JKW-KABUM-14-PHA-021-001

🚧 This website is under continued development. We appreciate your patience!

First text in section. Back to Volume PageNext Text

Wylie title
Location	mkhyen brtse'i bka' 'bum Volume 14, sde tshan 21, Text 1, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yak+sha dzam+b+ha la ljang gu'i gtor 'bul 'dod rgu'i snying po. In 'jam dbyangs mkhyen brtse'i dbang po'i bka' 'bum, Vol. 14: 319-323. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

1 325-343	གྲུབ་མཆོག་རྣམས་ལ་བརྟེན་པའི་བླ་མའི་རྣལ་འབྱོར་བྱིན་རླབས་སྤྲིན་གྱི་རྔ་དབྱངས། grub mchog rnams la brten pa'i bla ma'i rnal 'byor byin rlabs sprin gyi rnga dbyangs Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

གྲུབ་མཆོག་དཔའ་བོ་འོད་གསལ་ལུགས་ཀྱི་གྲུབ་བརྒྱའི་བླ་མའི་བྱིན་རླབས་སྤྲིན་གྱི་རྔ་དབྱངས།

༄༅། །གྲུབ་མཆོག་རྣམས་ལ་བརྟེན་པའི་བླ་མའི་རྣལ་འབྱོར་བྱིན་རླབས་སྤྲིན་གྱི་རྔ་དབྱངས་ཞེས་བྱ་བ་བཞུགས་སོ། །

ན་མོ་གུ་ར་བེ། །ཟུང་འཇུག་གྲུབ༷་པའི་བདུད་རྩིས་ཡིས། །བདེ༷་ཆེན༷་རྡོ་རྗེའི་ས་བརྙེས་པའི། །རྗེ་བཙུན་མཆོག༷་རྣམ༷ས་ལ་བཏུད་ནས། །བྱིན༷་རླབ༷ས་སྤྲིན༷་གྱི༷་རྔ༷་དབྱང༷ས་ལེན། །འདིར་གྲུབ་པའི་དབང་ཕྱུག་ཆེན་པོ་དཔལ་ས་ར་ཧ༡། ཀླུ་སྒྲུབ༢། ཤ་བ་རི་པ༣། ནག་པོ་སྤྱོད་པ༤། བི་རཱུ་པ༥། ཌོམྦྷི་ཧེ་རུ་ཀ༦ །ལཱུ་ཡི་པ༧། གཽ་རཀྵ་༨ནཱ་ཐེ། ཏནྟི་པ༩། རྡོ་རྗེ་དྲིལ་བུ་པ༡༠། ཛ་ལནྡྷ་རི་པ༡༡། ཀུཀྐུ་རི་པ༡༢། ལཱ་ཝ་པ༡༣། ཨིནྡྲ་༡༤བྷུ་ཏི། པདྨཱ་༡༥ཀ་ར། ནག་པོ་བི་རཱུ་པ༡༦། ཏིལླི་པ༡༧། ནཱ་རོ་པ༡༨། ཤཱནྟི་པ༡༩། ཤྲཱི་ས་ཐ་ནཱ་རྦ་ཤཱནྟི་གུཔྟ༢༠། ཤྲཱི་བུདྡྷ་གུཔྟ་༢༡སོགས་ལ་བརྟེན་པའི་བླ་མའི་སྒྲུབ་ཐབས་ཟབ་མོ་ནི། གནས་དབེན་པར་ཕྱི་ནང་གི་མཆོད་པའི་ཡོ་བྱད་དང་། མཎྜལ་གྱི་ཡོ་བྱད་སོགས་མངོན་པར་འདུ་བྱས་ལ། སྐྱབས་འགྲོ་སེམས་བསྐྱེད་ཚད་མེད་བཞི་སྔོན་དུ་འགྲོ་བས་གཙང་མའི་ས་གཞིའི་མཎྜལ་ལ་བྱི་དོར་བྱས་ལ། ཨོཾ་བཛྲ་བྷཱུ་མི་སྭཱ་ཧཱ། ཞེས་སྐྱོན་སྦྱངས། ཨོཾ་བཛྲ་རེ་ཁེ་ཧཱུྃ་སྭཱ་ཧཱ། ཞེས་དྲི་བཟང་དང་བ་བྱུང་གིས་སྐྱང་ནུལ་བྱས། དེའི་དབུས་སུ་ལག་པ་གཡས་པས་མེ་ཏོག་གསར་པའི་ཚོམ་བུ་བཀོད་ལ། ཧཱུྃ་སུ་མེ་རུ་མ་དྷེ་མ། ཤར་དུ་བཀོད་ལ། ཡ་པཱུརྦ་བི་དེ་ཧ་དྭི་པ། ལྷོར་བཀོད་ལ། ར་ཛཾ་བུ་དྭི་པ་དཀྵིཎ། ནུབ་ཏུ་བཀོད་ལ། ཝ་གོད་ནཱི་ཡ་པཤྩི་མ་དྭི་པ། བྱང་དུ་བཀོད་ལ། ལ་ཨུཏྟ་ར་ཀུ་རུ་དྭི་པ། ཤར་གྱི་གཡས་གཡོན་དུ་བཀོད་ལ། ཡཾ་ཡཿདེ་ཧཤྩ་བི་དེ་ཧ། ལྷོའི་གཡས་གཡོན་ཏུ་བཀོད་ལ། རྃ་རཿཙ་མ་ར་ཤྩ་ཨ་པ་ཙ་མ་ར༔ ནུབ་ཀྱི་གཡས་གཡོན་དུ་བཀོད་ལ། ཝཾ་ཝ་ཤ་ཋཤྩ་ཨཏྟ་ར་མཏྟྲིཎཿ བྱང་གི་གཡས་གཡོན་དུ་བཀོད་ལ། ལཾ་ལཿཀུ་ར་ཝཤྩ་ཀཽ་ར་ཝཱ། ཤར་གྱི་ཤར་དང་ནུབ་ཀྱི་ནུབ་ཏུ་བཀོད་ལ། ཙནྡྲ་སཱུཪྻ་བྷུ་ཥི་ཏ། ཞེས་བརྗོད་ནས། རིན་ཆེན་སྣ་ཚོགས་རང་བཞིན་ནི། །རི་རབ་ལྕོགས་བརྒྱད་ཡང་དག་ལྡན། །གླིང་བཞི་གླིང་ཕྲན་ལྡན་པ་འདི། །འབུལ་གྱིས་ཡང་དག་བཞེས་སུ་གསོལ། །ཞེས་མེ་ཏོག་དོར། མཎྜལ་གྱི་དབུས་སུ་དག་པ་ཡེ་ཤེས་ཀྱི་ཞིང་ཁམས་རྒྱ་དང་ཚད་ཡོངས་སུ་ཆད་པ་མེད་པ་རྒྱན་བཀོད་པ་ཕུན་སུམ་ཚོགས་པ་དང་བཅས་པ་ཕྱི་རོལ་བསྲུང་བའི་འཁོར་ལོ་གཞོམ་དུ་མེད་པས་ཡོངས་སུ་བསྐོར་བའི་སྙིང་པོ་གཞལ་མེད་ཁང་དང་བཀོད་པ་ཕུན་སུམ་ཚོགས་པ། དུར་ཁྲོད་རོལ་པའི་ཡོ་བྱད་དང་ལྷ་རྫས་ཀྱི་ཉེར་སྤྱོད་མཐའ་ཀླས་པས་བརྒྱན་པའི་དབུས་སུ་ཀྲྀཥྞ་སཱ་རའི་པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་དཔལ་༡ས་ར་ཧ། སྐུ་མདོག་དཀར་དམར་བྲམ་ཟེའི་ཆ་བྱད་ཅན། བགྲེས་རྒུད་སྤངས་པའི་ལང་ཚོ་འགྱུར་བ་མེད་པའི་གང་བ་ལ་རྟག་ཏུ་གནས་པ། དབུ་སྐྲ་ཅོ་བྲེགས་རས་དམར་པོའི་ཨངྒ་རག་གསོལ་ཞིང་། ཕྱག་གཉིས་གཉུག་མའི་གནས་ལུགས་མཚོན་པར་བྱེད་པའི་མདའ་བསྲོང་བའི་ཕྱག་རྒྱ་ཅན། ཞབས་ཕྱེད་ཀྲུང་དུ་བཞུགས་པའི་གཡོན་ནས་རིག་མ་ཡེ་ཤེས་ཀྱི་རྣལ་འབྱོར་མ་མདའ་མཁན་མོའི་ཚུལ་ཅན་གྱིས་བརྟེན་པ། ལྷན་ཅིག་སྐྱེས་པའི་བདེ་བ་ཆེན་པོའི་ཡེ་ཤེས་ཀྱི་གཟི་འོད་ཕྱོགས་བརྒྱར་འབར་བས་བཟོད་པར་དཀའ་བའི་ཟིལ་ཅན་ཉི་མའི་སྙིང་པོ་ལྟ་བུ། །སྲིད་པ་གསུམ་ཟིལ་གྱིས་གནོན་པའི་ལྟ་སྟངས་ཀྱིས་རབ་ཏུ་དཔའ་བའི་ཉམས་ཅན། ཐུགས་གཉིས་སུ་མེད་པའི་ཡེ་ཤེས་ཕྱག་རྒྱ་ཆེན་པོ་ཆོས་ཀྱི་སྐུ་ལ་རྟག་ཏུ་མཉམ་པར་བཞག་པས། ལྷུན་གྱིས་གྲུབ་ཅིང་རྒྱུན་མི་ཆད་པའི་ཕྲིན་ལས་ཀྱི་རྣམ་པར་རོལ་པ་ཟད་མི་ཤེས་པ་ཅན། དཔའ་བོ་དང་ཌཱ་ཀི་རྒྱ་མཚོ་ལྟ་བུས་མཆོད་ཅིང་བརྗོད་པ་དང་། ས་གསུམ་གྱི་དབང་པོ་རྣམ་ཀྱིས་རི་མོར་བྱེད་བཞིན་པའི་སྐུ་ཅན་གྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དམ་ཚིག་པ་དང་ཡེ་ཤེས་པ་གདོད་ནས་དབྱེར་མི་ཕྱེད་པ། དངོས་དང་བརྒྱུད་པའི་བླ་མ་ཀུན་འདུས། ཡི་དམ་ཞི་ཁྲོ་རབ་འབྱམས་ཀུན་འདུས། །སངས་རྒྱས་ཆོས་དང་དགེ་འདུན་ཀུན་འདུས། མཁའ་འགྲོ་ཆོས་སྐྱོང་སྲུང་མ་ཀུན་འདུས། བརྟན་གཡོའི་ཁྱབ་བདག །འཁོར་འདས་ཀྱི་དཔལ་མགོན་སྐྱབས་གནས་ཀུན་གྱི་སྤྱི་གཟུགས་ཆེན་པོར་མངོན་སུམ་དུ་བཞུགས་པར་གྱུར། །ཨོཾ་ཨཱཿདཔལ་ལྡན་རྡོ་རྗེ་བླ་མ་དམ་པའི་ཞབས་ཀྱི་པདྨོ་ཡང་དག་པའི་ཡེ་ཤེས་གསལ་བར་བྱེད་པ་དེ་ལ་ཕྱག་འཚལ་ལོ་ཧཱུྃ་ཨ་དྱ་སིདྡྷྱཱ་མཱཾ། ཞེས་ལན་མང་དུ་ཕྱག་བྱ། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །མདའ་བསྣུན་ཁྱོད་ཞབས་པད་ལ་འདུད། །རྒྱལ་བ་ཀུན་དངོས་བླ་མ་ལ། །སོགས་ཡན་ལག་བདུན་པ་ཅི་མང་དང་། ཐུན་མོང་གི་མཎྜལ་སྤྱི་ལྟར་རྒྱས་བསྡུས་ལན་མང་དུ་ཕུལ་རྗེས་ནང་གི་མཎྜལ་ནི། སྐད་ཅིག་གིས་ཡེ་ཤེས་ཀྱི་རལ་གྲི་རྣོ་ངར་དང་ལྡན་པ་ལག་ཏུ་བྱུང་། དེས་རང་ལུས་དུམ་བུར་བྱས་ནས་མཎྜལ་དུ་བཀོད་པར་གྱུར། ཧཱུྃ་མསྟ་ཀ་སུ་མེ་རུ། ཡ་བཱ་མ་པཱ་ད་བི་དེ་ཧཿ ར་ཧི་ན་པཱ་ད་ཛམྦུ་དྭི་བ། ཝ་པཤྩི་མ་དྭི་པ་ཧི་ན་ཧསྟ། ལ་བ་མ་ཧསྟ་ཀུ་རུ་ཨུཏྟ་ར། ཤཱུ་ཏྲ་ཀུ་སུ་མ་ཙནྡྲ་སཱུརྱ་བྷུ་ཥི་ཏམ། ཞེས་ཚོམ་བུ་བཀོད་པར་མོས་ལ། ཨི་དམ་གུ་རུ་རཏྣ་ཨཱཏྨ་ན་མ་ཀཱ་ཡ་མཎྜ་ལ་ནིཪྻ་ཏ་ཡ་མི། ཞེས་དབུལ་ཞིང་སླར་ཡང་། རང་ལུས་རྣམ་སྨིན་ཕུང་པོའི་ཀ་པཱ་ལ། །ལིང་ཀྱིས་ཕོག་དབུས་ལྷག་མའི་ལུས་ཕུང་རྣམས། །རིལ་པོར་བཅུག་པས་ཡི་གེ་འབྲུ་གསུམ་གྱིས། །སྦྱངས་རྟོགས་སྦར་བཞུ་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ་ཧ་ཧོཿཧྲཱིཿ ལན་མང་དུ་བརྗོད། ལྗགས་རྡོ་རྗེའི་འོད་ཟེར་གྱི་སྦུ་གུས་གསོལ་བར་གྱུར་པར་བསམས་ལ། ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་དཔལ་ལྡན་བླ་མ་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ཨོཾ་ཨཱཿཤྲཱི་མན་སངྒུ་རུ་མ་ཧཱ་སིདྡྷི་མཱནྡྷ་ས་ར་ཧ་ས་པཱ་རི་ཝཱ་རེ་བྷྱཿ ཨི་དཾ་བ་ལིཾ་ག་ཎ་ཙཀྲ་མ་ཧཱ་པཱུ་ཛ་ཁཱ་ཧི། སརྦ་སིདྡྷི་མྨེ་པྲ་ཡ་ཙྪནྟུ། ཞེས་དང་། གཞན་ཡང་ཕྱི་ནང་གི་མཆོད་པ་ཅི་འབྱོར་པས་མཆོད་ཅིང་། མཚན་ཉིད་དང་ལྡན་པའི་རིག་མ་ཕུལ་བར་མོས་ལ། ལྷ་མོ་འདི་དག་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རིགས་ལྔ་ལས་བྱུང་འདི་ཕུལ་བས། །རིག་པའི་བརྟུལ་ཞུགས་མཐར་ཕྱིན་ཤོག །ལྷ་དང་མི་ཡི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་པའི། །དགའ་བ་བླ་ན་མེད་པས་མཆོད། །ཅེས་གསང་བའི་མཆོད་པ་བྱ། དེ་ནས་ཡན་ལག་བདུན་པ་དང་བསྟོད་པའི་རིགས་ཅི་ཤེས་དང་། ཨཱཏྨ་ནཱཾ་སུ་ཁ་དུཿཁ་ཏེ་མཻཛྙཱ་ནེ། སུ་ཁ་ཀི་དུཿཁ་ཏོ་མ་ཐི་ན་སྠི་ས་ར་ཧ་ན་མོ་སྟུ་ཏི། ཞེས་པའམ་བོད་སྐད་དུ་བསྒྱུར་ན། བདག་གི་བདེ་སྡུག་ཁྱེད་ཀྱིས་མཁྱེན་ནོ། །བདེའམ་སྡུག་ཀྱང་རུང་ཁྱོད་ལས་གཞན་མ་མཆིས་སོ། །ཕྱག་འཚལ་ཞིང་འདུད་དོ་ས་ར་ཧ། ཞེས་པ་གང་རིགས་ཀྱིས་དྲག་ཏུ་གསོལ་བ་གདབ་ཅིང་། གུ་རུ་མ་ཤ་ར་ཎཱཾ་གཙྪ་མི། ལན་མང་དུ་བརྗོད། ཨོཾ་ཨཱཿམ་ཧཱ་སིདྡྷི་ལབྡྷ་ས༵་ར༵་ཧུ༵་པཱ༵་ད་ཧཱུྃ་ཧཱུྃ། ཞེས་པའི་མཚན་སྔགས་ཀྱང་ཅི་ནུས་སུ་བཟླ་ཞིང་། མཐར། བླ་མ་གྲུབ་བརྙེས་རྣལ་འབྱོར་དབང་ཕྱུག་གི །སྐུ་ལ་རྩ་གསུམ་འཁོར་ལོ་ལྔ་གསལ་བའི། །གཡོན་ཕྱོགས་རྐྱང་མ་དང་འབྲེལ་ཀུནྡའི་ཁམས། །སྐུ་ཡི་བྱིན་རླབས་བདུད་རྩི་འོད་དཀར་ཚུལ། །སྨིན་མཚམས་ནས་བྱུང་རང་གི་དཔྲལ་བར་ཐིམ། །ལུས་ཀྱི་སྒྲིབ་དག་བུམ་དབང་ཐོབ་པར་གྱུར། །གཡས་ཕྱོགས་རོ་མ་དང་འབྲེལ་རྡུལ་གྱི་ཁམས། །གསུང་གི་བདུད་རྩི་འོད་དམར་ཚུལ་དུ་བྱུང་། །མགུལ་བའི་གནས་ནས་བདག་གི་མགྲིན་པར་ཐིམ། །ངག་གི་སྒྲིབ་དག་གསང་བའི་དབང་བསྐུར་ཐོབ། །ཨ་ཝ་དྷུ་ཏི་མུན་ཅན་དྭངས་མའི་ཚུལ། །ཐུགས་ཀྱི་བྱིན་རླབས་བདུད་རྩི་འོད་མཐིང་བཅས། །ཐུགས་ཀའི་གནས་ནས་སྙིང་གར་ཐིམ་པ་ཡིས། །ཡིད་ཀྱི་སྒྲིབ་དག་ཤེས་རབ་ཡེ་ཤེས་ཐོབ། །བླ་མ་འོད་དུ་ཞུ་ནས་རང་ལ་ཐིམ། །གཉིས་མེད་བསམ་བརྗོད་བྲལ་བའི་ངང་ལ་བཞག །སྒོ་གསུམ་འཕོ་བའི་སྒྲིབ་དག་ཚིག་དབང་ཐོབ། །བླ་མ་རང་སེམས་ཐ་མི་དད་དུ་འདྲེས། །ཨེ་མ་མ་ལ་དུས་གསུམ་དགེ་བ་འདིས། །བདག་དང་མར་གྱུར་མཐའ་ཡས་སེམས་ཅན་ཀུན། །གྲུབ་པ་མཆོག་གིས་རྟག་པར་རྗེས་བཟུང་ནས། །ཕྱག་རྒྱ་ཆེན་པོའི་དངོས་གྲུབ་ལ་རེག་གྱུར། །ཅེས་སོགས་བསྔོ་སྨོན་ཤིས་བརྗོད་ཀྱིས་མཐའ་བརྒྱན་ནོ། ། ༈ དེ་བཞིན་ཏུ་གཞན་འདྲ་བ་ལ། མངོན་རྟོགས་ཀྱི་སྐབས། པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་དཔའ་མགོན་འཕགས་པ་ཀླུ་སྒྲུབ་༢སྐུ་མདོག་སྔོ་སངས་ནོར་བུའི་ཁ་དོག་ལྟ་བུ་དྭངས་ཤིང་དྲི་མ་མེད་པ། མཚན་དང་དཔེ་བྱད་ཀྱིས་སྤྲས་ཤིང་ཕྱག་གཉིས་ཆོས་འཁོར་གྱི་ཕྱག་རྒྱ་ཐུགས་ཀར་འཆིང་བ། ན་བཟའ་ཆོས་གོས་གསུམ་དང་བཅས་ཤིང་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཤཾ་ཁ་ལ་སོགས་པའི་ཀླུའི་རྒྱལ་པོ་མཆོག་རྣམས་སྦྲུལ་གྱི་རྣམ་པས་གདེངས་ཀའི་གྲིབ་མ་འབུལ་བ་ལ་སྐུ་རྒྱབ་བརྟེན་པ། ཐུགས་གཉིས་སུ་མེད་པའི་ཡེ་ཤེས་མན་ཆད་གོང་བཞིན་ལ། བསྟོད་པའི་སྐབས། ནཱ་གརྫུ་ནའི་ཞབས་ལ་འདུད། མཚན་སྔགས་ཀྱང་ས་ར་ཧའི་ཚབ་ཏུ་ན་གརྫུ་ན་བཅུག་པ་མ་གཏོགས་གཞན་གོང་དང་འདྲ་བ་ཉིད་དོ། ། ༈ དེ་བཞིན་ཤ་ཝ་རི་ལའང་། བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་དཔལ་རི་ཁྲོད་༣པ་ཆེན་པོ། འགྱུར་བ་མེད་པའི་ཆོས་ཉིད་མཚོན་པའི་སྐུ་མདོག་ནག་པོ། དབུ་སྐྲ་རལ་པ་སྤྱི་བོར་བཅིངས་པ་སྨྱུག་མའི་ཤུན་པས་བསྡམས་པས་སྤྱན་འབྲུ་ཚུགས་སུ་གཟིགས་ཤིང་སྤྱན་རྩ་དམར་བ། ཕྱག་གཉིས་མདའ་དང་འོད་མའི་གཞུ་བསྣམས་པའི་གཞུ་མཆོག་ལ་ཕག་རྒོད་ཀྱི་ཁོག་སྟོད་དང་ཁོག་སྨད་བཀལ་བ། རྨ་བྱའི་མདངས་སྒྲོ་གཤིབ་པའི་ཤམ་ཐབས་དང་། མེ་ཏོག་དང་འབྲས་བུའི་རྒྱན་སྣ་ཚོགས་པས་བརྒྱན་ཏེ་འགྱིངས་བག་དང་བཅས་པའི་རོལ་སྟབས་སུ་བཞུགས་པ། སྐུའི་གཡས་གཡོན་ནས་རིག་མ་རྒྱན་དང་ཆ་ལུགས་གཙོ་བོ་དང་མཚུངས་ཤིང་མདའ་དོང་འཛིན་པ་གཉིས་ཀྱིས་བརྟེན་པ་ལྷན་ཅིག་སྐྱེས་པའི་བདེ་བ་མན་འདྲ། རི་ཁྲོད་དབང་ཕྱུག་ཞབས་ལ་འདུད། ཤ་ཝ་རི་པཱ་ད་ཞེས་བསྒྱུར་བ་མ་གཏོགས་འདྲ། བསྟོད་པའི་སྐབས་སྤྲོ་ན་ནགས་རིན་གྱིས་མཛད་པའི་ཤ་ཝ་རའི་བསྟོད་ཆེན་སོགས་ཀྱང་འདོན་ནོ། ། ༈ དེ་བཞིན་ཏུ་གྲུབ་ཆེན་ནག་པོ་སྤྱོད་པ་ལའང་། རྩ་བའི་བླ་མ་དང་གཉིས་སུ་མེད་པའི་གྲུབ་པའི་སློབ་དཔོན་བརྟུལ་ཞུགས་སྤྱོད་པའི་དབང་ཕྱུག་༤ཀཧྣི་པ་ཆེན་པོ་སྐུ་མདོག་ནག་པོ་དཔའ་ཞིང་སྒེག་པ་ཧུར་བག་ཆགས་པ་ཕྱག་གཡས་ཅང་ཏེའུ་འཁྲོལ་ཞིང་། གཡོན་ཀ་པཱ་ལ་བདུད་རྩིས་གང་བ་འཛིན་པའི་མཆན་ཁུང་དུ་རྡོ་རྗེ་ཁ་ཊྭཱྃ་ག་སྒྲེང་པ། དབུ་སྐྲ་རལ་པའི་ཐོར་གཙུག་ཅན་སྐུ་ལ་མི་རུས་ཀྱི་ཕྱག་རྒྱ་དྲུག་གིས་བརྒྱན་ཅིང་སྟག་གི་པགས་པའི་ཤམ་ཐབས་གསོལ་བ། བི་ཤྭ་རུ་པི་ནི་ཞེས་བྱ་བའི་སྲིན་མོའི་གཙོ་མོ་འཇིགས་སུ་རུང་བ་གདན་ནམ་གཞོན་པའི་ཚུལ་དུ་གནས་པའི་སྟེང་ན་རོལ་སྟབས་སུ་བཞུགས་པ། རེས་འགའ་རོ་ལངས་ཆེན་པོ་མེ་ཏོག་གི་ཕྲེང་བས་བརྒྱན་པ་ལ་ཆིབས་༢པ་སོགས་སྣ་ཚོགས་པའི་རྣམ་འཕྲུལ་སྟོན་པར་མཛད་བཞིན་པའི། སྟེང་གི་ནམ་མཁའ་ལ་གདུགས་བདུན་འཛིན་པ་མེད་པར་འཁོར་ཞིང་། ཌཱ་མ་རུ་བདུན་འཁྲོལ་བ་པོ་མེད་པར་རང་འཁྲོལ་བ། རེས་འགའ་གདུགས་བདུན་བརྒྱ་དང་ཌཱ་མ་རུ་བདུན་བརྒྱར་འཕེལ་བའི་ཆོ་འཕྲུལ་ཅན། སྣང་བའི་འཁོར་བདུན་བརྒྱ་དང་མི་སྣང་བའི་འཁོར་བདུན་བརྒྱ་ལ་སོགས་པ་གྲུབ་པ། རིག་པ་འཛིན་པའི་རྣལ་འབྱོར་ཕོ་མོ་གྲངས་མེད་པའི་དབུས་ན་རོལ་པ། ལྷན་ཅིག་སྐྱེས་པའི་བདེ་བ་ཆེན་པོ་མན་འདྲ། སྤྱོད་འཆང་དབང་པོའི་ཞབས་ལ་འདུད། ཙརྱ་བཛྲ་རཾ། ཀཧྣི་ཙཪྻ་ཀ་པཱ་ད་ཞེས་སྦྱར་བ་དང་། ༈ གཉིས་སུ་མེད་པའི་གྲུབ་པའི་དབང་ཕྱུག་བི་རཱུ་པ་ཆེན་པོ་སྐུ་མདོག་སྨུག་ནག་སྦོམ་ཞིང་ཐུང་ལ་གསུས་ཁྱིམ་ཆེ་བ། དབུ་སྐྲ་ཅོ་བྲེགས་ལ་མེ་ཏོག་གི་ཕྲེང་བས་སྤུད་པ། ལྷག་མ་རྒྱན་སྤངས་ཤིང་ཕྱག་གཡས་སྡིག་མཛུབ་ཀྱི་ཕྱག་རྒྱ་གདེངས་པས་ཉི་མ་བརྟོད་ལ་གནོན་པའི་ཚུལ་དང་། གཡོན་པ་མེན་གྱི་རྭ་ཞལ་ཆང་གིས་གང་བ་དཀུར་བརྟེན་པ། ཤ་ནའི་གོས་ཀྱིས་འདོམས་དཀྲིས་ཅན་རོལ་པའི་འདུག་སྟངས་སུ་བཞུགས་པ། གཡོན་གྱི་ཕྱོགས་ནས་རིག་མ་ཆང་སྣོད་འཛིན་པས་འདུད་པའི་ཚུལ་ཅན། ལྷན་ཅིག་སྐྱེས་པའི་མན་འདྲ། བི་རཱུ་པ་ལ་ཕྱག་འཚལ་འདུད། བི་རཱུ་པ་ད་ཞེས་བསྒྱུར་བ་དང་། ༈ གྲུབ་པའི་དབང་ཕྱུག་ཌོམྦྷི་ཧེ་༦རུ་ཀ་སྐུ་མདོག་དཀར་དམར་རལ་པའི་ཐོར་ཚུགས་དང་རུས་པའི་རྒྱན་དྲུག་གིས་བརྒྱན་པ། ཤིན་ཏུ་འཇིགས་པའི་སྦྲུལ་རེག་པའི་དུག་ཅན་གྱིས་རྒྱན་དུ་མཛད་ཅིང་། མཐོང་བའི་དུག་ཅན་ལྕག་གི་ཚུལ་དུ་བསྣམས་པ། ཁ་རླངས་ཀྱི་དུག་ཅན་བདུན་གྱིས་དབུའི་སྟེང་དུ་གདེངས་ཀར་བྱས་ཤིང་། སྟག་མོ་མི་ཟན་འཇིགས་སུ་རུང་བ་ལ་ཆིབས་པའི་བརླ་གཡོན་པའི་སྟེང་ནས་གསང་བའི་གཟུངས་མ་གཡུང་མོ་རྣལ་འབྱོར་མ་གཅེར་མོ་པདྨ་ཅན་གྱི་མཚན་ཉིད་ཡོངས་སུ་རྫོགས་པས་དམ་དུ་འཁྱུད་ཅིང་འཁྲིལ་བའི་བདེ་བས་དགྱེས་རྒུར་རོལ་པ། ལྷན་ཅིག་སྐྱེས་མན་འདྲ། ཌོམྦྷི་པ་ལ་ཕྱག་འཚལ་འདུད། ཌོམྦྷི་ཧེ་རུ་ཀ་པཱ་ད་ཞེས་བསྒྱུར། ། ༈ ཡང་གྲུབ་པའི་དབང་ཕྱག་ལཱུ་ཧི་༧པ་ཆེན་པོ་སྐུ་མདོག་སྔོ་སངས་སྐེམས་ཤིང་རིད་པའི་ཚུལ་ཅན། རལ་པའི་ཐོར་ཚུགས་ཅུང་ཟད་དང་བཅས་ཤིང་རས་ཀྱི་སྨད་དཀྲིས་གསོལ་བ། སྐུའི་མདུན་ཕྱོགས་སུ་ཉའི་རྒྱུ་ལྟོ་སྤུངས་པ་ལས་ཕྱུག་གིས་བླངས་ཏེ་ཞལ་དུ་གསོལ་བའི་རྣམ་པ་ཅན་ཕྱེད་སྐྱིལ་གྱིས་བཞུགས་པ། ལྷན་ཅིག་སྐྱེས་པའི་མན་འདྲ་བ་ལས། ལཱུ་ཡི་པ་ལ་ཕྱག་འཚལ་འདུད། ལཱུ་ཡི་པཱ་ད་ཞེས་བསྒྱུར་བ་དང་། ། ༈ བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་གཽ་རཀྵ་༨ན་ཐ་སྐུ་མདོག་དཀར་སྔོ་སྣུམ་པའི་མདངས་ཅན་ཤངས་རྒྱུད་མཐོ་ཞིང་འཛུམ་བག་གི་མདངས་དང་ལྡན་པ། ཨག་ཚོམ་དང་དབུ་སྐྲ་ལྗང་སེར། ལྟ་སྟངས་ཅེར་རེ་བ། སྙན་ལ་མུ་དྲ་ནག་པོ་དང་། མགུལ་དུ་སིངྒ་ནཱ་དའི་རྭ་དུང་འཆང་ཞིང་སྐུ་ལ་ཙཀྲ་ཀནྟ་སྟེ་འཁོར་ལོ་ལྟ་བུའི་བེམ་པོ་གསོལ་པ། སྒོམ་ཤིང་ཀོས་ཀོ་བརྟན་པའི་ཚུལ་གྱིས་སྐྱིལ་ཀྲུང་དང་བཅས་དྲང་པོ་བཞུགས་ཤིང་། ཕྱག་མཉམ་བཞག་གི་སྟེང་ན་ཀུ་བའི་སྣོད་ཐོགས་པ། མཐོང་བའི་མོད་ལ་ཉམས་དགའ་ཞིང་ཐ་མལ་གྱི་སྣང་བ་ཧྲུལ་པོར་འཇིག་པ། ལྷན་ཅིག་སྐྱེས་པའི་མན་འདྲ། གཽ་རཀྵ་ལ་གུས་པས་འདུད། དང་། གཽ་རཀྵ་ནཱ་ཐ་པཱ་དར་བསྒྱུར་བ་དང་། ༈ གྲུབ་པའི་སློབ་དཔོན་ཆེན་པོ་ཏནྟི་༩པ་སྔོ་སངས་ཤིན་ཏུ་སྨིན་པའི་ན་ཚོད་ཙམ་གྱི་སྐུ་ལུས། ཨག་ཚོམ་དང་སྨ་ར་རིང་དུ་འཕྱང་བ་དབུ་སྐྱེས་དང་བཅས་པ་རབ་ཏུ་དཀར་བའི་མདངས་ཅན། རས་ཀྱིས་སྨད་དཀྲིས་གསོལ་ཞིང་ཁྲི་འཐགས་ཀྱི་བྱ་བ་ལ་བརྩོན་པའི་ཚུལ་དུ་བཞུགས་པ། ལྷན་ཅིག་སྐྱེས་པའི་སོགས་དང་། ཏནྟི་པ་ལ་གུས་པས་འདུད། ཏནྟི་ཀ་པཱ་ད་སོགས་དང་། ༈ གྲུབ་པའི་དབང་ཕྱུག་རྡོ་རྗེ་དྲིལ་༡༠བུ་པ་སྐུ་མདོག་སྔོ་སངས་རལ་པའི་ཐོར་ཚུགས་ཅན། རུས་པའི་རྒྱན་དྲུག་དང་སྟག་གི་པགས་པའི་ཤམ་ཐབས་འཕྱར་བ། ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་པདྨ་ཅན་གྱི་མཚན་ཉིད་ཡོངས་སུ་རྫོགས་པ། རྡོ་རྗེ་རྣལ་འབྱོར་མའི་རྣམ་པ་དཀར་གསལ་ལྟ་བས་ཆོག་མི་ཤེས་པ་ལ་འཁྱུད་དེ་མཉམ་པར་སྦྱོར་བའི་བདེ་བས་རྒྱས་པ། ཞབས་གཡས་བརྐྱང་གིས་སྟབས་ཅན། ཞེས་དང་། དྲིལ་བུ་པ་ལ་ཕྱག་འཚལ་འདུད། བཛྲ་གཎྜ་པཱ་ད་ཞེས་དང་། ༈ གྲུབ་པའི་དབང་ཕྱུག་ཆེན་པོ་ཛ་ལནྡྷ་༡༡རི་པ་སྐུ་མདོག་དཀར་དམར་རལ་པའི་ཐོར་ཚུགས་དང་རུས་པའི་རྒྱན་ཅན་རས་དམར་པོའི་འདོམས་དཀྲིས་གསོལ་བ་ཞབས་ཕྱོགས་གཅིག་རྒྱབ་ནས་དཔུང་པར་བཀལ་ཞིང་། ཕྱོགས་གཅིག་བཞེངས་པའི་ཚུལ་ཅན། ཕྱག་གཉིས་རྡོ་རྗེ་གཙུག་ཏོར་གྱི་ཕྱག་རྒྱ་ལྡོག་སྟེ་སྤྱི་བོར་འཆིངས་བ། གཡོན་གྱི་ཕྱོགས་ནས་རིགས་མ་རྣལ་འབྱོར་མའི་ཆ་བྱད་ཅན་གྱིས་འདུད་བཞིན་པ། ཞེས་དང་། ཛ་ལནྡྷ་རིའི་ཞབས་ལ་འདུད། ཛ་ལནྡྷ་རི་པཱ་ད་ཞེས་པ་དང་། ༈ གྲུབ་པའི་སློབ་དཔོན་ཆེན་པོ་ཀུཀྐུ་༡༢རི་པ་སྐུ་མདོག་སྔོ་སངས་རུས་པའི་རྒྱན་དང་རལ་པའི་ཐོར་ཚུགས་ཅན། ཕྱེད་སྐྱིལ་གྱིས་བཞུགས་ཤིང་ཐོད་པ་འཛིན་པའི་པང་དུ་རྡོ་རྗེ་ཡན་ལག་མ་ཀུཀྐུ་རཱི་གཞོན་ནུའི་གཟུགས་ཅན་བཟུང་སྟེ་དགྱེས་རྒུར་རོལ་པ། ཀུཀྐུ་རཱི་པ་ཕྱག་འཚལ་འདུད། ཀུཀྐུ་རཱི་པཱ་ད་ཞེས་དང་། ༈ གྲུབ་པའི་སློབ་དཔོན་ཆེན་པོ་ལྭ་བ་༡༣པ་སྐུ་མདོག་དཀར་དམར་ཚངས་པར་སྤྱོད་པའི་ཆ་ བྱད་ཅན། སྐུ་ལ་ལྭ་པའི་དུམ་བུ་བརྒྱ་ཕྲག་བསྡུས་ཏེ་དྲུབས་པའི་ན་བཟའ་གསོལ་ཞིང་། ཕྱག་གཉིས་མཉམ་བཞག་གི་ཕྱག་རྒྱས་སྐྱིལ་མོ་ཀྲུང་བཅས་ཏེ་གཉིད་འཐུག་གི་ཟོལ་གྱིས་འོད་གསལ་བསམ་མི་ཁྱབ་ལ་མཉམ་པར་འཇོག་པའི་ཚུལ་ཅན། ལྭ་བ་པ་ལ་ཕྱག་འཚལ་འདུད། ཀམྤ་ལཱ་པ་ད་བསྒྱུར་བ་དང་། ༈ ཉེར་སྤྱོད་མཐའ་ཀླས་པས་བརྒྱན་པའི་དབུས་སུ་གྲུབ་པའི་སློབ་དཔོན་ཆེན་པོ་ཨིནྡྲ་༡༤བྷུ་ཏི་མིའི་བདག་པོ་སྟོབས་ཀྱིས་འཁོར་ལོས་སྒྱུར་བའི་ཆ་བྱད་སྐུ་མདོག་དཀར་དམར་མཛེས་ཤིང་བརྗིད་ལ་ཆགས་པའི་ཉམས་ཅན། དར་དང་རིན་པོ་ཆེའི་རྒྱན་གྱིས་སྤྲས་ཏེ་ནོར་བུའི་ཁྲི་སྟན་མཐོ་ཞིང་ཡངས་ལ་བཀོད་ལེགས་པའི་སྟེང་དུ་བདེ་ལུགས་སུ་བཞུགས་པའི་སྐུའི་མཐའ་སྐོར་དུ་བུད་མེད་རིན་པོ་ཆེ་མཚན་ཉིད་རྫོགས་པའི་བཙུན་མོའི་མཆོག་ལྔ་བརྒྱས་བསྐོར་ཏེ་འདོད་པའི་ཡོན་ཏན་ཐམས་ཅད་ལ་རྗེས་སུ་ཆགས་པས་རྟག་ཏུ་དགེས་རྒུར་རོལ་པའི་རྣམ་པ་ཅན། ཨིནྡྲ་བོ་དྷི་ལ་ཕྱག་འཚལ། ཤྲཱི་ནཱ་རེནྡྲ་ཨིནྡྲ་བོ་དྷི་པཱ་ད་ཞེས། ༈ གྲུབ་པའི་སློབ་དཔོན་ཆེན་པོ་དཔལ་བདེ་བ་ཆེན་པོ་པདྨ་༡༥ཀཱ་ར་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གྱི་དཀྱིལ་འཁོར་རབ་ཏུ་གང་ཞིང་རྒྱས་ལ། པདྨ་རྒྱས་པ་ལྟ་བུའི་སྤྱན་རས་དང་མཆུ་སྒྲོས་མངའ་བ། དབུའི་དཔྲལ་བའི་དབྱིངས་སུ་རྡོ་རྗེས་མཚན་པའི་པདྨ་རྒྱས་པའི་རེ་ཁཱས་བཀྲ་ཞིང་། སྐུའི་ཆ་ཤས་ཐམས་ཅད་དུ་པདྨ་ཨུཏྤལ་ལྕགས་ཀྱུ་ཞགས་པ་ལ་སོགས་པའི་ཤ་མཚན་དགེ་བ་ཤ་སྟག་གིས་སྤྲས་པ། ཀཎྜ་ཀེའི་ཅོད་པན་མནབས་ཤིང་། གསང་གོས་ཀྱི་སྟེང་དུ་ཆོས་གོས་རྣམ་པ་གསུམ་གསོལ་བ། ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་གདེངས་ཤིང་། གཡོན་ཀ་པཱ་ལ་བདུད་རྩིས་གང་བ་དཀུར་བརྟེན་པའི་མཆན་དུ་རྡོ་རྗེའི་ཁ་ཊྭཱྃ་ག་བཅུག་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུ་གཡས་གཡོན་ནས་མཚན་ཉིད་ཐམས་ཅད་ཡོངས་སུ་རྫོགས་པའི་པདྨ་ནཱི་བཅུ་དྲུག་པའི་ལང་ཚོ་ཅན་གྱིས་བརྟེན་པ། ལྷན་ཅིག་སྐྱེས་པའི་སོགས་དང་། པདྨ་ཀཱ་རར་ཕྱག་འཚལ་འདུད། ཤྲཱི་མ་ཧཱ་སུ་ཁ་པདྨ་བཛྲ་པཱ་ད་ཞེས་བསྒྱུར་བ་དང་། ༈ གྲུབ་པའི་སློབ་དཔོན་ཆེན་པོ་ནག་པོ་བི་རུ་༡༦པཱ། དབུ་ལ་རྡོ་རྗེ་ཐོད་ཅེས་བྱ་བ་རྟེན་འབྲེལ་གྱི་བྱིན་རླབས་ཀྱི་ཅོད་པན་སྔོན་པོ་གསོལ་ཞིང་། ཕྱག་གཡས་བ་མེན་གྱི་རྭ་བདུད་རྩིས་གང་བ་འཛིན་ཅིང་གསོལ་བ། གཡོན་པུས་མོའི་སྟེང་དུ་བཞག་པ། སྐུའི་མདུན་དུ་ཀ་པ་ལ་མ་ཧཱ་བ་ལས་གང་བ་བཞག་ཅིང་། དབུ་སྐྲ་ཅོ་རེག་པགས་པའི་གདན་དང་འདོམས་དཀྲིས་ཅན། ལྷག་མ་རྒྱན་དང་ན་བཟའ་སྤངས་ཤིང་རྣལ་འབྱོར་པ་ཧུར་བག་ཆགས་པའི་རྣམ་པ། སྐུའི་གཡོན་ནས་རིག་མ་ཐལ་མོ་སྦྱར་བ་དང་བཅས་པ། ལྷན་ཅིག་སོགས་དང་། ནག་པོ་བི་རཱུ་པ་ལ་འདུད། ཀྲྀཥྞ་བི་རཱུ་པཱ་ད་ཞེས་བསྒྱུར། ༈ བརྒྱན་པའི་དབུས་སུ་གྲུབ་པའི་དབང་ཕྱུག་ཏིལླི་༡༧པ་ཆེན་པོ་སྐུ་མདོག་སྔོ་ནག་དབུ་སྐྲ་རལ་པའི་ཐོར་ཚུགས་ཅན། རས་ཀྱི་ཨཾ་ག་རག་གསོལ་ཞིང་མི་འགྲེང་གང་ཙམ་གྱི་ནམ་མཁའ་ལ་འཕགས་ཏེ་ཏིལ་བརྡུང་བའི་རྣམ་པ་ཅན། སྐུའི་མདུན་དུ་རིག་མ་ཏིལ་མཁན་མོའི་རྣམ་པས་བར་སྣང་ལ་གནས་བཞིན་ཏུ་ཏིལ་ལུགས་པའི་བྱ་བ་ལ་བརྩོན་པ་དང་ཐབས་གཅིག་ཏུ་ལྷན་ཅིག་སྐྱེས་པའི་ཡེ་ཤེས་ཇི་ལྟར་འབྱུང་བའི་བརྡ་སྟོན་པར་མཛད་པ། བདེ་བ་ཆེན་པོའི་ཡེ་ཤེས་ཀྱི་སོགས་དང་། ཏིལླི་པ་ལ་ཕྱག་འཚལ་ལོ། །ཏིལླི་ཀ་པཱ་ད་ཧཱུྃ་ཧཱུྃ། ༈ གྲུབ་པའི་སློབ་དཔོན་ཆེན་པོ་དཔལ་༡༨ནཱ་རོ་པ་སྐུ་མདོག་སྨུག་ནག་ལྟ་བར་མི་བཟོད་པའི་ཟིལ་དང་ལྡན་པ། དབུ་སྐྲ་རལ་པའི་ཐོར་ཚུགས་དང་རུས་པའི་རྒྱན་དྲུག་གིས་སྤྲས་ཤིང་དར་གྱི་ཨངྒ་རག་གསོལ་བ། ཞིང་ཆེན་གྱི་པགས་པ་བཤུས་མ་ཐག་པ་ཁྲག་འཛག་པ་སྟོད་གཡོགས་ཀྱི་ཚུལ་དུ་མནབས་པའི་རྐང་ལག་གཉིས་ནས་ཕྱག་གིས་བཟུང་སྟེ་ཕན་ཚུན་དུ་བརྒྱངས་པ། ཞབས་བརྐྱང་བསྐུམ་གྱི་ཚུལ་དུ་བཞུགས་པའི་གར་སྟབས་ཅན། ལྷན་ཅིག་སྐྱེས་པའི་སོགས་དང་། ནཱ་རོ་པ་ཡི་ཞབས་ལ་འདུད། ནཱ་རོ་པཱ་ད་ཞེས་བསྒྱུར་བ་དང་། ༈ དབུས་སུ་གྲུབ་པའི་སློབ་དཔོན་ཆེན་པོ་དཔལ་ཤཱནྟི་༡༩པ་སྐུ་མདོག་དཀར་སྔོ་གནས་བརྟན་རྡོ་རྗེ་འཛིན་པ་ཆེན་པོ། ཅུང་ཟད་སྨིན་པའི་ན་ཚོད་ཀྱི་རྣམ་པ། ཆོས་གོས་རྣམ་པ་གསུམ་དང་པཎྜི་ཏའི་ཅོད་པན་མནབས་ཤིང་། ཕྱག་གཉིས་ཆོས་འཆད་ཀྱི་ཕྱག་རྒྱ་དང་བཅས་ཏེ་ཏ་ལའི་བྱང་བུར་བྲིས་པའི་གླེགས་བམ་བསྣམས་པ། ཞབས་རྡོ་རྗེ་སྐྱིལ་མོ་ཀྲུང་གིས་གདིང་བ་ལ་བཞུགས་པ་དང་། ཤཱནྟི་པ་ལ་ཕྱག་འཚལ་ལོ། །རཏྣ་ཨ་ཀཱ་ར་ཤཱནྟི་པཱ་ད་ཞེས་སྦྱར། དེ་བཞིན་ཏུ། ༈ བརྒྱན་པའི་དབུས་སུ་གྲུབ་པའི་སློབ་དཔོན་ཆེན་པོ་ཤྲཱི་སཏྭཱ་༢༠ནཱ་ཐ་ཤཱནྟི་གུཔྟ་སྐུ་མདོག་སྨུག་ནག །རིན་པོ་ཆེ་དང་རུས་པའི་རྒྱན་ཐོ་རེ་བས་སྤྲས་པ། སྐུ་ཤ་ཉམས་རྒྱས་ཤིང་བརྗིད་ལ་ཧུར་བག་ཆགས་པ། དབུ་སྐྲ་ཅོ་བྲེགས་རས་ཀྱི་འདོམས་དཀྲིས་གྲུ་གསུམ་པ་གསོལ་ཞིང་ཞབས་གཉིས་བཟང་པོའི་འདུག་སྟངས་ཀྱིས་རིན་པོ་ཆེའི་ཁྲི་ལ་པགས་པའི་གདན་གྱི་སྟེང་དུ་བཞུགས་པ། ཕྱག་གཉིས་ཆོས་ཀྱི་འཁོར་ལོའི་ཕྱག་རྒྱ་ཐུགས་ཀར་འཆིང་བ། ལྷན་ཅིག་སྐྱེས་པའི་སོགས་དང་། ཤཱནྟི་གུཔྟ་ལ་ཕྱག་འཚལ། ཤྲཱི་ས་ཏྭཱ་ནཱ་ཐ་ཤཱནྟི་གུཔྟ་ཧཱུྃ་ཧཱུྃ། ཞེས་སྦྱར། ༈ དེ་བཞིན་དུ་པགས་པའི་གདན་ལ་རྩ་བའི་བླ་མ་དང་གཉིས་སུ་མེད་པའི་གྲུབ་པའི་སློབ་དཔོན་ཆེན་པོ་ཤྲཱི་བུདྡྷ་གུཔྟ་༢༡ཛོ་ཀིའི་ཆ་བྱད་སྐུ་མདོག་དཀར་ལ་དམར་བའི་མདངས་ཆགས་པ། སྐུ་བོང་ཆེ་ཞིང་ལྷུན་ཆགས་ལ་དྭང་བ་འདྲེན་པ། མཐོང་བའི་མོད་ལ་བ་སྤུ་གཡོ་ཞིང་སྐྱི་བུང་ཞེས་བྱེད་པའི་ཟིལ་དང་ལྡན་པ་དབུ་སྐྲ་རལ་པ་ཐོར་ཚུགས་སུ་བཅིངས་པའི་རྩེ་མོ་ནས་རལ་པའི་ཟར་བུ་ཅུང་ཟད་རྒྱབ་ཏུ་འཕྱང་བ། མེ་ཏོག་སེར་པོ་ཁ་བྱེ་མ་ཐག་པའི་ཐོད་བཅིངས་གསོལ་བ། བགྲེས་རྒུད་སྤངས་པའི་ལངས་ཚོས་གང་བ་ལ་གནས་ཤིང་ཧུར་བག་ཆགས་པ། རས་ཀྱི་འདོམས་དཀྲིས་དང་ན་བཟའ་གསོལ་ཞིང་པུས་འཁྱུད་ཅན། ཕྱག་གཡས་ས་གནོན་པུས་སྟེང་དུ་བཀབ་ཅིང་གཡོན་ཀ་པཱ་ལ་བདུད་རྩིས་གང་བ་དཀུར་བརྟེན་པའི་ཚུལ་གྱིས་འཛིན་པ། སྐུ་དྲང་པོར་བསྲངས་ཏེ་སྐྱིལ་ཀྲུང་ཕྱེད་པའི་འདུག་སྟངས་ཀྱིས་བཞུགས་པ། ལྷན་ཅིག་སྐྱེས་པའི་སོགས་དང་། བུདྡྷ་གུཔྟར་གུས་ཕྱག་འཚལ། ཤྲཱི་བུདྡྷ་གུཔྟ་ནཱ་ཐ་ཧཱུྃ་ཧཱུྃ། ཞེས་སྦྱར་བ་མ་གཏོགས་གོང་དང་འདྲའོ། །དེ་ལྟར་འདི་ནི་གྲུབ་ཐོབ་བརྒྱད་ཅུ་རྩ་བཞིའི་བྱིན་རླབས་སློབ་དཔོན་དཔའ་བོ་འོད་གསལ་གྱི་ལུགས་ལ་གཙོ་བོར་བརྟེན་ཅིང་། འཕགས་ཡུལ་གྲུབ་པའི་སློབ་དཔོན་རྟ་མཆོག་གིས་མཛད་པའི་བླ་སྒྲུབ་དང་། རྩོད་དུས་ཀྱི་དཔལ་ཧེ་རུ་ཀ་ཤཱནྟི་གུཔྟའི་མན་ངག་བཀའ་བབས་བདུན་ལྡན་གྱི་བླ་མའི་རྣལ་འབྱོར་ལས་ཀྱང་ཁ་བསྐང་སྟེ་ཡོངས་སུ་གྲགས་པའི་གྲུབ་ཆེན་འགའ་ཞིག་ལ་གསོལ་བ་གདབ་པའི་ཕྱིར་ཚད་ལྡན་མཁས་པའི་ཞལ་ལུང་ཇི་ལྟ་བར་བྲིས་པ་སྟེ། འདིར་མ་སྨོས་པའི་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི་གཞན་རྣམས་ཀྱིས་མཚོན་གྲུབ་པ་བརྙེས་པའི་དམ་པ་གང་ལའང་སྦྱར་དུ་རུང་། ཚོགས་གསོག་གི་མཆོད་ཕྲེང་རྒྱས་པ་སྤྲོ་ན་སྦྱོར་བ་ཡོ་བྱད་བཤམ་བཀོད། གནས་དང་མཆོད་པའི་ཡོ་བྱད་བྱིན་རླབས། བླ་མ་སྤྱིའི་ཕྱག་འཚལ། ཉེར་སྤྱོད། འདོད་ཡོན་རིན་ཆེན་སྣ་བདུན། རིག་མ་བཅུ་དྲུག་སོགས་ཀྱི་མཆོད་ཕྲེང་། ནང་བདུད་རྩིའི་མཆོད་པ། གསང་བ་སྙོམས་འཇུག་གི་མཆོད་པ། དེ་ཁོ་ན་ཉིད་ཕྱག་རྒྱ་ཆེན་པོའི་མཆོད་པ། མཎྜལ། གསོལ་འདེབས། སྡིག་པ་བཤགས་པ་སོགས་ཡན་ལག་ལྷག་མ་རྣམས་བླ་མ་མཆོད་པའི་ཆོ་ག་གཞན་ནས་འབྱུང་བ་དང་སྤེལ། ཚོགས་མཆོད་བྱེད་པར་སྤྲོ་ན་རྗེ་གྲོལ་མཆོག་ཞབས་ཀྱི་གསུང་ཚོགས་མཆོད་རྒྱ་གར་མ་ལྟ་བུ་སྦྱར་ན་ཤིན་ཏུ་ལེགས་པ་ཡིན་ནོ། །ཡོངས་གྲུབ༷་བདེ་ཆེ༷ན་མཆོག་བརྙེས་པའི། །བླ༷་མ༷འི་རྣལ༷་འ༷བྱོར་བགྱིས་པའི་དགེས། །བྱིན༷་རླབ༷ས་སྤྲིན༷་གྱི༷་རྔ༷་ད༷བྱངས་ཀྱིས། །ཟུང་འཇུག་ངལ་འཚོ་བརྟེན་གྱུར་ཅིག །མངྒ་ལཾ།

[edit]

grub mchog dpa' bo 'od gsal lugs kyi grub brgya'i bla ma'i byin rlabs sprin gyi rnga dbyangs/__ @#/__/grub mchog rnams la brten pa'i bla ma'i rnal 'byor byin rlabs sprin gyi rnga dbyangs zhes bya ba bzhugs so/_/ na mo gu ra be/__/zung 'jug grubaX pa'i bdud rtsis yis/__/bdeX chenaX rdo rje'i sa brnyes pa'i/__/rje btsun mchogaX rnamaXs la btud nas/__/byinaX rlabaXs sprinaX gyiX rngaX dbyangaXs len/__/'dir grub pa'i dbang phyug chen po dpal sa ra ha1/__klu sgrub2/__sha ba ri pa3/__nag po spyod pa4/__bi rU pa5/__Dom+b+hi he ru ka6__/lU yi pa7/__gau rak+Sha 8nA the/__tan+ti pa9/__rdo rje dril bu pa10/__dza lan+d+ha ri pa11/__kuk+ku ri pa12/__lA wa pa13/__in+d+ra 14b+hu ti/__pad+mA 15ka ra/__nag po bi rU pa16/__til+li pa17/__nA ro pa18/__shAn+ti pa19/__shrI sa tha nA rba shAn+ti gup+ta20/__shrI bud+d+ha gup+ta 21sogs la brten pa'i bla ma'i sgrub thabs zab mo ni/__gnas dben par phyi nang gi mchod pa'i yo byad dang /__maN+Dal gyi yo byad sogs mngon par 'du byas la/__skyabs 'gro sems bskyed tshad med bzhi sngon du 'gro bas gtsang ma'i sa gzhi'i maN+Dal la byi dor byas la/__oM badz+ra b+hU mi swA hA/__zhes skyon sbyangs/__oM badz+ra re khe hU~M swA hA/__zhes dri bzang dang ba byung gis skyang nul byas/__de'i dbus su lag pa g.yas pas me tog gsar pa'i tshom bu bkod la/__hU~M su me ru ma d+he ma/__shar du bkod la/__ya pUrba bi de ha dwi pa/__lhor bkod la/__ra dzaM bu dwi pa dak+ShiN/__nub tu bkod la/__wa god nI ya pash+tsi ma dwi pa/__byang du bkod la/__la ut+ta ra ku ru dwi pa/__shar gyi g.yas g.yon du bkod la/__yaM yaHde hash+tsa bi de ha/__lho'i g.yas g.yon tu bkod la/__ra~M raHtsa ma ra sh+tsa