PJCW-KABUM-01-KA-007

🚧 This website is under continued development. We appreciate your patience!

Previous Text Back to Volume PageNext Text

Wylie title	nges 'byung dang brtson 'grus la bskul ba'i gtam shAkya'i khye'u zung gi gtam rgyud la sbyar ba
Location	dpal sprul bka' 'bum Volume 1, Text 7, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Discourses - gtam

Tibetan Text

[edit]

༄༅། །ངེས་འབྱུང་དང་བརྩོན་འགྲུས་ལ་བསྐུལ་བའི་གཏམ་ཤཱཀྱའི་ཁྱེའུ་ཟུང་གི་གཏམ་རྒྱུད་ལ་སྦྱར་བ།

གང་ཞིག་སྲིད་པའི་རབ་རིབ་ནི། །དག་པ་སྨན་གྱིས་སྦྱངས་གྱུར་པ། །ཐུབ་པ་ཤེས་རབ་སྤྱན་མངའ་བ། །འགྲོ་བའི་དམིགས་བུ་གཅིག་པུར་ངེས། །ལེགས་ལམ་སྟོང་གི་སྦྲུམ་པའི་དཀུ། །མིང་ལ་ནོར་འཛིན་དགའ་མ་ཙམ། །སྲིད་ན་རྒྱལ་བསྟན་རིན་ཆེན་མངལ། །འཛིན་བཟོད་དེ་ཡང་དེ་ཙམ་མོ། །གང་ལ་སྟོན་དང་བསྟན་པ་ནི། །གཅིག་པུ་ཆོས་འདུལ་བདུད་རྩིའི་གཏེར། །བླངས་ལས་འཆལ་བའི་དཔུང་སྙིལ་ལ། །དེ་འོས་དེ་དང་བཅས་པ་ཡིན། །ཡིད་འོང་ལི་ཁྲིས་བྲིས་སམ་ཅི། །གུར་གུམ་ཚོན་གྱིས་ཉུག་གམ་ཅི། །ཐུན་མཚམས་སྤྲིན་གྱི་བླ་གོས་ཅན། །འདི་ཀོ་སུ་ཡི་རྗེས་སྐྱེས་ཡིན། །རལ་བས་མ་ཡིན་ཐལ་བས་མིན། །དེ་ལ་སྐུད་པ་དབྱུག་གུས་མིན། །རྟག་འདི་ཐུབ་པ་ལྷའི་ཡང་ལྷས། །ཕྱག་རྒྱས་བཏབ་པ་གདོན་མི་ཟ། །གང་གིས་བསྟན་པ་རྟ་ཐུལ་ལས། །མཁས་པ་མཆོག་ཟུང་གྲགས་ཆེན་ལས། །འཕྲོག་པ་མིན་ནམ་ཐུབ་བསྟན་ལ། །ཉིན་མོར་བགྱིད་འདི་དེང་སུ་ཞིག །དེ་ཡི་ཕྱི་བཞིན་ལྷུན་པོ་ཡི། །དྲུང་ན་གསེར་རིའི་འཕྲེང་དངར་ལྟའི། །ཚོགས་ཀྱི་མཆོག་གཟིགས་གནོན་པ་ལ། །ཚོགས་མཆོག་ཉིད་དུ་ངོམས་པ་བཞིན། །བློ་གྲོས་བསླབ་པ་རྫོགས་པ་ལ། །རིངས་པ་ཐོབ་ཀྱང་ན་ཚོད་ཀྱིས། ། རེ་ཞིག་ངལ་བསོའི་སྟེགས་ཕྱིན་པར