JKW-KABUM-09-TA-009-003

🚧 This website is under continued development. We appreciate your patience!

Previous Text Back to Volume PageNext Text

བཅུ་གཅིག་ཞལ་མཁའ་འགྲོ་ལྔ་བསྐོར་གྱི་རྗེས་གནང་གཞན་ཕན་ཟླ་ཟེར།

Wylie title	bcu gcig zhal mkha' 'gro lnga bskor gyi rjes gnang gzhan phan zla zer
Location	mkhyen brtse'i bka' 'bum Volume 9, sde tshan 9, Text 3, Pages 382-399 (Folios 13b3 to 22a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bcu gcig zhal mkha' 'gro lnga bskor gyi rjes gnang gzhan phan zla zer. In 'jam dbyangs mkhyen brtse'i dbang po'i bka' 'bum, Vol. 9: 382-399. Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ཐུགས་རྗེ་ཆེན་པོ་བཅུ་གཅིག་ཞལ་དཔལ་མོ་ལུགས་ (thugs rje chen po bcu gcig zhal dpal mo lugs)
Deity	thugs rje chen po
Colophon	།ཅེས་པའང་ཤཱཀྱའི་དགེ་སྦྱོང་འཇམ་དབྱངས་མཁྱེན་བརྩེའི་དབང་པོའམ། ལྷག་པའི་ལྷ་འདི་ཉིད་ཀྱི་སྨིན་བྱེད་ཟབ་མོས་སྐལ་བ་བཟང་པོར་གྱུར་པའི་མིང་གི་ཅོད་པཎ་ཐུགས་རྗེ་དགེ་བའི་དབྱངས་ཞེས་ཀྱང་བགྱི་བའི་རྒྱལ་ཁམས་ཀྱི་བྱ་བྲལ་མ་ཎི་པས་སུག་བྲིས་སུ་བགྱིས་པ་དགེ་ལེགས་འཕེལ།། །།སརྦ་དཱ་མངྒ་ལཾ་བྷ་བ་ཏུ།།
	ces pa'ang shAkya'i dge sbyong 'jam dbyangs mkhyen brtse'i dbang po'am/__lhag pa'i lha 'di nyid kyi smin byed zab mos skal ba bzang por gyur pa'i ming gi cod paN thugs rje dge ba'i dbyangs zhes kyang bgyi ba'i rgyal khams kyi bya bral ma Ni pas sug bris su bgyis pa dge legs 'phel//__//sarba dA mang+ga laM b+ha ba tu/

1 Texts in this Section (sde tshan or chos tshan)

3 382-399	བཅུ་གཅིག་ཞལ་མཁའ་འགྲོ་ལྔ་བསྐོར་གྱི་རྗེས་གནང་གཞན་ཕན་ཟླ་ཟེར། bcu gcig zhal mkha' 'gro lnga bskor gyi rjes gnang gzhan phan zla zer Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བཅུ་གཅིག་ཞལ་དཔལ་མོ་ལུགས་མཁའ་འགྲོ་ལྔ་བསྐོར་གྱི་རྗེས་སུ་གནང་བའི་ཆོ་ག་གཞན་ཕན་ཟླ་ཟེར་ཞེས་བྱ་བ་བཞུགས་སོ། །ཐུགས་རྗེའི་གཏེར་ཆེན་སྤྱན་རས་གཟིགས་དབང་དང་། །དབྱེར་མེད་བླ་མའི་ཞབས་ལ་གུས་བཏུད་ནས། །དཔལ་མོའི་བཞེད་གཞུང་ལས་འོངས་རྗེས་གནང་གི །ཆོ་ག་གཞན་ཕན་ཟླ་བའི་ཟེར་ཕྲེང་སྤྲོ། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་གཙང་ཞིང་ཡིད་དང་རྗེས་སུ་མཐུན་པར་སྟེགས་ཀྱི་དབུས་སུ་མཎྜ་ལར་རྡུལ་ཚོན་གྱིས་པདྨ་འདབ་བཞི་བྲིས་པའི་དབུས་དང་ཕྱོགས་བཞིར་མཁའ་འགྲོ་ལྔ་ཡི་སྐུ་མདོག་དང་མཐུན་པའི་ཚོམ་བུ་བཀོད། དེའི་སྟེང་དུ་མཉྫིའི་ཁར་རྣམ་བུམ་བཅུད་ལྡན། ཤར་དུ་སངས་རྒྱས་ཀྱི་མཚན་གྱིས་བུམ་པ་འབྲས་བུས་གང་བའི་ནང་དུ་སློབ་མ་རྣམས་ལ་སྦྱིན་རྒྱུའི་སངས་རྒྱས་ཀྱི་མཚན་ཇི་ལྟར་རིགས་པའི་ཤོག་དྲིལ་བཅུག །གང་བའི་བུམ་པ། །ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། གཡས་གཡོན་དུ་ཐུགས་རྗེ་ཆེན་པོའི་སྐུ་དང་། པུསྟི། མདུན་དུ་དཀར་གཏོར་གསུམ་དང་། ཆུ་གཉིས་སྔོན་འགྲོའི་ཉེར་སྤྱོད། །ཉེ་ལོགས་ཅི་བདེ་བར་ལས་བུམ། རྡོར་དྲིལ། མེ་ཏོག་གི་སྣོད། སློབ་མ་ལ་དགོས་པའི་སྦྱོང་ཆས་སོགས་འདུ་བྱའོ། །དེ་ནས་བདག་གི་རྣལ་འབྱོར་ཐུགས་རྗེ་ཆེན་པོ་བཅུ་གཅིག་ཞལ་གཙོ་རྐྱང་གི་སྒོམ་བཟླས་སྨྱུང་གནས་ཀྱི་ཆོ་ག་སོགས་ལས་འབྱུང་བ་ལྟར་སྔོན་དུ་འགྲོ་བས་བུམ་པ་གཉིས། །ཨོཾ་པདྨཱནྟ་ཀྲྀ་ཏ྄་ཧཱུྃ་ཕཊ་ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་པྃ་ལས་བྱུང་བའི་བུམ་པ། ཕྱི་རིན་པོ་ཆེའི་བུམ་བཟང་མཚན་ཉིད་ཐམས་ཅད་ཡོངས་སུ་རྫོགས་པའི་རྣམ་པ་ལ་ནང་གཞལ་ཡས་ཁང་དུ་གྱུར་པའི་དབུས་སུ་སྣ་ཚོགས་པདྨ་འདབ་མ་བཞི་པའི་དབུས་དང་ཕྱོགས་བཞིར་ཟླ་བའི་གདན་རེ་རེ། དབུས་ཀྱི་གདན་གྱི་སྟེང་དུ་པདྨ་མཁའ་འགྲོ་མ་དམར་མོ་གཡོན་བྱེ་རུའི་བུམ་པ་བསྣམས་པ། ཤར་དུ་སངས་རྒྱས་མཁའ་འགྲོ་མ་དཀར་མོ་གཡོན་ཤེལ་གྱི་བུམ་པ་བསྣམས་པ། ལྷོར་རིན་ཆེན་མཁའ་འགྲོ་མ་སེར་མོ་གཡོན་གསེར་གྱི་བུམ་པ་བསྣམས་པ། ནུབ་ཏུ་རྡོ་རྗེ་མཁའ་འགྲོ་མ་སྔོན་མོ་གཡོན་ལྕགས་ཀྱི་བུམ་པ་བསྣམས་པ། བྱང་དུ་ལས་ཀྱི་མཁའ་འགྲོ་མ་ལྗང་གུ་གཡོན་གཡུའི་བུམ་པ་བསྣམས་པ། ཐམས་ཅད་ཀྱང་ཕྱག་གཡས་ཌ་མ་རུ་འཁྲོལ་ཞིང་རུས་པའི་ཕྱག་རྒྱ་ལྔས་བརྒྱན་པ། དར་སྣ་ཚོགས་ཀྱི་ན་བཟའ་ཅན། ཕཻཾ་གྱི་སྒྲ་སྒྲོགས་ཤིང་ཞབས་གཉིས་གར་སྟབས་སུ་འགྱིང་བ། ལས་ཐམས་ཅད་པའི་བུམ་པར་པད་ཉི་ལ་རྟ་མགྲིན་དམར་པོ་གཡས་དབྱུག་ཏོ་དང་། གཡོན་སྡིགས་མཛུབ་མཛད་པ། ཞལ་གདངས་ཤིང་མཆེ་བ་གཙིགས་པ། སྨིན་མ་དང་སྨ་ར་གཡོ་ཞིང་སྤྱན་གསུམ་འབར་བ། དབུ་གཙུག་ཏུ་རྟ་མགོ་ལྗང་ཞུར་རྟ་སྐད་འཚེར་བས་མཚན་པ། ཁྲོ་བོའི་རྒྱན་དང་རྣམ་འགྱུར་ཡོངས་སུ་རྫོགས་ཤིང་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེ་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་པ་ལས་འོད་ཟེར་འཕྲོས་པས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་དབང་ལྷ་དང་བཅས་པ་སྤྱན་དྲངས། ཛཿཧཱུྃ་བྃ་ཧོཿ དམ་ཚིག་ཡེ་ཤེས་དབྱེར་མེད་པར་གྱུར། དབང་གི་ལྷ་རྣམས་ལ། དེ་བཞིན་གཤེགས་པ་ཐམས་ཅད་ཀྱིས་འདི་རྣམས་ལ་མངོན་པར་དབང་བསྐུར་བ་སྩལ་དུ་གསོལ། །ཞེས་གསོལ་བ་བཏབ་པས་དབང་ལྷའི་ཐུགས་ཀ་ནས་ལྷ་མོ་བདུད་རྩིའི་བུམ་པ་ཐོགས་པ་ལྔ་སྤྲོས་ཏེ། ཇི་ལྟར་བལྟམས་པ་ནས། ཤྲི་ཡེ་ཧཱུྃ། ཞེས་གསུང་ཞིང་བུམ་པའི་བདུད་རྩིས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་པདྨ་མཁའ་འགྲོ་མ་ལ་འོད་དཔག་མེད། སངས་རྒྱས་མཁའ་འགྲོ་མ་ལ་རྣམ་པར་སྣང་མཛད། རིན་ཆེན་མཁའ་འགྲོ་མ་ལ་རིན་ཆེན་འབྱུང་ལྡན། རྡོ་རྗེ་མཁའ་འགྲོ་མ་ལ་མི་བསྐྱོད་པ། ལས་ཀྱི་མཁའ་འགྲོ་མ་ལ་དོན་ཡོད་གྲུབ་པ། རྟ་མགྲིན་ལ་འོད་དཔག་མེད་ཀྱིས་དབུར་བརྒྱན། མཆོད་པ་བསང་སྦྱང་བྱིན་གྱིས་བརླབས་ལ། ཨོཾ་པཉྩ་ཌཱ་ཀི་ནཱི་ཧ་ཡ་གྲཱི་བ་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། །ཞི་རྒྱས་དབང་དང་དྲག་པོ་ཡི། །ཕྲིན་ལས་མ་ལུས་སྒྲུབ་མཛད་པ། །མཁའ་འགྲོ་ཆེན་མོ་སྡེ་ལྔ་ལ། །སྒོ་གསུམ་གུས་པས་བསྟོད་པར་བགྱི། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་ཉིད། །ཁྲོ་བོའི་རྒྱལ་པོའི་སྐུར་སྟོན་པ། །རྟ་མཆོག་དཔལ་ལ་ཕྱག་འཚལ་ལོ། །ཅེས་བསྟོད། བུམ་པའི་ལྷའི་ཐུགས་ཀ་ནས་འོད་ཟེར་རང་མདོག་དང་མཐུན་པར་འཕྲོས། སེམས་ཅན་ཐམས་