JKW-KABUM-11-DA-014-008

🚧 This website is under continued development. We appreciate your patience!

Previous Text Back to Volume PageNext Text

བཅོམ་ལྡན་འདས་རྡོ་རྗེ་ཁྱུང་ཁྲའི་སྒྲུབ་ཐབས་བྱིན་རླབས་དང་བཅས་པ་བདུད་རྩིའི་ཆུ་རྒྱུན།

Wylie title	bcom ldan 'das rdo rje khyung khra'i sgrub thabs byin rlabs dang bcas pa bdud rtsi'i chu rgyun
Location	mkhyen brtse'i bka' 'bum Volume 11, sde tshan 14, Text 8, Pages 474-497 (Folios 36b1 to 48a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bcom ldan 'das rdo rje khyung khra'i sgrub thabs byin rlabs dang bcas pa bdud rtsi'i chu rgyun. In 'jam dbyangs mkhyen brtse'i dbang po'i bka' 'bum, Vol. 11: 474-497. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang  ·  Sadhanas - Evocation Ritual - sgrub thabs
Deity	rdo rje khyung khra
Colophon	།ཅེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རང་འདྲའི་བློ་དམན་རྣམས་འཇུག་པ་བདེ་བའི་སླད། མཉམ་མེད་གཟུངས་ཀྱི་དཔལ་བ་དང་། རྫོང་ཆུང་པ་ཀུན་དགའ་བློ་གྲོས་ཀྱིས་མཛད་པའི་མངོན་རྟོགས་དང་། འཕགས་པ་རིན་པོ་ཆེས་མཛད་པར་གྲགས་པའི་བྱིན་རླབས་ཀྱི་ཆོ་ག །བྱམས་པ་ངག་དབང་དཔལ་བཟང་གིས་མཛད་པའི་ཟུར་འདེབས་དང་བཅས་པ་རྣམས་ཕྱོགས་གཅིག་ཏུ་བསྒྲིགས་ཏེ། བཀླགས་པས་གྲུབ་པར་བསྡེབས་པ་སརྦ་དཱ་སུ་ཤྲེ་ཡོ་བྷ་བ་ཏུ།།
	ces pa'ang bya bral ba 'jam dbyangs mkhyen brtse'i dbang pos rang 'dra'i blo dman rnams 'jug pa bde ba'i slad/__mnyam med gzungs kyi dpal ba dang /__rdzong chung pa kun dga' blo gros kyis mdzad pa'i mngon rtogs dang /__'phags pa rin po ches mdzad par grags pa'i byin rlabs kyi cho ga__/byams pa ngag dbang dpal bzang gis mdzad pa'i zur 'debs dang bcas pa rnams phyogs gcig tu bsgrigs te/__bklags pas grub par bsdebs pa sarba dA su shre yo b+ha ba tu

1 Texts in this Section (sde tshan or chos tshan)

8 474-497	བཅོམ་ལྡན་འདས་རྡོ་རྗེ་ཁྱུང་ཁྲའི་སྒྲུབ་ཐབས་བྱིན་རླབས་དང་བཅས་པ་བདུད་རྩིའི་ཆུ་རྒྱུན། bcom ldan 'das rdo rje khyung khra'i sgrub thabs byin rlabs dang bcas pa bdud rtsi'i chu rgyun Permission to Invoke (anujñā) - rjes gnang   ·   Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བཅོམ་ལྡན་འདས་རྡོ་རྗེ་ཁྱུང་ཁྲའི་སྒྲུབ་ཐབས་བྱིན་རླབས་དང་བཅས་པ་བདུད་རྩིའི་ཆུ་རྒྱུན་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། བརྟན་གཡོའི་དུག་རྣམས་ཡེ་ཤེས་ཀྱི། །བདུད་རྩིས་འཇོམས་མཛད་བླ་མ་དང་། །དབྱེར་མེད་རྡོ་རྗེ་མཁའ་ལྡིང་པ། །བཏུད་ནས་དེ་ཡི་མན་ངག་དབྱེ། །འདི་ལ་གསུམ། སྒྲུབ་པའི་ཐབས། བྱིན་རླབས་ཀྱི་ཆོ་ག །ལས་ཚོགས་ཀྱི་ངེས་པའོ། །དང་པོ་ནི། འདི་ཉིད་ཀྱི་བྱིན་རླབས་ཟབ་མོས་རྒྱུད་སྨིན་ཅིང་། དམ་ཚིག་དང་ལྡན་པའི་རྣལ་འབྱོར་པ་སྟན་བདེ་བ་ལ་འདུག་སྟེ། སྐྱབས་འགྲོ་སེམས་བསྐྱེད་ཚད་མེད་བསྒོམ་ལ་སྤྱི་ལྟར་སྔོན་དུ་འགྲོ་བས། ཨོཾ་སྭ་བྷཱ་བ་ཤུདྡྷཿསརྦ་དྷ་རྨཱཿསྭཱ་བྷཱ་བ་ཤུདྡྷོ྅་ཧཾ། སྟོང་པའི་ངང་ལས་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་གྱི་དབུས་སུ་ཀླུ་ཆེན་པོ་བརྒྱད་བསྣོལ་བའི་གདན་གྱི་སྟེང་དུ་རང་གི་རིག་པ་ཀྵིཾ་ལྗང་སྔོན་ལས་འོད་ཟེར་འཕྲོས། གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། རང་ཉིད་སྐད་ཅིག་གིས་རྡོ་རྗེ་ཁྱུང་ཁྲ་སྐུ་མདོག་སྣ་ཚོགས་པའི་མདངས་ཅན། བརླ་གཉིས་མན་ཆད་ས་དག་པའི་རང་བཞིན་སེར་པོ། ལྟོ་བ་ཆུ་དག་པའི་རང་བཞིན་དཀར་པོ། སྙིང་ག་མེ་དག་པའི་རང་བཞིན་དམར་པོ། མགྲིན་པ་ནས་སྨིན་མཚམས་མན་ཆད་རླུང་དག་པའི་རང་བཞིན་ལྗང་གུ། སྤྱི་བོ་ནམ་མཁའི་རང་བཞིན་སྔོན་པོ། །རྡོ་རྗེའི་རྭ་དང་མཆུ་ཤིན་ཏུ་རྣོ་བ། སྡེར་མོ་ཟངས་ལས་གྲུབ་པ། སྤྱན་གསུམ་སྡང་མིག་ཏུ་གཟིགས་ཤིང་། ཁྲོ་གཉེར་དཔྲལ་བའི་དབྱིངས་སུ་བསྡུས་པ། སྨིན་མ་དམར་སེར་མེ་ལྟར་འབར་ཞིང་། དབུ་སྐྲ་ཁམ་སེར་གྱེན་དུ་བརྫེས་པ། ཕྱག་གཡས་སྐྱབས་སྦྱིན་གྱི་ཕྱག་རྒྱས་ཀླུའི་རྒྱལ་པོའི་གཙུག་ནས་ཕྲོགས་པའི་ནོར་བུ་རིན་པོ་ཆེ་རྭ་གཡས་ཀྱི་ཕྱོགས་ཀྱི་ནམ་མཁར་འཛིན་པས་སྒྲུབ་པ་པོ་ལ་དངོས་གྲུབ་སྩོལ་བ། གཡོན་གདུག་པ་ཅན་ཐམས་ཅད་སྡིགས་པར་མཛད་པའི་སྡིགས་མཛུབ་ཐུགས་ཀར་གཏོད་པས་ནོར་བུའི་ཕྲེང་བ་བསྣམས་པ། རྡོ་རྗེའི་མཆུས་སྦྲུལ་གདུག་པ་ཞལ་དུ་གསོལ་ཞིང་རིན་པོ་ཆེ་དང་སྦྲུལ་གྱིས་བརྒྱན་པ། རྡོ་རྗེའི་གཤོག་པ་རྒྱབ་ནག་པོ། མདུན་དཀར་པོ། བར་མཚམས་དམར་པོ་ཅན་ནམ་མཁར་གདེངས་ཤིང་རྡེབ་པ། ཡེ་ཤེས་ཀྱི་མེ་འབར་བའི་དབུས་ན་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་སྐུ་ཅན་དུ་གསལ་བའི་ཐུགས་ཀར་སྣ་ཚོགས་པདྨ་འདབ་མ་བཞི་པའི་དབུས་དང་ཕྱོགས་བཞིར་པདྨ་དང་ཉི་མའི་གདན་རེ་རེའི་སྟེང་དུ། ཡེ་ཤེས་སེམས་དཔའ་རིགས་ལྔའི་ངོ་བོ་དབུས་སུ་རྡོ་རྗེའི་ཁྱུང་སྔོན་པོ་གཡས་རྡོ་རྗེ། ཤར་དུ་འཁོར་ལོའི་ཁྱུང་དཀར་པོ་གཡས་འཁོར་ལོ། །ལྷོར་རིན་པོ་ཆེའི་ཁྱུང་སེར་པོ་གཡས་རིན་པོ་ཆེ། ནུབ་ཏུ་པདྨའི་ཁྱུང་དམར་པོ་གཡས་པདྨ། བྱང་དུ་རལ་གྲིའི་ཁྱུང་ལྗང་གུ་གཡས་རལ་གྲི་སྟེ་སོ་སོའི་རིགས་ཀྱི་ཕྱག་མཚན་རྣམས་འཕྱར་ཐབས་སུ་འཛིན་ཅིང་། གཡོན་ཐུགས་ཀར་སྡིགས་མཛུབ་མཛད་པ། རྒྱན་ཆ་ལུགས་ཐམས་ཅད་རང་ཉིད་དང་མཚུངས་པ། དེ་རྣམས་ཀྱི་ཐུགས་ཀར་པད་ཉིའི་གདན་གྱི་སྟེང་དུ། ཏིང་ངེ་འཛིན་སེམས་དཔའི་ངོ་བོ་ཁྱུང་དབུས་མའི་ཐུགས་ཀར་ཀྵིཾ་ལྗང་སྔོན། ཤར་གྱི་ཐུགས་ཀར་ཨོཾ་དཀར་པོ། ལྷོའི་ཐུགས་ཀར་པ་སེར་པོ། ནུབ་ཀྱི་ཐུགས་ཀར་སྭཱ་དམར་པོ། བྱང་གི་ཐུགས་ཀར་ཧཱ་ལྗང་གུ་རྣམས་ཀྱི་མཐར། ཨོཾ་པཀྵིཾ་སྭཱ་ཧཱ། ཞེས་པའི་སྔགས་ཕྲེང་རང་རང་གི་ཁ་དོག་ཅན་གཡས་སྐོར་དུ་འཁོད་པ། དེ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་དབུས་ཀྱི་ས་བོན་ལས་འོད་ཟེར་འཕྲོས་པས་དཔལ་དུས་ཀྱི་འཁོར་ལོ་ཁྲོས་བའི་ངོ་བོ་བཅོམ་ལྡན་འདས་རྡོ་རྗེ་ཁྱུང་ཁྲ་རིགས་ལྔ་ལ། གཞན་ཡང་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས་བསམ་གྱིས་མི་ཁྱབ་པས་བསྐོར་བ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད་དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས་ཨོཾ་བཛྲཱི་བྷ་བ་ཨ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། ལུས་ཀྱི་ནང་ཐམས་ཅད་གང་། དྲི་མ་ཐམས་ཅད་དག །དབང་ཐམས་ཅད་ཐོབ། ཆུ་ལྷག་མ་ཡར་ལུད་པ་ལས་མི་བསྐྱོད་པ་སྤྲུལ་སྐུའི་རྣམ་པ་ཅན་གྱིས་དབུར་བརྒྱན། ཨོཾ་ཤྲཱི་བཛྲ་ག་རུ་ཌ་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། འབྱུང་ལྔའི་རང་བཞིན་འབྱུང་ཆེན་ལྔ་ལ་དབང་། །ཀུན་ཏུ་སྒྱུར་བྱེད་རྡོ་རྗེའི་འདབ་གཤོག་ཅན། །ཀླུ་ཡི་དཔལ་འཕྲོག་ལྷ་མིའི་དཔལ་གྱུར་པའི། །རྡོ་རྗེ་ནམ་མཁའ་ལྡིང་ལ་ཕྱག་འཚལ་ལོ། །ཞེས་པས་བསྟོད། རང་ལྷའི་ང་རྒྱལ་བརྟན་པའི་ངང་ནས། ཨོཾ་པཀྵིཾ་སྭཱ་ཧཱ། ཞེས་པའི་སྔགས་ཀྱི་བཟླས་པ་ཅི་ནུས་བྱ། སྐབས་སུ་ཐུགས་ཀའི་ཁྱུང་ཡིག་འབྲུ་དང་བཅས་པ་ལས་འོད་ཟེར་འཕྲོས། ས་གསུམ་གྱི་གདུག་པ་ཅན་ཐམས་ཅད་ཚར་བཅད། བླ་མ་ཡི་དམ་རྒྱལ་བ་སྲས་དང་བཅས་པའི་ནུས་མཐུ་ཡོན་ཏན་གྱི་ཚོགས་ཇི་སྙེད་ཡོད་པ་ཐམས་ཅད་འོད་ཟེར་གྱི་རྣམ་པར་སྤྱན་དྲངས་ཏེ་ཐིམ་པས་རྒྱུད་བྱིན་གྱིས་བརླབ་པའི་མོས་པའང་བྱའོ། །ཐུན་མཐར། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཀླུ་དང་ས་བདག་གི་གནོད་པ་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། ཡི་གེ་བརྒྱ་པ་ལན་གསུམ་གྱིས་སྔགས་ཀྱི་ལྷག་ཆད་ཁ་བསྐང་ཞིང་བྱིན་རླབས་ཀྱི་རྒྱུན་བརྟན་པར་བྱས་ལ་གནས་གསུམ་བསྲུང་། བསྔོ་སྨོན་ཤིས་བརྗོད་སྤྱི་ལྟར་བྱས་ནས་ཐུན་མཚམས་ཀྱི་བྱ་བ་ལ་འཇུག །བསྙེན་པ་བྱེད་ན། ཐུན་གསུམ་མམ་བཞིའི་རིམ་པས་གཙོ་བོར་ལྷའི་གསལ་སྣང་ལ་སེམས་འཛིན་ཅིང་སྔགས་འབུམ་ཕྲག་གཅིག་གམ་ལྔ་བཟླ། གྲུབ་ན་ཐུན་ཐམས་ཅད་དམ། མ་གྲུབ་ན་སྔ་ཐུན་གྱི་མཇུག་ཏུ་གཏོར་མགྲོན་སྤྱན་དྲངས་པས་གཏོར་མ་འབུལ། སྒྲུབ་པ་ལ། གཙོ་བོར་འོད་ཟེར་སྤྲོ་བསྡུའི་དམིགས་པ་དང་བཅས་པ་འབུམ་ཕྲག་གསུམ་བྱ། དེ་ལྟ་བུའི་བསྙེན་སྒྲུབ་མཐར་ཕྱིན་པས་ཇི་སྐད་བཤད་པའི་ལས་ཀྱི་ཚོགས་ཐམས་ཅད་ཐོགས་པ་མེད་པར་འགྲུབ་ཅིང་། སྤྱིར་ཡང་རྡོ་རྗེ་ཁྱུང་གི་བསྙེན་སྒྲུབ་གང་དུ་བགྱིས་པའི་སའི་ཕྱོགས་དེའི་བརྟན་གཡོའི་དུག་ཐམས་ཅད་ཞི་བས་སྣོད་བཅུད་ཀྱི་དཔལ་ཕུན་སུམ་ཚོགས་པ་མཐའ་དག་སྐྱེད་པ་སོགས་ཡོན་ཏན་བསམ་གྱིས་མི་ཁྱབ་པ་འབྱུང་བའི་ཕྱིར། རིག་སྔགས་འཆང་བ་རྣམས་ཀྱིས་ཐོག་མ་ཁོ་ནར་རྡོ་རྗེ་ནམ་མཁའི་ལྡིང་བསྒོམ་པར་དཔལ་ལྡན་རྒྱུད་ལས་གསུངས་སོ། །གཉིས་པ་བྱིན་རླབས་ཀྱི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་བུའི་དབུས་སུ་མཎྜལར་རྡུལ་ཚོན་གྱིས་སྣ་ཚོགས་པདྨ་འདབ་མ་བཞི་པ་བྲིས་པའི་དབུས་དང་ཕྱོགས་བཞིར་ཁྱུང་རིགས་ལྔའི་སྐུ་མདོག་དང་མཐུན་པའི་ཚོན་ཕུང་རེ་དགོད། དེའི་སྟེང་དུ་མཉྫིའི་ཁར་ཁྲོ་བོའི་གཏོར་མ་ཟུར་གསུམ་པ་སྙིང་གཟུགས་མདུན་ནོར་བུ་མིག་གསུམ་པའི་དབྱིབས་འདྲ་བ་ལ་དར་གདུགས་ལྗང་གུས་བརྒྱན་ཅིང་སྐུ་ཅིག་ཡོད་ནའང་འཛུག །ཉ་ཤ་སོགས་དམ་རྫས་ཀྱིས་བསྐོར། མདུན་དུ་མེ་ལོང་ལ་ཡིག་འབྲུ་ལྔ་བྲིས་པ་དང་། དེའི་མདུན་དུ་ཟླུམ་གཏོར་གསུམ། མཐའ་སྐོར་དུ་ཆུ་གཉིས་སྔོན་འགྲོའི་ཉེར་སྤྱོད། ཉེ་ལོགས་ཅི་བདེ་བར་གཞི་བདག་གཏོར་མ། སློབ་དཔོན་གྱི་མདུན་དུ་བུམ་པ་གཉིས། རྡོར་དྲིལ། ནང་མཆོད་སོགས་དགོས་པའི་ཡོ་བྱད་ཐམས་ཅད་འདུ་བྱ། དེ་ནས་སྔོན་འགྲོ་གཏོར་མ་སྤྱི་ལྟར་བཏང་། གནས་ཡོ་བྱིན་རླབས་སྔོན་དུ་འགྲོ་བས་སྐྱབས་སེམས་ནས་བཟླས་པ་བསྡུ་པའི་བར་བདག་བསྐྱེད་གོང་དུ་བཤད་པ་བཞིན་གྲུབ་རྗེས། ཚོམ་བུ་དང་གཏོར་མ་གཉིས་ཀ་ལ་དམིགས་ཏེ་ཨ་མྲྀ་ཏས་བསང་། ས་བྷཱ་བས་སྦྱང་། སྟོང་པའི་ངང་ལས་པྃ་ལས་སོགས་ནས། དབུར་བརྒྱན་ཅེས་པའི་བར་རང་གི་རིག་པ་དང་། རང་ཉིད་ཅེས་པའི་ཚིག་དོར། བདག་ལ་མངོན་པར་དབང་བསྐུར་ཞེས་པའི་ཚབ་ཏུ་འདི་ལ་ཞེས་བསྒྱུར་བ་མ་གཏོགས་བདག་བསྐྱེད་ལྟར་གསལ་བཏབ། མཆོད་པ་བྱིན་རླབས་ལ་མཆོད་བསྟོད་རྒྱས་བསྡུས་གང་རིགས་དང་། མདུན་བསྐྱེད་ཀྱི་ཐུགས་རྒྱུད་བསྐུལ་བར་དམིགས་ཏེ་བཟླས་པ་ཅུང་ཟད་བྱ། བུམ་པ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱྃ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་། ནང་ཆུ་དང་བཅུད་སྣ་ཚོགས་ཀྱིས་གང་བའི་དབུས་སུ་པྃ་ལས་སོགས་ནས་དབུར་བརྒྱན། ཅེས་པའི་བར་མདུན་བསྐྱེད་ལྟར་གསལ་གདབ་ལ་མཆོད་བསྟོད་བྱ། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ཏེ་སོང་། བུམ་པའི་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། སྐུའི་ཆ་ཐམས་ཅད་ནས་བདུད་རྩིའི་རྒྱུན་བབས་པས་བུམ་པ་གང་བར་བསམ་ལ་བཟླས་པ་ཅི་ནུས་དང་། ལས་ཐམས་ཅད་པའི་བུམ་པར་སྐད་ཅིག་གིས་ཁྲོ་བོ་བདུད་རྩི་འཁྱིལ་བ་གསལ་བའི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་ཨ་མྲྀ་ཏ་བཟླ། གཉིས་ཀ་ལ་དམིགས་ཏེ་དབང་དང་ཁྲུས་ཀྱི་དོན་ཏུ་ཨབྷི་ཥེ་ཀའང་ཅི་རིགས་པ་བཟླས་མཐར་མཆོད་ཅིང་བསྟོད་ལ་ཡི་གེ་བརྒྱ་པ་ལན་གསུམ་གྱི་མཐར། ཨོཾ་ཨཱཿཧཱུྃ་ཞེས་དུང་ཆོས་ཀྱི་ཆུ་བདུད་རྩིའི་མཆོད་ཡོན་ཏུ་སྦྲེང་བས་བུམ་པའི་ལྷ་འོད་དུ་ཞུ་ནས་ཆུ་ནུས་པ་དང་ལྡན་པར་བསམ། གཏོར་མ་གསུམ་བསང་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བྱིན་བརླབ་སྟེ་དང་པོ། ཨོཾ་པཀྵིཾ་སྭཱ་ཧཱ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི་ལན་གསུམ་མམ་ལྔས་ཡི་དམ་ལ་ཕུལ། གོང་བཞིན་མཆོད་བསྟོད་དང་། མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་གསོལ། གཉིས་པ། རང་གི་སྙིང་ག་ནས་འོད་ཟེར་འཕྲོས་པས་རྡོ་རྗེའི་ཆོས་སྐྱོང་བའི་སྲུང་མ་ཐམས་ཅད་ཨོཾ་བཛྲ་ས་མཱ་ཛཿས་སྤྱན་དྲང་། ཨོཾ་ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨི་དཾ་སོགས་ཀྱིས་ཕུལ། དེ་ཉིད་ལ་ཨརྒྷཾ་སོགས་སྦྱར་བས་མཆོད། གང་གིས་འཕྲུལ་དང་མངོན་པར་ཤེས་པའི་དཔལ། །ཉེ་བར་དགོངས་ནས་ཐུབ་པའི་བཀའ་བཞིན་ཏུ། །བསྟན་པ་རིན་ཆེན་བང་མཛོད་ལེགས་སྐྱོང་བའི། །རྡོ་རྗེ་ཆོས་སྲུང་རྣམས་ལ་ཕྱག་འཚལ་ལོ། །ཞེས་བསྟོད། གསུམ་པ་མཁའ་འགྲོ་སྤྱི་གཏོར་གྱི་ཆོ་གས་བསྔོ། གཞི་བདག་གཏོར་མ་སྤྱི་ལྟར་བཏང་བ་རྣམས་སློབ་དཔོན་གྱི་བྱ་བའོ། །གཉིས་པ་དངོས་གཞི་ལ། ལས་ཀྱི་རྡོ་རྗེས་ཕྱི་རོལ་ཏུ་སློབ་མ་རྣམས་ཁྲུས་བྱ། ནང་དུ་འོངས་པ་ན་སློབ་དཔོན་གྱིས་སྦྱོང་བ་གསུམ་སྤྱི་ལྟར་བྱས་ལ་མཚམས་བཅད། ཨམྲྀ་ཏ་བཟླ་བཞིན་པས་ལས་བུམ་གྱི་ཆུས་ཁྲུས་བྱེད་དུ་གཞུག །དེ་ནས་སེམས་བསྐྱེད་གསལ་གདབ་སོགས་ཇི་ལྟར་རིགས་པས་མཚམས་སྦྱར་ཏེ། དེ་ལ་གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་མཆོག་གི་དམ་པ་དང་པོའི་སངས་རྒྱས་ལས་ལྷ་སྔགས་ཀྱི་རིམ་པ་དངོས་སུ་བསྟན་ཅིང་། གྲུབ་ཆེན་ནཱ་རཱོ་ཏཱ་པའི་མན་ངག་གིས་རྣལ་འབྱོར་བླ་མེད་སྤྱི་དང་མཐུན་པར་བཀྲལ་བའི་ཟབ་ཆོས། རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་ཤིང་། བླ་མ་རྫོང་པའི་མཁས་གྲུབ་རྣམས་ནས་རིམ་པར་བརྒྱུད་པ་བཅོམ་ལྡན་འདས་དཔལ་རྡོ་རྗེ་ཁྱུང་ཁྲའི་བྱིན་རླབས་ཟབ་མོ་སྒྲུབ་པ་ལ། སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རྣམས་ཀྱི་ངོ་སྐལ་དུ་གྱུར་པ་ལ། ཐོག་མར་སློབ་དཔོན་དང་མདུན་བསྐྱེད་ཀྱི་རྟེན་གཉིས་ཀ་བཅོམ་ལྡན་འདས་དུས་ཀྱི་འཁོར་ལོ་ཁྲོས་པའི་ངོ་བོ་མཁའ་ལྡིང་རྡོ་རྗེ་ཁྱུང་སྤྲོ་ན་མངོན་རྟོགས་ལྟར་རྒྱས་པར་བརྗོད་ཀྱང་ལེགས་སོ། །ཁྲའི་ཡེ་ཤེས་ཀྱི་སྐུར་དངོས་སུ་གསལ་བ་ལ་བྱིན་རླབས་ཀྱི་ཆོས་རྣམས་ཞུ་བའི་ཡོན་ཏུ་དམིགས་ཏེ་མཎྜལ་ཕུལ། མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་སོགས། ཞེས་པས་ཐུན་མོང་སྤྱིར་གསོལ་བ་བཏབ་ནས། སླར་ཡང་ཐུན་མོང་མ་ཡིན་པ་བྱེ་བྲག་ཏུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། སློབ་དཔོན་དགོངས་སུ་གསོལ། བདག་ལ་བཅོམ་ལྡན་འདས་རྡོ་རྗེ་ཁྱུང་ཁྲའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་དང་རྗེས་སུ་གནང་བ་མ་ལུས་པ་སྩལ་དུ་གསོལ། དེ་ནས་རྒྱུད་དག་པར་བྱ་བའི་སླད་དུ། བླ་མ་དང་གཉིས་སུ་མེད་པའི་རྡོ་རྗེ་ཁྱུང་ཁྲ་ལ་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་དུ་བཞུགས་པའི་སྤྱན་སྔར་རྒྱུན་བཤགས་སྔོན་དུ་འགྲོ་བའི་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་སོགས། བར་ཆད་བསལ་བའི་སླད་དུ་སློབ་དཔོན་གྱི་ཐུགས་ཀ་ནས་ཁྲོ་བོ་བདུད་རྩི་འཁྱིལ་བའི་ཚོགས་དཔག་ཏུ་མེད་པ་སྤྲོས་ཏེ་བགེགས་རྣམས་རྒྱང་རིང་དུ་བསྐྲད་པའི་མོས་པ་མཛོད། ཨམྲྀ་ཏ་བརྗོད་ཅིང་ལས་བུམ་གྱི་ཆུ་གཏོར། དངོས་གཞིའི་སྐབས་བླ་མ་རྡོ་རྗེ་ཁྱུང་ཁྲ་དང་མཇལ་བའི་ཚེ་ཕྱག་རྟེན་གྱི་སླད་དུ་མེ་ཏོག་གི་ཕྲེང་བ་རེ་ཡང་བྱིན་པའི་མོས་པ་མཛོད། ཨཱ་ཁཾ་བཱི་ར་ཧཱུྃ་གིས་མེ་ཏོག་གཏད། སྒོ་གསུམ་བྱིན་གྱིས་བརླབ་པའི་སླད་དུ་སློབ་དཔོན་གྱིས་དྲིའི་ཆུ་རྡོ་རྗེ་དང་བཅས་པས་གནས་གསུམ་དུ་རེག་སྟེ། ཨོཾ་ཨཱཿཧཱུྃ་ཞེས་བརྗོད་པས། ཁྱེད་རང་རྣམས་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་རེ་རེས་མཚན་པའི་མོས་པ་མཛོད། དེ་ནས་གསང་སྔགས་ནང་གི་སེམས་བསྐྱེད་པའི་སླད་དུ། ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ་རེ་རེའི་སྟེང་དུ། དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་རེ་རེས་རྒྱས་གདབ་པར་མོས་ཏེ། བདེན་གཉིས་དབྱེར་མེད་དུ་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་མཛོད། ཨོཾ་སརྦ་ཡོ་ག་ཙིཏྟ་ཨུཏྭཱ་ད་ཡཱ་མི། དེ་བརྟན་པར་བྱ་བའི་སླད་དུ། སློབ་དཔོན་གྱིས་རྡོ་རྗེ་མེ་ཏོག་དང་བཅས་པ་སྙིང་གར་བཞག་སྟེ། སུ་ར་ཏི་ས་མ་ཡ་སྟྭཱཾ་ཧོ་སིདྡྷི་བཛྲ་ཡ་ཐཱ་སུ་ཁཾ། ཞེས་པས་བརྟན་པར་བྱས་པའི་མོས་པ་མཛོད། དེ་རྣམས་སྔོན་འགྲོ་ཡིན། དངོས་གཞི་ལ། བྱིན་རླབས་ཀྱི་གཞི་དགོད་པ་དང་། དེ་ལ་བརྟེན་ནས་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་བྱིན་གྱིས་བརླབ་པའི་རིམ་པ་རྣམས་སུ་ཡོད་པ་ལས། ཐོག་མར་བྱིན་རླབས་ཀྱི་གཞི་དགོད་པ་ཡེ་ཤེས་པ་དབབ་པའི་སླད་དུ། སློབ་དཔོན་གྱིས། སྭ་བྷཱ་བ་སོགས་ཞེས་བརྗོད་པས་ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཐམས་ཅད་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པྃ་ལས་སོགས་ནས། ཐུགས་ཀར་ཧཱུྃ་སྔོན་པོ་ཞེས་པའི་བར་ཁྱེད་རང་རྣམས་ཀྱི་རིག་པ་ཞེས་དང་། ཁྱེད་རང་རྣམས་སྐད་ཅིག་གིས་ཞེས་བསྒྱུར་བ་མ་གཏོགས་བདག་བསྐྱེད་ལྟར་དམིགས་པ་སྤོད་ལ། སླར་ཡང་སློབ་དཔོན་ལ་གུས་འདུད་མཛད་པས། སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་དང་རྣལ་འབྱོར་མའི་ཚོགས་དཔལ་རྡོ་རྗེ་ཁྱུང་ཁྲའི་སྐུ་ཆེ་ཆུང་མ་ངེས་པའི་རྣམ་པ་ཅན་དཔག་ཏུ་མེད་པ་ནམ་མཁའ་གང་བ་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿས་ཁྱེད་རང་རྣམས་ཀྱི་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་རྒྱ་མཚོ་ཆེན་པོ་ལ་ཆར་བབས་པ་ལྟར་སིབ་སིབ་ཐིམ་པས་རྒྱུད་བྱིན་གྱིས་བརླབ་པའི་མོས་པ་མཛོད། ཨོཾ་པཀྵིཾ་ག་རུ་ཌ་ཨཱ་བེ་ཤ་ཡ་ཨཿཨཱཿ ཞེས་མང་དུ་བརྗོད་ཅིང་སྤོས་རོལ་བྱ། དེ་ལྟར་ཁྱེད་རང་རྣམས་ཀྱི་ལུས་ངག་ཡིད་གསུམ་དང་དཔལ་རྡོ་རྗེ་ཁྱུང་ཁྲའི་སྐུ་གསུང་ཐུགས་དབྱེར་མེད་དུ་གྱུར་པ་བརྟན་པར་བྱ་བའི་སླད་དུ་སློབ་དཔོན་གྱིས་རྡོ་རྗེ་སྤྱི་བོར་རྒྱ་གྲམ་གྱི་ཚུལ་དུ་བཞག་ཅིང་། ཏིཥྛ་བཛྲ་ཞེས་བརྗོད་པས་བརྟན་པར་བྱས་པའི་མོས་པ་མཛོད། དེ་ནས་ཁྱེད་རང་རྣམས་ཀྱི་ཕྱག་གི་མེ་ཏོག་དེ་ཉིད་སློབ་དཔོན་དང་རྡོ་རྗེ་ཁྱུང་ཁྲ་ཐ་མི་དད་པ་ལ་ཕུལ་བའི་མོས་པ་དང་བཅས་འདིའི་རྗེས་ཟློས་མཛོད། ཨོཾ་པྲ་ཏཱིཙྪ་བཛྲ་ཧོ། སློབ་དཔོན་གྱིས་ཀྱང་མེ་ཏོག་གི་ཕྲེང་བ་ཁྱེད་རང་རྣམས་ཀྱི་སྤྱི་བོར་བཞག་ཅིང་བྱིན་གྱིས་བརླབ་པའི་མོས་པ་མཛོད། ཨོཾ་པྲ་ཏི་གྲྀཧྞ་ཨི་མཾ་སཏྭ་མ་ཧཱ་བཱ་ལ། དེས་གཞི་འགོད་པ་སོང་ནས། སྐུའི་རྗེས་གནང་གི་སླད་དུ། སློབ་དཔོན་དང་ཁྱེད་རང་རྣམས་ཀྱི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་གསལ་བཏབ་ནས། སློབ་དཔོན་ལ་གུས་འདུད་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀ་དང་། འོག་མིན་ནས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿས་སྤྱན་དྲང་། ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། གསོལ་བ་འདེབས་པ་འདིའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། །ཞེས་གསོལ་བ་བཏབ་པས། དབང་གི་ལྷ་རྣམས་དང་སློབ་དཔོན་ལྷན་ཅིག་པས་བུམ་པ་ཡེ་ཤེས་ཀྱི་བདུད་རྩིས་གང་བ་དེ་ཐོགས་ཏེ་སྐུ་གསུང་ཐུགས་ཀྱི་དབང་བསྐུར་བའི་མོས་པ་མཛོད། བུམ་པ་སྤྱི་བོར་བཞག་ཅིང་། བཅོམ་ལྡན་རྡོ་རྗེ་ཁྱུང་ཁྲ་ཡི། །སྐུ་མཆོག་འབར་བའི་འོད་ཟེར་གྱིས། །གདུག་པ་ཅན་རྣམས་འཇོམས་མཛད་པའི། །སྐུ་ཡི་དབང་བསྐུར་མཛད་དུ་གསོལ། །ཨོཾ་པཀྵིཾ་ག་རུ་ཎ་ཨབྷི་ཥིཉྩ་ཨོཾ་བུམ་ཆུ་སྦྱིན་ཅིང་གཏོར། ཞེས་གསུང་ཞིང་དབང་གི་ལྷ་རྣམས་ཀྱིས་དབང་གི་ཆུ་རྒྱུན་དཀར་པོ་དང་། སློབ་དཔོན་གྱི་དཔྲལ་བའི་ཨོཾ་ལས་འཕྲོས་པའི་བདུད་རྩིའི་ཆུ་རྒྱུན་དཀར་པོས་དབང་བསྐུར་བས་ལུས་ཀྱི་ནང་ཐམས་ཅད་གང་། བུམ་པའི་དབང་ཐོབ། ལུས་ཀྱི་སྒྲིབ་པ་དག །སྐུའི་བྱིན་རླབས་ཞུགས་པའི་མོས་པ་མཛོད། བུམ་པ་མགྲིན་པར་བཞག་ལ། བཅོམ་ལྡན༴ གསུང་མཆོག༴ ངག་གི་ཉེས་པ་འཇོམས་མཛད་པའི། །གསུང་གི༴ ཨོཾ་པཀྵིཾ་ག་རུ་ཌ་ཨ་བྷི་ཥིཉྩ་ཨཱཿ ཞེས་གསུང་ཞིང་དབང་གི་ལྷ་རྣམས་ཀྱིས་དབང་གི་ཆུ་རྒྱུན་དམར་པོ་དང་། སློབ་དཔོན་གྱི་མགྲིན་པའི་ཨཱཿལས་འཕྲོས་པའི་བདུད་རྩིའི་ཆུ་རྒྱུན་དམར་པོས་དབང་བསྐུར་བས་ལུས་ཀྱི་ནང་ཐམས་ཅད་གང་། གསང་བའི༴ ངག་གི༴ གསུང་གི༴ བུམ་པ་སྙིང་གར་བཞག་ལ༴ བཅོམ་ལྡན༴ ཐུགས་མཆོག༴ ཉོན་མོངས་རྣམ་རྟོག་འཇོམས་མཛད་པའི། །ཐུགས་ཀྱི༴ ཨོཾ་པཀྵིཾ་ག་རུ་ཌ་ཨབྷི་ཥིཉྩ་ཧཱུྃ། ཞེས་གསུང་ཞིང་དབང་གི་ལྷ་རྣམས་ཀྱིས་དབང་གི་ཆུ་རྒྱུན་སྔོན་པོ་དང་། སློབ་དཔོན་གྱི་ཐུགས་ཀའི་ཧཱུྃ་ལས་འཕྲོས་པའི་བདུད་རྩིའི་ཆུ་རྒྱུན་སྔོན་པོས་དབང་བསྐུར་བས་ལུས་ཀྱི་ནང་ཐམས་ཅད་གང་། ཤེས་རབ་ཡེ་ཤེས་ཀྱི༴ ཡིད་ཀྱི༴ ཐུགས་ཀྱི༴ སླར་ཡང་བུམ་པ་སྤྱི་བོར་བཞག་ལ། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པའི། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་བཛྲཱི་བྷ་བ་ཨབྷི་ཥིཉྩ་ཧཱུྃ། ཞེས་གསུང་ཞིང་གདན་གསུམ་ཚང་བའི་དབང་གི་ལྷ་ཚོགས་རྣམས་ཀྱིས་དབང་གི་ཆུ་རྒྱུན་ཁ་དོག་སྣ་ཚོགས་པ་དང་། བླ་མའི་གནས་གསུམ་གྱི་ཨོཾ་ཨཱཿཧཱུྃ་ལས་འཕྲོས་པའི་བདུད་རྩིའི་ཆུ་རྒྱུན་ཁ་དོག་སྣ་ཚོགས་པས་དབང་བསྐུར་བས། ལུས་ཀྱི་ནང་ཐམས་ཅད་གང་། དབང་བཞི་པ་ཐོབ། ལུས་ངག་ཡིད་གསུམ་གྱི་སྡིག་སྒྲིབ་བག་ཆགས་དང་བཅས་པ་དག །སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་ཐམས་ཅད་རྒྱུད་ལ་ཞུགས། ཆུ་ལྷག་མ་ཡར་ལུད་པ་ལས་མི་བསྐྱོད་པ་སྤྲུལ་སྐུའི་རྣམ་པ་ཅན་གྱིས་དབུར་བརྒྱན། ཛཿཧཱུྃ་བྃ་ཧོཿ དབང་གི་ལྷ་རྣམས་ཀྱང་ཁྱེད་རང་རྣམས་ལ་ཐིམ་པའི་མོས་པ་མཛོད། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ས་གསུམ་གྱི་བདུད་ཐམས་ཅད་འདུལ་བའི་དབང་ཐོབ་པར་གྱུར་ཅིག །ཅེས་བརྗོད་ལ་མེ་ཏོག་གཏོར། དེ་ལྟར་ན་ཁྱེད་རང་རྣམས་ཡན་ལག་བཞི་རྫོགས་ཀྱི་ཆོ་གས་རྡོ་རྗེ་ཁྱུང་ཁྲའི་སྐུར་གྱུར་པ་མཆོད་པའི་ཞིང་དུ་བཟུང་བ་ཡིན་པས་མངའ་དབུལ་གྱི་ཚུལ་དུ་མཆོད་ཡོན་ལ་སོགས་པའི་མཆོད་པས་ཀྱང་མཆོད་པའི་མོས་པ་མཛོད། །ཨོཾ་བཛྲ་ཨརྒྷཾ་ཨཱཿཧཱུྃ་སོགས། ཤིས་པ་བརྗོད་པའི་ཚིགས་སུ་བཅད་པས་ཀྱང་མངའ་གསོལ་བའི་མོས་པ་མཛོད། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཐམས་ཅད་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །དེས་ནི་དེར་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཅེས་བརྗོད་ཅིང་མེ་ཏོག་གཏོར། །དེ་ནས་མཐའ་རྟེན་བཀྲུ་བྱབ་སྲུང་གསུམ་བྱ་བ་ལ། ཐོག་མར་བཀྲུ་བའི་སླད་དུ་སློབ་དཔོན་གྱིས་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ཏེ་ཁྱེད་རང་རྣམས་ལ་ཁྲུས་བགྱིས་པས་ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག་པའི་མོས་པ་མཛོད་ཅེས་བརྡ་སྦྱར་ལ། རྣམ་བུམ་གྱི་ཆུ་ལས་བུམ་དུ་བསྲེས་པ་ཐོགས་ཏེ། ཇི་ལྟར་བལྟམས་པ་སོགས། འདི་ནི་ཁྲུས་མཆོག་སོགས། རྩ་སྔགས་དང་ཨ་མྲྀ་ཏའི་མཐར། རྡོ་རྗེ་སློབ་མའི་ནད་ཐམས་ཅད་ཤཱནྟིཾ་ཀུ་རུ་སྭཱ་ཧཱ། གདོན་ཐམས་ཅད༴ བགེགས་ཐམས་ཅད༴ ལོག་འདྲེན་ཐམས་ཅད༴ སྟེང་གཟའི་གནོད་པ་ཐམས་ཅད༴ འོག་ཀླུའི་གནོད་པ་ཐམས་ཅད༴ ཤ་ཟ་སྨྱོ་བྱེད་ཀྱི་གནོད་པ་ཐམས་ཅད༴ གྲིབ་དང་མི་གཙང་བའི༴ འཁོན་དང་སྡིག་སྒྲིབ་ཀྱི༴ ཚེའི་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུ། ཁར་ཆུ་ཅུང་ཟད་འཛིན་ཏུ་བཅུག་ལ། བྱབ་པའི་སླད་དུ་རྨ་བྱའི་མདོངས་ཀྱི་ཐིག་ལེའི་དབུས་སུ་ཉི་མ་ལ་སྔགས་ཀྱི་ཡི་གེས་མཚན་པ་ལས་འོད་ཟེར་འཕྲོས། བཀྲུས་པས་མ་དག་པའི་ལྷག་མ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བླངས་པ་ལྟར་རྩེན་གྱིས་བླངས་ཏེ་རྒྱ་མཚོ་ཆེན་པོར་ཕྱིར་དོར་བའི་མོས་པ་མཛོད། གོང་གི་སྔགས་ཤཱནྟིཾ་ཀུ་རུའི་ཚབ་ཏུ་ཨ་པ་ན་ཡ་སྭཱ་ཧཱ་བཏགས་པས་བྱབ་ཅིང་། ཁ་ནང་གི་ཆུ་ཁྲུས་གཞོང་དུ་དོར། རྡོ་རྗེ་ཁྱུང་གི་ལྷ་ཚོགས་རྣམས། །རྨ་བྱའི་མདོངས་ཀྱི་རྣམ་པར་བྱོན། །ཉོན་མོངས་དུག་དང་བཅས་པ་དང་། །ཕུང་པོའི་དུག་རྣམས་མ་ལུས་དང་། །ནད་གདོན་བགེགས་རྣམས་ཞི་བར་མཛོད། །ཅེས་དང་། པཀྵིཾ་གྱི་མཐར་ཨ་ཡ་མ་དུ་རུ་ཙ་ཤ་ན་ཧཱུྃ་ཕཊ། ཅེས་བརྗོད་ཅིང་ཁྲུས་ཆུ་ཕྱིར་བསྐུར་ལ་ཆུ་བོ་ཆེན་པོའི་གཞུང་དུ་དོར། གུ་གུལ་གྱིས་བདུག །ཡུངས་ཀར་གྱིས་བྲབ། སུམྦྷ་སོགས་དྲག་སྔགས་བརྗོད་ལ་མཚམས་བཅད། སྲུང་བའི་སླད་དུ་སློབ་དཔོན་གྱི་ཕྱག་གི་རྡོ་རྗེ་སྤྱི་བོར་བཞག་པས་དེ་ལས་རྡོ་རྗེ་ཕྲ་མོ་དཔག་ཏུ་མེད་པ་བྱུང་། ལུས་ཐམས་ཅད་རྡོ་རྗེའི་གོ་ཁྲབ་ཀྱིས་གཡོགས་ཏེ་ནད་གདོན་སྡིག་སྒྲིབ་ཐམས་ཅད་སྲུང་བར་བྱས་པའི་མོས་པ་མཛོད། སྔགས་རཀྵ་རཀྵ་བཏགས་པ་བརྗོད། སླར་ཡང་རྡོ་རྗེ་སྤྱི་བོར་བཞག་ཅིང་བདེན་པའི་སྟོབས་བརྗོད་པ་ནི། རྒྱལ་བ་སྲས་བཅས་བདེན་པའི་བྱིན་རླབས་དང་། །བཅོམ་ལྡན་རྡོ་རྗེ་ཁྱུང་གི་ནུས་མཐུ་ཡིས། །རྡོ་རྗེ་སློབ་མ་འདི་ནི་བསྲུངས་ཟིན་གྱིས། །འདི་ལ་སུས་ཀྱང་གནོད་པར་མ་བྱེད་ཅིག །ཅེས་བརྗོད། བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །སོགས་ཤིས་བརྗོད་ཇི་ལྟར་རིགས་པའང་བྱའོ། །གསུང་གི་རྗེས་སུ་གནང་བ་ལ། ཐོག་མར་རྗེས་སུ་བཟླས་པའི་ལུང་གི་སླད་དུ། སློབ་དཔོན་གྱི་ཐུགས་ཀའི་ཡེ་ཤེས་སེམས་དཔའ་ཁྱུང་རིགས་ལྔ་སོ་སོའི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཕྲེང་གཉིས་པ་བྱུང་། ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ས་བོན་སོ་སོའི་མཐར་འཁོད་པའི་སྔགས་ཕྲེང་ལ་ཐིམ། དེ་ལས་འོད་ཟེར་འཕྲོས། གདུག་པ་ཅན་ཐམས་ཅད་ཚར་བཅད། བླ་མ་ཡི་དམ་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་ནུས་མཐུ་ཐམས་ཅད་བསྡུས་ཏེ་ཐིམ་པས་རྒྱུད་བྱིན་གྱིས་བརླབས་པའི་མོས་པ་དང་བཅས་ལྷའི་ང་རྒྱལ་བརྟན་པོའི་ངང་ནས་སྔགས་འདིའི་རྗེས་ཟློས་ལན་བརྒྱ་རྩ་བརྒྱད་མཛད་པར་ཞུ། ཨོཾ་པཀྵིཾ་སྭཱ་ཧཱ། བྱིན་གྱིས་བརླབ་པའི་ལུང་གི་སླད་དུ། སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་འཐོར་བ་དང་བཅས་འདིའི་རྗེས་ཟློས་མཛོད། བཅོམ་ལྡན་བདག་ལ་སོགས། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ཏེ་སྤྱི་བོར་བཞག་པས་རྒྱུད་བྱིན་གྱིས་བརླབས་པའི་མོས་པ་མཛོད། བཅོམ་ལྡན་འདི་ལ་སོགས། དམ་བཅའ་བའི་ལུང་གི་སླད་དུ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྡོ་རྗེ་ཁྱུང་ཁྲ་ཡི་དམ་དུ་འཛིན་སྙམ་པས་འདིའི་རྗེས་ཟློས་ལན་གསུམ་མཛོད། །སློབ་དཔོན་དགོངས་སུ་གསོལ། བདག་རིག་པ་འཛིན་པ་ཞེས་བགྱི་བ། དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། མཁའ་ལྡིང་རྡོ་རྗེ་ཁྱུང་ཁྲ་ཡི་དམ་གྱི་ལྷར་བཟུང་བར་བགྱིའོ། །ཐུགས་ཀྱི་རྗེས་གནང་གི་སླད་དུ། སྐུ་ཡི་རྟེན་མེ་ལོང་དང་། གསུང་གི་རྟེན་སྔགས་ཀྱི་ཡི་གེ་དང་། ཐུགས་ཀྱི་རྟེན་རྡོ་རྗེ་རྩེ་ལྔ་པ་རྣམས་ཁྱེད་རང་རྣམས་ཀྱི་སྙིང་གར་བཞག་སྟེ་བྱིན་གྱིས་བརླབས་པའི་མོས་པ་མཛོད། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་ཇི་ལྟར་ཐུགས་དམ་བསྐུལ་བའི་དམ་ཚིག་ལས་མ་འདའ་བར། བཅོམ་ལྡན་འདས་རྡོ་རྗེ་ཁྱུང་གི་ལྷ་ཚོགས་རྣམས། རྡོ་རྗེའི་སློབ་མ་འདི་རྣམས་ལ་ཇི་སྲིད་སངས་རྒྱས་མ་ཐོབ་ཀྱི་བར་དུ་ལུས་དང་གྲིབ་མ་ལྟར་མི་འབྲལ་ཞིང་བརྟན་པར་བཞུགས་པར་མཛད་དུ་གསོལ། ཞེས་བརྗོད། ཡོན་ཏན་དང་ཕྲིན་ལས་ཀྱི་རྗེས་གནང་གཏོར་མ་ལ་བརྟེན་ནས་བཀའ་བསྒོ་བ་ནི། གཏོར་མ་འདི་ཉིད་ཡན་ལག་བཞི་རྫོགས་ཀྱི་ཚུལ་གྱིས་ཡང་འདིར་ཡིག་ཆ་སྔ་མར། གཏོར་མ་ཡན་ལག་བཞི་རྫོགས་སུ་བསྐྱེད་པར་གསུངས་པས་སྤྲོ་ན་དེ་ལྟར་བྱས་ཀྱང་ལེགས་མོད། འདིར་ཕྱག་ལེན་བདེ་བའི་སླད་སྔོན་དུ་མདུན་བསྐྱེད་དང་ལྷན་ཅིག་ཏུ་བསྐྱེད་ཆོག་གཅིག་གིས་སོ་སོར་བསྐྱེད་པའི་དབང་དུ་བྱས་པ་ཡིན། བཅོམ་ལྡན་འདས་རྡོ་རྗེ་ཁྱུང་ཁྲར་བསྐྱེད་ཅིང་དངོས་སུ་གསལ་བའི་དབུའི་སྤྱི་བོའི་གཙུག་ཏུ། བརྒྱུད་པའི་བླ་མ་རྣམས་ངོ་བོ་བླ་མ་སོ་སོ་ལ་རྣམ་པ་རྡོ་རྗེ་ཁྱུང་ཁྲའི་སྐུར་གསལ་བ་ཐོ་བརྩེགས་སུ་བཞུགས་པའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས། བླ་མ་ཡི་དམ་སངས་རྒྱས་བྱང་སེམས་དཔའ་བོ་དང་རྣལ་འབྱོར་མའི་ཚོགས་ཐམས་ཅད་སྤྱན་དྲངས། བརྒྱུད་པའི་བླ་མ་རྣམས་ལ་ཐིམ་པས་སྐྱབས་གནས་ཀུན་འདུས་སུ་གྱུར་པ་ལ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། །དུས་གསུམ་སངས་རྒྱས་ཐམས་ཅད་ཀྱིས། །བཅོམ་ལྡན་རྡོ་རྗེ་ཁྱུང་ཁྲ་ལ། །སྐུ་གསུང་ཐུགས་ཀྱིས་བྱིན་བརླབས་ཤིང་། །ས་གསུམ་གདུག་པ་འདུལ་བ་རུ། །མཐུ་སྟོབས་བྱིན་རླབས་དབང་བསྐུར་ལྟར། །དེ་བཞིན་བདག་ལ་དབང་བསྐུར་སྩོལ། །ཞེས་གསོལ་བ་བཏབ་པས་གཏོར་མའི་ལྷ་ཚོགས་ཁྱེད་རང་རྣམས་ཀྱི་སྤྱི་བོར་བྱོན་ནས་བྱིན་གྱིས་བརླབས་པའི་མོས་པ་མཛོད། གཏོར་མ་སྤྱི་བོར་བཞག་ལ། བཅོམ་ལྡན་དུས་ཀྱི་འཁོར་ལོ་ཡི། །ཐུགས་སྤྲུལ་བྱིན་རླབས་མགོན་པོ་ཁྱེད། །འདི་ལ་འགོ་ཞིང་གྲོགས་མཛོད་ཅིག །སྒོས་ཀྱི་སྲུང་མ་མཛད་དུ་གསོལ། །ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་། ཡེ་ཤེས་ཀྱི་མཁའ་འགྲོ་མ། ཇོ་བོ་ནཱ་རོ་ཏཱ་པ། ཕམ་མཐིང་བ་སྐུ་མཆེད། ཀློག་སྐྱ་ཤེས་རབ་བརྩེགས། མལ་ལོ་ཙཱ་བ་བློ་གྲོས་གྲགས་པ། ས་ཆེན་ཀུན་དགའ་སྙིང་པོ། སློབ་དཔོན་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན། འཇམ་མགོན་ས་སྐྱ་པཎྜི་ཏ། འགྲོ་མགོན་ཆོས་རྒྱལ་འཕགས་པ། ཞང་དཀོན་མཆོག་དཔལ། ན་བཟའ་བྲག་ཕུག་པ། བླ་མ་དམ་པ་བསོད་ནམས་རྒྱལ་མཚན། སྔགས་འཆང་གཟུངས་ཀྱི་དཔལ་བ། ཆོས་རྗེ་དགེ་ལེགས་དཔལ་བཟང་། རྫོང་ཆུང་པ་ཀུན་དགའ་བློ་གྲོས། ཆོས་རྗེ་སངས་རྒྱས་བཟང་པོ། རིག་འཛིན་ཆོས་ཀྱི་བློ་གྲོས། རིག་འཛིན་ཆོས་དཔལ་བཟང་པོ། མཁན་ཆེན་བྱམས་པ་བཟང་པོ། འབུམ་ཆེན་ཀུན་དགའ་དཔལ་འབྱོར། མཁན་ཆེན་ངག་དབང་དཔལ་བཟང་། རིན་ཆེན་བསོད་ནམས་མཆོག་གྲུབ། གནས་གསར་བ་འཇམ་དབྱངས་བསྟན་འཛིན། ངག་དབང་བསྟན་འཛིན་ཕུན་ཚོགས། རྨོར་ཆེན་ཀུན་དགའ་ལྷུན་གྲུབ། གནས་གསར་པ་ལེགས་པའི་འབྱུང་གནས། འཇམ་མགོན་ཀུན་དགའ་བློ་གྲོས། གྲུབ་དབང་རིན་ཆེན་རྒྱལ་མཚན། ཡོངས་འཛིན་ཀུན་དགའ་བཀྲ་ཤིས། རྗེ་ཤེས་རབ་འོད་ཟེར། འཇམ་མགོན་ཀུན་དགའ་རྒྱལ་མཚན། བདག་ཅག་གི་དཔལ་ལྡན་བླ་མ་དམ་པ་འཇམ་དཔལ་གཞོན་ནུ་རྡོ་རྗེ་རིན་ཆེན་གྱི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་ཇི་ལྟར་ཐུགས་དམ་བསྐུལ་ཞིང་ཞལ་གྱིས་བཞེས་པ་ལྟར་བཅོམ་ལྡན་འདས་རྡོ་རྗེ་ཁྱུང་ཁྲའི་ལྷ་ཚོགས་རྣམས་རྡོ་རྗེ་སློབ་མ་འདི་རྣམས་ཀྱིས་བྱང་ཆུབ་མ་ཐོབ་ཀྱི་བར་དུ་ལུས་དང་གྲིབ་མ་ལྟར་མི་འབྲལ་བར་བཞུགས་ནས། བདུད་དང་བར་ཆད་ཐམས་ཅད་སྲུང་བ་དང་། དངོས་གྲུབ་ཐམས་ཅད་སྩལ་དུ་གསོལ། ཞེས་དང་གོང་གི་གསོལ་འདེབས་ཀྱི་ཚིག །དུས་གསུམ་སངས་རྒྱས་སོགས་ཀྱི་མཐར། དེ་བཞིན་བདག་གིས་དབང་བསྐུར་རོ། །ཨོཾ་པཀྵིཾ་སྭཱ་ཧཱ། ལྷ་ཚོགས་རྣམས་འོད་དུ་ཞུ་ནས་ཁྱེད་རང་རྣམས་ཀྱི་སྤྱི་བོ་ནས་ཞུགས་སྙིང་གའི་ཁྱུང་རིགས་ལྔར་གསལ་བ་ལ་ཐིམ་པས་ཡེ་ཤེས་སེམས་དཔའི་ཚུལ་གྱིས་བྱང་ཆུབ་མ་ཐོབ་བར་དུ་བརྟན་པར་བཞུགས་པའི་མོས་པ་མཛོད། ཨོཾ་པཀྵིཾ་ག་རུ་ཌ་ཀཱ་ཡ་ཝཱ་ཀ་ཙིཏྟ་བཛྲ་སྭཱ་བྷཱ་བ་ཨཱཏྨ་ཀོ྅ཧཾ། ཨ་ཡ་མ་དུ་རུ་ཙ་ཤ་ན་ཧཱུྃ་ཕཊ། ཅེས་དྲག་ཏུ་བཟླས་ཤིང་སྤོས་རོལ་བྱ། ལྷ་འོད་དུ་ཞུ་བའི་གཏོར་ཟན་དངོས་གྲུབ་ཀྱི་ཚུལ་དུ་ཅུང་ཟད་རེ་སྦྱིན། སུ་པྲ་ཏིཥྛས་བརྟན་པར་བྱ། མི་འགྱུར་ལྷུན་པོ་སོགས་ཤིས་པ་བརྗོད་པའི་ཚིགས་སུ་བཅད་པ་དང་མེ་ཏོག་གི་ཆར་དབབ། དེས་བྱིན་རླབས་ཀྱི་དངོས་གཞི་གྲུབ་ནས་མཇུག་དམ་ཚིག་ཁས་བླང་སོགས་སྤྱི་ལྟར་བྱས་ལ་སློབ་མ་རྣམས་རང་གནས་སུ་བཏང་། གསུམ་པ་ནི། སློབ་དཔོན་གྱིས་མཆོད་པ་ཁ་གསོས་བསང་སྦྱང་བྱིན་བརླབ། མཆོད་བསྟོད་བཟོད་གསོལ། བཛྲ་མུཿས་ཚོམ་བུའི་ཡེ་ཤེས་པ་དང་། གཏོར་མགྲོན་གྱི་ཡེ་ཤེས་པ་རྣམས་གཤེགས། དམ་ཚིག་པ་རང་ལ་བསྟིམ། གནས་གསུམ་བསྲུང་། བསྔོ་སྨོན་ཤིས་བརྗོད་བྱའོ། །ཡང་ནད་གདོན་གྱིས་ཉེན་པ་ལ་རྐྱེན་སེལ་ལྟ་བུར་གཏོར་མའི་བྱིན་རླབས་ཙམ་བྱེད་ན། བདག་བསྐྱེད་དང་། མདུན་རྟེན་གཏོར་མ་ཁོ་ན་ལྷར་བསྐྱེད་ཅིང་མཆོད་བསྟོད་བཟླས་པ་བྱ། དངོས་གཞི་མཎྜལ། ཐུན་མོང་གི་གསོལ་འདེབས། རྒྱུན་བཤགས་བཅས་ཀྱི་རྗེས། སློབ་མ་ལྷར་བསྐྱེད་ཅིང་བསྟིམ། དེ་ནས་གཏོར་དབང་གོང་བཞིན་བྱའོ། །དེ་བཞིན་ཏུ་ཁྲུས་ཆོག་རྐྱང་པ་བྱེད་ན། བདག་བསྐྱེད་དང་བུམ་པ་བསྒྲུབ། སྦྱོང་བ་གསུམ་སྔོན་ཏུ་འགྲོ་བ་བཀྲུ་བྱབས་ཤིས་བརྗོད་ཀྱི་བར་གོང་བཞིན་བགྱིས་པས་ཀྱང་གྲུབ་བོ། །གསུམ་པ་ལས་ཀྱི་ཚོགས་ནི། བྱིས་གདོན་བྱ་འདྲེ་མཆེ་བའི་དུག །སྟེང་གདོན་གཟའ་དང་འོག་གདོན་ཀླུ། །སྦྱར་བའི་དུག་ཏུ་གྱུར་པ་རྣམས། །བརྟག་ཅིང་སྲུང་གསོའི་རིམ་པ་དང་། །སྡེ་བརྒྱད་འཁྲུགས་པའི་ཆོ་འཕྲུལ་ནི། །སེར་བ་སྲུང་བའི་མན་ངག་སྟེ། །མངོན་སྤྱོད་དྲག་པོའི་སྦྱིན་སྲེག་བཅས། །ལས་ཀྱི་རིམ་པ་མདོར་བསྡུས་པའོ། །ཞེས་པ་སྟེ། རྩ་བའི་ཡིག་རྙིང་མཆན་དང་བཅས་པ་ལས་ཤེས་པར་བྱའོ། །བཅོམ་ལྡན་རྡོ་རྗེ་ཁྱུང་ཁྲ་ཡི། །ཐུགས་རྗེའི་བྱིན་རླབས་སྤྲིན་ཕུང་ལས། །ཡེ་ཤེས་བདུད་རྩིའི་ཆུ་རྒྱུན་གྱིས། །གྲུབ་གཉིས་དགའ་ཚལ་རྒྱས་གྱུར་ཅིག །ཅེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རང་འདྲའི་བློ་དམན་རྣམས་འཇུག་པ་བདེ་བའི་སླད། མཉམ་མེད་གཟུངས་ཀྱི་དཔལ་བ་དང་། རྫོང་ཆུང་པ་ཀུན་དགའ་བློ་གྲོས་ཀྱིས་མཛད་པའི་མངོན་རྟོགས་དང་། འཕགས་པ་རིན་པོ་ཆེས་མཛད་པར་གྲགས་པའི་བྱིན་རླབས་ཀྱི་ཆོ་ག །བྱམས་པ་ངག་དབང་དཔལ་བཟང་གིས་མཛད་པའི་ཟུར་འདེབས་དང་བཅས་པ་རྣམས་ཕྱོགས་གཅིག་ཏུ་བསྒྲིགས་ཏེ། བཀླགས་པས་གྲུབ་པར་བསྡེབས་པ་སརྦ་དཱ་སུ་ཤྲེ་ཡོ་བྷ་བ་ཏུ།། །། ༈

[edit]

bcom ldan 'das rdo rje khyung khra'i sgrub thabs byin rlabs dang bcas pa bdud rtsi'i chu rgyun/_ @#/_/bcom ldan 'das rdo rje khyung khra'i sgrub thabs byin rlabs dang bcas pa bdud rtsi'i chu rgyun zhes bya ba bzhugs so/__/oM swa sti sid+d+haM/__brtan g.yo'i dug rnams ye shes kyi/__/bdud rtsis 'joms mdzad bla ma dang /__/dbyer med rdo rje mkha' lding pa/__/btud nas de yi man ngag dbye/__/'di la gsum/__sgrub pa'i thabs/__byin rlabs kyi cho ga__/las tshogs kyi nges pa'o/__/dang po ni/__'di nyid kyi byin rlabs zab mos rgyud smin cing /__dam tshig dang ldan pa'i rnal 'byor pa stan bde ba la 'dug ste/__skyabs 'gro sems bskyed tshad med bsgom la spyi ltar sngon du 'gro bas/__oM swa b+hA ba shud+d+haHsarba d+ha rmAHswA b+hA ba shud+d+ho\u0f85 haM/__stong pa'i ngang las pa~M las pad+ma dang /__ra~M las nyi ma'i dkyil 'khor gyi dbus su klu chen po brgyad bsnol ba'i gdan gyi steng du rang gi rig pa k+ShiM ljang sngon las 'od zer 'phros/__gdug pa can thams cad tshar bcad/__tshur 'dus yongs su gyur pa las/__rang nyid skad cig gis rdo rje khyung khra sku mdog sna tshogs pa'i mdangs can/__brla gnyis man chad sa dag pa'i rang bzhin ser po/__lto ba chu dag pa'i rang bzhin dkar po/__snying ga me dag pa'i rang bzhin dmar po/__mgrin pa nas smin mtshams man chad rlung dag pa'i rang bzhin ljang gu/__spyi bo nam mkha'i rang bzhin sngon po/__/rdo rje'i rwa dang mchu shin tu rno ba/__sder mo zangs las grub pa/__spyan gsum sdang mig tu gzigs shing /__khro gnyer dpral ba'i dbyings su bsdus pa/__smin ma dmar ser me ltar 'bar zhing /__dbu skra kham ser