། །སྤོང་བཅུའི་ཁུར་འཛིན་དེ་ཡང་ཡོད། །གཞོན་ནུ་ན་ཚོད་གསལ་བ་དང་། །འགྲོགས་པའི་བློ་གྲོས་བརྩེ་འོས་པ། །རེ་ཞིག་དེ་རྗེས་འབྲང་དེའི་མཐུ། ། སྙན་ཚིག་གཏམ་ལ་དགྱེས་ཚུལ་ངོམས། །དེ་སླད་རྔ་ལ་དབྱུག་གུས་བཞིན། །གཏམ་གྱི་སྦྱོར་བ་ཁྱོད་བྱོས་ཞེས། །བསྐུལ་བ་བཟློག་པའི་ནུས་བྲལ་ཡང་། །སྨྲ་ལ་མོས་པ་རྒྱས་པ་མེད། ། སྔོན་བྱུང་གཏམ་ལས་གྱུར་པའི་ངག །སྙན་ངག་དམ་པའི་གཞི་ཉིད་ཅེས། །མཁས་པའི་གཏམ་དུ་བརྒྱུད་ཀྱང་སྦྱར། །ཐོས་དང་མཐོང་བའང་དེ་ལགས་མོད། །འོན་ཀྱང་དོན་ཆུང་དོན་ལོག་པའི། །ཅ་ཅོ་སྨྲ་ཡུལ་ཁྱོད་མི་འོས། །དོན་བཟང་ལྡན་ཞིང་སྙན་འཇེབས་པའི། །བརྗོད་པའི་བདུད་རྩིས་བདག་སྟོང་གྱུར། །འདོད་པ་དུག་ཅན་ཟས་འདྲ་བའི། །དུག་གི་ཉིང་ཁུར་གང་གྱུར་པ། །ཧ་ལ་ཧ་ལ་འདྲའི་བུད་མེད། །སྒྱུ་མ་དེ་བསྔགས་བདག་སྤོབས་རྒྱས། །དེ་འདྲ་མཁས་པས་སྨད་འོས་གང་། །རུང་བ་མ་ཡིན་མི་མཛེས་པའི། །གཏམ་གྱིས་ཁྱོད་སྙན་གཙེར་བ་ལ། །དགོས་པ་ཅི་ཡོད་གྱི་ན་ཙམ། །དེ་སླད་སྔོན་གྱི་མཁས་པས་མང་བསྟན་པ། །དམ་པའི་སྤྱོད་མཛེས་རྒྱུ་སྐར་ཕྲེང་འདྲ་ལས། །བསོད་ནམས་འདུན་སླད་བདག་གིས་ཉུང་ངུ་ཞིག ། བསྡེབ་པར་བགྱི་ཡི་མེ་ཏོག་ཕྲེང་བཞིན་ལོངས། །གང་གི་ལོངས་སྤྱོད་རྒྱས་པ་ལ། །དབང་པོས་ཀྱང་ནི་སྨོན་འོས་པ། །སེར་སྐྱའི་གྲོང་ཁྱེར་བལྟ་ན་སྡུག །གཉིས་པ་བཞིན་དུ་མཆིས་པ་ལགས། །ཐོག་མ་ཐ་མ་བར་དག་ཏུ། །གཅིག་ཏུ་གནས་པ་མི་བཟད་ལས། །རྩུབ་མོའི་བགྱི་བར་མངོན་ཕྱོགས་པ། །འཕགས་སྐྱེས་པོ་ནི་བདུད་ཉིད་བཞིན། །གཅིག་ཏུ་རབ་དཀར་ཟླ་འདྲ་བའི། །ཤཱཀྱའི་འབྱོར་པ་བཟའ་བ་ལ། །དུས་མེ་ལྟར་རྔམ་དེ་ཡི་དཔུང་། །མ་ལ་གནོད་དང་བཅས་པ་ཡིན། །རིང་ནས་ཐོག་མའི་ལས་ཀྱིས་དང་། །དྲུང་ནས་འདུན་ན་འདོན་གྱི་ཚིག ། ལྕགས་དང་འདྲ་བས་བསྐུལ་བསྐུལ་ནས། །ཁྲོ་བ་རང་གཞན་བདུད་དུ་སྐྱེས། །ཁྲོ་བ་སྤངས་པ་སངས་རྒྱས་ཀྱི། །སྲས་པོ་ཞི་བའི་བདག་ཉིད་ཅན། །སྒོར་ལ་སླར་ཡང་འདུད་འདུད་པ། །དེ་གསོད་པ་ལས་སླ་བ་མེད། འོན་ཀྱང་བླུན་པོ་བརྩེ་བྲལ་བ། །ཁྲོ་བའི་མིག་རྩ་དམར་དང་བཅས། །དེ་དཔུང་བཅོམ་ནས་བདག་ཁོ་ན། །དཔའ་བོ་བཞིན་དུ་དྲེགས་པ་ལེན། །གང་ཞིག་འབྱོར་དང་འདུས་དང་རབ་བསགས་པ། །རྒུད་འབྲལ་འཛད་པའི་བྱ་གཏོང་ཇི་བཞིན་དུ། ། གྲོང་བརླག་ཤཱཀྱའི་བུ་སྨད་ཕྱོགས་ཕྱོགས་སུ། །བཀྲེས་པས་ལག་པ་སྒྲེང་ཞིང་སློང་མོར་རྒྱུ། ། དེ་དབུས་ལང་ཚོའི་རྣམ་པར་རབ་གསལ་བ། །གསར་དུ་ཕ་མ་བྲལ་བའི་མྱ་ངན་ཅན། །གདོང་པ་མཆི་མའི་རི་མོ་སྐྱ་འགྱུར་བ། །བྱིས་པ་ཉེ་དུའི་སྲེད་ཅན་གཉིས་ཤིག་ངུ་། །བཟའ་བ་གང་ལ་བཏུང་བ་གང་ཞིག་ལས། །བརྩེ་བ་སུས་ཤེས་དེ་ལྟར་སྔར་སྤྱད་པའི། །བདེ་བའི་རྗེས་སུ་སེམས་པའི་སྨྲེ་སྔགས་ཅན། །དེ་མཐོང་མི་ལ་མཆི་མར་བཅས་མིན་མེད། །བཟོད་པ་བསྲན་ཆུང་རང་བཞིན་བློ་སྲབ་པ། །འཕྲལ་ལ་ངུ་དགའ་གྲོང་གི་བུད་མེད་དག །བྱིས་པ་དེ་མཐོང་འདུས་ནས་བྲང་བརྡུངས་ཤིང་། །ཉམ་ཐག་སྐད་ཀྱིས་སྙིང་རྗེ་རྗེ་བཞིན་དུ། །དེ་གཉིས་ཀྱི་ནི་མ་ཡི་མིང་པོ་རུ། །གྱུར་པ་ཤཱཀྱའི་སྲས་པོ་ཀུན་དགའ་བོ། །དེ་ཡང་དེར་འོང་དེ་ཡི་བཞིན་རྟོགས་ཤིང་། །བག་གིས་ཤེས་ནས་མིག་རྩ་བརླན་པར་གྱུར། །བྱིས་པ་ཕ་མ་ཡོད་དམ་ཅི། །གང་ལས་གང་དུ་ཇི་ལྟར་འོང་། །འདི་ལྟར་སྨྲ་བའི་རྒྱུ་ཅི་ཞེས། །དེ་གཉིས་ལ་ནི་ཀུན་དགས་དྲིས། ། འཕགས་པ་བདག་ཅག་ཕ་མ་མེད། །རྒྱུ་མེད་བཞིན་དུ་འཕགས་སྐྱེས་པོས། །རྣམ་པར་བཅོམ་ལས་སྡུག་བསྔལ་ཐོབ། །སྐྱབས་མེད་པར་ནི་འཁྱམས་ཤིང་རྒྱུ། །ཤཱཀྱའི་རྒྱལ་རིགས་ཀུན་དགའ་བོ། །ཁྱེད་གཉིས་ཀྱི་ནི་ཞང་པོ་ཡིན། ཕྱོགས་འདིར་ཡོད་ཅེས་གཞན་དག་སྨྲ། །མ་མཐོང་ཕྱིར་ན་སྨྲེ་སྔགས་བགྱིད། །དེ་ཐོས་ནས་ནི་ཀུན་དགའ་བོ། །གཉེན་ལ་སྲིད་པའི་གདུང་བ་སྐྱེས། །བྱིས་པ་དེ་གཉིས་ཕྱི་བཞིན་དུ། །བཀྲིས་ནས་རང་གི་གནས་སུ་འོང་། །མ་ཆགས་ཡང་དག་འཕགས་པའི་རིགས། །འདོད་པ་ཆུང་ཞིང་ཆོག་ཤེས་པའི། །གནས་ལ་ཡིད་རྟོན་དུལ་བ་ལ། །འབྱོར་བའི་བགོ་བྱ་ཅི་ཞིག་ཡོད། །དྲང་བོ་མཆོག་གི་སྣོད་གཅིག་པུར། །སྒོ་བརྒྱ་འགྲིམ་ལས་གང་རྙེད་དེ། །གྱི་ན་ཙམ་ཞིག་རང་འཚལ་ཞིང་། །དེ་དག་དུ་ཡང་ཐུན་མོང་བྱས། ། སྐྱེ་བོས་ལུས་ནི་ཟས་ཀྱིས་ཆུས། །པདྨོ་བཞིན་ཏུ་བསྐྱེད་བྱ་བ། །དེ་ལ་བསྙེན་དུ་མེད་རྒྱུ་དེས། ། དེ་བཞིན་སྐྱ་བོ་ཐངས་པོར་གྱུར། །ཐམས་ཅད་མཁྱེན་ཀྱང་མཁྱེན་བཞིན་ཏུ། །འདྲི་མཛད་ཐུགས་རྗེའི་དགོངས་མངའ་བ། །ཐུབ་པས་དེ་ལུས་སྐེམ་པའི་རྒྱུ། །དྲི་ལ་ཇི་བཞིན་ཉིད་དུ་ཞུས། །འདི་ན་བསྟན་པ་བདུད་རྩིའི་སྒོ། །དཔག་བསམ་གྱི་ནི་ཤིང་འདྲ་བ། །ཀུན་ལ་མཉམ་པར་ངེས་བརྡལ་ན། །དེ་དག་ཅིས་མི་ཞུགས་ཞེས་གསུངས། །མགོན་པོ་དེ་དག་ན་ཚོད་ཕྲ། ། ཀློག་དང་སྤོང་ལ་བརྩོན་ནུས་དཀའ། །དེ་སླད་ཐུབ་པའི་རྒྱལ་མཚན་གྱིས། །དགབ་པ་བདག་གིས་མ་སྤོབས་སོ། །གང་གིས་ཤེས་བྱ་ཅི་ཙམ་པ། །གཟིགས་གྱུར་ཐུབ་པ་བསྙེངས་མེད་པས། ། ཀུན་དགའ་བོ་ཡི་ཚིག་གསན་ནས། །དེ་ལ་ཐུགས་རྗེས་དགོངས་པར་མཛད། །ཀྱེ་མ་འོད་སྟོང་སྐྱེས་མཆོག་གི །བསྟན་ལ་གང་གིས་སྨོན་སྨོན་པ། །དེ་འབྲས་མེད་བགྱིད་བདག་ཆ་མིན། །དེ་སླད་གནས་འདི་གནང་བར་དགོངས། །དགེ་འདུན་གྱི་ནི་སྤྱི་བུད་ལ། །བྱ་རོག་ཟ་བ་སྐྲོད་ནུས་ཤིང་། །ལོ་བདུན་ལོན་པར་གང་གྱུར་པ། །རབ་ཏུ་བྱུང་ཞེས་གནང་བར་མཛད། །ཀྱེ་མ་ཐུགས་རྗེ་ཆེན་པོའི་ཁུར། །གང་གིས་རིང་ནས་བསྣམས་བསྣམས་པ། །སྐྱེ་དགུའི་བཤེས་སུ་རྩལ་ལགས་ན། །གང་དོན་མི་འགྱུར་དེ་ཡོད་མིན། །ཕུན་ཚོགས་ཐུབ་པ་ཉིད་བཞིན་དུ། །རྒྱས་པ་བསྟན་པའི་དགའ་ཚལ་ནི། །ལང་ཚོ་གཞོན་ནུའི་ཐར་ལམ་གྱི། །བརྩེ་དགའི་གསོས་སུ་དེ་རིང་བྱོན། །མཛེས་པ་ལྷ་ཡི་བུ་ཇི་ལྟར། །གཅུག་པ་འཛིན་པའི་གཞོན་ནུ་ཟུང་། །དར་བ་ཚུལ་ཁྲིམས་སྙེ་མ་ཡིན། །