JKW-KABUM-18-TSHA-002-002

🚧 This website is under continued development. We appreciate your patience!

Previous Text Back to Volume PageNext Text

རྣལ་འབྱོར་གྱི་རྒྱུད་སྡེ་བྱུང་ཚུལ།

Wylie title	rnal 'byor gyi rgyud sde byung tshul
Location	mkhyen brtse'i bka' 'bum Volume 18, sde tshan 2, Text 2, Pages 305-310 (Folios 18a4 to 20b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rnal 'byor gyi rgyud sde byung tshul. In 'jam dbyangs mkhyen brtse'i dbang po'i bka' 'bum, Vol. 18: 305-310. Khams sde dge rdzong sar dgon: Rdzong sar blo gros phun tshogs, 2020.
Genre	Religious History Texts - chos 'byung

1 Texts in this Section (sde tshan or chos tshan)

2 305-310	རྣལ་འབྱོར་གྱི་རྒྱུད་སྡེ་བྱུང་ཚུལ། rnal 'byor gyi rgyud sde byung tshul Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ན་མོ་བཛྲ་སཏྭཱ་ཡ། རྣལ་འབྱོར་གྱི་རྒྱུད་སྡེ་བྱུང་ཚུལ་ལ། བདག་ཅག་གི་སྟོན་པ་གྲངས་མེད་ཀུན་སྙིང་བཞེད་པའི་བསྐལ་པ་རྒྱ་མཚོའི་ཐོག་མ་ནས་རྫོགས་པའི་བྱང་ཆུབ་མངོན་དུ་བརྙེས་ཀྱང་། དྲང་དོན་དུ་རྒྱལ་བུ་དོན་གྲུབ་ཀྱི་རྟེན་ལ་གསར་དུ་སངས་རྒྱས་བའི་ཚུལ་སྟོན་པའི་ཚེ། བཏགས་པའི་ལུས་ཆུ་བོ་ནཻརཉྫ་ནའི་འགྲམ་དུ་བཞག་ནས་དབང་བསྐུར་ཏེ། ཡེ་ཤེས་ཀྱི་ལུས་འོག་མིན་དུ་མངོན་བྱང་ལྔའི་རོལ་པས་སྐུ་བཞིའི་སར་གཤེགས་པར་མཛད་ནས། སླར་ཡང་འོག་མིན་དང་། དགའ་ལྡན་དང་། ལྕང་ལོ་ཅན་ཏེ་ལྷ་གནས་གསུམ་དུ་གྲགས་པར་ཡོ་གའི་རྒྱུད་སྡེ་རྣམས་གསུངས། དེ་ཉིད་སྡུད་པོ་ཕྱག་ན་རྡོ་རྗེས་བསྡུས་ཏེ་གནས་པ་ལ། སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་གཉིས་ན། དཔལ་འཁོར་ལོ་སྡོམ་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ཞེས་སོགས་ལུང་བསྟན་པ་ལྟར་རྒྱ་གར་ཤར་ལྷོའི་འགྲམ། གྲོང་ཁྱེར་པ་ཏི་ཀི། རྟཱི་ཞེས་བྱ་བར་རྒྱལ་པོ་རབ་གསལ་ཟླ་བ་བྱུང་སྟེ། དེ་ལ་ཕྱག་ན་རྡོ་རྗེས་རྡོ་རྗེ་དབྱིངས་ཀྱི་དཀྱིལ་འཁོར་སྤྲུལ་ནས་དབང་བསྐུར་ཏེ། ལྷ་གནས་གསུམ་དུ་གྲགས་པར་དེ་ཉིད་བསྡུས་པ་ལ་སོགས་པ་རྣལ་འབྱོར་གྱི་རྒྱུད་མཐའ་དག་གནང་། དེ་ལ་སློབ་མ་རྒྱལ་བུ་སྒྲ་གཅན་འཛིན་བཟང་པོ་དང་། ཡེ་ཤེས་རྡོ་རྗེ་དང་། པྲཛྙཱ་སིདྡྷི་དང་། རབ་འབྱོར་བསྐྱངས་ཏེ་བཞིའམ། ཁ་ཅིག་རབ་འབྱོར་བསྐྱངས་མི་འདྲེན་པར། སྭ་སྟི་ཕ་ལ་དང་། ཕལ་ཆེར་ཉི་མའི་སྙིང་པོ་དང་བཞི་ཡིན་ཞེས་ཟེར། གང་ལྟར་དེ་བཞི་ཆར་ལ་འཇམ་དཔལ་རྩ་རྒྱུད་ལས། ཡི་གེ་ཨཱ་མིང་བདག་ཉིད་ཆེས། །སྟོན་པའི་བསྟན་པ་གཅེས་འཛིན་བྱེད། །བློ་ལྡན་ཡོན་ཏན་ཀུན་གྱིས་བཀུར། །ཞེས་ལུང་བསྟན་པའི་གྲུབ་ཆེན་ཀུན་དགའ་སྙིང་པོས་གསན། དེ་ནས་པྲཛྙཱ་བ་ལི་ཏ། པྲཛྙཱ་བོ་དྷི། མུཀྟིཀ་ཀོ་ཥ། དྷརྨ་པ་ལ་རྣམས་ལ་བརྒྱུད་དེ། དེའི་སློབ་མ་ནི་ཇོ་བོ་དཱི་པཾ་ཀ་ར་དང་། ལོ་ཙཱ་བ་རིན་ཆེན་བཟང་པོའོ། །ཡང་ཁ་ཅིག །སློབ་དཔོན་བུདྡྷ་གུཧྱ་ཞེས་བྱ་བ་དངོས་གྲུབ་བརྙེས་པ་ཞིག་གིས་འཕགས་པ་འཇམ་དཔལ་ལས། དེ་ཉིད་བསྡུས་པ། རྡོ་རྗེ་རྩེ་མོ། དཔལ་མཆོག་དང་པོ། ངན་སོང་སྦྱོང་རྒྱུད། རྟོག་པ་ཐམས་ཅད་བསྡུས་པ་རྣམས་ཀྱི་དབང་གདམས་གསན་ནས། ཡན་ལག་མེད་པའི་རྡོ་རྗེ་སོགས་ལས་རིམ་པར་བརྒྱུད་དེ། །སློབ་དཔོན་ཤཱཀྱ་བཤེས་གཉེན་ཞེས་བྱ་བས་དེ་ཉིད་བསྡུས་པའི་རྒྱ་ཆེར་བཤད་པ་ཤློཀ་སྟོང་ཕྲག་བཅུ་གཉིས་པ་ཀོ་སཱ་ལ་ཡི་རྒྱན་ཞེས་བྱ་བ་མཛད། ཡང་སྔར་གྱི་སློབ་དཔོན་གྲུབ་པ་ཐོབ་པ་དེ་དང་མིང་མཚུངས་པའི་སློབ་དཔོན་སངས་རྒྱས་གསང་བ་ཞེས་པས་དེ་ཉིད་བསྡུས་པའི་འགྲེལ་པ་མཛད་དེ། དེ་ལྟར་ན་དོན་ལ་མཁས་པ་སངས་རྒྱས་གསང་བ། ཚིག་ལ་མཁས་པ་ཤཱཀྱ་བཤེས་གཉེན། ཚིག་དོན་གཉིས་ཀ་ལ་མཁས་པ་ཀུན་དགའ་སྙིང་པོ་སྟེ། རྣལ་འབྱོར་རྒྱུད་ལ་མཁས་པ་མི་གསུམ་དུ་གྲགས་སོ། །ཞེས་བཞེད་དོ། །ཡང་ཀུན་དགའ་སྙིང་པོའི་མཆེད་གྲོགས་འཇམ་དཔལ་གྲགས་པ་ཞེས་བྱ་བ་འཇམ་དཔལ་གྱི་གྲུབ་པ་ཐོབ་ཅིང་སྐུ་ཆེ་བའི་ཡོན་ཏན་ལྔ་དང་ལྡན་པ་དེས་དཔལ་སྦས་བཟང་པོ་ལ་བཤད། དེས་བྲམ་ཟེ་ཡེ་ཤེས་རྡོ་རྗེ་ལ་བཤད། དེས་ན་ལེནྡྲའི་ནུབ་སྒོ་བ་ཤེར་འབྱུང་བློ་གྲོས་ལ་བཤད། དེས་བྲམ་ཟེ་བཞད་པའི་རྡོ་རྗེ་དང་། པདྨཱ་ཀ་ར་ཤྲཱདྡྷཱ་ཀ་ར་གསུམ་ལ་བཤད། ཕྱི་མ་གཉིས་ཀྱིས་ལོ་ཆེན་ལ་བཤད། ཡང་སློབ་དཔོན་འཇམ་དཔལ་བཤེས་གཉེན་ཞེས་བྱ་བས། སངས་རྒྱས་ཡེ་ཤེས་ཞབས་དང་སྒེག་པའི་རྡོ་རྗེའམ་ནོར་བུ་གླིང་པ་དང་སྣ་ཚོགས་གཟུགས་ཅན་སོགས་མཚན་གྱི་རྣམ་གྲངས་དུ་མ་དང་ལྡན་པ་དེ་ལ་བཤད། དེས་སཱུཪྻ་སིཾ་ཧ། དེས་དྷརྨ་བཛྲ། དེས་དེ་བེ་ཤྨ་ར། དེས་ཤཱིནྟཱཾ་གརྦྷ་དང་སྨྲྀ་ཏི་ཛྙཱ་ན་ལ་བཤད་དོ། །དེ་དག་ལས་བོད་དུ་ཇི་ལྟར་བྱུང་ཚུལ་ལ། ལོ་ཆེན་རིན་བཟང་ཀ་སྨི་རར་ལན་གསུམ་དུ་བྱོན་པའི་དང་པོ་ལ། ཁ་ཆེའི་མཁན་པོ་ཙནྡྲ་ཧ་རི་ལ་འཇིག་རྟེན་སྣང་བྱེད་ཀྱི་དཀྱིལ་འཁོར་དུ་ཞུགས། ཕྱིས་ཤྲདྡྷཱ་ལས་འདུས་པ་འཇམ་རྡོར་དང་། མི་བསྐྱོད་པ་གཉིས། རྡོར་དབྱིངས་ཀྱི་དཀྱིལ་འཁོར་དུ་དབང་བསྐུར་བ་ཞུས་ནས་བཤད་བཀའ་ཡང་གསན། ལན་གཉིས་པར་པཎྜི་ཏ་པདྨཱ་ཀ་ར་ཝརྨ་དང་པྲཛྙཱ་ཀ་ར་ཝརྨ་གཉིས་ལ་གཏུགས་ཏེ་ཡོ་གའི་གཞུང་འགྲེལ་འགའ་ཞིག་བསྒྱུར་བ་སོགས་མཛད། དེ་ཡན་ཆད་ལོ་ཆེན་གྱི་སློབ་མ་རྣམས། ཤྲདྡྷཱ་ནས་བརྒྱུད་པའི་ཡོ་གའི་སྐོར་འཛིན་པས། ཕྱག་ལེན་ཀུན་སྙིང་དང་། བཤད་པ་དེ་ཉིད་སྣང་བ་མ་འགྱུར་བས་བཤད་པ་ཀོ་སཱ་ལའི་རྒྱན་གྱི་སྟེང་ནས་མཛད་ཅིང་ཀར་དང་དབྱངས་སོགས་སྤྲོས་པའང་ཆེ་བར་གྲགས་སོ། །གསུམ་པར་པཎྜི་ཏ་སངས་རྒྱས་ཞི་བ་ཞེས་ནོར་བུ་གླིང་པའི་སློབ་མའམ། ལ་ལས་དེ་ཉིད་དུ་འདོད་པ་དེ་ལས་ཀུན་སྙིང་ལུགས་ཀྱི་བཤད་པ་དང་ལག་ལེན་གཉིས་ཀ་ཞུས་པས། དེ་ཉིད་ལ་ཐུགས་རྩིས་ཤིན་ཏུ་ཆེ་བར་མཛད། ལོ་ཆེན་གྱི་སྐུ་ཚེའི་མཇུག་ཏུ་རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་པ་ལ་མངའ་རིས་སུ་བྱོན་པར་རྣལ་འབྱོར་རྒྱུད་ཀྱི་སྐོར་གསན། ཀུན་སྙིང་གི་བརྒྱུད་པ་བཞི་པར་འདུག་ཅིང་དེའི་གདམས་པ་མ་ནོར་བ་བྱུང་བས་ཤིན་ཏུ་མཉེས་སྐད། ལོ་ཆེན་དེ་ལ་སྤྱིར་སློབ་མ་མང་ཡང་ཐུགས་སྲས་མཆོག་བཞི་སྟེ། ལོ་ཆུང་ལེགས་པའི་ཤེས་རབ། མང་གོང་གི་གུང་ཤིང་བརྩོན་འགྲུས་རྒྱལ་མཚན། གྲྭ་པ་གཞོན་ནུ་ཤེས་རབ། སྐྱི་ནོར་ཛྙཱ་ན་དང་བཞི་ལས། དང་པོས་དྷརྨ་ཕ་ལའི་ལུགས་མ་གསན། གཉིས་པས་དྷརྨ་ཕ་ལའི་ལུགས་གཙོ་བོར་མཛད། གསུམ་པས་གཉིས་ཀའི་གཞུང་བསྲངས། བཞི་པས་ཕྱིས་ཀྱི་གཞུང་བསྲང་ངོ་། །ཡང་གཞན་དུ་སྦྱངས་ཤིང་དེར་ཐུག་པ། པུ་ཧྲང་ཨན་སྟོན་གྲགས་རིན། རྒྱ་ཡེ་ཚུལ། གུང་པ་དགེ་བཤེས། མར་ཡུལ་བ་དཀོན་མཆོག་བརྩེགས་ཏེ་བཞིའོ། །དབུས་གཙང་ན་མར་དར་ཚུལ། ལོ་ཆེན་དྲུང་དུ་འགྲོ་བ་ཡི། རྒྱང་རོ་དཔེ་དམར་གྱི་རྐྱང་པོ་ཆོས་བློ་སྔ། དེ་ནས་ཤན་གྱི་སུམ་སྟོན་ཡེ་འབར། དེ་ནས་ཉང་སྟོད་ཀྱི་ཅེ་ཞར། དེ་ནས་དཔང་ཁ་འདར་ཆུང་གི་ཕ་གཞོན་ནུ་རྒྱ་མཚོ། ལ་སྟོད་ཀྱི་བྲག་སྟེང་བ། སྒུལ་ཕྱི་རུའི་དམར་སྟོན་ཆོས་ཀྱི་རྒྱལ་མཚན་ནོ། །མདོག་གླེ་སྟོན། བལ་ཤཱཀྱ་རྡོ་རྗེ། ཐང་སྟོན་གོང་གེ་བ་རྣམས་ཏེ། དེ་དག་ཕལ་ཆེར་ལོ་ཆེན་ལ་ཐུག་པ་ཙམ་བྱས་ནས་གཙོ་བོར་ལོ་ཆུང་གི་དྲུང་དུ་སྦྱངས་ཏེ། དབུས་གཙང་གི་སྨད་ཕྱོགས་སུ་དར་བས་ཡོ་ག་སྨད་ལུགས་སུ་གྲགས། ཡང་ལོ་ཆེན་གྱི་སློབ་མ་བྲག་སྟེང་པ་ཡོན་ཏན་ཚུལ་ཁྲིམས། དེས་མལ་གྱོ། དེས་ས་སྐྱ་པ་ལ་བརྒྱུད་དེ་སྟོད་ལུགས་སུ་གྲགས། ཡང་དྷརྨ་ཕ་ལ་ནས། ཇོ་བོ། གོ་མི་སྒོམ་ཆེན། སྐྱི་ནོར་ཛྙཱ་ན། གཉལ་བ་ཉི་མ་ཤེས་རབ། ས་ནུར་ཉི་མ་འོད་ཟེར་སོགས་ནས་བརྒྱུད་པ་ལ་ཇོ་བོ་ལུགས་སམ། རྩ་སྐྱ་པ་རྩ་སྣུར་ཉི་མ་འོད་ཟེར་འཛིམ་པ་བློ་ཆེན་གསུམ་ནས་བརྒྱུད་པ་ཞེས་གྲགས་སོ། །ཤུ་བྷཾ།། །། ༈

[edit]

