JKW-KABUM-11-DA-001-004

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 11, sde tshan 1, Text 4, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	སུམ་པ་ལོ་ཙཱ་བ་ (sum pa lo tsA ba)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 11: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Mind Training Texts - blo sbyong
Cycle	སུམ་པ་ལོ་ཙཱ་བའི་བློ་སྦྱོང་སྙན་བརྒྱུད་ (sum pa lo tsa ba'i blo sbyong snyan brgyud)

1 Texts in this Section (sde tshan or chos tshan)

4 22-39	སུམ་པ་ལོ་ཙཱ་བའི་བློ་སྦྱོང་སྙན་བརྒྱུད་ཀྱི་ཁྲིད་ཡིག་སྙིང་གི་བདུད་རྩི། sum pa lo tsA ba'i blo sbyong snyan brgyud kyi khrid yig snying gi bdud rtsi Mind Training Texts - blo sbyong   ·   Contemplative Guide Books and Instructional Manuals - khrid yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སུམ་པ་ལོ་ཙཱ་བའི་བློ་སྦྱོང་སྙན་བརྒྱུད་ཀྱི་ཁྲིད་ཡིག་སྙིང་གི་བདུད་རྩི།

༄༅། །སུམ་པ་ལོ་ཙཱ་བའི་བློ་སྦྱོང་སྙན་བརྒྱུད་ཀྱི་ཁྲིད་ཡིག་སྙིང་གི་བདུད་རྩི་ཞེས་བྱ་བ་བཞུགས་སོ། ། ཨོཾ་སྭསྟི་སིདྡྷཾ། ཐེག་མཆོག་གཞུང་གི་ཆུ་གཏེར་བསྲུབས་པའི་ཕུལ། །སྙན་བརྒྱུད་གདམས་ངག་བསྐལ་བཟང་མཆོག་རྣམས་ཀྱི། །སྙིང་གི་བདུད་རྩིར་སྩོལ་མཁས་བླ་མ་ལ། །བཏུད་ནས་ཟབ་མོའི་ལམ་སྲོལ་ཅུང་ཟད་དབྱེ། །འདི་ལ་གཉིས། ཡིད་ཆེས་ཤིང་ཁུངས་བཙུན་པར་བྱེད་པ་ལོ་རྒྱུས་དང་། ལོ་རྒྱུས་དེ་ལས་བྱུང་བའི་གདམས་པ་དངོས་སོ། །དང་པོ་ནི། སུམ་པ་ལོ་ཙཱ་བ་དར་མ་ཡོན་ཏན་ནམ་དཔལ་མཆོག་དང་པོའི་རྡོ་རྗེ་ཞེས་བྱ་བ་མཁས་ཤིང་གྲུབ་པ་བརྙེས་པ་དེས། འཕགས་ཡུལ་རྒྱ་གར་དུ་ཡུན་རིང་བར་བཞུགས། སླར་བོད་དུ་འབྱོན་པར་བཞེད་པ་ན། ཆས་ལྷག་གི་གསེར་རྣམས་ལས་རྒྱ་གར་རྡོ་རྗེ་གདན་དུ་མཆོད་པ་རྒྱས་པར་མཛད། འཕགས་ཡུལ་གྱི་གནས་དང་བླ་མ་རྣམས་ལ་ཐུགས་འཕྲེང་པའི་རྣམ་པས་འབྱོན་ནམ། བཞུགས་སམ་སྙམ་ཐེ་ཚོམ་མེ་ཐུགས་སྐྱོ་ཞིང་ཅུང་ཟད་མ་བདེ་བར་གྱུར་ཏེ། མ་ཧཱ་བོ་དྷི་ལ་བསྐོར་བ་མཛད་ཅིང་བཞུགས་པ་ན། །བུ་མོ་སྔོན་མོ་ཞིག་གི་རྗེས་སུ། །བུ་མོ་དམར་མོ་ཞིག་འབྲེངས་ཏེ། །རེས་ནམ་མཁའ་ལ་སྐོར་བ་བྱེད། རེས་ས་གཞིའི་སྟེང་ན་ཕར་སྐོར་བ་བྱེད། ཆེད་དུ་གཏོང་ན་ཡལ་བ་སྙམ་བྱེད་པ་ཞིག་འདུག་པ་ན། བུད་མེད་དམར་མོ་དེ་ཡི་ཞལ་ནས། ང་དོ་ཞག་སེམས་ཀྱང་མ་བདེ། འགྲོ་སྙིང་ཡང་འདོད། །འཆི་བ་ནི་མིན་ནམ། ལར་འཆི་བ་འདི་གས་འཇིགས་ཞུ་བ་ལ། བུད་མེད་སྔོན་མོ་དེ་ཉིད་ལོ་ཙཱ་བ་ལ་སྤྱན་ཧུར་གྱིས་གཟིགས་ཤིང་ཞལ་ནས། མོ་དེ་གང་བྱུང་གིས་ཆོག་ན་ཅི་བྱས་ཀྱང་བདེ་བ་ཞིག་ཡོང་བ་ཡིན་ཏེ། གང་བྱུང་གིས་མ་ཆོག་པས་ལན་པ་ཡིན་སོགས་དྲི་ལན་གྱི་ཚུལ་དུ་རྡོ་རྗེའི་ཚིག་བཞི་པོ་འདི་གསུངས་པས། ལོ་ཙཱ་བའི་ཐུགས་ལ་དེ་དག་གི་དོན་ཇི་ལྟ་བར་ཤར། སྔར་མཁྱེན་པའི་ཆོས་ཐམས་ཅད་ཀྱི་དོན་ཉམས་སུ་ལེན་མཁྱེན་པར་གྱུར། རྟོགས་པ་ཁྱད་པར་ཅན་འཁྲུངས། སྔར་མཁྱེན་པའི་ཆོས་ཐམས་ཅད་ཀྱང་ནོར་དུ་སོང་བས་ཐུགས་རྩིས་ཀྱི་སྙིང་པོར་མཛད། བུད་མེད་དམར་མོ་སྔོན་མོ་གཉིས་ཀྱང་རྡོ་རྗེ་ཕག་མོ་དང་། རྗེ་བཙུན་སྒྲོལ་མ་ཡིན་པར་སྣང་གསུངས། རྡོ་རྗེའི་ཚིག་དེ་དག་ཀྱང་བསྒྱུར་ཏེ་འཇམ་པའི་དབྱངས་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོ་ལ་གནང་། དེས་འགྲོ་བའི་མགོན་པོ་འཕགས་པ་རིན་པོ་ཆེ་དང་། གྲུབ་ཐོབ་འདར་འཕྱར་བ་རིན་པོ་ཆེ་བཟང་པོ་གཉིས་ལ་གནང་བ་ནས་རིམ་པར་བརྒྱུད་དེ། ཕྱིས་སུ་རྒྱལ་སྲས་རིན་པོ་ཆེ་ཐོགས་མེད་པས་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་ལ། དྲུང་པའི་ཐུགས་དམ་གྱི་བཅུད་ཡིན་པ་སེམས་ལ་ཕན་པའི་ཁྲིད་གཅིག་ཞུ་ཞུས་པས་འདི་སྩལ་བར་གྲགས་ཤིང་། དགེ་བཤེས་འཕགས་པ་ལྷ་ཞེས་བྱ་བ་བསྐུལ་ཏེ། ཁྲིད་ཡིག་ཀྱང་དུས་དེར་མཛད་པ་ཡིན་ཅེས་གསུངས། ས་སྐྱ་པའི་གདུང་བརྒྱུད་བླ་ཆེན་བསོད་བློ་རྒྱ་ནག་ཏུ་འབྱོན་པའི་དུས་ཀྱང་རྒྱལ་སྲས་རིན་པོ་ཆེ་ལྷ་ས་བར་སྐྱེལ་མ་ལ་ཕེབས། དུས་དེར་རྒྱལ་སྲས་པས་དབུ་མཛད། ཕྱོགས་ཀྱི་དགེ་བའི་བཤེས་གཉེན་ལྷ་སའི་ཁྱམས་ར་གང་ལའང་སྤྱི་ཆོས་སུ་གདམས་པ་འདི་ཀ་གནང་ཞེས་ཆོས་རྗེ་རྒྱལ་སྲས་པའི་རྣམ་ཐར་དུ་འབྱུང་བས་མཚོན་དགེ་བའི་བཤེས་གཉེན་ཆེན་པོ་རྣམས་ནས་ཀྱང་ཐུགས་དམ་གྱི་སྙིང་པོར་མཛད། ཁྱད་པར་རྗེ་བཙུན་རྡོ་རིང་པ་ལ། འཇམ་མགོན་ས་པཎ་ནས་བརྒྱུད་པའི་སྲོལ་གཉིས་ཀའི་ཆུ་བོ་གཅིག་ཏུ་འདྲེས་པ་ཚར་ཆེན་ཆོས་ཀྱི་རྒྱལ་པོས་གསན་ཅིང་། དཔལ་ཞྭ་ལུ་གསེར་བཀང་གི་ཆོས་གྲར་ཆོས་རྗེ་བླ་མ་དམ་པའི་ཁྲིད་ཡིག་གི་སྟེང་ནས་ཉམས་ཁྲིད་སྩལ་བའི་སྐབས། འཇམ་པའི་དབྱངས་དངོས་གནས་གསར་བ་མཁྱེན་བརྩེའི་དབང་ཕྱུག་གི་གསུང་རྒྱུན་ཟིན་བྲིས་སྙིང་གི་མུན་སེལ་ཞེས་བྱ་བ་མཛད་དེ་དུས་ཕྱིས་པར་ཉམས་འཁྲིད་ཀྱི་བརྒྱུད་པ་བར་མ་ཆད་པར་བྱུང་བ་དང་། རྒྱལ་སྲས་རིན་པོ་ཆེ་ནས་བརྒྱུད་པ་རྗེ་ཀུན་དགའ་གྲོལ་མཆོག་གིས་གསན་ཅིང་ཁྲིད་བརྒྱའི་གླེགས་བམ་དུ་བཀོད་པའི་ཁྲིད་ལུང་གི་རྒྱུན་ཀྱང་ད་ལྟའི་བར་དུ་བཞུགས་པ་ཡིན་ནོ།། །།

གཉིས་པ་ལོ་རྒྱུས་དེ་དང་ལྡན་པའི་གདམས་པ་དངོས་ལ། དེ་ལྟ་བུའི་སུམ་པ་ལོ་ཙཱ་བའི་སྙན་བརྒྱུད་བློ་སྦྱོང་ངམ། མཁའ་འགྲོའི་རྡོ་རྗེའི་ཚིག་བཞི་པ་ཞེས་གྲགས་པའི་ཁྲིད་ཉམས་སུ་ལེན་པར་བྱེད་པ་ལ་བཞི་ལས། རྡོ་རྗེའི་ཚིག་དང་པོ། གང་བྱུང་གིས་ཆོག་ན་ཅི་བྱས་བདེ། ཞེས་པའི་དོན་ཉམས་སུ་བླང་བ་ལ་གཉིས། སྔོན་འགྲོ་དང་སྦྱར་ཏེ་ཉམས་སུ་བླང་ཚུལ་དང་། དངོས་གཞི་དང་སྦྱར་ཏེ་ཉམས་སུ་བླང་བའི་ཚུལ་ལོ། །དང་པོ་ནི། གནས་དབེན་པར་བདེ་བའི་གདན་ལ་བསམ་གཏན་གྱི་རོལ་པས་འདུག་སྟེ། མདུན་གྱི་ནམ་མཁར་བླ་མ་དཀོན་མཆོག་གསུམ་མཁའ་ཁྱབ་ཏུ་བཞུགས་པ་ལ་བློ་གཏད་དེ། རང་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བར་མོས་ལ། སྐྱབས་འགྲོ་བཞི་སྐོར་བརྒྱ་སྟོང་སོགས་ཅི་ནུས་དང་། སེམས་ཅན་ཐམས་ཅད་ཡིད་ཡུལ་དུ་བྱས་ཏེ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་མཁའ་འགྲོ་མའི་སྙན་བརྒྱུད་ཀྱི་གདམས་པ་ཟབ་མོ་ཉམས་སུ་བླང་བར་བགྱིའོ། །ཞེས་ཐེངས་གསུམ་བརྗོད་པས་སྨོན་འཇུག་གི་སེམས་བསྐྱེད། ཁྲིད་དུ་བྱེད་པའི་ཚེ་དེ་བཞིན་བྱ་ལ། ཐུག་འཕྲད་དུ་ཉམས་སུ་ལེན་པ་ན། ཆོས་བཞི་བསྟན་པའི་མདོའི་དོན་ཇོ་བོ་རྗེས་མཛད་པའི། སངས་རྒྱས་ཆོས་ཚོགས་ཚར་གསུམ་ཙམ་བརྗོད་པས་སྐྱབས་སེམས་དུས་གཅིག་ཏུ་འབྱུང་བ་ཡིན་ཏེ། དེའང་ཚིག་དང་པོས་གང་ལ་སྐྱབས་སུ་འགྲོ་བའི་ཡུལ་བསྟན། བྱང་ཆུབ་བར་དུ་ཞེས་པས་དུས། བདག་ནི་ཞེས་པ་གང་ཟག །སྐྱབས་སུ་མཆི་ཞེས་པས་བྱ་བ་བསྟན། སྦྱིན་སོགས་བགྱིས་པའི་ཞེས་པས་འཇུག་པ་བྱང་སེམས། སངས་རྒྱས་འགྲུབ་པར་ཤོག་གིས་སྨོན་པ་བྱང་སེམས་བསྟན་པ་ཡིན་ནོ་གསུངས། སྔོན་འགྲོ་དངོས་ལ། དལ་འབྱོར་རྙེད་དཀའ་དང་། འཆི་བ་མི་རྟག་པ་ལ་སྦྱར་ཏེ་བསྒོམ་པ་དང་། ལས་རྒྱུ་འབྲས་དང་འཁོར་བའི་ཉེས་དམིགས་ལ་སྦྱར་ཏེ་བསྒོམ་པ་གཉིས། དང་པོ་ནི། རང་རེ་རྣམས་ཀྱི་ལུས་ལ་ནད་མེད། སེམས་ལ་སྡུག་བསྔལ་མེད། བསམ་པ་འགྲུབ། གཞན་གྱིས་བསྟོད་ཅིང་བསྐུར་བ་སོགས། དེས་མཚོན་པའི་ལུས་སེམས་ལ་བདེ་བ་གང་བྱུང་ཡང་། དེ་ཙམ་གྱིས་མི་ཆོག་པར། གཞན་ལ་བརྙས་འདོད། གཞན་བདེ་བ་ལ་མི་བདེ་བའི་ཕྲག་དོག །རང་གི་བདེ་བ་ལ་རློམ་སེམས་སོགས་སྣ་ཚོགས་ཤིག་བྱས་པས། ཆགས་སྡང་གི་ལས་མང་པོ་བསགས་ནས། བདེ་བ་དེ་ཀ་འཁོར་བ་དང་ངན་སོང་གི་རྒྱུར་སོང་བ་ཡིན། ད་ནི་བདེ་བ་གང་བྱུང་ཡང་། དེ་ཀས་ཆོག་པར་ཉམས་སུ་ལེན་པ་སྟེ། དེའང་རང་ལ་གོང་དུ་སྨོས་པ་ལྟར་ལུས་སེམས་ཀྱི་ཐོག་ཏུ་བདེ་བར་སྣང་བ་གང་བྱུང་ཡང་བདེ་བ་དེ་ལམ་གྱིས་གསལ་བཏབ། ཚོར་བ་བདེ་བ་མྱོང་བ་ན། བདེ་བ་འདི་ནི་གཉིད་སད་ཁའི་རྨི་ལམ་དང་འདྲ་བར་སྐད་ཅིག་ཙམ་ཡིན་གྱི་འདི་ལ་ཆགས་སྡང་གི་ལས་སོགས་རིན་མི་ཆོག །ང་རང་གིས་བདེ་བ་མྱང་བ་འདི་ཀས་ཆོག །མགྲོན་ཁང་གི་ཁང་པ་ཇི་ལྟར་དགའ་ཞིང་མཛེས་ཀྱང་། རང་རེ་ཞག་རེ་ཙམ་ལས་མི་སྡོད་པར་བུད་འགྲོ་བས། ཆགས་ཞེན་བྱེད་རིན་མི་ཆོག་པ་དང་། མགྲོན་ཁང་ན་ལོངས་སྤྱོད་ཇི་ཙམ་ཡོད་པ་དང་། མགྲོན་ཁང་ན་སྐྱེ་བོའི་འདུ་འཚོགས་ཇི་ཙམ་ཡོད་ཀྱང་། རང་རེ་ཡུད་ཙམ་རེ་ནས་བུད་འགྲོ་བས་ཆགས་རིན་མི་ཆོག་པ་ལྟར། ཚེ་འདིའི་གནས་ལུས་ལོངས་སྤྱོད་འཁོར་གཡོག་ལ་སོགས་པ་ཇི་སྙེད་ཅིག་ཡོད་ཀྱང་། ཡུད་ཙམ་རེ་སྔོན་ལས་ཀྱི་འཕེན་པ་དང་རྟེན་འབྲེལ་གྱི་དབང་གིས་ཚོགས་པ་ཡིན་གྱིས། ནམ་འཆི་ཆ་མེད་པས་མྱུར་དུ་མྱུར་དུ་གྱེས་ཤིང་བྲལ་ནས། རང་གཅིག་པུར་ག་ཤེད་དུ་ཡུད་ཀྱིས་འགྲོ་རྒྱུ་ཡིན་པས། དེ་ལ་བརྟེན་ན་ཆགས་སྡང་གི་ལས་གསོག་ཏུ་མི་ཁོམ་སྙམ་དུ་ཡང་ཡང་སེམས་པར་བྱེད། དེ་བཞིན་ཏུ་ལུས་ལ་ན་ཚ་དང་། སེམས་ལ་སྡུག་བསྔལ་དྲག་པོ་བཟོད་བླག་མེད་པ། དེས་མཚོན་པའི་སྡུག་པར་སྣང་བ་བྱུང་བ་ན། དེ་ལ་བརྟེན་ནས་ཆགས་སྡང་གི་ལས་ཁམ་པོ་ཆེ་བསགས་པས། སྡུག་པ་དེ་ཀ་ཐར་པའི་གེགས་སུ་སོང་བ་ཡིན་པས། དེ་ནི་སྡུག་པར་སྣང་བ་གང་བྱུང་ཡང་སྡུག་པ་དེ་ཀས་ཆོག་གི། དེ་ལ་བརྟེན་ནས་ལས་སོགས་རྒྱུ་ཅི་ཡང་མེད། སྡུག་པར་སྣང་བ་འདི་གཉིད་སད་ཀའི་རྨི་ལམ་དང་འདྲ། མགྲོན་ཁང་པ་ཤིན་ཏུ་ཉམ་ཉེས་པ་དང་། ལོངས་སྤྱོད་མེད་པ་དང་། དེ་ན་འཁོད་པས་རང་ལ་གཤེ་སྐུར་བྱེད་པ་དང་འདྲ། གང་བྱེད་ཀྱང་རང་རེ་ཡུད་ཀྱིས་བུད་འགྲོ་བ་མ་གཏོགས། དེར་གཏན་དུ་མི་སྡོད་པས་ཆགས་སྡང་བྱ་རིན་མི་ཆོག་པ་བཞིན་ཏུ། བདག་ཀྱང་དོ་ནུབ་འཆིའམ། སང་འཆི་བའི་ཚོད་འདི་ལ། སྡུག་པོ་གང་བྱུང་ཡང་། དེ་ལ་བརྟེན་པའི་ལས་གསོག་དུ་མི་ཁོམ། ད་ཅི་ནས་ཀྱང་ཚེ་ཐུང་འདི་དོན་མེད་དུ་མ་སོང་བར་ཆོས་ཤིག་རང་བྱེད་དོ་སྙམ་དུ་སེམས་པར་བྱེད་པ་ཡིན་གསུངས། གཉིས་པ་ལས་རྒྱུ་འབྲས་དང་འཁོར་བའི་ཉེས་དམིགས་དང་སྦྱར་ཏེ་གང་བྱུང་གིས་ཆོག་ན་ཅི་བྱས་བདེ་བར་ཉམས་སུ་ལེན་པ་ནི། སྔར་བཤད་པ་ལྟར་རང་ལ་བདེ་བ་བྱུང་ན། བདེ་བ་འདི་ལྟ་བུ་ཐོབ་པ་བདག་གི་སྐྱེ་བ་སྔོན་མ་དགེ་བ་བྱས་པའི་འབྲས་བུར་འདུག །འདོད་ནི་བདེ་བ་འདི་ཁོ་ན་འདོད་པར་འདུག་དེ་རྒྱུ་མི་དགེ་བ་ལས་མི་འབྱུང་གི། དགེ་བ་ཁོ་ན་ལས་འབྱུང་བར་འདུག་པས། ཅིས་ཀྱང་རང་དུས་འདི་ནས་བཟུང་སྟེ། མ་ཤིའི་བར། སང་ཉི་མ་མ་ཤར་གྱི་བར། ཐུན་འདི་མ་གྲོལ་གྱི་བར་དུ། དགེ་བ་ཆེ་འབྲིང་ཆུང་གསུམ་འགྲུབ་ཚད་ཅིག་གསོག་སྟེ་སྙམ་དུ་བསམ། སྡུག་པར་སྣང་བ་གང་བྱུང་ཡང་། འདི་འདྲ་བའི་སྡུག་བསྔལ་ཉམས་སུ་མྱོང་བ་འདི་མི་དགེ་བ་བྱས་པའི་འབྲས་བུ་ཡིན། སྡུག་པོ་འདི་ལྟ་བུ་འདོད་པོ་སུ་ཡང་མེད། སྡུག་པོ་མི་འདོད་ཙ་ན། དེའི་རྒྱུ་མི་དགེ་བ་མི་སྤོང་པའི་ཐབས་མི་འདུག་པས། དུས་འདི་ནས་མ་ཤིའི་བར་སོགས་སུ་མི་དགེ་བ་ཆེན་པོ་ལྟ་ཅི་སྨོས། ཕྲ་ཞིང་ཕྲ་བ་ཡན་ཆད་སྲོག་ལ་བབ་ཀྱང་མི་བྱེད་སྙམ་པའི་འདུན་པ་དྲག་པོ་བཏང་། དེས་མཚོན་པའི་ལུས་སེམས་སྡུག་བསྔལ་ཅི་བྱུང་ཡང་། ངས་འདི་ཙམ་གྱིས་སྡུག་བསྔལ་ཕྲ་མོ་ཡང་མི་བཟོད་ན། དམྱལ་བ་ཡི་དྭགས་དུད་འགྲོ་རྣམས་ཀྱི་སྡུག་བསྔལ་དོས་དྲག་ལ་ཡུན་རིང་བ་ཁམ་པོ་ཆེ་འདི་དག་བཟོད་པའི་བླག་ཨེ་འདུག །དེས་མཚོན་པའི་ལྷ། ལྷ་མ་ཡིན། མིའི་སྡུག་བསྔལ་ཆེན་པོ་རྣམས་བཟོད་ཐབས་མི་འདུག་པས། དེ་དག་གི་རྒྱུ་སྡིག་པ་སྤོང་དགོས་བསམ་པའི་འདུན་པ་བྱེད་པ་ཡིན་གསུངས། །གཉིས་པ་ལམ་གྱི་དངོས་གཞི་དང་སྦྱར་ཏེ་ཉམས་སུ་བླང་བ་ལ་གཉིས། ཀུན་རྫོབ་བྱང་ཆུབ་ཀྱི་སེམས་དང་སྦྱར་ཏེ་ཉམས་སུ་བླང་བ་དང་། དོན་དམ་བྱང་ཆུབ་ཀྱི་སེམས་དང་སྦྱར་ཏེ་ཉམས་སུ་བླང་བའོ། །དང་པོ་ནི། རང་གི་ལུས་སེམས་ཀྱི་བདེ་བ་གང་བྱུང་ཡང་། བདེ་བ་དེ་གསལ་བཏབ། ཚོར་བ་བདེ་བ་མྱོང་བ་ན། བདེ་བ་འདི་ལྟ་བུ་བྱུང་བ་ལ་དགའ་བ་ཁོ་ན་ཡོད། བདེ་བ་འདོད་མཁན་གྱི་སེམས་ཅན་འདི་ཐམས་ཅད་བདག་གི་ཅིར་མི་འོང་མ་ཡིན་གྱི། ཚེ་རབས་སྔ་མ་རྣམས་སུ་ཕ་མ་དྲིན་ཅན་ཡང་ནས་ཡང་དུ་བྱས་པ་ཤ་སྟག་ཡིན་པས། བདག་གི་བདེ་བ་རྒྱུ་དང་བཅས་པ་འདི་ཐམས་ཅད་སེམས་ཅན་ཐམས་ཅད་ལ་སྦྱིན་དགོས་བསམ་པའི་འདུན་པ་དྲག་པོ་བྱས། རང་གི་ལུས་ལོངས་སྤྱོད་སོགས་བདེ་བ་དང་། དེའི་རྒྱུ་དགེ་བའི་རྩ་བ་ཐམས་ཅད་བློས་ལིང་གིས་བླངས་ཏེ་སེམས་ཅན་ཐམས་ཅད་ལ་བྱིན་པས་ཐུན་མོང་དུ་ཡིད་ལ་འདོད་དགུ་འབད་མེད་འབྱུང་བ་ཡིད་བཞིན་ནོར་བུའི་ཆར་དུ་གྱུར། བྱེ་བྲག་གོས་མེད་པ་ལ་གོས། ཟས་མེད་པ་ལ་ཟས། མགོན་སྐྱབས་མེད་པ་ལ་མགོན་སྐྱབས། དེས་མཚོན་པའི་ཡིད་ལ་གང་འདོད་ཀྱི་ཆར་ཆེན་པོར་གྱུར་ཏེ་བསམ་པ་ཐམས་ཅད་རྫོགས་པར་བསམ། དེ་བཞིན་ཏུ་ཚ་དམྱལ་བ་རྣམས་ལ་ཆར་དང་རླུང་གྲང་མོ་སོགས་ཀྱིས་ཚ་བའི་གདུང་བ་བསལ། ལུས་སེམས་བསིལ་བའི་བདེ་བ་ལ་བཀོད། གྲང་དམྱལ་བ་རྣམས་ལ་ཉི་མའི་འོད་ལ་སོགས་པ་དྲོ་བའི་དངོས་པོས་མུན་པ་བསལ། དྲོ་ཞིང་བདེ་བར་བྱས་པ་སོགས་ཀྱིས་མཚོན་རིགས་དྲུག་སོ་སོའི་སྡུག་བསྔལ་སྦྱོང་ཆས་སུ་གྱུར་སོང་སྙམ་པའི་འདུན་པ་བྱེད། དེ་གསལ་འདེབས་པའི་སླད་དུ། བདག་གི་བདེ་བ་དང་དགེ་བ་ཐམས་ཅད་སེམས་ཅན་ཐམས་ཅད་ལ་སྨིན་པར་གྱུར་ཅིག་ཅེས་སྨོན་ལམ་གདབ། ཡུལ་ཁྱད་པར་ཅན་ལ་གསོལ་བ་བཏབ་ན་གང་བཏབ་པ་དེ་འགྲུབ་པ་ཡིན་པས། མདུན་གྱི་ནམ་མཁར་བླ་མ་དང་དཀོན་མཆོག་གསུམ་མཁའ་ཁྱབ་ཏུ་བཞུགས་པ་ལ་གདུང་ཤུགས་ཆེན་པོས། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་གྱིས་བདག་གིས་བདེ་བ་དང་དགེ་བ་སེམས་ཅན་ཐམས་ཅད་ལ་སྨིན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ། མདོར་ན། འདུན་པ་དང་། སྨོན་ལམ་དང་། གསོལ་འདེབས་གསུམ་སྤེལ་མར་བྱ་ཞིང་ཉམས་སུ་བླངས་ཏེ། བདེ་བ་གང་བྱུང་ཡང་ཁེངས་སེམས་དང་རློམ་སེམས་སོགས་འཁོར་བའི་རྒྱུར་མི་གཏོང་བར། གནད་འདི་ལྟ་བུས་ལམ་དུ་གཏོང་བ་ཡིན་གསུངས། དེས་མཚོན་པའི་སྡུག་པར་སྣང་བ་གང་བྱུང་ཡང་། སྡུག་པ་འདི་ལྟ་བུ་མི་འདོད་པ་ཁོ་ན་ཡོད་ཀྱང་། སེམས་ཅན་འདི་རྣམས་ཐབས་མི་མཁས་པའི་དབང་གིས། སྡུག་མི་འདོད་བཞིན་དུ་སྡུག་བསྔལ་ཁོ་ན་བསྒྲུབ་པར་འདུག །ཅི་ནས་ཀྱང་སེམས་ཅན་ཐམས་ཅད་ཀྱི་སྡུག་བསྔལ་དང་། །སྡུག་བསྔལ་གྱི་རྒྱུ་ལས་དང་ཉོན་མོངས་པ་ཐམས་ཅད་བདག་གི་སྡུག་བསྔལ་འདི་ལ་ཐིམ་ན་སྙམ་པའི་འདུན་པ་དྲག་པོ་བྱས་པས། སེམས་ཅན་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་ཐམས་ཅད་ནག་ཕུང་གིས་འདུས་བྱུང་། རང་གི་སྡུག་བསྔལ་གང་ཡིན་པ་དེ་ལ་སིབ་ཀྱིས་ཐིམ། སེམས་ཅན་ཐམས་ཅད་དཀར་སངས་ཀྱིས། བདེ་ཆམ་གྱིས་སོང་བར་བསམ་ཞིང་རིག་པ་བརྗོད་མེད་དུ་བཞག །གོང་བཞིན་འདུན་པ། སྨོན་ལམ། གསོལ་འདེབས་རྣམས་སྤེལ་མར་བྱ་སྟེ། དེ་ཡང་། སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་པ་ཐམས་ཅད་བདག་ལ་སྨིན་པར་གྱུར་ཅིག་ཅེས་སྨོན་ལམ་དང་། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་གྱིས་སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་པ་ཐམས་ཅད་བདག་ལ་སྨིན་པར་བྱིན་གྱིས་བརླབ་ཏུ་གསོལ། ཅེས་གསོལ་བ་གདབ། སྡུག་པ་ལ་ཁོང་ཁྲོ་བ་དང་། ཞུམ་པའི་སེམས་མི་བྱ་བར་ལམ་དུ་གཏོང་བ་གལ་ཆེ་གསུངས། མདོར་ན། རང་ལ་ཁབ་སྐུད་ཙམ་སྟེར་མཁན་བྱུང་བ་ན། ངས་འདི་ལྟ་བུ་ཐོབ་པ་འདི། སྔོན་གཞན་ལ་བྱིན་པའི་ཕན་ཡོན་གྱིས་བྱུང་བ་ཡིན་གྱི། སྟེས་དབང་ངམ། ཕོ་སྒོ་ལྟ་བུས་བྱུང་བ་མིན། འདིས་མཚོན་པའི་བདེ་དགེ་ཐམས་ཅད་ཡར་བླ་མ་དཀོན་མཆོག་ལ་ཕུལ། མར་སེམས་ཅན་ཐམས་ཅད་ལ་ལྟོས་མེད་དུ་ལིང་གིས་བྱིན་པས་གོང་བཞིན་གང་ལ་གང་འདོད་པའི་རྫས་སུ་གྱུར་ཏེ། ཚིམས་པར་བསམ་པ་བྱས་པས། དངོས་པོ་ཕྲ་ཞིང་ཕྲ་བ་ཁབ་སྐུད་ཙམ་ལ་བརྟེན་ནས་ཀྱང་། དགེ་བ་དཔག་ཏུ་མེད་པ་གསོག་ཐུབ་པའི་གནད་ཡིན་གསུངས། །གཉིས་པ་དོན་དམ་བྱང་སེམས་དང་སྦྱར་ཏེ་ཉམས་སུ་བླང་བ་ནི། བདེ་བར་སྣང་བ་གང་བྱུང་ཡང་། དེ་ཀའི་ངོ་བོ་རང་གི་སེམས་ལས་ལོགས་སུ་གྲུབ་པ་ཅུང་ཟད་ཀྱང་མེད་པ། སེམས་དེ་ཉིད་ཀྱང་། དང་པོ་དུས་འདི་ཙམ་ན། གནས་འདི་ལྟ་བུར། ཚུལ་འདི་ལྟར་སྐྱེས་བཙལ་པས། སྙེད་རྒྱུ་མི་ཡོང་བས་དང་པོར་སྐྱེ་བའི་རྒྱུས་སྟོང་པ། བར་དུ་རང་གི་ལུས་ཀྱི་ཕྱི་ནང་དོན་སྙིང་ནང་ཁྲོལ་ནས་བརྩམས་ཏེ། ཕྱི་སྣོད་ནང་བཅུད་ཕྲ་རགས་ཀྱི་བར་གང་དུ་གནས། དབྱིབས་དང་། ཁ་དོག་དང་། མཚན་མ་ཇི་ལྟ་བུས་གནས་ལེགས་པར་བཙལ་ཞིང་བརྟགས་ཀྱང་། འདིའོ་ཞེས་བརྗོད་མི་ཤེས་པས་བར་དུ་གནས་པའི་ངོ་བོས་སྟོང་། དེ་ལྟར་སྐྱེ་བ་དང་གནས་པ་མ་གྲུབ་ཙ་ན། དེ་ལ་ལྟོས་པའི་འགག་པའང་མི་གྲུབ་པས། ཐ་མར་འདི་འདྲ་ཞིག་ཏུ་ཐིམ་སོང་ཟེར་བའམ། ཟད་སོང་ཟེར་བ་སུས་བཙལ་ཀྱང་མི་རྙེད་པས། ཐ་མ་འགག་པའི་འབྲས་བུ་སྟོང་པ་སྟེ། མདོར་ན། སྐྱེ་འགག་གནས་གསུམ་དང་བྲལ་བའི་གནས་ལུགས་བརྗོད་བྲལ་གྱི་སྟེང་དུ་ཆམ་ཆམ་འཇོག་པར་བྱེད། དེ་བཞིན་ཏུ་སྡུག་པར་སྣང་བ་གང་བྱུང་ཡང་དེ་ཀའི་ངོ་བོ་ལ་བལྟས་ཏེ་གོང་བཞིན་ཉམས་སུ་ལེན། མདོར་ན། བདེ་སྡུག །སྐྱིད་མི་སྐྱིད་སོགས་གཉིས་ཆོས་ཀྱིས་བསྡུས་པའི་སྣང་བ་གང་བྱུང་ཡང་། རློམ་ཞེན་དང་། ཁོང་ཁྲོ་སོགས་མི་བྱ་བར། གནད་འདི་ལྟ་བུས་ལམ་དུ་བཏང་བས། ཅི་བྱུང་བདེ་བ་ཞེས་བྱ་བ། ཅི་བྱུང་ཡང་ཆོས་སུ་སོང་བས་གནས་སྐབས་དང་། མཐར་ཐུག་ཏུ་བདེ་བ་ཞིག་ཡོང་བ་ཡིན་ནོ་གསུངས། རྡོ་རྗེའི་ཚིག་གཉིས་པ། སེམས་བཞག་པར་བསྡད་ན་ཕྱིན་ཀྱང་ཆོག །ཅེས་པའི་དོན་ཉམས་སུ་ལེན་པ་ལའང་གཉིས། ཐུན་མོང་གི་རྣལ་འབྱོར་དང་། ཐུན་མོང་མ་ཡིན་པའི་རྣལ་འབྱོར་རོ། །དང་པོ་ཐུན་མོང་གི་རྣལ་འབྱོར་གྱིས་ཉམས་སུ་བླངས་ན། དགེ་བའི་བྱ་བ་གང་བྱེད་ཀྱང་། བུ་གཅིག་པོ་ཤི་བའི་མ་བཞིན་དུ་ནམ་ཡང་ཡིད་ལ་འབྲལ་ཐབས་མེད་པའི་འདུན་པ་དྲག་པོ་དུང་ངེ་བ་བྱས། གཡེང་བ་གང་བྱུང་ཡང་། དེའི་དབང་དུ་མི་བཏང་བར་ཉམས་སུ་བླངས་ན། འགྲོ་འཆག་ཉལ་འདུག་གང་བྱེད་ཀྱང་སེམས་བཀོལ་དུ་བཏུབ་པས་དགེ་བ་མི་ཉམས་ཤིང་འཕེལ་བར་གྱུར་པས་ན། བསྡད་ཀྱང་རུང་ལ། ཕྱིན་ཀྱང་ཆོག །ཅེས་པ་ཡིན་གསུངས། གཉིས་པ་ཐུན་མོང་མིན་པའི་རྣལ་འབྱོར་གྱིས་ཉམས་སུ་བླང་བ་ནི། སློབ་དཔོན་ཞི་བ་ལྷས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་པ་ལྟར། ཞི་གནས་ཀྱིས་སེམས་ལས་སུ་རུང་བས་ཉོན་མོངས་པ་ཟིལ་གྱིས་གནོན། ལྷག་མཐོང་གིས་སེམས་ཀྱི་ངོ་བོ་རྟོགས་པས་ཉོན་མོངས་པ་དྲུངས་ནས་འབྱིན་པར་ཤེས་པར་བྱས་ནས། ཐོག་མར་ལྷག་མཐོང་གི་རྟེན་ཞི་གནས་བཙལ་དགོས། དེ་ཡང་ལུས་དང་སེམས་རྣམ་པར་དབེན་པ་ལས་སྐྱེ་བས་ན། ཚེ་འདིར་སྣང་གི་དགོས་མེད་ཀྱི་བྱ་ལ་བུན་ལོང་ངེ་བ་ཐམས་ཅད་ལིངས་ཀྱིས་བསྐྱུར་ནས། ལས་དང་པོ་པས་གནས་དབེན་པར་སྟན་བདེ་བ་ལ་ལུས་སྐྱིལ་ཀྲུང་དྲང་པོར་བསྲང་། རླུང་རང་སོར་བཞག །བླ་མ་དང་ལྷག་པའི་ལྷ་ལ་གསོལ་བ་བཏབ། སེམས་དུས་གསུམ་གྱི་སྤྲོས་པ་ཐམས་ཅད་བཅད་དེ། གནས་ལུགས་བརྗོད་བྲལ་གྱི་ངང་དུ་འཛིན་པ་མ་ཞུགས་པར་ཧད་དེ་ཆད་དེ་མཉམ་པར་བཞག་པས་གནས་ཉམས་རིམ་གྱིས་སྐྱེ་བར་འགྱུར་ལ། ཅུང་ཟད་གོམས་པས་དུས་དང་རྣམ་པ་ཐམས་ཅད་དུ་མཉམ་པར་འཇོག་པར་བྱེད། དེ་ལྟར་བརྩོན་པས་ཡུལ་རྐྱེན་གྱིས་མི་འཕྲོག་པར་སེམས་རང་ངོ་ཤེས། རང་ས་ཟིན། རང་དབང་ཐོབ་པས་དམིགས་པ་གང་ལ་གཏད་ཀྱང་སེམས་བཞག་པར་སྡོད་ན། ལུས་གྲོང་ཡུལ་དུ་གནས་པའམ། བཤུལ་རིང་གི་ལམ་དུ་བགྲོད་ཀྱང་། སེམས་ཉམས་མྱོང་དང་མི་འབྲལ་བས་གང་བྱས་ཀྱང་ཆོག་པ་ཡིན་ནོ། །རྡོ་རྗེའི་ཚིག་གསུམ་པ། བློ་ཆོས་སུ་སོང་ན་ཤི་ཡང་སླ། ཞེས་པའི་དོན་ཉམས་སུ་བླང་བ་ལ་གཉིས། ཐུན་མོང་དང་ཁྱད་པར་རོ། །དང་པོ་ནི། ཀུན་རྫོབ་ཏུ་དཀོན་མཆོག་དཔང་དུ་བཙུགས་ཏེ། རྡོ་རྗེའི་ཚིག་དང་པོའི་སྐབས་སུ་ཇི་སྐད་བཤད་པའི་ཉམས་ལེན་གྱིས་ལས་རྒྱུ་འབྲས་ཕྲ་ཞིང་ཕྲ་བའང་སྤང་བླང་དང་། ཀུན་རྫོབ་བྱང་སེམས་ལ་བློ་སྦྱོང་བ་ཚུལ་བཞིན་ཏུ་བྱས་ཏེ། ཆོས་དང་གང་མཐུན་བྱེད་པ་ཡིན་ལ། དེ་ལྟར་རྩེ་གཅིག་ཏུ་དྲན་པ་དང་ཤེས་བཞིན་གྱིས་བསྐྱངས་པས། རང་གི་བློ་རྒྱུད་དང་དམ་པའི་ཆོས་ལྷན་གྱིས་འདྲེས་ཏེ། དུས་དང་རྣམ་པ་ཀུན་ཏུ་མི་དགེ་བ་དང་ལུང་མ་བསྟན་གྱི་དབང་དུ་མ་སོང་བར་དགེ་བའི་སྤྱོད་པ་དང་། བྱང་ཆུབ་སེམས་ཀྱིས་དུས་འདའ་བ་ཞིག་བྱུང་ན། ད་ལྟ་རང་འཆིའང་དགེ་བའི་སྣང་བ་དང་མི་འབྲལ་ཞིང་། ཡིད་བདེ་བའི་ངལ་འཚོ་ཐོབ་པས་ཤིའང་སླ་བ་ཡིན་ཏེ། སྤྱོད་འཇུག་ལས། བྱང་ཆུབ་སེམས་ཀྱི་རྟར་ཞོན་ནས། བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་སྐྱེ། །ཞེས་གསུངས་པ་ལྟར་རོ། །གཉིས་པ་ནི། ཐུན་མོང་མིན་པའི་དབང་དུ་བྱས་ན། བློ་ནི་སེམས། ཆོས་ནི་སེམས་ཀྱི་ཆོས་ཉིད་རང་བཞིན་གྱིས་སྤྲོས་པ་ཐམས་ཅད་དང་བྲལ་བ་སྟེ། མདོར་ན་རང་སེམས་མཚན་ཉིད་གསལ་བ། ངོ་བོ་སྟོང་པ་དེ་གཉིས་དབྱེར་མི་ཕྱེད་པ་ཟུང་འཇུག་བརྗོད་པའི་མཐའ་ཐམས་ཅད་དང་བྲལ་བ་ལྷག་མཐོང་རྣམ་པར་མི་རྟོག་པ་དེའི་རང་ངོ་ཤེས་པར་བྱས་ལ། རྒྱུན་བསྐྱང་བ་ལ་འབད་པ་ཡིན་གསུངས། དེ་ལྟར་འབད་པས་སེམས་དང་ཆོས་ཉིད་རོ་གཅིག་ཏུ་འདྲེས་པ་ནི་བློ་ཆོས་སུ་སོང་བས་ད་ལྟ་ཤིའང་རེ་དོགས་ཀྱི་གཟུང་འཛིན་མི་འབྱུང་བ་ཡིན་ནོ། །རྡོ་རྗེའི་ཚིག་བཞི་པ། སེམས་སྐྱེ་མེད་དུ་རྟོགས་ན་འཆི་རྒྱུའང་མེད། ཅེས་གསུངས་པའི་དོན་ནི། དེ་ལྟར་བྱང་ཆུབ་སེམས་རྣམ་པ་གཉིས་ལ་བློ་འབྱོངས་ན་འཆི་བ་ལ་སོགས་པའི་རྐྱེན་གང་གིས་ཀྱང་མི་བརྫི་བར་མ་ཟད། ལེགས་པར་དཔྱད་ན་འཆི་བ་ལྟར་སྣང་བའང་དོན་དུ་འཆི་རྒྱུ་མེད་དེ། སྐྱེ་བ་མེད་པའི་ཕྱིར་འདུས་མ་བྱས་ཀྱི་ནམ་མཁའ་བཞིན་ནོ། །དེ་ལ་སྐྱེ་བ་མེད་པའི་ཚུལ་ནི། ལུས་ནི་སེམས་ཀྱིས་བཏགས་པ་ཙམ་ལས་དོན་དུ་མ་གྲུབ་སེམས་ནི་དང་པོར་སྐྱེ་བའི་རྒྱུས་སྟོང་པ་སོགས་སྔར་སྨོས་པ་ལྟར་སྐྱེ་འགགས་གནས་གསུམ་དང་བྲལ། དེ་བས་ན་འཆི་བ་ངེས་པར་བདེན་ན། ལུས་འཆིའམ། སེམས་འཆིའམ། ལྷན་ཅིག་ཏུ་འཆི། ལུས་ནི་བེམ་པོ་ས་རྡོ་དང་འདྲ་བ་ལ་འཆི་རྒྱུ་མི་འདུག་ལྷན་ཅིག་ཏུ་ཤི་བ་ནི་སུ་ལའང་མ་བྱུང་ཞིང་མི་འབྱུང་། སེམས་སྤྲོས་བྲལ་ནམ་མཁའ་ལྟ་བུ་ལ་འཆི་བྱ་འཆི་བྱེད་ཐམས་ཅད་དང་བྲལ་བར་ཐག་ཆོད་ཙ་ན། འཆི་བའི་འཇིགས་པ་ཐམས་ཅད་ལས་གྲོལ། འཕོ་བྱ་འཕོ་བྱེད་བྲལ་བ་ཡང་དུང་སྟེ། ཞེས་གསུངས་ལྟར་འཕོ་བ་ཐམས་ཅད་ཀྱི་མཆོག་ཀྱང་ཡིན་གསུངས། མདོར་ན་ཐོག་མར་སྐྱེ་བ་མིང་གིས་བཏགས་པ་ཙམ་དུ་རྟོགས་པས། མཐར་འཆི་བ་ལ་བདེན་པར་ཞེན་པའི་རྟོག་པའང་རང་བཞིན་གྱིས་འགགས་ཏེ་སྐྱེ་བས་འཆི་བའི་མཚང་གཏིབ། སེམས་སྐྱེ་འགག་གནས་གསུམ་དང་བྲལ་བར་རྟོགས་པ་མཉམ་རྗེས་མེད་པར་བརྟེན་ན་འཆི་མེད་གཉུག་མའི་རང་ཞལ་མངོན་དུ་གྱུར་པ་ཡིན་ནོ། །དེ་ལྟ་བུའི་དོན་མདོར་བསྡུ་ན། རྡོ་རྗེའི་ཚིག་དང་པོས་ཐེག་པ་ཆེན་པོའི་ལམ་གྱི་སྔོན་འགྲོ་དང་དངོས་གཞི་རྫོགས་པར་བསྟན། གཉིས་པས་གཙོ་བོར་ཞི་གནས། གསུམ་པས་ལྷག་མཐོང་། བཞི་པས་ལམ་མཐར་ཕྱིན་པའི་གདམས་པ་བསྟན་པ་ཡིན་ལ། ཉམས་ལེན་གྱི་སྙིང་པོའང་། དུས་དང་རྣམ་པ་ཀུན་ཏུ་འབྱོར་རྒུད། བདེ་སྡུག །མཐོ་དམན་སོགས་རྐྱེན་ཅི་བྱུང་ཡང་དེའི་དབང་དུ་མི་བཏང་བར། བྱང་ཆུབ་སེམས་གཉིས་ཀྱིས་ལམ་དུ་བསླང་སྟེ་ཡིད་བདེ་འབའ་ཞིག་རྒྱུད་ལ་བསྟེན་པ་ཡིན་ནོ། །ཡེ་ཤེས་མཁའ་འགྲོའི་ཞལ་ལུང་རྡོ་རྗེའི་ཚིག །སུམ་པ་ལོ་ཙཱའི་སྙན་བརྒྱུད་བློ་སྦྱོང་གི། །གདམས་ངག་བདུད་རྩིའི་སྙིང་པོས་ཡིད་ཅན་ཀུན། །ཕན་བདེའི་བཅུད་ལེན་མཆོག་ཏུ་གྲུབ་གྱུར་ཅིག །ཅེས་པའང་ཚར་ཆེན་ཆོས་ཀྱི་རྒྱལ་པོའི་གསུང་འཇམ་དབྱངས་མཁྱེན་བརྩེའི་དབང་ཕྱུག་གིས་ཟིན་བྲིས་སུ་མཛད་པའི་ཁྲིད་ཡིག་ལ་གཞི་བྱས། རྡོ་རྗེའི་ཚིག་ཕྱི་མ་གསུམ་ཅུང་ཟད་རྒྱས་པར་ཕྱེ་སྟེ། བྱ་བྲལ་སྤོང་བ་པ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་ཀྱི་དུས་སྟོན་མཆོག་ཏུ་འཕེལ་བར་གྱུར་ཅིག །མངྒ་ལཾ།། །། ༈

[edit]

sum pa lo tsA ba'i blo sbyong snyan brgyud kyi khrid yig snying gi bdud rtsi/_ @#/_/sum pa lo tsA ba'i blo sbyong snyan brgyud kyi khrid yig snying gi bdud rtsi zhes bya ba bzhugs so/_/__ oM swasti sid+d+haM/__theg mchog gzhung gi chu gter bsrubs pa'i phul/__/snyan brgyud gdams ngag bskal bzang mchog rnams kyi/__/snying gi bdud rtsir stsol mkhas bla ma la/__/btud nas zab mo'i lam srol cung zad dbye/__/'di la gnyis/__yid ches shing khungs btsun par byed pa lo rgyus dang /__lo rgyus de las byung ba'i gdams pa dngos so/__/dang po ni/__sum pa lo tsA ba dar ma yon tan nam dpal mchog dang po'i rdo rje zhes bya ba mkhas shing grub pa brnyes pa des/__'phags yul rgya gar du yun ring bar bzhugs/__slar bod du 'byon par bzhed pa na/__chas lhag gi gser rnams las rgya gar rdo rje gdan du mchod pa rgyas par mdzad/__'phags yul gyi gnas dang bla ma rnams la thugs 'phreng pa'i rnam pas 'byon nam/__bzhugs sam snyam the tshom me thugs skyo zhing cung zad ma bde bar gyur te/__ma hA bo d+hi la bskor ba mdzad cing bzhugs pa na/__/bu mo sngon mo zhig gi rjes su/__/bu mo dmar mo zhig 'brengs te/__/res nam mkha' la skor ba byed/__res sa gzhi'i steng na phar skor ba byed/__ched du gtong na yal ba snyam byed pa zhig 'dug pa na/__bud med dmar mo de yi zhal nas/__nga do zhag sems kyang ma bde/__'gro snying yang 'dod/__/'chi ba ni min nam/__lar 'chi ba 'di gas 'jigs zhu ba la/__bud med sngon mo de nyid lo tsA ba la spyan hur gyis gzigs