JKW-KABUM-18-TSHA-001-010

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 18, sde tshan 1, Text 10, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 18: 8-. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

10 146-150	རྟེན་གསུམ་དང་གཙུག་ལག་ཁང་ལྟ་བུ་རབ་གནས་གྲུབ་པའི་ལེགས་འབུལ་གྱི་ཚེ། rten gsum dang gtsug lag khang lta bu rab gnas grub pa'i legs 'bul gyi tshe Official Letters - chab shog	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྟེན་གསུམ་དང་གཙུག་ལག་ཁང་ལྟ་བུ་རབ་གནས་གྲུབ་པའི་ལེགས་འབུལ་གྱི་ཚེ། རྟེན་གསུམ་དང་གཙུག་ལག་ཁང་ལྟ་བུ་རབ་གནས་གྲུབ་པའི་ལེགས་འབུལ་གྱི་ཚེ། གོང་རྒྱན་འབེབས་ཞུས་སོགས་སྐབས་སུ་བབས་པ་སྦྱོར་བའི་མཐར། ཁྱད་པར་གཞན་ཕྱིར་དམིགས་པའི་བསོད་ནམས་ཀྱིས། །ཉེ་བར་བསྐྲུན་པའི་རྟེན་གྱི་ཕུང་པོ་གང་། །རྡུལ་ཕྲན་རེར་ཡང་རབ་འབྱམས་ཞིང་ཁམས་ཀྱི། །རྟེན་དང་བརྟེན་པའི་དངོས་པོ་གསར་དུ་བསྐྲུན། །དམ་ཚིག་སྣང་ཆར་ཡེ་ཤེས་སེམས་དཔའི་བྱིན། །མངོན་སུམ་འཕོས་གང་ལྷག་པར་གནས་པ་ཡི། །མེ་ཏོག་འཐོར་བས་བརྟན་པའི་དགེ་མཚན་ལས། །དོན་གཉིས་རྫོགས་ལྡན་གསར་པའི་སྣང་བ་ཤར། །དེ་ཚེ་ལྷར་བཅས་ཀུན་གྱི་མཆོད་སྡོང་དུ། །ཉེ་བར་འོས་པའི་རིན་ཐང་ལ་སྦྱར་བའི། །ངོ་མཚར་བཀའ་དྲིན་དྲན་པའི་དད་གསུམ་བློས། །དངོས་འབྱོར་མཎྜལ་ཕྲ་མོའི་དགའ་སྟོན་སྟོབ། །དེ་ལྟར་མཚོ་བྱུང་མའི་རྒྱུད་མངས་ལས་འཕོས་པའི་བརྗོད་པ་ཉུང་ངུའི་མདུན་བདར་ཏེ། སྐབས་སུ་བབས་པའི་གླེང་བ་ནི། གང་ལ་ལྷག་པར་གནས་པའི་བྱ་བའི་རྟེན་གྱི་དངོས་པོ་གུས་ལྡན་པ་ཁོ་བོ་ཅག་གིས་ཡིད་ཅན་ཐམས་ཅད་བྱང་ཆུབ་སྙིང་པོ་ལ་འགོད་པའི་བསམ་སྦྱོར་འབའ་ཞིག་གིས་ཀུན་ནས་བསླངས་ཏེ། སྒྱུ་མའི་ནོར་རྫས་ཅུང་ཟད་གཅིག་མཆིས་པ་རྣམས་ལས་སྙིང་པོ་བླང་བའི་ཕྱིར། བཟོ་གནས་ཀྱི་རིག་པར་རྣམ་དཔྱོད་མཆོག་ཏུ་ཡངས་པ་དག་ལ་དྭང་བས་ཆེད་དུ་བསྐུལ་ཏེ། བསྐལ་བཟང་འདིར་སྐུ་གསུང་ཐུགས་རྟེན་དམིགས་བསལ་གང་ཡིན་ཁ་བསྒྱུར་བྱ། རྣམ་འདྲེན་བཞི་པའི་མཚན་དཔེའི་ཞལ་སྐྱིན་གསེར་སྦྱངས་ཞུན་མ་ལས་གྲུབ་པ་རྒྱུད་སྡེ་རིན་པོ་ཆེ་ནས་ཉེ་བར་བཤད་པའི་ཕྱག་ཚད་རྣམས་ལེགས་པར་ཚང་བ་སོགས་ངོ་མཚར་མིག་གི་བདུད་རྩིར་བསྐྲུན་པ་དང་ཆབ་གཅིག་གང་གིས་རབ་ཏུ་གནས་པའི་སློབ་དཔོན། ཕྱི་ལྟར་ན་ཡང་དག་པར་བླངས་པའི་ཁྲིམས་ཀྱིས་རྒྱུད་ཉེ་བར་བསྡམས་ཤིང་བརྟན་མཁས་ཀྱི་ཡོན་ཏན་མཐའ་དག་གིས་མཛེས་པའི་བྱང་ཆུབ་སེམས་དཔའི་དགེ་སློང་ཆེན་པོ། ནང་ལྟར་ན་ཕྱི་ནང་གི་དེ་ཉིད་བཅུ་ལ་སོགས་པ་རྡོ་རྗེ་འཛིན་པའི་ལས་རབ་འབྱམས་གང་ལའང་ཐོགས་པ་མེད་པ་དཔལ་གསང་བའི་བདག་པོ་ལྟ་བུ། གསང་བ་ལྟར་ན་གདན་གསུམ་ཚང་བའི་དཀྱིལ་འཁོར་གྱི་འཁོར་ལོའི་གཙོ་བོར་བཞུགས་པའི་ཀུན་མཁྱེན་ཡེ་ཤེས་ཕུང་པོའི་བདག་ཉིད་ཅན་རྗེ་བཙུན་བླ་མ་དམ་པ་གང་གི་ཞལ་སྔ་ནས་ཀྱི་དབུས་རིག་གྲོལ་གྱི་ཡོན་ཏན་བརྒྱད་དང་ལྡན་པའི་འཕགས་ཚོགས་འདུས་པ་རྒྱ་མཚོས། འདི་ལྟར་ཀྲི་ཡཱ་ས་མུཙྪ་དང་། རབ་གནས་ཀྱི་རྒྱུད་སོགས་ལས་བཤད་པའི་ལོ་ཟླ་ཞག་དུས་གཟའ་སྐར་གྱི་འཕྲོད་སྦྱོར་སོགས་ཕུན་སུམ་ཚོགས་པའི་དུས་སུ། རིན་ཆེན་འབར་བ་ལས། གནས་ནི་ཡིད་འོང་འདུ་འཛི་སོགས། །སྐྱོན་མེད་རྣམ་མཛེས་བླ་གབ་ཅན། །ཞེས་སོགས་ཀྱི་ཁྱད་ཆོས་དང་མཚན་ཉིད་ལེགས་པར་ཚང་བར། དཀྱིལ་འཁོར་དང་། སྦྱིན་སྲེག་དང་། རབ་ཏུ་གནས་པ་རྣམས་དང་འབྲེལ་བའི་དགོས་པའི་ཡོ་བྱད་མ་ཚང་བ་མེད་པར་བསགས་ཏེ། ཚུལ་ཇི་ལྟར་ན། དཔལ་དམ་པ་དང་པོའི་སངས་རྒྱས་ལས། རང་ལུས་ཡེ་ཤེས་རྣམ་པར་དག་ལ་རྡོ་རྗེ་གསུམ་དང་སྔགས་དང་བཅས་པའི་ཕུང་པོ་ཁམས་ལ་སོགས་པ་ཀུན། །ལྷ་རྣམས་ཀྱི་ནི་རང་གི་སྙིང་གའི་པདྨར་ས་བོན་རང་རང་རིམ་པས་འགོད་པར་བྱ། །ས་བོན་བཀོད་ནས་རབ་ཏུ་གནས་པར་འགྱུར་ཏེ་མི་ཡི་བདག་པོ་མཆོད་རྟེན་སྐུ་གཟུགས་སོགས་ལའང་། །ཞེས་སོགས་ཀྱིས་མཚོན་རྒྱུད་སྡེ་རིན་པོ་ཆེ་རྣམས་ནས་ལན་གཅིག་མ་ཡིན་པར་བསྟན་པ་བཞིན། འཕགས་བོད་ཀྱི་པཎ་གྲུབ་ཚད་ལྡན་རྣམས་ཀྱིས་བཀྲལ་ཞིང་ཐུགས་ཉམས་སུ་བསྟར་བའི་རྗེས་སུ་འབྲངས་ཏེ་སྦྱོར་དངོས་རྗེས་གསུམ་གྱི་ཆོ་གའི་ཡན་ལག་ཕྲ་མོ་ཚུན་ཆད་ཉམས་པ་མེད་པའི་སྒོ་ནས་རབ་ཏུ་གནས་ཤིང་མངའ་གསོལ་པའི་བྱ་བས་ལེགས་བྲིས་ཀྱི་དབང་པོ་དང་། མི་ཡི་བདག་པོ་དང་། གདེངས་ཅན་གྱི་དབང་པོ་རྣམས་དང་བཅས་པའི་འཇིག་རྟེན་གསུམ་གྱི་སྐྱེ་འགྲོ་མ་ལུས་པས་མཆོད་པའི་འོས་སུ་མཛད་པའི་ཚེ་ན། ཇི་སྐད་དུ་དཔལ་དུས་ཀྱི་འཁོར་ལོ་ལས། ཅོད་པན་དར་དཔྱངས་དག་དང་དོ་ཤལ་གདུ་བུ་དང་ནི་དེ་བཞིན་སྐ་རགས་རྣ་ཆ་ལ་སོགས་པ། །སློབ་དཔོན་ལ་ནི་རབ་ཏུ་སྦྱིན་བྱར་འགྱུར་ཏེ་མི་ཡི་བདག་པོ་ཡོན་ཡང་བདག་ཉིད་ནུས་པས་སོ། །ཞེས་དང་། རབ་རྒྱུད་ལས། གླང་པོ་རྟ་དང་ཤིང་རྟ་ནོར། །ཡོན་གྱི་དམ་པ་དབུལ་བར་བྱ། །དེ་ནས་དེ་ལ་ནན་ཏན་གྱིས། །ལོངས་སྤྱོད་གཡོ་བ་དབུལ་བར་བྱ། །གལ་ཏེ་ལྷ་ཉིད་དགྱེས་འདོད་ན། །གུས་པས་བླ་མ་མཉེས་བྱ་ཞིང་། །དེ་ལྟར་རྣམ་པ་ཐམས་ཅད་དུ། །བླ་མ་ཡང་དག་མཉེས་པར་བྱ། །ཞེས་སོགས་མཐའ་ཡས་པར་བསྟན་པ་ལ་རྗེས་སུ་དཔག་སྟེ། དངོས་འབྱོར་གྱི་བདོག་པ་ཕྲ་མོ་འདིས་མཚོན་དུས་གསུམ་གྱི་ལུས་ལོངས་སྤྱོད་དགེ་རྩ་དང་བཅས་པ་འཕགས་པ་ཀུན་ཏུ་བཟང་པོའི་མཆོད་སྤྲིན་རྒྱ་མཚོར་དད་པས་སྤྲུལ་ཏེ་འབུལ་བའི་མཎྜལ་མཚོན་བྱེད་དུ་ཞེས་སོགས་ནས་འདིར་འབུལ་ཚན་རྣམས་བྲིས་མཐར། ཞབས་བརྟན་བསྔོ་སྨོན་ཤིས་བརྗོད་སོགས་ཇི་ལྟར་རིགས་པས་སྦྱར་བར་བྱའོ། ། ༈

[edit]