rnal 'byor gyi rgyud sde byung tshul/ @#/_/na mo badz+ra satwA ya/__rnal 'byor gyi rgyud sde byung tshul la/__bdag cag gi ston pa grangs med kun snying bzhed pa'i bskal pa rgya mtsho'i thog ma nas rdzogs pa'i byang chub mngon du brnyes kyang /__drang don du rgyal bu don grub kyi rten la gsar du sangs rgyas ba'i tshul ston pa'i tshe/__btags pa'i lus chu bo nairany+dza na'i 'gram du bzhag nas dbang bskur te/__ye shes kyi lus 'og min du mngon byang lnga'i rol pas sku bzhi'i sar gshegs par mdzad nas/__slar yang 'og min dang /__dga' ldan dang /__lcang lo can te lha gnas gsum du grags par yo ga'i rgyud sde rnams gsungs/__de nyid sdud po phyag na rdo rjes bsdus te gnas pa la/__ston pa mya ngan las 'das nas lo brgya dang bcu gnyis na/__dpal 'khor lo sdom pa'i rgyud phyi ma las/__nga ni 'di nas mi snang nas/__/zhes sogs lung bstan pa ltar rgya gar shar lho'i 'gram/__grong khyer pa ti ki/_rtI zhes bya bar rgyal po rab gsal zla ba byung ste/__de la phyag na rdo rjes rdo rje dbyings kyi dkyil 'khor sprul nas dbang bskur te/__lha gnas gsum du grags par de nyid bsdus pa la sogs pa rnal 'byor gyi rgyud mtha' dag gnang /__de la slob ma rgyal bu sgra gcan 'dzin bzang po dang /__ye shes rdo rje dang /__pradz+nyA sid+d+hi dang /__rab 'byor bskyangs te bzhi'am/__kha cig rab 'byor bskyangs mi 'dren par/__swa sti pha la dang /__phal cher nyi ma'i snying po dang bzhi yin zhes zer/__gang ltar de bzhi char la 'jam dpal rtsa rgyud las/__yi ge A ming bdag nyid ches/__/ston pa'i bstan pa gces 'dzin byed/__/blo ldan yon tan kun gyis bkur/__/zhes lung bstan pa'i grub chen kun dga' snying pos gsan/__de nas pradz+nyA ba li ta/__pradz+nyA bo d+hi/__muk+tika ko Sha/__d+harma pa la rnams la brgyud de/__de'i slob ma ni jo bo dI paM ka ra dang /__lo tsA ba rin chen bzang po'o/__/yang kha cig__/slob dpon bud+d+ha guh+ya zhes bya ba dngos grub brnyes pa zhig gis 'phags pa 'jam dpal las/__de nyid bsdus pa/__rdo rje rtse mo/__dpal mchog dang po/__ngan song sbyong rgyud/__rtog pa thams cad bsdus pa rnams kyi dbang gdams gsan nas/__yan lag med pa'i rdo rje sogs las rim par brgyud de/__/slob dpon shAkya bshes gnyen zhes