DKR-KABUM-15-BA-006: Difference between revisions
From Khyentse Lineage - A Tsadra Foundation Project
WikiBot2015 (talk | contribs) No edit summary |
m (Text replacement - "Khyentse Metadata" to "Text") |
||
| (3 intermediate revisions by one other user not shown) | |||
| Line 1: | Line 1: | ||
{{ | {{Text | ||
|classification=Tibetan Publications | |classification=Tibetan Publications | ||
|subclass=Tibetan Texts | |subclass=Tibetan Texts | ||
|sectionheading=No | |||
|fulltitletib=འཇམ་མགོན་བླ་མ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་རྣམ་ཐར་གསོལ་འདེབས་ཀྱི་འགྲེལ་བ་མཚོ་བྱུང་དཔལ་མོ་དགྱེས་པའི་རྒྱུད་མང་། | |||
|fulltitle='jam mgon bla ma mi pham 'jam dbyangs rnam rgyal rgya mtsho'i rnam thar gsol 'debs kyi 'grel ba mtsho byung dpal mo dgyes pa'i rgyud mang | |||
|citation=[[Khyentse, Dilgo]]. '''jam mgon bla ma mi pham 'jam dbyangs rnam rgyal rgya mtsho'i rnam thar gsol 'debs kyi 'grel ba mtsho byung dpal mo dgyes pa'i rgyud mang''. In ''Skyabs rje dil mgo mkhyen brtse rin po che'i bka' 'bum'', Vol. 15: 267-299. Delhi: Shechen Publications, 1994. | |||
|collectiontitletib=དིལ་མགོ་མཁྱེན་བརྩེ་བཀའ་འབུམ། | |||
|collectiontitle=dil mgo mkhyen brtse bka' 'bum | |collectiontitle=dil mgo mkhyen brtse bka' 'bum | ||
|author=Khyentse, Dilgo | |author=Khyentse, Dilgo | ||
|authortib=དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ | |authortib=དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ | ||
|associatedpeople=mi pham rgya mtsho | |||
|associatedpeopletib=མི་ཕམ་རྒྱ་མཚོ་ | |||
|tibgenre=Biographies - Hagiography - rnam thar, Commentaries - 'grel pa, Supplications - gsol 'debs | |||
|terma=No | |||
|dkroutline=Five | |||
|language=Tibetan | |language=Tibetan | ||
| | |volumenumber=015 | ||
| | |volnumtib=༡༥ | ||
|volyigtib=བ་ | |||
|totalvolumes=25 | |||
|textnuminvol=006 | |textnuminvol=006 | ||
|pagenumbers=267-299 | |||
|totalpages=66 | |||
|beginfolioline=1a | |||
|endfolioline=33b6 | |||
|totalfolios=33 | |||
|multivolumework=No | |||
|rectonotes='grel pa | |||
|versonotes=mi pham rnam thar gsol 'debs | |||
|colophontib=།བརྩམ་འཕྲོས་ལུས། | |||
|colophonwylie=/brtsam 'phros lus/ | |||
|pdflink=File:DKR-KABUM-15-BA-006.pdf | |pdflink=File:DKR-KABUM-15-BA-006.pdf | ||
}} | }} | ||
| Line 16: | Line 36: | ||
<h1 style="font-size: 24px !important;">Tibetan Text</h1> | <h1 style="font-size: 24px !important;">Tibetan Text</h1> | ||
<onlyinclude> | <onlyinclude> | ||
{{TibP|༄༅། འཇམ་མགོན་བླ་མ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་རྣམ་ཐར་གསོལ་འདེབས་ཀྱི་འགྲེལ་བ་མཚོ་བྱུང་དཔལ་མོ་དགྱེས་པའི་རྒྱུད་མང་ཞེས་བྱ་བ་བཞུགས།། | {{TibP|༄༅། འཇམ་མགོན་བླ་མ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་རྣམ་ཐར་གསོལ་འདེབས་ཀྱི་འགྲེལ་བ་མཚོ་བྱུང་དཔལ་མོ་དགྱེས་པའི་རྒྱུད་མང་ཞེས་བྱ་བ་བཞུགས།།<br><br> | ||
༄༅། ཨོཾ་སྭསྟི་ཤྲཱི་བི་ཛ་ཡནྟུ། དེ་ལ་འདིར་འཕགས་ཡུལ་གྱི་ཤིང་རྟ་ཆེན་པོ་རྣམས་དང་མཁྱེན་རྟོགས་རྣམ་དབྱེར་མ་མཆིས་པའི་ངེས་པ་དོན་གྱི་ཐམས་ཅད་མཁྱེན་ཅིང་གཟིགས་པ་མི་ཕམ་འཇམ་དཔལ་དགྱེས་པའི་རྡོ་རྗེའི་ཞལ་གསུང་རྣམ་ཐར་གསོལ་འདེབས་ལ། རྗེ་ཉིད་ཀྱི་གསུང་དང་རྣམ་ཐར་གྱི་ཟེགས་མ་གང་ཐོས་སྒྲོ་བཀུར་གྱིས་མ་བསླད་པས་བརྒྱན་ཏེ་ཚིག་འགྲེལ་བཀོད་པ་ལ། ན་མོ་གུ་རུ་མཉྫུ་ཤྲཱི་ཡེ། ཞེས་པ་ནི། རྗེ་ཉིད་ཀྱི་རིགས་ཀྱི་བདག་པོ་ཐུན་མོང་མ་ཡིན་པ་འཇམ་དབྱངས་མཁྱེན་བརྩེའི་དབང་པོ་དང༌། འཇམ་མགོན་བློ་གྲོས་མཐའ་ཡས། ལབ་སྐྱབས་མགོན་དབང་ཆེན་དགྱེས་རབ་རྡོ་རྗེ། འཇིགས་མེད་ཆོས་ཀྱི་དབང་པོ་སོགས་ཐམས་ཅད་རྗེ་བཙུན་འཇམ་དཔལ་དབྱངས་ཀྱི་སྤྲུལ་པ་ཡིན་ཅིང༌། རྗེ་ཉིད་ཀྱི་ལྷག་པའི་ལྷ་ཐུན་མོང་མ་ཡིན་པའང་འཇམ་དཔལ་ཞི་ཁྲོ་ཡིན་པ་དང༌། ངེས་པའི་དོན་དུ་རྗེ་ཉིད་ཀྱི་སྤྲུལ་གཞིའང་ཡིན་པ། བླ་མ་འཇམ་དཔལ་ལ་ཕྱག་འཚལ་ལོ། །ཞེས་ལེགས་སྦྱར་གྱི་སྐད་དུ་ཕྱག་འཚལ་བས་རྣམ་ཐར་གྱི་དངོས་པོ་མདོར་བསྟན་པའོ། །གཉིས་པ་རྒྱས་པར་བཤད་པ་ལ། སྤྲུལ་གཞི་དང༌། སྤྲུལ་པ་དངོས་ཀྱི་རྣམ་ཐར་རོ། །དང་པོ་ནི། རྗེ་བླ་མ་འདི་སུ་ཞིག་གི་རྣམ་འཕྲུལ་ཡིན་སྙམ་ན། རྗེ་བླ་མ་མཆོག་གི་ཞལ་ལས། མགོན་པོ་མཁྱེན་རབ་མངའ་བདག་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་རྣམ་པར་མི་རྟོག་པའི་ཆོས་ཀྱི་སྐུ་གཅིག་པུར་གྱུར་པ་བྱང་ཆུབ་སེམས་དཔའི་ཚུལ་གྱིས་ནམ་མཁའ་དང༌། ཆོས་ཀྱི་དབྱིངས་ཇི་སྲིད་དུ་བཞུགས་ནས། ལ་ལར་ཡོན་ཏན་མ་ལུས་རྫོགས་པའི་སངས་རྒྱས་དང༌། ལ་ལར་རྒྱལ་བའི་སྲས་ཀྱི་ཐུ་བོ་དང༌། ལ་ལར་ཡོན་ཏན་ཡོངས་སུ་རྫོགས་པ་དང༌། ལམ་ལ་སློབ་པ་དང༌། ལ་ལར་ཕལ་པའི་གཟུགས་ཀྱིས་མཛད་པ་སྣ་ཚོགས་པའི་སྒོ་ནས་རྒྱལ་དང་རྒྱལ་སྲས་ཐམས་ཅད་ཀྱི་མཛད་པ་ཇི་སྙེད་པ་དང༌། སེམས་ཅན་གྱི་ཁམས་ཇི་སྙེད་པར་འཇུག་པ་རྣམ་ཐར་བསམ་གྱིས་མི་ཁྱབ་པ་ལ་གནས་པ་སྟེ། ཞེས་གསུངས་པ་ལྟར། མདོ་རྒྱུད་ཀྱི་ལུང་དང་སྦྱར་བས་འཆད་ན། བསྟོད་པ་གླུར་བླང་གི་ལེའུ་ལས། མཆོག་གི་དང་པོ་སྐུ་གསུམ་འཆང༌། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །ཞེས་གསུངས་པ་ལྟར། ཆོས་དབྱིངས་ཀུན་ཏུ་ཁྱབ་པའི་རྒྱལ་བ་སྲས་བཅས་ཀུན་གྱི་རྣམ་པ་ཐམས་ཅད་མཁྱེན་པའི་ཤེས་རབ་གཅིག་ཏུ་བསྡུས་པའམ་འདུས་པ་ནི་འཇམ་མགོན་གཞོན་ནུ་ཞེས་གྲགས་པ་སྟེ། ཡེ་ཤེས་སྒྱུ་འཕྲུལ་དྲྭ་བའི་རོལ་གར་ཇི་ལྟར་བསྟན་པའི་ཚུལ་ནི། སྔ་འགྱུར་གྱི་ཆོས་སྡེ་འཇམ་དཔལ་སྒྱུ་འཕྲུལ་དྲྭ་བའི་རྒྱུད་ཕྱི་མ་ལས། འཇམ་དཔལ་འདི་ནི་དཔལ་འགྱུར་རྫོགས་པའི་སྐུ། །ཐུན་མོང་མ་ཡིན་གཉིས་མེད་ཁྱབ་པའི་ཆོས། །དུས་གསུམ་མཉམ་རྫོགས་རྒྱལ་བ་ཀུན་གྱི་ཡབ། །ཆོས་དབྱིངས་ཡུམ་ཉིད་སེམས་དཔའ་སྲས་མཆོག་སྟེ། །ཞེས་གསུངས་པ་ལྟར་འཇམ་དཔལ་གསང་རྒྱུད་ལས། ང་ནི་དུས་གསུམ་སྔོན་དུ་བྱུང༌། །སངས་རྒྱས་ཀུན་གྱི་སྔོན་དུ་བྱུང༌། །ང་ནི་དུས་གསུམ་ཕྱིས་ཀྱང་བྱུང༌། །ང་ནི་དུས་གསུམ་ད་ལྟར་བྱུང༌། །ཞེས་སངས་རྒྱས་ཀུན་གྱི་ཐོག་མའི་ཚུལ་གྱིས་སངས་རྒྱས་ཐམས་ཅད་དང་པོ་བྱང་ཆུབ་ཏུ་ཐུགས་བསྐྱེད་པའི་བཤེས་གཉེན་དང༌། བར་དུ་བྱང་ཆུབ་ཀྱི་སྤྱོད་པ་སྤྱད་པའི་ཚེ་གྲོགས་ཀྱི་ཚུལ་དང༌། ཐ་མ་མངོན་པར་སངས་རྒྱས་པའི་ཚེ་སྲས་ཀྱི་ཐུ་བོའི་ཚུལ་དུ་མཛད་པས་ན་རྒྱལ་བ་ཐམས་ཅད་བསྐྱེད་པའི་ཡབ་ཏུ་གྱུར་བ་དང༌། དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས། ལྷོ་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སུམ་སྟོང་བར་འདས་པ་ན་འཇིག་རྟེན་གྱི་ཁམས་མཉམ་པ་ཞེས་བྱ་བར། བཅོམ་ལྡན་འདས་དེ་བཞིན་གཤེགས་པ་ཀླུའི་རིགས་མཆོག་ཅེས་བྱ་བ་བྱུང་སྟེ་སྐུ་ཚེའི་ཚད་ནི་ལོ་བཞི་ཁྲིར་གྱུར་ཏོ། །བྱང་ཆུབ་སེམས་དཔའི་ཐེག་པས་སེམས་ཅན་བྱེ་བ་ཕྲག་བདུན་ཅུ། ཉན་ཐོས་ཀྱི་ཐེག་པས་སེམས་ཅན་བྱེ་བ་ཕྲག་བརྒྱད་ཅུ། རང་སངས་རྒྱས་ཀྱི་ཐེག་པས་སེམས་ཅན་བྱེ་བ་ཕྲག་དགུ་ཅུ་རྩ་དྲུག་སྨིན་པར་བྱས་ནས། དེ་བཞིན་གཤེགས་པ་དེའི་ཉན་ཐོས་ཀྱི་དགེ་འདུན་དཔག་ཏུ་མེད་པར་གྱུར་ནས། མྱ་ངན་ལས་འདས་ནས་མཆོད་རྟེན་བྱེ་བ་ཕྲག་སུམ་ཅུ་རྩ་དྲུག་ཏུ་གྱུར་ཏེ་སེམས་ཅན་གྱི་དོན་མཛད་པར་གསུངས་བ་དང༌། སོར་མོའི་ཕྲེང་བ་ལ་ཕན་པའི་མདོ་ལས། འདི་ནས་བྱང་ཕྱོགས་སུ་འཇིག་རྟེན་གྱི་ཁམས་རྟག་པར་རབ་ཏུ་དགའ་བ་སྡུག་ཅིང་མོས་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མོས་པ་རབ་ཏུ་དགའ་བའི་སྙིང་པོ་ནོར་བུ་རིན་པོ་ཆེ་བརྩེགས་པའི་རྒྱལ་པོ་ཞེས་བྱ་བར་ད་ལྟ་འཚོ་ཞིང་གཞེས་ལ་ཆོས་སྟོན་པ་དེ་ཉིད་འཇམ་དཔལ་གཞོན་ནུར་གྱུར་པ་འདི་ཡིན་ནོ། །སངས་རྒྱས་དེའི་ཞིང་ན་ཉན་རང་མེད་ལ། རྒ་བ་དང་ན་བ་སོགས་སྡུག་བསྔལ་མེད་ཅིང༌། སེམས་ཅན་ཐམས་ཅད་བདེ་བ་ཐམས་ཅད་དང་ལྡན་ལ་ཚེ་དང་གཟི་བརྗིད་དཔག་ཏུ་མེད་དོ། །ཞེས་དང༌། སྙིང་རྗེ་པདྨ་དཀར་པོ་ལས། འཇམ་དཔལ་ཁྱོད་ནི་མ་འོངས་པའི་དུས་བསྐལ་པ་གྲངས་མེད་པ་གང་གཱའི་ཀླུང་གི་བྱེ་མ་སྙེད་གཉིས་འདས་ནས་གསུམ་པར་བབ་པའི་ཚེ། ལྷོ་ཕྱོགས་སུ་འཇིག་རྟེན་གྱི་ཁམས་རྡུལ་བྲལ་ཡང་དག་བསགས་པར་ཞེས་བྱ་བ་མི་མཇེད་ཀྱི་འཇིག་རྟེན་ཀྱང་དེའི་ཁོངས་སུ་འདུས་ཤིང་ཆུད་པ་དེར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་གཟིགས་ཞེས་བྱ་བར་འགྱུར་རོ། །ཞེས་གསུངས་སོ། །ཡང༌། སྟོང་ཉིད་ཅི་ལའང་མ་རེག་ལྷུན་གྱིས་གྲུབ། །དོན་ཀུན་འབྱོར་བས་བླང་དོར་མེད་པ་ཡི། །བདག་ཉིད་རང་བཞིན་བཞག་དང་འཇམ་དཔལ་ཉིད། །བསམ་གྱིས་མི་ཁྱབ་མི་གནས་མི་སེམས་གང༌། །འཇམ་དཔལ་ཉིད་དང་ཡོན་ཏན་རྫོགས་པར་མཉམ། །ཞེས་དང༌། སངས་རྒྱས་ཕལ་པོ་ཆེ་ལས། འཇམ་དཔལ་གཞོན་ནུར་གྱུར་པ་དེ་ནི་སངས་རྒྱས་བྱེ་བ་ཕྲག་ཁྲིག་བརྒྱ་སྟོང་གི་ཡུམ་ལྟ་བུའོ། །ཞེས་གསུངས་པ་ལྟར་ཆོས་དབྱིངས་ཤེས་རབ་ཀྱི་ཕ་རོལ་ཏུ་ཕྱིན་མ་འཕགས་བཞི་བསྐྱེད་པའི་ཡུམ་ཆེན་མོ་ཉིད་དང་འཇམ་དཔལ་གཉིས་ཡེ་ཤེས་ཀྱི་དབྱིངས་གཅིག་པས་རྡོ་རྗེ་དབྱངས་ཅན་མ་སོགས་དང་ཐ་མི་དད་པ་དང༌། དཀོན་མཆོག་བརྩེགས་པའི་ལེའུ་བཅོ་ལྔ་པ་འཇམ་དཔལ་ཞིང་གི་ཡོན་ཏན་བཀོད་པ་ལས། ཤར་ཕྱོགས་འཇིག་རྟེན་གྱི་ཁམས་འབྱུང་བ་བཟང་པོ་ཞེས་བྱ་བར་འཇམ་དཔལ་འཁོར་ལོའི་བསྒྱུར་བའི་རྒྱལ་པོ་ནམ་མཁར་གྱུར་ནས་བྱང་ཆུབ་ཏུ་ཐུགས་བསྐྱེད་པས་རྗེས་སུ་འབྲང་བའི་སྲོག་ཆགས་བྱེ་བ་ཉི་ཤུས་བྱང་ཆུབ་ཏུ་སེམས་བསྐྱེད་པར་གསུངས་པ་དང༌། ཐུན་མོང་ཡོངས་སུ་གྲགས་པར་ས་བཅུའི་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱི་སྲས་ཀྱི་ཐུ་བོའི་ཚུལ་གྱིས་འགྲོ་ཁམས་ཇི་སྲིད་བར་འཚང་མི་རྒྱ་བར་སེམས་ཅན་གྱི་དོན་མཛད་པར་གསུངས་པ་དང༌། དཀོན་མཆོག་བརྩེགས་པའི་ཆོ་འཕྲུལ་ཆེན་པོ་བསྟན་པའི་ཆོས་ཀྱི་རྣམ་གྲངས་ལས། སྔོན་འདས་པའི་དུས་བསྐལ་པ་ཆེས་གྲངས་མེད་པའི་ཕ་རོལ་ན་བསྐལ་པ་མངོན་པར་དགའ་བ་ཞེས་བྱ་བར་དེ་བཞིན་གཤེགས་པ་རི་རབ་ལྟ་བུ་ཞེས་བྱ་བའི་གསུང་རབ་ལ་འཇམ་དཔལ་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་དུ་གྱུར་ནས། འཁོར་ལོའི་བསྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བ་གླིང་བཞིའི་དབང་ཕྱུག་ཆོས་ཀྱི་རྒྱལ་པོའི་བུ་སྟོང་དང་བཅས་པ་ལ་བྱང་ཆུབ་སེམས་དཔའི་སྤྱོད་པ་བསྟན་པས། བུ་སྟོང་དུ་གཅིག་གིས་མ་ཚང་བ་དང༌། ཡབ་རྒྱལ་པོ་དང་བཅས་པ་རབ་ཏུ་བྱུང་བ། རྒྱལ་པོ་དགེ་བའི་བཀོད་པ་ནི་ལྷའི་བུ་དེད་དཔོན། བུ་སྟོང་ནི་བསྐལ་བཟང་སངས་རྒྱས་སྟོང༌། རྒྱལ་བུ་སྙིང་རྗེ་ཆེར་སེམས་ནི་སྟོན་པ་ཤཱཀྱའི་རྒྱལ་པོ་ཡིན་པར་གསུངས་པ་སོགས་དང༌། མ་སྐྱེས་དགྲའི་འགྱོད་པ་བསལ་བའི་མདོ་ལས། རྒྱལ་པོ་མ་སྐྱེས་དགྲས་ཕ་བསད་པའི་འགྱོད་པ་བསལ་ནས་མཐུན་པའི་ཆོས་ལ་བཟོད་པ་ཐོབ་ནས། བསྐལ་པ་གྲངས་མེད་པ་སྟོང་ཕྲག་བརྒྱད་བརྒྱ་ན་མཐོང་ན་དགའ་བར་འཇིག་རྟེན་གྱི་ཁམས་འདམ་གྱི་རྙོགས་པ་མེད་པ་ན་དེ་བཞིན་གཤེགས་པ་ཡུལ་ཤིན་ཏུ་རྣམ་པར་འགྱུར་བ་སངས་རྒྱས་ཀྱི་ལུང་བསྟན་པ་དང༌། འཕགས་པ་དཀོན་མཆོག་གི་ཟ་མ་ཏོག་ཅེས་བྱ་བའི་ཐེག་པ་ཆེན་པོའི་མདོ་ལས། སྟོན་པ་རྒྱལ་བུ་རྒྱལ་བྱེད་ཀྱི་ཚལ་ན་དབྱར་གནས་པ་མཛད་པའི་ཚེ། འཇམ་དཔལ་གསལ་རྒྱལ་གྱི་བཙུན་མོའི་ནང་ན་དབྱར་གནས་པའི་ཚུལ་མཛད་པ་གནས་བརྟན་འོད་སྲུང་ཆེན་པོས་བསྐྲད་པར་བརྩམས་པའི་ཚེ་གསལ་རྒྱལ་གྱི་བཙུན་མོ་འཁོར་ལྔ་བརྒྱ། སྐྱེས་པ་ལྔ་བརྒྱ། ཁྱེའུ། སྲུ་མོ། སྨད་འཚོང་མ་ལྔ་བརྒྱ་བཅས་བྱང་ཆུབ་ལ་བཀོད་པར་གསུངས་པ་དང༌། འཇམ་དཔལ་རྣམ་པར་རོལ་པའི་མདོ་ལས། སྨད་འཚོང་མའི་བུ་མོ་གསེར་མཆོག་འོད་གསལ་བསྐུལ་ནས་བླ་མེད་བྱང་ཆུབ་ཏུ་སེམས་བསྐྱེད་པས། དེའི་ཕྱིས་བཞིན་འབྲང་བའི་སྲོག་ཆགས་ཉིས་བརྒྱས་བྱང་ཆུབ་ཏུ་སེམས་བསྐྱེད། ལྷ་མི་དྲུག་ཅུས་ཆོས་ཀྱི་མིག་ཐོབ་ནས་བསྐལ་པ་འབུམ་ཕྲག་དགུ་བཅུ་རྩ་གཉིས་འདས་པའི་འོག་ཏུ་བུ་མོ་གསེར་མཆོག་འོད་དཔལ་བསྐལ་པ་རིན་ཆེན་གྱི་འབྱུང་བར་སངས་རྒྱས་རིན་ཆེན་འོད་ཅེས་འགྱུར་བར་ལུང་སྟོན་པ་སོགས་དང༌། ཡབ་རྒྱལ་པོ་ཟས་གཙང་འཇམ་དཔལ་གྱི་སྤྲུལ་པ་ཡིན་པ་གསང་བ་འདུས་པའི་རྒྱུད་ལས་གསུངས་པ་དང༌། ཉན་ཐོས་ཤེས་རབ་ཅན་གྱི་མཆོག་ཤཱ་རིའི་བུ་ཡང་འཇམ་དཔལ་དུ་གྲགས་པ་སོགས། དཔལ་དུས་ཀྱི་འཁོར་ལོ་ལས། འཛམ་བུའི་གླིང་ལ་ཡུལ་དྲུག་ཏུ་གྲགས་པའི་ནང་ཚན་བྱང་ཕྱོགས་ཤམྦྷ་ལར་ཞེས་པ་ཡུལ་གྱི་བཀོད་པ་ཁྱད་པར་འཕགས་པ་དེར། ས་བཅུའི་བྱང་ཆུབ་སེམས་དཔའ་རྣམས་རྒྱལ་པོའི་ཚུལ་འཛིན་པ་བརྒྱུད་མར་བྱོན་པས། དུས་རབས་བརྒྱད་པ་ལ་རྗེ་བཙུན་འཇམ་དཔལ་དབྱངས་ཉིད་རིགས་ལྡན་འཇམ་དཔལ་གྲགས་པའི་རྣམ་པར་བྱོན་ནས། ཡུལ་དེའི་བྲམ་ཟེ་རིགས་བྱེད་པའི་གཞུང་སྨྲ་བ་སོགས་རིག་པ་སྣ་ཚོགས་ཀྱི་བརྟུལ་ཞུགས་འཛིན་པ་ཐམས་ཅད་བླ་མེད་རྡོ་རྗེ་ཐེག་པའི་དབང་བསྐུར་བྱིན་ཏེ་ཐེག་པ་མཆོག་གི་རིགས་མཆོག་ཏུ་བྱས་པའི་རྒྱལ་པོའི་དེའི་རིང་ནས་རིགས་ལྡན་ཞེས་པའི་མཚན་ཆགས་ཤིང༌། རིགས་ལྡན་གྲགས་པ་དེའི་རྩ་རྒྱུད་སྟོང་ཕྲག་བཅུ་གཉིས་ཀྱི་དོན་བསྡུས་པ་བསྡུས་རྒྱུད་ལེའུ་ལྔ་པར་མཛད་པ་དང༌། རིགས་ལྡན་གྲགས་པ་ནས་བརྩིས་པའི་གདན་རབས་ཉེར་ལྔ་པ་ལ་རྗེ་བཙུན་འཇམ་དཔལ་དབྱངས་ཉིད་རིགས་ལྡན་དྲག་པོ་འཁོར་ལོ་ཅན་གྱི་རྣམ་པར་བཞེངས་ནས་ཀླ་ཀློའི་ཕྱོགས་འཇོམས་པར་འགྱུར་བར་གསུངས་པ་དང༌། རིགས་ལྡན་དྲག་པོ་དམག་གི་དཔུང་རྒྱ་ཆེན་པོ་དང་ལྷ་ཆེན་པོ་བཅུ་གཉིས་ཀྱི་དཔུང་རོགས་བཅས་ཏེ་འཛམ་བུའི་གླིང་གི་ལྷོ་ཕྱོགས་ཀྱི་རྒྱུད་ཐམས་ཅད་དུ་འཁྲུག་པ་དྲག་པོའི་ཚུལ་གྱིས་ཀླ་ཀློའི་ཕྱོགས་མ་ལུས་པ་བཅོམ་ནས་སངས་རྒྱས་ཀྱི་བསྟན་པ་སྤྱི་དང་རྡོ་རྗེའི་ཐེག་པ་གསལ་བར་མཛད། སྲས་ཚངས་པ་ཤམྦྷ་ལའི་རྒྱལ་ས་དང༌། དབང་པོ་ཛམ་གླིང་གཞན་གྱི་རྒྱལ་པོ་བཀོད་ནས་དམ་པའི་ཆོས་འཕེལ་བར་མཛད་པས་མི་རྣམས་ཀྱི་ཚེ་དང་བསོད་ནམས་གོང་དུ་འཕེལ་ཞིང་རིགས་ལྡན་ཉིད་ཤམྦྷ་ལའི་གྲོང་དུ་ཕྱིན་ནས་ཕྱག་རྒྱ་ཆེན་པོའི་དངོས་གྲུབ་བརྙེས་པའི་ཚུལ་གྱི་དེ་དུས་ཀྱི་འཁོར་རྣམས་དང་འབྲེལ་ཐོགས་དང་བཅས་པ་ཐམས་ཅད་བདེ་བའི་གནས་སུ་འགྲོ་བར་གསུངས་པ་དང༌། འཇམ་དཔལ་རྩ་བའི་རྟོག་པ་ལས། ཐུབ་པའི་ཟླ་བ་རབ་ནུབ་ཅིང༌། །ས་ཡི་དཀྱིལ་འཁོར་སྟོངས་པ་ན། །ཆོ་ག་འཇིག་རྟེན་འདིར་གནས་པ། །བསྟན་པའི་དོན་ནི་སྟོན་པར་འགྱུར། །འཇམ་དཔལ་དབྱངས་ནི་རྟག་ཏུ་དགེ །འབྱུང་པོ་ཀུན་ལ་གཞོན་ནུ་ནི། །དེ་ཚེ་སངས་རྒྱས་མཛད་པ་ནི། །འཇིག་རྟེན་བསྟན་ལ་བྱེད་པར་འགྱུར། །ཞེས་དང་རྒྱུད་ལས། སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་གསུངས་པ་ལྟར་རྒྱལ་བའི་བསྟན་པ་འཛིན་པའི་ཤིང་རྟ་ཆེན་པོ་རྒྱལ་བའི་ཆོས་ཚུལ་ཟབ་ཅིང་ཕྲ་བ་རྟོགས་དཀའ་བ་ཐམས་ཅད་ལྷ་འདི་ཡི་མཐུས་འགྲེལ་བ་ཡིན། ཞེས་དམ་པ་དུ་མ་ལ་ཞལ་གཟིགས་ཏེ་ཡང་ཡང་གདམས་པ་བསྩལ་བ་དང༌། གཞན་ཡང་དཔལ་མགོན་འཕགས་པ་ཀླུ་སྒྲུབ། དཔལ་ལྡན་ཟླ་བ་གྲགས་པ། རྒྱལ་སྲས་ཞི་བ་ལྷ། སློབ་དཔོན་འཇམ་དཔལ་བཤེས་གཉེན། པཎ་ཆེན་བི་མ་མི་ཏྲ་དང༌། ཁྱད་པར་དུའང་རྒྱུད་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང༌། །ཆེ་བ་སངས་རྒྱས་རིགས་སྔགས་འཆང༌། །ཞེས་རྡོ་རྗེ་ཚིག་གིས་ལུང་བསྟན་པ་ལྟར། ཨོ་རྒྱན་སངས་རྒྱས་གཉིས་པའི་མཚན་གྱི་སྒྱུ་འཕྲུལ་བརྒྱད་ལས་མཁས་པ་བློ་ལྡན་མཆོག་སྲེད་འཇམ་དཔལ་དབྱངས་སུ་ཞལ་གྱིས་བཞེས་པ་དང༌། མཁན་ཆེན་ཞི་བ་འཚོ། གྲུབ་ཆེན་དམ་པ་སངས་རྒྱས། པཎྜི་ཏ་མ་ཏི་སོགས། བོད་དུ་རྒྱལ་བསྟན་འདྲེན་པའི་ཤིང་རྟ་ཆོས་རྒྱལ་ཁྲི་སྲོང༌། ཐུ་མི་སཾ་བྷོ་ཊ། གནུབས་སངས་རྒྱས་ཡེ་ཤེས་སོགས། རོང་ཟོམ་པཎྜི་ཏ། ཀུན་མཁྱེན་ཀློང་ཆེན་རབ་འབྱམས་སོགས་སྔ་འགྱུར་རྙིང་མ། འཇམ་མགོན་ས་སྐྱ་པཎྜི་ཏ་སོགས་ས་སྐྱ་གོང་མ་རྣམས་དང༌། རྔོག་ལོ་བློ་ལྡན་ཤེས་རབ། རྗེ་རིན་པོ་ཆེ་བློ་བཟང་གྲགས་པ། ཀརྨ་པ་ཆོས་གྲགས་རྒྱ་མཚོ། ཀུན་མཁྱེན་མི་བསྐྱོད་རྡོ་རྗེ། འཇམ་མགོན་བསྟན་པའི་ཉིན་བྱེད་སོགས་མཁས་གྲུབ་ཕལ་མོ་ཆེ་འཇམ་དཔལ་དབྱངས་ཀྱིས་རྗེས་སུ་བཟུང་སྟེ་གཟུངས་སྤོབས་བློ་གྲོས་ཀྱི་མཐུ་གྲུབ་པས་སློབ་བརྒྱུད་ལའང་འཆད་རྩོད་རྩོམ་གསུམ་ཆེས་དར་བ་དང༌། འཇམ་དཔལ་དབྱངས་ཀྱི་སྤྲུལ་པར་ཞལ་གྱིས་བཞེས་པ་ཆེས་མང་བ་སོ་སོའི་རྣམ་ཐར་དུ་གསལ་བ་བཞིན། སྟོན་པ་ཤཱཀྱ་སེང་གེའི་སྲས་ཀྱི་ཐུ་བོ་འཇམ་དཔལ་དབྱངས་ཉིད་རྣམ་རོལ་སྣ་ཚོགས་པས་བསྟན་པ་སྤེལ་ཞིང་བསྟན་འཛིན་ལ་བྱིན་གྱིས་རློབ་པར་གསུངས་པ་བཞིན་རྗེ་བླ་མ་འདི་ཉིད་ཀྱང་འཇམ་མགོན་ཟུར་ཕུད་ལྔ་པ་ཉིད། ཐུབ་དབང་བརྟུལ་ཞུགས་མཆོག་ལ་གནས་པའི་ངུར་སྨྲིག་རྣམ་གསུམ་ཐར་པའི་རྒྱལ་མཚན་འཛིན་པའི་ཐེག་པ་ཆེན་པོའི་དགེ་བའི་བཤེས་གཉེན་གྱི་ཚུལ་དུ་སྤྲུལ་པའི་རྣམ་པར་རོལ་པ་ཚད་མ་གསུམ་གྱིས་གྲུབ་སྟེ་རྗེའི་འདིའི་ཐུན་མོང་གི་རྣམ་ཐར་འོག་ནས་ཞིབ་ཏུ་འཆད་པར་འགྱུར་བས་ཤེས་ནུས་ཤིང༌། དེར་མ་ཟད་ཚད་མའི་སྐྱེས་བུ་ཐམས་ཅད་མཁྱེན་གཟིགས་མཉྫུ་གྷོ་ཥས། ཀུན་མཁྱེན་འཇིགས་མེད་གླིང་པའི་ཐུགས་སྲས་གཙང་ལ་སྟོད་ཀྱི་ཆོས་རྗེ་བྲག་ཕུག་པ་ཞེས་ཚད་མ་ལ་ཤིན་ཏུ་མཁས་ཤིང༌། ཀུན་མཁྱེན་རིན་པོ་ཆེར་ཡོན་ཏན་རིན་པོ་ཆེའི་མཛོད་མཛད་པར་བསྐུལ་ཞིང༌། འགྲེལ་ཆེན་ཤིང་རྟ་རྣམ་གཉིས་ཀྱི་ཡི་གེ་པ་མཛད་མཁན་ཐུགས་ཟིན་སློབ་མའི་མཆོག་དེའི་སྐྱེ་བ་མི་ཕམ་ཁྱོད་རང་ཡིན། ད་ལྟ་ཚད་མ་མཁས་པ་དེའི་བག་ཆགས་སད་པ་རེད་ཅེས་བཀའ་བསྩལ་བ་དང༌། སྤྱིར་རྗེ་ཉིད་ཀྱི་བཀའ་ལས། སྤྱིར་བྱིས་པ་བསམ་མནོ་མ་ཟིན་པའི་བྱ་བྱེད་ཐམས་ཅད་སྔོན་གྱི་བག་ཆགས་ཡིན་པས་ཕྲན་བྱིས་པའི་སྐབས་འབྲོག་ཁྱིམ་ཕན་ཚུན་དུ་འགྲོ་སྐབས་བྱིས་པ་ཆུང་ངུ་ཀོ་སྒྲོམ་དུ་བཅུག་སྟེ་གཡག་ལ་བཀལ་བའི་ཚེ་ཀོ་སྒྲོམ་རྔ་ཡིན་པ་དེའི་དབྱུག་པས་བརྡུང་བ་བྱེད་དར་བས་སྔགས་པ་རྔ་བརྡུང་བ་ཞིག་གི་བག་ཆགས་ཡོད་ཅེས་གསུངས། རྗེ་བཙུན་བླ་མ་ཉིད་དཀར་མོ་སྟག་ཚང་དུ་བཞུགས་སྐབས་གཟིམས་ཆུང་གསར་པ་ཞིག་བཞེངས་པའི་སྐར་ཁུང་གི་རྒྱ་ཁྲ་ཤིང་བཟོ་རྗེ་ཉིད་ཀྱིས་ཕྱག་བསྟར་གནང་ནས་འདི་ཙམ་པ་བཟོ་ལོས་ཤེས། ང་རྒྱ་གར་གྱི་ཤིང་བཟོ་མཁས་པ་ཞིག་གི་ལུས་བླང་བ་དྲན་གྱི་འདུག་ཅེས་ཞལ་རྩེད་དུ་གསུངས་པས་མཚོན་སྔོན་གྱི་སྐྱེས་རབས་ངོ་མཚར་ཅན་དུ་མ་ཡོད་པར་ངེས་ཀྱང་རྟག་ཏུ་ཡོན་ཏན་སྦས་ཚུལ་དུ་བཞུགས་པས་ཐུགས་སྒམ་ཞིང༌། ཀུན་གཟིགས་མཁྱེན་བརྩེའི་དབང་པོ་ལའང་བདག་དམ་པའི་སྐྱེས་བུ་མཆོག་རྣམས་ཀྱི་སྤྲུལ་པའོ་ཞེས་གསུང་གི་བསྔགས་པ་དྲིལ་བསྒྲག་ཏུ་མི་གསུང་བར་ཞུ་ཞེས་གསུངས་བ་སོགས་ཀྱིས་དམིགས་བསལ་མཐོང་ཐོས་ཅན་འགོད་པར་མ་ཤེས་ཀྱང་བོད་དུ་བསྟན་འགྲོར་ཕན་བདེའི་དོན་མཛད་པ་ཐམས་ཅད་གུ་རུ་རིན་པོ་ཆེའི་སྤྲུལ་པ་ཡིན་པར་གསུངས་པ་དང༌། ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་རྒྱལ་བསྟན་རིན་པོ་ཆེའི་སྲོལ་ཐོག་མར་འཛུགས་པའི་མཁན་ཆེན་བྱང་ཆུབ་སེམས་དཔའ་དང༌། མཁན་བརྒྱུད་དང༌། མ་འོངས་བསྟན་པ་གནས་པ་དེ་སྲིད་དུ་མཁན་བརྒྱུད་ལ་སྤྲུལ་པ་བྱོན་པ་དེ་ཀུན་ཇོ་བོ་ཉིད་དང་ངོ་བོ་གཅིག་པར་གསུང་པ་བཞིན་འཇམ་དཔལ་གཞོན་ནུའི་ཡེ་ཤེས་ཀྱི་རོལ་པ་ནི་ཚད་མེད་བསམ་གྱིས་མི་ཁྱབ་སྟེ་རྒྱུད་ལས། དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རིས་མེད་པ། །ཡེ་ཤེས་མིག་གཅིག་དྲི་མ་མེད། །ཅེས་གསུངས་པ་ལྟར་འཕགས་བོད་ཀྱི་མཁས་གྲུབ་འཇམ་དཔལ་གྲུབ་པའི་སློབ་དཔོན་ཐམས་ཅད་རྗེ་ཉིད་དང་ཐུགས་རྒྱུད་གཅིག་པར་ངེས་ཤིང་དོན་དུ་སྐུ་ཚེ་འདིའི་མཁྱེན་རྟོགས་ཡོན་ཏན་ནོར་བུ་རིན་པོ་ཆེའི་གཟི་འོད་ཀྱིས་བསྟན་འཛིན་རྒྱུ་སྐར་གྱི་ཕྲེང་བ་རྨད་དུ་བྱུང་བ་དུ་མའི་དབུས་ན་རྗེ་འཇམ་མགོན་བླ་མ་ཉིད་ཉ་གང་ཟླ་བ་གཞོན་ནུའི་དཀྱིལ་འཁོར་ལྟར་མཛེས་པས་གངས་རིའི་ཁྲོད་ཀྱི་གཟུར་གནས་བློ་ལྡན་ཡོངས་ཀྱིས་བསྔགས་པའི་ཀུ་མུད་མཛེས་པར་འཛུམ་པས་རྗེ་བཙུན་འཇམ་དཔལ་དབྱངས་དང་དབྱེར་མེད་པའོ་ཞེས་གྲགས་པའི་དྲི་བསུང་དངར་པོ་ད་ལྟའང་མ་ཉམས་པ་སྔ་འགྱུར་བསྟན་པའི་ཆུ་གཏེར་འཕེལ་བའི་གཉེན་དུ་གྱུར་པའི་ཚུལ་ལ་དཔྱད་པས། ཡོན་ཏན་གང་ཡང་མ་མཆིས་པ་འཕགས་པའི་སར་བཞུགས་སྐྱེས་ཆེན་དག་གི་སྤྲུལ་པའོ། །ཞེས་མིང་ཙམ་སྙན་པའི་སྐྱེས་རབས་མང་པོ་བགྲང་བ་རྨོངས་པ་བདག་ལྟ་བུ་དེང་སང་བསྟན་འཛིན་དུ་གྲགས་པ་ལས་ཁྱད་པར་འཕགས་ཚུལ་དཔྱད་པས་ཤེས་པའི་ཕྱིར། འཇམ་མགོན་ཀོང་སྤྲུལ་རིན་པོ་ཆེས་ལུང་གིས་ཟིན་པའི་སྐྱེས་བུ་ལ་ལུང་དོན་མཐུན་པའི་མཛད་པ་དགོས་ཞེས་གསུངས་པ་བཞིན་དུའོ། །དེས་ན་རྒྱུད་ལས། སངས་རྒྱས་ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་ཐུགས་ལ་གནས། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །ཞེས་གསུངས་པ་ལྟར། ཆོས་སྐུ་རང་གི་ངོ་བོ་ཡེ་ནས་སྐྱེ་འགག་གནས་གསུམ་དང་བྲལ་བའི་ཆོས་ཉིད་སྟོང་པ་ཉིད་ཀྱི་རང་བཞིན་ནམ་མཁའ་ལྟ་བུ་གང་སྲིད་ཞི་ཀུན་ལ་ཁྱབ་ཅིང་དགོངས་པ་དེ་ལས་མ་གཡོས་ཀྱང༌། གདུལ་བྱའི་སྔོན་ལས་དང་སྨོན་ལམ་སངས་རྒྱས་ཀྱི་ཐུགས་རྗེའི་དབང་གིས་གནས་དང་རིས་སུ་ཕྱེ་བའི་ངེས་པ་མེད་པ་གང་འདུལ་དུ་སྣང་ལ། མཁའ་ཁྱབ་ནམ་མཁའི་རྡོ་རྗེའི་སྐུ་ཞེས་རྡུལ་དང་དངོས་པོའི་ཆོས་ལས་འདས་པས་དབང་ཡུལ་གཟུང་འཛིན་དང་འབྲེལ་བས་རྟོགས་བྱ་མ་ཡིན་པ་གཟུགས་ཀྱི་རྣམ་པ་ཐམས་ཅད་དང་ལྡན་པའི་སྐུ་གཅིག་གིས་ཞིང་ཁམས་རབ་འབྱམས་ཁྱབ་པ། ཞིང་རབ་འབྱམས་སྐུ་ཡི་བ་སྤུ་གཅིག་ཏུ་རྫོགས་པ། དེར་ཡང་ཞིང་དང་སྐུ་སོགས་མཛད་པ་ཐམས་ཅད་མ་འདྲེས་པར་སྟོན་པའི་སྐུ་རྡོ་རྗེ་ཡིན་པས་སངས་རྒྱས་ཀུན་གྱི་སྐུ་མཆོག་འཇམ་དཔལ་རྡོ་རྗེ་ཞེས་གསུངས་ཤིང༌། དེ་བཞིན་དུ་རྣམ་པ་ཐམས་ཅད་པའི་སྟོང་ཉིད་ཀྱི་སྒྲ་དབྱངས་འགྲོ་བ་སོ་སོའི་ཁམས་དབང་བསམ་པའི་དངོས་པོ་དང་མཐུན་པར་ཡིད་ལ་འཇུག་ཅིང་རང་རང་གི་སྐད་ཀྱིས་ཆོས་ཀྱི་སྒོ་མཐའ་ཡས་པ་འབྱེད་པའི་བདེ་བར་གཤེགས་པ་རྣམས་ཀྱི་མགྲིན་པ་ཆོས་ཀྱི་དུང༌། གསུང་མི་ཟད་རྒྱན་གྱི་འཁོར་ལོའི་ངོ་བོ་ཡིན་པས། གསུང་གི་དབང་ཕྱུག་ཞེས་བྱ་ལ། རྒྱལ་བ་ཐམས་ཅད་ཀྱི་ཐུགས་མཁྱེན་པ་གཉིས་ལྡན་གྱི་ཡེ་ཤེས་འགྱུར་མེད་བདེ་བ་ཆེན་པོ་གཙང་བདག་རྟག་པ་བདེ་བ་དམ་པའི་ཕ་རོལ་དུ་ཕྱིན་པའི་བདག་ཉིད་ཆེན་པོ་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་རྡོ་རྗེ་འཇམ་དཔལ་ཡེ་ཤེས་སེམས་དཔའ་ཞེས་མཚན་དུ་གྲགས་ཤིང༌། སྐུ་གསུང་ཐུགས་དུ་མ་རོ་གཅིག་ལས་དབྱེར་མེད་པའི་བདེ་ཆེན་ལྷན་སྐྱེས་ནི་ཡེ་ཤེས་རྡོ་རྗེ་ཞེས་གྲགས་པས་ན་སྐུ་བཞིའི་ཡེ་ཤེས་ལྔ་ཡི་དཔལ་དང་ལྡན་པ་ཉིད་སྙིགས་མའི་འགྲོ་ལ་ཆོས་ཀྱི་སྣང་བ་འབྱེད་པའི་བླ་མ་དགེ་བའི་བཤེས་གཉེན་གྱི་རྣམ་པར་བྱོན་པ་སྟེ། མདོ་ལས། ཤེས་རབ་ཆེན་པོ་འཇམ་པའི་དབྱངས། །བྱིས་པ་གཞོན་ནུའི་གཟུགས་དང་ལྡན། །འཇིག་རྟེན་འདིར་ནི་ཀུན་ཏུ་རྒྱུ། །སེམས་ཅན་རྗེས་སུ་བཟུང་བར་བཟོད། །ཅེས་གསུངས་པ་ལྟ་བུའི་བདག་ཉིད་ཆེན་པོ་དེ་ལ་དཔལ་ལྡན་བླ་མའི་ངེས་ཚིག་དུས་འཁོར་ལས། སངས་རྒྱས་ཞལ་ནི་གང་གི་ཐུགས་དང་ཞལ་ལ་གནས་པར་གྱུར་པ་དེ་ནི་དཔལ་ལྡན་བླ་མའོ། །ཞེས་སངས་རྒྱས་ཀྱི་ཞལ་ལམ་སྒོར་གྱུར་པའི་དབང་བཞི་པ་ཟུང་འཇུག་གི་ལམ་འདི་ཉིད་གང་གི་ཞལ་ནས་སློབ་མའི་བློ་ལ་འཆར་ནུས་ཤིང༌། སློབ་མའི་རྒྱུད་ལ་བྱིན་རླབས་ཀྱི་རྟོགས་པ་སྤོ་ནུས་པ་དེ་འཕགས་པའི་ས་ཐོབ་པ་ཡིན་པས་དེའི་དཔལ་ལྡན་བླ་མ་ཞེས་གསུངས་པས་ཞབས་ལ་གསོལ་བ་འདེབས་སོ། །གཉིས་པ་སྤྲུལ་པའི་སྐྱེས་བུའི་རྣམ་ཐར་བཤད་པ་ལ། བསྟན་བཤད་གཉིས་ལས། དང་པོ་ཐོས་བསམ་སྒོམ་པ་ཇི་ལྟར་མཛད་ཚུལ་མདོར་བསྟན་ནི། རྗེ་བླ་མ་རིན་པོ་ཆེ་འདི་ཉིད་ཀྱི་མཚན་དཔེའི་མེ་ཏོག །གང་དུ་སྐྱེ་བའི་མྱུ་གུ་བཟུང་བའི་ཡུལ་ནི། མདོ་ཁམས་ཆུ་བཞི་སྒང་དྲུག་ཞེས་གྲགས་པའི་ཤར་ཟླ་སྒང་ཞེས་ཆོས་རྒྱལ་སྡེ་དགེའི་རྒྱལ་ཁབ་ཆེན་པོའི་གནོད་གནས་དབང་པོའི་ཕྱོགས། ས་གཞི་ཁ་རྒྱ་ཆེ། ལུང་པ་ཕུ་ཐག་རིང༌། ཉི་ཟླའི་བགྲོད་ཐག་རིང༌། བྱང་ཐང་མེ་ཏོག་གི་སྐྱེད་མོས་ཚལ། རྐྱང་འབྲོང་རི་དྭགས་ཀྱི་ཁྱུ་བག་ཕེབས་རྒྱུ་བ། འབྲོག་སྡེ་གནག་ཕྱུགས་ལུག་ཁྱུ་ཟད་མི་ཤེས་པའི་ལྷ་སྡེ། བཀྲ་ཤིས་འོ་མའི་རྒྱ་མཚོ་འཁྱིལ་ཞིང༌། རྩི་བཅུད་སྙིང་པོ་ཞུན་གྱི་གཏེར་རྡོལ་བ། རྒྱལ་དབང་པདྨའི་བཀའ་སྡོད་རྫ་རྒྱལ་རྡོ་རྗེ་འཕེན་ཕྱུག་ཅེས་ཀུན་ཏུ་གྲགས་པའི་ཟོ་དོར་གྱིས་སྐྱོང་བ། རྫ་ཀླུང་ཉལ་འགྲོའི་དགའ་མ་ལ་ལྦུ་ཕྲེང་མུ་ཏིག་གི་དོ་ཤལ་གྱིས་འཕྱང་འཕྲུལ་གཡོ་བའི་སྣེ་དལ་གྱི་འགྲོ་བའི་ཆར། ཡུལ་གྲུ་ཆེ་ཆུང་མང་དུ་མཆིས་པའི་ནང་ཚན་འོད་གསལ་ལྷ་ཡི་གདུང་བརྒྱུད་ཅིག་གནམ་གྱི་དམུ་ཐག་ལ་འཇུས་ཏེ་ས་གཞིར་བབས་པ་ལས་མི་རིགས་མཆེད་པས་འཇུ་ཞེས་ཡོངས་སུ་གྲགས་པའི་ས་འཛིན། ཀོ་ས་ལའི་འཐུང་སྤྱོད་ཙཱ་རི་ཏྲ་དང་མཉམ་པའི་རྡོ་རྗེའི་གནས་སུ་བསྔགས་ཤིང༌། མཁས་དང་གྲུབ་པའི་བཤེས་གཉེན། ནུས་མཐུ་ཅན་གྱི་སྔགས་བརྒྱུད། སྟོབས་འབྱོར་ལྡན་པའི་མི་དཔོན་དུ་མ་བྱོན་པས། འཇུས་ཐུག་ནག་ཅན་བཅུ་གསུམ་ཞེས་སྦྲ་ཁྱིམ་གྱི་སྟེང་དུ་རྔ་ཐུག་བཙུགས་པའི་བསྐྱེད་རྫོགས་ཀྱི་གདེང་ཐོབ་པའི་ནུས་མཐུ་ཁྱད་པར་ཅན་མངའ་བའི་སྔགས་ཁྱིམ་བཅུ་གསུམ་ཡོད་པའི་བྱེ་བྲག །རྗེ་བླ་མའི་མེས་པོ་འཇུ་སྔགས་ཆེན་ཀ་ལི་ཞེས་ཐུགས་ཀར་མེ་ལོང་གི་འོད་ཁྱིམ་གྱི་ཟེར་མི་ལ་ཕོག་པས་རྒྱུག་འགྱེལ་འགྲོ་བ་དང༌། གནོད་པའི་ཕྱོགས་སུ་སྔགས་ཐུན་གཏོར་ཞིང་མེ་མདའ་འཕངས་བས་མི་མ་ཡིན་སྨྲེ་སྔགས་དང་བཅས་ཏེ་བྲོས་ནས་དེ་ཕྱིན་གནོད་སྦྱིན་གྱི་རྒྱུ་ལམ་བཅད་པ་སོགས་ནུས་མཐུ་ཁྱད་པར་ཅན་མངའ་བས་ན་དེ་ཉིད་ཆིབས་ཐོག་ནས་ཕེབས་ལམ་ཞིག་ཏུ་བྱིས་པ་མང་པོ་རྩེད་མོས་གཡེངས་ཏེ་ཡོད་པའི་ནང་ནས་བྱིས་པ་ཞིག །སྔགས་ཆེན་མཐོང་མ་ཐག་རྗེས་དེད་དེ་བདག་ཀྱང་ཁྱོད་དང་འདྲ་བ་ཞིག་འོང་བར་ཤོག་ཅེས་རྒྱུག་པ་ལ་ཅེར་གྱིས་གཟིགས་ཏེ་ང་འདྲ་བ་ནི་དཀའ་མོ་རེད་དེ། ཁྱེད་རང་གཞན་དང་མ་འདྲ་བ་ཞིག་འབྱུང་ས་འདུག་གསུངས་པ་ཕྱིས་སུ་མང་དགེ་རྡོ་རྗེ་འཆང་ཞེས་རི་བོ་དགེ་ལུགས་པའི་བསྟན་འཛིན་མཁས་བཙུན་བཟང་གྲུབ་ཀྱི་སྐྱེས་བུ། སྟོན་པ་ཐུབ་པའི་དབང་པོས་རྗེས་སུ་བཟུང་བ་དེས་མཛད་པའི་ཐུབ་ཆོག་ད་ལྟ་རིན་ཆེན་གཏེར་མཛོད་དུ་བཞུགས་པས་མཚོན་མངོན་ཤེས་ཐོགས་མེད་དུ་མངའ་བའི་རིགས་སུ་འཁྲུངས་པ་སྟེ། རུས་ནི་བོད་མིའུ་གདུང་དྲུག་ཏུ་གྲགས་པའི་ནང་ཚན་ཨ་ལྕགས་འགྲུའི་ཁོངས་སུ་གཏོགས་པ་འདི་དག་སྔོན་སོག་པོ་ཝང་རྒྱལ་པོའི་བློན་ཆེན་ཡིན་ཀྱང༌། ཕྱིས་སྡེ་དགེ་ཆོས་རྒྱལ་བསྟན་པ་ཚེ་རིང་གི་སྐུ་དུས་ལྷ་འབངས་སུ་གྱུར་པ་དང༌། རྗེ་བླ་མ་དང་དུས་མཉམ་དུའང་འཇུ་དབོན་འཇིགས་མེད་རྡོ་རྗེ་ཞེས་སྣང་བཞི་མཐར་ཕྱིན་བཤེས་གཉེན་ཆེན་པོ་དང༌། དགེ་བའི་བཤེས་གཉེན་གྲགས་པ་རྒྱལ་མཚན་ཞེས་ཀུན་སྤང་བྱང་ཆུབ་སེམས་དཔའ་ཁྱད་འཕགས་སོགས་དུ་མ་བྱོན་པ་སྟེ། སྤྱིར་འཇམ་མགོན་བླ་མ་མཆོག་གིས་འཁྲུངས་ཡུལ་གྱི་རྟེན་བརྟེན་པ་ལ་བསྔགས་པའི་རྡོ་རྗེའི་གསུང་ཚིགས་བཅད་དུ་མཛད་པའི་ངོ་མཚར་ཅན་ཡོད་པ་ལྟར་དང༌། དེ་དག་ལས་འཇུ་བླ་མདོ་སྡེ་ཞེས་པ་འཚོ་མཛད་ཞིག་ཡོད་པ་ལྷ་སར་གནས་བསྐོར་དུ་ཕེབས་སྐབས་མི་ཕལ་ཆེར་འབྲུམ་ནག་གིས་ཚབ་ཆེར་བྱུང་བ་པོ་ཏཱ་ལའི་རྩེ་ནས་བུད་མེད་ཅིག་གིས་ཁམས་ཀྱི་བླ་མ་མདོ་སྡེ་ཞེས་པ་དེའི་སྨན་སྟེར་ན་ཡམས་ནད་འདི་མྱུར་དུ་རྒྱུན་འཆད་པར་འགྱུར་རོ་ཞེས་ལུང་བསྟན་པ་ལྟར་རྩད་ཆོད་དེ་སྨན་རྩིས་ཁང་དུ་གདན་དྲངས་ནས་སྨན་སྦྱོར་མཛད་དེ་ཐམས་ཅད་ལ་སྨན་བཏང་བས་འབྲུམ་ནད་རྒྱུན་ཆད་པ་དང༌། ཕྱིས་ཁམས་ནས་ཀྱང་སྨན་ཕྱག་ལེན་བསྟར་བས་ཚེ་ཟད་རེ་གཉིས་མ་གཏོགས་འཆི་མ་མྱོང་ཞེས་ཀུན་གྱིས་གླེང་བ་དེའི་ཚ་བོ་ཚེ་རིགས་འཛིན་པ་འཇུ་མགོན་པོ་དར་རྒྱས་ཞེས་པ་སྐྱེད་ཡབ་དང༌། ཆོ་འབྲང་སྨུག་པོ་གདོང་གི་མི་བརྒྱུད་ཆོས་འབྱོར་དང་དཔའ་རྩལ་སོགས་འགྲན་ཟླ་བྲལ་བ་སྐྱེ་བོ་ཕལ་གྱི་སྨོན་གནས་སུ་གྱུར་པ་དགེ་རྩེ་ཞེས་རུས་ཚན་ཆེ་ཞིང་མི་ཆེ་ཁ་གྲགས་འཛོམ་པ་ས་སྐྱོང་སྡེ་དགེའི་ཕྱི་བློན་གྱི་ཁོངས་སུ་གཏོགས་པའི་དཔོན་ཕྲན་དུ་མ་ཡོད་པའི་དཔོན་རུ་དཔོན་ཆོས་དར་གྱི་བུ་མོ་སྲིང་ཆུང་ཞེས་པ་སྐྱེད་ཡུམ་སྟེ། དེ་ལྟར་རིགས་རུས་ཆོ་འབྲང་ཕུན་སུམ་ཚོགས་པར་རབ་བྱུང་བཅུ་བཞི་པའི་ནང་ཚན་ཟིལ་གནོན་ཞེས་པ་མེ་ཕོ་རྟ་ཡི་ལོ་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་ཡ་ཆུའི་དིང་ཆུང་ཞེས་པར་ངོ་མཚར་བའི་ལྟས་དང་བཅས་ཏེ་སྤྲུལ་པའི་པདྨོ་བཞད། རྗེ་ཉིད་ཀྱི་ཁུ་བོ་དབོན་བླ་མ་སྒྲུབ་མཆོག་པདྨ་དར་རྒྱས་ཀྱིས་མི་ཕམ་རྒྱ་མཚོ་ཞེས་པའི་མཚན་གྱི་ཅོད་པན་དཔྱང༌། རྗེ་ཉིད་འཁྲུངས་པ་དང་རྟེའུ་རྐྱང་བུ་སྟོབས་ལྡན་ཞིག་ཀྱང་བཙས་པ་ཉིད་ཀྱི་ཆིབས་རྟ་ཡིན་ཞེས་ཞལ་བདག་མཛད་པ་དང༌། དེ་མཚུངས་འབྲི་ཡི་བེའུ་རྒལ་པའི་སྤུ་དཀར་པོ་སེང་གེ་ཁྱི་ཚུགས་སུ་གནས་པའི་གཟུགས་གསལ་ཅན་ཞིག་ཀྱང་ཡོད་པར་གསུངས། སྐུ་ན་ཕྲ་མོའི་དུས་ནས་ཡི་དམ་འཇམ་དཔལ་ཞི་དྲག་དང༌། ཆོས་སྐྱོང་གེ་སར་གཉིས་ལས་བསམ་རྒྱུ་མེད་པ་ཞིག་ཡོད་པ་དང༌། བྱིས་པའི་ཞལ་ལས་བེའུ་སྐྱེས་པ་ཚུན་ཆད་ཐུགས་ལ་གསལ་བའི་དྲན་པ་མངའ། མདའ་གཞུ་དང་གོ་མཚོན་ལ་ཐུགས་ཤིན་ཏུ་དགྱེས་ཤིང་སྐུའི་ཉེར་སྤྱད་མདའ་གཞུ་འབྲལ་སྤང་དུ་བསྣམས་པ་དང༌། ཐུགས་དཔའ་བརྟུལ་སྙིང་སྟོབས་ཤིན་ཏུ་ཆེ་བར་གྲགས། དགུང་གྲངས་བཅུ་གཉིས་པའི་ཐོག་ཡུལ་དེའི་སྤྱི་ལུགས་ལྟར། འོག་མིན་ཨོ་རྒྱན་སྨིན་གྲོལ་གླིང་པའི་ཆོས་བརྒྱུད། ཞེ་ཆེན་བསྟན་གཉིས་དར་རྒྱས་གླིང་གི་དགོན་ལག་ཏུ་གྱུར་པ་འཇུ་མོ་ཧོར་གསང་སྔགས་ཆོས་གླིང་དུ་ཆོས་ཞུགས་གནང་སྟེ་གྲྭ་བཙུན་དཀྱུས་མའི་ཚུལ་དུ་བཞུགས་ཤིང༌། དགུང་གྲངས་དྲུག་བདུན་སྐོར་ནས་སྡོམ་གསུམ་རྣམ་ངེས་བཅས་ཐུགས་འཛིན་མཛད། དང་པོ་ཉིད་ཀྱི་ཨ་ཁུ་པདྨ་དར་རྒྱས་ནས་སྐུ་པང་དུ་བཞག་སྟེ་རྩིས་སྐར་ནག་གི་སྔོན་འགྲོ་གསན་ནས་ཐུགས་སུ་ཆུད། བཤེས་གཉེན་དམ་པ་གྲགས་པ་རྒྱལ་མཚན་ཞེས་རྗེ་བླ་མ་ཉིད་ཀྱི་གསུང་ལས། བདག་ཅག་ཐོག་མའི་དགེ་བའི་བཤེས་གཉེན་ཆེན་པོ་བསླབ་པ་གསུམ་གྱི་རྣམ་ཐར་ཕུལ་དུ་བྱུང་ཞིང༌། བདེ་བ་ཅན་དུ་རྒྱལ་བའི་སྲས་ཀྱི་སྤྱོད་པ་ལ་སློབ་པའི་རྒྱུ་ཚོགས་ལ་མངའ་དབང་ཡང་དག་པར་འབྱོར་པ། བཀའ་དྲིན་མཚུངས་པ་མ་མཆིས་པའི་དགེ་སློང་གྲགས་པ་རྒྱལ་མཚན་དཔལ་བཟང་པོ་ཞེས་བསྔགས་བརྗོད་གནང་བ། ཐམས་ཅད་མཁྱེན་གཟིགས་མཁྱེན་བརྩེའི་དབང་པོའི་ཞལ་སློབ་སྒྲུབ་གནས་ཀྱི་རྒྱལ་པོ་པདྨ་ཤེས་ཕུག་གི་མཚོ་རྒྱལ་གཟིམ་ཕུག་ཏུ་བླ་མའི་ཐུགས་སྒྲུབ་བར་ཆད་ཀུན་སེལ་གྱི་བླ་མ་ལོངས་སྐུའི་ཆ་ལག་འོད་དཔག་མེད་ཞིང་སྦྱོང་གི་ཆོ་ག་ལ་བརྟེན་ནས་བྱང་ཆུབ་སེམས་དཔའི་སྨོན་ལམ་གྱི་རྒྱལ་པོ་བཟང་སྤྱོད་འབུམ་ཕྲག་གསུངས་ནས་སྐུ་འཕོས་མ་ཐག་བདེ་བ་ཅན་དུ་བྱོན་པར་གྲགས་པ་གང་ལས་སྡོམ་གསུམ་རྣམ་ངེས་གསན་སྦྱང་མཛད། དགུང་གྲངས་བཅུ་སྐོར་ནས་འབྲི་ཀློག་ཐོགས་མེད་དུ་མཁྱེན། སྐུ་ཆུང་དུས་གནག་ཕྱུགས་ཀྱི་རྫི་བོར་ཕེབས་པའི་སྐབས་ཀྱང་རྡོ་ལེབ་ལ་ཕྱག་བྲིས་མང་པོ་གནང༌། ཚིག་བཅད་ཀྱང་མང་པོ་ཐོགས་མེད་དུ་རྩོམ་ནུས་པར་གསུངས། འོག་ནས་རྒྱས་པར་འཆད་འགྱུར་ལྟར་ཤེས་བྱ་རིག་པའི་གནས་ཆེ་ཆུང་སོགས་ཕ་མཐའ་ཡས་པའི་ཐོས་པའི་རྒྱ་མཚོ་ཆེན་པོར་མཁྱེན་དཔྱོད་ཀྱི་གྲུ་གཟིངས་སྐྱེས་སྦྱངས་བརྩོན་པའི་བ་དན་གཡོ་བཞིན་པར་ཞུགས་ཏེ་མདོ་སྔགས་ཀྱི་གཞུང་ལུགས་ཀྱི་སྒྲོ་འདོགས་ཆོད་པར་སྦྱངས་ནས་རྣམ་དག་ལྟ་སྒོམ་སྤྱོད་པའི་གཅེས་ནོར་ཐམས་ཅད་བདག་གིར་བཞེས། ཚིག་དོན་གསན་པ་ཙམ་མ་ཡིན་པར་ནང་དུ་རྒྱལ་བ་དགྱེས་བསྐྱེད་སྐྱེས་བུ་གསུམ་གྱི་ལམ་གྱི་ཉིང་ཁུའི་གསན་པ་དེའི་དོན་དམ་གནད་མ་ལུས་པ་འགལ་མེད་གནད་དུ་བསྡོམས་ནས་ཚུལ་གཉིས་ཤིང་རྟའི་ལམ་སྲོལ་གཅིག་ཏུ་དྲིལ་ཏེ་མི་འཕྲོག་པའི་མཁྱེན་རབ་ཀྱིས་ཐུགས་རྒྱུད་ཆོས་དང་གཅིག་ཏུ་བསྲེས་ཏེ་འདྲེས་པར་མཛད་པའི་ཐ་མར་གདོད་ནས་གོམས་པའི་ཡེ་ཤེས་ཆེན་པོའི་གསང་མཛོད་རྙེད་དེ་ཆོས་ཐམས་ཅད་ཀྱི་གནསྃ་ལུགྃས་རྒྱལ་བའི་དགོངས་པ་མ་ནོར་བ་སྒྲ་ཇི་བཞིན་མངོྃན་སུྃམ་དུྃ་གཟིགས་པར་གྱུར་པས་འཁྲུལ་པའི་མུན་སྤྲུལ་བརྟོལ་ནས་ངེས་པ་དོན་གྱི་འཇམ་དཔལ་གཞོན་ནུའི་ཐུགས་ཀློང་དུ་བཞུགས་པ་དཔྃལ་ལྡནྃ་བླྃ་མྃའི་ཞབྃས་ལྃ་གསོྃལ་བྃ་འདེབྃས། །གཉིས་པ་རྒྱས་པར་བཤད་པ་ལ་གཉིས། བསྟན་དང་སྟོན་པ་ལ་ངེས་ཤེས་སྐྱེས་པའི་ཚུལ་དང༌། དེའི་བསྟན་པ་ལ་གསན་བསམ་སྒོམ་པ་མཛད་ཚུལ་དང་ཞར་བྱུང་ཐ་མའི་མཛད་ཚུལ་བསྟན་པའོ། །དང་པོ་ལ་བཞི་ལས། །དང་པོ་ནི། རྗེ་འདི་ཉིད་ཀྱི་སྐུའི་སྐྱེ་བ་ཐམས་ཅད་དུ་དམ་པའི་ཆོས་ཚོལ་བ་དང༌། ཆོས་ཀྱི་མཛོད་བསགས་པ་དང༌། དེ་ཉིད་གཞན་ལ་སྟོན་པ་ཆོས་ཀྱི་སྒྲོན་མེ་སྦར་བ་རྣམས་རྣམ་ཐར་གྱི་གཙོ་བོ་ཡིན་པའི་མཐུས་རྒྱལ་སྲས་ཞི་བ་ལྷས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང༌། །བཅས་ཏེ་ཡུན་རིང་གནས་གྱུར་ཅིག །ཅེས་རྗེས་སུ་བསྔགས་པ་ལྟར་བསྐལ་བཟང་རྣམ་འདྲེན་བཞི་པ་སྟོན་པ་ཐུབ་པའིྃ་དབང་པོའི་རིང་ལུགས་ལུང་རྟོགས་ཀྱི་བསྟན་པ་རིན་པོ་ཆེ་བཀའ་དང་བསྟན་བཅོས་ཀྱིས། མདོ་སྔགས་བསྟནྃ་པྃ་ཡོངས་རྫོགས་ཀྱི་སྙིང་པོར་གྱུར་པ་ནི་ཐེག་དགུའི་ཡང་རྩེ་འོད་གསལ་རྡོ་རྗེ་སྙིང་པོ་ནང་རྒྱུད་ཡོ་ག་གསུམ་གྱི་གནད་བསྐྱེད་རྫོགས་རྫོགས་པ་ཆེན་པོ་བཀའ་གཏེར་གྱི་ལམ་ཁྱད་པར་དྲུག་གིས་འཕགས་ཤིང་རྒྱལ་བའི་ཆོས་མཛོད་ཟབ་ཅིང་རྒྱ་ཆེ་བ་ཐམས་ཅད་དེ་ལ་རྫོགས་པར་མཁྱེན་ནས། རིན་ཐང་ཤེས་པའི་སྐྱེས་བུའི་ཡིད་བཞིན་ནོར་བུ་རྙེད་པ་ལྟར་གྱུར་ནས། རིང་ལུགས་འདི་ལ་ཐོས་བསམ་སྒོམ་པ་དཔྱིས་ཕྱིན་པ་ཞིག་བྱེད་དུ་ནམ་འོང་དགོངས་ནས་ཉིན་དང་མཚན་མོའི་དུས་ཀུན་ཏུ་མཛད་སྤྱོད་གཞན་ལ་ཐུགས་མི་འཇུག་པ་དཔེར་ན་བུ་གཅིག་པུ་ཡིས་མ་བརྗེད་པ་མེད་པ་བཞིན་དྲན་ཏེ་ཐོས་བསམ་སྒོམ་པ་ལ་རིངས་པ་བྱང་ཆུབ་སེམས་དཔའ་ཆེན་པོ་རྟག་ཏུ་ངུའི་ཤེས་རབ་ཀྱི་ཕ་རོལ་ཏུ་ཕྱིན་པ་ཚོལ་བ་ལྟ་བུ་སྟེ། རྗེ་ཉིད་ཀྱི་བཀའ་འཕྲོས་ལས། ཕྲན་ཆུང་དུས་མདོ་སྔགས་ཀྱི་གཞུང་རྣམས་ཤེས་འདོད་ཀྱི་རེ་བ་ཤིན་ཏུ་ཆེ་ཡང་འཆད་ཉན་མཛད་པའི་སློབ་དཔོན་ནི་གང་ནས་སྟབས་མ་འགྲིགས། མི་ཚེ་ཡུད་ཙམ་དེ་སྟོང་པར་ཟད་བོར་སྙམ་སྟེ་སེམས་ལ་སྡུག་བསྔལ་མང་པོ་བྱུང་ཞེས་གསུངས་པ་ལྟར་རོ། །དེ་ལྟ་བུའི་སྐུ་ན་ཚོད་ཕྲ་ཡང་དམ་པའི་ཆོས་ཁོ་ན་དོན་དུ་གཉེར་བའི་ངོ་མཚར་གྱི་ཐུགས་བསྐྱེད་མངའ་བའི་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཞིང་འདིའི་སྟོན་པའི་རྣམ་ཐར་རྗེས་སུ་དྲན་པའི་ཚུལ་ནི། སློབ་དཔོན་མཐོ་བཙུན་གྲུབ་རྗེས། བདག་ནི་སྟོན་པ་གཞན་སྤངས་ཏེ། །བཅོམ་ལྡན་ཁྱོད་ལ་སྐྱབས་མཆིས་པ། །དེ་ཅིའི་སླད་དུ་ཞེ་ན་ཁྱོད། །སྐྱོན་མི་མངའ་ལ་ཡོན་ཏན་ལྡན། །ཞེས་དང༌། རྗེ་ཉིད་ཀྱིས་ཀྱང༌། བདག་ཅག་སྙིགས་མའི་འགྲོ་བ་མགོན་མེད་རྣམས། ཐུགས་རྗེས་ལྷག་པར་བཟུང་བའི་བཀའ་དྲིན་གྱིས། །ཞིང་དང་དུས་འདིར་རིན་ཆེན་རྣམ་གསུམ་གྱིས། །སྣང་བ་ཇི་སྙེད་ཁྱོད་ཀྱི་ཕྲིན་ལས་ཉིད། །དེ་ཕྱིར་སྐྱབས་མཆོག་མཚུངས་མེད་གཅིག་པུ་རུ། །ཡིད་ཆེས་དད་པས་སྙིང་ནས་གསོལ་འདེབས་ན། །ཞེས་གསུངས་པ་ལྟར། དབང་རྣོན་ཆོས་ཀྱི་རྗེས་སུ་འབྲང་བའི་བློ་ལྡན་དག་གི་ཆོས་སྣང་བའི་སྒོ་དད་པ་དང་སྙིང་རྗེ་ལྷན་སྐྱེས་སུ་མངའ་ཞིང༌། དེ་ཡང་མ་ནོར་བའི་སྐྱབས་བསླུ་བ་མེད་པ་ལ་འདུས་པ་ཆོས་ཉིད་ཡིན་པས་ས་གསུམ་སྐྱེ་དགུའི་རྣམ་འདྲེན་ཕྱོགས་དུས་ཀྱི་རྒྱལ་བ་སྲས་དང་བཅས་པ་རྣམས་དང༌། ཁྱད་པར་དུ་ཡང་མི་མཇེད་ཞིང་གི་བསྐལ་བཟང་སངས་རྒྱས་སྟོང་གི་བཞི་པ་རྩོད་དུས་སྙིགས་མའི་སེམས་ཅན་ལ་ཐུགས་སྙིང་རྗེ་ཆེན་པོའི་སྨོན་ལམ་ཆེན་པོ་ལྔ་བརྒྱ་བཏབ་ནས་རྗེས་སུ་བཟུང་བས་པདྨ་དཀར་པོ་ལྟ་བུར་བསྔགས་པའི་འདྲེན་པ་མཉམ་མེད་ཤཱཀྱའི་རྒྱལ་པོའི་རྣམ་ཐར་དང་བཀའ་དྲིན་སངས་རྒྱས་ཀུན་ལས་ཁྱད་པར་དུ་འཕགས་པའི་ངོ་མཚར་གྱི་རྒྱུ་མཚན་མཁྱེན་པས་དེ་ཡི་མཚན་ཙམ་ཐོས་པས་ཐུགས་རྒྱུད་དད་པས་འཁུལ་ཏེ་མོས་གུས་མཆི་མ་འཁྲུགས་པ་འབྱུང་བ་ནི་ཤིན་ཏུ་ངོ་མཚར་རྨད་དུ་བྱུང་བ་སྟེ། འཇམ་མགོན་བླ་མ་མཆོག་གི་ཞལ་ནས། དེས་ན་བོད་དུ་བསྟན་པ་གནས་པ་འདི་མཁན་ཆེན་ཉིད་ཀྱི་ཐུགས་བསྐྱེད་དང་སྨོན་ལམ་ཁོ་ནའི་མཐུ་ལས་བྱུང་བ་གོར་མ་ཆག་ཀྱང༌། གང་ཟག་སོ་སོའི་སྣང་བ་ལ་རང་རང་གི་བླ་མ་རེས་དགོན་པ་རེ་མཛད་པའི་སྟབས་ཀྱིས་བྱུང་བར་སེམས་པ་ནི། སྐྲ་ལ་གྲི་འཇུ་བ་དང་གོས་ལ་ཚོན་འཛིན་པ་ཚུན་ཆད་སངས་རྒྱས་ཀྱི་ཕྲིན་ལས་ཡིན་ཀྱང་སུས་མི་ཤེས་པ་དང་འདྲའོ། །ཞེས་གསུངས་པ་ལྟར། སྙིགས་དུས་སྟོན་པའི་རྗེས་འཇུག་ཁས་འཆེ་བའི་མཁས་དང་གྲུབ་པར་རློམས་པ་རྣམས་ཐུབ་དབང་མཆོག་གི་མཚན་ཆེ་བ་དང་བཅས་ཏེ་བརྗོད་པའང་དཀོན་པར་སྣང་བས་དེ་ལྟ་བུ་མ་ཡིན་པའི་རྒྱུ་མཚན་ཚུལ་བཞིན་མཁྱེན་པ་དཔལ་ལྡན་བླ་མའི་ཞབས་ལ་གསོལ་བ་འདེབས། །གསུམ་པ་བསྟན་པ་ལ་ཕྱག་རྗེས་མངའ་བ་སྐྱེས་བུ་ཁྱད་པར་ཅན་རྗེས་སུ་དྲན་པའི་ཚུལ་ནི། མཛོད་ལས། སྟོན་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པ་བྱེད་པ་ཁོ་ནའོ། །ཞེས་གསུངས་པ་ལྟར་ལྷ་དང་བཅས་པའི་འཇིག་རྟེན་ན་འགྲན་ཟླ་མེད་པའི་སྟོན་པ་ཐུགས་རྗེ་ཅན་དེ་དང་དེའི་རིང་ལུགས་ལུང་རྟོགས་ཀྱི་བ་སྟན་པ་རིན་པོ་ཆེ་ད་ལྟའི་བར་འཛིན་སྐྱོང་སྤེལ་བའི་ཤཱཀྱའི་རྒྱལ་པོ་དེ་ཡི་སྲས་རྒྱ་གར་འཕགས་པའི་ཡུལ་དུ་ཤིང་རྟ་ཆེན་པོ་གཉིས། འཛམ་གླིང་མཛེས་པའི་རྒྱན་དྲུག །རྨད་དུ་བྱུང་བའི་སློབ་དཔོན་ཆེན་པོ་གཉིས། བོད་དུ་ལོ་ཆེན་བཻ་རོ་ཙ་ན། སྐ་ཅོག་ཞང་གསུམ། སོ་ཟུར་གནུབས་གསུམ། ས་སྐྱ་པཎ་ཆེན། བུ་དོལ་ཇོ་ནང་སོགས་ཉི་ཟླ་ལྟར་གྲགས་པའི་མཁས་མཆོག་རྣམས་ཀྱི་བཀའ་དང་བསྟན་བཅོས་ཀྱི་དགོངས་པ་འགྲེལ་བའི་ཟབ་རྒྱས་ཀྱི་དགོངས་པ་ཟླ་མེད་པ་དབུ་མ་དང༌། འདུལ་མངོན། ཕར་ཕྱིན་གྱི་གསང་ཆེན་རྒྱུད་སྡེ་རྒྱ་མཚོའི་རིང་ལུགས་ལོག་རྟོག་འཁྲུལ་པའི་དྲི་མ་མེད་པ་མཚུངས་མེད་རྒྱལ་བ་དགྱེས་པའི་ལམ་བཟང་གསལ་བར་མཛད་པ་དང༌། ཁྱད་པར་བོད་ཡུལ་མཐའ་འཁོབ་མུན་པའི་གླིང་དུ་རྒྱལ་བསྟན་ཉིན་བྱེད་འདྲེན་པའི་ཐུགས་བསྐྱེད་དང་སྨོན་ལམ་མཛད་པ་རྨད་དུ་བྱུང་བ་སངས་རྒྱས་གཉིས་པ་མཁན་སློབ་ཆོས་ཀྱི་རྒྱལ་པོ་རྣམ་པ་གསུམ་སྟེ། མཆོག་གྱུར་བདེ་ཆེན་གླིང་པའི་ཟབ་གཏེར་རིགས་གསུམ་སྙིང་ཐིག་གི་ཁོག་དབུབ་ལས། བཅོམ་ལྡན་མགོན་པོ་ཀུན་ཏུ་གཟིགས༔ རྒྱལ་སྲས་གཙོ་བོ་འཇམ་པའི་དབྱངས༔ བོད་ཡུལ་བསྟན་པ་སྤེལ་བའི་ཕྱིར༔ ཆོས་རྒྱལ་མཆོག་གི་རྣམ་པར་སྣང༔ འོད་ཟེར་ཀུན་འཕགས་དཔལ་བརྩེགས་རྒྱལ༔ པདྨ་གར་དབང་སྤྱན་རས་གཟིགས༔ འཛམ་གླིང་གདུལ་བྱའི་སྣང་ངོ་རུ༔ མཚོ་སྐྱེས་རྡོ་རྗེར་ལྷུན་གྱིས་གྲུབ༔ དཀྱིལ་འཁོར་ཁྱབ་བདག་རྡོ་རྗེ་འཆང་༔ གསང་བ་ཀུན་འཛིན་མཐུ་སྟོབས་བདག༔ བོད་ཁམས་ཐུབ་བསྟན་སྣང་མཛད་པ༔ བྱང་ཆུབ་སེམས་དཔའ་ཞི་བ་འཚོ༔ བདག་ཅག་གསུམ་ནི་རིགས་གསུམ་གྱི༔ སེམས་དཔའ་མཆོག་དང་དབྱེར་མེད་ཅིང་༔ འདས་དང་མ་འོངས་ད་ལྟའི་དུས༔ འགྲོ་འདུལ་ཕྲིན་ལས་ལྷུན་གྱིས་གྲུབ༔ དངོས་དང་སྐུ་ཡི་བཀོད་པ་གཞན༔ སྔགས་དང་ཡེ་ཤེས་རོལ་མོ་ནི༔ བྱུང་དང་འབྱུང་འགྱུར་སྣོད་ལྡན་ལ༔ རྡོ་རྗེའི་སྔགས་རྒྱུད་ཅིར་ཡང་སྣང་༔ ཞེས་གསུངས་པ་ལྟར་ལུང་སྡེ་སྣོད་གསུམ་གྱི་འཆད་ཉན་དང༌། ལམ་བསླབ་པ་གསུམ་གྱི་ཉམས་ལེན་གྱིས་མི་ནུབ་པར་ཕྱོགས་དུས་ཀུན་ཏུ་སྤེལ་བར་ཐུགས་ཀྱིས་གཡར་དམ་བཅས་པ་ནི་མདོ་ལས། ཇི་ལྟར་བསྐལ་པ་བྱེ་བ་སྟོང་བརྗོད་ཀྱང༌། །སངས་རྒྱས་ཡེ་ཤེས་མཐའ་ཡོད་མ་ཡིན་ལྟར། །དེ་བཞིན་གཤེགས་པའི་དམ་པའི་ཆོས་འཛིན་པའི། །བསོད་ནམས་དེ་ཡང་ཚད་ཡོད་མ་ཡིན་ནོ། །ཞེས་དང༌། དཀོན་མཆོག་ཏཱ་ལའི་མདོ་ལས། །གང་དག་སངས་རྒྱས་ཆོས་ལ་དད་གུས་ལ། །དེ་དག་རྒྱལ་བར་མཆོད་པ་རྒྱ་ཆེན་བྱེད། །གང་དག་རྒྱལ་ལ་མཆོད་པ་ཆེ་བྱེད་པ། །དེ་དག་སངས་རྒྱས་དད་པ་བསམ་མི་ཁྱབ། །གང་དག་རྒྱལ་བའི་ཆོས་ལ་དད་གུས་པ། །དེ་དག་རྒྱལ་བར་ཆོས་ཉན་ངོམས་པ་མེད། །གང་དག་རྒྱལ་བའི་ཆོས་ཉན་མི་ངོམས་པ། །དེ་དག་ཆོས་ལ་མོས་པ་བསམ་མི་ཁྱབ། །གང་དག་རྟག་ཏུ་དགེ་འདུན་དད་གུས་པ། །དེ་དག་མི་ལྡོག་དགེ་འདུན་དད་པ་ཡིན། །གང་དག་མི་ལྡོག་དགེ་འདུན་རབ་དད་པ། །དེ་དག་དད་པའི་སྟོབས་ཀྱིས་མི་ལྡོག་འགྱུར། །གང་དག་དད་པའི་སྟོབས་ཀྱིས་མི་ལྡོག་པ། །དེ་དག་དབང་པོ་རྣོ་ཞིང་རབ་ཏུ་གསལ། །གང་དག་དབང་པོ་རྣོ་ཞིང་རབ་གསལ་བ། །དེ་དག་སྡིག་པའི་གྲོགས་པོ་རྣམ་པར་སྤང༌། །གང་དག་སྡིག་པའི་གྲོགས་པོ་རྣམ་སྤང་བ། །དེ་དག་ཆོས་ལྡན་གྲོགས་ཀྱིས་ཡོངས་སུ་བཟུང༌། །གང་དག་ཆོས་ལྡན་གྲོགས་ཀྱིས་ཡོངས་བཟུང་བ། །དེ་དག་དགེ་བ་རྒྱ་ཆེར་གསོག་པར་བྱེད། །གང་དག་དགེ་བ་རྒྱ་ཆེན་གསོག་བྱེད་པ། །བདག་ཉིད་ཆེན་པོ་དེ་དག་སྐུ་སྟོབས་ལྡན། །བདག་ཉིད་ཆེན་པོ་སྐུ་སྟོབས་གང་ལྡན་པ། །དེ་དག་མོས་པའི་ཁྱད་པར་རྒྱ་ཆེན་བྱེད། །གང་དག་མོས་པའི་ཁྱད་པར་རྒྱ་ཆེ་བ། །དེ་དག་རྒྱལ་བ་ཀུན་གྱིས་རྟག་བྱིན་རློབ། ཅེས་སོགས་རྒྱ་ཆེར་གསུངས་པ་ལྟར་རོ། །བཞི་པ་དེའི་རིང་ལུགས་ཀྱི་ཆེ་བ་དྲན་པས་སྤེལ་བ་དམ་བཅས་ཚུལ་ནི། ཡབ་སྲས་མཇལ་བའི་མདོ་ལས། མི་ཁོམ་བརྒྱད་པོ་ཐམས་ཅད་རབ་སྤང་ཞིང༌། །དལ་བ་ཕུན་ཚོགས་རྙེད་དཀའ་ཐོབ་གྱུར་ནས། །བདེ་གཤེགས་བསྟན་ལ་དད་པ་རྙེད་གྱུར་པའི། མཁས་པ་རྣམས་ཀྱི་རིག་པའི་རྣལ་འབྱོར་སྤྱོད། །ཅེས་གསུངས་པ་བཞིན། སྐྱེས་བུ་ཆེན་པོ་གང་དུ་སྐུ་སྐྱེ་བའི་མྱུ་གུ་བཟུང་བ་དེའི་ཚེའི་དམ་པའི་ཡོན་ཏན་ནི་རྒྱ་མཚོའི་ཀློང་གི་ནོར་བུའི་ཁ་དོག་བཞིན་སྐུའི་ན་ཚོད་ཀྱི་མེ་ཏོག་ནར་མ་སོན་པ་གཞོན་ནུའི་གཟུགས་ཀྱིས་ཕྲ་མོར་གྱུར་པ་ལྟར་ཡོན་ཏན་ཀྱང་བདག་གིས་ཐོས་བསམ་སྒོམ་པ། འཆད་རྩོད་རྩོམ་པ་སོགས་ཐབས་ཀྱི་སྒོ་གང་གིས་སྲིད་ཞིའི་རྣམ་འདྲེན་རྨད་བྱུང་འཕགས་བོད་དུ་བྱོན་པ་མཁས་གྲུབ་མཆོག་དེ་དག་གིས་རྗེས་འཇུག་གི་དོན་དུ་བཞག་པའི་རིང་ལུགས་དྲི་མ་མེད་པ་ནི་མ་ཕམ་པས། ཆོས་རྣམས་ཐམས་ཅད་བཀའ་དང་བསྟན་བཅོས་ཏེ། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་གསུངས་པ་ཉིད་ཡིན་པས་བཀའ་དྲིན་རྗེས་སུ་གཟོ་བའི་ཕྱིར་དུ་སྲིད་ཞིའི་གཅེས་ནོར་རྒྱལ་བའི་བསྟན་པ་རིན་པོ་ཆེ་ཉིད་ཡིན་ཏེ། སྤེལ་མར་བསྟོད་པ་ལས། བགྲོད་པ་གཅིག་དང་ཐབས་བདེ་དང༌། །ལེགས་པར་འགྲེལ་དང་ཉེས་པ་དང༌། །ཐོག་མ་བར་དང་མཐར་དགེ་བ། །ཁྱེད་ཀྱིས་བསྟན་འདྲ་གཞན་ལ་མེད། །ཅེས་གསུངས་པ་ཉིད་རང་ནོར་རང་གིས་ངོ་ཤེས་པས་དགོས་པ་དང་ཕན་ཡོན་ཆེ་ཞིང་གཡར་དམ་བཅས་པ་བཞིན། ཐུབ་བསྟན་སྤྱི་དང་ཁྱད་པར་དུ་གསང་ཆེན་སྔ་འགྱུར་བཀའ་གཏེར་གྱི་ཤིང་རྟ་ཆོས་ཀྱི་རྒྱལ་པོ་རོང་ཀློང་གཉིས་ཀྱི་ཞལ་སྐྱིན་དུ་བཞུགས་པའི་ཚུལ་འཆད་འགྱུར་ལྟ་བུའི་རྣམ་ཐར་མཚུངས་མེད་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་དེའི་བསྟན་པ་ལ་གསན་བསམ་སྒོམ་པ་ཇི་ལྟར་མཛད་ཚུལ་ལ་གསུམ། དང་པོ་ཐོས་པས་ཤེས་བྱ་རིག་པའི་ཆོས་ཐམས་ཅད་ཐུགས་སུ་ཆུད་ཚུལ། བར་དུ་བསམ་པས་རྒྱལ་བའི་དགོངས་པ་ཟབ་རྒྱས་ཐུགས་རྒྱུད་དང་འདྲེས་ཚུལ། མཐར་སྒོམ་པས་རིག་འཛིན་གྲུབ་པའི་རྒྱལ་སར་གཤེགས་ཚུལ་ལོ། །དང་པོ་ཐོས་པའི་རྒྱུ་སྐྱེས་སྦྱང་གི་བློ་གྲོས་ལྷན་སྐྱེས་སུ་མངའ་ཚུལ་དང༌། ཐུན་མིན་ལྷག་པའི་ལྷས་བྱིན་གྱིས་བརླབ་ཚུལ་གཉིས་ཀྱིས་མདོར་བསྟན། འབྲས་བུ་ཤེས་བྱ་རིག་པའི་གནས་ཐམས་ཅད་ཐུགས་སུ་ཆུད་ཚུལ་རྒྱས་པར་བཤད་པའོ། །དང་པོ་ནི། ཇི་སྐད་དུ། ཆུ་སྐྱར་ལས་ནི་ཆུ་ཤེས་དང༌། །དུ་བ་ལས་ནི་མེར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་པ་ལྟར་སྐུ་གསང་བ་ཟབ་མོའི་དབྱིངས་རྗེ་བཙུན་མཁྱེན་པའི་བདག་པོ་གཉིས་སུ་མེད་ཅིང༌། དེའི་སྒྱུ་འཕྲུལ་གྱི་རོལ་པ་ཐམས་ཅད་ཆོས་རབ་རྣམ་པར་འབྱེད་པའི་བློ་གྲོས་དང་སྤོབས་པ་བསམ་མི་ཁྱབ་པ་ཉི་མ་དང་འོད་ཟེར་བཞིན་ལྷུན་གྱིས་གྲུབ་པའི་མངོན་རྟགས་མ་སྦས་པར་གསལ་ཏེ་སྐུའི་སྐྱེ་བ་སྔོན་ནས་ཟབ་དང་རྒྱ་ཆེ་བའི་ཆོས་ལ་སྦྱངས་བའི་ལས་འཕྲོ་ལེགས་སྨོན་བཟང་པོ་བཞི་ལྡན་དུ་སད་པ་ཡིས་ཟབ་པ་སྟོང་པ་ཉིད་དང་རྒྱ་ཆེ་བ་ས་བཅུ་ལམ་ལྔ་སོགས་ཀྱི་དོན་རྒྱས་པར་སྟོན་པའི་མདོ་ཤེས་རབ་ཀྱི་ཕ་རོལ་དུ་ཕྱིན་པ་དང༌། ཏིང་འཛིན་རྒྱལ་པོ་སོགས་དང༌། སངས་རྒྱས་ཕལ་པོ་ཆེ། དཀོན་མཆོག་བརྩེགས་པ་སོགས་དང༌། རྒྱུད་ཀྱི་གཙོ་བོ་བདེ་གསང་འཇིགས་གསུམ་ལས་ཀྱི་འཁོར་ལོ། མདོ་སྒྱུ་སེམས་ཕྱོགས་ཀྱི་རྒྱུད་ལུང་མན་ངག་གི་དགོངས་དོན་དང་དེ་དག་གི་དགོངས་འགྲེལ་བསྟན་བཅོས་གྲགས་ཆེ་བ་དཔལ་མགོན་འཕགས་པ་ཀླུ་སྒྲུབ་ཀྱིས་གཏམ་ཚོགས། དབུ་མ་རིག་ཚོགས། བསྟོད་ཚོགས་བཅས་འཁོར་ལོ་གསུམ་གྱི་དགོངས་འགྲེལ་དང༌། རྒྱལ་ཚབ་ས་བཅུའི་དབང་ཕྱུག་གི་བྱམས་ཆོས་སྡེ་ལྔ། འཕགས་པ་ལྷའི་བཞི་བརྒྱ་པ། ཟླ་གྲགས་ཀྱི་འཇུག་པ། ཞི་བ་ལྷའི་སྤྱོད་འཇུག །མཁན་ཆེན་བྱང་ཆུབ་སེམས་དཔའི་དབུ་མ་རྒྱན་སོགས་དང༌། ཐོག་མེད་དང་དབྱིག་གཉེན་སྐུ་མཆེད་ཀྱི་མངོན་པ་གོང་འོག །སོ་ཐར་གྱི་མདོ་དང༌། ཡོན་ཏན་འོད་ཀྱི་འདུལ་བ་མདོ་རྩ། ཕྱོགས་ཀྱི་གླང་པོའི་ཚད་མ་ཀུན་བཏུས། ཆོས་ཀྱི་གྲགས་པའི་རྣམ་འགྲེལ་སོགས་ཀྱིས་མཚོན་བཅུ་ཕྲག་རིག་པའི་གནས་ཐམས་ཅད་ཀྱིས་དགོངས་དོན་ལ་བཤེས་གཉེན་གྱི་ངག་ཁྲིད་སོགས་གང་ལའང་མ་ལྟོས་པར་སྤྱན་གྱིས་བལྟས་པ་ཙམ་གྱིས་ཚིག་དོན་ཐམས་ཅད་དཀའ་ངལ་མེད་པ་བདེ་བླག་གིས་ཁོང་དུ་ཆུད་པས་ཤེས་བྱ་རིག་པའི་གནས་ཐམས་ཅད་གཟིགས་པའི་པཎྜི་ཏ་ཆེན་པོ་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཐུན་མིན་ལྷག་པའི་ལྷས་བྱིན་གྱིས་བརླབས་ཚུལ་ནི། བཀའ་ལས་ཕྲན་ལོ་ཆུང་དུས་གསར་རྙིང་གི་མཁས་གྲུབ་བཟང་ལ་མང་བར་བཞུགས་ཀྱང་རྒྱལ་སྲས་མཁས་པའི་ཁྱུ་མཆོག་དཔལ་སྤྲུལ་ཆོས་ཀྱི་དབང་པོའི་ཞལ་སྔ་ནས་སྤྱོད་འཇུག་ཤེར་ལེ་ཞིག་ཉིན་ཞག་ལྔ་ཙམ་ཐོབ་པ་ལས་རང་ཉིད་བསོད་ནམས་དམན་པས་བླ་མ་སུ་ལས་ཀྱང་དཔེ་ཆ་ཞུ་ཡུལ་དང་བསླབ་སྦྱང་སྟབས་མ་འགྲིགས་པ། སྡེ་དགེའི་མངའ་ཁུལ་གྱི་བླ་མ་ཐམས་ཅད་མཇལ་ཞིང་བྱོན་པས་རུ་དམ་རྫོགས་ཆེན་དགོན་དུ་གྲུབ་དབང་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་རང་ཡུལ་གྱི་མཇལ་ཞུས་མང་པོ་དང་ལྷན་ཅིག་ཕེབས་པས་གཞན་རྣམས་ལ་གང་ཡང་མ་གསུང༌། རྗེ་ཉིད་ན་བཟའ་ཡང་གཟན་ཤམ་མེད་པར་པགས་སློག་རས་དམར་གྱི་མཐའ་རྒྱན་ཅན་ཞིག་བཞེས་གྲི་ཆུང་ངུ་ཞིག་སྐུ་སྐེད་དུ་དྲངས་བཞིན་ཕེབས་པས་མདུན་དུ་ཕེབས་པར་ཕྱག་དབུ་ལ་བཞག་སྟེ་ཁྱེད་རང་དཔལ་ཆེན་འདུས་པའི་བསྙེན་པ་ཞིག་ཞོག་དང་ཁམས་གསུམ་དབང་དུ་འདུས། སྲིད་གསུམ་ཟིལ་གྱིས་གནོན། ཚེ་འདི་ལ་བདེ་སྡུག་འདྲེས་མ་འོང༌། དགུང་གྲངས་བརྒྱད་ཅུ་ཐུབ། མཚན་མི་ཕམ་ཕྱོགས་ལས་རྣམ་རྒྱལ་ཐོགས་ཞེས་དེར་ཡོད་ཀུན་གྱི་ཐོས་པར་གསུངས། ཕྱིས་རྗེ་བླ་མ་མཆོག་གིས་རྫོགས་ཆེན་མི་འགྱུར་ནམ་མཁའི་རྡོ་རྗེས་ཚེ་འདི་ལ་བདེ་སྡུག་འདྲེས་མ་འབྱུང་གསུངས་པ་དེ་ཇི་བཞིན་བྱུང༌། མི་ཚེ་ཕྱེད་ནད་ཀྱིས་མནར་སོང་ཞེས་གསུངས་ཀྱང་ཇི་ལྟར་ལུང་བསྟན་པ་བཞིན་འཁྲུངས་ཡུལ་འཇུ་ཉུང་རི་ཁྲོད་དུ་དཔལ་ཆེན་འདུས་པའི་བསྙེན་སྒྲུབ་མཛད་ཅིང་དེ་ཕྱིན་ཐུགས་དམ་གསང་བའི་ལྷ་མཆོག་མཛད་ཚུལ་ཐུགས་དམ་རྒྱུན་གྱི་རྩ་ཐོར་གསལ་བ་ལྟར་རོ། །སྐུ་ཚེའི་སྨད་རྨ་རྒྱལ་སྤོམ་རའི་མདུན་ཕེབས་ན་དགུང་གྲངས་བརྒྱད་ཅུ་བཞུགས་པ་རཏ་གླིང་ཚེ་གསང་བསྙེན་སྒྲུབ་སྐབས་གུ་རུ་པདྨ་རྒྱལ་པོའི་ལུང་བསྟན་ཚིགས་བཅད་ཕྱག་བྲིས་དངོས་ཞིག་མཇལ་ཞིང་རླུང་རྟ་ཤིན་ཏུ་མང་པོ་སྤར་བཏབ་ཀྱིས་རྨ་རྒྱལ་དུ་ཕེབས་དགོས་ཞེས་གསུངས་ཀྱང༌། རྨ་རྒྱལ་ལུང་པ་ཤིན་ཏུ་གྲང་ངར་ཆེ། འཚོ་བ་ཡང་དཀོན། ཇག་རྐུན་མང་པོའི་རྒྱུ་ལམ་ཡིན་སྟབས་འཁྲུངས་ཡུལ་པ་ཐམས་ཅད་ཀྱིས་བཤོལ་བས་ཕེབས་རྒྱུ་མ་བྱུང༌། སླར་ལུང་བསྟན་ཞིག་ཏུ་དགུང་གྲངས་དྲུག་ཅུ་རེ་བརྒྱད་དུ་བཞུགས་པའི་ལུང་བསྟན་འདུག་པ་དེ་བཞིན་འཚོ་གཞེས་མཛད་པ་ཡིན། འདི་སྐབས་གཏེར་ཆེན་མཆོག་གྱུར་གླིང་པས་རུ་དམ་གངས་ཀྱི་ར་བའི་གནས་ཞལ་ཕྱེས་ཏེ་གངས་ཁྲོད་ནས་ཡང་དག་སངས་རྒྱས་མཉམ་སྦྱོར་ཟབ་གཏེར་བཞེས་ཤིང༌། མི་འགྱུར་ནམ་མཁའི་རྡོ་རྗེ་དང༌། དཔལ་སྤྲུལ་རིན་པོ་ཆེ་སོགས་ཆོས་བདག་རྣམས་ལ་ཆོས་སྐྱེས་ཕུལ་ཞིང་གངས་རིའི་རྩེར། བསྐོར་ལམ་བཏོད་པ་མི་མང་གིས་བསྐོར་བའི་མཉམ་དུ་རྗེ་བླ་མ་ཡང་ཕེབས་པས་གངས་རིའི་སྟེང་དུ་ཨ་རུ་རའི་ཆར་པ་བབས་འདུག་པ། ཨ་རུ་ར་ཐུ་བ་གང་ཙམ་བསྣམས་པ་གསུངས། གཏེར་ཆེན་ལས་བར་ཆད་ལམ་སེལ། ཆོས་སྐུ་ཀུན་བཟང་སོགས་ལྗགས་ལུང་གསན་པའི་ཕྱག་བྲིས་མཇལ། སྨད་ཤོད་རྫོང་སར་དུ་ཕེབས་པ་འཁྲུངས་ཡུལ་གཅིག་པའི་བླ་མ་རྒྱལ་སྲས་གཞན་ཕན་མཐའ་ཡས་ཀྱི་གསོལ་དཔོན་པདྨ་དོན་ཡོད་དང་མཇལ་བས་ཐུགས་དགྱེས་ཚུལ་མཛད་པ། དབྱངས་འཆར་ཞིག་ཤེས་ན་སྙམ་ཡང་བསླབ་མཁན་དཀོན་ཚུལ་ཞུས་པས་སྤྲུལ་སྐུ་རིན་པོ་ཆེ་འཇམ་དབྱངས་མཁྱེན་བརྩེའི་དབང་པོ་འཁྲུངས་གཞིས་སུ་བཞུགས་པས་དེར་ཞུ་ཡིག་ཕུལ་གསུངས་ཏེ་ཕྱག་བྲིས་བཅས་བཏང་བྱུང་བས། རྗེ་བླ་མ་མཇལ་ནས་ཞུ་ཡིག་ཕུལ་བས་ཁྱེད་ལ་དབྱངས་འཆར་ཞིག་བསླབ་རྒྱུ་དང་འཇམ་དབྱངས་རྗེས་གནང་དགོས་ཟེར་འདུག་པ་དབྱངས་འཆར་ཞིག་ལོ་ཆུང་དུས་བསླབ་མྱོང་ཡང་ད་ནི་ཁ་གར་གྱུ་མི་ཤེས། ཡི་གེའི་ནང་དབྱངས་ཅར་ཟེར་འདུག་དབྱངས་ཅར་མ་རེད་དབྱངས་འཆར་རེད། འཇམ་དབྱངས་རྗེས་གནང་དགོས་ན་ཞག་ཤས་སྡོད་དང་བྱེད་ཆོག་གསུངས། ཉིན་ཁ་ཤས་མཚམས་འཇམ་དཔལ་སྨྲ་སེང་དམ་པའི་ལུགས་ཀྱི་རྗེས་གནང་ཁྲིད་ལུང་བཅས་བསྩལ། སྤྱིར་ཤེས་རབ་ཀྱི་ལྷ་ཞིག་སྒྲུབས་དང་དབྱངས་འཆར་སོགས་གཞུང་ལུགས་རྣམ་ལོས་ཤེས་འོང༌། གཞུང་རེ་རེ་བཞིན་མི་རེ་ལ་ཁྲིད་ཚོད་ག་ལ་ཡོད་ཅེས་གསུངས། ཚུར་ལམ་དཔལ་སྤུངས་སུ་ཕེབས་པས་མཁན་ཆེན་བླ་མ་བཀྲ་ཤིས་འོད་ཟེར་དང་མཇལ། འཇམ་མགོན་ཀོང་སྤྲུལ་རིན་པོ་ཆེའི་མདུན་ནས་དབྱངས་འཆར་རྩ་བ་ཞིག་མཁན་ཆེན་བླ་མས་བསྣམས་ནས་གནང་བྱུང་བས་དཔེ་མེད་ཐུགས་དགྱེས་ཚུལ་གྱིས་གཟིགས་ཤིང་འཇམ་དབྱངས་ལ་གསོལ་བ་བཏབ་པས་མི་ལ་རེ་མ་དགོས་ཙམ་གྱིས་ཤེས་སོང་གསུངས། དག་སྣང་དུ་དབྱངས་འཆར་གྱི་དཔེ་རྙེད་པའི་ཚུལ་འགྲེལ་ཆེན་གྱི་གཤམ་མཛད་བྱང་དུ་གསལ་བ་ལྟར་དང༌། དེ་ནས་བཟུང་རྗེ་བླ་མ་རྣམ་གཉིས་ཐུགས་ནང་ཤིན་ཏུ་གཤིན་པ་སྐུ་མཆེད་ལྟ་བུ་མཛད། དད་པ་ཅན་དག་གིས་རྗེ་བླ་མ་རིན་པོ་ཆེ་དང་མཁན་ཆེན་བཀྲ་ཤིས་འོད་ཟེར་གཉིས་ཐུགས་བརྒྱུད་གཅིག་པའི་ཞལ་བཞེས་ཀྱང་གནང་ཞེས་ཐོས། དེ་ནས་ཐམས་ཅད་མཁྱེན་གཟིགས་ཀུན་མཁྱེན་འཇམ་དབྱངས་བླ་མས་བརྡས་ལུང་བསྟན་པ་བཞིན་འཁྲུངས་ཡུལ་དུ་བྱོན་ཏེ། འཇུ་ཉུང་རི་ཁྲོད་འཆི་མེད་མཆོག་གྲུབ་གླིང་དུ་ཟླ་བ་བཅོ་བརྒྱད་ཀྱི་བར་དུ་འཇམ་དཔལ་སྨྲ་སེང་གི་སྒྲུབ་ཐབས་ཀུན་གཟིགས་མཁྱེན་བརྩེ་རིན་པོ་ཆེའི་གསུང་གྲུབ་པ་མཆོག་གི་ཞལ་ལུང་སྟེང་ནས་བསྙེན་སྒྲུབ་རིལ་བུའི་ལས་སྦྱོར་བཅས་མཐར་ཕྱིན་པ་མཛད་པ་དང༌། ཟུང་འཇུག་གྲུབ་པ་ལབ་སྐྱབས་མགོན་དབང་ཆེན་དགྱེས་རབ་རྡོ་རྗེའི་མདུན་དུ་བྱོན་ནས་རྗེ་དེའི་ཐུགས་དམ་ལྷག་པའི་ལྷ་འཇམ་དཔལ་དཀར་པོ་མ་ཏིའི་ལུགས་དང༌། རྟ་མགྲིན་ཡང་གསང་གི་རྗེས་གནང༌། ལྷ་རིགས་བདེ་ཆེན་རོལ་པ་རྩལ་གྱི་དག་སྣང་གེ་སར་རྡོ་རྗེ་ཚེ་རྒྱལ་གྱི་སྲོག་གཏད་གསན་ཞིང༌། སྐྱབས་མགོན་འདི་ཉིད་ཀྱི་ཐུགས་དམ་གཙོ་བོ་གཅིག་རྟ་མགྲིན་གསང་སྒྲུབ་ཡིན་ཅིང་དེའི་རྗེས་སུ་བཟུང་སྟེ་ལུང་བསྟན་ཀྱང་ཡོད་པར་སྣང་བས། ལབ་རི་ཁྲོད་དུ་སྐྱབས་མགོན་ཉིད་ཀྱི་མཛད་པའི་འཇམ་དཔལ་དཀར་པོའི་སྒྲུབ་ཐབས་ལ་བརྟེན་ནས་བསྙེན་སྒྲུབ་ཟླ་བ་དྲུག་ཏུ་མཛད་པས་བསྐྱེད་རིམ་གྱི་གསལ་སྣང་ཁྱད་པར་ཅན་བྱུང་ཞིང༌། ཐུགས་ཀའི་སྔགས་ཕྲེང་འཁོར་བའི་དམིགས་པ་བཟུང་ནས་དངོས་སྣང་ལའང་ས་གཞི་ཐམས་ཅད་འཁོར་ལོ་བཞིན་འཁོར་བའི་སྣང་བ་དང༌། ཐ་མལ་གྱི་སྣང་ཤེས་འགགས་པའི་གསལ་སྣང་ཁྱད་པར་ཅན་བརྙེས་པ་སོགས་གཞུང་ནས་བཤད་པའི་ཏིང་འཛིན་གྱིས་དུས་འདའ་བ་བྱུང་བས་བླ་མའི་བྱིན་རླབས་ཡིན་པ་འདྲ་གསུངས་པ་དང༌། འཇམ་དཀར་གྱི་རྗེས་གནང་གསན་སྐབས་དང་བསྙེན་སྒྲུབ་ཀྱི་མཐར་སྲན་མ་མ་ཤིའི་ལས་སྦྱོར་གནང་བས་གཞུང་ནས་བཤད་པའི་རྟགས་བྱུང་གསུངས། སྒྲུབ་ཐབས་དེ་ཐུགས་རྩིས་ཆེ་བར་མཛད་ནས་སྤར་དུ་བཀོད་པར་མཛད། སྐྱབས་མགོན་དབང་ཆེན་དགྱེས་རབ་རྡོ་རྗེ་ལ་ཡང