rten gsum dang gtsug lag khang lta bu rab gnas grub pa'i legs 'bul gyi tshe/ rten gsum dang gtsug lag khang lta bu rab gnas grub pa'i legs 'bul gyi tshe/__gong rgyan 'bebs zhus sogs skabs su babs pa sbyor ba'i mthar/__khyad par gzhan phyir dmigs pa'i bsod nams kyis/__/nye bar bskrun pa'i rten gyi phung po gang /__/rdul phran rer yang rab 'byams zhing khams kyi/__/rten dang brten pa'i dngos po gsar du bskrun/__/dam tshig snang char ye shes sems dpa'i byin/__/mngon sum 'phos gang lhag par gnas pa yi/__/me tog 'thor bas brtan pa'i dge mtshan las/__/don gnyis rdzogs ldan gsar pa'i snang ba shar/__/de tshe lhar bcas kun gyi mchod sdong du/__/nye bar 'os pa'i rin thang la sbyar ba'i/__/ngo mtshar bka' drin dran pa'i dad gsum blos/__/dngos 'byor maN+Dal phra mo'i dga' ston stob/__/de ltar mtsho byung ma'i rgyud mangs las 'phos pa'i brjod pa nyung ngu'i mdun bdar te/__skabs su babs pa'i gleng ba ni/__gang la lhag par gnas pa'i bya ba'i rten gyi dngos po gus ldan pa kho bo cag gis yid can thams cad byang chub snying po la 'god pa'i bsam sbyor 'ba' zhig gis kun nas bslangs te/__sgyu ma'i nor rdzas cung zad gcig mchis pa rnams las snying po blang ba'i phyir/__bzo gnas kyi rig par rnam dpyod mchog tu yangs pa dag la dwang bas ched du bskul te/__bskal bzang 'dir sku gsung thugs rten dmigs bsal gang yin kha bsgyur bya/__rnam 'dren bzhi pa'i mtshan dpe'i zhal skyin gser sbyangs zhun ma las grub pa rgyud sde rin po che nas nye bar bshad pa'i phyag tshad rnams legs par tshang ba sogs ngo mtshar mig gi bdud rtsir bskrun pa dang chab gcig gang gis rab tu gnas pa'i slob dpon/__phyi ltar na yang dag par blangs pa'i khrims kyis rgyud nye bar bsdams shing brtan mkhas kyi yon tan mtha' dag gis mdzes pa'i byang chub sems dpa'i dge slong chen po/__nang ltar na phyi nang gi de nyid bcu la sogs pa rdo rje 'dzin pa'i las rab 'byams gang la'ang thogs pa med pa dpal gsang ba'i bdag po lta bu/__gsang ba ltar na gdan gsum tshang ba'i dkyil 'khor gyi 'khor lo'i gtso bor bzhugs pa'i kun mkhyen ye shes phung po'i bdag nyid can rje btsun bla ma dam pa gang gi zhal snga nas kyi dbus rig grol gyi yon tan brgyad dang ldan pa'i 'phags tshogs 'dus pa rgya mtshos/__'di ltar kri yA sa muts+tsha dang /__rab gnas kyi rgyud sogs las bshad pa'i lo zla zhag