gyen du brdzes pa/__phyag g.yas skyabs sbyin gyi phyag rgyas klu'i rgyal po'i gtsug nas phrogs pa'i nor bu rin po che rwa g.yas kyi phyogs kyi nam mkhar 'dzin pas sgrub pa po la dngos grub stsol ba/__g.yon gdug pa can thams cad sdigs par mdzad pa'i sdigs mdzub thugs kar gtod pas nor bu'i phreng ba bsnams pa/__rdo rje'i mchus sbrul gdug pa zhal du gsol zhing rin po che dang sbrul gyis brgyan pa/__rdo rje'i gshog pa rgyab nag po/__mdun dkar po/__bar mtshams dmar po can nam mkhar gdengs shing rdeb pa/__ye shes kyi me 'bar ba'i dbus na khams gsum dbang du sdud cing srid gsum zil gyis gnon pa'i sku can du gsal ba'i thugs kar sna tshogs pad+ma 'dab ma bzhi pa'i dbus dang phyogs bzhir pad+ma dang nyi ma'i gdan re re'i steng du/__ye shes sems dpa' rigs lnga'i ngo bo dbus su rdo rje'i khyung sngon po g.yas rdo rje/__shar du 'khor lo'i khyung dkar po g.yas 'khor lo/__/lhor rin po che'i khyung ser po g.yas rin po che/__nub tu pad+ma'i khyung dmar po g.yas pad+ma/__byang du ral gri'i khyung ljang gu g.yas ral gri ste so so'i rigs kyi phyag mtshan rnams 'phyar thabs su 'dzin cing /__g.yon thugs kar sdigs mdzub mdzad pa/__rgyan cha lugs thams cad rang nyid dang mtshungs pa/__de rnams kyi thugs kar pad nyi'i gdan gyi steng du/__ting nge 'dzin sems dpa'i ngo bo khyung dbus ma'i thugs kar k+ShiM ljang sngon/__shar gyi thugs kar oM dkar po/__lho'i thugs kar pa ser po/__nub kyi thugs kar swA dmar po/__byang gi thugs kar hA ljang gu rnams kyi mthar/__oM pak+ShiM swA hA/__zhes pa'i sngags phreng rang rang gi kha dog can g.yas skor du 'khod pa/__de thams cad kyi dpral bar oM dkar po/__mgrin par AHdmar po/__thugs kar hU~M sngon po/__thugs ka'i dbus kyi sa bon las 'od zer 'phros pas dpal dus kyi 'khor lo khros ba'i ngo bo bcom ldan 'das rdo rje khyung khra rigs lnga la/__gzhan yang rtsa brgyud kyi bla ma yi dam sangs rgyas byang sems dpa' bo mkha' 'gro'i tshogs bsam gyis mi khyab pas bskor ba oM badz+ra sa mA dzaH__dzaHhU~M ba~M hoH__dam tshig pa dang gnyis su med par gyur/__slar yang rang gi thugs ka'i sa bon las 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__oM pany+tsa ku la sa pa ri wA ra ar+g+haM sogs kyis mchod de bzhin gshegs pa thams cad kyis bdag la mngon par dbang bskur ba stsal du gsol/__zhes gsol ba btab pas/__dbang gi lha rnams kyis oM badz+rI b+ha ba a b+hi Shiny+tsa hU~M/__zhes gsung zhing bum pa'i chus spyi bo nas dbang bskur/__lus kyi nang thams cad gang /__dri ma thams cad dag__/dbang thams cad thob/__chu lhag ma yar lud pa las mi bskyod pa sprul sku'i rnam pa can gyis dbur brgyan/__oM shrI badz+ra ga ru Da ar+g+haM sogs kyis phyi mchod dang /__oM AHhU~M gis nang mchod phul/__'byung lnga'i rang bzhin 'byung chen lnga la dbang /__/kun tu sgyur byed rdo rje'i 'dab gshog can/__/klu yi dpal 'phrog lha mi'i dpal gyur pa'i/__/rdo rje nam mkha' lding la phyag 'tshal lo/___/zhes pas bstod/__rang lha'i nga rgyal brtan pa'i ngang nas/__oM pak+ShiM swA hA/__zhes pa'i sngags kyi bzlas pa ci nus bya/__skabs su thugs ka'i khyung yig 'bru dang bcas pa las 'od zer 'phros/__sa gsum gyi gdug pa can thams cad tshar bcad/__bla ma yi dam rgyal ba sras dang bcas pa'i nus mthu yon tan gyi tshogs ji snyed yod pa thams cad 'od zer gyi rnam par spyan drangs te thim pas rgyud byin gyis brlab pa'i mos pa'ang bya'o/__/thun mthar/__bcom ldan 'das bdag dang sems can thams cad la mchog dang thun mong gi dngos grub ma lus pa stsal du gsol/__klu dang sa bdag gi gnod pa thams cad zhi bar byin gyis brlab tu gsol/__zhes gsol ba btab/__yi ge brgya pa lan gsum gyis sngags kyi lhag chad kha bskang zhing byin rlabs kyi rgyun brtan par byas la gnas gsum bsrung /__bsngo smon shis brjod spyi ltar byas nas thun mtshams kyi bya ba la 'jug__/bsnyen pa byed na/__thun gsum mam bzhi'i rim pas gtso bor lha'i gsal snang la sems 'dzin cing sngags 'bum phrag gcig gam lnga bzla/__grub na thun thams cad dam/__ma grub na snga thun gyi mjug tu gtor mgron spyan drangs pas gtor ma 'bul/__sgrub pa la/__gtso bor 'od zer spro bsdu'i dmigs pa dang bcas pa 'bum phrag gsum bya/__de lta bu'i bsnyen sgrub mthar phyin pas ji skad bshad pa'i las kyi tshogs thams cad thogs pa med par 'grub cing /__spyir yang rdo rje khyung gi bsnyen sgrub gang du bgyis pa'i sa'i phyogs de'i brtan g.yo'i dug thams cad zhi bas snod bcud kyi dpal phun sum tshogs pa mtha' dag skyed pa sogs yon tan bsam gyis mi khyab pa 'byung ba'i phyir/__rig sngags 'chang ba rnams kyis thog ma kho nar rdo rje nam mkha'i lding bsgom par dpal ldan rgyud las gsungs so/__/gnyis pa byin rlabs kyi cho ga la gsum/__sbyor ba/__dngos gzhi/__rjes so/__/dang po ni/__gnas dben par stegs bu'i dbus su maN+Dalar rdul tshon gyis sna tshogs pad+ma 'dab ma bzhi pa bris pa'i dbus dang phyogs bzhir khyung rigs lnga'i sku mdog dang mthun pa'i tshon phung re dgod/__de'i steng du many+dzi'i khar khro bo'i gtor ma zur gsum pa snying gzugs mdun nor bu mig gsum pa'i dbyibs 'dra ba la dar gdugs ljang gus brgyan cing sku cig yod na'ang 'dzug__/nya sha sogs dam rdzas kyis bskor/__mdun du me long la yig 'bru lnga bris pa dang /__de'i mdun du zlum gtor gsum/__mtha' skor du chu gnyis sngon 'gro'i nyer spyod/__nye logs ci bde bar gzhi bdag gtor ma/__slob dpon gyi mdun du bum pa gnyis/__rdor dril/__nang mchod sogs dgos pa'i yo byad thams cad 'du bya/__de nas sngon 'gro gtor ma spyi ltar btang /__gnas yo byin rlabs sngon du 'gro bas skyabs sems nas bzlas pa bsdu pa'i bar bdag bskyed gong du bshad pa bzhin grub rjes/__tshom bu dang gtor ma gnyis ka la dmigs te a mr-i tas bsang /__sa b+hA bas sbyang /__stong pa'i ngang las pa~M las sogs nas/__dbur brgyan ces pa'i bar rang gi rig pa dang /__rang nyid ces pa'i tshig dor/__bdag la mngon par dbang bskur zhes pa'i tshab tu 'di la zhes bsgyur ba ma gtogs bdag bskyed ltar gsal btab/__mchod pa byin rlabs la mchod bstod rgyas bsdus gang rigs dang /__mdun bskyed kyi thugs rgyud bskul bar dmigs te bzlas pa cung zad bya/__bum pa bsang sbyang /__stong pa'i ngang las pa~M las pad+ma dang /__a las zla ba'i dkyil 'khor gyi steng du b+h+rA~M las rin po che'i bum pa mtshan nyid thams cad yongs su rdzogs shing /__nang chu dang bcud sna tshogs kyis gang ba'i dbus su pa~M las sogs nas dbur brgyan/__ces pa'i bar mdun bskyed ltar gsal gdab la mchod bstod bya/__rang gi snying ga nas sngags kyi phreng ba gzungs thag la brten te song /__bum pa'i lha'i thugs kar phog pas thugs rgyud bskul/__sku'i cha thams cad nas bdud rtsi'i rgyun babs pas bum pa gang bar bsam la bzlas pa ci nus dang /__las thams cad pa'i bum par skad cig gis khro bo bdud rtsi 'khyil ba gsal ba'i