ཅད་ཀྱི་དུག་ལྔ་སྦྱངས་ཏེ་རིགས་ལྔའི་མཁའ་འགྲོ་མར་གྱུར་པ་དང་། སངས་རྒྱས་ཐམས་ཅད་ཀྱི་ཡེ་ཤེས་ལྔའི་རང་མདངས་འོད་ཟེར་གྱི་རྣམ་པར་སྤྱན་དྲངས་ཏེ་ཐུགས་ཀའི་ས་བོན་ལ་ཐིམ། དེ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར་པར་བསམས་ལ། བཅུ་གཅིག་ཞལ་གྱི་གཟུངས་རིང་ཚར་གཅིག་གིས་ཐོག་དྲངས་ཏེ། ཏདྱ་ཐཱ། ཨོཾ་དྷ་ར་དྷ་ར་སོགས་སྙིང་པོ་ཅི་ནུས་དང་། འདིའི་བུམ་བསྐྱེད་སྐབས་སུ་བཅུ་གཅིག་ཞལ་བསྐྱེད་མི་དགོས་ཀྱང་། གཟུངས་བཟླ་བ་ནི། འཕགས་པའི་ཡེ་ཤེས་ལྔ་ཡི་ལྡོག་ཆ་སློབ་མ་རྣམས་ལ་དབང་གི་བྱ་བ་སྒྲུབ་པའི་སླད་དུ་ཡེ་ཤེས་ཀྱི་མཁའ་འགྲོ་རིགས་ལྔར་ཤར་བ་མཚོན་པ་སྟེ། ཡིག་རྙིང་ཁུངས་ཐུབ་རྣམས་སུའང་འདི་ཁོ་ན་ལྟར་འབྱུང་ངོ་། །ལས་བུམ་གྱི་ལྷ་ལ་དམིགས་ཏེ། ཨོཾ་པདྨཱ་ནྟ་ཀྲྀ་ཏྲ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། ཅེས་བཟླས་མཐར། བུམ་པའི་ལྷ་རྣམས་འོད་དུ་ཞུ་བ་ལས་བུམ་ཆུ་དང་དབྱེར་མེད་དུ་གྱུར་པར་བསམ། མཎྜལ་བསང་སྦྱང་། སྟོང་པའི་ངང་ལས་བྷྲཱུྃ་ལས་བྱུང་བའི་རིན་པོ་ཆེ་ལས་གྲུབ་པའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་འདབ་མ་བཞི་པའི་ནས། གར་སྟབས་སུ་འགྱིང་བ། དེ་ཐམས་ཅད་ཀྱི་སྤྱི་བོར་ཨོཾ་དཀར་པོ་ནས། ལས་ཀྱི་མཁའ་འགྲོ་མ་ལ་དོན་ཡོད་གྲུབ་པས་དབུར་བརྒྱན། མཆོད་པ་སངས་སྦྱང་བྱིན་གྱིས་བརླབ། ཨོཾ་པཉྩ་ཌཱ་ཀི་ནཱི་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། བསྟོད་པས་བསྟོད། གཏོར་མ་བསང་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་གཏོར་མ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ་གྱིས་བརླབས་ལ། གཏོར་མ་དང་པོ། ཨོཾ་པཉྩ་ཌཱ་ཀི་ནཱི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གསུམ་མམ་བདུན་གྱིས་ཕུལ། མཆོད་བསྟོད་ཀྱི་མཐར། མཆོད་གཏོར་འདོད་པའི་ཡོན་ཏན་ལྔ་དང་ལྡན་པ་འདི་ཉིད། ཡེ་ཤེས་ཀྱི་མཁའ་འགྲོ་རིགས་ལྔ་ལ་འབུལ་ལོ། །བདག་དང་རྡོ་རྗེ་སློབ་མ་རྣམས་ཀྱི་རྒྱུད་བྱིན་གྱིས་བརླབ་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་འདོད་དོན་གསོལ། གཉིས་པ་ཆོས་སྐྱོང་དང་། གསུམ་པ་གཞི་བདག་ལ་སྤྱི་ལྟར་འབུལ། སྤྲོ་ན་བདག་འཇུག་ལེན་པར་ཡིག་རྙིང་འགའ་ཞིག་ལས་ཀྱང་གསུངས་པ་ལྟར་འོག་ནས་འབྱུང་བའི་རྗེས་གནང་གི་ཆོས་རྣམས་བདག་འཇུག་གི་ཚུལ་དུ་བླངས་ཤིང་། །སློབ་མ་འཇུག་པར་གསོལ་བ་གདབ། གཉིས་པ་ནི། སྣོད་དང་ལྡན་པའི་སློབ་མ་རྣམས་ཕྱི་རོལ་ཏུ་ལས་བུམ་གྱི་ཆུས་ཁྲུས་བྱ། ནང་དུ་འོངས་པ་ན་སྦྱོང་བ་གསུམ་སྔོན་དུ་འགྲོ་བས་བགེགས་བསྐྲད། །ལས་ཀྱི་རྡོ་རྗེས་བསྐུལ་ཏེ་མཎྜལ་ཕུལ། དེ་ནས་སློབ་དཔོན་གྱིས་ཆོས་ཉན་པའི་ཀུན་སློང་དང་ཀུན་སྤྱོད་གསལ་བཏབ། ངེས་འབྱུང་དང་། བྱང་ཆུབ་སེམས་ཀྱི་གཏམ་ཟབ་མོས་མཚམས་སྦྱར་ཏེ། དེ་ལ་དུས་གསུམ་རྒྱལ་བ་སྲས་དང་བཅས་པའི་སྙིང་རྗེ་ཆེན་པོའི་ཡེ་ཤེས་གཅིག་ཏུ་བསྡུས་པའི་རང་གཟུགས། མཚན་འཛིན་པའམ། སྐུའི་སྣང་བ་དྲན་པ་ཙམ་གྱིས་ཀྱང་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་ཞིང་། ཕན་བདེའི་འདོད་པ་ཡིད་བཞིན་དུ་སྩོལ་བ་འཕགས་པ་ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་ལ། རྟེན་གཞིའི་རྒྱུད་དང་། བསྒྲུབ་བྱའི་ལྷ་དང་། སྒྲུབ་བྱེད་ཀྱི་ཐབས་དང་། གྲུབ་པའི་སློབ་དཔོན་རྣམས་ཀྱི་མན་ངག་གིས་ཕྱེ་བའི་བཀའ་སྲོལ་མི་འདྲ་བ་དུ་མ་ཞིག་མཆིས་པ་ལས། འདིར་བྱ་རྒྱུད་པདྨའི་རིགས་ཀྱི་བདག་པོ་འཕགས་པ་ཞལ་བཅུ་གཅིག་པའི་གཟུངས་ཀྱི་རྗེས་སུ་འབྲངས་ནས། མཁས་ཤིང་དངོས་གྲུབ་བརྙེས་པའི་དགེ་སློང་མ་དཔལ་མོས་མན་ངག་གིས་བཀྲལ་བ་སྟེ། དེ་ལ་གྲུབ་ཆེན་དཔལ་མོ་ནི། རྒྱལ་པོ་ཨིནྡྲ་བྷཱུ་ཏིའི་ལྕམ་མོ་རིག་པའི་གནས་ལྔ་ལ་མཁས་པར་གྱུར་ནས་པཎྜི་ཏ་མང་པོའི་བླ་མ་མཛད་པའི་སྐབས་སྔོན་ལས་ཀྱི་ལྷག་མས་སྐུ་ལ་བསྙུན་མི་བཟད་པས་བཏབ་སྟེ་འཁོར་རྣམས་ཀྱིས་དུར་ཁྲོད་དུ་བོར། །སོར་མོ་ཡང་ཆད་ནས་འོ་བརྒྱལ་བའི་ཚེ། འཕགས་པ་འཇམ་དཔལ་གྱིས་ལུང་བསྟན་ཏེ་རྟོག་པ་ཆུང་ལ་བསྒྲུབ་སླ་བའི་ཡི་དམ་གྱི་ལྷ་ཁྱད་པར་ཅན་ཐུགས་རྗེ་ཆེན་པོ་བཅུ་གཅིག་ཞལ་ཡིན་པས་ལི་ཁ་ར་ཤིང་འཕེལ་དུ་སོང་ལ་སྒྲུབས་ཤིག་ཅེས་བསྐུལ་བ་ལྟར། པདྨའི་རིགས་ཀྱི་མཁའ་འགྲོ་མ་བདུན་གྱི་རྫུ་འཕྲུལ་གྱིས་སྤྱན་དྲངས་ཏེ་སྐད་ཅིག་ལ་གནས་དེར་བྱོན། འཕགས་མཆོག་སྙིང་རྗེའི་གཏེར་ཆེན་གྱི་རྣལ་འབྱོར་ལ་རྩེ་གཅིག་ཏུ་གཞོལ་བས། ས་ག་ཟླ་བའི་ཚེས་བཅོ་ལྔའི་ཚེ་ཐུགས་རྗེ་ཆེན་པོས་མངོན་སུམ་དུ་རྗེས་སུ་བཟུང་བའི་མོད་ལ་ས་བརྒྱད་པ་ལ་གནས་པའི་བྱང་ཆུབ་སེམས་མ་ཆེན་མོར་གྱུར། བསྙུན་ཟུག་ཐམས་ཅད་སྦྲུལ་ཤུན་བརྗེས་པ་ལྟར་དག་སྟེ་འཕགས་པའི་ཆོས་སྐོར་འདི་ལ་བརྟེན་ནས་མ་འོངས་པའི་སེམས་ཅན་མང་པོ་འདྲེན་པར་ལུང་བསྟན་བརྙེས། ཉན་ཐོས་རྣམས་ཀྱི་མི་མོས་པ་ཟློག་པའི་དོན་དུ་ཕག་མོ་དབུ་བཅད་མའི་སྐུར་དངོས་སུ་བཞེངས་ནས་གྲུབ་པའི་རྫུ་འཕྲུལ་སྣ་ཚོགས་བསྟན་པས་སྐྱེ་བོ་དཔག་ཏུ་མེད་པ་བཏུལ། །གཟུགས་ཀྱི་སྐུ་མ་བསྡུས་པར་ད་ལྟའང་འགྲོ་བའི་དོན་དུ་བཞུགས་སོ། །དེས་པཎྜི་ཏ་ཟླ་བ་གཞོན་ནུ་དང་། ཡེ་ཤེས་བཟང་པོ་རྗེས་སུ་བཟུང་ཞིང་། གངས་ཅན་གྱི་ལྗོངས་འདིར་སྤྱན་རས་གཟིགས་དངོས་བྱང་ཆུབ་སེམས་དཔའ་ཆེན་པོ་ཟླ་བ་རྒྱལ་མཚན་སོགས་ཀྱིས་དར་རྒྱས་སུ་མཛད་པའི་གདམས་སྐོར་ལ། རྗེས་སུ་གནང་བའི་བཀའ་མི་འདྲ་བ་འགའ་ཞིག་བཞུགས་པ་ལས། ད་ལམ་འདིར་སྐབས་སུ་བབས་པ་འཕགས་པ་འཇིག་རྟེན་དབང་ཕྱུག་ཞལ་བཅུ་གཅིག་པ་མཁའ་འགྲོ་ལྔ་བསྐོར་དུ་གྲགས་པའི་རྗེས་གནང་ཟབ་མོ་ཞུ་བའི་སླད་དུ། མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཁྱོད་ནི་མགོན་པོ་སྤྱན་རས་གཟིགས། །ཀུན་ལ་ཁྱབ་པའི་ཐུགས་རྗེ་ཅན། །འགྲོ་བ་མ་ལུས་སྒྲོལ་མཛད་པ། །བདག་སོགས་རྣམས་ལ་བྱིན་གྱིས་རློབས། །རྒྱུད་དག་པར་བྱ་བའི་སླད་དུ་མདུན་གྱི་ནམ་མཁའ་འཕགས་པ་ཐུགས་རྗེ་ཆེན་པོ་ཞལ་བཅུ་གཅིག་པ་ལ། གཞན་ཡང་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་ཀྱིས་བསྐོར་བ་སྤྲིན་གྱི་ཕུང་པོ་འཁྲིགས་པ་ལྟར་བཞུགས་པའི་སྤྱན་སྔར་ཕྱག་འཚལ་བ་དང་། མཆོད་པ་འབུལ་བ་དང་། སྐྱབས་སུ་འགྲོ་བ་དང་། སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམ་པའི་ཡིད་ཀྱིས་འདིའི་རྗེས་ཟློས་ལན་གསུམ་མཛོད། །དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་མཆོད་པ་འབུལ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །སོགས། དེ་ནས་གནས་ཁང་འདི་ཉིད་ཀྱང་ཐ་མལ་གྱི་གནས་ཁང་འདི་ལྟ་བུ་མ་ཡིན་པར་ཡེ་ཤེས་ཀྱི་རང་སྣང་ལས