JKW-KABAB-20-WA-032

🚧 This website is under continued development. We appreciate your patience!

Previous Text Back to Volume PageNext Text

བདེན་བཞི་དང་རྟེན་འབྲེལ་གྱི་རྣམ་གཞག་ཚིག་གི་ས་བོན།

Wylie title	bden bzhi dang rten 'brel gyi rnam gzhag tshig gi sa bon
Location	mkhyen brtse'i bka' babs Volume 20, Text 32, Pages 507-530 (Folios 1a to 12b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bden bzhi dang rten 'brel gyi rnam gzhag tshig gi sa bon. In Rdzong sar 'jam dbyangs mkhyen brtse'i dbang po'i bka' babs, Vol. 20: 507-530. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Detailed Classification - rnam bzhag
Karchag page	JKW-KABAB-Volume-20-WA-Karchag

Tibetan Text

Wylie

[edit]

༄༅། །བདེན་བཞི་དང་རྟེན་འབྲེལ་གྱི་རྣམ་གཞག་ཚིག་གི་ས་བོན་ཞེས་བྱ་བ་བཞུགས་སོ། །༄༅། །ཀུན་འབྱུང་སྡུག་བསྔལ་རྒྱུ་འབྲས་ཀུན། །ལམ་བདེན་བདུད་རྩིས་སྤངས་པ་ལས། །འགོགས་པ་འཆི་མེད་གྲུབ་པའི་དབྱིད། །སྟོན་པ་མཆོག་དེས་དགེ་ལེགས་མཛོད། །འདི་ལ་གསུམ་སྟེ། བདེན་བཞི་དང་རྟེན་འབྲེལ་གྱི་རྣམ་གཞག །འཆི་འཕོ་ཇི་ལྟར་བྱེད་པའི་རིམ་པའོ། །དང་པོ་ལའང༌། གྲངས་ངེས། གོ་རིམ། ངོ་བོའི་ཁྱད་པར། རྒྱུད་གང་ལ་ཡོད་མེད། རྣམ་པ་སྒྲུབ་ཚུལ། སྒྲ་དོན། དགོས་པའོ། །དང་པོ་ནི། ཐར་འདོད་ཀྱི་སྐྱེས་བུས་གཏན་ལ་དབབ་བྱ་དང༌། འཇུག་ལྡོག་གི་གཙོ་བོ་ལ་བདེན་པ་བཞིར་གྲངས་ངེས་ཏེ། འཁོར་བར་འཇུག་པའི་རྒྱུ་ཀུན་འབྱུང༌། འབྲས་བུ་སྡུག་བདེན། ལྡོག་པའི་རྒྱུ་ལམ་བདེན་དང༌། བྲལ་འབྲས་འགོག་བདེན་གཉིས་སུ་ངེས་པའི་ཕྱིར། གཉིས་པ་ནི། བཅོམ་ལྡན་འདས་ཀྱིས་མདོ་སྡེ་དུ་མར་བདེན་བཞི་སྟོན་པའི་གོ་རིམ་གཉིས་སུ་གསུངས་ཏེ། དེ་ཡང་རྒྱུ་འབྲས་དོན་གྱི་རིམ་པའི་དབང་དུ་བྱས་ན། དང་པོར་ཀུན་འབྱུང༌། དེ་ནས་ལམ། སྡུག་བསྔལ། འགོག་བདེན་བསྟན་ལ། མངོན་རྟོགས་སྐྱེ་བའི་རིམ་པའི་དབང་དུ་བྱས་ན། སྡུག་ཀུན་འགོགས་ལམ་གྱི་བདེན་པ་བཞི་རིམ་ཅན་དུ་བསྟན་པའི་ཕྱིར། སྐབས་འདིར་ཕྱི་མའི་དབང་དུ་བྱས་ཏེ་བཤད་ན། རིམ་པ་དེ་ལྟར་བསྟན་པ་ལ་དགོས་པ་ཡོད་དེ། བདེན་བཞིའི་བླང་དོར་ལ་འཇུག་པའི་ཚེ། ཐོག་མར་རང་གཞན་རྣམས་སྐྱེ་རྒ་ན་འཆི་སོགས་འཁོར་བའི་སྡུག་བསྔལ་གྱིས་གཟིར་ཚུལ་ཤེས་པས་དེ་སྤང་འདོད་ཀྱི་བློ་བསྐྱེད་དགོས་པའི་ཕྱིར་སྡུག་བདེན་དུས་དང་པོར་བསྟན། དེ་ནས་དེ་གང་ལས་བྱུང་ན་ཆགས་སོགས་ཉོན་མོངས་ཀྱི་ལས་ཀྱི་ཀུན་འབྱུང་ལས་བྱུང་བར་ཤེས་ནས་དེ་སྤང་འདོད་བསྐྱེད་དགོས་པས་ཀུན་འབྱུང༌། དེ་རྗེས་སྡུག་ཀུན་གཉིས་སྤངས་པའི་འགོག་བདེན་ཐར་པ་ལ་ཐོབ་འདོད་ཀྱི་བློ་བསྐྱེད་དགོས་པས་འགོགས་བདེན། དེ་ནས་ཐར་པ་དེ་ཐོབ་པའི་ཐབས་བདག་མེད་མངོན་སུམ་དུ་རྟོགས་པའི་ཤེས་རབ་སོགས་ལམ་བདེན་རང་རྒྱུད་ལ་བསྟེན་དགོས་པས་ལམ་བདེན་དུས་བཞི་པར་བསྟན་པ་སྟེ། དེ་ཡང་དཔེར་ན། དང་པོ་རང་ཅག་ལྟ་བུ་ནད་ཀྱིས་གདུངས་པའི་སྡུག་བསྔལ་དེ་ཤེས་དགོས། དེ་ཤེས་ན་དེའི་རྒྱུ་སྤང་འདོད་སྐྱེ་ལ། དེ་སྐྱེས་ན་ནད་ཀྱི་སྡུག་བསྔལ་དེ་དང་བྲལ་བའི་བདེ་པ་ཐོབ་འདོད་སྐྱེ་ཞིང༌། དེའི་ཆེད་དུ་སྨན་བསྟེན་པ་ལ་འཇུག་པ་བཞིན་ཡིན་པའི་ཕྱིར་ཏེ། རྗེ་བཙུན་བྱམས་པས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་གསུངས་པའི་ཕྱིར་རོ། །རྒྱུ་འབྲས་དོན་གྱི་རིམ་པའི་དབང་དུ་བྱས་ན། ཉོན་མོངས་་ཕྱོགས་ཀྱིས་ཀུན་འབྱུང་ལས་སྡུག་བདེན་འབྱུང་ནི། རྣམ་བྱང་གི་ཕྱོགས་ཀྱི་ལམ་བདེན་ལས་འགོགས་བདེན་ཐོབ་པར་འགྱུར་རོ། །གསུམ་པ་ནི། མཚན་གཞི་ལ་མི་མཐུན་པ་ཆེར་མེད་ཀྱང༌། མཚན་ཉིད་བཞེད་ཚུལ་མི་འདྲ་བ་མང་ནའང༌། འདིར་གོ་བ་གཙོ་བོར་བྱས་ན། རང་གི་རྒྱུར་གྱུར་པའི་ཀུན་འབྱུང་བདེན་པས་ལག་རྗེས་བཞག་པའི་ཉེར་ལེན་གྱི་ཕུང་པོ་དེ་སྡུག་བདེན་གྱི་མཚན་ཉིད། དེ་ལ་ངོ་བོའི་སྒོ་ནས་དབྱེ་ན། ལུས་ལ་ཚོར་བ་དྲག་པོས་གཟིར་བའི་གནད་གཅོད་ཀྱི་སྡུག་བསྔལ་ལྟ་བུ་སྡུག་བསྔལ་གྱི་སྡུག་བསྔལ། ཟས་བཟང་པོའི་རོལ་སྲེད་ནས་ཚོར་བ་ཉམས་སུ་བདེ་བ་ལྟ་བུ་འགྱུར་བའི་སྡུག་བསྔལ། ལས་ཉོན་གྱི་ལག་རྗེས་བཞག་པའི་ཕུང་པོ་ལྔ་ལྟ་བུ་ཁྱབ་པ་འདུ་བྱེད་ཀྱི་སྡུག་བསྔལ་གསུམ་དང༌། གཞན་ཡང་འདོད་ཁམས་ཀྱི་གནས་འདི་ལྟ་བུ་དང་མ་དག་པའི་སྣོད་ཀྱི་འཇིག་རྟེན་དང༌། རང་ཅག་ལྟ་བུའི་སོ་སྐྱེས་མ་དག་པའི་བཅུད་ཀྱི་སེམས་ཅན་གཉིས། གཞན་ཡང་དམྱལ་བའི་ལྕགས་བསྲེགས་ཀྱིས་གཞི་ལྟ་བུ་༢། ཉེར་༡ལེན་གྱི་ཕུང་པོ་ལྔ་ལྟ་༢བུ། དེར་གྱུར་པའི་རྣམ་སྨིན་གྱི་འབྲས་བུ་༡དང༌། བདག་པོའི་འབྲས་༢བུ་༦། ཡང་མྱོང་ཚུལ་གྱིས་དབྱེ་ན། སྐྱེ་རྒ་ན་འཆིའི་སྡུག་བསྔལ་དང༌། དགྲ་སྡང་བ་དང་འཕྲད་ཀྱིས་དོགས་པའི། གཉེན་སྡུག་པ་དང་བྲལ་གྱིས་དོགས་པའི། འདོད་པ་བཙལ་ཀྱང་མི་རྙེད་པའི། གནས་ངན་ལེན་གྱི་སྡུག་བསྔལ་དང་བརྒྱད་ཡོད། རང་འབྲུས་སྡུག་བསྔལ་བདེན་པ་སྐྱེད་བྱེད་ཀྱི་རིགས་སུ་གནས་པའི་ཉེར་ལེན་གྱི་ཕུང་པོ་དེ་ཀུན་འབྱུང་བདེན་པའི་མཚན་ཉིད། དབྱེ་ན་ཉོན་མོངས་དང༌། ལས་དང༌། དེ་ལས་གཞན་པའི་ཀུན་འབྱུང་གསུམ། དང་པོ་ནི། དེར་གྱུར་པའི་རྩ་ཉོན་དྲུག་འདོད་ཁྲོ་ང་རྒྱལ་མ་རིག་ཐེ་ཚོམ་ལྟ་བ་དང༌། ཉེ་ཉོན་ཉི་ཤུའོ། །གཉིས་པ་ནི། འདོད་པའི་བདེ་འགྲོར་འཕེན་བྱེད་སྲོག་གཅོད་སྤངས་པའི་ལས་དང༌། སྦྱིན་པ་བྱིན་པའི་ཟག་བཅས་ཀྱི་ལས་ལྟ་བུ། དེར་གྱུར་པའི་བསོད་ནམས་ཀྱི། ངན་འགྲོར་འཕེན་བྱེད། །སྲོག་གཅོད་དང་མ་བྱིན་ལེན་ལྟ་བུ་བསོད་ནམས་མ་ཡིན་པའི། གཟུགས་དང་གཟུགས་མེད་ཀྱི་ལྷར་སྐྱེ་བ་འཕེན་བྱེད་ཀྱི་ལས་བསམ་གཏན་བཞི་དང་གཟུགས་མེད་བཞི་བསྒོམ་པ་ལྟ་བུ་མི་གཡོ་བའི་ལས་ཏེ་གསུམ་མོ། །གསུམ་པ་ནི། ཉོན་མོངས་དང་ལས་ཀྱི་ཀུན་འབྱུང་མཚུངས་ལྡན་དུ་གྱུར་པའི་གཙོ་སེམས་ལྟ་བུའོ། །ཡང་ལས་ཀྱི་ཀུན་འབྱུང་ལ་དབྱེ་ན། དེར་གྱུར་པའི་སྒོ་གསུམ་གྱི་ལས་དང༌། ལུང་མ་བསྟན་གྱི་ལས་རྣམས་སུ་ཡོད། རང་ཐོབ་བྱེད་ཀྱི་ཐབས་སུ་གྱུར་པའི་ལམ་བདེན་གྱི་བྲལ་བའི་འབྲས་བུར་གྱུར་པའི་སོ་སོར་བརྟགས་འགོག་འགོག་བདེན་གྱི་མཚན་ཉིད་དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། སོ་སོར་བརྟགས་མིན་གྱི་འགོག་པའམ། བརྡར་བརྟགས་པའི་འགོག་པ། དོན་དམ་པའི་འགོག་པ། དེ་བཞིན་དུ་རྒྱན་བཅས་རྒྱན་མེད། ལྷག་བཅས་ལྷག་མེད། ཡོངས་སུ་རྫོགས་པ། ཡོངས་སུ་མ་རྫོགས་པའི་འགོག་པ་རྣམས་སུ་ཡོད། དང་པོ་ནི། སྦྱོར་ལམ་རྩེ་མོ་པའི་རྒྱུད་ཀྱི་ཁོང་ཁྲོས་དགེ་རྩ་གཅོད་པ་སྤངས་པའི་ཆ་དང༌། སྦྱོར་ལམ་བཟོད་པ་ནས་ངན་འགྲོར་སྐྱེ་བ་སྤངས་པའི་ཆ་དང༌། སོ་སྐྱེའི་རྒྱུད་ཀྱི་འདོད་པའི་ཉོན་མོངས་མངོན་གྱུར་པ་ལ་རེ་ཞིག་ཆགས་པ་དང་བྲལ་བའི་ཆ་དང༌། དམན་ལམ་སྔོན་དུ་མ་སོང་བའི་ཐེག་ཆེན་མཐོང་ལམ་བར་ཆད་མེད་ལམ་པའི་རྒྱུད་ཀྱི་བདེན་འཛིན་ཀུན་བརྟགས་འགོག་པའི་ཆ་ལྟ་བུའོ། །གཉིས་པ་དང་འགོག་བདེན་དོན་གཅིག །གསུམ་པ་ནི། མངོན་ཤེས་དྲུག་ཐོབ་པའི་དགྲ་བཅོམ་གྱི་རྒྱུད་ཀྱི་འགོག་བདེན་ལྟ་བུ། བཞི་པ་ནི། མངོན་ཤེས་མ་ཐོབ་པའི་གང་ཟག་གི་རྒྱུད་ཀྱི་འགོག་བདེན་ལྟ་བུ། ལྔ་པ་དང་དྲུག་པ་ནི་ཉེར་ལེན་གྱི་ཕུང་པོ་དང་བཅས་མ་བཅས་སམ། ཐལ་འགྱུར་བ་ལྟར་ན་བདེན་སྣང་གི་ལྷག་མ་དང་བཅས་མ་བཅས་ཀྱི་མྱང་འདས་གཉིས། བདུན་པ་ནི་སློབ་པ་དང༌། བརྒྱད་པ་མི་སློབ་པའི་རྒྱུད་ཀྱི་འགོག་བདེན་ནོ། །རང་གི་བྲལ་འབྲས་སུ་ཕྱུར་པའི་འགོག་བདེན་གྱི་བྲལ་རྒྱུ་བྱེད་པའི་རིགས་སུ་གནས་པའི་འཕགས་རྒྱུད་ཀྱི་མཁྱེན་པ་ལམ་བདེན་གྱི་མཚན་ཉིད། དེ་ལ་དངོས་བརྟགས་མ་ཕྱེ་བར་དབྱེ་ན། ཚོགས་ལམ་སོགས་ལྔ། ངོ་བོའི་སྒོ་ནས་ཐེག་གསུམ་འཕགས་རྒྱུད་ཀྱི་ལམ་བདེན་གསུམ་དུ་དབྱེའོ། །འགོག་ལམ་གཉིས་ཇི་ལྟར་ཐོབ་ཚུལ་ནི། རང་གི་ངོ་སྐལ་གྱི་སྤང་བྱ་ཀུན་བརྟགས་དང་ལྷན་སྐྱེས་གང་དངོས་སུ་སྤོང་བའི་གཉེན་པོ་བྱེད་པའི་འཕགས་པའི་ཡེ་ཤེས་ཀུན་གྱིས་ཀྱང་རང་གིས་དངོས་སུ་འཐོབ་པར་འགྱུར་བའི་འགོག་བདེན་རྣམས་ཀྱི་བྲལ་རྒྱུ་བྱས་ནས། ནམ་ཡེ་ཤེས་དེ་དག་གིས་རང་རང་གིས་སྤང་བྱ་དེ་རྣམས་དངོས་སུ་སྤངས་པ་དེའི་ཚེ། སྤང་བྱ་དེ་ཤེས་རྒྱུད་ཀྱི་སྟེང་དུ་སླར་མི་སྐྱེ་བའི་ཚུལ་གྱིས་སྤངས་པའི་ཚེ་ཐོབ་པར་འགྱུར་བས། དེ་ལ་ནི་འགོག་བདེན་ཞེས་བྱ་ཞིང༌། དེ་དང་མཉམ་པའི་རྣམ་གྲོལ་རྣམས་ཀྱང་འགོག་བདེན་གྱི་བྲལ་རྒྱུ་བྱེད་པའི་རིགས་སུ་གནས་པའི་ལམ་བདེན་དུ་འཇོག་པ་ཡིན་ནོ། །བཞི་པ་ནི། སྡུག་ཀུན་གཉིས་སོ་སྐྱེའི་རྒྱུད་ལ་ཡོད་པ་གཙོ་ཆེ་ཞིང༌། འགོག་ལམ་གཉིས་འཕགས་རྒྱུད་ཁོ་ན་ལ་ཡོད། མ་དག་པའི་ཞིང་སྡུག་བདེན་ཡིན་ཀྱང་དག་པའི་ཞིང་མིན་པར་གསུངས་པས། བདེ་བ་ཅན་དང་དེའི་སོ་སྐྱེ་རྣམས་ནི་སྡུག་བདེན་མིན་ལ། དེ་ལས་གཞན་པའི་སོ་སྐྱེ་རྣམས་དང༌། དེའི་ཉེར་ལེན་ཕུང་པོ་དང་དེ་དག་གི་རྒྱུད་ཀྱི་ལས་ཉོན་རྣམས་ནི་སྡུག་ཀུན་ཅི་རིགས་སུ་ངེས། ཐེག་དམན་འཕགས་པའི་རྒྱུད་ལ་ཉེར་ལེན་གྱི་ཕུང་པོ་ཡོད་པས། སྡུག་བདེན་དང་ལས་ཀྱི་ཀུན་འབྱུང་གཉིས་ཀ་ཡོད་ཀྱང༌། ཐེག་ཆེན་འཕགས་རྒྱུད་ལ་སྡུག་ཀུན་གཉིས་ཀ་མེད་པས་དེའི་རྒྱུད་ཀྱི་ལས་དང་ཉོན་མོངས་རྣམས་དང་ཀུན་འབྱུང་མིན་ནོ། །འདུ་བྱེད་ཀྱི་སྡུག་བསྔལ་ཁམས་གསུམ་ཀར་ཡོད། གཞན་གཉིས་འདོད་ཁམས་མ་གཏོགས་མེད་དོ། །ལྔ་པ་ནི། བདེན་བཞིའི་རྣམ་པ་མི་རྟག་ལ་སོགས་བཅུ་དྲུག་ཡོད་པ་ལས། སྡུག་བསྔལ་གྱི་བདེན་པའི་རྣམ་པ་མི་རྟག་སྡུག་བསྔལ་སྟོང་པ་བདག་མེད་བཞི་སྟེ། ཉེར་ལེན་གྱི་ཕུང་པོ་ཆོས་ཅན། མི་རྟག་པའི་རྣམ་པ་ཡིན་ཏེ། རེས་འགའ་སྐྱེ་བའི་ཕྱིར། སྡུག་བསྔལ་བ་ཡིན་ཏེ། ལས་ཉོན་གྱི་གཞན་དབང་ཅན་ཡིན་པའི་ཕྱིར། དོན་གཞན་གྱིས་སྟོང་སྟེ། དབང་སྒྱུར་བ་པོའི་བདག་པོའི་དོན་གཞན་གྱིས་སྟོང་པའི་ཕྱིར། བདག་མེད་པའི་རྣམ་པ་ཡིན་ཏེ། རང་དབང་པའི་བདག་མ་གྲུབ་པའི་ཕྱིར། དེ་ལྟར་དྲན་ཅིང་བསྒོམས་པས་རིམ་བཞིན་ཉེར་ལེན་གྱི་ཕུང་པོ་ལ་རྟག །བདེ། གཙང་བ། བདག་ཏུ་འཛིན་པའི་ཕྱིན་ཅི་ལོག་བཞི་སྤོང་བར་བྱེད་དོ། །ཀུན་འབྱུང་བདེན་པའི་རྣམ་པར་རྒྱུ་ཀུན་འབྱུང་རབ་སྐྱེ་རྐྱེན་བཞི་སྟེ། ཟག་བཅས་ཀྱི་ལས་ཉོན་གཉིས་ཆོས་ཅན། རྒྱུའི་རྣམ་པ་ཡིན་ཏེ། རང་འབྲས་སྡུག་བསྔལ་གྱི་རྩ་བ་ཡིན་པའི་ཕྱིར། ཀུན་འབྱུང་བ༴ རང་འབྲས་སྡུག་བསྔལ་ཀུན་ཡང་ཡང་བསྐྱེད་པའི་ཕྱིར། རབ་སྐྱེ༴ སྡུག་བསྔལ་དེ་ཤུགས་དྲག་ཏུ་བསྐྱེད་པའི་ཕྱིར། རྐྱེན་གྱི་རྣམ་པ༴ རང་འབྲས་སྡུག་བསྔལ་གྱི་ལྷན་ཅིག་བྱེད་རྐྱེན་ཡིན་པའི་ཕྱིར། དེ་ལྟར་བསྒོམས་པས་རིམ་བཞིན་སྡུག་བསྔལ་རྒྱུ་མེད་དུ། དེ་རྒྱུ་གཅིག་ཁོ་ནས་བྱས་པར། དེ་དབང་ཕྱུག་སོགས་ཀྱིས་བྱས་པར། དེའང་བཞིན་གྱིས་རྟག་ལ་གནས་སྐབས་འགྱུར་བར་འཛིན་པའི་རྟོག་པ་རྣམས་སྤོང་བར་བྱེད། འགོག་བདེན་གྱི་རྣམ་པ་ལ་འགོག་ཞི་གྱ་ནོམ་ངེས་འབྱུང་བཞི་སྟེ། སྡུག་ཀུན་གཏན་ནས་སྤངས་པའི་བྲལ་བ་ཆོས་ཅན། འགོག་པའི་རྣམ་པ་ཡིན་ཏེ། སྡུག་བསྔལ་སྤངས་པའི་བྲལ་བ་ཡིན་པའི་ཕྱིར། ཞི་བ༴ ཉོན་མོངས་སྤངས་པའི་བྲལ་བ་ཡིན་པའི༴ གྱ་ནོམ་པ་ཡིན་ཏེ། ཕན་བདེའི་དངོས་པོར་གྱུར་པའི་ཐར་པ་ཡིན་པའི༴ ངེས་འབྱུང་༴ སླར་མི་ལྡོག་པའི་ཐར་པ༴ དེ་ལྟར་བསྒོམས་པས་རིམ་བཞིན། ཐར་པ་ཡེ་མེད་དུ། ཟག་བཅས་ཀྱི་ཁྱད་པར་འགའ་ཞིག་ཐར་པར། སྡུག་བསྔལ་གྱི་རང་བཞིན་འབའ་ཞིག་ཐར་པར། ཐར་པ་ཡོད་ཀྱང་སླར་ལྡོག་པར་འཛིན་པའི་རྟོག་པ་རྣམས་སྤོང་བར་བྱེད། ལམ་བདེན་གྱི་རྣམ་པ་ལ་ལམ་སྒྲུབ་པ་རིག་པ་ངེས་འབྱིན་བཞི་སྟེ། བདག་མེད་ཀྱི་དོན་མངོན་སུམ་དུ་རྟོགས་པའི་ཡེ་ཤེས་ཆོས་ཅན། ལམ་གྱི་རྣམ་པ་ཡིན་ཏེ། ཐར་པར་བགྲོད་བྱེད་ཀྱི་ལམ་དངོས་སམ་དེར་གཏོགས་ཀྱི་ལམ་ཡིན་པའི་ཕྱིར། སྒྲུབ་པ་ཡིན་ཏེ། བདག་མེད་ཅི་རིགས་མངོན་སུམ་དུ་རྟོགས་པའི་ཡེ་ཤེས༴ རིག་པ༴ ཉོན་མོངས་ཀྱི་གཉེན་པོ་བྱེད་པའི༴ ངེས་ཕྱིན་གྱི་རྣམ་པ༴ སྡུག་བསྔལ་སླར་མི་ལྡོག་པར་བྱེད་པའི་ཡེ་ཤེས་ཡིན་པའི་ཕྱིར། དེ་ལྟར་བསྒོམས་པས་རིམ་བཞིན་ཐར་ལམ་ཡེ་མེད་དུ་འཛིན་པ། བསམ་གཏན་གྱི་ངོ་བོ་འགའ་ཞིག་ཐར་ལམ་དུ། ཟག་བཅས་ཀྱི་ཁྱད་པར་འགའ་ཞིག་ཐར་ལམ་དུ། སྡུག་བསྔལ་གཏན་ཟད་པའི་ཐར་ལམ་མེད་པར་འཛིན་པའི་རྟོག་པ་རྣམས་སྤོང་བར་བྱེད་དོ། །དྲུག་པ་ནི། བཞི་པོ་དེ་དག་ལ་འཕགས་པའི་བདེན་པ་ཞེས་བརྗོད་པའི་རྒྱུ་མཚན་ཡོད་དེ། དེ་རྣམས་འཕགས་པ་རྣམས་ཀྱིས་གཟིགས་པ་ལྟར་བདེན་ཅིང༌། བྱིས་པ་སོ་སྐྱེས་བཟུང་བ་ལྟར་མི་བདེན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། བདུན་པ་ནི། བདེན་བཞིའི་རྣམ་གཞག་ནི་ཐེག་པ་ཆེ་ཆུང་ཀུན་ཏུ་ལན་དུ་མང་གསུངས་ཤིང༌། འཁོར་བར་འཇུག་ལྡོག་གི་གནད་རྣམས་ཐམས་ཅད་མཁྱེན་པས་བསྡུས་པ་ཡིན་པས་རྣམ་གྲོལ་བསྒྲུབ་པ་ལ་ཤིན་ཏུ་གལ་ཆེ་ཞིང༌། ཉམས་ལེན་གྱི་འགགས་སྡོམ་ཡང་ཆེ་བས་རིམ་པ་དེ་ལྟར་དུ་སློབ་དགོས་པའི་ཕྱིར་དགོས་པ་ཤིན་ཏུ་ཆེ་པར་གྲུབ་བོ། །གཉིས་པ་རྟེན་འབྲེལ་བཅུ་གཉིས་ཀྱི་རྣམ་གཞག་བཤད་པ་ལ་བདུན། སྤྱིའི་མཚན་ཉིད། སོ་སོའི་དབྱེ་བ། བསྡུ་བ། བྱེད་ལས་ཚེ་དུ་ལ་རྫོགས། བསྒོམ་ཚུལ། བསྒོམས་པའི་ཕན་ཡོན་ནོ། །དང་པོ་ནི། སཱ་ལུ་ལྗང་པའི་མདོ་ལས་བསྟན་དོན་རྟེན་འབྲེལ་མདོ་འགྲེལ་སོགས་ལས་རྒྱས་པར་བཤད་པ་ལྟར། དེ་དག་གི་དངོས་བསྟན་ནི་འདུས་བྱས་རྟེན་འབྲེལ་གྱི་དབང་དུ་བྱས་ལ། སྤྱིར་ལྟོས་ནས་གྲུབ་པ་རྟེན་འབྲེལ་གྱི་མཚན་ཉིད། རང་གི་རྒྱུ་རྐྱེན་ལ་ལྟོས་ནས་གྲུབ་པ། འདུས་བྱས་རྟེན་འབྲེལ་གྱི་མཚན་ཉིད་དོ། །གཉིས་པ་ནི། མ་རིག་པ་ནས་རྒ་ཤིའི་བར་དུ་བཅུ་གཉིས་ཏེ། དང་པོ་མ་རིག་པ་ལ། སྤྱིར་ལས་འབྲས་དང༌། དེ་ཁོ་ན་ཉིད་ལ་རྨོངས་པའི་མ་རིག་པ་གཉིས་སུ་ཡོད་ལ། སྔ་མས་ནི་ངན་འགྲོ་དང༌། ཕྱི་མས་ནི་བདེ་འགྲོ་ངན་འགྲོ་གཉིས་ཀར་འཕེན་པའི་ལས་གསོག །དེ་ཁོ་ན་ཉིད་ལ་རྨོངས་པའི་མ་རིག་པ་ནི། ཐལ་རང་གཉིས་ཀས་བདེན་འཛིན་ཐམས་ཅད་ལ་བྱེད་ཀྱང་ཐལ་འགྱུར་བས་བདེན་འཛིན་ཡིན་ན་མ་རིག་པས་ཁྱབ་ཅེས་བཞེད་པ་དང༌། རང་རྒྱུད་པས་ནི་དེ་ལྟར་མི་བཞེད། རང་རྒྱུད་པ་མན་ཆད་ཀྱི་རང་སྡེ་ལྟར་ན། གང་ཟག་རང་རྐྱ་ཐུབ་པའི་རྫས་ཡོད་དུ་འཛིན་པའི་རྟོག་པ་རྣམས་ནི། མ་རིག་པ་ཡིན་པས་ཐལ་རང་གཉིས་ཀྱི་ལུགས་ལ་འཁོར་བའི་རྩ་བ་ངོས་འཛིན་ཚུལ་མི་འདྲའོ། །གང་ལྟར་ནའང་རང་རང་ལུགས་ཀྱི་བདག་མེད་པའི་དེ་ཁོ་ན་ཉིད་ཀྱི་དོན་ལ་རྨོངས་པའི་སོ་སྐྱེའི་རྒྱུད་ཀྱི་དེ་འདྲའི་མ་རིག་པ་དེ་འཁོར་བའི་རྩ་བ་ཡིན་པར་བཞེད་པ་ནི་འདྲའོ། །དེས་ན་ཡན་ལག་བཅུ་གཉིས་ཀྱི་ཐོག་མའི་མ་རིག་པ་དང་བདག་མེད་པའི་དེ་ཁོ་ན་ཉིད་ལ་རྨོངས་པའི་མ་རིག་པ་སྟེ། འདི་ལ་ཀུན་བརྟགས་དང་ལྷན་སྐྱེས་གཉིས་ཀ་ཡོད་པར་བཤད་ཀྱང༌། འཕགས་པའི་རྒྱུད་ལ་ནི། ཡན་ལག་བཅུ་གཉིས་ཀྱི་ཐོག་མར་གྱུར་པའི་མ་རིག་པ་མེད་དོ། །མཁས་པ་ཕལ་ཆེར་འདུ་བྱེད་ཀྱི་ལས་ཀྱི་རྒྱུའི་ཀུན་སློང་གི་མ་རིག་པ་ལ་ནི་ལས་འབྲས་ལ་རྨོངས་པའི་མ་རིག་པ་མི་སྲིད་ཅེས་བཞེད་སྣང་ཡང༌། དུས་ཀྱི་ཀུན་སློང་ལ་ནི་དེ་ཡོད་དོ། །གཉིས་པ་འདུ་བྱེད་ལ་ནི་ལས་ཡིན་ལ། དེ་ལའང་བསོད་ནམས་མ་ཡིན་པ། བསོད་ནམས། མི་གཡོ་བའི་ལས་ཏེ་གསུམ་མོ། །གསུམ་པ་རྣམ་ཤེས་ནི། མདོ་ལས། ཚོགས་དྲུག་ཏུ་གསུངས་ཀྱང་འདིར་གཙོ་བོའི་དབང་དུ་བྱས་ན་ཡིད་ཤེས་ཏེ། དེ་ལ་དགེ་མི་དགེའི་ལས་བསགས་པའི་བག་ཆགས་བསྒོས་པའི་ཚེ་འདིའི་རྣམ་ཤེས་ནི་རྒྱུ་དུས་ཀྱི་རྣམ་ཤེས་ཡིན་ལ། ཕྱི་མར་སྐྱེ་གནས་སུ་ཉིང་མཚམས་སྦྱར་བ་ན་འབྲས་དུས་ཀྱི་རྣམ་ཤེས་སུ་འགྱུར་བས། གཉིས་ཀ་ལ་རྣམ་ཤེས་ཀྱི་རྟེན་འབྲེལ་ཞེས་གཅིག་ཏུ་བགྲང་པའོ། །བཞི་པ་མིང་གཟུགས་ཀྱི་མིང་ནི། ཚོར་བ་འདུ་ཤེས་འདུ་བྱེད་རྣམ་ཤེས་ཏེ་གཟུགས་ཅན་མ་ཡིན་པའི་མིང་གཞིའི་ཕུང་པོ་དང༌། གཟུགས་ནི་མེར་མེར་པོ་ལ་སོགས་པ་སྟེ། གཟུགས་མེད་དུ་སྐྱེ་ན་གཟུགས་ཀྱི་ས་བོན་ཙམ་ལས་གཟུགས་ནི་མེད་དོ། །ལྔ་པ་སྐྱེ་མཆེད་དྲུག་ནི། མངལ་དུ་སྐྱེ་ན། དང་པོར་རྣམ་ཤེས་ཁུ་ཁྲག་གི་མེར་མེར་པོ་དང་མིང་རྣམས་འཕེལ་ནས་གྲུབ་པའི་མིག་དང་རྣ་བ་ལ་སོགས་པའི་སྐྱེ་མཆེད་རྣམས་ཏེ། ལུས་དང་ཡིད་ཀྱི་སྐྱེ་མཆེད་ནི་སྔར་ནས་ཡོད་དོ། །བརྫུས་ཏེ་སྐྱེས་ན་རྫུས་སྐྱེས་དབང་པོ་རྣམས་གཅིག་ཅར་དུ་འགྲུབ་པས་རིམ་པ་དེ་ལྟར་མེད་ལ། སྒོང་དང་དྲོད་སྐྱེས་ལ་ནི་མངལ་མ་གཏོགས་ཆ་འདྲ་བར་བཤད། དྲུག་པ་རེག་པ་ནི། ཡུལ་དབང་རྣམ་ཤེས་གསུམ་འདུས་པ་ལ་