a pa tsa ma ra:__nub kyi g.yas g.yon du bkod la/__waM wa sha Thash+tsa at+ta ra mat+t+riNaH__byang gi g.yas g.yon du bkod la/__laM laHku ra wash+tsa kau ra wA/__shar gyi shar dang nub kyi nub tu bkod la/__tsan+d+ra sUR+Ya b+hu Shi ta/__zhes brjod nas/__rin chen sna tshogs rang bzhin ni/__/ri rab lcogs brgyad yang dag ldan/__/gling bzhi gling phran ldan pa 'di/__/'bul gyis yang dag bzhes su gsol/__/zhes me tog dor/__maN+Dal gyi dbus su dag pa ye shes kyi zhing khams rgya dang tshad yongs su chad pa med pa rgyan bkod pa phun sum tshogs pa dang bcas pa phyi rol bsrung ba'i 'khor lo gzhom du med pas yongs su bskor ba'i snying po gzhal med khang dang bkod pa phun sum tshogs pa/__dur khrod rol pa'i yo byad dang lha rdzas kyi nyer spyod mtha' klas pas brgyan pa'i dbus su kr-iSh+Na sA ra'i pags pa'i gdan la rtsa ba'i bla ma dang gnyis su med pa'i grub pa'i dbang phyug dpal 1sa ra ha/__sku mdog dkar dmar bram ze'i cha byad can/__bgres rgud spangs pa'i lang tsho 'gyur ba med pa'i gang ba la rtag tu gnas pa/__dbu skra co bregs ras dmar po'i ang+ga rag gsol zhing /__phyag gnyis gnyug ma'i gnas lugs mtshon par byed pa'i mda' bsrong ba'i phyag rgya can/__zhabs phyed krung du bzhugs pa'i g.yon nas rig ma ye shes kyi rnal 'byor ma mda' mkhan mo'i tshul can gyis brten pa/__lhan cig skyes pa'i bde ba chen po'i ye shes kyi gzi 'od phyogs brgyar 'bar bas bzod par dka' ba'i zil can nyi ma'i snying po lta bu/__/srid pa gsum zil gyis gnon pa'i lta stangs kyis rab tu dpa' ba'i nyams can/__thugs gnyis su med pa'i ye shes phyag rgya chen po chos kyi sku la rtag tu mnyam par bzhag pas/__lhun gyis grub cing rgyun mi chad pa'i phrin las kyi rnam par rol pa zad mi shes pa can/__dpa' bo dang DA ki rgya mtsho lta bus mchod cing brjod pa dang /__sa gsum gyi dbang po rnam kyis ri mor byed bzhin pa'i sku can gyi spyi bor oM/__mgrin par AH__thugs kar hU~M/__dam tshig pa dang ye shes pa gdod nas dbyer mi phyed pa/__dngos dang brgyud pa'i bla ma kun 'dus/__yi dam zhi khro rab 'byams kun 'dus/__/sangs rgyas chos dang dge 'dun kun 'dus/__mkha' 'gro chos skyong srung ma kun 'dus/__brtan g.yo'i khyab bdag__/'khor 'das kyi dpal mgon skyabs gnas kun gyi spyi gzugs chen por mngon sum du bzhugs par gyur/__/oM AHdpal ldan rdo rje bla ma dam pa'i zhabs kyi pad+mo yang dag pa'i ye shes gsal bar byed pa de la phyag 'tshal lo hU~M a d+ya sid+d+h+yA mAM/__zhes lan mang du phyag bya/__gang gi drin gyis bde chen nyid/__/skad cig nyid la 'char ba gang /__/bla ma rin chen lta bu'i sku/__/mda' bsnun khyod zhabs pad la 'dud/__/rgyal ba kun dngos bla ma la/__/sogs yan lag bdun pa ci mang dang /__thun mong gi maN+Dal spyi ltar rgyas bsdus lan mang du phul rjes nang gi maN+Dal ni/__skad cig gis ye shes kyi ral gri rno ngar dang ldan pa lag tu byung /__des rang lus dum bur byas nas maN+Dal du bkod par gyur/__hU~M masta ka su me ru/__ya bA ma pA da bi de haH__ra hi na pA da dzam+bu dwi ba/__wa pash+tsi ma dwi pa hi na hasta/__la ba ma hasta ku ru ut+ta ra/__shU tra ku su ma tsan+d+ra sUr+ya b+hu Shi tam/__zhes tshom bu bkod par mos la/__i dam gu ru rat+na At+ma na ma kA ya maN+Da la niR+Ya ta ya mi/__zhes dbul zhing slar yang /__rang lus rnam smin phung po'i ka pA la/__/ling kyis phog dbus lhag ma'i lus phung rnams/__/ril por bcug pas yi ge 'bru gsum gyis/__/sbyangs rtogs sbar bzhu bdud rtsi'i rgya mtshor gyur/__/oM AHhU~M ha hoHhrIH__lan mang du brjod/__ljags rdo rje'i 'od zer gyi sbu gus gsol bar gyur par bsams la/__zhal zas ro brgya ldan pa'i yid 'phrog pa/__/legs sbyar 'di ni dpal ldan bla ma la/__/dad pas phul bas 'gro ba 'di dag kun/__/'byor ldan ting 'dzin zas la spyod par shog__/oM AHshrI man sang+gu ru ma hA sid+d+hi mAn+d+ha sa ra ha sa pA ri wA re b+h+yaH__i daM ba liM ga Na tsakra ma hA pU dza khA hi/__sarba sid+d+hi m+me pra ya ts+tshan+tu/__zhes dang /__gzhan yang phyi nang gi mchod pa ci 'byor pas mchod cing /__mtshan nyid dang ldan pa'i rig ma phul bar mos la/__lha mo 'di dag phyag rgya che/__/mtha' yas bde ba sbyin pa mo/__/rigs lnga las byung 'di phul bas/__/rig pa'i brtul zhugs mthar phyin shog_/lha dang mi yi bde ba ni/__/bsdus byas rdo rje 'dzin pa yi/__/bcu drug char yang mi phod pa'i/__/dga' ba bla na med pas mchod/__/ces gsang ba'i mchod pa bya/__de nas yan lag bdun pa dang bstod pa'i rigs ci shes dang /__At+ma nAM su kha duHkha te maidz+nyA ne/__su kha ki duHkha to ma thi na s+thi sa ra ha na mo stu ti/__zhes pa'am bod skad du bsgyur na/__bdag gi bde sdug khyed kyis mkhyen no/_/bde'am sdug kyang rung khyod las gzhan ma mchis so/__/phyag 'tshal zhing 'dud do sa ra ha/__zhes pa gang rigs kyis drag tu gsol ba gdab cing /__gu ru ma sha ra NAM gats+tsha mi/__lan mang du brjod/__oM AHma hA sid+d+hi lab+d+ha sa~X ra~X hu~X pA~X da hU~M hU~M/__zhes pa'i mtshan sngags kyang ci nus su bzla zhing /__mthar/__bla ma grub brnyes rnal 'byor dbang phyug gi__/sku la rtsa gsum 'khor lo lnga gsal ba'i/__/g.yon phyogs rkyang ma dang 'brel kun+da'i khams/__/sku yi byin rlabs