JKW-KABUM-02-KHA-003

🚧 This website is under continued development. We appreciate your patience!

Previous Section Back to Volume PageLast section in volume.

Wylie title
Location	mkhyen brtse'i bka' 'bum Volume 2, sde tshan 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 2: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Advice - zhal gdams

1 Texts in this Section (sde tshan or chos tshan)

361-475	རྗེ་བཙུན་བླ་མ་དམ་པའི་ཞལ་ལུང་རྣམས་བསྐྱུད་བྱང་ཟིན་བྲིས་སུ་བཏབ་པ་བློ་གསལ་དགའ་བའི་རྣ་རྒྱན། rje btsun bla ma dam pa'i zhal lung rnams bskyud byang zin bris su btab pa blo gsal dga' ba'i rna rgyan Notes - zin bris   ·   Advice - zhal gdams	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །རྗེ་བཙུན་བླ་མ་དམ་པའི་ཞལ་ལུང་རྣམས་བསྐྱུད་བྱང་ཟིན་བྲིས་སུ་བཏབ་པ་བློ་གསལ་དགའ་བའི་རྣ་རྒྱན་ཅེས་བྱ་བ་བཞུགས་སོ། །

ན་མོ་བི་བྷཱུ་བཛྲ་དྷཱ་ར་མཉྫུ་གྷོ་ཥཱནནྡ་མ་ཏཱི་སཱ་ར་ཛ་ན་ཧ་པ་སྱ་ཤབྡ་སྭ་རཱ་ཡ། ཐོག་མར་ཉན་ཐོས་ཀྱི་ཐེག་པའི་སྐབས་སུ། བདེན་བཞི་རྣམ་པ་བཅུ་དྲུག་གི་དོན་མཚོན་ཙམ་སྤྲོ་ན། དང་པོ་ལ། སྡུག་བསྔལ་བདེན་པའི་ངོ་བོ། ཕུང་པོ་ལྔ་སྡུག་བསྔལ་གསུམ་དང་ལྡན་པས་ལུས་ངག་ཡིད་གསུམ་ཀར་མི་བདེ་བ་ཡིན། ངེས་ཚིག་དུ་ཁཿསཏྱཾ་ངན་པར་འགྲོ་བ་བདེན་པ་ཞེས་པའོ། །དབྱེ་ན། དབྱེ་གཞི་རང་དང་བཅས་བཞི་ལས། དང་པོ་སྡུག་བསྔལ་ལ་གསུམ་ནི། ཟག་བཅས་ཀྱི་འདུ་བྱེད་ལ་ཡིད་དུ་འོང་བ་རྣམས་ནི་འགྱུར་བའི་སྡུག་བསྔལ་མི་ལ་ཡོད་དེ། ཚེ་སྟོད་སྨད་དུ་བདེ་སྐྱིད་འགྱུར་བས་མཚོན། སྐྱེ་བའི་སྡུག་བསྔལ་འཇུར་མིག་ནས་དྲངས་པ་ལྟ་བུ། རྒ་བ་ཤིང་སྡོང་གོག་པ་ལྟ་བུ། ན་བ་དུག་འཐུང་བ་ལྟ་བུ། འཆི་བ་མུན་ནང་དུ་འགྲོ་བ་ལྟ་བུ། དགྲ་དང་འཕྲད་དོགས་པ་བྱིའུ་ཁྲས་དེད་པ་ལྟ་བུ། གཉེན་བྱམས་པ་དང་འབྲལ་དོགས་པ་བུ་གཅིག་པུ་ཤིར་ཉེ་བ་ལྟ་བུ། ཡོད་པ་འཚོ་སྐྱོང་མི་ཐུབ་པ་རྒན་མོས་ཕྱུགས་ཚོལ་བ་ལྟ་བུ། མེད་པ་བཙལ་གྱིས་མི་རྙེད་པ་ཡི་དྭགས་ཟས་སྐོམ་ཚོལ་བ་ལྟ་བུ་སྟེ་སྡུག་བསྔལ་བརྒྱད་དང་། དེ་བཞིན་ལྷ་ལ་འཕོ་ལྟུང་གིས་མཚོན། སྡུག་བསྔལ་གྱི་སྡུག་བསྔལ་ཡིད་དུ་མི་འོང་བ་རྣམས་ཏེ། མཛེ་ཐོག་ཏུ་ཕོལ་མིག་བྱུང་བའམ། བྱོལ་སོང་རྣམས་ལ་གླེན་ལྐུགས་ཀྱི་སྟེང་དུ། ཁལ་འགེལ། ཞོ་བཞོ། སྤུ་བཏོག །ཤ་ཁྲག་གི་ཆེད་དུ་གསོད་པས་མཚོན། ཁྱབ་པ་འདུ་བྱེད་ཀྱི་སྡུག་བསྔལ་ཀུན་ལ་ཡོད། ཟས་གོས་ལ་སོགས་ཀྱིས་མནར་བས་མཚོན། གཉིས་པ་མི་རྟག་པ་ལ་ཕྱི་ནང་གཉིས། ཕྱི་ལ་ཡང་གཉིས་ཏེ། རིང་བ་དུར་ཁྲོད་དུ་མི་སོགས་ཤི་བའི་རུས་པ་མཐོང་བ། ཉེ་བ་སེམས་ཅན་ད་ལྟ་ཤི་བ་མཐོང་ཐོས་སོ། །ནང་ལ་འཆི་ངེས་གསུམ་སྟེ། སྐྱེས་ཚད་མཐར་འཆི་བར་ངེས། འདུས་བྱས་མི་རྟག་པར་ངེས། ཚེ་སྐད་ཅིག་མི་རྟག་པར་ངེས་སོ། །ནམ་འཆི་ཆ་མེད་གསུམ་སྟེ། འཆི་བའི་རྐྱེན་མང་བ། ལུས་ལ་སྙིང་པོ་མེད་པ། ཚེ་ལ་ལོང་མེད་པ། འཆི་བ་ལ་ཅིས་ཀྱང་མི་བསྟོངས་པ་གསུམ་སྟེ། མཛའ་བཤེས་གཉེན་འདུན་གྱིས་མི་བསྟོངས། ཟས་ནོར་ལོངས་སྤྱོད་ཀྱིས་མི་བསྟོངས། རང་གི་ལུས་ཀྱིས་མི་བསྟོངས་པ་རྣམས་སོ། །གསུམ་པ་སྟོང་པ་ནི། དེ་ཀུན་རང་བཞིན་མེད་པའི་དོ ན་བསམ་ཞིང་དཔྱད་པ། བཞི་པ་བདག་མེད་པ་ནི་གང་ཟག་གི་བདག་མེད་པར་མཐོང་བའོ། །གཉིས་པ་ཀུན་འབྱུང་བདེན་པའི་ངོ་བོ་ནི། སྡུག་བསྔལ་དེ་ཀུན་འབྱུང་བའི་གཞི་དུག་གསུམ་སོགས་ཡིན། ངེས་ཚིག །ས་མུ་ཡ་ད་སྟེ། ལས་དང་ཉོན་མོངས་པའི་མཚན་ཉིད་དེ་དག་ལས་སྡུག་བསྔལ་བ་དེ་ཀུན་འབྱུང་བ་ལ་བྱ། དབྱེ་ན་དབྱེ་གཞི་རང་དང་བཅས་བཞི་ལས། དང་པོ་ནི། ཀུན་འབྱུང་ཞེས་པ། རྒྱུ་དུག་གསུམ་ལ་བརྟེན་ནས་འབྲས་བུ་རིགས་དྲུག་གི་སྡུག་བསྔལ་འབྱུང་བའོ། །གཉིས་པ་ལ། འདོད་ཡོན་ལྔའི་རྒྱུ་དང་། དེ་ལ་ཆགས་པའི་ཉེས་དམིགས་གཉིས། འདུན་པ། ཆགས་པ། རབ་ཏུ་བརྐམ་པ་གསུམ་མོ། །ཉེས་དམིགས་ནི། གཟུགས་ལ་ཆགས་པས་ཕྱེ་མ་ལེབ་ལྟ་བུ། སྒྲ་ལ་ཆགས་པས་རི་དྭགས་ལྟ་བུ། དྲི་ལ་ཆགས་པས་བུང་བ་ལྟ་བུ། རོ་ལ་ཆགས་པས་ཉ་ལྟ་བུ། རེག་བྱ་ལ་ཆགས་པས་གླང་པོ་ཆེ་ལྟ་བུའོ། །གསུམ་པ་རྐྱེན་ལ། འདས་མ་འོངས་ད་ལྟར་དུས་གསུམ་གྱིས་ཕྱེ། བཞི་པ་སྐྱེ་བ་ལ། རྒྱུ་རྣམ་རྟོག་སྐྱེ། འབྲས་བུ་ངན་སོང་སྐྱེ་བ་དང་གཉིས་སོ། །གསུམ་པ་འགོག་པའི་བདེན་པའི་ངོ་བོ་ནི། ཉོན་མོངས་རགས་པ་ཐམས་ཅད་ཞི་བའི་སྟོང་པའོ། །ངེས་ཚིག་ནི་རོ་དྷ་ངེས་འགོག་སྟེ། ཉོན་མོངས་པ་ཐམས་ཅད་ངེས་པར་འགོག་པའི་ཕྱིར་རོ། །དབྱེ་ན། དབྱེ་གཞི་རང་དང་བཅས་བཞི་ལས། དང་པོ་འགོག་པ་ཞེས་པ། སྡུག་བསྔལ་དང་བཅས་པ་འགོག་པས་འགོག་པ་སྟེ། རྒྱུ་ཉོན་མོངས་པ་འགོག་པས་ན་འགོག་པ། རྐྱེན་རྣམ་རྟོག་འབྲང་བ་དེ་འགོག་པས་ན་འགོག་པ། འབྲས་བུ་སྡུག་བསྔལ་འགོག་པས་ན་འགོག་པ། རྣམ་རྟོག་གི་རྒྱུན་ཐམས་ཅད་འགོག་པས་ན་འགོག་པ་སྟེ། ཉན་ཐོས་རྣམས་འགོག་པ་ལ་སྙོམས་པར་ཞུགས་ནས་བྱམས་པའི་བསྟན་པ་ལ་ལྡང་བར་འདོད་པའོ། །གཉིས་པ་ཞི་བ་ལ་ལྔ་སྟེ། ཉོན་མོངས་ཀྱི་མེ་ཞི་བ་ནི་མྱང་འདས་གྱི་ས་ན་དུག་གསུམ་མེད་པ་སྟེ་དུག་གསུམ་རྩད་ནས་སྤོང་པའི་ཕྱིར་རོ། །ཉེས་དམིགས་ཀྱི་མེ་ཞི་བ་ནི་མྱང་འདས་ཀྱི་ས་ན་འཁོར་བའི་སྡུག་བསྔལ་ཐམས་ཅད་ཞི་བ་སྟེ་འཁོར་བར་གནས་པའི་ཉེས་པ་ཐམས་ཅད་ཞི་བའོ། །ལོངས་སྤྱོད་ཀྱི་མེ་ཞི་བ་ནི། མྱང་འདས་ཀྱི་ས་ན་འདུ་བྱེད་ཀྱི་སྡུག་བསྔལ་མེད་དེ་ཟས་སྐོམ་གྱི་སྡུག་བསྔལ་མེད་པའོ། །སྤྱོད་ལམ་གྱི་མེ་ཞི་བ་ནི་འགྲོ་ཉལ་འདུག་པ་ཐམས་ཅད་ལ་མི་བདེ་བ་མེད་པའོ། །ཚོར་བའི་མེ་ཞི་བ་ནི། ཁམས་གསུམ་མཐའ་དག་ཚོར་བ་གསུམ་ལས་མ་འདས་པས། ཚོར་བ་བདེ་བ་ཐམས་ཅད་འགྱུར་བའི་སྡུག་བསྔལ། སྡུག་བསྔལ་མྱོང་བ་ཐམས་ཅད་སྡུག་བསྔལ་གྱི་སྡུག་བསྔལ། ཚོར་བ་མྱོང་བ་ཐམས་ཅད་འདུ་བྱེད་ཀྱི་སྡུག་བསྔལ་ལོ། །དེས་ན་མྱང་འདས་ལ་ཚོར་བ་བདེ་སྡུག་བཏང་སྙོམས་གསུམ་མེད་པའོ། །གསུམ་པ་གྱ་ནོམ་པ་ལ་གསུམ། ཉོན་མོངས་ཀྱི་ཐ་བ་གྱ་ནོམ་པ་ནི། ཉོན་མོངས་པའི་ཐ་བ་ཞི་གནས་ཀྱིས་མ་བརླན། ཤེས་རབ་ཀྱི་ཐོང་གཤོལ་གྱིས་མ་རློག་པ་དེ་ལ་འཇིག་རྟེན་ལས་འདས་པའི་མྱུ་གུ་ཐམས་ཅད་མི་སྐྱེའོ། །ངན་སོང་གི་ཐ་བ་གྱ་ནོམ་པ་ནི། ངན་སོང་གི་ཐ་བ་འཕགས་པའི་ལམ་གྱིས་མ་བརླན་ན། མཐོ་རིས་ཐར་པའི་གོ་འཕང་མི་འབྱུང་ངོ་། །སྡུག་བསྔལ་གྱི་ཐ་བ་གྱ་ནོམ་པ་ནི། སྡུག་བསྔལ་གྱི་ཐ་བ་བདེ་བས་མ་བརླན་ན་འཕགས་པའི་ལམ་མི་འབྱུང་བས། བདེ་བས་བརླན་དགོས། རྐྱེན་ཐམས་ཅད་དང་བྲལ་བས་གྱ་ནོམ་པ་སྟེ་ལེགས་པ་ཞེས་བྱའོ། །བཞི་པ་ངེས་པར་འབྱུང་བ་ལ་བཞི། རྒྱུ་ངེས་པ་ནི་ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་དང་། བག་ཆགས་འཐུག་པོ་ས་བོན་དང་བཅས་སྤོང་བ་དང་། སྒྲིབ་པ་གཉིས་ཀྱི་བག་ཆགས་སྤོང་པའོ། །རྐྱེན་ངེས་པ་ནི་མ་རིག་པའི་གཉེན་པོར་རིག་པའི་ཤེས་རབ་དང་། བག་ཆགས་ཀྱི་གཉེན་པོར་བསོད་ནམས་ཀྱི་ཚོགས་དང་སྒྲིབ་གཉིས་སྦྱོང་པའི་གཉེན་པོར་བདེན་པ་བཞིའོ། །ལམ་ངེས་པ་ནི་བདེན་བཞི་ཉིད་ལམ་དུ་བྱས་ནས་ཉམས་སུ་ལེན་པའོ། །འབྲས་བུ་ངེས་པ་ནི། སྡུག་བསྔལ་ལ་ངེས་པར་འབྱུང་བའོ། །དེ་ཡང་འཁོར་བའི་སྡུག་བསྔལ་ལས་ངེས་པར་འབྱུང་དགོས། ངེས་པར་འབྱུང་བ་ལ་རྒྱུ་བག་ཆགས་འཐུག་པོ་སྤང་དགོས། རྐྱེན་བསོད་ནམས་དཔག་མེད་གསོག་དགོས། ལམ་སྡོམ་པ་མིག་བཞིན་བསྲུང་དགོས། འབྲས་བུ་སྡུག་བསྔལ་དགག་དགོས། དེས་བག་ཆགས་ལ་ངེས་པར་འབྱུང་བས་ན་ངེས་འབྱིན་ནོ། །བཞི་པ་ལམ་བདེན་གྱི་ངོ་བོ་ནི། དཀར་པོའི་ལམ་དེ་ལ་ཞུགས་ཕྱིན་ཆད་ཐར་པ་ཐོབ་པ་ཞིག་གོ །ངེས་ཚིག་ནི། པནྠི་ཞེས་མང་པོ་འགྲོ་བའི་ཕྱིར་ལམ་སྟེ་ཐར་པར་འགྲོ་བའི་ལམ་མོ། །དབྱེ་ན། དབྱེ་གཞི་རང་དང་བཅས་པ་བཞི་ལས། དང་པོ་ནི། བདེན་པ་བཞི་ཁོ་ནའི་སྒོ་ནས་འཇུག་པའོ། །གཉིས་པ་རིག་པ་ལ་བཞི་སྟེ། ལྟོས་པའི་རིག་པ་ནི། རྒྱུ་ངན་པ་ལ་ལྟོས་ནས་འབྲས་བུ་ངན་པར་ཤེས། རྒྱུ་བཟང་པོ་ལ་ལྟོས་ནས་འབྲས་བུ་བཟང་པོར་ཤེས་པའོ། །བྱ་བྱེད་ཀྱི་རིག་པ་ནི། ཉོན་མོངས་པ་མི་དགེ་བའི་གཉེན་པོར་འགྱུར་བའི་བྱ་བ་བྱེད། དགེ་བ་དཀར་པོའི་ཆོས་མཐའ་དག་གི་གྲོགས་སུ་འགྱུར་བའི་བྱ་བ་བྱེད་པའོ། །འཐད་པ་སྒྲུབ་པའི་རིག་པ་ནི་ཆོས་ཅན་ལ་འཐད་པ་ཝ་ལྟ་བུ། དམ་བཅའ་ལ་འཐད་པ་མེ་ལྟ་བུ། གཏན་ཚིགས་ལ་འཐད་པ་དུ་བ་ལྟ་བུ། མཐུན་དཔེ་ལ་འཐད་པ་ཐབ་ཚང་ནང་དུ་མེ་ལྟ་བུའོ། །མདོར་ན་ཆོས་ཐམས་ཅད་ཚད་མའི་ལམ་གྱི་ཡང་དག་པར་ཤེས་པས་གཏན་ལ་འབེབས་པའོ། །ཆོས་ཉིད་ཀྱི་བདེན་པ་བདག་མེད་གཉིས་རྟོགས་པའམ། བདེན་བཞི་མ་ནོར་བར་རྟོགས་པའོ། །གསུམ་པ་སྒྲུབ་པ་ལ་གཉིས། ཐུན་མོང་སྒྲུབ་པ་ནི། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བསམས་ནས་སྐྱབས་སུ་འགྲོ། སྡོམ་པ་མིག་འབྲས་ལྟར་བསྲུང་། གང་ཟག་གི་བདག་མེད་བསྒོམ། ཐུན་མོང་མ་ཡིན་པའི་སྒྲུབ་པ་ནི། སེམས་ཅན་ཐམས་ཅད་ལ་བྱམས་སྙིང་རྗེའི་སྐྱབས་འགྲོ་ཁྱད་པར་ཅན་བསྐྱེད། སྨོན་འཇུག་གི་སེམས་བསྐྱེད། ཕར་ཕྱིན་གྱི་སྒོར་ཞུགས། ཆོས་ཀྱི་བདག་མེད་པ་སྒོམ་པ་དེས་བློ་ཕྱིན་ཅི་མ་ལོག་གི་དོན་ལ་སྒྲུབ་པར་ནུས་པས་ན་སྒྲུབ་པ་ཞེས་བྱ། བཞི་པ་ངེས་འབྱིན་ལ། རྒྱུ་འཁོར་བ་ལས་འབྱིན་པ་ནི། དཔེར་ན་རྩུབ་གཏན་རློན་པ་ལས་མེ་མི་འབར་བ་ལྟར་ཞེན་པ་ཉོན་མོངས་ཀྱི་རླན་གྱིས་གོས་ན་འབྲས་བུ་མྱ་ངན་ལས་འདས་པ་མི་ཐོབ་བས་འཁོར་བའི་ཉོན་མོངས་པའི་ཞེན་པ་དེ་དང་བྲལ་བར་བྱའོ། །འབྲས་བུ་མྱ་ངན་ལས་འདས་པ་ངེས་པར་འབྱིན་པ་ནི། དཔེར་ན། ཤིང་སྐམ་པོ་ལས་མེ་འབྱུང་བ་ལྟར་དཀོན་མཆོག་གསུམ་ཡུལ་དུ་བྱས་ནས་ལམ་བདེན་བཞི་སྦྱོར་བ་ནི་ཉམས་སུ་ལེན་ཅིང་། འབྲས་བུ་དགྲ་བཅོམ་བའོ། ། ༈ ཡེ་ཤེས་རྣམ་པ་བཅུ་དྲུག་ནི། སྒྱུ་མ་ངལ་བསོའི་འགྲེལ་པ་ལས། དེ་ནས་མཐོང་ལམ་རྣམ་པར་མི་རྟོག་པའི་ཡེ་ཤེས་བདེན་པ་བཞིའི་ཆོས་ཉིད་མངོན་དུ་མཐོང་སྟེ། ཁམས་ཀྱི་ཕྱོགས་གཅིག་སྤང་བྱ། རྟགས་གློ་བུར་བ་དག་པའི་དུས་སོ། །དེ་ལ་སྡུག་བསྔལ། ཀུན་འབྱུང་། ལམ་འགོག་པའི་བདེན་བ་རེ་རེ་བཞིན་ཆོས་ཤེས་པ་དང་། ཆོས་ཤེས་པ་ལ་བཟོད་པ། རྗེས་སུ་ཤེས་པ་དང་། རྗེས་སུ་ཤེས་པ་ལ་བཟོད་པ་སྟེ་བཞི་བཞི་བསྡོམས་པས་བཅུ་དྲུག་གོ །ཆོས་ཤེས་པ་ནི་བདེན་བཞི་སོ་སོའི་ཆོས་ཅན་གྱི་རང་མཚན་མཐོང་བའོ། །ཆོས་ཤེས་པ་ལ་བཟོད་པ་ནི་རང་མཚན་མཐོང་བས་མི་སྐྲག་པའོ། །རྗེས་སུ་ཤེས་པ་ནི་བདེན་བཞི་སོ་སོའི་རང་མཚན་སྟོང་ཉིད་དུ་མཐོང་པའོ། །རྗེས་སུ་ཤེས་པའི་བཟོད་པ་ནི་ནམ་མཁའ་མཐོང་བ་ལ་མི་སྐྲག་པའོ། །དེ་དག་ལ་བློ་རྫས་གཅིག་གིས་བདེན་བཞི་རང་བཞིན་སྣང་སྟོང་སྒྱུ་མ་ལྟ་བུར་བྱ་རྫོགས་ཀྱི་སྐད་ཅིག་མཐོང་ཚུལ་བཞི་འཆར་ཏེ། བདེན་བཞི་དོན་ལ་ཆོས་ཤེས་བཞི། ཆོས་བཟོད་བཞི། རྗེས་ཤེས་བཞི། རྗེས་བཟོད་བཞིའི་རིམ་པ་སོ་སོར་འཆར་བའི་ཕྱིར་རོ། །དེ་དག་ལ་མངོན་རྟོགས་རྒྱན་ལས། སྡུག་བསྔལ་ལ་སོགས་བདེན་པ་དང་། ཆོས་ཤེས་རྗེས་སུ་ཤེས་པ་དང་། །བཟོད་ཤེས་སྐད་ཅིག་བདག་ཉིད་ནི། །ཞེས་སོ། །དེའི་དུས་སུ་མཐོང་སྤོང་བརྒྱ་དང་བཅུ་གཉིས་སྤོང་ཚུལ་ནི། ཀུན་བརྟགས་ཀྱི་ཉོན་མོངས་པ་དྲུག་ལ། མ་རིག་པ། འདོད་ཆགས། ཁོང་ཁྲོ། ང་རྒྱལ། ཐེ་ཚོམ། ལྟ་བའོ། །ལྟ་བ་ལ་ལྔ་སྟེ། འཇིག་ཚོགས་ཀྱི་ལྟ་བ། མཐར་འཛིན། ལོག་ལྟ། ཚུལ་ཁྲིམས་དང་བརྟུལ་ཞུགས་ལ་མཆོག་འཛིན། ལྟ་བ་ལ་མཆོག་ཏུ་འཛིན་པའོ། །དེ་ལ་མ་རིག་པ་ལ་སོགས་པ་ལྟ་བ་མ་ཡིན་པ་ལྔ་པོ་དེ་དང་བསྡོམས་པས་བཅུ། དེ་ལྟར་རྩ་བའི་ཉོན་མོངས་པ་བཅུ་པོ་དེ་འདོད་ཁམས་ན་བདེན་བཞི་རེ་རེ་ལའང་བཅུ་བཅུ་བྱུང་བས་བཞི་བཅུ། གཟུགས་དང་གཟུགས་མེད་གཉིས་ན་ཁོང་ཁྲོ་མ་གཏོགས་དགུ་དགུ་བདེན་བཞི་རེ་རེ་ལ་བྱུང་བས། སུམ་ཅུ་རྩ་དྲུག་པ་གཉིས་ཏེ་བསྡམས་པས་མཐོང་སྤོང་བརྒྱ་དང་བཅུ་གཉིས་པོ་སྤོང་ཚུལ་ནི། མཐོང་ལམ་གྱི་ཡེ་ཤེས་སྐྱེ་འགྱུར་ལམ་གྱིས་རགས་པ་བརྒྱུད་ནས་སྦྱངས། སྐྱེ་བཞིན་པས་ཕྲ་བ་དངོས་སུ་སྤོངས། སྐྱེས་དུས་ནས་མཐོང་སྤོང་གི་ས་བོན་མ་ལུས་པ་འགག་པའི་ཚུལ་གྱིས་སོ། །དེའི་འོག་ཏུ་སྒོམ་ལམ་པའི་དྲི་མ་བཞི་བརྒྱ་དང་བཅུ་བཞི་ཡང་། རང་རང་གི་སའི་སྦྱོར་བ་དང་། དངོས་དང་། རྗེས་ལ་སྤངས་ཏེ། སྒོམ་སྤོང་གི་ཉོན་མོངས་བག་ལ་ཉལ་བའི་ལྷན་སྐྱེས་ལས་ཕྱེ་ན་དྲུག་སྟེ། མ་རིག་པ། འདོད་ཆགས། ཁོང་ཁྲོ། ང་རྒྱལ། འཇིག་ཚོགས་ལྟ་བ། མཐར་འཛིན་གྱི་ལྟ་བའོ། །འདོད་ཁམས་ན་ཉོན་མོངས་པ་དྲུག་པོ་རེ་རེ་ལའང་། ཆེན་པོ། འབྲིང་། ཆུང་ངུ་གསུམ་གསུམ་ལས། དེ་ལའང་ཆེན་པོ། འབྲིང་། ཆུང་ངུ་། འབྲིང་གི་ཆེན་པོ། འབྲིང་། ཆུང་ངུ་། ཆུང་ངུའི་ཆེན་པོ། འབྲིང་། ཆུང་ངུ་སྟེ་དགུ་དགུར་ཕྱེ་བས་དྲུག་ཚན་དགུ་སྟེ་ལྔ་བཅུ་རྩ་བཞི། གཟུགས་ཁམས་ན་བསམ་གཏན་དང་པོ། གཉི་པ། གསུམ་པ། བཞི་པ་རྣམས་སུ་ཁོང་ཁྲོ་བོར་ནས་ཉོན་མོངས་པ་ལྔ་པོ་རྣམས་ལ་ཆེ་འབྲིང་ཆུང་དགུ་དགུ་སྟེ། འདོད་ཆགས་ལ་སོགས་པ་བཞི་བཅུ་ཞེ་ལྔ་པ་བཞི་བསྡོམས་པས་བརྒྱ་བརྒྱད་ཅུ། གཟུགས་མེད། ནམ་མཁའ། རྣམ་ཤེས་ཅིའང་མེད། སྲིད་རྩེ་བཞི་ལ་བརྒྱ་བརྒྱད་ཅུ་སྟེ། ཁམས་གོང་མའི་བརྒྱ་བརྒྱད་ཅུ་བཅུ་ཚན་གཉིས་ལ་སུམ་བརྒྱ་དྲུག་ཅུ། དེའི་སྟེང་དུ་འདོད་པའི་ལྔ་བཅུ་རྩ་བཞི་བསྣན་པས་སྒོམ་སྤོང་བཞི་བརྒྱ་དང་བཅུ་བཞིའོ། །སྤོང་ཚུལ་ཡང་། སྦྱོར་བ་དང་། བར་ཆད་མེད་ལམ་གཉིས་ཀྱི་ཉེ་རྒྱུ་དང་པོར་སྤོང་། ཁྱད་པར་ལམ་གྱིས་དངོས་སུ་སྤོང་། རྣམ་གྲོལ་ལམ་གྱིས་ཐག་བསྲིང་དང་། ཕྲ་བ་འགག་འགྱུར་གྱི་ཚུལ་གྱིས་སྤོང་ངོ་། །ཞེས་གསུངས་སོ། །རང་རྒྱལ་གྱི་སྐབས་རྟེན་འབྲེལ་བཅུ་གཉིས་ལ་ཕྱི་རྒྱུ་དང་འབྲེལ་པ་དྲུག་ནི། མྱུ་གུ་དང་། ལྡོང་བུ། ཡལ་ག །ལོ་འདབ། མེ་ཏོག །འབྲས་བུའོ། །ནང་རྐྱེན་པ་དྲུག་ནི། ས་ཆུ་མེ་རླུང་དུས་ཀྱི་འགྱུར་བ། ས་བོན་ནོ། །འདིའི་མཚན་ཉིད་ལ་སྤྱི་མཚན་དང་རང་མཚན་གཉིས། དང་པོ་ལ་གསུམ། རྒྱུ་དེ་ཡོད་པ་ལས་སྐྱེ། མེད་པ་ལས་མི་སྐྱེ། རྒྱུ་མི་རྟག་པ་ལས་སྐྱེ། རྟག་པ་ལས་མི་སྐྱེ། ནུས་པ་ལས་སྐྱེ། མི་ནུས་པ་ལས་མི་སྐྱེའོ། །རང་གི་མཚན་ཉིད་ལ། མ་རིག་པ་ནི་ལས་རྒྱུ་ལ་རྨོངས་པ། འདུ་བྱེད་ནི་དམིགས་པ་ལ་སེམས་གཡོ་བ། རྣམ་ཤེས་དང་པོ་མངལ་དུ་ཞུགས་པ། མིང་ནི་མིང་བཞིའི་ཐོང་སྟེ། ཚོར་བ་འདུ་ཤེས་འདུ་བྱེད་རྣམ་ཤེས་བཞི། གཟུགས་ནི་མེར་པོ་སོགས། སྐྱེ་མཆེད་དྲུག་ནི་མིག་ལ་སོགས་པའི་དབང་པོ། རེག་པ་ནི་གསུམ་འདུས་ནས་ཡོངས་སུ་གཅོད་པ། ཚོར་བ་ནི་ཉམས་སུ་མྱོང་བ། སྲིད་པ་ནི་ཚོར་བ་ལ་ཆགས་པ། ལེན་པ་ནི་རྒྱུ་ལ་ཆགས་པ། སྲིད་པ་ནི་ལས་ཀྱི་བག་ཆགས་ནུས་མཐུ་ཅན། སྐྱེ་བ་ནི་དང་པོ་མ་བྱུང་བ་ལས་བྱུང་བ། རྒ་བ་ནི་རྒྱུན་འགྱུར་བ། ཤི་བ་ནི་སྲོག་གི་དབང་པོ་རྒྱུན་ཆད་པའོ། །དབྱེ་བ་མ་རིག་པ་ལ། དེ་ཁོ་ན་ཉིད་དང་ལས་རྒྱུ་འབྲས་ལ་རྨོངས་པ་གཉིས། འདུ་བྱེད་ལ་བསོད་ནམས་ཀྱི་འདུ་བྱེད་སེམས་པ་དང་། གཡོའི་འདུ་བྱེད་སེམས་པ་གཉིས། རྣམ་ཤེས་ལ་རྒྱུ་འབྲས་གཉིས། གཟུགས་ལ་འབྱུང་བའི་གཟུགས་དང་འབྱུང་འགྱུར་གཉིས། སྐྱེ་མཆེད་ལ་དྲུག་སྟེ། དབང་པོ་ལྔ་ཡིད་ཤེས་བཅས། རེག་པ་ལ་ཡང་དེ་དྲུག་ལ་བརྟེན་པས་དྲུག །ཚོར་བ་བདེ་སྡུག་བཏང་སྙོམས་ཀྱི། སྲེད་པ་ལ། འདོད་སྲེད། གཟུགས་སྲེད། གཟུགས་མེད་ཀྱི་སྲེད་པ་གསུམ། ལེན་པ་ལ་བདག་ཏུ་སྨྲ་བའི་ཉེར་ལེན། ལྟ་བའི་ཉེར་ལེན། ཉེ་འདོད་པའི་དང་ཚུལ་ཁྲིམས་ཀྱི་ཉེར་ལེན། བརྟུལ་ཞུགས་མཆོག་འཛིན་གྱི་ཉེར་ལེན་བཞིའོ། །སྲིད་པ་ལ། སྔོན་གྱི་སྲིད་པ། སྐྱེ་བའི་སྲིད་པ། འཆི་བའི་སྲིད་པ། བར་སྲིད་བཞི། སྐྱེ་བ་ལ། སྒོང་མངལ་དྲོད་རྫུས་བཞི། རྒ་ཤི་ནི་དེ་བས་སོ། །སྔ་མ་སྔ་མ་རྒྱུ་ལ། ཕྱི་མ་ཕྱི་མ་འབྲས་བུའོ། །དེ་ཡང་རིང་བའི་རྒྱུ་འབྲས་དང་། ཉེ་བའི་རྒྱུ་འབྲས་གཉིས་ལས། གོང་མ་བདུན་ནི་རིང་བའི་རྒྱུ་འབྲས་ཏེ། མ་རིག་པའི་དབང་གིས་ལས་བྱས། ལས་དབང་གིས་བག་ཆགས་བསགས་པས། བག་ཆགས་ནི་ལྔར་བཞག་པ་སྟེ། འབྲས་བུའི་མིང་རྒྱུ་ལ་བཏགས་ནས་བག་ཆགས་མི་ཟེར་བར། རྣམ་པར་ཤེས་པ་ལ་མིང་གཟུགས་སྐྱེ་མཆེད་རེག་པ་ཚོར་བ་ཟེར་རོ། །ཉེ་བའི་རྒྱུ་འབྲས་ནི་སྲེད་པ་ལ་སོགས་པ་འོག་མ་རྣམས་སོ། །བར་དེར་རྟེན་འབྲེལ་སྔ་མའི་ཁོང་དུ་གཏོགས་པ་གཅིག་གིས་སྲེད་པ་བསྐྱེད། སྲེད་པས་ལེན་པ་བསྐྱེད། སྲེད་ལེན་ཆུ་ལུད་འདྲ་བ་དེས་བག་ཆགས་ལྔ་པོ་གསོས་བཏབ་པས་བག་ཆགས་ནུས་མཐུ་ཅན་དུ་སོང་བ་དེ་ལ་སྲེད་པ་ཟེར་བ་ལགས་སོ། །ཉན་རང་གི་ས་བདུན་ནི། ཧེ་རུ་ཀ་གལྤོ་ལས། དང་པོ་དཀར་པོ་རྣམ་པར་མཐོང་། །ཤུཀླ་བི་དཪྴན་བྷཱུ་མི་ཞེས་པ། མོས་པ་སྤྱོད་པའི་ས་ནས་དྲོད་ལ་དང་། རྣམ་པར་བྱང་བ་དཀར་པོ་རྣམ་པར་མཐོང་བའི་ས་ཞེས་བྱའོ། །རིགས་དང་ལྡན་པ་རིགས་ཀྱིས། །གོ་ཏྲ་བྷཱུ་མི་ཞེས་པ། དད་པ་ཤིན་ཏུ་ཆེ་བའི་ས། །འཇིག་རྟེན་ཆོས་ཀྱི་མཆོག་ལ་ཆོས་དང་གང་ཟག་ལ་བདག་མེད་པར་བཟོད་པས་ན། བྱང་ཆུབ་ཐོབ་པའི་རིགས་དང་ལྡན་པས་ན་རིགས་ཀྱི་ས་ཞེས་བྱའོ། །གྲངས་ལས་འཕགས་པས་བརྒྱད་པའི་ས། །ཨཥྟ་མི་ཀ་བྷཱུ་མི་ཞེས་བྱ་བ་ནི། བརྒྱད་པ་ལ་བྱ་སྟེ། དགྲ་བཅོམ་པའི་འབྲས་བུ་ཐོབ་པའི་གྲལ་དང་པོ་ནས། ཡས་བགྲང་ན་རྒྱུན་དུ་ཞུགས་པ་ལ་འཇུག་པ་གྲངས་བརྒྱད་ལ་བབས་པས་ནའོ། །བརྒྱད་པའི། དེ་ཉིད་རྟགས་མཐོང་མཐོང་པའི་ས། །དཪྴན་བྷཱུ་མི་ཞེས་པ། དྲི་ཤྱཱ་ཏེ་པྲཾཀྵ་ཎ་ཞེས་པ་ནི། དྲི་ཤ་ནི་མཐོང་བ། བྷཱུ་མི་ནི་ས་སྟེ་རྒྱུན་ཞུགས་ཀྱི་འབྲས་བུ་ལ་གནས་པས་དེ་ཁོ་ན་ཉིད་རྟག་པར་མཐོང་བས་ན་མཐོང་བའི་ས་ཞེས་བྱའོ། །འདོད་ཁམས་འདོད་ཆགས་སྲབ་པའི་ས། །ཏ་ནཱུ་བྷཱུ་མི་ཞེས་པ། ལན་གཅིག་ཕྱིར་འོང་བས་ན་འདོད་ཁམས་འདོད་ཆགས་དང་སྲབ་མོར་བྱས་པ་ན་སྲབ་པའི་སའོ། །འདོད་པའི་འདོད་ཆགས་བྲལ་བའི་ས། །བི་ག་ཏ་ཏཱ་ག་བྷཱུ་མི་ཞེས་པ་ཕྱིར་མི་འོང་བའི་ས་སྟེ། ས་འདི་ལ་གནས་པས་འདོད་པ་འདུན་པ་དང་། གནོད་སེམས་སྤངས་པས་ན་འདོད་ཆགས་དང་བྲལ་བ་ཡིན་ཏེ། དེའི་སའོ། །བསྲུང་བྱ་མི་ཉམས་བསྲུང་པའི་ས། །ཀྲྀ་ཏཱ་བི་བྷཱུ་མི་ཞེས་པ་དགྲ་བཅོམ་པའི་ས་ལ་བྱ་སྟེ། ཀྲྀ་ཏ་ནི་བྱས་པ། ཨ་ནི་ཨ་བི་དུ་ན་ཤཱི་ལ་ཞེས་པ་སྟེ་བསྲུང་བའི་རང་བཞིན་ཅན་ཡིན་པས་སྔར་བྱས་ཏེ་གྲུབ་པའི་དོན་མི་ཉམས་པའི་བསྲུང་བའི་ཕྱིར་བྱས་པ་བསྲུང་བའི་ས་ཞེས་བྱ་སྟེ། དངོས་སུ་ན་དགྲ་བཅོམ་པའི་སའོ། །ཉོན་མོངས་ས་བདུན་རྣམ་པར་གནས། །པྲོ་ཏཱ་སནྡྷ་ཞེས་པ་ནི། པྲོ་ཏ་ནི་ཆུ་ཡི་རྒྱུན་ལྟ་བུའོ། །ཨ་སནྡྷ་ནི་ནང་དུ་ཞུགས་པ་སྟེ་སྤྱིར་མྱ་ངན་འདས་ཀྱི་མཚོར་འབབ་པའི་ཆུ་བོའི་རྒྱུན་དུ་ཞུགས་པ་སྟེ། པ་ཀྲྀ་དཱ་གཱ་མི་ཞེས་པ་སྟེ། པ་ཀྲྀ་ད་ནི་ལན་གཅིག །ཨཱ་གཱ་མཱི་ནི་འོང་བ་སྟེ། ཚེ་དེ་ཉིད་ལ་མྱ་ངན་མི་འདའ་ཡི། ལན་གཅིག་སླར་འཇིག་རྟེན་འདིར་སྐྱེ་བ་སྟེ་དེས་ན་ལན་གཅིག་ཕྱིར་འོང་བ་ཞེས་བྱའོ། །ཨ་ནཱ་གཱ་མཱི་ཞེས་པ་ཐ་མའི་སྐལ་བ་ཅན་གྱིས་ཆོས་རྣམ་ལྔ་སྤངས་པས། སླར་འདོད་ཁམས་སུ་སྐྱེ་བ་ཕྱིར་མི་འོང་བ་ཞེས་བྱའོ། །ལས་ཉོན་ཀྱི་དགྲས་མྱང་འདས་ཀྱི་བར་གཅོད་པ་རྣམས་བཅོམ་པ་ལ་དགྲ་བཅོམ་པ་ཞེས་བྱའོ། །དེ་ལྟར་ན་ཉན་ཐོས་ཀྱི་ས་བདུན་གྱི་ཁོག་བསྡེབ་པར་བྱའོ། །ཞེས་གསུངས་སོ། །བྱང་སེམས་སྐབས་བདེན་གཉིས་གཅིག་ན་སྐྱོན་བཞི་ཡོད་དེ། ཀུན་རྫོབ་ཀྱི་སྣང་བ་གཞན་ནས་འཚོལ་མི་དགོས་པ་བཞིན་དོན་དམ་ཡང་མི་འཚོལ་བར་འགྱུར་བ། ཀུན་རྫོབ་བསླུ་བ་བཞིན་དོན་དམ་ཡང་བསླུ་བ། དོན་དམ་བདེན་པ་བཞིན་ཀུན་རྫོབ་ཡང་བདེན་པ། ཀུན་རྫོབ་ལ་དབྱེ་ན་དུ་མ་ཡོད་པ་བཞིན། དོན་དམ་ལའང་དུ་མ་ཡོད་པའོ། །ཐ་དད་ན་སྐྱོན་བཞི་སྟེ། ཀུན་རྫོབ་བཀག་པས་དོན་དམ་མི་འབྱུང་བ། ཀུན་རྫོབ་ཀྱི་ཆོས་ཉིད་དོན་དམ་མ་ཡིན་པ། དོན་དམ་དེས་ཀུན་རྫོབ་ཀྱི་སྒྲོ་འདོགས་མི་ཆོད་པ། ཉོན་མོངས་པ་དང་རྣམ་བྱང་གཉིས་ཀུན་གཞིའི་ངོ་བོར་མ་གཅིག་པའོ། །དེ་ལ་ཀུན་རྫོབ་བདེན་པ་སྤྱིའི་མཚན་ཉིད་ནི། མི་བདེན་པས་བསླུ་ཞིང་སོ་སྐྱེའི་སྤྱོད་ཡུལ་དུ་གྱུར་པ་ཞིག་གོ །ངེས་ཚིག་ནི། སཾ་པྲྀ་ཏི་ས་ཏྱཾ་ཞེས་པ་ཡང་དག་པར་སྒྲིབ་པ་བདེན་པ་སྟེ། རྣམ་པར་རྟོག་པ་དང་བཅས་པའི་ཤེས་པས་དངོས་པོའི་དེ་ཁོ་ན་ཉིད་མཐོང་བར་བྱེད་པ་ལ་སྒྲིབ་པའི་ཕྱིར་རོ། །དབྱེ་ན་ཡང་ལོག་གཉིས་ལ་ཁྱད་པར་བརྒྱད་དེ། དང་པོ་དོན་བྱེད་ནུས་མི་ནུས་ནི། རེ་ཞིག་པའི་ཚད་མས་ཀྱང་གྲུབ། རེ་ཞིག་པའི་དོན་བྱེད་ཀྱང་ནུས་པ་ཡང་དག་ཀུན་རྫོབ། རེ་ཞིག་གི་ཚད་མས་ཀྱང་མ་གྲུབ། དོན་ཡང་བྱེད་མི་ནུས་པ་ལོག་པའི་ཀུན་རྫོབ་དེ་འདྲེས་སོ། །གཉིས་པ་རྟོག་ པ་ཡོད་མེད་ནི། རྟོག་མེད་ཡུལ་ཅན་དུ་བྱས་པ་ཡང་དག་ཀུན་རྫོབ། རྟོག་པ་དང་བཅས་པ་ཡུལ་ཡུལ་ཅན་དུ་བྱས་པ་ལོག་པའི་ཀུན་རྫོབ། གསུམ་པ་རིག་པས་དབང་བྱས་ན། ཡུལ་ཡུལ་ཅན་དུ་བྱས་པ་ཡང་དག་ཀུན་རྫོབ། དེའང་ཡིན་པ་སོ་སོ་ལོག་པའི་ཀུན་རྫོབ། བཞི་པ་གསལ་མི་གསལ་ནི། གསལ་བར་སྣང་ན་ཡང་དག་ཀུན་རྫོབ། མི་གསལ་ན་ལོག་པའི་ཀུན་རྫོབ། ལྔ་པ་མེད་དོན་ནི། མེད་པ་མ་ཡིན་པའི་དོན་སྣང་བ་ཙམ་ཡང་དག་ཀུན་རྫོབ། མེད་པའི་དོན་ལ་ཞེན་པ་ལོག་པའི་ཀུན་རྫོབ། དྲུག་པ་རྟེན་དག་པ་ནི། རྟེན་རང་གི་དབང་པོ་ལ་དངོས་སུ་བརྟེན་པ་དེ་ཡང་དག་ཀུན་རྫོབ། དེ་ལས་ལོག་པ་ལོག་པའི་ཀུན་རྫོབ། བདུན་པ་ཡུལ་ནི། ཡུལ་འདི་ན་དུས་ད་ལྟར་སྣང་བ་མཐུན་པ་ནི། ཤེས་པ་མ་ཞེན་པ་འཆིང་ནུས་བསྐྱེད་ནུས་ན་ཡང་དག་ཀུན་རྫོབ། དེ་ལྟར་མ་ཡིན་པ་ལོག་པའི་ཀུན་རྫོབ། བརྒྱད་པ་ཀུན་རྫོབ་མཚན་ཉིད་བཞི་ཅན་ནི། མཐུན་པར་སྣང་། དོན་བྱེད་ནུས། རྒྱུ་དང་རྐྱེན་ལས་བསྐྱེད་པ་ཡང་དག །བརྟགས་ན་དབེན་པ་ལོག་པའོ། །སྣང་ལ་དོན་བྱེད་ནུས་པའི་དཔེ་བུམ་པ་དེ་བཞིན་དུ་སྣང་ལ། དོན་བྱེད་མི་ནུས་པ་ཐག་ཁྲའི་སྦྲུལ་སྣང་ཡང་མི་སྣང་དོན་ཡང་མི་ནུས་པ་ནི། མི་སྲིད་པའི་ཆོས་བཞི་སྟེ། རི་བོང་གི་རྭ། མོ་གཤམ་གྱི་བུ། རུས་སྦལ་གྱི་སྤུ། ནམ་མཁའི་མེ་ཏོག་གོ །གཞན་ཡང་བྱེ་མ་ལས་མར་དང་། སེང་གེ་ལས་ཁ་ཆུ་སོགས་མཚོན་ནོ། །དོན་དམ་པའི་བདེན་པའི་མཚན་ཉིད་སྤྲོས་མཐའ་ཐམས་ཅད་དང་བྲལ་བ། ངེས་ཚིག་པ་རཱ་མཪྠ་སཏྱཾ། ཞེས་པ་དོན་མཆོག་བདེན་ཏེ། འཇིག་རྟེན་ལས་འདས་པའི་ཡེ་ཤེས་མཆོག་གི་དམིགས་པའི་སྤྱོད་ཡུལ་ལ་དོན་དུ་གྱུར་པ་འཕགས་པ་རྣམས་མྱ་ངན་འདས་པ་དང་། སྐྱེ་བ་མེད་པར་ཡང་དག་པར་བདེན་པའོ། །དབྱེ་ན་གཉིས། རྣམ་གྲངས་མ་ཡིན་པའི་དོན་དམ་པ་ནི། མཐའ་བརྒྱད་དང་བྲལ་བ་སྟེ། སྐྱེ། འགག །རྟག །ཆད། འགྲོ། འོང་། མཐའ། དབུས་དང་བྲལ་བ་སངས་རྒྱས་གྱི་ཐུགས་ཡིན། །རྣམ་གྲངས་ཀྱི་དོན་དམ་པ་ཐུགས་དེས་མཁྱེན་ནས་གཟིགས་པའི་ཡུལ་ཡིན། སྟོང་ཉིད་བཅོ་བརྒྱད་ཀྱང་རྣམ་གྲངས་པའི་དོན་མང་སྟེ། མིག་རྣ་བ་སྣ་ལྕེ་ཡིད་རྣམས་ཐེར་ཟུག་ཏུ་མ་ཡིན་པའི་ཕྱིར་ན་ནང་སྟོང་པ་ཉིད། གཟུགས་སྒྲ་དྲི་རོ་རེག་བྱའི་ཆོས་ཐམས་ཅད་ཐེར་ཟུག་ཏུ་མ་ཡིན། འཇིག་པར་མི་འགྱུར་བས་ན་ཕྱི་སྟོང་པ་ཉིད། ཕྱི་ནང་གི་སྐྱེ་མཆེད་བཅུ་གཉིས་དོན་དམ་པར་གཟུང་འཛིན་གཉིས་ཀ་མེད་དོ། །ཡུལ་དང་ཡུལ་ཅན་གྱི་ཚུལ་དང་བྲལ་བས་ཕྱི་ནང་སྟོང་པ་ཉིད། ཆོས་ཐམས་ཅད་ངོ་བོ་ཉིད་ཀྱིས་སྟོང་པ་རང་བཞིན་གྱིས་སྟོང་སྟེ་གཞན་གྱིས་སྟོང་པར་བྱར་མེད་པས་སྟོང་པ་ཉིད་སྟོང་པ་ཉིད། ཕྱི་སྣོད་ཀྱི་འཇིག་རྟེན་ན་སའི་དཀྱིལ་འཁོར་ཆེན་པོར་ཕྱོགས་བཅུར་སྟོང་པས་ཆེན་པོ་སྟོང་པ་ཉིད། དོན་དམ་པ་ཉིད་ལ་ཡང་དངོས་པོར་བཟུང་དུ་རུང་བ་མེད་པས་དོན་དམ་པ་སྟོང་པ་ཉིད། འདུས་བྱས་ཁམས་གསུམ་སྒྱུ་མ་དང་འདྲ་སྟེ། སྐྱེ་འགག་གནས་གསུམ་དང་བྲལ་ཞིང་སྟོང་པས་འདུས་བྱས་སྟོང་པ་ཉིད། འདུས་མ་བྱས་ནམ་མཁའ་དང་། དེ་བཞིན་ཉིད་དང་། འགོག་པ་གཉིས་རྒྱུ་རྐྱེན་གྱིས་གྲུབ་པ་མ་ཡིན་པ་འདི་བཞི་རང་བཞིན་གྱིས་སྟོང་པས་ན་འདུས་མ་བྱས་སྟོང་པ་ཉིད། མཐའ་ལས་འདས་པ་སྟོང་པ་ཉིད་ནི་གོ་སླའོ། །འཁོར་བ་ཐོག་མཐའ་མེད་ཅིང་དབུས་ཀྱང་མེད་པས་ཐོག་མ་དང་ཐ་མ་མེད་པ་སྟོང་པ་ཉིད། བུམ་ནང་གི་ཆུ་ལྟར་ཡོད་པ་ལས་མེད་པར་བྱས་ལྟ་བུ་མ་ཡིན་པ་སྟེ། ཆོས་ཐམས་ཅད་ཡེ་ནས་རང་བཞིན་གྱིས་སྟོང་པས་བསལ་བ་མེད་པའི་ཕྱིར་དོར་བ་མེད་པ་སྟོང་པ་ཉིད། ཆོས་ཐམས་ཅད་ཉན་རང་དང་དེ་བཞིན་གཤེགས་པས་ཀྱང་མ་མཛད། རང་བཞིན་གྱི་འདུས་བྱས་ཀྱང་མ་ཡིན་པས་རང་བཞིན་སྟོང་པ་ཉིད། ཕུང་པོ་ཁམས་དང་སྐྱེ་མཆེད་ལ་སོགས་པ་འདུས་བྱས་འདུས་མ་བྱས་ཀྱི་ཆོས་ཐམས་ཅད་སོ་སོའི་མཚན་ཉིད་ཀྱིས་སྟོང་པས་ཆོས་ཐམས་ཅད་སྟོང་པ་ཉིད། གཟུགས་ཚོར་འདུ་ཤེས་སོགས་རང་མཚན་བཏགས་པ་ཙམ་དུ་ཟད་དེ། ཡོངས་སུ་གྲུབ་པ་མེད་པས་དངོས་པོ་མེད་པ་སྟོང་པ་ཉིད། འདུ་འཕྲོད་ལས་བྱུང་བའི་ཆོས་རྣམས་རང་དབང་ཅན་དུ་མི་སྐྱེ་སྟེ། རྟེན་ཅིང་འབྲེལ་ཏེ་བྱུང་བ་ན་ངོ་བོ་ཉིད་མེད་པའི་ཕྱིར་ངོ་བོ་ཉིད་སྟོང་པ་ཉིད། དངོས་པོ་མེད་པར་རྟོགས་པའི་མཐོང་བ་དང་། ཤེས་པ་ནི་དངོས་པོ་མེད་པའི་ངོ་བོ་ཉིད་ཅེས་བྱ། མཐོང་བ་དང་ཤེས་པ་འདི་ཀ་ཡང་མཐོང་བས་ཀྱང་མ་གྲུབ། ཤེས་པས་ཀྱང་མ་བྱས་ཏེ་རང་བཞིན་གྱིས་སྟོང་པའི་ཕྱིར་དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །དེ་ལྟ་བུའི་སྟོང་པ་ཉིད་བཅོ་བརྒྱད་པོ་རེ་རེ་ལ་ཡང་མཐའ་བརྒྱད་རེ་རེས་ཁྱབ་བོ། ། ༈ དབུ་མ་པས་དམ་བཅའ་བའི་གཏན་ཚིགས་ཆེན་པོ་བཞི་ཡི་བཤད་པའི་ཚུལ་ལ། དང་པོ་རྡོ་རྗེ་གཟེགས་མ་ནི་དགག་བྱའི་རྒྱུ་དཔྱད་ནས་དགག་བྱ་འགོག་པ་སྟེ། ཆོས་ཅན་ངོ་བོ་ཙམ་ཡང་དོན་དམ་པར་བདག་དང་། གཞན་དང་། གཉིས་ཀ་དང་། རྒྱུ་མེད་པ་ལས་མ་སྐྱེས་པ་གང་ཞིག་ལ་སྐྱེ་བའི་དངོས་པོ་མཐའ་དག་གིས་སྟོང་སྟེ། དཔེར་ན་དོན་སྤྱི་ཙམ་ལ་དངོས་པོ་མེད་པ་བཞིན་ནོ། །ཡོད་མེད་སྐྱེ་འགོག་ནི། དགག་བྱའི་འབྲས་བུ་དཔྱད་ནས་འགོག་པ་སྟེ། ཆོས་ཅན་སྣང་བ་རྟེན་འབྲེལ་འདི་ཡང་དོན་དམ་པར་རྒྱུ་ལ་འབྲས་བུ་ཡོད་མེད་སྐྱེ་བ་གསུམ་ཀ་སྟོང་པའི་ཕྱིར་ཏེ། འདི་ལྟར་གང་ལས་རྒྱུ་དང་འབྲས་བུ་ཡོད་པ་དང་། མེད་པ་སྐྱེ་བས་སྟོང་པ་དང་། སྐྱེ་བའི་དངོས་པོ་མཐའ་དག་གིས་སྟོང་པ་སྟེ། དཔེར་ན་དངོས་པོ་མེད་ཀྱང་། ངོ་བོ་ཉིད་ཀྱིས་མཚོན་པར་བྱས་པ་བཞིན་ནོ། །མུ་བཞི་སྐྱེ་འགོག་ནི། རྒྱུ་འབྲས་གཉིས་ཀ་དཔྱད་ནས་འགོག་པ་སྟེ། འདི་ལྟར་སྣང་བའང་དོན་དམ་པར་གཅིག་ལས་གཅིག་ཤེས་དང་། གཅིག་ལས་དུ་མ་དང་། དུ་མ་ལས་དུ་མ་དང་། དུ་མ་ལས་གཅིག་སྐྱེ་བའི་མུ་བཞི་སྐྱེ་བས་སྟོང་པའོ། །དཔེར་ན་དངོས་པོ་མེད་པར་ནམ་མཁའ་ཞེས་གདགས་པ་བཞིན་ནོ། །རྟེན་འབྲེལ་ཆེན་པོ་ལ་གཉིས་ཏེ། མ་ཡིན་དགག་གཏན་ཚིགས་སུ་བཀོད་པ་རྟེན་འབྲེལ་ཆེན་པོ་རང་གི་ངོ་བོ་དཔྱད་ནས་འགོག་པ་ནི། རྟེན་ཅིང་འབྲེལ་བར་འབྱུང་བ་དེ་ཡང་སྐྱེ་འགག་ལ་སོགས་པའི་མཐའ་བརྒྱད་དང་བྲལ་བ་ཡིན་པས་བདེན་པའི་རང་བཞིན་གྱིས་སྟོང་པ་སྟེ། དཔེར་ན། སྨིག་རྒྱུ་གཡོ་བ་བཞིན་སྣང་བའི་རྟེན་འབྲེལ་ཙམ་དུ་མ་འགག་པའོ། །མེད་དགག་གཏན་ཚིགས་སུ་བཀོད་པ་གཅིག་དང་དུ་བྲལ་ནི། ཡོད་པའི་དངོས་པོ་ཙམ་དུ་མའི་དངོས་པོ་ཡིན་པ་བཀག་པ་ཙམ་གྱིས་གཅིག །གཅིག་གི་དངོས་པོར་ཡོད་དུས་སུ་ཆོད་དེ། ཡོད་པའི་དངོས་པོ་ཙམ་ལ་གཅིག་ཏུ་ཡོད་པའམ། དུ་མར་ཡོད་པས་ཁྱབ་ལ་དངོས་སུ་མེད་ངེས་པ་ན་གཅིག་དང་དུ་མའི་ཁྱབ་བྱར་མཐོང་བའི་ཡོད་པའི་དངོས་པོ་འདི་ཉིད་དོན་དམ་པའི་དངོས་པོ་ཡིན་ནའང་། དེ་ཉིད་གཅིག་དང་དུ་མས་མ་ཁྱབ་པར་དོགས་པ་སྐྱེ་བའི་ནུས་པ་བརྩམས་ཏེ། དོན་དམ་པའི་དངོས་པོ་ཆ་གཅིག་དང་དུ་མས་ཁྱབ་པ་མཚན་ཉིད་ངེས་པའི་ཚུལ་གྱིས་ཤུགས་ལས་གྲུབ་པའོ། །ངེས་དོན་དབུ་མ་ཆེན་པོས་ཆོས་ཐམས་ཅད་མཚན་ཉིད་གསུམ་དུ་འདུས་པར་བཞེད་པ་ལས། ཐོག་མར་ཀུན་བཏགས་བཤད་པ་ལ། ངོ་བོ་ནི། གཟུགས་སོགས་ཡུལ་དྲུག་དང་། དབང་པོ་དྲུག་དག །ཆོས་དང་གང་ཟག་དངོས་པོར་ཡོད་དོ་སྙམ་དུ་འཁྲུལ་པའི་རྣམ་ཤེས་ཀྱིས་ནན་གྱིས་བཏགས་པའི་གཟུང་འཛིན་ཆ་གཉིས་ཀྱི་རྟོག་པ་དེའོ། །ངེས་ཚིག་ནི། པ་རི་ས་མ་ཏཱ་དཱ་ཞེས་ཡོངས་སུ་མེད་པ་ལ་སྒྲོ་བཏགས་པ་ལྟ་བུའོ། །དབྱེ་ན་གཉིས་ཏེ། སྣང་བའི་ཀུན་བཏགས་ནི་ཡུལ་དང་། དབང་པོའི་གཟུང་འཛིན་གཉིས་སོ། །མི་སྣང་བའི་ཀུན་བཏགས་ནི། རི་བོང་གི་རྭ་དང་། མོ་གཤམ་གྱི་བུ་དང་། མུ་སྟེགས་པའི་བདག་ཏུ་ལྟ་བ་དང་། ཉན་ཐོས་ཀྱི་རྡུལ་ཕྲན་རྣམས་སོ། །གཉིས་པ་གཞན་དབང་བཤད་པ་ལ། ངོ་བོ་ནི། ཀུན་གཞིའི་རྣམ་ཤེས་འཁོར་དང་བཅས་པ་ཉིད། །རྒྱུ་འབྲས་ཀྱི་ཚུལ་དུ་སྐད་ཅིག་མ་ལ་སེམས་དང་སེམས་བྱུང་རྟེན་འབྲེལ་དུ་འབྱུང་འབྱུང་བ་དེའོ། །དེ་ལ་ཅིའི་ཕྱིར་གཞན་དབང་ཞེས་བྱ་ཞེ་ན། ཁམས་གསུམ་གྱི་ཤེས་པ་རྒྱུ་རྐྱེན་ལ་རགས་མ་ལུས་པར་རང་སྐྱེ་མི་ནུས་པས་གཞན་དབང་ཞེས་བྱ་བ་སྟེ། རྒྱུ་རྐྱེན་བཞིས་བསྐྱེད་དེ། ཀུན་གཞི་ལ་བག་ཆགས་ཡོད་པ་ནི་རྒྱུའི་རྐྱེན། མིག་གི་དབང་པོ་ལ་སོགས་པ་འཇུག་པའི་ཚོགས་དྲུག་ནི་བདག་པོའི་རྐྱེན། ཡུལ་གཟུགས་སྒྲ་དྲི་རོ་རེག་བྱ་ལ་སོགས་པ་ནི་དམིགས་པའི་རྐྱེན། ཤེས་པ་སྐད་ཅིག་མ་མ་འགག་པས་གོ་དབྱེ་ནས། སྐད་ཅིག་མ་ཕྱི་མ་འབྱུང་བ་ནི་དེ་མ་ཐག་པའི་རྐྱེན་ནོ། །ངེས་ཚིག །པ་ར་ཏནྟྲ་ཞེས། །གཞན་རྐྱེན་ལ་རགས་ལས་ཤིང་ཤེས་པས་དེར་སྟོན་པའོ། །དབྱེ་ན་གཉིས་ཏེ། བསྐྱེད་པའི་གཞན་དབང་ནི་སེམས་ཅན་གྱི་སེམས་ལས་བྱུང་བ་ནི་ཀུན་འབྱུང་དང་རྐྱེན་གྱིས་བསྐྱེད་པའི་འདུས་བྱས་སོ། །ལྟོས་པའི་གཞན་དབང་ནི། དེ་ལ་བལྟོས་ནས་རྒྱུ་རྐྱེན་ལས་བསྐྱེད་པའི་འདུས་མ་བྱས་བཞི་སྟེ། སོ་སོར་བརྟག་པའི་འགོག་པ། སོ་སོར་བརྟག་མིན་འགོག་པ། ནམ་མཁའ་དང་། དེ་བཞིན་ཉིད་རྣམས་སོ། །གསུམ་པ་ཡོངས་གྲུབ་བཤད་པ་ལ། ངོ་བོ་ནི། གཞན་དབང་གི་ཆོས་ཅན། དེ་ཀུན་ལ་གཟུང་འཛིན་གཉིས་དང་བྲལ་བ་སྟེ། དེ་ལ་ཅིའི་ཕྱིར་ཡོངས་གྲུབ་ཅེས་བྱ་ཞེ་ན། དཔེར་ན་ཆུ་དང་། ནམ་མཁའ་དང་། གསེར་དང་འདྲའོ། །ཆུ་རྙོག་རུང་དྭངས་རུང་ཆུ་ཡི་རང་བཞིན་སྔོ་སིང་ངེ་བ་དེ་གང་ནས་ཀྱང་མ་འོང་། གང་དུ་ཡང་མ་སོང་། གསེར་ཡང་མགར་བའི་བརྡུང་རུང་མ་བརྡུང་རུང་། དེའི་རང་བཞིན་སེར་པོ་གང་ཡང་མ་སོང་། གང་ནས་ཀྱང་མ་འོང་། ནམ་མཁའ་ཡང་གསལ་རུང་མི་གསལ་རུང་ནམ་མཁའ་དྭངས་པའི་རང་བཞིན་ནི་གང་ནས་ཀྱང་མི་འོང་། གང་དུ་ཡང་མ་སོང་ངོ་། །དེ་བཞིན་དུ་ཆོས་ཉིད་ཆོས་ཀྱི་དབྱིངས་དེ། སངས་རྒྱས་ཀྱིས་འཇིག་རྟེན་དུ་བསྟན་ཀྱང་གང་ནས་ཀྱང་མ་འོང་། མ་བསྟན་ཀྱང་གང་དུའང་མ་སོང་བ་ལ་བྱའོ། །ངེས་ཚིག་ནི། པ་རི་ནི་ཥྤནྣ་ཞེས་པ་དེ་བཞིན་ཉིད་དང་ཡང་དག་པའི་ཡེ་ཤེས་གཉིས་མ་འགྱུར་བ་དང་། ཕྱིན་ཅི་མ་ལོག་པའི་ཚུལ་གྱིས་ཡོངས་སུ་རྫོགས་ཤིང་གྲུབ་པས་ན་ཡོངས་སུ་གྲུབ་པའི་མཚན་ཉིད་དོ། །དབྱེ་ན་གཉིས་ཏེ། མི་འགྱུར་བའི་ཡོངས་གྲུབ་ནི། ཆོས་རྣམས་ཀྱི་ཆོས་ཉིད། ཕྱིན་ཅི་མ་ལོག་པའི་ཡོངས་གྲུབ་ནི། ཆོས་ཉིད་ཕྱིན་ཅི་མ་ལོག་པར་རྟོགས་པའི་རིགས་པའི་ཡེ་ཤེས་སོ། །དེ་ཡང་མེད་པའི་ཆོས་ལ་ཡོད་པར་བཏགས་པ་ཐམས་ཅད་ཀུན་བཏགས། རྒྱུ་རྐྱེན་གྱིས་སྐྱེ་བ་ཐམས་ཅད་གཞན་དབང་། ཕྱིན་ཅི་མ་ལོག་བློས་བཏགས་པ་ཡང་མིན། རྒྱུ་རྐྱེན་གྱིས་ཀྱང་མ་བསྐྱེད་པ་ཐམས་ཅད་ཡོངས་གྲུབ་ཡིན་ནོ། །བྱང་ཆུབ་སེམས་དཔའི་སེམས་བསྐྱེད་ཀྱི་ས་མཚམས་དབྱེ་བ་ཉེར་གཉིས་ཀྱི་དོན་ནི། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱི། །རྣམ་པ་ཉི་ཤུ་རྩ་གཉིས་སོ། །ཞེས་གསུངས་ཏེ། དཔེ་ཉི་ཤུ་རྩ་གཉིས་པོ་འདི་དག་ནི། དོན་འདུན་པ་ནས་ཆོས་སྐུའི་བར་དུ་ཡིན་ཏེ། དེ་ཡང་ལམ་ལྔ་དང་སྦྱར་ན། འདུན་པ་དང་ལྡན་པ་ནི་ས་དང་འདྲ་སྟེ། ཆོས་དཀར་པོ་ཐམས་ཅད་ཀྱི་གཞིའི་དངོས་པོ་བྱེད་པའོ། །བསམ་པ་དང་ལྡན་པ་ནི་གསེར་དང་འདྲ་སྟེ། བྱང་ཆུབ་བར་དུ་མི་འགྱུར་བའོ། །ལྷག་པའི་བསམ་པ་དང་ལྡན་པ་ནི་ཟླ་བ་ཚེས་པ་དང་འདྲ་སྟེ། དགེ་བའི་ཆོས་མཐའ་དག་རྣམ་པར་འཕེལ་བར་འགྱུར་བའོ། །དེ་གསུམ་ནི་ཚོགས་ལམ་ཆུང་ངུ་དང་། འབྲིང་པོ་དང་། ཆེན་པོ་ཉིད་ཀྱི་ལས་དང་པོ་པའི་སས་བསྡུས་པའོ། །སྦྱོར་བ་དང་ལྡན་པ་ནི་མེ་དང་འདྲ་སྟེ། ཐམས་ཅད་མཁྱེན་པ་ཉིད་གསུམ་ལ་སྒྲིབ་པའི་བུད་ཤིང་སྲེག་པར་བྱེད་པའོ། །དེ་ནི་སྦྱོར་བའི་ལམ་གྱིས་བསྡུས་པའོ། །སྦྱིན་པའི་ཕ་རོལ་ཏུ་ཕྱིན་པ་ནི་གཏེར་ཆེན་པོ་དང་འདྲ་སྟེ། སེམས་ཅན་ཐམས་ཅད་ཚིམ་པར་བྱེད་པའོ། །ཚུལ་ཁྲིམས་དང་ལྡན་པ་ནི་རིན་པོ་ཆེའི་འབྱུང་གནས་དང་འདྲ་སྟེ། ཡོན་ཏན་རིན་པོ་ཆེའི་རྟེན་གྱི་དངོས་པོ་བྱེད་པའོ། །བཟོད་པ་དང་ལྡན་པ་ནི་རྒྱ་མཚོ་ཆེན་པོ་དང་འདྲ་སྟེ། མི་འདོད་ཐམས་ཅད་ཐོག་ཏུ་བབས་པས་མི་འཁྲུགས་པའོ། །བརྩོན་འགྲུས་དང་ལྡན་པ་ནི་རྡོ་རྗེ་དང་འདྲ་སྟེ། མི་ཤིགས་པ་ཉིད་ཀྱིས་ན་སྲ་བའོ། །བསམ་གཏན་དང་ལྡན་པ་ནི་རིའི་རྒྱལ་པོ་དང་འདྲ་སྟེ། དམིགས་པའི་རྣམ་པར་གཡེང་བས་མི་བསྐྱོད་པའོ། །ཤེས་རབ་དང་ལྡན་པ་ནི་སྨན་དང་འདྲ་སྟེ་ཉོན་མོངས་པའི་ནད་ཞི་བར་བྱེད་པའོ། །ཐབས་དང་ལྡན་པ་ནི་དགེ་བའི་བཤེས་གཉེན་དང་འདྲ་སྟེ། གནས་སྐབས་ཐམས་ཅད་དུ་སེམས་ཅན་གྱི་དོན་ཡོངས་སུ་མི་གཏོང་བའོ། །སྨོན་ལམ་དང་ལྡན་པ་ནི་ཡིད་བཞིན་གྱི་ནོར་བུ་དང་འདྲ་སྟེ། ཇི་ལྟར་སྨོན་པའི་འབྲས་བུ་འགྲུབ་པའོ། །སྟོབས་དང་ལྡན་པ་ནི་ཉི་མ་དང་འདྲ་སྟེ་གདུལ་བྱ་ཡོངས་སུ་སྨིན་པར་བྱེད་པའོ། །ཡེ་ཤེས་ཀྱི་ཕ་རོལ་ཏུ་ཕྱིན་པ་ནི་ཆོས་ཀྱི་སྒྲ་དབྱངས་དང་འདྲ་སྟེ། གདུལ་བྱ་འདུན་བར་བྱེད་པའི་ཆོས་སྟོན་པའོ། །དེ་ལྟར་བཅུ་ནི་རིམ་པ་ལྟར་རབ་ཏུ་དགའ་བ་ལ་སོགས་པ་བཅུས་བསྡུས་ཏེ། མཐོང་བའི་ལམ་དང་སྒོམ་པའི་ལམ་གྱི་སྤྱོད་ཡུལ་ཅན་ཡིན་ནོ། །མངོན་པར་ཤེས་པ་དང་ལྡན་པ་ནི་རྒྱལ་པོ་ཆེན་པོ་དང་འདྲ་སྟེ། མཐུ་ཐོགས་པ་མེད་པས་གཞན་གྱི་དོན་སྒྲུབ་པའོ། །བསོད་ནམས་དང་ཡེ་ཤེས་ལྡན་པ་ནི་བང་མཛོད་དང་འདྲ་སྟེ། ཚོགས་མང་པོའི་མཛོད་དུ་གྱུར་པའོ། །བྱང་ཆུབ་ཀྱི་ཕྱོགས་དང་མཐུན་པའི་ཆོས་དང་ལྡན་པ་ནི་ལམ་པོ་ཆེ་དང་འདྲ་སྟེ། འཕགས་པ་ཐམས་ཅད་གཤེགས་ཤིང་རྗེས་སུ་གཤེགས་པས་སོ། །སྙིང་རྗེ་དང་། ལྷག་མཐོང་དང་ལྡན་པ་ནི་བཞོན་པ་དང་འདྲ་སྟེ། འཁོར་འདས་གང་དུའང་ལྟུང་བ་མེད་པར་བདེ་བླག་ཏུ་འགྲོ་བའོ། །གཟུངས་དང་སྤོབས་པ་དང་ལྡན་པ་ནི་བཀོད་མའི་ཆུ་དང་འདྲ་སྟེ། ཐོས་པ་དང་མ་ཐོས་པའི་ཆོས་འཛིན་པས་མི་ཟད་པའོ། །དེ་ལྟར་ལྔ་ནི་བྱང་ཆུབ་སེམས་དཔའི་ཁྱད་པར་གྱི་ལམ་གྱིས་བསྡུས་པའོ། །ཆོས་ཀྱི་སྐྱེད་མོས་ཚལ་དང་ལྡན་པ་ནི་སྒྲ་སྙན་ཐོས་པ་དང་འདྲ་སྟེ། ཐར་པ་འདོད་པའི་གདུལ་བྱ་ལ་སྙན་པར་སྒྲོགས་པའོ། །བགྲོད་པ་གཅིག་པའི་ལམ་དང་ལྡན་པ་ནི་ཆུ་བོའི་རྒྱུན་དང་འདྲ་སྟེ། གཞན་གྱི་དོན་བྱ་བ་མི་ཉམས་པའོ། །ཆོས་ཀྱི་སྐུ་དང་ལྡན་པ་ནི་སྤྲིན་དང་འདྲ་སྟེ། དགའ་ལྡན་གྱི་གནས་ན་བཞུགས་པ་ལ་སོགས་པ་སྟོན་པའི་སྒོ་ནས་སེམས་ཅན་གྱི་དོན་བྱ་བ་རྣམས་དེ་ལ་རགས་ལས་པའོ། །དེ་ལྟར་གསུམ་ནི་སངས་རྒྱས་ཀྱི་སས་བསྡུས་པ་སྟེ། དེ་ལྟར་ཉི་ཤུ་རྩ་གཉིས་བོ་ལས་དང་པོ་པའི་ས་ནས་བཟུང་སྟེ། སངས་རྒྱས་ཀྱི་སའི་བར་གྱིས་བསྡུས་པའོ། །ཡང་ས་མཚམས་ཀྱི་སྒོ་ནས་དབྱེ་བ་ནི་བཞི་སྟེ། མོས་པ་དང་ལྡན་པའི། ལྷག་པའི་བསམ་པ་དང་ལྡན་པའི། རྣམ་པར་སྨིན་པའི། སྒྲིབ་པ་སྤང་པའི་སེམས་བསྐྱེད་དོ། །དེ་ལ་དང་པོ་ནི། མོས་པས་སྤྱོད་པའི་སས་བསྡུས་པ་རྣམས་སོ། །གཉིས་པ་ནི། ས་དང་པོ་ནས་བདུན་པའི་བར་རོ། །གསུམ་པ་ནི། ས་བརྒྱད་པ་ནས་བཅུ་པའི་བར་རོ། །བཞི་པ་ནི། སངས་རྒྱས་ཀྱི་སའོ། །དེ་ལྟར་ཡང་སྔ་མ་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་གསུངས་སོ། །བྱང་ཆུབ་སེམས་དཔའི་ས་བཅུའི་སྒྲ་དོན་ནི། བྱང་ཆུབ་དང་ཉེ་ཞིང་སེམས་ཅན་མང་པོའི་དོན་འགྲུབ་པར་གཟིགས་པས་རབ་ཏུ་དགའ་བ། ལྟུང་བའི་ཆ་ཕྲ་མོ་ཆད་ཀྱང་བྱང་ནས་འཆལ་བའི་ཚུལ་ཁྲིམས་ཀྱི་དྲི་མ་མེད་པ། ཉན་རང་གི་ས་ལས་འདས་པའི་ཏིང་ངེ་འཛིན་གྱི་ཕུང་པོ་ཡོངས་སུ་དག་པ་ཡེ་ཤེས་ཀྱི་སྣང་བ་ཆེན་པོའི་གནས་སུ་གྱུར་བ་ཐོབ་པས་འོད་བྱེད་པ། ཉོན་མོངས་པ་སྲེག་པ་བྱང་ཆུབ་ཕྱོགས་ཀྱི་མེའི་འོད་འཕྲོ་བས་འོད་འཕྲོ་བ། ཉན་རང་ལས་འདས་པའི་འཕགས་པའི་བདེན་པ་བཞི་བསྒོམས་ཤིང་འཁོར་འདས་གཉིས་ཀ་ལ་མི་གནས་པའི་ཤེས་རབ་ཡོངས་སུ་དག་པར་བྱ་བ་སྦྱོང་ཤིང་སྒོམ་པ་ལ་ཤིན་ཏུ་དཀའ་བ། ཤེས་རབ་ཀྱི་ཕར་ཕྱིན་ལ་བརྟེན་ནས་འཁོར་འདས་གཉིས་ཀ་ལ་མི་གནས་ཤིང་། མཚན་མ་མེད་པ་ལ་རང་གི་ངང་གིས་འཇུག་པའི་ཡེ་ཤེས་ལ་མང་དུ་གནས་ཤིང་མངོན་དུ་གཟིགས་པས་ན་མངོན་དུ་གྱུར་པ། མཚན་མ་མེད་པ་ལ་བགྲོད་པ་གཅིག་ཏུ་གྱུར་པའི་ལམ་དང་ཉེ་ཞིང་རིང་དུ་ཕྱིན་པས་ན་རིང་དུ་སོང་བ། མཚན་མ་ཡོད་མེད་ཀྱི་འདུ་ཤེས་གཉིས་ཀས་བསྐྱོད་པར་མི་ནུས་པས་མི་གཡོ་བ། སོ་སོ་ཡང་དག་པར་རིག་པ་བརྙེས་པས་ན་བློ་གྲོས་གཞན་ལས་འཕགས་པས་ལེགས་པའི་བློ་གྲོས། གཟུངས་དང་ཏིང་འཛིན་ཀུན་ལ་ཡང་སྤྲིན་དང་འདྲ་བར་ཁྱབ་ཅིང་། ཐོས་པའི་ཆོས་ནམ་མཁའ་འདྲ་བ་ལ་སྤྲིན་བཞིན་ཁྱབ་པས་ཆོས་ཀྱི་སྤྲིན་ནོ། །དེ་རྣམས་སྦྱིན། ཚུལ། བཟོད། བརྩོན། བསམ། ཤེར། ཐབས། སྨོན། སྟོབས། ཡེ་ཤེས་ཀྱི་ཕ་རོལ་ཕྱིན་བཅུ་རྫོགས་པ་དང་སྦྱར་བ་ཡིན་ནོ། །བྱང་ཆུབ་སེམས་དཔའི་ལམ་ལྔ་ཆོས་སོ་བདུན་དང་སྦྱར་ཚུལ་ནི། དྲན་པ་ཉེར་བཞག་ནས་འཕགས་ལམ་ཡན་ལག་བརྒྱད་ཀྱི་བར་བྱང་ཆུབ་གསུམ་པོའི་ཕྱོགས་སུ་གྱུར་པས་ན་བྱང་ཆུབ་ཆོས་སོ་བདུན་ཡིན། དེ་ལ་རང་དང་སྤྱིའི་མཚན་ཉིད་ཤེས་རབ་ཀྱིས་བརྟགས་ཏེ་མཐོང་པའི་དོན་རྣམས་དྲན་པས་གསལ་བར་འཛིན་ཏེ་དྲན་པ་ཤས་ཆེ་བས་དྲན་པ་ཉེར་བཞག་བཞི་ཡིན། ལུས་དྲན་མི་རྟག །སྡུག་བསྔལ། བདག་མེད་གསུམ། ཚོར་དྲན་བདེ། སྡུག །བཏང་སྙོམས་གསུམ། སེམས་དྲན་རྣམ་ཤེས་ཚོགས་བརྒྱད་ཀྱི་དོན་སེམས་པ། ཆོས་དྲན་ཀུན་ཉོན་དང་། རྣམ་བྱང་གི་དོན་ཚོལ་བའོ། །བརྩོན་འགྲུས་ཀྱིས་དགེ་བ་བསྐྱེད་ཅིང་མི་དགེ་བ་སྤངས་པས་ན་ཡང་དག་པ་སྤོང་བ་བཞི་ཡིན། དེ་ཡང་མི་དགེ་བ་སྒོ་གསུམ་ལ་སྐྱེས་པ་སྤོང་། མ་སྐྱེས་པ་མི་བསྐྱེད། དགེ་བའི་ཆོས་སྒོ་གསུམ་ལ་སྐྱེས་པ་རྣམས་གོང་དུ་སྤེལ། མ་སྐྱེས་པ་བསྐྱེད་པའོ། །རྫུ་འཕྲུལ་གྱི་རྐང་པ་བཞིས་ནམ་མཁའ་ལ་འགྲོ་བ་ལ་སོགས་པའི་རྫུ་འཕྲུལ་གྱི་རྟེན་དང་རྒྱུར་གྱུར་པས་དེ་སྐད་ཅེས་བྱ། འདུན་པས་ནི་འདུན་པ་དྲག་པོ་བསྐྱེད། བརྩོན་འགྲུས་ཀྱིས་མྱུར་དུ་སྒྲུབ་སེམས་ཀྱིས་གང་འདོད་བསྒྲུབ། སྤྱོད་པས་འབྲས་བུ་གང་ཡིན་སྤྱོད་པའོ། །ཚོགས་ལམ་ཞེས་པ་ནི་ཚོགས་མང་དུ་གསོག་པའི་དེ་སྐད་དུ་བརྗོད་དོ། །དད་སོགས་ལྔ་ཡི་དབང་གིས་སེམས་ལས་རུང་དུ་གྱུར་པའི་རྒྱུད་ལ་ཐར་པ་ཆ་མཐུན་གྱི་དགེ་བ་བསྐྱེད་པ་ལ་དབང་བའི་ཕྱིར་དབང་པོ་ལྔ་ཡིན། དད། བརྩོན། དྲན། ཏིང་འཛིན། ཤེས་རབ་རྣམས་ལ་དབང་ཐོབ་པའོ། །དེ་ལྟ་བུའི་དབང་ལྔ་ཡུན་རིང་དུ་བསྒོམས་པས་མ་དད་པ། ལེ་ལོ། དྲན་བ་ཉམས་པ། གཡེང་བ། ཤེས་བཞིན་མ་ཡིན་པ་ལྔས་བར་ཆད་མི་ནུས་པས་དད་པ་སོགས་པའི་མཐུ་བསྐྱེད་པའི་སྟོབས་ལྔའོ། །སྦྱོར་ལམ་ཞེས་པ་དྲོད། རྩེ་མོ། བཟོད་པ། ཆོས་མཆོག་ནས་མཐོང་ལམ་ལ་སྦྱོར་བས་ནའོ། །གཟུང་བ་རང་བཞིན་གྱིས་མེད་པ་དྲོད་དེ། འཕགས་ལམ་གྱིས་ཉོན་མོངས་པའི་བུད་ཤིང་སྲེག་པར་འདོད། དེ་ལ་ཡིད་ཆེས་ཤིང་དགེ་རྩའི་རྩེ་མོ་ཡིན་པས་རྩེ་མོ། འཛིན་པ་རང་བཞིན་མེད་པར་བཟོད་པ། ཟག་བཅས་ཀྱི་སྐྱེ་འཇིག་ལ་བཟོད་པ། དེ་ལ་ཡིད་ཆེས་པས་འཇིག་རྟེན་པའི་ཆོས་མཆོག་སྟེ་འཇིག་རྟེན་གྱི་ཆོས་གཞན་ལས་ལྷག་པའོ། །མཐོང་ལམ་ལ་དེ་ཁོ་ན་ཉིད་བྱང་ཆུབ་པའི་རྒྱུར་གྱུར་པས་བྱང་ཆུབ་ཡན་ལག་བདུན་ཡིན། དེ་ཡང་། དམིགས་པ་མི་བརྗེད་པ་དྲན་པ་ཡང་དག་བྱང་ཆུབ་ཀྱི་ཡན་ལག །ཇི་ལྟ་ཇི་སྙེད་ཀྱི་ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག །འཁོར་བ་ལས་འདའ་བའི་བརྩོན་འགྲུས་བྱང་ཆུབ་ཀྱི་ཡན་ལག །ལུས་ངག་ཡིད་གསུམ་ལ་ཕན་འདོགས་པའི་དགའ་བ་བྱང་ཆུབ་ཀྱི་ཡན་ལག །སེམས་ལས་སུ་རུང་བ་ཤིན་ཏུ་སྦྱོང་བ་བྱང་ཆུབ་ཀྱི་ཡན་ལག །སེམས་རྩེ་གཅིག་ཏུ་མཉམ་པར་འཇོག་པ་ལ་འཛིན་པ་དང་བྲལ་བ་ཏིང་ངེ་འཛིན་བྱང་ཆུབ་ཀྱི་ཡན་ལག །ཆོས་ཐམས་ཅད་ལ་རེ་དོགས་དང་བྲལ་བའི་དགའ་བ་ཐོབ་པ་བཏང་སྙོམས་བྱང་ཆུབ་ཀྱི་ཡན་ལག་རྣམས་སོ། །མཐོང་ལམ་ཞེས་པ་སྔར་མ་མཐོང་བའི་ལམ་མཐོང་བའི་ཕྱིར་རོ། །འཕགས་ལམ་ཡན་ལག་བརྒྱད་ཀྱིས་དགྲ་བཅོམ་པའི་འབྲས་བུ་ཐོབ་པར་བྱེད་དེ། ཡང་དག་པའི་ལྟ་བས་མཐོང་ལམ་མངོན་དུ་བྱེད། ཡང་དག་པའི་རྟོགས་པས་མི་རྟོགས་པར་མི་སྨྲ། ཡང་དག་པའི་ངག་གིས་གང་ལ་གང་གིས་འདུལ་བའི་ཆོས་སྟོན། ཡང་དག་པའི་མཐས་བྱ་བ་མ་ཡིན་པ་གཞན་མི་བྱེད། ཡང་དག་པའི་འཚོ་བའི་བདག་གཞན་གཉིས་ཀར་མི་གནོད་ཅིང་ཉོན་མོངས་པས་མི་གོས། ཡང་དག་པའི་རྩོལ་བས་ནི་འདུས་མ་བྱས་པའི་ཆོས་སྒྲུབ། ཡང་དག་པའི་དྲན་པས་སེམས་དང་སེམས་བྱུང་གི་མི་དགེ་བས་སྐབས་མི་རྙེད། ཡང་དག་པའི་ཏིང་ངེ་འཛིན་གྱིས་སེམས་སྐད་ཅིག་དང་ལྡན་པའི་ཡེ་ཤེས་ཀྱིས་ཐམས་ཅད་མཁྱེན་པ་དང་། དེའི་ཡེ་ཤེས་ཀྱིས་མངོན་པར་རྫོགས་པར་སངས་རྒྱས་པའོ། །སྒོམ་ལམ་ཞེས་པ་ཆོས་ཉིད་ཀྱི་དོན་ལ་ཡང་དང་ཡང་དུ་འདྲིས་པར་བྱེད་པའི་ཕྱིར་རོ། །དེ་དག་ས་བཅུ་དང་སྦྱར་ན། དང་པོ་མཐོང་ལམ། གཉིས་པ་ནས་བརྒྱད་བར་སྒོམ་ལམ། མོས་སྤྱོད་ནས་ས་དང་པོའི་བར་རང་དོན་སྒྲུབ་པ་ལས་གཞན་དོན་བྱེད་མི་ནུས་ཏེ་རང་ཉིད་ཀྱང་ཉོན་མོངས་དང་ཆ་བྲལ་བའི་ཕྱིར་རོ། །ས་གཉིས་པ་ནས་བརྒྱད་བར་དོན་གཉིས་ཀ་བྱེད་དེ། ཉོན་མོངས་མངོན་གྱུར་དང་བྲལ། བག་ཉལ་ཡོད། དགུ་པ་དང་བཅུ་པའི་བར་གཞན་དོན་འབའ་ཞིག་མཛད་དེ། ཉོན་མོངས་པ་ས་བོན་དང་བཅས་པ་སྤངས་པས་རང་དོན་བྱ་མི་དགོས། ས་དགུ་པ་དང་བཅུ་པ་མི་སློབ་ལམ་ཡིན་ཏེ། སློབ་ལམ་གྱིས་གནས་སྐབས་སྤངས་པ་ལ་བཤད་དོ། །ཡུམ་ལས། རྟོག་པ་དང་བཅས་ཤིང་དཔྱོད་པ་དང་བཅས་པ་ནི་བསམ་གཏན་དང་པོ། རྟོག་པ་མེད་ལ་སྤྱོད་པ་ཙམ་དང་བཅས་པ་ནི་བསམ་གཏན་གཉིས་པ། རྟོག་པ་ཡང་མེད་ལ་དཔྱོད་པ་ཡང་མེད་པའི་ཡིད་ལ་བྱེད་པ་བསམ་གཏན་གསུམ་པ། དགའ་བ་སྡུད་པ་ཡིད་ལ་བྱེད་པ་ནི་བསམ་གཏན་བཞི་པའོ། །ཞེས་སོ། །བསམ་གཏན་བཞི་པ་ལ་འཕགས་པའི་ཤེས་རབ་ཀྱིས་ཟག་མེད་སྤེལ་ཞིང་རིམ་པ་ལྔར་བསྒོམས་ན་མི་ཆེ་བ་སོགས་གཙང་གནས་ལྔར་སྐྱེའོ། །དེ་ཡང་། བསམ་གཏན་དང་པོ་དང་བཞི་པ་སྤེལ་བ་ཆུང་ངུ་། དང་པོ་དང་གཉིས་པ་བསྡམས་པ་ལས་བཞི་པ་སྤེལ་བ་འབྲིང་། དང་པོ་དང་གཉིས་པ་གསུམ་པ། དེ་དང་གསུམ་པ་བཞི་པ་སྤེལ་བ་ཆེན་པོ། བསམ་གཏན་བཞི་པོ་ནང་ཚན་རེ་རེ་ཞིང་བཞི་པ་དང་སྤེལ་བ་ཆེན་པོ། དེ་དག་ཐོད་རྒལ་དུ་བསྒོམས་པས་མཆོག་ཏུ་ཆེན་པོའོ། །ཐོད་རྒལ་ནི་བསམ་གཏན་བཞི་པོའི་ལམ་དོར་བས་ན་འཕྱོངས་པའི་བར་དུ་སྒོམ་པ་སྟེ། མས་ཡར་རིམ་དང་། རིམ་མིན་དུ་གཅིག་ནས་གསུམ་གྱི་བར་ནས། ཡས་མར་སོང་བའི་བར་དུ་བཞིས་བསྒོམ་པའོ། །གོ་མྱོང་གཉིས་པོ་གང་ཡིན་ཀྱང་སོ་སྐྱེའི་སྒོམ་པའི་བསམ་གཏན་ཡིན་པ་ལ། རིམ་གྱིས་པའི་དབང་དུ་བྱས་ན་སེམས་ཀྱི་གནས་ལུགས་ལྟ་ཚུལ་ནས་བཟུང་སྟེ་རྩེ་གཅིག་ཆེན་པོ་མན་ཆད་ཡིན་ནོ། །འཕགས་པ་རྣམས་ཀྱིས་མི་རྟོག་པའི་ཤེས་རབ་ནི། སྙོམས་འཇུག་དགུ་པོ་རང་བཞིན་མེད་པར་ཤེས་པའི་ལྷག་མཐོང་ཉིད་དོ། །བསམ་གཟུགས་འགོག་བཅས་སྙོམས་འཇུག་དགུ་ཡི་ཏིང་འཛིན་སྐྱེ་ལུགས་ནི། མཉམ་པར་འཇོག་བྱེད་ཀྱི་བློ་དང་བཅས་ཤིང་གང་དུའང་མི་རྟོག་པར་འཇོག་པའི་གསལ་སྟོང་དེ་ལ་དྲན་རྩིས་དཔྱོད་པ་དང་བཅས་པའི་སྦྱོར་བས་དངོས་གཞི་མི་རྟོག་པར་སྐྱེ་ཞིང་། ཐུན་མཚམས་ནི་རྟོག་དཔྱོད་དང་བཅས་ཏེ་བསམ་གཏན་དང་པོའི་ཏིང་འཛིན་ཡིན་ནོ། །དེའི་དྭངས་ཆ་ལས་སྤྱན་དང་མངོན་ཤེས་ཅུང་ཟད་འཆར་རོ། །ཡང་སྔ་མ་དེའི་སེམས་ཀྱི་དངོས་གཞི་བརྟན་པའི་ཉེར་བསྡོགས་རྟོག་པ་མེད་ལ་དཔྱོད་པ་ཙམ་དང་བཅས་པ་ནི་སྦྱོར་བ། དེའང་གསལ་སྟོང་དུ་ཤེས་པའི་དྲན་རྟོག་ཕྲ་མོའང་མེད་ཀྱང་ཉམས་མྱོང་གི་འཛིན་པ་དང་བཅས་པའི་གསལ་སྟོང་སྐྱེས་པ་ནི་དངོས་གཞི་སྟེ། བསམ་གཏན་གཉིས་པའི་ཏིང་འཛིན་ནོ། །ཡང་དེའི་སེམས་ཀྱི་དངོས་གཞི་བརྟན་པའི་ཉེར་བསྡོགས་ལས་རྟོག་དཔྱོད་གཉིས་ཀ་མེད་པའི་སྟོང་པ་ཁྱད་པར་ཉིད་སྐྱེས་པ་དངོས་གཞི། བསམ་གཏན་གསུམ་པའིའོ། །ཡང་སྔ་མའི་སེམས་ཀྱི་དངོས་གཞི་བརྟན་པའི་ཉེར་བསྡོགས་ལས། བདེ་གསལ་མི་རྟོག་པའི་དགའ་བདེ་སྔོན་ལས་ཆེས་ལྷག་པར་སྐྱེ་བ་ནི་བསམ་གཏན་བཞི་པའི་དངོས་གཞི་སྟེ། དེ་རེ་རེ་ལའང་གོམས་ཚུལ་གྱི་རིམ་པས་གཟུགས་ཁམས་ཀྱི་ལྷའི་གནས་རིས་གསུམ་གསུམ་ལ་སྐྱེ་བའི་རྒྱུ་བྱེད་དེ་སོ་སོའི་སྐྱེ་བོའི་གནས་བཅུ་གཉིས་ཏེ་འབྲས་ཆེ་མན་ཆད་དོ། །འབྲས་བུ་ཆེ་བའི་དགའ་བདེའི་རང་བཞིན་དེ་ཉིད་ཞི་གནས་རྐྱང་པར་གོལ་ཞིང་གཏིང་གསལ་གྱི་མདངས་མ་རྙེད་ན་དབང་པོའི་ཡུལ་རྒྱུན་འགགས་ནས་རྣམ་པར་རྟོག་མི་རྟོག་གཉིས་ཀའི་དྭངས་ཆ་འགག་སྟེ། གཟུགས་མེད་དུ་འཕེན་ལ། དེ་ཡང་གསལ་ཆ་འགག་པའི་ཤེས་པ་ནམ་མཁའ་ལྟར་སྟོང་ལ་མ་དགག་ཙམ་གྱི་ངོ་བོ་ཉིད་ལ་གོམས་པ་ནི་ནམ་མཁའ་མཐའ་ཡས་ཀྱི་སྐྱེ་མཆེད་དོ། །དེའི་ངང་ལ་གོམས་པས་རྣམ་ཤེས་ཀྱི་ངོ་ན་སེམས་ཙམ་པའི་གསལ་སྣང་མཐའ་ཡས་པ་ཡིད་ལ་བྱེད་ཀྱང་ཚོགས་དྲུག་གི་དྭངས་ཆ་མ་འགག་པར་བསྟན་པ་ལས་རྣམ་ཤེས་མཐའ་ཡས། དེ་ལྟར་གོམས་པ་ལས་སེམས་ཙམ་དུ་ཤེས་པའི་ཚོར་བ་ཕྲ་མོ་དེའང་ནུབ་ནས་གང་དུའང་མི་མཐོང་བ་ནི་ཅི་ཡང་མེད་པའི་སེམས། དེ་ལྟར་ཅི་ཡང་མེད་པ་ཙམ་དུ་འཛིན་པའི་སེམས་དེ་ཡང་ཡོད་མེད་གང་དུའང་མ་གྲུབ་པར་ཡིད་ལ་མི་བྱེད་པ་མི་སྟུག་པོར་འབྱམས་པ་ནི་ཡོད་མིན་མེད་མིན་གྱི་སྐྱེ་མཆེད་དེ་སྲིད་རྩེའི་སེམས་སོ། །དེ་རྣམས་གང་ལ་གོམས་པ་དེའི་ངང་དུ་ཤི་ནས་དེར་སྐྱེ་བ་ཡིན་ནོ། །འགོག་པ་ནི། བདེ་སྡུག་གི་ཚོར་བ་དང་འདུ་ཤེས་བཀག་པས་འགོག་པའི་ཏིང་ངེ་འཛིན་ཐོབ་པ་ཡིན་ཏེ། སེམས་བྱུང་ལྔ་བཅུ་དང་རྟོག་ཚོགས་བརྒྱད་ཅུ་སོགས་གཏན་འགགས་པའི་རུམ་དུ་རིག་ཆའི་ཡོན་ཏན་བག་ལ་ཞ་སོང་བ་ཡིན་ནོ། །དེ་ཡང་བློས་དཔྱད་ནས་བརྟགས་པས་འགོག་པ་དང་། རྟོག་བྲལ་གྱི་ངང་ལ་བཞག་པ་བརྟག་མིན་གྱི་འགོག་པའོ། །འབྲས་བུ་ཆེ་བའི་བསམ་གཏན་མན་ཆད་དེ་ཤེས་རབ་ཀྱི་ལམ་སྟེགས་ཙམ་དུ་མངོན་དུ་བྱེད་ཀྱང་རྣམ་པར་སྣང་བ་དེ་ཉིད་ཡང་དག་པའི་ལྷག་མཐོང་རྣམ་པར་མི་རྟོག་པས་ཟིན་ནས་གྲོལ་བ་ནི་འཕགས་པ་རྣམས་ཀྱི་ཁྱད་ཆོས་སོ།། །། ༈ སློབ་དཔོན་ཀླུ་སྒྲུབ་ཀྱིས་མཛད་པའི་འཇམ་པའི་རྡོ་རྗེའི་སྒྲུབ་ཐབས་བློ་གྲོས་འཕེལ་བ་ལས། པདྨ་འདབ་བརྒྱད་སེར་པོ་དབུས་དཀར་པོར་བྱས་ལ། དེའི་སྟེང་དུ་ལྷུང་བཟེད་དུ་ཤེས་རབ་འཕེལ་བར་བྱེད་པའི་རྫས། དབང་པོ་ལག་པ། གླ་རྩི། གི་ཝང་། སྤང་རྒྱན་དཀར་པོ་རྣམས་བ་དམར་མོའི་འོ་མས་སྦྲུས་ཏེ་རིལ་བུ་སྲན་མ་ཙམ་བྱའོ། །དེའི་སྟེང་དུ་འཇམ་དཔལ་དང་དབྱངས་ཅན་མ་གཉིས་ཀ་ཞལ་སྦྱོར་གྱི་ཙཀླི་གཅིག་གཞུག་པར་བྱའོ་དང་། སྒྲུབ་པའི་ཚད་ཞག་བདུན་དུ་བྱའོ། །རྟགས་ནི་འོད་དང་སྒྲ་ལ་སོགས་པ་འབྱུང་ངོ་། །ཞག་བརྒྱད་ན་དཀྱིལ་འཁོར་གྱི་ལྷ་རང་དང་རིལ་བུ་ལ་བསྟིམ། རིལ་བུ་དེ་སྒྲུབ་པ་པོས་ཟོས་པས་འཇམ་པའི་དབྱངས་དང་ཤེས་རབ་མཉམ་པར་འགྱུར་རོ། །ཐུན་མོང་ཚེ་ཡི་དངོས་གྲུབ་ཀྱང་ཐོབ་སྟེ། དེ་ལྟར་ཡང་། འདི་ཟོས་ཡོན་ཏན་བསམ་མི་ཁྱབ། །ལོ་བརྒྱ་ཐུབ་པ་བརྒྱད་བརྒྱར་འགྲོ། །དགུ་བཅུ་ལོན་པ་བཅུ་དྲུག་ལྟར། །སྐྲ་དཀར་བུད་ནས་ནག་པོར་འགྱུར། །བང་ནི་རྟ་དང་མཉམ་པར་འགྱུར། །སྐྲ་ནི་མེ་ཏོག་པདྨ་འདྲ། །ལུས་ནི་དཀར་ལ་སྦོམ་པར་འགྱུར། །ཉམས་སྟོབས་ལུས་ཟུང་འཕེལ་བར་འགྱུར། །ལྷ་འདྲེ་རྣམས་ཀྱིས་སྟོང་གྲོགས་བྱེད། །ཡོན་ཏན་སྨོན་འཇུག་སེམས་དང་ལྡན། །སེམས་བསྐྱེད་དེ་དང་ལྡན་པ་ཡི། །སྐྱེས་བུ་དེ་ནི་དམ་པ་ཡིན། །ཡོན་ཏན་དེ་དང་ལྡན་ཞེས་སྨྲ། །ཞེས་འབྱུང་ངོ་། །འདིའི་བདག་བསྐྱེད་འཇམ་དབྱངས་དམར་པོ། རིལ་བུ་དབྱངས་ཅན་མ་དཀར་པོད་རལ་ཅན། མོར་བསྐྱེད་སྣང་། ། ༈ འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས་བརྒྱ་རྩ་བརྒྱད་པ་ལས། ཐུགས་རྗེ་ཆེན་པོ་ནམ་མཁའ་མཛོད་སེར་པོའི་སྒྲུབ་ཐབས་ལས། གཙོ་བོ་སྐུ་མདོག་སེར་པོ། ཡིད་བཞིན་གྱི་ཤིང་ལ་སྐུ་རྒྱབ་བརྟེན་པ། གཡོན་པདྨོ་འཛིན་ཅིང་། གཡས་ནོར་ཐམས་ཅད་སྦྱིན་པ་མཛད་པའི་གཡས་སུ་འཕགས་པ་ནོར་འཕེལ་རྔ་ཡབ་ཐོགས་ནས་ནོར་གྱི་རྒྱུན་འབེབས་པ་དང་། གཡོན་དུ་ལྷ་མོ་ནོར་སྦྱིན་མ་དམར་མོ་རིལ་པ་འཛིན་པ་ནོར་བུ་དམར་པོའི་ཕྲེང་བས་བརྒྱན་པ། སྔགས་ནི། ཨོཾ་ཨཱཿཧྲཱིཿཧཱུྃ། ཚད་འབུམ་ཕྲག་ལྔ་བཟླས་ནས་རང་གི་བདོག་པ་ཐམས་ཅད་སྦྱིན་པ་བཏང་ན་བསོད་ནམས་ཀྱི་སྤྲིན་ལས་འདོད་དགུའི་ཆར་ཆེན་འབེབས་པར་བྱེད་དོ། ། ༈ འཕགས་པ་ཐུགས་རྗེ་ཆེན་པོ་ལུས་ཀྱི་འཁོར་ལོ་འབར་བ་ལས་སྙིང་གར་པདྨ་འདབ་མ་བཞི་པའི་ཕྱི་རོལ་ཏུ་རྩིབས་དྲུག་དང་ལྡན་པའི་འཁོར་ལོ། དབུས་དང་འདབ་མ་བཞི་ལ། འཇིག་རྟེན་དབང་ཕྱུག །གཏི་མུག་རྡོ་རྗེ་སོགས་བཞི། རྩིབས་དྲུག་ལ་འགྲོ་བ་རིགས་དྲུག་གི་རྣམ་པར་དག་པ་འགོད་པར་བྱ་སྟེ། ལྷ་རིགས་རྣམ་དག་འཆི་འཕོ་མེད། །དབང་པོ་རྡོ་རྗེ་གུར་གུམ་མདོག །མེ་ཏོག་ཕྲེང་བའི་ཆུན་པོ་འཛིན། །དྲེགས་པ་མ་ལུས་སྤངས་པའོ། །ཨ། ལྷ་མིན་རྣམ་དག་འཁྲུགས་པ་མེད། །དྲག་པོ་རྡོ་རྗེ་རྒྱ་སྐྱེགས་མདོག །རལ་གྲི་དང་ནི་འཁོར་ལོ་འཛིན། །ཕྲག་དོག་མ་ལུས་ཀུན་སྤངས་པའོ། །ཨི། མི་ནི་རྣམ་དག་བྲེལ་ཕོངས་མེད། །དབང་ཕྱུག་རྡོ་རྗེ་རྫ་གསར་མདོག །རྡོ་རྗེ་དང་ནི་དྲིལ་བུ་འཛིན། །རྣམ་པར་གཡེངས་པ་ཀུན་སྤངས་པའོ། །ཨུ། དུད་འགྲོ་རྣམ་དག་བླུན་རྨོངས་མེད། །སེང་གེ་རྡོ་རྗེ་དུ་བའི་མདོག །དགྲ་སྟྭ་དང་ནི་དབྱུག་པ་འཛིན། །བག་མེད་བཏུལ་བ་ཀུན་སྤངས་པའོ། །ཨེ། ཡི་དྭགས་རྣམ་དག་སེར་སྣ་མེད། །གཤིན་རྗེ་རྡོ་རྗེ་ཆར་སྤྲིན་མདོག །ཐོད་པ་དང་ནི་ཞགས་པ་འཛིན། །འཇུངས་པའི་སྲེད་པ་ཀུན་སྤངས་པའོ། །ཨོ། དམྱལ་བ་རྣམ་དག་ཚ་གྲང་མེད། །འཇིགས་སྐྱོབས་རྡོ་རྗེ་བྱེ་རུའི་མདོག །བུམ་པ་དང་ནི་ལྷུང་བཟེད་འཛིན། །མི་ཟད་ཡང་ཡང་ཀུན་སྤངས་པའོ། །ཞེས་སྣང་བ་འདི་ཐུབ་པ་དྲུག་དང་གཅིག་པར་འདུག་གོ ། ༈ བསམ་གྱིས་མི་ཁྱབ་པའི་མཆོད་པའི་ཆོ་ག་གཞུང་དང་གསལ་བྱེད་ལྟར་བཤད་ན། གཙང་མའི་གནས་སུ་མེ་ཏོག་སོགས་ཅི་འབྱོར་པའི་མཆོད་པ་དགྲམ། རང་སྐད་ཅིག་གིས་འཕགས་པ་སྤྱན་རས་གཟིགས་རྒྱལ་མཚན་རྩེ་མོ་གསེར་མདོག་ཞལ་གཅིག་ཕྱག་གཉིས་པ། གཡས་མཆོག་སྦྱིན་ལས་མཆོད་པའི་ཆར་ཆེན་པོ་འབེབས་ཤིང་། གཡོན་པདྨོ་རྒྱས་པ་འཆང་བ། མཆོད་པའི་སྤྲིན་རྒྱ་མཚོའི་དབུས་ན་བཞུགས་ཤིང་ཡོ་བྱད་ནམ་མཁའི་མཛོད་ལ་མངའ་བརྙེས་འཁོར་ལོས་སྒྱུར་བའི་རྒྱལ་པོའི་ངང་ཚུལ་ཅན་དུ་གསལ་བར་གྱུར། །ཨོཾ་བཛྲ་པུཥྤེ་ཨཱཿཧཱུྃ། དེ་བཞིན། དྷཱུ་པེ་ནས་ཤབྡའི་བར་དང་། མཎྜལ་སྦྱར་བས་བྱིན་རླབས། ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། བླ་མ་དཀྱིལ་འཁོར་ལྷ་ཚོགས་སོགས། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །ཞེས་ཕྱག་འཚལ་བ་སྔོན་དུ་འགྲོ་བས། རང་གི་ཐུགས་ཀའི་ཧྲཱིཿལས་མཆོད་པའི་ལྷ་མོ་ཁ་དོག་སྣ་ཚོགས་པ་བསམ་གྱིས་མི་ཁྱབ་པ་རེ་རེ་ལས་ཀྱང་དཔག་ཏུ་མེད་པའི་སྤྲིན་འཕྲོ་བ་སྤྲོས་ནས་བསྙེན་བཀུར་བར་བསམས་ལ། རང་བཞིན་སྟོང་པ་ཉིད་ཅན་གྱི། །སྣ་ཚོགས་མེ་ཏོག་བསམ་མི་ཁྱབ། །རྒྱལ་མཚན་རྩེ་མོའི་རིག་པ་ཡིས། །སྤྲུལ་ནས་འཕགས་ཚོགས་མཆོད་པར་བྱ། །ཨོཾ་ན་མོ་བྷ་ག་ཝ་ཏེ་མ་ཧཱ་ཀ་རུ་ཎི་ཀ་པུཥྤེ་པཱུ་ཛ་མེ་གྷ་ས་མུ་དྲ་ཀེ་ཏུ་རཱ་ཛ་ཡ། ཏ་ཐཱ་ག་ཏཱ་ཡ། ཨརྷ་ཏེ་ས་མྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ། པུཥྤེ། པུཥྤེ། པུཥྤ་ཨུཏྦྷ་ཝེ། པུཥྤ་ཨ་བ་ཀཱི་ར་ཎེ་སྭཱ་ཧཱ། ཞེས་པའི་རིག་པ་འདི་ལན་གསུམ་དུ་བརྗོད་ཅིང་འབུལ། དེ་བཞིན་དུ་མེ་ཏོག་གི་གནས་སུ་བདུག་སྤོས་དང་། པུཥྤ་དང་པུཥྤེ་གནས་སུ་དྷཱུ་པེ་དང་དྷཱུ་པེ་སོགས་སྦྱར་བས་མཚོན། ཉེར་སྤྱོད་ལྔ་དང་། རོལ་མོ་མཎྜལ་བཅས་འབུལ། ཐོག་མ་མེད་ནས་ད་ལྟའི་བར། །ཞེས་སོགས་སྡིག་པ་བཤགས་པས་མཚོན་ཡན་ལག་ལྷག་མ་རྣམས་ཀྱང་བྱས་ཏེ། བདག་དང་སེམས་ཅན་ཐམས་ཅད་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་ཏེ་མྱུར་དུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །ཅེས་གསོལ་བ་གདབ་རྗེས་ཚོགས་ཞིང་རྣམས་མི་དམིགས་པར་བལྟས་ལ་དེ་ཁོ་ན་ཉིད་རྗེས་སུ་དྲན་པས་དགེ་བའི་རྩ་བ་སངས་རྒྱས་ཀྱི་སར་བསྔོའོ། །ཕན་ཡོན་ནི། མི་ཕྱེད་གུས་པ་མང་ལྡན་པས། །གཟུངས་འདི་ལན་གསུམ་ཆོ་ག་འདིས། །ཉིན་རེ་དུས་གསུམ་མཆོད་བྱེད་ན། །བྱེ་བ་བསམ་མི་ཁྱབ་མཆོད་འགྱུར། །ཞེས་སོ། ། ༈ ལུས་ཀྱི་འཁོར་ལོ་བཅིངས་གྲོལ་གྱི་མན་ངག་ལས། ཐུགས་རྗེ་ཆེར་ཁྲོས་བཞད་པའི་ཞལ། །རྡོ་རྗེའི་ཁྱུང་གཤོག་མཐིང་ག་ཅན། །ཞེས་གཤོག་པ་བཤད། ། ༈ དཔལ་རྡོ་རྗེ་ཐོད་པའི་དངོས་གྲུབ་སྒྲུབ་ཐབས་ལས། བློ་ལྡན་ཆོ་ག་བཟང་ཤེས་པས། །བདེ་ཆེན་དངོས་གྲུབ་སྟེར་བའི་ཕྱིར། །ཀ་པཱ་ལ་འདྲའི་གནས་སུ་ནི། །ཀ་པཱ་ལ་ཡི་དངོས་གྲུབ་བསྒྲུབ། །ཅེས་ཐོད་སྒྲུབ་ཀྱི་མན་ངག་བཤད་ཅིང་། དེའང་མཚན་མ་བཟང་པོའི་ཐོད་པ། ག་བུར་ཙནྡན་གླ་རྩི་སོགས་དྲི་བཟང་པོས་བྱུགས་པར་དཀྱིལ་འཁོར་བྲི། ལྔ་ཚན་ལྔ་དང་རིང་བསྲེལ་སྙིང་པོར་གཞུག་པ་སོགས་ཆོ་ག་རྒྱས་པར་བཤད་དོ། ། ༈ ཐུགས་རྗེ་ཆེན་པོ་རྔ་སྒྲའི་སྒྲུབ་ཐབས་ལས། འདབ་ཆགས་ང་རོ་ཆེན་པོའི་ལོ། །སྐར་མ་རྒྱལ་ལ་བབས་པའམ། །ཡང་ན་དབྱར་གྱི་སྒྲ་སྒྲོགས་དུས། །མཁས་པས་རྔ་ཆེན་བཅོས་པར་བྱ། །ཙནྡན་སྡོང་བུ་དཀར་དམར་རམ། །སྒྲ་སྒྲོགས་ཤིང་དང་སྙན་པའི་འདབ། །སེང་ལྡེང་གླང་སྣ་བུ་འབོད་དང་། །ཏི་ཏི་ར་སྔོ་རྒྱུ་ཡིན་བརྟག །ཉི་མ་ཤར་དང་ཟླ་བ་ཤར། །སྲོད་ཀྱི་དུས་ལ་བབས་པ་ན། །གླ་རྩི་ག་བུར་གུར་གུམ་བྱུག །རྡོ་རྗེ་ཁྲོས་པས་བགེགས་ཚར་བཅད། །བྱམས་པའི་ཉི་མ་གང་ལ་བབས། །ཁྲི་སྙན་མོ་ཡིས་པགས་པ་སྦྱངས། །ནམ་མཁའི་སྒྲ་གསང་སྒྲོགས་པ་ན། །ལྷོ་རུ་ཁ་བལྟས་གཡོགས་པར་བྱ། །དེ་ནས་དྲི་མཆོག་དམ་ཚིག་ཅན། །བདུད་རྩི་ལག་པར་ལེགས་བྱུགས་ལ། །དབང་ཐོབ་ལྷ་བཟོ་སྐད་མཐོན་པོས། །སྒྲ་དབྱངས་མགོན་པོ་བྲི་བར་བྱ། །དབུས་སུ་པདྨོ་དམར་བཞིའི་སྟེང་། །གཞོན་ནུའི་མདངས་རྒོད་ང་རོ་བཅིངས། །ཕྱག་གཉིས་རིན་ཆེན་རྔ་ཆེན་བརྡུང་། །ཟླ་བའི་མདོག་ཅན་བརྗིད་པའོ། །ཤར་སོགས་འདབ་བཞིར་གྲགས་ཆེན་དང་། །འབྲུག་སྒྲ་སྙན་པའི་དབྱངས་ཅན་དང་། །ང་རོ་མི་ཟད་གནོད་སྦྱིན་བཞི། །ཕྱོགས་ཀྱི་ཁ་དོག་ཇི་བཞིན་གནས། །བརྩོན་པའི་ཆ་བྱད་ཅན་གྱིས་སྤྲད། །ཕྱག་བཞི་དུང་དཀར་ཀཱ་ལ་ཧཱ། །དྲིལ་བུ་དང་ནི་གཎྜི་ཐོགས། །མིག་དམར་དགའ་བ་ཁྲོས་པའི་ཚུལ། །དེ་མཐར་འཁོར་ལོ་བརྒྱད་རྩིབས་རིས། །བཀྲ་ཤིས་བརྒྱད་འཛིན་ལྷ་མོ་བརྒྱད། །ཤིན་ཏུ་སྒེག་མཛད་དུལ་བའི་ཚུལ། །འཛུམ་པའི་མདངས་དཀར་སྣ་ཚོགས་མདོག །མུ་ཁྱུད་རྡོ་རྗེའི་སྤྲིན་འཁྲིགས་པ། །འུར་འུར་སྐད་འབྱིན་འཇིགས་པ་དང་། །གློག་རྒྱན་ཕྲེང་བས་མཛེས་པ་ནི། །མཁས་པ་ཏིང་འཛིན་ལྡན་པས་བྲིས། །དེའི་འོག་ཏུ་ཇི་སྐད་བསྔགས་པའི་སྐབས་ནས་ཡེ་ཤེས་ཀྱི་འཁོར་ལོ་ཅན་གྱི་རྔ་བཀུག་ནས་རོལ་མོ་ལ་སོགས་པའི་མཆོད་པས་མཉེས་པར་བྱས་ནས་རྗེས་སུ་གཞུག་པར་བྱའོ། །དེ་ནས་ལྟེ་བ་མུ་ཁྱུད་ཀྱི་ནང་གི་ཁྱུད་ཀོར་དུ་ཡི་གེ་ཆེན་པོ་ལྔ་དང་ཉེ་བའི་ཡི་གེ་ལྔ་བཅུ་བྱང་ཆུབ་ཀྱི་སེམས་གཉིས་འདྲེས་པ་བྲི་ཞིང་། སྔགས་དེ་ཉིད་སྒྲ་ཆེན་པོས་ལན་བདུན་དུ་བཀླགས་ལ་རོལ་མོ་གསིལ་བ་དང་བྲོ་བརྡུང་བར་བྱའོ། །དེ་རྗེས་མཁས་པས་བརྒྱ་བྱིན་གྱི། །ལག་པ་འདྲ་བའི་འཁྲུལ་འཁོར་གྱིས། །རྩོལ་བ་སྤངས་ནས་རྔ་བརྡུང་ཞིང་། །བདག་ཉིད་རྣལ་འབྱོར་བརྩོན་པས་བྱ། །སྒྲུབ་པ་པོ་ཡི་ངག་མེད་ཀྱང་། །ཇི་ཙམ་བསྙེན་པའི་མཚན་བཤད་སྔགས། །དེ་ཡི་ཕྱེད་གཉིས་འགྲུབ་པར་ནི། །ངེས་པར་ཐེ་ཚོམ་མི་བྱའོ། །དེའི་འོག་ཏུ་གཡུལ་བཟློག་པའམ། །གྲགས་པ་མཐོ་འདོད་དེ་བཞིན་གཞན། །ཐམས་ཅད་སྙིང་རྗེ་མ་བྲལ་བས། །རྔ་འདི་བརྡུང་བ་ཙམ་གྱིས་འགྲུབ། །འཇིག་རྟེན་གསུམ་གྲགས་མཐའ་ཡས་པ། །ཐུགས་རྗེ་ཆེན་པོས་ཉིད་སྤྲུལ་པ། །རྔ་ཆེན་རྒྱལ་པོ་བརྟག་པའི་ལས། །དོན་ཀུན་སྒྲུབ་པར་བྱེད་པ་ཡིན། །ཞེས་སོ། ། ༈ སྲུང་སྐུད་ཀྱི་ཆོ་ག་ལས། །འཕགས་པ་སྤྱན་རས་གཟིགས་ལ་དད་པ་ཐོབ་པས། ཚོར་བས་གཟིར་བ་དང་། གདོན་གྱིས་གླགས་བཙལ་བ་དང་། རྐུན་པོ་དང་དགྲས་འཇིགས་པའི་ནུས་པའི་དབང་བ་བསྲུང་བ་ལ་སོགས་པའི་དོན་དུ་སྙིང་རྗེ་ཆེན་པོས་སྲུང་སྐུད་བཅིང་བར་བྱའོ། །འཁོར་ལོ་རྡོ་རྗེ་རིན་ཆེན་དང་། །པདྨོ་སྣ་ཚོགས་ཁ་དོག་ཅན། །རས་དང་དར་དང་བལ་དང་བཅས། །པདྨའི་སྐུད་པ་ཤིན་ཏུ་བསྔགས། །སོགས་གསུངས་ཏེ། གཞོན་ནུ་ཕོ་མོས་བཀལ་བའི་སྲད་བུ་པདྨ་འདབ་བརྒྱད་ཀྱི་དབུས་སུ་བཞག་ནས་སྦྱང་བ་སོགས་བྱ། དེ་ནས་རང་འཇིག་རྟེན་དབང་ཕྱུག་སྲད་བུ་དང་པདྨོ་བསྣམས་པར་བསྐྱེད་ནས། མདུད་པ་གསུམ་བྱས་ལ། སོ་སོར་གསང་བ་གསུམ་གྱིས་འོད་ཕྱུང་བས་སྒོ་གསུམ་སྲུང་བའི་ནུས་ལྡན་དུ་བསམས་ལ། ཨོཾ་ཨཱཿཧྲཱིཿཀཱ་ཡ་བཛྲ་ཀྵ་ཡ་ཀཎྛ་ཧཱུྃ། དེ་བཞིན། ཝཱ་ཀ་དང་། ཙིཏྟ་སྦྱར་བས་སྔགས། དམ་ཚིག་གི་སྲད་བུ་འོད་ལྔ་འབར་བར་བསམས་ལ་བསྒྲུབ་བྱའི་མགུལ་ལམ་དཔུང་པ་ལ་བཅིངས་པར་གསུངས། ། ༈ ཚེ་འདས་ལ་བྱ་བའི་ཆོ་གར། སྙིང་རྗེ་ཆེན་པོ་ཡིད་གཞུང་པས། །སྤྱན་རས་གཟིགས་དཔལ་བསྙེན་བྱས་ཏེ། །ལུས་ཅན་མི་འདོད་བཞིན་དུ་ལྷུང་། །དེ་དག་ངན་འགྲོ་བཟློག་པར་བྱ། །སྔོན་ནས་སྦྱངས་པ་ཉིད་དང་ནི། །གཞན་དག་གློ་བུར་བྱ་བ་ཉིད། །དེ་བཞིན་ཕྱི་ནས་གཞན་གྱིས་ཏེ། །མཆོག་དང་ཕ་མཐའ་གྲངས་བཞིན་འདོད། །ཅེས་རབ་རང་བྱིན་རླབས་ཀྱི་སྦྱོར་བས་འཕོ། འབྲིང་གློ་བུར་བདག་ལ་འོད་ཀྱི་སྦུ་གུས་སྦྱོར་བའི་འཕོ་བ་དག་བཤད་ནས་ཐ་མ། དེ་ལྟར་རིང་ནས་ལམ་གོམས་པའི། །བློ་ལྡན་དུས་ལས་འདས་གྱུར་ཚེ། །འཕགས་པ་ངན་སོང་སྦྱོང་དཔལ་གྱི། །ཆོ་ག་བདུན་ཕྲག་བདུན་དུ་སྦྱངས། །རོའམ་རུས་པ་གོས་སམ་མིང་། །རྟེན་དེའི་མདུན་དུ་བཞག་ནས་སུ། །མ་དག་པ་དང་དག་པ་ཡི། །དཀྱིལ་འཁོར་གཉིས་ལ་རྟེན་གཉིས་བཞག །བརྡེག་དང་བསྲེག་དང་བཀྲུ་བ་ཡིས། །དྲི་མ་གཞིག་གཞོམ་དད་པ་དག །དཀྱིལ་འཁོར་ནག་པོ་བྱ་བས་ཏེ། །བསྟན་དང་དབང་བསྐུར་བྱ་བ་ལའོ། །ཡུངས་ཀར་བྱེ་མ་ཐལ་ཆེན་ལ། །རིམ་པར་བཟླས་ནས་བསྣུན་བྱ་ཞིང་། །སྦྱིན་སྲེག་ཆོ་གའི་བྱ་བ་ཡིས། །རྟེན་བཅས་བག་ཆགས་འབད་དེ་བསྲེག །ངན་སོང་སྦྱོང་བའི་སྐུ་གསུང་ཐུགས། །བཞུ་བའི་ཆུས་བཀང་བུམ་པ་བླུགས། །རྡོ་རྗེའི་གླུ་བླངས་རིམ་པ་བཟླ། །མ་ལུས་དྲི་མ་བཀྲུ་བར་བྱ། །ཨོཾ་ཨཱཿཧྲཱིཿསརྦ་དུརྒ་ཏི་པ་རི་ཤོ་དྷ་ནེ་རཱ་ཛ་ཡ། ཨ་མུ་ཀེ་ཀཱ་ཡ། ཝཱ་ཀ་ཙིཏྟ་སརྦ་པ་པཾ་ཏོ་ཥ་ཝ་ར་ཎ་བྷཾ་ག་བྷཾ། ཌ་ཧ་ཌ་ཧ། བཱ་རཙྪ་བཱ་རཙྪ། ཤོ་དྷ་ཡ་ཤོ་དྷ་ཡ་ཕཊ་ཕཊ་སྭཱ་ཧཱ། དེ་རྗེས་དྲི་མ་དག་པའི་སེམས། །ལྷག་པའི་ལྷ་ལ་བཅུ་གནས་ནི། །ཇི་སྲིད་དབང་བསྐུར་བྱས་ཏེ་མཆོད། །དགའ་སྟོན་ཆེན་པོ་སྦྱིན་པར་བྱ། །ཞེས་སོ། ། ༈ བཀྲ་ཤིས་ཀྱི་ཆོ་ག་ལས། བཀྲ་ཤིས་བཟང་དང་བཀྲ་ཤིས་ནོར་འབྲུ་སྨན། །བཀྲ་ཤིས་མཆོད་རྫས་དང་ནི་བཀྲ་ཤིས་རྒྱན། །དཔལ་ལྡན་བཀྲ་ཤིས་དཀྱིལ་འཁོར་ཆེར་བྲི་ལ། །བཀྲ་ཤིས་རྒྱལ་པོ་སྤྱན་རས་གཟིགས་དབང་དགུག །གང་དག་གང་གི་ཕྱིར་དང་གང་དུ་ཇི་ལྟར་བྱ་བའི་རང་བཞིན་ཐམས་ཅད་ལ་བཀྲ་ཤིས་ཞེས་སྦྱར་རོ། །ཤིས་པ་བརྗོད་པའི་དབྱངས་དང་སེམས་དང་རྗེས་སུ་མཐུན་པའི་རོལ་མོ་དང་གླུས་མཆོད་དོ། །མེ་ཏོག་དཀར་དམར་དང་ཙནྡན་དཀར་དམར་དང་རྒྱན་དང་དྲིའི་ཁྱད་པར་ངེས་པའོ། །ཡོ་བྱད་གློ་བུར་དང་གསར་དུ་སྐྱེས་པ་མཐའ་དག་ལ་རྒྱལ་བར་གྱུར་པའི་ཚིག་སྔོན་དུ་སོང་བས་སོ། །སྦྱིན་བདག་གམ་སློབ་མའི་ལུས་བཀྲུས་ལ་བཀྲ་ཤིས་ཀུན་ཏུ་སྣང་བའི་རྒྱས་གདབ་བོ། །སིཌྷཽ། འདི་རྣམས་གྲུབ་པ་བརྙེས་པའི་སློབ་དཔོན་པཎྜི་ཏ་ཆེན་པོ་ཨ་ཛི་ཏ་མི་ཏྲ་གུཔྟས་མཛད། །རྣལ་འབྱོར་གྱི་དབང་ཕྱུག་མི་ཏྲ་ཛོ་ཀི་དང་། ཁྲོ་ལོའི་འགྱུར་རོ། །ཨ་ཏི་སཱ་དྷུ་སཱ་དྷུ་པཱ་ཤྱ་ཧོཿ ། ༈ རྣམ་འཇོམས་ཀྱི་ཁྲུས་ཆོག་གི་འགྲེལ་པ་སློབ་དཔོན་རྡོ་རྗེ་གོ་ཆས་མཛད་པ་ལས། དེའི་ནང་དུ་དགང་བ་ནི། ཆུ་ཡིས་ཞེས་པ་སྨོས་ཏེ། ཙནྡན་དང་གུར་གུམ་ལ་སོགས་པའི་སྤོས་ཆུས་བཀང་སྟེ། དེ་དང་ལྷན་ཅིག་ལྡན་པའི་རིན་པོ་ཆེ་ནི་ཤེལ་དང་རྡོ་རྗེ་ཞེས་པ་དངོས་སུ་ཟད། ནོར་བུ་ཞེས་པ་སྤྱིའི་ཚིག་ཏུ་སྨོས་ཏེ། རྣམ་པར་མ་ཕྱེ་བའི་པདྨ་རཱ་ག་དང་། ཨིནྡྲ་ནི་ལ་ལ་སོགས་པ་རིན་པོ་ཆེའི་རིགས་སུ་གཏོགས་པ་དང་། མུ་ཏིག་དང་ས་ལེ་སྦྲམ་ལ་སོགས་པ་སྟེ། དེ་དག་གས་ཆག་མེད་པ་རྒྱན་གྱི་བྱ་བ་བྱེད་ནུས་པ་སྟེ་རིན་ཆེན་རྨ་མེད་ཅེས་བྱའོ། །གཞན་ཡང་དེའི་ཟླ་ལ་ཡུངས་ཀར་དང་། རྩ་དཱུརྦ་དང་། མེ་ཏོག་རྣམས་གཞུག་པར་བྱའོ། །ཞེས་དང་། ཡང་གོང་མའི་འབྲུ་དང་སྨན་ཞེས་བྱ་བ་ལ། བྱ་གྷྲི་དང་། སི་གྷྲི་ལ་སོགས་པའི་སྨན་རྣམ་པ་ལྔ་དང་། ཏིལ་དང་སྲན་མ་བ་ཤ་ཀ་ལ་སོགས་པའི་འབྲུ་སྣ་ཚོགས་རྣམས་རྒྱུད་ལས་གྲགས་པ་བཞིན་ནོ། །མགུལ་ཆིངས་གཙང་མའི་གོས་ཞེས་བྱ་བ་མ་སྤྱད་པ་མ་ཉམས་པའི་རས་དཀར་པོ་ཁ་ཚར་དང་བཅས་པའོ། ། ༈ སློབ་དཔོན་བྱང་ཆུབ་སྙིང་པོས་མཛད་པའི་གཟུངས་ཆོག་ལས། རིན་པོ་ཆེ་སྣ་ལྔ་དང་། འབྲུ་ལྔ་དང་། སྨན་ལྔ་དང་། སྙིང་པོ་ལྔ་དང་། སྤོས་དྲི་ཞིམ་པོ་བླུགས་ཏེ། ལྡུམ་བུས་ཁ་བརྒྱན་ལ་མགྲིན་པར་དཀྲིའོ། ། ༈ ཛ་ཡ་ཝ་རྨས་མཛད་པའི་དཀྱིལ་ཆོག་ལས། འབྲུ་སྨན་རིན་ཆེན་ལྔར་ལྡན་པས། །བཟང་པོའི་ཤིང་གིས་ཁ་བརྒྱན་ནས། །ཀུ་ཤའི་སྟན་ལ་ཡང་དག་བཞག །ཅེས་འདིའི་དབང་ཆོག་པད་དཀར་གྱི་དཀྱིལ་ཆོག་དང་མཐུན་པར་སྣང་། ། ༈ བྲམ་ཟེ་མ་ཎི་བཛྲས་མཛད་པའི་ལས་བཞི་སྒྲུབ་པའི་ཆོ་ག་ལས། ལས་སུ་བྱ་བ་ཆུ་དང་འབྲེལ་བས་བཀྲུ་བ་ཞེས་པ་དེང་སང་ཛྭ་ཆུ་བཀོལ་བ་དང་གྲགས་པའི་དབྱིབས་ལྟ་བུ་ཞིག་སྣང་། འོན་ཀྱང་ཏིང་ངེ་འཛིན་གྱི་མེས་བསྐོལ་བ་ལས་དངོས་སུ་བསྐོལ་བའི་གསར་ཁ་མེད། ཕན་ཡོན་ནི། གང་གི་ལུས་ལ་ཆུས་རེག་པ། །བགེགས་ཀྱི་གནོད་པ་ལས་གྲོལ་འགྱུར། །ཞེས་སོ། །པཎྜི་ཏ་ཛྙཱ་ན་ཤྲཱི་དང་། ལོ་ཙཱ་བ་རབ་ཞི་བཤེས་གཉེན་གྱི་འགྱུར་རོ། ། ༈ རྣམ་འཇོམས་གཟུངས་སྒྲུབ་གྲུབ་ཆེན་བྲམ་ཟེ་ཀུ་མཱ་ར་སེ་ནས་མཛད་པ། དེའི་སློབ་མ་སངས་རྒྱས་གསང་བ་དང་། དཔའ་མཉྫུ་ཤྲཱིའི་འགྱུར་ལས། ཁྲུས་ཀྱི་བུམ་པ་བཟང་པོ་བྱ། །དེ་ཡང་གསེར་སོགས་དག་ལས་འབྱུང་། །མཚན་ཉིད་ལྡན་དེར་ཆུ་ཀླུང་ཆུ། །འོ་མ་དྲི་ལྔ་སྨན་དང་འབྲུ། །རིན་ཆེན་སྙིང་པོ་མེ་ཏོག་བཅས། །ཤེལ་དང་ཕ་ལམ་མུ་ཏིག་དང་། །ཁ་རྒྱན་མགུལ་གསུམ་པ་ཡིས་བཅིངས། །དཱུཪྺ་བདུག་དང་ཀུ་ཤ་དང་། །རྨ་བྱའི་སྒྲོ་དང་རྡོ་རྗེར་ལྡན། །ལས་ཀྱི་ཆོ་ག་མཐོང་བ་ཡིས། །ལེགས་བྱས་བསྐྲད་ལ་སྒྲུབ་རྫས་ནི། །རིན་ཆེན་སྣོད་ཀྱི་སྟེང་དུ་གནས། །མཎྜལ་སྟེང་དུ་དེ་བཞག་ལ། །ཞེས་སོ། །འདིའི་ཆོ་ག་རྣམས་བྱ་བ་སྤྱིའི་ཆོས་སྐད་ཇི་བཞིན་པའོ། ། ༈ གཏོར་མའི་ཆོ་ག་སངས་རྒྱས་གསང་བས་མཛད་པ་ལས། །བར་ཆད་ཞི་དང་ཚོགས་བསགས་དང་། །འདོད་པ་ཐམས་ཅད་རབ་བསྒྲུབ་ཕྱིར། །ཟླ་བ་ཞག་དང་ཐུན་མཚམས་ལ། །ཡོ་བྱད་ཅི་འབྱོར་གཏོར་མ་བཏང་། །ཞེས་སོ། ། ༈ དེས་མཛད་པའི་ཁྲུས་ཀྱི་ཆོ་གར་བུམ་རྫས་ཀྱི་ངོས་འཛིན་གོང་གི་རྡོ་རྗེ་གོ་ཆའི་གསུངས་དང་མཐུན་ནོ། ། ༈ ཤ་བ་རི་པས་མཛད་པའི་དཀྱིལ་ཆོག་རིན་ཆེན་སྣང་བར། དངུལ་ལ་སོགས་པའི་བུམ་པར་ནི། །ནོར་བུ་ཡུངས་ཀར་དཱུཪྺ་དང་། །ཤེལ་དང་པདྨ་ཙནྡན་དང་། །གསེར་དང་རིན་ཆེན་ཆུས་དགང་བྱ། །ཞེས་སོ། ། ༈ རྣམ་འཇོམས་ཀྱི་ལས་སྒྲུབ་པའི་ཐབས་ཀྱི་ཆོ་ག་མགོན་པོ་བྱམས་པས་རྗེས་སུ་བཟུང་བའི་དཔལ་གདྒཱ་དྷ་རའི་སྲས་ཀྱི་ཐུ་བོ་བྲམ་ཟེ་མ་ཎི་བཛྲས་མཛད་པ་ལས། རང་ལྷའི་དམིགས་པ་གསལ་བ་དང་། །སྔགས་ཀྱི་བཟླས་པ་མཐར་ཕྱིན་པས། །རིག་སྔགས་༡ཐོགས་པ་མེད་པ་དང་། །ཕ་རོལ་སྡེ་ལས་༢རྒྱལ་བ་དང་། །སྐྲག་༣དང་མཐུ་སྟོབས་གཞིག་༤པ་དང་། །རིག་སྔགས་བཅད་༥དང་མནན་༦པ་དང་། །ལས་༧གཞོལ་ཕ་རོལ་ལས་གཞིག་༨དང་། །གདོན་བརླག་༩གདོན་ལས་གྲོལ་༡༠པ་དང་། །འབྱུང་༡༡པོ་དགུག་དང་མནན་༡༢པ་དང་། །ལས་རྣམས་མ་གྲུབ་སྤོགས་པ་༡༣དང་། །གྲུབ་པའི་འབྲས་༡༤བུ་མཐར་དབྱུང་དང་། །འདོད་འབྲས་དངོས་གྲུབ་༡༥བསྒྲུབ་པ་དང་། །སྲུང་༡༦དང་ཞི་དང་༡༧རྒྱས་༡༨པ་དང་། །རེངས་༡༩དང་རྨུགས་༢༠པར་བྱེད་པ་ཡི། །ཐུན་མོང་ཁྱད་པར་བདག་ཉིད་ཀྱི། །ཆོ་ག་ཉི་ཤུའི་སྦྱོར་བ་རྣམས། །ཇི་ལྟར་བླ་མའི་མན་ངག་ལས། །རྟོགས་པའི་རིམ་པ་གསལ་བར་བྱ། །ཞེས་རྒྱས་པར་བཤད་དོ། ། ༈ རྡོ་རྗེ་རྣམ་པར་འཇོམས་པའི་ལས་སྣ་ཚོགས་སྒྲུབ་པའི་ཆོ་ག་ཞེས་མཛད་བྱང་མེད་པ་ལས། སྡིག་༡པ་ཐམས་ཅད་ཞི་བ་ཏིལ་དང་མེ་ཏོག་དཀར་པོའི་སྦྱིན་སྲེག །སྡུག་བསྔལ་ཐམས་ཅད་༢ཞི་བ་ཁྲུས་གྱི་ཆོ་ག །དཔལ་༣འཕེལ་བ་འབྲས་བུ་དང་མེ་ཏོག་སེར་པོ་མངར་གསུམ་དང་བཅས་པའི་སྦྱིན་སྲེག །ཨིནྡྲ་བི་ཤོ་དྷ་ན་སྦྱར་བས་དབང་༤པོ་ཉམས་པ་གསོ་པའི་ཁྲུས་ཆོག །ཚེ་ཉམས་པ་༥གསོ་བ་དཱུཪྺ་དང་མེ་ཏོག་སེར་པོའི་སྦྱིན་སྲེག །ཕུན་སུམ་ཚོགས་པར་བྱེད་པ་འབྲུ་དང་མེ་ཏོག་སེར་པོའི་སྦྱིན་སྲེག །བུམ་བཟང་གཙང་མའི་ཆུས་བཀང་སྟེ། འབྲུ་སྨན་རིན་ཆེན་སྙིང་པོ་དྲི། །མ་ཉམས་རས་ཀྱིས་མགུལ་དཀྲིས་ཤིང་། །བཟང་པོའི་ཤིང་གིས་ཁ་བརྒྱན་པར། །ལྷར་བསྐྱེད་ཡེ་ཤེས་གཞུག་མཆོད་བསྟོད། །ཤོ་དྷ་ཡ་བི་ཤོ་དྷ་ཡ། མཐར་སྦྱར་སྔགས་བཟླས་ལེགས་བཀྲུས་པས། །ལྷ་རྣམས་མདུན་གྱི་ལྟེ་༧བར་གནས། །ཞེས་པ་འདི་ནི་ཁྲུས་སོགས་ཀྱི་ཁུངས་སུ་སེམས། མཛའ་སྡུག་དབང་དུ་བྱེད་པ་མེ་ཏོག་དམར་པོའི་སྦྱིན་སྲེག །ཚེ་ཡི་ཚིལ་བུ་གུ་གུལ་དང་། །ཡུངས་ཀར་ཅེ་སྤྱང་ཀླད་པར་སྦྱར། །བརྒྱ་རྩ་བརྒྱད་དུ་མངོན་སྔགས་པས། །དུར་ཁྲོད་སོལ་བའི་མེ་ལ་བསྲེག །བདུག་པས་བྲན་བཟའ་སོགས་ལུས་བདུག །གདོན་གྱིས་གཙེས་པ་ཐར་བར་བྱེད། །པདྨའི་རྩ་བ་ཙནྡན་དམར། །མངོན་པར་བསྔགས་པའི་མེ་སྦར་ཏེ། །རིག་སྔགས་བརྒྱ་རྩ་བརྒྱད་བཟླས་པའི། །དཱུཪྺས་རང་གི་མིག་བསྐུས་ན། །ཕན་ཚུན་མི་མཐུན་གནས་པ་ཡང་། །ལྟས་པ་ཙམ་གྱིས་༡༠མཛའ་བོར་འགྱུར། །བོང་འགྲིབ་པ་འཇོམས་༡༡པ་འབྲུའི་སྦྱིན་སྲེག །མྱ་ངན་ངལ་དང་གནོད་པ་༡༢འཇོམས་པའི་ཁྲུས་ཆོག །བླ་གོས་མཐའ་ལ་བརྒྱ་རྩ་བརྒྱད། །མངོན་སྔགས་མདུད་པ་བདུན་བོར་ནས། །ལམ་དུ་ཞུགས་ན་མི་ཟད་པའི། །འཇིགས་དང་ཉམ་ང་ལས་གྲོལ་བྱེད། །ཐོ་རངས་ལྷ་ཡི་བསམ་གཏན་ལྡན། །སྔགས་ཀྱིས་མངོན་པར་བསྔགས་པ་ཡི། །ཆུ་དང་ཐལ་བ་ཡུངས་ཀར་གྱིས། །ཕྱོགས་མཚམས་བཅིངས་པས་ཕོངས་པ་༡༤འཇོམས། །སྔགས་བཏབ་པའི་སྤོས་དཀར་གྱིས་བདུག་པས་གཟའ་༡༥དང་། གུ་གུལ་བདུག་པས་རྒྱུ་༡༦སྐར་གྱི་གནོད་པ་འཇོམས། ཁ་དོག་ལྔ་ཡི་སྐུད་པ་ལ། །རིག་སྔགས་སྟོང་ཕྲག་བདུན་བཟླས་ནས། །གང་གི་མགུལ་ལམ་དཔུང་པ་ལ། །བཅིངས་པས་བྱད་༡༧སྟེམས་ལས་གྲོལ་བྱེད། །མི་ཟད་གདོན་གྱིས་ཉེན་པ་ལ། །སྔགས་ཀྱི་ཆུ་ཡིས་ལུས་བཀྲུས་ནས། །གུ་གུལ་ཡུངས་ནག་ཡི་དྭགས་སྐྲ། །ཁྭ་ཡི་གཤོག་པ་རྨ་བྱའི་ཤ །ཅེ་སྤྱང་རྟུག་པ་སྔགས་བཅས་པའི། །བདུག་པས་ངེས་པར་ཐར་༡༨བར་བྱེད། །རྨི་ལམ་སྡིག་པའི་མཚན་མ་མཐོང་། །གཙང་མའི་གོས་གྱོན་དྲིས་བདུག་སྟེ། །ཤར་དུ་མངོན་པར་ཕྱོགས་པ་ཡིས། །རིག་སྔགས་བརྒྱ་རྩ་བརྒྱད་བཟླས་པའི། །ཆུ་ཡིས་ཁྲུས་༡༩བྱས་དགེ་བ་དང་། །སྡིག་མེད་དཔལ་དང་ལྡན་པར་བྱེད། །ཅེས་གསུངས། འདི་མ་ཎི་ཀ་བཛྲ་གྱིས་མཛད་དམ་སྙམ་ཞིང་། ཛྙཱ་ན་ཤྲཱི་དང་། རབ་ཞིའི་འགྱུར་རོ། ། ༈ གང་གི་ལས་སྒྲུབ་པའི་ཐབས་ཀྱི་རིག་སྔགས་ཀྱི་མཐུ་ཐོགས་པ་མེད་པར་བྱ་བ་ནི་བཅུ་ཆའི་སྦྱིན་སྲེག་ལ་བཤད། གདོན་ལས་ཐར་བ་ནི། ཁྲུས་ཀྱི་རྗེས་སུ་ས་རྫ་ནའི་སྔགས་བདུག་སྦྱིན་པས་གྲུབ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ནི། འབྱུང་པོ་མངགས་གཞུག་གི་ལས་སྒྲུབ་པར་གསུངས། མ་གྲུབ་པ་གྲུབ་པར་བྱེད་པ། སྤོག་ཆོག་ནི། མདུན་དུ་མཎྜལ་ལྷ་དམིགས་ཏེ་སྔགས་བརྗོད་པས་མེ་ཏོག་ཁྲི་ཕྲག་གཅིག་ཕུལ་ལ། དེ་ཉིད་སྲེག་རྫས་བྱས་པའི་སྦྱིན་སྲེག་བྱ་བར་གསུངས། གྲུབ་པ་ཆུད་མི་ཟ་བ་ནི་ལས་སྦྱོར་གྱི་སྦྱིན་སྲེག་ལ་བཤད། འདོད་པའི་དངོས་གྲུབ་བསྒྲུབས་པས། མདུན་དུ་མཎྜལ་གྱི་སྟེང་ལྷའི་སྐུ་གཟུགས་བཞག །དེའི་དྲུང་དུ་རིན་པོ་ཆེའི་སྣོད་དུ་དངོས་གྲུབ་ཀྱི་རྫས་བཤམས། བདག་གི་རྣལ་འབྱོར་དང་མདུན་དུ་ལྷ་དམིགས་ལ་མཆོད་བསྟོད་སྔོན་དུ་འགྲོ་བས་བཟླས་པ་བྱ་ཞིང་ཕོ་ཉའི་ཚོགས་སྤྲོ་བསྡུས་སྦྱོར་བས་དངོས་གྲུབ་སྒྲུབ་པར་དམིགས་ཏེ། དྲོ་བ་དང་། དུ་བ་འཐུལ་བ་དང་། འབར་བ་ལས་མཁའ་སྤྱོད། ས་སྤྱོད། ས་འོག་གི་དངོས་གྲུབ་སྦྱིན་པར་གསུངས། སྲུང་བ་སོགས་འཁོར་ལོས་སྒྲུབ་པར་བསྟན་ཏོ། །མཐར། གང་ལ་བསྙེན་པ་བྱས་པའི་སྔགས། །ལས་སྒྲུབ་པ་ཡང་དེ་ཉིད་དེ། །དད་བརྟན་ཐེ་ཚོམ་མེད་པ་ལ། །སྔགས་ནི་ཡིད་བཞིན་ནོར་ལྟར་འགྲུབ། །ཅེས་སོ། ། ༈ གདན་བཞིའི་དཀྱིལ་ཆོག་སྙིང་པོ་མདོར་བསགས་ལས། །ཡི་གེ་དགོད་པས་བཀོད་ནས་ནི། །ས་བོན་ལས་ནི་ལྷ་ཡི་ཚུལ། །ཟླ་བའི་དཀྱིལ་འཁོར་དབུས་གནས་པའི། །རྡོ་རྗེ་སེམས་དཔའ་བསམ་པར་བྱ། །པདྨའི་གདན་ལ་བཞུགས་པ་སྟེ། །གངས་དང་ཀུནྡ་ལྟ་བུའི་འོད། །ཕྱག་གཉིས་སེམས་དཔའི་སྐྱིལ་མོ་ཀྲུང་། །སངས་རྒྱས་ལྔ་ཡི་ཅོད་པན་ཅན། །རྡོ་རྗེ་སྙིང་གར་བཟུང་ནས་ནི། །གཡོན་གྱི་དྲིལ་བུ་དཀུ་ལ་བརྟེན། །སྐུ་ལ་རྒྱན་རྣམས་ཐམས་ཅད་དང་། །ཤིན་ཏུ་མཛེས་པའི་ན་བཟས་བཀླུབས། །འོད་ཟེར་སྣ་ཚོགས་འབར་བ་ཅན། །རྡོ་རྗེ་སེམས་དཔས་བདག་ཅེས་བརྗོད། །ཡེ་ཤེས་ས་བོན་འབུམ་ཕྲག་གསུམ། །སྔོན་དུ་བསྙེན་པའི་བཟླས་པ་བྱ། །ཐིག་ལེ་ནཱ་ད་ཡང་དག་ལྡན། །ཕྱག་འཚལ་ནཱ་མ་སྭཱ་ཧཱའི་མཆན། སྦྱིན་པའི་མཐའ་ཅན་ཏེ། །རྣལ་འབྱོར་མ་ནི་བརྒྱད་པོ་ཡི། །ཁྲི་ཁྲག་བཞི་ནི་བསྙེན་པར་བྱ། །སྦོས་མོ་ཌཱ་མི་ཀྲི་སོགས་ཀྱི། །ཉི་ཤུ་སྟོང་ཕྲག་ལྔ་རུ་བཟླས། །ཕྱི་རོལ་གནས་ཀྱི་འཇིག་རྟེན་པ། རྒྱལ་དབང་དངོས་གྲུབ་ཤིན་ཏུ་དྲག །སྟོང་ཕྲག་གསུམ་དུ་བཟླས་ནས་ནི། །ཀུན་ནས་ཀུན་ཏུ་འགྲུབ་པར་འགྱུར། །སྔོན་དུ་བསྙེན་པས་འགྲུབ་འགྱུར་ཏེ། །མ་བསྙེན་པ་ནི་དཀྱིལ་འཁོར་མིན། །སྔགས་དང་རྣལ་འབྱོར་དེ་དག་གིས། །རིམ་གྱིས་བྱིན་གྱིས་རློབ་པར་འགྱུར། །སྔོན་དུ་ལྷ་བསྙེན་པས་མཉེས་པར་བྱ་བའི་ཆོ་ག་སྟེ་གཉིས་པའོ། །ཞེས་སློབ་དཔོན་བསྐྱོད་པའི་བརྟུལ་ཞུགས་ཀྱིས་མཛད་པ་ལས་སོ།། །། ༈ ཕག་མོའི་སྐོར་ལས། ནཱ་རོ་མཁའ་སྤྱོད་སྐབས། གོས་ཟུང་དམར་པོ་བཤམས། འདིའི་མཆོད་པའི་སྐབས། རིགས་བཅུ་དྲུག་གི་སྔགས་ལས་དྷརྨ་དྷཱ་ཏུ་ཆད། གཏོར་ཆོག་གི་ས་བོན་ལས་ར་གཅིག་ལྷག་པ་སོགས། ལར་རིན་འབྱུང་སྤར་མ་འདི་ལ་ཡི་གེ་མ་དག་པ་མང་བས་ཞིབ་དཔྱོད་གལ་ཆེ། བུམ་བསྐྱེད་ཀྱི་ཧཱུྃ་བཞིའི་བཟླས་པར། བིདྱ་རཱ་ཛ་ཞེས་འདོན་པར་གསུངས་འདུག་ནའང་། བདེ་མཆོག་གི་སྐོར་ཐམས་ཅད་ལ་བཛྲ་རཱ་ཛ་ཁོ་ན་བཤད་པས། དཔྱད། ལུས། ། ༈ དཔྱལ་ལུགས་ཞལ་གཉིས་མར། ལུས་གཞལ་ཡས་ཁང་། ངག་ཡིག་འབྲུ། སེམས་ལྷ་སྐུར་བསྒོམ་གསུངས་པ་དངོས་སུ་དེ་དང་དེར་བསྒོམ་པ་ཡིན་གྱི། དག་པ་དྲན་པ་ལྟ་བུ་ནི་མིན་གསུངས། ཆོས་འབྱུང་གདེངས་ཀ་རྒྱས་པའི་སྟེང་རུ་སྦལ་གྱི་རྒྱབ་ལྟར་མཐོ་བ་ཞེས་པ་གང་ཡིན་མ་འཚལ། འདིའི་ཕག་ཞལ་རྣ་ལྟག་གཡས་ནས་ཐོན་པ་ཡིན། དབང་ལྷ་དཔལ་ཧེ་རུ་ཀའི་རྣམ་པ་ནི་བདེ་མཆོག་ལྷ་དྲུག་ཅུ་རྩ་གཉིས་དང་། རང་སྔགས། ཨོཾ་ཤྲཱི་བཛྲ་ཧེ་ཧེ་སོགས། མཆོད་འབུལ་གྱི་སྒོ་མཚམས་མ་བརྒྱད་ཀ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་མ། ཆོས་འབྱུང་ཡི་གེ་བཞི་དང་བཅས་པ་ནི། དབུས་སུ་བྃ། དེའི་མདུན་དུ་ཧཱུྃ། གཡོན་ཟུར་དུ་ཨོཾ། གཡས་ཟུར་དུ་ཨཱཿའོ། །རྩ་སྔགས་ཨོཾ་གསུམ་མ། ཁྱད་པར་གྱི་མཆོད་པ་བདུད་རྩི་དབུལ་བ་ནི། སྒྲུབ་མཆོད་སོགས་ཀྱི་སྐབས་དུས་སོགས་ཀྱི་ཨརྒྷཾ་མཆོད་པ་ལྟ་བུ་ཡིན་ཀྱང་། དབང་སྒྲུབ་སྐབས་ནང་མཆོད་བྱིན་གྱིས་བརླབས་པ་ཨོཾ་གསུམ་མའི་མཐར་འབྲུ་གསུམ་བཏགས་པ་འཐོར་བས་ཆོག །ལག་མཆོད་ཀྱི་སྐབས་ཨོཾ་མཐེ་བོང་ནས་བརྩམས་ཏེ་འགོད་པ་དང་། མཐེའུ་ཆུང་ནས་བརྩམས་ཏེ་འགོད་པའི་ལུགས་གཉིས་ལས་ཇོ་ལུགས་དང་འབྲུག་ལུགས་ལ་ཕྱི་མ་ལྟར་བཞེད། དེ་ཡང་ནང་ངོས་ཀྱི་ཚིགས་བར་པ་ལའོ། །སོར་མོ་རྣམས་ཕྱེད་ཙམ་བཀུག་པའི་སེན་མོའི་རྣམས་འཛོམས་པར་ཕཊ་ཕཊ། ཅེས་བཀོད། སྲུང་སྐུད་གདགས་དུས་སྔགས་བརྗོད་རྒྱུ་སྟ་གོན་གྱི་སྐབས་རྣམས་དང་གཅིག །སྤྱིར་ཕག་མོའི་སྐབས་འདི་རྣམས་ཀྱི་ཆོ་ག་སྤྲོས་དགོས་རིགས་བདེ་ཆེན་དཔལ་འབར་ནས་ལེན་གསུངས། ། ༈ མཻ་ཏྲི་མཁའ་སྤྱོད་ཀྱི་དཔལ་གྱི་རི་ནི་ལྷོ་ཕྱོགས་ཤྲཱི་པརྦ་ཏ་དང་། མ་ན་བྷཾ་ག་ནི་ཡིད་ཕམ་པའི་རིའོ། །བྱིན་རླབས་གསུམ་པའི་སྐབས་ལྟེ་བར་ཆོས་འབྱུང་ཟུར་དྲུག་གི་དབུས་སུ་འཁོར་ལོ་སྔགས་ཕྲེང་དང་བཅས་པ་ནི་སྔགས་འཁོར་ལ་དེ་ལྟར་བཏགས་པ་མ་གཏོགས་འཁོར་ལོ་ཟུར་པ་ཞིག་བསྒོམ་རྒྱུ་མེད། བཞི་བའི་སྐབས། སྣ་རྩེ་ནས་ཕྱི་རོལ་ཏུ་སོར་བརྒྱད་པའི་སར་དགའ་འཁྱིལ་གྱེན་ལངས་བསྒོམ། ལྔ་པའི་སྐབས་ཀྱི་གསང་གནས་སུ་དགའ་འཁྱིལ་བསྒོམ་པའང་གྱེན་ལངས། ལར་འདི་ཡིག་རྙིང་གི་རྗེས་འབྲངས་ཏེ་ཕྱིས་ཀྱི་སྤྲུ་ལུང་པའི་ཡིག་ཆ་དང་ཅུང་མི་གཅིག་པ་མང་། ། ༈ དོན་གྲུབ་མ་རྒྱས་པར་བདེ་ཆེན་དཔལ་འབར་དང་། དབང་སྒྲུབ་སོགས་ཀྱི་སྐབས་རིན་འབྱུང་རང་གི་དཔྱལ་ལུགས་ཞལ་གཉིས་མ་གུང་བསྒྲིགས་པས་ཁྱབ། ། ༈ དབུ་བཅད་མར། གཡོན་གྱི་རྡོ་རྗེ་རབ་བསྔགས་མ། གཡོན་གྲི་གུག་དང་། གཡས་ཐོད་པ་འཛིན་པ་ཡིན་ཀྱང་སྤར་མ་དག །དག་དྲན་སྐབས་ཞལ་གཉིས་མ་དང་འདྲ་བ་ལ། མི་རོའི་གདན་གྱི་ཚབ། འཇིགས་བྱེད་ཆེན་མོ་དང་དུས་མཚན་མ་ནི་གཟུང་བ་དང་འཛིན་པ་སྤངས་པའོ། །བསྒྱུར་བ་ལྟ་བུ་ཞིབ་ཆ་ཤིན་ཏུ་དཔྱད་དགོས་པ་མང་། ། ༈ ཕག་མོ་གནམ་ཞལ་མར། རིན་ཆེན་ལྷར་བསྐྱེད་སོགས་དུས་འཁོར་གྱི་དབང་གོང་མ་ལྟ་བུ་ཞིག་ཨེ་ཡིན་ཀྱང་དེང་སང་རྒྱུན་གང་ཡང་མེད་གསུངས། འདིའི་ཨིནྡྲ་བྷོ་དྷི་ནི་ཨ་བ་སའི་སྐབས་ཀྱི་དེ་ཡིན་འདྲའོ། ། ༈ རུས་སྦལ་ཞབས་ཀྱི་བཞུགས་སྟངས་ནི་མིའུ་ཐུང་གེལ་བའི་འདུག་སྟངས་དང་གཅིག་སྙམ། ། ༈ དཔལ་འཛིན་ལུགས་ཀྱི་ཕག་གདོང་གི་ཞལ་དམར་པོ། ལྷ་གསུམ་རོ་གདན་གཅིག་ལ་བཞུགས་པ། ། ༈ གོ་བཟློག་ལྷན་སྐྱེས་མར་རྡོར་སེམས་སྒོམ་བཟླས་དགོས། ། ༈ ཕག་དཀར་ལ། ཞབས་གཡས་བསྐུམ་གཡོན་བརྐྱང་མཛད་པ་ཕག་མོ་སྤྱི་དང་མ་གཅིག་པས་དཔྱད། སྐུ་མདོག་དཀར་མོའི་ཚིག་གསལ་ཆད། ཐིག་ལེ་དཀར་པོ་དབང་སྒྲུབ་དང་མཉམ་དུ་ལྷར་བསྐྱེད་བསྟིམས་སོགས་བྱས་ལ། སློབ་མ་ལ་སྟེར་སྐབས་སྔགས་གཞུང་གསལ་ལྟར་བཟླས་པ་ལ་གཏད། ཕུས་བཏབ་པ་སོགས་མི་དགོས། སློབ་མས་པད་འདབ་བརྒྱད་དབུས་ཧྲཱིཿདང་། འདབ་མར་དབྱངས་གསལ་༡༦སྐོར་གཉིས་གཉིས་བྲི། དེ་བསང་སྦྱངས་དམ་ཡེ་དབྱེར་མེད་དུ་བྱ་བའམ། ཡེ་ཤེས་པ་ཙམ་བསྟིམ་ལ་མཆོད་པ་སོགས་གཞུང་ལྟར། གི་ཝཾ་གིས་ལྕེ་ལ་ཡི་གེ་འབྲི་བ་ཕྱག་ལེན་དུ་མི་མཛད། གལ་ཏེ་འབྲི་ན་ཧྲཱིཿཁོ་ན་ཡིན་སྙམ། ཕག་དཀར་གསར་རྙིང་ལ་བྱིན་རླབས་སོ་སོར་མཛད་གསུངས་སོ། ། ༈ སྭ་སྟི། བཀྲ་ཤིས་གཟའ་དགུའི་མཆོད་པའི་ཆོ་ག་པཎྜི་ཏ་བ་ན་རཏྣ་ཉིད་ཀྱི་བླ་མ་ཧང་བ་ཞེས་པའི་གསུང་ཟིན་བྲིས་སུ་མཛད་པ་ལས། སྲུང་བ་ལྔའི་མཆོད་པའི་མཇུག་ཏུ། ཉི་མ་ལ། བདུག་སྤོས་ནི། ཀུན་ཏུ་རྒྱུ། མཆོད་ཡོན་གྱི་སྣོད་ནི་ཟངས། རིན་པོ་ཆེ་དམར་པོ་དང་། ཙནྡན་དམར་པོ་དང་། སཱ་ལའི་འབྲུ་དམར་པོ་དང་། འོ་མ་དང་བཅས་པའི་གཏོར་མ་དང་། ཡོན་ནི་བེའུ་དང་བཅས་པའི་བའོ། ༡༽ །ཟླ་བའི་བདུག་སྤོས་ག་བུར། མཆོད་ཡོན་སྣོད་དངུལ། མུ་ཏིག་གི་མཆོད་ཡོན། ཏིལ་དཀར། འབྲས་དཀར། འོ་ཟན་གྱི་གཏོར་མ། ཡོན་དུང་། ༢༽ །མིག་དམར་ལ། སྤོས། གུ་གུལ། མཆོད་ཡོན་སྣོད་ཟངས། མཆོད་ཡོན་ནི་བྱེ་རུ་སོགས་རིན་ཆེན་དམར་པོ། སྲན་མ་མ་ཥ། ཡུངས་ཀར། བུ་རམ། འབྲས་ཆན་གྱི་གཏོར་མ། ཡོན་དངུལ་གྱི་ཁྱུ་མཆོག ༣༽ །ལྷག་པར། སྤོས་སྤོས་དཀར། མཆོད་སྣོད་གསེར། མཆོད་ཡོན་གསེར་དང་བྱེ་རུ། ནས་དང་འབྲས་ཟན་སེར་པོའི་གཏོར་མ། ཡོན་གསེར་རོ། ༤༽ །ཕུར་བུའི་སྤོས་ཤཱི་བཱ་ས། མཆོད་སྣོད་གསེར། མཆོད་ཡོན་གསེར། ཡུངས་ཀར་དང་། ཞོ་དང་། གྲོ་དང་། འོ་མའི་གཏོར་མ། ཡོན་གོས་ཟུང་སེར་པོ། ༥༽ །པ་སངས་ཀྱི་སྤོས་གུ་གུལ་དང་། ཤྲཱི་བ་ས། མཆོད་ཡོན་སྣོད་དངུལ། འབྲས་དཀར་པོ། བུ་རམ། ཁུར་བ། མར་གྱི་གཏོར་མ། ཡོན་ནི་དངུལ་གྱི་རྟའོ། ༦༽ །སྤེན་པའི་སྤོས་གནྡྷ་རཱ་ས་དང་། བིལྦ། མཆོད་སྣོད་ས། མཆོད་ཡོན་ལྕགས། སྲན་མ་མ་ཥ། མུཏྒ། ཏིལ། འབྲས་ཆན་གྱི་གཏོར་མ། ཡོན་དངུལ་གྱི་བ་ནག་མོའོ། ༧༽ །སྒྲ་གཅན་གྱི་སྤོས་བི་ལྦའི་ས་བོན། མཆོད་སྣོད་ས། མཆོད་ཡོན་ཞ་ཉེ། སྲན་མ་ཥའི་གཏོར་མ། ཡོན་གྲིའོ། ༨༽ །མཇུག་རིང་སྤོས་བིལྦའི་ས་བོན། སྣོད་ས། མཆོད་ཡོན་རིན་པོ་ཆེ་ལྔ། ཏིལ་ནག །འོ་མ། བུ་རམ་གྱི་གཏོར་མ། ཡོན་དངུལ་གྱི་རྭ་སྐྱེས་སོ། ། ༈ སྒྲུབ་རིན་ཟིན་བྲིས་བཀའ་བརྒྱུད་ཕྲིན་ལས་ཤིང་རྟ་ལས་ཁམས་སྤྲུལ་རིན་པོ་ཆེས་གསན་སྐབས་གནང་༡༥༦བར། ལས་མགོན་བྱ་རོག་གདོང་བརྒྱུད་པ་གཉིས་འདྲེས་ཀྱི་ཟིན་བྲིས་ཡན་ལ་ལྡེབ་༡༥༦སྣང་། ཐམས་ཅད་ལ་བཤམ་བཀོད་རིགས་རྣམས་རྒྱས་པར་སྣང་། དམིགས་བསལ་ཡོད་མེད་ཕལ་ཆེར་ལ་དཀྱིལ་འཁོར་བསྒོམ་དོན་དང་མཐུན་པར་འབྲི་བར་བཤད། སྤྱིར་ཡོ་བྱད་བཤམ་ཚུལ་སོགས་ཤིན་ཏུ་ཞིབ་པར་ཡོད་འདུག །སྒྲོལ་དཀར་གྱི་སྐབས། དབུ་སྐྲ་ལི་བ་ནི། འཇམ་ཞིང་རྩེ་མོ་འཁྱིལ་བའི་ཉམས་ཅན་དེའོ། །བསང་ཆུ་སྔགས་དང་ཕྱག་རྒྱས་བརླབས་པ་ལས་ལྷས་དམིགས་བསལ་བསྐྱེད་མི་དགོས། ལས་རྡོར་གྱིས་ཡིག་བརྒྱ་བརྗོད་ནས་སྒོ་དྲུང་དུ་ཁྲུས་བྱ། བུམ་བསྐྱེད་ལ། བུམ་ནང་དུ་བསྐྱེད་པ་དང་། དུང་ཆོས་སུ་བསྐྱེད་པ་གཉིས་ལས། ཏཱ་ར་སྔ་མ་བཞེད། བུ་སྟོན་རིན་པོ་ཆེས་སྐུ་ཚེའི་སྨད་དང་འབྲུག་ལུགས་དག་ཕྱི་མ་ལྟར་གནང་གསུངས། ། ༈ ཇོ་ལུགས་སྒྲོལ་དཀར་ལ་རིགས་བདག་རིན་འབྱུང་མཛད་པ་ཚེ་རྒྱས་པའི་ཆེད་ཡིན། ། ༈ དབྱངས་ཅན་དཀར་མོའི་བི་ལེ་པ་ནི་ཞེས་པ་བཞི་མཉམ་གྱི་ལྡེ་གུ་སྟེ། འདིའི་སྒོས་མཆོད་ཡིན། ཕྱག་རྒྱ་ཞལ་ཟས་ཀྱི་རྒྱའམ། མཆོད་པ་སྤྱི་འགྲེ་ནམ་མཁའ་མཛོད་ཀྱི་རྒྱ་གང་རིགས་བྱ། ། ༈ ཀུ་རུ་ཀུལླེའི་ས་བོན་ཧྲཱིཾཿཞེས་ཡི་གེ་མ་དག །ཧྲཱིཿཁོ་ནའོ། ། ༈ རིགས་བྱེད་ཕུག་ཅེས་ལྷོ་ཕྱོགས་རྒྱ་མཚོའི་གླིང་ཤེད་ན་ཡོད་པར་གྲགས། ། ༈ པདྨའི་ཕྲེང་བ་ནི། བལ་པོ་ནས་འབྱུང་བའི་མེ་ཏོག་པདྨ་རང་གི་འབྲུའི་རྩ་བ་དེ་ཀ་ལ་བྱེད་གསུངས། ། ༈ ཀག་ཆོལ་ཞེས་པའི་བརྡ་དཔྱད་གསུངས། ། ༈ མཆོད་ཡོན་ལ་རོ་རྡོ་རྗེ་མའི་རྒྱ། ཞབས་བསིལ་གཡོན་དེ་བཞིན་ལ། གཡས་པས་འཐོར་ཚུལ་ལྕགས་ཀྱུའི་རྒྱ་སྤྱི་མཚུངས། ཞགས་པ་ལ་སྥོ་ཊའི་རྒྱ་ལས་མཛུབ་མོ་སྦྲེལ་བ། ལྕགས་སྒྲོག་ལ་ཁུ་ཚུར་རྒྱབ་སྤྲོད་མཛུབ་མོ་དང་མཐེའུ་ཆུང་སྦྲེལ་བ། དྲིལ་བུ་ལ་འདྲ། ། ༈ ཀླུ་ཤིང་ཞེས་པ་བལ་པོ་སྐྱེ་བ་དེ་ནི་མིན་འདྲ་གསུངས། ། ༈ སྒྲུབ་ཐབས་རྒྱ་མཚོ་ལ་མ་ཚང་བའི་ལྷ་ལྔ་བཅུ་ཙམ་ཁ་སྐོང་ནས་ཏཱ་རས་གསར་འགྱུར་གནང་བ་དེའི་རྒྱུན་ཆད་གསུངས། ། ༈ གཙོ་བོའི་ཕྱག་མཚན་མེད་པ་རྣམས་འཁོར་གྱི་ཕྱག་མཚན་སྤྲོ་གསུངས། ། ༈ སྒོམ་ལུང་དང་བཟླས་ལུང་འབོགས་ཚུལ་ལ། སྐྱབས་སེམས་ཀྱི་རྗེས། ཁྱེད་རང་རྣམས་སྐད་ཅིག་གིས་ལྷ་འདི་ཞེས་བྱ་བའི་སྐུར་གྱུར་པ་ནི་སོགས། ལྷའི་མངོན་རྟོགས་ཀྱི་དམིགས་པ་ཕོག །དེ་ནས་སློབ་དཔོན་དང་མདུན་བསྐྱེད་ལས་སྔགས་ཕྲེང་སྤྲོ་བ་སོགས་བཟླས་ལུང་སྤྱི་ལྟར་རོ་གསུངས། ། ༈ ཀླུ་དབང་རྒྱལ་པོའི་སྐུ་མདོག་རིན་པོ་ཆེ་མི་དཔོག་པའི་ཁ་དོག་ཞེས་པ་དེ་ཇི་ལྟར་དང་། ཕྱག་རྒྱ་མི་འཁྲུགས་པའི་ཆོ་གར་འབྱུང་བའི་རྡོ་རྗེ་རྩེ་ལྔའི་ཕྱག་རྒྱ་ལྟ་བུ་ཞིག་འབྲི་སྲོལ་སྣང་བའང་དཔྱད་ཅེས་དང་། སྐྱབས་སྦྱིན་འདྲ་ཡིན་ནམ་བརྟག །སྦྲུལ་གྱི་གདེངས་ཀ་ནི་ཀླུ་རྣམས་རྒྱབ་ནས་ལངས་ཏེ་བསྙེན་བཀུར་བའི་ཚུལ་ལས་ཀླུ་ལ་གདེངས་ཀ་ཡོད་པ་ལྟ་བུ་ནི་གཏན་ནས་མིན་ནོ། ། ༈ཌཱ་མ་རུ་བླ་མེད་མ་རྒྱུད་ལ་འཁྲོལ། ཕ་རྒྱུད་འཇིགས་བྱེད་མ་གཏོགས་གཞན་ལྷའི་ཕྱག་མཚན་ལ་ཌཱ་མ་རུ་དམིགས་བསལ་ཡོད་ན་མ་གཏོགས་མི་འཁྲོལ་གསུངས། ། ༈ འཇམ་རྡོར་གྱི་ཡུམ་ཡབ་དང་མཚུངས་ཀྱང་ཐོར་ཚུགས་མེད། ཡབ་ཀྱི་ཐུགས་ཀར་རང་འདྲའི་ཡེ་སེམས་ཡུམ་བཅས་དང་། ཡུམ་གྱི་ཐུགས་ཀར་ཡུམ་ལ་ཡབ་ཀྱིས་འཁྱུད་པའི་གོ་བཟློག་གི་ཡེ་སེམས་ངེས་པར་བསྒོམས་གསུངས། ། ༈ མི་བསྐྱོད་པ་དབྱངས་བཅུ་གཉིས་ནི་རྀ་ལྀ་བཞི་དོར་བའི་ལྷག་མ་ཡིན་འདྲ། རིན་འབྱུང་ལ་རྗེས་གནང་སྒྲུབ་བསྐུར་རེ་རེ་ནས་ངེས་པར་མཛད་གསུངས། ། ༈ ཇོ་ལུགས་ལ་དབང་གསུམ་པར་ཕལ་ཆེར་རིག་ཙཀ་གཏད། ། ༈ དུས་འཁོར་གྱི་རྡོ་རྗེའི་རྒྱན་ནི། རྒྱུ་ཕ་ལམ། དབྱིབས་རྩེ་གསུམ་རྩེ་ལྔ་གང་རུང་། ཁ་དོག་གསེར་ལྟ་བུའོ། །ཕྱག་སོར་གྱི་ཚིགས་ཕྲེང་དང་པོ་ནག་པོ་སོགས་ཀྱི་དང་པོ་ཕྱག་མཐིལ་གྱི་ཕྱོགས་ནས་རིམ་བཞིན་བརྩི། མཐེ་བོང་ལ་ཚིགས་མངོན་པ་གཉིས་ལས་མེད་ཀྱང་། ལག་པའི་མཁྲིག་མ་དང་ཉེ་བའི་ཕྱོགས་དེར་མི་མངོན་པ་གཅིག་ཡོད་པས་དེ་ནས་བརྩི་བར་བཞེད། དེ་ཡང་ལུགས་གཞན་ལས་མཐེ་བོང་སོགས་ཀྱི་རང་མདོག་རྒྱབ་ངོས་དང་། ཚིགས་ཀྱི་རང་མདོག་མདུན་ངོས་སུ་ཡོད་པར་འདོད། ཇོ་ལུགས་ཚིགས་ཀྱི་མདོག་སོར་གདུབ་བཀོན་པ་ལྟར་མཚམས་སོ་སོར་ཁྱུར་ཙམ་རེ་ཡོད་པར་བཞེད། འདིའི་ཛཿལ་མཛུབ་མོ་ལྕགས་ཀྱུ་ལྟར་དགུག་པའི་རྡོ་རྗེ་ཁུ་ཚུར། ཧཱུྃ་ལ་རྡོ་རྗེ་རྩེ་ལྔའི་རྒྱ། བཾ་ལ་གཡོན་སྟེང་དང་། ཧོཿ ལ་གཡས་སྟེང་དུ་བྱས་པའི་ཁུ་ཚུར་རྒྱབ་སྤྲོད་དང་། སྟེང་འོག །ཧི་ལ་གཡོན་ཁུ་ཚུར་གྱེན་བལྟས་སུ་བཟེད། གཡས་ཁུ་ཚུར་གྱེན་དུ་བསྒྲེང་བ་ཡིན་སྙམ། ཞིབ་པར་དུས་འཁོར་ཕྱག་རྒྱའི་འགྲེལ་པར་བལྟ་གསུངས། ། ༈ རྡོ་རྗེ་ཤུགས་ཀྱི་དབང་གཏོར་དཔལ་གཏོར་དམར་པོ་ཟུར་དྲུག་ལ་དབལ་ཅན། མཆོད་གཏོར་དམར་པོ་པད་འདབ་བཞིས་མཚན་པ་རྒྱན་ལྡན་ཆེ་བ། སྲུང་མ་དྲུག་ཅུ་ལ་གཡས་སུ་གསུམ། གཡོན་དུ་གསུམ་སྟེ་དྲུག་གཙོ་བོ་ལས་ཆུང་བ། ཐམས་ཅད་ཟླུམ་གཏོར་དམར་པོ། མཆོད་པ་བཅུ་གཉིས་སྦྲེང་ཚར་རམ། ཤར་དུ་དྲི། མེ་ཏོག །ལྷོར་སྤོས། མེ། ནུབ་ཏུ་ན་བཟའ། མེ་ལོང་། བྱང་དུ་ཞལ་ཟས། ཤིང་ཏོག །ཤར་གྱི་ཤར་དུ་ཏིང་ཤག་རྡོར་དྲིལ། ནུབ་ཀྱི་ནུབ་ཏུ་ཆོས་འབྱུང་། པི་ཝཾ། འདིའི་ཞལ་བཞི་ལས། རྒྱབ་ཞལ་ལ་མགྲིན་པ་མེད་པས་མགྲིན་པ་གསུམ་པ། ཕྱག་དཔུང་པ་དང་ཕྱག་ངར་རྣམས་མདུན་ནས་རྒྱབ་ངོས་སུ་ཐད་བསྒྲིགས། འདིའི་ཡི་དྭགས་ཀྱི་གདན་ནི་གཤིན་རྗེའི་གདན། རལ་པའི་ཐོར་ཚུགས་དང་ཐོར་ཅོག་དོན་གཅིག་སྟེ་དབུ་སྐྲ་གྱེན་དུ་མཐོ་ཚད་བསྡམ་པ། དོ་ཀེར་དང་ཟུར་ཕུད་དོན་གཅིག་སྟེ་སྔ་མ་ལས་ཐུང་བར་ཕྱེད་དང་སུམ་ཆའི་ཚད་ཙམ་བསྡམས་པས་དེ་ཡིན་སྙམ། ལྷ་མོའི་རིགས་ལ་དཀའ་ཐུབ་མཛད་པའི་བཀོད་པ་མ་གཏོགས་གཞན་ལ་ཐོར་ཚུགས་ཡོད་པའི་སྲོལ་མེད། བླ་མེད་སྤྱི་ལ་མཆོད་པའི་རིག་མ་བཅུ་དྲུག་དང་། དུས་འཁོར་ལ་བཅུ་གཉིས་རང་བཤད། ཡུལ་བདག་དང་གྲོང་བདག་གཏོར་མ་འབུལ་ན་ཟུར་དུ་ཟླུམ་གཏོར་གཉིས་བཤམ། ལག་གཡས་ཁུ་ཚུར་ཁ་གྱེན་བསྟན་དང་། གཡོན་ཐུར་བསྟན་རྒྱབ་བསྣོལ་བའི་སྟེང་གི་མཛུབ་མོས་འོག་མའི་མཛུབ་མོ་འཐེན་པའི་ཕྱག་རྒྱས་ཡུལ་བདག་དང་། སོར་བཅུ་ཀ་ཆ་སྙོམས་པ་ལྕགས་ཀྱུ་ལྟར་བཀུག་པ་གཡས་གཡོན་ལ་ཁ་སྤྲོད་མ་རེག་ཙམ་བྱས་པ་གྱེན་མཐུར་གྲུ་ཁུང་བྱེད་པས་གྲོང་བདག་བཀུག །སོ་སོའི་མིང་མཐར་ཨི་དཾ་བ་ལིཾ་སོགས་བཏགས་པས་བསྔོ། ། ༈ སྤྱི་བོ་དང་། དཔྲལ་བ་ཞེས་པ་སོ་སོ་ཡིན་པས་ཚིག་རིས་མཐུན་པར་ཡིག་འབྲུའང་དེར་བསྒོམ་གསུངས། ། ༈ སམྦུ་ཊིའི་འཇིགས་བྱེད་ཀྱི་དམ་རྫས་ཞེས་པ་ཆང་ཁོ་ན། རྡོ་རྗེ་སྲིན་པོ་སོགས་གསུམ་གྱི་གཏོར་མ་ཟུར་གསུམ་ལོགས་རེ་རེ་མཐེབ་ཀྱུས་བརྒྱན་པ། ། ༈ རིན་འབྱུང་ཡོངས་རྫོགས་ཀྱི་མཆོད་སྔགས། ཆུ་གཉིས་ཀྱི་སྔགས་མཐར་སྭཱ་ཧཱ། པུཥྤེ་མན་ལ་ཨཱཿཧཱུྃ་སྦྱར་སྲོལ་ཡོད། རྣལ་འབྱོར་མའི་རིག་མ་བཅུ་དྲུག་གི་སྔགས་ལས་དྷརྨ་དྷཱ་ཏུ་ཆད་པ་དང་། བདུད་རྩི་ལྔའི་ས་བོན་ལ་ར་གཅིག་ལྷག་པར་ཡོད་པ་སོགས་མ་དག་པ་མང་། ། ༈ གཡོན་པའི་མཐེབ་སྲིན་གྱིས་སྔགས་འབྲི་བར་གསུངས་པ་རྣམས་གཡས་པའི་མཐེབ་མཛུབ་ཀྱིས་སྨྱུ་གུ་བཟུང་ནས་གཡོན་པའི་མཐེབ་སྲིན་གྱིས་ཀྱང་དེའི་རྩ་བ་ནས་འཛིན་པའི་ཚུལ་གྱིས་བྲི་བར་གསུངས། ། ༈ སྤྱན་རས་གཟིགས་ཡི་གེ་དྲུག་པའི་བསྟོད་པར། ཆུ་བདག་གི་ཞབས་བསྟེན་ཅེས་པ་ཡིན། རྗེས་གནང་ཆིངས་སྒྲུབ་ཐབས་རྒྱ་རྒྱམ་འདྲེས་པའི་ཕྱོགས་ཡིན། ། ༈ བཅུ་གཅིག་ཞལ་དམར་མོ་ལུགས་སོགས་ལ་བདག་བསྐྱེད་ཀྱི་ཡེ་ཤེས་པ་མཐར་གཤེགས་སུ་གསོལ་བ་ཡང་ཕྱག་ལེན་རྙིང་པའི་སྤྱི་འགྲེ་ལས། རང་བཞེད་དངོས་རི་ཁྲོད་མའི་སྐབས། ཡེ་ཤེས་པ་གཤེགས་པ་ངེས་པར་མི་དགོས། གསུངས་པ་དེའོ། ། ༈ དོན་ཞགས་བ་རི་ལུགས་ལ་ཕྱུགས་བདག་གི་ཆ་ལུགས་ནི། དཀའ་ཐུབ་ཀྱི་ཆ་ལུགས་རྒྱན་སྤངས་པ། གཏོར་འབུལ་ཀྱི་སྔགས་ལས། ཁྲོ་གཉེར་ཅན་མའི་མཚན་སྔགས་ཆད་ཡོད་པས། གྷྲྀ་ཀུ་ཊི་ས་པ་རི་ཝཱ་ར་ངེས་པར་དགོས། ། ༈ དབྱུ་གུ་རྩེ་གསུམ་ནི་དབྱུག་པ་མགོ་གསུམ་པ། ། ༈ ཁ་སཪྤཱ་ཎི་ལྷ་ལྔའི་ནོར་བཟང་བྱིས་པའི་ཆ་ལུགས་དང་རྒྱན་ནི། སྐྲ་ཟུར་ཕུད་ཆུང་ངུ་ཕན་ཚུན་དུ་ཁ་ཤས་བསྡམས་པ་ལ་རིན་པོ་ཆེ་དྲྭ་བ་དྲྭ་ཕྱེད་ལྟ་བུས་སྤྲས་པ། འདིའི་ས་བོན་གྱི་སྔགས་ལ་ཧྲཱིཿཆད་སྣང་། ། ༈ བཅུ་གཅིག་ཞལ་འཇིགས་པ་བརྒྱད་སྐྱོབས་ལ་བསྒོམ་ལུང་གིས་ཆོག་པར་གསུངས་ཀྱང་བསྒོམ་ལུང་མཛད་པ་ཕྱག་ལེན་ལ་ཡོད། ། ༈ སྤྱན་རས་གཟིགས་རྡོ་རྗེ་སྙིང་པོར་ཐུན་གྱི་སྡིག་བཤགས་གང་འགྲུབ་བྱེད་གསུངས་པ་ལྟ་བུ་འདི་རིགས་ཐམས་ཅད་བསྙེན་པ་ཁོ་ནའི་སྐབས་ལ་དགོངས་པས་དབང་སྒྲུབ་དུས་མ་བྱས་ཀྱང་རུང་གསུངས། ། ༈ སེང་གེ་སྒྲའི་རིགས་ལྔ་དཔྱི་གཉིས་སུ་བསྒོམ་རྒྱུ་སྐུའི་རྒྱབ་ངོས་ནས་ཞལ་ནང་བསྟན་དུ་བཞུགས་པ་ཡིན་གསུངས་སྣང་། རྗེས་གནང་ལ། བགེགས་གཏོར་བཀྲུ་བྱབས་སྲུང་གསུམ་བྱེད་ཅེས་པར། བགེགས་སྦྱོང་གསུམ་དང་། སྡིག་སྦྱོང་ཏིལ་སྦྱོང་བཅས་བྱེད་སྲོལ་ཡོད་ལ། སྤྱིར་ཏིལ་སྦྱོང་སྔགས། རྡོ་རྗེ་མཁའ་འགྲོ་མ་བསྐྱེད་ན། བཛྲ་ཌཱ་ཀི་སོགས་དང་། མ་བསྐྱེད་ན་སརྦ་པཱ་པྃ་བྱེད་པ་ཤས་ཆེ་བས་འདིར་ཡང་ཕྱི་མ་ལྟར་རོ། ། ༈ བདེ་གཤེགས་བཞི་བསྒྲིལ་ལ། བསྒོམ་ལུང་བུམ་དབང་གི་གོང་དུ་བྱེད་པ་ཕྱག་ལེན་ཡིན། བཟླས་ལུང་ནི་དབང་བཞི་རྫོགས་པའི་མཐའ་དམ་ཚིག་ཁས་བླངས་ཀྱི་གོང་དུ་བྱེད། ། ༈ སྒྲོལ་མ་ཉིན་ཞི་མཚན་ཁྲོའི་ཁྲོ་མོའི་སྐུ་ནི་རྣམ་འགྱུར་མ་ངེས་སྣ་ཚོགས་སུ་སྟོན་ཅིང་། ཕྱག་གཡོན་པའང་ས་ལ་བསྣུན་པ་དང་། ཐུགས་ཀར་སྡིགས་མཛུབ་མཛད་པ་སོགས་མ་ངེས་པར་བསྒོམས་ཀྱང་། བྲིས་སྐུའི་ཚེ་ཐུགས་ཀར་སྡིགས་མཛུབ་མཛད་པ་ཁོ་ནའོ། ། ༈ སྒྲོལ་མ་དམར་མོ་ལྟ་བུ་ལྷ་བསྐྱེད་ལུགས་མི་འདྲ་བ་གཉིས་རེ་ཡོད་པ་འདི་རིགས་ལ་རྩ་བ་བདག་བསྐྱེད་དང་། གཅིག་ཤོས་མདུན་བསྐྱེད་ལ་སྦྱར་རོ། ། ༈ སྒྲོལ་མ་ནོར་སྦྱིན་མར། གནས་བཅུ་ཡི་གེ་བཀོད་པ་ནི། སྤྱི་བོར་ཨོཾ། དཔྲལ་བར་ཏཱ། སྤྱན་གཉིས་ལ་རེ། མགྲིན་པར་ཏུད། དཔུང་པར་ཏཱ། སྙིང་གར་རེ། ལྟེ་བར་ཏུ། གསང་བར་རེ། པུས་མོ་གཉིས་ལ་སྭཱ། ཞབས་གཉིས་ལ་ཧཱ། ། ༈ སྒྲོལ་མ་ལྷ་ལྔ་རྩ་བ་བདག་བསྐྱེད་དང་། ཙཱནྡྲ་གོ་མིའི་ལུགས་མདུན་བསྐྱེད་ལ་བསྒོམ་པར་གསུངས། ཕྱི་མའི་ནོར་བུ་འཛིན་མ་དང་སོ་སོར་འབྲང་མ་གཅིག་གམ་སེམས། ། ༈ ཀཱ་པ་ལ་ཏཱ་ར་ལྟ་བུ་སྔགས་བརྒྱ་རྩ་རྗེས་ཟློས་ལས་བཟླས་ལུང་གིས་དམིགས་བསལ་མ་བཤད་པ་རྣམས་ལའང་བཟླས་ལུང་གི་དམིགས་པ་ངེས་པར་འབོག་ཅེས་སྣང་། འདི་གཞིར་བཞག་ལ་ཞལ་བསྒྱུར་ཏཱ་ར་ལའང་ཟུར་དུ་བྱེད་པས་མཚོན་ཞར་བྱུང་དུ་བཤད་པ་རྣམས་ལའང་སོ་སོར་མཛད། ། ༈ ཕྱག་རྡོར་ཨུ་ཙཪྻའི་རྟེན་གཏོར་ནག་པོ་གྲུ་གསུམ་པད་འདབས་བརྒྱད་པ། དེ་མདུན་མཆོད་གཏོར་དབུས་སུ་ཀ་པཱ་ལར་གཏོར་མ་འདབ་བརྒྱད་ཅན་དམར་པོ། གཡས་སུ་རིན་པོ་ཆེའི་སྣོད་དུ་དཀར་གཏོར་པད་འདབ་བཞི་པ་རྒྱན་སུམ་རིམ་ཅན། གཡོན་དུ་རྫའི་སྣོད་དུ་བགེགས་གཏོར་ལྟ་བུ་ཤོ་ལུ་ཞེས་གྲགས་པ་དེ་ལ་མཐེབ་ཀྱུས་བསྐོར་བ་ཆང་བུ་དང་བཅས་པ། ། ༈ ཕྱག་རྡོར་འབྱུང་འདུལ་རིང་བརྒྱུད་དང་། ཉེ་བརྒྱུད་སོ་སོར་བྱ། འདི་དག་ལ་གཏོར་དབང་ཡང་ངེས་པར་བྱེད། པད་འདབས་ཀྱི་དབུས་སུ་ཚོམ་བུ་འགོད་པའི་དམིགས་བསལ་མེད་པ་རྣམས་ཀྱང་ལྷའི་སྐུ་མདོག་དང་མཐུན་པའི་ཚོམ་བུ་རེ་འགོད་རྒྱུ་མཛད་སྣང་། ། ༈ རྟ་མགྲིན་ལྷན་སྐྱེས་ལ་གཏོར་མ་དམར་པོ་པད་འདབ་བརྒྱད་པ། ། ༈ ཤཱན་བཞི་སྐོར་གྱི་དཀྱིལ་འཁོར་ལྷན་སྐྱེས་དང་འདྲ་བ་ལ། དབུས་སུ་ཉི་གདན་ལ་ཚོམ་བུ་དམར་པོ། ཕྱོགས་ཀྱི་འདབ་བཞིར་ཤཱན་བཞིའི་མདོག་མཐུན་ཚོམ་བུ་རེ་བཀོད་གསུངས། ། ༈ ཤཱཀྱ་ཤྲཱིའི་ལུགས་ཀྱི་རྟ་མགྲིན་མཎྜལ་གྲུ་བཞི་ཉིས་བརྩེགས་ཁར་པདྨ་དམར་པོ་འདབ་བརྒྱད་ལ་ཉི་གདན་གྱི་དབུས་སུ་ཚོམ་བུ་དམར་པོ་བཀོད་གསུངས་པ་སོགས་དམིགས་བསལ་མེད་པ་རྣམས་ལ་མངོན་རྟོགས་དང་བསྟུན་པ་ཁོ་ན་མཛད་འདུག ། ༈ བཀའ་གདམས་ཁྱུང་སེར་དང་། ཤྲ་བ་ཎ་ལྟ་བུ་ལུང་ཙམ་གྱིས་ཆོག་གསུངས་པ་ཐམས་ཅད་ལའང་བསྒོམ་ལུང་གི་དམིགས་པ་ཡོད་སྲོལ་སྣང་། ། ༈ མགོན་པོ་ཕྱག་དྲུག་པའི་གཏོར་མ་ཐོད་པར་རྟེན་གཏོར་ནོར་དབྱིབས་རྫབ་ཅན་ཅུང་ལེབ་པའི་ངོས་སུ་ནོར་བུ་མིག་གསུམ་འབུར་དོད་ཅན་དམར་པོ། མཐར་འཁོར་གྱི་གཏོར་མ་སུམ་ཆ་ཙམ་སླེབས་དང་མཐེབ་ཀྱུས་བསྐོར། མཆོད་གཏོར་རྒྱས་པ་བྲ་གཟུགས་མ་འཁོར་ལྔ་དང་མཐེབ་ཀྱུ་མང་པོས་བསྐོར་བ། ། ༈ གཤེད་དམར་གྱི་རྒྱུད་ལེའུ་ཉེར་གཉིས་པ་གསར་འགྱུར་ལས། སྐྱུ་རུ་ར་དང་། ཨ་རུ་ར་དང་། དཱུཪྺའི་རྒྱལ་པོ་དང་། པི་པི་ལིང་དང་། ན་ལེ་ཤམ་དང་། ལྕགས་ཀྱི་ཕྱེ་མ་རྣམས་སྦྲང་རྩི་དང་། ཤ་ཁ་ར་དག་གིས་ཨུ་དུམ་ཝ་རའི་ཚད་ཀྱི་རིལ་བུར་བྱའོ། །དེ་ནས་རིལ་བུ་བཟའ་བར་བྱ་སྟེ། ཟླ་བས་ཚེ་ལོ་སུམ་བརྒྱར་འགྱུར་རོ། །དང་། ལ་ཕུག་གི་ས་བོན་དང་། པྲི་ཡངྐུ་དང་། ཙནྡན་དམར་པོ་དང་། རུ་རྟ་བཏགས་ནས་དྲིལ་ཕྱིས་བྱས་པས་སྤྲེའུ་ལ་སོགས་པ་འཇོམས་སོ། །དང་། སྐྱུ་རུ་དང་། པི་པི་ལིང་དང་། ཙི་ཏྲ་ཀ་དང་། སྐམ་གཤེར་དང་། བུ་རམ་རྙིང་པ་དང་། མར་དང་སྦྲང་རྩི་མཉམ་པར་བཟའ་བར་བྱ་སྟེ། དུས་མ་ཡིན་པའི་ལུད་པ་དང་དབུགས་མི་བདེ་བ་འཇོམས་སོ། །དང་། རྩཱ་དཱུཪྺ་ལ་ཡུང་བས་བཏགས་ནས་བྱུགས་པས་རྡོ་འཇོམས་སོ། །དང་། བིལྦ་བསྲེགས་པ་བུ་རམ་གྱིས་བཟའ་བར་བྱ་སྟེ། ཁྲག་འབྱམས་པ་འཇོམས་སོ། །དང་། དགའ་མ་གཤིན་རྗེ་གཤེད་དམར་པོའི། །རྒྱུད་དུ་གངྒའི་ཀླུང་གི་ནི། །བྱེ་སྙེད་དངོས་གྲུབ་ཆེས་མང་ངོ་། །ལྷ་མོ་གུས་དང་བཅས་པས་ཉོན། །ལྷ་མོ་དག་ནི་མྱ་ངན་འདའ། །དབང་པོ་སོགས་ཀྱིས་མི་མཐོང་ངོ་། །བི་རཱུ་པཀྵ་རྣལ་འབྱོར་དབང་། །བྲམ་ཟེའི་རིགས་སུ་འབྱུང་བར་འགྱུར། །བརྩོན་འགྲུས་ཆེན་པོ་སྟོབས་ཆེན་ལྡན། །བདག་གི་ཆོས་ནི་སྟོན་པ་པོ། །འགའ་ཞིག་གིས་ནི་སྦས་པའི་རྒྱུད། །འདིས་ནི་ཐོས་ནས་ལེགས་སྦེད་ཅན། །གསང་སྔགས་འབུམ་ཕྲག་གཅིག་བཟླས་ནས། །བདག་ནི་སྒྲུབ་པར་བྱེད་པར་འགྱུར། །འཛམ་བུའི་གླིང་ན་སྣ་ཚོགས་པའི། །དངོས་གྲུབ་རབ་ཏུ་སྟེར་བར་བྱེད་པར་འགྱུར། །ཀྲྀ་ཤཱུ་བཱི་ཛཾ་མཱ་ས་ཀཾ །འདི་དག་བདུན་གྱི་རྣལ་འབྱོར་པས། །སྟེར་བར་དམིགས་པ་བྱེད་པར་འགྱུར། དང་། དང་པོར་གསོ་སྦྱོང་སྦྱིན་པར་བྱ། །ཕྱི་ནས་བསླབ་ པའི་གནས་ལྔ་སྦྱིན། །བྱེ་བྲག་སྨྲ་བ་འབད་པས་བསླབ། །མདོ་སྡེ་པ་ཡང་དེ་བཞིན་ནོ། །དགེ་བ་བཅུ་ལ་གོམས་གྱུར་ནས། །བླ་མ་ལ་གུས་འདུལ་ལ་མོས། །དབུ་མའང་སློབ་ཏུ་བཅུག་ནས་ནི། །སྔགས་འདི་ཀུན་ཏུ་བརྩམ་པར་བྱ། ། ༈ གསར་འགྱུར་ནག་པོ་ཆེན་པོ་དངོས་གྲུབ་ཀུན་ལས་བཏུས་པའི་རྒྱུད་ལས། འཇིག་རྟེན་གསུམ་པོ་སྒྲུབ་བྱེད་ཅིང་། །འདོད་པ་ཀུན་སྦྱིན་ནག་པོ་ཆེ། །གང་གིས་རྣམ་པར་ཤེས་ཙམ་གྱིས། །ལུས་ཅན་ཀུན་གྱིས་དབང་ཕྱུག་ཐོབ། །སོགས་དངོས་གྲུབ་མཐའ་ཡས་པར་སྒྲུབ་པའི་བསྔགས་པ་རྒྱ་ཆེར་གསུངས་སོ། །དེའི་ལྷ་བཞེངས་པའི་སྐབས་ལས། ཕྱག་གཉིས་པ་དང་། བཞི་པ། དྲུག་པ། བརྒྱད་པ། བཅུ་གཉིས་པ། བཅུ་དྲུག་པ། བཅུ་པ། བཅུ་བཞི་པ་སོགས་དང་། དབང་གི་མགོན་པོ་དང་། ངག་གིས་དབང་ཕྱུག་ལ་སོགས་པ་བཤད་ཅིང་། ཕྱག་བཞི་པའི་སྐབས། ཕྱག་བཞི་པ་བསྐྱེད་པར་བཤད་པར་བྱ་སྟེ། ཕྱག་རྒྱ་བཞི་རྣམ་པར་དག་པ་ལྷ་མོ་བཞི་དང་བཅས་པའོ། །སོགས་ཕྱག་དང་པོ་གཉིས་གྲི་ཐོད། ལྷག་མ་གཉིས་ཡུམ་ལ་འཁྱུད་པར་གསུངས། ། ༈ སློབ་དཔོན་སྤྱོད་པའི་བརྟུལ་ཞུགས་ཀྱིས་གདན་བཞིའི་དཀྱིལ་ཆོག་སྙིང་པོ་མདོར་བསགས་ལས། སངས་རྒྱས་ཞིང་སོགས་ཞིང་རྣམས་ལ། །ཁྱད་པར་དུ་ནི་སྦྱིན་ལ་སྤེལ། །དམངས་རིགས་སྟོང་ཕྲག་གཉིས་དག་ནི། །བྲམ་ཟེ་གཙང་མ་གཅིག་དང་འདྲ། །བྲམ་ཟེ་སྟོང་ཕྲག་གཉིས་དག་ནི། །དགེ་སློང་གཅིག་ལ་རབ་ཏུ་སྦྱར། །དགེ་སློང་སྟོང་ཕྲག་གཉིས་དག་ནི། །རྡུལ་མེད་པ་ནི་གཅིག་དང་མཉམ། །རྡུལ་མེད་སྟོང་ཕྲག་བརྒྱད་དག་ནི། །ཡེ་ཤེས་ལྡན་པ་གཅིག་དང་སྦྱར། །ཡེ་ཤེས་ལྡན་པ་སྟོང་ཕྲག་གཉིས། །སློབ་དཔོན་གཅིག་དང་མཉམ་པར་བརྟག །དེ་ལྟར་སྦྱིན་པའི་ཞིང་བྱས་ནས། །བློ་དང་ལྡན་པས་རྟག་ཏུ་སྦྱིན། །རྣལ་འབྱོར་རྩ་བའི་ཆོས་ལ་ནི། །ཞིང་བཟང་པོ་ལ་ས་བོན་གདབ། །ཅེས་སོ། ༼ན༽ །གསང་བ་རིང་བསྲེལ་གྱི་སྙིང་པོ། ཨོཾ་སརྦ་ཏ་ཐཱ་ག་ཏ་ཨུཥྞཱི་ཥ་དྷཱ་ཏུ་མུ་དྲཱ་ཎི་སརྦ་ཏ་ཐཱ་ག་ཏ་དྷརྨ་དྷ་ཏུ་བི་བྷཱུ་ཥི་ཏ་ཨ་དྷིཥྛི་ཏེ་ཧུ་རུ་ཧུ་རུ་ཧཱུྃ་ཧཱུྃ་སྭཱ་ཧཱ། བྱང་ཆུབ་རྒྱན་འབུམ་གྱི་སྙིང་པོ། ཨོཾ་སརྦ་ཏ་ཐཱ་ག་ཏ་བྱཱ་ལོ་ཀི་ཏེ་ཛ་ཡ་ཛ་ཡ་སྭཱ་ཧཱ། ། ༈ ཙནྡན་གྱི་ཡན་ལག་ཅེས་བྱ་བའི་གཟུངས་ལས། འདི་ལྟར་ས་ཆེན་པོ་འདི་ནི་མ་ལུས་པ་གྲུམ་པར་འགྱུར་ཡང་སྲིད། རྒྱ་མཚོ་ཆེན་པོ་ནི་བསྐམ་ཀྱང་སྲིད། དེ་བཞིན་དུ་རིའི་རྒྱལ་པོ་རི་རབ་ནི་འཇིག་པར་འགྱུར་ཡང་སྲིད། རླུང་ནི་ཞགས་པས་བཅིང་དུ་རུང་ཡང་སྲིད། ཟླ་བ་དང་ཉི་མ་ནི་ས་ཡི་སྟེང་དུ་ལྷུང་ཡང་སྲིད། ནམ་མཁའ་ནི་ལག་པ་གཉིས་ཀྱིས་མནན་དུ་རུང་ཡང་སྲིད། མེ་ནི་ཆུར་འགྱུར་ཡང་སྲིད། འབྱུང་བ་ཆེན་པོ་བཞི་ནི་གཞན་དུ་འགྱུར་ཡང་སྲིད། སེམས་ཅན་ཐམས་ཅད་ཀྱི་སེམས་ནི་གཅིག་ཏུ་འགྱུར་ཡང་སྲིད་ཀྱི། དེ་བཞིན་གཤེགས་པས་གསུངས་ཤིང་བྱིན་གྱིས་བརླབས་པ་ནི་གཞན་དུ་འགྱུར་མི་སྲིད་དེ། སུས་བསྐྱོད་པའམ། བསྒུལ་བར་མི་ནུས་སོ། །འདི་ནི་བདུད་སྡིག་ཅན་གྱིས་གླགས་རྙེད་པར་མི་འགྱུར་རོ། །ཞེས་སོ། ། ༈ སྒོ་མཐའ་ཡས་པས་སྒྲུབ་པའི་གཟུངས་ལས། །རྒྱལ་བས་བསྔགས་པའི་དགོན་པར་གནས་པར་གྱིས། །དེ་ལ་གནས་པ་གཞན་ལ་བརྙས་པ་མེད། །ཟབ་མོའི་བསོད་པ་འདུན་པ་བསྐྱེད་ནས་སུ། །བག་ཡོད་མགོ་ལ་འབར་བཞིན་གནས་པར་གྱིས། །ཞེས་དང་། ཀྱེ་མ་སངས་རྒྱས་བསྟན་པ་ལེགས་པར་རྙེད། །སྡུག་བསྔལ་མང་པོའི་རྩ་བ་ཁྱིམ་ཡང་སྤོངས། །ལུས་དང་ངག་དང་ཡིད་ཀྱང་ཡོངས་དག་པས། །སངས་རྒྱས་དང་ནི་ཆོས་ལ་གུས་པར་གྱིས། །དང་། མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་གཟུངས་དང་བཀླག་པ་ཡིས། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལས་ཀྱང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེས་ནི་མྱུར་དུ་བྱང་ཆུབ་མངོན་འཚང་རྒྱ། །ཞེས་སོ། ། ༈ ན་མཿསརྦ་ཏ་ཐཱ་ག་ཏ་ཧྲྀ་ད་ཡ་ཨ་ནུ་ག་ཏེ་ཨོཾ་ཀུ་རུཾ་གི་ནི་སྭཱ་ཧཱ། འདི་ལན་གཅིག་བཟླས་པས་ཀྱང་བསྐལ་པ་འབུམ་ཕྲག་བརྒྱ་སྟོང་དུ་བསགས་པའི་ལས་ཀྱི་སྒྲིབ་པ་ཡང་ཟད་པར་འགྱུར་རོ། །དེ་བཞིན་གཤེགས་པ་སྤྱིའི་སྙིང་པོ་རྗེས་སུ་དྲན་པ་རྫོགས་སོ། ། ༈ མཆོད་པའི་སྤྲིན་གྱི་གཟུངས་ལ། མཧཱ་བྷོ་དྷི་ཙིཏྟ་བཛྲ་ལས་བར་དུ་བིདྱཱ་མི་སྣང་། ། ༈ དཀོན་མཆོག་གསུམ་ལ་ཕྱག་མཚལ་ལོ། །ཨོཾ་སྨ་ར་སྨ་ར་བི་སྨ་ན་སྐ་ར་མ་ཛ་བ་ཧཱུྃ། ཞེས་བརྗོད་ཅིང་རིན་ཆེན་བརྡར་བས་རིན་པོ་ཆེའི་གདུགས་དང་རྒྱལ་མཚན་ལ་སོགས་པའི་ཆར་དཔག་ཏུ་མེད་པ་ནམ་མཁའི་ཁམས་གང་བར་བསམས་ལ་འབུལ་ལོ། །རིན་ཆེན་བརྡར་བའི་གཟུངས་རྫོགས་སོ། ། ༈ འཕགས་པ་འཇམ་དཔལ་གྱི་རྩ་བའི་རྟོགས་པ་ཆེན་པོ་ལས། གང་དུ་དྲན་པ་ཙམ་གྱིས་མཚམས་མེད་པ་ལྔ་ཡང་ཡོངས་སུ་སྦྱོང་བར་བྱེད་ན་བཟླས་པས་ལྟ་སྨོས་ཀྱང་ཅི་དགོས། དེ་ཡང་གང་ཞེ་ན། ཨོཾ་ཨཱ་བཱི་ར་ཧཱུྃ་ཁེ་ཙ་ར། གྲོགས་པོ་དག་འདི་ནི་ཡི་གེ་བརྒྱད་པ་དཔའ་བོ་ཆེན་པོ་ཞེས་བྱ་བ་གསང་བའི་སྙིང་པོའི་བདག་ཉིད་ཡིན་ཏེ། སངས་རྒྱས་ཉིད་མཉེས ་བཞིན་དུ་རབ་ཏུ་ལྟེ་བར་གནས་པ་ཡིན་ནོ། །ཞེས་དང་། ན་མཿས་མནྟ་བུདྡྷཱ་ནཱཾ། ཨ་ཙིནྟཱ་དྦྷཱཏ་རཱུ་པཱི་ཎཱཾ། ཨོཾ་ཏཱ་རེ་སྭཱ་ཧཱ། རིག་པ་ཕུག་རོན་ཞེས་བྱ་བ། །ལས་རྣམས་ཀུན་ལ་རབ་ཏུ་བསྔགས། །ཞེས་སོ། །ཕྱོགས་བཞིར་ཐེག་པ་ཆེན་པོའི་མདོ་སྡེ་བཀླག་པར་བྱ་བ་ལ་འདི་ལྟ་སྟེ། བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ལྷོ་ཕྱོགས་སུ་བཀླག་པར་བྱའོ། །འཕགས་པ་ཟླ་བ་སྒྲོན་མའི་ཏིང་ངེ་འཛིན་ནུབ་ཕྱོགས་སུ་བཀླག་པར་བྱའོ། །འཕགས་པ་སྡོང་པོས་བརྒྱན་པ་བྱང་ཕྱོགས་སུ་བཀླག་པར་བྱའོ། །འཕགས་པ་གསེར་འོད་དམ་པའི་མདོ་སྡེ་ཤར་ཕྱོགས་སུ་བཀླག་པར་བྱའོ། །ཞེས་དང་། དཀྱིལ་འཁོར་བྲི་བའི་ཚེ། བཅོམ་ལྡན་འདས། རིགས་གསུམ། བྱང་ཆུབ་སེམས་དཔའ་རྣམས་ཀྱི་གཙོ་བོ། ཀུན་ཏུ་བཟང་པོ་རྣམས་དངོས་སུ་བྲི་ཞིང་། ལྷག་མ་རྣམས་ནི་ཇི་ལྟར་རྣམ་པར་བཞག་པ་བཞིན་ཕྱག་རྒྱ་བྲི་བར་བྱའོ་གསུངས། བདག་ཉིད་ཆེན་པོས་གང་གསུངས་པའི། །རི་མོ་འདི་ནི་མདུན་བཞག་ན། །སྔགས་རྣམས་མ་ལུས་འགྲུབ་པར་འགྱུར། །ཞེས་དང་། རས་བྲིས་མཐོང་བའི་སྐྱེ་བོ་ཡི། །བསོད་ནམས་ཐོབ་པ་དོན་ཡོད་པ། །བསྐལ་པ་བྱེ་བ་རྣམས་སུ་ཡང་། །བརྗོད་པར་ཡང་ནི་མི་ནུས་སོ། །ཞེས་དང་། བསྐལ་པ་བྱེ་བར་མི་ཟད་ལས། །རས་རིས་མཐོང་བ་ཙམ་གྱིས་གྲོལ། །རས་རིས་མཐོང་བ་ཙམ་གྱིས་ནི། །སྐད་ཅིག་དེ་ལ་གྲོལ་བར་འགྱུར། །སངས་རྒྱས་བྱེ་བ་སྟོང་ཕྲག་ནི། །མཐོང་བ་ཙམ་གྱིས་གྲོལ་འགྱུར་ཏེ། །རས་བྲིས་མཐོང་བ་ཙམ་གྱིས་ཀྱང་། །དེ་ཡི་མོད་ལ་གྲོལ་པར་འགྱུར། །ཞེས་དང་། དད་པ་མེད་པའི་མི་ལ་ནི། །དཀར་པོའི་ཆོས་རྣམས་མི་སྐྱེ་སྟེ། །ས་བོན་ཚིག་པར་གྱུར་པ་ལས། །མྱུ་གུ་སྔོན་པོ་ཇི་བཞིན་ནོ། །དད་དང་ལྡན་པའི་མི་དག་ལ། །སངས་རྒྱས་ལས་ནི་འགྲུབ་འགྱུར་ཏེ། །སྔགས་རྣམས་ཐམས་ཅད་ཁྱད་བར་དུ། །དད་པ་མེད་ལ་མི་འགྲུབ་བོ། །ཞེས་དང་། མར་མེའི་སྣོད་གསེར་རམ་དངུལ་ལམ་ཟངས་སམ་སའི་རང་བཞིན་ལ་ཤིང་ཏུ་རུཏྐའི་འབྲུ་མར་གྱིས་བཀང་བའམ་དྲི་ཞིམ་པོའི་འབྲུ་མར་གྱིས་བཀང་བའམ་བའི་མར་གྱིས་ཡོངས་སུ་བཀང་བའི་མར་མེ་རས་ཀྱི་དུམ་བུ་སར་པས་སྙིང་པོ་བྱས་ཏེ་རས་བྲིས་ཀྱི་མདུན་དུ་འབུམ་ཕྲག་གཅིག་གི་མར་མེ་དབུལ་བར་བྱའོ། །ཞེས་དང་། ཆོས་ལྡན་རྒྱལ་པོ་ཡོད་པ་དང་། །གཙང་སྦྲ་ཡོད་པའི་སྐྱེ་བོ་ཡོད། །ཕ་དང་མ་ལ་གུས་པ་དང་། །བྲམ་ཟེའི་རིགས་ནི་ཡོད་པ་ཡི། །གནས་དེར་ལྷ་རྣམས་འགྲུབ་འགྱུར་ཏེ། །གཞན་དུ་འགྲུབ་པ་མ་ཡིན་ནོ། །ཞེས་དང་། སྟོབས་བཅུ་ལྡན་པས་བཤད་པའི་ཞིང་། །བྱང་ཕྱོགས་ཡོད་པའི་རི་དག་དང་། །ཁ་ཆེ་དང་ནི་རྒྱ་ཡུལ་དང་། །བལ་པོ་དེ་བཞིན་མང་ཡུལ་དང་། །རྒྱ་ཡུལ་ཆེ་དང་ལི་ཡུལ་དང་། །དེ་དག་མ་ལུས་གྲུབ་པའི་ཞིང་། །ཞེས་དང་། ཆུ་ཀླུང་རྒྱ་མཚོའི་འགྲམ་དག་གམ། །དེ་བཞིན་རི་བོ་ཁ་བ་ཅན། །རི་ཡི་རྒྱལ་པོ་འབིགས་བྱེད་ལ། །ལས་གྱི་མཆོག་ནི་བསྒྲུབ་པར་བྱ། །ཞེས་དང་། དེ་ནས་ཉི་མ་ཕྱེད་ཤར་ན། །སྔགས་བཟླས་དེ་ཚེ་སྤང་བར་བྱ། །སྔགས་བཟླས་དེ་ཚེ་བཏང་བ་ན། །སྡོམ་བརྩོན་མཆོད་ཡོན་སླར་གཤེགས་གསོལ། །དེ་ཚེ་བཏང་བའི་ལྷག་དུས་ལ། །ཐུབ་པའི་བསྟན་ལ་དགེ་བ་བྱ། །དམ་ཆོས་བཀླག་ལ་སོགས་པ་ནི། །ཤེས་རབ་ཕ་རོལ་ཕྱིན་ལ་སོགས། །གླེགས་བམ་ས་བཅུ་ཞེས་བྱ་བ། །མཆོད་དང་བཀླག་པ་རྟག་ཏུ་བྱ། །ཞེས་དང་། འཁོར་བའི་རྒྱ་མཚོའི་ཆུ་འབྱུང་བ། །ཟོ་ཆུན་གྱི་ནི་རྣམ་པ་བཞིན། །འགྲོ་བ་དེ་དག་མི་བཟད་པའི། །སྡུག་བསྔལ་ཆུ་ཡིས་ཁྱབ་པ་ཡིན། །སངས་རྒྱས་ཀྱིས་ནི་བུད་མེད་དག །གཅིག་ཏུ་སྡུག་བསྔལ་རྩ་བར་གསུངས། །ཉན་ཐོས་བྱང་ཆུབ་སེམས་དཔའ་དང་། །རང་རྒྱལ་ཐུབ་པས་དེ་བཞིན་གསུངས། །ཞེས་དང་། ཟློས་པ་འདི་ལ་ཚུལ་ཁྲིམས་ཉམས། །དེ་ལ་གུས་པ་མཆོག་མེད་ཅིང་། །གྲུབ་པ་འབྲིང་ཡང་ཡོད་མེད་དེ། །གྲུབ་པ་ཐ་མའང་ཡོད་མ་ཡིན། །ཚུལ་ཁྲིམས་འཆལ་བ་ཐུབ་དབང་གི །སྔགས་འགྲུབ་པར་ནི་མ་གསུངས་ཏེ། །མྱ་ངན་འདས་གྲོང་འགྲོ་བ་ཡི། །ཡུལ་དང་ཕྱོགས་ཀྱང་མ་ཡིན་ནོ། །བྱིས་པ་ངན་པ་འདི་ལ་ནི། །སྔགས་གྲུབ་པ་ནི་ག་ལ་ཡོད། །སྐྱེ་བོ་ཚུལ་ཁྲིམས་འཆལ་འདི་ལ། །དེ་ལ་བདེ་འགྲོ་ག་ལ་ཡོད། །མཐོ་རིས་སུ་ཡང་མི་འགྱུར་ཞིང་། །བདེ་བ་མཆོག་ཏུའང་མི་འགྱུར་ན། །རྒྱལ་བས་གསུངས་པའི་སྔགས་རྣམས་ནི། །འགྲུབ་པར་འགྱུར་བ་ལྟ་ཅི་སྨོས། །ཞེས་དང་། བློ་ལྡན་གཡེང་བ་མེད་ལ་དགའ། །གཙང་ཞིང་མ་ཆགས་ཤེས་ཉེན་ཅན། །རིགས་མཐོ་བརྟན་དང་དཔའ་བ་དང་། །བརྩེར་ལྡན་མཐོང་ན་དགའ་བ་དང་། །ཆོས་དང་ཆོས་མིན་རྣམ་དཔྱོད་ཤེས། །དེ་ལ་གྲུབ་པ་རྙེད་མི་དཀའ། །ཞེས་དང་། བཀྲེས་དང་སྐོམ་པས་ཉེན་གྱུར་ན། །སྔགས་ཀྱི་དོན་ལ་རྟེན་མི་ནུས། །ཁ་ཟས་མང་དང་ཉུང་ཟོས་ན། །སྔགས་རྣམས་ཐོབ་པར་མི་ནུས་སོ། །དེ་ཉིད་ཕྱིར་ན་ཐུབ་དབང་གིས། །སེམས་ཅན་ཟས་ཀྱིས་གནས་པའོ་ཞེས། །ལུས་ཅན་རྣམས་ལ་གསུངས་པ་སྟེ། །དང་། གཟུགས་ཀྱི་ཁམས་ན་གནས་པ་རྣམས། །བསམ་གཏན་ཟས་ལ་སྤྱོད་པ་ཅན། །གཟུགས་མེད་ཁམས་ཀྱི་ལྷ་དག་ནི། །ཏིང་འཛིན་འབྲས་བུ་སྤྱོད་པའོ། །སྲིད་པ་བར་མའི་སེམས་ཅན་རྣམས། །དྲི་ཡི་ཟས་སུ་རབ་ཏུ་བསྒྲགས། །དེ་བཞིན་འདོད་ཁམས་སེམས་ཅན་དག །སྣ་ཚོགས་ཟས་ལ་སྤྱོད་པ་ཡིན། །དེ་ཉིད་ཕྱིར་ན་ཐུབ་དབང་གིས། །ལས་ཀྱི་རྒྱུ་ཡིས་གསུངས་པ་ནི། །སེམས་ཅན་ཟས་ཀྱིས་གནས་པ་ཞེས། །ཐམས་ཅད་ལ་ནི་རབ་ཏུ་བསྒྲགས། །དང་། སྤྱོད་པ་ཡོངས་སུ་དག་པ་དང་། །དགེ་ཞིང་ཚངས་པར་སྤྱོད་པ་དང་། །ཁ་ཟས་ཚོད་ནི་རན་པ་ལ། །དེ་ལ་གྲུབ་པ་རྙེད་མི་དཀའ། དང་། རྒྱུད་རྣམས་ཀུན་ལ་བསྔགས་པ་ཡི། །གཙང་སྦྲ་ལྔ་ཡི་ཆོ་ག་གསུངས། །ལུས་ཀྱི་དག་དང་མ་དག་དང་། །ཡིད་ཀྱིས་དག་པ་ཡིན་པར་བསྟན། །བཞི་པ་བདེན་པའི་དག་བརྫུན་སྤངས་པ། པ་སྟེ། །ཆུ་ཡི་དག་པ་ལྔ་པར་བཤད། །ཅེས་དང་། ལོག་པར་སྨྲ་བར་གྱུར་པ་དང་། །རྨོངས་པས་ལོག་པར་བརྗོད་པ་ཡིས། །འབྱུང་པོ་རྣམས་ལ་སླུ་བྱེད་པ། །དེ་ལ་སྔགས་གྲུབ་ག་ལ་ཡོད། དང་། སྔགས་དང་རྒྱུད་ཀྱི་དོན་ལྡན་པའི། །འབྲས་བཅས་ལས་ནི་བརྩམ་པར་བྱ། །བརྩམས་པའི་ལས་ནི་བརྩམ་བྱ་སྟེ། །ལས་མེད་ཉིད་ལ་བརྩམ་མི་བྱ། །དང་། སྔགས་པས་ཟློས་མཐར་ངལ་བསོ་ཞིང་། །ཇི་སྲིད་དུས་སུ་བསྡད་པར་བྱ། །ཟློས་པ་དུས་ལ་བབས་པ་ན། །དེར་ནི་བཟླས་པར་བྱ་བ་ཡིན། །དང་། གལ་ཏེ་དེས་ནི་རྨི་ལམ་ན། །དགེ་བའི་རྨི་ལམ་མཐོང་ན་ནི། །འབྲས་བཅས་རྨི་ལམ་སྟོན་པ་སྟེ། །དེར་ནི་གྲུབ་པ་སྟོན་པ་ཡིན། །དང་། མྱ་ངན་མེད་ཤིང་ཞི་དོན་དུ། །སློབ་པ་དག་ནི་རབ་ཏུ་བསྔགས། །དང་། ཧ་ཅང་མི་སྐམ་རློན་པའང་མིན། །ཚིག་མིན་ལས་ནི་བརྩམས་མི་བྱ། །དང་། ཤར་དུ་བལྟས་པས་ཞི་བ་འགྲུབ། །བྱང་དུ་བལྟས་པས་རྒྱས་པའོ། །དང་། ཞི་དང་རྒྱས་པའི་ལས་ལ་ནི། །ཤིང་རློན་དག་ནི་རབ་ཏུ་བསྔགས། །དང་། གཙང་བའི་རྩྭ་ཡི་རྩ་བས་ནི། །མེ་སྒྲོན་ཚད་དང་ལྡན་བྱས་ནས། །དེ་ནས་ཆང་པར་བཅངས་ནས་ནི། །འབད་པས་མེ་ནི་སྦར་བར་བྱ། །ཁ་ཡི་རླུང་གིས་མི་བྱ་སྟེ། །རྟག་ཏུ་གོས་ཀྱི་མཐས་ཀྱང་མིན། །ཤམ་ཐབས་བླ་གོས་རྣམ་པར་སྤངས། །གོས་གཞན་དག་ནི་བཀག་མ་ཡིན། །དང་། རླུང་གཡབ་གཙང་དང་དེ་བཞིན་གོས། །ལོ་མས་ཀྱང་ནི་རླུང་གཡབ་བྱ། །དང་། ལག་པ་དེ་ནི་གཡོན་པ་ཡིས། །ལན་གསུམ་བར་དུ་ཆུས་གཏོར་ནས། །དང་། ཞོ་དང་མར་གྱིས་སྦག་པ་དང་། །སྦྲང་རྩིས་སྦག་པའི་ཡམ་ཤིང་གིས། །རྒྱས་པའི་ལས་ནི་བྱ་བའི་ཕྱིར། །སྔགས་ཀྱིས་ཀུན་ཏུ་སྦྱིན་སྲེག་བྱ། །དང་། ཞི་བ་ཁ་དོག་དཀར་པོ་ནི། །རྒྱལ་བ་མཆོག་གིས་རྟག་ཏུ་བསྔགས། །དང་། དེ་བཞིན་རྟག་ཏུ་མདོག་དམར་ལས། །རྒྱས་པར་འགྲུབ་པར་འདོད་པ་ཡིན། །བྱང་ཆུབ་སེམས་དཔའ་སེམས་དཔའ་ཆེ། །ས་བཅུ་ལ་ནི་ཡང་དག་གནས། །སྦྱིན་སྲེག་ལས་ཀྱིས་འགུགས་བྱེད་ན། །ས་སྟེང་མི་རྣམས་སྨོས་ཅི་དགོས། །དང་། ཏིལ་ལ་མར་གྱིས་བཏགས་པའམ། །ཞོ་ལ་སྦྲང་རྩི་བསྲེས་པ་ཡིས། །ལས་ཀུན་ལ་ནི་སྦྱིན་སྲེག་ནི། །སྟོང་རྩ་བརྒྱད་ནི་རྟག་ཏུ་བྱ། །དང་། །མེ་ཡི་ལས་དང་དེ་བཞིན་གཟུགས། །རས་རིས་མདུན་དུ་བརྩམ་བྱས་ན། །དེ་ནི་སྔགས་རྣམས་འགྲུབ་འགྱུར་ཞེས། །སྔོན་གྱི་བདེར་གཤེགས་རྣམས་ཀྱིས་གསུངས། །ཞེས། མཚམས་མེད་ལྔ་པོ་བྱེད་པ་དང་། །ཚུལ་འཆལ་བློ་ནི་ཆུང་བ་དང་། །སྡིག་པ་ཀུན་ལ་འཛུད་བྱེད་པ། །ཁྱབ་བདག་མཐོང་བ་དཀྱིར་འཁོར་ཙམ་གྱིས་གྲོལ། །དང་། དང་པོའི་ཐུན་གྱི་རྨི་ལམ་གང་། །བད་ཀན་ལས་གྱུར་ཤེས་པར་བྱ། །གཉིས་པར་གང་བྱུང་མཁྲིས་པ་སྟེ། །འཇིག་རྟེན་ལ་ཡོད་སྨད་པ་ཡིན། །གསུམ་པ་རླུང་བྱུང་ཤེས་པར་བྱ། །བཞི་པ་བདེན་པར་འབྱུང་བ་ཡིན། །བད་ཀན་རྨི་ལམ་དང་པོ་ནི། །འདི་འདྲར་རྟག་ཏུ་མཐོང་བ་ཡིན། །ནོར་བུ་ཤེལ་གྱི་ཁང་པ་ནི། །ཀུན་ནས་མུ་ཏིག་ཕྲེང་བ་ཅན། །ཨ་མྲའི་ཤིང་ཚོགས་རབ་མང་པོ། །བདག་ཉིད་ཆུ་ནང་བྱིང་བ་མཐོང་། །སོགས་ཉེས་པ་གསུམ་གྱི་རྨི་ལམ་རྒྱ་ཆེར་བསྟན་ཅིང་། གོང་དུ། སངས་རྒྱས་ཉན་ཐོས་བསེ་རུ་ནི། །གལ་ཏེ་འདི་ཡིས་རྨི་ལམ་མཐོང་། །སྔགས་པ་དེ་ནི་བྱ་བ་ཡི། །འབྲས་བཅས་ངེས་པར་འགྲུབ་པར་འགྱུར། །སོགས་གསུངས་སོ། །འཇམ་དཔལ་ཞེས་བྱ་ཡོངས་སུ་བཏགས་པ་ནི། །ཁྱོད་ཀྱི་མིང་ནི་སྔོན་གྱི་རྒྱལ་བས་མཛད། །ཁྱོད་ཀྱི་མིང་དུ་འདི་ལྟར་བཏགས་བྱས་པ། །འདས་དང་མ་བྱོན་ད་ལྟར་སངས་རྒྱས་ཀྱི། །གཞན་དུ་མ་ཡེངས་རྩེ་གཅིག་ཡིད་དག་པས། །ཁྱོད་ཀྱི་མིང་ནི་འཁོར་གྱི་ནང་དུ་ཐོས། །དེས་ནི་འདི་ལ་ཤེས་དང་ཞི་བ་ཐོབ། །སྲིད་མཐར་བྱང་ཆུབ་མཆོག་ནི་ཁྱད་པར་ཐོབ། །སྔགས་རྣམས་མ་ལུས་འགྲུབ་པར་འགྱུར་བ་དང་། །འགྲོ་བའི་སྐྱེ་གནས་མཆོག་ནི་རབ་ཐོབ་ཅིང་། །རྟག་ཏུ་ཆོས་མཆོག་ལ་ནི་ཡང་དག་གནས། །བགེགས་རྣམས་རྣམ་པར་སྤོང་ཞིང་གྲུབ་པ་ཐོབ། །འདོད་པའི་སྔགས་རྣམས་མ་ལུས་འགྲུབ་པར་བྱེད། །བྱང་ཆུབ་ཤིང་དབང་དྲུང་དུ་མྱུར་དུ་འགྲོ། །སོང་ནས་བྱང་ཆུབ་མཆོག་ནི་ཐོབ་པར་བྱེད། །སོང་ནས་སེམས་ཅན་ཕན་ཕྱིར་དེར་འདུག་སྟེ། །སངས་རྒྱས་བྱང་ཆུབ་འཁོར་ལོ་རབ་ཏུ་བསྐོར། །དེ་ལྟར་རྒྱལ་བའི་ཡོན་ཏན་གཙོ་བོས་གསུངས། །འཇམ་དཔལ་ཞེས་ནི་ཁྱོད་ཀྱི་མིང་དྲན་པ། །ཡོན་ཏན་བསམ་མི་ཁྱབ་ཅེས་རྒྱལ་བས་གསུངས། །རྒྱལ་བའི་གཙོ་བོ་སྔར་གཤེགས་ཐམས་ཅད་ཀྱིས། །རྟག་ཏུ་ཁྱོད་ཀྱི་མཐུ་ནི་བསྟན་པ་ཡིན། །གཞོན་ནུ་དག་པ་ཁྱེད་ཀྱི་སྔགས་རྟོག་པ། །བསྐལ་པ་གྲངས་མེད་རྟག་ཏུའང་སྟོན་མི་ནུས། །ཡིད་འོང་བཟང་པོ་རྣར་ནི་སྙན་པ་དང་། །དགའ་བསྐྱེད་སྙན་པ་དང་ནི་རྗེས་སུ་མཐུན། །སེམས་ནི་ཚིམ་བྱེད་བདེ་བ་རབ་ཏུ་སྦྱིན། །འཇམ་ཞེས་བྱ་བར་སངས་རྒྱས་ཡང་དག་གསུང་། །དང་། ཇི་ལྟར་སཱ་ལུའི་འབྲུ་རྣམས་ནི། །མྱུ་གུས་རྣམ་པར་ཤེས་པར་བྱེད། །དེ་བཞིན་གྲུབ་པའི་རྫས་རྣམས་ནི། །མཚན་ཉིད་ཀྱིས་ནི་རྣམ་པར་ཤེས། །དང་། རྒྱུ་མཚན་དང་ནི་སྤྱོད་པ་དང་། །སྐྱེ་བ་དང་ནི་རིགས་དང་གནས། །རྟག་ཏུ་ལ་ཉེ་སྣ་ཚོགས་པ། །ལས་དེ་ལས་ནི་ཉེ་བར་དམིགས། །དང་། གྲུབ་དང་མ་གྲུབ་མཚན་མ་ནི། །རྐྱེན་གྱི་དོན་ལ་ལྟོས་པ་ཡིན། །རྒྱུ་མཚན་སྤྱོད་དང་མཚན་མ་ནི། །རྐྱེན་ལ་མངོན་པར་རབ་ཏུ་བརྟག །དེ་བས་རྣམ་ཀུན་འབད་ནས་ནི། །རྐྱེན་ལ་རགས་ལས་བྱ་བ་ཡིན། །ཟློས་པའི་སྔགས་རྣམས་རྟག་ཏུ་ནི། །གྲུབ་པ་རྒྱུ་ལ་ལྟོས་པ་ཡིན། །འདི་དག་རྐྱེན་གྱི་ཡན་ལག་ནི། །ལས་ནི་བདག་གིར་བྱེད་པས་མཚོན། །ཅེས་སོགས་ཇི་ལྟར་སཱ་ལུའི་འབྲས་བུ་ཕུན་སུམ་ཚོགས་པ་འབྱུང་མི་འབྱུང་མྱུ་གུའི་དུས་ནས་ཤེས་པ་ལྟར། སྔགས་འགྲུབ་མི་འགྲུབ་ལྟས་ཀྱི་བྱེད་ལས་ཤེས་ཤིང་། ལྟས་ཀྱང་མཚན་མ་དང་། རྨི་ལམ་དང་། གཞན་གྱི་སྤྱོད་ཚུལ་སོགས་ལ་ཉེ་ལས་ཤེས་པས་ན། རྨི་ལམ་ངན་པ་གཙོ་བོར་གྱུར་པའི་ལྟས་མི་ཤིས་པ་བྱུང་ན་དེ་དག་ཟློག་ཅིང་། ཤིས་པའི་ལྟས་ཀྱི་བྱེད་ལས་ཆུད་མི་ཟ་བར་བདག་གིར་འགྱུར་བའི་རིག་སྔགས་ནི། རྨི་ལམ་ངན་པ་བཟོད་དཀའ་དང་། །མ་རུང་སེམས་ཅན་ཟློག་བྱེད་པ། །རྒྱལ་བ་སཱ་ལའི་དབང་པོ་ཡི། །སྔོན་གྱི་སྔགས་རྒྱལ་ཡོངས་གསུངས་པ། །ལྷ་ཡི་ཚོགས་དང་གཟའ་རྣམས་དང་། །རྒྱུ་སྐར་སྐར་མཁན་རྣམས་ཉོན་ཅིག །ཅེས་སོགས་མཉན་པར་གདམས་ནས་གཙུག་ཏོར་འབར་བའི་སྔགས་ཕན་ཡོན་དང་བཅས་པ་གསུངས་སོ། །འདིའི་སྔགས། ཏིཥྛ་ཥྟི་ཕཊ་ཕཊ་སྭཱ་ཧཱ། ཞེས་སྣང་། ལས་བདག་གིར་བྱེད་པའི་རྐྱེན་གྱི་ལེའུ་རབ་འབྱམས་ལས་བཅུ་དྲུག་པའི་སྐབས་སུ་སྣང་ངོ་། །རྒྱུ་སྐར་ལྷག་མ་གཙོ་བོ་ནི། །དུས་ཀྱི་ཐ་མར་འབྱུང་བ་མིན། །ཞེས་སྣང་ནའང་། རྒྱུ་སྐར་གཙོ་ལས་ལྷག་མ་ནི། །ཞེས་བསྒྱུར་ན་གོ་བདེ་བར་སེམས་ཏེ། གཙོ་བོ་ཉེར་བདུན་ལས། སྐར་ཕྲན་གཞན་གྱི་ནུས་པ་དུས་མཐར་མི་འབྱུང་། ཞེས་པའི་དོན་དུ་སྣང་བས་སོ། །ཡང་། ཤེས་རབ་ཆེན་པོ་འཇམ་པའི་དབྱངས། །བྱིས་པ་གཞོན་ནུའི་གཟུགས་དང་ལྡན། །འཇིག་རྟེན་འདིར་ནི་ཀུན་ཏུ་རྒྱུ། །སེམས་ཅན་རྗེས་སུ་བཟུང་བར་བཟོད། །དེ་ཡི་དུས་སུ་གྲུབ་པ་ནི། །འཇམ་པའི་དབྱངས་ནི་རབ་ཏུ་མཐོང་། །རྒྱུ་སྐར་སྐར་མའི་དཔྱད་ཤེས་པ། །དེ་ཡི་ཚེ་ན་འབྱུང་བར་འགྱུར། །སོགས་གསུངས་པ་འདིས་ནག་རྩིས་གཙོ་བོར་ལུང་བསྟན་པར་རྟོགས་ཏེ་རྒྱུ་མཚན་མང་པོ། །ཐ་སྐར་སྣར་མ་ཉིད་དང་ནི། །རྒྱལ་དང་ཁྲུམས་ནི་སྟོད་སྨད་གཉིས། །ནམ་གྲུ་དང་ནི་ལྷ་མཚམས་དག །བཟླས་པའི་དུས་སུ་རབ་ཏུ་བསྔགས། །དང་། ཕུར་བུ་པ་སངས་ཟླ་བ་དང་། །གཟའ་ལྷག་མཆོག་ནི་ལས་ཀུན་ལ། །གཟའ་མཆོག་འདི་དག་རྟག་ཏུ་ནི། །བཞི་པོ་ཚེས་དང་ལྡན་པ་ནི། །ས་སྟེང་འཇིག་རྟེན་ཀུན་ཏུ་ནི། །འགྲོ་བའི་ལས་ནི་གྲུབ་པར་བྱེད། །ཅེས་དང་། སེ་གོལ་བརྒྱ་ཡི་ཚོགས་དག་ལ། །རྩ་རྒྱུན་གཅིག་ཏུ་བསྟན་པ་ཡིན། །རྩ་རྒྱུན་བཞི་ལ་ཆུ་ཚོད་བསྟན། །ཆུ་ཚོད་བཞི་ལ་ཐུན་ཞེས་བྱ། །ཐུན་བཞི་ལ་ནི་ཉིན་པར་ཏེ། །མཚན་མོ་དག་ཀྱང་དེ་བཞིན་བསྟན། །དེ་ལྟར་བརྒྱད་དང་ལྡན་པ་ལ། །ཉིན་མཚན་དུ་ནི་རབ་ཏུ་བརྟག །དང་། ཉི་མ་བཅོ་ལྔ་ཉིད་ལ་ནི། །ཟླ་བ་ཕྱེད་ནི་རབ་ཏུ་བསྟན། །ཟླ་ཕྱེད་གཉིས་ལ་ཟླ་བ་ཞེས། །རྩིས་ཤེས་འཇིགས་པ་མེད་པས་བསྟན། །དེ་བཞིན་ཟླ་བ་ཟླ་དྲུག་གིས། །སྒྲ་གཅན་གྱིས་ཀྱང་འཛིན་པ་ཡིན། །དེ་ནས་ཟླ་བ་བཅུ་གཉིས་ལ། །ལོ་ཡི་སྒྲར་ནི་རབ་ཏུ་བསྒྲགས། །དེ་ནས་ལོ་ནི་བཅུ་གཉིས་ལ། །ལོ་ཆེན་ཞེས་ནི་དེ་ལ་བྱ། །གཟའ་དང་རྒྱུ་སྐར་ཕྱིན་ཅི་ལོག །ལྷ་མིན་དབང་པོ་ཐམས་ཅད་ཀྱང་། །དེ་ནས་ལོ་ནི་བཅུ་གཉིས་ལ། །འདིར་ནི་དགེ་དང་མི་དགེ་བྱེད། །ཅེས་དང་། ལེ་བརྒན་དུ་བཙོས་པའི་སྐུད་པ་ལན་བདུན་བཟླས་བརྗོད་བྱས་ཏེ་མདུད་པ་བོར་ན་བཅིང་བར་འགྱུར་རོ། །དང་། སློང་མོའི་ཟས་ཟ་ཞིང་ཆོ་འཕྲུལ་ཆེན་པོའི་ཟླ་ཕྱེད་ཀྱི་ཟླ་བ་ལ་ནུབ་གསུམ་སྨྱུང་བར་བྱས་ལ། ཟླ་བ་གཟས་ཟིན་པ་ན་བ་ནག་མོའི་འོ་མ་ལ་ལན་བརྒྱ་རྩ་བརྒྱད་མངོན་པར་བསྔགས་ཏེ་འཐུང་ན་བཅུད་ལེན་གྱི་ཡོན་ཏན་དང་ལྡན་པར་འགྱུར་རོ། །དང་། རྩྭ་དཱུཪྺའི་འཇག་མ་ལ་ཞོ་དང་སྦྲང་རྩི་མར་གྱིས་བཏགས་པ་སྟོང་རྩ་བརྒྱད་ནུབ་བཅུའི་བར་དུ་སྦྱིན་སྲེག་བྱས་ན་དུས་མ་ཡིན་པར་འཆི་བ་རབ་ཏུ་ཞི་ཞིང་ཚེ་རིང་བར་འགྱུར་རོ། །དང་། སྲུང་བའི་སྐུད་པས་ནི་ནད་ཐམས་ཅད་ལས་གྲོལ་བར་འགྱུར་རོ། །དང་། ཤུ་དག་ལ་ཞོ་དང་སྦྲང་རྩི་དང་མར་གྱིས་བཏགས་ཏེ་སྦྱིན་སྲེག་བྱས་ན་རྒོལ་བ་ཐམས་ཅད་ལ་ལན་འདེབས་ནུས་པར་འགྱུར་རོ། །དང་། རྒྱ་དང་རྒྱ་ནི་ཆེ་ཉིད་ལ། །འཇམ་པའི་དབྱངས་ནི་རབ་འགྲུབ་འགྱུར། །གང་ཡང་དེ་ནི་སྔགས་རྣམས་ནི། །དེར་ནི་རབ་ཏུ་འགྲུབ་པར་འགྱུར། །དང་། ཁ་བ་ཅན་རིའི་ནང་བྱུང་བ། །དེར་ནི་ཐམས་ཅད་འགྲུབ་པར་འགྱུར། །སྐྱེ་བོ་སྐལ་ལྡན་བཟང་པོ་ནི། །ཞི་བའི་ལས་ནི་རྩོམ་པར་བྱེད། །དང་། རྒྱལ་བས་གསུངས་པའི་སྔགས་ཀྱིས་ནི། །ཞི་བའི་ལས་ནི་བྱ་བ་ཡིན། །རིན་ཆེན་རིགས་ཀྱི་བྱ་བ་ནི། །རྒྱས་པའི་ལས་ནི་ཐམས་ཅད་དོ། །མངོན་པར་སྤྱོད་པའི་ལས་རྣམས་ནི། །རྡོ་རྗེའི་རིགས་ཀྱིས་བྱ་བ་ཡིན། །དང་། མཆོག་དང་བར་དང་ཐ་མ་ནི། །དེ་དག་རྣམ་པ་གསུམ་འབྱེད་པ། །ཞི་དང་རྒྱས་པ་དག་དང་ནི། །མངོན་སྤྱོད་པར་ནི་འདོད་པ་ཡིན། །དང་། བརྒྱ་ཡི་གྲངས་ཀྱིས་བགྲང་བ་ནི། །དེ་དག་བཅུ་ལ་སྟོང་ཕྲག་གཅིག །སྟོང་ཕྲག་བཅུ་ལ་ཁྲི་ཡིན་ཏེ། །ཁྲི་བཅུ་ལ་ནི་འབུམ་ཕྲག་གཅིག །འབུམ་ཕྲག་བཅུ་ལ་ས་ཡ་སྟེ། །ས་ཡ་བཅུ་ལ་བྱེ་བ་ཡིན། །བྱེ་བ་བཅུ་ལ་དུང་ཕྱུར་ཏེ། །དུང་ཕྱུར་བཅུ་ལ་ཐེར་འབུམ་ཡིན། །སོགས་རྒྱ་ཆེར་བསྟན། །འཇིག་རྟེན་དང་ནི་མྱ་ངན་འདའ། །སྟོང་པའི་སྟེང་ནི་སྟོང་གྱུར་ན། །ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། །ཁ་བ་ཅན་ནང་ཡོད་པ་ཡིན། །དང་། སེམས་ཅན་མཐའ་ནི་བསམ་མི་ཁྱབ། །རྣམ་པར་སྨིན་པའང་༴ སངས་རྒྱས་ཆོས་ཀྱང་༴ བྱང་ཆུབ་སྤྱོད་པའང་༴ གདུལ་བའི་སེམས་ཅན་ལ་བརྟེན་ནས། །ཕན་མཛད་སྤྱོད་པ་བསམ་མི་ཁྱབ། །བྱང་ཆུབ་སེམས་དཔའི་སྤྱོད་པ་རྣམས། །བསམ་མི་ཁྱབ་པར་ཡོངས་སུ་བསྟན། །ཅེས་སོ། །ཆོས་འདི་དག་ནི་མདོར་བསྡུ་ན། །དགེ་དང་མི་དགེ་བསྟན་པ་ཡིན། །རྟག་ཏུ་མི་དགེ་སྤང་བྱ་སྟེ། །དུས་རྣམས་ཀུན་ཏུ་དགེ་བ་སྤྱད། །དང་། གངྒཱའི་བྱང་ཕྱོགས་འགྲམ་དག་ནི། །ཆུ་བོ་ཆེན་པོ་དེ་ལས་གཞན། །ཁ་བ་ཅན་རིའི་ལྷོ་ཕྱོགས་ཆར། །སཱ་ལའི་ནགས་ཞེས་བྱ་བ་འབྱུང་། །དེ་ཚེ་ནུབ་ཕྱོགས་བལྟས་པའི་མལ། །དེར་ནི་གནས་སུ་འབྱུང་བར་འགྱུར། །དེ་ཚེ་ཆུ་བོ་རབ་དགའ་བ། །བཟང་པོ་གསེར་ལྡན་འགྲམ་དག་ཏུ། །ལྷ་རྣམས་ཀུན་གྱི་ཚོགས་ལ་སོགས། །འདུས་པ་དག་ནི་འབྱུང་བར་འགྱུར། །དང་། ཡི་གེ་ཧཱུྃ་དེ་ཡི་གེ་གཅིག །ལས་རྣམས་མ་ལུས་བྱེད་ཅིང་དག །སྔགས་ཀྱི་རྒྱལ་པོ་བཟླས་ཙམ་གྱིས། །འདི་ནི་བཟླས་པ་ཙམ་གྱིས་བྱེད། །འགྲོ་དང་གནས་པའི་དུས་དག་དང་། །དེ་བཞིན་དགྲ་རྐུན་རེངས་པར་བྱེད། །སེམས་ཅན་གདུག་པ་ཐམས་ཅད་ལ། །བཟླས་པ་ཙམ་གྱིས་རེངས་པར་བྱེད། །དང་། མ་སྐྱེས་དགྲ་ཡི་བུ་ཨུའི་མིང་ཅན་གྱིས། །དེས་ནི་སྟོན་པའི་གསུང་རབས་དག །རྒྱ་ཆེར་འབྲི་བར་བྱེད་འཇུག་འགྱུར། །དང་། རྒྱལ་པོ་དེ་ལས་གཞན་པ་ཡང་། །ཟླ་བ་སྦས་ཞེས་བྱ་བ་འབྱུང་། །གནོད་སྦྱིན་ཆུ་དབང་གྲུབ་པ་སྟེ། །རྒྱལ་སྲིད་གནོད་པ་མེད་པར་བྱེད། །དང་། དེ་བཞིན་གཤེགས་པའི་བསྟན་འདི་ལ། །རྣམ་པ་སྣ་ཚོགས་བྱ་བ་བྱེད། །བྱང་གི་ཕྱོགས་ལ་བརྟེན་ནས་ནི། །དེ་ཡི་ཚེ་ན་འབྱུང་བར་འགྱུར། །ལྷ་ལྡན་ཡུལ་ཞེས་བྱ་བ་ན། །གངས་ཅན་མི་ཡི་ནང་གནས་པའི། །རྒྱལ་བ་མི་ཡི་ལྷ་ཞེས་པ། །ལིཙྪ་བཱི་རྣམས་རིགས་སུ་འབྱུང་། །དང་། སྟོན་པའི་གསུང་རབ་ས་སྟེང་དུ། །དུས་མཐར་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བ་ཐེ་ཚོམ་མེད། །དང་། ཡི་གེ་ར་དང་བ་དང་པོར། །དགེ་སློང་གང་ཞིག་རབ་བྱུང་གསུངས། །སྟོན་པའི་བསྟན་པ་གསལ་བྱེད་པ། །འབྱུང་བར་འགྱུར་བ་ཐེ་ཚོམ་མེད། །དང་། དེ་ནས་ཡི་གེ་ས་དང་ཀ །དང་པོ་ངག་ཏུ་བརྗོད་པ་དང་། །ཞེས་དང་། དང་པོར་ཡི་གེ་བ་གྲགས་དང་། །སྟོན་པའི་གཟུགས་བརྙན་དོན་ཡང་བྱེད། །བློ་ལྡན་དང་པོར་ཡི་གེ་མ། །སོགས་དང་། སྡོམ་བརྩོན་ཐམས་ཅད་བསྒྲགས་པ་ཡང་། །སྟོན་པའི་བསྟན་པ་གསལ་བྱེད་པའོ། །སོགས་ལུང་བསྟན་ཏོ། །འཇམ་དཔལ་ཆོ་ག་འདི་གསུངས་པ། །བཀླག་པ་དང་ནི་འཆང་བ་ཡིས། །དེ་ནི་འདོད་འཇོའི་བ་འདྲར་འགྱུར། །ནོར་ཆེན་ལོངས་སྤྱོད་ཕུན་སུམ་ཚོགས། །ཞེས་གསུངས་སོ། །སྤྱིར་འཇམ་དཔལ་གྱི་རྩ་བའི་རྒྱུད་འདིར་རས་བྲིས་ཆེ་འབྲིང་ཆུང་གསུམ་སོགས་རས་བྲིས་ཀྱི་ཆོ་ག་༧དང་། ཟློས་པ་དང་། སྦྱིན་སྲེག་དང་། སྒྲུབ་པོའི་མཚན་ཉིད་དང་། རྨི་ལམ་དང་། ཚེས་དང་། རྒྱུ་སྐར་དང་། ལྟས་ཀྱི་བྱེ་བྲག་སོགས་མཐའ་ཡས་པ་གསུངས་ཤིང་། མཇུག་ཏུ་ལུང་བསྟན་པ་རྒྱ་ཆེར་སྣང་སྟེ་གཙོ་བོར་རྒྱལ་རིགས་ཁོ་ནར་སྣང་ངོ་། ༼ན༽ ལྡེབ༢༠༤མཚམས། ཡི་གེ་གཅིག་གི་ས་འདི་ནི་རིག་པའི་འཁོར་ལོས་སྒྱུར་བ། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་འོག་ནས་གོང་དུ་གནས་པ་བསྟན་པ་ཐོགས་པ་མེད་པ་སོགས་ནས། བྷྲཱུྃ། བཅོམ་ལྡན་འདི་ནི་ཐམས་ཅད་མཁྱེན། །སངས་རྒྱས་སྔགས་གཟུགས་རྣམ་པར་གནས། །སྟོན་པ་ཐུགས་རྗེ་ཆེ་དང་ལྡན། །སེམས་ཅན་ཀུན་ལ་རྣམ་པར་སྐྱོང་། །ཞེས་སོགས་དང་། རྩྭ་ཀུ་ཤ་ལ་བརྒྱ་རྩ་བཟླས་ནས་མཚོ་གནས་བཅད་ན་གཞན་གྱི་རིག་སྔགས་བཅད། དར་ལེ་བརྒན་ལ་མདུད་པ་བོར་ནས་ལན་བདུན་བཟླས་ན་བཅིངས། ཞོ་དང་སྦྲང་རྩི་དང་མར་དང་ཏིལ་གྱིས་སྦྱིན་སྲེག་གིས་ཐམས་ཅད་དབང་དུ་འགྱུར་བ་དང་། ཐང་ཤིང་གིས་ལྷ། མངར་གསུམ་གྱིས་ཀླུ། མྱ་ངན་མེད་པའི་ཤིང་དང་པྲྀ་ཡངྐའི་ཤིང་གིས་དྲི་ཟ། སྐེ་ཚེས་གནོད་སྦྱིན་མོ་དང་ཀླུ་མོ། ཡུངས་ཀར་གྱིས་རྒྱལ་པོ། མེ་ཏོག་གིས་བྲམ་ཟེ། ཞོ་དང་འོ་མ་དང་མར་གྱིས་རྗེ་རིགས། ཕུབ་མའི་རྡུལ་གྱིས་དམངས་རིགས། ལན་ཚྭས་བུད་མེད་སོགས་དབང་དུ་འགྱུར་བར་གསུངས།། །། ༈ འཇམ་དཔལ་རྩ་རྒྱུད་ལས། རིག་པའི་རྒྱལ་མོ་རྫུ་འཕྲུལ་ཅན། །དེ་ནི་སྒྲོལ་མ་ཞེས་ཀྱང་བསྟན། །བུད་མེད་གཟུགས་འཆང་ལྷ་མོ་ནི། །འགྲོ་བ་ཀུན་ཏུ་རྣམ་པར་རྒྱུ། །སྙིང་རྗེས་བརླན་པའི་སེམས་ཀྱིས་ནི། །སེམས་ཅན་རྣམས་ལ་ཕན་དོན་དུ། །མི་མཇེད་འཇིག་རྟེན་ཁམས་གནས་ནས། །བུད་མེད་མིང་གིས་འཇུག་པར་བྱེད། །ས་བཅུ་ལ་ནི་རབ་གནས་ཐོབ། །བྱང་ཆུབ་སེམས་མ་རྫུ་འཕྲུལ་ཆེ། །སེམས་ཅན་རྣམས་ནི་འདུལ་བྱེད་པ། །ལྷ་མོ་སྒྲོལ་མ་ཞེས་སུ་བསྟན། །འདི་ནི་འབད་མེད་འགྲུབ་པ་སྟེ། །སྲུང་དང་སྐྱོབ་དང་སྦ་བར་བྱེད། །ལོངས་སྤྱོད་དབང་ཕྱུག་འཕེལ་བྱེད་པས། །འདི་ནི་ལྷ་མོ་བསྒྲུབ་པར་བྱ། །བྱང་ཆུབ་མཆོག་གི་ཆེད་དུ་ནི། །སྐྱེད་པ་ཉིད་ནི་བརྩམ་པར་བྱ། །སྙིང་རྗེས་བརླན་པའི་ལུས་ཅན་ལ། །དེ་ཚེ་ལྷ་མོ་རྗེས་འབྲང་བ། །སྔགས་ཀྱི་གཟུགས་ཀྱིས་སེམས་ཅན་ལ། །བྱང་ཆུབ་ཚོགས་ཀྱི་བྱ་ཕྱིར་རོ། །རེ་བ་ཐམས་ཅད་དགའ་རྒྱས་ཕྱིར། །ཤར་གྱི་ཕྱོགས་སུ་གནས་པ་ཡིན། །བདག་ཉིད་རྣམས་ལ་སྟོང་དང་ནི། །རྣམ་པ་མང་པོ་བྱས་ནས་ཀྱང་། །རྒྱ་མཚོ་བཞི་ཡི་མཐར་ཐུག་པར། །ས་རྣམས་ཀུན་ཏུ་རྣམ་པར་རྒྱུ། །ཞེས་སོགས་རྒྱ་ཆེར་བསྟན་ལ། ཡེ་ཤེས་ཐིག་ལེའི་རྒྱུད་ལས། ཏཱ་ནི་ཡིག་འབྲུ་ཁུ་བ་ཡབ། །རཱ་ནི་ཡུམ་སྟེ་ཁྲག་ཡིན་ནོ། །དེ་གཉིས་འདྲེས་པ་ཐིག་ལེ་ཡིན། །གཞན་མིན་རྣམ་ཤེས་ངོ་བོའོ། །ཞེས་གཙོ་བོ་སྟོང་པ་ཉིད་ཡུམ་དང་། ཡན་ལག་ཐབས་བདེ་བ་ཆེན་པོ་ཡབ་ཀྱི་ངོ་བོ་དབྱེར་མི་ཕྱེད་པ་བྱང་ཆུབ་སེམས་ཀྱི་རྡོ་རྗེ་ནི་ངེས་དོན་གྱི་སྒྲོལ་མའོ། ། ༈ དཔལ་མཆོག་དང་པོའི་རྒྱུད་ལས། གསེར་རམ་ཡང་ན་དངུལ་དང་ནི། །དེ་བཞིན་ཤིང་ལས་བྱས་པ་ཡི། །རང་གི་འདོད་ལྷའི་གདོང་རྣམས་ཀྱིས། །གྲུབ་པའི་ཕྱག་རྒྱས་གར་རྣམས་བྱ། །ཞེས་གར་འཆམས་ཀྱི་ཁུངས་གསུངས་སོ། ། ༈ མགོན་པོ་ཀུན་འབྱུང་ལས། སྣ་ཚོགས་འབྲུ་ནག་དཔལ་བྱས་པའི། །གཏོར་མ་མི་ཤས་བརྒྱན་པ་དང་། །ཅེས་གཏོར་མ་ཟུར་གསུམ་དུ་བྱེད་པའི་ཁུངས་སོ། ། ༈ སྔ་འགྱུར་རྡོ་རྗེ་ཕུར་པ་གསང་བའི་རྒྱུད་ལས། །གླེགས་ཤིང་ཐབས་དང་ཤེས་རབ་ལ། །ཤོག་གུ་ཐེག་པའི་ས་གཞི་སྟེ། །ཞི་གནས་ལྷག་མཐོང་ཞིང་གི་རྒྱགས། །དབྱིངས་དང་ཡེ་ཤེས་དོན་རྒྱགས་གཉིས། །སྨྱུ་གུ་རིག་པའི་ཤེས་རབ་སྟེ། །བྱང་ཆུབ་སེམས་རྟགས་སྣག་ཚ་ཡིན། །ཡི་གེ་གསུམ་གྱི་ཕྱག་རྒྱས་བྲིས། །བྱེད་པ་པོ་ནི་དམ་ཚིག་ཅན། །ལེགས་ཤིང་ཚད་དང་ལྡན་བྱས་ནས། །སྔགས་མཁན་དམ་ཚིག་བློ་ཅན་གྱིས། །དུས་གསུམ་བཞུགས་པ་ཐམས་ཅད་ཀྱི། །གསུང་གི་དེ་ཉིད་བྱིན་བསྡུས་ནས། །གླེགས་བམ་ཉིད་ལ་བསྟིམ་པར་བྱའོ། ། ༈ འཇམ་དཔལ་ལས་བཞིའི་འཁོར་ལོའི་རྒྱུད་ཕྱི་མ་ལས། དུས་ངན་ཐ་མར་བྱུང་བའི་ཚེ། །ལྷ་མོའི་ནང་ན་འོད་ཟེར་ཅན། །འཕགས་པའི་ནང་ན་འཇམ་དཔལ་ཉིད། །འདི་གཉིས་མ་གཏོགས་དངོས་གྲུབ་གཞན། །རིག་འཛིན་ཀུན་ལ་མ་ཡིན་ནོ། །ཞེས་སོ། ། ༈ འཇམ་དཔལ་དཔའ་བོ་གཅིག་པུ་གྲུབ་པ་རྒྱུད་ཀྱི་རྒྱལ་པོ་ལེའུ་གཉིས་པ་ལས། ཨོཾ་ཤྲ་བ་ཎ་པི་ཤཱ་ཙི་ནི་མུཎྜེ་སྭཱ་ཧཱ། བ་རུ་རའི་ཤིང་ངམ་ནྱ་གྲོ་དྷའི་ཤིང་གི་རྩ་བར་འདུག་ལ། ཅང་མི་སྨྲ་བར་འབུམ་ཕྲག་གཅིག་བཟླས་ན་གྲུབ་པར་འགྱུར་ཏེ་འཇིག་རྟེན་གསུམ་གྱི་སྤྱོད་པ་ཡང་སྟོན་པར་འགྱུར་རོ། །ཡང་ན་ལེགས་པར་ཁྲུས་བྱས་ལ་གོས་གཙང་མ་བགོས་ཏེ་དབེན་པར་འདུག་ལ་ཁྲི་བཟླས་པས་གྲུབ་པར་འགྱུར་རོ། །དགོང་མོ་ཉལ་ཁར་རུ་རྟ་ལ་བརྒྱ་རྩ་བརྒྱད་མངོན་པར་བཟླས་ནས་གདོང་དང་རྐང་པ་གཉིས་བཀྲུས་ན་རྨི་ལམ་དུ་དགེ་བ་དང་མི་དགེ་བ་རྣམས་སྟོན་པར་འགྱུར་རོ། །ཞེས་བྱ་བ་ནི་ལྷ་མོ་ཤྲ་བ་ཎའི་སྒྲུབ་པའི་ཐབས་སོ། །ཡང་། ཨོཾ་མུ་ཙི་ལི་སྭཱ་ཧཱ། །མོ་ཧ་ནི་སྭཱ་ཧཱ། ལག་ན་རྡོ་རྗེ་རྨི་ལམ་མཐོང་བའི་གཟུངས་ཀྱང་འདིའོ། །དན་ཏི་ལི་སྭཱ་ཧཱ། གསང་སྔགས་འདི་ཁྲི་བཟླས་ན་འགྲུབ་པར་འགྱུར་རོ། །བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་རྒྱ་ཆེན་པོ་བྱས་ནས་ལན་བརྒྱ་རྩ་བརྒྱད་མངོན་པར་བསྔགས་པའི་ཆུས་གདོང་བཀྲུས་ཏེ། དགོས་པ་ཡིད་ལ་བྱེད་པའི་བཟླས་པས་མི་སྨྲ་བར་ཉལ་ན་བཅོམ་ལྡན་འདས་རང་གི་གཟུགས་སུ་མཐོང་བར་འགྱུར་ཞིང་དགེ་བ་དང་མི་དགེ་བ་རྨི་ལམ་དུ་རྨིས་པར་འགྱུར་རོ། །ཞེས་གསུངས་པ་འདིས་ནི་དབང་གི་སྟ་གོན་ལ་སོགས་པའི་སྐབས་སུ་རྨི་ལམ་བརྟག་པའི་རིག་སྔགས་སོ། །ཡང་། ཨོཾ་བུདྡྷ་ཙུ་རུ་མཱ་ཙུ་རུ་ཀེ་སྭཱ་ཧཱ། སྐུ་གདུང་དང་བཅས་པའི་མཆོད་རྟེན་ནམ་རྗེ་བཙུན་སངས་རྒྱས་ཀྱི་སྤྱན་སྔར་བསྙེན་པ་ཆོ་ག་ཁྲི་བཟླས་ལ། དེའི་འོག་ཏུ་ཅི་འབྱོར་པའི་མཆོད་པ་བྱས་ནས་ཉལ་བའི་དུས་སུ་བརྒྱ་རྩ་བརྒྱད་བཟླས་ཏེ། བདག་གང་ནས་སྐྱེས་པར་གྱུར། གང་དུ་སྐྱེ་བར་འགྱུར་ཞེས་ཡིད་ལ་བསམས་ཤིང་ཉལ་ན་འདས་མ་འོངས་པའི་སྐྱེ་བ་དམིགས་པར་འགྱུར་བར་ཐེ་ཚོམ་མེད་དོ། །གལ་ཏེ་ཟླ་བ་དྲུག་གི་ནང་རོལ་དུ་འཆི་བར་འགྱུར་བ་དེའི་ཚེ་རྨི་ལམ་དུ་བདག་གམ་གཞན་གྱི་མགོ་བོ་མི་མཐོང་བར་འགྱུར་རོ། །དེ་བཞིན་དུ་མངོན་པར་བསྔགས་པའི་མེ་ལོང་བལྟས་པ་ན་ཁྱེའུའམ་བུ་མོ་གང་གི་མགོ་བོ་མཐོང་བར་མ་གྱུར་པ་དེ་ཟླ་བ་དྲུག་གི་ནང་དུ་འཆི་བར་འགྱུར་རོ། །རྡོ་ལིག་བུ་མིག་དང་། ཤིང་ཨ་ག་སྟི་དཀར་པོའི་རྩ་བ་རེང་བུར་བྱས་ཏེ། བརྒྱ་རྩ་བརྒྱད་མངོན་པར་བསྔགས་པའི་མིག་ལ་བྱུག་ན། གང་དག་ཟླ་བ་དྲུག་གི་ནང་དུ་འཆི་བར་འགྱུར་བའི་རྐང་གཉིས་པ་དང་། རྐང་བཞི་དེ་དག་ཐམས་ཅད་ཀྱི་མགོ་བོ་མེད་པ་མངོན་སུམ་དུ་མཐོང་བར་འགྱུར་རོ། །ཞེས་བྱ་བ་ནི་བུདྡྷ་ཙུ་རུ་མའི་རྨི་ལམ་བརྟག་པའི་ཆོ་གའོ། །ཡང་། ཨོཾ་ཛམྦྷེ་མོ་ཧེ་སྭཱ་ཧཱ། རྗེ་བཙུན་སྒྲོལ་མ་ལ་ཀ་ར་ཝཱི་རའི་མེ་ཏོག་གིས་མངོན་པར་མཆོད་དེ། སྔགས་ཀྱི་རྒྱལ་པོ་ཡི་གེ་འབུམ་བཟླས་ན་ཡིད་ལ་རེ་བ་ཐམས་ཅད་རྫོགས་པར་བྱེད་དོ། །ཞེས་དོན་ཐམས་ཅད་གྲུབ་པའི་ཆོ་གའོ། །འོག་མ་འདི་དག་སྒྲོལ་མ་རྣལ་འབྱོར་མའི་རྒྱུད་ལས་ཀྱང་འབྱུང་། ལེའུ་གསུམ་པར། འཇམ་དཀར་གྱི་སྒྲུབ་ཐབས་དང་། སྔགས་འདྲ་མིན་གསུམ། སྒྲོལ་མའི་སྔགས་འཇམ་དཀར་གཙོ་འཁོར་ལྔའི་སྒྲུབ་ཐབས་བཅས་བསྟན་པའི་འཕྲོར། ར་ཡི་འོ་མ་ཨ་རུ་ཚ་བ་གསུམ། །ས་ཐ་ཤུ་དག་སེ་འབྲུ་སེན་དྷ་པ། །ལན་བདུན་སྔགས་པའི་མར་དང་ནི། །འཐུང་བས་དབྱངས་ཅན་འགྲུབ་པར་འགྱུར། །ར་ཡི་འོ་མ་བྲེ་བཞི་དང་། །སྨན་རྣམས་སྲང་གཅིག་ཙམ་གྱི་ཚད། །མར་བྲེ་གང་དང་མཁས་པ་ཡིས། །རིམ་གྱིས་མེ་ཆུ་ལ་བསྐོལ་བྱ། །ཟླ་གཅིག་ཙམ་ཞིག་རབ་སྦྱར་ན། །བླ་མེད་ཚིག་ནི་ཐོབ་འགྱུར་ཞིང་། །ཟླ་དྲུག་ཉེ་བར་ལོངས་སྤྱོད་པས། །ངག་གི་དབང་ཕྱུག་མངོན་སུམ་འགྱུར། །ཤུག་པ་ཤིང་མངར་སེན་དྷ་པ། །ཨ་རུ་བཅའ་སྒ་ལ་ལ་ཕུད། །རུ་རྟ་པི་པི་ཟི་ར་བཅས། །རྣམ་བཏགས་ངག་ནི་དག་པར་བྱེད། །ལྷ་ལ་མེ་ཏོག་དྲི་བཟང་སོགས། །ནངས་པར་ཡང་དག་མཆོད་ནས་ནི། །ལན་བདུན་སྔགས་བྱས་ཟོས་ན་ནི། །ཟླ་བ་དྲུག་གིས་ཐོས་འཛིན་བྱེད། །ཟླ་བ་གསུམ་གྱིས་ཚིག་བདག་འགྱུར། །ཟླ་བ་གཅིག་གིས་བློ་ལྡན་ཞིང་། །ཁུ་བྱུག་གཞོན་ནུའི་སྐད་བཞིན་དུ། །དབྱངས་སྙན་པ་ནི་སྐྱེ་བར་འགྱུར། །ཞེས་དང་། ཨོཾ་བཱག་དི་ནི་བཱ་ཙརྨ་ནི་ཡཙྪ་ས་ར་སྭ་ཏཱི་མ་ཧཱ་ཤྭེ་ཏེ་སྭཱ་ཧཱ། པདྨ་ལས་སྐྱེས་པའི་དཀར་མོ་ཆེན་མོའི་སྙིང་པོ་འདིས་ནི་གོང་དུ་བཤད་པའི་ལས་ཐམས་ཅད་བྱེད་པར་འགྱུར་རོ། །ཞེས་གསུངས། ཡང་ལེའུ་དང་པོར། ཨོཾ་པི་ཤཱ་ཙི་པརྞ་ཤ་བ་རི་སརྦ་ཨུ་པ་དྲ་བ་ནཱ་ཤ་ནི་སྭཱ་ཧཱ། རིག་པ་ཆེན་པོ་འདི་མ་བསྒྲུབས་སུ་ཟིན་ཀྱང་རྐང་གཉིས་པ་དང་རྐང་བཞི་པ་ཐམས་ཅད་ཀྱི་རྣམ་པར་འཚེ་བ་སེལ་བར་བྱེད་ཅིང་། ལས་ཐམས་ཅད་བྱེད་པར་འགྱུར་རོ། །སྦྱིན་སྲེག་གམ་བཟླས་པའམ་ཁྲུས་སམ་སྔགས་མདུད་མངོན་པར་བསྔགས་པའི་ཆུ་འཐུང་པའམ་བྱབས་པས་ནད་ཐམས་ཅད་སེལ་བར་བྱེད་དོ། །གྲོ་ག་ལ་གུར་གུམ་གྱིས་བྲིས་པའི་སྔགས་རྐེའམ་དཔུང་པ་ལ་བཏགས་ན་རྩོད་སྦྱོང་ལས་རྒྱལ་བ་ཐོབ་པར་འགྱུར་ཞིང་། རིམས་ཉིན་བཞི་པ་སོགས་མི་ཟད་པའི་ས་ལས་རྣམ་པར་གྲོལ་བར་འགྱུར་རོ། །སྲིན་པོ་ལ་སོགས་པའི་འཇིགས་པ་སེལ་བར་བྱེད་ཅིང་། འཐབ་པ་དང་འཁྲུགས་པ་དང་རྩོད་པ་དག་ལས་རྒྱལ་བ་སྒྲུབ་པར་བྱེད་དོ། །སྟག་དང་ཆུ་སྲིན་དང་ལྟོ་འཕྱེ་ཆེན་པོ་དང་རྐུན་པོ་ལ་སོགས་པས་མི་མཐོང་ཞིང་རྟག་ཏུ་བཟླས་ན་སྐྱེ་བོ་ཐམས་ཅད་དགའ་བར་འགྱུར་རོ། །ཞེས་སོ།། །། ༈ འཇམ་དཔལ་དཔའ་བོ་གཅིག་པུ་གྲུབ་པའི་རྒྱུད་ཀྱི་ལེའུ་དང་པོ་ལས། ཨོཾ་ཨ་མཱ་ར་ཎི་ཛཱི་ཝནྟེ་ཡེ་སྭཱ་ཧཱ། སྔགས་ཀྱི་རྒྱལ་པོ་འདི་ལེགས་པར་བཟླས་ན་ལས་ཐམས་ཅད་བྱེད་པར་འགྱུར་རོ། །མངོན་པར་བསྔགས་པའི་ཆུ་འཐུང་ན་འབྲུམ་བུ་འོང་བར་མི་འགྱུར་རོ། །ལུས་ལས་སྐྱེས་པའི་དུག་མི་ཟད་པ་དང་། སྤྲེའུ་དུག་དང་སྦྲུལ་དུག་ལ་སོགས་པའི་རྨ་ལ་ཡུང་བ་དང་། ཨ་རུ་ར་དང་། རུ་རྟ་ལ་སོགས་པ་ལ་ཡོངས་སུ་བཟླས་ཏེ་བསྐུས་ན་རང་བཞིན་དུ་གནས་པར་འགྱུར་རོ། །ནད་དང་རྣམ་པར་འཚེ་བ་ཐམས་ཅད་ལ་སྔགས་མདུད་བཅིངས་ན་ཞི་བར་བྱེད་དོ། །རྟག་ཏུ་བཟླས་ན་ཚེ་ཟད་པ་ཡང་ཚེ་ལོ་བརྒྱ་ཐུབ་པར་འགྱུར་རོ། །མར་དང་ཏིལ་གྱི་སྦྱིན་སྲེག་གིས་ཐམས་ཅད་ཞི་བར་བྱེད་དོ། །མངོན་པར་བསྔགས་པའི་སྨན་གྱི་བཏུང་བས་ནད་ཐམས་ཅད་ལས་ཡོངས་སུ་ཐར་བར་བྱེད་དོ། །ལན་བརྒྱ་བཀྲུས་པའི་མར་ལ་མངོན་པར་བསྔགས་པས་ན་བའི་ཡན་ལག་ལ་བསྐུས་ན་རང་བཞིན་དུ་གནས་པར་འགྱུར་རོ། །མགོའི་ནད་ལ་ཏིལ་མར་ལ་སྔགས་ཏེ་བསྐུས་ན་རང་བཞིན་དུ་གནས་པར་འགྱུར་རོ། །གདུག་པའི་རྨ་ལ་ཆུ་ལ་སྔགས་ནས་གཏོར་བས་སོས་པར་འགྱུར་རོ། །སྤྲི་ཧའི་ནད་ལ་བེ་དོང་ལ་སོགས་པའི་མཚོན་གྱིས་གཏུབས་པས་ཀྲྀ་ཧ་བཅད་པར་འགྱུར་རོ། །ནི་རྒུན་དྷི་དང་། ནིམ་པའི་རྩ་བ་རྨ་བྱའི་མཇུག་སྒྲོ་དང་བཅས་པ་གཅིག་ཏུ་སྦྱར་ལ། བརྒྱ་རྩ་བརྒྱད་མངོན་པར་བསྔགས་པའི་བདུག་པས་བདུག་ན། རིམས་ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་ལ་སོགས་པ་སེལ་བར་བྱེད་ཅིང་། འབྱུང་པོ་དང་། ཤ་ཟ་དང་། ཚངས་པ་དང་། སྲིན་པོ་ལ་སོགས་པ་སེལ་བར་འགྱུར་རོ། །བུད་མེད་བུ་ཤི་བ་ལ་ལན་བརྒྱ་རྩ་བརྒྱད་མངོན་པར་བསྔགས་པའི་བུམ་པས་ཁྲུས་བྱས་ན་བུ་གསོན་པོ་དང་ལྡན་པར་འགྱུར་རོ། །གྲོ་ག་ལ་བྲིས་པའི་སྔགས་རྐེད་པའམ་དཔུང་པ་ལ་བཏགས་པས་མངལ་སྲུང་བར་འགྱུར་རོ། །སྔགས་རྗེས་སུ་དྲན་པས་གཡུལ་ངོགས་སུ་འཇུག་ན་རྒྱལ་བ་རྙེད་པར་འགྱུར་ཞིང་བྱབས་པས་ནད་ཐམས་ཅད་སེལ་བར་བྱེད་དོ། །ཞེས་སོ། ། ༈ གཤིན་རྗེ་གཤེད་ཀྱི་རྒྱུད་རྟོགས་པ་གསུམ་པ་ལས། ཞི་བའི་ལས་ནི་ཟླ་བ་ཡིན། །རྒྱས་པ་དེ་བཞིན་མིག་ཏུ་བསྒྲགས། །དབྱེ་བ་ཡོན་ཏན་ཞེས་བྱ་སྟེ། །དགུག་པའི་ལས་ནི་དེ་བཞིན་མདའ། །བསྐྲད་དང་མནན་པ་དབང་པོ་ཡིན། །མནན་པ་རྗེས་སུ་འབྲང་བ་ཡིས། །བསད་པའི་ལས་ནི་རྒྱ་མཚོར་འདོད། །ལས་རྣམས་དེ་དག་རེ་རེ་ལའང་། །འཕགས་སོགས་མཆོད་སྦྱིན་དང་པོ་སྟེ། །ཉི་མ་གཉིས་པ་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་སྲེག་ཚང་བར་བྱ། །ལྔ་པ་ལས་ཀྱི་འཁོར་ལོ་བསྐོར། །དྲུག་པ་བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང་། གྲོགས་ཀྱི་ལས་ལ་ཁྱད་པར་དུ། །ལས་ཀྱི་གཙོར་ནི་གང་བསྒྲུབ་དེའི། །འཁོར་ལོ་བསྐོར་བ་ཉི་མ་བཞིས། །ལས་ཀྱི་བྱེ་བྲག་འདི་ཤེས་ན། །ཞི་བས་འཇིགས་པ་བརྒྱད་ལས་སྐྱོབ། །རྒྱས་པས་ཡོན་ཏན་དྲུག་དང་སྦྱོར། །དབང་གིས་མོས་པ་རྣམ་བཞིར་འགྱུར། །དབྱེ་བས་གསང་སྡེ་བརྒྱད་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ནི་ཇི་ལྟར་དེ་བཞིན་ནོ། །སྔགས་དང་རྫས་དང་སྦྱོར་བ་ལ། །དཔྱད་ན་དངོས་གྲུབ་མ་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་སྟེར་བ་ཡང་། །ཕྱིར་ལྡོག་འགྱུ ར་བར་གདོན་མི་ཟ། །དད་པ་བརྟན་པོས་བསྒྲུབ་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བ་མི་སྲིད་ན། །འདོད་ཆགས་བྲལ་བས་བྱས་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི། །སོགས་སོ།། །། ༈ སྨན་བླའི་མཚན་དྲན་པ་དང་། གཟུངས་བཟླས་པས་ཚངས་སྤྱོད་མི་ཉམས་ཤིང་ནད་ཕོགས་ཀྱིས་དབང་པོ་ཉམས་པ་སོགས་སོས། ནད་ཐམས་ཅད་ཞི་ཞིང་བྱང་ཆུབ་བར་དུ་མི་འབྱུང་། འཇིགས་པ་ཐམས་ཅད་ལས་སྲུང་ཞིང་ཟས་གོས་སོགས་རྩོལ་མེད་དུ་རྙེད། བུད་མེད་ཀྱི་སྲིད་པ་ཐ་མར་བྱེད་ཅིང་ངན་སོང་ལས་ཐར་བ་སོགས་ཕན་ཡོན་དཔག་ཏུ་མེད། ཆོ་ག་མདོ་རང་རྐང་དང་། སྔགས་ཆོག་ཏུ་བཀྲལ་བ་གཉིས་ཡོད། སྔ་མ་ཡོངས་གྲགས་དང་། ཕྱི་མ་ངོར་ཆེན་རྡོ་རྗེ་འཆང་སོགས་བཞེད། བྱ་རྒྱུད་དང་མཐུན་པར་བཀྲལ་བའི་དབང་བཀའ་དང་། བདག་བསྐྱེད་གཙོ་འཁོར་གསུམ་པ་དང་། མདུན་བསྐྱེད་སྨན་བླ་མཆེད་བདུན་བྱས་པའི་རྗེས་གནང་བཅས་བོ་དྷི་སཏྭཱ་ནས་བརྒྱུད་པ་དང་། ཡང་ཇོ་བོ་ནས་བརྒྱུད་པའི་བདག་མདུན་གཉིས་ཀ་གཙོ་འཁོར་གསུམ་པར་བྱས་པ་ཞིག་ཀྱང་ཡོད་སྣང་། སྔ་མའི་སྐབས་གཟུངས་རིང་དང་། བར་པར་གཟུངས་འབྲིང་པོ། ཕྱི་མར་གཟུངས་ཐུང་གཙོ་བོར་བཟླ་བར་གསུང་སྣང་། འོན་ཀྱང་ཕྱི་མའི་རྒྱུན་ཤིན་ཏུ་དཀོན་པས་སླར་བཙལ་ལོ། ། ༈ འཇམ་དབྱངས་སྨྲ་སེང་འདི་ཡིག་རྙིང་རྣམས་དང་། སྣར་ཐང་བརྒྱ་རྩའི་རྒྱ་གཞུང་བཅས་སུ་སེང་གེ་གདན་ཐབས་དང་། ཕྱག་གཡས་རལ་གྲི་ཕྱར་ཞིང་། གཡོན་ཨུཏྤལ་ཡུ་བ་ཐུགས་ཀར་བཟུང་བའི་མེ་ཏོག་སྙན་ཐད་ཁ་བྱེ་བར་གླེགས་བམ་མཚན་པ་ཁོ་ན་བཤད། དཔའ་བོ་བཅུ་གཉིས་ཀྱི་རྫས་གླ་བ་ཞེས་བཤད། ཕྱིས་ཀྱི་ཡིག་ཆར་ཕྱག་ཆོས་འཆད་སོགས་དང་། རྫས་ལ་ཨ་བ་བཤད་པ་རེ་ཡང་སྣང་། ཡིག་ཆ་ཕྱི་མར། ར་དཀར་གྱི་འོ་མ་དབྱངས་ཅན་མ་ཞུ་བ་དང་། བ་དམར་གྱི་འོ་མ་འཇམ་དབྱངས་ཞུ་བའི་བདུད་རྩིར་བསམས་ལ་སྦྲུས་ཞེས་སྣང་བས། སྤྲོ་ན་འོ་མའི་སྟེང་དུ་ལྷ་སོ་སོ་བུམ་བསྐྱེད་ལྟར་བསྐྱེད་ཅིང་བཟླས་མཐར་འོད་དུ་ཞུ་བའི་བདུད་རྩིར་བསམ་པ་ལེགས་སྙམ། སྦྲང་རྩི་དབང་སྡུད་ཀྱི་རྫས་ཡིན་པས་ཤེས་རབ་གཙོ་བོ་བྱེད་པ་ལ་མི་དགོས་ཞེས་ཁ་ཅིག་སྨྲ་ཡང་། ཤེས་རབ་དབང་དུ་བྱེད་པ་མཚོན་ཕྱིར་བསྲེ་བ་ལེགས་ཤིང་ཡིག་རྙིང་དུའང་འབྱུང་། སྣོད་ལས་མཐུན་གྱི་ཁ་དོག་ཅན་གྱི་དབུས་སུ་ཟངས་སམ། ཙནྡན་ནམ། ཤུག་པའི་རལ་གྲི་སོར་བཞི་པ་བསྒྲེང་པའི་ཕྱོགས་བཞིར་སྔགས་བཟླ་བཞིན་པས་རིལ་བུའི་ཡི་གེ་དབུ་ཕྱིར་བསྟན་བརྩེགས་ཞེས་བཤད་པ་དང་། ཡང་རིལ་བུའི་གྲངས་ཉིས་བརྒྱ་བཅུ་དྲུག་བྱ་བར་བཤད་པ་སྣང་བས་རྒྱུ་མཚན་བརྟག །གསན་ཡིག་ལ་ལར་འཇམ་དཔལ་ཡབ་ཡུམ་རྒྱལ་ཆེན་བཞིས་བསྐོར་བའི་རྗེས་གནང་ཞེས་སྣང་བ་དེ་འདྲ་བའི་རྒྱུན་ཀྱང་ཡོད་པར་མངོན། རྗེས་གནང་ཁ་ཅིག་ཏུ་ཚིག་འཇམ་དཀར་མ་ཏི་ལུགས་ལ་དཔེ་བླངས་པའང་སྣང་། མཇུག་ཏུ་བཟླས་ལུང་དང་། ཡིག་རྙིང་ལས་བཤད་པའི་རྗེས་སྡུད་ཀྱི་རྫོགས་རིམ་དམིགས་པར་འབོགས་པའི་ཚུལ་ཀྱང་སྣང་ངོ་། ། ༈ ཀུ་རུ་ཀུལླེ་ཞེས་སྔ་མ་རྣམས་ཀྱིས་རིགས་བྱེད་མར་བསྒྱུར། ཡིད་བཟང་རྩེ་པས། ས་སྒྲོག་རིགས་སུ་བསྒྱུར་བར་སྣང་། ། ༈ ཀུན་དོང་ཞེས་པ་སྒོག་སྐྱ། ། ༈ ཀེའུ་ཞེས་པ་ལ་ལས་བཙོང་དང་། ཁ་ཅིག་རི་སྒོག་ལ་ངོས་འཛིན། ། ༈ ཅུང་སེང་ཞེས། འཕྲོག་མ་ལ་ཅུང་སེང་སྦྱིན་པ་ཞེས་འབྱུང་བས་ཆང་བུའི་བརྡ་རྙིང་ཡིན། ། ༈ ཁ་སཱཪྤཱ་ཎི་འགའ་ཞིག་གིས་མཁའ་སྤྱོད་དུ་བསྒྱུར། ཁྲོ་ལོས་རྒྱུ་མཚན་བཅས་མགྲོན་བུ་ཟད་པར་བསྒྱུར་རོ། ༈ །ལ་དུ་ནི། མྱ་ངན་འདས་ཆེན་ལས་འདི་ལྟར་གསུངས། མར་དང་། བག་ཕྱེ་དང་། སྦྲང་རྩི་དང་། །བཅའ་སྒ་དང་། པི་པི་ལིང་དང་། ན་ལེ་ཤམ་དང་། རྒུན་འབྲུཾ་དང་། བལ་པོའི་སེའུ་དང་། འུ་སུའི་འབྲས་བུ་ལ་སོགས་པ་རྣམས་བསྡུས་ན་ལ་དུ་ཞེས་བྱའོ། །ཞེས་གསུངས། ། ༈ རབ་གནས་སྐབས། འདག་ཆལ་གྱི་རྫས། །སྲན་དཀར་ཕྱེ་མའམ། སུག་པ་དཀར་པོའི་ཕྱེ་མའམ། ཐལ་དཀར་རྡོ་རྗེའི་ཕྱེ་མ་ཞེས་གསུངས་པ་གང་རུང་གིས་ཆོག་པར་མངོན། ཤུན་ལྤགས་ལྔ་མ་འབྱོར་ན་སྐྱུ་རུ་རའི་ཕྱེ་མས་ཆོག་པར་བཤད། ། ༈ གཎྜིའི་རྒྱུ། པ་ལ་ཤ །རྒྱ་སྐྱེགས་ཤིང་། ཨ་ཤཏྠ། པི་ལིང་ཤིང་།ཨ་ཤྭ་ཏ། རྒྱ་སྟར་ཤིང་། ཙུ་ཏ། ཨ་མྲ་ཤིང་། ། ༈ རྡོ་རིང་དབོན་པོ་མཁས་བཙུན་ཀུན་དགའ་རྒྱལ་མཚན་ཡང་དགུང་ལོ་བཅུ་གཅིག་དུས་མནལ་ལམ་དུ་ཀུན་སྤངས་རིན་པོ་ཆེར་ཚེ་སྒྲུབ་ཞུས་ཟེར་བའི་བསྐུལ་མ་བྱུང་བ་ལྟར་ཞུས་པས། ཀུན་སྤངས་རྗེས་ཀུན་མཁྱེན་རོང་པོ་ནས་བརྒྱུད་པའི་ཚེ་སྒྲུབ་ཞག་བདུན་མ་འདི་ཆིག་བརྒྱུད་དུ་གནང་། སྐུ་ཚེ་རིང་པོར་ཡོང་བའི་ལུང་བསྟན་མཛད་པ་ལྟར་དགུང་ལོ་བརྒྱད་ཅུ་རྩ་གསུམ་དུ་བཞུགས་ཤིང་། མཐར་སྐུ་ལ་བསྙུན་པ་མེད་པར་གཤེགས་ཞེས་འབྱུང་། ། ༈ དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། དབང་ལག །ལག་པ་ཆད་པ་སོས། ཆུ་སྲིན་སྡེར་མོ། སོར་མོ། ནཱ་ག་གེ་སར། བྱང་ཆུབ་ཀྱི་སེམས་དྲན། ནཱ་ག་པུཥྤ། མེ་ཏོག་གི་ཚལ་དུ་འགྱུར། སྤོས་དཀར། དྲི་ང་བ་སྤང་ཞིང་བྱང་ཆུབ་ཀྱི་སེམས་དྲན། འབྲས་ཡོས། ནད་ཐམས་ཅད་འཚོ། ཐང་ཀ །མཚལ་དཀར། ཁྲག་སྐམ་པ་པོས། རྡོ་རྒྱུས་བྱ་བལ་མ། རྒྱུས་པ་ཆད་པ་སོས། །སྤུ་ཤེལ་རྩེ། ག་བུར། ཚ་བའི་ནད་སོས། དར་ལེ་བརྒན། ཁྱིང་སེར་འཇིགས་པ་ཐམས་ཅད་སེལ། དུང་། རུས་ཆག་སོས། རས་སྐུད་གསུམ། ཚེ་བསྲིང་། མངར་གསུམ་བཅས་ཞལ་ཟས་རོ་བརྒྱ་དང་ལྡན་པར་འགྱུར། སྦྱར་བ་ཀླུ་སྨན་གྱི་མཆོག་ཏུ་གསུངས་ཤིང་། སོ་སོའི་ཕན་ཡོན་དང་བཅས་ཏེ་བསྟན་པའི་མཐར། དེ་དག་ཀུན་ཀྱང་རིན་པོ་ཆེའི་བུམ་པའམ་ཁམ་ཕོར་ལྟ་བུ་མཆུ་ལྔ་པར་བླུགས་ནས་སྦས་ན་གང་ཉམས་པ་དེ་སོས་པར་འགྱུར་རོ། །ཞེས་གསུངས། ཡང་དེ་ཉིད་ལས་ཀླུའི་བྱད་འགྲོལ་ཚུལ་འདི་ལྟར་གསུངས་ཏེ། རྟག་ཏུ་སྐོམ་ཆས་གཏོར་མས་མཆོད། །ཞི་བས་དུག་དབྱུང་བྱད་ཀྱང་དགྲོལ། །རྩ་བའི་དཀྱིལ་འཁོར་ཕྱོགས་བཞི་རུ། །ནཱ་གའི་གཟུགས་བྲིས་དུག་ཅན་བཞག །ཚོན་སྐུད་སྦྲུལ་བསྒོམ་བཅིངས་པ་དེ། །སྤུ་གྲི་འབར་བས་གཏུབས་ཤིང་དབྱེ། །རི་རབ་ཆེན་པོའི་ཕྱོགས་བཞི་ན། །དུག་བཞི་ལས་སྐྱེས་རིགས་བཞིའི་ཀླུ། །ས་ཆུ་མེ་རླུང་དུག་བཞིའི་བདག །བཅིངས་པ་གྲོལ་ཕྱིར་དུག་དབྱུང་ཕྱིར། །དགུ་ཐུབ་སྒྲོ་ལ་ཁྱུང་བསམ་ཕྱིར། །དུག་བྱབས་སྔགས། ཨོཾ་ཉི་མ་ས་ལ་ནཱཾ། གྷུ་ནི་ཞི་རྩི་ཏ་གྷུ་ལཾ་ནཱཾ། ཙི་ཏྲ་མུ་ཏྲ་ཟློག་བྱེར། ཙི་ཏྲ་གྷུ་ལི་ནཱཾ། ཡ་ཁྲ་ནཱ་ག་ཟློག །ནཱ་ག་ཤིག །ནཱ་ག་མགོ་ལ་ནཱཾ། ཧ་ས་པ་ཁྲེ། རང་རང་གནས་སུ་བཏང་། །བདེན་པ་བདར་ཞིང་ཏིང་འཛིན་གསལ། །ཞེས་སོ། ། ༈ རྡོ་རྗེ་བདེ་ཁྲོས་ཀྱི་རྒྱུད་ལས། བུམ་པར་ནོར་བུ་རིན་ཆེན་གཞུང་། །མཛེས་པའི་དར་སྣ་འབྲུ་ཡི་མཛོད། །གང་གི་རྟེན་ལ་སྦས་གྱུར་ན། །གནོད་པ་རགས་པ་ཞི་བར་འགྱུར། །ཞེས་དང་། བཙན་དུག་གུ་གུལ་གླ་རྩི་དང་། །ཤུ་དག་ཤིང་ཀུན་མུ་ཟི་དྲུག །གསང་སྔགས་བཏབ་སྟེ་ལུས་ལ་བྱུགས། །གུ་གུལ་ཉ་མཁྲིས་གླ་རྩི་དང་། །སྒོག་པ་ཤུ་དག་དྲི་ཆེན་རྣམས། །བདུག་པ་བྱའམ་ཡང་ན་བཀྲུ། །གསེར་གཡུ་བྱི་རུ་མིག་མ་དང་། །བཙན་དུག་རྨ་བྱའི་མཁྲིས་པ་དག །བཅངས་ན་གྲུབ་པའི་མཆོག་ཏུ་འགྱུར། །ཞེས་སོ། ། ༈ གསང་བ་དངོས་བསྟན་ལས། བསྐྱེད་པའི་རིམ་ལ་དམིགས་ཐོབ་ནས། །སྙིང་གར་ཡེ་ཤེས་སེམས་དཔའ་བསམ། །དེ་ཡི་རང་བཞིན་སྙིང་ནང་དུ། །པདྨ་འདབ་བཞི་ཐིག་ལེས་བརྒྱན། །ཉི་ཟླའི་བར་དུ་རྒྱ་སྲན་ཚད། །དེ་ཡི་ནང་དུ་གནས་པའི་སྲོག །ཨ་ཤད་དམར་མོའི་རྩེ་ལྟར་བསྒོམ། །དེ་ལ་དམིགས་པ་བརྟན་པ་དང་། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམ་ན། །དེ་ལས་ཡེ་ཤེས་སྐྱེ་བར་འགྱུར། །གསལ་ཞིང་མི་རྟོག་རིག་པའི་སྐུ། །ཡེ་ཤེས་ཞེས་ནི་དེ་ལ་བྱ། །ཞེས་སོ། ། ༈ རྣམ་སྣང་སྒྱུ་འཕྲུལ་དྲྭ་བའི་རྒྱུད་ལས། བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲན་ཅིང་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོ ར་ཤེས་པས། །དཀྱིལ་འཁོར་འབྲི་བའི་ལས་བྱའོ། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་ཀུན་ལ་མི་འཇིགས་སྦྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཞེས་དང་། དགེ་དང་སྡོམ་ལ་དགའ་བ་དང་། །རྟག་ཏུ་བླ་མ་ལ་གུས་དང་། །རྒྱུན་དུ་ལྷ་རྣམས་མཆོད་བྱེད་པའི། །ཡོན་ཏན་ལྡན་ན་སློབ་མ་ཡིན། །ཅེས་དང་། སློབ་དཔོན་ཅི་འདྲ་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་ཏོག །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་བཞིན། །སློབ་དཔོན་གྱི་ནི་ཡོན་ཏན་བཟུང་། །སྐྱོན་རྣམས་ནམ་ཡང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་དང་། དེ་ཕྱིར་ཀུན་གྱིས་རབ་བསྒྲིམ་སྟེ། །བསམ་ཡས་འབྲས་བུ་སྨིན་བྱེད་པའི། །སངས་རྒྱས་འབྲས་བུ་འདོད་བྱེད་པའི། །སེམས་ཅན་དད་དང་ལྡན་པས་མཆོད། །ཅེས་སོ། །ཡང་། གཡས་པས་སྲུང་སྐུད་བཅིངས་ནས་སུ། །ལག་མཐིལ་སོ་ཤིང་ཀུ་ཤ་སྦྱིན། །དང་། དེ་ལ་འདི་ནི་སྐྱབས་སུ་འགྲོ་བ་ཡིན་ཏེ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་ལ་ཡི་རང་སྟེ། །སངས་རྒྱས་བྱང་ཆུབ་ཡིད་ཀྱིས་བཟུང་། །ཞེས་དང་། དང་པོ་ས་གཞི་ཡོངས་སུ་བཟུང་། །གཉིས་པ་ལ་ནི་གནས་པ་སྟེ། །ནུབ་གསུམ་པ་ལ་འཇུག་པ་ཡིན། །ཞེས་དང་། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གིས་སློབ་མ་གཞུག་པར་བྱ། །དང་། ཐུར་མ་ལ་སོགས་མེད་ན་ཡང་། །ཕྱག་རྒྱའི་གཟུགས་རྣམས་བསྟན་པར་བྱ། །ཞེས་ཐུར་མ་མེ་ལོང་འཁོར་ལོ་སོགས་དབང་རྫས་དམིགས་བསལ་མ་རྙེད་ན་ཕྱག་རྒྱས་ཆོག་པར་བཤད། དེ་ནས་བླ་མས་ཡོན་བླངས་ཏེ། །ས་དང་ཡིད་འོང་ཆུང་མ་དང་། །རིན་ཆེན་གསེར་དང་ནོར་བུ་འབར། །མུ་ཏིག་བྱི་རུ་ལ་སོགས་དང་། །ལུས་ཀྱང་དབུལ་དུ་གཞུག་པར་བྱ། །བླ་མ་ལ་ནི་གུས་པ་ཡི། །སློབ་མས་དེ་བཞིན་ཁོ་ནར་བྱ། །བླ་མ་མགུ་བས་དངོས་གྲུབ་སྟེར། །གཞན་དུ་མིན་ཞེས་ཐུབ་པས་གསུངས། །དང་། དཀྱིལ་འཁོར་གྱི་ནི་ཡོ་བྱད་ཀུན། །སློབ་དཔོན་ཉིད་ཀྱིས་བསྡུ་བར་བྱ། །སློབ་མས་ཅུང་ཟད་མི་སྤྱད་དོ། །དེ་ནི་དམ་ཚིག་ཉམས་པར་འགྱུར། །སློབ་དཔོན་གྱིས་ཀྱང་ཅི་རིགས་པར། །བདག་ཉིད་འདོད་པས་སྤྱད་པར་བྱ། །ཞེས་དང་། གང་ཞིག་བཅིངས་པ་ཙམ་གྱིས་ནི། །སྡིག་པ་ཀུན་ལས་རྣམ་གྲོལ་ཞིང་། །འདི་ན་ལུས་ནི་བྱིན་རླབས་ཏེ། །རང་གི་གཟུགས་སུ་རྣམ་བསྒོམ་ན། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དང་། ཨོཾ་བཛྲ་གཎྜེ་ར་ཎི་ཏ། ནས། བཛྲ་དྷརྨ་ཧྲྀ་ད་ཡ། སནྟོ་ཥ་ནི་ཧཱུྃ་ཧཱུྃ་ཧཱུྃ། ལག་གཡས་རྡོ་རྗེ་གསོར་བྱ་ཞིང་། །སྣ་ཚོགས་ཁུགས་སུ་འགྱུར་བ་ཡི། །རྡོ་རྗེའི་གླུ་ཡིས་བསྟོད་པར་བྱ། །དང་། མི་ཐོད་ལས་བྱས་ཅང་ཏེའུ་ལ། །སྤྲེའུའི་པགས་པས་གཡོགས་ནས་ནི། །ངོས་གཉིས་ལ་ནི་པདྨ་བྲི། །བུད་མེད་ཁྲག་གིས་འཛག་པར་བྱ། །དེ་ཡི་དཀྱིལ་དུ་ཕྲེཾ་བྲིས་ཏེ། །མི་ཡི་སྐྲ་ཡིས་བཏགས་ནས་ནི། །མཐིང་རིལ་གྱི་ནི་རྐང་རུས་ཀྱིས། །ཕྲེཾ་ཧཱུྃ་མིང་ནས་བརྗོད་ཅིང་བརྡུང་། །དང་། སྦྱིན་སྲེག་དེ་ཉིད་ལ་གནས་པའི། །མེ་ནི་ལྷ་ཡི་ཞལ་ཡིན་པས། །སྣ་ཚོགས་ལས་ཀུན་འགྲུབ་བྱེད་པའི། །སྦྱིན་སྲེག་ལས་ནི་རབ་ཏུ་བཤད། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་སྐོང་། །དེ་ཕྱིར་སྐུ་གསུམ་མཁས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །ཅེས་དང་། ཀུ་ཤའི་རྩེ་མོས་གནོན་པ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་འབར་བར་ཤེས་པ་དང་། གཡས་པས་མི་འཇིགས་མཐེབ་བསྐྱོད་ཅིང་། །གསང་སྔགས་འདི་ཡིས་ཆོ་ག་བཞིན། །མེ་ཡི་ལྷ་ནི་སྤྱན་དྲང་ངོ་། །ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །བསྲེག་བླུགས་ཞལ་ཟས་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ཨོཾ་ཨགྣ་ཡེ། དཱི་པྱ་དཱི་པྱ། ཨཱ་བེ་ཤ་མ་ཧཱ་ཤྲཱི་ཡེ། ཧ་བྱ་ཀ་བྱ། བཱ་ཧཱ་ནཱ་ཡ་སྭཱ་ཧཱ། སོགས་གསུངས་ཏེ། འཇིག་རྟེན་དང་འཇིག་རྟེན་ལས་འདས་པའི་མེ་ལྷ་གཉིས་ཀ་སྤྱན་དྲངས་རྗེས་བསྐྱེད་པར་གསུངས་སོ། ། ༈ གཤིན་རྗེ་དགྲ་ནག་གི་རྒྱུད་ཀྱི་ལེའུ་བདུན་པ་ལས། ཤེས་རབ་བསྐྱེད་པར་བྱ་བའི་ཕྱིར། །ཞལ་གསུམ་ཕྱག་དྲུག་དམར་བ་ལ། །ཞི་བ་ཕྱག་ན་པདྨ་བསྣམས། །དབྱངས་ཅན་བརྟུལ་ཞུགས་ཅན་གྱིས་བསྒོམ། །དང་། དེ་ནས་བཅོམ་ལྡན་འདས་དམ་ཚིག་ཆེན་པོའི་གཤིན་རྗེའི་གཤེད་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་དབྱངས་ཅན་མའི་སྔགས་གསུངས་པ། ཨོཾ་པི་ཙུ་པི་ཙུ་པྲཛྙཱ་ཝརྡྷ་ནི། ཛྭ་ལ་ཛྭ་ལ་མེ་དྷ་ཝརྡྷ་ནི། དྷི་རི་དྷི་རི་བུདྡྷ་ཝརྡྷ་ནི་སྭཱ་ཧཱ། ཚེས་ཀྱི་དང་པོ་ནས་བཟུང་སྟེ། །ཀུན་ཏུ་ཟླ་བ་ཉ་ཡི་བར། །སྦྱར་བའི་སྐད་ནི་སྨྲ་བར་བྱ། །ཇི་སྲིད་ཟླ་བའི་རྗེས་འཇུག་པས། །རྟག་ཏུ་ཚིགས་བཅད་བརྒྱ་ཟིན་འདིས། །ངག་གི་དབང་ཕྱུག་འགྲུབ་པར་འགྱུར། །ཁམས་གསུམ་མ་ལུས་པ་དག་ནི། །མ་ལུས་ལུས་པ་མེད་པར་འགྲུབ། །ཅེས་སོ། །གཤེད་དམར་གྱི་རྒྱུད་ཀྱི་རིམ་པར་ཕྱེ་བ་གསུམ་པ་ལས་ཀྱང་ལྷའི་རྣལ་འབྱོར་མ་བསྟན་པ་མ་གཏོགས་སྔགས་ཀྱི་སྦྱོར་བ་འདི་ཁོ་ན་བཞིན་གསུངས་སོ། ། ༈ གཤེད་དམར་རྒྱུད་བུ་འགྱུར་ལས། སྐྱ་རུ་རའི་ཕྱེ་མ་དང་། འོ་མ་ལ་སོགས་པ་བཟའ་བར་བྱ་སྟེ། ལོའི་སྦྱོར་བས་ཚེ་བརྒྱའོ། །དང་། སྐྱུ་རུ་ར་དང་། ཨ་རུ་ར་དང་། བུང་བའི་རྒྱལ་པོ་དང་། པི་པི་ལིང་དང་། ན་ལེ་ཤམ་དང་། ལྕགས་ཀྱི་ཕྱེ་མ་རྣམས་སྦྲང་རྩི་དང་། ཤ་ཁ་ར་དག་གིས་ཨུ་དུམྺཱ་རའི་འབྲས་བུའི་ཚད་ཀྱི་རིལ་བུར་བྱའོ། །དེ་ནས་རིལ་བུ་བཟའ་བར་བྱ་སྟེ། ཟླ་བས་ཚེ་ལོ་སུམ་ཅུར་འགྱུར་རོ། །དང་། ཐམས་ཅད་དུ་ཕ་མ་ཉིད་ལྷའི་རྣམ་པས་བཟའ་བར་བྱའོ། །སྔགས་ཀྱིས་མཉེས་ཤིང་བྱིན་གྱིས་བརླབ་པར་བྱའོ། །དང་། འབྲས་བུ་གསུམ་གྱི་ཕྱེ་མ་དང་། མར་དང་སྦྲང་རྩི་རྣམས་བཏུང་བར་བྱ་སྟེ་ནད་ཐམས་ཅད་འཇོམས་སོ། ། ༈ རྣམ་སྣང་སྒྱུ་འཕྲུལ་དྲྭ་བའི་རྒྱུད་ལས། གང་ཞིག་ནོར་རྫས་འདོད་པ་ཡིས། །གནོད་གནས་འདི་འདྲ་བསྒོམ་བགྱིས་ན། །དེ་ཡིས་ས་ཆེན་ནོར་རྫས་ཀྱིས། །རིང་པོར་མི་ཐོགས་གང་བར་འགྱུར། །ཞེས་དང་། ལག་ན་རྡོ་རྗེ་བདུད་རྩི་ཡིས། །ཆུ་ཡང་རྟག་ཏུ་དབུལ་བར་བྱ། །དང་། གཟུགས་འོད་ཟེར་ཅན། བརྙན་མང་པོ་འཕྲོ་བ་ཡིས། །སྡང་བའི་སེམས་ཅན་བཅིངས་པ་དང་། །མིག་དང་ཁ་ནི་འདྲུབ་པར་བྱེད། །དང་། དཀྱིལ་འཁོར་དམར་པོ་རི་ཁྲོད་མ་ཆེར་འབར་བས། །ཁྲོ་བོའི་སྤྲིན་འཕྲོ་སྡུད་མཛད་ཅིང་། །གདོན་གང་སྐྱེ་རྒུའི་ནང་གནས་པ། །དེ་དག་ཁྲོ་བོའི་མེས་ཀྱང་བསྲེག །ཕྱིར་ཡང་བསྲེགས་ནས་སངས་རྒྱས་ཀྱི། །ཁ་དོག་བདུད་རྩི་ཆར་འབེབས་མཛད། །དེ་འདྲ་རྣལ་འབྱོར་གྱིས་བསྒོམ་ན། །མི་ངས་ཐམས་ཅད་ཞི་བར་མཛད། །དང་། ཛཿཡི་ཡེ་ཤེས་ལས་བསྒྲུབས་པ། །རིག་སྔགས་མཚན་ནི་དུག་སེལ་མ། །སོགས་ནས། ཕྱག་བཟང་བུམ་པ་ཟླ་འདྲ་བའི། །ཁ་ནི་ཛ་ཡིས་རྣམ་བརྒྱན་པས། །དུག་གིས་ཕོག་པ་རྣམས་ལ་ལྡུག །རྟག་ཏུ་སྐུ་གསུམ་དུག་སེལ་མ། །དུག་གིས་ཕོག་པ་རྣམས་ལ་བསྒོམ། །དེ་ལྟར་བསྒོམ་པར་བྱས་པ་ཡིས། །རིང་པོར་མི་ཐོགས་བྱང་ཆུབ་ཐོབ། །དང་། ས་ཡི་ཡེ་ཤེས་ལས་བསྒྲུབས་པ། །སྟོང་ཆེན་རབ་ཏུ་འཇོམས་མཛད་པའི། །ལྷ་མོ་ནད་ཀུན་འཕྲོག་མ་སྟེ། །སྡང་བའི་སེམས་ཅན་འཇོམས་མཛད་མ། །སོགས་ཕྱག་སྟོང་དབུ་སྟོང་དང་། ཕྱག་བརྒྱད། དབུ་བཞིའི་བསྒོམ་ཚུལ་དང་། དེ་ཡི་ལས་ཀྱིས་བསྐུལ་བ་ཡི། །གསང་སྔགས་དཔའ་བོས་གདོན་བར་བྱ། །རྣལ་འབྱོར་དབང་ཕྱུག་ལས་འདོད་པས། །འདི་བྱས་པས་ནི་སྲུང་བར་འགྱུར། །དང་། དྷྭཾ་ཞེས་བྱ་བ་བསྐྱེད་པ་ཡི། །བསྡིགས་པའི་མཛུབ་མོའི་ཕྱག་རྒྱ་ཅན། །དྲག་མོ་ཆེན་མོ་ཞལ་བཞི་པ། །སྤྱན་གསུམ་ཕྱག་བརྒྱད་རྣམས་ཀྱིས་བརྒྱན། །རལ་གྲི་གཏུན་ཤིང་འཁོར་ལོ་མདའ། །མདུང་རྩེ་གསུམ་པ་རྡོ་རྗེ་གཞུ། །ཆོམ་རྐུན་མཛུབ་མོས་བསྡིགས་པ་སྟེ། །རྡོ་རྗེ་རོ་ལངས་འབྱུང་བ་དག །མཐོང་བས་དཔུང་རྣམས་བཅོམ་གཏོང་བས། །ལྷ་མོ་རྟག་ཏུ་བསྒོམས་ན་ནི། །རིང་པོར་མི་ཐོགས་བྱང་ཆུབ་ཐོབ། །འཇིག་རྟེན་གསུམ་རྣམ་པར་འཇོམས་པ་ལ་མཁས་པ་མཆོག་གི་རྡོ་རྗེ་རྩེ་མོ་ཞེས་བྱ་བའི་ཏིང་ངེ་འཛིན་ཏོ། །དང་། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས། བརྒྱ་བྱིན་མངོན་པར་མཐོ་བའི་སྟོབས་ལྷ་མ་ཡིན་རྣམ་པར་འཇོམས་པས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྒྱལ་མཚན་གྱི་རྩེ་མོའི་དཔུང་རྒྱན་གྱི་གཟུངས་ཆེན་པོ་འདི་གསུངས་སོ། །ཨོཾ་བྷ་ག་ཝ་ཏཱི་དྷྭ་ཛཱ་གྲ་ཀེ་ཡཱུ་རེ་པ་ར་སཻ་ནྱ། བི་དྷྭཱ་ནྶ་ན་ཀཱ་སྭཱ་སཻ་ནྱ་པ་རི་ལ་ནི། ཨུ་ལུ་ཀཱ་མུ་ཁི་ཁ་ཁ་ཁཱ་ཧི་ཁཱ་ཧི། པ་ར་སཻ་ནྱ་མ་ཨ་ནནྟ་བྷུ་ཛེ། ཨ་ནནྟ་མུ་ཁེ། པྲ་ཧ་ར་པྲ་ཧ་ར་ཧཱུྃ་ཕཊ྄་ཕཊ྄་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་གཡོས་པར་འགྱུར། །བྱང་ཆུབ་སེམས་དཔའ་རབ་གཡོས་ཤིང་། །བདུད་ཀྱི་སྡེ་རྣམས་ཚིག་པར་གྱུར། །གནོད་སྦྱིན་སྲིན་པོ་གོས་བྲལ་ནས། །འཇིགས་ཤིང་སྐྲག་པར་གྱུར་པ་ཡིས། །གཙོ་བོ་རྡོ་རྗེ་རྣམ་སྣང་དྲན། །དང་། །ཁུ་ཚུར་གཉིས་ལས་གུང་མོ་གཉིས་གཤིབས་ཏེ་བསྒྲེང་བ་ལས་རིན་པོ་ཆེའི་ཚུལ་དུ་བཀུག་ལ་མཐེ་བོང་བརྐྱང་པའི་སྟེང་དུ་མཛུབ་མོ་གཉིས་གདུ་བུའི་ཚུལ་དུ་བྱས་པ་ནི་སངས་རྒྱས་འཁོར་ལོ་ཅན་གྱི་ཕྱག་རྒྱ་གཡུལ་ལས་སྒྲོལ་བར་བྱེད་པའོ། །གསུངས་ཏེ་ཏིང་འཛིན་སྔགས་རྒྱས་བསྟན་ལ། ལས་ཀྱི་ཚོགས་ནི་དམིགས་བསལ་མེད་དོ། །པྲ་ཡི་ཡེ་ཤེས་ལས་བསྒྲུབ་པ། །སྟོབས་ཆེན་ཕ་རོལ་གནོན་མཛད་མ། །སྤྱན་གསུམ་ཕྱག་བརྒྱད་གཡས་པ་ན། །རལ་གྲི་འཁོར་ལོ་མདུང་རྩེ་གསུམ། །མདའ་ཡིས་རྣམ་བརྒྱན་ཕྱག་གཡོན་ན། །རྡོ་རྗེ་ཞགས་པ་དགྲ་སྟྭ་གཞུ། །བསྣམས་པས་སྡང་བའི་བགེགས་ལྷུང་མཛད། །བུ་མི་འཚོ་དང་མོ་གཤམ་དག །གསང་པའི་དཀྱིལ་འཁོར་བཅུག་ནས་སུ། །ལྷ་རྣམས་ཀུན་གྱིས་བུམ་པ་འཛིན། །སློབ་དཔོན་གྱིས་ནི་དབང་བསྐུར་ཞིང་། །དེ་ཡི་མངལ་དུ་བྱིས་པ་ནི། །འཇམ་པའི་གཟུགས་ཅན་འཇུག་པར་བསམ། །ཞགས་པའི་ཕྱག་རྒྱས་མཚན་ངན་ནས། །སྐྱེས་པའི་གཟུགས་ཅན་འབྱུང་བ་དག །དྲན་པ་ཡིས་ནི་བྲལ་ནས་ཀྱང་། །མངལ་ནི་བསོད་ནམས་དག་གིས་སྤེལ། །མངལ་ཐམས་ཅད་རྣམ་པར་བལྟ་བ་སོ་སོར་འབྲང་མའི་ཡེ་ཤེས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དང་། ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་ས་རི་སྭཱ་ཧཱ། ཞེས་བསྟན། ཨོཾ་མ་ཧཱ་ས་ཧ་སྲ་པྲ་མརྡྷ་མརྡྷ་ནཱ་བ་ར་སིདྡྷིཾ་ད་མཱི་གེ་མ་ཎི་བཛྲ་ཎི་ཧཱུྃ་ཕཊ་སྭཱ་ཧཱ། སོགས་སྟོང་ཆེན་རབ་འབྱམས་ཀྱི་སྙིང་པོ་གསུངས། བ་ཡི་ཡེ་ཤེས་རོལ་པས་བསྐྲུན། །ལྷ་མོ་ནོར་གྱི་བློ་གྲོས་མ། །གཟི་ཆེན་གསེར་གྱི་མདོག་ཅན་ལ། །ཕྱག་དྲུག་ལང་ཚོ་དར་ལ་བབས། །རྒྱན་རྣམས་ཀུན་གྱིས་བརྒྱན་པ་སྟེ། །འཇོ་སྒེག་ཐབས་བཅས་འབར་བ་སྟེ། །དེ་ཡི་ཕྱག་གཡས་མཆོག་སྦྱིན་མཛད། །གཉིས་པས་འབྲུ་ཡི་སྙེ་མ་དང་། །གསུམ་པ་ཡིས་ནི་མདའ་ཡང་གསོར། །ཕྱག་གཡོན་ཡིད་བཞིན་ནོར་བུ་དང་། །རིན་ཆེན་ཆར་འབེབས་གཞུ་ཡང་འཛིན། །གྲོགས་མོའི་སྐྱེ་བོས་ཡོངས་བསྐོར་ཅིང་། །མངགས་གཞུག་གནོད་སྦྱིན་མེ་ཡི་གཟུགས། །རིན་ཆེན་ཆར་པ་འབེབས་པ་དང་། །ནོར་ཀུན་གྱི་ནི་ཆར་པ་ཡང་། །འབེབས་པར་བྱེད་པ་བསམ་པར་བྱ། །ནོར་གྱི་བློ་གྲོས་ཆེན་མོ་འདི། །དེ་ལྟར་སྔགས་པས་བསྒོམ་ན་དེས། །དཔག་ཚད་བདུན་ནི་རྒྱས་པར་ཡང་། །ནོར་གྱི་ཆར་གྱིས་ཁྱབ་པར་མཛད། །བྱང་ཆུབ་ཤིང་མཆོག་དམ་པ་ན། །དེ་ལྟར་རྣལ་འབྱོར་བདག་ཉིད་བསྒོམ། །ནོར་གྱི་རྒྱུན་གྱི་ཆར་རབ་ཏུ་འབེབས་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དང་། ཨོཾ་བ་སུ་དྷཱ་རི་མ་ཧཱ་བ་སུ་དྷཱ་ར་དྲྀཥྟ་ནི་པཱ་ཏ་ནི་བ་སུ་སྭཱ་ཧཱ། དང་། བཅོམ་ལྡན་ནོར་རྒྱུན་ཞེས་བྱ་བའི། །མཚན་ནི་མི་མཆོག་སྒྲོགས་བགྱིད་ན། །དེ་ལ་ནོར་གྱི་ཆར་འབབ་ཅིང་། །ནོར་ཆེན་དང་ནི་ལྡན་པར་བགྱི། །གསུངས། ཨོཾ་པི་ཤཱ་ཙི་པ་ཎ་ཤ་བ་རི། སརྦ་མཱ་རི་པྲ་ཤ་མ་ནི་ཧཱུྃ་ཕཊ། དང་། ནམ་མཁར་ཀུན་ནས་རིག་སྔགས་ཀྱི། །རྒྱལ་མོས་ལེགས་པར་བཀང་ནས་སུ། །བདུད་རྩིའི་ཆར་འབེབས་བསམ་ན་ནི། །མོད་ལ་གནོད་པ་ཞི་བར་འགྱུར། །ཞེས་གསུངས་སོ། །བདེ་བ་ལས་འཁྲུངས་རྡོ་རྗེ་འཆང་བ་ཡི། །དངོས་པོ་དངོས་མེད་འབྱུང་གནས་ཆེན་པོར་མཁྱེན། །དང་པོ་གང་དུ་རྣམ་པར་སྣང་མཛད་ནི། །དག་ཅིང་དྲི་མེད་བློས་ནི་ཨོཾ་དུ་སྤྲུལ། །གཟུགས་མང་ཚུལ་གྱིས་ཕྲེང་བས་བསྐོར་བ་ཡི། །སྒྱུ་འཕྲུལ་དྲྭ་བ་ཁྱོད་ལ་ཕྱག་འཚལ་ལོ། །ཞེས་སོ། །ཡང་ཐོག་མར། དེ་ལ་རེ་ཞིག་དང་པོ་དངོས་གྲུབ་ནི་སློབ་དཔོན་ཆོས་ཀྱི་རྗེས་སུ་འབྲང་བ་ཡིན་པས། སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཡེ་ཤེས་སྙིང་པོ་ཁྱོད་ཉོན་ཅིག །བརྟན་ཞིང་སོགས་སོ། ། ༈ སྤྲིན་ཆེན་ལས་ཀླུ་ལ་བདེ་བ་སྦྱིན་པའི་གཟུངས་ནི། ཏདྱ་ཐཱ། དྷཱ་ར་ཎཱི་དྷཱ་ར་ཎཱི། ཨུཏྟཱ་ར་ཎི། སཾ་པྲ་ཏིཥྛ་ཏེ། བི་ཛ་ཡ་ཝ་རྞ། སཏྱ་པྲ་ཏི་ཛྙཱ་ས་ར་ཧ། །ཛྙཱ་ན་བ་ཏི། ཨུད་དེ་པཱ་ད་ནི་བི་ནཱ་མ་ནི། ཨ་བྷི་ཥེ་ཙ་ནི། ཨ་བྷི་བྱ་ཧཱ་ར། ཤུ་བྷ་བ་ཏི། ཨ་ཛི་མ་ཏུ། ཨེ་ཧི་ཀུ་མ་བ་ལ་ནཱི། བ་ཧ་ཧཱ་ར་ཀླེ་ཤ་ན། དྷུ་ན་པཱ་པཾ། ཤོ་བྷ་ཡ་མརྒ་ཎ། ནི་ར་ཏི་ཀ །དྷརྨ་ཏ་ཤུདྡྷ། ལོ་ཀ་བི་ཏི་མི་ར་ར་ཙ་ས། དུཿཁ་ཤ་མ་ན་སརྦ་བུདྡྷ་ཨ་ཝ་ལོ་ཀ་ན་ཨ་དྷིཥྛི་ཏེ། པྲཛྙཱ་ཛྙཱ་ན་བི་སྭཱ་ཧཱ། འདིས་ཀླུ་ཐམས་ཅད་ཀྱི་སྡུག་བསྔལ་རྒྱུན་གཅོད། བདེ་བ་སྦྱིན། ཆར་འབེབས། ལོ་ཏོག་སྐྱེད་པ་སོགས་ཡོན་ཏན་རྒྱ་ཆེར་བསྔགས་སོ། ། ༈ གཟའ་ཡུམ་གྱི་གཟུངས་ལ། ལག་ན་རྡོ་རྗེ་གཟའ་རྣམས་ཀྱི་ཡུམ་ཞེས་བྱ་བའི་གཟུངས་སྔགས་ཀྱི་ཚིག་འདི་དག་སྟོན་ཟླ་ཐ་ཆུང་སྨིན་དྲུག་ཟླ་བའི་ཡར་ངོའི་ཚེས་བདུན་ནས་བརྩམས་ཏེ། གསོ་སྦྱོང་བླངས་ནས་ཚེས་བཅུའི་བར་དུ་ཉིན་གཅིག་བཞིན་མཆོད་ཅིང་བརྗོད་པར་བྱས་ནས་ཉ་ལ་ཉིན་ཐོག་ཐག་བཀླག་ན་དེ་ལ་ལོ་དགུ་བཅུ་རྩ་དགུའི་བར་དུ་འཆི་བའི་འཇིགས་པ་འབྱུང་བར་མི་འགྱུར་རོ། །སྐར་མདའ་ལྷུང་བ་དང་། གཟའ་དང་རྒྱུ་སྐར་གྱིས་གདུངས་པའི་འཇིགས་པ་འབྱུང་བར་མི་འགྱུར་རོ། །ཞེས་སོགས་གསུངས། ། ༈ ཡོན་ཏན་བསྔགས་པ་དཔག་ཏུ་མེད་པའི་གཟུངས་ནི། དཀོན་མཆོག་གསུམ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། ཨ་མི་ཏ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ཨ་མི་ཏེ། ཨ་མི་ཏོཏྦྷ་ཝེ། ཨ་མི་ཏ་སཾ་བྷ་ཝེ། ཨ་མི་ཏ་བིཀྲཱ་ནྟེ། ཨ་མི་ཏ་ག་མི་ནི། ག་ག་ན་ཀཱིརྟི་ཀ་རེ། སརྦ་ཀླེ་ཤཀྵ་ཡཾ་ཀ་རི་སྭཱ་ཧཱ། འདི་ལན་གཅིག་བརྗོད་པས་བསྐལ་པ་འབུམ་གྱི་སྡིག་སྒྲིབ་བྱང་བ་སོགས་དང་། ལན་སུམ་འབུམ་བཟླས་བརྗོད་བྱས་ན་དེ་བཞིན་གཤེགས་པ་འོད་དཔག་མེད་མཐོང་བར་འགྱུར་རོ། །གསུངས། སྣང་བ་མཐའ་ཡས་རྗེས་སུ་དྲན་པའི་གཟུངས་ལ། བཅོམ་ལྡན་འདས། + སངས་རྒྱས་སྣང་བ་མཐའ་ཡས་ལ་ཕྱག་འཚལ་ལོ། །ཏདྱ་ཐཱ། ཨ་མི་ཏེ། ++ ཀྲཱནྟ་ཀ་རེ། ཨ་མི་ཏ་ག་ག་ན། +++ སྭཱ་ཧཱ། ཡང་གཅིག་ལ། བི་ཀྲཱནྟ་ཡན་འདྲ་བ་ལ། གཱ་མི་ནི། ག་ག་ན་སོགས་གསུངས་སོ། །རྒྱལ་མཚན་རྩེ་མོའི་དཔུང་རྒྱན་གྱི་གཟུངས། ཏདྱ་ཐཱ། ཨོཾ་ཛ་ཡ་ཛ་ཡ་སོགས། རྒྱལ་མཚན་རྩེ་མོའམ། མགུལ་དུ་བཏགས་ན་མིའི་རྒྱལ་པོ་དང་སྐྱེས་བུ་དཔའ་བོ་ཐམས་ཅད་སྲུང་བར་བྱེད་དོ་ཞེས་གསུངས། ། ༈ མིག་ནད་རྣམ་པར་སྦྱོང་བའི་རིག་སྔགས། ཏདྱ་ཐཱ། ཧི་ལི་མི་ལི། ཀི་ལི་མི་ལི། ཧི་ལི་ཏེ་མི་ལི། ཧུ་ཡཱ་ཧུ་ཡཱ་ཧུ་ཡཱ་མ་ནི། ཧུ་ལུ་ཧུ་ལུ་ཧུ་ལུ། ཧུ་དུ་ཧུ་དུ་ཧུ་དུ། ཙཀྵུར་མེ་བི་ཤོདྷ་ཡ་སྭཱ་ཧཱ། ། ༈ དཔའ་བོ་གཅིག་གྲུབ་ལས། ཨོཾ་པདྨེ་པདྨ་ཨཀྵི་པདྨ་སུ་བྷ་གེ་ཕུཿ པདྨེ་པདྨ། ཨཀྵེ་པདྨ། སུ་བྷ་གེ་ཕུ་སྭཱ་ཧཱ། འདིས་བྱབས་པས་མིག་རེངས་པ་སོས། ། ༈ མིག་ནད་ཞི་བའི་གཟུངས། ཏདྱ་ཐཱ། རུ་དྷི་རེ་ཕུཿ རུ་དྷི་ར་ཨཀྵི་ཕུཿ རུ་དྷི་ར་པེཾ་ག་ལེ་ཕུཿ བ་ཏེ་ཕུཿ བ་ཏི་ལེ་ཕུཿ ཧནྟེ་ཕུཿ མཱྃ་ས་དུནྡྷུ་བྷི་ཕུཿ པདྨ་ཨཀྵི་ཕུཿ པདྨ་དཎྜ་ཧི་ར་ཎཱི་ཡེ་ཕུ་སྭཱ་ཧཱ། འདི་སྲད་བུ་དཀར་པོར་ལན་བདུན་བཟླས་ཏེ་མདུད་པ་བོར་བ་གདགས། ཚུལ་བདུན་བཟླས་ཏེ་བྱབས། ། ༈ དཀོན་མཆོག་གསུམ་ལ་ཕྱག་འཚལ་ལོ། །འཕགས་པ་འོད་དཔག་ཏུ་མེད་པ་ལ་ཕྱག་འཚལ་ལོ། །ཏདྱ་ཐཱ། ཨི་ལི་མི་ཏི་མི་ལི། ཧ་ནེ་སུ་ཧ་ནེ། ཆྒཻ་མོ་ཞིག་ཛྭ་ར་བནྡྷཱ་མི། ཨེ་ཀ་རི་ཀཾ །ཏྲི་རི་ཀཾ །ཙ་ཏུརྦད་ཀཾ །ནིརྱ་ཛྭ་རཾ་སྭཱ་ཧཱ། འདི་མགུལ་དུ་བཏགས་ན་རིམས་ནད་མེད་པར་བྱེད། ། ༈ ནམ་སྙིང་མཚན་བརྒྱའི་གཟུངས། ཨོཾ་སྭ་སྟི་ཀ་མ་ལཱཀྵི་བི་པུ་ལ་སཾ་བྷ་ཝ། དྷརྨ་དྷཱ་ཏུ་གོ་ཙ་ར་སྭཱ་ཧཱ། ཕྱག་རྡོར་མཚན་བརྒྱ། ཨོཾ་བཛྲ་ཙཎྜ་སརྦ་དུཥྟན་ཏ་ཀ་ཧ་ན་ད་ཧ་པ་ཙ་ཧཱུྃ་ཕ྄ཊ། ། ༈ སྒྲིབ་སེལ་མཚན་བརྒྱར། ཨོཾ་ཨ་མྲྀ་ཏ་བིནྡྷུ་ཛ་བ་མ་ཧཱ་སུ་ཁ་སྭཱ་ཧཱ། འདི་གང་གི་རྣ་ལམ་དུ་གྲགས་པས་སྒྲིབ་པ་ཐམས་ཅད་སེལ་བར་གསུངས། སྐུ་གདུང་དང་བཅས་པའི་མཆོད་རྟེན་ལ་ཚེས་བརྒྱད་བཅོ་ལྔ་གང་རིགས་སྨྱུང་བར་གནས་པས། སྤོས་སོགས་ཀྱིས་མཆོད་ཅིང་བསྐོར་བ་དང་བཅས་བཟླས་ན་དམ་པ་ཅི་འདོད་ཐོབ་ཅིང་སྡིག་པ་དང་སྡུག་བསྔལ་འཇིགས་པ་ཐམས་ཅད་ལས་ཐར་བར་གསུངས། ། ༈ ས་སྙིང་། ཨོཾ་སུམྦྷ་ནི་སུམྦྷ། ཧ་ར་ཙ་ར། མ་ཧཱ་པཱ་ཤ་མ་རུ་ཏཱ། ཨ་མོ་གྷ་བཛྲ་ས་ཏྭཱ་སཱ་ཧཱ། ། ༈ བདུད་རྩི་འབྱུང་བ་ལ། ཨོཾ་ཨ་མྲྀ་ཏེ་ཧཱུྃ། དང་། ན་མཿསརྦ་སོགས་ནམ་མཁའ་མཛོད་ཀྱི་སྔགས་གསུངས། ། ༈ ཁ་འབར་མའི་གཟུངས་ལས། ན་མ་སྶརྦ་ཏ་ཐཱ་ག་ཏ་ཨ་ཝ་ལོ་ཀི་སོགས་གསུངས། ། ༈ འཇུར་གེགས་ཀྱི་གཟུངས་ལས། ཨོཾ་ཛྭ་ལ་མི་དཾ་སོགས་གསུངས། ། ༈ ཡེ་ཤེས་སྐར་མདའི་གཟུངས་ལས། ཨོཾ་ཛྙཱ་ན་ཨ་ཝ་ལོ་ཀི་ཏེ་ས་མནྟ་སྥ་ར་ཎ་ར་སྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུྃ། ཞེས་པའི་ཆུ་སྦྱིན་གསུངས། ། ༈ ཕྱག་རྡོར་བར་ཆད་སེལ་བའི་གཟུངས་ནི། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཨ་པྲ་ཏི་ཧ་ཏ་ཕ་ལ་ཧཱུྃ་ཕ྄ཊ། སརྦ་བིགྡྷཱཾ་ཨནྟ་རཱ་ཡ་བི་ནཱ་ཤ་ཀ་ར་མཱ་ར་ཡ་ཧཱུྃ་ཕཊ། བརྒྱ་རྩ་བརྒྱད་བཟླས་ན་གཤིས་ངན་དུ་འཆི་བ་བཅུ་གསུམ་གྱིས་མི་ཚུགས། འཛིན་འཆང་བཟླས་པས་བགེགས་ཐམས་ཅད་ཀྱིས་གླགས་མི་རྙེད་པ་དང་། སྒྲིབ་པ་ཐམས་ཅད་བྱང་བ་སོགས་མཐའ་ཡས་པར་གསུངས་སོ།། །། ༈ ཀུན་མཁྱེན་ཆོས་འབྱུང་དང་ཀུན་ཁྱབ་དཔོན་སློབ་བཀའ་འགྲོས་ནས་བཀོད་པའི་གྲུབ་བརྒྱའི་བཀོད་ཡིག་ཉུང་ངུ་ཞིག་ཡོད་པས། རྗེས་གནང་གི་སྐབས་ཀྱང་མངོན་རྟོགས་དེ་ལྟར་ཡོད། ཏཱ་རའི་གྲུབ་བརྒྱའི་བཀོད་ཡིག་ཀྱང་ཡོད་པས་སླར་བཙལ་གསུངས། ། ༈ ཇོ་ལུགས་གསང་འདུས་འཇམ་རྡོར་སྤར་མ་ལ་ཡི་གེ་མ་དག་པ་རེ་ཟུང་ཡོད། རྣམ་སྣང་གི་སྔགས་ཆད་པས། ཨོཾ་ཨཱཿཛི་ན་ཛིཀྲ་བྲཱུཾ་ཧཱུྃ། ཞེས་སྦྱར་དགོས་སོ། །དཀྱིལ་འཁོར་གྱི་གཙོ་བོ་མི་བསྐྱོད་པ་དང་འཇམ་དཔལ་དབྱེར་མེད་ཡིན་ཅིང་། སྔགས་ཀྱང་། མཉྫུ་བཛྲ་ཟེར་བ་འདི་ཡོད་པ་ཡིན་གསུངས་སོ། །དེ་ཡང་། ཛི་ན་ཛིཀ྄་འབྱིན་སྔགས། བྲཱུཾ་ས་བོན། དེ་དག་འབྲུ་གསུམ་དང་སྤེལ་བའོ། །རྡོ་རྗེ་སློབ་དཔོན་གྱི་དབང་གི་སྐབས་སུ་བརྟན་བྱེད་ཆུ་དབང་ཞིག་བསྐུར་གསུངས་པ་དེ་ནི་ངེས་པར་དགོས། རིག་དབང་ལྷག་མ་རྣམས་བསྐུར་གསུངས་པ་ན་བོད་སྔ་མའི་རྗེས་སུ་འབྲངས་ནས་སོར་བཞག་མཛད་པ་མ་གཏོགས་རང་བཞེད་དང་རྒྱ་གར་པའི་ལུགས་མིན་ཏེ། རྒྱ་གར་པའི་ལུགས་ལ་སློབ་དཔོན་བྱེད་མི་ནུས་པ་རྣམས་རིག་དབང་ལྔ་སློབ་མའི་དོན་ཁོ་ནར་ཞུ་མཁན་ཡོད་པས། དེས་སློབ་དཔོན་གྱི་རིག་དབང་གི་གོ་མི་ཆོད་པས། དབང་ཐོག་མར་ཞུ་དུས་ནས་རིག་དབང་ལྔ་ཡོངས་རྫོགས་རྡོ་རྗེ་སློབ་དཔོན་དུ་བསྒྲུབས་པའི་ཆེད་དུ་ཞུ་བ་ཞིག་དགོས་པས། མར་མེ་མཛད་བཟང་པོས་བཞི་བརྒྱ་ལྔ་བཅུ་པ་ལས། རྡོ་རྗེ་སློབ་དཔོན་གྱི་དབང་གི་སྐབས་སུ། སྔར་བཞིན་རིག་དབང་ལྔ་བསྐུར་ཟེར་བའང་དེ་ལ་དགོངས། བོད་འདིར་ནི་དབང་བཞི་ཡོངས་རྫོགས་སྟན་ཐོག་གཅིག་ཏུ་བསྐུར་བའི་ཕྱིར་དེ་འདྲའི་ཐ་སྙད་མེད་དོ། ། ༈ བོད་ཡིག་སྲོང་བཙན་གྱི་དུས་ཐོན་མིས་ཐོག་མར་མཛད། དེ་ནས་མིའི་ཨག་ཚོམ་གྱི་དུས་གཙང་པ་དགེ་བསྙེན་དཀོན་མཆོག་འབངས་ཞེས་བྱ་བ་དང་། ཁྲི་སྲོང་གི་དུས་བྷེ་ཤོ་ཁྲམ་ཟེར་བ་སོགས་དང་། ཁྲི་རལ་གྱི་དུས་གྲ་ཤོད་རྣམ་གཉིས་ཞེས་སོགས་བྱུང་། ཕྱི་དར་གྱི་དུས་ལོ་ཆེན་ཤཱཀྱ་རྡོ་རྗེ་བྱ་བ་དང་། ལྷག་པར་མཁས་པ་ཀ་ཁྱུང་གཉིས། དེ་ལས་ཀྱང་ཁྱུང་པོ་ཕུལ་དུ་བྱུང་བས་བོད་ཀྱི་ཡིག་དཔོན་བྱས་པར་གྲགས། སློབ་མའང་བུ་ཆེན་བཅུ་གཉིས་སོགས་བྱུང་བ་ལས། མཁས་པ་རོང་པོ་ཉིད་མཆོག་ཏུ་གྱུར་པའོ། །ཞེས་སྐད་དོ།། །། ༈ རྣལ་འབྱོར་མའི་བསྐྱེད་རྫོགས་དང་གསང་འདུས་རིམ་ལྔ་དོད་ཐུབ་སྦྱར་ན། འགྲོ་བ་དག་པའི་རྣལ་འབྱོར་དང་། ཁྱད་པར་ལུས་དཀྱིལ་ཐུན་མོང་མ་ཡིན་པའི་གསལ་སྣང་གྲུབ་པ་ལ་བརྟེན་ནས་རླུང་སེམས་འཇུག་པ་གཅིག་པས་སྣང་བ་ལྷ་སྐུར་རང་ཤར་བ་ལུས་དབེན། རྫོགས་རིམ་རྩ་དབུ་མ་ཁ་དབྱེ་ནས་རླུང་དབུ་མར་ཞུགས་གནས་ཐིམ་གསུམ་སྒྲུབ་ནུས་པ་ངག་དབེན། རླུང་ལུས་ལ་ཞུགས་པས་སྟོང་གཞིའི་འོད་གསལ་འདྲེན་པ་སེམས་དབེན། སེམས་ལ་ཞུགས་པའི་སྟོང་ཉིད་ལས་ལྷ་སྐུ་འཇའ་ཚོན་ལྟ་བུར་ལྡང་བས་སྒྱུ་ལུས། དེ་ཉིད་སྟོང་པར་ཞུགས་པས་འོད་གསལ། ཁྱད་པར་བསམ་མི་ཁྱབ་པ་དུས་ཚོད་མ་ཡིན་པའི་སྡུད་རིམ་ལ་བརྟེན་ནས་འོད་གསལ་དང་ཟུང་འཇུག་གཉིས་ཀ་འགྲུབ་པའི་གནད་སོགས་རྒྱས་པར་སྦྱར་དུ་ཡོད་ཀྱང་ཡི་གེ་ཉུང་ངུས་མཚོན་དཀའ་བས་ས་བཅད་ཙམ་ཞུས་པ་ཞིབ་དཔྱོད་གནང་བས་མཁྱེན་པར་འགྱུར་བ་ལགས་ཤིང་། གཞན་ཡང་ལཱུ་ཧི་པའི་རྫོགས་རིམ་རྣལ་འབྱོར་ཆེན་པོ། དྲིལ་བུ་རིམ་ལྔ། ནག་པོ་རིམ་བཞི་སོགས་དང་སྦྱར་ཚུལ་ཞྭ་ལུ་རྡོ་རྗེ་འཆང་ནས་རྒྱ་ཆེར་གསུངས་པ་ཐོས་ལགས།། །།

                            ཞུ་བཅུག་པ་ཤེས་རབ་ཐེངས་གསུམ་པ་ཡིན་ལགས།

[edit]

rje btsun bla ma dam pa'i zhal lung rnams bskyud byang zin bris su btab pa blo gsal dga' ba'i rna rgyan/ @#/_/rje btsun bla ma dam pa'i zhal lung rnams bskyud byang zin bris su btab pa blo gsal dga' ba'i rna rgyan ces bya ba bzhugs so/_/ na mo bi b+hU badz+ra d+hA ra many+dzu g+ho ShAnan+da ma tI sA ra dza na ha pa s+ya shab+da swa rA ya/_thog mar nyan thos kyi theg pa'i skabs su/_bden bzhi rnam pa bcu drug gi don mtshon tsam spro na/_dang po la/_sdug bsngal bden pa'i ngo bo/_phung po lnga sdug bsngal gsum dang ldan pas lus ngag yid gsum kar mi bde ba yin/_nges tshig du khaHsat+yaM ngan par 'gro ba bden pa zhes pa'o/_/dbye na/_dbye gzhi rang dang bcas bzhi las/_dang po sdug bsngal la gsum ni/_zag bcas kyi 'du byed la yid du 'ong ba rnams ni 'gyur ba'i sdug bsngal mi la yod de/_tshe stod smad du bde skyid 'gyur bas mtshon/_skye ba'i sdug bsngal 'jur mig nas drangs pa lta bu/_rga ba shing sdong gog pa lta bu/_na ba dug 'thung ba lta bu/_'chi ba mun nang du 'gro ba lta bu/_dgra dang 'phrad dogs pa byi'u khras ded pa lta bu/_gnyen byams pa dang 'bral dogs pa bu gcig pu shir nye ba lta bu/_yod pa 'tsho skyong mi thub pa rgan mos phyugs tshol ba lta bu/_med pa btsal gyis mi rnyed pa yi dwags zas skom tshol ba lta bu ste sdug bsngal brgyad dang /_de bzhin lha la 'pho ltung gis mtshon/_sdug bsngal gyi sdug bsngal yid du mi 'ong ba rnams te/_mdze thog tu phol mig byung ba'am/_byol song rnams la glen lkugs kyi steng du/_khal 'gel/_zho bzho/_spu btog__/sha khrag gi ched du gsod pas mtshon/_khyab pa 'du byed kyi sdug bsngal kun la yod/_zas gos la sogs kyis mnar bas mtshon/_gnyis pa mi rtag pa la phyi nang gnyis/_phyi la yang gnyis te/_ring ba dur khrod du mi sogs shi ba'i rus pa mthong ba/_nye ba sems can da lta shi ba mthong thos so/_/nang la 'chi nges gsum ste/_skyes tshad mthar 'chi bar nges/_'dus byas mi rtag par nges/_tshe skad cig mi rtag par nges so/_/nam 'chi cha med gsum ste/_'chi ba'i rkyen mang ba/_lus la snying po med pa/_tshe la long med pa/_'chi ba la cis kyang mi bstongs pa gsum ste/_mdza' bshes gnyen 'dun gyis mi bstongs/_zas nor longs spyod kyis mi bstongs/_rang gi lus kyis mi bstongs pa rnams so/_/gsum pa stong pa ni/_de kun rang bzhin med pa'i do_na bsam zhing dpyad pa/_bzhi pa bdag med pa ni gang zag gi bdag med par mthong ba'o/_/gnyis pa kun 'byung bden pa'i ngo bo ni/_sdug bsngal de kun 'byung ba'i gzhi dug gsum sogs yin/_nges tshig__/sa mu ya da ste/_las dang nyon mongs pa'i mtshan nyid de dag las sdug bsngal ba de kun 'byung ba la bya/_dbye na dbye gzhi rang dang bcas bzhi las/_dang po ni/_kun 'byung zhes pa/_rgyu dug gsum la brten nas 'bras bu rigs drug gi sdug bsngal 'byung ba'o/_/gnyis pa la/_'dod yon lnga'i rgyu dang /_de la chags pa'i nyes dmigs gnyis/_'dun pa/_chags pa/_rab tu brkam pa gsum mo/_/nyes dmigs ni/_gzugs la chags pas phye ma leb lta bu/_sgra la chags pas ri dwags lta bu/_dri la chags pas bung ba lta bu/_ro la chags pas nya lta bu/_reg bya la chags pas glang po che lta bu'o/_/gsum pa rkyen la/_'das ma 'ongs da ltar dus gsum gyis phye/_bzhi pa skye ba la/_rgyu rnam rtog skye/_'bras bu ngan song skye ba dang gnyis so/_/gsum pa 'gog pa'i bden pa'i ngo bo ni/_nyon mongs rags pa thams cad zhi ba'i stong pa'o/_/nges tshig ni ro d+ha nges 'gog ste/_nyon mongs pa thams cad nges par 'gog pa'i phyir ro/_/dbye na/_dbye gzhi rang dang bcas bzhi las/_dang po 'gog pa zhes pa/_sdug bsngal dang bcas pa 'gog pas 'gog pa ste/_rgyu nyon mongs pa 'gog pas na 'gog pa/_rkyen rnam rtog 'brang ba de 'gog pas na 'gog pa/_'bras bu sdug bsngal 'gog pas na 'gog pa/_rnam rtog gi rgyun thams cad 'gog pas na 'gog pa ste/_nyan thos rnams 'gog pa la snyoms par zhugs nas byams pa'i bstan pa la ldang bar 'dod pa'o/_/gnyis pa zhi ba la lnga ste/_nyon mongs kyi me zhi ba ni myang 'das gyi sa na dug gsum med pa ste dug gsum rtsad nas spong pa'i phyir ro/_/nyes dmigs kyi me zhi ba ni myang 'das kyi sa na 'khor ba'i sdug bsngal thams cad zhi ba ste 'khor bar gnas pa'i nyes pa thams cad zhi ba'o/_/longs spyod kyi me zhi ba ni/_myang 'das kyi sa na 'du byed kyi sdug bsngal med de zas skom gyi sdug bsngal med pa'o/_/spyod lam gyi me zhi ba ni 'gro nyal 'dug pa thams cad la mi bde ba med pa'o/_/tshor ba'i me zhi ba ni/_khams gsum mtha' dag tshor ba gsum las ma 'das pas/_tshor ba bde ba thams cad 'gyur ba'i sdug bsngal/_sdug bsngal myong ba thams cad sdug bsngal gyi sdug bsngal/_tshor ba myong ba thams cad 'du byed kyi sdug bsngal lo/_/des na myang 'das la tshor ba bde sdug btang snyoms gsum med pa'o/_/gsum pa gya nom pa la gsum/_nyon mongs kyi tha ba gya nom pa ni/_nyon mongs pa'i tha ba zhi gnas kyis ma brlan/_shes rab kyi thong gshol gyis ma rlog pa de la 'jig rten las 'das pa'i myu gu thams cad mi skye'o/_/ngan song gi tha ba gya nom pa ni/_ngan song gi tha ba 'phags pa'i lam gyis ma brlan na/_mtho ris thar pa'i go 'phang mi 'byung ngo /_/sdug bsngal gyi tha ba gya nom pa ni/_sdug bsngal gyi tha ba bde bas ma brlan na 'phags pa'i lam mi 'byung bas/_bde bas brlan dgos/_rkyen thams cad dang bral bas gya nom pa ste legs pa zhes bya'o/_/bzhi pa nges par 'byung ba la bzhi/_rgyu nges pa ni nyon mongs pa thams cad kyi rtsa ba ma rig pa dang /_bag chags 'thug po sa bon dang bcas spong ba dang /_sgrib pa gnyis kyi bag chags spong pa'o/_/rkyen nges pa ni ma rig pa'i gnyen por rig pa'i shes rab dang /_bag chags kyi gnyen por bsod nams kyi tshogs dang sgrib gnyis sbyong pa'i gnyen por bden pa bzhi'o/_/lam nges pa ni bden bzhi nyid lam du byas nas nyams su len pa'o/_/'bras bu nges pa ni/_sdug bsngal la nges par 'byung ba'o/_/de yang 'khor ba'i sdug bsngal las nges par 'byung dgos/_nges par 'byung ba la rgyu bag chags 'thug po spang dgos/_rkyen bsod nams dpag med gsog dgos/_lam sdom pa mig bzhin bsrung dgos/_'bras bu sdug bsngal dgag dgos/_des bag chags la nges par 'byung bas na nges 'byin no/_/bzhi pa lam bden gyi ngo bo ni/_dkar po'i lam de la zhugs phyin chad thar pa thob pa zhig go__/nges tshig ni/_pan+thi zhes mang po 'gro ba'i phyir lam ste thar par 'gro ba'i lam mo/_/dbye na/_dbye gzhi rang dang bcas pa bzhi las/_dang po ni/_bden pa bzhi kho na'i sgo nas 'jug pa'o/_/gnyis pa rig pa la bzhi ste/_ltos pa'i rig pa ni/_rgyu ngan pa la ltos nas 'bras bu ngan par shes/_rgyu bzang po la ltos nas 'bras bu bzang por shes pa'o/_/bya byed kyi rig pa ni/_nyon mongs pa mi dge ba'i gnyen por 'gyur ba'i bya ba byed/_dge ba dkar po'i chos mtha' dag gi grogs su 'gyur ba'i bya ba byed pa'o/_/'thad pa sgrub pa'i rig pa ni chos can la 'thad pa wa lta bu/_dam bca' la 'thad pa me lta bu/_gtan tshigs la 'thad pa du ba lta bu/_mthun dpe la 'thad pa thab tshang nang du me lta bu'o/_/mdor na chos thams cad tshad ma'i lam gyi yang dag par shes pas gtan la 'bebs pa'o/_/chos nyid kyi bden pa bdag med gnyis rtogs pa'am/_bden bzhi ma nor bar rtogs pa'o/_/gsum pa sgrub pa la gnyis/_thun mong sgrub pa ni/_'chi ba mi rtag pa/_las rgyu 'bras/_'khor ba'i nyes dmigs bsams nas skyabs su 'gro/_sdom pa mig 'bras ltar bsrung /_gang zag gi bdag med bsgom/_thun mong ma yin pa'i sgrub pa ni/_sems can thams cad la byams snying rje'i skyabs 'gro khyad par can bskyed/_smon 'jug gi sems bskyed/_phar phyin gyi sgor zhugs/_chos kyi bdag med pa sgom pa des blo phyin ci ma log gi don la sgrub par nus pas na sgrub pa zhes bya/_bzhi pa nges 'byin la/_rgyu 'khor ba las 'byin pa ni/_dper na rtsub gtan rlon pa las me mi 'bar ba ltar zhen pa nyon mongs kyi rlan gyis gos na 'bras bu mya ngan las 'das pa mi thob bas 'khor ba'i nyon mongs pa'i zhen pa de dang bral bar bya'o/_/'bras bu mya ngan las 'das pa nges par 'byin pa ni/_dper na/_shing skam po las me 'byung ba ltar dkon mchog gsum yul du byas nas lam bden bzhi sbyor ba ni nyams su len cing /_'bras bu dgra bcom ba'o/_/_!