bya bas de nyid bsdus pa'i rgya cher bshad pa sh+loka stong phrag bcu gnyis pa ko sA la yi rgyan zhes bya ba mdzad/__yang sngar gyi slob dpon grub pa thob pa de dang ming mtshungs pa'i slob dpon sangs rgyas gsang ba zhes pas de nyid bsdus pa'i 'grel pa mdzad de/__de ltar na don la mkhas pa sangs rgyas gsang ba/__tshig la mkhas pa shAkya bshes gnyen/__tshig don gnyis ka la mkhas pa kun dga' snying po ste/__rnal 'byor rgyud la mkhas pa mi gsum du grags so/__/zhes bzhed do/__/yang kun dga' snying po'i mched grogs 'jam dpal grags pa zhes bya ba 'jam dpal gyi grub pa thob cing sku che ba'i yon tan lnga dang ldan pa des dpal sbas bzang po la bshad/__des bram ze ye shes rdo rje la bshad/__des na len+d+ra'i nub sgo ba sher 'byung blo gros la bshad/__des bram ze bzhad pa'i rdo rje dang /__pad+mA ka ra shrAd+d+hA ka ra gsum la bshad/__phyi ma gnyis kyis lo chen la bshad/__yang slob dpon 'jam dpal bshes gnyen zhes bya bas/__sangs rgyas ye shes zhabs dang sgeg pa'i rdo rje'am nor bu gling pa dang sna tshogs gzugs can sogs mtshan gyi rnam grangs du ma dang ldan pa de la bshad/__des sUR+Ya siM ha/__des d+harma badz+ra/__des de be sh+ma ra/__des shIn+tAM gar+b+ha dang smr-i ti dz+nyA na la bshad do/__/de dag las bod du ji ltar byung tshul la/__lo chen rin bzang ka smi rar lan gsum du byon pa'i dang po la/__kha che'i mkhan po tsan+d+ra ha ri la 'jig rten snang byed kyi dkyil 'khor du zhugs/__phyis shrad+d+hA las 'dus pa 'jam rdor dang /__mi bskyod pa gnyis/__rdor dbyings kyi dkyil 'khor du dbang bskur ba zhus nas bshad bka' yang gsan/__lan gnyis par paN+Di ta pad+mA ka ra warma dang pradz+nyA ka ra warma gnyis la gtugs te yo ga'i gzhung 'grel 'ga' zhig bsgyur ba sogs mdzad/__de yan chad lo chen gyi slob ma rnams/__shrad+d+hA nas brgyud pa'i yo ga'i skor 'dzin pas/__phyag len kun snying dang /__bshad pa de nyid snang ba ma 'gyur bas bshad pa ko sA la'i rgyan gyi steng nas mdzad cing kar dang dbyangs sogs spros pa'ang che