JKW-KABAB-13-PA-011

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med mtsho skyes snying tig las smin byed rtsa ba'i dbang bzhi bklag chog tu bkod pa ye shes bdud rtsi'i char rgyun
Location	mkhyen brtse'i bka' babs Volume 13, Text 11, Pages 111-127 (Folios 1a to 9a6)
Author	འཇམ་མགོན་ཀོང་སྤྲུལ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam mgon kong sprul. 'chi med mtsho skyes snying tig las smin byed rtsa ba'i dbang bzhi bklag chog tu bkod pa ye shes bdud rtsi'i char rgyun. In Rdzong sar 'jam dbyangs mkhyen brtse'i dbang po'i bka' babs, Vol. 13: 111-127. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Empowerment Ritual - dbang chog - dbang skur
Cycle	འཆི་མེད་མཚོ་སྐྱེས་སྙིང་ཏིག་ ('chi med mtsho skyes snying tig)
Deity	gu ru mtsho skyes rdo rje
Karchag page	JKW-KABAB-Volume-13-PA-Karchag
RTZ	In the Rinchen Terdzö: https://rtz.tsadra.org/index.php/Terdzo-THA-043
Colophon	།ཅེས་པའང་གཏེར་ཆེན་བླ་མ་ཐམས་ཅད་མཁྱེན་པའི་རྡོ་རྗེ་ཞལ་ལུང་མ་ནོར་བར་ཆོས་འདིའི་སྣོད་ལྡན་༧པདྨ་གར་དབང་བློ་གྲོས་མཐའ་ཡས་ཀྱིས་རྫོང་སར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་བགྱིས་པ་དགེ་ལེགས་འཕེལ།།
	ces pa'ang gter chen bla ma thams cad mkhyen pa'i rdo rje zhal lung ma nor bar chos 'di'i snod ldan pad+ma gar dbang blo gros mtha' yas kyis rdzong sar bkra shis lha rtse'i chos grwa chen por bgyis pa dge legs 'phel

Tibetan Text

Wylie

[edit]

༄༅། །འཆི་མེད་མཚོ་སྐྱེས་སྙིང་ཏིག་ལས། སྨིན་བྱེད་རྩ་བའི་དབང་བཞི་བཀླག་ཆོག་ཏུ་བཀོད་པ་ཡེ་ཤེས་བདུད་རྩིའི་ཆར་རྒྱུན་ཅེས་བྱ་བ་བཞུགས་སོ།

༄༅། །ན་མོ་གུ་རུ་པདྨ་བཛྲཱ་ཡ། །འཆི་མེད་རྡོ་རྗེའི་སྐུ་གསུང་ཐུགས། །ཡོན་ཏན་ཕྲིན་ལས་མཁའ་དང་མཉམ། །དེ་ཉིད་བླ་མའི་སྐུར་བསྟན་ནས། །སྙིགས་མའི་གདུལ་བྱ་སྐྱོང་ལ་འདུད། །ངོ་མཚར་བླ་སྒྲུབ་སྐོར་བཞི་ལས། །གསང་སྒྲུབ་མཚོ་སྐྱེས་རྡོ་རྗེ་ཡི། །རྩ་བའི་སྨིན་བྱེད་བདུད་རྩིའི་ཆར། །སྐལ་ལྡན་ཞིང་སའི་གསོས་སུ་ལོངས། །འཆི་མེད་མཚོ་སྐྱེས་སྙིང་ཐིག་གི་རྩ་བའི་སྨིན་བྱེད་སྒྲུབ་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ཡོ་བྱད་གཤོམ་ནི། ཡར་ངོའི་ཚེས་བཅུ་དང་གུ་རུའི་སྒྲུབ་གནས་ལྟ་བུའི་དུས་དང་གནས་བཟང་པོར་མཛེས་པའི་སྟེགས་ལ་དཀྱིལ་འཁོར་པདྨ་འདབ་བརྒྱད་ཚོམ་བུ་གཅིག་པའི་སྟེང་དུ་རྐང་གསུམ་ལ་བུམ་པ་བཅུད་ལྡན་མགུལ་ཆིངས་དཀར་པོ་ཁ་རྒྱན་དང་བཅས་པའི་སྟེང་དུ་འཕྲུལ་སྟེགས་ལ་བླ་གཏོར་རྒྱན་ལྡན་བཀོད། གོ་ཡུལ་མི་བདེ་ན་རྒྱབ་ཏུ་བཞག་ཀྱང་ཆོག །གཡས་གཡོན་ཏུ་ཐོད་པ་མཚན་ལྡན་མངར་སྦྱར་ཆང་གིས་བཀང་བ་དང༌། མེ་ལོང་དྲི་མེད་རྟ་ཕག་ཙཀླི་དང་བཅས་པ་བཞག །ཕྱི་ནང་གི་མཆོད་གཏོར་ལག་ལེན་ལྟར་བཤམས་ལ་མཁོ་བའི་ཡོ་བྱད་ཚོགས་པར་བྱའོ། །གཉིས་པ་ལ་ཐོག་མར་དབང་དོན་སྒྲུབ་མཆོད་ནི། གསོལ་འདེབས་སྔོན་ཏུ་འགྲོ་བས་ལས་བྱང་མཐར་ཆགས་སུ་བཏང་ཞིང་བཟླས་པ་ཅི་ནུས་བྱ། ལས་སྦྱོར་བཟླས་པའི་རྗེས་སུ་རྣམ་བུམ་གསལ་གདབ་སོགས་སྤྱི་ལྟར་བྱས་ཏེ་གཟུངས་ཐག་བླངས་ལ་སྒྲུབ་པའི་བཟླས་པ་བརྒྱ་རྩ་སོགས་ཀྱི་མཐར་བུམ་ལྷ་འོད་ཞུ་བྱ། ལས་བུམ་དུ་རྟ་མགྲིན་བསྐྱེད་བཟླས་དང༌། སྲུང་མའི་གཏོར་འབུལ། ཚོགས་བྱིན་རླབས་བསྒྲལ་བསྟབ་ཀྱི་བར་དུ་བཏང༌། རིག་པའི་མེ་ཏོག་དོར་ལ་གནང་བ་ནོད་དོ། །གཉིས་པ་དབང་དངོས་ལ། སློབ་མ་རྣམས་ཁྲུས་བྱ། བགེགས་གཏོར་བཏང་ལ་བཀའ་བསྒོ་ཞིང་མཚམས་བཅད། མེ་ཏོག་བཀྱེ་བསྡུ་དང་སེམས་བསྐྱེད་གསལ་བཏབ་ལ། དེ་ལ་འདིར་འཆད་པར་བྱ་བ། གསང་སྔགས་རྡོ་རྗེ་ཐེག་པ་སྔ་འགྱུར་གཏེར་མའི་ཕྱོགས་ལ་གཏེར་རིགས་ཀྱི་དབྱེ་བ་མང་དུ་གསུངས་པ་རྣམས་མདོར་དྲིལ་ན། ཕྱི་ས་གཏེར། ནང་དག་སྣང༌། གསང་བ་དགོངས་པའི་གཏེར་ཁ་གསུམ་དུ་འདུ་བ་ལས་འདིར་ནི་ཤིན་ཏུ་ཡང་ཟབ་དགོངས་པའི་གཏེར་ཁ་ཡིན་ཏེ། དེའི་ལོ་རྒྱུས་སྙིང་པོ་ཙམ་བརྗོད་ན། རྒྱལ་བ་ཀུན་གྱི་ཡབ་གཅིག་རྗེ་བཙུན་འཇམ་པའི་རྡོ་རྗེ་ཉིད་གངས་ལྗོངས་བསྟན་པའི་ཤིང་རྟ་ཆོས་རྒྱལ་ཆེན་པོའི་རྣམ་པར་བཞེངས་པ་ཚངས་པ་ལྷའི་མེ་ཏོག་དེ་ཉིད་སྙིགས་མའི་དུས་མཐར་བོད་འབངས་སྐྱོབ་པའི་དཔལ་མགོན་ཏུ་བསམ་བཞིན་སྤྲུལ་པའི་རོལ་གར་བཟུང་བ། གངས་ཅན་མཁས་གྲུབ་ཡོངས་ཀྱི་འཁོར་ལོས་སྒྱུར་བ་ཆེན་པོ་འཇམ་དབྱངས་མཁྱེན་བརྩེའི་དབང་པོའམ་པདྨ་འོད་གསལ་མདོ་སྔགས་གླིང་པ་གང་ཉིད་དགུངས་གྲངས་ས་སྤྲེལ་ཉེར་དགུར་སོན་པའི་སྐབས་བོད་ཡུལ་དབུས་སུ་ཕེབ་པའི་བྱང་ལམ་དགེ་རྒྱལ་ཕྱོགས་སུ་ཁྲུམས་ཟླའི་ཚེས་བཅུར་ཁེལ་བས་བླ་མ་གསང་འདུས་ཚོགས་མཆོད་མཛད་པས་ཐུགས་ཉམས་འབར། ཕྱི་རོལ་དུ་ཕེབས་སྐབས་བྲག་ཕུག་ཁ་ལྷོ་ནུབ་ཏུ་བལྟ་བ་ཡིད་དུ་འོང་བ་ཞིག་འདུག་པའི་ནང་དུ་ཕེབ་པས་ཐུགས་སྤྲོ་བར་བྱུང་ནས་བླ་མའི་རྣལ་འབྱོར་ཞིག་མཛད་པའི་མཐར་ཅུང་ཟད་མནལ་དུ་སོང་བ་ལ་སྒྲ་ཆེན་པོ་ཞིག་གྲགས་པས་སད་པ་ན། མདུན་གྱི་ནམ་མཁར་གུ་རུ་ཟ་ཧོར་མའི་ཆས་ཅན་གཙོ་འཁོར་གསུམ་མངོན་སུམ་བྱོན་ནས་བརྡའི་བྱིན་རླབས་སྩལ་ཏེ་ཉིད་ལ་ཐིམ་པའི་རྗེས་ཐོག་ཏུ་མཚོ་སྐྱེས་སྙིང་ཐིག་གི་རྩ་བའི་ཆོས་སྐོར་ཐུགས་ལ་ལམ་མེར་གསལ་བས་དེ་ཉིད་དུ་ལས་བྱང་རྫོགས་པར་གཏན་ལ་ཕབ། དེ་ནས་ཐ་སྐར་ཟླ་བའི་ཚེས་བཅོ་ལྔར་བསམ་ཡས་སུ་ཕེབས་ཏེ་རྫོངས་སུ་བཞུགས་པའི་ཉང་གཏེར་གུ་རུ་མཚོ་སྐྱེས་རྡོ་རྗེའི་མདུན་མཆོད་པ་རྒྱས་པར་ཕུལ་ནས་སྔ་མའི་ལས་བྱང་བཏང་བའི་ཚེ་སྐུ་བརྙན་དེ་མཚོ་སྐྱེས་རྡོ་རྗེ་དངོས་སུ་གྱུར་ནས་དབང་དང་གདམས་པ་སྩལ་ཏེ་ཉིད་ལ་ཐིམ་པའི་གཟིགས་སྣང་ཤར། ཡན་ལག་ཆོས་སྐོར་རྣམས་ཀྱང་དགོངས་པའི་ཀློང་དུ་གསལ་ཡང་རིང་ཞིག་གསང་རྒྱས་བཏབ། དགུངས་གྲངས་སོ་བདུན་མེ་འབྲུག་རྒྱལ་ཟླའི་ཡར་ཚེས་ལ་གཏེར་ཆེན་མཆོག་གྱུར་གླིང་པས་རྗེ་ཉིད་ལ་བཞུགས་པའི་ཟབ་ཆོས་ཞིག་གི་སྨིན་གྲོལ་སྩོལ་བའི་གསོལ་བ་ནན་ཏུ་བཏབ་པའི་ངོར་རྩ་དབང་དང་ལས་བྱང་གི་བཤད་པ་བཅས་གནང་བའི་ནུབ་མོ་གཏེར་ཆེན་མནལ་ལམ་དུ་གུ་རུ་རིན་པོ་ཆེས་རྒྱལ་ཚབ་ཏུ་མངའ་གསོལ་བའི་ལྟས་ཁྱད་པར་ཅན་གཟིགས། དེའི་བྱིན་རླབས་ཀྱིས་སྣ་དྲངས་ཏེ་སེང་ཆེན་གནམ་བྲག་གི་གཏེར་ཁ་རྣམས་ཀྱང་ཕྱག་ཏུ་སོན། ཕྱིས་སུ་བསྙེན་སྒྲུབ་མཛད་པའི་མཐར་ཚེས་བཅུའི་ཚོགས་འཁོར་སྐབས་ཐུགས་ཉམས་འུར་ཏེ་ཌ་དྲིལ་བར་སྣང་ལ་བཞག་པ་ཉེ་གནས་པས་ཀྱང་མཇལ་བའི་མངོན་རྟགས་བྱུང༌། དེ་ལྟ་བུའི་ཡིད་ཆེས་ངོ་མཚར་བྱིན་རླབས་ཀྱི་ཚན་ཁ་ཁྱད་དུ་འཕགས་པ་འདི་ནི་སྤྲུལ་པའི་གཏེར་ཆེན་རྣམ་པ་གཉིས་ཐུན་མོང་གི་ཟབ་ཆོས་བླ་སྒྲུབ་སྐོར་བཞིའི་ནང་ཚན་གསང་སྒྲུབ་མཚོ་སྐྱེས་རྡོ་རྗེ་ཞེས་གྲགས་པ་སྟེ། འདི་ལའང་རྩ་བ་དང་ཡན་ལག་གི་ཆོས་སྐོར་གཉིས་ལས་འདིར་རྩ་བའི་སྨིན་བྱེད་ཟབ་མོ་བསྒྲུབ་པ་ལ་བདག་ཉིད་ཀྱིས་བགྱི་བར་འོས་པ་སོགས་ཀྱི་མཚམས་སྦྱར་ནས་མཎྜལ་དུ་དབུལ་དུ་གཞུག །གནས་ཁང་འོག་མིན་པདྨ་འོད་ཀྱི་ཞིང་དང་གཞལ་མེད་ཁང་ཆེན་པོར་སློབ་དཔོན་ཉིད་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་གུ་རུ་མཚོ་སྐྱེས་རྡོ་རྗེ་དངོས་ཡིན་སྙམ་པའི་མོས་གུས་གདུང་ཤུགས་དྲག་པོས་སྙིམས་པ་མེ་ཏོག་གིས་བཀང་སྟེ་གསོལ་བ་གདབ་པ་འདིའི་རྗེས་ཟློས་མཛོད། ཨེ་མ་རྡོ་རྗེ་སློབ་དཔོན་དགོངས༔ བདག་ཅག་སྣོད་ལྡན་རིགས་ཀྱི་བུར༔ གསང་བ་མཆོག་གི་དཀྱིལ་འཁོར་དུ༔ སྒོ་གསུམ་སྨིན་པར་མཛད་དུ་གསོལ༔ ལན་གསུམ། སློབ་དཔོན་དང་མདུན་བསྐྱེད་དབྱེར་མ་མཆིས་པ་རྒྱལ་ཀུན་འདུས་ཞལ་གུ་རུ་མཚོ་སྐྱེས་རྡོ་རྗེ་ལ་དཀོན་མཆོག་རྩ་གསུམ་རབ་འབྱམས་རྒྱ་མཚོས་བསྐོར་ཏེ་བཞུགས་པ་ལ། བདག་གཞན་སེམས་ཅན་ཐམས་ཅད་དེང་ནས་བྱང་ཆུབ་སྙིང་པོ་ལ་མཆིས་ཀྱི་བར་དུ་སྒོ་གསུམ་གུས་པ་ཆེན་པོས་སྐྱབས་སུ་འགྲོ་བའི་འདུན་པས་འདིའི་རྗེས་ཟློས། ན་མོ། བདག་སོགས༴ ནས་སྐྱབས་སུ་མཆི༔ ལན་གསུམ། མཁའ་ཁྱབ་ཀྱི་ཕ་མ་སེམས་ཅན་མཐའ་དག་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་གུ་རུ་རིན་པོ་ཆེའི་གོ་འཕང་ལ་འགོད་པར་བྱ། དེའི་ཆེད་དུ་འཆི་མེད་མཚོ་སྐྱེས་སྙིང་ཐིག་གི་སྨིན་བྱེད་ཟབ་མོའི་སྒོར་ཞུགས་ཏེ། ལམ་རིམ་པ་གཉིས་ཀྱི་རྣལ་འབྱོར་ལ་བརྩོན་པར་བགྱིའོ་སྙམ་པས་འདིའི་རྗེས་ཟློས། ཧོཿ གཞན་དོན་ནས༴ སེམས་བསྐྱེད་དོ༔ ལན་གསུམ། ཚོགས་ཀྱི་ཞིང་ཁྱད་པར་ཅན་དེ་དག་གི་སྤྱན་སྔར་བསགས་སྦྱོང་སྤེལ་གསུམ་གྱི་ཐབས་ཁྱད་པར་དུ་འཕགས་པ་ཡན་ལག་བདུན་པ་ཚུལ་བཞིན་དུ་བྱ་བའི་འདུན་པས་ཏིང་ངེ་འཛིན་སོ་སོར་གསལ་ཐོབ་ལ་རྗེས་ཟློས། ཧོཿ འཆི་མེད་རྩ་གསུམ་ནས༴ སྙིང་པོར་བསྔོ། ལན་གསུམ། དབང་གི་སྲོག་འཛིན་པ་ནི་དམ་ཚིག་དང་སྡོམ་པ་ལ་རག་ལས་པ་ཡིན་པས་སོ་བྱང་སྔགས་གསུམ་གྱིས་བསྡུས་པའི་སྡོམ་པ་མཐའ་དག་ངོ་བོ་གནས་འགྱུར་བའི་ཚུལ་གྱིས་བཟུང༌། ཡོན་ཏན་ཡར་ལྡན་གྱི་ཚུལ་གྱིས་བསྲུང་ཞིང་སྤེལ། དུས་སྐབས་དགོས་པ་གང་གཙོའི་ལག་ལེན་ཐད་ཀར་སྤྱད་པར་བགྱིའོ་སྙམ་པས་འདིའི་རྗེས་ཟློས། ཨོ་རྒྱན་གདུང་འཛིན་རྒྱལ་བའི་སྲས༔ རྡོ་རྗེ་སློབ་དཔོན་དགོངས་སུ་གསོལ། །བདག་ནི་འདི་བཟུང་བྱང་ཆུབ་བར༔ སོ་སོ་ཐར་དང་བྱང་ཆུབ་སེམས༔ རིག་འཛིན་ནང་གི་སྡོམ་པའི་ཚོགས༔ ཡང་དག་ཉིད་དུ་བཟུང་བྱས་ཏེ༔ སྲོག་གི་ཕྱིར་ཡང་མི་བཏང་ན༔ བདག་ལ་བྱིན་གྱིས་བརླབ་ཏུ་གསོལ༔ ལན་གསུམ། དེ་རྣམས་ཀྱིས་རྒྱུད་རྣམ་པར་དག་པར་བྱ་བ་སོང་ནས། དབང་གི་གཞི་དགོད་པ་ཡེ་ཤེས་པ་དབབ་པ་ཡིན་པས་ཁྱེད་རང་རྣམས་ལུས་ངག་ཡིད་གསུམ་གྱི་གནད་གཅུན་ལ་གཞན་ཏུུ་མ་ཡེངས་པར་དམིགས་པ་འདི་རྩེ་གཅིག་ཏུ་གསལ་ཐོབ་ཅིག ཨཱཿ གཞི་དབྱིངས་ཀ་དག་དེ་བཞིན་ཉིད༔ སོགས་ནས། སྤྲུལ་སྐུའི་ཆ་ལུགས་མཚན་དཔེས་མཛེས༔ བར་ལས་བྱང་ལྟར་བརྗོད། དེ་ལྟར་གསལ་བའི་གནས་གསུམ་དུ་རྡོ་རྗེ་གསུམ་གྱི་ངོ་བོ་ཡི་གེ་ཨོཾ་ཨཱཿཧཱུྃ་དཀར་དམར་མཐིང་གསུམ་གྱིས་མཚན་པ་དང༌། སློབ་དཔོན་གྱི་ཐུགས་ཀ་ནས་ཀྱང་འོད་ཟེར་ཁ་དོག་སྣ་ཚོགས་པ་ནམ་མཁའི་དབྱིངས་གང་བ་འཕྲོས། སངས་རྒྱས་ཀྱི་ཞིང་རབ་འབྱམས་དང་ཁྱད་པར་རྔ་ཡབ་པདྨ་འོད་ཀྱི་གཞལ་མེད་ཁང་ཆེན་པོ་ན་བཞུགས་པའི་རྒྱལ་བ་སྲས་དང་བཅས་པ་རྣམས་དང་གུ་རུ་པདྨ་ཐོད་ཕྲེང་རྩལ་གྱི་ཐུགས་རྒྱུད་བསྐུལ། ཐམས་ཅད་ཀྱང་འཆི་མེད་མཚོ་སྐྱེས་རྡོ་རྗེའི་སྐུའི་རྣམ་པར་བཞེངས་ཏེ་ནམ་མཁའ་ནས་ཆར་ཆེན་པོ་འབབ་པ་བཞིན་བྱོན་ནས་ཁྱེད་རང་རྣམས་ལ་དབྱེར་མེད་དུ་ཐིམ་པས་རྒྱུད་བྱིན་གྱིས་བརླབས་པའི་མོས་འདུན་མཛོད་ཅིག འབེབས་པའི་རྫས་བདུག །དབྱངས་རོལ་དང་བཅས། ཧཱུྃ༔ སྔོན་གྱི་བསྐལ་པ་སོགས་ལས་གཞུང་ལྟར་བརྗོད་ལ་བྱིན་དབབ། ཡེ་ཤེས་པའི་བྱིན་རླབས་ཀྱི་རྒྱུན་སྒོ་གསུམ་ལ་རབ་ཏུ་གནས་པར་བྱས་པར་མོས་ཤིག ཏིཥྛ་བཛྲ། ཞེས་རྒྱ་གྲམ་མགོར་བཞག་ལ་བརྟན་པར་བྱ། དེ་དག་རྣམས་ཀྱིས་འཇུག་པའི་རིམ་པ་གྲུབ་ནས་དངོས་གཞིའི་དབང་རྣམས་རིམ་པར་ཞུ་བའི་ཡོན་ཏུ་མཎྜལ་ཕུལ། ཅེས་འབུལ་གཞུག །དེ་ལ་དང་པོ་བུམ་པའི་དབང་གི་དོན་དུ། གསོལ་བ་འདེབས་པ་འདིའི་རྗེས་ཟློས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་བཞིན། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། ལན་གསུམ། དེ་ལྟར་གསོལ་བ་བཏབ་པ་ལས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། གདན་གསུམ་ཚང་བའི་དབང་གི་ལྷ་ནམ་མཁའ་གང་བ་སྤྱན་དྲངས་བཛྲ་ས་མཱ་ཛ༔ ཨོཾ་བཛྲ་ཨརྒྷཾ་སོགས་ཀྱིས་མཆོད། ཆོས་སྐུ་ནམ་མཁའ་སོགས་ཀྱིས་བསྟོད། དེ་བཞིན་གཤེགས་པ་ཐམས་ཅད་ཀྱིས་སློབ་མ་ལ་མངོན་པར་དབང་བསྐུར་བ་སྩལ་དུ་གསོལ། ཅེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། སེམས་དཔའ་རྣམས་ཀྱིས་ཤིས་པ་བརྗོད་ཅིང་མེ་ཏོག་འཐོར། སེམས་མ་རྣམས་ཀྱིས་རྡོ་རྗེའི་གླུ་ལེན། ཁྲོ་བོ་ཁྲོ་མོ་རྣམས་ཀྱིས་བར་གཅོད་ཀྱི་བགེགས་བསྐྲད། ཡུམ་ལྔ་རྩ་གསུམ་ལྷ་ཚོགས་རྣམས་ཀྱི་ངོ་བོ་བདུད་རྩིས་བཀང་བའི་བུམ་པ་ཐོགས་ནས་དབང་བསྐུར་བའི་ཕྲིན་ལས་མཛད་པར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཐམས་ཅད་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་སྐྱེད་བྱེད་བདེ་བ་ཆེན་པོ་སྟེ། དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཅེས་ཤིས་པ་བརྗོད་ཅིང་མེ་ཏོག་འཐོར། བུམ་པ་སྤྱི་བོར་བཞག་ལ། ཨོཾ༔ འཆི་མེད་རྩ་གསུམ་ལྷ་ཚོགས་ཀྱི༔ གསང་གསུམ་གནས་ལས་བྱུང་བ་ཡི༔ ཡེ་ཤེས་བདུད་རྩིས་དབང་བསྐུར་བས༔ ཕུང་ཁམས་ལྷ་སྐུར་དག་པར་ཤོག༔ ཨོཾ་ཨཱཿཧཱུྃ་བཛྲ་ཀ་ལ་ཤ་ཀཱ་ཡ་ཨ་བྷི་ཤིཉྩ་ཨོཾ༔ ཞེས་གསུངས་ཤིང་དབང་བསྐུར་བས་བདུད་རྩིའི་རྒྱུན་གྱིས་ལུས་ཐམས་ཅད་གང༌། དྲི་མ་དག །ཆུའི་ལྷག་མ་གྱེན་དུ་འཁྱིལ་བ་ལས། རིགས་ཀྱི་བདག་པོ་འོད་དཔག་མེད་ཀྱི་རྒྱས་བཏབ་པ་ལ་ནམ་མཁའི་དབང་ལྷ་རྣམས་ཀྱང་ཐིམ་པར་གྱུར། ཨོཾ་སུ་པྲ་ཏིཥྛ་སོགས་དང་མེ་ཏོག་འཐོར་ལ་བརྟན་པར་བྱ། དེའི་རྗེས་འབྲེལ་དུ་སྐུ་གསུང་ཐུགས་ཀྱི་དབང་བསྐུར་བ་ཡིན་པས་དང་པོའི་སླད་དུ་འདུན་པ་འདི་ལྟར་དུ་མཛོད། འདི་ལྟར་སྣང་བའི་སྣོད་ཀྱི་འཇིག་རྟེན་འོག་མིན་པདྨ་འོད་ཀྱི་གཞལ་མེད་ཁང༌། བཅུད་ཀྱི་སྐྱེ་འགྲོ་ཐམས་ཅད་འཆི་མེད་མཚོ་སྐྱེས་རྡོ་རྗེའི་སྐུའི་རྣམ་པར་བཀྲ་ལམ་གྱིས་འཆར་བར་མོས་ལ་སེམས་གཏོད་ཅིག །དེས་སྐུའི་དབང་བསྐུར་ཐོབ་པས་དེང་ཕྱིན་ཆད་སྣང་སྟོང་ཕྱག་རྒྱའི་ལམ་ཁྱེར་དང་མ་བྲལ་བ་གྱིས་ཤིག །གཉིས་པ་གསུང་བཟླས་ལུང་གི་སླད་དུ། སློབ་དཔོན་དང་ཁྱེད་རང་རྣམས་ཀྱི་གནས་གསུམ་འབྲུ་གསུམ་གསལ་བ་ལས་འོད་ཟེར་འཕྲོས། རང་གིས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་མདུན་གྱི་ནམ་མཁར་བཞུགས་པའི་གནས་གསུམ་ནས་གསང་བ་གསུམ་གྱི་བྱིན་རླབས་ཐམས་ཅད་སྐུ་ཕྱག་རྒྱ། གསུང་སྔགས་ཕྲེང༌། ཐུགས་ཕྱག་མཚན་དང་འོད་ཟེར་དཀར་དམར་མཐིང་གསུམ་རྣམ་པ་དཔག་ཏུ་མེད་པ་བྱོན་ཏེ་ཁྱེད་རང་རྣམས་ཀྱི་གནས་གསུམ་དུ་ཐིམ་པས་སྒྲིབ་བཞི་དག །དབང་བཞི་ཐོབ། སྐུ་བཞིའི་ས་བོན་རྒྱུད་ལ་བཞག །ཐུན་མོང་མཆོག་གི་དངོས་གྲུབ་བདེ་བླག་ཏུ་ཐོབ་པར་མོས་ལ་བསྙེན་སྔགས་འདིའི་རྗེས་ཟློས། ཨོཾ་ཨཱཿཧཱུྃ་བཛྲ་གུ་རུ་སོགས་ལན་གསུམ། ནམ་མཁར་བཞུགས་པའི་ལྷ་རྣམས་རང་རང་ལ་ཐིམ། ཁྱེད་རང་རྣམས་ལྷར་གསལ་བའི་སྙིང་གའི་ཡེ་ཤེས་སེམས་དཔའི་ཐུགས་ཀར་ཉི་ཟླའི་གྭའུའི་དབུས་སུ་ཧྲཱིཿདམར་པོ་རེ་གསལ་ཐོབ། སློབ་དཔོན་ཡང་དེ་ལྟར་གསལ་བ་ལ་མོས་གུས་བྱས་པས་ཐུགས་སྲོག་སྔགས་ཕྲེང་དང་བཅས་པ་ལས་སྔགས་ཕྲེང་གཉིས་པ་བྱུང༌། ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས་པ་སྙིང་གའི་ཧྲཱིཿཡིག་གི་མཐར་འཁོད་ཅིང་གཡས་སུ་འཁོར་བའི་འོད་ཟེར་གྱིས་རྩ་བ་གསུམ་གྱི་ལྷ་ཚོགས་མཆོད་ཅིང་ཐུགས་དམ་བསྐུལ། བྱིན་རླབས་དངོས་གྲུབ་ཐམས་ཅད་འོད་ཟེར་གྱི་རྣམ་པར་བསྡུས་ཏེ་ཐིམ། སྣོད་བཅུད་ཀྱི་དངོས་འཛིན་བག་ཆགས་དང་བཅས་པ་སྦྱངས་ནས་ལྷ་སྔགས་ཡེ་ཤེས་ཀྱི་འཁོར་ལོར་གྱུར་པར་མོས་ལ་སྒྲུབ་པའི་སྔགས་ཀྱི་རྗེས་ཟློས། ཨོཾ་ཨཱཿཧཱུྃ་བཛྲ་གུ་རུུ་པདྨ་དྷེ་ཝ་དྷཱ་ཀི་ནཱི་སརྦ་སིདྡྷི་ཕ་ལ་ཧཱུྃ་ཨཱཿ ལན་གསུམ། སླར་ཡང་སྔགས་ཕྲེང་ལས་འོད་ཟེར་སྣ་ཚོགས་ཕྱོགས་བཅུར་འཕྲོས་པས་ཕྲིན་ལས་བཞི་དང་དངོས་གྲུབ་རྣམ་གཉིས་འབད་མེད་དུ་འགྲུབ་པར་མོས་ལ་ལས་སྦྱོར་སྔགས་ཀྱི་རྗེས་ཟློས། དེ་ལྟར་རྗེས་ཟློས་བྱར་གཞུག །དེས་གསུང་གི་དབང་ཐོབ་པས་དེང་ཕྱིན་ཆད་གྲགས་སྟོང་སྔགས་ཀྱི་ལམ་ཁྱེར་དང་མ་བྲལ་བ་གྱིས་ཤིག །གསུམ་པ་ཐུགས་འོད་གསལ་གྱི་དགོངས་པ་ངོ་སྤྲད་པའི་སླད་དུ། བསྒོམ་པའི་དཀྱིལ་འཁོར་བརྟེན་དང་བརྟེན་པར་བཅས་པ་ཐམས་ཅད་ནམ་མཁའ་ལ་འཇའ་ཚོན་ཡལ་བ་བཞིན་འོད་གསལ་གཉུག་མའི་ཀློང་དུ་ཐིམ་པར་མོས་ལ་ཀ་དག་དེ་ཁོ་ན་ཉིད་ཀྱི་ངང་དུ་མཉམ་པར་ཞོག་ཅིག །ཅེས་ཅུང་ཟད་འཇོག །དེས་ཐུགས་ཀྱི་དབང་ཐོབ་པས་དེང་ཕྱིན་ཆད་རིག་སྟོང་ཟུང་འཇུག་ཡེ་ཤེས་ཆེན་པོའི་ལམ་ཁྱེར་དང་མ་བྲལ་བ་གྱིས་ཤིག །དེ་ལྟར་ན་དེ་རྣམས་ཀྱིས་རྩ་གསུམ་ཡོངས་རྫོགས་ལ་བརྟེན་ནས་མཚན་མའི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ། ལུས་ཀྱི་སྒྲིབ་པ་དག །ལམ་བསྐྱེད་རིམ་བསྙེན་པའི་རྣལ་འབྱོར་བསྒོམ་པ་ལ་དབང༌། འབྲས་བུ་སྐུ་རྡོ་རྗེ་སྤྲུལ་པའི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ༔ ཞེས་དག་པ་བརྗོད། གཉིས་པ་གསང་བའི་དབང་བསྐུར་བ་ལ་དམིགས་པ་འདི་ལྟར་དུ་མཛོད། སླར་ཡང་སློབ་དཔོན་དང་ཁྱེད་རང་རྣམས་སྐད་ཅིག་གིས་སྤྱན་རས་གཟིགས་སྐུ་མདོག་དམར་པོ་ཞལ་གཅིག་ཕྱག་བཞི་པ་ཐལ་སྦྱར་ཕྲེང་བ་དང་པདྨ་བསྣམས་ཤིང་ཡུམ་དང་བཅས་པ། རྒྱན་ཆ་ལུགས་ཡོངས་སུ་རྫོགས་པའི་སྐུར་ལམ་གྱིས་གྱུར་པར་མོས་ཤིག །བླ་མ་ཡབ་ཡུམ་མཉམ་པར་སྦྱོར་བའི་དགའ་བའི་སྒྲ་དང་བདེ་བའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་སྤྱན་དྲངས། ཞལ་དུ་ཞུགས། ཐུགས་ཀར་ཆགས་པ་ཆེན་པོའི་མེས་ཞུ། བྱང་ཆུབ་སེམས་ཀྱི་ཆུ་རྒྱུན་མཁའ་གསང་ནས་ཕྱུངས་ཏེ་ཐོད་པའི་བདུད་རྩི་དང་རོ་གཅིག་ཏུ་འདྲེས་པ་ཁྱེད་རང་རྣམས་ལ་བྱིན་པ་མགྲིན་པའི་ལམ་བརྒྱུད། རྩ་ཁམས་ཐམས་ཅད་ལ་ཁྱབ་པས་ལས་རླུང་གི་འཆིང་བ་དབུ་མའི་དབྱིངས་སུ་གྲོལ་ཏེ་གསལ་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་པར་མོས་ཤིག །ཐོད་པའི་བདུད་རྩི་སྦྱིན་ལ། ཨཱཿ འཇིག་རྟེན་དབང་ཕྱུག་བདེ་བ་ཆེ༔ རྡོ་རྗེ་བཙུན་མོར་སྙོམས་ཞུགས་པའི༔ བྱང་ཆུབ་སེམས་ཀྱི་དབང་བསྐུར་བས༔ རྩ་རླུང་དབུ་མར་ཐིམ་པར་ཤོག༔ ཨོཾ་ཨཱཿཧཱུྃ་བོ་དྷི་ཙིཏྟ་ཝཱ་ཀ་ཨ་བྷི་ཥིཉྩ་ཨཱཿ དེ་ལྟར་ཡེ་ཤེས་སེམས་དཔའ་ལ་བརྟེན་ནས་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་བསྐུར་བ་ཐོབ། ངག་གི་སྒྲིབ་པ་དག །ལམ་རྩ་རླུང་ཉེ་བར་བསྙེན་པའི་རྣལ་འབྱོར་བསྒོམ་པ་ལ་དབང༌། འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་ཅན་ཏུ་བྱས་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ལ་དམིགས་འདུན་འདི་བཞིན་ཏུ་མཛོད། སློབ་དཔོན་དང་ཁྱེད་རང་རྣམས་སྐད་ཅིག་གིས་དཔལ་ཆེན་རྟ་མགྲིན་སྐུ་མདོག་དམར་པོ་ཁྲོ་ཞིང་འཛུམ་པའི་ཉམས་ཅན་ཡུམ་ཕག་མོ་མཐིང་གས་འཁྱུད་པ། གཉིས་ཀའང་གྲི་གུག་དང་ཐོད་པ་འཛིན་ཅིང་དུར་ཁྲོད་ཀྱི་ཆས་དང་རྟ་ཞལ་ཕག་ཞལ་གྱིས་མཚན་པ། བདེ་དྲོད་ཀྱི་མེ་ཕུང་འབར་བའི་དབུས་ན་བཞུགས་པར་གསལ་ཐོབ། རྟ་ཕག་ཡབ་ཡུམ་གྱི་ཕྱག་རྒྱ་སྣང་སྟོང་སྒྱུ་མ་ལྟ་བུའི་བརྡས་མཚོན་ཏེ་ཆོས་ཐམས་ཅད་དོན་ཐབས་དང་ཤེས་རབ་ཟུང་དུ་འཇུག་པའི་རྟགས་ལྷན་སྐྱེས་སུ་གྲུབ་པ་ཉིད་ཟབ་མོའི་གནད་ཀྱིས་ལམ་དུ་ཁྱེར་དགོས་པའི་དོན་རྟོགས་པར་གྱིས་ཤིག །མེ་ལོང་ངོས་སུ་རྟ་ཕག་སྐུ་གཟུགས་ཤར་བ་བསྟན་ལ། ཧཱུྃ༔ བདེ་ཆེན་ཐབས་མཆོག་གར་གྱི་དབང་༔ ཤེས་རབ་སྟོང་ཉིད་ཕག་མོ་ཡུམ༔ མཉམ་སྦྱོར་ཕྱག་རྒྱའི་དབང་བསྐུར་བས༔ ལྷན་སྐྱེས་ཡེ་ཤེས་རྟོགས་པར་ཤོག༔ ཨཱོཾ་ཨཱཿཧཱུྃ་མ་ཧཱ་མུ་དྲ་ཙིཏྟ་ཨ་བྷི་ཥིཉྩ་ཧཱུྃ༔ སློབ་དཔོན་དབང་ཆེན་རྟ་མགྲིན་གྱི་ཡུམ་ལས་ཕག་མོ་གཉིས་པ་འཕྲོས། ཁྱེད་རང་གི་ཡུམ་ལ་ཐིམ་པས་ཁྱེད་རང་རྟ་ཕག་ཡབ་ཡུམ་དངོས་སུ་གསལ་བ་ལྷའི་འདུ་ཤེས། མཁའ་གསང་རྡོ་རྗེ་དང་པདྨར་བྱིན་གྱིས་བརླབས་པ་སྔགས་ཀྱི་འདུ་ཤེས། ཐབས་ཟབ་མོ་འདི་ལ་བརྟེན་ནས་བདེ་ཆེན་ཕྱག་རྒྱ་ཆེན་པོའི་གོ་འཕང་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་དེ་གསུམ་དང་ལྡན་པས་སྙོམས་པར་ཞུགས་པ་ལས་ཡས་བབ་དང་མས་བརྟན་གྱི་དགའ་བཞིའི་ཡེ་ཤེས་རིམ་པར་སྐྱེས་པའི་རང་ངོ་ལ་མཉམ་པར་བཞག་པས་མཐར་ཐུག་འཕོ་མེད་ལྷན་ཅིག་སྐྱེས་པའི་བདེ་ཆེན་ཀྱི་ཡེ་ཤེས་མངོན་ཏུ་གྱུར་པར་མོས་ཤིག །དེ་ལྟར་རྟ་མགྲིན་ཡབ་ཡུམ་ལ་བརྟེན་ནས་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ། ཡིད་ཀྱི་སྒྲིབ་པ་དག །ལམ་དགའ་བཞིའི་ཡེ་ཤེས་སྒྲུབ་པའི་རྣལ་འབྱོར་བསྒོམ་པ་ལ་དབང༌། འབྲས་བུ་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །བཞི་པ་དོན་དམ་རིག་པ་རྩལ་གྱི་དབང་བསྐུར་བ་ལ་དམིགས་པ་འདི་ལྟར་མཛོད་ཅིག །གཏོར་མ་ཐོགས་ལ། དབྱིངས་ཀྱི་ངོ་བོ་གཏོར་སྣོད་གཞལ་མེད་ཁང་དུ་རིག་པའི་རང་བཞིན་བླ་མའི་གཏོར་ཆེན་དང༌། སློབ་དཔོན་ཁྱེད་རང་རྣམས་དང་བཅས་པ་སྐད་ཅིག་གིས་རིགས་ཀྱི་བདག་པོ་འོད་དཔག་མེད་སྤྲུལ་སྐུའི་ཆ་ལུགས་ཅན། སྐུ་མདོག་དམར་པོ་མཉམ་བཞག་ལྷུང་བཟེད་འཛིན་ཅིང་རྡོ་རྗེའི་སྐྱིལ་ཀྲུང་གིས་བཞུགས་པའི་སྐུར་ལམ་སྟེ་གྱུར་པ་ལ། གཏོར་མའི་ལྷ་སྤྱི་བོར་སྤྱན་དྲངས་ཏེ་རྡོ་རྗེ་ཡེ་ཤེས་ཆེན་པོའི་བྱིན་རླབས་སྩོལ་བར་མོས་ལ་དད་གུས་དྲག་པོ་སྐྱེད་ཅིག །ཨཱཿ གཏོར་སྣོད་ཀ་དག་ཆོས་ཀྱི་དབྱིངས༔ གཏོར་མ་ལྷུན་གྲུབ་རིག་པའི་སྐུ༔ རིགས་ཀྱི་བདག་པོས་དབང་བསྐུར་བས༔ གདོད་མའི་གནས་ལུགས་མངོན་གྱུར་ཤོག༔ ཨོཾ་ཨཱཿཧཱུྃ་དྷཱ་ཏུ་ཛྙཱ་ན་ཀཱ་ཡ་ཨ་བྷི་ཥིཉྩ་ཧྲཱི༔ ཞེས་གཏོར་མ་མགོར་བཞག །གཏོར་མའི་ལྷ་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་ཡེ་ཤེས་འཕོ་བའི་བྱིན་རླབས་ཐོབ། བླ་མ་ཆོས་སྐུའི་ཐུགས་དང་རང་གི་སེམས་དབྱེར་མེད་དུ་འདྲེས། གནས་ལུགས་རྫོགས་པ་ཆེན་པོའི་དགོངས་པ་མངོན་ཏུ་གྱུར་པར་མོས་ལ་རིག་སྟོང་ཁྱབ་བརྡལ་ཆེན་པོའི་དབྱིངས་སུ་མཉམ་པར་ཞོག་ཅིག །ཨ་ཨ་ཨ༔ ཞེས་དཔོན་སློབ་གཉིས་ཀས་དར་གཅིག་མཉམ་པར་བཞག །སླར་ཡང་ལྟ་སྒོམ་སྤྱོད་འབྲས་བཞིའི་ངོ་སྤྲོད་མདོར་བསྡུ་བའི་ཚུལ་གྱིས་གདབ་པ་ཡིན་པས་འདི་ལ་གསན་འཚལ། དེའང་ལྟ་བ་ལུང་རིགས་དང་འབྲེལ་བ་ཡིན་པས། ཇི་སྐད་དུ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་པས་ཆོས་ཐམས་ཅད་ཀྱི་གནས་ལུགས་སྨྲ་བསམ་བརྗོད་པ་ཀུན་ལས་འདས་པ། གདོད་མ་ནས་སྐྱེ་འགགས་སོགས་སྤྲོས་པའི་མཐའ་ཐམས་ཅད་དང་བྲལ་བས་ནམ་མཁའ་ལྟ་བུའི་དབྱིངས་དེ་ཉིད་སོ་སོ་རང་གི་རིག་པ་མངོན་སུམ་པས་ཉམས་སུ་མྱོང་བའི་སྤྱོད་ཡུལ་ཅན། དུས་གསུམ་རྒྱལ་བ་མ་ལུས་པ་སྐྱེད་པའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའམ་རང་བཞིན་རྫོགས་པ་ཆེན་པོ་ཞེས་བྱ་བ་དབྱིངས་དང་རིག་པ་ཟུང་དུ་འཇུག་པའི་ཡེ་གྲོལ་ལ་བསྐྱར་གྲོལ་གྱི་ལྷན་པ་གདབ་མི་དགོས་པ་ཤེས་རིག་ཟང་ཀ་མ་འདི་ཀ་ཡིན་ལ། དེ་ལྟར་ལྟ་བ་རིག་སྟོང་རྗེན་པ་ངོ་འཕྲོད་ཕན་ཆོད་སྒོམ་པ་ཉམས་མྱོང་དང་འབྲེལ་དགོས་པས། དྲན་པས་ཟིན་ཙམ་ནས་གསལ་བ་སྟོང་པ་རིག་པའི་སྙིང་པོ་ཅན་གྱི་ངང་བསྐྱངས་ནས་ཉམས་ལེན་ཆུ་བོ་རྒྱུན་གྱི་རྣལ་འབྱོར་ལ་གོམས་པར་བྱ་དགོས། ལྟ་སྒོམ་གྱི་བོགས་འདོན་ཏུ་སྤྱོད་པ་དུས་ཚོད་དང་འབྲེལ་བར་སྤྱོད་པས་འབྲས་བུ་གཞན་དོན་དང་འབྲེལ་བ་རིང་པོར་མི་ཐོགས་པ་ཤུགས་ལས་འབྱུང་བ་ཡིན་པས་དེ་ལྟར་ཉམས་སུ་ལོངས་ཤིག །ཅེས་གདམས། དེ་ལྟར་ཡེ་ཤེས་སེམས་དཔའི་བྱིན་རླབས་འཕོ་བ་ལ་བརྟེན་ནས་སྣང་སྲིད་རྫོགས་པ་ཆེན་པོའི་དཀྱིལ་འཁོར་དུ་དབང་བཞི་པ་ཐོབ། ཡེ་ཤེས་ཀྱི་དྲི་མ་དག །ལམ་ཀ་དག་ལྷུན་གྲུབ་རྫོགས་པ་ཆེན་པོ་སྒྲུབ་པ་ཆེན་པོའི་རྣལ་འབྱོར་བསྒོམ་པ་ལ་དབང༌། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །ཞེས་རྟོགས་པ་བསྐྱེད། ཤིས་བརྗོད་ལས་བྱང་ནས་འབྱུང་བ་སོགས་ཇི་ལྟར་འོས་པ་བརྗོད། དམ་ཚིག་བསྒྲག་བཟུང༌། གཏང་རག་མཎྜལ་དང་ལུས་འབུལ། དགེ་བསྔོ་བྱས་ལ་སློབ་མ་གྱེས། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བཏང་བ་ནས་ཤིས་བརྗོད་ཀྱི་བར་ཡང་ཕྲིན་ལས་དང་གསང་བ་སྤྱིའི་རིགས་འགྲེ་སྦྱར་བས་འགྲུབ་བོ། །འདིར་འབད་དགེ་བས་མཚོ་སྐྱེས་རྗེའི། །གསང་གསུམ་ཕྲིན་ལས་དང་བཅས་པ། །བདག་གཞན་འགྲོ་བས་མྱུར་འགྲུབ་སྟེ། །འཆི་མེད་རྡོ་རྗེའི་དཔལ་ཐོབ་ཤོག །ཅེས་པའང་གཏེར་ཆེན་བླ་མ་ཐམས་ཅད་མཁྱེན་པའི་རྡོ་རྗེ་ཞལ་ལུང་མ་ནོར་བར་ཆོས་འདིའི་སྣོད་ལྡན་༧པདྨ་གར་དབང་བློ་གྲོས་མཐའ་ཡས་ཀྱིས་རྫོང་སར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་བགྱིས་པ་དགེ་ལེགས་འཕེལ།། །།

[edit]

@#/__/'chi med mtsho skyes snying tig las/__smin byed rtsa ba'i dbang bzhi bklag chog tu bkod pa ye shes bdud rtsi'i char rgyun ces bya ba bzhugs so/ @#/__/na mo gu ru pad+ma badz+rA ya/__/'chi med rdo rje'i sku gsung thugs/__/yon tan phrin las mkha' dang mnyam/__/de nyid bla ma'i skur bstan nas/__/snyigs ma'i gdul bya skyong la 'dud/__/ngo mtshar bla sgrub skor bzhi las/__/gsang sgrub mtsho skyes rdo rje yi/__/rtsa ba'i smin byed bdud rtsi'i char/__/skal ldan zhing sa'i gsos su longs/__/'chi med mtsho skyes snying thig gi rtsa ba'i smin byed sgrub pa la gsum/__sbyor ba/__dngos gzhi/__rjes so/__/dang po yo byad gshom ni/__yar ngo'i tshes bcu dang gu ru'i sgrub gnas lta bu'i dus dang gnas bzang por mdzes pa'i stegs la dkyil 'khor pad+ma 'dab brgyad tshom bu gcig pa'i steng du rkang gsum la bum pa bcud ldan mgul chings dkar po kha rgyan dang bcas pa'i steng du 'phrul stegs la bla gtor rgyan ldan bkod/__go yul mi bde na rgyab tu