shing zhal nas/__mo de gang byung gis chog na ci byas kyang bde ba zhig yong ba yin te/__gang byung gis ma chog pas lan pa yin sogs dri lan gyi tshul du rdo rje'i tshig bzhi po 'di gsungs pas/__lo tsA ba'i thugs la de dag gi don ji lta bar shar/__sngar mkhyen pa'i chos thams cad kyi don nyams su len mkhyen par gyur/__rtogs pa khyad par can 'khrungs/__sngar mkhyen pa'i chos thams cad kyang nor du song bas thugs rtsis kyi snying por mdzad/__bud med dmar mo sngon mo gnyis kyang rdo rje phag mo dang /__rje btsun sgrol ma yin par snang gsungs/__rdo rje'i tshig de dag kyang bsgyur te 'jam pa'i dbyangs sa skya paN+Di ta kun dga' rgyal mtshan dpal bzang po la gnang /__des 'gro ba'i mgon po 'phags pa rin po che dang /__grub thob 'dar 'phyar ba rin po che bzang po gnyis la gnang ba nas rim par brgyud de/__phyis su rgyal sras rin po che thogs med pas dpal ldan bla ma dam pa bsod nams rgyal mtshan la/__drung pa'i thugs dam gyi bcud yin pa sems la phan pa'i khrid gcig zhu zhus pas 'di stsal bar grags shing /__dge bshes 'phags pa lha zhes bya ba bskul te/__khrid yig kyang dus der mdzad pa yin ces gsungs/__sa skya pa'i gdung brgyud bla chen bsod blo rgya nag tu 'byon pa'i dus kyang rgyal sras rin po che lha sa bar skyel ma la phebs/__dus der rgyal sras pas dbu mdzad/__phyogs kyi dge ba'i bshes gnyen lha sa'i khyams ra gang la'ang spyi chos su gdams pa 'di ka gnang zhes chos rje rgyal sras pa'i rnam thar du 'byung bas mtshon dge ba'i bshes gnyen chen po rnams nas kyang thugs dam gyi snying por mdzad/__khyad par rje btsun rdo ring pa la/__'jam mgon sa paN nas brgyud pa'i srol gnyis ka'i chu bo gcig tu 'dres pa tshar chen chos kyi rgyal pos gsan cing /__dpal zhwa lu gser bkang gi chos grar chos rje bla ma dam pa'i khrid yig gi steng nas nyams khrid stsal ba'i skabs/__'jam pa'i dbyangs dngos gnas gsar ba mkhyen brtse'i dbang phyug gi gsung rgyun zin bris snying gi mun sel zhes bya ba mdzad de dus phyis par nyams 'khrid kyi brgyud pa bar ma chad par byung ba dang /__rgyal sras rin po che nas brgyud pa rje kun dga' grol mchog gis gsan cing khrid brgya'i glegs bam du bkod pa'i khrid lung gi rgyun kyang da lta'i bar du bzhugs pa yin no//__// gnyis pa lo rgyus de dang ldan pa'i gdams pa dngos la/__de lta bu'i sum pa lo tsA ba'i snyan brgyud blo sbyong ngam/__mkha' 'gro'i rdo rje'i tshig bzhi pa zhes grags pa'i khrid nyams su len par byed pa la bzhi las/__rdo rje'i tshig dang po/__gang byung gis chog na ci byas bde/__zhes pa'i don nyams su blang ba la gnyis/__sngon 'gro dang sbyar te nyams su blang tshul dang /__dngos gzhi dang sbyar te nyams su blang ba'i tshul lo/__/dang po ni/__gnas dben par bde ba'i gdan la bsam gtan gyi rol pas 'dug ste/__mdun gyi nam mkhar bla ma dkon mchog gsum mkha' khyab tu bzhugs pa la blo gtad de/__rang gzhan sems can thams cad sgo gsum 'jug pa gcig pas skyabs su 'gro bar mos la/__skyabs 'gro bzhi skor brgya stong sogs ci nus dang /__sems can thams cad yid yul du byas te/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du mkha' 'gro ma'i snyan brgyud kyi gdams pa zab mo nyams su blang bar bgyi'o/__/zhes thengs gsum brjod pas smon 'jug gi sems bskyed/__khrid du byed pa'i tshe de bzhin bya la/__thug 'phrad du nyams su len pa na/__chos bzhi bstan pa'i mdo'i don jo bo rjes mdzad pa'i/__sangs rgyas chos tshogs tshar gsum tsam brjod pas skyabs sems dus gcig tu 'byung ba yin te/__de'ang tshig dang pos gang la skyabs su 'gro ba'i yul bstan/__byang chub bar du zhes pas dus/__bdag ni zhes pa gang zag___/skyabs su mchi zhes pas bya ba bstan/__sbyin sogs bgyis pa'i zhes pas 'jug pa byang sems/__sangs rgyas 'grub par shog gis smon pa byang sems bstan pa yin no gsungs/__sngon 'gro dngos la/__dal 'byor rnyed dka' dang /__'chi ba mi rtag pa la sbyar te bsgom pa dang /__las rgyu 'bras dang 'khor ba'i nyes dmigs la sbyar te bsgom pa gnyis/__dang po ni/__rang re rnams kyi lus la nad med/__sems la sdug bsngal med/__bsam pa 'grub/__gzhan gyis bstod cing bskur ba sogs/__des mtshon pa'i lus sems la bde ba gang byung yang /__de tsam gyis mi chog par/__gzhan la brnyas 'dod/__gzhan bde ba la mi bde ba'i phrag dog__/rang gi bde ba la rlom sems sogs sna tshogs shig byas pas/__chags sdang gi las mang po bsags nas/__bde ba de ka 'khor ba dang ngan song gi rgyur song ba yin/__da ni bde ba gang byung yang /__de kas chog par nyams su len pa ste/__de'ang rang la gong du smos pa ltar lus sems kyi thog tu bde bar snang ba gang byung yang bde ba de lam gyis gsal btab/__tshor ba bde ba myong ba na/__bde ba 'di ni gnyid sad kha'i rmi lam dang 'dra bar skad cig tsam yin gyi 'di la chags sdang gi las sogs rin mi chog__/nga rang gis