JKW-KABUM-01-KA-002-038

🚧 This website is under continued development. We appreciate your patience!

Previous Text Back to Volume PageNext Text

Wylie title	jo bo rje dpal ldan a ti sha la cung zad bsngags pa'i tshig gi rgyud mangs dad brgya'i me tog
Location	mkhyen brtse'i bka' 'bum Volume 1, sde tshan 2, Text 38, Pages 164-168 (Folios 53b1 to 55b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ཇོ་བོ་རྗེ་ཨ་ཏི་ཤ་ (Atiśa)
Citation	'jam dbyangs mkhyen brtse'i dbang po. jo bo rje dpal ldan a ti sha la cung zad bsngags pa'i tshig gi rgyud mangs dad brgya'i me tog. In 'jam dbyangs mkhyen brtse'i dbang po'i bka' 'bum, Vol. 1: 164-168. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Colophon	།དེ་ལྟར་ལྔ་བརྒྱ་པ་རྣམས་ཀྱི་གཙུག་གི་ནོར་བུ་དཔལ་ལྡན་ཨ་ཏི་ཤའི་རྣམ་ཐར་ལ་ཅུང་ཟད་བསྔགས་པའི་ཚིགས་སུ་བཅད་པ་འདིའང་། རྗེ་དེ་ཉིད་ཀྱིས་བྱིན་གྱིས་བརླབས་པའི་གནས་དཔལ་གྱི་སྙེ་ཐང་དུ་སྐུ་འདྲ་རིན་པོ་ཆེ་ཡིད་བཞིན་ནོར་བུའི་སྤྱན་སྔར་ས་ཟླའི་དམར་ཕྱོགས་ཀྱི་རྒྱལ་བ་གཉིས་པར་རྒྱལ་ཁམས་ཉུལ་བའི་ད་རི་དྲཱ་གཙུག་ལག་སྨྲ་བའི་ཉི་མས་སྣང་གསལ་ཞིག་གི་ངོགས་སུ་འབད་པས་བྲིས་ཏེ་གསོལ་བ་བཏབ་པ་སིདྡྷི་ར སྟུ།།
	de ltar lnga brgya pa rnams kyi gtsug gi nor bu dpal ldan a ti sha'i rnam thar la cung zad bsngags pa'i tshigs su bcad pa 'di'ang /__rje de nyid kyis byin gyis brlabs pa'i gnas dpal gyi snye thang du sku 'dra rin po che yid bzhin nor bu'i spyan sngar sa zla'i dmar phyogs kyi rgyal ba gnyis par rgyal khams nyul ba'i da ri drA gtsug lag smra ba'i nyi mas snang gsal zhig gi ngogs su 'bad pas bris te gsol ba btab pa sid+d+hi ra_stu

1 Texts in this Section (sde tshan or chos tshan)

38 164-168	ཇོ་བོ་རྗེ་དཔལ་ལྡན་ཨ་ཏི་ཤ་ལ་ཅུང་ཟད་བསྔགས་པའི་ཚིག་གི་རྒྱུད་མངས་དད་བརྒྱའི་མེ་ཏོག། jo bo rje dpal ldan a ti sha la cung zad bsngags pa'i tshig gi rgyud mangs dad brgya'i me tog Verses of Praise - bstod pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཇོ་བོ་རྗེ་དཔལ་ལྡན་ཨ་ཏི་ཤ་ལ་ཅུང་ཟད་བསྔགས་པའི་ཚིག་གི་རྒྱུད་མང་དད་བརྒྱའི་མེ་ཏོག་ཅེས་བྱ་བ་བཞུགས་སོ། །ན་མཿཤྲཱི་མཱཾ་དཱི་པཾ་ཀ་རཱ་ཡ། དགེ་ལེགས་ཐུགས་རྗེའི་བདུད་རྩིའི་སྤྲིན་གྱིས་སྲིད་པའི་གདུང་བ་མཐའ་དག་འཕྲོག །དཔལ༷་ལྡན༷་ཡོན་ཏན་དམ་པའི་ལྗོན་ཤིང་ཞི་བསིལ་འདོད་པ་འཇོ་བའི་གཏེར། །རིག་དང་བརྩེ་བའི་མར༷་མེ༷འི་སྣང་བས་མཐའ་གཉིས་མུན་པ་བསྙིལ་མཛ༷ད་པའི། །མཁས་གྲུབ་རྒྱ་མཚོའི་གཙུག་གི་ནོར་བུས་ཤིས་པའི་མེ་ཏོག་ཆར་དུ་བསྙིལ། ༡ །ཕུ༷ལ་བྱུང༷་སྲིད་ན་མངོན་མཐོའི་ཟུར་ཕུད་ཀྱིས། །ཡང་ཡང་བསྙེན་པའི་ཞབས༷་སྐྱེས་བཀྲ་ཤིས་རྡུལ། །གང་དུ་བཀོད་པ་ཙམ་གྱིས་རྒྱལ་བའི་བསྟན། །སླར་ཡང་དར་ལ་བབས་པའི་ངང་ཚུལ་བཟུང་། ༢ །ཨེ་མ་དེ་ཡི་རྟོགས་པ་བརྗོད་པའི་གཏམ། །རིན་ཆེན་རིན་ཐང་བྲལ་བའི་ལེགས་བཤད་དབྱངས། །དཔྱོད་ལྡན་འཕགས་དང་མཁས་པའི་མགྲིན་པ་ནས། །ཁོར་ཡུག་རི་བོའི་ཁོངས་སུ་རླུང་ལྟར་སྒྲོགས། ༣ །ཐོག་མར་ཆེན་པོའི་རིགས་ཀྱི་སཱ་ལའི་ཚལ། །མཛེས་སྟེར་པདྨོ་གཞོན་ནུའི་སྙེམས་འཆང་བ། །ཤར་བའི་མོད་ནས་མཁྱེན་དང་བརྩེ་བ་ཡིས། །བདུད་རྩིའི་དོ་ཤལ་མི་ཐུང་ཅི་ཡང་རིང་། ༤ །རྒྱུའོ་དྲི་བཟང་རྒྱས་པའི་ཀུ་མུ་དཱའི། །རྫིང་བུར་བུང་བ་མྱོས་པའི་ཚོགས་རྣམས་ཏེ། །ཞི་བསིལ་ཉམས་བརྒྱས་རབ་སྒེག་ཐར་པའི་གྲོང་། །འཇུག་ལ་ཁྱོད་ཐུགས་རྟག་ཏུ་ཉམས་པ་མེད། ༥ །དེ་སླད་ཟླ་ཤེལ་གསར་པའི་འཛུམ་རླབས་དང་། །འཁྲུལ་པའི་རྣམ་ཐར་དཀར་པོས་མཛེས་པ་ཡང་། །ཕྱི་ནས་གྲུབ་པའི་དཔལ་གྱིས་མངོན་མཐོ་བའི། །ཚུལ་འདིས་སོམ་ཉིའི་དྲྭ་བ་འཇིལ་ལ་དབང་། ༦ །སླར་ཡང་ཐམས་ཅད་གཟིགས་པས་རང་ཉིད་ཀྱི། །ཡོངས་རྫོགས་བསྟན་ལ་བྱ་བ་མཛད་པའི་སླད། །བག་མེད་འགོག་པའི་བདུད་རྩི་ཟུངས་ཤིག་ཅེས། །བསྐུལ་བའི་ངོ་མཚར་སྲིད་ན་ཉིན་བཞིན་གསལ། ༧ །དེ་ཚེ་རྣམ་པར་གྲོལ་བའི་ཚུལ་ཁྲིམས་ནི། །བརྟན་མཁས་ཡོན་ཏན་བྱེ་བའི་ཕུང་པོ་ཅན། །འཆད་དང་སྤྱོད་ལ་འཕགས་མཆོག་ཨུ་པ་ལཱི། །ཁོ་ན་ཉིད་ཅེས་འཇིག་རྟེན་གསུམ་ན་སྙན། ༨ །ཡུན་རིང་དུས་ནས་གོམས་པའི་ཁྱད་པར་དང་། །བརྩོན་པས་ཟབ་མོའི་དོན་ལ་མཉམ་བཞག་པས། །གཟུངས་དང་མངོན་པར་ཤེས་དང་ཏིང་འཛིན་སྒོ། །ཕ་མཐའ་ཡས་པར་འཇུག་ཅིང་ལྡང་བར་མཛད། ༩ །མ་ཕྱིས་དྲི་མེད་མཁྱེན་པའི་མེ་ལོང་དུ། །བྲིས་མིན་ཤེས་བྱའི་རི་མོ་འབུམ་འཆར་བས། །བསྐུལ་བ་མེད་པར་དཔྱོད་ལྡན་རྒྱ་མཚོ་ཡིས། །ཐོར་ཚུགས་ས་ལ་དུད་པའི་བསྟི་སྟང་སྟོབ། ༡༠ །ཕྱི་ནང་རིག་གཞུང་ཀུན་གྱི་ཚིག་དང་དོན། །གང་བློའི་གྲ་ཟུར་གཅིག་ན་བདེར་བཟུང་བས། །ཚུལ་བཞིན་འཆད་རྩོད་རྩོམ་ལ་མཚུངས་མེད་པའི། །གྲགས་དཀར་ཡི་གེ་ཕྱོགས་ཀྱི་འགྲམ་པར་བྱིན། ༡༡ །ཀུན་མཁྱེན་ཉིད་ཀྱང་འདོད་པའི་ཆགས་བྲལ་ཞིང་། །འགྲོ་བའི་མིག་སྟེ་འཆར་ནུབ་གཞན་དབང་མིན། །སྣ་ཚོགས་གཟུགས་ཀྱིས་འཇིག་རྟེན་ཁྱབ་འཇུག་ཀྱང་། །གཞན་དག་བསླུ་བའི་བསམ་སྦྱོར་གཞར་ཡང་དབེན། ༡༢ །ཁྱད་པར་བསིལ་ལྡན་ལྗོངས་སུ་ཐུབ་པའི་བསྟན། །སྙིགས་སྤྱོད་གདུང་བའི་མལ་དུ་ཉམ་ཐག་ཚེ། །རྗེ་བཙུན་འཕགས་མས་བསྐུལ་བའི་དེ་མ་ཐག ། གང་ཁྱོད་ཁ་བའི་ཁྲོད་འདིར་དལ་གྱིས་གཤེགས། ༡༣ །དེ་ཚེ་སྙིང་རྗེས་རབ་བརླན་བྱང་ཆུབ་སེམས། །སྲ་ཞིང་ལྕི་དང་གཡོ་བའི་མཆིལ་པ་རུ། །གྲུབ་པ་མིན་ཡང་ཚུར་མཐོང་རྣམས་ཀྱི་ཡིད། །མཐའ་དག་གཞུ་བཞིན་བཀུག་པའི་ངོ་མཚར་བཟུང་། ༡༤ །མཐའ་ཀླས་སྲས་བཅས་རྒྱལ་བའི་ཐུགས་ཀྱི་བཅུད། །སྐྱེས་བུ་གསུམ་གྱི་ལམ་རིམ་ཁོ་ནས་ཀྱང་། །ཟབ་རྒྱས་རྒྱལ་བའི་བཀའ་དང་དགོངས་འགྲེལ་ཀུན། །གདམས་ངག་གཅིག་ཏུ་འཆར་བའི་མཚན་སྙན་ལེན། ༡༥ །སྡེ་སྣོད་རྒྱ་མཚོའི་བཤད་སྒྲ་སྒྲོག་པ་དང་། །ལྷན་ཅིག་མཁས་པའི་འདུ་བ་ཆེར་རྒྱས་ཤིང་། །རྩེ་གཅིག་སྒྲུབ་ལ་བརྩོན་པའི་དགེ་མཚན་གྱིས། །རྨད་བྱུང་གྲུབ་པའི་ལམ་སྲོལ་གསར་དུ་ཚུགས། ༡༦ །དེ་ཕྱིར་དགའ་ལྡན་གནས་སུ་མ་ཕམ་ཞབས། །འཕགས་པའི་ཡུལ་དུ་སློབ་དཔོན་ཀླུ་ཡི་དབང་། །གངས་རིའི་ལྗོངས་འདིར་མར་མེ་མཛད་དཔལ་རྣམས། །ཀུན་མཁྱེན་གཉིས་པར་གྲགས་པའི་སྒྲ་དེ་འཛིན། ༡༧ ། གང་གི་བསྐལ་པར་གོམས་པའི་ཐུགས་བསྐྱེད་ཀྱིས། །བསྟན་འགྲོར་ཕན་བདེ་བསྒྲུབས་ལ་ངོ་མཚར་ཅི། །བསོད་ནམས་བྱེ་བའི་རང་གཟུགས་མཚན་དཔེའི་བྱིན། །འདེགས་བཟོད་བྷོ་ཊའི་ལྗོངས་འདི་ཨེ་མ་བརླིང་། ༡༨ །དེ་སླད་མཐོང་ན་མི་མཐུན་མེད་པའི་ཞལ། །མངོན་སུམ་བསྙེན་པའི་སྐལ་བཟང་བཏང་གྱུར་ཀྱང་། །ཡིད་བཞིན་འདོད་པ་འཇོ་བའི་ཞལ་སྐྱིན་མཆོག །མཇལ་བས་མོས་པའི་ཆུ་གཏེར་སྙིང་ལ་ཁོལ། ༡༩ །གང་ཕྱིར་དད་བརྒྱའི་དཔྱིད་ཀས་བཟུང་བ་ཡི། །ཚིག་སྦྱོར་མེ་ཏོག་ཕྲ་མོའི་མཆོད་སྤྲིན་གྱིས། །ཅུང་ཟད་བསྙེན་བཀུར་བགྱིས་པའི་བསོད་ནམས་ཀྱིས། །ཡེ་ཤེས་གཟིགས་པའི་འབབ་སྟེགས་མཛེས་པར་བྱས། ༢༠ །དེ་ལས་བྱུང་བའི་ལེགས་བྱས་སྣང་བ་ཡིས། །ངེས་འབྱུང་ལོ་འདབ་མངོན་མཐོའི་ཐོར་ཚུགས་ཀྱིས། །དུད་བྱས་བྱང་ཆུབ་སེམས་གཉིས་པདྨོ་དང་། །ཡང་དག་ལྟ་བའི་འབྲས་བུས་འཁྱུད་གྱུར་ཅིག ༢༡ །ཁྱད་པར་དྲི་མེད་ཐུབ་བསྟན་རིན་པོ་ཆེའི། །བཤད་སྒྲུབ་གདུགས་དཀར་སྲིད་རྩེར་བསྒྲེངས་པ་ལས། །འགྲོ་ཀུན་གནས་སྐབས་མཐར་ཐུག་དོན་གཉིས་ཀྱི། །ངལ་འཚོའི་དགའ་སྟོན་མཆོག་ཏུ་རྒྱས་པར་ཤོག ༢༢། མདོར་ན་རིག་དང་བརྩེ་བའི་ཡོན་ཏན་མཁའ་བཞིན་ཕ་མཐའ་ཡས་པའི་དཔྱིད། །རྣམ་འདྲེན་སྲས་བཅས་དགྱེས་པའི་ཟླ་བ་གྲགས་སྙན་བདུད་རྩིའི་དོ་ཤལ་གྱིས། །འཁྱུད་པའི་ངོ་མཚར་སྲིད་ན་མཚུངས་མེད་ཕུལ་བྱུང་ཞབས་ཀྱི་རྣམ་ཐར་དག །བདག་གཞན་ཡིད་ཅན་རྒྱ་མཚོའི་ཚོགས་རྣམས་སྤྱོད་ཡུལ་མཉམ་པ་ཉིད་གྱུར་ཅིག ༢༣ །དེ་ལྟར་ལྔ་བརྒྱ་པ་རྣམས་ཀྱི་གཙུག་གི་ནོར་བུ་དཔལ་ལྡན་ཨ་ཏི་ཤའི་རྣམ་ཐར་ལ་ཅུང་ཟད་བསྔགས་པའི་ཚིགས་སུ་བཅད་པ་འདིའང་། རྗེ་དེ་ཉིད་ཀྱིས་བྱིན་གྱིས་བརླབས་པའི་གནས་དཔལ་གྱི་སྙེ་ཐང་དུ་སྐུ་འདྲ་རིན་པོ་ཆེ་ཡིད་བཞིན་ནོར་བུའི་སྤྱན་སྔར་ས་ཟླའི་དམར་ཕྱོགས་ཀྱི་རྒྱལ་བ་གཉིས་པར་རྒྱལ་ཁམས་ཉུལ་བའི་ད་རི་དྲཱ་གཙུག་ལག་སྨྲ་བའི་ཉི་མས་སྣང་གསལ་ཞིག་གི་ངོགས་སུ་འབད་པས་བྲིས་ཏེ་གསོལ་བ་བཏབ་པ་སིདྡྷི་ར སྟུ།། །། ༈

[edit]

jo bo rje dpal ldan a ti sha la cung zad bsngags pa'i tshig gi rgyud mangs dad brgya'i me tog/ @#/__/jo bo rje dpal ldan a ti sha la cung zad bsngags pa'i tshig gi rgyud mang dad brgya'i me tog ces bya ba bzhugs so/__/na maHshrI mAM dI paM ka rA ya/__dge legs thugs rje'i bdud rtsi'i sprin gyis srid pa'i gdung ba mtha' dag 'phrog__/dpalaX ldanaX yon tan dam pa'i ljon shing zhi bsil 'dod pa 'jo ba'i gter/__/rig dang brtse ba'i maraX meX'i snang bas mtha' gnyis mun pa bsnyil mdzaXd pa'i/__/mkhas grub rgya mtsho'i gtsug gi nor bus shis pa'i me tog char du bsnyil/__1__/phuXl byungaX srid na mngon mtho'i zur phud kyis/__/yang yang bsnyen pa'i zhabasaX skyes bkra shis rdul/__/gang du bkod pa tsam gyis rgyal ba'i bstan/__/slar yang dar la babs pa'i ngang tshul bzung /__2__/e ma de yi rtogs pa brjod pa'i gtam/__/rin chen rin thang bral ba'i legs bshad dbyangs/__/dpyod ldan 'phags dang mkhas pa'i mgrin pa nas/__/khor yug ri bo'i khongs su rlung ltar sgrogs/__3__/thog mar chen po'i rigs kyi sA la'i tshal/__/mdzes ster pad+mo gzhon nu'i snyems 'chang ba/__/shar ba'i mod nas mkhyen dang brtse ba yis/__/bdud rtsi'i do shal mi thung ci yang ring /__4__/rgyu'o dri bzang rgyas pa'i ku mu dA'i/__/rdzing bur bung ba myos pa'i tshogs rnams te/__/zhi bsil nyams brgyas rab sgeg thar pa'i grong /__/'jug la khyod thugs rtag tu nyams pa med/__5__/de slad zla shel gsar pa'i 'dzum rlabs dang /__/'khrul pa'i rnam thar dkar pos mdzes pa yang /__/phyi nas grub pa'i dpal gyis mngon mtho ba'i/__/tshul 'dis som nyi'i drwa ba 'jil la dbang /__6__/slar yang thams