བརྟེན་ནས་ཡུལ་གཟུགས་སོགས་ཡིད་དུ་འོང་མི་འོང་བར་མ་གསུམ། གང་རུང་ཡོངས་སུ་གཅོད་པའི་སེམས་བྱུང་དང་པོ་གྲུབ་པ་སྟེ། འདི་ལ་མིག་ནས་ཡིད་ཀྱི་འདུས་ཏེ་རེག་པའི་བར་ཅི་རིགས་ཡོད་དོ། །བདུན་པ་ཚོར་བ་ནི། རེག་པས་ཡུལ་གསུམ་གང་རུང་བཅད་པ་དང་རྗེས་སུ་མཐུན་པར། ཟག་བཅས་ཀྱི་ཚོར་བ་བདེ་སྡུག་བཏང་སྙོམས་གསུམ་གང་རུང་སྐྱེས་པའོ། །འདི་ལའང་སྔར་བཞིན་ཡོད། བརྒྱད་པ་སྲེད་པ་ནི། ཚོར་བ་བདེ་བ་ལ་ནི་མི་འབྲལ་བ་དང་སྡུག་བསྔལ་ལ་འབྲལ་འདོད་ཀྱི་སྲེད་པའམ། བཏང་སྙོམས་གང་རུང་ལ་སྲེད་པ་གང་རུང་སྟེ། འདི་ལ་འདོད་སྲེད། སྲིད་སྲེད། འཇིག་སྲེད་གསུམ། དགུ་པ་ལེན་པ་ནི། སྲེད་པ་དེ་ཉིད་ཆེར་འཕེལ་བའི་འདོད་ཆགས་ཏེ། འདི་ལ་འདོད་པ་ཉེ་བར་ལེན་པ། ལྟ་བ། བརྟུལ་ཞུགས། བདག་ཏུ་སྨྲ་བའི་ཉེར་ལེན་བཞི། དང་པོ་ནི། གཟུགས་སོགས་འདོད་ཡོན་ལ་ཆགས་པ། གཉིས་པ་ནི། འཇིག་ལྟ་མ་ཡིན་པའི་ལྟ་ངན་ལ་ཆགས་པ། གསུམ་པ་ནི། ཚུལ་ཁྲིམས་དང་བརྟུལ་ཞུགས་དམན་ལ་ཆགས་པ། བཞི་པ་ནི། འཇིག་ལྟ་ལ་འདུན་ཞིང་ཆགས་པའི་སྲེད་པ། བཅུ་པ་སྲིད་པ་ནི། སྔར་འདུ་བྱེད་ཀྱི་ལས་ཀྱི་བག་ཆགས་རྣམ་ཤེས་ལ་བསྒོས་པ་དེ་ཉིད་སྲེད་ལེན་གཉིས་ཀྱིས་གསོས་བཏབ་ནས་ཡང་སྲིད་ཕྱི་མ་འདྲེན་པ་ནུས་མཐུ་ཅན་དུ་སོང་བའི་སྐབས་ཀྱི་ལས་ཏེ། སྲིད་པ་ཞེས་པ་ནི་འབྲས་མིང་རྒྱ་ལ་བཏགས་པའོ། །འདི་ལ་ཁམས་གསུམ་གྱི་ལས་གསུམ། བཅུ་གཅིག་པ་སྐྱེ་བ་ནི། སྲིད་ལས་ཀྱི་མཐུས་སྐྱེ་གནས་བཞི་པོ་གང་རུང་དུ་རྣམ་ཤེས་དང་པོར་ཉིང་མཚམས་སྦྱང་བ་དེ། འདི་ལ་མངལ་དུ་ཉིང་མཚམས་སྦྱར་བ་སོགས་བཞིའམ། ཁམས་གསུམ་གྱི་ཉིང་མཚམས་སྦྱང་བ་གསུམ། འདིའི་སྐྱེ་བ་ཉིང་མཚམས་སྦྱར་མ་ཐག་པའི་གནས་སྐབས་ཀྱི་ཕུང་པོ་ལྔ་དང༌། ཁ་ཅིག་མངལ་ནས་ཕྱི་རོལ་དུ་བཙའ་བ་ལ་དེ་འཇོག་མོད། འདིར་ནི་ཉིང་མཚམས་སྦྱར་བའི་ཆ་དང་པོར་འདོད་དོ། །བཅུ་གཉིས་པ་རྒ་ཤི་ལ། རྒ་བ་ནི་ཕུང་པོ་སྨིན་ཅིང་གཞན་དུ་འགྱུར་བའི་ཆ་ཡིན་ལ། ཤི་བ་ནི་ཕུང་པོ་རིས་མཐུན་པ་འདོར་བའམ་དོར་བའོ། །དེ་གཉིས་ཡན་ལག་གཅིག་ཏུ་འཇོག་པ་ནི། དེ་གཉིས་གོ་རིམ་མ་ངེས་པའི་རྒྱུ་མཚན་གྱིས་སོ། །མྱ་ངན་དང་སྨྲེ་སྔགས་འདོན་པ་ལ་སོགས་པ་ནི་ཡན་ལག་ཏུ་འགྱུར་བར་མ་ངེས་པར་ཞར་བྱུང་ཙམ་སྟེ་སྐྱོ་བ་བསྐྱེད་པའི་ཆེད་དུ་གསུངས་སོ། །གསུམ་པ་ལ་གཉིས་ཏེ། མདོར་བསྡུ་བ་དང༌། ཀུན་ནས་ཉོན་མོངས་པའི་བསྡུ་བའོ། །དང་པོ་ནི། ཡན་ལག་བཅུ་གཉིས་པོ་དེ་རྒྱུ་འབྲས་ཀྱིས་བསྡུས་ཏེ། འཕེན་བྱེད་དང༌། འགྲུབ་བྱེད་ཀྱི་རྒྱུ་འབྲས་གཉིས་ཀྱིས་བསྡུས་པའི་ཕྱིར། དེ་ཡང་མ་རིག་པ། འདུ་བྱེད། རྒྱུ་དུས་ཀྱི་རྣམ་ཤེས་གསུམ་ནི། འཕེན་བྱེད་ཀྱི་རྒྱུ་དང༌། འབྲས་དུས་ཀྱི་རྣམ་ཤེས་དང་མིང་གཟུགས་སྐྱེ་མཆེད་དྲུག །རེག་པ་ཆོར་བ་སྟེ་ཕྱེད་དང་ལྔ་ནི་འཕངས་པའི་འབྲས་བུ་དང༌། སྲེད་ལེན་སྲིད་པ་གསུམ་འགྲུབ་བྱེད་ཀྱི་རྒྱུ་དང༌། སྐྱེ་རྒ་གཉིས་ནི། གྲུབ་པའི་འབྲས་བུའི་ཡན་ལག་ཏུ་འདུའོ། །གང་འཕང་ན། འབྲས་དུས་ནི་རྣམ་ཤེས་ནས་ཚོར་བའི་བར་ཡན་ལག་ཕྱེད་ལྔའོ། །གང་གིས་འཕངས་ན། མ་རིག་པའི་རྐྱེན་གྱིས་འདུ་བྱེད་ཀྱི་ལས་ཀྱིས་སོ། །ཇི་ལྟར་འཕངས་ན་རྒྱུ་དུས་ཀྱི་རྣམ་ཤེས་ལ་ལས་ཀྱི་བག་ཆགས་བསྒོས་པའི་ཚུལ་གྱིས་སོ། །འཕངས་པའི་དོན་ནི། སྲེད་པ་སོགས་འགྲུབ་བྱེད་ཡོད་ན་འབྲས་བུ་དེ་རྣམས་འགྲུབ་རུང་དུ་བྱས་པའོ། །གང་གིས་འགྲུབ་པར་བྱེད་ན་སྲིད་པའི་རྐྱེན་གྱི་ལེན་པས་སོ། །གང་འགྲུབ་ན་སྐྱེ་བ་དང་རྒ་ཤིའོ། །ཇི་ལྟར་འགྲུབ་པར་བྱེད་ཅེ་ན། འདུ་བྱེད་ཀྱིས་རྣམ་ཤེས་ལ་བསྒོས་པའི་ལས་ཀྱི་བག་ཆགས་དེས་ནུས་མཐུ་ཅན་དུ་བྱས་པའི་ཚུལ་གྱིས་སོ། །དེས་ན་འདིའི་འཕངས་པའི་ཡན་ལག་དང་གྲུབ་པའི་ཡན་ལག་དོན་གཉིས་ངོ་བོ་གཅིག་གོ །གཉིས་པ་ནི། མ་རིག་སྲེད་ལེན་གསུམ་ཉོན་མོངས་པའི་ཀུན་འབྱུང༌། འདུ་བྱེད་དང་སྲིད་ལས་གཉིས་ལས་ཀྱི་ཀུན་འབྱུང་འབྲས་དུས་ཀྱི་རྣམ་ཤེས་སོགས་བདུན་ནི་སྡུག་བདེན་དུ་འདུའོ། །བཞི་པ་བྱེད་ལས་ནི། མ་རིག་པས་དེ་ཁོ་ན་ཉིད་ལ་སྒྲིབ། འདུ་བྱེད་ཀྱིས་ཡང་སྲིད་ཕྱི་མའི་ས་བོན་འདེབས། རྣམ་ཤེས་ཀྱིས་སྐྱེ་གནས་སུ་འཁྲིད། མིང་གཟུགས་ཀྱིས་ལུས་འཛིན། སྐྱེ་མཆེད་ཀྱིས་ལུས་རྫོགས། རེག་པས་ཡུལ་གྱི་འགྱུར་བ་སྤྱོད། ཚོར་བས་རྣམ་སྨིན་སྤྱོད། སྲེད་པས་ཕུང་པོ་སླར་སྡུད། ལེན་པས་ཕུང་པོ་འགྲུབ་པ་ལ་སྦྱོར། སྲིད་པས་ཕྱི་མའི་ཕུང་པོ་མངོན་དུ་འགྱུར། སྐྱེ་བ་དང་རྒ་ཤིས་རང་རང་གར་ལ་ལྡན་པའི་གང་ཟག་དེ་སྡུག་བསྔལ་བར་བྱེད་དོ། །ལྔ་པ་ནི། མྱུར་ན་ཚེ་གཉིས་དང༌། བུལ་ན་གསུམ་གྱིས་རྫོགས་ལ། ཁ་ཅིག་ཚེ་བཞིར་རྫོགས་པའང་ཡོད་ཅེས་གསུངས། དང་པོ་སྐྱེས་ནས་མྱོང་འགྱུར་གྱི་དབང་དུ་བྱས་པ་སྟེ། དཔེར་ན་མི་འགའ་ཞིག་མ་རིག་པས་ཀུན་ནས་བསླངས་ཏེ། རྒྱུ་དུས་ཀྱི་རྣམ་ཤེས་ཀྱིས་འདོད་ལྷར་སྐྱེ་བའི་འདུ་བྱེད་ཀྱི་ལས་བསགས། ལས་དེ་འཆི་ཀ་ཚུན་སྲེད་ལེན་གཉིས་ཀྱིས་གསོས་བཏབ་ནས་སྲིད་ལས་ནུས་ལྡན་དུ་བྱས་ཏེ་སྐྱེ་བ་བླངས་ན་ཚེ་སྔ་མར་ཕྱེད་དྲུག །ཕྱི་མ་ལྷར་བསྐྱེད་པའི་ཚེ་འབྲས་དུས་ཀྱི་རྣམ་ཤེས་སོགས་ཕྱེད་བདུན་འགྲུབ་པར་འགྱུར་བས་སོ། །གཉིས་པ་ནི། ལན་གྲངས་གཞན་ལ་མྱོང་འགྱུར་གྱི་དབང་དུ་བྱས་པ་སྟེ། དཔེར་ན་མི་ཞིག་གིས་རྟེན་དེ་ཡང་མ་རིག་པའི་སྟོབས་ཀྱིས་རྣམ་ཤེས་ཀྱི་སྟེང་དུ་ལས་ཀྱི་བག་ཆགས་བཞག་པས་དེ་ལ་སྲེད་ལེན་གཉིས་ཀྱིས་གསོས་མ་བཏབ་པར་དུད་འགྲོར་སྐྱེས། རྟེན་དེ་ལ་སྲེད་ལེན་གཉིས་ཀྱིས་གསོས་བཏབ་ནས་སྲིད་ལས་ནུས་པ་ཅན་དུ་བྱས་ནས་འདོད་ལྷར་སྐྱེས་ཀྱི་སྐྱེ་བ་བླངས་པའི་ཚེ། ཡན་ལག་དང་པོ་གཉིས་ཚེ་དང་པོ། སྲིད་ལེན་སྲིད་པ་གསུམ་གཉིས་པ། ལྷག་མ་རྣམས་ཚེ་གསུམ་པ་ལ་རྫོགས་པ་བཞིན་ནོ། །གསུམ་པ་སླར་ལེན་ན་ནི་སྲེད་པས་གསོས་བཏབ་ཀྱང༌། ལེན་པས་གསོས་མ་བཏབ་པ་ཞིག་འདོད་དགོས་སོ། །འདི་དག་ནི་ཐེག་པ་ཆེན་པོའི་དབང་དུ་བྱས་པ་སྟེ། མདོ་སྡེ་དང༌། །བྱེ་སྨྲ་བའི་ལུགས་ཅུང་ཟད་མི་འདྲ་པ་ཡོད་དོ། །གསུམ་པ་ནི། ཡན་ལག་དང་པོར་རིག་པ་འཁོར་རྩར་འགྱུར་ཚུལ་སྤྱི་དང༌། ཁྱད་པར་དེའི་རྐྱེན་གྱིས་འདུ་བྱེད་འབྱུང་བ་ནས། སྐྱེ་བའི་རྐྱེན་གྱིས་རྒ་ཤི་འབྱུང་བའི་བར་ནི་ཉོན་མོངས་ཕྱོགས་ཀྱི་རྟེན་འབྲེལ་ལུགས་མཐུན་དང༌། རྒ་ཤི་གང་ནས་འབྱུང་ན་སྐྱེ་བ་ལས་འབྱུང་བ་ནས། འདུ་བྱེད་མ་རིག་པ་ལས་འབྱུང་བའི་བར་ནི་ཉོན་མོངས་པའི་ཕྱོགས་ཀྱི་རྟེན་འབྲེལ་ལུགས་ལྡོག །མ་རིག་པ་འགག་པ་ནས་འདུ་བྱེད་འགགས་ནས། སྐྱེ་བ་འགགས་པ་ནས་རྒ་ཤི་འགགས་པའི་བར་རྣམ་བྱང་ཕྱོགས་ཀྱི་རྟེན་འབྲེལ་ལུགས་མཐུན་དང༌། གང་འགགས་པས་རྒ་ཤི་འགག་སྙམ་ན། སྐྱེ་བུ་འགགས་པས་རྒ་ཤི་འགགས་སོ་ཞེས་པ་ནས། མ་རིག་པ་འགགས་པས་འདུ་བྱེད་འགགས་པའི་བར་ནི་རྣམ་བྱང་ཕྱོགས་ཀྱི་རྟེན་འབྲེལ་ལུགས་ལྡོག་ཏུ་བསྒོམ་པར་བྱའོ། །དེ་ལའང་དང་པོ་གཉིས་ལྟར་བསམ་པ་ནི། རིམ་བཞིན་སྡུག་ཀུན་གཉིས་ཤེས་པར་བྱེད་པ་ཡིན་ལ། ཕྱི་མ་གཉིས་ལྟར་བསམ་པ་ནི། འགོག་ལམ་གཉིས་སྒོམ་པར་བྱེད་པ་ཡིན་ནོ། །བདུན་པ་ནི། འཕགས་པ་ཀླུས། རྟེན་ཅིང་འབྲེལ་བར་འབྱུང་འདི་རྒྱལ་བ་ཡི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །གང་གིས་འདི་ནི་ཡང་དག་མཐོང་བ་དེས། །སངས་རྒྱས་དེ་ཉིད་རིག་པ་རྣམས་མཆོག་མཐོང༌། །ཞེས་སོགས་ཕན་ཡོན་དཔག་ཏུ་མེད་དོ། །གསུམ་པ་འཆི་འཕོ་ཇི་ལྟར་བྱེད་ཚུལ་ལ་གཉིས་ཏེ། དངོས་དང༌། ཞར་བྱུང་ངོ༌། །དང་པོ་ལ་ལྔ། འཆི་བའི་རྐྱེན། འཆི་བའི་སེམས། དྲོད་སྡུད་ཚུལ། བར་དོ་འགྲུབ་ལུགས། སྐྱེ་སྲིད་དུ་ཉིད་མཚམས་སྦྱོར་ཚུལ་ལོ། །དང་པོ་ལ་གཉིས། ཚེ་ཟད་ནས་དུས་ཀྱིས་འཆི་བ་དང༌། མ་ཟད་ཀྱང་དུས་མིན་གྱི་འཆི་བའོ། །ཕྱི་མ་ལའང༌། བསོད་ནམས་ཟད་ནས་ནད་སོགས་ཀྱིས་འཆི་བ་དང༌། གཞན་ཡང་དུས་མིན་གྱི་འཆི་རྐྱེན་དགུ་མདོ་ལས་གསུངས་སོ། །གཉིས་པ་ནི། དགེ་མི་དགེ་ལུང་མ་བསྟན་གྱི་སེམས་གསུམ་ཅི་རིགས་སུ་འབྱུང་ལ། སྤྱིར་དགེ་བ་བྱེད་པ་རྣམས་དགེ་སེམས་དང༌། མི་དགེ་བ་བྱེད་པ་རྣམས་སྡིག་པ་བྱུང་མོད། དམིགས་བསལ་ལ་མ་ངེས་ཤིང༌། དེ་དག་འདུ་ཤེས་རགས་པ་རྒྱུ་བའི་ཚེ་ཡིན་ཕྱི། ཕྲ་མོའི་སྐབས་སུ་ནི་ལུང་མ་བསྟན་གྱི་སེམས་ཁོ་ནར་འགྱུར་རོ། །གསུམ་པ་ནི། མི་དགེ་བ་ཆེན་པོ་བྱེད་པ་རྣམས་དྲོད་སྟོད་ནས་དང༌། དགེ་བ་ཆེན་པོ་བྱེད་པ་རྣམས་ཀྱི་དྲོད་སྨད་ནས་སྡུད་ལ། གཉིས་ཀའང་དྲོད་སྙིང་གའི་བར་བསྡུས་ཏེ་རྣམ་ཤེས་འཕོའོ། །བཞི་པ་ནི། རྣམ་ཤེས་ཕྱིར་འཕོ་བ་དང་བར་ཆད་མེད་པར་སྲང་མདའི་མཐོ་དམན་བཞིན་དུ་བར་དོ་འགྲུབ་སྟེ། འགྲོ་བ་གང་དུ་སྐྱེ་བར་འགྱུར་བ་དེའི་ལུས་དབྱིབས་ཅན་དུ་འགྱུར་རོ། །འོན་ཀྱང་གཟུགས་མེད་ཁམས་སུ་སྐྱེ་བའི་ཚེ་བར་དོ་མེད་དོ། །ལྔ་པ་ལ་གཉིས། དངོས་དང༌། འཕྲོས་དོན་ནོ། །དང་པོ་ནི། མངལ་དུ་སྐྱེ་ན། བར་དོ་བ་དེས་རང་དང་རིས་མཐུན་པའི་སེམས་ཅན་དག་མཐོང་ནས་དེ་དག་ལ་ལྟ་བ་དང༌། རྩེ་བ་སོགས་བྱེད་ལ། ཕ་མའི་ཁུ་ཁྲག་ལ་ཕྱིན་ཅི་ལོག་ཏུ་མཐོང་པའི་བློས་དེ་དང་ཉེ་བར་ལྷགས་པ་ན་བུད་མེད་དེའི་དབང་པོ་ཙམ་ཞིག་མ་གཏོགས་གཞན་གང་ཡང་མི་སྣང་བར་གྱུར་པས་ཁྲོས་ཏེ་ཤི་འཕོས་ནས་ཉིང་མཚམས་སྦྱོར་རོ། །ཉིང་མཚམས་སྦྱར་མ་ཐག་གི་རྣམ་ཤེས་ནི། ཡིད་ཤེས་ཁོ་ན་སྟེ་གཞན་ནི་དེའི་ཚེ་མེད་དོ། །དེར་མེར་མེར་པོ་དང༌། དེ་ལས་གཞན་པའི་འབྱུང་བ་ཆ་ཕྲ་བ་རྣམས་དང་འདྲེས་ནས་རིམ་གྱིས་འཕེལ་ཏེ། ཞག་བདུན་ཕྲག་སོ་བརྒྱད་ལྷག་ཙམ་ནས་ཕྱིར་བཙའ་བར་འགྱུར་ཏེ། འདི་དག་གི་རྣམ་གཞག་ཞིབ་པ་ནི་དགའ་བོ་མངལ་འཇུག་གི་མདོ་ལས་རྒྱས་པར་འབྱུང་ངོ༌། །དམྱལ་བ་ཕལ་ཆེར་དང་དུད་འགྲོ་དང་ཡི་དྭགས་དང་མི་དང་འདོད་གཟུགས་ཀྱི་ལྷར་སྐྱེ་ན་ནི། རང་དང་རིས་མཐུན་པའི་སེམས་ཅན་མཐོང་སྟེ། དེར་སོང་ན་སྐྱེ་གནས་ལ་ཁྲོས་པའི་རྐྱེན་གྱིས་བར་སྲིད་འགགས་ནས་སྐྱེ་སྲིད་དུ་ཉིད་མཚམས་སྦྱོར་ལ། འོན་ཀྱང་ལུག་དང་ཕག་དང་བྱ་རི་དྭགས་མང་པོ་གསོད་པའི་སྡིག་ཅན་དམྱལ་བར་སྐྱེ་ངེས་པ་རྣམས་ལ་བར་སྲིད་ནས་ལུག་དང་ཕག་སོགས་དེ་དག་རྨི་ལམ་བཞིན་དུ་མཐོང་ནས་སྔོན་གོམས་ཀྱི་དགའ་བས་དེར་རྒྱུག་གོ། །དེ་ནས་སྐྱེ་བའི་གནས་ལ་ཁྲོས་པས་བར་སྲིད་འགགས་ཏེ་སྐྱེ་སྲིད་དུ་འཕོ་བར་འགྱུར་རོ། སྒོར་སྐྱེས་ནི་ཕལ་ཆེར་མངལ་སྐྱེས་དང་འདྲ་ཞིང༌། དྲོད་གཤེར་སྐྱེ་ན་དྲི་དང༌། རྫུས་སྐྱེས་ཀྱིས་གནས་འདོད་ཅིང༌། ཚ་དམྱལ་དུ་སྐྱེ་ན་དྲོད་དང༌། གྲང་དམྱལ་དུ་སྐྱེ་ན་བསིལ་བར་འདོད་པས་རྐྱེན་བྱས་ནས་ཉིང་མཚམས་སྦྱོར་བར་བཤད་དོ། །གཉིས་པ་ནི། དབུ་མ་པའི་ལུགས་ཀྱི་དབང་དུ་བྱས་པའི་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་འཁོར་བར་འཁོར་ཚུལ་ལེགས་པར་ཤེས་དགོས། དེ་ཡང་ཕུང་པོ་འདི་ཉིད་བདག་མ་ཡིན་ལ། ཕུང་པོ་འདི་ལས་དོན་གཞན་པའི་གང་ཟག་རང་རྐྱ་ཐུབ་པའི་བདག་ཞིག་འཇིག་རྟེན་ཕ་རོལ་ཏུ་འགྲོ་བ་མ་ཡིན་གྱི། ཕུང་པོ་ལ་བརྟེན་བཏགས་པའི་ང་ཙམ་ཞིག་སྒྱུ་མ་ལྟ་བུའི་ཆོས་རྟེན་འབྲེལ་བཅུ་གཉིས་ལ་བརྟེན་པའི་ཚུལ་གྱིས་ཀུན་རྫོབ་ཙམ་དུ་འཁོར་བར་འཁོར་བའི་ཚུལ་ལེགས་པར་ཤེས་པར་བྱའོ། །དེ་ལྟར་འཁོར་བའི་ཚེ་རྣམ་ཤེས་འདི་ཉིད་འདི་ནས་ཕྱི་མར་ཉིང་མཚམས་སྦྱོར་ཚུལ་དང༌། དེ་ལ་དཔེ་ཅི་འདྲ་ཞིག་ཡོད་ཅེ་ན། ཐེག་པ་ཆེན་པོའི་ལུགས་ཀྱི་རྣམ་ཤེས་ཕྱི་མར་ཉིང་མཚམས་སྦྱོར་ཚུལ་མདོ་ལས་བཤད་པའི་དོན་གོ་སླ་བར་བརྗོད་ན། བླ་མས་སློབ་མར། ན་མོ་བུདྡྷཱ་ཡ་ལྟ་བུའི་ཁ་ཏོན་བློ་ཐོག་ནས་ངག་གིས་བསླབ་ནས་སློབ་མ་དེས་བློར་བཟུང་ནས་བརྗོད་ཚེ། སློབ་དཔོན་གྱི་ངག་སློབ་མ་ལ་འཁོས་པ་མ་ཡིན་ཏེ། ཡིན་ན་བླ་མ་ལ་སླར་དེ་འདྲའི་ངག་བརྗོད་རྒྱུ་མེད་པར་འགྱུར་རོ། །སློབ་མས་བླ་མའི་གསུང་ལ་མ་བརྟེན་པར་བྱུང་བའང་མིན་ཏེ། ཡིན་ན་རྒྱུ་མེད་པར་འགྱུར་བའི་ཕྱིར་རོ། །དཔེ་དེ་བཞིན་ཤི་ནས་ཕྱི་མར་ཉིང་མཚམས་སྦྱོར་ཚེ་འཆི་ཀའི་རྣམ་ཤེས་དེ་ཉིད་ངོ་བོས་འགྱུར་མེད་དུ་ཕྱི་མའི་རྣམ་ཤེས་སུ་འཕོ་བ་ཡིན་ཏེ། ཡིན་ན་དེ་རྟག་པར་འགྱུར་བས་སྐྱེ་བ་ལེན་པ་ཡང་མི་འཐད་དོ། །ཕྱི་མའི་རྣམ་ཤེས་དེ་འཆི་ཀའི་རྣམ་ཤེས་དེ་ལ་མ་བརྟེན་པར་མི་འབྱུང་སྟེ། འབྱུང་ན་རྒྱུ་མེད་པར་ཐལ་བའི་ཕྱིར་རོ། །དེ་ལྟར་ནའང་བླ་མས་བརྗོད་པའི་རྒྱུ་ལས་སློབ་མའི་ངག་འབྱུང་བ་ལྟར་སྔ་མའི་རྣམ་ཤེས་ཀྱི་རྒྱུན་ལས་ཕྱི་མའི་རྣམ་ཤེས་ཉིད་འབྱུང་ལ། བླ་མའི་ངག་དང་སློབ་མའི་ངག་གཅིག་ཏུ་མི་རུང་བ་བཞིན་ཚེ་འདིའི་འཆི་ག་མའི་རྣམ་ཤེས་དང༌། ཕྱི་མར་ཉིང་མཚམས་སྦྱར་བའི་རྣམ་ཤེས་གཉིས་གཅིག་མ་ཡིན་ཞིང༌། སློབ་མའི་ངག་དེ་བླ་མའི་ངག་ཐོས་པ་ལས་བྱུང་བ་ལྟར། ཕྱི་མའི་རྣམ་ཤེས་ཡང་སྔ་མའི་རྣམ་ཤེས་ལ་བརྟེན་ནས་བྱུང་བ་ཡིན་གྱི། གློ་བུར་དུ་གཞན་བྱུང་བའང་མིན་ནོ། །དེ་བཞིན་དུ་མར་མེ་ལས་མར་མེ་གཉིས་པ་ཆད་པ། མེ་ལོང་དུ་བྱད་འཆར་བ། ལྷ་སྐུ་སོགས་སྤར་གྱི་རྒྱ་ལས་དེ་འདྲའི་རི་མོ་འབྱུང་བ། མེ་ཤེལ་ལས་མེ་འབྱུང་བ། ས་བོན་ལས་མྱུ་གུ་འབྱུང་བ། ཤིང་ཏོག་སོགས་སྐྱུར་མོ་མཐོང་བས་འགྲམ་ཆུ་ལྡང་བ་དང༌། སྒྲ་གྲགས་པ་ལས་བྲག་ཅ་འབྱུང་བ་རྣམས་ལའང་སྔར་བཤད་པའི་རིག་པས་སྦྱར་བར་བྱའོ། །འཆི་འཕོ་ཐ་སྙད་དུ་ཡོད་ཀྱང་དོན་དམ་པར་མེད་པར་རྟོགས་པས་མཐའ་གཉིས་དང་བྲལ་བའི་དབུ་མའི་ལམ་དུ་གྲུབ་པ་ཡིན་པ་བཞིན་འདུས་བྱས་ཐམས་ཅད་ཀྱི་སྐྱེ་བ་དང་འགག་པ་ལའང་དེ་བཞིན་དུ་སྦྱར་བར་བྱའོ། །གཉིས་པ་ཞར་བྱུང་ནི། བླ་མེད་ཀྱི་ལུགས་ལ་བདེན་འཛིན་གྱི་མ་རིག་པས་འཁོར་བ་མར་འཁྱམས་པའི་རྩ་བ་བྱས་ཏེ། ཤིན་ཏུ་ཕྲ་བའི་རླུང་སེམས་ཙམ་ལ་བརྟེན་ནས་བཏགས་པའི་ང་ཉིད་ཀྱི་སྟེང་དུ་ལས་ཀྱི་བག་ཆགས་བསྒོས་ནས་ཕྱི་མར་སྐྱེ་བ་རྣམས་སུ་ཉིད་མཚམས་སྦྱོར་བར་འགྱུར་བ་ཡིན་ཏེ། རྡོ་རྗེ་ཕྲེང་བར། སྐྱེ་དང་གནས་དང་འཇིག་པ་དང༌། །སྲིད་པ་བར་མར་གནས་པ་སྟེ། །ཇི་སྲིད་འཇིག་རྟེན་གྱིས་བཏགས་བས། །སེམས་ནི་རླུང་གི་རྣམ་འཕྲུལ་ལོ། །ཞེས་གསུངས་པའི་ཕྱིར། ཅེས་པའང་ཉེར་འཁོའི་ལེའུ་ཚན་ནོ། །ཤུ་བྷཾ།།

[edit]

@#/__/bden bzhi dang rten 'brel gyi rnam gzhag tshig gi sa bon zhes bya ba bzhugs so/__/@#/__/kun 'byung sdug bsngal rgyu 'bras kun/__/lam bden bdud rtsis spangs pa las/__/'gogs pa 'chi med grub pa'i dbyid/__/ston pa mchog des dge legs mdzod/__/'di la gsum ste/__bden bzhi dang rten 'brel gyi rnam gzhag__/'chi 'pho ji ltar byed pa'i rim pa'o/__/dang po la'ang*/__grangs nges/__go rim/__ngo bo'i khyad par/__rgyud gang la yod med/__rnam pa sgrub tshul/__sgra don/__dgos pa'o/__/dang po ni/__thar 'dod kyi skyes bus gtan la dbab bya dang*/__'jug ldog gi gtso bo la bden pa bzhir grangs nges te/__'khor bar 'jug pa'i rgyu kun 'byung*/__'bras bu sdug bden/__ldog pa'i rgyu lam bden dang*/__bral 'bras 'gog bden gnyis su nges pa'i phyir/__gnyis pa ni/__bcom ldan 'das kyis mdo sde du mar bden bzhi ston pa'i go rim gnyis su gsungs te/__de yang rgyu 'bras don gyi rim pa'i dbang du byas na/__dang por kun 'byung*/__de nas lam/__sdug bsngal/__'gog bden bstan la/__mngon rtogs skye ba'i rim pa'i dbang du byas na/__sdug kun 'gogs lam gyi bden pa bzhi rim can du bstan pa'i phyir/__skabs 'dir phyi ma'i dbang du byas te bshad na/__rim pa de ltar bstan pa la dgos pa yod de/__bden bzhi'i blang dor la 'jug pa'i tshe/__thog mar rang gzhan rnams skye rga na 'chi sogs 'khor ba'i sdug bsngal gyis gzir tshul shes pas de spang 'dod kyi blo bskyed dgos pa'i phyir sdug bden dus dang por bstan/__de nas de gang las byung na chags sogs nyon mongs kyi las kyi kun 'byung las byung bar shes nas de spang 'dod bskyed dgos pas kun 'byung*/__de rjes sdug kun gnyis spangs pa'i 'gog bden thar pa la thob 'dod kyi blo bskyed dgos pas 'gogs bden/__de nas thar pa de thob pa'i thabs bdag med mngon sum du rtogs pa'i shes rab sogs lam bden rang rgyud la bsten dgos pas lam bden dus bzhi par bstan pa ste/__de yang dper na/__dang po rang cag lta bu nad kyis gdungs pa'i sdug bsngal de shes dgos/__de shes na de'i rgyu spang 'dod skye la/__de skyes na nad kyi sdug bsngal de dang bral ba'i bde pa thob 'dod skye zhing*/__de'i ched du sman bsten pa la 'jug pa bzhin yin pa'i phyir te/__rje btsun byams pas/__nad ni shes bya nad kyi rgyu ni spang bya la/__/bder gnas thob bya sman ni bsten par bya ba ltar/__/sdug bsngal rgyu dang de 'gog pa dang de bzhin lam/__/shes bya spang bya rig par bya zhing bsten par bya/__/zhes gsungs pa'i phyir ro/__/rgyu 'bras don gyi rim pa'i dbang du byas na/__nyon mongs phyogs kyis kun 'byung las sdug bden 'byung ni/__rnam byang gi phyogs kyi lam bden las 'gogs bden thob par 'gyur ro/__/gsum pa ni/__mtshan gzhi la mi mthun pa cher med kyang*/__mtshan nyid bzhed tshul mi 'dra ba mang na'ang*/__'dir go ba gtso bor byas na/__rang gi rgyur gyur pa'i kun 'byung bden pas lag rjes bzhag pa'i nyer len gyi phung po de sdug bden gyi mtshan nyid/__de la ngo bo'i sgo nas dbye na/__lus la tshor ba drag pos gzir ba'i gnad gcod kyi sdug bsngal lta bu sdug bsngal gyi sdug bsngal/__zas bzang po'i rol sred nas tshor ba nyams su bde ba lta bu 'gyur ba'i sdug bsngal/__las nyon gyi lag rjes bzhag pa'i phung po lnga lta bu khyab pa 'du byed kyi sdug bsngal gsum dang*/__gzhan yang 'dod khams kyi gnas 'di lta bu dang ma dag pa'i snod kyi 'jig rten dang*/__rang cag lta bu'i so skyes ma dag pa'i bcud kyi sems can gnyis/__gzhan yang dmyal ba'i lcags bsregs kyis gzhi lta bu 2/__nyer 1len gyi phung po lnga lta 2bu/__der gyur pa'i rnam smin gyi 'bras bu 1dang*/__bdag po'i 'bras 2bu 6/__yang myong tshul gyis dbye na/__skye rga na 'chi'i sdug bsngal dang*/__dgra sdang ba dang 'phrad kyis dogs pa'i/__gnyen sdug pa dang bral gyis dogs pa'i/__'dod pa btsal kyang mi rnyed pa'i/__gnas ngan len gyi sdug bsngal dang brgyad yod/__rang 'brus sdug bsngal bden pa skyed byed kyi rigs su gnas pa'i nyer len gyi phung po de kun 'byung bden pa'i mtshan nyid/__dbye na nyon mongs dang*/__las dang*/__de las gzhan pa'i kun 'byung gsum/__dang po ni/__der gyur pa'i rtsa nyon drug 'dod khro nga rgyal ma rig the tshom lta ba dang*/__nye nyon nyi shu'o/__/gnyis pa ni/__'dod pa'i bde 'gror 'phen byed srog gcod spangs pa'i las dang*/__sbyin pa byin pa'i zag bcas kyi las lta bu/__der gyur pa'i bsod nams kyi/__ngan 'gror 'phen byed/__/srog gcod dang ma byin len lta bu bsod nams ma yin pa'i/__gzugs dang gzugs med kyi lhar skye ba 'phen byed kyi las bsam gtan bzhi dang gzugs med bzhi bsgom pa lta bu mi g.yo ba'i las te gsum mo/__/gsum pa ni/__nyon mongs dang las kyi kun 'byung mtshungs ldan du gyur pa'i gtso sems lta bu'o/__/yang las kyi kun 'byung la dbye na/__der gyur pa'i sgo gsum gyi las dang*/__lung ma bstan gyi las rnams su yod/__rang thob byed kyi thabs su gyur pa'i lam bden gyi bral ba'i 'bras bur gyur pa'i so sor brtags 'gog 'gog bden gyi mtshan nyid de la sgras brjod rigs kyi sgo nas dbye na/__so sor brtags min gyi 'gog pa'am/__brdar brtags pa'i 'gog pa/__don dam pa'i 'gog pa/__de bzhin du rgyan bcas rgyan med/__lhag bcas lhag med/__yongs su rdzogs pa/__yongs su ma rdzogs pa'i 'gog pa rnams su yod/__dang po ni/__sbyor lam rtse mo pa'i rgyud kyi khong khros dge rtsa gcod pa spangs pa'i cha dang*/__sbyor lam bzod pa nas ngan 'gror skye ba spangs pa'i cha dang*/__so skye'i rgyud kyi 'dod pa'i nyon mongs mngon gyur pa la re zhig chags pa dang bral ba'i cha dang*/__dman lam sngon du ma song ba'i theg chen mthong lam bar chad med lam pa'i rgyud kyi bden 'dzin kun brtags 'gog pa'i cha lta bu'o/__/gnyis pa dang 'gog bden don gcig__/gsum pa ni/__mngon shes drug thob pa'i dgra bcom gyi rgyud kyi 'gog bden lta bu/__bzhi pa ni/__mngon shes ma thob pa'i gang zag gi rgyud kyi 'gog bden lta bu/__lnga pa dang drug pa ni nyer len gyi phung po dang bcas ma bcas sam/__thal 'gyur ba ltar na bden snang gi lhag ma dang bcas ma bcas kyi myang 'das gnyis/__bdun pa ni slob pa dang*/__brgyad pa mi slob pa'i rgyud kyi 'gog bden no/__/rang gi bral 'bras su phyur pa'i 'gog bden gyi bral rgyu byed pa'i rigs su gnas pa'i 'phags rgyud kyi mkhyen pa lam bden gyi mtshan nyid/__de la dngos brtags ma phye bar dbye na/__tshogs lam sogs lnga/__ngo bo'i sgo nas theg gsum 'phags rgyud kyi lam bden gsum du dbye'o/__/'gog lam gnyis ji ltar thob tshul ni/__rang gi ngo skal gyi spang bya kun brtags dang lhan skyes gang dngos su spong ba'i gnyen po byed pa'i 'phags pa'i ye shes kun gyis kyang rang gis dngos su 'thob par 'gyur ba'i 'gog bden rnams kyi bral rgyu byas nas/__nam ye shes de dag gis rang rang gis spang bya de rnams dngos su spangs pa de'i tshe/__spang bya de shes rgyud kyi steng du slar mi skye ba'i tshul gyis spangs pa'i tshe thob par 'gyur bas/__de la ni 'gog bden zhes bya zhing*/__de dang mnyam pa'i rnam grol rnams kyang 'gog bden gyi bral rgyu byed pa'i rigs su gnas pa'i lam bden du 'jog pa yin no/__/bzhi pa ni/__sdug kun gnyis so skye'i rgyud la yod pa gtso che zhing*/__'gog lam gnyis 'phags rgyud kho na la yod/__ma dag pa'i zhing sdug bden yin kyang dag pa'i zhing min par gsungs pas/__bde ba can dang de'i so skye rnams ni sdug bden min la/__de las gzhan pa'i so skye rnams dang*/__de'i nyer len phung po dang de dag gi rgyud kyi las nyon rnams ni sdug kun ci rigs su nges/__theg dman 'phags pa'i rgyud la nyer len gyi phung po yod pas/__sdug bden dang las kyi kun 'byung gnyis ka yod kyang*/__theg chen 'phags rgyud la sdug kun gnyis ka med pas de'i rgyud kyi las dang nyon mongs rnams dang kun 'byung min no/__/'du byed kyi sdug bsngal khams gsum kar yod/__gzhan gnyis 'dod khams ma gtogs med do/__/lnga pa ni/__bden bzhi'i rnam pa mi rtag la sogs bcu drug yod pa las/__sdug bsngal gyi bden pa'i rnam pa mi rtag sdug bsngal stong pa bdag med bzhi ste/__nyer len gyi phung po chos can/__mi rtag pa'i rnam pa yin te/__res 'ga' skye ba'i phyir/__sdug bsngal ba yin te/__las nyon gyi gzhan dbang can yin pa'i phyir/__don gzhan gyis stong ste/__dbang sgyur ba po'i