bar grags so/__/gsum par paN+Di ta sangs rgyas zhi ba zhes nor bu gling pa'i slob ma'am/__la las de nyid du 'dod pa de las kun snying lugs kyi bshad pa dang lag len gnyis ka zhus pas/__de nyid la thugs rtsis shin tu che bar mdzad/__lo chen gyi sku tshe'i mjug tu rgya gar shar phyogs kyi paN+Di ta d+harma pa la mnga' ris su byon par rnal 'byor rgyud kyi skor gsan/__kun snying gi brgyud pa bzhi par 'dug cing de'i gdams pa ma nor ba byung bas shin tu mnyes skad/__lo chen de la spyir slob ma mang yang thugs sras mchog bzhi ste/__lo chung legs pa'i shes rab/__mang gong gi gung shing brtson 'grus rgyal mtshan/__grwa pa gzhon nu shes rab/__skyi nor dz+nyA na dang bzhi las/__dang pos d+harma pha la'i lugs ma gsan/__gnyis pas d+harma pha la'i lugs gtso bor mdzad/__gsum pas gnyis ka'i gzhung bsrangs/__bzhi pas phyis kyi gzhung bsrang ngo /__/yang gzhan du sbyangs shing der thug pa/__pu hrang an ston grags rin/__rgya ye tshul/__gung pa dge bshes/__mar yul ba dkon mchog brtsegs te bzhi'o/__/dbus gtsang na mar dar tshul/__lo chen drung du 'gro ba yi/__rgyang ro dpe dmar gyi rkyang po chos blo snga/__de nas shan gyi sum ston ye 'bar/__de nas nyang stod kyi ce zhar/__de nas dpang kha 'dar chung gi pha gzhon nu rgya mtsho/__la stod kyi brag steng ba/__sgul phyi ru'i dmar ston chos kyi rgyal mtshan no/__/mdog gle ston/__bal shAkya rdo rje/__thang ston gong ge ba rnams te/__de dag phal cher lo chen la thug pa tsam byas nas gtso bor lo chung gi drung du sbyangs te/__dbus gtsang gi smad phyogs su dar bas yo ga smad lugs su grags/__yang lo chen gyi slob ma brag steng pa yon tan tshul khrims/__des mal gyo/__des sa skya pa la brgyud de stod lugs su grags/__yang d+harma pha la nas/__jo bo/__go mi sgom chen/__skyi nor dz+nyA na/__gnyal ba nyi ma shes rab/__sa nur nyi ma 'od zer sogs nas brgyud pa la jo bo lugs sam/__rtsa skya pa rtsa snur nyi ma 'od zer 'dzim pa blo chen gsum nas brgyud pa zhes grags so/__/shu b+haM//__//__!_