JKW-KABUM-11-DA-011-001

🚧 This website is under continued development. We appreciate your patience!

First text in section. Back to Volume PageNext Text

ཐུབ་དབང་གནས་བརྟན་བཅུ་དྲུག་འཁོར་དང་བཅས་པ་མཆོད་ཅིང་གསོལ་བ་གདབ་པའི་ཚུལ་མདོར་བསྡུས་པ་བསོད་ནམས་སྤྲིན་གྱི་རྔ་གསང་།

Wylie title	thub dbang gnas brtan bcu drug 'khor dang bcas pa mchod cing gsol ba gdab pa'i tshul mdor bsdus pa bsod nams sprin gyi rnga gsang
Location	mkhyen brtse'i bka' 'bum Volume 11, sde tshan 11, Text 1, Pages 339-350 (Folios 1a to 6b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. thub dbang gnas brtan bcu drug 'khor dang bcas pa mchod cing gsol ba gdab pa'i tshul mdor bsdus pa bsod nams sprin gyi rnga gsang. In 'jam dbyangs mkhyen brtse'i dbang po'i bka' 'bum, Vol. 11: 339-350. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Homage - phyag 'tshal  ·  Offering Rituals - mchod sbyin
Deity	shAkya thub pa, gnas brtan bcu drug
Colophon	།ཅེས་པའང་མཆིམ་ཆེན་ནམ་མཁའ་གྲགས་སོགས་དམ་པ་སྔ་མ་རྣམས་ཀྱིས་མཛད་པའི་བརྗོད་བྱའི་དོན་སྙིང་པོར་དྲིལ་ཏེ། ཕན་པ་དང་བདེ་བའི་འབྱུང་གནས་ཀུན་མཁྱེན་རྒྱལ་བའི་ལམ་སྲོལ་ཡུན་རིང་དུ་འཚོ་ཞིང་གཞེས་པའི་རྟེན་འབྲེལ་དུ་དམིགས་ནས། རིས་མེད་པའི་བསྟན་པ་ཀུན་ལ་དག་པའི་སྣང་བ་གཅིག་ཏུ་དཀར་བའི་ཤཱཀྱའི་དགེ་སློང་བྱ་བྲལ་བ་མཁྱེན་བརྩེའི་མིང་གིས་དཔལ་སྣར་ཐང་གི་ཆོས་གྲྭར་སྨིན་ཟླའི་དཀར་ཕྱོགས་ཀྱི་རྒྱལ་བ་དང་པོར་སྦྱར་བ་སརྦ་དཱ་མངྒ་ལཾ་བྷ་བ་ཏུ།།
	ces pa'ang mchim chen nam mkha' grags sogs dam pa snga ma rnams kyis mdzad pa'i brjod bya'i don snying por dril te/__phan pa dang bde ba'i 'byung gnas kun mkhyen rgyal ba'i lam srol yun ring du 'tsho zhing gzhes pa'i rten 'brel du dmigs nas/__ris med pa'i bstan pa kun la dag pa'i snang ba gcig tu dkar ba'i shAkya'i dge slong bya bral ba mkhyen brtse'i ming gis dpal snar thang gi chos grwar smin zla'i dkar phyogs kyi rgyal ba dang por sbyar ba sarba dA mang+ga laM b+ha ba tu

1 Texts in this Section (sde tshan or chos tshan)

1 339-350	ཐུབ་དབང་གནས་བརྟན་བཅུ་དྲུག་འཁོར་དང་བཅས་པ་མཆོད་ཅིང་གསོལ་བ་གདབ་པའི་ཚུལ་མདོར་བསྡུས་པ་བསོད་ནམས་སྤྲིན་གྱི་རྔ་གསང་། thub dbang gnas brtan bcu drug 'khor dang bcas pa mchod cing gsol ba gdab pa'i tshul mdor bsdus pa bsod nams sprin gyi rnga gsang Ritual and Liturgical Texts - cho ga phyag len   ·   Supplications - gsol 'debs   ·   Offering Rituals - mchod sbyin	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཐུབ་དབང་གནས་བརྟན་བཅུ་དྲུག་འཁོར་དང་བཅས་པ་མཆོད་ཅིང་གསོལ་བ་གདབ་པའི་ཚུལ་མདོར་བསྡུས་པ་བསོད་ནམས་སྤྲིན་གྱི་རྔ་གསང་ཞེས་བྱ་བ་བཞུགས་སོ། ན་མོ་མུ་ནཱེནྡྲ་སྠ་བི་རེ་བྷྱ༔ ཐུབ་དབང་གནས་བརྟན་འཁོར་བཅས་ལ། །མཆོག་ཏུ་གུས་པས་ཕྱག་བགྱིས་ནས། །གང་དེའི་མཆོད་པའི་ཐབས་ཚུལ་ནི། །བསོད་ནམས་སྤྲིན་གྱི་རྔ་གསང་འཁྲོལ། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་ཞིང་བཀོད་པ་མཛེས་པར། རྟེན་གྱི་གང་ཟག་ཁས་བླངས་པའི་ཚུལ་ཁྲིམས་དག་ཅིང་ཁྲུས་དང་གཙང་སྦྲ་ལ་གནས་པས། ཐུབ་དབང་གནས་བརྟན་འཁོར་བཅས་གྱི་སྣང་བརྙན་སོགས་དཀོན་མཆོག་གསུམ་གྱི་རྟེན་དགྲམས་པའི་འདུན་སར། སྟེགས་ཀྱི་དབུས་སུ་མཎྜལ་པདྨ་འདབ་མ་བཅུ་དྲུག་པ་གྲུ་བཞི་སྒོ་བཞི་པར། ལྷ་གྲངས་དང་མཐུན