bdud rtsi 'od dkar tshul/__/smin mtshams nas byung rang gi dpral bar thim/__/lus kyi sgrib dag bum dbang thob par gyur/_/g.yas phyogs ro ma dang 'brel rdul gyi khams/__/gsung gi bdud rtsi 'od dmar tshul du byung /__/mgul ba'i gnas nas bdag gi mgrin par thim/__/ngag gi sgrib dag gsang ba'i dbang bskur thob/__/a wa d+hu ti mun can dwangs ma'i tshul/__/thugs kyi byin rlabs bdud rtsi 'od mthing bcas/__/thugs ka'i gnas nas snying gar thim pa yis/__/yid kyi sgrib dag shes rab ye shes thob/__/bla ma 'od du zhu nas rang la thim/__/gnyis med bsam brjod bral ba'i ngang la bzhag__/sgo gsum 'pho ba'i sgrib dag tshig dbang thob/___/bla ma rang sems tha mi dad du 'dres/__/e ma ma la dus gsum dge ba 'dis/__/bdag dang mar gyur mtha' yas sems can kun/__/grub pa mchog gis rtag par rjes bzung nas/_/phyag rgya chen po'i dngos grub la reg gyur/__/ces sogs bsngo smon shis brjod kyis mtha' brgyan no/__/__!__de bzhin tu gzhan 'dra ba la/__mngon rtogs kyi skabs/__pags pa'i gdan la rtsa ba'i bla ma dang gnyis su med pa'i dpa' mgon 'phags pa klu sgrub 2sku mdog sngo sangs nor bu'i kha dog lta bu dwangs shing dri ma med pa/__mtshan dang dpe byad kyis spras shing phyag gnyis chos 'khor gyi phyag rgya thugs kar 'ching ba/__na bza' chos gos gsum dang bcas shing rdo rje'i skyil mo krung gis bzhugs pa/__shaM kha la sogs pa'i klu'i rgyal po mchog rnams sbrul gyi rnam pas gdengs ka'i grib ma 'bul ba la sku rgyab brten pa/__thugs gnyis su med pa'i ye shes man chad gong bzhin la/__bstod pa'i skabs/__nA gardzu na'i zhabs la 'dud/__mtshan sngags kyang sa ra ha'i tshab tu na gardzu na bcug pa ma gtogs gzhan gong dang 'dra ba nyid do/___/__!_de bzhin sha wa ri la'ang /__bla ma dang gnyis su med pa'i grub pa'i dbang phyug dpal ri khrod 3pa chen po/__'gyur ba med pa'i chos nyid mtshon pa'i sku mdog nag po/__dbu skra ral pa spyi bor bcings pa smyug ma'i shun pas bsdams pas spyan 'bru tshugs su gzigs shing spyan rtsa dmar ba/__phyag gnyis mda' dang 'od ma'i gzhu bsnams pa'i gzhu mchog la phag rgod kyi khog stod dang khog smad bkal ba/__rma bya'i mdangs sgro gshib pa'i sham thabs dang /__me tog dang 'bras bu'i rgyan sna tshogs pas brgyan te 'gyings bag dang bcas pa'i rol stabs su bzhugs pa/__sku'i g.yas g.yon nas rig ma rgyan dang cha lugs gtso bo dang mtshungs shing mda' dong 'dzin pa gnyis kyis brten pa lhan cig skyes pa'i bde ba man 'dra/__ri khrod dbang phyug zhabs la 'dud/__sha wa ri pA da zhes bsgyur ba ma gtogs 'dra/__bstod pa'i skabs spro na nags rin gyis mdzad pa'i sha wa ra'i bstod chen sogs kyang 'don no/___/__!_de bzhin tu grub chen nag po spyod pa la'ang /__rtsa ba'i bla ma dang gnyis su med pa'i grub pa'i slob dpon brtul zhugs spyod pa'i dbang phyug 4kah+ni pa chen po sku mdog nag po dpa' zhing sgeg pa hur bag chags pa phyag g.yas cang te'u 'khrol zhing /__g.yon ka pA la bdud rtsis gang ba 'dzin pa'i mchan khung du rdo rje kha T+wA~M ga sgreng pa/__dbu skra ral pa'i thor gtsug can sku la mi rus kyi phyag rgya drug gis brgyan cing stag gi pags pa'i sham thabs gsol ba/__bi shwa ru pi ni zhes bya ba'i srin mo'i gtso mo 'jigs su rung ba gdan nam gzhon pa'i tshul du gnas pa'i steng na rol stabs su bzhugs pa/__res 'ga' ro langs chen po me tog gi phreng bas brgyan pa la chibs 2pa sogs sna tshogs pa'i rnam 'phrul ston par mdzad bzhin pa'i/__steng gi nam mkha' la gdugs bdun 'dzin pa med par 'khor zhing /__DA ma ru bdun 'khrol ba po med par rang 'khrol ba/__res 'ga' gdugs bdun brgya dang DA ma ru bdun brgyar 'phel ba'i cho 'phrul can/__snang ba'i 'khor bdun brgya dang mi snang ba'i 'khor bdun brgya la sogs pa grub pa/__rig pa 'dzin pa'i rnal 'byor pho mo grangs med pa'i dbus na rol pa/__lhan cig skyes pa'i bde ba chen po man 'dra/__spyod 'chang dbang po'i zhabs la 'dud/__tsar+ya badz+ra raM/__kah+ni tsaR+Ya ka pA da zhes sbyar ba dang /__!__gnyis su med pa'i grub pa'i dbang phyug bi rU pa chen po sku mdog smug nag sbom zhing thung la gsus khyim che ba/__dbu skra co bregs la me tog gi phreng bas spud pa/__lhag ma rgyan spangs shing phyag g.yas sdig mdzub kyi phyag rgya gdengs pas nyi ma brtod la gnon pa'i tshul dang /__g.yon pa men gyi rwa zhal chang gis gang ba dkur brten pa/__sha na'i gos kyis 'doms dkris can rol pa'i 'dug stangs su bzhugs pa/__g.yon gyi phyogs nas rig ma chang snod 'dzin pas 'dud pa'i tshul can/__lhan cig skyes pa'i man 'dra/__bi rU pa la phyag 'tshal 'dud/__bi rU pa da zhes bsgyur ba dang /__!__grub pa'i dbang phyug Dom+b+hi he 6ru ka sku mdog dkar dmar ral pa'i thor tshugs dang rus pa'i rgyan drug gis brgyan pa/__shin tu 'jigs pa'i sbrul reg pa'i dug can gyis rgyan du mdzad cing /__mthong ba'i dug can lcag gi tshul du bsnams pa/__kha rlangs kyi dug can bdun gyis dbu'i steng du gdengs kar byas shing /__stag mo mi zan 'jigs su rung ba la chibs pa'i brla g.yon pa'i steng nas gsang ba'i gzungs ma g.yung mo rnal 'byor ma gcer mo pad+ma can gyi mtshan nyid yongs su rdzogs pas dam du 'khyud cing 'khril ba'i bde bas dgyes rgur rol pa/__lhan cig skyes man 'dra/__Dom+b+hi pa la phyag 'tshal 'dud/__Dom+b+hi he ru ka pA da zhes bsgyur/___/__!