JKW-KABUM-23-'A-001-006

🚧 This website is under continued development. We appreciate your patience!

Previous Text Back to Volume PageNext Text

Wylie title	bsnyen sgrub yan lag bzhi ldan gyi glu mtsho skyes bla ma'i zhal lung
Location	mkhyen brtse'i bka' 'bum Volume 23, sde tshan 1, Text 6, Pages 12-14 (Folios 6b6 to 7b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bsnyen sgrub yan lag bzhi ldan gyi glu mtsho skyes bla ma'i zhal lung. In 'jam dbyangs mkhyen brtse'i dbang po'i bka' 'bum, Vol. 23: 12-14. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་ཕུར་བུ་ས་སྤྲེལ་ལོའི་སྤྲེལ་ཟླའི་དཀར་ཕྱོགས་ཀྱི་ཚེས་བཅུར་ཚོགས་ཀྱི་མཆོད་པ་བརྡ་མཚོན་ཙམ་བགྱིས་པའི་སྐབས། གྲུབ་པའི་སློབ་དཔོན་མཚོ་སྐྱེས་རྡོ་རྗེའི་བྱིན་རླབས་ལས་རང་ཤར་བའི་ཚུལ་གྱིས་རྣལ་འབྱོར་པ་མཁྱེན་བརྩེའི་དབང་པོས་སོ།
	zhes phur bu sa sprel lo'i sprel zla'i dkar phyogs kyi tshes bcur tshogs kyi mchod pa brda mtshon tsam bgyis pa'i skabs/__grub pa'i slob dpon mtsho skyes rdo rje'i byin rlabs las rang shar ba'i tshul gyis rnal 'byor pa mkhyen brtse'i dbang pos so

Tibetan Text

Wylie

[edit]

བསྙེན་སྒྲུབ་ཡན་ལག་བཞི་ལྡན་གྱི་རྡོ་རྗེའི་གླུ་འཆི་མེད་མཚོ་སྐྱེས་བླ་མའི་ཞལ་ལུང་ཞེས་བྱ་བ། ཨ་ཧོ་སྙིང་དབུས་གཞོམ་དུ་མེད་པ་འོད་གསལ་གྱི་ཕོ་བྲང་། །མི་ཤིགས་ཐིག་ལེ་ཆེན་པོ་མཚོ་སྐྱེས་ཀྱི་བླ་མ། །གདོད་ནས་འདུ་འབྲལ་སྤངས་པའི་རང་ཞལ་ལ་བཏུད་ནས། །ངེས་དོན་ཟབ་མོའི་ལམ་གྱི་གླུ་དབྱངས་ཞིག་ལེན་ནོ། །ཐ་མལ་སྣང་བ་ཐམས་ཅད་ཡེ་ཤེས་སུ་ཐིམ་པའི། །རང་རྩལ་དག་པ་རབ་འབྱམས་དཀྱིལ་འཁོར་གྱི་འཁོར་ལོ། །སྣང་སྲིད་གཞིར་བཞེངས་ཆེན་པོའི་བསྐྱེད་རིམ་ལ་སྦྱར་བས། །བུམ་དབང་བསྙེན་པའི་རྣལ་འབྱོར་ལྷུན་གྲུབ་ཏུ་ཤར་རོ། །བརྒྱད་ཁྲི་བཞི་སྟོང་སྲོག་དང་ཐུར་སེལ་གྱི་རྒྱུ་བ། ཁ་སྦྱོར་རྡོ་རྗེའི་ཆོ་གས་དབུ་མ་རུ་བཅིལ་ནས། །འབར་འཛག་བདེ་ཆེན་ཉམས་བརྒྱའི་འཇོ་སྒེག་ལ་སྦྱར་བའི། །གསང་དབང་ཉེ་བར་བསྙེན་པའི་རྣལ་འབྱོར་ལ་འཇུག་གོ། །རང་སྣང་རིག་མའི་འདོད་ཡོན་སྙོམས་འཇུག་གི་རེག་བྱས། །བདེ་ཆེན་ཐབས་མཆོག་ཧེ་རུ་ཀ་དཔལ་ལ་འཁྱུད་པས། །དགའ་བཞི་དབུ་མར་རྫོགས་པའི་ངལ་འཚོ་དང་སྦྲགས་ནས། །ཤེར་དབང་སྒྲུབ་པའི་རྣལ་འབྱོར་གསེང་ལམ་ལ་ཆས་འགྲོ། །ཨ་ཧོ་བསམ་བརྗོད་བྲལ་བ་ཀ་དག་གི་ཡེ་ཤེས། །ལྷུན་གྲུབ་མངོན་སུམ་རིག་པའི་སྣང་བ་དང་འགྲིགས་ཏེ། །ཆོས་ཟད་བློ་འདས་དོན་དམ་མཚོ་སྐྱེས་ཀྱི་རྡོ་རྗེ། །ཚིག་དབང་སྒྲུབ་པ་ཆེན་པོའི་འབྲས་བུ་ལ་སྤྱོད་དོ། །ཨེ་མ་འཆི་མེད་གྲུབ་པའི་སློབ་དཔོན་གྱི་བྱིན་རླབས། །ཚེ་རབས་ཕྲེང་བར་ཐོབ་པའི་སྐལ་བཟང་གི་བདུད་རྩི། །མགྲིན་པ་ལོངས་སྤྱོད་འཁོར་ལོའི་པདྨོ་ལ་རེག་པས། །ངེས་གསང་ལམ་གྱི་ཟིལ་དངར་རང་གྲོལ་དུ་ཤར་རོ། །དགེ་བ་དེ་ཡིས་ཕྱི་ནང་གཞན་གསུམ་གྱི་ཆོས་ཀུན། །དབྱེར་མེད་རྫོགས་པ་ཆེན་པོའི་ཡེ་ཤེས་ལ་བརྟེན་ནས། །མཁའ་ཁྱབ་འགྲོ་ཀུན་སྒྲོལ་བའི་ཕྲིན་ལས་སུ་འཆར་བའི། །དོན་གཉིས་ཡིད་བཞིན་འགྲུབ་པའི་སྨོན་ལམ་ཞིག་ཞུའོ། །ཞེས་ཕུར་བུ་ས་སྤྲེལ་ལོའི་སྤྲེལ་ཟླའི་དཀར་ཕྱོགས་ཀྱི་ཚེས་བཅུར་ཚོགས་ཀྱི་མཆོད་པ་བརྡ་མཚོན་ཙམ་བགྱིས་པའི་སྐབས། གྲུབ་པའི་སློབ་དཔོན་མཚོ་སྐྱེས་རྡོ་རྗེའི་བྱིན་རླབས་ལས་རང་ཤར་བའི་ཚུལ་གྱིས་རྣལ་འབྱོར་པ་མཁྱེན་བརྩེའི་དབང་པོས་སོ། ། ༈