cad gzigs pas rang nyid kyi/__/yongs rdzogs bstan la bya ba mdzad pa'i slad/__/bag med 'gog pa'i bdud rtsi zungs shig ces/__/bskul ba'i ngo mtshar srid na nyin bzhin gsal/__7_/de tshe rnam par grol ba'i tshul khrims ni/__/brtan mkhas yon tan bye ba'i phung po can/__/'chad dang spyod la 'phags mchog u pa lI/__/kho na nyid ces 'jig rten gsum na snyan/__8__/yun ring dus nas goms pa'i khyad par dang /__/brtson pas zab mo'i don la mnyam bzhag pas/__/gzungs dang mngon par shes dang ting 'dzin sgo/__/pha mtha' yas par 'jug cing ldang bar mdzad/__9__/ma phyis dri med mkhyen pa'i me long du/__/bris min shes bya'i ri mo 'bum 'char bas/__/bskul ba med par dpyod ldan rgya mtsho yis/__/thor tshugs sa la dud pa'i bsti stang stob/__10__/phyi nang rig gzhung kun gyi tshig dang don/__/gang blo'i gra zur gcig na bder bzung bas/__/tshul bzhin 'chad rtsod rtsom la mtshungs med pa'i/_/grags dkar yi ge phyogs kyi 'gram par byin/__11_/kun mkhyen nyid kyang 'dod pa'i chags bral zhing /__/'gro ba'i mig ste 'char nub gzhan dbang min/__/sna tshogs gzugs kyis 'jig rten khyab 'jug kyang /__/gzhan dag bslu ba'i bsam sbyor gzhar yang dben/__12_/khyad par bsil ldan ljongs su thub pa'i bstan/__/snyigs spyod gdung ba'i mal du nyam thag tshe/__/rje btsun 'phags mas bskul ba'i de ma thag__/_gang khyod kha ba'i khrod 'dir dal gyis gshegs/__13_/de tshe snying rjes rab brlan byang chub sems/__/sra zhing lci dang g.yo ba'i mchil pa ru/__/grub pa min yang tshur mthong rnams kyi yid/__/mtha' dag gzhu bzhin bkug pa'i ngo mtshar bzung /__14_/mtha' klas sras bcas rgyal ba'i thugs kyi bcud/__/skyes bu gsum gyi lam rim kho nas kyang /__/zab rgyas rgyal ba'i bka' dang dgongs 'grel kun/__/gdams ngag gcig tu 'char ba'i mtshan snyan len/__15__/sde snod rgya mtsho'i bshad sgra sgrog pa dang /__/lhan cig mkhas pa'i 'du ba cher rgyas shing /__/rtse gcig sgrub la brtson pa'i dge mtshan gyis/__/rmad byung grub pa'i lam srol gsar du tshugs/__16__/de phyir