bzhag kyang chog__/g.yas g.yon tu thod pa mtshan ldan mngar sbyar chang gis bkang ba dang*/__me long dri med rta phag tsakli dang bcas pa bzhag__/phyi nang gi mchod gtor lag len ltar bshams la mkho ba'i yo byad tshogs par bya'o/__/gnyis pa la thog mar dbang don sgrub mchod ni/__gsol 'debs sngon tu 'gro bas las byang mthar chags su btang zhing bzlas pa ci nus bya/__las sbyor bzlas pa'i rjes su rnam bum gsal gdab sogs spyi ltar byas te gzungs thag blangs la sgrub pa'i bzlas pa brgya rtsa sogs kyi mthar bum lha 'od zhu bya/__las bum du rta mgrin bskyed bzlas dang*/__srung ma'i gtor 'bul/__tshogs byin rlabs bsgral bstab kyi bar du btang*/__rig pa'i me tog dor la gnang ba nod do/__/gnyis pa dbang dngos la/__slob ma rnams khrus bya/__bgegs gtor btang la bka' bsgo zhing mtshams bcad/__me tog bkye bsdu dang sems bskyed gsal btab la/__de la 'dir 'chad par bya ba/__gsang sngags rdo rje theg pa snga 'gyur gter ma'i phyogs la gter rigs kyi dbye ba mang du gsungs pa rnams mdor dril na/__phyi sa gter/__nang dag snang*/__gsang ba dgongs pa'i gter kha gsum du 'du ba las 'dir ni shin tu yang zab dgongs pa'i gter kha yin te/__de'i lo rgyus snying po tsam brjod na/__rgyal ba kun gyi yab gcig rje btsun 'jam pa'i rdo rje nyid gangs ljongs bstan pa'i shing rta chos rgyal chen po'i rnam par bzhengs pa tshangs pa lha'i me tog de nyid snyigs ma'i dus mthar bod 'bangs skyob pa'i dpal mgon tu bsam bzhin sprul pa'i rol gar bzung ba/__gangs can mkhas grub yongs kyi 'khor los sgyur ba chen po 'jam dbyangs mkhyen brtse'i dbang po'am pad+ma 'od gsal mdo sngags gling pa gang nyid dgungs grangs sa sprel nyer dgur son pa'i skabs bod yul dbus su pheb pa'i byang lam dge rgyal phyogs su khrums zla'i tshes bcur khel bas bla ma gsang 'dus tshogs mchod mdzad pas thugs nyams 'bar/__phyi rol du phebs skabs brag phug kha lho nub tu blta ba yid du 'ong ba zhig 'dug pa'i nang du pheb pas thugs spro bar byung nas bla ma'i rnal 'byor zhig mdzad pa'i mthar cung zad mnal du song ba la sgra chen po zhig grags pas sad pa na/__mdun gyi nam mkhar gu ru za hor ma'i chas can gtso 'khor gsum mngon sum byon nas brda'i byin rlabs stsal te nyid la thim pa'i rjes thog tu mtsho skyes snying thig gi rtsa ba'i chos skor thugs la lam mer gsal bas de nyid du las byang rdzogs par gtan la phab/__de nas tha skar zla ba'i tshes bco lngar bsam yas su phebs te rdzongs su bzhugs pa'i nyang gter gu ru mtsho skyes rdo rje'i mdun mchod pa rgyas par phul nas snga ma'i las byang btang ba'i tshe sku brnyan de mtsho skyes rdo rje dngos su gyur nas dbang dang gdams pa stsal te nyid la thim pa'i gzigs snang shar/__yan lag chos skor rnams kyang dgongs pa'i klong du gsal yang ring zhig gsang rgyas btab/__dgungs grangs so bdun me 'brug rgyal zla'i yar tshes la gter chen mchog gyur gling pas rje nyid la bzhugs pa'i zab chos zhig gi smin grol stsol ba'i gsol ba nan tu btab pa'i ngor rtsa dbang dang las byang gi bshad pa bcas gnang ba'i nub mo gter chen mnal lam du gu ru rin po ches rgyal tshab tu mnga' gsol ba'i ltas khyad par can gzigs/__de'i byin rlabs kyis sna drangs te seng chen gnam brag gi gter kha rnams kyang phyag tu son/__phyis su bsnyen sgrub mdzad pa'i mthar tshes bcu'i tshogs 'khor skabs thugs nyams 'ur te Da dril bar snang la bzhag pa nye gnas pas kyang mjal ba'i mngon rtags byung*/__de lta bu'i yid ches ngo mtshar byin rlabs kyi tshan kha khyad du 'phags pa 'di ni sprul pa'i gter chen rnam pa gnyis thun mong gi zab chos bla sgrub skor bzhi'i nang tshan gsang sgrub mtsho skyes rdo rje zhes grags pa ste/__'di la'ang rtsa ba dang yan lag gi chos skor gnyis las 'dir rtsa ba'i smin byed zab mo bsgrub pa la bdag nyid kyis bgyi bar 'os pa sogs kyi mtshams sbyar nas maN+Dal du dbul du gzhug__/gnas khang 'og min pad+ma 'od kyi zhing dang gzhal med khang chen por slob dpon nyid dus gsum sangs rgyas thams cad 'dus pa'i ngo bo gu ru mtsho skyes rdo rje dngos yin snyam pa'i mos gus gdung shugs drag pos snyims pa me tog gis bkang ste gsol ba gdab pa 'di'i rjes zlos mdzod/__e ma rdo rje slob dpon dgongs:__bdag cag snod ldan rigs kyi bur:__gsang ba mchog gi dkyil 'khor du:__sgo gsum smin par mdzad du gsol:__lan gsum/__slob dpon dang mdun bskyed dbyer ma mchis pa rgyal kun 'dus zhal gu ru mtsho skyes rdo rje la dkon mchog rtsa gsum rab 'byams rgya mtshos bskor te bzhugs pa la/__bdag gzhan sems can thams cad deng nas byang chub snying po la mchis kyi bar du sgo gsum gus pa chen pos skyabs su 'gro ba'i 'dun pas 'di'i rjes zlos/__na mo/__bdag sogs=__nas skyabs su mchi:__lan gsum/__mkha' khyab kyi pha ma sems can mtha' dag rnam grol gtan gyi