JKW-KABUM-09-TA-001-014

🚧 This website is under continued development. We appreciate your patience!

Previous Text Back to Volume PageLast text in section.

Wylie title
Location	mkhyen brtse'i bka' 'bum Volume 9, sde tshan 1, Text 14, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 9: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Longevity Rituals - tshe sgrub

1 Texts in this Section (sde tshan or chos tshan)

14 117-126	འཆི་མེད་རྡོ་རྗེ་ལྷ་མོའི་རྗེས་གནང་གི་ཆོ་ག་བདུད་རྩིའི་སྤྲིན་ཆར། 'chi med rdo rje lha mo'i rjes gnang gi cho ga bdud rtsi'i sprin char Longevity Rituals - tshe sgrub   ·   Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཆི་མེད་རྡོ་རྗེ་ལྷ་མོའི་རྗེས་གནང་གི་ཆོ་ག་བདུད་རྩིའི་སྤྲིན་ཆར།

༄༅། །འཆི་མེད་རྡོ་རྗེ་ལྷ་མོའི་རྗེས་གནང་གི་ཆོ་ག་བདུད་རྩིའི་སྤྲིན་ཆར་ཞེས་བྱ་བ་བཞུགས་སོ། །ན་མོ་གུ་རུ་བཛྲ་དེ་བྱཻ། འཆི་མེད་རྡོ་རྗེ་ལྷ་མོའི་རྗེས་གནང་གི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྟེགས་བུའི་དབུས་སུ་མཎྜ་ལར་རྡུལ་ཚོན་གྱིས་ཆོས་འབྱུང་གི་ནང་དུ་པདྨ་དཀར་པོ་འདབ་མ་བརྒྱད་པ་བྲི། དེའི་ལྟེ་བར་མེ་ཏོག་དཀར་པོའི་ཚོམ་བུའམ་ཚོན་ཕུང་དཀར་པོ་ཞིག་བཀོད་པ་མཉྫིའི་ཁར་བཞག་པའི་མདུན་དུ་འབུལ་གཏོར་དང་མཆོད་པ་བཤམ། རང་གི་མདུན་དུ་བུམ་པ་བཅུད་ལྡན་སོགས་ཉེར་མཁོའི་ཡོ་བྱད་རྣམས་འདུ་བྱ། ཐོག་མར་མཆོད་པ་རྣམས་སུམྦྷས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན་སོགས་ནས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་དང་། གྷཎྜེ་ར་ཎི་ཏ་ལན་གསུམ་བརྗོད་པས་བྱིན་དབབ། སྐྱབས་འགྲོ་ནས་བཟླས་པ་བསྡུ་བའི་བར་སྒྲུབ་པའི་ཐབས་རིན་ཆེན་འབྱུང་གནས་ལྟར་བྱ། སྤྲོ་ན། འཇམ་པའི་དབྱངས་དཀོན་མཆོག་ལྷུན་གྲུབ་ཀྱི་སྒྲུབ་ཐབས་ལྟར་ཉམས་སུ་བླངས་ཀྱང་ལེགས། དེ་ནས་མདུན་རྟེན་མཎྜལ་སུམྦྷས་བསང་། ཤཱུ་ནྱ་ཏས་སྦྱང་། སྟོང་པའི་ངང་ལས་མདུན་གྱི་ནམ་མཁར་རྃ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སོགས་ནས། དབུར་བརྒྱན་ཞེས་པའི་བར་གྱིས་མདུན་བསྐྱེད་གསལ་བཏབ། མཆོད་པ་བསང་སྦྱང་བྱིན་བརླབ། ཨོཾ་བྷ་ག་ཝ་ཏཱི་བཛྲ་དེ་བཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་ནས། ཤབྡའི་བར་དང་། གྷཎྜེ་ར་ཎི་ཏས་ཕྱི་མཆོད། ནང་མཆོད་བསང་སྦྱང་། སྟོང་པའི་ངང་ལས་ཡྃ་ལས་རླུང་དང་། རྃ་ལས་མེའི་དཀྱིལ་འཁོར་གྱི་སྟེང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ་རྣམས་བསྐོལ་ཞིང་འོད་དུ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོཿཧྲཱིཿཞེས་པས་བྱིན་གྱིས་བརླབས་ལ། ཨོཾ་བཛྲ་དེ་བཱི་པཉྩ་ཨ་མྲྀ་ཏ་ཨོཾ་ཨཱཿཧཱུྃ། ཞེས་འབུལ། བསྟོད་པས་བསྟོད། གཏོར་མ་ནང་མཆོད་ལྟར་བྱིན་གྱིས་བརླབས་ལ་འབུལ། མཆོད་བསྟོད་གསོལ་བ་གདབ། གཏོར་མ་གཉིས་པའམ། འདས་གཏོར་གྱི་ལྷག་མ་མཁའ་འགྲོ་སྤྱི་གཏོར་གྱི་ཆོ་གས་བསྔོ། མདུན་བསྐྱེད་ཀྱི་ཐུགས་རྒྱུད་བསྐུལ་བར་དམིགས་ཏེ་བཟླས་པ་ཅུང་ཟད་བྱ། བུམ་པ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ་མཚན་ཉིད་