PJCW-KABUM-06-CHA-028

🚧 This website is under continued development. We appreciate your patience!

Previous Text Back to Volume PageNext Text

Wylie title	nges 'byung byang sems yang dag pa'i lta ba sogs chos kyi lus tshang bar nyams su len tshul kun bzang chos rgyal la gdams pa
Location	dpal sprul bka' 'bum Volume 6, Text 25, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Advice - zhal gdams

Tibetan Text

[edit]

༄༅། །ངེས་འབྱུང་བྱང་སེམས་ཡང་དག་པའི་ལྟ་བ་སོགས་ཆོས་ཀྱི་ལུས་ཚང་བར་ཉམས་སུ་ལེན་ཚུལ་ཀུན་བཟང་ཆོས་རྒྱལ་ལ་གདམས་པ།

རྒྱལ་དང་རྒྱལ་བའི་སྲས་པོ་ཇི་སྙེད་པ། །ཀུན་གྱི་ཐུགས་རྗེ་བྱིན་རླབས་འདུས་པའི་དཔྱིད། །དྲིན་ཆེན་བླ་མ་རྫོགས་པའི་སངས་རྒྱས་དངོས། །མི་འབྲལ་སྤྱི་གཙུག་རྒྱན་དུ་རྟག་པར་བཞུགས། །གང་ཞིག་འཁོར་བའི་གནས་ཀུན་ཉེས་པའི་སྣོད། །དུག་སྦྲུལ་གཟེབ་དང་འདྲ་བར་ལེགས་མཁྱེན་ནས། །ཡང་དག་ཐར་པའི་ལམ་ལ་འབྱོན་བཞེད་པ། །དེ་དག་ཀུན་གྱི་ལག་ལེན་འདི་ལྟར་ལགས། །དང་པོ་ངེས་འབྱུང་ཆོས་ཀྱི་མགོ་ཡིན་པས། །ཡ་ཀི་དགའ་ལྡན་ལྷ་ཡུལ་མན་ཆད་ནས། །མ་ཀི་ངན་སོང་གནས་གསུམ་ཡན་ཆད་ཀྱི། །འཁོར་བའི་གནས་ འདི་མེ་ཡི་འོབས་ལྟ་བུར། །ཤེས་ནས་ཐེག་གསུམ་ལམ་ལ་སློབ་པ་དགོས། །བར་དུ་བྱང་སེམས་ཆོས་ཀྱི་ལུས་ཡིན་པས། །འགྲོ་བ་འདི་ཀུན་ཕ་དང་མར་ཤེས་ནས། །དེ་དག་དོན་དུ་སངས་རྒྱས་ཐོབ་འདོད་བློ། །བཅོས་མ་མིན་པར་སྙིང་ནས་སྐྱེ་བ་དགོས། །ཐ་མ་ཡང་དག་ལྟ་དང་དེའི་ཉམས་ལེན། །ས་ལམ་མྱུར་བགྲོད་ཆོས་ཀྱི་རྐང་པ་སྟེ། །སྣང་སྲིད་ཆོས་ཀུན་སྤྲོས་བྲལ་སྟོང་པའི་ངང་། །ལུང་དང་རིགས་པས་གཏན་ལ་འབེབས་པ་ལགས། །འཁོར་འདས་ཆོས་ཀུན་རྩ་བ་རང་གི་སེམས། །སེམས་ནི་དང་པོ་བྱུང་བའི་ཡུལ་མེད་ཅིང་། །བར་དུ་གནས་པའི་གཞི་མེད་སྟོང་པ་ཉིད། །ཐ་མ་འགྲོ་འོང་བྲལ་བ་གཉུག་མའི་ངང་། །བྱུང་གནས་འགྲོ་གསུམ་བྲལ་བའི་རང་སེམས་ལ། །བལྟར་མེད་རང་ངོ་བལྟས་ན་སྟོང་པར་མཐོང་། །སྟོང་ཉིད་ལོགས་སུ་མེད་དེ་སེམས་ཀྱི་གཤིས། །ཡུལ་མེད་ཟང་ཐལ་མཐོང་ན་ལྟ་བ་ལགས། །གནས་ལུགས་ལྟ་བའི་ཉམས་ལེན་དེའི་ངང་དུ། །རྩལ་སྣང་འཁྲུལ་པའི་རྣམ་རྟོག་ཅི་ཤར་ཡང་། །སྤང་བླང་ཆེད་འཛིན་མེད་པར་ཕྱམ་བརྡལ་བའི། །ཡེངས་སྒོམ་བྲལ་བའི་མཉམ་བཞག་སྒོམ་པ་ལགས། ། ཡུལ་སྣང་དགའ་སྡུག་ཆགས་སྡང་རེ་དོགས་བློ། །གང་ལའང་སྤང་བླང་དགག་སྒྲུབ་མི་བྱ་བར། ། ཐམས་ཅད་མཉམ་པའི་ངང་ནས་འགྲོ་དང་འདུག །སྒྱུ་མའི་རོལ་བར་འཆར་བ་སྤྱོད་པ་ལགས། ། མདོར་ན་རང་ངོ་ཤེས་པ་ལྟ་བ་ལ། །དེ་ཡི་ངང་ལ་གནས་པ་སྒོམ་པ་སྟེ། །དེ་ཉིད་རྐྱེན་དང་བསྲེ་བ་སྤྱོད་པའི་གནད། །ལྟ་སྒོམ་སྤྱོད་འབྲས་ཐ་དད་མེད་པ་ལགས། །ལྟ་བ་གང་ཡང་ཞེན་པ་མེད་པ་གཙོ། །སྒོམ་པ་གང་ཡང་འཛིན་པ་མེད་པ་གནད། །སྤྱོད་པ་གང་ཡང་ཆོས་དང་མཐུན་པ་མཆོག །ལྟ་སྒོམ་སྤྱོད་འབྲས་གཅིག་ཏུ་འདྲིལ་བ་གནད། །ཅི་ནས་རང་གི་སེམས་ལ་མི་ཕན་པའི། །ཆོས་དེ་ཁ་ཆོས་ཡིན་གྱི་དོན་ཆོས་མིན། །རང་གི་སེམས་ལ་ཁྱད་པར་མི་འདུག་ན། །ལོ་བརྒྱར་མཚམས་སྒྲུབ་བྱས་ཀྱང་ངལ་བའི་རྒྱུ། །དེ་ཡང་ཡང་དག་ཆོས་ཀྱི་གནད་འགག་ཀུན། །དོར་ནས་གཟུགས་བརྙན་སྒྲུབ་པའི་སྒྲུབ་པ་པོས། །ནེ་ཙོའི་འདོན་པ་ལྟ་བུའི་ཉམས་ལེན་འདི། །འཁྲུལ་མེད་རྒྱལ་བསྟན་ཡིན་སྙམ་བདག་ལ་མེད། །ལོ་མཚམས་ཟླ་མཚམས་ཁ་གྲངས་གྲངས་རྫོགས་ཤིང་། །དུང་ཕྱུར་དུང་ཕྱུར་བཟླས་པའི་གྲངས་འཁྱོལ་ཡང་། །སེམས་ལ་ཆགས་སྡང་རྨོངས་གསུམ་མ་བྲི་ན། །ཆོས་དེ་དོན་མེད་ཁོ་ན་ལགས་སྙམ་བགྱིད། །བསྐྱེད་རྫོགས་མེད་པའི་ཆོ་ག་ཐུན་བཞི་དང་། །དག་དྲན་མེད་པའི་རྔ་རོལ་འུར་ཆེམས་དང་། །ཏིང་འཛིན་མེད་པའི་བཟླས་བརྗོད་འབུག་འབུག་འདི། །ཐར་པའི་ལམ་ལ་ཕྱོགས་ཙམ་ཉེ་རེ་ཀན། ། གལ་ཏེ་བསྐྱེད་རྫོགས་ཏིང་འཛིན་ཡོད་ན་ཡང་། །ཡང་དག་བྱང་ཆུབ་སེམས་དང་མ་འབྲེལ་ན། །འཁྲུལ་སྣང་འཁོར་བར་སྐྱེ་བའི་ས་བོན་ལས། །རྣམ་མཁྱེན་གོ་འཕང་འཐོབ་ལ་མི་ཕན་ནོ། །དེས་ན་གནད་དོན་མེད་པའི་ཆོས་གཟུགས་དང་། །འཁྲུལ་སྣང་ཚེ་འདི་སྒྲུབ་པའི་བན་འཁྱམས་དང་། །དཀོར་ཟན་དལ་ཁོམ་མེད་པའི་བླ་ཆུང་གི །ལད་མོ་མ་བྱེད་རང་སེམས་ཆོས་ཀྱིས་ཐུལ། །སེམས་ཐུལ་སེམས་ཐུལ་རང་སེམས་ཆོས་ཀྱིས་ཐུལ། །བློ་ལྡོག་རྣམ་བཞིས་རང་ གི་སེམས་ཐུལ་ན། །ལྟ་སྒོམ་བཟླས་བརྗོད་བསྐྱེད་རྫོགས་མེད་ན་ཡང་། །ཐར་པའི་ལམ་ལས་ གཞན་དུ་འཕྱུགས་པ་མེད། །བློ་སྦྱོངས་བློང་སྦྱོངས་རང་གི་བློ་འདི་སྦྱོངས། །བྱང་ཆུབ་སེམས་ཀྱིས་རང་གི་བློ་སྦྱངས་ན། །ལུས་ངག་དགེ་བ་སྣ་གཅིག་མ་འགྲུབ་ཀྱང་། །རང་གཞན་དོན་གཉིས་མ་འབད་ཤུགས་ཀྱིས་འགྲུབ། །གལ་ཆེན་བྱང་ཆུབ་སེམས་ལ་ཐུན་གཅིག་ཀྱང་། ། ཉམས་ལེན་མི་བྱེད་བསྐྱེད་རྫོགས་སྒོམ་ལོ་དང་། །བཟླས་བརྗོད་བྱེད་ལོ་ཆོས་པའི་གཟུགས་བརྙན་འདིའི། །ཁ་དེ་གྲོང་ཚོ་དགུ་ཡི་སྐྱག་པས་ཆོད། །གྲོགས་ཁྱེད་ཡང་དག་ཆོས་ཤིག་སྒྲུབ་དགོས་ན། །བློ་སྦྱོངས་བློ་སྦྱོངས་སྙིང་རྗེ་བྱང་སེམས་སྦྱོངས། །གལ་ཆེན་ལན་དགུ་བཟླས་འདི་ དགོངས་མཛད་ནས། །རང་སེམས་ཆོས་ཀྱིས་ཐུལ་དང་གནད་དེ་ལགས། །ཁོ་བོས་ཡང་དག་བླ་མ་མང་བསྟེན་ཞིང་། །ཕྱོགས་མེད་གྲུབ་མཐར་ཐོས་བསམ་རྒྱ་ཆེར་བྱས། །གནད་དོན་སྙིང་པོར་བཏོན་ན་ཚིག་གཅིག་ཡིན། །ཚིགས་འདི་དཔེ་ལ་མ་བཞག་ཉམས་སུ་ལོངས། །ཞལ་གདམས་ཞལ་གདམས་ཟེར་མཁན་མང་ན་ཡང་། །དཔེ་བྲིས་ཤོག་བུར་དྲིལ་ནས་ཉར་ཚག་བྱེད། །དེ་དོན་ཅི་ཡོད་ཙམ་ཡང་མི་ལྟ་ན། །དོན་མེད་ཡི་གེ་བྲིས་པ་ངལ་བའི་རྒྱུ། །དེ་འདྲའི་རང་བཞིན་མ་བྱེད་སྐུ་ཚེ་རིང་། །དེ་དོན་ཉམས་སུ་ལོངས་མཛོད་སྐུ་ཚེ་རིང་། །དེ་འབྲས་འདི་ཕྱིར་མངོན་འོངས་སྐུ་ཚེ་རིང་། །ཞལ་གདམས་དེ་ལས་མེད་དོ་སྐུ་ཚེ་རིང་། །སྐུ་ཚེ་རིང་མཛོད་ཀུན་བཟང་ཆོས་རྒྱལ་ཁྱེད། །ལུགས་གཉིས་བྱ་བཞག་བྲལ་བའི་སྤྲང་འཁྱམས་བདག །བླ་མར་མཐོང་ན་ཞལ་གདམས་དེ་ཡིན་ནོ། །གྲོགས་པོར་མཐོང་ན་སྙིང་གཏམ་དེ་ཡིན་ནོ། །རྒྱལ་འཕགས་དགོན་དུ་ཀུན་བཟང་ཆོས་རྒྱལ་ལ་གདམས་པ་དགེ། དགེའོ། །

༄༅། །ཐོས་བསམ་སྒོམ་གསུམ་ཡུལ་དང་བཅས་པའི་རིམ་པ་མ་ནོར་བར་སློབ་ཚུལ་ལྷུན་གྲུབ་རྡོ་རྗེར་གདམས་པ། རྟག་ཏུ་རྒྱལ་བ་ཀུན་དང་སེམས་ཅན་གྱི། །སྙིང་ལ་བདེ་ཆེན་རོ་གཅིག་ཡེ་ཤེས་སེམས། །འཇམ་ པའི་དབྱངས་དེ་ང་དང་ཁྱོད་ཀྱི་ཡང་། །བྱང་ཆུབ་བར་དུ་རིགས་བདག་དགེ་གྱུར་ཅིག །ངན་སྤྱོད་སྣ་དགུ་བག་མེད་བྱུང་རྒྱལ་གྱིས། །རྒྱུས་ཡོད་ཡིད་ལ་སུན་པ་བསྐྱེད་ཟིན་ཡང་། རྒྱུས་མེད་ཡུལ་ནས་ལྷུན་གྲུབ་རྡོ་རྗེ་དེས། །བཟང་པོར་མཐོང་ནས་ཨ་བུ་ཧྲལ་པོ་བཀུར། །མ་སྨིན་སྨིན་འདྲའི་ཕྱི་ཡི་ཚུལ་དཔགས་ནས། །ཨ་མྲའི་རོ་བཞིན་ཆོས་དོན་བླང་འདོད་དེ། །སྤང་བླང་གནས་ལ་རྩོམ་པ་གྱིས་ཤིག་ཅེས། །ནན་གྱིས་བསྒོས་ནས་བྲི་གཞིའི་ལྡེབ་མའང་བྱིན། །དམ་པའི་ཞལ་གདམས་དམན་པས་ཉན་རིགས་ཀྱང་། །གདོལ་པའི་གཏམ་ལ་སུ་ཡིས་ཡིད་ཆེས་འོས། །འོན་ཀྱང་རི་དྭགས་རོ་ལས་གླ་རྩི་བཞིན། །ལེགས་པར་བཤད་པ་ཀུན་ལས་བླང་འོས་ཡིན། །དམ་པ་དུ་མས་ཐུགས་རྗེས་བཟུང་བ་དང་། །མཁས་པའི་གཞུང་ལ་ཅུང་ཟད་སྦྱངས་པའི་མཐུས། །ཉམས་སུ་མ་བླངས་ནེ་ཙོའི་འདོན་པ་ལྟའི། །ལེགས་བཤད་སྨྲ་བ་ལྷ་ཡུལ་བྱ་བཞིན་དབང་། །དེ་སླད་སྤོབས་པ་བསྐྱེད་དེ་