bde ba rdzogs pa'i sangs rgyas gu ru rin po che'i go 'phang la 'god par bya/__de'i ched du 'chi med mtsho skyes snying thig gi smin byed zab mo'i sgor zhugs te/__lam rim pa gnyis kyi rnal 'byor la brtson par bgyi'o snyam pas 'di'i rjes zlos/__hoH__gzhan don nas=__sems bskyed do:__lan gsum/__tshogs kyi zhing khyad par can de dag gi spyan sngar bsags sbyong spel gsum gyi thabs khyad par du 'phags pa yan lag bdun pa tshul bzhin du bya ba'i 'dun pas ting nge 'dzin so sor gsal thob la rjes zlos/__hoH__'chi med rtsa gsum nas=__snying por bsngo/__lan gsum/__dbang gi srog 'dzin pa ni dam tshig dang sdom pa la rag las pa yin pas so byang sngags gsum gyis bsdus pa'i sdom pa mtha' dag ngo bo gnas 'gyur ba'i tshul gyis bzung*/__yon tan yar ldan gyi tshul gyis bsrung zhing spel/__dus skabs dgos pa gang gtso'i lag len thad kar spyad par bgyi'o snyam pas 'di'i rjes zlos/__o rgyan gdung 'dzin rgyal ba'i sras:__rdo rje slob dpon dgongs su gsol/__/bdag ni 'di bzung byang chub bar:__so so thar dang byang chub sems:__rig 'dzin nang gi sdom pa'i tshogs:__yang dag nyid du bzung byas te:__srog gi phyir yang mi btang na:__bdag la byin gyis brlab tu gsol:__lan gsum/__de rnams kyis rgyud rnam par dag par bya ba song nas/__dbang gi gzhi dgod pa ye shes pa dbab pa yin pas khyed rang rnams lus ngag yid gsum gyi gnad gcun la gzhan tu+u ma yengs par dmigs pa 'di rtse gcig tu gsal thob cig__AH__gzhi dbyings ka dag de bzhin nyid:__sogs nas/__sprul sku'i cha lugs mtshan dpes mdzes:__bar las byang ltar brjod/__de ltar gsal ba'i gnas gsum du rdo rje gsum gyi ngo bo yi ge oM AHhU~M dkar dmar mthing gsum gyis mtshan pa dang*/__slob dpon gyi thugs ka nas kyang 'od zer kha dog sna tshogs pa nam mkha'i dbyings gang ba 'phros/__sangs rgyas kyi zhing rab 'byams dang khyad par rnga yab pad+ma 'od kyi gzhal med khang chen po na bzhugs pa'i rgyal ba sras dang bcas pa rnams dang gu ru pad+ma thod phreng rtsal gyi thugs rgyud bskul/__thams cad kyang 'chi med mtsho skyes rdo rje'i sku'i rnam par bzhengs te nam mkha' nas char chen po 'bab pa bzhin byon nas khyed rang rnams la dbyer med du thim pas rgyud byin gyis brlabs pa'i mos 'dun mdzod cig__'bebs pa'i rdzas bdug__/dbyangs rol dang bcas/__hU~M:__sngon gyi bskal pa sogs las gzhung ltar brjod la byin dbab/__ye shes pa'i byin rlabs kyi rgyun sgo gsum la rab tu gnas par byas par mos shig__tiSh+Tha badz+ra/__zhes rgya gram mgor bzhag la brtan par bya/__de dag rnams kyis 'jug pa'i rim pa grub nas dngos gzhi'i dbang rnams rim par zhu ba'i yon tu maN+Dal phul/__ces 'bul gzhug__/de la dang po bum pa'i dbang gi don du/__gsol ba 'debs pa 'di'i rjes zlos/__byang chub rdo rje sangs rgyas la/__/mchod chen ji ltar stsal ba bzhin/__/bdag kyang bskyab pa'i don gyi phyir/__/nam mkha'i rdo rje deng bdag stsol/__lan gsum/__de ltar gsol ba btab pa las/__slob dpon gyi thugs ka nas 'od zer 'phros/__gdan gsum tshang ba'i dbang gi lha nam mkha' gang ba spyan drangs badz+ra sa mA dza:__oM badz+ra ar+g+haM sogs kyis mchod/__chos sku nam mkha' sogs kyis bstod/__de bzhin gshegs pa thams cad kyis slob ma la mngon par dbang bskur ba stsal du gsol/__ces gsol ba btab pas de bzhin gshegs pa rnams kyis dbang bskur ba'i dgongs pa mdzad/__sems dpa' rnams kyis shis pa brjod cing me tog 'thor/__sems ma rnams kyis rdo rje'i glu len/__khro bo khro mo rnams kyis bar gcod kyi bgegs bskrad/__yum lnga rtsa gsum lha tshogs rnams kyi ngo bo bdud rtsis bkang ba'i bum pa thogs nas dbang bskur ba'i phrin las mdzad par gyur/__bkra shis gang zhig sems can kun gyi snying la gnas/__/thams cad bdag nyid rigs kun gyi ni bdag po mchog__/ma lus sems can skyed byed bde ba chen po ste/__des ni deng khyod dbang bskur mchog la bkra shis shog__/ces shis pa brjod cing me tog 'thor/__bum pa spyi bor bzhag la/__oM:__'chi med rtsa gsum lha tshogs kyi:__gsang gsum gnas las byung ba yi:__ye shes bdud rtsis dbang bskur bas:__phung khams lha skur dag par shog:__oM AHhU~M badz+ra ka la sha kA ya a b+hi shiny+tsa oM:__zhes gsungs shing dbang bskur bas bdud rtsi'i rgyun gyis lus thams cad gang*/__dri ma dag__/chu'i lhag ma gyen du 'khyil ba las/__rigs kyi bdag po 'od dpag med kyi rgyas btab pa la nam mkha'i dbang lha rnams kyang thim par gyur/__oM su pra tiSh+Tha sogs dang me tog 'thor la brtan par bya/__de'i rjes 'brel du sku gsung thugs kyi dbang bskur ba yin pas dang po'i slad du 'dun pa 'di ltar du mdzod/__'di ltar snang ba'i snod kyi 'jig rten 'og min pad+ma 'od kyi gzhal med khang*/__bcud kyi skye 'gro thams cad 'chi med mtsho skyes rdo rje'i sku'i rnam par bkra lam gyis 'char bar mos la sems gtod cig__/des