_ye shes rnam pa bcu drug ni/_sgyu ma ngal bso'i 'grel pa las/_de nas mthong lam rnam par mi rtog pa'i ye shes bden pa bzhi'i chos nyid mngon du mthong ste/_khams kyi phyogs gcig spang bya/_rtags glo bur ba dag pa'i dus so/_/de la sdug bsngal/_kun 'byung /_lam 'gog pa'i bden ba re re bzhin chos shes pa dang /_chos shes pa la bzod pa/_rjes su shes pa dang /_rjes su shes pa la bzod pa ste bzhi bzhi bsdoms pas bcu drug go__/chos shes pa ni bden bzhi so so'i chos can gyi rang mtshan mthong ba'o/_/chos shes pa la bzod pa ni rang mtshan mthong bas mi skrag pa'o/_/rjes su shes pa ni bden bzhi so so'i rang mtshan stong nyid du mthong pa'o/_/rjes su shes pa'i bzod pa ni nam mkha' mthong ba la mi skrag pa'o/_/de dag la blo rdzas gcig gis bden bzhi rang bzhin snang stong sgyu ma lta bur bya rdzogs kyi skad cig mthong tshul bzhi 'char te/_bden bzhi don la chos shes bzhi/_chos bzod bzhi/_rjes shes bzhi/_rjes bzod bzhi'i rim pa so sor 'char ba'i phyir ro/_/de dag la mngon rtogs rgyan las/_sdug bsngal la sogs bden pa dang /_chos shes rjes su shes pa dang /_/bzod shes skad cig bdag nyid ni/_/zhes so/_/de'i dus su mthong spong brgya dang bcu gnyis spong tshul ni/_kun brtags kyi nyon mongs pa drug la/_ma rig pa/_'dod chags/_khong khro/_nga rgyal/_the tshom/_lta ba'o/_/lta ba la lnga ste/_'jig tshogs kyi lta ba/_mthar 'dzin/_log lta/_tshul khrims dang brtul zhugs la mchog 'dzin/_lta ba la mchog tu 'dzin pa'o/_/de la ma rig pa la sogs pa lta ba ma yin pa lnga po de dang bsdoms pas bcu/_de ltar rtsa ba'i nyon mongs pa bcu po de 'dod khams na bden bzhi re re la'ang bcu bcu byung bas bzhi bcu/_gzugs dang gzugs med gnyis na khong khro ma gtogs dgu dgu bden bzhi re re la byung bas/_sum cu rtsa drug pa gnyis te bsdams pas mthong spong brgya dang bcu gnyis po spong tshul ni/_mthong lam gyi ye shes skye 'gyur lam gyis rags pa brgyud nas sbyangs/_skye bzhin pas phra ba dngos su spongs/_skyes dus nas mthong spong gi sa bon ma lus pa 'gag pa'i tshul gyis so/_/de'i 'og tu sgom lam pa'i dri ma bzhi brgya dang bcu bzhi yang /_rang rang gi sa'i sbyor ba dang /_dngos dang /_rjes la spangs te/_sgom spong gi nyon mongs bag la nyal ba'i lhan skyes las phye na drug ste/_ma rig pa/_'dod chags/_khong khro/_nga rgyal/_'jig tshogs lta ba/_mthar 'dzin gyi lta ba'o/_/'dod khams na nyon mongs pa drug po re re la'ang /_chen po/_'bring /_chung ngu gsum gsum las/_de la'ang chen po/_'bring /_chung ngu /_'bring gi chen po/_'bring /_chung ngu /_chung ngu'i chen po/_'bring /_chung ngu ste dgu dgur phye bas drug tshan dgu ste lnga bcu rtsa bzhi/_gzugs khams na bsam gtan dang po/_gnyi pa/_gsum pa/_bzhi pa rnams su khong khro bor nas nyon mongs pa lnga po rnams la che 'bring chung dgu dgu ste/_'dod chags la sogs pa bzhi bcu zhe lnga pa bzhi bsdoms pas brgya brgyad cu/_gzugs med/_nam mkha'/_rnam shes ci'ang med/_srid rtse bzhi la brgya brgyad cu ste/_khams gong ma'i brgya brgyad cu bcu tshan gnyis la sum brgya drug cu/_de'i steng du 'dod pa'i lnga bcu rtsa bzhi bsnan pas sgom spong bzhi brgya dang bcu bzhi'o/_/spong tshul yang /_sbyor ba dang /_bar chad med lam gnyis kyi nye rgyu dang por spong /_khyad par lam gyis dngos su spong /_rnam grol lam gyis thag bsring dang /_phra ba 'gag 'gyur gyi tshul gyis spong ngo /_/zhes gsungs so/_/rang rgyal gyi skabs rten 'brel bcu gnyis la phyi rgyu dang 'brel pa drug ni/_myu gu dang /_ldong bu/_yal ga__/lo 'dab/_me tog__/'bras bu'o/_/nang rkyen pa drug ni/_sa chu me rlung dus kyi 'gyur ba/_sa bon no/_/'di'i mtshan nyid la spyi mtshan dang rang mtshan gnyis/_dang po la gsum/_rgyu de yod pa las skye/_med pa las mi skye/_rgyu mi rtag pa las skye/_rtag pa las mi skye/_nus pa las skye/_mi nus pa las mi skye'o/_/rang gi mtshan nyid la/_ma rig pa ni las rgyu la rmongs pa/_'du byed ni dmigs pa la sems g.yo ba/_rnam shes dang po mngal du zhugs pa/_ming ni ming bzhi'i thong ste/_tshor ba 'du shes 'du byed rnam shes bzhi/_gzugs ni mer po sogs/_skye mched drug ni mig la sogs pa'i dbang po/_reg pa ni gsum 'dus nas yongs su gcod pa/_tshor ba ni nyams su myong ba/_srid pa ni tshor ba la chags pa/_len pa ni rgyu la chags pa/_srid pa ni las kyi bag chags nus mthu can/_skye ba ni dang po ma byung ba las byung ba/_rga ba ni rgyun 'gyur ba/_shi ba ni srog gi dbang po rgyun chad pa'o/_/dbye ba ma rig pa la/_de kho na nyid dang las rgyu 'bras la rmongs pa gnyis/_'du byed la bsod nams kyi 'du byed sems pa dang /_g.yo'i 'du byed sems pa gnyis/_rnam shes la rgyu 'bras gnyis/_gzugs la 'byung ba'i gzugs dang 'byung 'gyur gnyis/_skye mched la drug ste/_dbang po lnga yid shes bcas/_reg pa la yang de drug la brten pas drug__/tshor ba bde sdug btang snyoms kyi/_sred pa la/_'dod sred/_gzugs sred/_gzugs med kyi sred pa gsum/_len pa la bdag tu smra ba'i nyer len/_lta ba'i nyer len/_nye 'dod pa'i dang tshul khrims kyi nyer len/_brtul zhugs mchog 'dzin gyi nyer len bzhi'o/_/srid pa la/_sngon gyi srid pa/_skye ba'i srid pa/_'chi ba'i srid pa/_bar srid bzhi/_skye ba la/_sgong mngal drod rdzus bzhi/_rga shi ni de bas so/_/snga ma snga ma rgyu la/_phyi ma phyi ma 'bras bu'o/_/de yang ring ba'i rgyu 'bras dang /_nye ba'i rgyu 'bras gnyis las/_gong ma bdun ni ring ba'i rgyu 'bras te/_ma rig pa'i dbang gis las byas/_las dbang gis bag chags bsags pas/_bag chags ni lngar bzhag pa ste/_'bras bu'i ming rgyu la btags nas bag chags mi zer bar/_rnam par shes pa la ming gzugs skye mched reg pa tshor ba zer ro/_/nye ba'i rgyu 'bras ni sred pa la sogs pa 'og ma rnams so/_/bar der rten 'brel snga ma'i khong du gtogs pa gcig gis sred pa bskyed/_sred pas len pa bskyed/_sred len chu lud 'dra ba des bag chags lnga po gsos btab pas bag chags nus mthu can du song ba de la sred pa zer ba lags so/_/nyan rang gi sa bdun ni/_he ru ka galpo las/_dang po dkar po rnam par mthong /_/shukla bi daR+shan b+hU mi zhes pa/_mos pa spyod pa'i sa nas drod la dang /_rnam par byang ba dkar po rnam par mthong ba'i sa zhes bya'o/_/rigs dang ldan pa rigs kyis/_/go tra b+hU mi zhes pa/_dad pa shin tu che ba'i sa/_/'jig rten chos kyi mchog la chos dang gang zag la bdag med par bzod pas na/_byang chub thob pa'i rigs dang ldan pas na rigs kyi sa zhes bya'o/_/grangs las 'phags pas brgyad pa'i sa/_/aSh+ta mi ka b+hU mi zhes bya ba ni/_brgyad pa la bya ste/_dgra bcom pa'i 'bras bu thob pa'i gral dang po nas/_yas bgrang na rgyun du zhugs pa la 'jug pa grangs brgyad la babs pas na'o/_/brgyad pa'i/_de nyid rtags mthong mthong pa'i sa/_/daR+shan b+hU mi zhes pa/_dri sh+yA te praMk+Sha Na zhes pa ni/_dri sha ni mthong ba/_b+hU mi ni sa ste rgyun zhugs kyi 'bras bu la gnas pas de kho na nyid rtag par mthong bas na mthong ba'i sa zhes bya'o/_/'dod khams 'dod chags srab pa'i sa/_/ta nU b+hU mi zhes pa/_lan gcig phyir 'ong bas na 'dod khams 'dod chags dang srab mor byas pa na srab pa'i sa'o/_/'dod pa'i 'dod chags bral ba'i sa/_/bi ga ta tA ga b+hU mi zhes pa phyir mi 'ong ba'i sa ste/_sa 'di la gnas pas 'dod pa 'dun pa dang /_gnod sems spangs pas na 'dod chags dang bral ba yin te/_de'i sa'o/_/bsrung bya mi nyams bsrung pa'i sa/_/kr-i tA bi b+hU mi zhes pa dgra bcom pa'i sa la bya ste/_kr-i ta ni byas pa/_a ni a bi du na shI la zhes pa ste bsrung ba'i rang bzhin can yin pas sngar byas te grub pa'i don mi nyams pa'i bsrung ba'i phyir byas pa bsrung ba'i sa zhes bya ste/_dngos su na dgra bcom pa'i sa'o/_/nyon mongs sa bdun rnam par gnas/_/pro tA san+d+ha zhes pa ni/_pro ta ni chu yi rgyun lta bu'o/_/a san+d+ha ni nang du zhugs pa ste spyir mya ngan 'das kyi mtshor 'bab pa'i chu bo'i rgyun du zhugs pa ste/_pa kr-i dA gA mi zhes pa ste/_pa kr-i da ni lan gcig__/A gA mI ni 'ong ba ste/_tshe de nyid la mya ngan mi 'da' yi/_lan gcig slar 'jig rten 'dir skye ba ste des na lan gcig phyir 'ong ba zhes bya'o/_/a nA gA mI zhes pa tha ma'i skal ba can gyis chos rnam lnga spangs pas/_slar 'dod khams su skye ba phyir mi 'ong ba zhes bya'o/_/las nyon kyi dgras myang 'das kyi bar gcod pa rnams bcom pa la dgra bcom pa zhes bya'o/_/de ltar na nyan thos kyi sa bdun gyi khog bsdeb par bya'o/_/zhes gsungs so/_/byang sems skabs bden gnyis gcig na skyon bzhi yod de/_kun rdzob kyi snang ba gzhan nas 'tshol mi dgos pa bzhin don dam yang mi 'tshol bar 'gyur ba/_kun rdzob bslu ba bzhin don dam yang bslu ba/_don dam bden pa bzhin kun rdzob yang bden pa/_kun rdzob la dbye na du ma yod pa bzhin/_don dam la'ang du ma yod pa'o/_/tha dad na skyon bzhi ste/_kun rdzob bkag pas don dam mi 'byung ba/_kun rdzob kyi chos nyid don dam ma yin pa/_don dam des kun rdzob kyi sgro 'dogs mi chod pa/_nyon mongs pa dang rnam byang gnyis kun gzhi'i ngo bor ma gcig pa'o/_/de la kun rdzob bden pa spyi'i mtshan nyid ni/_mi bden pas bslu zhing so skye'i spyod yul du gyur pa zhig go__/nges tshig ni/_saM pr-i ti sa t+yaM zhes pa yang dag par sgrib pa bden pa ste/_rnam par rtog pa dang bcas pa'i shes pas dngos po'i de kho na nyid mthong bar byed pa la sgrib pa'i phyir ro/_/dbye na yang log gnyis la khyad par brgyad de/_dang po don byed nus mi nus ni/_re zhig pa'i tshad mas kyang grub/_re zhig pa'i don byed kyang nus pa yang dag kun rdzob/_re zhig gi tshad mas kyang ma grub/_don yang byed mi nus pa log pa'i kun rdzob de 'dres so/_/gnyis pa rtog _pa yod med ni/_rtog med yul can du byas pa yang dag kun rdzob/_rtog pa dang bcas pa yul yul can du byas pa log pa'i kun rdzob/_gsum pa rig pas dbang byas na/_yul yul can du byas pa yang dag kun rdzob/_de'ang yin pa so so log pa'i kun rdzob/_bzhi pa gsal mi gsal ni/_gsal bar snang na yang dag kun rdzob/_mi gsal na log pa'i kun rdzob/_lnga pa med don ni/_med pa ma yin pa'i don snang ba tsam yang dag kun rdzob/_med pa'i don la zhen pa log pa'i kun rdzob/_drug pa rten dag pa ni/_rten rang gi dbang po la dngos su brten pa de yang dag kun rdzob/_de las log pa log pa'i kun rdzob/_bdun pa yul ni/_yul 'di na dus da ltar snang ba mthun pa ni/_shes pa ma zhen pa 'ching nus bskyed nus na yang dag kun rdzob/_de ltar ma yin pa log pa'i kun rdzob/_brgyad pa kun rdzob mtshan nyid bzhi can ni/_mthun par snang /_don byed nus/_rgyu dang rkyen las bskyed pa yang dag__/brtags na dben pa log pa'o/_/snang la don byed nus pa'i dpe bum pa de bzhin du snang la/_don byed mi nus pa thag khra'i sbrul snang yang mi snang don yang mi nus pa ni/_mi srid pa'i chos bzhi ste/_ri bong gi rwa/_mo gsham gyi bu/_rus sbal gyi spu/_nam mkha'i me tog go__/gzhan yang bye ma las mar dang /_seng ge las kha chu sogs mtshon no/_/don dam pa'i bden pa'i mtshan nyid spros mtha' thams cad dang bral ba/_nges tshig pa rA maR+tha sat+yaM/_zhes pa don mchog bden te/_'jig rten las 'das pa'i ye shes mchog gi dmigs pa'i spyod yul la don du gyur pa 'phags pa rnams mya ngan 'das pa dang /_skye ba med par yang dag par bden pa'o/_/dbye na gnyis/_rnam grangs ma yin pa'i don dam pa ni/_mtha' brgyad dang bral ba ste/_skye/_'gag__/rtag__/chad/_'gro/_'ong /_mtha'/_dbus dang bral ba sangs rgyas gyi thugs yin/_/rnam grangs kyi don dam pa thugs des mkhyen nas gzigs pa'i yul yin/_stong nyid bco brgyad kyang rnam grangs pa'i don mang ste/_mig rna ba sna lce yid rnams ther zug tu ma yin pa'i phyir na nang stong pa nyid/_gzugs sgra dri ro reg bya'i chos thams cad ther zug tu ma yin/_'jig par mi 'gyur bas na phyi stong pa nyid/_phyi nang gi skye mched bcu gnyis don dam par gzung 'dzin gnyis ka med do/_/yul dang yul can gyi tshul dang bral bas phyi nang stong pa nyid/_chos thams cad ngo bo nyid kyis stong pa rang bzhin gyis stong ste gzhan gyis stong par byar med pas stong pa nyid stong pa nyid/_phyi snod kyi 'jig rten na sa'i dkyil 'khor chen por phyogs bcur stong pas chen po stong pa nyid/_don dam pa nyid la yang dngos por bzung du rung ba med pas don dam pa stong pa nyid/_'dus byas khams gsum sgyu ma dang 'dra ste/_skye 'gag gnas gsum dang bral zhing stong pas 'dus byas stong pa nyid/_'dus ma byas nam mkha' dang /_de bzhin nyid dang /_'gog pa gnyis rgyu rkyen gyis grub pa ma yin pa 'di bzhi rang bzhin gyis stong pas na 'dus ma byas stong pa nyid/_mtha' las 'das pa stong pa nyid ni go sla'o/_/'khor ba thog mtha' med cing dbus kyang med pas thog ma dang tha ma med pa stong pa nyid/_bum nang gi chu ltar yod pa las med par byas lta bu ma yin pa ste/_chos thams cad ye nas rang bzhin gyis stong pas bsal ba med pa'i phyir dor ba med pa stong pa nyid/_chos thams cad nyan rang dang de bzhin gshegs pas kyang ma mdzad/_rang bzhin gyi 'dus byas kyang ma yin pas rang bzhin stong pa nyid/_phung po khams dang skye mched la sogs pa 'dus byas 'dus ma byas kyi chos thams cad so so'i mtshan nyid kyis stong pas chos thams cad stong pa nyid/_gzugs tshor 'du shes sogs rang mtshan btags pa tsam du zad de/_yongs su grub pa med pas dngos po med pa stong pa nyid/_'du 'phrod las byung ba'i chos rnams rang dbang can du mi skye ste/_rten cing 'brel te byung ba na ngo bo nyid med pa'i phyir ngo bo nyid stong pa nyid/_dngos po med par rtogs pa'i mthong ba dang /_shes pa ni dngos po med pa'i ngo bo nyid ces bya/_mthong ba dang shes pa 'di ka yang mthong bas kyang ma grub/_shes pas kyang ma byas te rang bzhin gyis stong pa'i phyir dngos po med pa'i ngo bo nyid stong pa nyid do/_/de lta bu'i stong pa nyid bco brgyad po re re la yang mtha' brgyad re res khyab bo/___/_!_dbu ma pas dam bca' ba'i gtan tshigs chen po bzhi yi bshad pa'i tshul la/_dang po rdo rje gzegs ma ni dgag bya'i rgyu dpyad nas dgag bya 'gog pa ste/_chos can ngo bo tsam yang don dam par bdag dang /_gzhan dang /_gnyis ka dang /_rgyu med pa las ma skyes pa gang zhig la skye ba'i dngos po mtha' dag gis stong ste/_dper na don spyi tsam la dngos po med pa bzhin no/_/yod med skye 'gog ni/_dgag bya'i 'bras bu dpyad nas 'gog pa ste/_chos can snang ba rten 'brel 'di yang don dam par rgyu la 'bras bu yod med skye ba gsum ka stong pa'i phyir te/_'di ltar gang las rgyu dang 'bras bu yod pa dang /_med pa skye bas stong pa dang /_skye ba'i dngos po mtha' dag gis stong pa ste/_dper na dngos po med kyang /_ngo bo nyid kyis mtshon par byas pa bzhin no/_/mu bzhi skye 'gog ni/_rgyu 'bras gnyis ka dpyad nas 'gog pa ste/_'di ltar snang ba'ang don dam par gcig las gcig shes dang /_gcig las du ma dang /_du ma las du ma dang /_du ma las gcig skye ba'i mu bzhi skye bas stong pa'o/_/dper na dngos po med par nam mkha' zhes gdags pa bzhin no/_/rten 'brel chen po la gnyis te/_ma yin dgag gtan tshigs su bkod pa rten 'brel chen po rang gi ngo bo dpyad nas 'gog pa ni/_rten cing 'brel bar 'byung ba de yang skye 'gag la sogs pa'i mtha' brgyad dang bral ba yin pas bden pa'i rang bzhin gyis stong pa ste/_dper na/_smig rgyu g.yo ba bzhin snang ba'i rten 'brel tsam du ma 'gag pa'o/_/med dgag gtan tshigs su bkod pa gcig dang du bral ni/_yod pa'i dngos po tsam du ma'i dngos po yin pa bkag pa tsam gyis gcig__/gcig gi dngos por yod dus su chod de/_yod pa'i dngos po tsam la gcig tu yod pa'am/_du mar yod pas khyab la dngos su med nges pa na gcig dang du ma'i khyab byar mthong ba'i yod pa'i dngos po 'di nyid don dam pa'i dngos po yin na'ang /_de nyid gcig dang du mas ma khyab par dogs pa skye ba'i nus pa brtsams te/_don dam pa'i dngos po cha gcig dang du mas khyab pa mtshan nyid nges pa'i tshul gyis shugs las grub pa'o/_/nges don dbu ma chen pos chos thams cad mtshan nyid gsum du 'dus par bzhed pa las/_thog mar kun btags bshad pa la/_ngo bo ni/_gzugs sogs yul drug dang /_dbang po drug dag__/chos dang gang zag dngos por yod do snyam du 'khrul pa'i rnam shes kyis nan gyis btags pa'i gzung 'dzin cha gnyis kyi rtog pa de'o/_/nges tshig ni/_pa ri sa ma tA dA zhes yongs su med pa la sgro btags pa lta bu'o/_/dbye na gnyis te/_snang ba'i kun btags ni yul dang /_dbang po'i gzung 'dzin gnyis so/_/mi snang ba'i kun btags ni/_ri bong gi rwa dang /_mo gsham gyi bu dang /_mu stegs pa'i bdag tu lta ba dang /_nyan thos kyi rdul phran rnams so/_/gnyis pa gzhan dbang bshad pa la/_ngo bo ni/_kun gzhi'i rnam shes 'khor dang bcas pa nyid/_/rgyu 'bras kyi tshul du skad cig ma la sems dang sems byung rten 'brel du 'byung 'byung ba de'o/_/de la ci'i phyir gzhan dbang zhes bya zhe na/_khams gsum gyi shes pa rgyu rkyen la rags ma lus par rang skye mi nus pas gzhan dbang zhes bya ba ste/_rgyu rkyen bzhis bskyed de/_kun gzhi la bag chags yod pa ni rgyu'i rkyen/_mig gi dbang po la sogs pa 'jug pa'i tshogs drug ni bdag po'i rkyen/_yul gzugs sgra dri ro reg bya la sogs pa ni dmigs pa'i rkyen/_shes pa skad cig ma ma 'gag pas go dbye nas/_skad cig ma phyi ma 'byung ba ni de ma thag pa'i rkyen no/_/nges tshig__/pa ra tan+t+ra zhes/_/gzhan rkyen la rags las shing shes pas der ston pa'o/_/dbye na gnyis te/_bskyed pa'i gzhan dbang ni sems can gyi sems las byung ba ni kun 'byung dang rkyen gyis bskyed pa'i 'dus byas so/_/ltos pa'i gzhan dbang ni/_de la bltos nas rgyu rkyen las bskyed pa'i 'dus ma byas bzhi ste/_so sor brtag pa'i 'gog pa/_so sor brtag min 'gog pa/_nam mkha' dang /_de bzhin nyid rnams so/_/gsum pa yongs grub bshad pa la/_ngo bo ni/_gzhan dbang gi chos can/_de kun la gzung 'dzin gnyis dang bral ba ste/_de la ci'i phyir yongs grub ces bya zhe na/_dper na chu dang /_nam mkha' dang /_gser dang 'dra'o/_/chu rnyog rung dwangs rung chu yi rang bzhin sngo sing nge ba de gang nas kyang ma 'ong /_gang du yang ma song /_gser yang mgar ba'i brdung rung ma brdung rung /_de'i rang bzhin ser po gang yang ma song /_gang nas kyang ma 'ong /_nam mkha' yang gsal rung mi gsal rung nam mkha' dwangs pa'i rang bzhin ni gang nas kyang mi 'ong /_gang du yang ma song ngo /_/de bzhin du chos nyid chos kyi dbyings de/_sangs rgyas kyis 'jig rten du bstan kyang gang nas kyang ma 'ong /_ma bstan kyang gang du'ang ma song ba la bya'o/_/nges tshig ni/_pa ri ni Sh+pan+na zhes pa de bzhin nyid dang yang dag pa'i ye shes gnyis ma 'gyur ba dang /_phyin ci ma log pa'i tshul gyis yongs su rdzogs shing grub pas na yongs su grub pa'i mtshan nyid do/_/dbye na gnyis te/_mi 'gyur ba'i yongs grub ni/_chos rnams kyi chos nyid/_phyin ci ma log pa'i yongs grub ni/_chos nyid phyin ci ma log par rtogs pa'i rigs pa'i ye shes so/_/de yang med pa'i chos la yod par btags pa thams cad kun btags/_rgyu rkyen gyis skye ba thams cad gzhan dbang /_phyin ci ma log blos btags pa yang min/_rgyu rkyen gyis kyang ma bskyed pa thams cad yongs grub yin no/_/byang chub sems dpa'i sems bskyed kyi sa mtshams dbye ba nyer gnyis kyi don ni/_mngon rtogs rgyan las/_de yang sa gser zla ba me/_/gter dang rin chen 'byung gnas mtsho/_/rdo rje ri sman bshes gnyen dang /_/yid bzhin nor bu nyi ma glu/_/rgyal po mdzod dang lam po che/_/bzhon pa bkod ma'i chu dang ni/_/sgra snyan chu bo sprin rnams kyi/_/rnam pa nyi shu rtsa gnyis so/_/zhes gsungs te/_dpe nyi shu rtsa gnyis po 'di dag ni/_don 'dun pa nas chos sku'i bar du yin te/_de yang lam lnga dang sbyar na/_'dun pa dang ldan pa ni sa dang 'dra ste/_chos dkar po thams cad kyi gzhi'i dngos po byed pa'o/_/bsam pa dang ldan pa ni gser dang 'dra ste/_byang chub bar du mi 'gyur ba'o/_/lhag pa'i bsam pa dang ldan pa ni zla ba tshes pa dang 'dra ste/_dge ba'i chos mtha' dag rnam par 'phel bar 'gyur ba'o/_/de gsum ni tshogs lam chung ngu dang /_'bring po dang /_chen po nyid kyi las dang po pa'i sas bsdus pa'o/_/sbyor ba dang ldan pa ni me dang 'dra ste/_thams cad mkhyen pa nyid gsum la sgrib pa'i bud shing sreg par byed pa'o/_/de ni sbyor ba'i lam gyis bsdus pa'o/_/sbyin pa'i pha rol tu phyin pa ni gter chen po dang 'dra ste/_sems can thams cad tshim par byed pa'o/_/tshul khrims dang ldan pa ni rin po che'i 'byung gnas dang 'dra ste/_yon tan rin po che'i rten gyi dngos po byed pa'o/_/bzod pa dang ldan pa ni rgya mtsho chen po dang 'dra ste/_mi 'dod thams cad thog tu babs pas mi 'khrugs pa'o/_/brtson 'grus dang ldan pa ni rdo rje dang 'dra ste/_mi shigs pa nyid kyis na sra ba'o/_/bsam gtan dang ldan pa ni ri'i rgyal po dang 'dra ste/_dmigs pa'i rnam par g.yeng bas mi bskyod pa'o/_/shes rab dang ldan pa ni sman dang 'dra ste nyon mongs pa'i nad zhi bar byed pa'o/_/thabs dang ldan pa ni dge ba'i bshes gnyen dang 'dra ste/_gnas skabs thams cad du sems can gyi don yongs su mi gtong ba'o/_/smon lam dang ldan pa ni yid bzhin gyi nor bu dang 'dra ste/_ji ltar smon pa'i 'bras bu 'grub pa'o/_/stobs dang ldan pa ni nyi ma dang 'dra ste gdul bya yongs su smin par byed pa'o/_/ye shes kyi pha rol tu phyin pa ni chos kyi sgra dbyangs dang 'dra ste/_gdul bya 'dun bar byed pa'i chos ston pa'o/_/de ltar bcu ni rim pa ltar rab tu dga' ba la sogs pa bcus bsdus te/_mthong ba'i lam dang sgom pa'i lam gyi spyod yul can yin no/_/mngon par shes pa dang ldan pa ni rgyal po chen po dang 'dra ste/_mthu thogs pa med pas gzhan gyi don sgrub pa'o/_/bsod nams dang ye shes ldan pa ni bang mdzod dang 'dra ste/_tshogs mang po'i mdzod du gyur pa'o/_/byang chub kyi phyogs dang mthun pa'i chos dang ldan pa ni lam po che dang 'dra ste/_'phags pa thams cad gshegs shing rjes su gshegs pas so/_/snying rje dang /_lhag mthong dang ldan pa ni bzhon pa dang 'dra ste/_'khor 'das gang du'ang ltung ba med par bde blag tu 'gro ba'o/_/gzungs dang spobs pa dang ldan pa ni bkod ma'i chu dang 'dra ste/_thos pa dang ma thos pa'i chos 'dzin pas mi zad pa'o/_/de ltar lnga ni byang chub sems dpa'i khyad par gyi lam gyis bsdus pa'o/_/chos kyi skyed mos tshal dang ldan pa ni sgra snyan thos pa dang 'dra ste/_thar pa 'dod pa'i gdul bya la snyan par sgrogs pa'o/_/bgrod pa gcig pa'i lam dang ldan pa ni chu bo'i rgyun dang 'dra ste/_gzhan gyi don bya ba mi nyams pa'o/_/chos kyi sku dang ldan pa ni sprin dang 'dra ste/_dga' ldan gyi gnas na bzhugs pa la sogs pa ston pa'i sgo nas sems can gyi don bya ba rnams de la rags las pa'o/_/de ltar gsum ni sangs rgyas kyi sas bsdus pa ste/_de ltar nyi shu rtsa gnyis bo las dang po pa'i sa nas bzung ste/_sangs rgyas kyi sa'i bar gyis bsdus pa'o/_/yang sa mtshams kyi sgo nas dbye ba ni bzhi ste/_mos pa dang ldan pa'i/_lhag pa'i bsam pa dang ldan pa'i/_rnam par smin pa'i/_sgrib pa spang pa'i sems bskyed do/_/de la dang po ni/_mos pas spyod pa'i sas bsdus pa rnams so/_/gnyis pa ni/_sa dang po nas bdun pa'i bar ro/_/gsum pa ni/_sa brgyad pa nas bcu pa'i bar ro/_/bzhi pa ni/_sangs rgyas kyi sa'o/_/de ltar yang snga ma las/_sems bskyed de ni sa rnams la/_/mos dang lhag bsam dag pa dang /_/rnam par smin pa gzhan du 'dod/_/de bzhin sgrib pa spangs pa'o/_/zhes gsungs so/_/byang chub sems dpa'i sa bcu'i sgra don ni/_byang chub dang nye zhing sems can mang po'i don 'grub par gzigs pas rab tu dga' ba/_ltung ba'i cha phra mo chad kyang byang nas 'chal ba'i tshul khrims kyi dri ma med pa/_nyan rang gi sa las 'das pa'i ting nge 'dzin gyi phung po yongs su dag pa ye shes kyi snang ba chen po'i gnas su gyur ba thob pas 'od byed pa/_nyon mongs pa sreg pa byang chub phyogs kyi me'i 'od 'phro bas 'od 'phro ba/_nyan rang las 'das pa'i 'phags pa'i bden pa bzhi bsgoms shing 'khor 'das gnyis ka la mi gnas pa'i shes rab yongs su dag par bya ba sbyong shing sgom pa la shin tu dka' ba/_shes rab kyi phar phyin la brten nas 'khor 'das gnyis ka la mi gnas shing /_mtshan ma med pa la rang gi ngang gis 'jug pa'i ye shes la mang du gnas shing mngon du gzigs pas na mngon du gyur pa/_mtshan ma med pa la bgrod pa gcig tu gyur pa'i lam dang nye zhing ring du phyin pas na ring du song ba/_mtshan ma yod med kyi 'du shes gnyis kas bskyod par mi nus pas mi g.yo ba/_so so yang dag par rig pa brnyes pas na blo gros gzhan las 'phags pas legs pa'i blo gros/_gzungs dang ting 'dzin kun la yang sprin dang 'dra bar khyab cing /_thos pa'i chos nam mkha' 'dra ba la sprin bzhin khyab pas chos kyi sprin no/_/de rnams sbyin/_tshul/_bzod/_brtson/_bsam/_sher/_thabs/_smon/_stobs/_ye shes kyi pha rol phyin bcu rdzogs pa dang sbyar ba yin no/_/byang chub sems dpa'i lam lnga chos so bdun dang sbyar tshul ni/_dran pa nyer bzhag nas 'phags lam yan lag brgyad kyi bar byang chub gsum po'i phyogs su gyur pas na byang chub chos so bdun yin/_de la rang dang spyi'i mtshan nyid shes rab kyis brtags te mthong pa'i don rnams dran pas gsal bar 'dzin te dran pa shas che bas dran pa nyer bzhag bzhi yin/_lus dran mi rtag__/sdug bsngal/_bdag med gsum/_tshor dran bde/_sdug__/btang snyoms gsum/_sems dran rnam shes tshogs brgyad kyi don sems pa/_chos dran kun nyon dang /_rnam byang gi don tshol ba'o/_/brtson 'grus kyis dge ba bskyed cing mi dge ba spangs pas na yang dag pa spong ba bzhi yin/_de yang mi dge ba sgo gsum la skyes pa spong /_ma skyes pa mi bskyed/_dge ba'i chos sgo gsum la skyes pa rnams gong du spel/_ma skyes pa bskyed pa'o/_/rdzu 'phrul gyi rkang pa bzhis nam mkha' la 'gro ba la sogs pa'i rdzu 'phrul gyi rten dang rgyur gyur pas de skad ces bya/_'dun pas ni 'dun pa drag po bskyed/_brtson 'grus kyis myur du sgrub sems kyis gang 'dod bsgrub/_spyod pas 'bras bu gang yin spyod pa'o/_/tshogs lam zhes pa ni tshogs mang du gsog pa'i de skad du brjod do/_/dad sogs lnga yi dbang gis sems las rung du gyur pa'i rgyud la thar pa cha mthun gyi dge ba bskyed pa la dbang ba'i phyir dbang po lnga yin/_dad/_brtson/_dran/_ting 'dzin/_shes rab rnams la dbang thob pa'o/_/de lta bu'i dbang lnga yun ring du bsgoms pas ma dad pa/_le lo/_dran ba nyams pa/_g.yeng ba/_shes bzhin ma yin pa lngas bar chad mi nus pas dad pa sogs pa'i mthu bskyed pa'i stobs lnga'o/_/sbyor lam zhes pa drod/_rtse mo/_bzod pa/_chos mchog nas mthong lam la sbyor bas na'o/_/gzung ba rang bzhin gyis med pa drod de/_'phags lam gyis nyon mongs pa'i bud shing sreg par 'dod/_de la yid ches shing dge rtsa'i rtse mo yin pas rtse mo/_'dzin pa rang bzhin med par bzod pa/_zag bcas kyi skye 'jig la bzod pa/_de la yid ches pas 'jig rten pa'i chos mchog ste 'jig rten gyi chos gzhan las lhag pa'o/_/mthong lam la de kho na nyid byang chub pa'i rgyur gyur pas byang chub yan lag bdun yin/_de yang /_dmigs pa mi brjed pa dran pa yang dag byang chub kyi yan lag__/ji lta ji snyed kyi chos rnam par 'byed pa byang chub kyi yan lag__/'khor ba las 'da' ba'i brtson 'grus byang chub kyi yan lag__/lus ngag yid gsum la phan 'dogs pa'i dga' ba byang chub kyi yan lag__/sems las su rung ba shin tu sbyong ba byang chub kyi yan lag__/sems rtse gcig tu mnyam par 'jog pa la 'dzin pa dang bral ba ting nge 'dzin byang chub kyi yan lag__/chos thams cad la re dogs dang bral ba'i dga' ba thob pa btang snyoms byang chub kyi yan lag rnams so/_/mthong lam zhes pa sngar ma mthong ba'i lam mthong ba'i phyir ro/_/'phags lam yan lag brgyad kyis dgra bcom pa'i 'bras bu thob par byed de/_yang dag pa'i lta bas mthong lam mngon du byed/_yang dag pa'i rtogs pas mi rtogs par mi smra/_yang dag pa'i ngag gis gang la gang gis 'dul ba'i chos ston/_yang dag pa'i mthas bya ba ma yin pa gzhan mi byed/_yang dag pa'i 'tsho ba'i bdag gzhan gnyis kar mi gnod cing nyon mongs pas mi gos/_yang dag pa'i rtsol bas ni 'dus ma byas pa'i chos sgrub/_yang dag pa'i dran pas sems dang sems byung gi mi dge bas skabs mi rnyed/_yang dag pa'i ting nge 'dzin gyis sems skad cig dang ldan pa'i ye shes kyis thams cad mkhyen pa dang /_de'i ye shes kyis mngon par rdzogs par sangs rgyas pa'o/_/sgom lam zhes pa chos nyid kyi don la yang dang yang du 'dris par byed pa'i phyir ro/_/de dag sa bcu dang sbyar na/_dang po mthong lam/_gnyis pa nas brgyad bar sgom lam/_mos spyod nas sa dang po'i bar rang don sgrub pa las gzhan don byed mi nus te rang nyid kyang nyon mongs dang cha bral ba'i phyir ro/_/sa gnyis pa nas brgyad bar don gnyis ka byed de/_nyon mongs mngon gyur dang bral/_bag nyal yod/_dgu pa dang bcu pa'i bar gzhan don 'ba' zhig mdzad de/_nyon mongs pa sa bon dang bcas pa spangs pas rang don bya mi dgos/_sa dgu pa dang bcu pa mi slob lam yin te/_slob lam gyis gnas skabs spangs pa la bshad do/_/yum las/_rtog pa dang bcas shing dpyod pa dang bcas pa ni bsam gtan dang po/_rtog pa med la spyod pa tsam dang bcas pa ni bsam gtan gnyis pa/_rtog pa yang med la dpyod pa yang med pa'i yid la byed pa bsam gtan gsum pa/_dga' ba sdud pa yid la byed pa ni bsam gtan bzhi pa'o/_/zhes so/_/bsam gtan bzhi pa la 'phags pa'i shes rab kyis zag med spel zhing rim pa lngar bsgoms na mi che ba sogs gtsang gnas lngar skye'o/_/de yang /_bsam gtan dang po dang bzhi pa spel ba chung ngu /_dang po dang gnyis pa bsdams pa las bzhi pa spel ba 'bring /_dang po dang gnyis pa gsum pa/_de dang gsum pa bzhi pa spel ba chen po/_bsam gtan bzhi po nang tshan re re zhing bzhi pa dang spel ba chen po/_de dag thod rgal du bsgoms pas mchog tu chen po'o/_/thod rgal ni bsam gtan bzhi po'i lam dor bas na 'phyongs pa'i bar du sgom pa ste/_mas yar rim dang /_rim min du gcig nas gsum gyi bar nas/_yas mar song ba'i bar du bzhis bsgom pa'o/_/go myong gnyis po gang yin kyang so skye'i sgom pa'i bsam gtan yin pa la/_rim gyis pa'i dbang du byas na sems kyi gnas lugs lta tshul nas bzung ste rtse gcig chen po man chad yin no/_/'phags pa rnams kyis mi rtog pa'i shes rab ni/_snyoms 'jug dgu po rang bzhin med par shes pa'i lhag mthong nyid do/_/bsam gzugs 'gog bcas snyoms 'jug dgu yi ting 'dzin skye lugs ni/_mnyam par 'jog byed kyi blo dang bcas shing gang du'ang mi rtog par 'jog pa'i gsal stong de la dran rtsis dpyod pa dang bcas pa'i sbyor bas dngos gzhi mi rtog par skye zhing /_thun mtshams ni rtog dpyod dang bcas te bsam gtan dang po'i ting 'dzin yin no/_/de'i dwangs cha las spyan dang mngon shes cung zad 'char ro/_/yang snga ma de'i sems kyi dngos gzhi brtan pa'i nyer bsdogs rtog pa med la dpyod pa tsam dang bcas pa ni sbyor ba/_de'ang gsal stong du shes pa'i dran rtog phra mo'ang med kyang nyams myong gi 'dzin pa dang bcas pa'i gsal stong skyes pa ni dngos gzhi ste/_bsam gtan gnyis pa'i ting 'dzin no/_/yang de'i sems kyi dngos gzhi brtan pa'i nyer bsdogs las rtog dpyod gnyis ka med pa'i stong pa khyad par nyid skyes pa dngos gzhi/_bsam gtan gsum pa'i'o/_/yang snga ma'i sems kyi dngos gzhi brtan pa'i nyer bsdogs las/_bde gsal mi rtog pa'i dga' bde sngon las ches lhag par skye ba ni bsam gtan bzhi pa'i dngos gzhi ste/_de re re la'ang goms tshul gyi rim pas gzugs khams kyi lha'i gnas ris gsum gsum la skye ba'i rgyu byed de so so'i skye bo'i gnas bcu gnyis te 'bras che man chad do/_/'bras bu che ba'i dga' bde'i rang bzhin de nyid zhi gnas rkyang par gol zhing gting gsal gyi mdangs ma rnyed na dbang po'i yul rgyun 'gags nas rnam par rtog mi rtog gnyis ka'i dwangs cha 'gag ste/_gzugs med du 'phen la/_de yang gsal cha 'gag pa'i shes pa nam mkha' ltar stong la ma dgag tsam gyi ngo bo nyid la goms pa ni nam mkha' mtha' yas kyi skye mched do/_/de'i ngang la goms pas rnam shes kyi ngo na sems tsam pa'i gsal snang mtha' yas pa yid la byed kyang tshogs drug gi dwangs cha ma 'gag par bstan pa las rnam shes mtha' yas/_de ltar goms pa las sems tsam du shes pa'i tshor ba phra mo de'ang nub nas gang du'ang mi mthong ba ni ci yang med pa'i sems/_de ltar ci yang med pa tsam du 'dzin pa'i sems de yang yod med gang du'ang ma grub par yid la mi byed pa mi stug por 'byams pa ni yod min med min gyi skye mched de srid rtse'i sems so/_/de rnams gang la goms pa de'i ngang du shi nas der skye ba yin no/_/'gog pa ni/_bde sdug gi tshor ba dang 'du shes bkag pas 'gog pa'i ting nge 'dzin thob pa yin te/_sems byung lnga bcu dang rtog tshogs brgyad cu sogs gtan 'gags pa'i rum du rig cha'i yon tan bag la zha song ba yin no/_/de yang blos dpyad nas brtags pas 'gog pa dang /_rtog bral gyi ngang la bzhag pa brtag min gyi 'gog pa'o/_/'bras bu che ba'i bsam gtan man chad de shes rab kyi lam stegs tsam du mngon du byed kyang rnam par snang ba de nyid yang dag pa'i lhag mthong rnam par mi rtog pas zin nas grol ba ni 'phags pa rnams kyi khyad chos so//___//_!_ slob dpon klu sgrub kyis mdzad pa'i 'jam pa'i rdo rje'i sgrub thabs blo gros 'phel ba las/_pad+ma 'dab brgyad ser po dbus dkar por byas la/_de'i steng du lhung bzed du shes rab 'phel bar byed pa'i rdzas/_dbang po lag pa/_gla rtsi/_gi wang /_spang rgyan dkar po rnams ba dmar mo'i 'o mas sbrus te ril bu sran ma tsam bya'o/_/de'i steng du 'jam dpal dang dbyangs can ma gnyis ka zhal sbyor gyi tsakli gcig gzhug par bya'o dang /_sgrub pa'i tshad zhag bdun du bya'o/_/rtags ni 'od dang sgra la sogs pa 'byung ngo /_/zhag brgyad na dkyil 'khor gyi lha rang dang ril bu la bstim/_ril bu de sgrub pa pos zos pas 'jam pa'i dbyangs dang shes rab mnyam par 'gyur ro/_/thun mong tshe yi dngos grub kyang thob ste/_de ltar yang /_'di zos yon tan bsam mi khyab/_/lo brgya thub pa brgyad brgyar 'gro/_/dgu bcu lon pa bcu drug ltar/_/skra dkar bud nas nag por 'gyur/_/bang ni rta dang mnyam par 'gyur/_/skra ni me tog pad+ma 'dra/_/lus ni dkar la sbom par 'gyur/_/nyams stobs lus zung 'phel bar 'gyur/_/lha 'dre rnams kyis stong grogs byed/_/yon tan smon 'jug sems dang ldan/_/sems bskyed de dang ldan pa yi/_/skyes bu de ni dam pa yin/_/yon tan de dang ldan zhes smra/_/zhes 'byung ngo /_/'di'i bdag bskyed 'jam dbyangs dmar po/_ril bu dbyangs can ma dkar pod ral can/_mor bskyed snang /___/_!_'phags pa spyan ras gzigs dbang phyug gi sgrub thabs brgya rtsa brgyad pa las/_thugs rje chen po nam mkha' mdzod ser po'i sgrub thabs las/_gtso bo sku mdog ser po/_yid bzhin gyi shing la sku rgyab brten pa/_g.yon pad+mo 'dzin cing /_g.yas nor thams cad sbyin pa mdzad pa'i g.yas su 'phags pa nor 'phel rnga yab thogs nas nor gyi rgyun 'bebs pa dang /_g.yon du lha mo nor sbyin ma dmar mo ril pa 'dzin pa nor bu dmar po'i phreng bas brgyan pa/_sngags ni/_oM AHhrIHhU~M/_tshad 'bum phrag lnga bzlas nas rang gi bdog pa thams cad sbyin pa btang na bsod nams kyi sprin las 'dod dgu'i char chen 'bebs par byed do/___/_!_'phags pa thugs rje chen po lus kyi 'khor lo 'bar ba las snying gar pad+ma 'dab ma bzhi pa'i phyi rol tu rtsibs drug dang ldan pa'i 'khor lo/_dbus dang 'dab ma bzhi la/_'jig rten dbang phyug__/gti mug rdo rje sogs bzhi/_rtsibs drug la 'gro ba rigs drug gi rnam par dag pa 'god par bya ste/_lha rigs rnam dag 'chi 'pho med/_/dbang po rdo rje gur gum mdog__/me tog phreng ba'i chun po 'dzin/_/dregs pa ma lus spangs pa'o/_/a/_lha min rnam dag 'khrugs pa med/_/drag po rdo rje rgya skyegs mdog__/ral gri dang ni 'khor lo 'dzin/_/phrag dog ma lus kun spangs pa'o/_/i/_mi ni rnam dag brel phongs med/_/dbang phyug rdo rje rdza gsar mdog__/rdo rje dang ni dril bu 'dzin/_/rnam par g.yengs pa kun spangs pa'o/_/u/_dud 'gro rnam dag blun rmongs med/_/seng ge rdo rje du ba'i mdog__/dgra s+t+wa dang ni dbyug pa 'dzin/_/bag med btul ba kun spangs pa'o/_/e/_yi dwags rnam dag ser sna med/_/gshin rje rdo rje char sprin mdog__/thod pa dang ni zhags pa 'dzin/_/'jungs pa'i sred pa kun spangs pa'o/_/o/_dmyal ba rnam dag tsha grang med/_/'jigs skyobs rdo rje bye ru'i mdog__/bum pa dang ni lhung bzed 'dzin/_/mi zad yang yang kun spangs pa'o/_/zhes snang ba 'di thub pa drug dang gcig par 'dug go_/_!