ཐོས་པ་དང་། །བསམ་དང་སྒོམ་པའི་གནས་ལས་ལེགས་བརྩམས་ཏེ། །ཁྱོད་ལ་ཅུང་ཟད་གསོལ་གྱིས་འདིར་གསོན་ལ། །བླང་འོས་ལགས་ན་བུང་བས་སྦྲང་བཞིན་བྱེད། །ཀྱེ་ལགས་ཐོས་པ་རིན་ཆེན་སྒྲོན་མེ་སྟེ། །ཐར་ལམ་སྣང་བྱེད་ལམ་དང་ལམ་མིན་འབྱེད། །བླང་དོར་གོ་འབྱེད་མིག་དང་འདྲ་བས་ན། །ལམ་ཞུགས་རྣམས་ཀྱིས་ཅིས་ཀྱང་བསྟེན་འོས་ཡིན། །དྲུག་པའི་ས་བརྙེས་རྒྱལ་སྲས་ཆེ་རྣམས་ཀྱང་། །ཚིགས་བཅད་གཅིག་ཕྱིར་སྟོང་གསུམ་མེ་མདག་གིས། །གང་ལས་འབོག་ནས་ཐོས་པ་འཚོལ་མཛད་ན། །གནས་འདི་འདོར་ལ་ལམ་བཟང་ཇི་ལྟར་ཡོད། །ཐར་པའི་ཆ་མཐུན་ཚོགས་ཀྱི་ལམ་མཆོག་ཏུ། །ཐོས་པ་ཁོ་ནས་རང་རྒྱུད་གྲོལ་དགོས་ཀྱི། །སྒོམ་པའི་ཡེ་ཤེས་ཅིག་ཅར་སྐྱེ་དཀའ་བས། །ཤེས་རབ་གསུམ་ལས་དང་པོར་ཐོས་པ་བསྔགས། །ཐོས་བྲལ་གང་ཟག་བསམ་དང་སྒོམ་པ་ལ། །སྦྱོར་བར་རློམ་ཡང་ལམ་དང་ལམ་མིན་པ། །ཤེས་པ་མེད་པས་ལམ་གོལ་གཡང་ས་རུ། །མུན་པར་རྡོ་འཕེན་རང་རྒྱུད་བསླུས་པ་མང་། །ཐོས་པ་བྱ་བ་གསུང་རབ་རིན་པོ་ཆེ། ། རྒྱལ་བའི་སྡེ་སྣོད་བྱིན་རླབས་འོད་སྣང་ཅན། །ཚིག་གཅིག་ཐོས་ཀྱང་བསྐལ་མང་སྒྲིབ་སྦྱོང་བའི། །ཁྱད་ཆོས་དགོངས་ལ་ཉན་ཀློག་ལྟ་བ་བརྩོན། །རྒྱལ་དང་རྒྱལ་སྲས་སེམས་དཔའ་ཆེ་རྣམས་ཀྱི། །མཛད་པའི་ཚུལ་དང་བསམ་གྱིས་མི་ཁྱབ་པའི། །ཆོས་ཚུལ་མཐོང་ནས་ཐུན་མོང་མ་ཡིན་པའི། །མོས་གུས་སྐྱེ་ངེས་ཆོས་ཀྱི་བྱིན་རླབས་ཡིན། །འདི་ལ་མོས་བློ་སྐད་ཅིག་སྐྱེས་པས་ཀྱང་། །བསྐལ་མང་སྒྲིབ་བྱང་ཚེ་རབས་ཐམས་ཅད་དུ། །དཀོན་མཆོག་མི་འབྲལ་རྒྱལ་དང་རྒྱས་སྲས་དྲུང་། །པདྨོའི་སྟན་གནས་དམ་ཆོས་ཉན་པར་དབང་། །དེ་སླད་གཉིས་སུ་མེད་གསུང་སངས་རྒྱས་ཀྱི། །གསུང་རབ་ཐོག་མཐའ་བར་དུ་དགེ་བ་སྟེ། །འཁྲུལ་མེད་ལེགས་བཤད་གཅིག་པུ་ཤེས་ཀྱིས་ལ། །ཐོས་པའི་སྒོ་ཆེན་དང་པོ་ཕྱོགས་འདིར་དབྱེ། །བཀའ་ཡི་དགོངས་འགྲེལ་ཕུན་ཚོགས་བསྟན་བཅོས་གཞུང་། །འཕགས་ཡུལ་རྒྱན་དྲུག་ཞི་ལྷ་ཟླ་གྲགས་དང་། །ཡོངས་གྲགས་གྲུབ་བརྙེས་རྒྱལ་བ་དངོས་འདྲ་བའི། །ལེགས་བཤད་ཐོས་བསམ་འཇུག་ སྒོ་གཉིས་བར་བཟུང་། །ཁྱད་པར་འཇམ་པའི་དབྱངས་དངོས་ཞི་བ་ལྷའི། །གཞུང་བཟང་བྱང་ཆུབ་ལམ་གྱི་སྲོག་གཅིག་པུར། །བཟུང་ནས་གྲུབ་བརྒྱའི་སྤྱི་མེས་ས་ར་ཧའི། །དོ་ཧའི་སྐོར་ལས་བློ་བྲལ་ཡེ་ཤེས་བཙལ། །ལྔ་རིག་སྣང་བའི་ཉིན་བྱེད་ས་པན་རྗེ། །མདོ་སྔགས་ལེགས་བཤད་འབྱུང་གནས་ཙོང་ཁ་པ། །ཡོངས་རྫོགས་བསྟན་པའི་མངའ་བདག་ཀློང་ཆེན་པ། ། གངས་ལྗོངས་འཇམ་པའི་དབྱངས་དངོས་རྣམ་གསུམ་ཡིན། །ཕྱོགས་ལྷུང་གདོན་གྱི་དབང་དུ་མ་གྱུར་པས། །རྣམ་གསུམ་མཁས་པའི་གཞུང་ལ་ལེགས་སྦྱངས་ན། །ཡོངས་རྫོགས་རྒྱལ་བའི་བསྟན་པ་རིན་པོ་ཆེ། །ཇི་སྙེད་གཟུངས་དང་སྤོབས་པའི་ཡུལ་དུ་འགྱུར། །མཁས་པའི་གཞུང་ལ་གོམས་པ་ཆེར་བསྐྱེད་ནས། །འཁྲུལ་མེད་ལམ་ལ་ངེས་ཤེས་མ་ཐོབ་བར། །རྟོག་གེ་ཟོལ་མའི་ཆགས་སྡང་བསྟན་བཅོས་དང་། །རྫུན་གཏེར་ཟོག་པོའི་བསླུ་ཆོས་དུག་ལྟར་འཛེམ། ། རང་བློ་ཡང་དག་ལམ་ལས་མི་ཕྱེད་ཅིང་། །སྤང་བླང་གནས་ལ་སྤྱོད་པའི་སྐལ་ཐོབ་ཚེ། །ངང་པས་ཆུ་ལས་འོ་མ་ཇི་ལྟ་བར། །ཕྱོགས་མེད་གཞུང་ལས་ལེགས་བཤད་ཆ་ཤས་ལོངས། །དེ་ཚེ་ ཐོས་པའི་ཉིན་བྱེད་བཀྲག་འབར་བ། །རྨོངས་བློའི་མུན་པ་འཇོམས་པའི་དཀྱིལ་འཁོར་དེ། ། བློ་གྲོས་རླུང་གི་རྟ་བདུན་ལ་ཞོན་ནས། །འཆད་རྩོད་རྩོམ་པའི་གླིང་བཞི་ལོས་ཀྱང་བསྐོར། ། ཐོས་པའི་ཚིག་གི་གོ་ཡུལ་མང་ན་ཡང་། །བསམ་པས་རང་གི་རྒྱུད་ལ་མ་སྦྱར་ན། །རང་རྒྱུད་ཡང་དག་ལམ་ལས་ཕྱི་རོལ་ཏུ། །གྱུར་ནས་ངན་འགྲོའི་གཡང་སར་འཁྱམས་པ་མང་། །དེ་སླད་ ཐོས་པའི་ཆོས་རྣམས་རང་རྒྱུད་ལ། །སྦྱར་ནས་ནན་ཏན་བསམ་པས་ཉམས་བླངས་ན། །ཆོས་དང་སེམས་སུ་འདྲེས་ནས་རྒྱུད་གྲོལ་ཞིང་། །ཐོས་པ་མི་བརྗེད་གཟུངས་ཀྱིས་རྒྱས་ཐེབས་འགྱུར། །སྡེ་སྣོད་རྒྱ་ཆེ་གཞུང་ལུགས་གྲངས་མང་ཡང་། །ཀུན་གྱི་སྙིང་པོ་རྒྱལ་བའི་ལམ་དུ་གཅིག །རྒྱལ་བའི་ལམ་བཟང་སྨོན་འཇུག་བྱང་ཆུབ་སེམས། །འདི་ལས་གཞན་མེད་ཆོས་ཀུན་ཉིང་ཁུ་ཡིན། །དམ་ཆོས་འོ་མའི་རྒྱ་མཚོ་བསྲུབས་པའི་སྐྱེས། །བྱང་ཆུབ་སེམས་མཆོག་མར་གྱི་ཉིང་ཁུ་འདི། །ཐར་པའི་སྲོག་གི་ཟུངས་གཅིག་འགྲན་ཟླ་མེད། །དེ་ཕྱིར་ཆོས་ཀྱི་སྡོམ་དུ་བསམ་པར་མཛོད། །ཆོས་གཅིག་བསམ་ན་ཆོས་ཀུན་དེར་འདུ་ཞིང་། །ཆོས་ཀུན་བསམ་ཀྱང་མཐར་ཐུག་དེར་འབབས་པ། །ཆོས་ཀྱི་སྙིང་པོ་སེམས་མཆོག་རིན་པོ་ཆེ། །འདི་ལ་སྤྲོས་ཏེ་ཆོས་རྣམས་བསམ་པར་མཛོད། །དེ་ལྟར་བསམ་ན་རྒྱལ་བའི་ཆོས་མཛོད་ཡིན། །རང་གཞན་གྲུབ་མཐའི་ཆགས་སྡང་རང་སར་ཞི། །བསྟན་པ་ཐམས་ཅད་འགལ་མེད་གཅིག་ཏུ་རྟོགས། །རྒྱལ་བའི་ལམ་དང་ནམ་ཡང་འབྲལ་བ་མེད། །དེ་ལྟར་མ་ཤེས་ཕྱོགས་རིའི་ཐོས་པའི་རྗེས། །བསམ་ཞིང་བསམ་ན་འཆལ་བའི་ཤེས་རབ་སྐྱེ། །གཞུང་ལུགས་ཐམས་ཅད་འགལ་འདུ་ཁོ་ནར་མཐོང་། །ཆགས་སྡང་དབང་གིས་རང་གཞན་ཕྱོགས་སུ་རྩོད། །ཁྱད་ཆོས་བྱེད་འདོད་ཆོས་སྤངས་ལས་ངན་བསག །ཐ་སྙད་རྟོག་གེའི་རྩོད་པ་རྣམ་འཕེལ་ཏེ། །ཡང་དག་གཞུང་ལུགས་ལོག་པའི་ལམ་དུ་འགྲེལ། །ཆོས་ལ་བརྟེན་ནས་ཆོས་མིན་འཕེལ་བར་འགྱུར། ། ཆགས་དང་སྡང་ཞུགས་མི་བཟད་ཀུན་སློང་འཕེལ། །ཆོས་མིན་ཆོས་ལྟར་བཅོས་ནས་སྟོན་པ་དང་། །རྙེད་དང་བཀུར་སྟིའི་ཆེད་དུ་བདག་འཚོང་བའི། །བྱང་ཆུབ་སེམས་དཔའ་ཕམ་པའི་ལག་རྗེས་སུ། །ཤར་བའི་ཡིག་ཕྲན་བདུད་ཀྱིས་བྱས་པ་ན། །རང་སྡེས་མཐོང་ན་ལོག་པའི་ལམ་འགྲོ་ཞིང་། །གཞན་སྡེས་མཐོང་ན་བསྟན་པའི་བླ་འཚོང་ལ། །སུ་ཡིས་མཐོང་ཡང་ཆགས་སྡང་ཁོ་ན་འཕེལ། །དེ་སླད་གསར་ཕྱོགས་རྟོག་གེ་ཟོལ་མ་དང་། །རྙིང་ཕྱོགས་རྫུན་གཏེར་ཟོག་ པོའི་བདུད་ལས་འདིས། །ཐར་འདོད་ལོག་ལམ་ཁྲིད་པ་གྲངས་མང་ཞིང་། །བསྟན་སེལ་སྡེ་འཁྲུགས་སློང་བའི་རྗེས་མི་འབྲང་། །ཡང་དག་ལམ་ལ་ཐོས་བསམ་བྱས་པའི་རྗེས། །སྒོམ་པའི་ཉམས་ལེན་བླ་མའི་མན་ངག་བཞིན། །བྱང་ཆུབ་སེམས་ཀྱི་བསླབ་པས་གཞི་བཟུང་ནས། ། བསྐྱེད་དང་རྫོགས་དང་རྫོགས་པ་ཆེན་པོར་དྲིལ། །བྱང་ཆུབ་སེམས་བྲལ་བསྐྱེད་རྫོགས་སྒོམ་ ལོ་ཡང་། །ཐར་པའི་ལམ་དུ་འགྲོ་བར་དཀའ་བས་ན། །ཡང་དག་རྒྱལ་བའི་ལམ་བཟང་གཞུང་ བསྲངས་ཏེ། །ཀུན་ཏུ་བཟང་པོའི་སྤྱོད་ལ་དོན་གཉེར་དགོས། །བསྐྱེད་རིམ་གསང་ཆེན་ལམ་ གྱི་གཞི་མ་སྟེ། །གསང་སྔགས་ཐབས་ཀྱིས་ཆེ་བའི་ཁྱད་ཆོས་མཆོག །ཐ་མལ་མཚན་རྟོག་སྡོམ་ལ་མེད་ཐབས་མེད། །དེ་ཕྱིར་འོག་མིན་བགྲོད་པའི་ཐེམ་སྐས་བཞིན། །གཡོ་ཐོབ་གོམས་ བརྟན་མཐར་ཕྱིན་གྱུར་གྱི་བར། །རྟོག་པའི་ལྷ་སྐུར་རྩལ་སྦྱོང་ཆོས་ཉིད་དུ། །བསྲེ་བའི་སྣང་སྟོང་ཟུང་འཇུག་རྩལ་འབྱོངས་ནས། །སྲོག་སྡོམ་གཟེར་བཞིའི་མན་ངག་གནད་དུ་བསྣུན། ། རྫོགས་རིམ་མཚན་བཅས་རྣམ་པ་གྲངས་མང་ཡང་། །ཀུན་གྱི་རྩ་བ་གཏུམ་མོའི་གནད་ལ་འདུས། །དེ་སླད་མན་ངག་གནད་དང་ལྡན་པ་ཡིས། །དྲོད་ཙམ་དོན་དུ་གཉེར་བ་མ་ཡིན་པར། ། རླུང་སེམས་དབུ་མར་འཛུད་པའི་མན་ངག་གིས། །སྣང་གསུམ་དོན་གྱི་འོད་གསལ་ལ་འདྲེས་ན། །རིམ་ལྔ་ཆོས་དྲུག་སྦྱོར་དྲུག་ལ་སོགས་པ། །ཀུན་གྱི་གནད་དོན་གཅིག་ཏུ་འདུས་པ་ཡིན། ། རྫོགས་ཆེན་ཀ་དག་ལྷུན་གྲུབ་ཟུང་འཇུག་ལམ། །ཁྲེགས་ཆོད་ཐོད་རྒལ་གདམས་པའི་ཉམས་ལེན་མཐིལ། །སྙིང་ཏིག་གསང་བའི་མན་ངག་ཇི་ལྟ་བར། །ཚེ་གཅིག་འོད་ལུས་འགྲུབ་པའི་ལམ་ལ་བསླབ། །དེ་ལྟར་ཐོས་བསམ་སྒོམ་པས་རྒྱལ་པའི་བསྟན། །ཡོངས་རྫོགས་རང་གི་རྒྱུད་ལ་ཉམས་ལེན་པའི། །གནད་དོན་དེ་ལྟར་དགོངས་ན་བསྟུན་པ་ཀུན། །འགལ་མེད་ལམ་གྱི་ཆ་ལག་གཅིག་ཏུ་རྟོགས། །དེ་ཕྱིར་རྒྱལ་བའི་བསྟན་པའི་གནད་སྟོན་པའི། །ལེགས་བཤད་ཚིག་འདིས་ཁྱེད་ཐུགས་དགྱེས་སྐྱེད་པའི། །ཆོས་བཞིན་སྨྲ་བའི་ཨ་བུ་ཧྲལ་བོ་ཡང་། །ཆོས་ལ་གོམས་པས་བསྐལ་མང་འདའ་གྱུར་ཅིག །མངྒ་ལམ། །