bde ba myang ba 'di kas chog__/mgron khang gi khang pa ji ltar dga' zhing mdzes kyang /__rang re zhag re tsam las mi sdod par bud 'gro bas/__chags zhen byed rin mi chog pa dang /__mgron khang na longs spyod ji tsam yod pa dang /__mgron khang na skye bo'i 'du 'tshogs ji tsam yod kyang /__rang re yud tsam re nas bud 'gro bas chags rin mi chog pa ltar/__tshe 'di'i gnas lus longs spyod 'khor g.yog la sogs pa ji snyed cig yod kyang /__yud tsam re sngon las kyi 'phen pa dang rten 'brel gyi dbang gis tshogs pa yin gyis/__nam 'chi cha med pas myur du myur du gyes shing bral nas/__rang gcig pur ga shed du yud kyis 'gro rgyu yin pas/__de la brten na chags sdang gi las gsog tu mi khom snyam du yang yang sems par byed/__de bzhin tu lus la na tsha dang /__sems la sdug bsngal drag po bzod blag med pa/__des mtshon pa'i sdug par snang ba byung ba na/__de la brten nas chags sdang gi las kham po che bsags pas/__sdug pa de ka thar pa'i gegs su song ba yin pas/__de ni sdug par snang ba gang byung yang sdug pa de kas chog gi/__de la brten nas las sogs rgyu ci yang med/__sdug par snang ba 'di gnyid sad ka'i rmi lam dang 'dra/__mgron khang pa shin tu nyam nyes pa dang /__longs spyod med pa dang /__de na 'khod pas rang la gshe skur byed pa dang 'dra/__gang byed kyang rang re yud kyis bud 'gro ba ma gtogs/__der gtan du mi sdod pas chags sdang bya rin mi chog pa bzhin tu/__bdag kyang do nub 'chi'am/__sang 'chi ba'i tshod 'di la/__sdug po gang byung yang /__de la brten pa'i las gsog du mi khom/__da ci nas kyang tshe thung 'di don med du ma song bar chos shig rang byed do snyam du sems par byed pa yin gsungs/__gnyis pa las rgyu 'bras dang 'khor ba'i nyes dmigs dang sbyar te gang byung gis chog na ci byas bde bar nyams su len pa ni/__sngar bshad pa ltar rang la bde ba byung na/__bde ba 'di lta bu thob pa bdag gi skye ba sngon ma dge ba byas pa'i 'bras bur 'dug__/'dod ni bde ba 'di kho na 'dod par 'dug de rgyu mi dge ba las mi 'byung gi/__dge ba kho na las 'byung bar 'dug pas/__cis kyang rang dus 'di nas bzung ste/__ma shi'i bar/__sang nyi ma ma shar gyi bar/__thun 'di ma grol gyi bar du/__dge ba che 'bring chung gsum 'grub tshad cig gsog ste snyam du bsam/__sdug par snang ba gang byung yang /__'di 'dra ba'i sdug bsngal nyams su myong ba 'di mi dge ba byas pa'i 'bras bu yin/__sdug po 'di lta bu 'dod po su yang med/__sdug po mi 'dod tsa na/__de'i rgyu mi dge ba mi spong pa'i thabs mi 'dug pas/__dus 'di nas ma shi'i bar sogs su mi dge ba chen po lta ci smos/__phra zhing phra ba yan chad srog la bab kyang mi byed snyam pa'i 'dun pa drag po btang /__des mtshon pa'i lus sems sdug bsngal ci byung yang /__ngas 'di tsam gyis sdug bsngal phra mo yang mi bzod na/__dmyal ba yi dwags dud 'gro rnams kyi sdug bsngal dos drag la yun ring ba kham po che 'di dag bzod pa'i blag e 'dug__/des mtshon pa'i lha/__lha ma yin/__mi'i sdug bsngal chen po rnams bzod thabs mi 'dug pas/__de dag gi rgyu sdig pa spong dgos bsam pa'i 'dun pa byed pa yin gsungs/__/gnyis pa lam gyi dngos gzhi dang sbyar te nyams su blang ba la gnyis/__kun rdzob byang chub kyi sems dang sbyar te nyams su blang ba dang /__don dam byang chub kyi sems dang sbyar te nyams su blang ba'o/__/dang po ni/_rang gi lus sems kyi bde ba gang byung yang /__bde ba de gsal btab/__tshor ba bde ba myong ba na/__bde ba 'di lta bu byung ba la dga' ba kho na yod/__bde ba 'dod mkhan gyi sems can 'di thams cad bdag gi cir mi 'ong ma yin gyi/__tshe rabs snga ma rnams su pha ma drin can yang nas yang du byas pa sha stag yin pas/__bdag gi bde ba rgyu dang bcas pa 'di thams cad sems can thams cad la sbyin dgos bsam pa'i 'dun pa drag po byas/__rang gi lus longs spyod sogs bde ba dang /__de'i rgyu dge ba'i rtsa ba thams cad blos ling gis blangs te sems can thams cad la byin pas thun mong du yid la 'dod dgu 'bad med 'byung ba yid bzhin nor bu'i char du gyur/__bye brag gos med pa la gos/__zas med pa la zas/__mgon skyabs med pa la mgon skyabs/__des mtshon pa'i yid la gang 'dod kyi char chen por gyur te bsam pa thams cad rdzogs par bsam/__de bzhin tu tsha dmyal ba rnams la char dang rlung grang mo sogs kyis tsha ba'i gdung ba bsal/__lus sems bsil ba'i bde ba la bkod/__grang dmyal ba rnams la nyi ma'i 'od la sogs pa dro ba'i dngos pos mun pa bsal/__dro zhing bde bar byas pa sogs kyis mtshon rigs drug so so'i sdug bsngal sbyong chas su gyur song snyam pa'i 'dun pa byed/__de gsal 'debs pa'i slad du/__bdag gi bde ba dang dge ba thams cad sems can thams cad la smin par gyur cig ces smon lam gdab/__yul khyad par can la gsol ba btab na gang btab pa de 'grub pa yin pas/__mdun gyi nam mkhar bla ma dang dkon mchog gsum