re nas/__oM AHhU~M gis brlabs/__na mas+sarba sogs kyi bsngo/__de bzhin gshegs pa bzhi'i mtshan brjod/__khyer cig khyer cig stobs ldan rnams/__/sred dang chags dang zhen pa dang /__/dran dang bzung dang bsam dang reg__/glod dang grol dang zhi bar mdzod/__/ces bka' bsgo/__de 'dra lo grangs sogs song mthar/__rang yi dam du gsal ba'i thugs ka nas 'od zer lcags kyu'i rnam pa lta bu grangs med pa 'phros pas/__'khor 'das kyi tshe bsod dpal 'byor ye shes kyi dwangs bcud thams cad dang /__khyad par bsgrub bya'i bla tshe chad nyams yar ba thams cad 'od zer thig le a hrI b+h+rU~M sogs kyi rnam par rang dbang med par bkug ste bsgrub bya la thim pas bla tshe srog dbugs nyams pa sor chud/__gnas pa gong du 'phel/__tshe bsod dpal 'byor stobs rtsal thams cad rgyas par gyur/__yi dam gyi sngags mthar/__oM rdzab rdzab/__rdzub rdzub/__b+ha tra slong slong /__nr-i khug dzaHdzaH__zhes ngag bcad la bzlas/__yang thun mtshams su glud gtor ci ltar rigs pas 'bul/__skabs su dmod pa dang bcas bla lug bskor bas lan gcig min par bla rten gyi phyogs la kha gyus na khug pa'i rtags yin/__mthar/__chos rnams gang dag sogs kyis chos sbyin bya/__byang chub kyi sems gnyis bsgom la zab mdo 'don/__mchod sbyin gnas 'dir gang lhags pa'i/__/sogs kyis mgron rnams gshegs/__nag phyogs pa sdod srid pas drag sngags kyis mtshams bcad la/__glud gtor chu bo chen po'i gzhung du bskyal/__/bla g.yu bsgrub bya'i mgul du gdags la bkra shis bya'o/__/zhes yig rnying las 'don bder bris pa dge legs su gyur cig/___//___!_phan che'i 'khor lo brgya rtsa brgyad kyi nang nas ltas ngan zlog pa'i man ngag 'di slob dpon rin po che nas phyungs te mnga' bdag gi don du mdzad pas shin tu zab bo/__/de yang rang la ltas ngan gang byung ba de'i gzugs dang /__shing sna rnyed tshad thams cad sgye mo nag po zhig gi nang du blugs/__zhags pa nag pos kha dam par bsdoms/__sngags pa rang gi yi dam gyi gzhung bsrang /__ltas ngan pa/__nyam nga ba/__chags che ba sogs mi shis pa thams cad sgye nag gi rdzas la dgug gzhug drag tu bya/__rang yi dam du gsal ba'i zhabs kyis brdzis nas rmegs med du bcom/__thal ba bun bun song bar bsams la sngags brgya rtsa brgyad bzla/__sgo drung gi bar rdog pas bsgril la chu bo chen po'i gzhung du bskyal/__yang na lam gru gsum du mnan/__phyi mig mi blta bar log la mtshams bcad do/__/sngags ni yi dam gang yin gyi drag sngags dang /__oM ma hA hur thum rbad rbad/__dgra bo thum thums/__shig shig__/rbad rbad/__dril dril/__b+h+yo b+h+yo zlog zlog__/ces bzlas dus sgye nag rdog pas brdzi'o/__/yi dam gyi nga rgyal drag po gal che/__'di ltar bgyis pas ltas ngan thams cad bzlog par the tshom med/__khyad par mi dang phyugs la mi shis pa'i rigs skyes pa dang /__me shor ba dang /__sa g.yos pa dang /__shwa brdol ba/__gzhan yang keg sri langs pa/__god kha byur kha/__mi kha bra mchu thams cad la phan no/__/mdor na bkra mi shis pa'i rigs thams cad zlog pa'i gdams pa sgye nag rdog dril ma zhes zab par gdams so/__/sa ma ya/___/___!_phyag rgya 'di shing byang la bris te gnas khang gi phyogs bzhir btsugs/__phyogs bzhir zab mdo bdud bzlog dang bcas pa tshar re dang bkra shis brtsegs pa sgrogs pas/__bya than/__'bu than sogs than dang ltas ngan gi rigs thams cad bzlog par 'gyur ro/___/___!_yang rgya shog la rgya snag gi yi ge 'di bris te yungs kar 'bru bdun dang lhan cig tu rten 'brel snying po'i sngags stong tsho dang bcas zos na ltas ngan thams cad 'phral du zlog pa'i man ngag zab khyad ma'o//__a+thi+-i/