JKW-KABUM-03-GA-001-023

🚧 This website is under continued development. We appreciate your patience!

Previous Text Back to Volume PageNext Text

མདོ་དང་སྒྱུ་འཕྲུལ་གྱི་ཟིན་བྲིས།

Wylie title	mdo dang sgyu 'phrul gyi zin bris
Location	mkhyen brtse'i bka' 'bum Volume 3, sde tshan 1, Text 23, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mdo dang sgyu 'phrul gyi zin bris. In 'jam dbyangs mkhyen brtse'i dbang po'i bka' 'bum, Vol. 3: 362-. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

23 410-415	མདོ་དང་སྒྱུ་འཕྲུལ་གྱི་ཟིན་བྲིས། mdo dang sgyu 'phrul gyi zin bris Notes - zin bris	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

མདོ་ཕྱོགས་ཀྱི་མཆོད་པ། ཕར་ཕྱིན་བཟང་སྤྱོད་ཡན་ལག་བདུན་པ་སོགས་སུ་བཞི་རེ་དང་། སྤྱོད་འཇུག་མཆོད་པའི་ལེའུར། བདག་པོས་མ་བཟུང་བ་དང་། རང་གི་ལུས་དབུལ་བ་དང་། བློས་སྤྲུལ་པའི་མཆོད་པ་སྟེ་གསུམ། སྔགས་ལ་ཐུན་མོང་དུ་ཆུ་གཉིས་སམ་བཞི་དང་ཉེར་སྤྱོད་ལྔ། བྱ་སྤྱོད་ཐུན་མོང་འོད་ཟེར་དྲི་མེད་ཀྱི་མཆོད་པ་ཉེར་གསུམ། རྣལ་འབྱོར་རྒྱུད་ལ་ཅོད་པན་སོགས་མཆོད་རྫས་ཉེར་ལྔ། སྒེག་སོགས་ལྷ་མོ་བརྒྱད། མཆོད་ཡོན་ཨརྒྷཾ་པདྱཱཾ། གོང་གི་སྟེང་པཉྩ་མ་ནཾ་པྲོཀྵ་ནམ་གཉིས་བསྣན་པ། སོགས་ཉེར་གཅིག །རྡོ་རྗེ་ལྷ་མོ་བཅུ་དྲུག་ཐུན་མོང་བ་བླ་མེད་ཕ་རྒྱུད་ལ། ལཱ་ལི་ཏ་བཛྲའི་བཞེད་པ་ལྟར་རྡུལ་གཡབ་སོགས་མཆོད་པ་ཉི་ཤུ་པར་གྲགས་པ། མ་རྒྱུད་ལ་ཡོངས་སུ་གྲགས་པའི་མཆོད་པ་ཁྱད་པར་གྱི་རིག་མ་བཅུ་དྲུག །བརྟག་གཉིས་ལས་གསུངས་པའི་གསང་བ་དེ་ཁོ་ན་ཉིད་ཀྱི་ལྷ་མོ་བརྒྱད་ཀྱིས་མཆོད་པ། དཀར་མོ་རི་དྭགས་མཚན་མ་འཛིན། །སོགས་དང་། གཉིས་མེད་ཀྱི་རྒྱུད་དུས་འཁོར་དུ་མཆོད་པ་རྣམ་པ་བཅུ་གསུམ། སྔ་འགྱུར་ལ་རྒྱ་གར་གྱི་སློབ་དཔོན་མ་ཏིས་མཛད་པ་བཛྲ་ལཱ་སྱེ་སོགས་བཅུ་གཉིས། མངའ་བདག་ཆོས་ཀྱི་དབང་ཕྱུག་གི་བླ་མ་གསང་འདུས་ཀྱི་གར་དག་སྣང་བ་བཀའ་དྲིན་ཅན་མའི་གར་སོགས་སུ་གྲགས་པ་མཐའ་ཡས་སོ། །ཏིང་འཛིན་རྒྱལ་པོར། སྤོས་མཆོག་ཕྲེང་བ་མེ་ཏོག་བདུག་པ་དང་། །རོལ་མོ་སིལ་སྙན་མང་བ་རབ་ཐོགས་ལ། །རྒྱལ་བའི་མཆོད་རྟེན་དག་ལ་མཆོད་པར་བགྱི། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་སོ། །བློ་གྲོས་བཟང་པོས་ཞུས་པ་ལས། དུས་སུ་སྦྱིན་དང་འགྱོད་པ་མེད་པ་དང་། །ཡིད་འོང་སྦྱིན་དང་རྣམ་སྨིན་མི་རེ་བ། །དཔའ་བོ་རྣམས་ཀྱིས་ལས་འདི་བྱས་པ་ན། །རྟག་ཏུ་ལོངས་སྤྱོད་ཆེན་པོ་ཐོབ་པ་ཡིན། །ཞེས་སོ། །ཆོས་ཡང་དག་པར་སྡུད་པ་ལས། བྱང་ཆུབ་སེམས་དཔའི་གཏོང་བ་ནི་རྣམ་པ་གསུམ་སྟེ། གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བའོ། །ཞེས་སོ། །ཕར་ཕྱིན་བསྡུས་པ་ལས། ཚེ་དང་སྤོབས་པ་སངས་རྒྱས་སྟོབས་ལ་སོགས། །འགྲོ་བ་ཀུན་ལ་བདག་གིས་བསྒྲུབ་བྱ་ཞིང་། །ཟང་ཟིང་སྦྱིན་པས་བསྡུས་པའི་སེམས་ཅན་དག །བདག་གི་དམ་ཆོས་སྣོད་དུ་གྱུར་ཏོ་ཞེས། །དེ་ལྟར་བདག་གིས་ཁ་ཟས་སྐོམ་རྣམས་བཏང་། །རང་གི་ཕུན་ཚོགས་བསྒྲུབ་པར་བྱ་ཕྱིར་མིན། །ཞེས་དང་། སྦྱིན་པའི་འབྲས་བུ་མང་པོ་ཐོབ་གྱུར་ནས། །སྲིད་པའི་མུན་ནག་འཐོམ་པའི་སྐྱེ་བོ་ལ། །དམ་པའི་ཆོས་ཀྱི་སྦྱིན་པ་རྒྱ་ཆེན་གྱིས། །ཞེས་སོ། །དཀོན་མཆོག་ཏ་ལ་ལས། དེ་དག་བསྡུ་བའི་དངོས་པོ་བཞི་བརྩོན་ཅིང་། །གང་དག་བསྡུ་བའི་དངོས་པོ་བཞིར་བརྩོན་པ། །དེ་དག་འགྲོ་བའི་དོན་ནི་མཐའ་ཡས་བྱེད། །ཅེས་དང་། མི་འཇིགས་སྦྱིན་པ་སེམས་ཅན་གང་བསྐྱབས་དང་། །སྲོག་བསད་པ་ལས་ལྡོག་པར་བྱས་པ་དང་། །འཇིགས་པ་སྐྱབས་ཚོལ་རྣམས་ལ་བསྐྱབས་བྱས་པས། །མི་འཇིགས་སྦྱིན་པའི་འོད་ཟེར་དེས་གྲུབ་བོ། །ཞེས་སོ། །རྡོ་རྗེ་རྩེ་མོར། སྙན་ཅིང་བདེན་པར་སྨྲ་བ་ཡིས། །ཞེ་སྡང་འཇོམས་བྱེད་བྱམས་པ་བསྒོམ། །ཞེས་སོ། །རྡོ་རྗེ་གུར་ལས། གར་དང་གླུ་ལ་རབ་ཞེན་པའི། །སེམས་ཅན་རྣམས་ནི་བསྡུ་བའི་ཕྱིར། །སངས་རྒྱས་གར་མཁན་རོལ་པར་མཛད། །ཅེས་དང་། སངས་རྒྱས་འབྲས་བུ་འདོད་པ་ཡིས། །བདེ་བ་རངས་ཤིང་གར་དང་ནི། །གླུ་དང་རོལ་མོའི་སྒྲ་བྱེད་པ། །དྲི་དང་ཕྲེང་བ་བྱུགས་པ་ཡིས། །རིག་པའི་རྒྱལ་པོ་རབ་ཏུ་འགྲུབ། །ཅེས་སོ། །མདོ་སྡེ་རྒྱན་ལས། རྣམ་དག་སྨིན་ཅིང་ཐོས་སོགས་དྲན་མི་བརྗེད། །དེ་བཞིན་ལེགས་བཤད་ཉེས་པར་སྨྲས་པ་དག །རབ་ཤེས་བློ་ཆེན་སྐྱེ་བར་རུང་བ་ཉིད། །ཤིན་ཏུ་ཡིད་གཞུང་ཡོངས་སུ་སྨིན་པའི་མཚན། །ཞེས་སོ། །ཇི་སྐད་དུ། ཕན་ཡོན་མཐོང་བའི་ཤེས་རབ་ཅན། །རྩེ་གཅིག་བསམ་པའི་བསམ་གཏན་ཅན། །བརྟན་ཅིང་སྤྲོ་བའི་བརྩོན་འགྲུས་ཅན། །དཀའ་སྤྱད་མི་སྐྱོ་བཟོད་བསྲན་ཅན། །ངང་རིང་ཚིག་འཇམ་ཚུལ་ཁྲིམས་ཅན། །གཡོ་མེད་གཏོང་ཕོད་སྦྱིན་པར་ལྡན། །ལྷ་དང་བཟོ་བོར་དད་གུས་པ། །རིམ་གྱིས་དགའ་བ་བསྒོམ་པའོ། །ཞེས་སོ། །སྨན་དང་དོན་འགྲུབ་པའི་ཆ་ཚད་ཡིད་བཞིན་ནོར་བུར། ཀུན་མཁྱེན་ལྷག་བསམ་རབ་དཀར་ལུས། །ཁྲེལ་ཡོད་ངོ་ཚའི་གོས་རྒྱན་ལྡན། །དད་དང་གཏོང་ཕོད་ཚོགས་མཆོད་ཀྱིས། །ལྷ་དང་བཟོ་བོ་དབྱེར་མེད་མཆོད། །ཅེས་སོ། །ཡོན་ཏན་འབྱུང་གནས་ལས། །དད་འདུན་བརྩོན་འགྲུས་སྙིང་རྗེར་ལྡན། །དགེ་ལ་མངོན་སྤྲོ་གཏོང་ཕོད་ཅན། །བརྟན་ཅིང་ངང་རིང་གཡོ་སྒྱུ་མེད། །ལྷ་དང་བཟོ་བོ་ལ་གུས་པའོ། །ཞེས་དང་། སྡིག་ལ་མི་འཛེམ་དད་འདུན་ཆུང་། །ཚེ་འདིའི་འདོད་ཡོན་གྲགས་འདོད་བློ། །ངང་ཆུང་ཐེག་ཆུང་འགྱོད་སེམས་ཅན། །མི་བསྒྲུབ་བསྒྲུབ་འདོད་འཕྲོར་འཇོག་པ། །ཕན་ཡོན་དག་ལ་ཐེ་ཚོམ་དང་། །ལྷ་དང་བཟོ་བོ་སྨོད་པའོ། །ཞེས་སོ། །ཕལ་པོ་ཆེ་ལས། རིག་པས་བརྩོན་པས་དཀོན་མཆོག་རྣམ་གསུམ་ལ། །སྦྱོར་བ་སྐྱོ་བ་མེད་པས་མཆོད་བྱས་ན། །དེ་དག་བདུད་བཞིའི་ལམ་ལས་རབ་འདས་ཏེ། །བྱང་ཆུབ་བླ་མེད་མྱུར་དུ་རེག་པར་འགྱུར། །ཞེས་སོ། །ཆོས་ཐམས་ཅད་ཀྱི་རྒྱལ་པོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་ནི་འགའ་ཡོད་མིན། །ཞེས་དང་། སོར་ཕྲེང་ལ་ཕན་པའི་མདོ་ལས། ཆོས་དང་དགེ་འདུན་གཉིས་ནི་ཐབས་ཀྱི་སྐྱབས་ལགས་ཏེ། །དེ་བཞིན་གཤེགས་པ་སྐྱབས་མེད་སྐྱོབས་དང་དོན་དམ་སྐྱབས། །དེ་བཞིན་གཤེགས་པ་ཀུན་གྱི་སྐྱབས་ལགས་ཏེ། །དེ་ཡི་སླད་དུ་དེ་བཞིན་གཤེགས་ལ་སྐྱབས་སུ་མཆི། །ཞེས་སོ། །བུ་མོ་ཟླ་བ་མཆོག་ལུང་བསྟན་པའི་མདོ་ལས། དེ་དག་བདག་གིས་སྒྲ་ཐོས་སངས་རྒྱས་ནི། །འགྲོ་བ་སྒྲོལ་ཕྱིར་ཟང་ཟིང་མེད་སྤྱད་ཅིང་། །འཇིག་རྟེན་བརྩེ་ཕྱིར་ཐུགས་རྗེ་བསྐྱེད་ནས་ནི། སངས་རྒྱས་བསོད་སྙོམས་སླད་དུ་འཇིག་རྟེན་རྒྱན། །གལ་ཏེ་རྒྱལ་བ་དེ་དག་མཆོད་འདོད་ན། །སངས་རྒྱས་ཉིད་ཕྱིར་ཁྱོད་ཀྱིས་སྨོན་ལམ་ཐོབ། །བྱང་ཆུབ་སེམས་བསྐྱེད་བརྟན་གྱུར་གང་ཡིན་པ། །དེ་ལས་ལྷག་མཆོད་སྲིད་པ་གསུམ་ན་མེད། །ཅེས་སྒྲུབ་པའི་བཀུར་སྟི་ནི་ཤིན་ཏུ་མཆོག་སྟེ་བདག་ཉིད་རྫོགས་སངས་རྒྱས་ནས་མཁའ་ཁྱབ་ཀྱི་འགྲོ་བ་སྒྲོལ་བར་བྱང་ཆུབ་ཀྱི་སེམས་བསྐྱེད་ཅིང་སྨོན་ལམ་ནན་ཏན་དུ་བྱ་བ་ལ་ནི་ཕན་ཡོན་གཞལ་དུ་མེད་པའོ། །འོན་ཀྱང་འཇིག་རྟེན་ལ་ཐུགས་བརྩེ་བས་དེ་དག་བསོད་ནམས་གསོག་པའི་སླད་དུ་བསོད་སྙོམས་སོགས་བཞེས་པའི་ཚུལ་བསྟན་པ་ཡིན་ཕྱིར་ཟང་ཟིང་གི་མཆོད་པ་སྐུ་གསུང་ཐུགས་རྟེན་བཞེངས་པ། དེ་དག་ལ་བཀུར་སྟི་བྱས་པས་ཚོགས་དཔག་ཏུ་མེད་པ་འདུམས་ལ། ཁྱད་པར་ཉན་རང་གི་ཞི་བདེའི་བསམ་པ་དང་འཇིག་རྟེན་རྒྱུར་དམིགས་པ་སྤངས་ཏེ། འགྲོ་བ་ཀུན་གྱི་དོན་དུ་བདག་ཉིད་རྫོགས་པའི་སངས་རྒྱས་ཐོབ་སྟེ་ཐམས་ཅད་སྒྲོལ་བའི་སེམས་བསྐྱེད་རླབས་པོ་ཆེའི་ཐབས་མཁས་དང་འབྲེལ་ན་བསོད་ནམས་ཁྱད་པར་དུ་འཕགས་པ་ཡིན་ནོ། ། ༈

[edit]