bdag po'i don gzhan gyis stong pa'i phyir/__bdag med pa'i rnam pa yin te/__rang dbang pa'i bdag ma grub pa'i phyir/__de ltar dran cing bsgoms pas rim bzhin nyer len gyi phung po la rtag__/bde/__gtsang ba/__bdag tu 'dzin pa'i phyin ci log bzhi spong bar byed do/__/kun 'byung bden pa'i rnam par rgyu kun 'byung rab skye rkyen bzhi ste/__zag bcas kyi las nyon gnyis chos can/__rgyu'i rnam pa yin te/__rang 'bras sdug bsngal gyi rtsa ba yin pa'i phyir/__kun 'byung ba=__rang 'bras sdug bsngal kun yang yang bskyed pa'i phyir/__rab skye=__sdug bsngal de shugs drag tu bskyed pa'i phyir/__rkyen gyi rnam pa=__rang 'bras sdug bsngal gyi lhan cig byed rkyen yin pa'i phyir/__de ltar bsgoms pas rim bzhin sdug bsngal rgyu med du/__de rgyu gcig kho nas byas par/__de dbang phyug sogs kyis byas par/__de'ang bzhin gyis rtag la gnas skabs 'gyur bar 'dzin pa'i rtog pa rnams spong bar byed/__'gog bden gyi rnam pa la 'gog zhi gya nom nges 'byung bzhi ste/__sdug kun gtan nas spangs pa'i bral ba chos can/__'gog pa'i rnam pa yin te/__sdug bsngal spangs pa'i bral ba yin pa'i phyir/__zhi ba=__nyon mongs spangs pa'i bral ba yin pa'i=__gya nom pa yin te/__phan bde'i dngos por gyur pa'i thar pa yin pa'i=__nges 'byung =__slar mi ldog pa'i thar pa=__de ltar bsgoms pas rim bzhin/__thar pa ye med du/__zag bcas kyi khyad par 'ga' zhig thar par/__sdug bsngal gyi rang bzhin 'ba' zhig thar par/__thar pa yod kyang slar ldog par 'dzin pa'i rtog pa rnams spong bar byed/__lam bden gyi rnam pa la lam sgrub pa rig pa nges 'byin bzhi ste/__bdag med kyi don mngon sum du rtogs pa'i ye shes chos can/__lam gyi rnam pa yin te/__thar par bgrod byed kyi lam dngos sam der gtogs kyi lam yin pa'i phyir/__sgrub pa yin te/__bdag med ci rigs mngon sum du rtogs pa'i ye shes=__rig pa=__nyon mongs kyi gnyen po byed pa'i=__nges phyin gyi rnam pa=__sdug bsngal slar mi ldog par byed pa'i ye shes yin pa'i phyir/__de ltar bsgoms pas rim bzhin thar lam ye med du 'dzin pa/__bsam gtan gyi ngo bo 'ga' zhig thar lam du/__zag bcas kyi khyad par 'ga' zhig thar lam du/__sdug bsngal gtan zad pa'i thar lam med par 'dzin pa'i rtog pa rnams spong bar byed do/__/drug pa ni/__bzhi po de dag la 'phags pa'i bden pa zhes brjod pa'i rgyu mtshan yod de/__de rnams 'phags pa rnams kyis gzigs pa ltar bden cing*/__byis pa so skyes bzung ba ltar mi bden pa'i rgyu mtshan gyis de ltar brjod pa'i phyir/__bdun pa ni/__bden bzhi'i rnam gzhag ni theg pa che chung kun tu lan du mang gsungs shing*/__'khor bar 'jug ldog gi gnad rnams thams cad mkhyen pas bsdus pa yin pas rnam grol bsgrub pa la shin tu gal che zhing*/__nyams len gyi 'gags sdom yang che bas rim pa de ltar du slob dgos pa'i phyir dgos pa shin tu che par grub bo/__/gnyis pa rten 'brel bcu gnyis kyi rnam gzhag bshad pa la bdun/__spyi'i mtshan nyid/__so so'i dbye ba/__bsdu ba/__byed las tshe du la rdzogs/__bsgom tshul/__bsgoms pa'i phan yon no/__/dang po ni/__sA lu ljang pa'i mdo las bstan don rten 'brel mdo 'grel sogs las rgyas par bshad pa ltar/__de dag gi dngos bstan ni 'dus byas rten 'brel gyi dbang du byas la/__spyir ltos nas grub pa rten 'brel gyi mtshan nyid/__rang gi rgyu rkyen la ltos nas grub pa/__'dus byas rten 'brel gyi mtshan nyid do/__/gnyis pa ni/__ma rig pa nas rga shi'i bar du bcu gnyis te/__dang po ma rig pa la/__spyir las 'bras dang*/__de kho na nyid la rmongs pa'i ma rig pa gnyis su yod la/__snga mas ni ngan 'gro dang*/__phyi mas ni bde 'gro ngan 'gro gnyis kar 'phen pa'i las gsog__/de kho na nyid la rmongs pa'i ma rig pa ni/__thal rang gnyis kas bden 'dzin thams cad la byed kyang thal 'gyur bas bden 'dzin yin na ma rig pas khyab ces bzhed pa dang*/__rang rgyud pas ni de ltar mi bzhed/__rang rgyud pa man chad kyi rang sde ltar na/__gang zag rang rkya thub pa'i rdzas yod du 'dzin pa'i rtog pa rnams ni/__ma rig pa yin pas thal rang gnyis kyi lugs la 'khor ba'i rtsa ba ngos 'dzin tshul mi 'dra'o/__/gang ltar na'ang rang rang lugs kyi bdag med pa'i de kho na nyid kyi don la rmongs pa'i so skye'i rgyud kyi de 'dra'i ma rig pa de 'khor ba'i rtsa ba yin par bzhed pa ni 'dra'o/__/des na yan lag bcu gnyis kyi thog ma'i ma rig pa dang bdag med pa'i de kho na nyid la rmongs pa'i ma rig pa ste/__'di la kun brtags dang lhan skyes gnyis ka yod par bshad kyang*/__'phags pa'i rgyud la ni/__yan lag bcu gnyis kyi thog mar gyur pa'i ma rig pa med do/__/mkhas pa phal cher 'du byed kyi las kyi rgyu'i kun slong gi ma rig pa la ni las 'bras la rmongs pa'i ma rig pa mi srid ces bzhed snang yang*/__dus kyi kun slong la ni de yod do/__/gnyis pa 'du byed la ni las yin la/__de la'ang bsod nams ma yin pa/__bsod nams/__mi g.yo ba'i las te gsum mo/__/gsum pa rnam shes ni/__mdo las/__tshogs drug tu gsungs kyang 'dir gtso bo'i dbang du byas na yid shes te/__de la dge mi dge'i las bsags pa'i bag chags bsgos pa'i tshe 'di'i rnam shes ni rgyu dus kyi rnam shes yin la/__phyi mar skye gnas su nying mtshams sbyar ba na 'bras dus kyi rnam shes su 'gyur bas/__gnyis ka la rnam shes kyi rten 'brel zhes gcig tu bgrang pa'o/__/bzhi pa ming gzugs kyi ming ni/__tshor ba 'du shes 'du byed rnam shes te gzugs can ma yin pa'i ming gzhi'i phung po dang*/__gzugs ni mer mer po la sogs pa ste/__gzugs med du skye na gzugs kyi sa bon tsam las gzugs ni med do/__/lnga pa skye mched drug ni/__mngal du skye na/__dang por rnam shes khu khrag gi mer mer po dang ming rnams 'phel nas grub pa'i mig dang rna ba la sogs pa'i skye mched rnams te/__lus dang yid kyi skye mched ni sngar nas yod do/__/brdzus te skyes na rdzus skyes dbang po rnams gcig car du 'grub pas rim pa de ltar med la/__sgong dang drod skyes la ni mngal ma gtogs cha 'dra bar bshad/__drug pa reg pa ni/__yul dbang rnam shes gsum 'dus pa la brten nas yul gzugs sogs yid du 'ong mi 'ong bar ma gsum/__gang rung yongs su gcod pa'i sems byung dang po grub pa ste/__'di la mig nas yid kyi 'dus te reg pa'i bar ci rigs yod do/__/bdun pa tshor ba ni/__reg pas yul gsum