sku'i dbang bskur thob pas deng phyin chad snang stong phyag rgya'i lam khyer dang ma bral ba gyis shig__/gnyis pa gsung bzlas lung gi slad du/__slob dpon dang khyed rang rnams kyi gnas gsum 'bru gsum gsal ba las 'od zer 'phros/__rang gis bsgoms pa dang 'dra ba'i ye shes pa spyan drangs mdun gyi nam mkhar bzhugs pa'i gnas gsum nas gsang ba gsum gyi byin rlabs thams cad sku phyag rgya/__gsung sngags phreng*/__thugs phyag mtshan dang 'od zer dkar dmar mthing gsum rnam pa dpag tu med pa byon te khyed rang rnams kyi gnas gsum du thim pas sgrib bzhi dag__/dbang bzhi thob/__sku bzhi'i sa bon rgyud la bzhag__/thun mong mchog gi dngos grub bde blag tu thob par mos la bsnyen sngags 'di'i rjes zlos/__oM AHhU~M badz+ra gu ru sogs lan gsum/__nam mkhar bzhugs pa'i lha rnams rang rang la thim/__khyed rang rnams lhar gsal ba'i snying ga'i ye shes sems dpa'i thugs kar nyi zla'i gwa'u'i dbus su hrIHdmar po re gsal thob/__slob dpon yang de ltar gsal ba la mos gus byas pas thugs srog sngags phreng dang bcas pa las sngags phreng gnyis pa byung*/__zhal nas thon/__khyed rang rnams kyi zhal du zhugs pa snying ga'i hrIHyig gi mthar 'khod cing g.yas su 'khor ba'i 'od zer gyis rtsa ba gsum gyi lha tshogs mchod cing thugs dam bskul/__byin rlabs dngos grub thams cad 'od zer gyi rnam par bsdus te thim/__snod bcud kyi dngos 'dzin bag chags dang bcas pa sbyangs nas lha sngags ye shes kyi 'khor lor gyur par mos la sgrub pa'i sngags kyi rjes zlos/__oM AHhU~M badz+ra gu ru+u pad+ma d+he wa d+hA ki nI sarba sid+d+hi pha la hU~M AH__lan gsum/__slar yang sngags phreng las 'od zer sna tshogs phyogs bcur 'phros pas phrin las bzhi dang dngos grub rnam gnyis 'bad med du 'grub par mos la las sbyor sngags kyi rjes zlos/__de ltar rjes zlos byar gzhug__/des gsung gi dbang thob pas deng phyin chad grags stong sngags kyi lam khyer dang ma bral ba gyis shig__/gsum pa thugs 'od gsal gyi dgongs pa ngo sprad pa'i slad du/__bsgom pa'i dkyil 'khor brten dang brten par bcas pa thams cad nam mkha' la 'ja' tshon yal ba bzhin 'od gsal gnyug ma'i klong du thim par mos la ka dag de kho na nyid kyi ngang du mnyam par zhog cig__/ces cung zad 'jog__/des thugs kyi dbang thob pas deng phyin chad rig stong zung 'jug ye shes chen po'i lam khyer dang ma bral ba gyis shig__/de ltar na de rnams kyis rtsa gsum yongs rdzogs la brten nas mtshan ma'i dkyil 'khor du bum pa'i dbang bskur ba thob/__lus kyi sgrib pa dag__/lam bskyed rim bsnyen pa'i rnal 'byor bsgom pa la dbang*/__'bras bu sku rdo rje sprul pa'i sku 'grub pa'i skal ba can du byas pa yin no:__zhes dag pa brjod/__gnyis pa gsang ba'i dbang bskur ba la dmigs pa 'di ltar du mdzod/__slar yang slob dpon dang khyed rang rnams skad cig gis spyan ras gzigs sku mdog dmar po zhal gcig phyag bzhi pa thal sbyar phreng ba dang pad+ma bsnams shing yum dang bcas pa/__rgyan cha lugs yongs su rdzogs pa'i skur lam gyis gyur par mos shig__/bla ma yab yum mnyam par sbyor ba'i dga' ba'i sgra dang bde ba'i 'od zer gyis phyogs bcu'i rgyal ba sras dang bcas pa spyan drangs/__zhal du zhugs/__thugs kar chags pa chen po'i mes zhu/__byang chub sems kyi chu rgyun mkha' gsang nas phyungs te thod pa'i bdud rtsi dang ro gcig tu 'dres pa khyed rang rnams la byin pa mgrin pa'i lam brgyud/__rtsa khams thams cad la khyab pas las rlung gi 'ching ba dbu ma'i dbyings su grol te gsal stong rnam par mi rtog pa'i ye shes rgyud la skyes par mos shig__/thod pa'i bdud rtsi sbyin la/__AH__'jig rten dbang phyug bde ba che:__rdo rje btsun mor snyoms zhugs pa'i:__byang chub sems kyi dbang bskur bas:__rtsa rlung dbu mar thim par shog:__oM AHhU~M bo d+hi tsit+ta wA ka a b+hi Shiny+tsa AH__de ltar ye shes sems dpa' la brten nas byang chub sems kyi dkyil 'khor du gsang ba'i dbang bskur ba thob/__ngag gi sgrib pa dag__/lam rtsa rlung nye bar bsnyen pa'i rnal 'byor bsgom pa la dbang*/__'bras bu gsung rdo rje longs spyod rdzogs pa'i sku 'grub pa'i skal ba can tu byas pa yin no/__/gsum pa shes rab ye shes kyi dbang bskur ba la dmigs 'dun 'di bzhin tu mdzod/__slob dpon dang khyed rang rnams skad cig gis dpal chen rta mgrin sku mdog dmar po khro zhing 'dzum pa'i nyams can yum phag mo mthing gas 'khyud pa/__gnyis ka'ang gri gug dang thod pa 'dzin cing dur khrod kyi chas dang rta zhal phag zhal gyis mtshan pa/__bde drod kyi me phung 'bar ba'i dbus na bzhugs par gsal thob/__rta phag yab yum gyi phyag rgya snang stong sgyu ma lta bu'i brdas mtshon te chos thams cad don thabs dang shes rab zung du 'jug pa'i rtags lhan skyes su grub pa nyid zab mo'i gnad kyis lam du khyer dgos pa'i don rtogs par gyis shig__/me long ngos su