་གྲུབ་པའི་གྲུ་འཛིན་རི་བོའི་ཕོ་བྲང་དངོས་ཡིན་སྙམ་པ་དང་། བླ་མ་ཡང་འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་དངོས་ཡིན་སྙམ་པ་དང་། མདུན་གྱི་མཎྜལ་འདི་ཉིད་ཀྱང་བསྒྲུབས་ཟིན་པ་ལྟར། རིན་པོ་ཆེ་ལས་གྲུབ་པའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་འདབ་མ་བཞི་པའི་སོགས་ནས། གར་སྟབས་སུ་འགྱིང་བ་སྟེ། ཡེ་ཤེས་ཀྱི་མཁའ་འགྲོ་མ་རིགས་ལྔའི་རྟེན་དང་བརྟེན་པར་བཅས་པའི་དཀྱིལ་འཁོར་དང་། དེ་དག་གི་སྟེང་ཕྱོགས་ཀྱི་ནམ་མཁར་ཇོ་བོ་ཐུགས་རྗེ་ཆེན་པོ་ཞལ་བཅུ་གཅིག་པའི་ལྷ་ཚོགས་རྣམས་ཀྱང་མངོན་སུམ་ལྟ་བུར་བཞུགས་པའི་མོས་པ་མཛད་ནས། རྗེས་གནང་གི་གཞི་དགོད་པའི་སླད་དུ་སློབ་མ་རྣམས་ལྷར་བསྐྱེད་པ་ཡིན་པས་དམིགས་པ་འདི་བཞིན་དུ་གནང་བར་ཞུ། ཞེས་བརྡ་སྦྱར་ལ། སློབ་མ་རྣམས་བསང་སྦྱང་། སྟོང་པའི་ངང་ལས་བཅུ་གཅིག་ཞལ་གཙོ་རྐྱང་དུ་སྒྲུབ་ཐབས་ལྟར་བསྐྱེད། དེའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། སླར་ཡང་སློབ་དཔོན་ལ་གུས་འདུད་དྲག་པོ་མཛད་པས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེ་དག་གི་ཐུགས་ཀ་ནས་འོད་ཟེར་བསམ་གྱིས་མི་ཁྱབ་པ་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པའི་ཐུགས་ཀར་ཕོག་པས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ། རྣམ་པ་འཕགས་མཆོག་ཐུགས་རྗེ་ཆེན་པོ་ཞལ་བཅུ་གཅིག་པའི་ལྷ་ཚོགས་ནམ་མཁའ་གང་བར་སྤྱན་དྲངས་ཏེ་སློབ་མ་རྣམས་ཀྱི་ལུས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཏདྱ་ཐཱ། ཨོཾ་དྷ་ར་དྷ་སོགས་དང་། ཨོཾ་བཛྲ་ཨཱ་བེ་ཤ་ཡ་ཨཿཨཱཿ ཛཿཧཱུྃ་བྃ་ཧོཿ ཞེས་ཡང་ཡང་བརྗོད། སྤོས་རོལ་བྱ། དེས་རྗེས་གནང་གི་གཞི་དགོད་པའི་རིམ་པ་སོང་ནས། དངོས་གཞིའི་རྗེས་སུ་གནང་བ་ལ། ལྷ་བསྒོམ་པ། སྔགས་བཟླ་བ། གཞན་དོན་བྱ་བའི་རྗེས་སུ་གནང་བ་སྟེ་རྣམ་པ་གསུམ་དུ་ཡོད་པ་ལས། ཐོག་མར་ལྷ་བསྒོམ་པའི་རྗེས་གནང་བུམ་པའི་དབང་བསྐུར་བ་ལ་འོད་དཔག་མེད་ཆུའི་དབང་གི་སླད་དུ། སློབ་དཔོན་གྱིས་པདྨ་མཁའ་འགྲོ་མའི་ངོ་བོ་རྣམ་པར་རྒྱལ་མའི་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་ཏེ་སྤྱི་བོར་བཞག་ཅིང་དབང་བསྐུར་བའི་མོས་པ་མཛོད། དབང་བསྐུར་རྡོ་རྗེ་ཆེན་པོ་སྟེ། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་པའི། །གནས་ལས་བྱུང་བ་སྦྱིན་པར་བྱ། །པདྨ་ཨ་བྷི་ཥིཉྩ་ཧྲཱིཿ ཞེས་དབང་བསྐུར་ཞིང་བཀྲུ་བ་དང་། བཏུང་དུ་གཞུག །སླར་ཡང་བུམ་ཆུ་འཐོར་ཞིང་། ཇི་ལྟར་བལྟམས་པ་སོགས་ནས། ཤྲི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་དབང་བསྐུར་བས་ལུས་ཐམས་ཅད་གང་། སྒོ་གསུམ་གྱི་དྲི་མ་དག །བདེ་བ་ཆེན་པོའི་ཡེ་ཤེས་ཉམས་སུ་མྱོང་། ཆུའི་ལྷག་མ་ཡར་ལུད་པ་ལས་སྤྱི་གཙུག་ཏུ་འོད་དཔག་མེད་ཀྱིས་དབུར་བརྒྱན་ཅིང་། མདུན་བསྐྱེད་ཀྱི་དཀྱིལ་འཁོར་གྱི་དབུས་ན་བཞུགས་པའི་ལྷ་མོ་དམར་མོ་ལས། ལྷ་མོ་གཉིས་པ་རེ་ཆད། སློབ་མ་རྣམས་ཀྱི་སྤྱི་བོ་ནས་ཞུགས། སྙིང་གའི་དབུས་སུ་ཐིག་ལེ་དམར་པོའི་རྣམ་པར་བཞུགས་པའི་མོས་པ་མཛོད། །དེ་ལྟར་ཆུའི་དབང་བསྐུར་བས་འདོད་ཆགས་ཀྱི་དྲི་མ་སྦྱངས། འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་མངོན་དུ་བྱས། འོད་དཔག་མེད་དང་དེའི་རིགས་ཀྱི་དངོས་གྲུབ་སྒྲུབ་པ་ལ་དབང་བར་བྱས་པ་ཡིན་ནོ། །རྣམ་པར་སྣང་མཛད་མིང་དབང་གི་སླད་དུ་སངས་རྒྱས་མཁའ་འགྲོ་མའི་ངོ་བོ་དེ་བཞིན་གཤེགས་པའི་མཚན་གྱིས་གང་བའི་བུམ་པ་དཔྲལ་བར་བཞག་སྟེ་དབང་བསྐུར་བའི་མོས་པ་མཛོད། །དབང་བསྐུར་རྡོ་རྗེ་སོགས་དང་། བུདྡྷ་ཨ་བྷི་ཥིཉྩ་ཨོཾ། ཞེས་བརྗོད་ཅིང་བུམ་པ་དཔྲལ་བར་བཞག །གང་དུ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་མཚན་འགྲུབ་པར་གྱུར་ཅིག །ཅེས་བརྗོད་ལ་མཚན་གྱི་ཤོག་དྲིལ་ལག་ཏུ་བྱིན། དེ་བརྟན་པར་བྱ་བའི་སླད་དུ་བུམ་པའི་ཆུས་ཀྱང་དབང་བསྐུར་བའི་མོས་པ་མཛོད། ཇི་ལྟར་བལྟམས་པ་སོགས་ནས། ཤྲི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་སོགས་ནས། ཆུའི་ལྷག་མ་ཡར་ལུད་པ་ལས་དཔྲལ་བར་རྣམ་པར་སྣང་མཛད་ཀྱིས་དབུར་བརྒྱན་ཅིང་། མདུན་བསྐྱེད་ཤར་གྱི་ལྷ་མོ་དཀར་མོ་ལས། ལྷ་མོ་གཉིས་པ་རེ་ཆད། སློབ་མ་རྣམས་ཀྱི་དཔྲལ་བ་ནས་ཞུགས། སྙིང་གའི་ཐིག་ལེ་དམར་པོའི་མདུན་དུ་ཐིག་ལེ་དཀར་པོའི་རྣམ་པར་བཞུགས་པའི་མོས་པ་མཛོད། དེ་ལྟར་མིང་གི་དབང་བསྐུར་བས་གཏི་མུག་གི་དྲི་མ་སྦྱངས། གཟུགས་ཀྱི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། རྣམ་སྣང་དང་དེའི་རིགས་ཀྱི་དངོས་གྲུབ་སྒྲུབ་པ་ལ་དབང་བར་བྱས་པ་ཡིན་ནོ། །རིན་ཆེན་འབྱུང་ལྡན་དབུ་རྒྱན་གྱི་དབང་གི་སླད་དུ་རིན་ཆེན་མཁའ་འགྲོ་མའི་ངོ་བོ་རིན་པོ་ཆེའི་དབུ་རྒྱན་རྣ་ལྟག་གཡས་སུ་བཞག་སྟེ་དབང་བསྐུར་བའི་མོས་པ་མཛོད། དབང་བསྐུར་རྡོ་རྗེ་སོགས་དང་། རཏྣ་ཨ་བྷི་ཥིཉྩ་ཏྲཱྃ། བརྟན་བྱེད་ཆུ་དབང་སྔར་བཞིན་བསྐུར་ལ། ཆུའི་ལྷག་མ་ཡར་ལུད་པ་ལས་རྣ་ལྟག་གཡས་སུ་རིན་ཆེན་འབྱུང་ལྡན་གྱིས་དབུར་བརྒྱན་ཅིང་། མདུན་བསྐྱེད་ལྷོའི་ལྷ་མོ་སེར་པོ་ལས། ལྷ་མོ་གཉིས་པ་རེ་ཆད། སློབ་མ་རྣམས་ཀྱི་རྣ་ལྟག་གཡས་པ་ནས་ཞུགས། སྙིང་གའི་ཐིག་ལེ་དམར་པོའི་གཡས་སུ་ཐིག་ལེ་སེར་པོའི་རྣམ་པར་བཞུགས་པའི་མོས་པ་མཛོད། །དེ་ལྟར་དབུ་རྒྱན་གྱི་དབང་བསྐུར་བས་ང་རྒྱལ་དང་སེར་སྣའི་དྲི་མ་སྦྱངས། ཚོར་བའི་ཕུང་པོ་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རིན་ཆེན་འབྱུང་ལྡན་དང་དེའི་རིགས་ཀྱི་དངོས་གྲུབ་སྒྲུབ་པ་ལ་དབང་བར་བྱས་པ་ཡིན་ནོ། །མི་བསྐྱོད་པ་རྡོ་རྗེའི་དབང་གི་སླད་དུ་རྡོ་རྗེ་མཁའ་འགྲོ་མའི་ངོ་བོ་རྡོ་རྗེ་ལྟག་པར་བཞག་སྟེ་དབང་བསྐུར་བའི་མོས་པ་མཛོད། དབང་བསྐུར་རྡོ་རྗེ་སོགས་དང་། བཛྲ་ཨ་བྷི་ཥིཉྩ་ཧཱུྃ། བརྟན་བྱེད་ཆུ་དབང་མཐར། ཆུའི་ལྷག་མ་ཡར་ལུད་པ་ལས་ལྟག་པར་མི་བསྐྱོད་པས་དབུར་བརྒྱན་ཅིང་། མདུན་བསྐྱེད་ནུབ་ཀྱི་ལྷ་མོ་སྔོན་མོ་ལས། ལྷ་མོ་གཉིས་པ་རེ་ཆད། སློབ་མ་རྣམས་ཀྱི་ལྟག་པ་ནས་ཞུགས། སྙིང་གའི་ཐིག་ལེ་དམར་པོའི་རྒྱབ་ཏུ་ཐིག་ལེ་སྔོན་པོའི་རྣམ་པར་བཞུགས་པའི་མོས་པ་མཛོད། །དེ་ལྟར་རྡོ་རྗེའི་དབང་བསྐུར་བས་ཞེ་སྡང་གི་དྲི་མ་སྦྱངས། རྣམ་པར་ཤེས་པའི་ཕུང་པོ་གནས་གྱུར། ཆོས་དབྱིངས་ཡེ་ཤེས་མངོན་དུ་བྱས། མི་བསྐྱོད་པ་དང་དེའི་རིགས་ཀྱི་དངོས་གྲུབ་སྒྲུབ་པ་ལ་དབང་བར་བྱས་པ་ཡིན་ནོ། །དོན་ཡོད་གྲུབ་པ་དྲིལ་བུའི་དབང་གི་སླད་དུ་ལས་ཀྱི་མཁའ་འགྲོ་མའི་ངོ་བོ་དྲིལ་བུ་རྣ་ལྟག་གཡོན་པར་བཞག་སྟེ་དབང་བསྐུར་བའི་མོས་པ་མཛོད། དབང་བསྐུར་རྡོ་རྗེ་སོགས་དང་། ཀརྨ་ཨ་བྷི་ཥིཉྩ་ཨཱཿ བརྟན་བྱེད་ཆུ་དབང་གི་མཐར། ཆུའི་ལྷག་མ་ཡར་ལུད་པ་ལས་རྣ་ལྟག་གཡོན་པར་དོན་ཡོད་གྲུབ་པས་དབུར་བརྒྱན་ཅིང་། མདུན་བསྐྱེད་བྱང་གི་ལྷ་མོ་ལྗང་མོ་ལས། ལྷ་མོ་གཉིས་པ་རེ་ཆད། སློབ་མ་རྣམས་ཀྱི་རྣ་ལྟག་གཡོན་པ་ནས་ཞུགས། སྙིང་གའི་ཐིག་ལེ་དམར་པོའི་གཡོན་དུ་ཐིག་ལེ་ལྗང་གུའི་རྣམ་པར་བཞུགས་པའི་མོས་པ་མཛོད། དེ་ལྟར་དྲིལ་བུའི་དབང་བསྐུར་བས་ཕྲག་དོག་གི་དྲི་མ་སྦྱངས། འདུ་བྱེད་ཀྱི་ཕུང་པོ་གནས་གྱུར་བྱ་བ་གྲུབ་པའི་ཡེ་ཤེས་མངོན་དུ་བྱས། དོན་ཡོད་གྲུབ་པ་དང་། དེའི་རིགས་ཀྱི་དངོས་གྲུབ་སྒྲུབ་པ་ལ་དབང་བར་བྱས་པ་ཡིན་ནོ། །དེ་ནས་སྙིང་གའི་ཐིག་ལེ་རྣམས་ལ་ཡིད་ཞུགས་པ་བཞིན་ཆེར་གྱིས་གཏད་དེ་མཉམ་པར་བཞག་པས། ཐིག་ལེ་རྣམས་འོད་དུ་ཞུ། དབུས་ཀྱི་ཐིག་ལེ་དམར་པོ་ལ་ཐིམ། དེ་འོད་དུ་ཞུ་བ་ལས་ཟླ་བའི་དཀྱིལ་འཁོར་གྱི་དབུས་སུ་ཧྲཱིཿཡིག་དཀར་པོ་རིང་ཆ་ཚེག་དྲག་དང་བཅས་པ། དེ་ཡོངས་སུ་གྱུར་པ་ལས་ཡེ་ཤེས་སེམས་དཔའ་འཕགས་པ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་གཉིས། གཡས་མཆོག་སྦྱིན་དང་། གཡོན་པདྨ་བསྣམས་པ། དར་དང་རིན་པོ་ཆེས་བརྒྱན་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པ། ཚོན་གང་བ་རེའི་སྐུ་ཅན་དུ་ལམ་སྟེ་གྱུར་པའི་མོས་པ་མཛོད། གཉིས་པ་སྔགས་ཀྱི་རྗེས་གནང་ནི། སློབ་དཔོན་དང་སློབ་མ་རྣམས་འཕགས་པ་བཅུ་གཅིག་ཞལ་དུ་གསལ་བཞིན་པའི་ཐུགས་ཀར་ཡེ་ཤེས་སེམས་དཔའི་ཐུགས་དབུས་སུ་ཟླ་བའི་གདན་ལ་ཏིང་ངེ་འཛིན་སེམས་དཔའ་ཧྲཱིཿདཀར་པོའི་མཐར་གཟུངས་སྔགས་ཀྱི་ཕྲེང་བས་བསྐོར་བར་གསལ་བཏབ་ནས་སློབ་དཔོན་ལ་སྔགས་ཀྱི་བཟླས་ལུང་ཞུ་བའི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། བཅོམ་ལྡན་ཐུགས་རྗེ་ཆེན་པོ་ཡིས། །བདག་ལ་བྱིན་གྱིས་བརླབ་པར་མཛོད། །སྔགས་ཀྱི་དངོས་གྲུབ་སྩལ་ནས་ཀྱང་། །བདག་ལ་ཉེ་བར་མཛད་དུ་གསོལ། །ཞེས་གསོལ་བ་བཏབ་པས་སློབ་དཔོན་གྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་བྱུང་། ཞལ་ནས་ཐོན། སློབ་མ་རྣམས་ཀྱི་ཞལ་དུ་ཞུགས། སྙིང་གའི་སྔགས་ཕྲེང་ལ་ཐིམ་པས་བྱིན་གྱིས་བརླབ་པར་མོས་ཏེ་གཟུངས་སྔགས་འདིའི་རྗེས་ཟློས་ལན་གསུམ་མཛོད། གཟུངས་རིང་ལན་གསུམ། སླར་ཡང་སློབ་དཔོན་གྱིས་འཕགས་པ་ཐུགས་རྗེ་ཆེན་པོའི་གསུང་གི་བྱིན་རླབས་ཐམས་ཅད་དབྱངས་གསལ་གྱི་ཡི་གེའི་རྣམ་པར་སྤྱན་དྲངས། མེ་ཏོག་ལ་ཐིམ་པ་སློབ་མ་རྣམས་ཀྱི་སྤྱི་བོར་བཞག་པས་སྙིང་གའི་སྔགས་ཕྲེང་བརྟན་ཅིང་ནུས་ལྡན་དུ་བྱས་པའི་མོས་པ་མཛོད། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་ཉེ་བར་མཛད་དུ་གསོལ། །སྔགས་ཀྱི་དངོས་གྲུབ་ཐོབ་པ་དང་། །བརྟུལ་ཞུགས་བརྟན་པར་མཛད་དུ་གསོལ། ཅེས་བརྗོད། གསུམ་པ་གཞན་དོན་བྱ་བའི་རྗེས་གནང་ནི། ཐུགས་རྗེ་ཆེན་པོའི་སྐུ་སྤྱི་བོར་གཞག་ཅིང་སྒྲུབ་ཐབས་ཀྱི་གླེགས་བམ་ཕྱག་ཏུ་གཏད་དེ་སློབ་དཔོན་མདུན་བསྐྱེད་དང་བཅས་པས་མགྲིན་གཅིག་ཏུ་གཞན་དོན་བྱ་བར་རྗེས་སུ་གནང་བའི་མོས་པ་མཛོད། དེང་ནས་བཟུང་སྟེ་བུ་ཁྱོད་ཀྱིས། །འཕགས་པ་ཐུགས་རྗེ་ཆེན་པོ་ཡི། །དབང་སྐུར་དམ་ཆོས་རྒྱ་ཆེར་ཤོད། གཞན་དོན་ཐམས་ཅད་བསྒྲུབ་པར་གྱིས། །ཞེས་བརྗོད། དེ་ལྟར་ན་བུམ་པས་དབང་བསྐུར་བས་ལུས་ཐུགས་རྗེ་ཆེན་པོའི་སྐུར་བསྒོམ་པ་ལ་དབང་། སྔགས་ཀྱི་རྗེས་གནང་གིས་ངག་གཟུངས་སྔགས་ཟབ་མོ་བཟླ་བ་ལ་དབང་། གཞན་དོན་གྱིས་ཤིག་པའི་རྗེས་གནང་གིས། ཐུགས་རྗེ་ཆེན་པོའི་དམ་ཆོས་ཀྱི་སྒོ་ནས་གཞན་དོན་མཁའ་ཁྱབ་ཏུ་བྱེད་པ་ལ་དབང་བ་ཡིན་ནོ། །དེས་རྗེས་གནང་གི་དངོས་གཞི་ལེགས་པར་གྲུབ་ནས། མཇུག་གི་ཆོས་དམ་ཚིག་ཁས་བླང་བ་སོགས་སྤྱི་ལྟར་བྱས་ལ། དགེ་བའི་རྩ་བ་བྱང་ཆུབ་ཏུ་བསྔོའོ། །གསུམ་པ་ནི། སློབ་དཔོན་གྱིས་མཆོད་པ་བསང་སྦྱང་བྱིན་གྱིས་བརླབས་ལ། མདུན་བསྐྱེད་ལ་མཆོད་བསྟོད་དང་། ཨོཾ་པདྨ་ས་ཏྭ་སོགས་ཡི་གེ་བརྒྱ་པ་ལན་གསུམ་གྱི་མཐར་ནོངས་པ་བཟོད་པར་གསོལ། བཛྲ་མུཿས་ཚོམ་བུའི་ཡེ་ཤེས་པ་གཤེགས། དམ་ཚིག་པ་རྟེན་དང་བརྟེན་པ་རང་ལ་ཐིམ་པར་བསམ། རང་ཐུགས་རྗེ་ཆེན་པོ་ཞལ་གཅིག་ཕྱག་གཉིས་པར་གྱུར་པའི་དཔྲལ་བར་ཨོཾ་དཀར་པོ་སོགས་གནས་གསུམ་བསྲུང་། བསྔོ་སྨོན་དང་ཤིས་བརྗོད་ཀྱི་ཕྲེང་བས་མཐའ་བརྒྱན་པར་བྱའོ། །དེ་ལྟར་བཅུ་གཅིག་ཞལ་དཔལ་མོ་ལུགས་མཁའ་འགྲོ་ལྔ་བསྐོར་དུ་གྲགས་པའི་རྗེས་གནང་གི་ཆོ་ག་འདི་ལ། ཡིག་ཆ་གསར་རྙིང་ཅུང་ཟད་མི་མཐུན་པ་འགའ་ཞིག་མཇལ་ནའང་། གཙོ་བོར་ཡིག་རྙིང་གི་དགོངས་དོན་དང་མི་འགལ་བར་བླ་མ་དམ་པའི་ཕྱག་གཞེས་ཀྱིས་བརྒྱན་ཏེ་ཤིན་ཏུ་གསལ་བར་བཀོད་པའོ། །འཕགས་མཆོག་ཐུགས་རྗེའི་ཆུ་གཏེར་བསྲུབས་པའི་ཕུལ། །རྗེས་གནང་གཞན་ལ་ཕན་པའི་ཟླ་ཤེལ་གྱི། །བྱིན་རླབས་བདུད་རྩིའི་ཟེར་བརྒྱས་ས་གསུམ་ན། །ཐར་བདེའི་སྣང་བ་མཆོག་ཏུ་སྦྱིན་གྱུར་ཅིག །ཅེས་པའང་ཤཱཀྱའི་དགེ་སྦྱོང་འཇམ་དབྱངས་མཁྱེན་བརྩེའི་དབང་པོའམ། ལྷག་པའི་ལྷ་འདི་ཉིད་ཀྱི་སྨིན་བྱེད་ཟབ་མོས་སྐལ་བ་བཟང་པོར་གྱུར་པའི་མིང་གི་ཅོད་པཎ་ཐུགས་རྗེ་དགེ་བའི་དབྱངས་ཞེས་ཀྱང་བགྱི་བའི་རྒྱལ་ཁམས་ཀྱི་བྱ་བྲལ་མ་ཎི་པས་སུག་བྲིས་སུ་བགྱིས་པ་དགེ་ལེགས་འཕེལ།། །།སརྦ་དཱ་མངྒ་ལཾ་བྷ་བ་ཏུ།། །། ༈

[edit]

bcu gcig zhal mkha' 'gro lnga bskor gyi rjes gnang gzhan phan zla zer/ @#/_/bcu gcig zhal dpal mo lugs mkha' 'gro lnga bskor gyi rjes su gnang ba'i cho ga gzhan phan zla zer zhes bya ba bzhugs so/__/thugs rje'i gter chen spyan ras gzigs dbang dang /__/dbyer med bla ma'i zhabs la gus btud nas/__/dpal mo'i bzhed gzhung las 'ongs rjes gnang gi__/cho ga gzhan phan zla ba'i zer phreng spro/__/'di la gsum/__sbyor ba/__dngos gzhi/__rjes so/__/dang po ni/__gnas gtsang zhing yid dang rjes su mthun par stegs kyi dbus su maN+Da lar rdul tshon gyis pad+ma 'dab bzhi bris pa'i dbus dang phyogs bzhir mkha' 'gro lnga yi sku mdog dang mthun pa'i tshom bu bkod/__de'i steng du many+dzi'i khar rnam bum bcud ldan/__shar du sangs rgyas kyi mtshan gyis bum pa 'bras bus gang ba'i nang du slob ma rnams la sbyin rgyu'i sangs rgyas kyi mtshan ji ltar rigs pa'i shog dril bcug__/gang ba'i bum pa/__/lhor dbu rgyan/__nub tu rdo rje/__byang du dril bu/__g.yas g.yon du thugs rje chen po'i sku dang /__pusti/__mdun