mkha' khyab tu bzhugs pa la gdung shugs chen pos/__bla ma dang dkon mchog rin po che rnam pa gsum gyis bdag gis bde ba dang dge ba sems can thams cad la smin par byin gyis brlab tu gsol/__zhes gsol ba drag tu gdab/__mdor na/__'dun pa dang /__smon lam dang /__gsol 'debs gsum spel mar bya zhing nyams su blangs te/__bde ba gang byung yang khengs sems dang rlom sems sogs 'khor ba'i rgyur mi gtong bar/__gnad 'di lta bus lam du gtong ba yin gsungs/__des mtshon pa'i sdug par snang ba gang byung yang /__sdug pa 'di lta bu mi 'dod pa kho na yod kyang /__sems can 'di rnams thabs mi mkhas pa'i dbang gis/__sdug mi 'dod bzhin du sdug bsngal kho na bsgrub par 'dug__/ci nas kyang sems can thams cad kyi sdug bsngal dang /__/sdug bsngal gyi rgyu las dang nyon mongs pa thams cad bdag gi sdug bsngal 'di la thim na snyam pa'i 'dun pa drag po byas pas/__sems can thams cad kyi sdug bsngal rgyu dang bcas pa thams cad nag phung gis 'dus byung /_rang gi sdug bsngal gang yin pa de la sib kyis thim/__sems can thams cad dkar sangs kyis/__bde cham gyis song bar bsam zhing rig pa brjod med du bzhag__/gong bzhin 'dun pa/__smon lam/__gsol 'debs rnams spel mar bya ste/__de yang /__sems can thams cad kyi sdug bsngal dang sdig pa thams cad bdag la smin par gyur cig ces smon lam dang /__bla ma dang dkon mchog rin po che rnam pa gsum gyis sems can thams cad kyi sdug bsngal dang sdig pa thams cad bdag la smin par byin gyis brlab tu gsol/__ces gsol ba gdab/__sdug pa la khong khro ba dang /__zhum pa'i sems mi bya bar lam du gtong ba gal che gsungs/__mdor na/__rang la khab skud tsam ster mkhan byung ba na/__ngas 'di lta bu thob pa 'di/__sngon gzhan la byin pa'i phan yon gyis byung ba yin gyi/__stes dbang ngam/__pho sgo lta bus byung ba min/__'dis mtshon pa'i bde dge thams cad yar bla ma dkon mchog la phul/__mar sems can thams cad la ltos med du ling gis byin pas gong bzhin gang la gang 'dod pa'i rdzas su gyur te/__tshims par bsam pa byas pas/__dngos po phra zhing phra ba khab skud tsam la brten nas kyang /__dge ba dpag tu med pa gsog thub pa'i gnad yin gsungs/__/gnyis pa don dam byang sems dang sbyar te nyams su blang ba ni/__bde bar snang ba gang byung yang /__de ka'i ngo bo rang gi sems las logs su grub pa cung zad kyang med pa/__sems de nyid kyang /__dang po dus 'di tsam na/__gnas 'di lta bur/__tshul 'di ltar skyes btsal pas/__snyed rgyu mi yong bas dang por skye ba'i rgyus stong pa/__bar du rang gi lus kyi phyi nang don snying nang khrol nas brtsams te/__phyi snod nang bcud phra rags kyi bar gang du gnas/__dbyibs dang /__kha dog dang /__mtshan ma ji lta bus gnas legs par btsal zhing brtags kyang /__'di'o zhes brjod mi shes pas bar du gnas pa'i ngo bos stong /__de ltar skye ba dang gnas pa ma grub tsa na/__de la ltos pa'i 'gag pa'ang mi grub pas/__tha mar 'di 'dra zhig tu thim song zer ba'am/__zad song zer ba sus btsal kyang mi rnyed pas/__tha ma 'gag pa'i 'bras bu stong pa ste/__mdor na/__skye 'gag gnas gsum dang bral ba'i gnas lugs brjod bral gyi steng du cham cham 'jog par byed/__de bzhin tu sdug par snang ba gang byung yang de ka'i ngo bo la bltas te gong bzhin nyams su len/__mdor na/__bde sdug__/skyid mi skyid sogs gnyis chos kyis bsdus pa'i snang ba gang byung yang /__rlom zhen dang /__khong khro sogs mi bya bar/__gnad 'di lta bus lam du btang bas/__ci byung bde ba zhes bya ba/__ci byung yang chos su song bas gnas skabs dang /__mthar thug tu bde ba zhig yong ba yin no gsungs/__rdo rje'i tshig gnyis pa/__sems bzhag par bsdad na phyin kyang chog__/ces pa'i don nyams su len pa la'ang gnyis/__thun mong gi rnal 'byor dang /__thun mong ma yin pa'i rnal 'byor ro/__/dang po thun mong gi rnal 'byor gyis nyams su blangs na/__dge ba'i bya ba gang byed kyang /__bu gcig po shi ba'i ma bzhin du nam yang yid la 'bral thabs med pa'i 'dun pa drag po dung nge ba byas/__g.yeng ba gang byung yang /__de'i dbang du mi btang bar nyams su blangs na/__'gro 'chag nyal 'dug gang byed kyang sems bkol du btub pas dge ba mi nyams shing 'phel bar gyur pas na/__bsdad kyang rung la/__phyin kyang chog__/ces pa yin gsungs/__gnyis pa thun mong min pa'i rnal 'byor gyis nyams su blang ba ni/__slob dpon zhi ba lhas/__zhi gnas rab tu ldan pa'i lhag mthong gis/__/nyon mongs rnam par 'joms par shes byas nas/__/thog mar zhi gnas btsal bya de yang ni/__/'jig rten chags pa med la mngon dgas 'grub/__/ces gsungs pa ltar/__zhi gnas kyis sems las su rung bas nyon mongs pa zil gyis gnon/__lhag mthong gis sems kyi ngo bo rtogs pas nyon mongs pa drungs nas 'byin par shes par byas nas/__thog mar lhag mthong gi rten zhi gnas btsal dgos/__de yang lus dang sems rnam par dben pa las skye