ཐམས་ཅད་ཡོངས་སུ་རྫོགས་པ་ཆུ་དང་བཅུད་ཐམས་ཅད་ཀྱིས་གང་བའི་ནང་དུ་ཟླ་བ་ལ་སྔགས་ཀྱི་ཡིག་འབྲུ་རྣམས་རང་སྒྲ་སྒྲོགས་བཞིན་དུ་གསལ་བ་ལས་ཡེ་ཤེས་ཀྱི་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་བཟླས་པ་ཇི་ལྟར་རིགས་པ་བྱ། མཐར་སྔགས་ཀྱི་ཆོ་གས་འོད་དུ་ཞུ་བ་ལས་ཆུ་བདུད་རྩིར་གྱུར་བར་བསམ་མོ། །གཉིས་པ་ནི། སློབ་མ་རྣམས་ཁྲུས་བྱས་མདུན་དུ་འཁོད་པ་ལ་མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་བཏབ་ལ། དེ་ལ་གནས་སྐབས་སུ་མཐོ་རིས་ཀྱི་ཡོན་ཏན་མཐའ་དག་གི་ཕྱི་མོ། །ཐུན་མོང་གི་དངོས་གྲུབ་ཀྱིས་ཕན་འདོགས་པའི་གཞི། མཐར་ཐུག་མཆོག་གི་དངོས་གྲུབ་ཀྱང་རྟེན་འདི་ཁོ་ན་ལ་རགས་ལས་པའི་ཕྱིར། སྤྱིར་ཛམྦུའི་གླིང་པ་ཁམས་དྲུག་ལྡན་གྱི་རྟེན། བྱེ་བྲག་ཏུ་དལ་འབྱོར་གྱི་ལུས། ཁྱད་པར་ཆོས་བཞིན་དུ་སྤྱོད་པ། དེ་ལས་ཀྱང་སྔགས་ཀྱི་དངོས་གྲུབ་མཆོག་དོན་དུ་གཉེར་བ་རྣམས་ཀྱི་འཚོ་བ་ནི་ཤིན་ཏུ་དོན་ཡོད་པ་དང་བཅས་པའི་ཕྱིར་ཡུན་རིང་དུ་འཚོ་བའི་ཐབས་ཚུལ་ཁོ་ན་ལྷུར་ལེན་པ་གལ་ཆེ། དེ་ལའང་འཇིག་རྟེན་ན་ལྷ་དང་དྲང་སྲོང་ཆེན་པོ་རྣམས་ཀྱིས་རིང་འཚོའི་ཐབས་ཚུལ་དུ་མ་ཞིག་བཤད་ཀྱང་། དེ་ཐམས་ཅད་ཀྱིས་ཕྱག་བྱས་པའི་དྲང་སྲོང་མཆོག་གཅིག་པུ་སྟོན་པ་བདེ་བར་གཤེགས་པས་མདོ་དང་། སྔགས་ཀྱི་ཐེག་པ་དག་ལས། ཚུལ་ཁྲིམས་ཀྱི་ཀུན་སྤྱོད་དང་། ཏིང་ངེ་འཛིན་གྱི་སྒོ་དང་། ཤེས་རབ་ཟབ་མོའི་རྒྱས་འདེབས་དང་། སྨན་དང་། སྔགས་དང་། ནོར་བུ་དང་། རྟེན་འབྲེལ་དང་། ནང་འབའ་ཞིག་ལ་གཞོལ་བའི་རྣལ་འབྱོར་ཟབ་པ་དང་། ཆེས་ཤིན་ཏུ་ཟབ་པའི་སྒོ་ནས་ཚེ་སྲིང་བ་དང་། བར་ཆད་སེལ་བ་དང་། འཆི་མེད་ཡེ་ཤེས་ཀྱི་སྐུ་སྒྲུབ་པའི་ཐབས་ཚུལ་བསམ་གྱིས་མི་ཁྱབ་པ་ཞིག་ཡིད་ཅན་མཐའ་དག་ལ་ཐུགས་བརྩེ་བ་ཁོ་ནས་བཀའ་སྩལ་པ་ཉིད་གཙོ་བོར་བཟུང་བར་རིགས་ཏེ། འཁྲུལ་པའི་རྒྱུ་སྤངས་པ་དང་། མ་འཁྲུལ་པའི་ཡེ་ཤེས་བརྙེས་པ་དང་། སྙིང་བརྩེ་བའི་ཐབས་ཡུན་རིང་དུ་གོམས་པའི་མཐུ་ལས་བྱུང་བའི་ཕྱིར་རོ། །དེ་ལྟ་བས་ན་ལེགས་པར་གསུངས་པའི་དམ་ཆོས་རྣམས་ཀྱི་སྙིང་པོར་གྱུར་པའང་རྡོ་རྗེ་ཐེག་པ་ཉིད་ཡིན་ལ། དེ་ཉིད་ཐུན་མོང་གི་ཚུལ་ལས་ཆེས་ཟབ་པའི་ཕྱིར། དབང་པོ་རྣོན་པོ་སྐལ་བ་དང་ལྡན་པ་རྣམས་ཀྱིས་གསང་སྔགས་ཀྱི་རྒྱུད་སྡེ་རིན་པོ་ཆེ་རྣམས་ནས་གསུངས་པའི་རིང་འཚོའི་སྒོ་དུ་མ་ལ་ནན་ཏན་དུ་བྱ་རིགས་པ་ལས། འདིར་རྒྱུད་སྡེ་ཐམས་ཅད་ཀྱི་མཐར་ཐུག་པ་རྣལ་འབྱོར་མའི་རྒྱུད་དཔལ་འཁོར་ལོ་སྡོམ་པ་ཨ་བྷི་དྷ་ན་ལས་འདི་ཉིད་ཀྱི་རིག་པ་གསུངས་པའི་མཇུག་ཏུ། འདི་ནི་ཁྲི་ཙམ་བཟླས་པས་ཀྱང་། །འཆི་བ་ཐམས་ཅད་འཚོ་བར་བྱེད། །དུས་མིན་འཆི་བ་ཞི་འགྱུར་ཞིང་། །འཆི་བ་ལས་ནི་ངེས་པར་སྤོང་། །ཞེས་རྒྱ་ཆེར་བསྔགས་པའི་རྗེས་སུ་འབྲངས་ཏེ་གྲུབ་པའི་དབང་ཕྱུག་ནཱ་རོ་ཏཱ་པས་ལེགས་པར་བཀྲལ་བའི་ཞལ་གྱི་བདུད་རྩི་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པའི་གདམས་པ་ཟབ་ཁྱད་ཅན། དུས་མ་ཡིན་པའི་འཆི་བ་ཟློག་པ་གཙོ་བོར་གྱུར་པའི་ལས་རབ་འབྱམས་འདོད་པ་བཞིན་སྩོལ་བའི་བཅོམ་ལྡན་འདས་མ་འཆི་མེད་རྡོ་རྗེ་ལྷ་མོའི་རྗེས་སུ་གནང་བ་བསྒྲུབ་པ་ལ་སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལའང་སྦྱོར་དངོས་རྗེས་གསུམ་གྱི། སྦྱོར་བའི་རིམ་པ་ལ་མཎྜལ་འབུལ་བ། གསོལ་བ་འདེབས་པ། རྒྱུད་དག་པར