sku las bdud rtsi'i rgyun babs pas bum pa gang bar bsams la a mr-i ta bzla/__gnyis ka la dmigs te dbang dang khrus kyi don tu ab+hi She ka'ang ci rigs pa bzlas mthar mchod cing bstod la yi ge brgya pa lan gsum gyi mthar/__oM AHhU~M zhes dung chos kyi chu bdud rtsi'i mchod yon tu sbreng bas bum pa'i lha 'od du zhu nas chu nus pa dang ldan par bsam/__gtor ma gsum bsang sbyangs/__stong pa'i ngang las oM las byung ba'i rin po che las grub pa'i snod yangs shing rgya che ba'i nang du gtor ma ye shes kyi bdud rtsi'i rgya mtsho chen por gyur/__oM AHhU~M lan gsum gyis byin brlab ste dang po/__oM pak+ShiM swA hA i daM ba lin+ta kha kha khA hi khA hi lan gsum mam lngas yi dam la phul/__gong bzhin mchod bstod dang /__mchod sbyin gtor ma 'di bzhes sogs kyis phrin las gsol/__gnyis pa/__rang gi snying ga nas 'od zer 'phros pas rdo rje'i chos skyong ba'i srung ma thams cad oM badz+ra sa mA dzaHsa spyan drang /__oM shrI badz+ra d+harma pA la sa pa ri wA ra i daM sogs kyis phul/__de nyid la ar+g+haM sogs sbyar bas mchod/__gang gis 'phrul dang mngon par shes pa'i dpal/__/nye bar dgongs nas thub pa'i bka' bzhin tu/__/bstan pa rin chen bang mdzod legs skyong ba'i/__/rdo rje chos srung rnams la phyag 'tshal lo/__/zhes bstod/__gsum pa mkha' 'gro spyi gtor gyi cho gas bsngo/__gzhi bdag gtor ma spyi ltar btang ba rnams slob dpon gyi bya ba'o/__/gnyis pa dngos gzhi la/__las kyi rdo rjes phyi rol tu slob ma rnams khrus bya/__nang du 'ongs pa na slob dpon gyis sbyong ba gsum spyi ltar byas la mtshams bcad/__amr-i ta bzla bzhin pas las bum gyi chus khrus byed du gzhug__/de nas sems bskyed gsal gdab sogs ji ltar rigs pas mtshams sbyar te/__de la gnyis su med pa'i rgyud kyi rgyal po dpal mchog gi dam pa dang po'i sangs rgyas las lha sngags kyi rim pa dngos su bstan cing /__grub chen nA rA+o tA pa'i man ngag gis rnal 'byor bla med spyi dang mthun par bkral ba'i zab chos/__rje btsun sa skya pa yab sras la bka' babs shing /__bla ma rdzong pa'i mkhas grub rnams nas rim par brgyud pa bcom ldan 'das dpal rdo rje khyung khra'i byin rlabs zab mo sgrub pa la/__slob dpon gyi bya ba rnams grub nas/__khyed rnams kyi ngo skal du gyur pa la/__thog mar slob dpon dang mdun bskyed kyi rten gnyis ka bcom ldan 'das dus kyi 'khor lo khros pa'i ngo bo mkha' lding rdo rje khyung spro na mngon rtogs ltar rgyas par brjod kyang legs so/__/khra'i ye shes kyi skur dngos su gsal ba la byin rlabs kyi chos rnams zhu ba'i yon tu dmigs te maN+Dal phul/__me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__kun mkhyen ye shes sogs/__zhes pas thun mong spyir gsol ba btab nas/__slar yang thun mong ma yin pa bye brag tu gsol ba 'debs pa 'di'i rjes zlos lan gsum mdzod/__slob dpon dgongs su gsol/__bdag la bcom ldan 'das rdo rje khyung khra'i sku gsung thugs yon tan phrin las dang bcas pa'i byin rlabs dang rjes su gnang ba ma lus pa stsal du gsol/__de nas rgyud dag par bya ba'i slad du/__bla ma dang gnyis su med pa'i rdo rje khyung khra la skyabs yul thams cad kyis bskor ba mngon sum du bzhugs pa'i spyan sngar rgyun bshags sngon du 'gro ba'i byang chub mchog tu sems bskyed par bgyi'o snyam pas 'di'i rjes zlos lan gsum mdzod/__dkon mchog gsum la sogs/__bar chad bsal ba'i slad du slob dpon gyi thugs ka nas khro bo bdud rtsi 'khyil ba'i tshogs dpag tu med pa spros te bgegs rnams rgyang ring du bskrad pa'i mos pa mdzod/__amr-i ta brjod cing las bum gyi chu gtor/__dngos gzhi'i skabs bla ma rdo rje khyung khra dang mjal ba'i tshe phyag rten gyi slad du me tog gi phreng ba re yang byin pa'i mos pa mdzod/__A khaM bI ra hU~M gis me tog gtad/__sgo gsum byin gyis brlab pa'i slad du slob dpon gyis dri'i chu rdo rje dang bcas pas gnas gsum du reg ste/__oM AHhU~M zhes brjod pas/__khyed rang rnams spyi bor oM dkar po/__mgrin par AHdmar po/__snying gar hU~M sngon po re res mtshan pa'i mos pa mdzod/__de nas gsang sngags nang gi sems bskyed pa'i slad du/__khyed rang rnams kyi snying gar kun rdzob byang chub sems kyi ngo bo zla ba'i dkyil 'khor nya gang ba re re'i steng du/__don dam byang chub sems kyi ngo bo rdo rje dkar po rtse lnga pa re res rgyas gdab par mos te/__bden gnyis dbyer med du sems bskyed par bgyi'o snyam pas 'di'i rjes zlos mdzod/__oM sarba yo ga tsit+ta utwA da yA mi/__de brtan par bya ba'i slad du/__slob dpon gyis rdo rje me tog dang bcas pa snying gar bzhag ste/__su ra ti sa ma ya s+t+wAM ho sid+d+hi badz+ra ya thA su khaM/__zhes pas brtan par byas pa'i mos pa mdzod/__de rnams sngon 'gro yin/__dngos gzhi la/__byin rlabs kyi gzhi dgod pa dang /__de la brten nas sku gsung thugs yon tan phrin las dang bcas pas byin gyis brlab pa'i rim pa rnams su yod pa las/__thog mar byin rlabs kyi gzhi dgod pa ye shes pa dbab pa'i slad du/__slob dpon gyis/__swa b+hA ba sogs zhes brjod pas khyed rang rnams kyi phung khams skye mched thams cad mi dmigs te stong par gyur/__stong pa'i ngang las pa~M las sogs nas/__thugs kar hU~M sngon po zhes pa'i bar khyed rang rnams kyi rig pa zhes dang /__khyed rang rnams skad cig gis zhes bsgyur ba ma gtogs bdag bskyed ltar dmigs pa spod la/__slar yang slob dpon la gus 'dud mdzad pas/__slob dpon gyi thugs ka'i sa bon las 'od zer 'phros/__phyogs bcu'i bla ma yi dam sangs rgyas byang sems dpa' bo dang rnal 'byor ma'i tshogs dpal rdo rje khyung khra'i sku che chung ma nges pa'i rnam pa can dpag tu med pa nam mkha' gang ba oM badz+ra sa mA dzaHsa spyan drang /__dzaHhU~M ba~M hoHsa khyed rang rnams kyi dbang po'i sgo dang ba spu'i bu ga thams cad nas rgya mtsho chen po la char babs pa ltar sib sib thim pas rgyud byin gyis brlab pa'i mos pa mdzod/__oM pak+ShiM ga ru Da A be sha ya aHAH__zhes mang du brjod cing spos rol bya/__de ltar khyed rang rnams kyi lus ngag yid gsum dang dpal rdo rje khyung khra'i sku gsung thugs dbyer med du gyur pa brtan par bya ba'i slad du slob dpon gyis rdo rje spyi bor rgya gram gyi tshul du bzhag cing /__tiSh+Tha badz+ra zhes brjod pas brtan par byas pa'i mos pa mdzod/__de nas khyed rang rnams kyi phyag gi me tog de nyid slob dpon dang rdo rje khyung khra tha mi dad pa la phul ba'i mos pa dang bcas 'di'i rjes zlos mdzod/__oM pra tIts+tsha badz+ra ho/__slob dpon gyis kyang me tog gi phreng ba khyed rang rnams kyi spyi bor bzhag cing byin gyis brlab pa'i mos pa mdzod/__oM pra ti gr-ih+Na i maM satwa ma hA bA la/__des gzhi 'god pa song nas/__sku'i rjes gnang gi slad du/__slob dpon dang khyed rang rnams kyi gnas gsum du oM AHhU~M gis mtshan par gsal btab nas/__slob dpon la gus 'dud mdzad pas/__slob dpon gyi thugs ka nas 'od zer 'phros/__mdun bskyed kyi thugs ka dang /__'og min