du dkar gtor gsum dang /__chu gnyis sngon 'gro'i nyer spyod/__/nye logs ci bde bar las bum/__rdor dril/__me tog gi snod/__slob ma la dgos pa'i sbyong chas sogs 'du bya'o/___/de nas bdag gi rnal 'byor thugs rje chen po bcu gcig zhal gtso rkyang gi sgom bzlas smyung gnas kyi cho ga sogs las 'byung ba ltar sngon du 'gro bas bum pa gnyis/__/oM pad+mAn+ta kr-i ta? hU~M phaT kyis bsang /__swa b+hA bas sbyang /__stong pa'i ngang las pa~M las byung ba'i bum pa/__phyi rin po che'i bum bzang mtshan nyid thams cad yongs su rdzogs pa'i rnam pa la nang gzhal yas khang du gyur pa'i dbus su sna tshogs pad+ma 'dab ma bzhi pa'i dbus dang phyogs bzhir zla ba'i gdan re re/__dbus kyi gdan gyi steng du pad+ma mkha' 'gro ma dmar mo g.yon bye ru'i bum pa bsnams pa/__shar du sangs rgyas mkha' 'gro ma dkar mo g.yon shel gyi bum pa bsnams pa/__lhor rin chen mkha' 'gro ma ser mo g.yon gser gyi bum pa bsnams pa/__nub tu rdo rje mkha' 'gro ma sngon mo g.yon lcags kyi bum pa bsnams pa/__byang du las kyi mkha' 'gro ma ljang gu g.yon g.yu'i bum pa bsnams pa/__thams cad kyang phyag g.yas Da ma ru 'khrol zhing rus pa'i phyag rgya lngas brgyan pa/__dar sna tshogs kyi na bza' can/__phaiM gyi sgra sgrogs shing zhabs gnyis gar stabs su 'gying ba/__las thams cad pa'i bum par pad nyi la rta mgrin dmar po g.yas dbyug to dang /__g.yon sdigs mdzub mdzad pa/__zhal gdangs shing mche ba gtsigs pa/__smin ma dang sma ra g.yo zhing spyan gsum 'bar ba/__dbu gtsug tu rta mgo ljang zhur rta skad 'tsher bas mtshan pa/__khro bo'i rgyan dang rnam 'gyur yongs su rdzogs shing ye shes kyi me 'bar ba'i dbus na bzhugs pa/__de thams cad kyi spyi bor oM dkar po/__mgrin par AHdmar po/__thugs kar hU~M sngon pos mtshan pa las 'od zer 'phros pas/__rang bzhin gyi gnas nas bsgoms pa dang 'dra ba'i ye shes pa dbang lha dang bcas pa spyan drangs/__dzaHhU~M ba~M hoH__dam tshig ye shes dbyer med par gyur/__dbang gi lha rnams la/__de bzhin gshegs pa thams cad kyis 'di rnams la mngon par dbang bskur ba stsal du gsol/__/zhes gsol ba btab pas dbang lha'i thugs ka nas lha mo bdud rtsi'i bum pa thogs pa lnga spros te/__ji ltar bltams pa nas/__shri ye hU~M/__zhes gsung zhing bum pa'i bdud rtsis dbang bskur/__sku gang /__dri ma dag__/chu'i lhag ma yar lud pa las pad+ma mkha' 'gro ma la 'od dpag med/__sangs rgyas mkha' 'gro ma la rnam par snang mdzad/__rin chen mkha' 'gro ma la rin chen 'byung ldan/__rdo rje mkha' 'gro ma la mi bskyod pa/__las kyi mkha' 'gro ma la don yod grub pa/__rta mgrin la 'od dpag med kyis dbur brgyan/__mchod pa bsang sbyang byin gyis brlabs la/__oM pany+tsa DA ki nI ha ya grI ba sa pa ri wA ra ar+g+haM nas/__shab+da'i bar gyis mchod/__/zhi rgyas dbang dang drag po yi/__/phrin las ma lus sgrub mdzad pa/__/mkha' 'gro chen mo sde lnga la/__/sgo gsum gus pas bstod par bgyi/__/dus gsum sangs rgyas thams cad kyi/__/sku gsung thugs kyi rang bzhin nyid/_/khro bo'i rgyal po'i skur ston pa/__/rta mchog dpal la phyag 'tshal lo/__/ces bstod/__bum pa'i lha'i thugs ka nas 'od zer rang mdog dang mthun par 'phros/__sems can thams cad kyi dug lnga sbyangs te rigs lnga'i mkha' 'gro mar gyur pa dang /__sangs rgyas thams cad kyi ye shes lnga'i rang mdangs 'od zer gyi rnam par spyan drangs te thugs ka'i sa bon la thim/__de las bdud rtsi'i rgyun babs pas bum pa gang bar gyur par bsams la/__bcu gcig zhal gyi gzungs ring tshar gcig gis thog drangs te/__tad+ya thA/__oM d+ha ra d+ha ra sogs snying po ci nus dang /__'di'i bum bskyed skabs su bcu gcig zhal bskyed mi dgos kyang /__gzungs bzla ba ni/__'phags pa'i ye shes lnga yi ldog cha slob ma rnams la dbang gi bya ba sgrub pa'i slad du ye shes kyi mkha' 'gro rigs lngar shar ba mtshon pa ste/__yig rnying khungs thub rnams su'ang 'di kho na ltar 'byung ngo /__/las bum gyi lha la dmigs te/__oM pad+mA n+ta kr-i tra badz+ra kro d+ha ha ya grI ba hu lu hu lu hU~M phaT/__ces bzlas mthar/__bum pa'i lha rnams 'od du zhu ba las bum chu dang dbyer med du gyur par bsam/__maN+Dal bsang sbyang /__stong pa'i ngang las b+h+rU~M las byung ba'i rin po che las grub pa'i gzhal med khang mtshan nyid thams cad yongs su rdzogs pa'i dbus su sna tshogs pad+ma 'dab ma bzhi pa'i nas/__gar stabs su 'gying ba/__de thams cad kyi spyi bor oM dkar po nas/__las kyi mkha' 'gro ma la don yod grub pas dbur brgyan/__mchod pa sangs sbyang byin gyis brlab/__oM pany+tsa DA ki nI sa pa ri wA ra ar+g+haM sogs kyis mchod/__bstod pas bstod/__gtor ma bsang sbyang /__stong pa'i ngang las b+h+rU~M las rin po che'i snod yangs shing rgya che ba rnams kyi nang du oM 'od du zhu ba las byung ba'i gtor ma zag pa med pa'i ye shes kyi bdud rtsi'i rgya mtsho chen por gyur/__oM AHhU~M/__lan gsum gyis brlabs la/__gtor ma dang po/__oM pany+tsa DA ki nI sa pa ri wA ra i daM ba liM ta kha kha khA hi khA hi/__gsum mam bdun gyis phul/__mchod bstod kyi mthar/__mchod gtor 'dod pa'i yon tan lnga dang ldan pa 'di nyid/__ye shes kyi mkha' 'gro rigs lnga la 'bul lo/__/bdag dang rdo rje slob ma rnams kyi rgyud byin gyis brlab pa dang /__mchog dang thun mong gi dngos grub ma lus pa stsal du gsol/__ces 'dod don gsol/__gnyis pa chos skyong dang /__gsum pa gzhi bdag la spyi ltar 'bul/__spro na bdag 'jug len par yig rnying 'ga' zhig las kyang gsungs pa ltar 'og nas 'byung ba'i rjes gnang gi chos rnams bdag 'jug gi tshul du blangs shing /__/slob ma 'jug par gsol ba gdab/__gnyis pa ni/__snod dang ldan pa'i slob ma rnams phyi rol tu las bum gyi chus khrus bya/__nang du 'ongs pa na sbyong ba gsum sngon du 'gro bas bgegs bskrad/__/las kyi rdo rjes bskul te maN+Dal phul/__de nas slob dpon gyis chos nyan pa'i kun slong dang kun spyod gsal btab/__nges 'byung dang /__byang chub sems kyi gtam zab mos mtshams sbyar te/__de la dus gsum rgyal ba sras dang bcas pa'i snying rje chen po'i ye shes gcig tu bsdus pa'i rang gzugs/__mtshan 'dzin pa'am/__sku'i snang ba dran pa tsam gyis kyang 'khor ba dang ngan song gi sdug bsngal las sgrol zhing /__phan bde'i 'dod pa yid bzhin du stsol ba 'phags pa thugs rje chen po spyan ras gzigs dbang phyug la/__rten gzhi'i rgyud dang /__bsgrub bya'i lha dang /__sgrub byed kyi thabs dang /__grub pa'i slob dpon rnams kyi man ngag gis phye ba'i bka' srol mi 'dra ba du ma zhig mchis pa las/__'dir bya rgyud pad+ma'i rigs kyi bdag po 'phags pa zhal bcu gcig pa'i gzungs kyi rjes su 'brangs nas/__mkhas shing dngos grub brnyes pa'i dge slong ma dpal mos man ngag gis bkral ba ste/__de la grub chen dpal mo ni/__rgyal po in+d+ra b+hU ti'i lcam mo rig pa'i gnas lnga la mkhas par gyur nas paN+Di ta mang po'i bla ma mdzad pa'i skabs sngon las kyi lhag mas sku la bsnyun mi bzad pas btab ste 'khor rnams kyis dur khrod du bor/__/sor mo yang chad nas 'o brgyal ba'i tshe/__'phags pa 'jam dpal gyis lung bstan te rtog pa chung la bsgrub sla ba'i yi dam gyi lha khyad par can thugs rje chen po bcu gcig zhal yin pas li kha ra shing 'phel du song la sgrubs shig ces bskul ba ltar/__pad+ma'i rigs kyi mkha' 'gro ma bdun gyi rdzu 'phrul gyis spyan drangs te skad cig la gnas der byon/__'phags mchog snying rje'i gter chen gyi rnal 'byor la rtse gcig tu gzhol bas/__sa ga zla ba'i tshes bco lnga'i tshe thugs rje chen pos mngon sum du rjes su bzung ba'i mod la sa brgyad pa la gnas pa'i byang chub sems ma chen mor gyur/__bsnyun zug thams cad sbrul shun brjes pa ltar dag ste 'phags pa'i chos skor 'di la brten nas ma 'ongs pa'i sems can mang po 'dren par lung bstan brnyes/__nyan thos rnams kyi mi mos pa zlog pa'i don du phag mo dbu bcad ma'i skur dngos su bzhengs nas grub pa'i rdzu 'phrul sna tshogs bstan pas skye bo dpag tu med pa btul/__/gzugs kyi sku ma bsdus par da lta'ang 'gro ba'i don du bzhugs so/__/des paN+Di ta zla ba gzhon nu dang /__ye shes bzang po rjes su bzung zhing /__gangs can gyi ljongs 'dir spyan ras gzigs dngos byang chub sems dpa' chen po zla ba rgyal mtshan sogs kyis dar rgyas su mdzad pa'i gdams skor la/__rjes su gnang ba'i bka' mi 'dra ba 'ga' zhig bzhugs pa las/__da lam 'dir skabs su babs pa 'phags pa 'jig rten dbang phyug zhal bcu gcig pa mkha' 'gro lnga bskor du grags pa'i rjes gnang zab mo zhu ba'i slad du/__me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__khyod ni mgon po spyan ras gzigs/__/kun la khyab pa'i thugs rje can/__/'gro ba ma lus sgrol mdzad pa/__/bdag sogs rnams la byin gyis rlobs/__/rgyud dag par bya ba'i slad du mdun gyi nam mkha' 'phags pa thugs rje chen po zhal bcu gcig pa la/__gzhan yang rtsa brgyud kyi bla ma yi dam sangs rgyas byang sems dpa' bo mkha' 'gro chos skyong srung ma thams cad kyis bskor ba sprin gyi phung po 'khrigs pa ltar bzhugs pa'i spyan sngar phyag 'tshal ba dang /__mchod pa 'bul ba dang /__skyabs su 'gro ba dang /__sdig pa bshags pa dang /__dge ba la rjes su yi rang ba dang /__byang chub mchog tu sems bskyed par bgyi'o snyam pa'i yid kyis 'di'i rjes zlos lan gsum mdzod/__/dkon mchog gsum la phyag 'tshal lo/__/dkon mchog gsum la mchod pa 'bul/__/dkon mchog gsum la bdag skyabs mchi/__/sdig pa thams cad so sor bshags/__/sogs/__de nas gnas khang 'di nyid kyang tha mal gyi gnas khang 'di lta bu ma yin par ye shes kyi rang snang las grub pa'i gru 'dzin ri bo'i pho brang dngos yin snyam pa dang /__bla ma yang 'phags pa thugs rje chen po bcu gcig zhal dngos yin snyam pa dang /__mdun gyi maN+Dal 'di nyid kyang bsgrubs zin pa ltar/__rin po che las grub pa'i gzhal med khang mtshan nyid thams cad yongs su rdzogs pa'i dbus su sna tshogs pad+ma 'dab ma bzhi pa'i sogs nas/__gar stabs su 'gying ba ste/__ye shes kyi mkha' 'gro ma rigs lnga'i rten dang brten par bcas pa'i dkyil 'khor dang /__de dag gi steng phyogs kyi nam mkhar jo bo thugs rje chen po zhal bcu gcig pa'i lha tshogs rnams kyang mngon sum lta bur bzhugs pa'i mos pa mdzad nas/__rjes gnang gi gzhi dgod pa'i slad du slob ma