JKW-KABUM-19-DZA-001-043

🚧 This website is under continued development. We appreciate your patience!

Previous Text Back to Volume PageNext Text

རྡོ་རྗེ་འཆང་མཁྱེན་རབ་བྱམས་པ་ངག་དབང་ལྷུན་གྲུབ་ནི།

Wylie title	rdo rje 'chang mkhyen rab byams pa ngag dbang lhun grub ni
Location	mkhyen brtse'i bka' 'bum Volume 19, sde tshan 1, Text 43, Pages 373-378 (Folios 187a4 to 189b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje 'chang mkhyen rab byams pa ngag dbang lhun grub ni. In 'jam dbyangs mkhyen brtse'i dbang po'i bka' 'bum, Vol. 19: 373-378. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

43 373-378	རྡོ་རྗེ་འཆང་མཁྱེན་རབ་བྱམས་པ་ངག་དབང་ལྷུན་གྲུབ་ནི། rdo rje 'chang mkhyen rab byams pa ngag dbang lhun grub ni History Texts - lo rgyus   ·   Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྡོ་རྗེ་འཆང་མཁྱེན་རབ་བྱམས་པ་ངག་དབང་ལྷུན་གྲུབ་ནི། རྡོ་རྗེ་འཆང་མཁྱེན་རབ་བྱམས་པ་ངག་དབང་ལྷུན་གྲུབ་ནི། འོད་གསལ་གྱི་ལྷ་གེམ་རྩེ་རྒྱལ་པོའི་རིགས་ལས། བསྟན་པ་སྔ་དར་གྱི་དུས་སུ་ལོ་ཙཱ་བ་ལྕེ་ཛྙཱ་ན་སིདྡྷི་དང་། ལྕེ་ཁྱི་འབྲུག་སོགས་དང་། ཕྱི་དར་གྱི་དུས་སུ་དཔལ་ཞྭ་ལུ་གསེར་བསྐོང་གི་དགོན་སྡེ་འདེབས་པ་པོ་ལྕེ་བཙུན་ཤེས་རབ་འབྱུང་གནས་སོགས་མང་དུ་བྱོན་ཅིང་། འགྲོ་མགོན་འཕགས་པ་རིན་པོ་ཆེས་ཞྭ་ལུ་ཁྲི་སྐོར་གྱི་བདག་པོར་དབང་བསྐུར་བ་དང་། ས་སྐྱ་པ་དྷརྨ་པ་ལ་རཀྵི་ཏའི་སྐུ་ཞང་དུ་གྱུར་པས་ཞ་ལུ་སྐུ་ཞང་ཞེས་གྲགས་ཤིང་། རྡོ་རྗེ་འཆང་མཁྱེན་རབ་ཆོས་རྗེ་སོགས་དམ་པ་དུ་མ་བྱོན་པའི་རིགས་ལས། ཡབ་གྲུབ་པའི་དབང་ཕྱུག་སྐུ་ཞང་འཇམ་དབྱངས་དབང་པོ་དང་། ཡུམ་ཁྲི་དཔོན་ཕོ་མདོ་བའི་བློན་རིགས་དཔོན་ཆེན་ཕྲེང་ལྷག་པའི་སྲས་མོ་གུ་རུ་སྒྲོལ་མ་གཉིས་ཀྱི་སྲས་སུ་ཆུ་བྱ་ཆོ་འཕྲུལ་ཟླ་བའི་དཀར་ཕྱོགས་ཀྱི་དགའ་བ་དང་པོའི་ནམ་ལངས། རྒྱལ་ཕུར་གྱི་འགྲུབ་སྦྱོར་བཟང་པོ་འཆར་བའི་ཚེ་ཨ་ཞེས་པའི་སྒྲ་དང་བཅས་ཏེ་འཁྲུངས་མ་ཐག་ཁུ་བོ་མཁྱེན་རབ་བསྟན་འཛིན་བཟང་པོས་བྱིན་གྱིས་བརླབས། རིམ་གྱིས་དབང་བསྐུར་བ་དང་། དགེ་བསྙེན་གྱི་སྡོམ་པ་སྩལ་ནས་མཚན་ངག་དབང་རྒྱལ་མཚན་དུ་བཏགས། དམ་པའི་རིགས་སད། དགུང་ལོ་བདུན་པར་དཔལ་ནཱ་ལེནྡྲར་ཕེབས། ཐུགས་གཉེར་གནང་བས་ཉིན་རེར་ཤོག་བུ་བཅུ་ལྷག་འཛིན་པ་སོགས་མཁྱེན་རབ་ཆེ། ཆོས་སྲུང་གི་རྣམ་འཕྲུལ་མང་དུ་གཟིགས། དགུང་ལོ་བརྒྱད་པར་གསུང་ངག་རིན་པོ་ཆེ་ཐོག་མར་གསན་པས་མཚོན་ཁུ་བོ་ལས་གསན་པ་རྒྱ་མཚོ་ལྟ་བུ་བཞེས། བར་མ་རབ་བྱུང་སྩལ་ཞིང་མཚན་མཁྱེན་རབ་ངག་དབང་ལྷུན་གྲུབ་ཏུ་གསོལ། ལྷག་པར་དགུང་ལོ་བཅུ་གཅིག་པར་ཡང་བསྐྱར་ལམ་འབྲས་གསན་པའི་རྒྱུ་དབང་སྐབས་བླ་མ་དགེས་པ་རྡོ་རྗེ་ཡབ་ཡུམ་དངོས་སུ་གཟིགས་ཤིང་། དེ་ནས་བཟུང་བླ་མ་འདི་སངས་རྒྱས་དངོས་ཡིན་སྙམ་པ་ལས་ཁུ་བོ་དང་མི་ཕལ་པའི་སྣང་བ་སྐད་ཅིག་ཀྱང་མ་ཤར། ལམ་ཟབ་གནང་སྐབས་བླ་མ་ས་ཆེན་དུ་གཟིགས། སྤྱིར་ཡང་ཐུགས་ཉམས་དང་། ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་། དེ་དག་གི་བར་སྐབས་རྣམས་སུ་གཞུང་ཆེན་མོའི་གཟིགས་རྟོགས་དང་། བསྙེན་སྒྲུབ་ཟུང་འབྲེལ་དུ་བསྐྱངས་པས་ཐོས་བསམ་སྒོམ་གསུམ་ལྷན་གཅིག་ཏུ་རྫོགས། རིམ་གྱིས་བཀའ་ཆོས་ཀྱང་མང་དུ་གནང་། རྗེ་དབོན་རིན་པོ་ཆེ་ལས་ལམ་འབྲས་གནང་སྐབས་སྤྲུལ་པའི་དཀྱིལ་འཁོར་དངོས་སུ་གཟིགས། ཁུ་བོ་དང། གཅེན་ངོ་མཚར་བའི་ལྟས་དང་བཅས་གཞན་དོན་དུ་གཤེགས་ནས་དགོངས་རྫོགས་རྒྱ་ཆེར་གནང་། དགུང་ལོ་ཉེར་གཅིག་པར་ཐམས་ཅད་མཁྱེན་པ་རོང་སྟོན་ཆེན་པོའི་ཆོས་ཀྱི་ཁྲི་ལ་ཞབས་བཀོད། ལོ་དེར་རྩེ་གདོང་མཁན་ཆེན་བྱམས་པ་བསོད་ནམས་ལྷུན་གྲུབ་དང། ཐུབ་བསྟན་མཁན་པོ་ཆོས་དཀར་རྣམ་རྒྱལ་དཔོན་སློབ་སོགས་འདུས་པའི་སྤྱན་སྔར་བསྙེན་པར་རྫོགས་ཤིང་ཚུལ་ཁྲིམས་ཀྱི་ཕུང་པོ་ཡོངས་སུ་དག་པར་གྱུར། ས་སྐྱ་གོང་དུ་ཕེབས་ཤིང། བདག་ཆེན་རིན་པོ་ཆེ་རྗེ་བཙུན་གྲགས་པའི་སྤྲུལ་པར་ཐུགས་ངེས་འདྲོངས། རྟ་ནག་ཏུ་ངག་དབང་བསྟན་པའི་རྡོ་རྗེ་ལས་རྒྱུ་ལམ་གྱི་དབང་སོགས་གསན་ཅིང་། ཁྱད་པར་སྒྲུབ་པ་ལུང་བྱིན་སྐབས། བླ་མ་ཉིད་སྐུ་འོད་དང་གཟི་བརྗིད་ཤིན་ཏུ་ཆེ་བར་གཟིགས། སྐུ་ཚེའི་ཚད་དང་སློབ་མའི་གཙོ་བོ་སོགས་ལུང་བསྟན་པ་རྣམས་ཐོག་ཏུ་ཁེལ། ཤིང་སྟག་ལོར་ཞྭ་ལུ་མཁན་རིན་པོ་ཆེར་ལྷེ་མོས་གཞིས་ཀར་མགོན་པོ་ཆེ་ཆུང་སོགས་དང་། ཁྱད་པར་མེ་འབྲུག་ལོ་ནང་རྗེ་ཉིད། གནས་གསར་པ་ནམ་མཁའ་བསོད་ནམས་དབང་གི་རྒྱལ་པོ། སྒེར་པ་རྗེ་དྲུང་བསྟན་འཛིན་ཕུན་ཚོགས་སོགས་འདུས་པ་ཉི་ཤུ་སྐོར་གྱིས་སློབ་བཤད་གསན། སློབ་བཤད་གྲོལ་ནས་ཕྱག་དཔེ་རྣམས་ཉིད་ཆོས་ཀྱི་བདག་པོ་ཡིན་པས་བཤད་སྒྲུབ་འཕེལ་བར་མཛོད་ཅེས་གསུངས་ནས་གནང་བས་ལུང་བསྟན་གྱི་བདེན་པ་མངོན་དུ་གྱུར། གོང་ས་རིན་པོ་ཆེས་ཀྱང་རྣམ་པ་ཀུན་ཏུ་ཐུགས་རྗེས་ལྷག་པར་སྐྱོངས། ཐུགས་དམ་ཐུན་བཞིའི་རྣལ་འབྱོར་དང་། ལྟ་བ་འཁོར་འདས་དབྱེར་མེད་ཀྱི་ཉམས་ལེན་དང་མ་བྲལ་བའི་ངང་། འཁོར་ལོ་གསུམ་གྱི་མཛད་པ་སྤྱི་དང་། ཁྱད་པར་ཡོངས་འཛིན་དམ་པ་ཉི་ཤུ་རྩ་ལྔ་ལས་བཞེས་པའི་ཟབ་ཆོས་རྣམས་བར་མ་ཆད་པར་སྩལ་ཏེ། དེའང་ལམ་འབྲས་ཚར་ཉེར་ལྔ། མཁའ་སྤྱོད་༧སོགས་ཁྲིད་དང་། རྒྱུ་དབང་དྲུག་བརྒྱ་སྐོར། ལམ་དབང་ལྔ་བརྒྱ་སྐོར། ཕྲེང་བའི་དབང་བསྐུར་བ་ཚར་བཅུ་བདུན། མཁའ་སྤྱོད་བྱིན་རླབས་དྲུག་བརྒྱ་སྐོར། སྦྱོང་དཀྱིལ་ཚར་སུམ་བརྒྱ་སྐོར་སོགས་དབང་ཁྲིད་ལུང་གསུམ་བསམ་གྱིས་མི་ཁྱབ་པ་སྩལ་བའི་གྲུབ་འབྲས་ཞལ་སློབ་ས་སྐྱ་པ་ཀུན་དགའ་བཀྲ་ཤིས། རྩེ་གདོང་འཇམ་དབྱངས་མཆེད། ཞྭ་ལུ་མཁན་ཆེན། དགའ་ལྡན་ཁྲི་པ་གཉིས། རྡོར་བྲག་པད་ཕྲིན། གཏེར་བདག་གླིང་པ། གནས་གསར་པ་ནམ་མཁའ་བསོད་ནམས། མཁྱེན་བརྩེ་རབ་བརྟན་སོགས་སྐྱེས་བུ་དུ་མ་དང་། གཞན་ཡང་མངའ་རིས་ཁམས་སོག་ཡན་ཐམས་ཅད་དུ་ཁྱབ་ཅིང་། ཁྱད་པར་རྨོར་ཆེན་གྱིས་ཆོས་བརྒྱུད་སྤེལ། ཐུགས་དམ་གྱི་ལྷ་བསམ་གྱིས་མི་ཁྱབ་པ་ཞལ་གཟིགས། རྣམ་སྲས་དང་རབ་བརྟན་མ་སོགས་བྲན་དུ་ཁོལ། དེ་ལྟ་བུའི་མཛད་པ་བསམ་གྱིས་མི་ཁྱབ་པའི་ངང་། དགུང་ལོ་དོན་གཅིག་པ་ཆུ་ལུག་སྣྲོན་ཟླ་བའི་དམར་ཕྱོགས་རྫོགས་པ་ལྔ་པའི་ཕྱི་མའི་ཐོ་རངས་སྐྱ་རིངས་འཆར་བ་ཙམ་གྱི་ཚེ་སྔ་སོར་ནས་ཕྱི་མཐའི་ཞལ་ཆེམས་ལྷུག་སྩོལ་དང་། ངོ་མཚར་བའི་གཟིགས་སྣང་དང་ཆོ་འཕྲུལ་བསམ་གྱིས་མི་ཁྱབ་པའི་ངང་། ནམ་མཁའ་ལས་མེ་ཏོག་སྣ་ལྔའི་ཆར་ཁ་བ་ལྟར་བབས་ཤིང་། འཇའ་དཀར་པོ་མདུང་ཚུགས་སུ་ཟུག་པ་དང་། ཁ་དོག་སྣ་ལྔ་པའི་འོད་ཀྱིས་བར་སྣང་ཐམས་ཅད་ཁྱབ་པ་དང་ལྷན་ཅིག་ཏུ། སྐུ་དྲང་པོ། ཞབས་སྐྱིལ་ཀྲུང་ཕྱེད་པ། ཕྱག་གཉིས་གཡས་བདུད་འདུལ་དང་། གཡོན་མཉམ་གཞག་གི་ཕྱག་རྒྱ་བཅས་ཏེ་མཁའ་སྤྱོད་ཆེན་པོར་གཤེགས་པའི་ཚེ། ཟླ་བ་གཅིག་གི་བར་དུ་དེ་ལྟ་བུའི་ལྟས་རྒྱུན་མི་འཆད་པས་འགྲོ་བ་རྣམས་དད་པའི་ས་ལ་བཀོད་ཅིང་། རྗེས་ཀྱི་སྒྲུབ་དགོས་རྣམས་དབོན་མཁྱེན་བརྩེ་རབ་བརྟན་མཆེད་ནས་ལྷུན་གྱིས་གྲུབ་པར་མཛད། རྣམ་ཐར་རྒྱས་པ་དགུང་ལོ་རེ་དགུ་པ་ལྕགས་སྦྲུལ་ཧོར་ཟླ་དྲུག་པ་ཡན་རྗེ་ཉིད་ཀྱིས་མཛད་པའི་རྟོགས་ལྕེ་བཙུན་སེང་གེ་དབང་ཕྱུག་གི་བརྗོད་ཤེལ་དཀར་༡༨༤ཕྲེང་བ་དང་། འཕྲོས་ཁ་༣༥སྐོང་རིགས་སྐལ་ལྡན་རྣ་བའི་བདུད་རྩི་ཞེས་དབོན་མཁྱེན་བརྩེའི་ཟིན་བྲིས་ལ་ལྕེ་རིགས་ས་མུ་དྲའི་མཚན་གྱིས་མཛད་པ་ལས་ཤེས་སོ། ། ༈ བྱམས་པ་མགོན་པོ་འཕགས་པ་ཉེ་བར་འཁོར། །རྒྱལ་བ་མཆོག་དབྱངས་དམ་པ་རྒྱ་གར་ཞབས། །རོང་སྟོན་རྗེ་དང་ཁྱབ་བདག་རྡོ་རིང་མ། །མཁའ་སྤྱོད་བཙུན་མོས་མངོན་སུམ་རྗེས་བཟུང་བ། །སྔགས་འཆང་ཚར་ཆེན་ཡབ་སྲས་དངོས་སློབ། སངས་རྒྱས་རིན་ཆེན་རྣམ་འཕྲུལ་ནི། །ངག་གི་དབང་ཕྱུག་བྱམས་པ་ལྷུན་གྲུབ་སྟེ། །དེ་ཡི་ཟློས་གར་ས་སྐྱའི་རིགས་སུ་འཁྲུངས། །ཞེས་སོ།། །། ༈

[edit]

rdo rje 'chang mkhyen rab byams pa ngag dbang lhun grub ni/ rdo rje 'chang mkhyen rab byams pa ngag dbang lhun grub ni/__'od gsal gyi lha gem rtse rgyal po'i rigs las/__bstan pa snga dar gyi dus su lo tsA ba lce dz+nyA na sid+d+hi dang /__lce khyi 'brug sogs dang /__phyi dar gyi dus su dpal zhwa lu gser bskong gi dgon sde 'debs pa po lce btsun shes rab 'byung gnas sogs mang du byon cing /__'gro mgon 'phags pa rin po ches zhwa lu khri skor gyi bdag por dbang bskur ba dang /__sa skya pa d+harma pa la rak+Shi ta'i sku zhang du gyur pas zha lu sku zhang zhes grags shing /__rdo rje 'chang mkhyen rab chos rje sogs dam pa du ma byon pa'i rigs las/__yab grub pa'i dbang phyug sku zhang 'jam dbyangs dbang po dang /__yum khri dpon pho mdo ba'i blon rigs dpon chen phreng lhag pa'i sras mo gu ru sgrol ma gnyis kyi sras su chu bya cho 'phrul zla ba'i dkar phyogs kyi dga' ba dang po'i nam langs/__rgyal phur gyi 'grub sbyor bzang po 'char ba'i tshe a zhes pa'i sgra dang bcas te 'khrungs ma thag khu bo mkhyen rab bstan 'dzin bzang pos byin gyis brlabs/__rim gyis dbang bskur ba dang /__dge bsnyen gyi sdom pa stsal nas mtshan ngag dbang rgyal mtshan du btags/__dam pa'i rigs sad/__dgung lo bdun par dpal nA len+d+rar phebs/__thugs gnyer gnang bas nyin rer shog bu bcu lhag 'dzin pa sogs mkhyen rab che/__chos srung gi rnam 'phrul mang du gzigs/__dgung lo brgyad par gsung ngag rin po che thog mar gsan pas mtshon khu bo las gsan pa rgya mtsho lta bu bzhes/__bar ma rab byung stsal zhing mtshan mkhyen rab ngag dbang lhun grub tu gsol/__lhag par dgung lo bcu gcig par yang bskyar lam 'bras gsan pa'i rgyu dbang skabs bla ma dges pa rdo rje yab yum dngos su gzigs shing /__de nas bzung bla ma 'di sangs rgyas dngos yin snyam pa las khu bo dang mi phal pa'i snang ba skad cig kyang ma shar/__lam zab gnang skabs bla ma sa chen du gzigs/__spyir yang thugs nyams dang /__ngo mtshar ba'i ltas bsam gyis mi khyab pa byung /__de dag gi bar skabs rnams su gzhung chen mo'i gzigs rtogs dang /__bsnyen sgrub zung 'brel du bskyangs pas thos bsam sgom gsum lhan gcig tu rdzogs/__rim gyis bka' chos kyang mang du gnang /__rje dbon rin po