༄༅། །སྐྱབས་སེམས་ཀྱི་རྟེན་གཞི་མ་འཆོལ་པར་ངེས་འབྱུང་སོགས་ལ་སློབ་ཚུལ་གདམས་པ། བཀའ་དྲིན་མཚུངས་པ་མེད་པའི་ཐུགས་རྗེ་ཅན། །བྱིན་རླབས་བསླུ་བ་མེད་པའི་དཀོན་མཆོག་གསུམ། ། ཡིད་ཆེས་ཁྱེད་ཤེས་དད་པས་གསོལ་བ་འདེབས། །རེ་ལྟོས་འགྲོ་བའི་ཤེས་རྒྱུད་ཆོས་ལ་སྒྱུར། ། གྲོགས་ཁྱོད་ཡང་དག་ཆོས་ལ་སློབ་འདོད་ན། །སྙིང་ནས་ཡིད་ཆེས་དད་པ་རྩེ་གཅིག་གིས། ། བསླུ་མེད་དཀོན་མཆོག་གསུམ་ལ་སྐྱབས་སུ་སོང་། །བློ་གཏད་བསླུ་བ་མེད་པ་འདི་ལ་གྱིས། ། ཆོས་རྣམས་ཀུན་གྱི་གཞི་རྟེན་སྐྱབས་འགྲོ་སྟེ། །སྐྱབས་འགྲོ་མེད་ན་ཐེག་དགུའི་ཆོས་ཤེས་ཀྱང་། །མུ་སྟེགས་ཕྱི་མའི་གཞུང་དང་ཁྱད་པར་མེད། །དེ་ཕྱིར་སྐྱབས་འགྲོ་ཆོས་ཀྱི་རྟེན་གཞིར་ཟུངས། །རྒྱལ་དང་རྒྱས་སྲས་ཀུན་གྱི་བགྲོད་ཅིག་ལམ། །ཐེག་ཆེན་ལམ་གྱི་བློ་སྦྱོང་འདི་ཡིན་ཏེ། །བྱང་ཆུབ་སེམས་མཆོག་ཡིད་བཞིན་རིན་པོ་ཆེ། །འདི་ལ་མ་བརྟེན་རྫོགས་པའི་སངས་རྒྱས་མེད། །བྱང་ཆུབ་སེམས་ཀྱིས་མ་ཟིན་བསྐྱེད་རྫོགས་སོགས། །གསང་སྔགས་ལམ་གྱི་ ཉམས་ལེན་བྱེད་ལོ་ཡང་། །ཐེག་ཆེན་ལྟ་ཅི་ནང་པའི་ཆོས་སུ་ཡང་། །འགྲོ་དང་མི་འགྲོ་ཤེས་པར་དཀའ་བ་ལགས། །བྱང་ཆུབ་སེམས་དང་ལྡན་ན་ཚེ་རབས་ཀུན། །ངན་འགྲོར་མི་ལྟུང་ཚོགས་གཉིས་ཤུགས་ཀྱིས་རྫོགས། །རང་གཞན་དོན་གཉིས་མ་ལུས་མཐར་ཕྱིན་ནས། །མཐར་ ཐུག་རྫོགས་པའི་སངས་རྒྱས་ངེས་པར་ཐོབ། །དེ་ཕྱིར་སྐྱབས་སུ་འགྲོ་དང་སེམས་བསྐྱེད་པ། ། འདི་གཉིས་ཆོས་རྣམས་ཀུན་གྱི་མདོ་འགགས་ཏེ། །གཉིས་འདི་ཇི་ལྟར་བཤད་བཞིན་ཉམས་བླང་ན། །སྡོམ་པ་གསུམ་སོགས་ཆོས་ཀྱི་གནད་ཀུན་འདུས། །དེ་བས་གཉིས་འདིར་མ་འདུས་གཞན་པའམ། །གཉིས་པོ་འདི་ལས་ལྷག་པའི་ཉམས་ལེན་ཞིག །ངས་ནི་སྡེ་སྣོད་བལྟས་ཀྱང་ མ་མཐོང་ལ། །དམ་པའི་བཤེས་གཉེན་བསྟེན་ཀྱང་མ་ཐོས་སོ། །གང་ཞིག་འཁོར་བ་མེ་དོང་འདྲ་བའི་འོབས། །འདི་རུ་ཆུད་ན་སྡུག་བསྔལ་རང་བཞིན་ཏེ། །བདེ་བའི་གོ་སྐབས་གང་ནའང་ མེད་པའི་ཚུལ། །ཡང་དག་ཤེས་ནས་ངེས་འབྱུང་བློ་སྐྱེ་མཛོད། །ངེས་འབྱུང་འདི་ལ་བརྟེན་ནས་རང་དང་གཞན། །གཉིས་པོའི་དོན་དུ་སྐྱབས་སུ་འགྲོ་བ་དང་། །བླ་ན་མེད་པའི་བྱང་ཆུབ་སེམས་མཆོག་བསྐྱེད། །རྒྱུན་དུ་རང་གི་སེམས་ལ་བརྟག་བྱ་སྟེ། །རང་རྒྱུད་རྣམ་རྟོག་ཡན་པར་མ་ཤོར་བར། །དགེ་བློ་བསྐྱེད་ཅིང་མི་དགེའི་རྟོག་པ་སྤང་། །གང་ཡང་རང་བཞིན་མེད་པར་ཤེས་པར་བྱ། །རྒྱུན་དུ་རང་གི་སེམས་ལ་མ་བརྟགས་ན། །ཆོས་སྒྲུབ་རློམ་ཡང་ང་རྒྱལ་སྣོན་མ་སྟེ། །གཞན་གྱིས་བསྟོད་ཅིང་དཀོར་ནག་འཕེལ་བའི་རྒྱུས། །ཆོས་དེ་ངན་སོང་སྐྱེ་བའི་སྣོན་མ་ལགས། །གཞན་གྱིས་མི་ཤེས་རང་སེམས་ལྐོག་ཏུ་འདུལ། །ཆོས་དང་སེམས་རྒྱུད་དབྱེར་མེད་འདྲེས་པ་དེར། །བསྒོམས་བསྒོམས་བཟླས་བཟླས་ཁ་ཕོ་མེད་ན་ཡང་། །རྒྱལ་བ་རྣམས་ཀྱི་རྗེས་འཇུག་ངེས་པར་ཡིན། །དེ་ཕྱིར་ཁྱེད་ཀྱང་འདི་འདྲའི་ཚུལ་བསླབས་ཏེ། །ཆོས་བརྫུ་ཟོག་པོའི་རྗེས་སུ་མི་འབྲང་བར། །ཆོས་མཛད་དམ་པའི་མཛད་བཟང་ལྟར་བགྱིས་ཏེ། །རང་གཞན་དོན་གཉིས་མཐར་ཕྱིན་མཛད་པར་ཞུ། །ཁོ་བོའི་རྒྱུད་ན་ཡོན་ཏན་སྣ་གཅིག་ཀྱང་། ། མེད་མོད་རྩ་བའི་བླ་མ་སངས་རྒྱས་དངོས། །དེ་ཡི་གསུང་སྒྲོས་མང་ཞིག་ཐོས་དེའི་ཕྱིར། ། བཤད་པའི་ཚིག་འདི་ཡང་དག་ཆོས་དང་མཐུན། །དེ་སྐད་དམ་པ་གང་གི་བཀས་བསྐུལ་ནས། ། མི་འདོད་ལས་ཀྱིས་དེད་པའི་སྒར་གྲལ་ནས། །བརྒྱ་བསམ་གཅིག་དོན་མེད་པའི་ལས་ངན་པོ། །ཁྱི་རྒན་དཔལ་དགེ་སྡོམ་པོས་བྲིས་མདོག་བྱས། །དགེའོ། །དགེའོ། །དགེའོ། ། ༄༅། །འདུ་འཛི་སྤངས་ལ་དབེན་པ་བསྟེན། འདུ་སྣང་སྤངས་ལ་ལྷ་ཆོས་བསྒྲུབ་དགོས་པར་བླ་མ་སངས་རྒྱས་ཚེ་རིང་ལ་གདམས་པ། བླ་མ་ལ་ཕྱག་འཚལ་ལོ། །ཐོག་མཐའ་མི་མངོན་སྲིད་པའི་གྲོང་ཁྱེར་དུ། །སྡུག་བསྔལ་གསུམ་གྱིས་མནར་བའི་འགྲོ་ཁམས་ལ། །གཅིག་ཏུ་བརྩེར་དགོངས་ཡེ་ཤེས་སྒྱུ་མའི་འཕྲུལ། །ཅིར་ཡང་ངོམ་མཛད་དཔལ་མགོན་བླ་མར་འདུད། །མ་རིག་ཤིང་ལ་དུག་ལྔའི་མེས་བཟུང་བའི། །རྨོངས་པའི་ཁ་འདི་ནགས་ཀྱི་མེ་ཆེན་བཞིན། །གདམས་པའི་རླན་བཅུད་སྤྲོ་བ་མ་མཆིས་ཀྱང་། །བསྐུལ་པའི་ཚུལ་གྱིས་རྔ་ལ་དབྱུག་གུ་བཞིན། །རང་ཉམས་མེད་པའི་བཤད་ཡམ་རི་དྭགས་ཁྱུས། །སྙིང་གི་སྤང་ཐང་ལྷས་སུ་བགྱིད་མོད་ཀྱང་། །ཐུགས་ལ་འཕྲོད་པའི་དོན་བཟང་བདུད་རྩིའི་ཞོ། །དམ་པའི་གྲོགས་ལ་དྲང་དུ་མེད་ངེས་ནོངས། །དེ་ལྟ་ན་ཡང་གྲུབ་བརྙེས་གོང་མ་རྣམས། །ཕྱི་ཡི་ཡུལ་འདི་དཔེ་ཆར་གསུངས་པས་ན། །དཔེ་ལས་བཤུས་ཏེ་ངེས་ཤེས་དམ་པའི་ངག །ཁྱེད་ལ་གསོལ་ན་བརྩེ་བའི་ཐུགས་ཀྱིས་དགོངས། །ཀྱེ་ལགས་ལྟོས་དང་མི་རྟག་སྲིན་མོའི་ཁ། །གླལ་བའི་ཁྱོན་འདི་བདེན་བཞིའི་ཆོས་ཀུན་གྱི། །གླེང་གཞི་ལགས་ཏེ་འཁོར་བའི་གྲོང་ཁྱེར་ན། །སྣོད་བཅས་འཇིག་རྟེན་ཟ་བ་པོ་ཡང་འདི། །སྔར་ཞིག་བཀོད་ཅིང་བཀོད་པའི་སྟོང་ཁམས་བརྒྱ། །ཟོས་པའི་སྒྲེགས་སྐད་ཐོས་པ་ཡོད་ལགས་ཀྱང་། །ངེས་འབྱུང་རླུང་གིས་བ་སྤུ་མི་གཡོ་བ། །རྟག་འཛིན་བདུད་འདིས་ཡིད་དབང་འཕྲོག་པས་ལན། །ཀྱེ་མ་གཅིག་ཏུ་བརྟན་པའི་ནོར་འཛིན་མ། །སྲིད་ན་སྲ་བའི་དཔེ་རུ་བགྱི་མོད་ཀྱང་། །མི་རྟག་སྲིན་མོ་འདི་མཐོང་རླུང་ཤུགས་ཀྱིས། །བཏབ་པའི་རང་གཞིན་འདར་བ་གཟིགས་ལགས་སམ། །ཚུལ་འདི་མཁས་པའི་རང་བཞིན་གྲོང་བའི་ཁྱིམ། །གྲུབ་པའི་གདན་སར་བཏགས་པའི་བརྗིད་བག་བརྒྱ། །གཏུབས་ནས་རྡུལ་གྱི་ཕུང་པོར་སྤུངས་པ་འདིས། །སེམས་ཞིག་ཡོད་ན་ངེས་འབྱུང་མགྲོན་དུ་འབོད། །མི་རྟག་སྲིན་མོས་བྱ་གཏོང་འདི་མཐོང་ཡང་། །ད་དུང་སྐྱོ་བ་མེད་པའི་ལུས་ཅན་པ། །རང་གསོད་འཇུར་བུ་བཅའ་བའི་བྲེལ་རྒྱུ་ལས། །ངེས་འབྱུང་ནགས་སུ་མི་འབྲོས་འདི་སྨྱོས་སམ། །ཀྱི་ཧུད་སུན་པ་མེད་པའི་འཁོར་བ་ན། །བྱ་བྱེད་མང་པོས་དམྱལ་བའི་འཐབ་མོ་བཞིན། །རང་གཞན་གཉིས་ཕུང་ལན་བརྒྱར་མཐོང་ན་ཡང་། །སྐྱོ་ནས་སྒྱུར་དུ་མེད་པ་འདི་ ཅི་ཞིག །གདམས་ཟབ་ཐོང་བཤོལ་ཡོད་དགུའི་རྣོ་སོ་ཡང་། །འདེབས་ས་འདི་སྣང་ཐ་བ་འདི་ལགས་ན། །སྲིད་འབྱོར་རྡུལ་དུ་ཞིག་པའི་ལྟད་མོ་འདི། །གདམས་ཟབ་སྟོང་གི་ཉིང་ཁུ་ཉིད་དུ་དགོངས། །འཁྲུལ་མེད་རྒྱལ་བའི་བཀའ་ཞེས་གྲགས་ན་ཡང་། །དད་མེད་མིག་སྔར་ཤོག་ལོགས་རི་མོ་ཙམ། །ཟབ་གནད་དམ་པའི་གསུང་ཞེས་ཉན་ན་ཡང་། །ངེས་འབྱུང་མེད་ལ་ཞལ་གྱི་རླངས་པར་ཟད། །སྐྱེས་ཚད་འཆི་དང་བསགས་ཚད་འཛད་པ་དང་། །བརྩིགས་ཚད་འགྱེལ་བའི་སྣང་ཚུལ་ཕྱོགས་རེ་ཙམ། །མང་དུ་མཐོང་ཡང་སྙིང་ལ་མ་ངེས་པ། །ཆོས་ཀྱིས་དྲེད་པའི་རང་རྒྱུད་སྲ་བས་ལན། །མི་རྟག་ཡོད་དགུའི་སྣང་ཚུལ་དུས་གཅིག་ཏུ། །ངོམ་པའི་གཤིན་རྗེའི་གར་མཁན་སླེབས་པ་འདི། །དམ་པའི་གསུང་སྒྲོས་སྟོང་གི་བདེན་དཔང་དུ། །ངེས་ན་ཡིད་ཆེས་འདི་ལ་འཆའ་བར་རིགས། །སློབ་དཔོན་འདི་ལགས་གདམས་པའི་ཟབ་གནད་འདི། ། དྲན་བགྱིད་སྐྱོ་ཤས་བསྐྱེད་འོས་འདི་ལགས་ཏེ། །ད་རེས་གཤིན་རྗེ་གདུག་པའི་གར་སྟབས་འདིས། །མི་རྟག་སྲིན་མོའི་འཇབ་ཁུང་བུད་པ་ལགས། །ཀྱེ་ལགས་ཕུན་ཚོགས་དབེན་པའི་ལྗོངས་ཤིག་ན། །དབེན་གསུམ་གྲིབ་བསིལ་སྣུམ་པའི་རེག་འཇམ་ཅན། །རབ་དགའི་ལྗོན་ཤིང་ལྷ་མོའི་མཛེས་སྡུག་གིས། །ལག་པད་བསྐྱོད་བཞིན་འབོད་པ་དེ་གཟིགས་སམ། །རྒྱང་ནས་མི་རྟག་སྲིན་མོ་འཇབ་འདུག་གི །མཆོང་པའི་གོམས་སྟབས་ནམ་སླེབས་མི་ཤེས་ཀྱི། ། མྱུར་བར་ང་ཅན་ཤོག་ཅེས་དུས་བཞིའི་མགྲོན། །གྲོགས་སུ་སྦྲན་ནས་འབོད་པ་མ་ལགས་སམ། ། ལྷ་མོ་མཆོག་འདི་ལྷ་ཡི་ཡང་ལྷ་དེས། །ལྷ་སྲས་སྟོང་གི་མ་མ་ཡིན་སྐད་དེ། །འདི་དྲུང་ཕྱིན་ན་འཁྲུལ་པའི་ཁུར་ཆེན་ཡང་། །ཕོག་ནས་ངལ་བསོའི་སྟེགས་ལ་འགོད་ཅེས་ཐོས། །ངེས་འབྱུང་མདོག་དཀར་ཉམས་ལེན་བཅུད་ཀྱིས་རྒྱས། །དབེན་གསུམ་ཏོག་ལས་གཞིབ་པའི་སྟབས་བདེ་བ། །སྙིང་ལ་ངེས་པར་འབབས་པའི་ལྷ་ཆོས་བཅུད། །རོ་མངར་ནུ་མ་འདི་ཡིས་སྣུན་པར་ངེས། །སྔོན་བྱོན་དམ་པའི་སྐྱེ་བོ་སྟོང་དག་ཀྱང་། །འདི་དྲུང་ཕྱིན་ནས་ཉམས་ལེན་བཅུད་གསོལ་ཏེ། །ཡོན་ཏན་ལུས་རྩལ་རྒྱས་པའི་གར་སྟབས་དང་། །རྟོགས་པའི་མྱོས་གླུ་ཅིར་ཡང་ངོམ་ཞེས་གྲགས། །ད་ལྟའི་དུས་ནའང་གཞན་ལ་ཕན་བརྩོན་ཞིང་། །མཐའ་ཡས་ཡོན་ཏན་གཏེར་ལ་དབང་བསྒྱུར་བའི། །དམ་པ་དེ་དག་དབེན་པའི་ནགས་ཚལ་ལ། །གཅིག་ཏུ་དགྱེས་དེས་བསླབ་ གསུམ་རྫོགས་པ་ལགས། །དེ་སླད་ཁྱེད་ཀྱང་མཁས་པའི་རྗེས་བསླབས་ཏེ། །འདུ་འཛིའི་གནས་ལས་དབེན་པར་ཕེབས་ཟིན་དེས། །ཡི་རངས་མེ་ཏོག་ཆར་སིལ་འཐོར་བ་ལས། ། སྐུལ་འདེབས་ལྷ་ཡི་རྔ་ཆེན་ད་ཅི་བརྡུང་། །འོན་ཀྱང་བག་ཡངས་གནས་ལས་བག་མེད་པས། ། སྐྱེ་བ་ངེས་འབྱུང་བདུད་རྩིས་མ་ངོམས་ཤིང་། །སྐུལ་འདེབས་མི་རྟག་ལྕག་གིས་བྲབ་ཉུང་བའི། ། རྒྱུ་ལས་ངེས་པར་འབྱུང་བ་མཁྱེན་པར་མཛོད། །འཆི་བ་མ་དྲན་ཆོས་ཀྱི་གཟུགས་བརྙན་དེས། ། འཆི་བདག་དྲུང་ན་ཆོས་གོ་མི་ཆོད་ཀྱི། །སེམས་དང་ཆོས་སུ་འདྲེས་པའི་ནོར་བུ་དེ། །རྟག་ཏུ་ཆོས་དོན་སེམས་པའི་ལག་རྗེས་ལགས། །ངུར་སྨྲིག་འཛིན་པའི་སེམས་ལ་གཡོ་སྒྱུ་དང་། ། དབེན་པའི་ནགས་ན་ཚེ་འདི་གཉེར་བའི་ལས། །མཐོང་ནས་ལྷ་ཡི་རྒྱལ་པོས་དམོད་འདོར་བས། །རྟག་ཏུ་རང་སེམས་འདི་ལ་བྱ་ར་མཛོད། །འཁྲུལ་པའི་སེམས་འདི་ངེས་པར་མ་བཏུལ་ན། །མཆུ་འདབ་རླུང་གིས་བསྐྱོད་པའི་བཟླས་བརྗོད་དང་། །ལེགས་སྨོན་དུག་གིས་བསྐྱེད་པའི་སྲུང་སྡོམ་དེ། །འབྲས་བུ་ཐར་མཆོག་བཅུད་དུ་སྨིན་པར་དཀའ། །དྲན་དང་ཤེས་བཞིན་སེམས་ཀྱི་ཁ་ལོ་པ། །བག་ཡོད་སེམས་ཀྱི་སྲུང་མ་དཔའ་བོ་སྟེ། །བྱང་ཆུབ་སེམས་མཆོག་སེམས་ཀྱི་ནོར་བུ་འདི། །ཤེས་ནས་སེམས་འདི་དབྱིག་དང་ལྡན་པར་མཛོད། །སེམས་ཀྱི་བུ་ཆུང་ཡན་པར་ཤོར་བ་འདི། །དྲན་ཤེས་རྒན་པོའི་མིག་ལྕིབས་འགེབས་ཚེར་ཡང་། །ཚུལ་མིན་ཡིད་བྱེད་ཚུལ་ལ་རྒྱག་འཆོར་བས། །ལས་གཞན་སྤངས་ནས་འདི་ངོ་ཅེར་རེ་འཚོས། །ཕྱིན་དྲུག་ལམ་དང་བསྐྱེད་རྫོགས་རྫོགས་ཆེན་དོན། །འདི་ལ་དགོས་ཀྱི་གཞན་དུ་སུ་ཡིས་སྤྱོད། ། བརྒྱད་ཁྲི་བཞི་སྟོང་ཆོས་ཀྱི་ཆར་བ་ཡང་། །འབེབས་པ་སེམས་ཀྱི་ཞིང་ས་འདི་ཁོ་ན། །གཞན་གྱིས་མཐོང་དང་རང་གིས་བགྲང་རྒྱུ་ཡོད། །བྱས་ཡུས་ཅན་གྱི་ཆོས་དེ་གཟུགས་བརྙན་ཙམ། ། ལགས་ཏེ་དེ་འདྲ་ང་རྒྱལ་སྣོན་མ་ལས། །ཐར་པའི་ལམ་དང་ཞལ་འདྲིས་མེད་པ་འདྲ། །འཁྲུལ་པའི་སེམས་དང་འཐབ་མོ་རྒྱུན་བསྲིངས་པས། །ཆོས་དང་རང་སེམས་ལྐོག་ནས་འདྲེས་པ་དེ། ། ཆོས་བྱས་སྙམ་དུ་རློམ་པ་མི་སྐྱེ་ཡང་། །ལྷ་དང་བླ་མ་དེ་ལ་དགྱེས་པར་འདུག །དེ་སླད་དྲན་པའི་མདུང་རྣོན་དེ་བརྡར་ནས། །རྟག་ཏུ་སེམས་ཀྱི་སྒོ་འདི་བསྲུང་ནུས་ན། །ཐེགས་གསུམ་ལམ་གྱི་ཡོན་ཏན་ཇི་སྙེད་པ། །མ་ཚོར་ཤུགས་ཀྱིས་རྒྱུད་ལ་མཛའ་བར་འགྱུར། །ཕྱོགས་འདི་གང་གིས་བཟུང་བའི་འདུས་པའི་སྡེ། །འདི་ན་ལམ་གྱི་སྲོལ་ཆེན་གཉིས་སྣང་སྟེ། །གཅིག་གིས་ཆོས་དང་གཅིག་གིས་རྙེད་པ་ཡིས། །རྙེད་པ་བསྒྲུབ་ལ་ཕྱག་ལེན་གཅིག་ཏུ་མཐུན། །སོ་དཀར་གཞོན་པའི་དུས་ན་འདོད་ལྔའི་ཡུལ། །རང་དགའ་དང་དུ་བླངས་ཏེ་རྩེས་རྩེས་ནས། ། ཕྱེད་དཀར་མགོ་སྐྱེས་དུས་ན་སྒྲུབ་པའི་ཟོལ། །དབུ་དཀར་བླ་མའི་རྣམ་རོལ་དང་པོ་ལགས། །ཟ་ཆོག་ཚོགས་གྲལ་འགྲིམ་པ་གཞོན་ནུའི་དུས། །སྐྱ་སེར་གཉིས་གོ་ཆོད་པ་བར་དུ་སྟེ། །ཕྱི་ནས་རྒྱ་དབུས་འགྲིམ་པའི་ཚོང་དཔོན་དུ། །ཆས་པ་ཕྱོགས་འདིའི་ལམ་སྲོལ་གཉིས་པ་ལགས། །གཉིས་པོ་གང་ཡང་བསྟན་པའི་བཅུད་ཆེན་པོ། །འཛིན་པའི་བུམ་བཟང་ལགས་ཞེས་དར་དམར་གྱི། །མགུལ་ཆིངས་སྒྲོན་པའི་ངོ་ན་འཆི་བདག་གིས། །ལྕགས་ཀྱུའི་རྩེ་ཡང་དེ་ལ་ཉེ་བར་གྱུར། །སྔར་ནས་ཆོས་དང་རང་རྒྱུད་མ་བསྲེས་པས། །དེ་བློ་བསྟན་པའི་ཕྱོགས་སུ་ཅི་སྟེ་འགྲོ། །ཚེ་གང་ཚེ་འདིའི་ཕྱོགས་སུ་ཤོར་ཤོར་ནས། །འཆི་ཁ་བྲང་ལག་འཐབ་ཚེ་འགྱོད་ཀྱང་འཕྱིས། །དེ་བས་ཁྱེད་ཀྱང་དབེན་པའི་ནགས་ཁྲོད་དུ། །རང་གི་ཚེ་འདི་དོན་ཡོད་འདའ་བྱས་ན། །འདི་སྣང་ཆེ་དགུས་ཞལ་འཛུམ་མ་སྩལ་ཡང་། །ལྷ་དང་བླ་མ་དབྱིངས་ནས་དགྱེས་པར་ངེས། །རང་དྲིན་རང་ལ་ཆེ་བའི་ཉམས་ལེན་ཞིག །ནུས་ན་དལ་འབྱོར་རིན་ཆེན་དོན་བཅས་ཏེ། །བསྒྲུབས་འབྲས་ཚེ་འདིའི་ཕྱོགས་སུ་ཤོར་བ་ཕལ། །ལམ་རིང་ཕྱི་མའི་རྒྱགས་ཕྱེ་གང་དུ་ཚོལ། །ཀྱེ་མ་བྱང་ཆུབ་སེམས་མཆོག་དམ་པའི་ལམ། །ལམ་འདི་སྲས་བཅས་རྒྱལ་བའི་གཤེགས་ཤུལ་ཏེ། །ལམ་མཆོག་འདི་ལ་བརྟེན་ན་རྣམ་མཁྱེན་ལམ། །རིང་བ་མིན་ཞེས་ལམ་མཐར་ཕྱིན་ཀུན་གསུངས། །དེ་སླད་བདེན་གཉིས་རང་བཞིན་དམ་པའི་སེམས། །སྙིང་གི་བདུད་རྩིར་སྤྱོད་དུ་ཡོད་པ་འདི། །བསྐལ་མང་རྙེད་དཀར་དགོངས་ནས་ཉམས་ལེན་རྒྱུན། །འཆི་བས་གཏུགས་པ་དེ་སྲིད་གཏོང་མི་འཚལ། །དེའང་རྣམ་པ་ཀུན་ཏུ་དོན་ཆེ་བས། །སྐྱེ་དང་སྐྱེ་བར་འཕགས་པའི་རིགས་སད་ཅིང་། །མཐར་ཐུག་རྣམ་མཁྱེན་ཡེ་ཤེས་སྒྲིབ་བྲལ་དུ། །རྒྱས་ནས་སྲིད་ན་ཆོས་ཆར་འབེབས་པར་འགྱུར། །དེ་ལྟར་གང་གསོལ་འདི་ཡང་དོན་བཅས་ཏེ། །མཚུངས་མེད་བླ་མ་སངས་རྒྱས་དངོས་ཤིག་གིས། །གསུང་གིས་བསྐྱངས་ཕྱིར་གསུང་སྒྲོས་ཉག་གཅིག་ཕྱིར། །ཞལ་གྱི་གདམས་པར་བཏགས་ཀྱང་འོས་པ་ཙམ། །གཞན་དུ་རང་རྒྱུད་ཆོས་དང་མ་འདྲེས་པའི། །བག་མེད་བདག་ལྟས་གདམས་ངག་ཅི་འཆད་དེ། །ཁ་སྦུབ་བུམ་པའི་དྲུང་ན་ཞལ་སྐོམ་ཡང་། །དེ་ལས་བཏུང་བའི་རེ་བ་སུ་ཞིག་འཆའ། །འདི་ན་མཁས་གྲུབ་ཉི་ཟླའི་དཀྱིལ་འཁོར་ཟུང་། །བཀྲག་ཏུ་འབར་དྲུང་སྲིན་བུའི་འོད་སྣང་ལ། །གཟིགས་ས་རྩེད་མོའི་རྣམ་འགྱུར་ཡིན་མཆི་ཡང་། །འདི་རུ་ཅུང་ཟད་ངལ་ལས་དྲོད་གཞན་མེད། །དེ་སྐད་བུདྡྷའི་མཚན་ཅན་དེས་བསྐུལ་ནས། ཁམས་གསུམ་ཟ་བར་བྱེད་པ་འཇིགས་བྱེད་དུས། །དུས་ཀྱང་ཟ་བར་བྱེད་པ་འཇམ་པའི་དབྱངས། །དུས་དགྲའི་དབང་པོའི་ཕོ་བྲང་བརྗིད་པ་ནས། །དུག་ལྔའི་མེ་དཔུང་འབར་བའི་འཛུམ་ཟེར་རྩེར། །ཡེ་ཤེས་སྣང་བ་འཆར་བ་ལ་དགའ་ཞིང་། །སྙིང་གི་ཉི་མ་འཇམ་མགོན་སྨྲ་བའི་ལྷར། །གསོལ་བ་འདེབས་པའི་ཨ་བུ་ཧྲལ་པོས་བྲིས། །དེ་ལས་རབ་དགེ་ཅུང་ཟད་ཐོབ་སྲིད་ན། །དགེ་བ་དེ་ཡང་གཏམ་འདི་སྐུལ་པ་པོའི། །རྗེས་སུ་འབྲང་ནས་སྐྱེ་དང་ཚེ་རབས་སུ། །སྙིང་པོའི་སྒྲུབ་པ་མཐར་ཕྱིན་གྲོགས་བགྱིད་ཤོག །ཅེས་མདོ་སྨད་ཀྱི་མཁས་པ་ཤུ་བྷཾ་ཤྲཱི་ཞེས་བྱ་བས་སྦྱར་བའོ། །དགེའོ། །

༈ འཇམ་པའི་རྡོ་རྗེ་དྲང་སྲོང་ཆེན་པོའི་གསུང་། །འདི་རྣམས་རིས་མེད་འགྲོ་ལ་ཆོས་སྦྱིན་སླད། །གཉེར་མཛོད་ཚེ་དབང་ཆེར་ཆེན་མཆོག་གྲུབ་པས། །སྤར་དུ་བསྒྲུབ་དགེས་འགྲོ་ཀུན་རྣམ་གྲོལ་ཤོག །མངྒལཾ། །