JKW-KABUM-23-'A-001-028

🚧 This website is under continued development. We appreciate your patience!

Previous Text Back to Volume PageNext Text

ཐེག་མཆོག་ལམ་རིམ་གྱི་གླུ་འཆི་མེད་གྲུབ་པའི་བདེན་ཚིག།

Wylie title	theg mchog lam rim gyi glu 'chi med grub pa'i bden tshig
Location	mkhyen brtse'i bka' 'bum Volume 23, sde tshan 1, Text 28, Pages 64-66 (Folios 32b4 to 33b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. theg mchog lam rim gyi glu 'chi med grub pa'i bden tshig. In 'jam dbyangs mkhyen brtse'i dbang po'i bka' 'bum, Vol. 23: 64-66. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་ཀཤྨི་རིའི་པཎྜི་ཏ་འོད་གསལ་ཡེ་ཤེས་ཀྱི་སྐུ་ཅན་བི་མ་ལ་མི་ཏྲ་བསམ་བཞིན་དུ་བསྟན་འགྲོའི་མགོན་དུ་རྣམ་པར་འཕྲུལ་པ་རྫོགས་ཆེན་བཞི་པ་རིན་པོ་ཆེའི་ཞལ་སྔ་ནས་བཀྲ་ཤིས་པའི་ལྷ་རྫས་དང་བཅས་ཞལ་གདམས་ཉམས་མགུར་གྱི་ཚུལ་དུ་བྱས་པ་ཞིག་དགོས་ཞེས་བཀའ་འཕེབས་པ་རྟེན་འབྲེལ་དགོངས་པ་ཅན་གྱི་གསུང་ལྡོག་ཏུ་མ་བཏུབ་པར། ཚིགས་སུ་བཅད་པ་བཀྲ་ཤིས་པའི་གྲངས་ལྡན་བཤེས་གཉེན་དམ་པ་སྤྱི་ལ་ཞབས་བརྟན་གསོལ་འདེབས་དང་འབྲེལ་ཞིང་། སློབ་དཔོན་མཚོ་སྐྱེས་ཞབས་ཀྱི་མདོ་སྔགས་ལམ་རིམ་གཉིས་ཀྱི་སྙིང་པོ་བསྡུས་པའི་ཁུལ་དུ་པདྨ་ཀུན་ཏུ་འཆང་བ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སིདྡྷི་རསྟུ།
	zhes pa'ang kash+mi ri'i paN+Di ta 'od gsal ye shes kyi sku can bi ma la mi tra bsam bzhin du bstan 'gro'i mgon du rnam par 'phrul pa rdzogs chen bzhi pa rin po che'i zhal snga nas bkra shis pa'i lha rdzas dang bcas zhal gdams nyams mgur gyi tshul du byas pa zhig dgos zhes bka' 'phebs pa rten 'brel dgongs pa can gyi gsung ldog tu ma btub par/__tshigs su bcad pa bkra shis pa'i grangs ldan bshes gnyen dam pa spyi la zhabs brtan gsol 'debs dang 'brel zhing /__slob dpon mtsho skyes zhabs kyi mdo sngags lam rim gnyis kyi snying po bsdus pa'i khul du pad+ma kun tu 'chang ba dgyes pa'i 'bangs mkhyen brtse'i dbang pos bris pa sid+d+hi rastu

Tibetan Text

Wylie

[edit]

ཐེག་པ་མཆོག་གི་ལམ་གྱི་རིམ་པ་དང་འབྲེལ་བའི་གླུ་འཆི་མེད་གྲུབ་པའི་བདེན་ཚིག་ཅེས་བྱ་བ། ཨ་ཧོ། ཀ་དག་གཞི་དབྱིངས་གཞོན་ནུ་བུམ་སྐུ་ཡི་ཀློང་ནས། །ལྷུན་གྲུབ་གཞི་སྣང་ཁ་སྦྱོར་བདུན་ལྡན་དུ་ཤར་བ། །དུས་གསུམ་རྒྱལ་ཀུན་འདུས་པའི་ཡེ་ཤེས་ཀྱི་སྤྱི་གཟུགས། །འཆི་མེད་པདྨ་སཾ་བྷས་བྱིན་གྱིས་རང་རློབས་ཤིག །བཤེས་གཉེན་ཚུལ་བཞིན་བསྟེན་པ་ཐར་ལམ་གྱི་རྩ་བ། །དལ་འབྱོར་རྙེད་དཀའ་དྲན་པ་ཆོས་སྤྱོད་ཀྱི་ཐོག་མ། །མི་རྟག་སྙིང་ལ་གཟེར་བ་དགེ་སྦྱོར་གྱི་སྐུལ་འདེབས། །མཐར་ཕྱིན་རིང་པོར་འཚོ་བའི་སྨོན་ལམ་ཞིག་ཞུའོ། །མེད་བཞིན་འཁྲུལ་བའི་སྡུག་བསྔལ་འཁོར་བ་ཡི་ཚུལ་ལ། །ངེས་འབྱུང་དྲག་པོའི་རྒྱུ་འབྲས་བླང་དོར་ལ་འབད་ཅིང་། །གསུམ་ལ་སྐྱབས་སོང་བྱང་ཆུབ་སེམས་གཉིས་ཀྱི་བདུད་རྩིས། །རིང་འཚོའི་དགེ་མཚན་རྒྱས་པའི་སྨོན་ལམ་ཞིག་ཞུའོ། །ཚུལ་ཁྲིམས་རྣམ་པར་དག་པའི་ཡོན་ཏན་གྱི་ཞིང་སར། །གསན་བསམ་བསྒོམ་པའི་མྱུ་གུ་གོང་འཕེལ་དུ་བསྐྱེད་ཅིང་། །ཏིང་འཛིན་ཤེས་རབ་མཆོག་གི་འབྲས་བུ་ཡིས་དུད་པ། །འཚོ་གཞེས་བསྐལ་བརྒྱར་བརྟན་པའི་སྨོན་ལམ་ཞིག་ཞུའོ། །རང་བཞིན་སྐྱེ་མེད་སྟོང་པ་གདོད་མ་ཡི་གནས་ལུགས། །རོལ་པ་འགག་མེད་ཤར་བ་ལམ་སྣང་གི་འཆང་ཚུལ། །ངོ་བོ་གཉིས་མེད་བརྗོད་བྲལ་བློ་འདས་ཀྱི་དབྱིངས་སུ། །གཞོམ་མེད་རྒྱུན་གྱིས་རྟག་པའི་སྨོན་ལམ་ཞིག་ཞུའོ། །དབང་བཞིས་རང་རྒྱུད་སྨིན་པ་གསང་ཆེན་གྱི་ས་བོན། །ཐ་མལ་སྣང་ཞེན་འཇིག་པ་བསྐྱེད་རིམ་གྱི་ལམ་ཁྱེར། །ལྟར་སྣང་བདེ་ཆེན་འཆར་བའི་རྫོགས་རིམ་དང་སྦྲགས་ནས། །གསང་གསུམ་རྡོ་རྗེར་གྲུབ་པའི་སྨོན༴ །རིག་སྟོང་རྗེན་པའི་ངང་དུ་བསལ་བཞག་དང་བྲལ་བར། །རྟོགས་ཚོགས་རང་སར་གྲོལ་བའི་ཡང་དག་གི་དྲན་པ། །མཉམ་རྗེས་དབྱེར་མེད་གོམས་པའི་ཉམས་ལེན་གྱི་སྙིང་པོས། །འཕོ་མེད་ཆོས་སྐུར་གྲུབ་པའི་སྨོན་ལམ་ཞིག༴ །མདོར་ན་རྒྱལ་བས་ལེགས་གསུངས་མདོ་སྔགས་ཀྱི་ཉིང་ཁུ། །འགལ་མེད་སྟན་ཐོག་གཅིག་ཏུ་ཚུལ་བཞིན་གྱིས་བསྒོམས་པས། །འཕགས་རྣམས་རབ་ཏུ་དགྱེས་པའི་བཀྲ་ཤིས་ཀྱི་སྣང་བས། །འཆི་མེད་ཡེ་ཤེས་གྲུབ་པའི་སྨོན་ལམ་ཞིག་ཞུའོ། །ཞེས་པའང་ཀཤྨི་རིའི་པཎྜི་ཏ་འོད་གསལ་ཡེ་ཤེས་ཀྱི་སྐུ་ཅན་བི་མ་ལ་མི་ཏྲ་བསམ་བཞིན་དུ་བསྟན་འགྲོའི་མགོན་དུ་རྣམ་པར་འཕྲུལ་པ་རྫོགས་ཆེན་བཞི་པ་རིན་པོ་ཆེའི་ཞལ་སྔ་ནས་བཀྲ་ཤིས་པའི་ལྷ་རྫས་དང་བཅས་ཞལ་གདམས་ཉམས་མགུར་གྱི་ཚུལ་དུ་བྱས་པ་ཞིག་དགོས་ཞེས་བཀའ་འཕེབས་པ་རྟེན་འབྲེལ་དགོངས་པ་ཅན་གྱི་གསུང་ལྡོག་ཏུ་མ་བཏུབ་པར། ཚིགས་སུ་བཅད་པ་བཀྲ་ཤིས་པའི་གྲངས་ལྡན་བཤེས་གཉེན་དམ་པ་སྤྱི་ལ་ཞབས་བརྟན་གསོལ་འདེབས་དང་འབྲེལ་ཞིང་། སློབ་དཔོན་མཚོ་སྐྱེས་ཞབས་ཀྱི་མདོ་སྔགས་ལམ་རིམ་གཉིས་ཀྱི་སྙིང་པོ་བསྡུས་པའི་ཁུལ་དུ་པདྨ་ཀུན་ཏུ་འཆང་བ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སིདྡྷི་རསྟུ། ། ༈