che las lam 'bras gnang skabs sprul pa'i dkyil 'khor dngos su gzigs/__khu bo dang/__gcen ngo mtshar ba'i ltas dang bcas gzhan don du gshegs nas dgongs rdzogs rgya cher gnang /__dgung lo nyer gcig par thams cad mkhyen pa rong ston chen po'i chos kyi khri la zhabs bkod/__lo der rtse gdong mkhan chen byams pa bsod nams lhun grub dang/__thub bstan mkhan po chos dkar rnam rgyal dpon slob sogs 'dus pa'i spyan sngar bsnyen par rdzogs shing tshul khrims kyi phung po yongs su dag par gyur/__sa skya gong du phebs shing/__bdag chen rin po che rje btsun grags pa'i sprul par thugs nges 'drongs/__rta nag tu ngag dbang bstan pa'i rdo rje las rgyu lam gyi dbang sogs gsan cing /__khyad par sgrub pa lung byin skabs/__bla ma nyid sku 'od dang gzi brjid shin tu che bar gzigs/__sku tshe'i tshad dang slob ma'i gtso bo sogs lung bstan pa rnams thog tu khel/__shing stag lor zhwa lu mkhan rin po cher lhe mos gzhis kar mgon po che chung sogs dang /__khyad par me 'brug lo nang rje nyid/__gnas gsar pa nam mkha' bsod nams dbang gi rgyal po/__sger pa rje drung bstan 'dzin phun tshogs sogs 'dus pa nyi shu skor gyis slob bshad gsan/__slob bshad grol nas phyag dpe rnams nyid chos kyi bdag po yin pas bshad sgrub 'phel bar mdzod ces gsungs nas gnang bas lung bstan gyi bden pa mngon du gyur/__gong sa rin po ches kyang rnam pa kun tu thugs rjes lhag par skyongs/__thugs dam thun bzhi'i rnal 'byor dang /__lta ba 'khor 'das dbyer med kyi nyams len dang ma bral ba'i ngang /__'khor lo gsum gyi mdzad pa spyi dang /__khyad par yongs 'dzin dam pa nyi shu rtsa lnga las bzhes pa'i zab chos rnams bar ma chad par stsal te/__de'ang lam 'bras tshar nyer lnga/__mkha' spyod 7sogs khrid dang /__rgyu dbang drug brgya skor/__lam dbang lnga brgya skor/__phreng ba'i dbang bskur ba tshar bcu bdun/__mkha' spyod byin rlabs drug brgya skor/__sbyong dkyil tshar sum brgya skor sogs dbang khrid lung gsum bsam gyis mi khyab pa stsal ba'i grub 'bras zhal slob sa skya pa kun dga' bkra shis/__rtse