་བྱ་བ། ཐུན་མོང་མ་ཡིན་པའི་སྡོམ་པ་བཟུང་བ་རྣམས་སུ་ཡོད་པ་ལས། ཐོག་མར་བླ་མ་དང་འཆི་མེད་རྡོ་རྗེ་ལྷ་མོ་ཐ་མི་དད་པ་ལ་རྗེས་གནང་ཟབ་མོ་ཞུ་བའི་ཡོན་དུ་མཎྜལ་ཕུལ། མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། དོན་དམ་སྨྲ་བའི་སེང་གེ་རྣལ་འབྱོར་ཞེས་བྱ་བ། །ཉོན་མོངས་གཅོད་པའི་དོན་ལ་ཤིན་ཏུ་མཁས་གྱུར་པས། །སྲིད་པའི་ཉེས་བརྒྱ་སྐྱེད་རྩ་ཉོན་མོངས་ཆོམས་མཛོད་ལ། །རྣལ་འབྱོར་དོན་དམ་རྒྱལ་པོ་དེ་ཉིད་བདག་ལ་འགྲུབ་པར་མཛོད། །རྒྱུད་དག་པར་བྱ་བའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་འཆི་མེད་རྡོ་རྗེ་ལྷ་མོ་ལ་གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ། དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་མངོན་སུམ་ལྟ་བུར་བཞུགས་པའི་སྤྱན་སྔར་རང་གཞན་སེམས་ཅན་ཐམས་ཅད་ཀྱི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་སོགས། སླར་ཡང་རིགས་ལྔ་སྤྱི་དང་ཁྱད་པར་གྱིས་བསྡུས་པའི་དམ་ཚིག་དང་སྡོམ་པ་རྣམས་བཟུང་བར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། སྲས་བཅས་སངས་རྒྱས་ཐམས་ཅད་དང་སོགས། དེ་རྣམས་རྗེས་གནང་གི་སྔོན་འགྲོ་ཡིན། དངོས་གཞི་ལ་སྐུ་གསུང་ཐུགས་ཀྱི་རྗེས་གནང་གསུམ་ལས། དང་པོ་སྐུའི་རྗེས་གནང་གི་སླད་དུ་སློབ་དཔོན་གྱིས། ཨོཾ་ཤཱུ་ནྱ་ཏཱ་སོགས། ཞེས་བརྗོད་པས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་སོགས་ནས། མེ་འབར་བའི་དབུས་ན་བཞུགས་པ་ཞེས་པའི་བར་གྱིས་སློབ་མ་ལྷར་བསྐྱེད། །ཐུགས་ཀའི་དབུས་སུ་ཟླ་བ་དམར་སྐྱ་ལ་ཧཱུྃ་དཀར་པོ། དེ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཐམས་ཅད་འཆི་མེད་རྡོ་རྗེ་ལྷ་མོའི་རྣམ་པར་སྤྱན་དྲངས། ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། སྔགས་ཀྱི་མཐར་ཨོཾ་བཛྲ་ཨཱ་བེ་ཤ་ཡ་ཨཿཨཱཿ ཛཿཧཱུྃ་བྃ་ཧོཿཞེས་བརྗོད་ཅིང་སྤོས་རོལ་བྱ། སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་དེ་བཞིན་གཤེགས་པའི་དཀྱིལ་འཁོར་ནམ་མཁའ་གང་བ་ཨོཾ་བཛྲ་ས་མཱ་ཛཿ ནམ་མཁར་བཞུགས་པའི་དབང་གི་ལྷ་ལ་གསོལ་བ་འདེབས་པ་འདིའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས་སློབ་དཔོན་དང་དབང་གི་ལྷ་ལྷན་ཅིག་པས་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ཏེ་དབང་བསྐུར་བའི་མོས་པ་མཛོད། ཇི་ལྟར་བལྟམས་པ་སོགས་ནས། ཤྲི་ཡེ་ཧཱུྃ་ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་དེ་བཞིན་གཤེགས་པ་རིགས་ལྔ་ཡུམ་དང་བཅས་པས་དབུར་བརྒྱན། ཛཿཧཱུྃ་བྃ་ཧོཿ ནམ་མཁར་བཞུགས་པའི་དབང་གི་ལྷ་རྣམས་ཀྱང་ཁྱེད་རང་རྣམས་ལ་ཐིམ་པར་གྱུར་པའི་མོས་པ་མཛོད། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་བརྗོད་ཅིང་མེ་ཏོག་གཏོར། གསུང་གི་རྗེས་གནང་གི་སླད་དུ། སློབ་དཔོན་གྱི་ཐུགས་ཀར་ཟླ་བ་ལ་གནས་པའི་ཧཱུྃ་དཀར་པོའི་མཐར་སྔགས་ཀྱི་ཕྲེང་བས་བསྐོར་བ་ལས། སྔགས་ཕྲེང་གཉིས་པ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་བ་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ས་བོན་གྱི་མཐར་འཁོད་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། ཨོཾ་ཨ་མྲྀ་ཏ་སོགས། དེ་ལྟར་བཟླས་པས་དང་པོས་རྒྱུད་བྱིན་གྱིས་བརླབས། གཉིས་པས་དབྱེར་མེད་དུ་བྱས། གསུམ་པས་བརྟན་པར་བྱས་པར་མོས་ཏེ་སློབ་དཔོན་ལ་མེ་ཏོག་འཐོར་བ་དང་བཅས་པས་འདིའི་རྗེས་ཟློས་ལན་གསུམ་མཛོད། བཅོམ་ལྡན་བདག་ལ་སོགས། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ཏེ་སྤྱི་བོར་བཞག་པས་སྙིང་གའི་སྔགས་ཕྲེང་བརྟན་ཅིང་ནུས་ལྡན་དུ་གྱུར་པའི་མོས་པ་མཛོད། བཅོམ་ལྡན་འདི་ལ་སོགས། ཐུགས་ཀྱི་རྗེས་གནང་གི་སླད་དུ། ཁྱེད་རང་རྣམས་ལྷ་སྐུ་སྣང་ལ་རང་བཞིན་མེད་པར་གསལ་བའི་སྤྱི་གཙུག་ཏུ་ཧྃ་དཀར་པོ་མགོ་བོ་ཐུར་དུ་བསྟན་པ། སྤྱི་བོའི་སྟེང་གི་ནམ་མཁར་ཟླ་བའི་དཀྱིལ་འཁོར་གྱི་སྟེང་དུ་ངོ་བོ་ལྷ་ལ་རྣམ་པ་ཁ་ཊྭཱཾ་ག་དཀར་པོ་དབྱུག་པ་སྦོམ་སའི་དབུས་སུ་ཧཱུྃ་དཀར་པོས་མཚན་པར་གསལ་བཏབ་ནས། དེ་ཉིད་ལ་གུས་འདུད་དྲག་པོ་མཛད་པས་ཧཱུྃ་ལས་འོད་ཟེར་འཕྲོས། དེ་བཞིན་གཤེགས་པ་སྲས་དང་བཅས་པ་ཐམས་ཅད་དང་། ཡུལ་ཉི་ཤུ་རྩ་བཞིའི་དཔའ་བོ་དང་རྣལ་འབྱོར་མ་ཐམས་ཅད་ཀྱི་ཐུགས་ཀ་ནས་ཚེའི་བཅུད་དང་དྭངས་མ་ཐམས་ཅད་འཆི་མེད་བདུད་རྩིའི་ཆུ་རྒྱུན་གྱི་རྣམ་པར་སྤྱན་དྲང་ཧཱུྃ་ལ་ཐིམ། དེ་ལས་བྱུང་བའི་བདུད་རྩིས་ཁ་ཊྭཱཾ་གའི་ནང་གང་། དེ་གཉིས་ལས་བྱུང་བའི་ཆུ་རྒྱུན་གྱིས་སྤྱི་གཙུག་གི་ཧཾ་ལ་རེག །དེ་ལས་བདུད་རྩིའི་རྒྱུན་བབས་ཏེ་སྙིང་གའི་སྔགས་ཕྲེང་ལ་ཐིམ། དེ་ལས་བྱུང་བའི་བདུད་རྩིས་སྤྱི་གཙུག་ནས་རྐང་མཐིལ་གྱི་བར་མེར་གྱིས་ཁེངས་པས་འཆི་མེད་ཚེའི་དངོས་གྲུབ་ཐོབ། བདེ་བ་ཆེན་པོའི་ཡེ་ཤེས་རྒྱུད་ལ་སྐྱེས་པའི་མོས་པ་དང་བཅས་ཏེ་ཅུང་ཟད་རེ་མཉམ་པར་འཇོག་མཛོད། དེས་རྗེས་གནང་གི་དངོས་གཞི་གྲུབ་ནས། མཇུག་དམ་ཚིག་ཁས་བླང་བ་སོགས་སྤྱི་ལྟར་བྱས་ལ་སློབ་མ་རྣམས་རང་གནས་སུ་བཏང་ངོ་། །གསུམ་པ་རྗེས་ནི། སློབ་དཔོན་གྱིས་མདུན་བསྐྱེད་ལ་མཆོད་ཅིང་བསྟོད། ཧེ་རུ་ཀའི་ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། བཛྲ་མུཿས་ཡེ་ཤེས་པ་གཤེགས་དམ་ཚིག་པ་རང་ལ་བསྟིམ། བསྔོ་སྨོན་ཤིས་བརྗོད་རྒྱས་པར་བྱའོ། །ཞེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཡིག་ཆ་སྔ་ཕྱི་རྣམས་སྦྱར་ཏེ་ཤིན་ཏུ་གསལ་བར་བྲིས་པའི་དགེ་བས་འགྲོ་རྣམས་འཆི་མེད་ཡེ་ཤེས་ཀྱི་སྐུ་མྱུར་དུ་འགྲུབ་པར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།།

[edit]

'chi med rdo rje lha mo'i rjes gnang gi cho ga bdud rtsi'i sprin char/ @#/_/'chi med rdo rje lha mo'i rjes gnang gi cho ga bdud rtsi'i sprin char zhes bya ba bzhugs so/__/na mo gu ru badz+ra de byai/__'chi med rdo rje lha mo'i rjes gnang gi cho ga la gsum/__sbyor ba/__dngos gzhi/__rjes so/__/dang po ni/__stegs bu'i dbus su maN+Da lar rdul tshon gyis chos 'byung gi nang du pad+ma dkar po 'dab ma brgyad pa bri/__de'i lte bar me tog dkar po'i tshom bu'am tshon phung dkar po zhig bkod pa many+dzi'i khar bzhag pa'i mdun du 'bul gtor dang mchod pa bsham/__rang gi mdun du bum pa bcud ldan sogs nyer mkho'i yo byad rnams 'du bya/__thog mar mchod pa rnams sum+b+has bsang /__swa b+hA bas sbyang /__stong pa'i ngang las a las ye shes kyi