dus gza' skar gyi 'phrod sbyor sogs phun sum tshogs pa'i dus su/__rin chen 'bar ba las/__gnas ni yid 'ong 'du 'dzi sogs/__/skyon med rnam mdzes bla gab can/__/zhes sogs kyi khyad chos dang mtshan nyid legs par tshang bar/__dkyil 'khor dang /__sbyin sreg dang /__rab tu gnas pa rnams dang 'brel ba'i dgos pa'i yo byad ma tshang ba med par bsags te/__tshul ji ltar na/__dpal dam pa dang po'i sangs rgyas las/__rang lus ye shes rnam par dag la rdo rje gsum dang sngags dang bcas pa'i phung po khams la sogs pa kun/__/lha rnams kyi ni rang gi snying ga'i pad+mar sa bon rang rang rim pas 'god par bya/__/sa bon bkod nas rab tu gnas par 'gyur te mi yi bdag po mchod rten sku gzugs sogs la'ang /__/zhes sogs kyis mtshon rgyud sde rin po che rnams nas lan gcig ma yin par bstan pa bzhin/__'phags bod kyi paN grub tshad ldan rnams kyis bkral zhing thugs nyams su bstar ba'i rjes su 'brangs te sbyor dngos rjes gsum gyi cho ga'i yan lag phra mo tshun chad nyams pa med pa'i sgo nas rab tu gnas shing mnga' gsol pa'i bya bas legs bris kyi dbang po dang /__mi yi bdag po dang /__gdengs can gyi dbang po rnams dang bcas pa'i 'jig rten gsum gyi skye 'gro ma lus pas mchod pa'i 'os su mdzad pa'i tshe na/__ji skad du dpal dus kyi 'khor lo las/__cod pan dar dpyangs dag dang do shal gdu bu dang ni de bzhin ska rags rna cha la sogs pa/__/slob dpon la ni rab tu sbyin byar 'gyur te mi yi bdag po yon yang bdag nyid nus pas so/__/zhes dang /__rab rgyud las/__glang po rta dang shing rta nor/__/yon gyi dam pa dbul bar bya/__/de nas de la nan tan gyis/__/longs spyod g.yo ba dbul bar bya/__/gal te lha nyid dgyes 'dod na/__/gus pas bla ma mnyes bya zhing /__/de ltar rnam pa thams cad du/__/bla ma yang dag mnyes par bya/__/zhes sogs mtha' yas par bstan pa la rjes su dpag ste/__dngos 'byor gyi bdog pa phra mo 'dis mtshon dus gsum gyi lus longs spyod dge rtsa dang bcas pa 'phags pa kun tu bzang po'i mchod sprin rgya mtshor dad pas sprul te 'bul ba'i maN+Dal mtshon byed du zhes sogs nas 'dir 'bul tshan rnams bris mthar/__zhabs brtan bsngo smon shis brjod sogs ji ltar rigs pas sbyar bar bya'o/__/_!