[edit]

theg mchog lam rim gyi glu 'chi med grub pa'i bden tshig/_ theg pa mchog gi lam gyi rim pa dang 'brel ba'i glu 'chi med grub pa'i bden tshig ces bya ba/__a ho/__ka dag gzhi dbyings gzhon nu bum sku yi klong nas/__/lhun grub gzhi snang kha sbyor bdun ldan du shar ba/__/dus gsum rgyal kun 'dus pa'i ye shes kyi spyi gzugs/__/'chi med pad+ma saM b+has byin gyis rang rlobs shig__/bshes gnyen tshul bzhin bsten pa thar lam gyi rtsa ba/___/dal 'byor rnyed dka' dran pa chos spyod kyi thog ma/__/mi rtag snying la gzer ba dge sbyor gyi skul 'debs/__/mthar phyin ring por 'tsho ba'i smon lam zhig zhu'o/__/med bzhin 'khrul ba'i sdug bsngal 'khor ba yi tshul la/__/nges 'byung drag po'i rgyu 'bras blang dor la 'bad cing /__/gsum la skyabs song byang chub sems gnyis kyi bdud rtsis/__/ring 'tsho'i dge mtshan rgyas pa'i smon lam zhig zhu'o/__/tshul khrims rnam par dag pa'i yon tan gyi zhing sar/__/gsan bsam bsgom pa'i myu gu gong 'phel du bskyed cing /__/ting 'dzin shes rab mchog gi 'bras bu yis dud pa/__/'tsho gzhes bskal brgyar brtan pa'i smon lam zhig zhu'o/__/rang bzhin skye med stong pa gdod ma yi gnas lugs/__/rol pa 'gag med shar ba lam snang gi 'chang tshul/__/ngo bo gnyis med brjod bral blo 'das kyi dbyings su/__/gzhom med rgyun gyis rtag pa'i smon lam zhig zhu'o/__/dbang bzhis rang rgyud smin pa gsang chen gyi sa bon/__/tha mal snang zhen 'jig pa bskyed rim gyi lam khyer/__/ltar snang bde chen 'char ba'i rdzogs rim dang sbrags nas/__/gsang gsum rdo rjer grub pa'i smon=__/rig stong rjen pa'i ngang du bsal bzhag dang bral bar/__/rtogs tshogs rang sar grol ba'i yang dag gi dran pa/__/mnyam rjes dbyer med goms pa'i nyams len gyi snying pos/__/'pho med chos skur grub pa'i smon lam zhig=__/mdor na rgyal bas legs gsungs mdo sngags kyi nying khu/__/'gal med stan thog gcig tu tshul bzhin gyis bsgoms pas/__/'phags rnams rab tu dgyes pa'i bkra shis kyi snang bas/__/'chi med ye shes grub pa'i smon lam zhig zhu'o/__/zhes pa'ang kash+mi ri'i paN+Di ta 'od gsal ye shes kyi sku can bi ma la mi tra bsam bzhin du bstan 'gro'i mgon du rnam par 'phrul pa rdzogs chen bzhi pa rin po che'i zhal snga nas bkra shis pa'i lha rdzas dang bcas zhal gdams nyams mgur gyi tshul du byas pa zhig dgos zhes bka' 'phebs pa rten 'brel dgongs pa can gyi gsung ldog tu ma btub par/__tshigs su bcad pa bkra shis pa'i grangs ldan bshes gnyen dam pa spyi la zhabs brtan gsol 'debs dang 'brel zhing /__slob dpon mtsho skyes zhabs kyi mdo sngags lam rim gnyis kyi snying po bsdus pa'i khul du pad+ma kun tu 'chang ba dgyes pa'i 'bangs mkhyen brtse'i dbang pos bris pa sid+d+hi rastu/___/__!_