[edit]

bsnyen sgrub yan lag bzhi ldan gyi glu mtsho skyes bla ma'i zhal lung /__ bsnyen sgrub yan lag bzhi ldan gyi rdo rje'i glu 'chi med mtsho skyes bla ma'i zhal lung zhes bya ba/__a ho snying dbus gzhom du med pa 'od gsal gyi pho brang /__/mi shigs thig le chen po mtsho skyes kyi bla ma/__/gdod nas 'du 'bral spangs pa'i rang zhal la btud nas/__/nges don zab mo'i lam gyi glu dbyangs zhig len no/__/tha mal snang ba thams cad ye shes su thim pa'i/__/rang rtsal dag pa rab 'byams dkyil 'khor gyi 'khor lo/__/snang srid gzhir bzhengs chen po'i bskyed rim la sbyar bas/__/bum dbang bsnyen pa'i rnal 'byor lhun grub tu shar ro/__/brgyad khri bzhi stong srog dang thur sel gyi rgyu ba/__kha sbyor rdo rje'i cho gas dbu ma ru bcil nas/__/'bar 'dzag bde chen nyams brgya'i 'jo sgeg la sbyar ba'i/__/gsang dbang nye bar bsnyen pa'i rnal 'byor la 'jug go/__/rang snang rig ma'i 'dod yon snyoms 'jug gi reg byas/__/bde chen thabs mchog he ru ka dpal la 'khyud pas/__/dga' bzhi dbu mar rdzogs pa'i ngal 'tsho dang sbrags nas/__/sher dbang sgrub pa'i rnal 'byor gseng lam la chas 'gro/__/a ho bsam brjod bral ba ka dag gi ye shes/__/lhun grub mngon sum rig pa'i snang ba dang 'grigs te/__/chos zad blo 'das don dam mtsho skyes kyi rdo rje/__/tshig dbang sgrub pa chen po'i 'bras bu la spyod do/__/e ma 'chi med grub pa'i slob dpon gyi byin rlabs/__/tshe rabs phreng bar thob pa'i skal bzang gi bdud rtsi/__/mgrin pa longs spyod 'khor lo'i pad+mo la reg pas/__/nges gsang lam gyi zil dngar rang grol du shar ro/__/dge ba de yis phyi nang gzhan gsum gyi chos kun/__/dbyer med rdzogs pa chen po'i ye shes la brten nas/__/mkha' khyab 'gro kun sgrol ba'i phrin las su 'char ba'i/__/don gnyis yid bzhin 'grub pa'i smon lam zhig zhu'o/__/zhes phur bu sa sprel lo'i sprel zla'i dkar phyogs kyi tshes bcur tshogs kyi mchod pa brda mtshon tsam bgyis pa'i skabs/__grub pa'i slob dpon mtsho skyes rdo rje'i byin rlabs las rang shar ba'i tshul gyis rnal 'byor pa mkhyen brtse'i dbang pos so/___/__!