_ bsam gyis mi khyab pa'i mchod pa'i cho ga gzhung dang gsal byed ltar bshad na/_gtsang ma'i gnas su me tog sogs ci 'byor pa'i mchod pa dgram/_rang skad cig gis 'phags pa spyan ras gzigs rgyal mtshan rtse mo gser mdog zhal gcig phyag gnyis pa/_g.yas mchog sbyin las mchod pa'i char chen po 'bebs shing /_g.yon pad+mo rgyas pa 'chang ba/_mchod pa'i sprin rgya mtsho'i dbus na bzhugs shing yo byad nam mkha'i mdzod la mnga' brnyes 'khor los sgyur ba'i rgyal po'i ngang tshul can du gsal bar gyur/_/oM badz+ra puSh+pe AHhU~M/_de bzhin/_d+hU pe nas shab+da'i bar dang /_maN+Dal sbyar bas byin rlabs/_tshogs zhing mkha' khyab tu sad pa'i spyan sngar/_bla ma dkyil 'khor lha tshogs sogs/_/phyogs bcu dus gsum bzhugs pa yi/_/rgyal ba sras bcas thams cad la/_/kun nas dang bas phyag 'tshal lo/_/zhes phyag 'tshal ba sngon du 'gro bas/_rang gi thugs ka'i hrIHlas mchod pa'i lha mo kha dog sna tshogs pa bsam gyis mi khyab pa re re las kyang dpag tu med pa'i sprin 'phro ba spros nas bsnyen bkur bar bsams la/_rang bzhin stong pa nyid can gyi/_/sna tshogs me tog bsam mi khyab/_/rgyal mtshan rtse mo'i rig pa yis/_/sprul nas 'phags tshogs mchod par bya/_/oM na mo b+ha ga wa te ma hA ka ru Ni ka puSh+pe pU dza me g+ha sa mu dra ke tu rA dza ya/_ta thA ga tA ya/_ar+ha te sa myak+saM bud+d+hA ya/_tad+ya thA/_oM puSh+pe/_puSh+pe/_puSh+pe/_puSh+pa ut+b+ha we/_puSh+pa a ba kI ra Ne swA hA/_zhes pa'i rig pa 'di lan gsum du brjod cing 'bul/_de bzhin du me tog gi gnas su bdug spos dang /_puSh+pa dang puSh+pe gnas su d+hU pe dang d+hU pe sogs sbyar bas mtshon/_nyer spyod lnga dang /_rol mo maN+Dal bcas 'bul/_thog ma med nas da lta'i bar/_/zhes sogs sdig pa bshags pas mtshon yan lag lhag ma rnams kyang byas te/_bdag dang sems can thams cad bsod nams dang ye shes kyi tshogs gnyis yongs su rdzogs te myur du rnam pa thams cad mkhyen pa rdzogs pa'i sangs rgyas kyi go 'phang thob par byin gyis brlab tu gsol/_/ces gsol ba gdab rjes tshogs zhing rnams mi dmigs par bltas la de kho na nyid rjes su dran pas dge ba'i rtsa ba sangs rgyas kyi sar bsngo'o/_/phan yon ni/_mi phyed gus pa mang ldan pas/_/gzungs 'di lan gsum cho ga 'dis/_/nyin re dus gsum mchod byed na/_/bye ba bsam mi khyab mchod 'gyur/_/zhes so/___/_!_ lus kyi 'khor lo bcings grol gyi man ngag las/_thugs rje cher khros bzhad pa'i zhal/_/rdo rje'i khyung gshog mthing ga can/_/zhes gshog pa bshad/___/_!_ dpal rdo rje thod pa'i dngos grub sgrub thabs las/_blo ldan cho ga bzang shes pas/_/bde chen dngos grub ster ba'i phyir/_/ka pA la 'dra'i gnas su ni/__/ka pA la yi dngos grub bsgrub/_/ces thod sgrub kyi man ngag bshad cing /_de'ang mtshan ma bzang po'i thod pa/_ga bur tsan+dan gla rtsi sogs dri bzang pos byugs par dkyil 'khor bri/_lnga tshan lnga dang ring bsrel snying por gzhug pa sogs cho ga rgyas par bshad do/___/_!_ thugs rje chen po rnga sgra'i sgrub thabs las/_'dab chags nga ro chen po'i lo/_/skar ma rgyal la babs pa'am/_/yang na dbyar gyi sgra sgrogs dus/_/mkhas pas rnga chen bcos par bya/_/tsan+dan sdong bu dkar dmar ram/_/sgra sgrogs shing dang snyan pa'i 'dab/_/seng ldeng glang sna bu 'bod dang /_/ti ti ra sngo rgyu yin brtag__/nyi ma shar dang zla ba shar/_/srod kyi dus la babs pa na/_/gla rtsi ga bur gur gum byug__/rdo rje khros pas bgegs tshar bcad/_/byams pa'i nyi ma gang la babs/_/khri snyan mo yis pags pa sbyangs/_/nam mkha'i sgra gsang sgrogs pa na/_/lho ru kha bltas g.yogs par bya/_/de nas dri mchog dam tshig can/_/bdud rtsi lag par legs byugs la/_/dbang thob lha bzo skad mthon pos/_/sgra dbyangs mgon po bri bar bya/_/dbus su pad+mo dmar bzhi'i steng /_/gzhon nu'i mdangs rgod nga ro bcings/_/phyag gnyis rin chen rnga chen brdung /__/zla ba'i mdog can brjid pa'o/_/shar sogs 'dab bzhir grags chen dang /_/'brug sgra snyan pa'i dbyangs can dang /_/nga ro mi zad gnod sbyin bzhi/_/phyogs kyi kha dog ji bzhin gnas/_/brtson pa'i cha byad can gyis sprad/_/phyag bzhi dung dkar kA la hA/_/dril bu dang ni gaN+Di thogs/_/mig dmar dga' ba khros pa'i tshul/_/de mthar 'khor lo brgyad rtsibs ris/_/bkra shis brgyad 'dzin lha mo brgyad/_/shin tu sgeg mdzad dul ba'i tshul/_/'dzum pa'i mdangs dkar sna tshogs mdog__/mu khyud rdo rje'i sprin 'khrigs pa/_/'ur 'ur skad 'byin 'jigs pa dang /_/glog rgyan phreng bas mdzes pa ni/_/mkhas pa ting 'dzin ldan pas bris/_/de'i 'og tu ji skad bsngags pa'i skabs nas ye shes kyi 'khor lo can gyi rnga bkug nas rol mo la sogs pa'i mchod pas mnyes par byas nas rjes su gzhug par bya'o/_/de nas lte ba mu khyud kyi nang gi khyud kor du yi ge chen po lnga dang nye ba'i yi ge lnga bcu byang chub kyi sems gnyis 'dres pa bri zhing /_sngags de nyid sgra chen pos lan bdun du bklags la rol mo gsil ba dang bro brdung bar bya'o/_/de rjes mkhas pas brgya byin gyi/_/lag pa 'dra ba'i 'khrul 'khor gyis/_/rtsol ba spangs nas rnga brdung zhing /_/bdag nyid rnal 'byor brtson pas bya/_/sgrub pa po yi ngag med kyang /___/ji tsam bsnyen pa'i mtshan bshad sngags/_/de yi phyed gnyis 'grub par ni/_/nges par the tshom mi bya'o/_/de'i 'og tu g.yul bzlog pa'am/_/grags pa mtho 'dod de bzhin gzhan/_/thams cad snying rje ma bral bas/_/rnga 'di brdung ba tsam gyis 'grub/_/'jig rten gsum grags mtha' yas pa/_/thugs rje chen pos nyid sprul pa/_/rnga chen rgyal po brtag pa'i las/_/don kun sgrub par byed pa yin/_/zhes so/___/_!_ srung skud kyi cho ga las/_/'phags pa spyan ras gzigs la dad pa thob pas/_tshor bas gzir ba dang /_gdon gyis glags btsal ba dang /_rkun po dang dgras 'jigs pa'i nus pa'i dbang ba bsrung ba la sogs pa'i don du snying rje chen pos srung skud bcing bar bya'o/_/'khor lo rdo rje rin chen dang /_/pad+mo sna tshogs kha dog can/_/ras dang dar dang bal dang bcas/_/pad+ma'i skud pa shin tu bsngags/_/sogs gsungs te/_gzhon nu pho mos bkal ba'i srad bu pad+ma 'dab brgyad kyi dbus su bzhag nas sbyang ba sogs bya/_de nas rang 'jig rten dbang phyug srad bu dang pad+mo bsnams par bskyed nas/_mdud pa gsum byas la/_so sor gsang ba gsum gyis 'od phyung bas sgo gsum srung ba'i nus ldan du bsams la/_oM AHhrIHkA ya badz+ra k+Sha ya kaN+Tha hU~M/_de bzhin/_wA ka dang /_tsit+ta sbyar bas sngags/_dam tshig gi srad bu 'od lnga 'bar bar bsams la bsgrub bya'i mgul lam dpung pa la bcings par gsungs/__/_!_ tshe 'das la bya ba'i cho gar/_snying rje chen po yid gzhung pas/_/spyan ras gzigs dpal bsnyen byas te/_/lus can mi 'dod bzhin du lhung /_/de dag ngan 'gro bzlog par bya/_/sngon nas sbyangs pa nyid dang ni/_/gzhan dag glo bur bya ba nyid/_/de bzhin phyi nas gzhan gyis te/_/mchog dang pha mtha' grangs bzhin 'dod/_/ces rab rang byin rlabs kyi sbyor bas 'pho/_'bring glo bur bdag la 'od kyi sbu gus sbyor ba'i 'pho ba dag bshad nas tha ma/_de ltar ring nas lam goms pa'i/_/blo ldan dus las 'das gyur tshe/_/'phags pa ngan song sbyong dpal gyi/_/cho ga bdun phrag bdun du sbyangs/_/ro'am rus pa gos sam ming /_/rten de'i mdun du bzhag nas su/_/ma dag pa dang dag pa yi/_/dkyil 'khor gnyis la rten gnyis bzhag__/brdeg dang bsreg dang bkru ba yis/_/dri ma gzhig gzhom dad pa dag__/dkyil 'khor nag po bya bas te/_/bstan dang dbang bskur bya ba la'o/_/yungs kar bye ma thal chen la/_/rim par bzlas nas bsnun bya zhing /_/sbyin sreg cho ga'i bya ba yis/_/rten bcas bag chags 'bad de bsreg__/ngan song sbyong ba'i sku gsung thugs/_/bzhu ba'i chus bkang bum pa blugs/_/rdo rje'i glu blangs rim pa bzla/_/ma lus dri ma bkru bar bya/_/oM AHhrIHsarba durga ti pa ri sho d+ha ne rA dza ya/_a mu ke kA ya/_wA ka tsit+ta sarba pa paM to Sha wa ra Na b+haM ga b+haM/_Da ha Da ha/_bA rats+tsha bA rats+tsha/_sho d+ha ya sho d+ha ya phaT phaT swA hA/_de rjes dri ma dag pa'i sems/_/lhag pa'i lha la bcu gnas ni/_/ji srid dbang bskur byas te mchod/_/dga' ston chen po sbyin par bya/_/zhes so/___/_!_ bkra shis kyi cho ga las/_bkra shis bzang dang bkra shis nor 'bru sman/_/bkra shis mchod rdzas dang ni bkra shis rgyan/_/dpal ldan bkra shis dkyil 'khor cher bri la/_/bkra shis rgyal po spyan ras gzigs dbang dgug__/gang dag gang gi phyir dang gang du ji ltar bya ba'i rang bzhin thams cad la bkra shis zhes sbyar ro/_/shis pa brjod pa'i dbyangs dang sems dang rjes su mthun pa'i rol mo dang glus mchod do/_/me tog dkar dmar dang tsan+dan dkar dmar dang rgyan dang dri'i khyad par nges pa'o/_/yo byad glo bur dang gsar du skyes pa mtha' dag la rgyal bar gyur pa'i tshig sngon du song bas so/_/sbyin bdag gam slob ma'i lus bkrus la bkra shis kun tu snang ba'i rgyas gdab bo/_/siD+hau/_'di rnams grub pa brnyes pa'i slob dpon paN+Di ta chen po a dzi ta mi tra gup+tas mdzad/_/rnal 'byor gyi dbang phyug mi tra dzo ki dang /_khro lo'i 'gyur ro/_/a ti sA d+hu sA d+hu pA sh+ya hoH___/_!_ rnam 'joms kyi khrus chog gi 'grel pa slob dpon rdo rje go chas mdzad pa las/_de'i nang du dgang ba ni/_chu yis zhes pa smos te/_tsan+dan dang gur gum la sogs pa'i spos chus bkang ste/_de dang lhan cig ldan pa'i rin po che ni shel dang rdo rje zhes pa dngos su zad/_nor bu zhes pa spyi'i tshig tu smos te/_rnam par ma phye ba'i pad+ma rA ga dang /_in+d+ra ni la la sogs pa rin po che'i rigs su gtogs pa dang /_mu tig dang sa le sbram la sogs pa ste/_de dag gas chag med pa rgyan gyi bya ba byed nus pa ste rin chen rma med ces bya'o/_/gzhan yang de'i zla la yungs kar dang /_rtsa dUrba dang /_me tog rnams gzhug par bya'o/_/zhes dang /_yang gong ma'i 'bru dang sman zhes bya ba la/_bya g+h+ri dang /_si g+h+ri la sogs pa'i sman rnam pa lnga dang /_til dang sran ma ba sha ka la sogs pa'i 'bru sna tshogs rnams rgyud las grags pa bzhin no/_/mgul chings gtsang ma'i gos zhes bya ba ma spyad pa ma nyams pa'i ras dkar po kha tshar dang bcas pa'o/___/_!_slob dpon byang chub snying pos mdzad pa'i gzungs chog las/_rin po che sna lnga dang /_'bru lnga dang /_sman lnga dang /_snying po lnga dang /_spos dri zhim po blugs te/_ldum bus kha brgyan la mgrin par dkri'o/__/_!_dza ya wa rmas mdzad pa'i dkyil chog las/_'bru sman rin chen lngar ldan pas/_/bzang po'i shing gis kha brgyan nas/_/ku sha'i stan la yang dag bzhag__/ces 'di'i dbang chog pad dkar gyi dkyil chog dang mthun par snang /___/_!_bram ze ma Ni badz+ras mdzad pa'i las bzhi sgrub pa'i cho ga las/_las su bya ba chu dang 'brel bas bkru ba zhes pa deng sang dz+wa chu bkol ba dang grags pa'i dbyibs lta bu zhig snang /_'on kyang ting nge 'dzin gyi mes bskol ba las dngos su bskol ba'i gsar kha med/_phan yon ni/_gang gi lus la chus reg pa/_/bgegs kyi gnod pa las grol 'gyur/_/zhes so/_/paN+Di ta dz+nyA na shrI dang /_lo tsA ba rab zhi bshes gnyen gyi 'gyur ro/___/_!_rnam 'joms gzungs sgrub grub chen bram ze ku mA ra se nas mdzad pa/_de'i slob ma sangs rgyas gsang ba dang /_dpa' many+dzu shrI'i 'gyur las/_khrus kyi bum pa bzang po bya/_/de yang gser sogs dag las 'byung /_/mtshan nyid ldan der chu klung chu/_/'o ma dri lnga sman dang 'bru/_/rin chen snying po me tog bcas/_/shel dang pha lam mu tig dang /_/kha rgyan mgul gsum pa yis bcings/_/dUR+Wa bdug dang ku sha dang /_/rma bya'i sgro dang rdo rjer ldan/_/las kyi cho ga mthong ba yis/_/legs byas bskrad la sgrub rdzas ni/_/rin chen snod kyi steng du gnas/_/maN+Dal steng du de bzhag la/_/zhes so/_/'di'i cho ga rnams bya ba spyi'i chos skad ji bzhin pa'o/___/_!_gtor ma'i cho ga sangs rgyas gsang bas mdzad pa las/_/bar chad zhi dang tshogs bsags dang /_/'dod pa thams cad rab bsgrub phyir/_/zla ba zhag dang thun mtshams la/_/yo byad ci 'byor gtor ma btang /_/zhes so/___/_!_des mdzad pa'i khrus kyi cho gar bum rdzas kyi ngos 'dzin gong gi rdo rje go cha'i gsungs dang mthun no/__/_!_sha ba ri pas mdzad pa'i dkyil chog rin chen snang bar/_dngul la sogs pa'i bum par ni/_/nor bu yungs kar dUR+Wa dang /_/shel dang pad+ma tsan+dan dang /_/gser dang rin chen chus dgang bya/_/zhes so/___/_!_rnam 'joms kyi las sgrub pa'i thabs kyi cho ga mgon po byams pas rjes su bzung ba'i dpal gad+gA d+ha ra'i sras kyi thu bo bram ze ma Ni badz+ras mdzad pa las/_rang lha'i dmigs pa gsal ba dang /_/sngags kyi bzlas pa mthar phyin pas/_/rig sngags 1thogs pa med pa dang /_/pha rol sde las 2rgyal ba dang /_/skrag 3dang mthu stobs gzhig 4pa dang /_/rig sngags bcad 5dang mnan 6pa dang /_/las 7gzhol pha rol las gzhig 8dang /_/gdon brlag 9gdon las grol 10pa dang /_/'byung 11po dgug dang mnan 12pa dang /_/las rnams ma grub spogs pa 13dang /_/grub pa'i 'bras 14bu mthar dbyung dang /_/'dod 'bras dngos grub 15bsgrub pa dang /_/srung 16dang zhi dang 17rgyas 18pa dang /_/rengs 19dang rmugs 20par byed pa yi/_/thun mong khyad par bdag nyid kyi/_/cho ga nyi shu'i sbyor ba rnams/_/ji ltar bla ma'i man ngag las/_/rtogs pa'i rim pa gsal bar bya/_/zhes rgyas par bshad do/___/_!_rdo rje rnam par 'joms pa'i las sna tshogs sgrub pa'i cho ga zhes mdzad byang med pa las/_sdig 1pa thams cad zhi ba til dang me tog dkar po'i sbyin sreg__/sdug bsngal thams cad 2zhi ba khrus gyi cho ga__/dpal 3'phel ba 'bras bu dang me tog ser po mngar gsum dang bcas pa'i sbyin sreg__/in+d+ra bi sho d+ha na sbyar bas dbang 4po nyams pa gso pa'i khrus chog__/tshe nyams pa 5gso ba dUR+Wa dang me tog ser po'i sbyin sreg__/phun sum tshogs par byed pa 'bru dang me tog ser po'i sbyin sreg__/bum bzang gtsang ma'i chus bkang ste/_'bru sman rin chen snying po dri/_/ma nyams ras kyis mgul dkris shing /_/bzang po'i shing gis kha brgyan par/_/lhar bskyed ye shes gzhug mchod bstod/_/sho d+ha ya bi sho d+ha ya/_mthar sbyar sngags bzlas legs bkrus pas/_/lha rnams mdun gyi lte 7bar gnas/_/zhes pa 'di ni khrus sogs kyi khungs su sems/_mdza' sdug dbang du byed pa me tog dmar po'i sbyin sreg__/tshe yi tshil bu gu gul dang /_/yungs kar ce spyang klad par sbyar/_/brgya rtsa brgyad du mngon sngags pas/_/dur khrod sol ba'i me la bsreg__/bdug pas bran bza' sogs lus bdug__/gdon gyis gtses pa thar bar byed/_/pad+ma'i rtsa ba tsan+dan dmar/_/mngon par bsngags pa'i me sbar te/_/rig sngags brgya rtsa brgyad bzlas pa'i/_/dUR+Was rang gi mig bskus na/_/phan tshun mi mthun gnas pa yang /_/ltas pa tsam gyis 10mdza' bor 'gyur/_/bong 'grib pa 'joms 11pa 'bru'i sbyin sreg__/mya ngan ngal dang gnod pa 12'joms pa'i khrus chog__/bla gos mtha' la brgya rtsa brgyad/_/mngon sngags mdud pa bdun bor nas/_/lam du zhugs na mi zad pa'i/_/'jigs dang nyam nga las grol byed/_/tho rangs lha yi bsam gtan ldan/_/sngags kyis mngon par bsngags pa yi/_/chu dang thal ba yungs kar gyis/_/phyogs mtshams bcings pas phongs pa 14'joms/_/sngags btab pa'i spos dkar gyis bdug pas gza' 15dang /_gu gul bdug pas rgyu 16skar gyi gnod pa 'joms/_kha dog lnga yi skud pa la/_/rig sngags stong phrag bdun bzlas nas/_/gang gi mgul lam dpung pa la/_/bcings pas byad 17stems las grol byed/_/mi zad gdon gyis nyen pa la/_/sngags kyi chu yis lus bkrus nas/_/gu gul yungs nag yi dwags skra/_/khwa yi gshog pa rma bya'i sha__/ce spyang rtug pa sngags bcas pa'i/_/bdug pas nges par thar 18bar byed/_/rmi lam sdig pa'i mtshan ma mthong /_/gtsang ma'i gos gyon dris bdug ste/_/shar du mngon par phyogs pa yis/_/rig sngags brgya rtsa brgyad bzlas pa'i/_/chu yis khrus 19byas dge ba dang /_/sdig med dpal dang ldan par byed/_/ces gsungs/_'di ma Ni ka badz+ra gyis mdzad dam snyam zhing /_dz+nyA na shrI dang /_rab zhi'i 'gyur ro/___/_!_gang gi las sgrub pa'i thabs kyi rig sngags kyi mthu thogs pa med par bya ba ni bcu cha'i sbyin sreg la bshad/_gdon las thar ba ni/_khrus kyi rjes su sa rdza na'i sngags bdug sbyin pas grub/_rig sngags kyi las thams cad byed du 'jug pa ni/_'byung po mngags gzhug gi las sgrub par gsungs/_ma grub pa grub par byed pa/_spog chog ni/_mdun du maN+Dal lha dmigs te sngags brjod pas me tog khri phrag gcig phul la/_de nyid sreg rdzas byas pa'i sbyin sreg bya bar gsungs/_grub pa chud mi za ba ni las sbyor gyi sbyin sreg la bshad/_'dod pa'i dngos grub bsgrubs pas/_mdun du maN+Dal gyi steng lha'i sku gzugs bzhag__/de'i drung du rin po che'i snod du dngos grub kyi rdzas bshams/_bdag gi rnal 'byor dang mdun du lha dmigs la mchod bstod sngon du 'gro bas bzlas pa bya zhing pho nya'i tshogs spro bsdus sbyor bas dngos grub sgrub par dmigs te/_dro ba dang /_du ba 'thul ba dang /_'bar ba las mkha' spyod/_sa spyod/_sa 'og gi dngos grub sbyin par gsungs/_srung ba sogs 'khor los sgrub par bstan to/_/mthar/_gang la bsnyen pa byas pa'i sngags/_/las sgrub pa yang de nyid de/_/dad brtan the tshom med pa la/_/sngags ni yid bzhin nor ltar 'grub/_/ces so/___/_!_ gdan bzhi'i dkyil chog snying po mdor bsags las/_/yi ge dgod pas bkod nas ni/_/sa bon las ni lha yi tshul/_/zla ba'i dkyil 'khor dbus gnas pa'i/_/rdo rje sems dpa' bsam par bya/_/pad+ma'i gdan la bzhugs pa ste/_/gangs dang kun+da lta bu'i 'od/_/phyag gnyis sems dpa'i skyil mo krung /_/sangs rgyas lnga yi cod pan can/_/rdo rje snying gar bzung nas ni/_/g.yon gyi dril bu dku la brten/_/sku la rgyan rnams thams cad dang /_/shin tu mdzes pa'i na bzas bklubs/_/'od zer sna tshogs 'bar ba can/_/rdo rje sems dpas bdag ces brjod/_/ye shes sa bon 'bum phrag gsum/_/sngon du bsnyen pa'i bzlas pa bya/_/thig le nA da yang dag ldan/_/phyag 'tshal nA ma swA hA'i mchan/_sbyin pa'i mtha' can te/_/rnal 'byor ma ni brgyad po yi/_/khri khrag bzhi ni bsnyen par bya/_/sbos mo DA mi kri sogs kyi/_/nyi shu stong phrag lnga ru bzlas/_/phyi rol gnas kyi 'jig rten pa/_rgyal dbang dngos grub shin tu drag__/stong phrag gsum du bzlas nas ni/_/kun nas kun tu 'grub par 'gyur/_/sngon du bsnyen pas 'grub 'gyur te/_/ma bsnyen pa ni dkyil 'khor min/_/sngags dang rnal 'byor de dag gis/_/rim gyis byin gyis rlob par 'gyur/_/sngon du lha bsnyen pas mnyes par bya ba'i cho ga ste gnyis pa'o/_/zhes slob dpon bskyod pa'i brtul zhugs kyis mdzad pa las so//____//_!_ phag mo'i skor las/_nA ro mkha' spyod skabs/_gos zung dmar po bshams/_'di'i mchod pa'i skabs/_rigs bcu drug gi sngags las d+harma d+hA tu chad/_gtor chog gi sa bon las ra gcig lhag pa sogs/_lar rin 'byung spar ma 'di la yi ge ma dag pa mang bas zhib dpyod gal che/_bum bskyed kyi hU~M bzhi'i bzlas par/_bid+ya rA dza zhes 'don par gsungs 'dug na'ang /_bde mchog gi skor thams cad la badz+ra rA dza kho na bshad pas/_dpyad/_lus/___/_!_dpyal lugs zhal gnyis mar/_lus gzhal yas khang /_ngag yig 'bru/_sems lha skur bsgom gsungs pa dngos su de dang der bsgom pa yin gyi/_dag pa dran pa lta bu ni min gsungs/_chos 'byung gdengs ka rgyas pa'i steng ru sbal gyi rgyab ltar mtho ba zhes pa gang yin ma 'tshal/_'di'i phag zhal rna ltag g.yas nas thon pa yin/_dbang lha dpal he ru ka'i rnam pa ni bde mchog lha drug cu rtsa gnyis dang /_rang sngags/_oM shrI badz+ra he he sogs/_mchod 'bul gyi sgo mtshams ma brgyad ka sku mdog ljang sngon zhal gcig phyag gnyis ma/_chos 'byung yi ge bzhi dang bcas pa ni/_dbus su ba~M/_de'i mdun du hU~M/_g.yon zur du oM/_g.yas zur du AH'o/_/rtsa sngags oM gsum ma/_khyad par gyi mchod pa bdud rtsi dbul ba ni/_sgrub mchod sogs kyi skabs dus sogs kyi ar+g+haM mchod pa lta bu yin kyang /_dbang sgrub skabs nang mchod byin gyis brlabs pa oM gsum ma'i mthar 'bru gsum btags pa 'thor bas chog__/lag mchod kyi skabs oM mthe bong nas brtsams te 'god pa dang /_mthe'u chung nas brtsams te 'god pa'i lugs gnyis las jo lugs dang 'brug lugs la phyi ma ltar bzhed/_de yang nang ngos kyi tshigs bar pa la'o/_/sor mo rnams phyed tsam bkug pa'i sen mo'i rnams 'dzoms par phaT phaT/_ces bkod/_srung skud gdags dus sngags brjod rgyu sta gon gyi skabs rnams dang gcig__/spyir phag mo'i skabs 'di rnams kyi cho ga spros dgos rigs bde chen dpal 'bar nas len gsungs/___/_!_mai tri mkha' spyod kyi dpal gyi ri ni lho phyogs shrI parba ta dang /_ma na b+haM ga ni yid pham pa'i ri'o/_/byin rlabs gsum pa'i skabs lte bar chos 'byung zur drug gi dbus su 'khor lo sngags phreng dang bcas pa ni sngags 'khor la de ltar btags pa ma gtogs 'khor lo zur pa zhig bsgom rgyu med/_bzhi ba'i skabs/_sna rtse nas phyi rol tu sor brgyad pa'i sar dga' 'khyil gyen langs bsgom/_lnga pa'i skabs kyi gsang gnas su dga' 'khyil bsgom pa'ang gyen langs/_lar 'di yig rnying gi rjes 'brangs te phyis kyi spru lung pa'i yig cha dang cung mi gcig pa mang /___/_!_don grub ma rgyas par bde chen dpal 'bar dang /_dbang sgrub sogs kyi skabs rin 'byung rang gi dpyal lugs zhal gnyis ma gung bsgrigs pas khyab/___/_!_dbu bcad mar/_g.yon gyi rdo rje rab bsngags ma/_g.yon gri gug dang /_g.yas thod pa 'dzin pa yin kyang spar ma dag__/dag dran skabs zhal gnyis ma dang 'dra ba la/_mi ro'i gdan gyi tshab/_'jigs byed chen mo dang dus mtshan ma ni gzung ba dang 'dzin pa spangs pa'o/_/bsgyur ba lta bu zhib cha shin tu dpyad dgos pa mang /___/_!_phag mo gnam zhal mar/_rin chen lhar bskyed sogs dus 'khor gyi dbang gong ma lta bu zhig e yin kyang deng sang rgyun gang yang med gsungs/_'di'i in+d+ra b+ho d+hi ni a ba sa'i skabs kyi de yin 'dra'o/__/_!_rus sbal zhabs kyi bzhugs stangs ni mi'u thung gel ba'i 'dug stangs dang gcig snyam/___/_!_dpal 'dzin lugs kyi phag gdong gi zhal dmar po/_lha gsum ro gdan gcig la bzhugs pa/___/_!_go bzlog lhan skyes mar rdor sems sgom bzlas dgos/___/_!_phag dkar la/_zhabs g.yas bskum g.yon brkyang mdzad pa phag mo spyi dang ma gcig pas dpyad/_sku mdog dkar mo'i tshig gsal chad/_thig le dkar po dbang sgrub dang mnyam du lhar bskyed bstims sogs byas la/_slob ma la ster skabs sngags gzhung gsal ltar bzlas pa la gtad/_phus btab pa sogs mi dgos/_slob mas pad 'dab brgyad dbus hrIHdang /_'dab mar dbyangs gsal 16skor gnyis gnyis bri/_de bsang sbyangs dam ye dbyer med du bya ba'am/_ye shes pa tsam bstim la mchod pa sogs gzhung ltar/_gi waM gis lce la yi ge 'bri ba phyag len du mi mdzad/_gal te 'bri na hrIHkho na yin snyam/_phag dkar gsar rnying la byin rlabs so sor mdzad gsungs so/____/_!_ swa sti/_bkra shis gza' dgu'i mchod pa'i cho ga paN+Di ta ba na rat+na nyid kyi bla ma hang ba zhes pa'i gsung zin bris su mdzad pa las/_srung ba lnga'i mchod pa'i mjug tu/_nyi ma la/_bdug spos ni/_kun tu rgyu/_mchod yon gyi snod ni zangs/_rin po che dmar po dang /_tsan+dan dmar po dang /_sA la'i 'bru dmar po dang /_'o ma dang bcas pa'i gtor ma dang /_yon ni be'u dang bcas pa'i ba'o/_1)__/zla ba'i bdug spos ga bur/_mchod yon snod dngul/_mu tig gi mchod yon/_til dkar/_'bras dkar/_'o zan gyi gtor ma/_yon dung /_2)__/mig dmar la/_spos/_gu gul/_mchod yon snod zangs/_mchod yon ni bye ru sogs rin chen dmar po/_sran ma ma Sha/_yungs kar/_bu ram/_'bras chan gyi gtor ma/_yon dngul gyi khyu mchog__3)__/lhag par/_spos spos dkar/_mchod snod gser/_mchod yon gser dang bye ru/_nas dang 'bras zan ser po'i gtor ma/_yon gser ro/_4)__/phur bu'i spos shI bA sa/_mchod snod gser/_mchod yon gser/_yungs kar dang /_zho dang /_gro dang /_'o ma'i gtor ma/_yon gos zung ser po/_5)__/pa sangs kyi spos gu gul dang /_shrI ba sa/_mchod yon snod dngul/_'bras dkar po/_bu ram/_khur ba/_mar gyi gtor ma/_yon ni dngul gyi rta'o/_6)__/spen pa'i spos gan+d+ha rA sa dang /_bilba/_mchod snod sa/_mchod yon lcags/_sran ma ma Sha/_mut+ga/_til/_'bras chan gyi gtor ma/_yon dngul gyi ba nag mo'o/_7)__/sgra gcan gyi spos bi lba'i sa bon/_mchod snod sa/_mchod yon zha nye/_sran ma Sha'i gtor ma/_yon gri'o/_8)__/mjug ring spos bilba'i sa bon/_snod sa/_mchod yon rin po che lnga/_til nag__/'o ma/_bu ram gyi gtor ma/_yon dngul gyi rwa skyes so/___/_!_sgrub rin zin bris bka' brgyud phrin las shing rta las khams sprul rin po ches gsan skabs gnang 156bar/_las mgon bya rog gdong brgyud pa gnyis 'dres kyi zin bris yan la ldeb 156snang /_thams cad la bsham bkod rigs rnams rgyas par snang /_dmigs bsal yod med phal cher la dkyil 'khor bsgom don dang mthun par 'bri bar bshad/_spyir yo byad bsham tshul sogs shin tu zhib par yod 'dug__/sgrol dkar gyi skabs/_dbu skra li ba ni/_'jam zhing rtse mo 'khyil ba'i nyams can de'o/_/bsang chu sngags dang phyag rgyas brlabs pa las lhas dmigs bsal bskyed mi dgos/_las rdor gyis yig brgya brjod nas sgo drung du khrus bya/_bum bskyed la/_bum nang du bskyed pa dang /_dung chos su bskyed pa gnyis las/_tA ra snga ma bzhed/_bu ston rin po ches sku tshe'i smad dang 'brug lugs dag phyi ma ltar gnang gsungs/___/_!_jo lugs sgrol dkar la rigs bdag rin 'byung mdzad pa tshe rgyas pa'i ched yin/___/_!_dbyangs can dkar mo'i bi le pa ni zhes pa bzhi mnyam gyi lde gu ste/_'di'i sgos mchod yin/_phyag rgya zhal zas kyi rgya'am/_mchod pa spyi 'gre nam mkha' mdzod kyi rgya gang rigs bya/___/_!_ku ru kul+le'i sa bon hrIMHzhes yi ge ma dag__/hrIHkho na'o/___/_!_rigs byed phug ces lho phyogs rgya mtsho'i gling shed na yod par grags/___/_!_pad+ma'i phreng ba ni/_bal po nas 'byung ba'i me tog pad+ma rang gi 'bru'i rtsa ba de ka la byed gsungs/___/_!_kag chol zhes pa'i brda dpyad gsungs/___/_!_mchod yon la ro rdo rje ma'i rgya/_zhabs bsil g.yon de bzhin la/_g.yas pas 'thor tshul lcags kyu'i rgya spyi mtshungs/_zhags pa la s+pho Ta'i rgya las mdzub mo sbrel ba/_lcags sgrog la khu tshur rgyab sprod mdzub mo dang mthe'u chung sbrel ba/_dril bu la 'dra/___/_!_klu shing zhes pa bal po skye ba de ni min 'dra gsungs/___/_!_sgrub thabs rgya mtsho la ma tshang ba'i lha lnga bcu tsam kha skong nas tA ras gsar 'gyur gnang ba de'i rgyun chad gsungs/___/_!_gtso bo'i phyag mtshan med pa rnams 'khor gyi phyag mtshan spro gsungs/___/_!_sgom lung dang bzlas lung 'bogs tshul la/_skyabs sems kyi rjes/_khyed rang rnams skad cig gis lha 'di zhes bya ba'i skur gyur pa ni sogs/_lha'i mngon rtogs kyi dmigs pa phog__/de nas slob dpon dang mdun bskyed las sngags phreng spro ba sogs bzlas lung spyi ltar ro gsungs/___/_!_klu dbang rgyal po'i sku mdog rin po che mi dpog pa'i kha dog zhes pa de ji ltar dang /_phyag rgya mi 'khrugs pa'i cho gar 'byung ba'i rdo rje rtse lnga'i phyag rgya lta bu zhig 'bri srol snang ba'ang dpyad ces dang /_skyabs sbyin 'dra yin nam brtag__/sbrul gyi gdengs ka ni klu rnams rgyab nas langs te bsnyen bkur ba'i tshul las klu la gdengs ka yod pa lta bu ni gtan nas min no/_/_!DA ma ru bla med ma rgyud la 'khrol/_pha rgyud 'jigs byed ma gtogs gzhan lha'i phyag mtshan la DA ma ru dmigs bsal yod na ma gtogs mi 'khrol gsungs/__/_!_'jam rdor gyi yum yab dang mtshungs kyang thor tshugs med/_yab kyi thugs kar rang 'dra'i ye sems yum bcas dang /_yum gyi thugs kar yum la yab kyis 'khyud pa'i go bzlog gi ye sems nges par bsgoms gsungs/___/_!_mi bskyod pa dbyangs bcu gnyis ni r-i l-i bzhi dor ba'i lhag ma yin 'dra/_rin 'byung la rjes gnang sgrub bskur re re nas nges par mdzad gsungs/___/_!_jo lugs la dbang gsum par phal cher rig tsaka gtad/___/_!_dus 'khor gyi rdo rje'i rgyan ni/_rgyu pha lam/_dbyibs rtse gsum rtse lnga gang rung /_kha dog gser lta bu'o/_/phyag sor gyi tshigs phreng dang po nag po sogs kyi dang po phyag mthil gyi phyogs nas rim bzhin brtsi/_mthe bong la tshigs mngon pa gnyis las med kyang /_lag pa'i mkhrig ma dang nye ba'i phyogs der mi mngon pa gcig yod pas de nas brtsi bar bzhed/_de yang lugs gzhan las mthe bong sogs kyi rang mdog rgyab ngos dang /_tshigs kyi rang mdog mdun ngos su yod par 'dod/_jo lugs tshigs kyi mdog sor gdub bkon pa ltar mtshams so sor khyur tsam re yod par bzhed/_'di'i dzaHla mdzub mo lcags kyu ltar dgug pa'i rdo rje khu tshur/_hU~M la rdo rje rtse lnga'i rgya/_baM la g.yon steng dang /_hoH_la g.yas steng du byas pa'i khu tshur rgyab sprod dang /_steng 'og__/hi la g.yon khu tshur gyen bltas su bzed/_g.yas khu tshur gyen du bsgreng ba yin snyam/_zhib par dus 'khor phyag rgya'i 'grel par blta gsungs/___/_!_rdo rje shugs kyi dbang gtor dpal gtor dmar po zur drug la dbal can/_mchod gtor dmar po pad 'dab bzhis mtshan pa rgyan ldan che ba/_srung ma drug cu la g.yas su gsum/_g.yon du gsum ste drug gtso bo las chung ba/_thams cad zlum gtor dmar po/_mchod pa bcu gnyis sbreng tshar ram/_shar du dri/_me tog__/lhor spos/_me/_nub tu na bza'/_me long /_byang du zhal zas/_shing tog__/shar gyi shar du ting shag rdor dril/_nub kyi nub tu chos 'byung /_pi waM/_'di'i zhal bzhi las/_rgyab zhal la mgrin pa med pas mgrin pa gsum pa/_phyag dpung pa dang phyag ngar rnams mdun nas rgyab ngos su thad bsgrigs/_'di'i yi dwags kyi gdan ni gshin rje'i gdan/_ral pa'i thor tshugs dang thor cog don gcig ste dbu skra gyen du mtho tshad bsdam pa/_do ker dang zur phud don gcig ste snga ma las thung bar phyed dang sum cha'i tshad tsam bsdams pas de yin snyam/_lha mo'i rigs la dka' thub mdzad pa'i bkod pa ma gtogs gzhan la thor tshugs yod pa'i srol med/_bla med spyi la mchod pa'i rig ma bcu drug dang /_dus 'khor la bcu gnyis rang bshad/_yul bdag dang grong bdag gtor ma 'bul na zur du zlum gtor gnyis bsham/_lag g.yas khu tshur kha gyen bstan dang /_g.yon thur bstan rgyab bsnol ba'i steng gi mdzub mos 'og ma'i mdzub mo 'then pa'i phyag rgyas yul bdag dang /_sor bcu ka cha snyoms pa lcags kyu ltar bkug pa g.yas g.yon la kha sprod ma reg tsam byas pa gyen mthur gru khung byed pas grong bdag bkug__/so so'i ming mthar i daM ba liM sogs btags pas bsngo/__/_!_spyi bo dang /_dpral ba zhes pa so so yin pas tshig ris mthun par yig 'bru'ang der bsgom gsungs/___/_!_sam+bu Ti'i 'jigs byed kyi dam rdzas zhes pa chang kho na/_rdo rje srin po sogs gsum gyi gtor ma zur gsum logs re re mtheb kyus brgyan pa/___/_!_rin 'byung yongs rdzogs kyi mchod sngags/_chu gnyis kyi sngags mthar swA hA/_puSh+pe man la AHhU~M sbyar srol yod/_rnal 'byor ma'i rig ma bcu drug gi sngags las d+harma d+hA tu chad pa dang /_bdud rtsi lnga'i sa bon la ra gcig lhag par yod pa sogs ma dag pa mang /___/_!_g.yon pa'i mtheb srin gyis sngags 'bri bar gsungs pa rnams g.yas pa'i mtheb mdzub kyis smyu gu bzung nas g.yon pa'i mtheb srin gyis kyang de'i rtsa ba nas 'dzin pa'i tshul gyis bri bar gsungs/___/_!_spyan ras gzigs yi ge drug pa'i bstod par/_chu bdag gi zhabs bsten ces pa yin/_rjes gnang chings sgrub thabs rgya rgyam 'dres pa'i phyogs yin/__/_!_bcu gcig zhal dmar mo lugs sogs la bdag bskyed kyi ye shes pa mthar gshegs su gsol ba yang phyag len rnying pa'i spyi 'gre las/_rang bzhed dngos ri khrod ma'i skabs/_ye shes pa gshegs pa nges par mi dgos/_gsungs pa de'o/___/_!_don zhags ba ri lugs la phyugs bdag gi cha lugs ni/_dka' thub kyi cha lugs rgyan spangs pa/_gtor 'bul kyi sngags las/_khro gnyer can ma'i mtshan sngags chad yod pas/_g+hr-i ku Ti sa pa ri wA ra nges par dgos/___/_!_dbyu gu rtse gsum ni dbyug pa mgo gsum pa/___/_!_kha saR+pA Ni lha lnga'i nor bzang byis pa'i cha lugs dang rgyan ni/_skra zur phud chung ngu phan tshun du kha shas bsdams pa la rin po che drwa ba drwa phyed lta bus spras pa/_'di'i sa bon gyi sngags la hrIHchad snang /___/_!_bcu gcig zhal 'jigs pa brgyad skyobs la bsgom lung gis chog par gsungs kyang bsgom lung mdzad pa phyag len la yod/___/_!_spyan ras gzigs rdo rje snying por thun gyi sdig bshags gang 'grub byed gsungs pa lta bu 'di rigs thams cad bsnyen pa kho na'i skabs la dgongs pas dbang sgrub dus ma byas kyang rung gsungs/___/_!_seng ge sgra'i rigs lnga dpyi gnyis su bsgom rgyu sku'i rgyab ngos nas zhal nang bstan du bzhugs pa yin gsungs snang /_rjes gnang la/_bgegs gtor bkru byabs srung gsum byed ces par/_bgegs sbyong gsum dang /_sdig sbyong til sbyong bcas byed srol yod la/_spyir til sbyong sngags/_rdo rje mkha' 'gro ma bskyed na/_badz+ra DA ki sogs dang /_ma bskyed na sarba pA pa~M byed pa shas che bas 'dir yang phyi ma ltar ro/___/_!_bde gshegs bzhi bsgril la/_bsgom lung bum dbang gi gong du byed pa phyag len yin/_bzlas lung ni dbang bzhi rdzogs pa'i mtha' dam tshig khas blangs kyi gong du byed/___/_!_sgrol ma nyin zhi mtshan khro'i khro mo'i sku ni rnam 'gyur ma nges sna tshogs su ston cing /_phyag g.yon pa'ang sa la bsnun pa dang /_thugs kar sdigs mdzub mdzad pa sogs ma nges par bsgoms kyang /_bris sku'i tshe thugs kar sdigs mdzub mdzad pa kho na'o/___/_!_sgrol ma dmar mo lta bu lha bskyed lugs mi 'dra ba gnyis re yod pa 'di rigs la rtsa ba bdag bskyed dang /_gcig shos mdun bskyed la sbyar ro/___/_!_sgrol ma nor sbyin mar/_gnas bcu yi ge bkod pa ni/_spyi bor oM/_dpral bar tA/_spyan gnyis la re/_mgrin par tud/_dpung par tA/_snying gar re/_lte bar tu/_gsang bar re/_pus mo gnyis la swA/_zhabs gnyis la hA/___/_!_sgrol ma lha lnga rtsa ba bdag bskyed dang /_tsAn+d+ra go mi'i lugs mdun bskyed la bsgom par gsungs/_phyi ma'i nor bu 'dzin ma dang so sor 'brang ma gcig gam sems/___/_!_kA pa la tA ra lta bu sngags brgya rtsa rjes zlos las bzlas lung gis dmigs bsal ma bshad pa rnams la'ang bzlas lung gi dmigs pa nges par 'bog ces snang /_'di gzhir bzhag la zhal bsgyur tA ra la'ang zur du byed pas mtshon zhar byung du bshad pa rnams la'ang so sor mdzad/___/_!_phyag rdor u tsaR+Ya'i rten gtor nag po gru gsum pad 'dabs brgyad pa/_de mdun mchod gtor dbus su ka pA lar gtor ma 'dab brgyad can dmar po/_g.yas su rin po che'i snod du dkar gtor pad 'dab bzhi pa rgyan sum rim can/_g.yon du rdza'i snod du bgegs gtor lta bu sho lu zhes grags pa de la mtheb kyus bskor ba chang bu dang bcas pa/___/_!_phyag rdor 'byung 'dul ring brgyud dang /_nye brgyud so sor bya/_'di dag la gtor dbang yang nges par byed/_pad 'dabs kyi dbus su tshom bu 'god pa'i dmigs bsal med pa rnams kyang lha'i sku mdog dang mthun pa'i tshom bu re 'god rgyu mdzad snang /___/_!_rta mgrin lhan skyes la gtor ma dmar po pad 'dab brgyad pa/___/_!_shAn bzhi skor gyi dkyil 'khor lhan skyes dang 'dra ba la/_dbus su nyi gdan la tshom bu dmar po/_phyogs kyi 'dab bzhir shAn bzhi'i mdog mthun tshom bu re bkod gsungs/___/_!_shAkya shrI'i lugs kyi rta mgrin maN+Dal gru bzhi nyis brtsegs khar pad+ma dmar po 'dab brgyad la nyi gdan gyi dbus su tshom bu dmar po bkod gsungs pa sogs dmigs bsal med pa rnams la mngon rtogs dang bstun pa kho na mdzad 'dug__/_!_bka' gdams khyung ser dang /_shra ba Na lta bu lung tsam gyis chog gsungs pa thams cad la'ang bsgom lung gi dmigs pa yod srol snang /_/_!_mgon po phyag drug pa'i gtor ma thod par rten gtor nor dbyibs rdzab can cung leb pa'i ngos su nor bu mig gsum 'bur dod can dmar po/_mthar 'khor gyi gtor ma sum cha tsam slebs dang mtheb kyus bskor/_mchod gtor rgyas pa bra gzugs ma 'khor lnga dang mtheb kyu mang pos bskor ba/___/_!_gshed dmar gyi rgyud le'u nyer gnyis pa gsar 'gyur las/_skyu ru ra dang /_a ru ra dang /_dUR+Wa'i rgyal po dang /_pi pi ling dang /_na le sham dang /_lcags kyi phye ma rnams sbrang rtsi dang /_sha kha ra dag gis u dum wa ra'i tshad kyi ril bur bya'o/_/de nas ril bu bza' bar bya ste/_zla bas tshe lo sum brgyar 'gyur ro/_/dang /_la phug gi sa bon dang /_pri yang+ku dang /_tsan+dan dmar po dang /_ru rta btags nas dril phyis byas pas spre'u la sogs pa 'joms so/_/dang /_skyu ru dang /_pi pi ling dang /_tsi tra ka dang /_skam gsher dang /_bu ram rnying pa dang /_mar dang sbrang rtsi mnyam par bza' bar bya ste/_dus ma yin pa'i lud pa dang dbugs mi bde ba 'joms so/_/dang /_rtsA dUR+Wa la yung bas btags nas byugs pas rdo 'joms so/_/dang /_bilba bsregs pa bu ram gyis bza' bar bya ste/_khrag 'byams pa 'joms so/_/dang /_dga' ma gshin rje gshed dmar po'i/_/rgyud du gang+ga'i klung gi ni/_/bye snyed dngos grub ches mang ngo /_/lha mo gus dang bcas pas nyon/_/lha mo dag ni mya ngan 'da'/_/dbang po sogs kyis mi mthong ngo /_/bi rU pak+Sha rnal 'byor dbang /_/bram ze'i rigs su 'byung bar 'gyur/_/brtson 'grus chen po stobs chen ldan/_/bdag gi chos ni ston pa po/_/'ga' zhig gis ni sbas pa'i rgyud/_/'dis ni thos nas legs sbed can/_/gsang sngags 'bum phrag gcig bzlas nas/_/bdag ni sgrub par byed par 'gyur/_/'dzam bu'i gling na sna tshogs pa'i/_/dngos grub rab tu ster bar byed par 'gyur/_/kr-i shU bI dzaM mA sa kaM__/'di dag bdun gyi rnal 'byor pas/_/ster bar dmigs pa byed par 'gyur/_dang /_dang por gso sbyong sbyin par bya/_/phyi nas bslab _pa'i gnas lnga sbyin/_/bye brag smra ba 'bad pas bslab/_/mdo sde pa yang de bzhin no/_/dge ba bcu la goms gyur nas/_/bla ma la gus 'dul la mos/_/dbu ma'ang slob tu bcug nas ni/_/sngags 'di kun tu brtsam par bya/___/_!_gsar 'gyur nag po chen po dngos grub kun las btus pa'i rgyud las/_'jig rten gsum po sgrub byed cing /_/'dod pa kun sbyin nag po che/_/gang gis rnam par shes tsam gyis/_/lus can kun gyis dbang phyug thob/_/sogs dngos grub mtha' yas par sgrub pa'i bsngags pa rgya cher gsungs so/_/de'i lha bzhengs pa'i skabs las/_phyag gnyis pa dang /_bzhi pa/_drug pa/_brgyad pa/_bcu gnyis pa/_bcu drug pa/_bcu pa/_bcu bzhi pa sogs dang /_dbang gi mgon po dang /_ngag gis dbang phyug la sogs pa bshad cing /_phyag bzhi pa'i skabs/_phyag bzhi pa bskyed par bshad par bya ste/_phyag rgya bzhi rnam par dag pa lha mo bzhi dang bcas pa'o/_/sogs phyag dang po gnyis gri thod/_lhag ma gnyis yum la 'khyud par gsungs/___/_!_slob dpon spyod pa'i brtul zhugs kyis gdan bzhi'i dkyil chog snying po mdor bsags las/_sangs rgyas zhing sogs zhing rnams la/_/khyad par du ni sbyin la spel/_/dmangs rigs stong phrag gnyis dag ni/_/bram ze gtsang ma gcig dang 'dra/_/bram ze stong phrag gnyis dag ni/_/dge slong gcig la rab tu sbyar/_/dge slong stong phrag gnyis dag ni/_/rdul med pa ni gcig dang mnyam/_/rdul med stong phrag brgyad dag ni/_/ye shes ldan pa gcig dang sbyar/_/ye shes ldan pa stong phrag gnyis/_/slob dpon gcig dang mnyam par brtag__/de ltar sbyin pa'i zhing byas nas/_/blo dang ldan pas rtag tu sbyin/_/rnal 'byor rtsa ba'i chos la ni/_/zhing bzang po la sa bon gdab/__/ces so/_(na)__/gsang ba ring bsrel gyi snying po/_oM sarba ta thA ga ta uSh+NI Sha d+hA tu mu drA Ni sarba ta thA ga ta d+harma d+ha tu bi b+hU Shi ta a d+hiSh+Thi te hu ru hu ru hU~M hU~M swA hA/_byang chub rgyan 'bum gyi snying po/_oM sarba ta thA ga ta byA lo ki te dza ya dza ya swA hA/___/_!_tsan+dan gyi yan lag ces bya ba'i gzungs las/_'di ltar sa chen po 'di ni ma lus pa grum par 'gyur yang srid/_rgya mtsho chen po ni bskam kyang srid/_de bzhin du ri'i rgyal po ri rab ni 'jig par 'gyur yang srid/_rlung ni zhags pas bcing du rung yang srid/_zla ba dang nyi ma ni sa yi steng du lhung yang srid/_nam mkha' ni lag pa gnyis kyis mnan du rung yang srid/_me ni chur 'gyur yang srid/_'byung ba chen po bzhi ni gzhan du 'gyur yang srid/_sems can thams cad kyi sems ni gcig tu 'gyur yang srid kyi/_de bzhin gshegs pas gsungs shing byin gyis brlabs pa ni gzhan du 'gyur mi srid de/_sus bskyod pa'am/_bsgul bar mi nus so/_/'di ni bdud sdig can gyis glags rnyed par mi 'gyur ro/_/zhes so/___/_!_sgo mtha' yas pas sgrub pa'i gzungs las/_/rgyal bas bsngags pa'i dgon par gnas par gyis/_/de la gnas pa gzhan la brnyas pa med/_/zab mo'i bsod pa 'dun pa bskyed nas su/_/bag yod mgo la 'bar bzhin gnas par gyis/_/zhes dang /_kye ma sangs rgyas bstan pa legs par rnyed/_/sdug bsngal mang po'i rtsa ba khyim yang spongs/_/lus dang ngag dang yid kyang yongs dag pas/_/sangs rgyas dang ni chos la gus par gyis/_/dang /_mdo sde thos nas rjes su yi rang dang /_/yi ger bris dang gzungs dang bklag pa yis/_/bsod nams chu bo ji tsam bskyed pa ni/_/sems can kun gyis shes par yong mi nus/_/de ni tshe rabs kun tu rgyal ba mthong /_/de dag las kyang dad pa bsam yas rnyed/_/mdo sde zab mo'i tshul yang shes par 'gyur/_/des ni myur du byang chub mngon 'tshang rgya/_/zhes so/___/_!_na maHsarba ta thA ga ta hr-i da ya a nu ga te oM ku ruM gi ni swA hA/_'di lan gcig bzlas pas kyang bskal pa 'bum phrag brgya stong du bsags pa'i las kyi sgrib pa yang zad par 'gyur ro/_/de bzhin gshegs pa spyi'i snying po rjes su dran pa rdzogs so/___/_!_mchod pa'i sprin gyi gzungs la/_mahA b+ho d+hi tsit+ta badz+ra las bar du bid+yA mi snang /___/_!_dkon mchog gsum la phyag mtshal lo/_/oM sma ra sma ra bi sma na ska ra ma dza ba hU~M/_zhes brjod cing rin chen brdar bas rin po che'i gdugs dang rgyal mtshan la sogs pa'i char dpag tu med pa nam mkha'i khams gang bar bsams la 'bul lo/_/rin chen brdar ba'i gzungs rdzogs so/___/_!_'phags pa 'jam dpal gyi rtsa ba'i rtogs pa chen po las/_gang du dran pa tsam gyis mtshams med pa lnga yang yongs su sbyong bar byed na bzlas pas lta smos kyang ci dgos/_de yang gang zhe na/_oM A bI ra hU~M khe tsa ra/_grogs po dag 'di ni yi ge brgyad pa dpa' bo chen po zhes bya ba gsang ba'i snying po'i bdag nyid yin te/_sangs rgyas nyid mnyes_ bzhin du rab tu lte bar gnas pa yin no/_/zhes dang /_na maHsa man+ta bud+d+hA nAM/_a tsin+tA d+b+hAta rU pI NAM/_oM tA re swA hA/_rig pa phug ron zhes bya ba/_/las rnams kun la rab tu bsngags/_/zhes so/_/phyogs bzhir theg pa chen po'i mdo sde bklag par bya ba la 'di lta ste/_bcom ldan 'das yum shes rab kyi pha rol tu phyin ma lho phyogs su bklag par bya'o/_/'phags pa zla ba sgron ma'i ting nge 'dzin nub phyogs su bklag par bya'o/_/'phags pa sdong pos brgyan pa byang phyogs su bklag par bya'o/_/'phags pa gser 'od dam pa'i mdo sde shar phyogs su bklag par bya'o/_/zhes dang /_dkyil 'khor bri ba'i tshe/_bcom ldan 'das/_rigs gsum/_byang chub sems dpa' rnams kyi gtso bo/_kun tu bzang po rnams dngos su bri zhing /_lhag ma rnams ni ji ltar rnam par bzhag pa bzhin phyag rgya bri bar bya'o gsungs/_bdag nyid chen pos gang gsungs pa'i/_/ri mo 'di ni mdun bzhag na/_/sngags rnams ma lus 'grub par 'gyur/_/zhes dang /_ras bris mthong ba'i skye bo yi/_/bsod nams thob pa don yod pa/_/bskal pa bye ba rnams su yang /_/brjod par yang ni mi nus so/_/zhes dang /_bskal pa bye bar mi zad las/_/ras ris mthong ba tsam gyis grol/_/ras ris mthong ba tsam gyis ni/_/skad cig de la grol bar 'gyur/_/sangs rgyas bye ba stong phrag ni/_/mthong ba tsam gyis grol 'gyur te/_/ras bris mthong ba tsam gyis kyang /_/de yi mod la grol par 'gyur/_/zhes dang /_dad pa med pa'i mi la ni/_/dkar po'i chos rnams mi skye ste/_/sa bon tshig par gyur pa las/_/myu gu sngon po ji bzhin no/_/dad dang ldan pa'i mi dag la/_/sangs rgyas las ni 'grub 'gyur te/_/sngags rnams thams cad khyad bar du/_/dad pa med la mi 'grub bo/_/zhes dang /_mar me'i snod gser ram dngul lam zangs sam sa'i rang bzhin la shing tu rut+ka'i 'bru mar gyis bkang ba'am dri zhim po'i 'bru mar gyis bkang ba'am ba'i mar gyis yongs su bkang ba'i mar me ras kyi dum bu sar pas snying po byas te ras bris kyi mdun du 'bum phrag gcig gi mar me dbul bar bya'o/_/zhes dang /_chos ldan rgyal po yod pa dang /_/gtsang sbra yod pa'i skye bo yod/_/pha dang ma la gus pa dang /_/bram ze'i rigs ni yod pa yi/_/gnas der lha rnams 'grub 'gyur te/_/gzhan du 'grub pa ma yin no/_/zhes dang /_stobs bcu ldan pas bshad pa'i zhing /_/byang phyogs yod pa'i ri dag dang /_/kha che dang ni rgya yul dang /_/bal po de bzhin mang yul dang /_/rgya yul che dang li yul dang /_/de dag ma lus grub pa'i zhing /_/zhes dang /_chu klung rgya mtsho'i 'gram dag gam/_/de bzhin ri bo kha ba can/_/ri yi rgyal po 'bigs byed la/_/las gyi mchog ni bsgrub par bya/_/zhes dang /_de nas nyi ma phyed shar na/_/sngags bzlas de tshe spang bar bya/_/sngags bzlas de tshe btang ba na/_/sdom brtson mchod yon slar gshegs gsol/_/de tshe btang ba'i lhag dus la/_/thub pa'i bstan la dge ba bya/_/dam chos bklag la sogs pa ni/_/shes rab pha rol phyin la sogs/_/glegs bam sa bcu zhes bya ba/_/mchod dang bklag pa rtag tu bya/_/zhes dang /_'khor ba'i rgya mtsho'i chu 'byung ba/_/zo chun gyi ni rnam pa bzhin/_/'gro ba de dag mi bzad pa'i/_/sdug bsngal chu yis khyab pa yin/_/sangs rgyas kyis ni bud med dag__/gcig tu sdug bsngal rtsa bar gsungs/_/nyan thos byang chub sems dpa' dang /_/rang rgyal thub pas de bzhin gsungs/_/zhes dang /_zlos pa 'di la tshul khrims nyams/_/de la gus pa mchog med cing /_/grub pa 'bring yang yod med de/_/grub pa tha ma'ang yod ma yin/_/tshul khrims 'chal ba thub dbang gi__/sngags 'grub par ni ma gsungs te/_/mya ngan 'das grong 'gro ba yi/_/yul dang phyogs kyang ma yin no/_/byis pa ngan pa 'di la ni/_/sngags grub pa ni ga la yod/_/skye bo tshul khrims 'chal 'di la/_/de la bde 'gro ga la yod/_/mtho ris su yang mi 'gyur zhing /_/bde ba mchog tu'ang mi 'gyur na/_/rgyal bas gsungs pa'i sngags rnams ni/_/'grub par 'gyur ba lta ci smos/_/zhes dang /_blo ldan g.yeng ba med la dga'/_/gtsang zhing ma chags shes nyen can/_/rigs mtho brtan dang dpa' ba dang /_/brtser ldan mthong na dga' ba dang /_/chos dang chos min rnam dpyod shes/_/de la grub pa rnyed mi dka'/_/zhes dang /_bkres dang skom pas nyen gyur na/_/sngags kyi don la rten mi nus/_/kha zas mang dang nyung zos na/_/sngags rnams thob par mi nus so/_/de nyid phyir na thub dbang gis/_/sems can zas kyis gnas pa'o zhes/_/lus can rnams la gsungs pa ste/_/dang /_gzugs kyi khams na gnas pa rnams/_/bsam gtan zas la spyod pa can/_/gzugs med khams kyi lha dag ni/_/ting 'dzin 'bras bu spyod pa'o/_/srid pa bar ma'i sems can rnams/_/dri yi zas su rab tu bsgrags/_/de bzhin 'dod khams sems can dag__/sna tshogs zas la spyod pa yin/_/de nyid phyir na thub dbang gis/_/las kyi rgyu yis gsungs pa ni/_/sems can zas kyis gnas pa zhes/_/thams cad la ni rab tu bsgrags/_/dang /_spyod pa yongs su dag pa dang /_/dge zhing tshangs par spyod pa dang /_/kha zas tshod ni ran pa la/_/de la grub pa rnyed mi dka'/_dang /_rgyud rnams kun la bsngags pa yi/_/gtsang sbra lnga yi cho ga gsungs/_/lus kyi dag dang ma dag dang /_/yid kyis dag pa yin par bstan/_/bzhi pa bden pa'i dag brdzun spangs pa/_pa ste/_/chu yi dag pa lnga par bshad/_/ces dang /_log par smra bar gyur pa dang /_/rmongs pas log par brjod pa yis/_/'byung po rnams la slu byed pa/_/de la sngags grub ga la yod/_dang /_sngags dang rgyud kyi don ldan pa'i/_/'bras bcas las ni brtsam par bya/_/brtsams pa'i las ni brtsam bya ste/_/las med nyid la brtsam mi bya/_/dang /_sngags pas zlos mthar ngal bso zhing /_/ji srid dus su bsdad par bya/_/zlos pa dus la babs pa na/_/der ni bzlas par bya ba yin/_/dang /_gal te des ni rmi lam na/_/dge ba'i rmi lam mthong na ni/_/'bras bcas rmi lam ston pa ste/_/der ni grub pa ston pa yin/_/dang /_mya ngan med shing zhi don du/_/slob pa dag ni rab tu bsngags/_/dang /_ha cang mi skam rlon pa'ang min/_/tshig min las ni brtsams mi bya/_/dang /_shar du bltas pas zhi ba 'grub/_/byang du bltas pas rgyas pa'o/_/dang /_zhi dang rgyas pa'i las la ni/_/shing rlon dag ni rab tu bsngags/_/dang /_gtsang ba'i rtswa yi rtsa bas ni/_/me sgron tshad dang ldan byas nas/_/de nas chang par bcangs nas ni/_/'bad pas me ni sbar bar bya/_/kha yi rlung gis mi bya ste/_/rtag tu gos kyi mthas kyang min/_/sham thabs bla gos rnam par spangs/_/gos gzhan dag ni bkag ma yin/_/dang /_rlung g.yab gtsang dang de bzhin gos/_/lo mas kyang ni rlung g.yab bya/_/dang /_lag pa de ni g.yon pa yis/_/lan gsum bar du chus gtor nas/_/dang /_zho dang mar gyis sbag pa dang /_/sbrang rtsis sbag pa'i yam shing gis/_/rgyas pa'i las ni bya ba'i phyir/_/sngags kyis kun tu sbyin sreg bya/_/dang /_zhi ba kha dog dkar po ni/_/rgyal ba mchog gis rtag tu bsngags/_/dang /_de bzhin rtag tu mdog dmar las/_/rgyas par 'grub par 'dod pa yin/_/byang chub sems dpa' sems dpa' che/_/sa bcu la ni yang dag gnas/_/sbyin sreg las kyis 'gugs byed na/_/sa steng mi rnams smos ci dgos/_/dang /_til la mar gyis btags pa'am/_/zho la sbrang rtsi bsres pa yis/_/las kun la ni sbyin sreg ni/_/stong rtsa brgyad ni rtag tu bya/_/dang /_/me yi las dang de bzhin gzugs/_/ras ris mdun du brtsam byas na/_/de ni sngags rnams 'grub 'gyur zhes/_/sngon gyi bder gshegs rnams kyis gsungs/_/zhes/_mtshams med lnga po byed pa dang /_/tshul 'chal blo ni chung ba dang /_/sdig pa kun la 'dzud byed pa/_/khyab bdag mthong ba dkyir 'khor tsam gyis grol/_/dang /_dang po'i thun gyi rmi lam gang /_/bad kan las gyur shes par bya/_/gnyis par gang byung mkhris pa ste/_/'jig rten la yod smad pa yin/_/gsum pa rlung byung shes par bya/_/bzhi pa bden par 'byung ba yin/_/bad kan rmi lam dang po ni/_/'di 'drar rtag tu mthong ba yin/_/nor bu shel gyi khang pa ni/_/kun nas mu tig phreng ba can/_/a mra'i shing tshogs rab mang po/_/bdag nyid chu nang bying ba mthong /_/sogs nyes pa gsum gyi rmi lam rgya cher bstan cing /_gong du/_sangs rgyas nyan thos bse ru ni/_/gal te 'di yis rmi lam mthong /_/sngags pa de ni bya ba yi/_/'bras bcas nges par 'grub par 'gyur/_/sogs gsungs so/_/'jam dpal zhes bya yongs su btags pa ni/_/khyod kyi ming ni sngon gyi rgyal bas mdzad/_/khyod kyi ming du 'di ltar btags byas pa/_/'das dang ma byon da ltar sangs rgyas kyi/_/gzhan du ma yengs rtse gcig yid dag pas/_/khyod kyi ming ni 'khor gyi nang du thos/_/des ni 'di la shes dang zhi ba thob/_/srid mthar byang chub mchog ni khyad par thob/_/sngags rnams ma lus 'grub par 'gyur ba dang /_/'gro ba'i skye gnas mchog ni rab thob cing /_/rtag tu chos mchog la ni yang dag gnas/_/bgegs rnams rnam par spong zhing grub pa thob/_/'dod pa'i sngags rnams ma lus 'grub par byed/_/byang chub shing dbang drung du myur du 'gro/_/song nas byang chub mchog ni thob par byed/_/song nas sems can phan phyir der 'dug ste/_/sangs rgyas byang chub 'khor lo rab tu bskor/_/de ltar rgyal ba'i yon tan gtso bos gsungs/_/'jam dpal zhes ni khyod kyi ming dran pa/_/yon tan bsam mi khyab ces rgyal bas gsungs/_/rgyal ba'i gtso bo sngar gshegs thams cad kyis/_/rtag tu khyod kyi mthu ni bstan pa yin/_/gzhon nu dag pa khyed kyi sngags rtog pa/_/bskal pa grangs med rtag tu'ang ston mi nus/_/yid 'ong bzang po rnar ni snyan pa dang /_/dga' bskyed snyan pa dang ni rjes su mthun/_/sems ni tshim byed bde ba rab tu sbyin/_/'jam zhes bya bar sangs rgyas yang dag gsung /_/dang /_ji ltar sA lu'i 'bru rnams ni/_/myu gus rnam par shes par byed/_/de bzhin grub pa'i rdzas rnams ni/_/mtshan nyid kyis ni rnam par shes/_/dang /_rgyu mtshan dang ni spyod pa dang /_/skye ba dang ni rigs dang gnas/_/rtag tu la nye sna tshogs pa/_/las de las ni nye bar dmigs/_/dang /_grub dang ma grub mtshan ma ni/_/rkyen gyi don la ltos pa yin/_/rgyu mtshan spyod dang mtshan ma ni/_/rkyen la mngon par rab tu brtag__/de bas rnam kun 'bad nas ni/_/rkyen la rags las bya ba yin/_/zlos pa'i sngags rnams rtag tu ni/_/grub pa rgyu la ltos pa yin/_/'di dag rkyen gyi yan lag ni/_/las ni bdag gir byed pas mtshon/_/ces sogs ji ltar sA lu'i 'bras bu phun sum tshogs pa 'byung mi 'byung myu gu'i dus nas shes pa ltar/_sngags 'grub mi 'grub ltas kyi byed las shes shing /_ltas kyang mtshan ma dang /_rmi lam dang /_gzhan gyi spyod tshul sogs la nye las shes pas na/_rmi lam ngan pa gtso bor gyur pa'i ltas mi shis pa byung na de dag zlog cing /_shis pa'i ltas kyi byed las chud mi za bar bdag gir 'gyur ba'i rig sngags ni/_rmi lam ngan pa bzod dka' dang /_/ma rung sems can zlog byed pa/_/rgyal ba sA la'i dbang po yi/_/sngon gyi sngags rgyal yongs gsungs pa/_/lha yi tshogs dang gza' rnams dang /_/rgyu skar skar mkhan rnams nyon cig__/ces sogs mnyan par gdams nas gtsug tor 'bar ba'i sngags phan yon dang bcas pa gsungs so/_/'di'i sngags/_tiSh+Tha Sh+ti phaT phaT swA hA/_zhes snang /_las bdag gir byed pa'i rkyen gyi le'u rab 'byams las bcu drug pa'i skabs su snang ngo /_/rgyu skar lhag ma gtso bo ni/_/dus kyi tha mar 'byung ba min/_/zhes snang na'ang /_rgyu skar gtso las lhag ma ni/_/zhes bsgyur na go bde bar sems te/_gtso bo nyer bdun las/_skar phran gzhan gyi nus pa dus mthar mi 'byung /_zhes pa'i don du snang bas so/_/yang /_shes rab chen po 'jam pa'i dbyangs/_/byis pa gzhon nu'i gzugs dang ldan/_/'jig rten 'dir ni kun tu rgyu/_/sems can rjes su bzung bar bzod/_/de yi dus su grub pa ni/_/'jam pa'i dbyangs ni rab tu mthong /_/rgyu skar skar ma'i dpyad shes pa/_/de yi tshe na 'byung bar 'gyur/_/sogs gsungs pa 'dis nag rtsis gtso bor lung bstan par rtogs te rgyu mtshan mang po/_/tha skar snar ma nyid dang ni/_/rgyal dang khrums ni stod smad gnyis/_/nam gru dang ni lha mtshams dag__/bzlas pa'i dus su rab tu bsngags/_/dang /_phur bu pa sangs zla ba dang /_/gza' lhag mchog ni las kun la/_/gza' mchog 'di dag rtag tu ni/_/bzhi po tshes dang ldan pa ni/_/sa steng 'jig rten kun tu ni/_/'gro ba'i las ni grub par byed/_/ces dang /_se gol brgya yi tshogs dag la/_/rtsa rgyun gcig tu bstan pa yin/_/rtsa rgyun bzhi la chu tshod bstan/_/chu tshod bzhi la thun zhes bya/_/thun bzhi la ni nyin par te/_/mtshan mo dag kyang de bzhin bstan/_/de ltar brgyad dang ldan pa la/_/nyin mtshan du ni rab tu brtag__/dang /_nyi ma bco lnga nyid la ni/_/zla ba phyed ni rab tu bstan/_/zla phyed gnyis la zla ba zhes/_/rtsis shes 'jigs pa med pas bstan/_/de bzhin zla ba zla drug gis/_/sgra gcan gyis kyang 'dzin pa yin/_/de nas zla ba bcu gnyis la/_/lo yi sgrar ni rab tu bsgrags/_/de nas lo ni bcu gnyis la/_/lo chen zhes ni de la bya/_/gza' dang rgyu skar phyin ci log__/lha min dbang po thams cad kyang /_/de nas lo ni bcu gnyis la/_/'dir ni dge dang mi dge byed/_/ces dang /_le brgan du btsos pa'i skud pa lan bdun bzlas brjod byas te mdud pa bor na bcing bar 'gyur ro/_/dang /_slong mo'i zas za zhing cho 'phrul chen po'i zla phyed kyi zla ba la nub gsum smyung bar byas la/_zla ba gzas zin pa na ba nag mo'i 'o ma la lan brgya rtsa brgyad mngon par bsngags te 'thung na bcud len gyi yon tan dang ldan par 'gyur ro/_/dang /_rtswa dUR+Wa'i 'jag ma la zho dang sbrang rtsi mar gyis btags pa stong rtsa brgyad nub bcu'i bar du sbyin sreg byas na dus ma yin par 'chi ba rab tu zhi zhing tshe ring bar 'gyur ro/_/dang /_srung ba'i skud pas ni nad thams cad las grol bar 'gyur ro/_/dang /_shu dag la zho dang sbrang rtsi dang mar gyis btags te sbyin sreg byas na rgol ba thams cad la lan 'debs nus par 'gyur ro/_/dang /___rgya dang rgya ni che nyid la/_/'jam pa'i dbyangs ni rab 'grub 'gyur/_/gang yang de ni sngags rnams ni/_/der ni rab tu 'grub par 'gyur/_/dang /_kha ba can ri'i nang byung ba/_/der ni thams cad 'grub par 'gyur/_/skye bo skal ldan bzang po ni/_/zhi ba'i las ni rtsom par byed/_/dang /_rgyal bas gsungs pa'i sngags kyis ni/_/zhi ba'i las ni bya ba yin/_/rin chen rigs kyi bya ba ni/_/rgyas pa'i las ni thams cad do/_/mngon par spyod pa'i las rnams ni/_/rdo rje'i rigs kyis bya ba yin/_/dang /_mchog dang bar dang tha ma ni/_/de dag rnam pa gsum 'byed pa/_/zhi dang rgyas pa dag dang ni/_/mngon spyod par ni 'dod pa yin/_/dang /_brgya yi grangs kyis bgrang ba ni/_/de dag bcu la stong phrag gcig__/stong phrag bcu la khri yin te/_/khri bcu la ni 'bum phrag gcig__/'bum phrag bcu la sa ya ste/_/sa ya bcu la bye ba yin/_/bye ba bcu la dung phyur te/_/dung phyur bcu la ther 'bum yin/_/sogs rgya cher bstan/_/'jig rten dang ni mya ngan 'da'/_/stong pa'i steng ni stong gyur na/_/khyod nyid byis pa'i gzugs kyis ni/_/sangs rgyas mdzad pa byed par 'gyur/_/de tshe dgon chen rab dga' ba/_/kha ba can nang yod pa yin/_/dang /_sems can mtha' ni bsam mi khyab/_/rnam par smin pa'ang =__sangs rgyas chos kyang =__byang chub spyod pa'ang =__gdul ba'i sems can la brten nas/_/phan mdzad spyod pa bsam mi khyab/_/byang chub sems dpa'i spyod pa rnams/_/bsam mi khyab par yongs su bstan/_/ces so/_/chos 'di dag ni mdor bsdu na/_/dge dang mi dge bstan pa yin/_/rtag tu mi dge spang bya ste/_/dus rnams kun tu dge ba spyad/_/dang /_gang+gA'i byang phyogs 'gram dag ni/_/chu bo chen po de las gzhan/_/kha ba can ri'i lho phyogs char/_/sA la'i nags zhes bya ba 'byung /_/de tshe nub phyogs bltas pa'i mal/_/der ni gnas su 'byung bar 'gyur/_/de tshe chu bo rab dga' ba/_/bzang po gser ldan 'gram dag tu/_/lha rnams kun gyi tshogs la sogs/_/'dus pa dag ni 'byung bar 'gyur/_/dang /_yi ge hU~M de yi ge gcig__/las rnams ma lus byed cing dag__/sngags kyi rgyal po bzlas tsam gyis/_/'di ni bzlas pa tsam gyis byed/_/'gro dang gnas pa'i dus dag dang /_/de bzhin dgra rkun rengs par byed/_/sems can gdug pa thams cad la/_/bzlas pa tsam gyis rengs par byed/_/dang /_ma skyes dgra yi bu u'i ming can gyis/_/des ni ston pa'i gsung rabs dag__/rgya cher 'bri bar byed 'jug 'gyur/_/dang /_rgyal po de las gzhan pa yang /_/zla ba sbas zhes bya ba 'byung /_/gnod sbyin chu dbang grub pa ste/_/rgyal srid gnod pa med par byed/_/dang /_de bzhin gshegs pa'i bstan 'di la/_/rnam pa sna tshogs bya ba byed/_/byang gi phyogs la brten nas ni/_/de yi tshe na 'byung bar 'gyur/_/lha ldan yul zhes bya ba na/_/gangs can mi yi nang gnas pa'i/_/rgyal ba mi yi lha zhes pa/_/lits+tsha bI rnams rigs su 'byung /_/dang /_ston pa'i gsung rab sa steng du/_/dus mthar 'jig rten nyams pa na/_/sdom brtson rgyal po'i tshul gyis ni/_/'byung bar 'gyur ba the tshom med/_/dang /_yi ge ra dang ba dang por/_/dge slong gang zhig rab byung gsungs/_/ston pa'i bstan pa gsal byed pa/_/'byung bar 'gyur ba the tshom med/_/dang /_de nas yi ge sa dang ka__/dang po ngag tu brjod pa dang /_/zhes dang /_dang por yi ge ba grags dang /_/ston pa'i gzugs brnyan don yang byed/_/blo ldan dang por yi ge ma/_/sogs dang /_sdom brtson thams cad bsgrags pa yang /_/ston pa'i bstan pa gsal byed pa'o/_/sogs lung bstan to/_/'jam dpal cho ga 'di gsungs pa/_/bklag pa dang ni 'chang ba yis/_/de ni 'dod 'jo'i ba 'drar 'gyur/_/nor chen longs spyod phun sum tshogs/_/zhes gsungs so/_/spyir 'jam dpal gyi rtsa ba'i rgyud 'dir ras bris che 'bring chung gsum sogs ras bris kyi cho ga 7dang /_zlos pa dang /_sbyin sreg dang /_sgrub po'i mtshan nyid dang /_rmi lam dang /_tshes dang /_rgyu skar dang /_ltas kyi bye brag sogs mtha' yas pa gsungs shing /_mjug tu lung bstan pa rgya cher snang ste gtso bor rgyal rigs kho nar snang ngo /_(na)__ldeb204mtshams/_yi ge gcig gi sa 'di ni rig pa'i 'khor los sgyur ba/_de bzhin gshegs pa thams cad kyi gtsug tor 'og nas gong du gnas pa bstan pa thogs pa med pa sogs nas/_b+h+rU~M/_bcom ldan 'di ni thams cad mkhyen/_/sangs rgyas sngags gzugs rnam par gnas/_/ston pa thugs rje che dang ldan/_/sems can kun la rnam par skyong /_/zhes sogs dang /_rtswa ku sha la brgya rtsa bzlas nas mtsho gnas bcad na gzhan gyi rig sngags bcad/_dar le brgan la mdud pa bor nas lan bdun bzlas na bcings/_zho dang sbrang rtsi dang mar dang til gyis sbyin sreg gis thams cad dbang du 'gyur ba dang /_thang shing gis lha/_mngar gsum gyis klu/_mya ngan med pa'i shing dang pr-i yang+ka'i shing gis dri za/_ske tshes gnod sbyin mo dang klu mo/_yungs kar gyis rgyal po/_me tog gis bram ze/_zho dang 'o ma dang mar gyis rje rigs/_phub ma'i rdul gyis dmangs rigs/_lan tshwas bud med sogs dbang du 'gyur bar gsungs//___//_!_ 'jam dpal rtsa rgyud las/_rig pa'i rgyal mo rdzu 'phrul can/_/de ni sgrol ma zhes kyang bstan/_/bud med gzugs 'chang lha mo ni/_/'gro ba kun tu rnam par rgyu/_/snying rjes brlan pa'i sems kyis ni/_/sems can rnams la phan don du/_/mi mjed 'jig rten khams gnas nas/_/bud med ming gis 'jug par byed/_/sa bcu la ni rab gnas thob/_/byang chub sems ma rdzu 'phrul che/_/sems can rnams ni 'dul byed pa/_/lha mo sgrol ma zhes su bstan/_/'di ni 'bad med 'grub pa ste/_/srung dang skyob dang sba bar byed/_/longs spyod dbang phyug 'phel byed pas/_/'di ni lha mo bsgrub par bya/_/byang chub mchog gi ched du ni/_/skyed pa nyid ni brtsam par bya/_/snying rjes brlan pa'i lus can la/_/de tshe lha mo rjes 'brang ba/_/sngags kyi gzugs kyis sems can la/_/byang chub tshogs kyi bya phyir ro/_/re ba thams cad dga' rgyas phyir/_/shar gyi phyogs su gnas pa yin/_/bdag nyid rnams la stong dang ni/_/rnam pa mang po byas nas kyang /_/rgya mtsho bzhi yi mthar thug par/_/sa rnams kun tu rnam par rgyu/_/zhes sogs rgya cher bstan la/_ye shes thig le'i rgyud las/_tA ni yig 'bru khu ba yab/_/rA ni yum ste khrag yin no/_/de gnyis 'dres pa thig le yin/_/gzhan min rnam shes ngo bo'o/_/zhes gtso bo stong pa nyid yum dang /_yan lag thabs bde ba chen po yab kyi ngo bo dbyer mi phyed pa byang chub sems kyi rdo rje ni nges don gyi sgrol ma'o/___/_!_dpal mchog dang po'i rgyud las/_gser ram yang na dngul dang ni/_/de bzhin shing las byas pa yi/_/rang gi 'dod lha'i gdong rnams kyis/_/grub pa'i phyag rgyas gar rnams bya/_/zhes gar 'chams kyi khungs gsungs so/___/_!_mgon po kun 'byung las/_sna tshogs 'bru nag dpal byas pa'i/_/gtor ma mi shas brgyan pa dang /_/ces gtor ma zur gsum du byed pa'i khungs so/___/_!_ snga 'gyur rdo rje phur pa gsang ba'i rgyud las/_/glegs shing thabs dang shes rab la/_/shog gu theg pa'i sa gzhi ste/_/zhi gnas lhag mthong zhing gi rgyags/_/dbyings dang ye shes don rgyags gnyis/_/smyu gu rig pa'i shes rab ste/_/byang chub sems rtags snag tsha yin/_/yi ge gsum gyi phyag rgyas bris/_/byed pa po ni dam tshig can/_/legs shing tshad dang ldan byas nas/_/sngags mkhan dam tshig blo can gyis/_/dus gsum bzhugs pa thams cad kyi/_/gsung gi de nyid byin bsdus nas/_/glegs bam nyid la bstim par bya'o/___/_!_'jam dpal las bzhi'i 'khor lo'i rgyud phyi ma las/_dus ngan tha mar byung ba'i tshe/_/lha mo'i nang na 'od zer can/_/'phags pa'i nang na 'jam dpal nyid/_/'di gnyis ma gtogs dngos grub gzhan/_/rig 'dzin kun la ma yin no/_/zhes so/_/_!_'jam dpal dpa' bo gcig pu grub pa rgyud kyi rgyal po le'u gnyis pa las/_oM shra ba Na pi shA tsi ni muN+De swA hA/_ba ru ra'i shing ngam n+ya gro d+ha'i shing gi rtsa bar 'dug la/_cang mi smra bar 'bum phrag gcig bzlas na grub par 'gyur te 'jig rten gsum gyi spyod pa yang ston par 'gyur ro/_/yang na legs par khrus byas la gos gtsang ma bgos te dben par 'dug la khri bzlas pas grub par 'gyur ro/_/dgong mo nyal khar ru rta la brgya rtsa brgyad mngon par bzlas nas gdong dang rkang pa gnyis bkrus na rmi lam du dge ba dang mi dge ba rnams ston par 'gyur ro/_/zhes bya ba ni lha mo shra ba Na'i sgrub pa'i thabs so/_/yang /_oM mu tsi li swA hA/_/mo ha ni swA hA/_lag na rdo rje rmi lam mthong ba'i gzungs kyang 'di'o/_/dan ti li swA hA/_gsang sngags 'di khri bzlas na 'grub par 'gyur ro/_/bcom ldan 'das 'phags pa spyan ras gzigs dbang phyug la mchod pa rgya chen po byas nas lan brgya rtsa brgyad mngon par bsngags pa'i chus gdong bkrus te/_dgos pa yid la byed pa'i bzlas pas mi smra bar nyal na bcom ldan 'das rang gi gzugs su mthong bar 'gyur zhing dge ba dang mi dge ba rmi lam du rmis par 'gyur ro/_/zhes gsungs pa 'dis ni dbang gi sta gon la sogs pa'i skabs su rmi lam brtag pa'i rig sngags so/_/yang /_oM bud+d+ha tsu ru mA tsu ru ke swA hA/_sku gdung dang bcas pa'i mchod rten nam rje btsun sangs rgyas kyi spyan sngar bsnyen pa cho ga khri bzlas la/_de'i 'og tu ci 'byor pa'i mchod pa byas nas nyal ba'i dus su brgya rtsa brgyad bzlas te/_bdag gang nas skyes par gyur/_gang du skye bar 'gyur zhes yid la bsams shing nyal na 'das ma 'ongs pa'i skye ba dmigs par 'gyur bar the tshom med do/_/gal te zla ba drug gi nang rol du 'chi bar 'gyur ba de'i tshe rmi lam du bdag gam gzhan gyi mgo bo mi mthong bar 'gyur ro/_/de bzhin du mngon par bsngags pa'i me long bltas pa na khye'u'am bu mo gang gi mgo bo mthong bar ma gyur pa de zla ba drug gi nang du 'chi bar 'gyur ro/_/rdo lig bu mig dang /_shing a ga sti dkar po'i rtsa ba reng bur byas te/_brgya rtsa brgyad mngon par bsngags pa'i mig la byug na/_gang dag zla ba drug gi nang du 'chi bar 'gyur ba'i rkang gnyis pa dang /_rkang bzhi de dag thams cad kyi mgo bo med pa mngon sum du mthong bar 'gyur ro/_/zhes bya ba ni bud+d+ha tsu ru ma'i rmi lam brtag pa'i cho ga'o/_/yang /_oM dzam+b+he mo he swA hA/_rje btsun sgrol ma la ka ra wI ra'i me tog gis mngon par mchod de/_sngags kyi rgyal po yi ge 'bum bzlas na yid la re ba thams cad rdzogs par byed do/_/zhes don thams cad grub pa'i cho ga'o/_/'og ma 'di dag sgrol ma rnal 'byor ma'i rgyud las kyang 'byung /_le'u gsum par/_'jam dkar gyi sgrub thabs dang /_sngags 'dra min gsum/_sgrol ma'i sngags 'jam dkar gtso 'khor lnga'i sgrub thabs bcas bstan pa'i 'phror/_ra yi 'o ma a ru tsha ba gsum/_/sa tha shu dag se 'bru sen d+ha pa/_/lan bdun sngags pa'i mar dang ni/_/'thung bas dbyangs can 'grub par 'gyur/_/ra yi 'o ma bre bzhi dang /_/sman rnams srang gcig tsam gyi tshad/_/mar bre gang dang mkhas pa yis/_/rim gyis me chu la bskol bya/_/zla gcig tsam zhig rab sbyar na/_/bla med tshig ni thob 'gyur zhing /_/zla drug nye bar longs spyod pas/_/ngag gi dbang phyug mngon sum 'gyur/_/shug pa shing mngar sen d+ha pa/_/a ru bca' sga la la phud/_/ru rta pi pi zi ra bcas/_/rnam btags ngag ni dag par byed/_/lha la me tog dri bzang sogs/_/nangs par yang dag mchod nas ni/_/lan bdun sngags byas zos na ni/_/zla ba drug gis thos 'dzin byed/_/zla ba gsum gyis tshig bdag 'gyur/_/zla ba gcig gis blo ldan zhing /_/khu byug gzhon nu'i skad bzhin du/_/dbyangs snyan pa ni skye bar 'gyur/_/zhes dang /_oM bAg di ni bA tsarma ni yats+tsha sa ra swa tI ma hA shwe te swA hA/_pad+ma las skyes pa'i dkar mo chen mo'i snying po 'dis ni gong du bshad pa'i las thams cad byed par 'gyur ro/_/zhes gsungs/_yang le'u dang por/_oM pi shA tsi par+Na sha ba ri sarba u pa dra ba nA sha ni swA hA/_rig pa chen po 'di ma bsgrubs su zin kyang rkang gnyis pa dang rkang bzhi pa thams cad kyi rnam par 'tshe ba sel bar byed cing /_las thams cad byed par 'gyur ro/_/sbyin sreg gam bzlas pa'am khrus sam sngags mdud mngon par bsngags pa'i chu 'thung pa'am byabs pas nad thams cad sel bar byed do/_/gro ga la gur gum gyis bris pa'i sngags rke'am dpung pa la btags na rtsod sbyong las rgyal ba thob par 'gyur zhing /_rims nyin bzhi pa sogs mi zad pa'i sa las rnam par grol bar 'gyur ro/_/srin po la sogs pa'i 'jigs pa sel bar byed cing /_'thab pa dang 'khrugs pa dang rtsod pa dag las rgyal ba sgrub par byed do/_/stag dang chu srin dang lto 'phye chen po dang rkun po la sogs pas mi mthong zhing rtag tu bzlas na skye bo thams cad dga' bar 'gyur ro/_/zhes so//___//_!