ཕོན་པོའི་ཁུར་གྱིས་ལྕི་བར་བྱས། །ཆོས་འདུལ་ནོར་བུའི་དོ་ཤལ་གྱིས། ། སྒེག་འཆང་དགྱེས་པའི་བག་ཡོད་འདིས། །སྐྱེངས་བྱས་མེས་པོ་ཚངས་པ་ཡང་། །བྱེད་པོར་རྫུན་གྱིས་བསྙེན་ནམ་སྙམ། །དེར་ནི་ཀློག་པའི་བརྟུལ་ཞུགས་ལས། །བརྩོན་པར་བྱོས་ཞེས་ཀུན་དགའ་བོས། །བསླབ་ཀྱང་གཞོན་པའི་རྒྱུ་མཚན་གྱིས། །བརྩེ་བའི་གཏམ་དེས་གདུལ་མ་ནུས། །རྫུ་འཕྲུལ་ཆེན་པོ་དབང་ཡོད་པོ། །མཁས་པ་མོའུ་གལ་བུའི་དྲུང་དེར། །ཚིག་གིས་བཅོལ་ནས་དེས་བསླབ་པར། །འཕྲལ་དུ་ཀློག་ཀྱང་རྒྱུན་བཅས་མིན། །བག་བསྐྱངས་རྩེད་མོའི་རྣམ་འགྱུར་ལ། །དགའ་བར་བྱིས་པའི་ངང་ཚུལ་དེར། །འཇམ་པོས་བསླབ་ཀྱང་ཉན་བྲལ་བས། །བསྡིགས་པར་བྱོས་ཞེས་ཀུན་དགས་བསྐུལ། །གང་དུ་གནས་བརྟན་མཛེས་པར་གཤེགས། །གྲོང་ན་གུས་བཅས་གཞོན་ནུ་ཟུང་། །ཕྲག་གོང་གདེགས་པའི་ཁུར་མཛེས་ལས། ། དད་དང་བརྩེ་འོས་འགྲན་པ་བཞིན། །གནས་དང་གནས་པ་ལྷན་ཅིག་པས། །ཉིན་མོར་སྤྱོད་པའི་གནས་བསྙེགས་ལ། །དད་པས་ལྷ་དག་རང་གི་ཚལ། །འདི་ན་སྐད་ཅིག་བཀྲམ་པ་བཞིན། །མར་གད་བཞུས་པའི་དཀྱིལ་འཁོར་ལ། །མེ་ཏོག་ཐིག་ལེའི་ཚོམ་བུ་ཅན། །ཅུང་ཟད་མཐོང་བར་གནས་སྣང་དེར། །ལྷག་མཐོང་མགྲོན་དུ་འབོད་པ་བཞིན། །ཀླུ་ཡི་རྒྱལ་པོ་བསྐྱིལ་བ་ལྟར། །མི་གཡོ་མཉམ་པར་བཞག་པ་ཅན། །ཏིང་འཛིན་གང་གིས་རྣམ་སྤྲུལ་པ། །མེད་བཞིན་སྣང་དང་བཅས་པ་ཡིན། །སྒྲ་ཆེན་པོ་དང་སྒྲ་མཐོན་པོ། །དུཿཁའི་སྒྲ་གདངས་རྣར་རྩུབ་པ། །རིང་བ་མིན་པའི་ས་ཕྱོགས་ཐོས། །རྒྱུ་མཚན་གནས་ལ་གནས་པས་དྲིས། །གཞོན་ནུ་དལ་གྱིས་འགྲོ་བར་བྱོས། །ལེགས་པར་སྒྲིམ་ལ་ལྟོས་ཤིག་དང་། །རྒྱུ་མཚན་ངེས་པར་འགྱུར་སྲིད་ཀྱི། །རྒྱུ་དེ་བདག་གིས་མ་འཚལ་ཏེ། །ཞེས་པ་བླ་མའི་ཚིག་མཉན་ནས། །དེ་གཉིས་དལ་གྱིས་དལ་གྱིས་ནི། །འཇིགས་དང་རབ་དགའ་མཚར་བའི་སེམས། །འགྲན་པ་ལྟ་བུས་དེ་བལྟར་ཕྱིན། །གང་དུ་རབ་འབར་མེ་ཚོགས་