gang rung bcad pa dang rjes su mthun par/__zag bcas kyi tshor ba bde sdug btang snyoms gsum gang rung skyes pa'o/__/'di la'ang sngar bzhin yod/__brgyad pa sred pa ni/__tshor ba bde ba la ni mi 'bral ba dang sdug bsngal la 'bral 'dod kyi sred pa'am/__btang snyoms gang rung la sred pa gang rung ste/__'di la 'dod sred/__srid sred/__'jig sred gsum/__dgu pa len pa ni/__sred pa de nyid cher 'phel ba'i 'dod chags te/__'di la 'dod pa nye bar len pa/__lta ba/__brtul zhugs/__bdag tu smra ba'i nyer len bzhi/__dang po ni/__gzugs sogs 'dod yon la chags pa/__gnyis pa ni/__'jig lta ma yin pa'i lta ngan la chags pa/__gsum pa ni/__tshul khrims dang brtul zhugs dman la chags pa/__bzhi pa ni/__'jig lta la 'dun zhing chags pa'i sred pa/__bcu pa srid pa ni/__sngar 'du byed kyi las kyi bag chags rnam shes la bsgos pa de nyid sred len gnyis kyis gsos btab nas yang srid phyi ma 'dren pa nus mthu can du song ba'i skabs kyi las te/__srid pa zhes pa ni 'bras ming rgya la btags pa'o/__/'di la khams gsum gyi las gsum/__bcu gcig pa skye ba ni/__srid las kyi mthus skye gnas bzhi po gang rung du rnam shes dang por nying mtshams sbyang ba de/__'di la mngal du nying mtshams sbyar ba sogs bzhi'am/__khams gsum gyi nying mtshams sbyang ba gsum/__'di'i skye ba nying mtshams sbyar ma thag pa'i gnas skabs kyi phung po lnga dang*/__kha cig mngal nas phyi rol du btsa' ba la de 'jog mod/__'dir ni nying mtshams sbyar ba'i cha dang por 'dod do/__/bcu gnyis pa rga shi la/__rga ba ni phung po smin cing gzhan du 'gyur ba'i cha yin la/__shi ba ni phung po ris mthun pa 'dor ba'am dor ba'o/__/de gnyis yan lag gcig tu 'jog pa ni/__de gnyis go rim ma nges pa'i rgyu mtshan gyis so/__/mya ngan dang smre sngags 'don pa la sogs pa ni yan lag tu 'gyur bar ma nges par zhar byung tsam ste skyo ba bskyed pa'i ched du gsungs so/__/gsum pa la gnyis te/__mdor bsdu ba dang*/__kun nas nyon mongs pa'i bsdu ba'o/__/dang po ni/__yan lag bcu gnyis po de rgyu 'bras kyis bsdus te/__'phen byed dang*/__'grub byed kyi rgyu 'bras gnyis kyis bsdus pa'i phyir/__de yang ma rig pa/__'du byed/__rgyu dus kyi rnam shes gsum ni/__'phen byed kyi rgyu dang*/__'bras dus kyi rnam shes dang ming gzugs skye mched drug__/reg pa chor ba ste phyed dang lnga ni 'phangs pa'i 'bras bu dang*/__sred len srid pa gsum 'grub byed kyi rgyu dang*/__skye rga gnyis ni/__grub pa'i 'bras bu'i yan lag tu 'du'o/__/gang 'phang na/__'bras dus ni rnam shes nas tshor ba'i bar yan lag phyed lnga'o/__/gang gis 'phangs na/__ma rig pa'i rkyen gyis 'du byed kyi las kyis so/__/ji ltar 'phangs na rgyu dus kyi rnam shes la las kyi bag chags bsgos pa'i tshul gyis so/__/'phangs pa'i don ni/__sred pa sogs 'grub byed yod na 'bras bu de rnams 'grub rung du byas pa'o/__/gang gis 'grub par byed na srid pa'i rkyen gyi len pas so/__/gang 'grub na skye ba dang rga shi'o/__/ji ltar 'grub par byed ce na/__'du byed kyis rnam shes la bsgos pa'i las kyi bag chags des nus mthu can du byas pa'i tshul gyis so/__/des na 'di'i 'phangs pa'i yan lag dang grub pa'i yan lag don gnyis ngo bo gcig go__/gnyis pa ni/__ma rig sred len gsum nyon mongs pa'i kun 'byung*/__'du byed dang srid las gnyis las kyi kun 'byung 'bras dus kyi rnam shes sogs bdun ni sdug bden du 'du'o/__/bzhi pa byed las ni/__ma rig pas de kho na nyid la sgrib/__'du byed kyis yang srid phyi ma'i sa bon 'debs/__rnam shes kyis skye gnas su 'khrid/__ming gzugs kyis lus 'dzin/__skye mched kyis lus rdzogs/__reg pas yul gyi 'gyur ba spyod/__tshor bas rnam smin spyod/__sred pas phung po slar sdud/__len pas phung po 'grub pa la sbyor/__srid pas phyi ma'i phung po mngon du 'gyur/__skye ba dang rga shis rang rang gar la ldan pa'i gang zag de sdug bsngal bar byed do/__/lnga pa ni/__myur na tshe gnyis dang*/__bul na gsum gyis rdzogs la/__kha cig tshe bzhir rdzogs pa'ang yod ces gsungs/__dang po skyes nas myong 'gyur gyi dbang du byas pa ste/__dper na mi 'ga' zhig ma rig pas kun nas bslangs te/__rgyu dus kyi rnam shes kyis 'dod lhar skye ba'i 'du byed kyi las bsags/__las de 'chi ka tshun sred len gnyis kyis gsos btab nas srid las nus ldan du byas te skye ba blangs na tshe snga mar phyed drug__/phyi ma lhar bskyed pa'i tshe 'bras dus kyi rnam shes sogs phyed bdun 'grub par 'gyur bas so/__/gnyis pa ni/__lan grangs gzhan la myong 'gyur gyi dbang du byas pa ste/__dper na mi zhig gis rten de yang ma rig pa'i stobs kyis rnam shes kyi steng du las kyi bag chags bzhag pas de la sred len gnyis kyis gsos ma btab par dud 'gror skyes/__rten de la sred len gnyis kyis gsos btab nas srid las nus pa can du byas nas 'dod lhar skyes kyi skye ba blangs pa'i tshe/__yan lag dang po gnyis tshe dang po/__srid len srid pa gsum gnyis pa/__lhag ma rnams tshe gsum pa la rdzogs pa bzhin no/__/gsum pa slar len na ni sred pas gsos btab kyang*/__len pas gsos ma btab pa zhig 'dod dgos so/__/'di dag ni theg pa chen po'i dbang du byas pa ste/__mdo sde dang*/___/bye smra ba'i lugs cung zad mi 'dra pa yod do/__/gsum pa ni/__yan lag dang por rig pa 'khor rtsar 'gyur tshul spyi dang*/__khyad par de'i rkyen gyis 'du byed 'byung ba nas/__skye ba'i rkyen gyis rga shi 'byung ba'i bar ni nyon mongs phyogs kyi rten 'brel lugs mthun dang*/__rga shi gang nas 'byung na skye ba las 'byung ba nas/__'du byed ma rig pa las 'byung ba'i bar ni nyon mongs pa'i phyogs kyi rten 'brel lugs ldog__/ma rig pa 'gag pa nas 'du byed 'gags nas/__skye ba 'gags pa nas rga shi 'gags pa'i bar rnam byang phyogs kyi rten 'brel lugs mthun dang*/__gang 'gags pas rga shi 'gag snyam na/__skye bu 'gags pas rga shi 'gags so zhes pa nas/__ma rig pa 'gags pas 'du byed 'gags pa'i bar ni rnam byang phyogs kyi rten 'brel lugs ldog tu bsgom par bya'o/__/de la'ang dang po gnyis ltar bsam pa ni/__rim bzhin sdug kun gnyis shes par byed pa yin la/__phyi ma gnyis ltar bsam pa ni/__'gog lam gnyis sgom par byed pa yin no/__/bdun pa ni/__'phags pa klus/__rten cing 'brel bar 'byung 'di rgyal ba yi/__/gsung gi mdzod kyi