_ 'jam dpal dpa' bo gcig pu grub pa'i rgyud kyi le'u dang po las/_oM a mA ra Ni dzI wan+te ye swA hA/_sngags kyi rgyal po 'di legs par bzlas na las thams cad byed par 'gyur ro/_/mngon par bsngags pa'i chu 'thung na 'brum bu 'ong bar mi 'gyur ro/_/lus las skyes pa'i dug mi zad pa dang /_spre'u dug dang sbrul dug la sogs pa'i rma la yung ba dang /_a ru ra dang /_ru rta la sogs pa la yongs su bzlas te bskus na rang bzhin du gnas par 'gyur ro/_/nad dang rnam par 'tshe ba thams cad la sngags mdud bcings na zhi bar byed do/_/rtag tu bzlas na tshe zad pa yang tshe lo brgya thub par 'gyur ro/_/mar dang til gyi sbyin sreg gis thams cad zhi bar byed do/_/mngon par bsngags pa'i sman gyi btung bas nad thams cad las yongs su thar bar byed do/_/lan brgya bkrus pa'i mar la mngon par bsngags pas na ba'i yan lag la bskus na rang bzhin du gnas par 'gyur ro/_/mgo'i nad la til mar la sngags te bskus na rang bzhin du gnas par 'gyur ro/_/gdug pa'i rma la chu la sngags nas gtor bas sos par 'gyur ro/_/spri ha'i nad la be dong la sogs pa'i mtshon gyis gtubs pas kr-i ha bcad par 'gyur ro/_/ni rgun d+hi dang /_nim pa'i rtsa ba rma bya'i mjug sgro dang bcas pa gcig tu sbyar la/_brgya rtsa brgyad mngon par bsngags pa'i bdug pas bdug na/_rims nyin gcig pa dang /_nyin gnyis pa dang /_nyin gsum pa dang /_nyin bzhi pa la sogs pa sel bar byed cing /_'byung po dang /_sha za dang /_tshangs pa dang /_srin po la sogs pa sel bar 'gyur ro/_/bud med bu shi ba la lan brgya rtsa brgyad mngon par bsngags pa'i bum pas khrus byas na bu gson po dang ldan par 'gyur ro/_/gro ga la bris pa'i sngags rked pa'am dpung pa la btags pas mngal srung bar 'gyur ro/_/sngags rjes su dran pas g.yul ngogs su 'jug na rgyal ba rnyed par 'gyur zhing byabs pas nad thams cad sel bar byed do/_/zhes so/___/_!_gshin rje gshed kyi rgyud rtogs pa gsum pa las/_zhi ba'i las ni zla ba yin/_/rgyas pa de bzhin mig tu bsgrags/_/dbye ba yon tan zhes bya ste/_/dgug pa'i las ni de bzhin mda'/_/bskrad dang mnan pa dbang po yin/_/mnan pa rjes su 'brang ba yis/_/bsad pa'i las ni rgya mtshor 'dod/_/las rnams de dag re re la'ang /_/'phags sogs mchod sbyin dang po ste/_/nyi ma gnyis pa gtor ma sbyin/_/gsum pa bzlas pa rnam par 'bad/_/bzhi pa sbyin sreg tshang bar bya/_/lnga pa las kyi 'khor lo bskor/_/drug pa bsam gtan rtse gcig bya/_/bdun pa las kyi lhag chad bskang /_grogs kyi las la khyad par du/_/las kyi gtsor ni gang bsgrub de'i/_/'khor lo bskor ba nyi ma bzhis/_/las kyi bye brag 'di shes na/_/zhi bas 'jigs pa brgyad las skyob/_/rgyas pas yon tan drug dang sbyor/_/dbang gis mos pa rnam bzhir 'gyur/_/dbye bas gsang sde brgyad dang 'byed/_/mnan pas dbang po drug 'ching byed/_/gzhan ni ji ltar de bzhin no/_/sngags dang rdzas dang sbyor ba la/_/dpyad na dngos grub ma 'grub ste/_/gal te yid gnyis za gyur tam/_/bsam pa 'gyur ram dad pa nyams/_/de tshe dngos grub ster ba yang /_/phyir ldog 'gyu_ra bar gdon mi za/_/dad pa brtan pos bsgrub pa na/_/nam mkha' med par gyur na yang /_/sngags kyi dngos grub med mi srid/_/lha dang drang srong gis bshad pa'i/_/rig sngags bslu ba mi srid na/_/'dod chags bral bas byas pa yi/_/gsang sngags sbyor bas bslu ba ni/_/ma byung 'byung bar mi 'gyur ro/_/chos nyid bsam gyis mi khyab pa'i/__/sogs so//___//_!_ sman bla'i mtshan dran pa dang /_gzungs bzlas pas tshangs spyod mi nyams shing nad phogs kyis dbang po nyams pa sogs sos/_nad thams cad zhi zhing byang chub bar du mi 'byung /_'jigs pa thams cad las srung zhing zas gos sogs rtsol med du rnyed/_bud med kyi srid pa tha mar byed cing ngan song las thar ba sogs phan yon dpag tu med/_cho ga mdo rang rkang dang /_sngags chog tu bkral ba gnyis yod/_snga ma yongs grags dang /_phyi ma ngor chen rdo rje 'chang sogs bzhed/_bya rgyud dang mthun par bkral ba'i dbang bka' dang /_bdag bskyed gtso 'khor gsum pa dang /_mdun bskyed sman bla mched bdun byas pa'i rjes gnang bcas bo d+hi satwA nas brgyud pa dang /_yang jo bo nas brgyud pa'i bdag mdun gnyis ka gtso 'khor gsum par byas pa zhig kyang yod snang /_snga ma'i skabs gzungs ring dang /_bar par gzungs 'bring po/_phyi mar gzungs thung gtso bor bzla bar gsung snang /_'on kyang phyi ma'i rgyun shin tu dkon pas slar btsal lo/___/_!_ 'jam dbyangs smra seng 'di yig rnying rnams dang /_snar thang brgya rtsa'i rgya gzhung bcas su seng ge gdan thabs dang /_phyag g.yas ral gri phyar zhing /_g.yon ut+pal yu ba thugs kar bzung ba'i me tog snyan thad kha bye bar glegs bam mtshan pa kho na bshad/_dpa' bo bcu gnyis kyi rdzas gla ba zhes bshad/_phyis kyi yig char phyag chos 'chad sogs dang /_rdzas la a ba bshad pa re yang snang /_yig cha phyi mar/_ra dkar gyi 'o ma dbyangs can ma zhu ba dang /_ba dmar gyi 'o ma 'jam dbyangs zhu ba'i bdud rtsir bsams la sbrus zhes snang bas/_spro na 'o ma'i steng du lha so so bum bskyed ltar bskyed cing bzlas mthar 'od du zhu ba'i bdud rtsir bsam pa legs snyam/_sbrang rtsi dbang sdud kyi rdzas yin pas shes rab gtso bo byed pa la mi dgos zhes kha cig smra yang /_shes rab dbang du byed pa mtshon phyir bsre ba legs shing yig rnying du'ang 'byung /_snod las mthun gyi kha dog can gyi dbus su zangs sam/_tsan+dan nam/_shug pa'i ral gri sor bzhi pa bsgreng pa'i phyogs bzhir sngags bzla bzhin pas ril bu'i yi ge dbu phyir bstan brtsegs zhes bshad pa dang /_yang ril bu'i grangs nyis brgya bcu drug bya bar bshad pa snang bas rgyu mtshan brtag__/gsan yig la lar 'jam dpal yab yum rgyal chen bzhis bskor ba'i rjes gnang zhes snang ba de 'dra ba'i rgyun kyang yod par mngon/_rjes gnang kha cig tu tshig 'jam dkar ma ti lugs la dpe blangs pa'ang snang /_mjug tu bzlas lung dang /_yig rnying las bshad pa'i rjes sdud kyi rdzogs rim dmigs par 'bogs pa'i tshul kyang snang ngo /___/_!_ku ru kul+le zhes snga ma rnams kyis rigs byed mar bsgyur/_yid bzang rtse pas/_sa sgrog rigs su bsgyur bar snang /___/_!_kun dong zhes pa sgog skya/___/_!_ke'u zhes pa la las btsong dang /_kha cig ri sgog la ngos 'dzin/___/_!_cung seng zhes/_'phrog ma la cung seng sbyin pa zhes 'byung bas chang bu'i brda rnying yin/___/_!_kha sAR+pA Ni 'ga' zhig gis mkha' spyod du bsgyur/_khro los rgyu mtshan bcas mgron bu zad par bsgyur ro/_!___/la du ni/_mya ngan 'das chen las 'di ltar gsungs/_mar dang /_bag phye dang /_sbrang rtsi dang /_/bca' sga dang /_pi pi ling dang /_na le sham dang /_rgun 'bruM dang /_bal po'i se'u dang /_'u su'i 'bras bu la sogs pa rnams bsdus na la du zhes bya'o/_/zhes gsungs/___/_!_rab gnas skabs/_'dag chal gyi rdzas/_/sran dkar phye ma'am/_sug pa dkar po'i phye ma'am/_thal dkar rdo rje'i phye ma zhes gsungs pa gang rung gis chog par mngon/_shun lpags lnga ma 'byor na skyu ru ra'i phye mas chog par bshad/___/_!_gaN+Di'i rgyu/_pa la sha___/rgya skyegs shing /_a shat+tha/_pi ling shing /a shwa ta/_rgya star shing /_tsu ta/_a mra shing /___/_!_rdo ring dbon po mkhas btsun kun dga' rgyal mtshan yang dgung lo bcu gcig dus mnal lam du kun spangs rin po cher tshe sgrub zhus zer ba'i bskul ma byung ba ltar zhus pas/_kun spangs rjes kun mkhyen rong po nas brgyud pa'i tshe sgrub zhag bdun ma 'di chig brgyud du gnang /_sku tshe ring por yong ba'i lung bstan mdzad pa ltar dgung lo brgyad cu rtsa gsum du bzhugs shing /_mthar sku la bsnyun pa med par gshegs zhes 'byung /___/_!_dpal rdo rje gtum po thugs gsang ba'i rgyud las/_dbang lag__/lag pa chad pa sos/_chu srin sder mo/_sor mo/_nA ga ge sar/_byang chub kyi sems dran/_nA ga puSh+pa/_me tog gi tshal du 'gyur/_spos dkar/_dri nga ba spang zhing byang chub kyi sems dran/_'bras yos/_nad thams cad 'tsho/_thang ka__/mtshal dkar/_khrag skam pa pos/__rdo rgyus bya bal ma/_rgyus pa chad pa sos/_/spu shel rtse/_ga bur/_tsha ba'i nad sos/_dar le brgan/_khying ser 'jigs pa thams cad sel/_dung /_rus chag sos/_ras skud gsum/_tshe bsring /_mngar gsum bcas zhal zas ro brgya dang ldan par 'gyur/_sbyar ba klu sman gyi mchog tu gsungs shing /_so so'i phan yon dang bcas te bstan pa'i mthar/_de dag kun kyang rin po che'i bum pa'am kham phor lta bu mchu lnga par blugs nas sbas na gang nyams pa de sos par 'gyur ro/_/zhes gsungs/_yang de nyid las klu'i byad 'grol tshul 'di ltar gsungs te/_rtag tu skom chas gtor mas mchod/_/zhi bas dug dbyung byad kyang dgrol/_/rtsa ba'i dkyil 'khor phyogs bzhi ru/_/nA ga'i gzugs bris dug can bzhag__/tshon skud sbrul bsgom bcings pa de/_/spu gri 'bar bas gtubs shing dbye/_/ri rab chen po'i phyogs bzhi na/_/dug bzhi las skyes rigs bzhi'i klu/_/sa chu me rlung dug bzhi'i bdag__/bcings pa grol phyir dug dbyung phyir/_/dgu thub sgro la khyung bsam phyir/_/dug byabs sngags/_oM nyi ma sa la nAM/_g+hu ni zhi rtsi ta g+hu laM nAM/_tsi tra mu tra zlog byer/_tsi tra g+hu li nAM/_ya khra nA ga zlog__/nA ga shig__/nA ga mgo la nAM/_ha sa pa khre/_rang rang gnas su btang /_/bden pa bdar zhing ting 'dzin gsal/_/zhes so/___/_!_rdo rje bde khros kyi rgyud las/_bum par nor bu rin chen gzhung /_/mdzes pa'i dar sna 'bru yi mdzod/_/gang gi rten la sbas gyur na/_/gnod pa rags pa zhi bar 'gyur/_/zhes dang /_btsan dug gu gul gla rtsi dang /_/shu dag shing kun mu zi drug__/gsang sngags btab ste lus la byugs/_/gu gul nya mkhris gla rtsi dang /_/sgog pa shu dag dri chen rnams/_/bdug pa bya'am yang na bkru/_/gser g.yu byi ru mig ma dang /_/btsan dug rma bya'i mkhris pa dag__/bcangs na grub pa'i mchog tu 'gyur/_/zhes so/__/_!_gsang ba dngos bstan las/_bskyed pa'i rim la dmigs thob nas/_/snying gar ye shes sems dpa' bsam/_/de yi rang bzhin snying nang du/_/pad+ma 'dab bzhi thig les brgyan/_/nyi zla'i bar du rgya sran tshad/_/de yi nang du gnas pa'i srog__/a shad dmar mo'i rtse ltar bsgom/_/de la dmigs pa brtan pa dang /_/ci yang bsam par mi bya ste/_/bsam gyis mi khyab de bsam na/_/de las ye shes skye bar 'gyur/_/gsal zhing mi rtog rig pa'i sku/_/ye shes zhes ni de la bya/_/zhes so/__/_!_ rnam snang sgyu 'phrul drwa ba'i rgyud las/_brtan zhing dul la blo gros ldan/_/bzod ldan dran cing g.yo sgyu med/_/gsang sngags rgyud kyi sbyo_ra shes pas/_/dkyil 'khor 'bri ba'i las bya'o/_/de nyid bcu ni yongs shes shing /_/sems can kun la mi 'jigs sbyin/_/theg pa che la rtag dga' ba/_/de ni slob dpon yin par gsungs/_/zhes dang /_dge dang sdom la dga' ba dang /_/rtag tu bla ma la gus dang /_/rgyun du lha rnams mchod byed pa'i/_/yon tan ldan na slob ma yin/_/ces dang /_slob dpon ci 'dra blta zhe na/_/bla ma sangs rgyas kun dang mnyam/_/de nyid rtag tu rdo rje 'chang /_/de bzhin gshegs pa rin chen tog__/de ni ye shes rgya mtsho che/_/yid bzhin nor bu rin chen bzhin/_/slob dpon gyi ni yon tan bzung /_/skyon rnams nam yang ma yin no/_/yon tan bzung bas dngos grub cing /_/skyon rnams kyis ni dngos grub nyams/_/de yi grib ma'ang mi 'gom ste/_/mchod rten bshig dang 'dra bar gsungs/_/zhes dang /_de phyir kun gyis rab bsgrim ste/_/bsam yas 'bras bu smin byed pa'i/_/sangs rgyas 'bras bu 'dod byed pa'i/_/sems can dad dang ldan pas mchod/_/ces so/_/yang /_g.yas pas srung skud bcings nas su/_/lag mthil so shing ku sha sbyin/_/dang /_de la 'di ni skyabs su 'gro ba yin te/_dkon mchog gsum la skyabs su mchi/_/sdig pa thams cad bshags par bgyi/_/'gro ba'i dge la yi rang ste/_/sangs rgyas byang chub yid kyis bzung /_/zhes dang /_dang po sa gzhi yongs su bzung /_/gnyis pa la ni gnas pa ste/_/nub gsum pa la 'jug pa yin/_/zhes dang /_rdo rje ye shes thob byed pa'i/_/de bzhin gshegs pa thams cad kyi/_/pho brang snying po'i dkyil 'khor 'dir/_/bdag gis slob ma gzhug par bya/_/dang /_thur ma la sogs med na yang /_/phyag rgya'i gzugs rnams bstan par bya/_/zhes thur ma me long 'khor lo sogs dbang rdzas dmigs bsal ma rnyed na phyag rgyas chog par bshad/_de nas bla mas yon blangs te/_/sa dang yid 'ong chung ma dang /_/rin chen gser dang nor bu 'bar/_/mu tig byi ru la sogs dang /_/lus kyang dbul du gzhug par bya/_/bla ma la ni gus pa yi/_/slob mas de bzhin kho nar bya/_/bla ma mgu bas dngos grub ster/_/gzhan du min zhes thub pas gsungs/_/dang /_dkyil 'khor gyi ni yo byad kun/_/slob dpon nyid kyis bsdu bar bya/_/slob mas cung zad mi spyad do/_/de ni dam tshig nyams par 'gyur/_/slob dpon gyis kyang ci rigs par/_/bdag nyid 'dod pas spyad par bya/_/zhes dang /_gang zhig bcings pa tsam gyis ni/_/sdig pa kun las rnam grol zhing /_/'di na lus ni byin rlabs te/_/rang gi gzugs su rnam bsgom na/_/sangs rgyas nyid kyang thob 'gyur na/_/dngos grub gzhan lta smos ci dgos/_/dang /_oM badz+ra gaN+De ra Ni ta/_nas/_badz+ra d+harma hr-i da ya/_san+to Sha ni hU~M hU~M hU~M/_lag g.yas rdo rje gsor bya zhing /_/sna tshogs khugs su 'gyur ba yi/_/rdo rje'i glu yis bstod par bya/_/dang /_mi thod las byas cang te'u la/_/spre'u'i pags pas g.yogs nas ni/_/ngos gnyis la ni pad+ma bri/_/bud med khrag gis 'dzag par bya/_/de yi dkyil du phreM bris te/_/mi yi skra yis btags nas ni/_/mthing ril gyi ni rkang rus kyis/_/phreM hU~M ming nas brjod cing brdung /_/dang /_sbyin sreg de nyid la gnas pa'i/_/me ni lha yi zhal yin pas/_/sna tshogs las kun 'grub byed pa'i/_/sbyin sreg las ni rab tu bshad/_/sbyin sreg gis ni lha rnams tshim/_/tshim par gyur nas dngos grub ster/_/gsang sngags lhag chad gang yin pa/_/thams cad sbyin sreg dag gis skong /_/de phyir sku gsum mkhas mchog gis/_/sbyin sreg rab tu bsngags par mdzad/_/ces dang /_ku sha'i rtse mos gnon pa yis/_/thab khung khor yug bskor bar bya/_/me ni 'bar bar shes pa dang /_g.yas pas mi 'jigs mtheb bskyod cing /_/gsang sngags 'di yis cho ga bzhin/_/me yi lha ni spyan drang ngo /_/tshur spyon tshur spyon 'byung po che/_/lha yi drang srong bram ze mchog__/bsreg blugs zhal zas bzhes nas kyang /_/'di nyid du ni bzhugs su gsol/_/oM ag+na ye/_dI pya dI pya/_A be sha ma hA shrI ye/_ha bya ka bya/_bA hA nA ya swA hA/_sogs gsungs te/_'jig rten dang 'jig rten las 'das pa'i me lha gnyis ka spyan drangs rjes bskyed par gsungs so/___/_!_gshin rje dgra nag gi rgyud kyi le'u bdun pa las/_shes rab bskyed par bya ba'i phyir/_/zhal gsum phyag drug dmar ba la/_/zhi ba phyag na pad+ma bsnams/_/dbyangs can brtul zhugs can gyis bsgom/_/dang /_de nas bcom ldan 'das dam tshig chen po'i gshin rje'i gshed rdo rje shes rab kyi pha rol tu phyin pa zhes bya ba'i ting nge 'dzin la snyoms par zhugs nas rdo rje dbyangs can ma'i sngags gsungs pa/_oM pi tsu pi tsu pradz+nyA war+d+ha ni/_dz+wa la dz+wa la me d+ha war+d+ha ni/_d+hi ri d+hi ri bud+d+ha war+d+ha ni swA hA/_tshes kyi dang po nas bzung ste/_/kun tu zla ba nya yi bar/_/sbyar ba'i skad ni smra bar bya/_/ji srid zla ba'i rjes 'jug pas/_/rtag tu tshigs bcad brgya zin 'dis/_/ngag gi dbang phyug 'grub par 'gyur/_/khams gsum ma lus pa dag ni/_/ma lus lus pa med par 'grub/_/ces so/_/gshed dmar gyi rgyud kyi rim par phye ba gsum pa las kyang lha'i rnal 'byor ma bstan pa ma gtogs sngags kyi sbyor ba 'di kho na bzhin gsungs so/___/_!_gshed dmar rgyud bu 'gyur las/_skya ru ra'i phye ma dang /_'o ma la sogs pa bza' bar bya ste/_lo'i sbyor bas tshe brgya'o/_/dang /_skyu ru ra dang /_a ru ra dang /_bung ba'i rgyal po dang /_pi pi ling dang /_na le sham dang /_lcags kyi phye ma rnams sbrang rtsi dang /_sha kha ra dag gis u dum+WA ra'i 'bras bu'i tshad kyi ril bur bya'o/_/de nas ril bu bza' bar bya ste/_zla bas tshe lo sum cur 'gyur ro/_/dang /_thams cad du pha ma nyid lha'i rnam pas bza' bar bya'o/_/sngags kyis mnyes shing byin gyis brlab par bya'o/_/dang /_'bras bu gsum gyi phye ma dang /_mar dang sbrang rtsi rnams btung bar bya ste nad thams cad 'joms so/___/_!_rnam snang sgyu 'phrul drwa ba'i rgyud las/_gang zhig nor rdzas 'dod pa yis/_/gnod gnas 'di 'dra bsgom bgyis na/_/de yis sa chen nor rdzas kyis/_/ring por mi thogs gang bar 'gyur/_/zhes dang /_lag na rdo rje bdud rtsi yis/_/chu yang rtag tu dbul bar bya/_/dang /_gzugs 'od zer can/_brnyan mang po 'phro ba yis/_/sdang ba'i sems can bcings pa dang /_/mig dang kha ni 'drub par byed/_/dang /_dkyil 'khor dmar po ri khrod ma cher 'bar bas/_/khro bo'i sprin 'phro sdud mdzad cing /_/gdon gang skye rgu'i nang gnas pa/_/de dag khro bo'i mes kyang bsreg__/phyir yang bsregs nas sangs rgyas kyi/_/kha dog bdud rtsi char 'bebs mdzad/_/de 'dra rnal 'byor gyis bsgom na/_/mi ngas thams cad zhi bar mdzad/_/dang /_dzaHyi ye shes las bsgrubs pa/_/rig sngags mtshan ni dug sel ma/_/sogs nas/_phyag bzang bum pa zla 'dra ba'i/_/kha ni dza yis rnam brgyan pas/_/dug gis phog pa rnams la ldug__/rtag tu sku gsum dug sel ma/_/dug gis phog pa rnams la bsgom/_/de ltar bsgom par byas pa yis/_/ring por mi thogs byang chub thob/_/dang /_sa yi ye shes las bsgrubs pa/_/stong chen rab tu 'joms mdzad pa'i/_/lha mo nad kun 'phrog ma ste/_/sdang ba'i sems can 'joms mdzad ma/_/sogs phyag stong dbu stong dang /_phyag brgyad/_dbu bzhi'i bsgom tshul dang /_de yi las kyis bskul ba yi/_/gsang sngags dpa' bos gdon bar bya/_/rnal 'byor dbang phyug las 'dod pas/_/'di byas pas ni srung bar 'gyur/_/dang /_d+h+waM zhes bya ba bskyed pa yi/_/bsdigs pa'i mdzub mo'i phyag rgya can/_/drag mo chen mo zhal bzhi pa/_/spyan gsum phyag brgyad rnams kyis brgyan/_/ral gri gtun shing 'khor lo mda'/_/mdung rtse gsum pa rdo rje gzhu/_/chom rkun mdzub mos bsdigs pa ste/_/rdo rje ro langs 'byung ba dag__/mthong bas dpung rnams bcom gtong bas/_/lha mo rtag tu bsgoms na ni/_/ring por mi thogs byang chub thob/_/'jig rten gsum rnam par 'joms pa la mkhas pa mchog gi rdo rje rtse mo zhes bya ba'i ting nge 'dzin to/_/dang /_de nas bcom ldan 'das rnam par snang mdzad chen po rdo rje'i de bzhin gshegs pas/_brgya byin mngon par mtho ba'i stobs lha ma yin rnam par 'joms pas rnam par rgyal ba'i rdo rje zhes bya ba'i ting nge 'dzin la snyoms par zhugs nas rgyal mtshan gyi rtse mo'i dpung rgyan gyi gzungs chen po 'di gsungs so/_/oM b+ha ga wa tI d+h+wa dzA gra ke yU re pa ra sai n+ya/_bi d+h+wA n+sa na kA swA sai n+ya pa ri la ni/_u lu kA mu khi kha kha khA hi khA hi/_pa ra sai n+ya ma a nan+ta b+hu dze/_a nan+ta mu khe/_pra ha ra pra ha ra hU~M phaTa? phaTa? swA hA/_de nas rig sngags che gsungs pas/_/sangs rgyas zhing rnams g.yos par 'gyur/_/byang chub sems dpa' rab g.yos shing /_/bdud kyi sde rnams tshig par gyur/_/gnod sbyin srin po gos bral nas/_/'jigs shing skrag par gyur pa yis/_/gtso bo rdo rje rnam snang dran/_/dang /_/khu tshur gnyis las gung mo gnyis gshibs te bsgreng ba las rin po che'i tshul du bkug la mthe bong brkyang pa'i steng du mdzub mo gnyis gdu bu'i tshul du byas pa ni sangs rgyas 'khor lo can gyi phyag rgya g.yul las sgrol bar byed pa'o/_/gsungs te ting 'dzin sngags rgyas bstan la/_las kyi tshogs ni dmigs bsal med do/_/pra yi ye shes las bsgrub pa/_/stobs chen pha rol gnon mdzad ma/_/spyan gsum phyag brgyad g.yas pa na/_/ral gri 'khor lo mdung rtse gsum/_/mda' yis rnam brgyan phyag g.yon na/_/rdo rje zhags pa dgra s+t+wa gzhu/_/bsnams pas sdang ba'i bgegs lhung mdzad/_/bu mi 'tsho dang mo gsham dag__/gsang pa'i dkyil 'khor bcug nas su/_/lha rnams kun gyis bum pa 'dzin/_/slob dpon gyis ni dbang bskur zhing /_/de yi mngal du byis pa ni/_/'jam pa'i gzugs can 'jug par bsam/_/zhags pa'i phyag rgyas mtshan ngan nas/_/skyes pa'i gzugs can 'byung ba dag__/dran pa yis ni bral nas kyang /_/mngal ni bsod nams dag gis spel/_/mngal thams cad rnam par blta ba so sor 'brang ma'i ye shes rnam par rgyal ba'i rdo rje zhes bya ba'i ting nge 'dzin to/_/dang /_oM ma Ni d+ha ri badz+ra Ni ma hA pra ti sa ri swA hA/_zhes bstan/_oM ma hA sa ha sra pra mar+d+ha mar+d+ha nA ba ra sid+d+hiM da mI ge ma Ni badz+ra Ni hU~M phaT swA hA/_sogs stong chen rab 'byams kyi snying po gsungs/_ba yi ye shes rol pas bskrun/_/lha mo nor gyi blo gros ma/_/gzi chen gser gyi mdog can la/_/phyag drug lang tsho dar la babs/_/rgyan rnams kun gyis brgyan pa ste/_/'jo sgeg thabs bcas 'bar ba ste/_/de yi phyag g.yas mchog sbyin mdzad/_/gnyis pas 'bru yi snye ma dang /_/gsum pa yis ni mda' yang gsor/_/phyag g.yon yid bzhin nor bu dang /_/rin chen char 'bebs gzhu yang 'dzin/_/grogs mo'i skye bos yongs bskor cing /_/mngags gzhug gnod sbyin me yi gzugs/_/rin chen char pa 'bebs pa dang /_/nor kun gyi ni char pa yang /_/'bebs par byed pa bsam par bya/_/nor gyi blo gros chen mo 'di/_/de ltar sngags pas bsgom na des/_/dpag tshad bdun ni rgyas par yang /_/nor gyi char gyis khyab par mdzad/_/byang chub shing mchog dam pa na/_/de ltar rnal 'byor bdag nyid bsgom/_/nor gyi rgyun gyi char rab tu 'bebs pa'i ye shes kyi rdo rje zhes bya ba'i ting nge 'dzin to/_/dang /_oM ba su d+hA ri ma hA ba su d+hA ra dr-iSh+ta ni pA ta ni ba su swA hA/_dang /_bcom ldan nor rgyun zhes bya ba'i/_/mtshan ni mi mchog sgrogs bgyid na/_/de la nor gyi char 'bab cing /_/nor chen dang ni ldan par bgyi/_/gsungs/_oM pi shA tsi pa Na sha ba ri/_sarba mA ri pra sha ma ni hU~M phaT/_dang /_nam mkhar kun nas rig sngags kyi/_/rgyal mos legs par bkang nas su/_/bdud rtsi'i char 'bebs bsam na ni/_/mod la gnod pa zhi bar 'gyur/_/zhes gsungs so/_/bde ba las 'khrungs rdo rje 'chang ba yi/_/dngos po dngos med 'byung gnas chen por mkhyen/_/dang po gang du rnam par snang mdzad ni/_/dag cing dri med blos ni oM du sprul/_/gzugs mang tshul gyis phreng bas bskor ba yi/_/sgyu 'phrul drwa ba khyod la phyag 'tshal lo/_/zhes so/_/yang thog mar/_de la re zhig dang po dngos grub ni slob dpon chos kyi rjes su 'brang ba yin pas/_slob dpon med par gyur na ni/_/dngos grub thob par mi 'gyur bas/_/slob dpon mtshan nyid bshad par bya/_/ye shes snying po khyod nyon cig__/brtan zhing sogs so/__/_!_sprin chen las klu la bde ba sbyin pa'i gzungs ni/_tad+ya thA/_d+hA ra NI d+hA ra NI/_ut+tA ra Ni/_saM pra tiSh+Tha te/_bi dza ya wa r+Na/_sat+ya pra ti dz+nyA sa ra ha/_/dz+nyA na ba ti/_ud de pA da ni bi nA ma ni/_a b+hi She tsa ni/_a b+hi bya hA ra/_shu b+ha ba ti/_a dzi ma tu/_e hi ku ma ba la nI/_ba ha hA ra kle sha na/_d+hu na pA paM/_sho b+ha ya marga Na/_ni ra ti ka__/d+harma ta shud+d+ha/_lo ka bi ti mi ra ra tsa sa/_duHkha sha ma na sarba bud+d+ha a wa lo ka na a d+hiSh+Thi te/_pradz+nyA dz+nyA na bi swA hA/_'dis klu thams cad kyi sdug bsngal rgyun gcod/_bde ba sbyin/_char 'bebs/_lo tog skyed pa sogs yon tan rgya cher bsngags so/___/_!_gza' yum gyi gzungs la/_lag na rdo rje gza' rnams kyi yum zhes bya ba'i gzungs sngags kyi tshig 'di dag ston zla tha chung smin drug zla ba'i yar ngo'i tshes bdun nas brtsams te/_gso sbyong blangs nas tshes bcu'i bar du nyin gcig bzhin mchod cing brjod par byas nas nya la nyin thog thag bklag na de la lo dgu bcu rtsa dgu'i bar du 'chi ba'i 'jigs pa 'byung bar mi 'gyur ro/_/skar mda' lhung ba dang /_gza' dang rgyu skar gyis gdungs pa'i 'jigs pa 'byung bar mi 'gyur ro/_/zhes sogs gsungs/__/_!_yon tan bsngags pa dpag tu med pa'i gzungs ni/_dkon mchog gsum la phyag 'tshal lo/_/na mo rat+na tra yA ya/_na mo b+ha ga wa te/_a mi ta b+hA ya/_ta thA ga tA ya/_ar+ha te samyak+saM bud+d+hA ya/_tad+ya thA/_oM a mi te/_a mi tot+b+ha we/_a mi ta saM b+ha we/_a mi ta bikrA n+te/_a mi ta ga mi ni/_ga ga na kIrti ka re/_sarba kle shak+Sha yaM ka ri swA hA/_'di lan gcig brjod pas bskal pa 'bum gyi sdig sgrib byang ba sogs dang /_lan sum 'bum bzlas brjod byas na de bzhin gshegs pa 'od dpag med mthong bar 'gyur ro/_/gsungs/_snang ba mtha' yas rjes su dran pa'i gzungs la/_bcom ldan 'das/[ + ]sangs rgyas snang ba mtha' yas la phyag 'tshal lo/_/tad+ya thA/_a mi te/[ ++ ]krAn+ta ka re/_a mi ta ga ga na/[ +++ ]swA hA/_yang gcig la/_bi krAn+ta yan 'dra ba la/_gA mi ni/_ga ga na sogs gsungs so/_/rgyal mtshan rtse mo'i dpung rgyan gyi gzungs/_tad+ya thA/_oM dza ya dza ya sogs/_rgyal mtshan rtse mo'am/_mgul du btags na mi'i rgyal po dang skyes bu dpa' bo thams cad srung bar byed do zhes gsungs/___/_!_mig nad rnam par sbyong ba'i rig sngags/_tad+ya thA/_hi li mi li/_ki li mi li/_hi li te mi li/_hu yA hu yA hu yA ma ni/_hu lu hu lu hu lu/_hu du hu du hu du/_tsak+Shur me bi shod+ha ya swA hA/___/_!_dpa' bo gcig grub las/_oM pad+me pad+ma ak+Shi pad+ma su b+ha ge phuH__pad+me pad+ma/_ak+She pad+ma/_su b+ha ge phu swA hA/_'dis byabs pas mig rengs pa sos/___/_!_mig nad zhi ba'i gzungs/_tad+ya thA/_ru d+hi re phuH__ru d+hi ra ak+Shi phuH__ru d+hi ra peM ga le phuH__ba te phuH__ba ti le phuH__han+te phuH__mA~M sa dun+d+hu b+hi phuH__pad+ma ak+Shi phuH__pad+ma daN+Da hi ra NI ye phu swA hA/_'di srad bu dkar por lan bdun bzlas te mdud pa bor ba gdags/_tshul bdun bzlas te byabs/___/_!_dkon mchog gsum la phyag 'tshal lo/_/'phags pa 'od dpag tu med pa la phyag 'tshal lo/_/tad+ya thA/_i li mi ti mi li/_ha ne su ha ne/_ch+gai mo zhig dz+wa ra ban+d+hA mi/_e ka ri kaM_/tri ri kaM_/tsa turbad kaM_/nir+ya dz+wa raM swA hA/_'di mgul du btags na rims nad med par byed/___/_!_nam snying mtshan brgya'i gzungs/_oM swa sti ka ma lAk+Shi bi pu la saM b+ha wa/_d+harma d+hA tu go tsa ra swA hA/_phyag rdor mtshan brgya/_oM badz+ra tsaN+Da sarba duSh+tan ta ka ha na da ha pa tsa hU~M pha?T/___/_!_sgrib sel mtshan brgyar/_oM a mr-i ta bin+d+hu dza ba ma hA su kha swA hA/_'di gang gi rna lam du grags pas sgrib pa thams cad sel bar gsungs/_sku gdung dang bcas pa'i mchod rten la tshes brgyad bco lnga gang rigs smyung bar gnas pas/_spos sogs kyis mchod cing bskor ba dang bcas bzlas na dam pa ci 'dod thob cing sdig pa dang sdug bsngal 'jigs pa thams cad las thar bar gsungs/___/_!_sa snying /_oM sum+b+ha ni sum+b+ha/_ha ra tsa ra/_ma hA pA sha ma ru tA/_a mo g+ha badz+ra sa twA sA hA/___/_!_bdud rtsi 'byung ba la/_oM a mr-i te hU~M/_dang /_na maHsarba sogs nam mkha' mdzod kyi sngags gsungs/___/_!_kha 'bar ma'i gzungs las/_na ma s+sarba ta thA ga ta a wa lo ki sogs gsungs/___/_!_'jur gegs kyi gzungs las/_oM dz+wa la mi daM sogs gsungs/___/_!_ye shes skar mda'i gzungs las/_oM dz+nyA na a wa lo ki te sa man+ta s+pha ra Na ra smi b+ha ba sa ma ya ma hA ma Ni du ru du ru hri da ya dz+wa la ni hU~M/_zhes pa'i chu sbyin gsungs/___/_!_phyag rdor bar chad sel ba'i gzungs ni/_oM badz+ra tsaN+Da ma hA ro Sha Na hU~M phaT/_a pra ti ha ta pha la hU~M pha?T/_sarba big+d+hAM an+ta rA ya bi nA sha ka ra mA ra ya hU~M phaT/_brgya rtsa brgyad bzlas na gshis ngan du 'chi ba bcu gsum gyis mi tshugs/_'dzin 'chang bzlas pas bgegs thams cad kyis glags mi rnyed pa dang /_sgrib pa thams cad byang ba sogs mtha' yas par gsungs so//___//_!_ kun mkhyen chos 'byung dang kun khyab dpon slob bka' 'gros nas bkod pa'i grub brgya'i bkod yig nyung ngu zhig yod pas/_rjes gnang gi skabs kyang mngon rtogs de ltar yod/_tA ra'i grub brgya'i bkod yig kyang yod pas slar btsal gsungs/___/_!_jo lugs gsang 'dus 'jam rdor spar ma la yi ge ma dag pa re zung yod/_rnam snang gi sngags chad pas/_oM AHdzi na dzikra brUM hU~M/_zhes sbyar dgos so/_/dkyil 'khor gyi gtso bo mi bskyod pa dang 'jam dpal dbyer med yin cing /_sngags kyang /_many+dzu badz+ra zer ba 'di yod pa yin gsungs so/_/de yang /_dzi na dzika? 'byin sngags/_brUM sa bon/_de dag 'bru gsum dang spel ba'o/_/rdo rje slob dpon gyi dbang gi skabs su brtan byed chu dbang zhig bskur gsungs pa de ni nges par dgos/_rig dbang lhag ma rnams bskur gsungs pa na bod snga ma'i rjes su 'brangs nas sor bzhag mdzad pa ma gtogs rang bzhed dang rgya gar pa'i lugs min te/_rgya gar pa'i lugs la slob dpon byed mi nus pa rnams rig dbang lnga slob ma'i don kho nar zhu mkhan yod pas/_des slob dpon gyi rig dbang gi go mi chod pas/_dbang thog mar zhu dus nas rig dbang lnga yongs rdzogs rdo rje slob dpon du bsgrubs pa'i ched du zhu ba zhig dgos pas/_mar me mdzad bzang pos bzhi brgya lnga bcu pa las/_rdo rje slob dpon gyi dbang gi skabs su/_sngar bzhin rig dbang lnga bskur zer ba'ang de la dgongs/_bod 'dir ni dbang bzhi yongs rdzogs stan thog gcig tu bskur ba'i phyir de 'dra'i tha snyad med do/___/_!_bod yig srong btsan gyi dus thon mis thog mar mdzad/_de nas mi'i ag tshom gyi dus gtsang pa dge bsnyen dkon mchog 'bangs zhes bya ba dang /_khri srong gi dus b+he sho khram zer ba sogs dang /_khri ral gyi dus gra shod rnam gnyis zhes sogs byung /_phyi dar gyi dus lo chen shAkya rdo rje bya ba dang /_lhag par mkhas pa ka khyung gnyis/_de las kyang khyung po phul du byung bas bod kyi yig dpon byas par grags/_slob ma'ang bu chen bcu gnyis sogs byung ba las/_mkhas pa rong po nyid mchog tu gyur pa'o/_/zhes skad do//___//_!_ rnal 'byor ma'i bskyed rdzogs dang gsang 'dus rim lnga dod thub sbyar na/_'gro ba dag pa'i rnal 'byor dang /_khyad par lus dkyil thun mong ma yin pa'i gsal snang grub pa la brten nas rlung sems 'jug pa gcig pas snang ba lha skur rang shar ba lus dben/_rdzogs rim rtsa dbu ma kha dbye nas rlung dbu mar zhugs gnas thim gsum sgrub nus pa ngag dben/_rlung lus la zhugs pas stong gzhi'i 'od gsal 'dren pa sems dben/_sems la zhugs pa'i stong nyid las lha sku 'ja' tshon lta bur ldang bas sgyu lus/_de nyid stong par zhugs pas 'od gsal/_khyad par bsam mi khyab pa dus tshod ma yin pa'i sdud rim la brten nas 'od gsal dang zung 'jug gnyis ka 'grub pa'i gnad sogs rgyas par sbyar du yod kyang yi ge nyung ngus mtshon dka' bas sa bcad tsam zhus pa zhib dpyod gnang bas mkhyen par 'gyur ba lags shing /_gzhan yang lU hi pa'i rdzogs rim rnal 'byor chen po/_dril bu rim lnga/_nag po rim bzhi sogs dang sbyar tshul zhwa lu rdo rje 'chang nas rgya cher gsungs pa thos lags//____//