་པར་བཞུགས་གནས་མཚོན་བྱེད་དུ་ཚོམ་བུ་རེ་བཀོད། དེའི་མདུན་དུ་མཆོད་པའི་མཎྜལ་དང་མཆོད་པ་སྣ་ལྔ་ཚར་ཉེར་གཅིག་སོགས་ཇི་ལྟར་འབྱོར་བ་དང་། རྒྱལ་ཆེན་བཞི་ལ་གཏོར་མ་རེ་རེའམ་བསྡུ་ན་གཅིག་དང་། སྤྲོ་ན་ཕྱོགས་སྐྱོང་དང་གཞི་བདག་སོགས་ལའང་གཏོར་མ་རེ་རེ་བཤམས། དེ་ནས་སྟན་བདེ་བ་ལ་འཁོད་དེ། ངེས་འབྱུང་དང་བྱང་ཆུབ་སེམས་ཀྱིས་རྒྱུད་སྦྱང་བ་སྔོན་དུ་འགྲོ་བས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་སྐྱབས་སེམས་རྒྱས་བསྡུས་ཇི་ལྟར་རིག་པ་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། གནས་དང་ཡོ་བྱད་རྣམས་ལ་དམིགས་ཏེ། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངར་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་འཁོར་ཡུག་གི་ས་གཞི་འདི་དག་བདེ་བ་ཅན་གྱི་ཞིང་གི་བཀོད་པ་ལྟ་བུ་ཕུན་སུམ་ཚོགས་པའི་རྒྱན་ཐམས་ཅད་ཀྱིས་རྣམ་པར་བརྒྱན་པ་མཛེས་ཤིང་ཡིད་དུ་འོང་བའི་དབུས་སུ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་པ། སྒོ་བཞི་པ། རིན་པོ་ཆེ་སྣ་ཚོགས་ཀྱི་ཁམས་ལས་གྲུབ་ཅིང་། ཡོ་བྱད་སྣ་ཚོགས་པས་ཡོངས་སུ་གང་བ། དེའི་དབུས་སུ་རིན་པོ་ཆེའི་ཁྲི་པདྨ་དང་ཟླ་བའི་གདན། མཐའ་སྐོར་དུ་པདྨའི་གདན་བཅུ་དྲུག །ཤར་སྒོའི་ནང་དུ་ལྷག་ཅིག་དང་བཅས་པའི་སྒོ་བཞིར་རིན་པོ་ཆེའི་གདན་དང་བཅས་པ་ཕྱི་ནང་ཐམས་ཅད་དུའང་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་བསམ་གྱིས་མི་ཁྱབ་ཅིང་རྒྱུན་མི་འཆད་པར་འབྱུང་བར་གྱུར་ཅིག །ཅེས་བདེན་པའི་སྟོབས་དང་། སྤྲོ་ན་མཆོད་པའི་སྤྲིན་གྱི་གཟུངས་དང་བཅས་པས་བྱིན་གྱིས་བརླབས། དེ་ནས་སྤོས་བཏུལ་ཞིང་འདུན་པ་རྩེ་གཅིག་པས། ལག་མཐིལ་ལྟར་མཉམ་རིན་ཆེན་རྒྱན་གྱིས་སྤྲས། །ཅེས་སོགས་ནས། འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཅེས་སྤྱན་དྲངས་པས། རང་བཞིན་གྱི་གནས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་སྟོན་པ་ཤཱཀྱའི་རྒྱལ་པོ་འཁོར་གནས་བརྟན་ཆེན་པོ་བཅུ་དྲུག་དང་། ཕྱི་བཞིན་འབྲང་བ་དགེ་བསྙེན་དྷརྨ་ཏཱ་ལ། རྒྱལ་པོ་ཆེན་པོ་སྡེ་བཞི་དང་བཅས་པ་ཚད་མེད་པའི་ཐུགས་རྗེ་ཆེན་པོ་དང་། རྫུ་འཕྲུལ་གྱི་མཐུ་ཐོགས་པ་མེད་པར་བྱོན་ཏེ་བྱིན་གྱིས་བརླབས་པའི་ཕོ་བྲང་གི་ནང་དུ་དགྱེས་བཞིན་དུ་བཞུགས་པ་ནི། དབུས་སུ་སྟོན་པ་བཅོམ་ལྡན་འདས་ཤཱཀྱ་ཐུབ་པ་སྐུ་མདོག་གསེར་གྱི་ལྷུན་པོ་ལ་ཉི་མ་ཤར་བ་ལྟར་རབ་ཏུ་དྭངས་ཤིང་འོད་ཟེར་ཁ་དོག་སྣ་ཚོགས་འཕྲོ་བ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོས་བརྒྱད་ཅུས་སྤྲས་པ། གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཏིང་ངེ་འཛིན་བརྒྱ་ཕྲག་དུ་མ་ལ་སྙོམས་པར་འཇུག་པ། ཕྱག་གཡས་ས་གནོན་དང་གཡོན་མཉམ་གཞག་མཛད་པ། ན་བཟའ་ཆོས་གོས་རྣམ་གསུམ་ངུར་སྨྲིག་ཏུ་གསོལ་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཕྱི་རོལ་གྱི་པདྨ་རྣམས་ལ་ཤར་ནས་རིམ་པ་བཞིན་དུ་གཡས་བསྐོར་གྱིས། འཕགས་པའི་གནས་བརྟན་ཆེན་པོ་ཡན་ལག་འབྱུང་༨ཕྱག་གཉིས་ཐལ་མོ་སྦྱར་བའི་དབུས་ན་སྤོས་ཕོར་དང་། མཆན་ཁུང་གཡོན་ན་རྔ་ཡབ་འཛིན་པ། གནས་བརྟན་ཆེན་པོ་མ་ཕམ་པ་༩ཕྱག་གཉིས་མཉམ་པར་གཞག་པ། གནས་བརྟན་ཆེན་པོ་ནགས་༡༠ན་གནས་གཡས་ཞི་བའི་སྡིགས་མཛུབ་མཛད་ཅིང་། གཡོན་རྔ་ཡབ་འཛིན་པ། གནས་བརྟན་ཆེན་པོ་དུས་༡༡ལྡན་ཕྱག་གཉིས་ཀྱིས་གསེར་གྱི་རྣ་ཀོར་འཛིན་པ། གནས་བརྟན་ཆེན་པོ་རྡོ་རྗེ་༡༢མོའི་བུ་གཡས་སྡིག་མཛུབ་དང་། གཡོན་རྔ་ཡབ་འཛིན་པ། གནས་བརྟན་ཆེན་པོ་བཟང་པོ་གཡས་༡༣ཆོས་འཆད་དང་། གཡོན་མཉམ་གཞག་མཛད་པ། གནས་བརྟན་ཆེན་པོ་གསེར་བེའུ་༡༤ཕྱག་གཉིས་ཀྱིས་རིན་པོ་ཆེའི་ཞགས་པ་འཛིན་པ། གནས་བརྟན་ཆེན་༡༥པོ་བྷ་ར་དྷཱ་ཛ་གསེར་ཅན་ཕྱག་གཉིས་ཀྱིས་མཉམ་གཞག་མཛད་པ། གནས་བརྟན་ཆེན་པོ་བ་ཀུ་ལ་༡༦ཕྱག་ན་ནེའུ་ལེ་བསྣམས་པ། གནས་བརྟན་ཆེན་པོ་སྒྲ་༡གཅན་ཟིན་ཕྱག་གཉིས་རིན་པོ་ཆེའི་པྲོག་ཞུ་བསྣམས་པ། གནས་བརྟན་ཆེན་པོ་༢ལམ་ཕྲན་བརྟན་ཕྱག་གཉིས་མཉམ་པར་གཞག་པ། གནས་བརྟན་ཆེན་པོ་༣བྷཱ་ར་དྷཱ་ཛ་བསོད་སྙོམས་ལེན་གཡས་གླེགས་བམ་གཡོན་ལྷུང་བཟེད་འཛིན་པ། གནས་བརྟན་ཆེན་པོ་༤ལམ་བརྟན་ཕྱག་གཡས་ཆོས་འཆད་གཡོན་གླེགས་བསྣམས་པ། གནས་བརྟན་ཆེན་༥པོ་ཀླུའི་སྡེ་གཡས་བུམ་པ། གཡོན་འཁར་བསིལ་བསྣམས་པ། གནས་བརྟན་ཆེན་པོ་སྦེད་༦བྱེད་གླེགས་བམ་བསྣམས་པ། གནས་བརྟན་ཆེན་༧པོ་མི་ཕྱེད་པ་ཕྱག་གཉིས་ཐལ་མོ་སྦྱར་བའི་བར་དུ་བྱང་ཆུབ་ཆེན་པོའི་མཆོད་རྟེན་འཛིན་པ། དེ་ཐམས་ཅད་ཀྱང་ན་བཟའ་ཆོས་གོས་རྣམ་གསུམ་མཛེས་པར་གསོལ་ཞིང་། དགྲ་བཅོམ་པ་དབང་པོ་དུལ་བའི་ཀུན་སྤྱོད་ལ་གནས་པའོ། །ཤར་སྒོའི་ནང་དུ་དགེ་བསྙེན་ཆེན་པོ་དྷརྨ་ཏཱ་ལ། གཡས་རྔ་ཡབ་དང་གཡོན་བུམ་པ་བསྣམས་པ། དབུ་སྐྲ་རལ་པའི་ཐོར་ཅོག་སྤྱི་བོར་བཅིངས་ཤིང་། གླེགས་བམ་གྱི་ཁུར་པོ་བསྣམས་པ། མདུན་གྱི་ནམ་མཁར་སངས་རྒྱས་སྣང་བ་མཐའ་ཡས་ལ་གཟིགས་ཤིང་། པུས་མོ་གཡས་པ་ལས་སྟག་གི་ཚོགས་སྤྲུལ་པ་ཤར་སྒོར་ཡུལ་འཁོར་སྲུང་དཀར་པོ་པི་ཝཾ་འཛིན་པ། ལྷོ་སྒོར་འཕགས་སྐྱེས་པོ་སྔོན་པོ་རལ་གྲི་འཛིན་པ། ནུབ་སྒོར་མིག་མི་བཟང་པོ་དམར་པོ་སྦྲུལ་ཞགས་དང་མཆོད་རྟེན་འཛིན་པ། བྱང་སྒོར་རྣམ་ཐོས་སྲས་སྔོན་པོ་ཡིད་བཞིན་གྱི་རྒྱལ་མཚན་དང་ནེའུ་ལེ་འཛིན་པ་རྣམས་རང་རང་གི་འཁོར་བསམ་གྱིས་མི་ཁྱབ་པས་བསྐོར་བ་དང་། མདུན་གྱི་ནམ་མཁའི་གནས་སུ་བླ་མ་དགེ་བའི་བཤེས་གཉེན་རྣམས་དང་། སངས་རྒྱས་དང་བྱང་ཆུབ་སེམས་དཔའ་ཉན་རང་འཕགས་པའི་ཚོགས་དཔག་ཏུ་མེད་པ་དང་བཅས་ཏེ་མངོན་སུམ་ལྟ་བུར་བཞུགས་ཤིང་། དེ་རྣམས་ཀྱི་ཐུགས་དགོངས་གཅིག་པས་བདག་གཞན་གྱི་རྒྱུད་བྱིན་གྱིས་བརླབ་པར་གྱུར། ཅེས་བརྗོད་ཅིང་བསམ་ལ། ཇི་སྙེད་སུ་དག་སོགས་ནས། བདེ་བར་གཤེགས་པ་ཐམས་ཅད་བདག་གི་བསྟོད། །ཅེས་པས་སྤྱིར་ཕྱག་རྒྱ། སངས་རྒྱས་ཐམས་ཅད་འདུས་པའི་སྐུ། །ཞེས་སོགས་དང་། མགོན་པོ་ཐུགས་རྗེ་ཆེ་ལྡན་པ། །ཞེས་སོགས་ཀྱིས་བྱེ་བྲག་ཏུ་རྩ་བརྒྱུད་ཀྱིས་བླ་མས་དཀོན་མཆོག །གནས་བརྟན་ཕྱག་མཆོད་ཚིག་ལྷུག་པའམ། མཚུངས་མེད་བལྟ་བས་མི་ངོམ་ཞིང་། །སོགས་ནས། རྒྱལ་ཆེན་བཞི་ལ་ཕྱག་འཚལ་ལོ། །བསྟན་པ་རྒྱས་པར་བྱིན་གྱིས་རློབས། །ཞེས་པའི་བར་གྱིས་ཐུབ་དབང་གནས་བརྟན་འཁོར་དང་བཅས་པ་ལ་ཕྱག་བྱ། མེ་ཏོག་དམ་པ་ཕྲེང་བ་དམ་པ་དང་། ཤློ་ཀ་གསུམ་གྱི་མཐར། སྤྲོ་ན་མཆོད་པའི་སྤྲིན་གྱི་གཟུངས་དང་བཅས་པ་མཆོད། ས་གཞི་སྤོས་ཆུས་བྱུགས་ཤིང་། སོགས་མཎྜལ་རྒྱས་བསྡུས་ཇི་ལྟར་རིགས་པ་ཚར་བདུན་སོགས་ཕུལ། དེ་ནས་ཡན་ལག་ལྷག་མ་རྣམས་བཟང་སྤྱོད་ལྟར་བྱ། ལྷར་ཡང་གནས་བརྟན་ཕྱག་མཆོད་ཀྱི་ཚིགས་སུ་བཅད་པ་ལན་གྲངས་ཅི་ནུས་ཀྱིས་གསོལ་བ་གདབས། ཨོཾ་མུ་ནི་མུ་ནི་མ་ཧཱ་མུ་ན་ཡེ་སྭཱ་ཧཱ། ཞེས་མང་དུ་བཟླས་ལ་ཐུགས་རྒྱུད་བསྐུལ་ལོ། །རྗེས་ཀྱི་རིམ་པ་ནི་གཏོང་རག་གི་སླད་དུ་ཡན་ལག་བདུན་པ་སྔར་བཞིན་བྱ། གཏོར་མ། ཨ་ཀཱ་རོས་བྱིན་གྱིས་བརླབས་ལ། སཾ་བྷཱ་ར་ལན་བདུན་གྱིས་བསྔོ་ཞིང་། མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་འདི་ཉིད་རྒྱལ་པོ་ཆེན་པོ་སྡེ་བཞི་ལ་སོགས་པ་དཀར་ཕྱོགས་སྐྱོང་བའི་སྲུང་མ་དམ་ཚིག་ཅན་རྣམས་ཀྱི་ཚོགས་རྣམས་ལ་འབུལ་ལོ། །སངས་རྒྱས་ཀྱི་བསྟན་པ་དར་བ་དང་། འཇིག་རྟེན་རྣམས་བདེ་ཞིང་སྐྱིད་པ་དང་། བདག་ཅག་དཔོན་སློབ་ཡོན་མཆོད་རྒྱུ་སྦྱོར་བ་འཁོར་དང་བཅས་པའི་འགལ་རྐྱེན་བར་ཆད་ཐམས་ཅད་ཞི་བ་དང་། མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། །ཅེས་ཕྲིན་ལས་བཅོལ། སྤྲོ་ན་ཕྱོགས་སྐྱོང་དང་འབྱུང་པོ་ལ་ཆ་གསུམ་གྱི་ཆོ་ག་དང་། བཞི་བདག་ལ་ཨ་ཀཱ་རོས་བསྔོ་ཞིང་། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་བཅོལ། ཐལ་མོ་སྦྱར་ནས་འདུན་པ་རྩེ་གཅིག་པས། སྟོན་པ་ཐུབ་པའི་དབང་པོ་འཕགས་པའི་གནས་བརྟན་བཅུ་དྲུག་འཁོར་དང་བཅས་པ་ཁྱེད་རྣམས་ལ། མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། དཔལ་ལྡན་བླ་མ་དམ་པ་གོང་མ་ཞི་བར་གཤེགས་པ་རྣམས་ཀྱི་ཐུགས་ཀྱི་དགོངས་པ་རྫོགས་ཤིང་། ད་ལྟར་ཞལ་བཞུགས་པའི་བསྟན་འཛིན་གྱི་སྐྱེས་བུ་དམ་པ་རྣམས་ཀྱང་སྐུ་ཁམས་བཟང་ཞིང་རྣམ་པར་དཀར་བའི་ཕྲིན་ལས་རྒྱས་པ་དང་། ཆོས་གྲྭ་ཆེན་པོ་འདི་ཉིད་ཀྱིས་མཚོན་ཕྱོགས་བཅུའི་དགེ་འདུན་གྱི་སྡེ་འཕེལ་ཞིང་ཆོས་སྤྱོད་བཅུ་ཡི་སྒྲུབ་པ་ཉམས་ལེན་ཐམས་ཅད་གོང་ནས་གོང་དུ་འཕེལ་ཞིང་རྒྱས་པ་དང་། དེ་དག་གི་ཐུགས་རྗེ་དང་བྱིན་རླབས་ལ་བརྟེན་ནས་ས་ཕྱོགས་འདི་ཉིད་ཀྱི་ཐོག་དྲངས་ཡངས་པའི་རྒྱལ་ཁམས་ཐམས་ཅད་དུ་རྫོགས་ལྡན་དུས་ཀྱི་འབྱོར་པས་འཚོ་བ་དང་། ཁྱད་པར་སྦྱིན་པའི་བདག་པོ་འཁོར་དང་བཅས་པ་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་ནས་གནས་སྐབས་དང་མཐར་ཐུག་གི་བསམ་པའི་དོན་ཐམས་ཅད་ཆོས་དང་མཐུན་པར་ཡིད་བཞིན་དུ་འགྲུབ་པར་མཛད་དུ་གསོལ། ཅེས་ལན་གསུམ་དང་། སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། ཞེས་སོགས་ཀྱིས་གསོལ་བ་གདབ། སྟོན་པ་ཐུབ་པའི་དབང་པོ་དང་འཕག་པའི་གནས་བརྟན་འཁོར་དང་བཅས་པ་བདག་ལ་དགོངས་སུ་གསོལ་བདག་ཅག་དུས་ངན་པའི་སེམས་ཅན་སྤྱོད་པ་དམན་ཞིང་མ་དག་པ་དང་ཉོན་མོངས་པའི་གཞན་དབང་དུ་གྱུར་པས། མཆོད་པའི་དངོས་པོ་དམན་ཞིང་གཙང་སྦྲ་ཆུང་བ་དང་། མདོ་སྡེ་ལས་བྱུང་བའི་ཆོ་ག་ཚུལ་བཞིན་དུ་མ་ལྕོགས་པ་སོགས་འཁྲུལ་ཞིང་ནོངས་པའི་ཚོགས་ཅི་མཆིས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་རྣམས་ལ་བཟོད་པར་གསོལ་ཞིང་མཆིས་ན་ཐུགས་བརྩེ་བར་དགོངས་ཏེ་བཟོད་པར་བཞེས་ཤིང་འཕྲལ་དང་ཡུན་དུ་སྒྲིབ་པར་མི་འགྱུར་བར་མཛད་དུ་གསོལ། ཞེས་དང་། མ་འབྱོར་པ་དང་། སོགས་ཀྱི་ནོངས་པ་བཟོད་པར་གསོལ། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་བྱ། བདག་གཞན་དགེ་བའི་རྩ་བ་འདི་ཡི་མཐུས། །ཞེས་སོགས་ཀྱིས་དགེ་བ་བསྔོ་ཞིང་སྨོན་ལམ་གདབ། ཚོགས་གཉིས་མཐར་ཕྱིན། སོགས་དང་། ཐབས་མཁས་ཐུགས་རྗེ། སོགས་དང་། དུས་གསུམ་རྒྱལ་བ་སྲས་བཅས་ཐུགས་རྗེ་ཡིས། །ཉན་ཐོས་ཚུལ་བཟུང་སྲིད་པ་ཇི་སྲིད་པར། །བསྟན་པ་སྐྱོང་ཞིང་འགྲོ་བའི་དོན་མཛད་པ། །གནས་བརྟན་ཆེན་པོ་རྣམས་ཀྱི་བཀྲ་ཤིས་ཤོག །ཅེས་སོགས་ཤིས་པ་བརྗོད་པ་ཇི་ལྟར་རིག་པས་མཐའ་བརྒྱན་པར་བྱའོ། །དེ་ལྟར་ལྷ་དང་བཅས་པའི་སྟོན་པ་མཉམ་མེད་ཤཱཀྱའི་རྒྱལ་པོ་དང་། དེའི་ཉན་ཐོས་ཀྱི་ཚུལ་བཟུང་ནས་བྱང་ཆུབ་སེམས་དཔའི་ཕྲིན་ལས་མཛད་པ་འཕགས་པའི་གནས་བརྟན་ཆེན་པོ་འཁོར་དང་བཅས་པ་ལ་གསོལ་བ་གདབས་པས། སྤྱིར་ཇི་ལྟར་བསམ་པའི་དོན་ཐམས་ཅད་ཡིད་བཞིན་དུ་འགྲུབ་ཅིང་། དཀར་ཕྱོགས་ཀྱི་ལྷས་སྲུང་བ་སོགས་ཕན་ཡོན་བསམ་གྱིས་མི་ཁྱབ་ལ། ཁྱད་པར་བཤད་སྒྲུབ་ཀྱི་བསྟན་པ་དགེ་འདུན་སྡེ་དང་བཅས་འཕེལ་བའི་ཐབས་དང་རྟེན་འབྲེལ་རྨད་དུ་བྱུང་བ་ཉིད་ཀྱི་ཕྱིར། བློ་གྲོས་དང་ལྡན་པ་རྣམས་ཀྱིས་མདོ་ཆོག་རྒྱས་པར་ཕྱག་ལེན་དུ་བསྟར་བ་དང་། དེ་ལྟར་མི་ནུས་པ་དག་གིས་ཀྱང་འདི་ཙམ་ཉམས་སུ་ལེན་པས་མཚོན་སྒོ་དུ་མ་ནས་འབད་པར་བྱའོ། །ཐུབ་དབང་གནས་བརྟན་འཁོར་བཅས་ཀྱི། །མཆོད་པའི་ཆོ་ག་འདི་བགྱིས་པས། །བཤད་སྒྲུབ་བསྟན་པ་རྒྱས་པ་དང་། །འགྲོ་ཀུན་བདེ་སྐྱིད་འཕེལ་གྱུར་ཅིག །ཅེས་པའང་མཆིམ་ཆེན་ནམ་མཁའ་གྲགས་སོགས་དམ་པ་སྔ་མ་རྣམས་ཀྱིས་མཛད་པའི་བརྗོད་བྱའི་དོན་སྙིང་པོར་དྲིལ་ཏེ། ཕན་པ་དང་བདེ་བའི་འབྱུང་གནས་ཀུན་མཁྱེན་རྒྱལ་བའི་ལམ་སྲོལ་ཡུན་རིང་དུ་འཚོ་ཞིང་གཞེས་པའི་རྟེན་འབྲེལ་དུ་དམིགས་ནས། རིས་མེད་པའི་བསྟན་པ་ཀུན་ལ་དག་པའི་སྣང་བ་གཅིག་ཏུ་དཀར་བའི་ཤཱཀྱའི་དགེ་སློང་བྱ་བྲལ་བ་མཁྱེན་བརྩེའི་མིང་གིས་དཔལ་སྣར་ཐང་གི་ཆོས་གྲྭར་སྨིན་ཟླའི་དཀར་ཕྱོགས་ཀྱི་རྒྱལ་བ་དང་པོར་སྦྱར་བ་སརྦ་དཱ་མངྒ་ལཾ་བྷ་བ་ཏུ།། །། ༈

[edit]

thub dbang gnas brtan bcu drug 'khor dang bcas pa mchod cing gsol ba gdab pa'i tshul mdor bsdus pa bsod nams sprin gyi rnga gsang / @#/__/thub dbang gnas brtan bcu drug 'khor dang bcas pa mchod cing gsol ba gdab pa'i tshul mdor bsdus pa bsod nams sprin gyi rnga gsang zhes bya ba bzhugs so/ na mo mu nA+en+d+ra s+tha bi re b+h+ya:__thub dbang gnas brtan 'khor bcas la/__/mchog tu gus pas phyag bgyis nas/__/gang de'i mchod pa'i thabs tshul ni/__/bsod nams sprin gyi rnga gsang 'khrol/__/'di la gsum/__sbyor ba/__dngos gzhi/__rjes so/__/dang po ni/__gnas dben zhing bkod pa mdzes par/__rten gyi gang zag khas blangs pa'i tshul khrims dag cing khrus dang gtsang sbra la gnas pas/__thub dbang gnas brtan 'khor bcas gyi snang brnyan sogs dkon mchog gsum gyi rten dgrams pa'i 'dun sar/__stegs kyi dbus su maN+Dal pad+ma 'dab ma bcu drug pa gru bzhi sgo bzhi par/__lha grangs dang mthun par bzhugs gnas mtshon byed du tshom bu re bkod/__de'i mdun du mchod pa'i maN+Dal dang mchod pa sna lnga tshar nyer gcig sogs ji ltar 'byor ba dang /__rgyal chen bzhi la gtor ma re re'am bsdu na gcig dang /__spro na phyogs skyong dang gzhi bdag sogs la'ang gtor ma re re bshams/__de nas stan bde ba la 'khod de/__nges 'byung dang byang chub sems kyis rgyud sbyang ba sngon du 'gro bas/__sangs rgyas chos dang tshogs kyi mchog rnams la/__/zhes sogs skyabs sems rgyas bsdus ji ltar rig pa dang /_sems can thams cad bde ba dang sogs tshad med bzhi bsgom/__gnas dang yo byad rnams la dmigs te/__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyi rlabs dang /__tshogs gnyis yongs su rdzogs pa'i mngar thang chen po dang /__chos kyi dbyings rnam par dag cing bsam gyis mi khyab pa'i stobs kyis/__deng 'dir 'khor yug gi sa gzhi 'di dag bde ba can gyi zhing gi bkod pa lta bu phun sum tshogs pa'i rgyan thams cad kyis rnam par brgyan pa mdzes shing yid du 'ong ba'i dbus su/__rin po che sna tshogs las grub pa'i gzhal yas khang pa gru bzhi pa/__sgo bzhi pa/__rin po che sna tshogs kyi khams las grub cing /__yo byad sna tshogs pas yongs su gang ba/__de'i dbus su rin po che'i khri pad+ma dang zla ba'i gdan/__mtha' skor du pad+ma'i gdan bcu drug__/shar sgo'i nang du lhag cig dang bcas pa'i sgo bzhir rin po che'i gdan dang bcas pa phyi nang thams cad du'ang 'phags pa kun tu bzang po'i rnam par thar pa las byung ba'i mchod pa'i sprin bsam gyis mi khyab cing rgyun mi 'chad par 'byung bar gyur cig__/ces bden pa'i stobs dang /__spro na mchod pa'i sprin gyi gzungs dang bcas pas byin gyis brlabs/__de nas spos btul zhing 'dun pa rtse gcig pas/__lag mthil ltar mnyam rin chen rgyan gyis spras/__/ces sogs nas/__'gro ba'i don phyir mchod kyis gshegs su gsol/__/ces spyan drangs pas/__rang bzhin gyi gnas nas bcom ldan 'das de bzhin gshegs pa dgra bcom pa yang dag pa rdzogs pa'i sangs rgyas ston pa shAkya'i rgyal po 'khor gnas brtan chen po bcu drug dang /__phyi bzhin 'brang ba dge bsnyen d+harma tA la/__rgyal po chen po sde bzhi dang bcas pa