JKW-KABUM-12-NA-001-012

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 12, sde tshan 1, Text 12, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 12: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

12 116-119	ཤེར་ཕྱིན་ཡི་གེ་གཅིག་མའི་གདམས་ངག་ཟབ་དོན་སྙིང་པོ། sher phyin yi ge gcig ma'i gdams ngag zab don snying po Spiritual Instructions - gdams ngag	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཤེར་ཕྱིན་ཡི་གེ་གཅིག་མའི་གདམས་ངག་ཟབ་དོན་སྙིང་པོ། ༄༅། །ཤེར་ཕྱིན་ཡི་གེ་གཅིག་མའི་གདམས་ངག་ཟབ་དོན་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་པྲཛྙཱ་པཱ་ར་མི་ཏཱ་ཡཻ། ཤེས་རབ་ཀྱི་ཕ་རོལ་ཏུ་ཕྱིན་མའི་ཡང་སྙིང་ཡི་གེ་གཅིག་མ་ཉམས་སུ་ལེན་པར་འདོད་པས། ཁྲུས་བྱས་སྟན་བདེ་བ་ལ་སྐྱིལ་མོ་ཀྲུང་བཅས་ཏེ་བྱང་ཆུབ་སེམས་ཀྱི་དྲན་པ་མངོན་དུ་བཞག་ལ། སངས་རྒྱས་ཆོས་ཚོགས་ལན་གསུམ་སྔོན་དུ་འགྲོ་བས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་པདྨ་དང་ཟླ་བའི་གདན་གྱི་སྟེང་དུ་རང་ཉིད་སྐད་ཅིག་གིས་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་གསེར་བཙོ་མའི་མདངས་ཅན། ཞལ་གཅིག་ཕྱག་བཞི་མ། ཕྱག་གཡས་ཀྱི་དང་པོས་རལ་གྲི་ནམ་མཁའ་ལ་འཕྱར་ཞིང་། གཡོན་དང་པོས་མཉམ་གཞག་མཛད་པ། གཡས་ཀྱི་གཉིས་པས་བགྲང་ཕྲེང་དང་། གཡོན་གྱི་གཉིས་པས་པུསྟི་བསྣམས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་། ཞབས་གཉིས་མཉམ་པའི་སྟབས་ཀྱིས་བཞེངས་པའི་སྐུར་གྱུར། ཅེས་བརྗོད་ཅིང་བསམས་ལ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ། དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་མང་པོ་དང་ཐབས་ཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཤེས་རབ་ཀྱི་ཕ་རོལ་ཏུ་ཕྱིན་མ་ཡི་གེ་གཅིག་མ་ཞེས་བྱ་བ་འདི་སེམས་ཅན་རྣམས་ལ་ཕན་པ་དང་བདེ་བའི་ཕྱིར་ཟུངས་ཤིག །འདི་ལྟ་སྟེ། ཞེས་གླེང་གཞི་དང་། མཉན་པར་གདམས་པའི་དོན་ཡིད་ལ་དྲན་བཞིན་དུ་བཏོན་པའི་མཐར། རང་ཉིད་ལྷ་སྐུའི་གསལ་སྣང་སྟོང་པར་སྦྱངས་ཏེ། ལྕེ་རྩེར་ཨ་ཡིག་ཙམ་ལ་སེམས་གཟུང་། དེ་ཡང་མི་དམིགས་པར་བསམས་ལ་སྤྲོས་བྲལ་སྟོང་པ་ཉིད་ཀྱི་ངང་དུ་བློ་བཞག་སྟེ་ཨ་ཉི་ཤུ་རྩ་གཅིག་གདོན། དེ་ནས་རྟེན་ཅིང་འབྲེལ་བར་འབྱུང་བ་སྒྱུ་མ་ལྟ་བུའི་ངང་ནས། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་ཕ་རོལ་ཏུ་ཕྱིན་པ་རྗེས་སུ་རྟོགས་ཤིང་ཡི་རངས་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་ཡི་རང་རྫོགས་པར་བཏོན། ཚར་གྲངས་མང་དུ་གདོན་ནའང་ཕྱག་འཚལ་ནས་བརྩམས་ཏེ་བསྐྱར། མཐར། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་སོགས་བསྔོ་སྨོན་བྱའོ། །དེ་ལྟར་སྦྱོར་དངོས་རྗེས་གསུམ་ཚང་བར་ཉམས་སུ་བླངས་པས་ཡུམ་རྒྱས་པར་ཚར་རེ་བཏོན་པའི་བསོད་ནམས་དང་མཉམ་པས་མཚོན་ཕན་ཡོན་དཔག་ཏུ་མེད་པ་དང་། བདུད་དང་བདུད་ཀྱི་རིས་ཀྱི་བར་དུ་གཅོད་པ་ཐམས་ཅད་སྲུང་བ་དང་། མྱུར་དུ་ཆོས་ཐམས་ཅད་ཀྱི་དེ་ཁོ་ན་ཉིད་མངོན་སུམ་དུ་རྟོགས་པར་འགྱུར་བ་ཡིན་ནོ། །ཞེས་པའང་ཡིག་རྙིང་གསལ་བྱེད་དང་བཅས་པའི་དགོངས་དོན་སྙིང་པོར་དྲིལ་པའི་དགེ་བས་འགྲོ་ཀུན་ཤེས་རབ་ཀྱི་ཕ་རོལ་ཏུ་ཕྱིན་མའི་གོ་འཕང་ལ་མྱུར་དུ་རེག་པའི་རྒྱུར་སིདྡྷི་ར་སྟུ། སརྦ་མངྒ་ལཾ་བྷ་བཏུ།། །། ༈