rta phag sku gzugs shar ba bstan la/__hU~M:__bde chen thabs mchog gar gyi dbang :__shes rab stong nyid phag mo yum:__mnyam sbyor phyag rgya'i dbang bskur bas:__lhan skyes ye shes rtogs par shog:__A+oM AHhU~M ma hA mu dra tsit+ta a b+hi Shiny+tsa hU~M:__slob dpon dbang chen rta mgrin gyi yum las phag mo gnyis pa 'phros/__khyed rang gi yum la thim pas khyed rang rta phag yab yum dngos su gsal ba lha'i 'du shes/__mkha' gsang rdo rje dang pad+mar byin gyis brlabs pa sngags kyi 'du shes/__thabs zab mo 'di la brten nas bde chen phyag rgya chen po'i go 'phang mngon du bya'o snyam pa chos kyi 'du shes de gsum dang ldan pas snyoms par zhugs pa las yas bab dang mas brtan gyi dga' bzhi'i ye shes rim par skyes pa'i rang ngo la mnyam par bzhag pas mthar thug 'pho med lhan cig skyes pa'i bde chen kyi ye shes mngon tu gyur par mos shig__/de ltar rta mgrin yab yum la brten nas b+ha ga'i dkyil 'khor du shes rab ye shes kyi dbang bskur ba thob/__yid kyi sgrib pa dag__/lam dga' bzhi'i ye shes sgrub pa'i rnal 'byor bsgom pa la dbang*/__'bras bu thugs rdo rje chos kyi sku 'grub pa'i skal ba can du byas pa yin no/__/bzhi pa don dam rig pa rtsal gyi dbang bskur ba la dmigs pa 'di ltar mdzod cig__/gtor ma thogs la/__dbyings kyi ngo bo gtor snod gzhal med khang du rig pa'i rang bzhin bla ma'i gtor chen dang*/__slob dpon khyed rang rnams dang bcas pa skad cig gis rigs kyi bdag po 'od dpag med sprul sku'i cha lugs can/__sku mdog dmar po mnyam bzhag lhung bzed 'dzin cing rdo rje'i skyil krung gis bzhugs pa'i skur lam ste gyur pa la/__gtor ma'i lha spyi bor spyan drangs te rdo rje ye shes chen po'i byin rlabs stsol bar mos la dad gus drag po skyed cig__/AH__gtor snod ka dag chos kyi dbyings:__gtor ma lhun grub rig pa'i sku:__rigs kyi bdag pos dbang bskur bas:__gdod ma'i gnas lugs mngon gyur shog:__oM AHhU~M d+hA tu dz+nyA na kA ya a b+hi Shiny+tsa hrI:__zhes gtor ma mgor bzhag__/gtor ma'i lha 'od du zhu nas khyed rang rnams la thim pas ye shes 'pho ba'i byin rlabs thob/__bla ma chos sku'i thugs dang rang gi sems dbyer med du 'dres/__gnas lugs rdzogs pa chen po'i dgongs pa mngon tu gyur par mos la rig stong khyab brdal chen po'i dbyings su mnyam par zhog cig__/a a a:__zhes dpon slob gnyis kas dar gcig mnyam par bzhag__/slar yang lta sgom spyod 'bras bzhi'i ngo sprod mdor bsdu ba'i tshul gyis gdab pa yin pas 'di la gsan 'tshal/__de'ang lta ba lung rigs dang 'brel ba yin pas/__ji skad du/__smra bsam brjod med shes rab pha rol phyin/__/ma skyes mi 'gags nam mkha'i ngo bo nyid/__/so so rang rig ye shes spyod yul ba/__/dus gsum rgyal ba'i yum gyur rdzogs pa che/__/zhes pas chos thams cad kyi gnas lugs smra bsam brjod pa kun las 'das pa/__gdod ma nas skye 'gags sogs spros pa'i mtha' thams cad dang bral bas nam mkha' lta bu'i dbyings de nyid so so rang gi rig pa mngon sum pas nyams su myong ba'i spyod yul can/__dus gsum rgyal ba ma lus pa skyed pa'i yum shes rab kyi pha rol tu phyin ma'am rang bzhin rdzogs pa chen po zhes bya ba dbyings dang rig pa zung du 'jug pa'i ye grol la bskyar grol gyi lhan pa gdab mi dgos pa shes rig zang ka ma 'di ka yin la/__de ltar lta ba rig stong rjen pa ngo 'phrod phan chod sgom pa nyams myong dang 'brel dgos pas/__dran pas zin tsam nas gsal ba stong pa rig pa'i snying po can gyi ngang bskyangs nas nyams len chu bo rgyun gyi rnal 'byor la goms par bya dgos/__lta sgom gyi bogs 'don tu spyod pa dus tshod dang 'brel bar spyod pas 'bras bu gzhan don dang 'brel ba ring por mi thogs pa shugs las 'byung ba yin pas de ltar nyams su longs shig__/ces gdams/__de ltar ye shes sems dpa'i byin rlabs 'pho ba la brten nas snang srid rdzogs pa chen po'i dkyil 'khor du dbang bzhi pa thob/__ye shes kyi dri ma dag__/lam ka dag lhun grub rdzogs pa chen po sgrub pa chen po'i rnal 'byor bsgom pa la dbang*/__'bras bu ye shes rdo rje ngo bo nyid kyi sku 'grub pa'i skal ba can du byas pa yin no/__/zhes rtogs pa bskyed/__shis brjod las byang nas 'byung ba sogs ji ltar 'os pa brjod/__dam tshig bsgrag bzung*/__gtang rag maN+Dal dang lus 'bul/__dge bsngo byas la slob ma gyes/__slob dpon gyis tshogs la rol zhing lhag ma btang ba nas shis brjod kyi bar yang phrin las dang gsang ba spyi'i rigs 'gre sbyar bas 'grub bo/__/'dir 'bad dge bas mtsho skyes rje'i/__/gsang gsum phrin las dang bcas pa/__/bdag gzhan 'gro bas myur 'grub ste/__/'chi med rdo rje'i dpal thob shog__/ces pa'ang gter chen bla ma thams cad mkhyen pa'i rdo rje zhal lung ma nor bar chos 'di'i snod ldan 7pad+ma gar dbang blo gros mtha' yas kyis rdzong sar bkra shis lha rtse'i chos grwa chen por bgyis pa dge legs 'phel//___//