_yang grub pa'i dbang phyag lU hi 7pa chen po sku mdog sngo sangs skems shing rid pa'i tshul can/__ral pa'i thor tshugs cung zad dang bcas shing ras kyi smad dkris gsol ba/__sku'i mdun phyogs su nya'i rgyu lto spungs pa las phyug gis blangs te zhal du gsol ba'i rnam pa can phyed skyil gyis bzhugs pa/__lhan cig skyes pa'i man 'dra ba las/__lU yi pa la phyag 'tshal 'dud/__lU yi pA da zhes bsgyur ba dang /___/__!_bla ma dang gnyis su med pa'i grub pa'i dbang phyug gau rak+Sha 8na tha sku mdog dkar sngo snum pa'i mdangs can shangs rgyud mtho zhing 'dzum bag gi mdangs dang ldan pa/__ag tshom dang dbu skra ljang ser/__lta stangs cer re ba/__snyan la mu dra nag po dang /__mgul du sing+ga nA da'i rwa dung 'chang zhing sku la tsakra kan+ta ste 'khor lo lta bu'i bem po gsol pa/__sgom shing kos ko brtan pa'i tshul gyis skyil krung dang bcas drang po bzhugs shing /__phyag mnyam bzhag gi steng na ku ba'i snod thogs pa/__mthong ba'i mod la nyams dga' zhing tha mal gyi snang ba hrul por 'jig pa/__lhan cig skyes pa'i man 'dra/__gau rak+Sha la gus pas 'dud/__dang /__gau rak+Sha nA tha pA dar bsgyur ba dang /__!__grub pa'i slob dpon chen po tan+ti 9pa sngo sangs shin tu smin pa'i na tshod tsam gyi sku lus/__ag tshom dang sma ra ring du 'phyang ba dbu skyes dang bcas pa rab tu dkar ba'i mdangs can/__ras kyis smad dkris gsol zhing khri 'thags kyi bya ba la brtson pa'i tshul du bzhugs pa/__lhan cig skyes pa'i sogs dang /__tan+ti pa la gus pas 'dud/__tan+ti ka pA da sogs dang /__!__grub pa'i dbang phyug rdo rje dril 10bu pa sku mdog sngo sangs ral pa'i thor tshugs can/__rus pa'i rgyan drug dang stag gi pags pa'i sham thabs 'phyar ba/__phyag gnyis rdo rje dang dril bu 'dzin pas yum pad+ma can gyi mtshan nyid yongs su rdzogs pa/__rdo rje rnal 'byor ma'i rnam pa dkar gsal lta bas chog mi shes pa la 'khyud de mnyam par sbyor ba'i bde bas rgyas pa/__zhabs g.yas brkyang gis stabs can/__zhes dang /__dril bu pa la phyag 'tshal 'dud/__badz+ra gaN+Da pA da zhes dang /__!__grub pa'i dbang phyug chen po dza lan+d+ha 11ri pa sku mdog dkar dmar ral pa'i thor tshugs dang rus pa'i rgyan can ras dmar po'i 'doms dkris gsol ba zhabs phyogs gcig rgyab nas dpung par bkal zhing /__phyogs gcig bzhengs pa'i tshul can/__phyag gnyis rdo rje gtsug tor gyi phyag rgya ldog ste spyi bor 'chings ba/__g.yon gyi phyogs nas rigs ma rnal 'byor ma'i cha byad can gyis 'dud bzhin pa/__zhes dang /__dza lan+d+ha ri'i zhabs la 'dud/__dza lan+d+ha ri pA da zhes pa dang /__!__grub pa'i slob dpon chen po kuk+ku 12ri pa sku mdog sngo sangs rus pa'i rgyan dang ral pa'i thor tshugs can/__phyed skyil gyis bzhugs shing thod pa 'dzin pa'i pang du rdo rje yan lag ma kuk+ku rI gzhon nu'i gzugs can bzung ste dgyes rgur rol pa/__kuk+ku rI pa phyag 'tshal 'dud/__kuk+ku rI pA da zhes dang /__!__grub pa'i slob dpon chen po l+wa ba 13pa sku mdog dkar dmar tshangs par spyod pa'i cha _byad can/__sku la l+wa pa'i dum bu brgya phrag bsdus te drubs pa'i na bza' gsol zhing /__phyag gnyis mnyam bzhag gi phyag rgyas skyil mo krung bcas te gnyid 'thug gi zol gyis 'od gsal bsam mi khyab la mnyam par 'jog pa'i tshul can/__l+wa ba pa la phyag 'tshal 'dud/__kam+pa lA pa da bsgyur ba dang /__!__nyer spyod mtha' klas pas brgyan pa'i dbus su grub pa'i slob dpon chen po in+d+ra 14b+hu ti mi'i bdag po stobs kyis 'khor los sgyur ba'i cha byad sku mdog dkar dmar mdzes shing brjid la chags pa'i nyams can/__dar dang rin po che'i rgyan gyis spras te nor bu'i khri stan mtho zhing yangs la bkod legs pa'i steng du bde lugs su bzhugs pa'i sku'i mtha' skor du bud med rin po che mtshan nyid rdzogs pa'i btsun mo'i mchog lnga brgyas bskor te 'dod pa'i yon tan thams cad la rjes su chags pas rtag tu dges rgur rol pa'i rnam pa can/__in+d+ra bo d+hi la phyag 'tshal/__shrI nA ren+d+ra in+d+ra bo d+hi pA da zhes/__!__grub pa'i slob dpon chen po dpal bde ba chen po pad+ma 15kA ra sku mdog dkar la dmar ba'i mdangs chags pa/__zhal gyi dkyil 'khor rab tu gang zhing rgyas la/__pad+ma rgyas pa lta bu'i spyan ras dang mchu sgros mnga' ba/__dbu'i dpral ba'i dbyings su rdo rjes mtshan pa'i pad+ma rgyas pa'i re khAs bkra zhing /__sku'i cha shas thams cad du pad+ma ut+pal lcags kyu zhags pa la sogs pa'i sha mtshan dge ba sha stag gis spras pa/__kaN+Da ke'i cod pan mnabs shing /__gsang gos kyi steng du chos gos rnam pa gsum gsol ba/__phyag g.yas rdo rje rtse lnga pa thugs kar gdengs shing /__g.yon ka pA la bdud rtsis gang ba dkur brten pa'i mchan du rdo rje'i kha T+wA~M ga bcug pa/__zhabs rdo rje'i skyil mo krung gis bzhugs pa'i sku g.yas g.yon nas mtshan nyid thams cad yongs su rdzogs pa'i pad+ma nI bcu drug pa'i lang tsho can gyis brten pa/__lhan cig skyes pa'i sogs dang /__pad+ma kA rar phyag 'tshal 'dud/__shrI ma hA su kha pad+ma badz+ra pA da zhes bsgyur ba dang /__!