འཁྱིལ་བ་ཚེག་ཡར་ཏོག་སྒྲས་ལྕེ་འབབ་པ། ། འཇིགས་དུས་མེ་བཞིན་ལྟ་བར་བཟོད་དཀའ་གཤིན་རྗེ་ལྟ་བུར་འཇིགས་སུ་རུང་། །འབར་བའི་ཤུགས་ཀྱིས་བསྐོལ་བའི་ཟངས་ཞུན་ལྷག་ལྷག་འཁྱིལ་བའི་དབུས་གནས་པ། །དུ་བ་སྔོ་ཕྱུར་ཉམ་ཐག་སྐད་འབྱིན་སྡུག་བསྔལ་སེམས་ཅན་དེ་ལྟར་མཐོང་། །གཞན་དུ་ལྕགས་སྣོད་མེ་ལྕེའི་ཕྲེང་འཁྲིགས་འབར་བའི་མེ་ཡི་ཚོགས་བཅས་པ། །གོ་རེ་ལོངས་བཞིན་ཕྱོགས་ཕྱོགས་རྒྱུ་བའི་མེ་བཞིན་ཚ་དབལ་མཚོན་ཆའི་ལག །གཡོ་བ་དང་ལྡན་དེ་ཡི་ཕྱོགས་ཀུན་གཤིན་རྗེའི་སྐྱེས་བུ་གཏུམ་ལྡན་པས། །བསྐོར་བ་ཕན་ཚུན་འགྲན་པ་བཞིན་དུ་གཉིས་ཤིག་དེ་ན་བཀོད་ཅིང་མཆིས། །དེ་མཐོང་སྐྱི་བུང་བྱེད་ཅིང་འཇིགས་དྲགས་མཉམ་པའི་གོམ་པ་འདོར་ནུས་མིན། ། ཀྱེ་མ་འདི་ཅི་འདི་འདྲ་ཅི་ཞིག་ཀྱི་ཧུད་བཟོད་པར་དཀའ་འདི་ཅི། །འདི་འདྲ་བལྟ་བར་ནུས་པ་མིན་ན་འདི་རུ་ཚུད་པ་ལྟ་ཅི་ཞེས། །ཤིན་ཏུ་ཞུམ་པའི་སྐད་གདངས་དམའ་བས་དེ་དག་ལ་ནི་དེ་གཉིས་འདྲི། །བཟོད་པར་མཛོད་ཅིག་སྐྱེས་སུ་དག །འདི་ན་ལྟད་མོ་མི་བཟོད་པའི། །རྒྱུ་མཚན་གང་ཡིན་བདག་ཅག་འདྲི། །བརྩེ་བཅས་ཡང་དག་འཆད་པར་རིགས། །གང་དུ་འཕགས་པ་ཀུན་དགའ་བོས། །སྲིང་མོའི་བུ་གཉིས་རབ་བྱུང་བ། །ཀློག་པར་མི་བརྩོན་དགེ་འདུན་གྱི། །དཀོར་ལ་བག་མེད་སྤྱོད་པར་བགྱིད། །མི་བཟད་ལས་ཀྱི་ཆད་པ་ནི། །གདུག་པ་ཅན་འདིར་དེ་འཛུད་དོ། །གཞན་ཡང་བག་མེད་སྔར་སྤྱོད་པ། །མང་པོ་འདི་རུ་འཚེད་འདིའོ། ། དེ་སྐད་གཤིན་རྗེའི་སྐྱེས་བུའི་ཚིག །གནམ་ལྕགས་ལྷུང་བཞིན་འཇིགས་འོས་པ། །ཐོས་པས་མིག་ཀྱང་རིག་རིག་པོར། །གྱུར་པའི་ཉམས་ཐག་གཞོན་ནུ་ཟུང་། །སྐྲག་པས་རྟབས་རྟབས་པོར་བགྱིད་ཅིང་། །མྱུར་བར་ཚིག་ལན་ལྡོག་བྲལ་ནས། །མཉམ་པ་མིན་པའི་གོམ་པ་ཅན། ། ཞུམ་བཞིན་མཁན་པོའི་དྲུང་དུ་འོང་། །ཀྱེ་མ་བལྟ་བར་དཀའ་དག་མཆིས། །ཐོས་དང་མཐོང་བ་འདི་འདྲ་ཞེས། །སྨྲས་ཞིང་