rnams lhar bskyed pa yin pas dmigs pa 'di bzhin du gnang bar zhu/__zhes brda sbyar la/__slob ma rnams bsang sbyang /__stong pa'i ngang las bcu gcig zhal gtso rkyang du sgrub thabs ltar bskyed/__de'i spyi bor oM dkar po/__mgrin par AHdmar po/__thugs kar hU~M sngon po/__slar yang slob dpon la gus 'dud drag po mdzad pas slob dpon gyi thugs ka nas 'od zer 'phros/__mdun bskyed kyi thugs rgyud bskul/__de dag gi thugs ka nas 'od zer bsam gyis mi khyab pa 'phros/__phyogs bcu'i rgyal ba sras dang bcas pa'i thugs kar phog pas thugs gnyis su med pa'i ye shes kyi ngo bo/__rnam pa 'phags mchog thugs rje chen po zhal bcu gcig pa'i lha tshogs nam mkha' gang bar spyan drangs te slob ma rnams kyi lus la sib sib thim pas rgyud byin gyis brlabs pa'i mos pa mdzod/__tad+ya thA/__oM d+ha ra d+ha sogs dang /__oM badz+ra A be sha ya aHAH__dzaHhU~M ba~M hoH__zhes yang yang brjod/__spos rol bya/__des rjes gnang gi gzhi dgod pa'i rim pa song nas/__dngos gzhi'i rjes su gnang ba la/__lha bsgom pa/__sngags bzla ba/__gzhan don bya ba'i rjes su gnang ba ste rnam pa gsum du yod pa las/__thog mar lha bsgom pa'i rjes gnang bum pa'i dbang bskur ba la 'od dpag med chu'i dbang gi slad du/__slob dpon gyis pad+ma mkha' 'gro ma'i ngo bo rnam par rgyal ma'i bum pa ye shes kyi bdud rtsis gang ba thogs te spyi bor bzhag cing dbang bskur ba'i mos pa mdzod/__dbang bskur rdo rje chen po ste/__/khams gsum kun gyis phyag byas pa/__/sangs rgyas kun gyi gsang gsum pa'i/__/gnas las byung ba sbyin par bya/__/pad+ma a b+hi Shiny+tsa hrIH__zhes dbang bskur zhing bkru ba dang /__btung du gzhug__/slar yang bum chu 'thor zhing /__ji ltar bltams pa sogs nas/__shri ye hU~M/__zhes gsung zhing bum pa'i chus dbang bskur bas lus thams cad gang /__sgo gsum gyi dri ma dag__/bde ba chen po'i ye shes nyams su myong /__chu'i lhag ma yar lud pa las spyi gtsug tu 'od dpag med kyis dbur brgyan cing /__mdun bskyed kyi dkyil 'khor gyi dbus na bzhugs pa'i lha mo dmar mo las/__lha mo gnyis pa re chad/__slob ma rnams kyi spyi bo nas zhugs/__snying ga'i dbus su thig le dmar po'i rnam par bzhugs pa'i mos pa mdzod/__/de ltar chu'i dbang bskur bas 'dod chags kyi dri ma sbyangs/__'du shes kyi phung po gnas gyur/__so sor rtog pa'i ye shes mngon du byas/__'od dpag med dang de'i rigs kyi dngos grub sgrub pa la dbang bar byas pa yin no/__/rnam par snang mdzad ming dbang gi slad du sangs rgyas mkha' 'gro ma'i ngo bo de bzhin gshegs pa'i mtshan gyis gang ba'i bum pa dpral bar bzhag ste dbang bskur ba'i mos pa mdzod/__/dbang bskur rdo rje sogs dang /__bud+d+ha a b+hi Shiny+tsa oM/__zhes brjod cing bum pa dpral bar bzhag__/gang du mngon par rdzogs par 'tshang rgya ba'i sangs rgyas kyi mtshan 'grub par gyur cig__/ces brjod la mtshan gyi shog dril lag tu byin/__de brtan par bya ba'i slad du bum pa'i chus kyang dbang bskur ba'i mos pa mdzod/__ji ltar bltams pa sogs nas/__shri ye hU~M/__zhes gsung zhing bum pa'i chus sogs nas/__chu'i lhag ma yar lud pa las dpral bar rnam par snang mdzad kyis dbur brgyan cing /__mdun bskyed shar gyi lha mo dkar mo las/__lha mo gnyis pa re chad/__slob ma rnams kyi dpral ba nas zhugs/__snying ga'i thig le dmar po'i mdun du thig le dkar po'i rnam par bzhugs pa'i mos pa mdzod/__de ltar ming gi dbang bskur bas gti mug gi dri ma sbyangs/__gzugs kyi phung po gnas gyur/__me long lta bu'i ye shes mngon du byas/__rnam snang dang de'i rigs kyi dngos grub sgrub pa la dbang bar byas pa yin no/__/rin chen 'byung ldan dbu rgyan gyi dbang gi slad du rin chen mkha' 'gro ma'i ngo bo rin po che'i dbu rgyan rna ltag g.yas su bzhag ste dbang bskur ba'i mos pa mdzod/__dbang bskur rdo rje sogs dang /__rat+na a b+hi Shiny+tsa trA~M/__brtan byed chu dbang sngar bzhin bskur la/__chu'i lhag ma yar lud pa las rna ltag g.yas su rin chen 'byung ldan gyis dbur brgyan cing /__mdun bskyed lho'i lha mo ser po las/__lha mo gnyis pa re chad/__slob ma rnams kyi rna ltag g.yas pa nas zhugs/__snying ga'i thig le dmar po'i g.yas su thig le ser po'i rnam par bzhugs pa'i mos pa mdzod/__/de ltar dbu rgyan gyi dbang bskur bas nga rgyal dang ser sna'i dri ma sbyangs/__tshor ba'i phung po gnas gyur/__mnyam pa nyid kyi ye shes mngon du byas/__rin chen 'byung ldan dang de'i rigs kyi dngos grub sgrub pa la dbang bar byas pa yin no/__/mi bskyod pa rdo rje'i dbang gi slad du rdo rje mkha' 'gro ma'i ngo bo rdo rje ltag par bzhag ste dbang bskur ba'i mos pa mdzod/__dbang bskur rdo rje sogs dang /__badz+ra a b+hi Shiny+tsa hU~M/__brtan byed chu dbang mthar/__chu'i lhag ma yar lud pa las ltag par mi bskyod pas dbur brgyan cing /__mdun bskyed nub kyi lha mo sngon mo las/__lha mo gnyis pa re chad/__slob ma rnams kyi ltag pa nas zhugs/__snying ga'i thig le dmar po'i rgyab tu thig le sngon po'i rnam par bzhugs pa'i mos pa mdzod/__/de ltar rdo rje'i dbang bskur bas zhe sdang gi dri ma sbyangs/__rnam par shes pa'i phung po