JKW-KABUM-23-'A-001-027

Previous Text Back to Volume PageNext Text

དེ་ཉིད་བསྡུས་པའི་གླུ་དཔའ་བོའི་རོལ་མོ།

Wylie title	de nyid bsdus pa'i glu dpa' bo'i rol mo
Location	mkhyen brtse'i bka' 'bum Volume 23, sde tshan 1, Text 27, Pages 61-64 (Folios 31a4 to 32b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. de nyid bsdus pa'i glu dpa' bo'i rol mo. In 'jam dbyangs mkhyen brtse'i dbang po'i bka' 'bum, Vol. 23: 61-64. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	ཅེས་པའང་གཞོན་ནུ་ཨ་བྷཱ་ཡས་རང་ལོ་བཅོ་ལྔ་པར་བརྗོད་པའོ།
	ces pa'ang gzhon nu a b+hA yas rang lo bco lnga par brjod pa'o

Tibetan Text

Wylie

[edit]

དེ་ཁོ་ན་ཉིད་བསྡུས་པའི་ཐོལ་གླུ་དཔའ་བོའི་རོལ་མོ་ཞེས་བྱ་བ། ཨ་ཧོ། སྣོད་བཅུད་ཀུན་སྐུ་དང་ཡེ་ཤེས་ཀྱི་འཆར་སྒོ། །རིག་སྟོང་གི་ངོ་བོ་བློ་འདས་ཀྱི་གཤིས་ལུགས། །སྲིད་ཞི་ལས་རང་གྲོལ་བདེ་ཆེན་གྱི་ཀློང་ཡངས། །གཟོད་མ་ནས་ཐོབ་ཤོར་བྲལ་བ་ལ་འདུད་དོ། །ཕྱིར་ལྟས་ཀྱི་རྟོག་གེའི་དོན་དམ་ནི་མི་མཐོང་། །ནང་དབྱིངས་ཀྱི་ངང་བཞག་རྟོགས་ཚོགས་ཀུན་རང་གྲོལ། །ཡིད་དཔྱོད་ཀྱི་སྤང་གཉེན་རེས་འཇོག་ལས་འདས་པའི། །ཟབ་དོན་གྱི་མཐར་ཐུག་རྫོགས་ཆེན་ལ་ཞུགས་ཤིག །ཀ་དག་གི་རིག་པ་ཅེར་གྲོལ་དུ་མཐོང་བས། །སྤང་བླངས་ཀྱི་གཉེན་པོ་དབུ་མ་རུ་ཞིག་ནས། །གང་ཤར་དང་རང་གྲོལ་ཆོས་སྐུ་ཡི་ངང་དུ། །སྣ་ཚོགས་ཀྱི་རྟོག་པ་མཉམ་རོལ་དུ་ཐིམ་མོ། །ཤེས་བྱ་ཡི་གཤིས་ལ་མ་ཤོར་བའི་སྤྲོས་བྲལ། །རྣམ་རིག་གི་དབུ་མར་མ་གཟུང་བའི་རང་གྲོལ། །གནས་བྱ་དང་གནས་བྱེད་ལས་འདས་ཀྱི་ཞི་གནས། །ཕྱི་ཡུལ་ལ་རྟོག་པས་མི་དཔྱོད་པའི་ལྷག་མཐོང་། །བསྒོམ་བློ་ཡི་སྡུག་བཙིར་ཐག་པས་ནི་མ་བཅིངས། །མི་བསྒོམ་པའི་དྲན་མེད་ཐ་མལ་དུ་མ་ཞུགས། །སྣ་ཚོགས་ཀྱི་ཞེ་འདོད་འཆིང་བ་ལས་གྲོལ་བའི། །ཡེ་ཡིན་གྱི་རིག་པ་ཁྱབ་བདལ་དུ་སྐྱོངས་ཤིག །མཚན་འཛིན་ལས་འདས་པས་རྟག་པ་ཡང་མ་ཡིན། །རང་གསལ་དུ་མི་འགགས་ཆད་མཐའ་དང་བྲལ་ཞིང་། །བསམ་གྱིས་ནི་མི་ཁྱབ་བློ་འདས་ཀྱི་གཤིས་ལུགས། །བྱར་མེད་ཀྱི་བཙན་ས་ཟིན་པ་རང་མཛོད་ཅིག །བཅོས་བསྒྱུར་གྱིས་མ་དཀྲོལ་ཡེ་གྲོལ་གྱི་རིག་པ། །རྣམ་རྟོག་གིས་མ་བཟོས་ཟག་བྲལ་གྱི་ཡེ་ཤེས། །ལྟ་སྒོམ་གྱིས་མ་བསླད་ཆོས་ཉིད་དེ་རྗེན་པ། །རང་ངོ་རུ་འདུ་འབྲལ་སྤངས་པ་འདི་ཨ་ཧོ། །འཇོག་ཏུ་ནི་མེད་དེ་ཀ་དག་གི་མཉམ་བཞག །རྩིས་གདབ་ལས་འདས་པའི་ལྷུན་གྲུབ་ཀྱི་རྗེས་ཐོབ། །ཀུན་གཞི་ལས་རྣམ་གྲོལ་རིག་སྟོང་གི་ངང་དུ། །གེགས་དང་ནི་གོལ་ཤོར་ནོར་ས་ལས་འདས་སོ། །ལྷུན་གྲུབ་ཀྱི་སྣང་བ་ལུག་རྒྱུད་ཀྱི་ཐིག་ལེ། །འོད་གསལ་གྱི་ངོ་བོ་བུམ་སྐུ་ཡི་རང་མདངས། །ཟུང་འཇུག་གི་དགོངས་པ་གཏད་མེད་དུ་གཟིར་བས། །སྣང་བཞི་ཡི་ངང་དུ་འཁྲུལ་ཆོས་ཀུན་ཟད་ནས། །ཞལ་ཕྱག་གི་སྤྲོས་པ་ནང་དབྱིངས་སུ་ཐིམ་པའི། །ཁྱད་ཆོས་དེ་དྲུག་ལྡན་ཀུན་བཟང་གི་མཁའ་ཀློང་། །ཐིམ་ལ་ནི་མ་རྨུག་རྟག་ཆད་དང་བྲལ་བའི། །སྐུ་གསུམ་གྱི་འཆར་གཞི་རྩོལ་མེད་དུ་འགྲུབ་བོ། །དེའི་ཕྱིར་ན་རྟག་ཏུ་ཉམས་ལེན་གྱི་མཐར་ཐུག །སྐད་ཅིག་གི་རིག་པ་སྣ་ཚོགས་སུ་འཕྲོ་ཡང་། །ཤར་མཁན་གྱི་ངང་དུ་རང་གྲོལ་དུ་ཞི་བའི། །བཅོས་བསྒྱུར་ལས་འདས་པའི་ངང་མདངས་ལ་བསྐྱང་ཞིང་། །སྣོད་བཅུད་ཀུན་དག་བྱེད་སྣང་སྟོང་གི་བསྐྱེད་རིམ། །རྩ་རླུང་ཁམས་བྱེད་བཅིངས་བདེ་སྟོང་གི་རྫོགས་རིམ། །སྤང་གཉེན་ལས་འདས་པ་དབྱིངས་རིག་དང་དབྱེར་མེད། །ནང་རྒྱུད་ཀྱི་སྦས་དོན་དེ་ཚོ་ལ་བསྙེན་མཛོད། །གྲུབ་མཐའ་ཡི་ཁ་འཛིན་ཆགས་སྡང་གི་གཞི་མ། །བདག་འཛིན་གྱི་སྲེད་ཞེན་སླུ་བྱེད་ཀྱི་བདུད་གཅོད། །ཉམས་སྣང་གི་དགག་སྒྲུབ་ལམ་ཞུགས་ཀྱི་གོལ་ས། །དེ་རྣམས་ཀྱི་འབྲས་བུ་ཡ་བྲལ་དུ་བྱེད་དོ། །འདུ་འཛི་ལས་བརྒལ་བ་བྲག་སྐྱིབས་ཀྱི་ཁང་བཟང་། །སྡང་ཞེན་ལས་འདས་པ་འདབ་ཆགས་ཀྱི་འཁོར་གྲོགས། །འཁྲུལ་པ་ཀུན་ཟད་བྱེད་རྩེ་གཅིག་གི་ཏིང་འཛིན། །འདི་རྣམས་ནི་ལམ་ཞུགས་རྣལ་འབྱོར་གྱི་སྲོག་ཤིང་། །ཞེ་འདོད་ཀྱི་སྒྲུབ་པ་འབྲས་བུ་ཡི་གོལ་ས། །ཐོབ་ཤོར་གྱི་དབེན་པ་རྫོགས་ཆེན་གྱི་མངའ་ཐང་། །རེ་དོག་གིས་མ་བཅིང་རང་གྲོལ་དུ་ལོངས་པས། །ཟུང་འཇུག་གི་རྒྱལ་སར་འབད་མེད་དུ་འཛེགས་འགྲོ། །དེ་སྐད་དུ་གང་ཤར་རང་གྲོལ་གྱི་གླུ་དབྱངས། །ཟབ་དོན་གྱི་དགོངས་པ་མཐོང་བ་རང་མིན་ཡང་། །ཁྱབ་བདག་གི་བླ་མ་སྙིང་དབུས་ནས་དྲན་པའི། །རང་རྩལ་ལས་འབད་མེད་ལྷུག་པ་རུ་བརྗོད་དོ། །དགེ་བ་དེས་བདག་གཞན་འགྲོ་བ་ཀུན་མ་ལུས། །ཐེག་བརྒྱད་ལས་འདས་པའི་རྫོགས་ཆེན་གྱི་ལམ་དུ། །རྩེ་གཅིག་ཏུ་ཞུགས་ནས་འཁྲུལ་པ་ཡི་ཕུང་ཁམས། །འཕོ་ཆེན་གྱི་འཇའ་ལུས་རྡོ་རྗེ་རུ་འགྲུབ་ཤོག །ཅེས་པའང་གཞོན་ནུ་ཨ་བྷཱ་ཡས་རང་ལོ་བཅོ་ལྔ་པར་བརྗོད་པའོ། ། ༈

[edit]

de nyid bsdus pa'i glu dpa' bo'i rol mo/__ de kho na nyid bsdus pa'i thol glu dpa' bo'i rol mo zhes bya ba/__a ho/__snod bcud kun sku dang ye shes kyi 'char sgo/__/rig stong gi ngo bo blo 'das kyi gshis lugs/__/srid zhi las rang grol bde chen gyi klong yangs/__/gzod ma nas thob shor bral ba la 'dud do/__/phyir ltas kyi rtog ge'i don dam ni mi mthong /__/nang dbyings kyi ngang bzhag rtogs tshogs kun rang grol/__/yid dpyod kyi spang gnyen res 'jog las 'das pa'i/__/zab don gyi mthar thug rdzogs chen la zhugs shig__/ka dag gi rig pa cer grol du mthong bas/__/spang blangs kyi gnyen po dbu ma ru zhig nas/__/gang shar dang rang grol chos sku yi ngang du/__/sna tshogs kyi rtog pa mnyam rol du thim mo/__/shes bya yi gshis la ma shor ba'i spros bral/__/rnam rig gi dbu mar ma gzung ba'i rang grol/__/gnas bya dang gnas byed las 'das kyi zhi gnas/__/phyi yul la rtog pas mi dpyod pa'i lhag mthong /__/bsgom blo yi sdug btsir thag pas ni ma bcings/__/mi bsgom pa'i dran med tha mal du ma zhugs/__/sna tshogs kyi zhe 'dod 'ching ba las grol ba'i/__/ye yin gyi rig pa khyab bdal du skyongs shig__/mtshan 'dzin las 'das pas rtag pa yang ma yin/__/rang gsal du mi 'gags chad mtha' dang bral zhing /__/bsam gyis ni mi khyab blo 'das kyi gshis lugs/__/byar med kyi btsan sa zin pa rang mdzod cig__/bcos bsgyur gyis ma dkrol ye grol gyi rig pa/__/rnam rtog gis ma bzos zag bral gyi ye shes/__/lta sgom gyis ma bslad chos nyid de rjen pa/__/rang ngo ru 'du 'bral spangs pa 'di a ho/__/'jog tu ni med de ka dag gi mnyam bzhag__/rtsis gdab las 'das pa'i lhun grub kyi rjes thob/__/kun gzhi las rnam grol rig stong gi ngang du/__/gegs dang ni gol shor nor sa las 'das so/__/lhun grub kyi snang ba lug rgyud kyi thig le/__/'od gsal gyi ngo bo bum sku yi rang mdangs/__/zung 'jug gi dgongs pa gtad med du gzir bas/__/snang bzhi yi ngang du 'khrul chos kun zad nas/__/zhal phyag gi spros pa nang dbyings su thim pa'i/__/khyad chos de drug ldan kun bzang gi mkha' klong /__/thim la ni ma rmug rtag chad dang bral ba'i/__/sku gsum gyi 'char gzhi rtsol med du 'grub bo/__/de'i phyir na rtag tu nyams len gyi mthar thug__/skad cig gi rig pa sna tshogs su 'phro yang /__/shar mkhan gyi ngang du rang grol du zhi ba'i/___/bcos bsgyur las 'das pa'i ngang mdangs la bskyang zhing /__/snod bcud kun dag byed snang stong gi bskyed rim/__/rtsa rlung khams byed bcings bde stong gi rdzogs rim/_/spang gnyen las 'das pa dbyings rig dang dbyer med/__/nang rgyud kyi sbas don de tsho la bsnyen mdzod/__/grub mtha' yi kha 'dzin chags sdang gi gzhi ma/__/bdag 'dzin gyi sred zhen slu byed kyi bdud gcod/__/nyams snang gi dgag sgrub lam zhugs kyi gol sa/__/de rnams kyi 'bras bu ya bral du byed do/__/'du 'dzi las brgal ba brag skyibs kyi khang bzang /__/sdang zhen las 'das pa 'dab chags kyi 'khor grogs/__/'khrul pa kun zad byed rtse gcig gi ting 'dzin/__/'di rnams ni lam zhugs rnal 'byor gyi srog shing /_/zhe 'dod kyi sgrub pa 'bras bu yi gol sa/__/thob shor gyi dben pa rdzogs chen gyi mnga' thang /__/re dog gis ma bcing rang grol du longs pas/__/zung 'jug gi rgyal sar 'bad med du 'dzegs 'gro/__/de skad du gang shar rang grol gyi glu dbyangs/__/zab don gyi dgongs pa mthong ba rang min yang /__/khyab bdag gi bla ma snying dbus nas dran pa'i/__/rang rtsal las 'bad med lhug pa ru brjod do/__/dge ba des bdag gzhan 'gro ba kun ma lus/__/theg brgyad las 'das pa'i rdzogs chen gyi lam du/__/rtse gcig tu zhugs nas 'khrul pa yi phung khams/__/'pho chen gyi 'ja' lus rdo rje ru 'grub shog__/ces pa'ang gzhon nu a b+hA yas rang lo bco lnga par brjod pa'o/___/__!