རང་གི་གཙུག་ལག་ཏུ། །ལ་འུར་འདོང་ཞེས་བསྐུལ་བར་བགྱིད། ། དེ་ཚིག་མཉན་ནས་དེ་དག་འོང་། །གནས་སུ་ཕྱིན་ནས་ཀློག་པ་ཡི། །གནས་ལ་ཤིན་ཏུ་བརྩོན་པ་ཡི། །སྒྲིན་དང་བཅས་པར་དེ་གཉིས་གྱུར། །འོན་ཀྱང་དམྱལ་མེ་མ་རུང་བའི། །འཇིགས་པ་ཟས་ཀྱི་གོང་དྲན་ན། །ཟ་བར་མི་ནུས་དེ་ལས་ཕྱིན། །དྲན་པས་སླར་ལ་སྐྱུགས་པར་བགྱིད། ། མ་ཟོས་པའམ་སྐྱུགས་པའི་རྒྱུས། །བཟའ་བ་བཅུད་དུ་མ་གྱུར་དེས། །དེ་གཉིས་ལུས་ནི་རིང་གྱུར་རྒྱུ། །ཞང་པོས་དྲིས་ནས་མཁན་པོའི་སྨྲས། །སྤོབས་པར་བྱོས་ཞེས་བསྐུལ་བ་ལས། །རྫུ་འཕྲུལ་གྱིས་ནི་ལྷ་ཡུལ་བསྟན། །ངེས་འབྱུང་བདུད་རྩི་ཡུན་རིང་དུ། །བཏུང་བ་གནས་འདིར་སྲིད་མི་སྐྱོ། །འདི་འདྲའི་བདེ་བ་རབ་དགའ་བ། །ཟད་པར་འགྱུར་རམ་མ་ཡིན་ཞེས། །ངེས་པར་སྐྱེས་བུ་མཁས་པ་ཡི། །བརྟག་འོས་གནས་འདི་བླ་མར་དྲིས། །དེས་ཀྱང་ཐུབ་པ་ཀུན་མཁྱེན་པའི། །གསུང་གི་གནས་བཞིན་འཁོར་བ་ཀུན། །མེ་འོབས་ལྟ་བུའི་ཚུལ་འདོམས་ཞིང་། ། སྲིད་བདེའི་མཐའ་ཡང་ངེས་པར་བྱས། །རྒྱུ་དེས་སྲིད་པ་ཐ་མ་པའི། །གང་ཟག་དེ་གཉིས་བརྩོན་པ་དང་། །འབད་པ་རྒྱུན་རིང་འགྲོགས་པ་ཡིས། །འཁོར་བ་འདི་ལས་ཕྱི་རོལ་ལོག ། གང་ཞིག་ཙནྡན་མཆོག་བདར་བཞིན། །བསིལ་བར་གྱུར་བ་རྙོགས་མེད་པའི། །མྱ་ངན་འདས་ཞི་དགྲ་བཅོམ་པ། །མཁས་པ་དེ་གཉིས་མངོན་དུ་བྱས། །མཁའ་ལ་སྐྱིལ་ཀྲུང་བཅས་གཤེགས་པའི། །མདུན་ན་ཆུ་ཡི་བུམ་པ་དག །རྟེན་པ་མེད་པར་འགྲོ་བ་ཡི། །རྫུ་འཕྲུལ་མཐུ་ཡང་ངེས་པར་བསྟན། །གང་གི་ལོ་བདུན་པ་ཁོ་ནར། །ལམ་མཐར་ཕྱིན་པ་མངོན་བྱས་པ། ། ངེས་འབྱུང་ཁ་ལོ་དང་བཅས་པའི། །བརྩོན་པའི་ཤིང་རྟར་ཞོན་ལས་ལགས། །དེ་སླད་རྨོངས་རྒྱུ་བག་མེད་དང་འགལ་བའི། །ངེས་འབྱུང་ཚུལ་ཁྲིམས་བསླབ་མཆོག་སྣོད་ལྟ་བུར། །སྨོན་འཇུག་བདུད་རྩིའི་བཅུད་མཆོག་གང་ཡིན་པ། །བསྙེན་ན་ཀུན་མཁྱེན་རིང་བ་མིན་པ་ལགས། །

དགེའོ། །