ka pA la yangs shing rgya che ba rnams kyi nang du/__hU~M zhu ba las byung ba'i lha rdzas las grub pa'i mchod yon sogs nas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas/__shab+da'i bar dang /__g+haN+De ra Ni ta lan gsum brjod pas byin dbab/__skyabs 'gro nas bzlas pa bsdu ba'i bar sgrub pa'i thabs rin chen 'byung gnas ltar bya/__spro na/__'jam pa'i dbyangs dkon mchog lhun grub kyi sgrub thabs ltar nyams su blangs kyang legs/__de nas mdun rten maN+Dal sum+b+has bsang /__shU n+ya tas sbyang /__stong pa'i ngang las mdun gyi nam mkhar ra~M las byung ba'i nyi ma'i dkyil 'khor gyi steng du hU~M las sogs nas/__dbur brgyan zhes pa'i bar gyis mdun bskyed gsal btab/__mchod pa bsang sbyang byin brlab/__oM b+ha ga wa tI badz+ra de bI sa pa ri wA ra ar+g+haM pra tIts+tsha swA hA nas/__shab+da'i bar dang /__g+haN+De ra Ni tas phyi mchod/__nang mchod bsang sbyang /__stong pa'i ngang las ya~M las rlung dang /__ra~M las me'i dkyil 'khor gyi steng du a las ye shes kyi ka pA la yangs shing rgya che ba'i nang du sha lnga bdud rtsi lnga rnams bskol zhing 'od du zhu ba las byung ba'i ye shes kyi bdud rtsi'i rgya mtsho chen por gyur/__oM AHhU~M ha hoHhrIHzhes pas byin gyis brlabs la/__oM badz+ra de bI pany+tsa a mr-i ta oM AHhU~M/__zhes 'bul/__bstod pas bstod/__gtor ma nang mchod ltar byin gyis brlabs la 'bul/__mchod bstod gsol ba gdab/__gtor ma gnyis pa'am/__'das gtor gyi lhag ma mkha' 'gro spyi gtor gyi cho gas bsngo/__mdun bskyed kyi thugs rgyud bskul bar dmigs te bzlas pa cung zad bya/__bum pa bsang sbyang /__stong pa'i ngang las pa~M las pad+ma dang /__a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba mtshan nyid thams cad yongs su rdzogs pa chu dang bcud thams cad kyis gang ba'i nang du zla ba la sngags kyi yig 'bru rnams rang sgra sgrogs bzhin du gsal ba las ye shes kyi bdud rtsi'i rgyun babs pas bum pa gang bar bsams la bzlas pa ji ltar rigs pa bya/__mthar sngags kyi cho gas 'od du zhu ba las chu bdud rtsir gyur bar bsam mo/__/gnyis pa ni/__slob ma rnams khrus byas mdun du 'khod pa la me tog bkye bsdu grub rjes/__slob dpon gyis sems bskyed gsal btab la/__de la gnas skabs su mtho ris kyi yon tan mtha' dag gi phyi mo/__/thun mong gi dngos grub kyis phan 'dogs pa'i gzhi/__mthar thug mchog gi dngos grub kyang rten 'di kho na la rags las pa'i phyir/__spyir dzam+bu'i gling pa khams drug ldan gyi rten/__bye brag tu dal 'byor gyi lus/__khyad par chos bzhin du spyod pa/__de las kyang sngags kyi dngos grub