nas dbang gi lha rigs lnga 'khor dang bcas pa oM badz+ra sa mA dzaHsa spyan drang /__oM pany+tsa ku la sa pa ri wA ra ar+g+haM sogs kyis mchod/__gsol ba 'debs pa 'di'i rjes zlos mdzod/__de bzhin gshegs pa thams cad kyis bdag la mngon par dbang bskur ba stsal du gsol/__/zhes gsol ba btab pas/__dbang gi lha rnams dang slob dpon lhan cig pas bum pa ye shes kyi bdud rtsis gang ba de thogs te sku gsung thugs kyi dbang bskur ba'i mos pa mdzod/__bum pa spyi bor bzhag cing /__bcom ldan rdo rje khyung khra yi/__/sku mchog 'bar ba'i 'od zer gyis/__/gdug pa can rnams 'joms mdzad pa'i/__/sku yi dbang bskur mdzad du gsol/__/oM pak+ShiM ga ru Na ab+hi Shiny+tsa oM bum chu sbyin cing gtor/__zhes gsung zhing dbang gi lha rnams kyis dbang gi chu rgyun dkar po dang /__slob dpon gyi dpral ba'i oM las 'phros pa'i bdud rtsi'i chu rgyun dkar pos dbang bskur bas lus kyi nang thams cad gang /__bum pa'i dbang thob/__lus kyi sgrib pa dag__/sku'i byin rlabs zhugs pa'i mos pa mdzod/__bum pa mgrin par bzhag la/__bcom ldan=__gsung mchog=__ngag gi nyes pa 'joms mdzad pa'i/__/gsung gi=__oM pak+ShiM ga ru Da a b+hi Shiny+tsa AH__zhes gsung zhing dbang gi lha rnams kyis dbang gi chu rgyun dmar po dang /__slob dpon gyi mgrin pa'i AHlas 'phros pa'i bdud rtsi'i chu rgyun dmar pos dbang bskur bas lus kyi nang thams cad gang /__gsang ba'i=__ngag gi=__gsung gi=__bum pa snying gar bzhag la=__bcom ldan=__thugs mchog=__nyon mongs rnam rtog 'joms mdzad pa'i/__/thugs kyi=__oM pak+ShiM ga ru Da ab+hi Shiny+tsa hU~M/__zhes gsung zhing dbang gi lha rnams kyis dbang gi chu rgyun sngon po dang /__slob dpon gyi thugs ka'i hU~M las 'phros pa'i bdud rtsi'i chu rgyun sngon pos dbang bskur bas lus kyi nang thams cad gang /__shes rab ye shes kyi=__yid kyi=__thugs kyi=__slar yang bum pa spyi bor bzhag la/__sangs rgyas rnams ni thams cad kyi/__/gsang gsum gnas las byung ba yi/__/khams gsum kun gyis phyag byas pa'i/__/rdo rje'i dbang bskur chen po sbyin/__/oM badz+rI b+ha ba ab+hi Shiny+tsa hU~M/__zhes gsung zhing gdan gsum tshang ba'i dbang gi lha tshogs rnams kyis dbang gi chu rgyun kha dog sna tshogs pa dang /__bla ma'i gnas gsum gyi oM AHhU~M las 'phros pa'i bdud rtsi'i chu rgyun kha dog sna tshogs pas dbang bskur bas/__lus kyi nang thams cad gang /__dbang bzhi pa thob/__lus ngag yid gsum gyi sdig sgrib bag chags dang bcas pa dag__/sku gsung thugs yon tan phrin las dang bcas pa'i byin rlabs thams cad rgyud la zhugs/__chu lhag ma yar lud pa las mi bskyod pa sprul sku'i rnam pa can gyis dbur brgyan/__dzaHhU~M ba~M hoH__dbang gi lha rnams kyang khyed rang rnams la thim pa'i mos pa mdzod/__/oM su pra tiSh+Tha badz+rA ya swA hA/__sa gsum gyi bdud thams cad 'dul ba'i dbang thob par gyur cig__/ces brjod la me tog gtor/__de ltar na khyed rang rnams yan lag bzhi rdzogs kyi cho gas rdo rje khyung khra'i skur gyur pa mchod pa'i zhing du bzung ba yin pas mnga' dbul gyi tshul du mchod yon la sogs pa'i mchod pas kyang mchod pa'i mos pa mdzod/__/oM badz+ra ar+g+haM AHhU~M sogs/__shis pa brjod pa'i tshigs su bcad pas kyang mnga' gsol ba'i mos pa mdzod/__bkra shis gang zhig sems can kun gyi snying la gnas/__/thams cad bdag nyid rigs kun gyi ni bdag po mchog__/sems can ma lus skyed byed bde ba chen po ste/__/des ni der khyod dbang bskur mchog la bkra shis shog__/ces brjod cing me tog gtor/__/de nas mtha' rten bkru byab srung gsum bya ba la/__thog mar bkru ba'i slad du slob dpon gyis bum pa ye shes kyi bdud rtsis gang ba re thogs te khyed rang rnams la khrus bgyis pas nad gdon sdig sgrib bag chags dang bcas pa thams cad byang zhing dag pa'i mos pa mdzod ces brda sbyar la/__rnam bum gyi chu las bum du bsres pa thogs te/__ji ltar bltams pa sogs/__'di ni khrus mchog sogs/__rtsa sngags dang a mr-i ta'i mthar/__rdo rje slob ma'i nad thams cad shAn+tiM ku ru swA hA/__gdon thams cad=__bgegs thams cad=__log 'dren thams cad=__steng gza'i gnod pa thams cad=__'og klu'i gnod pa thams cad=__sha za smyo byed kyi gnod pa thams cad=__grib dang mi gtsang ba'i=__'khon dang sdig sgrib kyi=__tshe'i bar du gcod pa thams cad shAn+tiM ku ru swA hA/__zhes brjod cing bkru/__khar chu cung zad 'dzin tu bcug la/__byab pa'i slad du rma bya'i mdongs kyi thig le'i dbus su nyi ma la sngags kyi yi ges mtshan pa las 'od zer 'phros/__bkrus pas ma dag pa'i lhag ma thams cad rdo khab len gyis lcags phye blangs pa ltar rtsen gyis blangs te rgya mtsho chen por phyir dor ba'i mos pa mdzod/__gong gi sngags shAn+tiM ku ru'i tshab tu a pa na ya swA hA btags pas byab cing /__kha nang gi chu khrus gzhong du dor/__rdo rje khyung gi lha tshogs rnams/__/rma bya'i mdongs kyi rnam par byon/__/nyon mongs dug dang bcas pa dang /__/phung po'i dug rnams ma lus dang /__/nad gdon bgegs rnams zhi bar mdzod/__/ces dang /__pak+ShiM gyi mthar a ya ma du ru tsa sha na hU~M phaT/__ces brjod cing khrus chu phyir bskur la chu bo chen po'i gzhung du dor/__gu gul gyis bdug__/yungs kar gyis brab/__sum+b+ha sogs drag sngags brjod la mtshams bcad/__srung ba'i slad du slob dpon gyi phyag gi rdo rje spyi bor bzhag pas de las rdo rje phra mo dpag tu med pa byung /__lus thams cad rdo rje'i go khrab kyis g.yogs te nad gdon sdig sgrib thams cad srung bar byas pa'i mos pa mdzod/__sngags rak+Sha rak+Sha btags pa brjod/__slar yang rdo rje spyi bor bzhag cing bden pa'i stobs brjod pa ni/__rgyal ba sras bcas bden pa'i byin rlabs dang /__/bcom ldan rdo rje khyung gi nus mthu yis/__/rdo rje slob ma 'di ni bsrungs zin gyis/__/'di la sus kyang gnod par ma byed cig__/ces brjod/__bgegs rigs stong phrag brgyad cu zhi ba dang /__/sogs shis brjod ji ltar rigs pa'ang bya'o/__/gsung gi rjes su gnang ba la/__thog mar rjes su bzlas pa'i lung gi slad du/__slob dpon gyi thugs ka'i ye shes sems dpa' khyung rigs lnga so so'i thugs ka'i sa bon sngags phreng dang bcas pa las sngags phreng gnyis pa byung /__zhal nas thon/__khyed rang rnams kyi zhal du zhugs/__thugs ka'i sa bon so so'i mthar 'khod pa'i sngags phreng la thim/__de las 'od zer 'phros/__gdug pa can thams cad tshar bcad/__bla ma yi dam rgyal ba sras dang bcas pa'i thugs rje byin rlabs nus mthu thams cad bsdus te thim pas rgyud byin gyis brlabs pa'i mos pa dang bcas lha'i nga rgyal brtan po'i ngang nas sngags 'di'i rjes zlos lan brgya rtsa brgyad mdzad par zhu/__oM pak+ShiM swA hA/__byin gyis brlab pa'i lung gi slad du/__slob dpon la drin lan gyi tshul du me tog 'thor ba dang bcas 'di'i rjes zlos mdzod/__bcom ldan bdag la sogs/__slob dpon gyis kyang me tog gi phreng ba sngags su byas te spyi bor bzhag pas rgyud byin gyis brlabs pa'i mos pa mdzod/__bcom ldan 