dga' ldan gnas su ma pham zhabs/_/'phags pa'i yul du slob dpon klu yi dbang /__/gangs ri'i ljongs 'dir mar me mdzad dpal rnams/__/kun mkhyen gnyis par grags pa'i sgra de 'dzin/__17__/_gang gi bskal par goms pa'i thugs bskyed kyis/__/bstan 'gror phan bde bsgrubs la ngo mtshar ci/__/bsod nams bye ba'i rang gzugs mtshan dpe'i byin/__/'degs bzod b+ho Ta'i ljongs 'di e ma brling /__18__/de slad mthong na mi mthun med pa'i zhal/__/mngon sum bsnyen pa'i skal bzang btang gyur kyang /__/yid bzhin 'dod pa 'jo ba'i zhal skyin mchog__/mjal bas mos pa'i chu gter snying la khol/__19__/gang phyir dad brgya'i dpyid kas bzung ba yi/__/tshig sbyor me tog phra mo'i mchod sprin gyis/__/cung zad bsnyen bkur bgyis pa'i bsod nams kyis/__/ye shes gzigs pa'i 'bab stegs mdzes par byas/_20_/de las byung ba'i legs byas snang ba yis/__/nges 'byung lo 'dab mngon mtho'i thor tshugs kyis/__/dud byas byang chub sems gnyis pad+mo dang /__/yang dag lta ba'i 'bras bus 'khyud gyur cig__21__/khyad par dri med thub bstan rin po che'i/__/bshad sgrub gdugs dkar srid rtser bsgrengs pa las/__/'gro kun gnas skabs mthar thug don gnyis kyi/__/ngal 'tsho'i dga' ston mchog tu rgyas par shog__22/__mdor na rig dang brtse ba'i yon tan mkha' bzhin pha mtha' yas pa'i dpyid/__/rnam 'dren sras bcas dgyes pa'i zla ba grags snyan bdud rtsi'i do shal gyis/__/'khyud pa'i ngo mtshar srid na mtshungs med phul byung zhabs kyi rnam thar dag__/bdag gzhan yid can rgya mtsho'i tshogs rnams spyod yul mnyam pa nyid gyur cig__23_/de ltar lnga brgya pa rnams kyi gtsug gi nor bu dpal ldan a ti sha'i rnam thar la cung zad bsngags pa'i tshigs su bcad pa 'di'ang /__rje de nyid kyis byin gyis brlabs pa'i gnas dpal gyi snye thang du sku 'dra rin po che yid bzhin nor bu'i spyan sngar sa zla'i dmar phyogs kyi rgyal ba gnyis par rgyal khams nyul ba'i da ri drA gtsug lag smra ba'i nyi mas snang gsal zhig gi ngogs su 'bad pas bris te gsol ba btab pa sid+d+hi ra_stu//___//__!