mchog don du gnyer ba rnams kyi 'tsho ba ni shin tu don yod pa dang bcas pa'i phyir yun ring du 'tsho ba'i thabs tshul kho na lhur len pa gal che/__de la'ang 'jig rten na lha dang drang srong chen po rnams kyis ring 'tsho'i thabs tshul du ma zhig bshad kyang /__de thams cad kyis phyag byas pa'i drang srong mchog gcig pu ston pa bde bar gshegs pas mdo dang /__sngags kyi theg pa dag las/__tshul khrims kyi kun spyod dang /__ting nge 'dzin gyi sgo dang /__shes rab zab mo'i rgyas 'debs dang /__sman dang /__sngags dang /__nor bu dang /__rten 'brel dang /__nang 'ba' zhig la gzhol ba'i rnal 'byor zab pa dang /__ches shin tu zab pa'i sgo nas tshe sring ba dang /__bar chad sel ba dang /__'chi med ye shes kyi sku sgrub pa'i thabs tshul bsam gyis mi khyab pa zhig yid can mtha' dag la thugs brtse ba kho nas bka' stsal pa nyid gtso bor bzung bar rigs te/__'khrul pa'i rgyu spangs pa dang /__ma 'khrul pa'i ye shes brnyes pa dang /__snying brtse ba'i thabs yun ring du goms pa'i mthu las byung ba'i phyir ro/__/de lta bas na legs par gsungs pa'i dam chos rnams kyi snying por gyur pa'ang rdo rje theg pa nyid yin la/__de nyid thun mong gi tshul las ches zab pa'i phyir/__dbang po rnon po skal ba dang ldan pa rnams kyis gsang sngags kyi rgyud sde rin po che rnams nas gsungs pa'i ring 'tsho'i sgo du ma la nan tan du bya rigs pa las/__'dir rgyud sde thams cad kyi mthar thug pa rnal 'byor ma'i rgyud dpal 'khor lo sdom pa a b+hi d+ha na las 'di nyid kyi rig pa gsungs pa'i mjug tu/__'di ni khri tsam bzlas pas kyang /__/'chi ba thams cad 'tsho bar byed/__/dus min 'chi ba zhi 'gyur zhing /__/'chi ba las ni nges par spong /__/zhes rgya cher bsngags pa'i rjes su 'brangs te grub pa'i dbang phyug nA ro tA pas legs par bkral ba'i zhal gyi bdud rtsi rje btsun sa skya pa yab sras la bka' babs pa'i gdams pa zab khyad can/__dus ma yin pa'i 'chi ba zlog pa gtso bor gyur pa'i las rab 'byams 'dod pa bzhin stsol ba'i bcom ldan 'das ma 'chi med rdo rje lha mo'i rjes su gnang ba bsgrub pa la slob dpon gyi bya ba rnams grub nas/__khyed rang rnams kyi ngo skal du gyur pa la'ang sbyor dngos rjes gsum gyi/__sbyor ba'i rim pa la maN+Dal 'bul ba/__gsol ba 'debs pa/__rgyud dag par bya ba/__thun mong ma yin pa'i sdom pa bzung ba rnams su yod pa las/__thog mar bla ma dang 'chi med rdo rje lha mo tha mi dad pa la rjes gnang zab mo zhu ba'i yon du maN+Dal phul/__me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__don dam smra ba'i seng ge rnal 'byor