gnas gyur/__chos dbyings ye shes mngon du byas/_mi bskyod pa dang de'i rigs kyi dngos grub sgrub pa la dbang bar byas pa yin no/__/don yod grub pa dril bu'i dbang gi slad du las kyi mkha' 'gro ma'i ngo bo dril bu rna ltag g.yon par bzhag ste dbang bskur ba'i mos pa mdzod/__dbang bskur rdo rje sogs dang /__karma a b+hi Shiny+tsa AH__brtan byed chu dbang gi mthar/__chu'i lhag ma yar lud pa las rna ltag g.yon par don yod grub pas dbur brgyan cing /__mdun bskyed byang gi lha mo ljang mo las/__lha mo gnyis pa re chad/__slob ma rnams kyi rna ltag g.yon pa nas zhugs/__snying ga'i thig le dmar po'i g.yon du thig le ljang gu'i rnam par bzhugs pa'i mos pa mdzod/__de ltar dril bu'i dbang bskur bas phrag dog gi dri ma sbyangs/__'du byed kyi phung po gnas gyur bya ba grub pa'i ye shes mngon du byas/__don yod grub pa dang /__de'i rigs kyi dngos grub sgrub pa la dbang bar byas pa yin no/__/de nas snying ga'i thig le rnams la yid zhugs pa bzhin cher gyis gtad de mnyam par bzhag pas/__thig le rnams 'od du zhu/__dbus kyi thig le dmar po la thim/__de 'od du zhu ba las zla ba'i dkyil 'khor gyi dbus su hrIHyig dkar po ring cha tsheg drag dang bcas pa/__de yongs su gyur pa las ye shes sems dpa' 'phags pa spyan ras gzigs sku mdog dkar po zhal gcig phyag gnyis/__g.yas mchog sbyin dang /__g.yon pad+ma bsnams pa/__dar dang rin po ches brgyan pa/__zhabs sems dpa'i skyil mo krung gis bzhugs pa/__tshon gang ba re'i sku can du lam ste gyur pa'i mos pa mdzod/__gnyis pa sngags kyi rjes gnang ni/__slob dpon dang slob ma rnams 'phags pa bcu gcig zhal du gsal bzhin pa'i thugs kar ye shes sems dpa'i thugs dbus su zla ba'i gdan la ting nge 'dzin sems dpa' hrIHdkar po'i mthar gzungs sngags kyi phreng bas bskor bar gsal btab nas slob dpon la sngags kyi bzlas lung zhu ba'i don du maN+Dal phul/__gsol ba 'debs pa 'di'i rjes zlos lan gsum mdzod/__bcom ldan thugs rje chen po yis/__/bdag la byin gyis brlab par mdzod/__/sngags kyi dngos grub stsal nas kyang /__/bdag la nye bar mdzad du gsol/__/zhes gsol ba btab pas slob dpon gyi thugs ka'i sngags phreng las sngags phreng gnyis pa byung /__zhal nas thon/__slob ma rnams kyi zhal du zhugs/__snying ga'i sngags phreng la thim pas byin gyis brlab par mos te gzungs sngags 'di'i rjes zlos lan gsum mdzod/__gzungs ring lan gsum/__slar yang slob dpon gyis 'phags pa thugs rje chen po'i gsung gi byin rlabs thams cad dbyangs gsal gyi yi ge'i rnam par spyan drangs/__me tog la thim pa slob ma rnams kyi spyi bor bzhag pas snying ga'i sngags phreng brtan cing nus ldan du byas pa'i mos pa mdzod/__bcom ldan 'di la stsal lags kyis/__/'di la nye bar mdzad du gsol/__/sngags kyi dngos grub thob pa dang /__/brtul zhugs brtan par mdzad du gsol/__ces brjod/__gsum pa gzhan don bya ba'i rjes gnang ni/__thugs rje chen po'i sku spyi bor gzhag cing sgrub thabs kyi glegs bam phyag tu gtad de slob dpon mdun bskyed dang bcas pas mgrin gcig tu gzhan don bya bar rjes su gnang ba'i mos pa mdzod/__deng nas bzung ste bu khyod kyis/__/'phags pa thugs rje chen po yi/__/dbang skur dam chos rgya cher shod/__gzhan don thams cad bsgrub par gyis/__/zhes brjod/__de ltar na bum pas dbang bskur bas lus thugs rje chen po'i skur bsgom pa la dbang /__sngags kyi rjes gnang gis ngag gzungs sngags zab mo bzla ba la dbang /__gzhan don gyis shig pa'i rjes gnang gis/__thugs rje chen po'i dam chos kyi sgo nas gzhan don mkha' khyab tu byed pa la dbang ba yin no/__/des rjes gnang gi dngos gzhi legs par grub nas/__mjug gi chos dam tshig khas blang ba sogs spyi ltar byas la/__dge ba'i rtsa ba byang chub tu bsngo'o/__/gsum pa ni/__slob dpon gyis mchod pa bsang sbyang byin gyis brlabs la/__mdun bskyed la mchod bstod dang /__oM pad+ma sa twa sogs yi ge brgya pa lan gsum gyi mthar nongs pa bzod par gsol/__badz+ra muHsa tshom bu'i ye shes pa gshegs/__dam tshig pa rten dang brten pa rang la thim par bsam/__rang thugs rje chen po zhal gcig phyag gnyis par gyur pa'i dpral bar oM dkar po sogs gnas gsum bsrung /__bsngo smon dang shis brjod kyi phreng bas mtha' brgyan par bya'o/__/de ltar bcu gcig zhal dpal mo lugs mkha' 'gro lnga bskor du grags pa'i rjes gnang gi cho ga 'di la/__yig cha gsar rnying cung zad mi mthun pa 'ga' zhig mjal na'ang /__gtso bor yig rnying gi dgongs don dang mi 'gal bar bla ma dam pa'i phyag gzhes kyis brgyan te shin tu gsal bar bkod pa'o/__/'phags mchog thugs rje'i chu gter bsrubs pa'i phul/__/rjes gnang gzhan la phan pa'i zla shel gyi/__/byin rlabs bdud rtsi'i zer brgyas sa gsum na/__/thar bde'i snang ba mchog tu sbyin gyur cig__/ces pa'ang shAkya'i dge sbyong 'jam dbyangs mkhyen brtse'i dbang po'am/__lhag pa'i lha 'di nyid kyi smin byed zab mos skal ba bzang por gyur pa'i ming gi cod paN thugs rje dge ba'i dbyangs zhes kyang bgyi ba'i rgyal khams kyi bya bral ma Ni pas sug bris su bgyis pa dge legs 'phel//__//sarba dA mang+ga laM b+ha ba tu//___//__!_