mdo dang sgyu 'phrul gyi zin bris/__ mdo phyogs kyi mchod pa/__phar phyin bzang spyod yan lag bdun pa sogs su bzhi re dang /__spyod 'jug mchod pa'i le'ur/__bdag pos ma bzung ba dang /__rang gi lus dbul ba dang /__blos sprul pa'i mchod pa ste gsum/__sngags la thun mong du chu gnyis sam bzhi dang nyer spyod lnga/__bya spyod thun mong 'od zer dri med kyi mchod pa nyer gsum/__rnal 'byor rgyud la cod pan sogs mchod rdzas nyer lnga/__sgeg sogs lha mo brgyad/__mchod yon ar+g+haM pad+yAM/__gong gi steng pany+tsa ma naM prok+Sha nam gnyis bsnan pa/__sogs nyer gcig__/rdo rje lha mo bcu drug thun mong ba bla med pha rgyud la/__lA li ta badz+ra'i bzhed pa ltar rdul g.yab sogs mchod pa nyi shu par grags pa/__ma rgyud la yongs su grags pa'i mchod pa khyad par gyi rig ma bcu drug__/brtag gnyis las gsungs pa'i gsang ba de kho na nyid kyi lha mo brgyad kyis mchod pa/__dkar mo ri dwags mtshan ma 'dzin/__/sogs dang /__gnyis med kyi rgyud dus 'khor du mchod pa rnam pa bcu gsum/__snga 'gyur la rgya gar gyi slob dpon ma tis mdzad pa badz+ra lA s+ye sogs bcu gnyis/__mnga' bdag chos kyi dbang phyug gi bla ma gsang 'dus kyi gar dag snang ba bka' drin can ma'i gar sogs su grags pa mtha' yas so/__/ting 'dzin rgyal por/__spos mchog phreng ba me tog bdug pa dang /__/rol mo sil snyan mang ba rab thogs la/__/rgyal ba'i mchod rten dag la mchod par bgyi/__/ring por mi thogs ting 'dzin mchog 'di thob/__/ces so/__/blo gros bzang pos zhus pa las/__dus su sbyin dang 'gyod pa med pa dang /__/yid 'ong sbyin dang rnam smin mi re ba/__/dpa' bo rnams kyis las 'di byas pa na/__/rtag tu longs spyod chen po thob pa yin/__/zhes so/__/chos yang dag par sdud pa las/__byang chub sems dpa'i gtong ba ni rnam pa gsum ste/__gtong ba dang /__gtong ba chen po dang /__shin tu gtong ba'o/__/zhes so/__/phar phyin bsdus pa las/__tshe dang spobs pa sangs rgyas stobs la sogs/__/'gro ba kun la bdag gis bsgrub bya zhing /__/zang zing sbyin pas bsdus pa'i sems can dag__/bdag gi dam chos snod du gyur to zhes/__/de ltar bdag gis kha zas skom rnams btang /__/rang gi phun tshogs bsgrub par bya phyir min/__/zhes dang /__sbyin pa'i 'bras bu mang po