zhes bya ba/__/nyon mongs gcod pa'i don la shin tu mkhas gyur pas/__/srid pa'i nyes brgya skyed rtsa nyon mongs choms mdzod la/__/rnal 'byor don dam rgyal po de nyid bdag la 'grub par mdzod/__/rgyud dag par bya ba'i slad du mdun gyi nam mkhar bla ma dang gnyis su med pa'i 'chi med rdo rje lha mo la gzhan yang phyogs bcu'i sangs rgyas dang byang chub sems dpa'/__dpa' bo dang rnal 'byor ma'i tshogs bsam gyis mi khyab pas bskor ba mngon sum lta bur bzhugs pa'i spyan sngar rang gzhan sems can thams cad kyi tshe 'khor ba thog ma med pa nas bsags pa'i sdig pa bshags pa la sogs pa yan lag bdun pa bgyi snyam pas 'di'i rjes zlos lan gsum mdzod/__dkon mchog gsum la sogs/__slar yang rigs lnga spyi dang khyad par gyis bsdus pa'i dam tshig dang sdom pa rnams bzung bar bgyi'o snyam pas 'di'i rjes zlos lan gsum mdzod/__sras bcas sangs rgyas thams cad dang sogs/__de rnams rjes gnang gi sngon 'gro yin/__dngos gzhi la sku gsung thugs kyi rjes gnang gsum las/__dang po sku'i rjes gnang gi slad du slob dpon gyis/__oM shU n+ya tA sogs/__zhes brjod pas snang srid 'khor 'das kyis bsdus pa'i chos thams cad mi dmigs te stong pa nyid du gyur/__stong pa'i ngang las sogs nas/__me 'bar ba'i dbus na bzhugs pa zhes pa'i bar gyis slob ma lhar bskyed/__/thugs ka'i dbus su zla ba dmar skya la hU~M dkar po/__de las 'od zer 'phros/__phyogs bcu'i sangs rgyas dang byang chub sems dpa' dpa' bo dang rnal 'byor ma thams cad 'chi med rdo rje lha mo'i rnam par spyan drangs/__khyed rang rnams la sib sib thim pas rgyud byin gyis brlabs pa'i mos pa mdzod/__sngags kyi mthar oM badz+ra A be sha ya aHAH__dzaHhU~M ba~M hoHzhes brjod cing spos rol bya/__slar yang slob dpon gyi thugs ka nas 'od zer 'phros pas dbang gi lha de bzhin gshegs pa'i dkyil 'khor nam mkha' gang ba oM badz+ra sa mA dzaH__nam mkhar bzhugs pa'i dbang gi lha la gsol ba 'debs pa 'di'i rjes zlos mdzod/__de bzhin gshegs pa thams cad kyis bdag la mngon par dbang bskur ba stsal du gsol/__zhes gsol ba btab pas slob dpon dang dbang gi lha lhan cig pas bum pa ye shes kyi bdud rtsis gang ba re thogs te dbang bskur ba'i mos pa mdzod/__ji ltar bltams pa sogs nas/__shri ye hU~M zhes gsung zhing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las de bzhin gshegs pa rigs lnga yum dang bcas pas dbur brgyan/__dzaHhU~M ba~M hoH__nam mkhar bzhugs pa'i dbang gi lha rnams kyang khyed rang rnams la thim par gyur pa'i mos pa mdzod/__oM su pra tiSh+Tha badz+rA ya swA hA/__zhes brjod cing me tog