bas na/__tshe 'dir snang gi dgos med kyi bya la bun long nge ba thams cad lings kyis bskyur nas/__las dang po pas gnas dben par stan bde ba la lus skyil krung drang por bsrang /__rlung rang sor bzhag__/bla ma dang lhag pa'i lha la gsol ba btab/__sems dus gsum gyi spros pa thams cad bcad de/__gnas lugs brjod bral gyi ngang du 'dzin pa ma zhugs par had de chad de mnyam par bzhag pas gnas nyams rim gyis skye bar 'gyur la/__cung zad goms pas dus dang rnam pa thams cad du mnyam par 'jog par byed/__de ltar brtson pas yul rkyen gyis mi 'phrog par sems rang ngo shes/__rang sa zin/__rang dbang thob pas dmigs pa gang la gtad kyang sems bzhag par sdod na/__lus grong yul du gnas pa'am/__bshul ring gi lam du bgrod kyang /__sems nyams myong dang mi 'bral bas gang byas kyang chog pa yin no/__/rdo rje'i tshig gsum pa/__blo chos su song na shi yang sla/__zhes pa'i don nyams su blang ba la gnyis/__thun mong dang khyad par ro/__/dang po ni/__kun rdzob tu dkon mchog dpang du btsugs te/__rdo rje'i tshig dang po'i skabs su ji skad bshad pa'i nyams len gyis las rgyu 'bras phra zhing phra ba'ang spang blang dang /__kun rdzob byang sems la blo sbyong ba tshul bzhin tu byas te/__chos dang gang mthun byed pa yin la/__de ltar rtse gcig tu dran pa dang shes bzhin gyis bskyangs pas/__rang gi blo rgyud dang dam pa'i chos lhan gyis 'dres te/__dus dang rnam pa kun tu mi dge ba dang lung ma bstan gyi dbang du ma song bar dge ba'i spyod pa dang /__byang chub sems kyis dus 'da' ba zhig byung na/__da lta rang 'chi'ang dge ba'i snang ba dang mi 'bral zhing /__yid bde ba'i ngal 'tsho thob pas shi'ang sla ba yin te/__spyod 'jug las/__byang chub sems kyi rtar zhon nas/__bde nas bde bar 'gro ba la/__/sems shes su zhig sgyid lug skye/__/zhes gsungs pa ltar ro/__/gnyis pa ni/__thun mong min pa'i dbang du byas na/__blo ni sems/__chos ni sems kyi chos nyid rang bzhin gyis spros pa thams cad dang bral ba ste/__mdor na rang sems mtshan nyid gsal ba/__ngo bo stong pa de gnyis dbyer mi phyed pa zung 'jug brjod pa'i mtha' thams cad dang bral ba lhag mthong rnam par mi rtog pa de'i rang ngo shes par byas la/__rgyun bskyang ba la 'bad pa yin gsungs/__de ltar 'bad pas sems dang chos nyid ro gcig tu 'dres pa ni blo chos su song bas da lta shi'ang re dogs kyi gzung 'dzin mi 'byung ba yin no/__/rdo rje'i tshig bzhi pa/__sems skye med du rtogs na 'chi rgyu'ang med/__ces gsungs pa'i don ni/__de ltar byang chub sems rnam pa gnyis la blo 'byongs na 'chi ba la sogs pa'i rkyen gang gis kyang mi brdzi bar ma zad/__legs par dpyad na 'chi ba ltar snang ba'ang don du 'chi rgyu med de/__skye ba med pa'i phyir 'dus ma byas kyi nam mkha' bzhin no/__/de la skye ba med pa'i tshul ni/__lus ni sems kyis btags pa tsam las don du ma grub sems ni dang por skye ba'i rgyus stong pa sogs sngar smos pa ltar skye 'gags gnas gsum dang bral/__de bas na 'chi ba nges par bden na/__lus 'chi'am/__sems 'chi'am/__lhan cig tu 'chi/__lus ni bem po sa rdo dang 'dra ba la 'chi rgyu mi 'dug lhan cig tu shi ba ni su la'ang ma byung zhing mi 'byung /__sems spros bral nam mkha' lta bu la 'chi bya 'chi byed thams cad dang bral bar thag chod tsa na/__'chi ba'i 'jigs pa thams cad las grol/__'pho bya 'pho byed bral ba yang dung ste/__zhes gsungs ltar 'pho ba thams cad kyi mchog kyang yin gsungs/__mdor na thog mar skye ba ming gis btags pa tsam du rtogs pas/__mthar 'chi ba la bden par zhen pa'i rtog pa'ang rang bzhin gyis 'gags te skye bas 'chi ba'i mtshang gtib/__sems skye 'gag gnas gsum dang bral bar rtogs pa mnyam rjes med par brten na 'chi med gnyug ma'i rang zhal mngon du gyur pa yin no/__/de lta bu'i don mdor bsdu na/__rdo rje'i tshig dang pos theg pa chen po'i lam gyi sngon 'gro dang dngos gzhi rdzogs par bstan/__gnyis pas gtso bor zhi gnas/__gsum pas lhag mthong /__bzhi pas lam mthar phyin pa'i gdams pa bstan pa yin la/__nyams len gyi snying po'ang /__dus dang rnam pa kun tu 'byor rgud/__bde sdug__/mtho dman sogs rkyen ci byung yang de'i dbang du mi btang bar/__byang chub sems gnyis kyis lam du bslang ste yid bde 'ba' zhig rgyud la bsten pa yin no/__/ye shes mkha' 'gro'i zhal lung rdo rje'i tshig__/sum pa lo tsA'i snyan brgyud blo sbyong gi/__/gdams ngag bdud rtsi'i snying pos yid can kun/__/phan bde'i bcud len mchog tu grub gyur cig__/ces pa'ang tshar chen chos kyi rgyal po'i gsung 'jam dbyangs mkhyen brtse'i dbang phyug gis zin bris su mdzad pa'i khrid yig la gzhi byas/__rdo rje'i tshig phyi ma gsum cung zad rgyas par phye ste/__bya bral spong ba pa 'jam dbyangs bla ma dgyes pa'i 'bangs mkhyen brtse'i dbang pos bris pa dge legs kyi dus ston mchog tu 'phel bar gyur cig__/mang+ga laM//____//__!