tshad med pa'i thugs rje chen po dang /__rdzu 'phrul gyi mthu thogs pa med par byon te byin gyis brlabs pa'i pho brang gi nang du dgyes bzhin du bzhugs pa ni/__dbus su ston pa bcom ldan 'das shAkya thub pa sku mdog gser gyi lhun po la nyi ma shar ba ltar rab tu dwangs shing 'od zer kha dog sna tshogs 'phro ba/__mtshan bzang po sum cu rtsa gnyis dang /__dpe byad bzang pos brgyad cus spras pa/__gsung dbyangs yan lag drug cu dang ldan pa/__thugs ting nge 'dzin brgya phrag du ma la snyoms par 'jug pa/__phyag g.yas sa gnon dang g.yon mnyam gzhag mdzad pa/__na bza' chos gos rnam gsum ngur smrig tu gsol ba/__zhabs rdo rje'i skyil mo krung gis bzhugs pa/__phyi rol gyi pad+ma rnams la shar nas rim pa bzhin du g.yas bskor gyis/__'phags pa'i gnas brtan chen po yan lag 'byung 8phyag gnyis thal mo sbyar ba'i dbus na spos phor dang /__mchan khung g.yon na rnga yab 'dzin pa/__gnas brtan chen po ma pham pa 9phyag gnyis mnyam par gzhag pa/__gnas brtan chen po nags 10na gnas g.yas zhi ba'i sdigs mdzub mdzad cing /__g.yon rnga yab 'dzin pa/__gnas brtan chen po dus 11ldan phyag gnyis kyis gser gyi rna kor 'dzin pa/__gnas brtan chen po rdo rje 12mo'i bu g.yas sdig mdzub dang /__g.yon rnga yab 'dzin pa/__gnas brtan chen po bzang po g.yas 13chos 'chad dang /__g.yon mnyam gzhag mdzad pa/__gnas brtan chen po gser be'u 14phyag gnyis kyis rin po che'i zhags pa 'dzin pa/__gnas brtan chen 15po b+ha ra d+hA dza gser can phyag gnyis kyis mnyam gzhag mdzad pa/__gnas brtan chen po ba ku la 16phyag na ne'u le bsnams pa/__gnas brtan chen po sgra 1gcan zin phyag gnyis rin po che'i prog zhu bsnams pa/__gnas brtan chen po 2lam phran brtan phyag gnyis mnyam par gzhag pa/__gnas brtan chen po 3b+hA ra d+hA dza bsod snyoms len g.yas glegs bam g.yon lhung bzed 'dzin pa/__gnas brtan chen po 4lam brtan phyag g.yas chos 'chad g.yon glegs bsnams pa/__gnas brtan chen 5po klu'i sde g.yas bum pa/__g.yon 'khar bsil bsnams pa/__gnas brtan chen po sbed 6byed glegs bam bsnams pa/__gnas brtan chen 7po mi phyed pa phyag gnyis thal mo sbyar ba'i bar du byang chub chen po'i mchod rten 'dzin pa/__de thams cad kyang na bza' chos gos rnam gsum mdzes par gsol zhing /__dgra bcom pa dbang po dul ba'i kun spyod la gnas pa'o/__/shar sgo'i nang du dge bsnyen chen po d+harma tA la/__g.yas rnga yab dang g.yon bum pa bsnams pa/__dbu skra ral pa'i thor cog spyi bor bcings shing /__glegs bam gyi khur po bsnams pa/__mdun gyi nam mkhar sangs rgyas snang ba mtha' yas la gzigs shing /__pus mo g.yas pa las stag gi tshogs sprul pa shar sgor yul 'khor srung dkar po pi waM 'dzin pa/__lho sgor 'phags skyes po sngon po ral gri 'dzin pa/__nub sgor mig mi bzang po dmar po sbrul zhags dang mchod rten 'dzin pa/__byang sgor rnam thos sras sngon po yid bzhin gyi rgyal mtshan dang ne'u le 'dzin pa rnams rang rang gi 'khor bsam gyis mi khyab pas bskor ba dang /__mdun gyi nam mkha'i gnas