gtor/__gsung gi rjes gnang gi slad du/__slob dpon gyi thugs kar zla ba la gnas pa'i hU~M dkar po'i mthar sngags kyi phreng bas bskor ba las/__sngags phreng gnyis pa mar me gcig las gnyis mched kyi tshul du byung ba zhal nas thon/__khyed rang rnams kyi zhal du zhugs/__thugs ka'i sa bon gyi mthar 'khod pa'i mos pa dang bcas te sngags 'di'i rjes zlos lan gsum mdzod/__oM a mr-i ta sogs/__de ltar bzlas pas dang pos rgyud byin gyis brlabs/__gnyis pas dbyer med du byas/__gsum pas brtan par byas par mos te slob dpon la me tog 'thor ba dang bcas pas 'di'i rjes zlos lan gsum mdzod/__bcom ldan bdag la sogs/__slob dpon gyis kyang me tog gi phreng ba sngags su byas te spyi bor bzhag pas snying ga'i sngags phreng brtan cing nus ldan du gyur pa'i mos pa mdzod/__bcom ldan 'di la sogs/__thugs kyi rjes gnang gi slad du/__khyed rang rnams lha sku snang la rang bzhin med par gsal ba'i spyi gtsug tu ha~M dkar po mgo bo thur du bstan pa/__spyi bo'i steng gi nam mkhar zla ba'i dkyil 'khor gyi steng du ngo bo lha la rnam pa kha T+wAM ga dkar po dbyug pa sbom sa'i dbus su hU~M dkar pos mtshan par gsal btab nas/__de nyid la gus 'dud drag po mdzad pas hU~M las 'od zer 'phros/__de bzhin gshegs pa sras dang bcas pa thams cad dang /__yul nyi shu rtsa bzhi'i dpa' bo dang rnal 'byor ma thams cad kyi thugs ka nas tshe'i bcud dang dwangs ma thams cad 'chi med bdud rtsi'i chu rgyun gyi rnam par spyan drang hU~M la thim/__de las byung ba'i bdud rtsis kha T+wAM ga'i nang gang /__de gnyis las byung ba'i chu rgyun gyis spyi gtsug gi haM la reg__/de las bdud rtsi'i rgyun babs te snying ga'i sngags phreng la thim/__de las byung ba'i bdud rtsis spyi gtsug nas rkang mthil gyi bar mer gyis khengs pas 'chi med tshe'i dngos grub thob/__bde ba chen po'i ye shes rgyud la skyes pa'i mos pa dang bcas te cung zad re mnyam par 'jog mdzod/__des rjes gnang gi dngos gzhi grub nas/__mjug dam tshig khas blang ba sogs spyi ltar byas la slob ma rnams rang gnas su btang ngo /__/gsum pa rjes ni/__slob dpon gyis mdun bskyed la mchod cing bstod/__he ru ka'i yi ge brgya pa lan gsum dang /__ma 'byor pa dang sogs kyis nongs pa bzod par gsol/__badz+ra muHsa ye shes pa gshegs dam tshig pa rang la bstim/__bsngo smon shis brjod rgyas par bya'o/__/zhes pa'ang bya bral ba 'jam dbyangs mkhyen brtse'i dbang pos yig cha snga phyi rnams sbyar te shin tu gsal bar bris pa'i dge bas 'gro rnams 'chi med ye shes kyi sku myur du 'grub par gyur cig__/sarba dA shre yo b+ha ba tu//