[edit]

sher phyin yi ge gcig ma'i gdams ngag zab don snying po/ @#/_/sher phyin yi ge gcig ma'i gdams ngag zab don snying po zhes bya ba bzhugs so/__/na mo gu ru pradz+nyA pA ra mi tA yai/__shes rab kyi pha rol tu phyin ma'i yang snying yi ge gcig ma nyams su len par 'dod pas/__khrus byas stan bde ba la skyil mo krung bcas te byang chub sems kyi dran pa mngon du bzhag la/__sangs rgyas chos tshogs lan gsum sngon du 'gro bas/__oM swa b+hA wa shud+d+haHsarba d+harmAHswa b+hA wa shud+d+ho\u0f85haM/__stong pa'i ngang las pad+ma dang zla ba'i gdan gyi steng du rang nyid skad cig gis shes rab kyi pha rol tu phyin ma sku mdog gser btso ma'i mdangs can/__zhal gcig phyag bzhi ma/__phyag g.yas kyi dang pos ral gri nam mkha' la 'phyar zhing /__g.yon dang pos mnyam gzhag mdzad pa/__g.yas kyi gnyis pas bgrang phreng dang /__g.yon gyi gnyis pas pusti bsnams pa/__dar dang rin po che'i rgyan thams cad kyis brgyan cing /__zhabs gnyis mnyam pa'i stabs kyis bzhengs pa'i skur gyur/__ces brjod cing bsams la/__smra bsam brjod med shes rab pha rol phyin/__/ma skyes mi 'gag nam mkha'i ngo bo nyid/__/so so rang rig ye shes spyod yul ba/__/dus gsum rgyal ba'i yum la phyag 'tshal lo/__/'di skad bdag gis thos pa dus gcig na/__bcom ldan 'das rgyal po'i khab bya rgod phung po'i ri la/__dge slong gi dge 'dun chen po brgya phrag phyed dang bcu gsum dang /__byang chub sems dpa' bye ba khrag khrig mang po dang thabs cig tu bzhugs so/__/de'i tshe bcom ldan 'das kyis tshe dang ldan pa kun dga' bo la 'di skad ces bka' stsal to/__/kun dga' bo shes rab kyi pha rol tu phyin ma yi ge gcig ma zhes bya ba 'di sems can rnams la phan pa dang bde ba'i phyir zungs shig__/'di lta ste/__zhes gleng gzhi dang /__mnyan par gdams pa'i don yid la dran bzhin du bton pa'i mthar/__rang nyid lha sku'i gsal snang stong par sbyangs te/__lce rtser a yig tsam la sems gzung /__de yang mi dmigs par bsams la spros bral stong pa nyid kyi ngang du blo bzhag ste a nyi shu rtsa gcig gdon/__de nas rten cing 'brel bar 'byung ba sgyu ma lta bu'i ngang nas/__bcom ldan 'das kyis de skad ces bka' stsal pa dang /__tshe dang ldan pa kun dga' bo dang /__dge slong de dag dang /__byang chub sems dpa' sems dpa' chen po de dag thams cad kyis pha rol tu phyin pa rjes su rtogs shing yi rangs nas/__bcom ldan 'das kyis gsungs pa la mngon par bstod do/__/zhes yi rang rdzogs par bton/__tshar grangs mang du gdon na'ang phyag 'tshal nas brtsams te bskyar/__mthar/__bsod nams 'di yis thams cad gzigs pa nyid/__/thob nas nyes pa'i dgra rnams pham byas te/__/skye rga na 'chi'i rba klong 'khrugs pa yi/__/srid pa'i mtsho las 'gro ba sgrol bar shog__/ces sogs bsngo smon bya'o/__/de ltar sbyor dngos rjes gsum tshang bar nyams su blangs pas yum rgyas par tshar re bton pa'i bsod nams dang mnyam pas mtshon phan yon dpag tu med pa dang /__bdud dang bdud kyi ris kyi bar du gcod pa thams cad srung ba dang /__myur du chos thams cad kyi de kho na nyid mngon sum du rtogs par 'gyur ba yin no/__/zhes pa'ang yig rnying gsal byed dang bcas pa'i dgongs don snying por dril pa'i dge bas 'gro kun shes rab kyi pha rol tu phyin ma'i go 'phang la myur du reg pa'i rgyur sid+d+hi ra stu/__sarba mang+ga laM b+ha btu//___//__!_