__grub pa'i slob dpon chen po nag po bi ru 16pA/__dbu la rdo rje thod ces bya ba rten 'brel gyi byin rlabs kyi cod pan sngon po gsol zhing /__phyag g.yas ba men gyi rwa bdud rtsis gang ba 'dzin cing gsol ba/__g.yon pus mo'i steng du bzhag pa/__sku'i mdun du ka pa la ma hA ba las gang ba bzhag cing /__dbu skra co reg pags pa'i gdan dang 'doms dkris can/__lhag ma rgyan dang na bza' spangs shing rnal 'byor pa hur bag chags pa'i rnam pa/__sku'i g.yon nas rig ma thal mo sbyar ba dang bcas pa/__lhan cig sogs dang /__nag po bi rU pa la 'dud/__kr-iSh+Na bi rU pA da zhes bsgyur/__!__brgyan pa'i dbus su grub pa'i dbang phyug til+li 17pa chen po sku mdog sngo nag dbu skra ral pa'i thor tshugs can/__ras kyi aM ga rag gsol zhing mi 'greng gang tsam gyi nam mkha' la 'phags te til brdung ba'i rnam pa can/__sku'i mdun du rig ma til mkhan mo'i rnam pas bar snang la gnas bzhin tu til lugs pa'i bya ba la brtson pa dang thabs gcig tu lhan cig skyes pa'i ye shes ji ltar 'byung ba'i brda ston par mdzad pa/__bde ba chen po'i ye shes kyi sogs dang /__til+li pa la phyag 'tshal lo/__/til+li ka pA da hU~M hU~M/__!__grub pa'i slob dpon chen po dpal 18nA ro pa sku mdog smug nag lta bar mi bzod pa'i zil dang ldan pa/__dbu skra ral pa'i thor tshugs dang rus pa'i rgyan drug gis spras shing dar gyi ang+ga rag gsol ba/__zhing chen gyi pags pa bshus ma thag pa khrag 'dzag pa stod g.yogs kyi tshul du mnabs pa'i rkang lag gnyis nas phyag gis bzung ste phan tshun du brgyangs pa/__zhabs brkyang bskum gyi tshul du bzhugs pa'i gar stabs can/__lhan cig skyes pa'i sogs dang /__nA ro pa yi zhabs la 'dud/__nA ro pA da zhes bsgyur ba dang /__!__dbus su grub pa'i slob dpon chen po dpal shAn+ti 19pa sku mdog dkar sngo gnas brtan rdo rje 'dzin pa chen po/__cung zad smin pa'i na tshod kyi rnam pa/__chos gos rnam pa gsum dang paN+Di ta'i cod pan mnabs shing /__phyag gnyis chos 'chad kyi phyag rgya dang bcas te ta la'i byang bur bris pa'i glegs bam bsnams pa/__zhabs rdo rje skyil mo krung gis gding ba la bzhugs pa dang /__shAn+ti pa la phyag 'tshal lo/__/rat+na a kA ra shAn+ti pA da zhes sbyar/__de bzhin tu/__!__brgyan pa'i dbus su grub pa'i slob dpon chen po shrI satwA 20nA tha shAn+ti gup+ta sku mdog smug nag__/rin po che dang rus pa'i rgyan tho re bas spras pa/__sku sha nyams rgyas shing brjid la hur bag chags pa/__dbu skra co bregs ras kyi 'doms dkris gru gsum pa gsol zhing zhabs gnyis bzang po'i 'dug stangs kyis rin po che'i khri la pags pa'i gdan gyi steng du bzhugs pa/__phyag gnyis chos kyi 'khor lo'i phyag rgya thugs kar 'ching ba/__lhan cig skyes pa'i sogs dang /__shAn+ti gup+ta la phyag 'tshal/__shrI sa twA nA tha shAn+ti gup+ta hU~M hU~M/__zhes sbyar/__!__de bzhin du pags pa'i gdan la rtsa ba'i bla ma dang gnyis su med pa'i grub pa'i slob dpon chen po shrI bud+d+ha gup+ta 21dzo ki'i cha byad sku mdog dkar la dmar ba'i mdangs chags pa/__sku bong che zhing lhun chags la dwang ba 'dren pa/__mthong ba'i mod la ba spu g.yo zhing skyi bung zhes byed pa'i zil dang ldan pa dbu skra ral pa thor tshugs su bcings pa'i rtse mo nas ral pa'i zar bu cung zad rgyab tu 'phyang ba/__me tog ser po kha bye ma thag pa'i thod bcings gsol ba/__bgres rgud spangs pa'i langs tshos gang ba la gnas shing hur bag chags pa/__ras kyi 'doms dkris dang na bza' gsol zhing pus 'khyud can/__phyag g.yas sa gnon pus steng du bkab cing g.yon ka pA la bdud rtsis gang ba dkur brten pa'i tshul gyis 'dzin pa/__sku drang por bsrangs te skyil krung phyed pa'i 'dug stangs kyis bzhugs pa/__lhan cig skyes pa'i sogs dang /__bud+d+ha gup+tar gus phyag 'tshal/__shrI bud+d+ha gup+ta nA tha hU~M hU~M/__zhes sbyar ba ma gtogs gong dang 'dra'o/__/de ltar 'di ni grub thob brgyad cu rtsa bzhi'i byin rlabs slob dpon dpa' bo 'od gsal gyi lugs la gtso bor brten cing /__'phags yul grub pa'i slob dpon rta mchog gis mdzad pa'i bla sgrub dang /__rtsod dus kyi dpal he ru ka shAn+ti gup+ta'i man ngag bka' babs bdun ldan gyi bla ma'i rnal 'byor las kyang kha bskang ste yongs su grags pa'i grub chen 'ga' zhig la gsol ba gdab pa'i phyir tshad ldan mkhas pa'i zhal lung ji lta bar bris pa ste/__'dir ma smos pa'i rnal 'byor gyi dbang phyug brgyad cu rtsa bzhi gzhan rnams kyis mtshon grub pa brnyes pa'i dam pa gang la'ang sbyar du rung /__tshogs gsog gi mchod phreng rgyas pa spro na sbyor ba yo byad bsham bkod/__gnas dang mchod pa'i yo byad byin rlabs/__bla ma spyi'i phyag 'tshal/__nyer spyod/__'dod yon rin chen sna bdun/__rig ma bcu drug sogs kyi mchod phreng /__nang bdud rtsi'i mchod pa/__gsang ba snyoms 'jug gi mchod pa/__de kho na nyid phyag rgya chen po'i mchod pa/__maN+Dal/__gsol 'debs/__sdig pa bshags pa sogs yan lag lhag ma rnams bla ma mchod pa'i cho ga gzhan nas 'byung ba dang spel/__tshogs mchod byed par spro na rje grol mchog zhabs kyi gsung tshogs mchod rgya gar ma lta bu sbyar na shin tu legs pa yin no/__/yongs grubaX bde cheXn mchog brnyes pa'i/__/blaX maX'i rnalaX 'aXbyor bgyis pa'i dges/__/byinaX rlabaXs sprinaX gyiX rngaX daXbyangs kyis/__/zung 'jug ngal 'tsho brten gyur cig__/mang+ga laM/_