'di la sogs/__dam bca' ba'i lung gi slad du/__dus 'di nas bzung ste ji srid byang chub snying po la mchis kyi bar du rdo rje khyung khra yi dam du 'dzin snyam pas 'di'i rjes zlos lan gsum mdzod/__/slob dpon dgongs su gsol/__bdag rig pa 'dzin pa zhes bgyi ba/__dus 'di nas bzung ste/__ji srid byang chub snying po la mchis kyi bar du/__mkha' lding rdo rje khyung khra yi dam gyi lhar bzung bar bgyi'o/__/thugs kyi rjes gnang gi slad du/__sku yi rten me long dang /__gsung gi rten sngags kyi yi ge dang /__thugs kyi rten rdo rje rtse lnga pa rnams khyed rang rnams kyi snying gar bzhag ste byin gyis brlabs pa'i mos pa mdzod/__rtsa ba dang brgyud par bcas pa'i dpal ldan bla ma dam pa rnams kyis ji ltar thugs dam bskul ba'i dam tshig las ma 'da' bar/__bcom ldan 'das rdo rje khyung gi lha tshogs rnams/__rdo rje'i slob ma 'di rnams la ji srid sangs rgyas ma thob kyi bar du lus dang grib ma ltar mi 'bral zhing brtan par bzhugs par mdzad du gsol/__zhes brjod/__yon tan dang phrin las kyi rjes gnang gtor ma la brten nas bka' bsgo ba ni/__gtor ma 'di nyid yan lag bzhi rdzogs kyi tshul gyis yang 'dir yig cha snga mar/__gtor ma yan lag bzhi rdzogs su bskyed par gsungs pas spro na de ltar byas kyang legs mod/__'dir phyag len bde ba'i slad sngon du mdun bskyed dang lhan cig tu bskyed chog gcig gis so sor bskyed pa'i dbang du byas pa yin/__bcom ldan 'das rdo rje khyung khrar bskyed cing dngos su gsal ba'i dbu'i spyi bo'i gtsug tu/__brgyud pa'i bla ma rnams ngo bo bla ma so so la rnam pa rdo rje khyung khra'i skur gsal ba tho brtsegs su bzhugs pa'i gnas gsum du oM AHhU~M gis mtshan pa las 'od zer 'phros/__bla ma yi dam sangs rgyas byang sems dpa' bo dang rnal 'byor ma'i tshogs thams cad spyan drangs/__brgyud pa'i bla ma rnams la thim pas skyabs gnas kun 'dus su gyur pa la gsol ba 'debs pa 'di'i rjes zlos lan gsum mdzod/__/dus gsum sangs rgyas thams cad kyis/__/bcom ldan rdo rje khyung khra la/__/sku gsung thugs kyis byin brlabs shing /__/sa gsum gdug pa 'dul ba ru/__/mthu stobs byin rlabs dbang bskur ltar/__/de bzhin bdag la dbang bskur stsol/__/zhes gsol ba btab pas gtor ma'i lha tshogs khyed rang rnams kyi spyi bor byon nas byin gyis brlabs pa'i mos pa mdzod/__gtor ma spyi bor bzhag la/__bcom ldan dus kyi 'khor lo yi/__/thugs sprul byin rlabs mgon po khyed/__/'di la 'go zhing grogs mdzod cig__/sgos kyi srung ma mdzad du gsol/__/yang dag par rdzogs pa'i sangs rgyas rdo rje 'chang /__ye shes kyi mkha' 'gro ma/__jo bo nA ro tA pa/__pham mthing ba sku mched/__klog skya shes rab brtsegs/__mal lo tsA ba blo gros grags pa/__sa chen kun dga' snying po/__slob dpon bsod nams rtse mo/__rje btsun grags pa rgyal mtshan/__'jam mgon sa skya paN+Di ta/__'gro mgon chos rgyal 'phags pa/__zhang dkon mchog dpal/__na bza' brag phug pa/__bla ma dam pa bsod nams rgyal mtshan/__sngags 'chang gzungs kyi dpal ba/__chos rje dge legs dpal bzang /__rdzong chung pa kun dga' blo gros/__chos rje sangs rgyas bzang po/__rig 'dzin chos kyi blo gros/__rig 'dzin chos dpal bzang po/__mkhan chen byams pa bzang po/__'bum chen kun dga' dpal 'byor/__mkhan chen ngag dbang dpal bzang /__rin chen bsod nams mchog grub/__gnas gsar ba 'jam dbyangs bstan 'dzin/__ngag dbang bstan 'dzin phun tshogs/__rmor chen kun dga' lhun grub/__gnas gsar pa legs pa'i 'byung gnas/__'jam mgon kun dga' blo gros/__grub dbang rin chen rgyal mtshan/__yongs 'dzin kun dga' bkra shis/__rje shes rab 'od zer/__'jam mgon kun dga' rgyal mtshan/__bdag cag gi dpal ldan bla ma dam pa 'jam dpal gzhon nu rdo rje rin chen gyi bar du byon pa'i rtsa ba dang brgyud par bcas pa'i dpal ldan bla ma dam pa rnams kyis ji ltar thugs dam bskul zhing zhal gyis bzhes pa ltar bcom ldan 'das rdo rje khyung khra'i lha tshogs rnams rdo rje slob ma 'di rnams kyis byang chub ma thob kyi bar du lus dang grib ma ltar mi 'bral bar bzhugs nas/__bdud dang bar chad thams cad srung ba dang /__dngos grub thams cad stsal du gsol/__zhes dang gong gi gsol 'debs kyi tshig__/dus gsum sangs rgyas sogs kyi mthar/__de bzhin bdag gis dbang bskur ro/__/oM pak+ShiM swA hA/__lha tshogs rnams 'od du zhu nas khyed rang rnams kyi spyi bo nas zhugs snying ga'i khyung rigs lngar gsal ba la thim pas ye shes sems dpa'i tshul gyis byang chub ma thob bar du brtan par bzhugs pa'i mos pa mdzod/__oM pak+ShiM ga ru Da kA ya wA ka tsit+ta badz+ra swA b+hA ba At+ma ko\u0f85haM/__a ya ma du ru tsa sha na hU~M phaT/__ces drag tu bzlas shing spos rol bya/__lha 'od du zhu ba'i gtor zan dngos grub kyi tshul du cung zad re sbyin/__su pra tiSh+Thas brtan par bya/__mi 'gyur lhun po sogs shis pa brjod pa'i tshigs su bcad pa dang me tog gi char dbab/__des byin rlabs kyi dngos gzhi grub nas mjug dam tshig khas blang sogs spyi ltar byas la slob ma rnams rang gnas su btang /__gsum pa ni/__slob dpon gyis mchod pa kha gsos bsang sbyang byin brlab/__mchod bstod bzod gsol/__badz+ra muHsa tshom bu'i ye shes pa dang /__gtor mgron gyi ye shes pa rnams gshegs/__dam tshig pa rang la bstim/__gnas gsum bsrung /__bsngo smon shis brjod bya'o/__/yang nad gdon gyis nyen pa la rkyen sel lta bur gtor ma'i byin rlabs tsam byed na/__bdag bskyed dang /__mdun rten gtor ma kho na lhar bskyed cing mchod bstod bzlas pa bya/__dngos gzhi maN+Dal/__thun mong gi gsol 'debs/__rgyun bshags bcas kyi rjes/__slob ma lhar bskyed cing bstim/__de nas gtor dbang gong bzhin bya'o/__/de bzhin tu khrus chog rkyang pa byed na/__bdag bskyed dang bum pa bsgrub/__sbyong ba gsum sngon tu 'gro ba bkru byabs shis brjod kyi bar gong bzhin bgyis pas kyang grub bo/__/gsum pa las kyi tshogs ni/__byis gdon bya 'dre mche ba'i dug__/steng gdon gza' dang 'og gdon klu/__/sbyar ba'i dug tu gyur pa rnams/__/brtag cing srung gso'i rim pa dang /__/sde brgyad 'khrugs pa'i cho 'phrul ni/__/ser ba srung ba'i man ngag ste/__/mngon spyod drag po'i sbyin sreg bcas/__/las kyi rim pa mdor bsdus pa'o/__/zhes pa ste/__rtsa ba'i yig rnying mchan dang bcas pa las shes par bya'o/__/bcom ldan rdo rje khyung khra yi/__/thugs rje'i byin rlabs sprin phung las/__/ye shes bdud rtsi'i chu rgyun gyis/__/grub gnyis dga' tshal rgyas gyur cig__/ces pa'ang bya bral ba 'jam dbyangs mkhyen brtse'i dbang pos rang 'dra'i blo dman rnams 'jug pa bde ba'i slad/__mnyam med gzungs kyi dpal ba dang /__rdzong chung pa kun dga' blo gros kyis mdzad pa'i mngon rtogs dang /__'phags pa rin po ches mdzad par grags pa'i byin rlabs kyi cho ga__/byams pa ngag dbang dpal bzang gis mdzad pa'i zur 'debs dang bcas pa rnams phyogs gcig tu bsgrigs te/__bklags pas grub par bsdebs pa sarba dA su shre yo b+ha ba tu//____//__!