su bla ma dge ba'i bshes gnyen rnams dang /__sangs rgyas dang byang chub sems dpa' nyan rang 'phags pa'i tshogs dpag tu med pa dang bcas te mngon sum lta bur bzhugs shing /__de rnams kyi thugs dgongs gcig pas bdag gzhan gyi rgyud byin gyis brlab par gyur/__ces brjod cing bsam la/__ji snyed su dag sogs nas/__bde bar gshegs pa thams cad bdag gi bstod/__/ces pas spyir phyag rgya/__sangs rgyas thams cad 'dus pa'i sku/__/zhes sogs dang /__mgon po thugs rje che ldan pa/__/zhes sogs kyis bye brag tu rtsa brgyud kyis bla mas dkon mchog__/gnas brtan phyag mchod tshig lhug pa'am/__mtshungs med blta bas mi ngom zhing /__/sogs nas/__rgyal chen bzhi la phyag 'tshal lo/__/bstan pa rgyas par byin gyis rlobs/__/zhes pa'i bar gyis thub dbang gnas brtan 'khor dang bcas pa la phyag bya/__me tog dam pa phreng ba dam pa dang /__sh+lo ka gsum gyi mthar/__spro na mchod pa'i sprin gyi gzungs dang bcas pa mchod/__sa gzhi spos chus byugs shing /__sogs maN+Dal rgyas bsdus ji ltar rigs pa tshar bdun sogs phul/__de nas yan lag lhag ma rnams bzang spyod ltar bya/__lhar yang gnas brtan phyag mchod kyi tshigs su bcad pa lan grangs ci nus kyis gsol ba gdabs/__oM mu ni mu ni ma hA mu na ye swA hA/__zhes mang du bzlas la thugs rgyud bskul lo/__/rjes kyi rim pa ni gtong rag gi slad du yan lag bdun pa sngar bzhin bya/__gtor ma/__a kA ros byin gyis brlabs la/__saM b+hA ra lan bdun gyis bsngo zhing /__mchod sbyin gyi gtor ma 'dod pa'i yon tan lnga dang ldan pa 'di nyid rgyal po chen po sde bzhi la sogs pa dkar phyogs skyong ba'i srung ma dam tshig can rnams kyi tshogs rnams la 'bul lo/__/sangs rgyas kyi bstan pa dar ba dang /__'jig rten rnams bde zhing skyid pa dang /__bdag cag dpon slob yon mchod rgyu sbyor ba 'khor dang bcas pa'i 'gal rkyen bar chad thams cad zhi ba dang /__mthun rkyen thams cad yid bzhin du 'grub par mdzad du gsol/__/ces phrin las bcol/__spro na phyogs skyong dang 'byung po la cha gsum gyi cho ga dang /__bzhi bdag la a kA ros bsngo zhing /__mchod sbyin gtor ma 'di bzhes la sogs kyis phrin las bcol/__thal mo sbyar nas 'dun pa rtse gcig pas/__ston pa thub pa'i dbang po 'phags pa'i gnas brtan bcu drug 'khor dang bcas pa khyed rnams la/__mkhyen pa'i ye shes/__brtse ba'i thugs rje/__mdzad pa'i phrin las/__skyob pa'i nus mthu bsam gyis mi khyab pa mnga' ba lags pas/__phan bde'i 'byung gnas sangs rgyas kyi bstan pa rin po che dar zhing rgyas la yun ring du gnas pa dang /__dpal ldan bla ma dam pa gong ma zhi bar gshegs pa rnams kyi thugs kyi dgongs pa rdzogs shing /__da ltar zhal bzhugs pa'i bstan 'dzin gyi skyes bu dam pa rnams kyang sku khams bzang zhing rnam par dkar ba'i phrin las rgyas pa dang /__chos grwa chen po 'di nyid kyis mtshon phyogs bcu'i dge 'dun gyi sde 'phel zhing chos spyod bcu yi sgrub pa nyams len thams cad gong nas gong du 'phel zhing rgyas pa dang /__de dag gi thugs rje dang byin rlabs la brten nas sa phyogs 