gdong 'jam dbyangs mched/__zhwa lu mkhan chen/__dga' ldan khri pa gnyis/__rdor brag pad phrin/__gter bdag gling pa/__gnas gsar pa nam mkha' bsod nams/__mkhyen brtse rab brtan sogs skyes bu du ma dang /__gzhan yang mnga' ris khams sog yan thams cad du khyab cing /__khyad par rmor chen gyis chos brgyud spel/__thugs dam gyi lha bsam gyis mi khyab pa zhal gzigs/__rnam sras dang rab brtan ma sogs bran du khol/__de lta bu'i mdzad pa bsam gyis mi khyab pa'i ngang /__dgung lo don gcig pa chu lug snron zla ba'i dmar phyogs rdzogs pa lnga pa'i phyi ma'i tho rangs skya rings 'char ba tsam gyi tshe snga sor nas phyi mtha'i zhal chems lhug stsol dang /__ngo mtshar ba'i gzigs snang dang cho 'phrul bsam gyis mi khyab pa'i ngang /__nam mkha' las me tog sna lnga'i char kha ba ltar babs shing /__'ja' dkar po mdung tshugs su zug pa dang /__kha dog sna lnga pa'i 'od kyis bar snang thams cad khyab pa dang lhan cig tu/__sku drang po/__zhabs skyil krung phyed pa/__phyag gnyis g.yas bdud 'dul dang /__g.yon mnyam gzhag gi phyag rgya bcas te mkha' spyod chen por gshegs pa'i tshe/__zla ba gcig gi bar du de lta bu'i ltas rgyun mi 'chad pas 'gro ba rnams dad pa'i sa la bkod cing /__rjes kyi sgrub dgos rnams dbon mkhyen brtse rab brtan mched nas lhun gyis grub par mdzad/__rnam thar rgyas pa dgung lo re dgu pa lcags sbrul hor zla drug pa yan rje nyid kyis mdzad pa'i rtogs lce btsun seng ge dbang phyug gi brjod shel dkar 184phreng ba dang /__'phros kha 35skong rigs skal ldan rna ba'i bdud rtsi zhes dbon mkhyen brtse'i zin bris la lce rigs sa mu dra'i mtshan gyis mdzad pa las shes so/___/__!_byams pa mgon po 'phags pa nye bar 'khor/__/rgyal ba mchog dbyangs dam pa rgya gar zhabs/__/rong ston rje dang khyab bdag rdo ring ma/__/mkha' spyod btsun mos mngon sum rjes bzung ba/__/sngags 'chang tshar chen yab sras dngos slob/__sangs rgyas rin chen rnam 'phrul ni/__/ngag gi dbang phyug byams pa lhun grub ste/__/de yi zlos gar sa skya'i rigs su 'khrungs/__/zhes so//____//_!_