gces pa zab mo ste/__/gang gis 'di ni yang dag mthong ba des/__/sangs rgyas de nyid rig pa rnams mchog mthong*/__/zhes sogs phan yon dpag tu med do/__/gsum pa 'chi 'pho ji ltar byed tshul la gnyis te/__dngos dang*/__zhar byung ngo*/__/dang po la lnga/__'chi ba'i rkyen/__'chi ba'i sems/__drod sdud tshul/__bar do 'grub lugs/__skye srid du nyid mtshams sbyor tshul lo/__/dang po la gnyis/__tshe zad nas dus kyis 'chi ba dang*/__ma zad kyang dus min gyi 'chi ba'o/__/phyi ma la'ang*/__bsod nams zad nas nad sogs kyis 'chi ba dang*/__gzhan yang dus min gyi 'chi rkyen dgu mdo las gsungs so/__/gnyis pa ni/__dge mi dge lung ma bstan gyi sems gsum ci rigs su 'byung la/__spyir dge ba byed pa rnams dge sems dang*/__mi dge ba byed pa rnams sdig pa byung mod/__dmigs bsal la ma nges shing*/__de dag 'du shes rags pa rgyu ba'i tshe yin phyi/__phra mo'i skabs su ni lung ma bstan gyi sems kho nar 'gyur ro/__/gsum pa ni/__mi dge ba chen po byed pa rnams drod stod nas dang*/__dge ba chen po byed pa rnams kyi drod smad nas sdud la/__gnyis ka'ang drod snying ga'i bar bsdus te rnam shes 'pho'o/__/bzhi pa ni/__rnam shes phyir 'pho ba dang bar chad med par srang mda'i mtho dman bzhin du bar do 'grub ste/__'gro ba gang du skye bar 'gyur ba de'i lus dbyibs can du 'gyur ro/__/'on kyang gzugs med khams su skye ba'i tshe bar do med do/__/lnga pa la gnyis/__dngos dang*/__'phros don no/__/dang po ni/__mngal du skye na/__bar do ba des rang dang ris mthun pa'i sems can dag mthong nas de dag la lta ba dang*/__rtse ba sogs byed la/__pha ma'i khu khrag la phyin ci log tu mthong pa'i blos de dang nye bar lhags pa na bud med de'i dbang po tsam zhig ma gtogs gzhan gang yang mi snang bar gyur pas khros te shi 'phos nas nying mtshams sbyor ro/__/nying mtshams sbyar ma thag gi rnam shes ni/__yid shes kho na ste gzhan ni de'i tshe med do/__/der mer mer po dang*/__de las gzhan pa'i 'byung ba cha phra ba rnams dang 'dres nas rim gyis 'phel te/__zhag bdun phrag so brgyad lhag tsam nas phyir btsa' bar 'gyur te/__'di dag gi rnam gzhag zhib pa ni dga' bo mngal 'jug gi mdo las rgyas par 'byung ngo*/__/dmyal ba phal cher dang dud 'gro dang yi dwags dang mi dang 'dod gzugs kyi lhar skye na ni/__rang dang ris mthun pa'i sems can mthong ste/__der song na skye gnas la khros pa'i rkyen gyis bar srid 'gags nas skye srid du nyid mtshams sbyor la/__'on kyang lug dang phag dang bya ri dwags mang po gsod pa'i sdig can dmyal bar skye nges pa rnams la bar srid nas lug dang phag sogs de dag rmi lam bzhin du mthong nas sngon goms kyi dga' bas der rgyug go/__/de nas skye ba'i gnas la khros pas bar srid 'gags te skye srid du 'pho bar 'gyur ro/__sgor skyes ni phal cher mngal skyes dang 'dra zhing*/__drod gsher skye na dri dang*/__rdzus skyes kyis gnas 'dod cing*/__tsha dmyal du skye na drod dang*/__grang dmyal du skye na bsil bar 'dod pas rkyen byas nas nying mtshams sbyor bar bshad do/__/gnyis pa ni/__dbu ma pa'i lugs kyi dbang du byas pa'i rten 'brel yan lag bcu gnyis kyi sgo nas 'khor bar 'khor tshul legs par shes dgos/__de yang phung po 'di nyid bdag ma yin la/__phung po 'di las don gzhan pa'i gang zag rang rkya thub pa'i bdag zhig 'jig rten pha rol tu 'gro ba ma yin gyi/__phung po la brten btags pa'i nga tsam zhig sgyu ma lta bu'i chos rten 'brel bcu gnyis la brten pa'i tshul gyis kun rdzob tsam du 'khor bar 'khor ba'i tshul legs par shes par bya'o/__/de ltar 'khor ba'i tshe rnam shes 'di nyid 'di nas phyi mar nying mtshams sbyor tshul dang*/__de la dpe ci 'dra zhig yod ce na/__theg pa chen po'i lugs kyi rnam shes phyi mar nying mtshams sbyor tshul mdo las bshad pa'i don go sla bar brjod na/__bla mas slob mar/__na mo bud+d+hA ya lta bu'i kha ton blo thog nas ngag gis bslab nas slob ma des blor bzung nas brjod tshe/__slob dpon gyi ngag slob ma la 'khos pa ma yin te/__yin na bla ma la slar de 'dra'i ngag brjod rgyu med par 'gyur ro/__/slob mas bla ma'i gsung la ma brten par byung ba'ang min te/__yin na rgyu med par 'gyur ba'i phyir ro/__/dpe de bzhin shi nas phyi mar nying mtshams sbyor tshe 'chi ka'i rnam shes de nyid ngo bos 'gyur med du phyi ma'i rnam shes su 'pho ba yin te/__yin na de rtag par 'gyur bas skye ba len pa yang mi 'thad do/__/phyi ma'i rnam shes de 'chi ka'i rnam shes de la ma brten par mi 'byung ste/__'byung na rgyu med par thal ba'i phyir ro/__/de ltar na'ang bla mas brjod pa'i rgyu las slob ma'i ngag 'byung ba ltar snga ma'i rnam shes kyi rgyun las phyi ma'i rnam shes nyid 'byung la/__bla ma'i ngag dang slob ma'i ngag gcig tu mi rung ba bzhin tshe 'di'i 'chi ga ma'i rnam shes dang*/__phyi mar nying mtshams sbyar ba'i rnam shes gnyis gcig ma yin zhing*/__slob ma'i ngag de bla ma'i ngag thos pa las byung ba ltar/__phyi ma'i rnam shes yang snga ma'i rnam shes la brten nas byung ba yin gyi/__glo bur du gzhan byung ba'ang min no/__/de bzhin du mar me las mar me gnyis pa chad pa/__me long du byad 'char ba/__lha sku sogs spar gyi rgya las de 'dra'i ri mo 'byung ba/__me shel las me 'byung ba/__sa bon las myu gu 'byung ba/__shing tog sogs skyur mo mthong bas 'gram chu ldang ba dang*/__sgra grags pa las brag ca 'byung ba rnams la'ang sngar bshad pa'i rig pas sbyar bar bya'o/__/'chi 'pho tha snyad du yod kyang don dam par med par rtogs pas mtha' gnyis dang bral ba'i dbu ma'i lam du grub pa yin pa bzhin 'dus byas thams cad kyi skye ba dang 'gag pa la'ang de bzhin du sbyar bar bya'o/__/gnyis pa zhar byung ni/__bla med kyi lugs la bden 'dzin gyi ma rig pas 'khor ba mar 'khyams pa'i rtsa ba byas te/__shin tu phra ba'i rlung sems tsam la brten nas btags pa'i nga nyid kyi steng du las kyi bag chags bsgos nas phyi mar skye ba rnams su nyid mtshams sbyor bar 'gyur ba yin te/__rdo rje phreng bar/__skye dang gnas dang 'jig pa dang*/__/srid pa bar mar gnas pa ste/__/ji srid 'jig rten gyis btags bas/__/sems ni rlung gi rnam 'phrul lo/__/zhes gsungs pa'i phyir/__ces pa'ang nyer 'kho'i le'u tshan no/__/shu b+haM//_