thob gyur nas/__/srid pa'i mun nag 'thom pa'i skye bo la/__/dam pa'i chos kyi sbyin pa rgya chen gyis/__/zhes so/__/dkon mchog ta la las/__de dag bsdu ba'i dngos po bzhi brtson cing /__/gang dag bsdu ba'i dngos po bzhir brtson pa/__/de dag 'gro ba'i don ni mtha' yas byed/__/ces dang /__mi 'jigs sbyin pa sems can gang bskyabs dang /__/srog bsad pa las ldog par byas pa dang /__/'jigs pa skyabs tshol rnams la bskyabs byas pas/__/mi 'jigs sbyin pa'i 'od zer des grub bo/__/zhes so/__/rdo rje rtse mor/__snyan cing bden par smra ba yis/__/zhe sdang 'joms byed byams pa bsgom/__/zhes so/__/rdo rje gur las/__gar dang glu la rab zhen pa'i/__/sems can rnams ni bsdu ba'i phyir/__/sangs rgyas gar mkhan rol par mdzad/__/ces dang /__sangs rgyas 'bras bu 'dod pa yis/__/bde ba rangs shing gar dang ni/__/glu dang rol mo'i sgra byed pa/__/dri dang phreng ba byugs pa yis/__/rig pa'i rgyal po rab tu 'grub/__/ces so/__/mdo sde rgyan las/__rnam dag smin cing thos sogs dran mi brjed/__/de bzhin legs bshad nyes par smras pa dag__/rab shes blo chen skye bar rung ba nyid/__/shin tu yid gzhung yongs su smin pa'i mtshan/__/zhes so/__/ji skad du/__phan yon mthong ba'i shes rab can/__/rtse gcig bsam pa'i bsam gtan can/__/brtan cing spro ba'i brtson 'grus can/__/dka' spyad mi skyo bzod bsran can/__/ngang ring tshig 'jam tshul khrims can/__/g.yo med gtong phod sbyin par ldan/__/lha dang bzo bor dad gus pa/__/rim gyis dga' ba bsgom pa'o/__/zhes so/__/sman dang don 'grub pa'i cha tshad yid bzhin nor bur/__kun mkhyen lhag bsam rab dkar lus/__/khrel yod ngo tsha'i gos rgyan ldan/__/dad dang gtong phod tshogs mchod kyis/__/lha dang bzo bo dbyer med mchod/__/ces so/__/yon tan 'byung gnas las/_/dad 'dun brtson 'grus snying rjer ldan/__/dge la mngon spro gtong phod can/__/brtan cing ngang ring g.yo sgyu med/__/lha dang bzo bo la gus pa'o/__/zhes dang /__sdig la mi 'dzem dad 'dun chung /__/tshe 'di'i 'dod yon grags 'dod