'di nyid kyi thog drangs yangs pa'i rgyal khams thams cad du rdzogs ldan dus kyi 'byor pas 'tsho ba dang /__khyad par sbyin pa'i bdag po 'khor dang bcas pa rnams kyi bsod nams dang ye shes kyi tshogs gnyis yongs su rdzogs nas gnas skabs dang mthar thug gi bsam pa'i don thams cad chos dang mthun par yid bzhin du 'grub par mdzad du gsol/__ces lan gsum dang /__sangs rgyas sprul pa dgra bcom 'phags pa'i tshogs/__zhes sogs kyis gsol ba gdab/__ston pa thub pa'i dbang po dang 'phag pa'i gnas brtan 'khor dang bcas pa bdag la dgongs su gsol bdag cag dus ngan pa'i sems can spyod pa dman zhing ma dag pa dang nyon mongs pa'i gzhan dbang du gyur pas/__mchod pa'i dngos po dman zhing gtsang sbra chung ba dang /__mdo sde las byung ba'i cho ga tshul bzhin du ma lcogs pa sogs 'khrul zhing nongs pa'i tshogs ci mchis pa thams cad 'phags pa thugs rje chen po dang ldan pa rnams la bzod par gsol zhing mchis na thugs brtse bar dgongs te bzod par bzhes shing 'phral dang yun du sgrib par mi 'gyur bar mdzad du gsol/__zhes dang /__ma 'byor pa dang /__sogs kyi nongs pa bzod par gsol/__rten yod na brtan bzhugs dang /__med na gshegs gsol bya/__bdag gzhan dge ba'i rtsa ba 'di yi mthus/__/zhes sogs kyis dge ba bsngo zhing smon lam gdab/__tshogs gnyis mthar phyin/__sogs dang /__thabs mkhas thugs rje/__sogs dang /__dus gsum rgyal ba sras bcas thugs rje yis/__/nyan thos tshul bzung srid pa ji srid par/__/bstan pa skyong zhing 'gro ba'i don mdzad pa/__/gnas brtan chen po rnams kyi bkra shis shog__/ces sogs shis pa brjod pa ji ltar rig pas mtha' brgyan par bya'o/__/de ltar lha dang bcas pa'i ston pa mnyam med shAkya'i rgyal po dang /__de'i nyan thos kyi tshul bzung nas byang chub sems dpa'i phrin las mdzad pa 'phags pa'i gnas brtan chen po 'khor dang bcas pa la gsol ba gdabs pas/__spyir ji ltar bsam pa'i don thams cad yid bzhin du 'grub cing /__dkar phyogs kyi lhas srung ba sogs phan yon bsam gyis mi khyab la/__khyad par bshad sgrub kyi bstan pa dge 'dun sde dang bcas 'phel ba'i thabs dang rten 'brel rmad du byung ba nyid kyi phyir/__blo gros dang ldan pa rnams kyis mdo chog rgyas par phyag len du bstar ba dang /__de ltar mi nus pa dag gis kyang 'di tsam nyams su len pas mtshon sgo du ma nas 'bad par bya'o/__/thub dbang gnas brtan 'khor bcas kyi/__/mchod pa'i cho ga 'di bgyis pas/__/bshad sgrub bstan pa rgyas pa dang /__/'gro kun bde skyid 'phel gyur cig__/ces pa'ang mchim chen nam mkha' grags sogs dam pa snga ma rnams kyis mdzad pa'i brjod bya'i don snying por dril te/__phan pa dang bde ba'i 'byung gnas kun mkhyen rgyal ba'i lam srol yun ring du 'tsho zhing gzhes pa'i rten 'brel du dmigs nas/__ris med pa'i bstan pa kun la dag pa'i snang ba gcig tu dkar ba'i shAkya'i dge slong bya bral ba mkhyen brtse'i ming gis dpal snar thang gi chos grwar smin zla'i dkar phyogs kyi rgyal ba dang por sbyar ba sarba dA mang+ga laM b+ha ba tu//____//__!_