blo/__/ngang chung theg chung 'gyod sems can/__/mi bsgrub bsgrub 'dod 'phror 'jog pa/__/phan yon dag la the tshom dang /__/lha dang bzo bo smod pa'o/__/zhes so/__/phal po che las/__rig pas brtson pas dkon mchog rnam gsum la/__/sbyor ba skyo ba med pas mchod byas na/__/de dag bdud bzhi'i lam las rab 'das te/__/byang chub bla med myur du reg par 'gyur/__/zhes so/__/chos thams cad kyi rgyal po las/__lha dang bcas pa'i 'jig rten na/__/dkon mchog gsum po ma gtogs pa/__/yon gyi gnas ni 'ga' yod min/__/zhes dang /__sor phreng la phan pa'i mdo las/__chos dang dge 'dun gnyis ni thabs kyi skyabs lags te/__/de bzhin gshegs pa skyabs med skyobs dang don dam skyabs/__/de bzhin gshegs pa kun gyi skyabs lags te/__/de yi slad du de bzhin gshegs la skyabs su mchi/__/zhes so/__/bu mo zla ba mchog lung bstan pa'i mdo las/__de dag bdag gis sgra thos sangs rgyas ni/__/'gro ba sgrol phyir zang zing med spyad cing /__/'jig rten brtse phyir thugs rje bskyed nas ni/__sangs rgyas bsod snyoms slad du 'jig rten rgyan/__/gal te rgyal ba de dag mchod 'dod na/__/sangs rgyas nyid phyir khyod kyis smon lam thob/__/byang chub sems bskyed brtan gyur gang yin pa/__/de las lhag mchod srid pa gsum na med/__/ces sgrub pa'i bkur sti ni shin tu mchog ste bdag nyid rdzogs sangs rgyas nas mkha' khyab kyi 'gro ba sgrol bar byang chub kyi sems bskyed cing smon lam nan tan du bya ba la ni phan yon gzhal du med pa'o/__/'on kyang 'jig rten la thugs brtse bas de dag bsod nams gsog pa'i slad du bsod snyoms sogs bzhes pa'i tshul bstan pa yin phyir zang zing gi mchod pa sku gsung thugs rten bzhengs pa/__de dag la bkur sti byas pas tshogs dpag tu med pa 'dums la/__khyad par nyan rang gi zhi bde'i bsam pa dang 'jig rten rgyur dmigs pa spangs te/__'gro ba kun gyi don du bdag nyid rdzogs pa'i sangs rgyas thob ste thams cad sgrol ba'i sems bskyed rlabs po che'i thabs mkhas dang 'brel na bsod nams khyad par du 'phags pa yin no/___/__!