་འཇམ་དབྱངས་ཀྱི་རྗེས་སུ་བཟུང་བ་ཡིན་པས་གཟིམ་ཆུང་འཇམ་དབྱངས་ཞལ་གཟིགས་ལྷ་ཁང་ཞེས་ཡོད་པར་སྣང༌། དོན་དུ་སྐྱབས་མགོན་ཉིད་ལ་སློབ་མ་འཇམ་དབྱངས་ཀྱི་མཚན་ཅན་བཞི་འབྱུང་ཞིང༌། དེ་ཐམས་ཅད་འཇམ་དབྱངས་ཀྱིས་རྗེས་སུ་བཟུང་བ་མཁས་གྲུབ་ཀྱི་དབང་པོ་བཞི་སངས་རྒྱས་ཀྱི་བསྟན་པ་ལ་བྱ་བ་མཛད་ནུས་འབྱུང་བའི་འཇམ་དཔལ་གྱིས་ལུང་བསྟན་པའི་ཡ་གྱལ་གཅིག་རྗེ་བླ་མ་ཉིད་ཡིན་པར་གསུངས། སྐྱབས་མགོན་ཉིད་རྒྱ་ནག་ཏུ་ཕེབས་པར་ནོར་གྱི་འགྲོ་དོན་ཆེ་བར་བྱུང་བས་ལབ་དགོན་དུ་སྟོན་པ་ཐུབ་དབང༌། འཇམ་དཔལ་དབྱངས། གུ་རུ་རིན་པོ་ཆེ། རྟ་མགྲིན། རྣམ་རྒྱལ་མཆོད་རྟེན་བཅས་སྟོང་སྐུ་ལྔ་དང༌། མཆོད་རྫས་སོགས་སྤུས་ནམ་ལྡན་པ་རྒྱ་གང་ཆེ་ལས་ཆོས་ཀྱི་འགྲོ་དོན་ཆེར་མ་བྱུང༌། མི་ཕམ་རིན་པོ་ཆེ་ཁྱེད་རང་ཕེབས་ན་ཆོས་ཀྱི་འགྲོ་དོན་རྒྱ་ཆེར་འབྱུང་བར་ལུང་བསྟན་པས་མཚོན་ཐུན་མོང་གི་སྣང་ངོར་མཚོན་བྱེད་ཙམ་དུ་བཤད་པ་ལས་ནམ་མཁའི་ཟླ་བ་དང་ཆུ་ཟླ་བཞིན་སྤྲུལ་གཞི་ཁྱད་པར་ཅན་སྲས་དང་བཅས་པའི་རྒྱལ་བ་ཀུན་གྱི་མཁྱེན་གཉིས་ཡེ་ཤེས་ཀྱི་སྐུ་གཅིག་ཏུ་སྐྱབས་གནས་ཀུན་གྱི་མཆོག་འཇམ་དཔལ་དམར་པོ་ལ་ཐུགས་དྲན་ཟིན་ཙམ་ནས་ཡིད་ཆེས་ཀྱི་དད་པའི་ངེས་ཤེས་ཐུགས་ལ་ལྷན་སྐྱེས་སུ་འཁྲུངས་ནས་སྐུའི་སྐྱེ་བ་ཐམས་ཅད་དུ་མི་འབྲལ་བ་སྙིང་གི་ཐིག་ལེར་རྟག་ཏུ་བསྒོམ་པ་བཞིན་འདུ་འབྲལ་མེད་པར་དགྱེས་པས་བཞུགས་པའི་མངོན་རྟགས་གསལ་བ་རྒྱལ་སྲས་ཞི་བ་ལྷ་ལ་འཇམ་དཔལ་དབྱངས་ཀྱིས། བུ་གཅིག་འདི་ནི་ང་ཡི་བསྟན་ཡིན་ཏེ། །ང་ནི་ཁྱེད་ཀྱི་དགེ་བའི་བཤེས་གཉེན་ཡིན། །ཞེས་སོགས་ཀྱིས་ཁབ་ནས་འབྱུང་བར་ལུང་བསྟན་པ་ལྟ་བུ་སྟེ་མདོར་ན་འཇམ་མགོན་ཟུར་ཕུད་ལྔ་པ་ཉིད་དཔལ་ལྡན་བླ་མའི་ཚུལ་དུ་བྱོན་པའི་ཞབས་ལ་གསོལ་བ་འདེབས། །གསུམ་པ་འབྲས་བུ་ཤེས་བྱ་རིག་པའི་གནས་ཐུགས་སུ་ཆུད་ཚུལ་ལ། སྐྱེས་སྦྱང་གི་རིགས་ཀྱི་རྟགས་མངའ་ཚུལ་སྤྱིར་བསྟན་པ་དང༌། བྱེ་བྲག་ཤེས་བྱ་རིག་པའི་གནས་ཐམས་ཅད་སྦྱང་བརྩོན་གྱིས་ཐུགས་སུ་ཆུད་ཚུལ་ལོ། །དང་པོ་ལའང་ཐེག་པ་ཆེན་པོའི་རིགས་ཀྱི་ཡོན་ཏན་ཐུགས་ལ་འཁྲུངས་ཚུལ་དང༌། ཆོས་རབ་རྣམ་འབྱེད་མཁྱེན་རབ་ཀྱི་པདྨོ་རྒྱས་པའི་ཚུལ་བསྟན་པའོ། །དང་པོ་ལའང་རྒྱ་ཆེ་བའི་བློ་དང་ཟབ་མོའི་བློ་གྲོས་མངའ་ཚུལ། སྙིང་རྗེ་ཆེན་པོའི་རིགས་ཀྱི་ཡོན་ཏན་རིམ་གྱིས་སད་པའི་ཚུལ་ལོ། །དང་པོ་ནི། བླ་མ་དང་ལྷག་པའི་ལྷའི་བྱིན་རླབས་ཟླ་གཞོན་གྱི་བདུད་རྩིས་ཇི་ཙམ་ནུས་པ་སད་པ་ནི། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང༌། །མོས་པ་དང་ནི་བཟོད་པ་དང༌། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་གསུངས་པ་ལྟར། གདོད་ནས་གོམས་པའི་ལྷན་སྐྱེས་ཐེག་པ་ཆེན་པོའི་རིགས་ཀྱི་ནུས་པའི་ཟླ་ཟེར་གྱིས་ཐུགས་ཀྱི་རྒྱ་མཚོ་ཆེན་པོར་རེག་པ་དེ་ཡི་ཚེ་རྒྱལ་བའི་དགོངས་པ་ཟབ་མོ་སྒྲ་ཇི་བཞིན་དང་ཇི་བཞིན་མ་ཡིན་པར་བསྟན་ཏེ་རྟོག་གེ་དང་ཕལ་པ་ཉན་རང་གི་བློར་འབད་པས་རྟོག་པར་དཀའ་བ་ཡི་ཐམས་ཅད་མཁྱེན་པའི་ལམ་གྱི་བསྒྲུབ་བྱ་བཟོ་གསོ་སྒྲ་ཚད་དང་ནང་དོན་མདོ་སྔགས་ཀྱི་རིག་པའི་གནས་ཆེ་ཕྲ་ཀུན་གྱི་གནད་གསང་གི་ཚིག་དོན་ལ་མི་འཕྲོག་པའི་མཁྱེན་རབ་དང་གཏིང་དཔོག་པའི་བློ་གྲོས་ཀྱི་མཐུ་ཡང་ཇི་ཙམ་ཟབ་ཅིང་རྒྱ་ཆེ་བ་དེ་ལྟ་དེ་ལྟར་ཟབ་པ་འཕེལ་བས་ཚིག་དོན་གྱི་གནད་མཐའ་དག་མི་བརྗེད་པ་དྲན་པའི་གཟུངས་སུ་སྨིན་པར་གྱུར་པས་ཆོས་ཀྱི་རྒྱ་མཚོ་འཕེལ་ཞིང་རྒྱས་པར་མཛད་ནུས་པའི་རིག་ཀྱི་བག་ཆགས་སད་པས་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཟབ་མོའི་དོན་རྟོགས་ཤིང་སད་པའི་ཚུལ་ནི། སྟོན་མཆོག་ཐམས་ཅད་མཁྱེན་པས་གདུལ་བྱའི་དོན་དུ་རྗེས་སུ་གདམས་པའི་ལུང་རྟོགས་དམ་པའི་ཆོས་ཀྱི་དོན་སྤྱི་དང༌། ཁྱད་པར་དུ་ཡང་ཀླུ་སྒྲུབ་ཀྱིས། རྟེན་ཅིང་འབྲེལ་བར་འབྱུང་འདི་རྒྱལ་བ་ཡི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །གང་གི་འདི་ནི་ཡང་དག་མཐོང་བ་དེའི། །སངས་རྒྱས་དེ་ཉིད་རིག་པ་རྣམ་མཆོག་ཡིན། ཞེས་དང༌། རྩ་ཤེས་ལས། གང་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ལྟར། ཐེག་ཆེན་འཕགས་པའི་རྟོགས་རིགས་ཟབ་ཆོས་བརྒྱད་ལྡན་དོན་དམ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཀུན་རྫོབ་ཕྱི་ནང་གི་རྒྱུ་འབྲས་རྟེན་ཅིང་འབྲེལ་འབྱུང་ཟུང་འཇུག་གི་དོན་ལ་ངོ་མཚར་རྨད་དུ་བྱུང་བ་རྒྱལ་བ་བདེན་པར་སྨྲ་བའི་གསུང་གི་གསང་མཛོད་ཀྱི་ཁྱད་ཆོས་ཡིན་པའི་ཡིད་ཆེས་ཀྱི་ངེས་པ་ཕྱིར་མི་ལྡོག་པ་སྙིང་གི་གཏིང་ནས་འཁྲུངས་པ་དཔལ་ལྡན་བླ་མའི་ཞབས་ལ་གསོལ་བ་འདེབས། །གསུམ་པ་འཕགས་པའི་རིགས་ཀྱི་རྟགས་སྙིང་རྗེ་ཆེན་པོའི་རིགས་སད་པའི་རྟགས་ནི། འཕགས་པ་ཆོས་ཡང་དག་པར་སྡུད་པ་ལས། བཅོམ་ལྡན་འདས་བྱང་ཆུབ་སེམས་དཔའ་ཆོས་རབ་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་གཅིག་རབ་ཏུ་བཟུང་ཞིང་རྟོགས་པར་བགྱིས་ན་སངས་རྒྱས་ཀྱི་ཆོས་ཐམས་ཅད་དེའི་ལག་ཏུ་མཆིས་པ་ལགས་སོ། །ཆོས་གཅིག་པོ་སྟེ་གང་ཞེ་ན། འདི་ལྟ་སྟེ། སྙིང་རྗེ་ཆེན་པོའོ། །བཅོམ་ལྡན་འདས་སྙིང་རྗེ་ཆེན་པོ་ནི་སངས་རྒྱས་ཀྱི་ཆོས་ཐམས་ཅད་བྱང་ཆུབ་སེམས་དཔའ་རྣམས་ཀྱི་ལག་མཐིལ་དུ་མཆིས་པ་ལགས་སོ། །བཅོམ་ལྡན་འདས་དཔེར་བགྱིས་ན་འཁོར་ལོའི་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིའོ། །བཅོམ་ལྡན་འདས་དཔེར་བགྱིས་ན་སྲོག་གི་དབང་པོ་མཆིས་ན་དབང་པོ་གཞན་རྣམས་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་དུ་སྙིང་རྗེ་ཆེན་པོ་མཆིས་ན་བྱང་ཆུབ་སེམས་དཔའི་ཆོས་གཞན་རྣམས་ཀྱང་འབྱུང་བར་འགྱུར་རོ། །ཞེས་སོགས་ཐེག་ཆེན་གྱི་མདོ་རྣམས་ནས་རྒྱ་ཆེར་བསྔགས་པ་ལྟར་ཆེད་དུ་དམིགས་པས་བསྒོམས་སྟེ་བཅོས་པ་མིན་ཀྱང་ནད་མཚོན་མུ་གེའི་སྡུག་བསྔལ་གྱི་རྒྱ་མཚོར་ཀུན་འབྱུང་ལས་ཉོན་གྱིས་རླུང་གིས་བར་མེད་དུ་གཡེང་བ་སྙིགས་དུས་ཀྱི་སྲིད་པའི་འགྲོ་བ་ཀུན་ཐབས་མཁས་ཐུགས་རྗེའི་ཞགས་པས་བཟུང་ཏེ་དུས་ནམ་དུ་ཡང་མི་གཏོང་སྙམ་པའི་སྙིང་རྗེ་རྒྱས་པ་བདག་ཅག་གི་རྣམ་འདྲེན་བཞི་པའི་མཆེད་ཟླར་གྲུབ་པ་ནི་བྱང་ཆུབ་སེམས་དཔའི་ཆེ་རྟགས་མ་ནོར་ལྷན་སྐྱེས་སུ་མངའ་བས་རྒྱ་མཚོའི་གཏིང་གི་ནོར་བུའི་འོད་མདངས་ཆུ་གཏེར་ལ་གསལ་བ་བཞིན་རྗེ་བཙུན་འཇམ་དཔལ་དཔའ་བོའི་ཡེ་ཤེས་སྒྱུ་མའི་ཆོ་འཕྲུལ་དུ་ངེས་པའི་རྟགས་གསལ་བར་མངའ་བ་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཆོས་རབ་རྣམས་འབྱེད་ཀྱི་མཁྱེན་རབ་ཀྱི་པདྨོ་རྒྱས་པའི་ཚུལ་ལ་བསྟན་བཤད་གཉིས་ལས། དང་པོ་མདོར་བསྟན་ནི། ཙནྡན་དང་དྲི་བཞིན་སྐྱེས་ཐོབ་ཀྱི་ཆགས་ཐོགས་མེད་པའི་བློ་གྲོས་ཟབ་ཅིང་མྱུར་བ་དང་ལྷག་པའི་ལྷ་ཡབ་གཅིག་སྨྲ་བའི་ཉི་མ་བསྙེན་སྒྲུབ་ཀྱི་ཐུགས་རྒྱུད་བསྐུལ་བའི་སྦྱོར་བརྩོན་ལས་དངོས་གྲུབ་ཏུ་ཐོབ་པའི་མཐུས་སྐུ་ཡི་ན་ཚོད་མ་སྨིན་པའི་བྱིས་པ་ལྟར་ཕྲ་ཡང་ཤེས་བྱ་གནས་ལྔ་རིག་པའི་གཞུང་ཡན་ལག་དང་བཅས་པ། སློབ་དཔོན་གྱི་ཞལ་ཁྲིད་དང་དམ་པའི་སྦྱང་བརྩོན་གྱིས་ཡུན་རིང་བསྒྲིམ་མི་དགོས་པ་བྱིས་པ་སྐུ་རྩེད་མཛད་པའི་ཞར་བྱུང་ལས་ཐུགས་སུ་ཆུད་དེ་ཤེས་པའི་ཚུལ་ནི། རྨད་དུ་བྱུང་བའི་སློབ་དཔོན་ཆེན་པོ་ཞི་བ་ལྷ་དངོས་དཔལ་སྤྲུལ་ཆོས་ཀྱི་དབང་པོ་ལས་སྤྱོད་འཇུག་ཤེར་ལེ་ཞག་ལྔ་ལ་གསན་པས་ལེགས་པར་མཁྱེན་ཏེ་ཕྱིས་སུ་རྣམ་བཤད་ཀེ་ཏ་ཀ་བརྩམས་ནས་མཁས་པའི་གྲགས་སྙན་གྱིས་ཁྱབ་པའི་ཚེ་ཆོས་རྗེ་དཔལ་སྤྲུལ་རིན་པོ་ཆེས་ཀྱང་ཀེ་ཏ་ཀ་ལ་ཞིབ་གཟིགས་གནང་ནས་སྔར་ང་རྫོགས་ཆེན་ཤྲཱི་སེང་དུ་འདུག་སྐབས་བཤད་པ་དེ་སྒྲ་ཇི་བཞིན་དུ་བྱུང་འདུག་ཅེས་གསུངས་པ་དང༌། དགེ་བའི་བཤེས་གཉེན་ཆེན་པོ་འཇུ་དབོན་འཇིགས་མེད་རྡོ་རྗེ་ལས། ཤེར་ཕྱིན་སྡུད་པའི་རྩ་བའི་ལུང་ཙམ་ཞིག་གསན་ནས། དེ་འཕྲལ་ཕར་བཤད་པ་ཟླ་བ་གཅིག་ཏུ་མཛད་པ་དང༌། དགེ་ལུགས་འབུམ་གསར་དགེ་བཤེས་ངག་དབང་འབྱུང་གནས་ལས། དབུ་མ་འཇུག་པ་གསན་དུས་བཤད་ལུང་ཙམ་ལས་འོ་བརྒྱལ་མི་དགོས་ཚུལ་ཞུས་པར། བཤད་ལུང་གནང་འཕྲལ་ཉིད་ནས་རྒྱུགས་ཕུལ་གསུངས་པས། འཇུག་པའི་དབུ་ནས་མར་བཤད་པ་མཛད་པས། དགེ་བཤེས་ཀྱིས། ཕྲན་ནི་དགེ་བཤེས་ཀྱི་མིང་ཐོགས་ན་ཡང་འདིའི་བློ་གྲོས་ཀྱི་ཆ་ཤས་ཙམ་ཡང་མ་མཆིས་སོ་ཞེས་འཁོར་གྱི་དབུས་སུ་བསྔགས་པ་མཛད་པ་སོགས་སྐུ་འཁྲུངས་ནས་རིང་པོར་མ་ལོན་པར་མཁྱེན་རབ་ཀྱི་རྩལ་རྫོགས་པས་རྔོགས་ལོ་ཆེན་པོས། སྔོན་ཚེ་སྦྱངས་བས་སྐྱེ་བ་འདིར། །གཞུང་རྣམས་རྩེད་མོའི་ཞར་ལས་ཤེས། །ཞེས་དང༌། འཇམ་མགོན་ས་སྐྱ་པཎྜི་ཏས། སྐྱེ་བ་སྐྱེ་བ་རྣམས་སུ་ཡང་དང་ཡང༌། །མཁས་པ་མཁས་པ་རྣམས་ལས་སྔོན་སྦྱངས་བས། །ཚེ་འདིར་ལན་རེ་ཟུང་རེ་ཐོས་ཙམ་གྱིས། །གཞུང་ལུགས་ཀུན་ཤེས་ཀུན་དགའ་རྒྱལ་མཚན་དཔལ། །ཕྱོགས་ལས་རྣམ་རྒྱལ་ཕྱོགས་གླང་ཆོས་གྲགས་པས། །གཞུང་མདོ་རྣམ་འགྲེལ་གཞན་དང་བཅས་པ་རྣམས། །ལེགས་པར་རྟོགས་ཤིང་རྟོག་གེའི་ཚུལ་བྱས་ནས། །ཡང་དག་རིག་མཆོག་རིག་པའི་གཏེར་དུ་བསྒྲུབས། །ཞེས་གསུངས་པ་ལྟ་བུའོ། །གཉིས་པ་རྒྱས་པར་བཤད་པ་ལ། དང་པོ་བརྡ་སྤྲོད་གཞུང་ཐུགས་སུ་ཆུད་ཚུལ་ནི། འཇམ་དཔལ་དབྱངས་ཐུ་མིའི་ཞལ་ནས། བསླབ་པ་ཀུན་གྱི་གཞི་འཛིན་ཅིང༌། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། །ཞེས་གསུངས་པ་ལྟར་ཤེས་བྱ་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་མིང་ཚིག་བརྗོད་པས་རྗེས་སུ་མཚོན་དགོས་ཤིང༌། མིང་ཚིག་ཡི་གེའི་སྦྱོར་བ་ལས་འབྱུང་བས་ན་རྒྱ་གར་འཕགས་པའི་ཡུལ་གྱི་ནང་པ་སངས་རྒྱས་པའི་བསླབ་པ་གསུམ་དང༌། ཕྱི་རོལ་པའི་ངེས་བརྗོད། མཆོད་སྦྱིན། སྙན་ཚིག །སྲིད་སྲུང་སྟེ་རིག་བྱེད་ཡན་ལག་བཞི་རྗེས་སུ་བསྟན་ཕྱིར་ཚངས་པའི་ཡི་གེ་ལཉྩ་ན། ཀླུའི་ཡི་གེ་ཝར་ཏུའི་གཙོས་རྒྱ་ཆེར་རོལ་པའི་མདོ་ལས་གསུངས་པའི་ཡི་གེའི་རིགས་དྲུག་ཅུ་རྩ་བཞི་དང༌། བོད་གངས་ཅན་གྱི་ཡི་གེའི་མཆོག་ཐུ་མི་སཾ་བྷོ་ཊའི་ཕྱག་བྲིས་གཟབ་མའམ་དབུ་ཅན་དང༌། བོད་ཡིག་གཤར་མ་དང་ཤེས་བྱ་ཀུན་ཁྱབ་ནང་ལྟོས་གསུངས། མཆན། ལྡན་ལུགས་དང༌། ཡི་གེ་དེ་དག་བསྡེབས་པའི་ཚེ་མིང་གཞི་དང༌། སྔོན་རྗེས་ཀྱི་འཇུག་པ་སོགས་མདོར་ན་མིང་ཚིག་ཡི་གེའི་སྦྱོར་བ་ལས་བྱུང་བའི་ཚིག་གི་འཁྲུལ་པ་སྤོང་བྱེད་བརྡ་སྤྲོད་ཀྱི་གཞུང༌། ཀུན་གྱི་ཕྱི་མོ་ལྟ་བུ་ཙནྡྲ་པའི་གཞུང་ཀུན་མཁྱེན་མ་ཧཱ་པཎྜི་ཏ་སི་ཏུ་དྷརྨཱ་ཀ་རའི་འགྲེལ་ཆེན་གྱི་སྟེང་ནས་འཇམ་མགོན་ལོ་ཆེན་གུ་ཎའི་ཞལ་སྔ་ནས་གསན་སྦྱང་གི་སྒོ་ཕྱེས་ནས། ཀ་ལཱ་པ་དང༌། མཚོ་ལྡན་མའི་གཞུང་རྣམས་ཀྱི་ཚིག་དོན་ལུས་པ་མེད་པ་ཆགས་ཐོགས་བྲལ་བའི་བློ་གྲོས་ཀྱི་རྒྱ་མཚོར་ཡོངས་སུ་ཆུད་དེ། རྒྱ་བོད་ཀྱི་སྐད་གཉིས་ཤན་སྦྱར་ཞེས་པའི་སྒྲ་གཞུང་ཁྱད་འཕགས་དང༌། བརྡ་སྤྲོད་པ་དབྱངས་ཅན་ངག་གི་མེ་ལོང་ཞེས་ཀུན་བཤད་དང་པོ་ཡན་ཆད་ཚིགས་སུ་བཅད་པ། དེའི་ཡན་ལག་སོགས་བསྟན་བཅོས་གསར་རྩོམ་མཛད་འཕྲོ་ཅན་དང༌། མདོ་རྒྱུད་དབྱངས་འཆར་སོགས་མན་ངག་གི་གཞུང་ནས་གསུངས་པའི་ཐབས་ཤེས་དབྱངས་གསལ་སྡེབས་པའི་ཡི་གེའི་འཕྲུལ་འཁོར་ལ་བརྟེན་ནས་ཕན་གནོད་ཀྱི་ལས་རབ་འབྱམས་རྣོ་མྱུར་དུ་བྱེད་པའི་ངོ་མཚར་རྟེན་འབྲེལ་ཟབ་གནད་འཁྲུལ་མེད་རྟོགས་པས་དོན་གཉིས་སྒྲུབ་པར་མཛད་ཅིང་དེར་མ་ཟད་ཕྱག་བྲིས་ཀྱང་སྐུ་ན་གཞོན་དུས་གཞན་གྱི་ཡི་གེ་འབྲི་བ་ལ་གཟིགས་ནས་འབྲི་གནང་བ་ཙམ་ཡིན་ཀྱང་ཕྱིས་ཀུན་གཟིགས་མཁྱེན་བརྩེའི་དྲུང་ཆེན་འཇམ་དཔལ་ལེགས་པའི་བློ་གྲོས་ལས་ཡིག་གཟུགས་བསླབས་ཏེ་དབུ་མ་རྒྱན་གྱི་འགྲེལ་ཆེན་སོགས་ཚུགས་བྲིས་ཤིན་ཏུ་ལེགས་པར་ཕྱག་བྲིས་མཛད་པ་སོགས་བསླབ་སྦྱང་ཕྲན་ཚེགས་ལའང་འབད་བརྩོན་རྒྱ་ཆེར་གནང་ཚུལ་བསྟན་པས་མཚོན་ཤེས་བྱ་རིག་པའི་གནས་ཐམས་ཅད་ཐུགས་སུ་ཆུད་པའི་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ལུས་སྲོག་གསོ་བ་རིག་པའི་གནས་ཐུགས་སུ་ཆུད་ཚུལ་ནི། ཇི་སྐད་དུ། ལུས་དང་བྱིས་པ་མོ་ནད་གདོན་མཚོན་དུག །རྒས་པ་རོ་ཙའི་མན་ངག་ཡན་ལག་བརྒྱད། །ཅེས་གསུངས་པའི་ཡན་ལག་བརྒྱད་དང་ལུས་སེམས་སྡུག་བསྔལ་གྱི་ཚོར་བ་ལས་གསོ་བར་བྱེད་པའི་རིགྃ་པྃ་ཡིྃ་དོན་སྟོན་པའི་གཞུང་རྩ་བཤད་མན་ངག་ཕྱི་མའི་རྒྱུད་བཞི་དང༌། གཡུ་ཐོག་སྙིང་ཐིག་ཆ་ལག་དང་བཅས་པའི་དགོངས་དོན་བྱང་ཟུར་མཁས་པའི་རིང་ལུགས་ཀྱི་ཡན་ལག་གི་ལག་ལེན་མཐའ་དག་ཟུར་མཁར་ཕྱི་མའི་སློབ་བརྒྱུད་དངྃ༌། འཕགས་ཡུལ་རྒྱ་ནག་གི་སྨན་པ་མཁས་པའི་བཤད་རྒྱུན་ལག་ལེན་མཐོང་བརྒྱུད་ཀྱིས་གཏན་ལ་ཕབ་པའི་སྨན་རྒྱལ་གཉིས་པ་ཆོས་ཀྱི་འབྱུང་གནས་ཀྱི་གདན་ས་མདོ་ཁམས་ཤར་དཔལ་སྤུངས་ཐུབ་བསྟན་ཆོས་འཁོར་གླིང་དུ་དབོན་སྤྲུལ་རིན་པོ་ཆེ་ལས་རྒྱུད་བཞིའི་བཤད་ཁྲིད་ཆ་ཚང་དང༌། ཀུན་གཟིགས་མཁྱེན་བརྩེའི་དབང་པོ་ལས། གཡུ་ཐོག་སྙིང་ཐིག་གི་དབང་ཁྲིད་མན་ངག་དང་བཅས་པ། འཇམ་མགོན་ཀོང་སྤྲུལ་རིན་པོ་ཆེ་ལས། རིན་ཆེན་གཙོ་བཀྲུའི་ཕྱག་ལེན་སོགས་གསན་ནས་ཉམས་བཞེས་དང་ཕྱག་བཞེས་མཛད་པས་གསོ་རིག་གི་དགོངས་དོན་ཐམས་ཅད་མ་ནོར་བར་རྟོགས་ཏེ་ཕྱིས་དཔལ་སྤུངས་ནས་རྒྱུད་བཞིའི་བཤད་ཁྲིད་རྒྱས་པ་མན་ངག་ལན་ལེན་དང་བཅས་པ་བསླབ་པ་དང༌། སློབ་མའང་མཁས་པ་མང་དུ་བྱོན་པར་མ་ཟད་གསོ་རིག་གི་གཟའ་བཅོས། རྒྱུད་བཞིའི་དཀའ་མཆན། གཅེས་བཏུས་ཕན་བདེའི་བང་མཛོད་སོགས་སྨན་གྱི་བསྟན་བཅོས་དང༌། སྨན་ཕྲེང་བརྒྱ་རྩ། སྨན་གྱི་སྦྱོར་ཐབས་དུ་མ་གསར་དུ་མཛད་པས་སྔར་ཡོད་ཀྱི་སྨན་ལས་ཀྱང་ཕན་སྟོབས་ཆེ་བ་བྱུང་ཚུལ་ཟླ་ཤེལ་བདུད་རྩི་སྨན་གྱི་ནོར་བུ་ཞེས་ནད་བརྒྱ་སྨན་གཅིག་ཁོ་ནའི་ནུས་པ་ཡང་རིན་ཆེན་མང་སྦྱོར་སོགས་སྨན་ཆེན་རྣམས་དང་ཁྱད་མེད་པ་རྒྱ་བོད་འཚོ་མཛད་མཁས་དབང་ཀུན་གྱིས་བསྔགས་པ། མཛད་བྱང་དུ་དྷཱི་ཡིས་དྷཱ་ཀི་སྒྲུབ་པའི་དུས་སུ་བྲིས་ཞེས་གསུངས་པ་གྲུབ་ཐོབ་ཨོ་རྒྱན་པ་ལ་རྡོ་རྗེ་ཕག་མོས་དངུལ་ཆུ་བཙོ་བཀྲུའི་མན་ངག་གནང་བ་དང་ཁྱད་མེད་པས་མཚོན་པ་ལྟར་འཇམ་མགོན་ཀོང་སྤྲུལ་རིན་པོ་ཆེས་མི་ཕམ་འཇམ་པའི་དབྱངས་ཀྱི་སྨན་སྦྱོར་གསར་པ་འདི་དག་སྨན་གྱི་རོ་ནུས་ཞུ་རྗེས་ལ་བརྟགས་ནས་བརྩམས་པ་ཡིན་བཀའ་འཕྲོས་ལས་གསུངས་ཀྱང༌། དགོངས་གཏེར་ཀློང་བརྡོལ་གྱི་མན་ངག་ཡིན་པས་ཤིན་ཏུ་ཟབ་ཅེས་གསུངས་པ་བཞིན། སྟོན་པ་ཞལ་བཞུགས་དུས་རྡོ་འཇོག་གི་རྒྱལ་པོ་པདྨའི་སྙིང་པོའི་བླ་སྨན་རྒྱུན་ཤེས་བུའི་སློབ་མ་འཚོ་བྱེད་གཞོན་ནུ་གཉིས་པར་ཁམས་བོད་ཀུན་ཏུ་ཡོངས་སུ་གྲགས་པ་དོན་ལ་གནས་པའི་དཔལ་ལྡན་བླ་མའི་ཞབས་ལ་གསོལ་བ་འདེབས། །གསུམ་པ་གདུལ་བྱ་རྗེས་འཛིན་བཟོ་རིག་མཁྱེན་ཚུལ་ནི། ལུས་བཟོའི་གཙོ་བོ་སྐུ་གཟུགས་དང་ཐུགས་རྟེན་གྱི་ཐིག །འཁྲུལ་འཁོར་དང་དཀྱིལ་འཁོར་བྲི་བ། ཡུལ་གླིང་དཔེའི་ཡི་གེ་བྲི་བ། ཕྱག་མཚན་དང་ངག་སྒུགས་ཀྱི་ཚད། གསར་རྙིང་གི་རྒྱུད་ལས་གསུངས་པའི་སྟངས་སྟབས་དང་གར་དང་ཕྱག་རྒྱ། ངག་བཟོའི་མཆོག་འཆད་རྩོད་རྩོམ་པ། དབྱངས་ཀྱི་བྱེ་བྲག་མཆོག་དང་ཕལ་པ། ཡིད་བཟོའི་མཆོག་ཐོས་བསམ་སྒོམ་པ་དང༌། ཕལ་རིག་གནས་བཅོ་བརྒྱད། བརྟག་པ་བརྒྱད་ནས་སྣ་ཚོགས་བཟོ་ཡི་རིག་པའི་གནས་ཤེས་པར་བྱ་བ་རྒྱ་ཆེ་མུ་མེད་རྒྱ་མཚོ་ལྟ་བུ་ལའང་རྫས་ལས་ཐོབ་པའི་བསོད་ནམས་བདུན་སོགས་རྒྱལ་བའི་བསྟན་པ་དང་འཇིག་རྟེན་པའི་ཉེར་མཁོ་ཐམས་ཅད་དེ་ལས་འབྱུང་བར་མཁྱེན་ནས་ཕྱོགས་རེའི་ལམ་གྱིས་ཐུགས་མ་ཚིམ་པས་བློ་མཆོག་ངང་མོ་གཞོན་ནུ་དཀར་བའི་གར་དང་བཅས་ཏེ་བག་ཕེབས་པར་དལ་གྱིས་རོལ་ནས་ཚུལ་བཞིན་རྟོགས་པའི་ཕྱག་རྗེས་ཏེ་རྒྱུད་དང་དབྱངས་འཆར་གྱི་ཡི་གེའི་འཕྲུལ་འཁོར། ཆོས་སྐྱོང་གི་སྲོག་འཁོར་ཕྱག་གིས་འདུ་མཛད་པ་ལ་ཕུལ་དུ་ཕྱིན་པ་དང༌། བཟོ་རིག་གི་བསྟན་བཅོས་ཉེར་མཁོའི་ཟ་མ་ཏོག་དང༌། དཔལ་དུས་ཀྱི་འཁོར་ལོའི་འགྲེལ་ཆེན་དུ་ཀླ་ཀློ་འཇོམས་པའི་སྒྱོགས་ཀྱི་འཕྲུལ་འཁོར་དང༌། གླིང་བྲོ་བདེ་ཆེན་རོལ་མོ། གླུ་བྲོ་གླུ་མའི་རོལ་མོ། རྟེན་འབྲེལ་ལམ་ཡག །འདོད་པའི་བསྟན་བཅོས། ལུགས་ཀྱི་བསྟན་བཅོས་ས་གཞི་སྐྱོང་བའི་རྒྱན། ལུགས་ཀྱི་བསྟན་བཅོས་རྒྱས་བསྡུས་དུ་མ་སོགས་སྲིད་པ་འཕྲུལ་གྱི་ཇུ་ཐིག་གི་གཞུང་ཆེན་པོ་ཡན་ལག་དང་བཅས་པ། འཇམ་དཔལ་གྱི་རིག་སྔགས་ཨ་ར་པ་ཙའི་མོ་རྒྱས་བསྡུས། རྡོ་རྗེ་གཡུ་སྒྲོན་དང༌། དཔལ་ལྡན་ལྷ་མོའི་པྲ་སྒྲུབ། གེ་སར་གྱི་མདའ་མོ་བཙན་གྱི་མོ་མཐོང་གསལ་སྒྲོན་མེས་མཚོན། མོ་པྲ་རྩིས་ཀྱི་བླང་དོར་བརྟགས་པ་སོགས་བསྟན་འགྲོར་ཕན་བདེའི་བཙས་སུ་གསལ་བར་མཛད་པའི་ཚུལ་རྗེ་ཉིད་ཀྱི་གསུང་ལས། ནོར་འཁྲུལ་བསལ་ཕྱིར་གཞན་ལ་བརྩེ་བའི་ཕྱིར། །བླང་དོར་མཐོང་ཕྱིར་གཤེན་ལ་དད་པའི་ཕྱིར། །ཝེར་མ་དགྱེས་ཕྱིར་འཇིག་རྟེན་བདེ་བའི་ཕྱིར། །འབད་པ་དེ་ཡང་དོན་མེད་འགྱུར་མ་ལགས། །འཇམ་དབྱངས་བླ་མའི་དྲིན་ལས་ཤེས་བྱའི་ཚུལ། །གང་ལ་བལྟས་པས་དེ་ཡང་མདུན་དུ་བདར། །ལྷག་བསམ་འོད་དང་འགྲོགས་པའི་བློ་གྲོས་ཀྱི། །ཟླ་བ་འདི་དག་གང་དུ་འགྲོ་ཡང་མཛེས། །ཀྱེ་ཧོ་རྣམ་དཔྱོད་བཟང་པོའི་མིག་ཡངས་ལ། །དགྲ་བླ་ཝེར་མ་དགྱེས་པའི་བརྫུས་གཟུགས་ཀྱི། །འཕྲུལ་ཆེན་མདུད་པ་འདི་ན་བླང་དོར་བརྒྱ། །མ་འདྲེས་གསལ་པོར་འཆར་བ་གཟིགས་མོ་མཛོད། །གཤིན་གྲུ་རྒྱ་མཚོའི་ངོགས་སུ་ཞུགས་པ་ན། །སྣ་ཚོགས་ལྟད་མོ་ནམ་མཁའི་གཏོས་སུ་ཆེ། །སྒྱུ་མའི་རྩེད་འཇོ་མུ་མཐའ་མེད་པ་ཡིས། །འགྲོ་ཀུན་སྐྱོང་བའི་སྨོན་ལམ་ཡུན་རིང་བྱས། །ཡབ་གཅིག་ཉི་མ་འཆར་བའི་སྣང་བ་ཅན། །བདག་བློའི་ཨུཏྤལ་གཞོན་ནུ་སྐྱོངས་ཤིག་དང༌། །མཁའ་མཉམ་སྲིད་པའི་མཐའ་དང་ཤེས་བྱའི་མུ། །དུས་ཀྱི་ཡུན་ལ་སྐྱོ་བར་ང་མི་སེམས། །ཞེས་གསུངས་པ་དང་ཨ་ར་པ་ཙའི་མོ་ལ་རིག་སྔགས་ཀྱི་རྒྱལ་པོ་ཕྱི་ནང་གཞན་གསུམ་གྱི་ཁམས་དང་སྦྱར་བའི་འཕྲུལ་བསྡེབས་ཀྱི་མན་ངག་དཔལ་དུས་ཀྱི་འཁོར་ལོའི་དབྱངས་གསལ་གྱི་ཡི་གེའི་འཕྲུལ་འཁོར་དང་མཚུངས་པའི་དཔྱད་དོན་གྱི་མན་ངག་གསལ་བ་རྡོ་རྗེའི་གསུང་གི་ཉི་མ་བལྟས་པས་ཤེས་ནུས་པ་སོགས་མཁས་པ་གཞན་གྱིས་རྩལ་དུ་མ་བཏོན་པའི་ལེགས་བཤད་སྒྲ་དབྱངས་སྟོང་གི་ཉམས་འགྱུར་གྱི་མགྲིན་རྔ་ལྷག་པར་སྒྲོགས་པའི་ཚུལ་གྱིས་རྒྱལ་བསྟན་རིན་པོ་ཆེ་མཛེས་པའི་རྒྱན་དུ་གྲུབ་པ་དཔལ་ལྡན་བླ་མའི་ཞབས་ལ་གསོལ་བ་འདེབས། །བཞི་པ་དོན་ལ་འཁྲུལ་པ་ཚར་གཅོད་པ་ཚད་མའམ་གཏན་ཚིག་རིགས་པ་མཁྱེན་ཚུལ་ནི། རིགས་ལམ་འདི་ལ་སྔོན་སྦྱང་གི་བག་ཆགས་ཐུན་མིན་དུ་མངའ་བས་ཁྱད་པར་ཞེས་དམིགས་སུ་བཀར་ཏེ་དངོས་བསྟན་ལ་མེད་པའི་ཤེས་བྱ་ཇི་སྙེད་པའི་དོན་ལ་རང་བློ་ལྐོག་གྱུར་དུ་འདོད་པ་ལ་སོགས་པ་ལོག་པར་རྟོག་པའི་དབང་དུ་བྱས་ཏེ་གཞན་རིག་མངོན་སུམ། རང་རིག་ཚད་མས་འཁྲུལ་པ་ཚར་གཅོད་པའི་ཚུར་མཐོང་ཚད་མའི་རིག་པ་གསལ་བྱེད་ཀྱི་ཤིང་རྟ་ཆེན་པོ་ཕྱོགས་ཀྱི་གླང་པོའི་ཚད་མའི་མདོ་ཀུན་ལས་བཏུས་པ་དང༌། དཔལ་ཆོས་ཀྱི་གྲགས་པས་དེའི་དགོངས་འགྲེལ་རྩ་བ་ལུས་ལྟ་བུ་རྒྱས་པ་རྣམ་འགྲེལ། འབྲིང་པོ་རྣམ་ངེས། བསྡུས་པ་རིགས་པའི་ཐིག་པ། གྱེས་བ་ཡན་ལག་ལྟ་བུ་འབྲེལ་བ་བརྟག་པ། གཏན་ཚིགས་ཐིགས་པ། རྩོད་པའི་རིགས་པ། རྒྱུད་གཞན་གྲུབ་པ་བཞི་སྟེ་ཚད་མ་སྡེ་བདུན་དུ་གྲགས་པ་དང༌། མཁན་ཆེན་ཞི་བ་འཚོས་ཚད་མ་བསྡུས་པ། འཇམ་མགོན་ས་སྐྱ་པཎྜི་ཏ་ཆེན་པོའི་སྡེ་བདུན་མདོ་དང་བཅས་པའི་གསལ་བྱེད་ཚད་མ་རིག་པའི་གཏེར་རང་འགྲེལ་དང་བཅས་པ། སློབ་ཚོགས་རྒྱ་བོད་ཀུན་ཏུ་བྱུང་བའི་གཞུང་རྣམས་དང༌། རྒྱལ་དབང་ཀརྨ་པ་བདུན་པ་ཆོས་གྲགས་རྒྱ་མཚོའི་རིག་གཞུང་རྒྱ་མཚོ་སོགས་ཀྱི་དགོངས་དོན་བཀྲལ་བ་ལ་མཁས་དང་རིག་པའི་དབང་ཕྱུག་སུས་ཀྱང་འགྲན་ཟླ་མེད་པའི་བློ་གྲོས་དང་སྤོབས་པའི་གོ་ཆ་ཆེན་པོས་རིག་པའི་ཆུ་ཀླུང་འབུམ་ཕྲག་ཐུགས་ལ་འཁྱིལ་བས་ཚད་མ་རྣམ་འགྲེལ་གྱི་འགྲེལ་ཆེན་ལེགས་བཤད་སྣང་བའི་གཏེར་ཚད་མ་ཀུན་བཏུས་དང༌། རིག་གཏེར་གྱི་མཆན་འགྲེལ། བསྡུས་ཚད་རྩོད་རིག་སྨྲ་བའི་སྒོ་འབྱེད། དོན་རྣམ་ངེས་ཤེས་རབ་རལ་གྲི། བརྡ་ཤན་འབྱེད་ཐེ་ཚོམ་དྲྭ་བ་གཅོད་པའི་རལ་གྲི། ཀླ་ཀློའི་མུན་སེལ་ཉི་མ་སོགས་གཞུང་དང་འགྲེལ་བ་མང་དུ་མཛད་ཅིང༌། ཚད་མ་རྣམ་འགྲེལ་གཟིགས་སྐབས་མནལ་ལམ་དུ་ངོ་བོ་ས་སྐྱ་པཎྜི་ཏ་ཡིན་རྒྱུ་ལ། རྣམ་པ་རྒྱ་གར་གྱི་པཎ་གྲུབ་ཀྱི་ཆ་བྱད་ཅན་ཤངས་རྩེ་ཅུང་ཟད་གུག་པ་ཞིག་གིས་ཚད་མ་རྣམ་འགྲེལ་མི་ཤེས་རྒྱུ་ཅི་ཡོད་དགག་སྒྲུབ་གཉིས་རེད་གསུངས་ནས་ཚད་མ་རྣམ་འགྲེལ་གྱི་པོད་ཞིག་ཕྱག་ན་རལ་གྲི་བསྣམས་པས་དུམ་བུ་གཉིས་སུ་བྱས་ཏེ། དེ་ཉིད་ཀྱི་ཕྱག་ཏུ་བཞག་ནས་འདི་གཉིས་གཅིག་ཏུ་སྡོམ་གསུངས་པས། དེ་གཅིག་ཏུ་སྡོམ་མ་ཐག་རལ་གྲི་ཞིག་ཏུ་གྱུར་ཏེ་རྗེ་ཉིད་ཀྱི་མདུན་དུ་ཤེས་བྱའི་ཆོས་ཐམས་ཅད་ཡོད་པ་ལྟ་བུའི་སྣང་བ་ལ་རལ་གྲི་དེ་གཅིག་གཡུག་པས་ཐམས་ཅད་ཐོགས་མེད་དུ་དུས་གཅིག་ལ་ཆོད་སོང་བའི་ཐུགས་སྣང་གསལ་བར་བྱུང་བས་ཕྱིར་ཉིན་ནས་རྣམ་འགྲེལ་ལ་མི་ཤེས་པ་ཚིག་གཅིག་ཀྱང་མ་བྱུང་ཞེས་གསོལ་དཔོན་པདྨ་ལ་གསུངས་པ་བཞིན་ཕྱོགས་ཐམས་ཅད་ལས་རྣམ་པར་རྒྱལ་བའི་རིག་པར་སྨྲ་བའི་མཆོག་གྲུབ་པའི་སློབ་དཔོན་ཆོས་ཀྱི་གྲགས་པའི་མཁྱེན་རབ་ཀྱི་ཉིན་བྱེད་མ་སྨས་པར་སྙིང་ལ་ཤར་བ་མཁྱེན་རབ་ཀྱི་འདབ་སྟོང་རབ་ཏུ་གྲོལ་བའི་དཔལ་ལྡན་བླ་མའི་ཞབས་ལ་གསོལ་བ་འདེབས། །བཞི་པ་རིག་པའི་གནས་ཆུང་ཀུན་གྱི་ཡ་གྱལ་སྙན་ངག་སྨྲ་བའི་དབང་ཕྱུག་ཏུ་གྱུར་པའི་ཚུལ་ནི། ཆོས་རབ་རྣམ་འབྱེད་ཀྱི་བློ་གྲོས་ཕུན་སུམ་ཚོགས་པའི་དཔལ་དང་ལྡན་པ་ལ་ཡིད་ཀྱི་བརྟན་པ་དབང་མེད་འཕྲོག་སྟེ་མངའ་བར་བྱེད་པ་མཁས་ཚུལ་གསུམ་གྱི་མཆོག་རྩོམ་པ་བཟང་པོ་སྙན་ངག་གི་ལེགས་བཤད་ཚིག་དོན་ཕུན་སུམ་ཚོགས་པའི་ལེགས་བཤད་ལྷ་ཡི་བདུད་རྩི་ཟད་པ་མེད་པ་ཁའམ་ཞལ་གྱི་སྒོ་ནས་གཡོ་བའི་རོ་བཅུད་མྱོང་བས་དབྱངས་ཅན་མགྲིན་པར་ཆགས་པའི་རྣམ་དཔྱོད་ཅན་དུ་གྱུར་པའི་ཚུལ་སྙན་ངག་མེ་ལོང་གི་འགྲེལ་པ་དབྱངས་ཅན་དགྱེས་པའི་རོལ་མཚོ་ཞེས་སྔ་འགྲེལ་རྣམས་ལས་ཀྱང་ལྷག་པའི་ཚུལ་གཞུང་ཉིད་ལ་གཟིགས་པས་ཤེས་ནུས་ལ། སྤྱིར་གོང་དུའང་སྨོས་པ་ལྟར་སྐུ་གཞོན་དུས་ནས་ཚིགས་བཅད་གསུངས་པ་ལ་ཐོགས་པ་མེད་ཀྱང་རྗེ་ཉིད་ཀྱི་ཞལ་འཕྲོས་ལས། ངས་མཁས་པའི་རྣམ་དཔྱོད་ཁོ་ན་རྩལ་དུ་བཏོན་ནས་བརྩམས་ན་བཀའ་འགྱུར་དང་བསྟན་འགྱུར་གྱི་པོད་གྲངས་ཙམ་བྲིས་ཀྱང་ཤེས་མོད་དེ་བས་ད་ལྟ་བརྩམས་པ་འདི་རྣམས་གཞུང་སྔ་མ་རྣམས་སུ་མི་གསལ་བའི་ཟབ་གནད་ཁྱད་པར་ཅན་གསལ་བྱེད་དང༌། བསྟན་པ་སེམས་ཅན་གྱི་དོན་དུ་འགྱུར་ངེས་ཀྱི་དགོས་པ་གཟིགས་ནས་བྲིས་པ་མ་གཏོགས་མེད་ཅེས་གསུངས་པ་དང༌། ཞེ་ཆེན་རྒྱལ་ཚབ་རིན་པོ་ཆེ་འཇམ་དབྱངས་བློ་གྲོས་རྒྱ་མཚོ། མི་ཕམ་འཇམ་པའི་དབྱངས་དཀར་མོ་སྟག་ཚང་དུ་སྒྲུབ་པ་ལ་བཞུགས་པའི་སྐབས་སྐུ་མདུན་དུ་ཕེབས་ནས་བཀའ་བརྒྱད་ཀྱི་རྣམ་བཤད་ཅིག་མཛད་གྲུབ་པར་ཞུས་པས། ཞལ་ནས་རང་བཞིན་གྱིས་བསམ་མནོ་བཏང་སྟེ་བྲིས་ན་སུ་ལའང་བྲི་རྒྱུ་ཡོད་མོད། དེ་ལ་དགོས་པ་མེད། སྐབས་འགར་བླ་མ་དང་ལྷག་པའི་ལྷས་ཐུགས་རྗེ་ལ་བརྟེན་ནས་རང་བཞིན་གྱིས་སེམས་ལ་ཤར་ཏེ་བཟོ་བཅོས་སོགས་ཆེར་མ་དགོས་པར་འབད་མེད་དུ་བྲི་ཆོག་པ་ཞིག་ཡོད་དར་བས་དེ་ལྟར་བྱུང་ན་ལས་སླ་ཞིང་དགོས་པ་ཆེ་བ་ཞིག་ཡོད་པས་དེ་བར་རེ་ཞིག་སྒུག །ཁྱེད་ནས་ཀྱང་བླ་མ་དང་ཡི་དམ་ལ་གསོལ་བ་ཐོབ། ཆོས་སྲུང་ལ་ཕྲིན་བཅོལ་རེ་ཡང་གྱིས་ཞེས་བཀའ་ཕེབས་པ་འདི་ལ་གོ་རྒྱུ་གནད་ཆེན་ཞིག་ཡོད་པར་འདུག་གསུངས་པ་དང༌། ཀུན་གཟིགས་མཁྱེན་བརྩེའི་དབང་པོས་ཀྱང་མི་ཕམ་ལ་རྩོམ་པ་ག་ཚད་བསྐུལ་ཀྱང་དོན་དང་དགོས་པ་ཆེན་པོ་ཞིག་མ་མཐོང་བར་གང་བྱུང་དུ་ཚིགས་བཅད་གཅིག་བྲིས་མ་རེད་ཅེས་གསུངས་ཤིང༌། བཅུད་ལེན་གྱི་ཡན་ལག་བདུད་རྩིའི་བུམ་བཟང་ལས། །རིག་པའི་རྩལ་ལས་མ་བྲིས་ཐབས་མེད་བྱུང༌། །རང་བཟོ་མ་ཡིན་རྒྱལ་གསུང་དཔང་ཏུ་བཞག །འདྲ་བཅོས་མ་ཡིན་ལྷ་ཡི་བྱིན་རླབས་ཡིན། །དོན་མེད་མ་ཡིན་དོན་ཆེན་གཏེར་དང་ལྡན། །ཞེས་གསུངས་པ་རྣམས་དོན་གཅིག་ལ་གསུང་རྩོམ་གནང་བ་རྣམས་ཀྱི་ཁྱད་ཆོས་ཡོད་ཚུལ་ཡང༌། ཨ་ཛི་ཏས་བརྩམས་པ། ཚིག་གཅིག་གིས་ཀྱང་དོན་གྱི་རྣམ་འགྱུར་བརྒྱ། །གསལ་བར་མཐོང་བ་དྭངས་ཤེལ་མེ་ལོང་འདྲ། །ཟབ་མོའི་གནད་བརྒྱ་འགག་གཅིག་གིས་བཀྲོལ་བ། འཕྲུལ་འཁོར་མཁས་པས་གསང་ཐག་བཀྲོལ་བ་བཞིན། །ཚིག་གསལ་དོན་ཟབ་འཁྲུལ་བྲལ་ཐེ་ཚོམ་གྱི། །མདུད་པ་ཀུན་འགྲོལ་ཡིད་འོང་སྙན་ངག་ལྡན། །བློ་ལྡན་སུ་ཡིས་མཐོང་ཡང་ཡིད་འཕྲོག་པ། །ཁྱེད་ཀྱི་གསུང་དང་མཚུངས་པ་གཞན་མ་མཆིས། །བལྟས་ན་བློ་གྲོས་གསལ་བྱེད་ཉི་མ་འདྲ། །བསམ་ན་ཀུན་དགའི་དཔལ་སྦྱིན་ཟླ་བའི་ཚུལ། །རྟོགས་ན་མི་ལྡོག་ཡིད་ཆེས་རྒྱལ་གསུང་བཞིན། །དེ་ཕྱིར་ཁྱེད་གསུང་ཟོལ་མེད་དད་པས་བསྟོད། །ཅེས་མེ་རྟ་ཟླ་༡༢ཚེས་༡༢ལའོ། །ཞེས་མི་འཇིགས་སེང་གེའི་སྒྲ་བསྒྲགས་པ་ལྟ་བུའོ། །རྗེ་བླ་མའི་ཐུགས་ཟིན་སློབ་མའི་ཁྱུ་མཆོག་མཁན་ཆེན་ཀུན་དཔལ་ཞབས་ནས་ཀྱང༌། ཁྱེད་བློ་གསལ་རྣམས་དང་པོ་ཀུན་མཁྱེན་མི་ཕམ་རིན་པོ་ཆེའི་གཞུང་འགྲེལ་ལ་ཐོས་བསམ་གྱིས། དེ་ནས་མཁས་པ་གཞན་གྱི་གསུང་ལ་ལྟོས། སླར་ཡང་མི་ཕམ་རིན་པོ་ཆེའི་གསུང་ལ་ལྟོས་དང་མཁས་པ་སུས་གསུང་དང་མི་འདྲ་བའི་ཁྱད་ཆོས་མཇལ་བར་ངེས་ཞེས་གདམས་པ་མཛད་པ་ཡིན་ནོ། །གཉིས་པ་སྐར་ནག་གི་རྩིས་རིག་མཐའ་དག་མཁྱེན་ཚུལ་ནི། སྐུ་ན་ཆེས་གཞོན་པའི་སྐབས་སྐུ་ཞང་ལས་ནག་རྩིས་བསླབ་ཚུལ་བསྟན་ཏེ། སྐར་རྩིས་ཤེས་ན་གྲངས་ལ་མི་རྨོངས་ཞེས་ཕྱི་ནང་ཐུན་མོང་གི་སྤྱིར་རིག་པའི་གནས་ཆུང་གི་བྱེ་བྲག་གཞུང་དུ་ཡོངས་སུ་གྲགས་ཀྱང༌། ནང་པས་དཔལ་རྒྱུད་ཀྱི་རྒྱལ་པོ་དུས་ཀྱི་འཁོར་ལོ་ལས་གསུངས་པའི་དགོངས་པ་ལྟར་ཆེས་ཟབ་པའི་ངོ་མཚར་ཏེ། དོན་དམ་དེ་ཁོ་ན་ཉིད་སྟོང་པ་སྤྲོས་བྲལ་གྱི་གནས་ལུགས་དེ། འཁྲུལ་ཚུལ་མ་རིག་པས་བསླད་པའི་དབང་གིས་གཞལ་བྱ་ཡུལ་ཡུལ་ཅན་ནམ་ཕྱི་འཇིག་རྟེན་གྱི་ཁམས་དང༌། ནང་རྡོ་རྗེའི་ལུས་ཀྱི་གནས་ལུགས་རྩ་རླུང་ཐིག་ལེའི་བཀོད་པ་དང་འགྲོ་འོང༌། གཞན་སེམས་ཀྱི་ཁམས་སོགས་སམ། ཟླ་ཉི་སྒྲ་གཅན་གྱིས་མཚོན་པའི་གསུམ་ཆོས་སོགས་རགས་སྣང་མཐའ་ཡས་པ་སོ་སྐྱེ་རྣམས་ཀྱིས་བརྩི་བྱའི་གཞི་དང༌། འཇལ་བྱེད་རྟེན་འབྲེལ་འབྱུང་བའི་གྲངས་ཀྱི་རིགས་པ་ནི་བརྩི་བའི་ཚུལ་ལམ་རྩི་བྱེད་ཀྱི་གནད་ཐམས་ཅད་ལ་རང་བྱན་ཆུད་པ་དང༌། རྗེ་བཙུན་འཇམ་དབྱངས་ཏྲི་ཤའི་ཤིང་གི་ལྦ་བ་ལས་ཁྱེའུ་ལོ་བརྒྱད་ཀྱི་ཚུལ་དུ་བསྟན་ནས་ལྷ། ལྷ་མིན་སྡེ་བརྒྱད་མི་ཡི་འཁོར་ལ་བསྟན་པའི་སྤོར་ཐང་རྩིས་ཀྱི་གཙུག་ལག་གསུངས་ཏེ་གཏེར་དུ་སྦས་པ། འཕགས་པ་སྤྱན་རས་གཟིགས་ཀྱི་གུ་རུ་རིན་པོ་ཆེ་ལ་བསྐུལ་ནས་སློབ་དཔོན་ཆེན་པོ་ཚངས་པ་གདོང་བཞི་རུ་སྤྲུལ་ཏེ། ལྷ་མོ་རྣམ་རྒྱལ། ཀླུ་རྒྱལ་འཇོག་པོ་སོགས་ལ་བསྟན་ཏེ། གནས་པའི་རུས་སྦལ་ཆོས་ཀུན་གྱི་གནས་ལུགས་དེ་བཞིན་ཉིད། ཆགས་པའི་རུས་སྦལ་མཁའ་སོགས་འབྱུང་ལྔའི་དཀྱིལ་འཁོར་ལས་སྣོད་བཅུད་ཀྱི་འཇིག་རྟེན། སྲིད་པའི་རུས་སྦལ་སྤར་ཁའི་ལྷ་ཆེན་བརྒྱད་སོགས་ལེགས་ཉེས་ཀྱི་སྟངས་འཛིན་པས་བདེ་སྡུག་སྣ་ཚོགས་སུ་སྣང་བ་ལ་བླང་དོར་གྱི་མིག་འབྱེད་པའི་ཕྱིར་བརྩི་བྱ་འབྱུང་བ་ལྔ་ལ། རྩི་བྱེད་རང་བཞིན་གཞི་ཡི་གཙུག་ལག་དང༌། འབྱུང་བ་རང་རྒྱུད། སྣང་བ་ཡུལ། གཅོད་བྱེད་ཡིད། འཛིན་པ་སེམས་ཀྱི་གབ་རྩེ་བཞིས་བསྡུས་པའི་མ་རིག་འཁྲུལ་སྣང་གི་གཙུག་ལག་གཉིས་ཀྱི་སྒོ་ནས་ལྐོག་གྱུར་ལེགས་ཉེས་ལུང་བསྟན་པའི་འབྱུང་རྩིས་སམ་ནག་རྩིས་ཀྱི་རིག་པའི་གཞུང་ཟབ་ལ་རྒྱ་ཆེ་བ་རྒྱ་མཚོ་ཆེན་པོའི་འཇིང་གི་གབ་སྦས་མན་ངག་ཟབ་གནས་དང་བཅས་པ་ཆ་ཤས་ཙམ་ཡང་ལུས་པ་མེད་པ་བློ་གཏེར་རྡོ་རྗེ་རྣོན་པོའི་མཁྱེན་རླབས་ཀྱིས་ཚིག་དོན་མ་ལུས་མཐོང་བའམ་ཐུགས་སུ་ཆུད་དེ་དེ་ཡི་དགོངས་དོན་ཟབ་མོའི་མན་ངག་གི་གནད་གསལ་བར་བྱེད་པའི་དབྱངས་འཆར་གྱི་འགྲེལ་ཆེན། རྩིས་གཞུང་གཉིས་ཀྱི་སྔོན་འགྲོ་དང་ནག་རྩིས་ཀྱི་བརྗེད་བྱང་སོགས་བཞུགས་ཏེ། དེ་དག་ཀྱང་སྤྱོད་འཇུག་ལས། །རྒྱལ་བའི་སྲས་ཀྱི་མི་བསླབ་པ། །དེ་ཉིད་གང་ཡང་ཡོད་མ་ཡིན། །དེ་ལྟར་གནས་པའི་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་གསུངས་པ་ལྟར་རྒྱལ་བའི་དབང་པོ་ཀརྨ་པ་རང་བྱུང་རྡོ་རྗེའི་ཕྱི་དུས་ཀྱི་འཁོར་ལོའི་དགོངས་པ་ཐུགས་སུ་ཆུད་དེ་རྩིས་ཀུན་བསྡུས་པའི་བསྟན་བཅོས། ནང་དུས་ཀྱི་འཁོར་ལོའི་དགོངས་པ་མངོན་དུ་གྱུར་པས་ཟབ་མོ་ནང་དོན། གཞན་དུས་ཀྱི་འཁོར་ལོའི་དགོངས་པ་མངོན་དུ་གྱུར་པས་སྙིང་པོ་བསྟན་པ་དང༌། རྣམ་ཤེས་ཡེ་ཤེས་འབྱེད་པའི་བསྟན་བཅོས་མཛད་པ་བཞིན། །སྐར་ནག་རྩིས་ཀྱི་སྦས་དོན་དབྱངས་འཆར་གྱི་ཐུན་མོང་མ་ཡིན་པའི་ཟབ་གནད་དང༌། དཔལ་དུས་ཀྱི་འཁོར་ལོའི་བསྡུས་པའི་རྒྱུད་ཀྱི་ཟབ་མོའི་གསང་བ་ཐམས་ཅད་གསན་བསམ་སྒོམ་གསུམ་གྱི་རང་ཕྱན་ཚུད་པས་མཁས་གྲུབ་སུས་ཀྱང་འགྲན་ཟླ་བྲལ་བའི་དཔལ་ལྡན་བླ་མའི་ཞབས་ལ་གསོལ་བ་འདེབས། །བརྩམ་འཕྲོས་ལུས །}} | ༄༅། ཨོཾ་སྭསྟི་ཤྲཱི་བི་ཛ་ཡནྟུ། དེ་ལ་འདིར་འཕགས་ཡུལ་གྱི་ཤིང་རྟ་ཆེན་པོ་རྣམས་དང་མཁྱེན་རྟོགས་རྣམ་དབྱེར་མ་མཆིས་པའི་ངེས་པ་དོན་གྱི་ཐམས་ཅད་མཁྱེན་ཅིང་གཟིགས་པ་མི་ཕམ་འཇམ་དཔལ་དགྱེས་པའི་རྡོ་རྗེའི་ཞལ་གསུང་རྣམ་ཐར་གསོལ་འདེབས་ལ། རྗེ་ཉིད་ཀྱི་གསུང་དང་རྣམ་ཐར་གྱི་ཟེགས་མ་གང་ཐོས་སྒྲོ་བཀུར་གྱིས་མ་བསླད་པས་བརྒྱན་ཏེ་ཚིག་འགྲེལ་བཀོད་པ་ལ། ན་མོ་གུ་རུ་མཉྫུ་ཤྲཱི་ཡེ། ཞེས་པ་ནི། རྗེ་ཉིད་ཀྱི་རིགས་ཀྱི་བདག་པོ་ཐུན་མོང་མ་ཡིན་པ་འཇམ་དབྱངས་མཁྱེན་བརྩེའི་དབང་པོ་དང༌། འཇམ་མགོན་བློ་གྲོས་མཐའ་ཡས། ལབ་སྐྱབས་མགོན་དབང་ཆེན་དགྱེས་རབ་རྡོ་རྗེ། འཇིགས་མེད་ཆོས་ཀྱི་དབང་པོ་སོགས་ཐམས་ཅད་རྗེ་བཙུན་འཇམ་དཔལ་དབྱངས་ཀྱི་སྤྲུལ་པ་ཡིན་ཅིང༌། རྗེ་ཉིད་ཀྱི་ལྷག་པའི་ལྷ་ཐུན་མོང་མ་ཡིན་པའང་འཇམ་དཔལ་ཞི་ཁྲོ་ཡིན་པ་དང༌། ངེས་པའི་དོན་དུ་རྗེ་ཉིད་ཀྱི་སྤྲུལ་གཞིའང་ཡིན་པ། བླ་མ་འཇམ་དཔལ་ལ་ཕྱག་འཚལ་ལོ། །ཞེས་ལེགས་སྦྱར་གྱི་སྐད་དུ་ཕྱག་འཚལ་བས་རྣམ་ཐར་གྱི་དངོས་པོ་མདོར་བསྟན་པའོ། །གཉིས་པ་རྒྱས་པར་བཤད་པ་ལ། སྤྲུལ་གཞི་དང༌། སྤྲུལ་པ་དངོས་ཀྱི་རྣམ་ཐར་རོ། །དང་པོ་ནི། རྗེ་བླ་མ་འདི་སུ་ཞིག་གི་རྣམ་འཕྲུལ་ཡིན་སྙམ་ན། རྗེ་བླ་མ་མཆོག་གི་ཞལ་ལས། མགོན་པོ་མཁྱེན་རབ་མངའ་བདག་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་རྣམ་པར་མི་རྟོག་པའི་ཆོས་ཀྱི་སྐུ་གཅིག་པུར་གྱུར་པ་བྱང་ཆུབ་སེམས་དཔའི་ཚུལ་གྱིས་ནམ་མཁའ་དང༌། ཆོས་ཀྱི་དབྱིངས་ཇི་སྲིད་དུ་བཞུགས་ནས། ལ་ལར་ཡོན་ཏན་མ་ལུས་རྫོགས་པའི་སངས་རྒྱས་དང༌། ལ་ལར་རྒྱལ་བའི་སྲས་ཀྱི་ཐུ་བོ་དང༌། ལ་ལར་ཡོན་ཏན་ཡོངས་སུ་རྫོགས་པ་དང༌། ལམ་ལ་སློབ་པ་དང༌། ལ་ལར་ཕལ་པའི་གཟུགས་ཀྱིས་མཛད་པ་སྣ་ཚོགས་པའི་སྒོ་ནས་རྒྱལ་དང་རྒྱལ་སྲས་ཐམས་ཅད་ཀྱི་མཛད་པ་ཇི་སྙེད་པ་དང༌། སེམས་ཅན་གྱི་ཁམས་ཇི་སྙེད་པར་འཇུག་པ་རྣམ་ཐར་བསམ་གྱིས་མི་ཁྱབ་པ་ལ་གནས་པ་སྟེ། ཞེས་གསུངས་པ་ལྟར། མདོ་རྒྱུད་ཀྱི་ལུང་དང་སྦྱར་བས་འཆད་ན། བསྟོད་པ་གླུར་བླང་གི་ལེའུ་ལས། མཆོག་གི་དང་པོ་སྐུ་གསུམ་འཆང༌། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །ཞེས་གསུངས་པ་ལྟར། ཆོས་དབྱིངས་ཀུན་ཏུ་ཁྱབ་པའི་རྒྱལ་བ་སྲས་བཅས་ཀུན་གྱི་རྣམ་པ་ཐམས་ཅད་མཁྱེན་པའི་ཤེས་རབ་གཅིག་ཏུ་བསྡུས་པའམ་འདུས་པ་ནི་འཇམ་མགོན་གཞོན་ནུ་ཞེས་གྲགས་པ་སྟེ། ཡེ་ཤེས་སྒྱུ་འཕྲུལ་དྲྭ་བའི་རོལ་གར་ཇི་ལྟར་བསྟན་པའི་ཚུལ་ནི། སྔ་འགྱུར་གྱི་ཆོས་སྡེ་འཇམ་དཔལ་སྒྱུ་འཕྲུལ་དྲྭ་བའི་རྒྱུད་ཕྱི་མ་ལས། འཇམ་དཔལ་འདི་ནི་དཔལ་འགྱུར་རྫོགས་པའི་སྐུ། །ཐུན་མོང་མ་ཡིན་གཉིས་མེད་ཁྱབ་པའི་ཆོས། །དུས་གསུམ་མཉམ་རྫོགས་རྒྱལ་བ་ཀུན་གྱི་ཡབ། །ཆོས་དབྱིངས་ཡུམ་ཉིད་སེམས་དཔའ་སྲས་མཆོག་སྟེ། །ཞེས་གསུངས་པ་ལྟར་འཇམ་དཔལ་གསང་རྒྱུད་ལས། ང་ནི་དུས་གསུམ་སྔོན་དུ་བྱུང༌། །སངས་རྒྱས་ཀུན་གྱི་སྔོན་དུ་བྱུང༌། །ང་ནི་དུས་གསུམ་ཕྱིས་ཀྱང་བྱུང༌། །ང་ནི་དུས་གསུམ་ད་ལྟར་བྱུང༌། །ཞེས་སངས་རྒྱས་ཀུན་གྱི་ཐོག་མའི་ཚུལ་གྱིས་སངས་རྒྱས་ཐམས་ཅད་དང་པོ་བྱང་ཆུབ་ཏུ་ཐུགས་བསྐྱེད་པའི་བཤེས་གཉེན་དང༌། བར་དུ་བྱང་ཆུབ་ཀྱི་སྤྱོད་པ་སྤྱད་པའི་ཚེ་གྲོགས་ཀྱི་ཚུལ་དང༌། ཐ་མ་མངོན་པར་སངས་རྒྱས་པའི་ཚེ་སྲས་ཀྱི་ཐུ་བོའི་ཚུལ་དུ་མཛད་པས་ན་རྒྱལ་བ་ཐམས་ཅད་བསྐྱེད་པའི་ཡབ་ཏུ་གྱུར་བ་དང༌། དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས། ལྷོ་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སུམ་སྟོང་བར་འདས་པ་ན་འཇིག་རྟེན་གྱི་ཁམས་མཉམ་པ་ཞེས་བྱ་བར། བཅོམ་ལྡན་འདས་དེ་བཞིན་གཤེགས་པ་ཀླུའི་རིགས་མཆོག་ཅེས་བྱ་བ་བྱུང་སྟེ་སྐུ་ཚེའི་ཚད་ནི་ལོ་བཞི་ཁྲིར་གྱུར་ཏོ། །བྱང་ཆུབ་སེམས་དཔའི་ཐེག་པས་སེམས་ཅན་བྱེ་བ་ཕྲག་བདུན་ཅུ། ཉན་ཐོས་ཀྱི་ཐེག་པས་སེམས་ཅན་བྱེ་བ་ཕྲག་བརྒྱད་ཅུ། རང་སངས་རྒྱས་ཀྱི་ཐེག་པས་སེམས་ཅན་བྱེ་བ་ཕྲག་དགུ་ཅུ་རྩ་དྲུག་སྨིན་པར་བྱས་ནས། དེ་བཞིན་གཤེགས་པ་དེའི་ཉན་ཐོས་ཀྱི་དགེ་འདུན་དཔག་ཏུ་མེད་པར་གྱུར་ནས། མྱ་ངན་ལས་འདས་ནས་མཆོད་རྟེན་བྱེ་བ་ཕྲག་སུམ་ཅུ་རྩ་དྲུག་ཏུ་གྱུར་ཏེ་སེམས་ཅན་གྱི་དོན་མཛད་པར་གསུངས་བ་དང༌། སོར་མོའི་ཕྲེང་བ་ལ་ཕན་པའི་མདོ་ལས། འདི་ནས་བྱང་ཕྱོགས་སུ་འཇིག་རྟེན་གྱི་ཁམས་རྟག་པར་རབ་ཏུ་དགའ་བ་སྡུག་ཅིང་མོས་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མོས་པ་རབ་ཏུ་དགའ་བའི་སྙིང་པོ་ནོར་བུ་རིན་པོ་ཆེ་བརྩེགས་པའི་རྒྱལ་པོ་ཞེས་བྱ་བར་ད་ལྟ་འཚོ་ཞིང་གཞེས་ལ་ཆོས་སྟོན་པ་དེ་ཉིད་འཇམ་དཔལ་གཞོན་ནུར་གྱུར་པ་འདི་ཡིན་ནོ། །སངས་རྒྱས་དེའི་ཞིང་ན་ཉན་རང་མེད་ལ། རྒ་བ་དང་ན་བ་སོགས་སྡུག་བསྔལ་མེད་ཅིང༌། སེམས་ཅན་ཐམས་ཅད་བདེ་བ་ཐམས་ཅད་དང་ལྡན་ལ་ཚེ་དང་གཟི་བརྗིད་དཔག་ཏུ་མེད་དོ། །ཞེས་དང༌། སྙིང་རྗེ་པདྨ་དཀར་པོ་ལས། འཇམ་དཔལ་ཁྱོད་ནི་མ་འོངས་པའི་དུས་བསྐལ་པ་གྲངས་མེད་པ་གང་གཱའི་ཀླུང་གི་བྱེ་མ་སྙེད་གཉིས་འདས་ནས་གསུམ་པར་བབ་པའི་ཚེ། ལྷོ་ཕྱོགས་སུ་འཇིག་རྟེན་གྱི་ཁམས་རྡུལ་བྲལ་ཡང་དག་བསགས་པར་ཞེས་བྱ་བ་མི་མཇེད་ཀྱི་འཇིག་རྟེན་ཀྱང་དེའི་ཁོངས་སུ་འདུས་ཤིང་ཆུད་པ་དེར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་གཟིགས་ཞེས་བྱ་བར་འགྱུར་རོ། །ཞེས་གསུངས་སོ། །ཡང༌། སྟོང་ཉིད་ཅི་ལའང་མ་རེག་ལྷུན་གྱིས་གྲུབ། །དོན་ཀུན་འབྱོར་བས་བླང་དོར་མེད་པ་ཡི། །བདག་ཉིད་རང་བཞིན་བཞག་དང་འཇམ་དཔལ་ཉིད། །བསམ་གྱིས་མི་ཁྱབ་མི་གནས་མི་སེམས་གང༌། །འཇམ་དཔལ་ཉིད་དང་ཡོན་ཏན་རྫོགས་པར་མཉམ། །ཞེས་དང༌། སངས་རྒྱས་ཕལ་པོ་ཆེ་ལས། འཇམ་དཔལ་གཞོན་ནུར་གྱུར་པ་དེ་ནི་སངས་རྒྱས་བྱེ་བ་ཕྲག་ཁྲིག་བརྒྱ་སྟོང་གི་ཡུམ་ལྟ་བུའོ། །ཞེས་གསུངས་པ་ལྟར་ཆོས་དབྱིངས་ཤེས་རབ་ཀྱི་ཕ་རོལ་ཏུ་ཕྱིན་མ་འཕགས་བཞི་བསྐྱེད་པའི་ཡུམ་ཆེན་མོ་ཉིད་དང་འཇམ་དཔལ་གཉིས་ཡེ་ཤེས་ཀྱི་དབྱིངས་གཅིག་པས་རྡོ་རྗེ་དབྱངས་ཅན་མ་སོགས་དང་ཐ་མི་དད་པ་དང༌། དཀོན་མཆོག་བརྩེགས་པའི་ལེའུ་བཅོ་ལྔ་པ་འཇམ་དཔལ་ཞིང་གི་ཡོན་ཏན་བཀོད་པ་ལས། ཤར་ཕྱོགས་འཇིག་རྟེན་གྱི་ཁམས་འབྱུང་བ་བཟང་པོ་ཞེས་བྱ་བར་འཇམ་དཔལ་འཁོར་ལོའི་བསྒྱུར་བའི་རྒྱལ་པོ་ནམ་མཁར་གྱུར་ནས་བྱང་ཆུབ་ཏུ་ཐུགས་བསྐྱེད་པས་རྗེས་སུ་འབྲང་བའི་སྲོག་ཆགས་བྱེ་བ་ཉི་ཤུས་བྱང་ཆུབ་ཏུ་སེམས་བསྐྱེད་པར་གསུངས་པ་དང༌། ཐུན་མོང་ཡོངས་སུ་གྲགས་པར་ས་བཅུའི་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱི་སྲས་ཀྱི་ཐུ་བོའི་ཚུལ་གྱིས་འགྲོ་ཁམས་ཇི་སྲིད་བར་འཚང་མི་རྒྱ་བར་སེམས་ཅན་གྱི་དོན་མཛད་པར་གསུངས་པ་དང༌། དཀོན་མཆོག་བརྩེགས་པའི་ཆོ་འཕྲུལ་ཆེན་པོ་བསྟན་པའི་ཆོས་ཀྱི་རྣམ་གྲངས་ལས། སྔོན་འདས་པའི་དུས་བསྐལ་པ་ཆེས་གྲངས་མེད་པའི་ཕ་རོལ་ན་བསྐལ་པ་མངོན་པར་དགའ་བ་ཞེས་བྱ་བར་དེ་བཞིན་གཤེགས་པ་རི་རབ་ལྟ་བུ་ཞེས་བྱ་བའི་གསུང་རབ་ལ་འཇམ་དཔལ་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་དུ་གྱུར་ནས། འཁོར་ལོའི་བསྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བ་གླིང་བཞིའི་དབང་ཕྱུག་ཆོས་ཀྱི་རྒྱལ་པོའི་བུ་སྟོང་དང་བཅས་པ་ལ་བྱང་ཆུབ་སེམས་དཔའི་སྤྱོད་པ་བསྟན་པས། བུ་སྟོང་དུ་གཅིག་གིས་མ་ཚང་བ་དང༌། ཡབ་རྒྱལ་པོ་དང་བཅས་པ་རབ་ཏུ་བྱུང་བ། རྒྱལ་པོ་དགེ་བའི་བཀོད་པ་ནི་ལྷའི་བུ་དེད་དཔོན། བུ་སྟོང་ནི་བསྐལ་བཟང་སངས་རྒྱས་སྟོང༌། རྒྱལ་བུ་སྙིང་རྗེ་ཆེར་སེམས་ནི་སྟོན་པ་ཤཱཀྱའི་རྒྱལ་པོ་ཡིན་པར་གསུངས་པ་སོགས་དང༌། མ་སྐྱེས་དགྲའི་འགྱོད་པ་བསལ་བའི་མདོ་ལས། རྒྱལ་པོ་མ་སྐྱེས་དགྲས་ཕ་བསད་པའི་འགྱོད་པ་བསལ་ནས་མཐུན་པའི་ཆོས་ལ་བཟོད་པ་ཐོབ་ནས། བསྐལ་པ་གྲངས་མེད་པ་སྟོང་ཕྲག་བརྒྱད་བརྒྱ་ན་མཐོང་ན་དགའ་བར་འཇིག་རྟེན་གྱི་ཁམས་འདམ་གྱི་རྙོགས་པ་མེད་པ་ན་དེ་བཞིན་གཤེགས་པ་ཡུལ་ཤིན་ཏུ་རྣམ་པར་འགྱུར་བ་སངས་རྒྱས་ཀྱི་ལུང་བསྟན་པ་དང༌། འཕགས་པ་དཀོན་མཆོག་གི་ཟ་མ་ཏོག་ཅེས་བྱ་བའི་ཐེག་པ་ཆེན་པོའི་མདོ་ལས། སྟོན་པ་རྒྱལ་བུ་རྒྱལ་བྱེད་ཀྱི་ཚལ་ན་དབྱར་གནས་པ་མཛད་པའི་ཚེ། འཇམ་དཔལ་གསལ་རྒྱལ་གྱི་བཙུན་མོའི་ནང་ན་དབྱར་གནས་པའི་ཚུལ་མཛད་པ་གནས་བརྟན་འོད་སྲུང་ཆེན་པོས་བསྐྲད་པར་བརྩམས་པའི་ཚེ་གསལ་རྒྱལ་གྱི་བཙུན་མོ་འཁོར་ལྔ་བརྒྱ། སྐྱེས་པ་ལྔ་བརྒྱ། ཁྱེའུ། སྲུ་མོ། སྨད་འཚོང་མ་ལྔ་བརྒྱ་བཅས་བྱང་ཆུབ་ལ་བཀོད་པར་གསུངས་པ་དང༌། འཇམ་དཔལ་རྣམ་པར་རོལ་པའི་མདོ་ལས། སྨད་འཚོང་མའི་བུ་མོ་གསེར་མཆོག་འོད་གསལ་བསྐུལ་ནས་བླ་མེད་བྱང་ཆུབ་ཏུ་སེམས་བསྐྱེད་པས། དེའི་ཕྱིས་བཞིན་འབྲང་བའི་སྲོག་ཆགས་ཉིས་བརྒྱས་བྱང་ཆུབ་ཏུ་སེམས་བསྐྱེད། ལྷ་མི་དྲུག་ཅུས་ཆོས་ཀྱི་མིག་ཐོབ་ནས་བསྐལ་པ་འབུམ་ཕྲག་དགུ་བཅུ་རྩ་གཉིས་འདས་པའི་འོག་ཏུ་བུ་མོ་གསེར་མཆོག་འོད་དཔལ་བསྐལ་པ་རིན་ཆེན་གྱི་འབྱུང་བར་སངས་རྒྱས་རིན་ཆེན་འོད་ཅེས་འགྱུར་བར་ལུང་སྟོན་པ་སོགས་དང༌། ཡབ་རྒྱལ་པོ་ཟས་གཙང་འཇམ་དཔལ་གྱི་སྤྲུལ་པ་ཡིན་པ་གསང་བ་འདུས་པའི་རྒྱུད་ལས་གསུངས་པ་དང༌། ཉན་ཐོས་ཤེས་རབ་ཅན་གྱི་མཆོག་ཤཱ་རིའི་བུ་ཡང་འཇམ་དཔལ་དུ་གྲགས་པ་སོགས། དཔལ་དུས་ཀྱི་འཁོར་ལོ་ལས། འཛམ་བུའི་གླིང་ལ་ཡུལ་དྲུག་ཏུ་གྲགས་པའི་ནང་ཚན་བྱང་ཕྱོགས་ཤམྦྷ་ལར་ཞེས་པ་ཡུལ་གྱི་བཀོད་པ་ཁྱད་པར་འཕགས་པ་དེར། ས་བཅུའི་བྱང་ཆུབ་སེམས་དཔའ་རྣམས་རྒྱལ་པོའི་ཚུལ་འཛིན་པ་བརྒྱུད་མར་བྱོན་པས། དུས་རབས་བརྒྱད་པ་ལ་རྗེ་བཙུན་འཇམ་དཔལ་དབྱངས་ཉིད་རིགས་ལྡན་འཇམ་དཔལ་གྲགས་པའི་རྣམ་པར་བྱོན་ནས། ཡུལ་དེའི་བྲམ་ཟེ་རིགས་བྱེད་པའི་གཞུང་སྨྲ་བ་སོགས་རིག་པ་སྣ་ཚོགས་ཀྱི་བརྟུལ་ཞུགས་འཛིན་པ་ཐམས་ཅད་བླ་མེད་རྡོ་རྗེ་ཐེག་པའི་དབང་བསྐུར་བྱིན་ཏེ་ཐེག་པ་མཆོག་གི་རིགས་མཆོག་ཏུ་བྱས་པའི་རྒྱལ་པོའི་དེའི་རིང་ནས་རིགས་ལྡན་ཞེས་པའི་མཚན་ཆགས་ཤིང༌། རིགས་ལྡན་གྲགས་པ་དེའི་རྩ་རྒྱུད་སྟོང་ཕྲག་བཅུ་གཉིས་ཀྱི་དོན་བསྡུས་པ་བསྡུས་རྒྱུད་ལེའུ་ལྔ་པར་མཛད་པ་དང༌། རིགས་ལྡན་གྲགས་པ་ནས་བརྩིས་པའི་གདན་རབས་ཉེར་ལྔ་པ་ལ་རྗེ་བཙུན་འཇམ་དཔལ་དབྱངས་ཉིད་རིགས་ལྡན་དྲག་པོ་འཁོར་ལོ་ཅན་གྱི་རྣམ་པར་བཞེངས་ནས་ཀླ་ཀློའི་ཕྱོགས་འཇོམས་པར་འགྱུར་བར་གསུངས་པ་དང༌། རིགས་ལྡན་དྲག་པོ་དམག་གི་དཔུང་རྒྱ་ཆེན་པོ་དང་ལྷ་ཆེན་པོ་བཅུ་གཉིས་ཀྱི་དཔུང་རོགས་བཅས་ཏེ་འཛམ་བུའི་གླིང་གི་ལྷོ་ཕྱོགས་ཀྱི་རྒྱུད་ཐམས་ཅད་དུ་འཁྲུག་པ་དྲག་པོའི་ཚུལ་གྱིས་ཀླ་ཀློའི་ཕྱོགས་མ་ལུས་པ་བཅོམ་ནས་སངས་རྒྱས་ཀྱི་བསྟན་པ་སྤྱི་དང་རྡོ་རྗེའི་ཐེག་པ་གསལ་བར་མཛད། སྲས་ཚངས་པ་ཤམྦྷ་ལའི་རྒྱལ་ས་དང༌། དབང་པོ་ཛམ་གླིང་གཞན་གྱི་རྒྱལ་པོ་བཀོད་ནས་དམ་པའི་ཆོས་འཕེལ་བར་མཛད་པས་མི་རྣམས་ཀྱི་ཚེ་དང་བསོད་ནམས་གོང་དུ་འཕེལ་ཞིང་རིགས་ལྡན་ཉིད་ཤམྦྷ་ལའི་གྲོང་དུ་ཕྱིན་ནས་ཕྱག་རྒྱ་ཆེན་པོའི་དངོས་གྲུབ་བརྙེས་པའི་ཚུལ་གྱི་དེ་དུས་ཀྱི་འཁོར་རྣམས་དང་འབྲེལ་ཐོགས་དང་བཅས་པ་ཐམས་ཅད་བདེ་བའི་གནས་སུ་འགྲོ་བར་གསུངས་པ་དང༌། འཇམ་དཔལ་རྩ་བའི་རྟོག་པ་ལས། ཐུབ་པའི་ཟླ་བ་རབ་ནུབ་ཅིང༌། །ས་ཡི་དཀྱིལ་འཁོར་སྟོངས་པ་ན། །ཆོ་ག་འཇིག་རྟེན་འདིར་གནས་པ། །བསྟན་པའི་དོན་ནི་སྟོན་པར་འགྱུར། །འཇམ་དཔལ་དབྱངས་ནི་རྟག་ཏུ་དགེ །འབྱུང་པོ་ཀུན་ལ་གཞོན་ནུ་ནི། །དེ་ཚེ་སངས་རྒྱས་མཛད་པ་ནི། །འཇིག་རྟེན་བསྟན་ལ་བྱེད་པར་འགྱུར། །ཞེས་དང་རྒྱུད་ལས། སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་གསུངས་པ་ལྟར་རྒྱལ་བའི་བསྟན་པ་འཛིན་པའི་ཤིང་རྟ་ཆེན་པོ་རྒྱལ་བའི་ཆོས་ཚུལ་ཟབ་ཅིང་ཕྲ་བ་རྟོགས་དཀའ་བ་ཐམས་ཅད་ལྷ་འདི་ཡི་མཐུས་འགྲེལ་བ་ཡིན། ཞེས་དམ་པ་དུ་མ་ལ་ཞལ་གཟིགས་ཏེ་ཡང་ཡང་གདམས་པ་བསྩལ་བ་དང༌། གཞན་ཡང་དཔལ་མགོན་འཕགས་པ་ཀླུ་སྒྲུབ། དཔལ་ལྡན་ཟླ་བ་གྲགས་པ། རྒྱལ་སྲས་ཞི་བ་ལྷ། སློབ་དཔོན་འཇམ་དཔལ་བཤེས་གཉེན། པཎ་ཆེན་བི་མ་མི་ཏྲ་དང༌། ཁྱད་པར་དུའང་རྒྱུད་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང༌། །ཆེ་བ་སངས་རྒྱས་རིགས་སྔགས་འཆང༌། །ཞེས་རྡོ་རྗེ་ཚིག་གིས་ལུང་བསྟན་པ་ལྟར། ཨོ་རྒྱན་སངས་རྒྱས་གཉིས་པའི་མཚན་གྱི་སྒྱུ་འཕྲུལ་བརྒྱད་ལས་མཁས་པ་བློ་ལྡན་མཆོག་སྲེད་འཇམ་དཔལ་དབྱངས་སུ་ཞལ་གྱིས་བཞེས་པ་དང༌། མཁན་ཆེན་ཞི་བ་འཚོ། གྲུབ་ཆེན་དམ་པ་སངས་རྒྱས། པཎྜི་ཏ་མ་ཏི་སོགས། བོད་དུ་རྒྱལ་བསྟན་འདྲེན་པའི་ཤིང་རྟ་ཆོས་རྒྱལ་ཁྲི་སྲོང༌། ཐུ་མི་སཾ་བྷོ་ཊ། གནུབས་སངས་རྒྱས་ཡེ་ཤེས་སོགས། རོང་ཟོམ་པཎྜི་ཏ། ཀུན་མཁྱེན་ཀློང་ཆེན་རབ་འབྱམས་སོགས་སྔ་འགྱུར་རྙིང་མ། འཇམ་མགོན་ས་སྐྱ་པཎྜི་ཏ་སོགས་ས་སྐྱ་གོང་མ་རྣམས་དང༌། རྔོག་ལོ་བློ་ལྡན་ཤེས་རབ། རྗེ་རིན་པོ་ཆེ་བློ་བཟང་གྲགས་པ། ཀརྨ་པ་ཆོས་གྲགས་རྒྱ་མཚོ། ཀུན་མཁྱེན་མི་བསྐྱོད་རྡོ་རྗེ། འཇམ་མགོན་བསྟན་པའི་ཉིན་བྱེད་སོགས་མཁས་གྲུབ་ཕལ་མོ་ཆེ་འཇམ་དཔལ་དབྱངས་ཀྱིས་རྗེས་སུ་བཟུང་སྟེ་གཟུངས་སྤོབས་བློ་གྲོས་ཀྱི་མཐུ་གྲུབ་པས་སློབ་བརྒྱུད་ལའང་འཆད་རྩོད་རྩོམ་གསུམ་ཆེས་དར་བ་དང༌། འཇམ་དཔལ་དབྱངས་ཀྱི་སྤྲུལ་པར་ཞལ་གྱིས་བཞེས་པ་ཆེས་མང་བ་སོ་སོའི་རྣམ་ཐར་དུ་གསལ་བ་བཞིན། སྟོན་པ་ཤཱཀྱ་སེང་གེའི་སྲས་ཀྱི་ཐུ་བོ་འཇམ་དཔལ་དབྱངས་ཉིད་རྣམ་རོལ་སྣ་ཚོགས་པས་བསྟན་པ་སྤེལ་ཞིང་བསྟན་འཛིན་ལ་བྱིན་གྱིས་རློབ་པར་གསུངས་པ་བཞིན་རྗེ་བླ་མ་འདི་ཉིད་ཀྱང་འཇམ་མགོན་ཟུར་ཕུད་ལྔ་པ་ཉིད། ཐུབ་དབང་བརྟུལ་ཞུགས་མཆོག་ལ་གནས་པའི་ངུར་སྨྲིག་རྣམ་གསུམ་ཐར་པའི་རྒྱལ་མཚན་འཛིན་པའི་ཐེག་པ་ཆེན་པོའི་དགེ་བའི་བཤེས་གཉེན་གྱི་ཚུལ་དུ་སྤྲུལ་པའི་རྣམ་པར་རོལ་པ་ཚད་མ་གསུམ་གྱིས་གྲུབ་སྟེ་རྗེའི་འདིའི་ཐུན་མོང་གི་རྣམ་ཐར་འོག་ནས་ཞིབ་ཏུ་འཆད་པར་འགྱུར་བས་ཤེས་ནུས་ཤིང༌། དེར་མ་ཟད་ཚད་མའི་སྐྱེས་བུ་ཐམས་ཅད་མཁྱེན་གཟིགས་མཉྫུ་གྷོ་ཥས། ཀུན་མཁྱེན་འཇིགས་མེད་གླིང་པའི་ཐུགས་སྲས་གཙང་ལ་སྟོད་ཀྱི་ཆོས་རྗེ་བྲག་ཕུག་པ་ཞེས་ཚད་མ་ལ་ཤིན་ཏུ་མཁས་ཤིང༌། ཀུན་མཁྱེན་རིན་པོ་ཆེར་ཡོན་ཏན་རིན་པོ་ཆེའི་མཛོད་མཛད་པར་བསྐུལ་ཞིང༌། འགྲེལ་ཆེན་ཤིང་རྟ་རྣམ་གཉིས་ཀྱི་ཡི་གེ་པ་མཛད་མཁན་ཐུགས་ཟིན་སློབ་མའི་མཆོག་དེའི་སྐྱེ་བ་མི་ཕམ་ཁྱོད་རང་ཡིན། ད་ལྟ་ཚད་མ་མཁས་པ་དེའི་བག་ཆགས་སད་པ་རེད་ཅེས་བཀའ་བསྩལ་བ་དང༌། སྤྱིར་རྗེ་ཉིད་ཀྱི་བཀའ་ལས། སྤྱིར་བྱིས་པ་བསམ་མནོ་མ་ཟིན་པའི་བྱ་བྱེད་ཐམས་ཅད་སྔོན་གྱི་བག་ཆགས་ཡིན་པས་ཕྲན་བྱིས་པའི་སྐབས་འབྲོག་ཁྱིམ་ཕན་ཚུན་དུ་འགྲོ་སྐབས་བྱིས་པ་ཆུང་ངུ་ཀོ་སྒྲོམ་དུ་བཅུག་སྟེ་གཡག་ལ་བཀལ་བའི་ཚེ་ཀོ་སྒྲོམ་རྔ་ཡིན་པ་དེའི་དབྱུག་པས་བརྡུང་བ་བྱེད་དར་བས་སྔགས་པ་རྔ་བརྡུང་བ་ཞིག་གི་བག་ཆགས་ཡོད་ཅེས་གསུངས། རྗེ་བཙུན་བླ་མ་ཉིད་དཀར་མོ་སྟག་ཚང་དུ་བཞུགས་སྐབས་གཟིམས་ཆུང་གསར་པ་ཞིག་བཞེངས་པའི་སྐར་ཁུང་གི་རྒྱ་ཁྲ་ཤིང་བཟོ་རྗེ་ཉིད་ཀྱིས་ཕྱག་བསྟར་གནང་ནས་འདི་ཙམ་པ་བཟོ་ལོས་ཤེས། ང་རྒྱ་གར་གྱི་ཤིང་བཟོ་མཁས་པ་ཞིག་གི་ལུས་བླང་བ་དྲན་གྱི་འདུག་ཅེས་ཞལ་རྩེད་དུ་གསུངས་པས་མཚོན་སྔོན་གྱི་སྐྱེས་རབས་ངོ་མཚར་ཅན་དུ་མ་ཡོད་པར་ངེས་ཀྱང་རྟག་ཏུ་ཡོན་ཏན་སྦས་ཚུལ་དུ་བཞུགས་པས་ཐུགས་སྒམ་ཞིང༌། ཀུན་གཟིགས་མཁྱེན་བརྩེའི་དབང་པོ་ལའང་བདག་དམ་པའི་སྐྱེས་བུ་མཆོག་རྣམས་ཀྱི་སྤྲུལ་པའོ་ཞེས་གསུང་གི་བསྔགས་པ་དྲིལ་བསྒྲག་ཏུ་མི་གསུང་བར་ཞུ་ཞེས་གསུངས་བ་སོགས་ཀྱིས་དམིགས་བསལ་མཐོང་ཐོས་ཅན་འགོད་པར་མ་ཤེས་ཀྱང་བོད་དུ་བསྟན་འགྲོར་ཕན་བདེའི་དོན་མཛད་པ་ཐམས་ཅད་གུ་རུ་རིན་པོ་ཆེའི་སྤྲུལ་པ་ཡིན་པར་གསུངས་པ་དང༌། ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་རྒྱལ་བསྟན་རིན་པོ་ཆེའི་སྲོལ་ཐོག་མར་འཛུགས་པའི་མཁན་ཆེན་བྱང་ཆུབ་སེམས་དཔའ་དང༌། མཁན་བརྒྱུད་དང༌། མ་འོངས་བསྟན་པ་གནས་པ་དེ་སྲིད་དུ་མཁན་བརྒྱུད་ལ་སྤྲུལ་པ་བྱོན་པ་དེ་ཀུན་ཇོ་བོ་ཉིད་དང་ངོ་བོ་གཅིག་པར་གསུང་པ་བཞིན་འཇམ་དཔལ་གཞོན་ནུའི་ཡེ་ཤེས་ཀྱི་རོལ་པ་ནི་ཚད་མེད་བསམ་གྱིས་མི་ཁྱབ་སྟེ་རྒྱུད་ལས། དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རིས་མེད་པ། །ཡེ་ཤེས་མིག་གཅིག་དྲི་མ་མེད། །ཅེས་གསུངས་པ་ལྟར་འཕགས་བོད་ཀྱི་མཁས་གྲུབ་འཇམ་དཔལ་གྲུབ་པའི་སློབ་དཔོན་ཐམས་ཅད་རྗེ་ཉིད་དང་ཐུགས་རྒྱུད་གཅིག་པར་ངེས་ཤིང་དོན་དུ་སྐུ་ཚེ་འདིའི་མཁྱེན་རྟོགས་ཡོན་ཏན་ནོར་བུ་རིན་པོ་ཆེའི་གཟི་འོད་ཀྱིས་བསྟན་འཛིན་རྒྱུ་སྐར་གྱི་ཕྲེང་བ་རྨད་དུ་བྱུང་བ་དུ་མའི་དབུས་ན་རྗེ་འཇམ་མགོན་བླ་མ་ཉིད་ཉ་གང་ཟླ་བ་གཞོན་ནུའི་དཀྱིལ་འཁོར་ལྟར་མཛེས་པས་གངས་རིའི་ཁྲོད་ཀྱི་གཟུར་གནས་བློ་ལྡན་ཡོངས་ཀྱིས་བསྔགས་པའི་ཀུ་མུད་མཛེས་པར་འཛུམ་པས་རྗེ་བཙུན་འཇམ་དཔལ་དབྱངས་དང་དབྱེར་མེད་པའོ་ཞེས་གྲགས་པའི་དྲི་བསུང་དངར་པོ་ད་ལྟའང་མ་ཉམས་པ་སྔ་འགྱུར་བསྟན་པའི་ཆུ་གཏེར་འཕེལ་བའི་གཉེན་དུ་གྱུར་པའི་ཚུལ་ལ་དཔྱད་པས། ཡོན་ཏན་གང་ཡང་མ་མཆིས་པ་འཕགས་པའི་སར་བཞུགས་སྐྱེས་ཆེན་དག་གི་སྤྲུལ་པའོ། །ཞེས་མིང་ཙམ་སྙན་པའི་སྐྱེས་རབས་མང་པོ་བགྲང་བ་རྨོངས་པ་བདག་ལྟ་བུ་དེང་སང་བསྟན་འཛིན་དུ་གྲགས་པ་ལས་ཁྱད་པར་འཕགས་ཚུལ་དཔྱད་པས་ཤེས་པའི་ཕྱིར། འཇམ་མགོན་ཀོང་སྤྲུལ་རིན་པོ་ཆེས་ལུང་གིས་ཟིན་པའི་སྐྱེས་བུ་ལ་ལུང་དོན་མཐུན་པའི་མཛད་པ་དགོས་ཞེས་གསུངས་པ་བཞིན་དུའོ། །དེས་ན་རྒྱུད་ལས། སངས་རྒྱས་ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་ཐུགས་ལ་གནས། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །ཞེས་གསུངས་པ་ལྟར། ཆོས་སྐུ་རང་གི་ངོ་བོ་ཡེ་ནས་སྐྱེ་འགག་གནས་གསུམ་དང་བྲལ་བའི་ཆོས་ཉིད་སྟོང་པ་ཉིད་ཀྱི་རང་བཞིན་ནམ་མཁའ་ལྟ་བུ་གང་སྲིད་ཞི་ཀུན་ལ་ཁྱབ་ཅིང་དགོངས་པ་དེ་ལས་མ་གཡོས་ཀྱང༌། གདུལ་བྱའི་སྔོན་ལས་དང་སྨོན་ལམ་སངས་རྒྱས་ཀྱི་ཐུགས་རྗེའི་དབང་གིས་གནས་དང་རིས་སུ་ཕྱེ་བའི་ངེས་པ་མེད་པ་གང་འདུལ་དུ་སྣང་ལ། མཁའ་ཁྱབ་ནམ་མཁའི་རྡོ་རྗེའི་སྐུ་ཞེས་རྡུལ་དང་དངོས་པོའི་ཆོས་ལས་འདས་པས་དབང་ཡུལ་གཟུང་འཛིན་དང་འབྲེལ་བས་རྟོགས་བྱ་མ་ཡིན་པ་གཟུགས་ཀྱི་རྣམ་པ་ཐམས་ཅད་དང་ལྡན་པའི་སྐུ་གཅིག་གིས་ཞིང་ཁམས་རབ་འབྱམས་ཁྱབ་པ། ཞིང་རབ་འབྱམས་སྐུ་ཡི་བ་སྤུ་གཅིག་ཏུ་རྫོགས་པ། དེར་ཡང་ཞིང་དང་སྐུ་སོགས་མཛད་པ་ཐམས་ཅད་མ་འདྲེས་པར་སྟོན་པའི་སྐུ་རྡོ་རྗེ་ཡིན་པས་སངས་རྒྱས་ཀུན་གྱི་སྐུ་མཆོག་འཇམ་དཔལ་རྡོ་རྗེ་ཞེས་གསུངས་ཤིང༌། དེ་བཞིན་དུ་རྣམ་པ་ཐམས་ཅད་པའི་སྟོང་ཉིད་ཀྱི་སྒྲ་དབྱངས་འགྲོ་བ་སོ་སོའི་ཁམས་དབང་བསམ་པའི་དངོས་པོ་དང་མཐུན་པར་ཡིད་ལ་འཇུག་ཅིང་རང་རང་གི་སྐད་ཀྱིས་ཆོས་ཀྱི་སྒོ་མཐའ་ཡས་པ་འབྱེད་པའི་བདེ་བར་གཤེགས་པ་རྣམས་ཀྱི་མགྲིན་པ་ཆོས་ཀྱི་དུང༌། གསུང་མི་ཟད་རྒྱན་གྱི་འཁོར་ལོའི་ངོ་བོ་ཡིན་པས། གསུང་གི་དབང་ཕྱུག་ཞེས་བྱ་ལ། རྒྱལ་བ་ཐམས་ཅད་ཀྱི་ཐུགས་མཁྱེན་པ་གཉིས་ལྡན་གྱི་ཡེ་ཤེས་འགྱུར་མེད་བདེ་བ་ཆེན་པོ་གཙང་བདག་རྟག་པ་བདེ་བ་དམ་པའི་ཕ་རོལ་དུ་ཕྱིན་པའི་བདག་ཉིད་ཆེན་པོ་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་རྡོ་རྗེ་འཇམ་དཔལ་ཡེ་ཤེས་སེམས་དཔའ་ཞེས་མཚན་དུ་གྲགས་ཤིང༌། སྐུ་གསུང་ཐུགས་དུ་མ་རོ་གཅིག་ལས་དབྱེར་མེད་པའི་བདེ་ཆེན་ལྷན་སྐྱེས་ནི་ཡེ་ཤེས་རྡོ་རྗེ་ཞེས་གྲགས་པས་ན་སྐུ་བཞིའི་ཡེ་ཤེས་ལྔ་ཡི་དཔལ་དང་ལྡན་པ་ཉིད་སྙིགས་མའི་འགྲོ་ལ་ཆོས་ཀྱི་སྣང་བ་འབྱེད་པའི་བླ་མ་དགེ་བའི་བཤེས་གཉེན་གྱི་རྣམ་པར་བྱོན་པ་སྟེ། མདོ་ལས། ཤེས་རབ་ཆེན་པོ་འཇམ་པའི་དབྱངས། །བྱིས་པ་གཞོན་ནུའི་གཟུགས་དང་ལྡན། །འཇིག་རྟེན་འདིར་ནི་ཀུན་ཏུ་རྒྱུ། །སེམས་ཅན་རྗེས་སུ་བཟུང་བར་བཟོད། །ཅེས་གསུངས་པ་ལྟ་བུའི་བདག་ཉིད་ཆེན་པོ་དེ་ལ་དཔལ་ལྡན་བླ་མའི་ངེས་ཚིག་དུས་འཁོར་ལས། སངས་རྒྱས་ཞལ་ནི་གང་གི་ཐུགས་དང་ཞལ་ལ་གནས་པར་གྱུར་པ་དེ་ནི་དཔལ་ལྡན་བླ་མའོ། །ཞེས་སངས་རྒྱས་ཀྱི་ཞལ་ལམ་སྒོར་གྱུར་པའི་དབང་བཞི་པ་ཟུང་འཇུག་གི་ལམ་འདི་ཉིད་གང་གི་ཞལ་ནས་སློབ་མའི་བློ་ལ་འཆར་ནུས་ཤིང༌། སློབ་མའི་རྒྱུད་ལ་བྱིན་རླབས་ཀྱི་རྟོགས་པ་སྤོ་ནུས་པ་དེ་འཕགས་པའི་ས་ཐོབ་པ་ཡིན་པས་དེའི་དཔལ་ལྡན་བླ་མ་ཞེས་གསུངས་པས་ཞབས་ལ་གསོལ་བ་འདེབས་སོ། །གཉིས་པ་སྤྲུལ་པའི་སྐྱེས་བུའི་རྣམ་ཐར་བཤད་པ་ལ། བསྟན་བཤད་གཉིས་ལས། དང་པོ་ཐོས་བསམ་སྒོམ་པ་ཇི་ལྟར་མཛད་ཚུལ་མདོར་བསྟན་ནི། རྗེ་བླ་མ་རིན་པོ་ཆེ་འདི་ཉིད་ཀྱི་མཚན་དཔེའི་མེ་ཏོག །གང་དུ་སྐྱེ་བའི་མྱུ་གུ་བཟུང་བའི་ཡུལ་ནི། མདོ་ཁམས་ཆུ་བཞི་སྒང་དྲུག་ཞེས་གྲགས་པའི་ཤར་ཟླ་སྒང་ཞེས་ཆོས་རྒྱལ་སྡེ་དགེའི་རྒྱལ་ཁབ་ཆེན་པོའི་གནོད་གནས་དབང་པོའི་ཕྱོགས། ས་གཞི་ཁ་རྒྱ་ཆེ། ལུང་པ་ཕུ་ཐག་རིང༌། ཉི་ཟླའི་བགྲོད་ཐག་རིང༌། བྱང་ཐང་མེ་ཏོག་གི་སྐྱེད་མོས་ཚལ། རྐྱང་འབྲོང་རི་དྭགས་ཀྱི་ཁྱུ་བག་ཕེབས་རྒྱུ་བ། འབྲོག་སྡེ་གནག་ཕྱུགས་ལུག་ཁྱུ་ཟད་མི་ཤེས་པའི་ལྷ་སྡེ། བཀྲ་ཤིས་འོ་མའི་རྒྱ་མཚོ་འཁྱིལ་ཞིང༌། རྩི་བཅུད་སྙིང་པོ་ཞུན་གྱི་གཏེར་རྡོལ་བ། རྒྱལ་དབང་པདྨའི་བཀའ་སྡོད་རྫ་རྒྱལ་རྡོ་རྗེ་འཕེན་ཕྱུག་ཅེས་ཀུན་ཏུ་གྲགས་པའི་ཟོ་དོར་གྱིས་སྐྱོང་བ། རྫ་ཀླུང་ཉལ་འགྲོའི་དགའ་མ་ལ་ལྦུ་ཕྲེང་མུ་ཏིག་གི་དོ་ཤལ་གྱིས་འཕྱང་འཕྲུལ་གཡོ་བའི་སྣེ་དལ་གྱི་འགྲོ་བའི་ཆར། ཡུལ་གྲུ་ཆེ་ཆུང་མང་དུ་མཆིས་པའི་ནང་ཚན་འོད་གསལ་ལྷ་ཡི་གདུང་བརྒྱུད་ཅིག་གནམ་གྱི་དམུ་ཐག་ལ་འཇུས་ཏེ་ས་གཞིར་བབས་པ་ལས་མི་རིགས་མཆེད་པས་འཇུ་ཞེས་ཡོངས་སུ་གྲགས་པའི་ས་འཛིན། ཀོ་ས་ལའི་འཐུང་སྤྱོད་ཙཱ་རི་ཏྲ་དང་མཉམ་པའི་རྡོ་རྗེའི་གནས་སུ་བསྔགས་ཤིང༌། མཁས་དང་གྲུབ་པའི་བཤེས་གཉེན། ནུས་མཐུ་ཅན་གྱི་སྔགས་བརྒྱུད། སྟོབས་འབྱོར་ལྡན་པའི་མི་དཔོན་དུ་མ་བྱོན་པས། འཇུས་ཐུག་ནག་ཅན་བཅུ་གསུམ་ཞེས་སྦྲ་ཁྱིམ་གྱི་སྟེང་དུ་རྔ་ཐུག་བཙུགས་པའི་བསྐྱེད་རྫོགས་ཀྱི་གདེང་ཐོབ་པའི་ནུས་མཐུ་ཁྱད་པར་ཅན་མངའ་བའི་སྔགས་ཁྱིམ་བཅུ་གསུམ་ཡོད་པའི་བྱེ་བྲག །རྗེ་བླ་མའི་མེས་པོ་འཇུ་སྔགས་ཆེན་ཀ་ལི་ཞེས་ཐུགས་ཀར་མེ་ལོང་གི་འོད་ཁྱིམ་གྱི་ཟེར་མི་ལ་ཕོག་པས་རྒྱུག་འགྱེལ་འགྲོ་བ་དང༌། གནོད་པའི་ཕྱོགས་སུ་སྔགས་ཐུན་གཏོར་ཞིང་མེ་མདའ་འཕངས་བས་མི་མ་ཡིན་སྨྲེ་སྔགས་དང་བཅས་ཏེ་བྲོས་ནས་དེ་ཕྱིན་གནོད་སྦྱིན་གྱི་རྒྱུ་ལམ་བཅད་པ་སོགས་ནུས་མཐུ་ཁྱད་པར་ཅན་མངའ་བས་ན་དེ་ཉིད་ཆིབས་ཐོག་ནས་ཕེབས་ལམ་ཞིག་ཏུ་བྱིས་པ་མང་པོ་རྩེད་མོས་གཡེངས་ཏེ་ཡོད་པའི་ནང་ནས་བྱིས་པ་ཞིག །སྔགས་ཆེན་མཐོང་མ་ཐག་རྗེས་དེད་དེ་བདག་ཀྱང་ཁྱོད་དང་འདྲ་བ་ཞིག་འོང་བར་ཤོག་ཅེས་རྒྱུག་པ་ལ་ཅེར་གྱིས་གཟིགས་ཏེ་ང་འདྲ་བ་ནི་དཀའ་མོ་རེད་དེ། ཁྱེད་རང་གཞན་དང་མ་འདྲ་བ་ཞིག་འབྱུང་ས་འདུག་གསུངས་པ་ཕྱིས་སུ་མང་དགེ་རྡོ་རྗེ་འཆང་ཞེས་རི་བོ་དགེ་ལུགས་པའི་བསྟན་འཛིན་མཁས་བཙུན་བཟང་གྲུབ་ཀྱི་སྐྱེས་བུ། སྟོན་པ་ཐུབ་པའི་དབང་པོས་རྗེས་སུ་བཟུང་བ་དེས་མཛད་པའི་ཐུབ་ཆོག་ད་ལྟ་རིན་ཆེན་གཏེར་མཛོད་དུ་བཞུགས་པས་མཚོན་མངོན་ཤེས་ཐོགས་མེད་དུ་མངའ་བའི་རིགས་སུ་འཁྲུངས་པ་སྟེ། རུས་ནི་བོད་མིའུ་གདུང་དྲུག་ཏུ་གྲགས་པའི་ནང་ཚན་ཨ་ལྕགས་འགྲུའི་ཁོངས་སུ་གཏོགས་པ་འདི་དག་སྔོན་སོག་པོ་ཝང་རྒྱལ་པོའི་བློན་ཆེན་ཡིན་ཀྱང༌། ཕྱིས་སྡེ་དགེ་ཆོས་རྒྱལ་བསྟན་པ་ཚེ་རིང་གི་སྐུ་དུས་ལྷ་འབངས་སུ་གྱུར་པ་དང༌། རྗེ་བླ་མ་དང་དུས་མཉམ་དུའང་འཇུ་དབོན་འཇིགས་མེད་རྡོ་རྗེ་ཞེས་སྣང་བཞི་མཐར་ཕྱིན་བཤེས་གཉེན་ཆེན་པོ་དང༌། དགེ་བའི་བཤེས་གཉེན་གྲགས་པ་རྒྱལ་མཚན་ཞེས་ཀུན་སྤང་བྱང་ཆུབ་སེམས་དཔའ་ཁྱད་འཕགས་སོགས་དུ་མ་བྱོན་པ་སྟེ། སྤྱིར་འཇམ་མགོན་བླ་མ་མཆོག་གིས་འཁྲུངས་ཡུལ་གྱི་རྟེན་བརྟེན་པ་ལ་བསྔགས་པའི་རྡོ་རྗེའི་གསུང་ཚིགས་བཅད་དུ་མཛད་པའི་ངོ་མཚར་ཅན་ཡོད་པ་ལྟར་དང༌། དེ་དག་ལས་འཇུ་བླ་མདོ་སྡེ་ཞེས་པ་འཚོ་མཛད་ཞིག་ཡོད་པ་ལྷ་སར་གནས་བསྐོར་དུ་ཕེབས་སྐབས་མི་ཕལ་ཆེར་འབྲུམ་ནག་གིས་ཚབ་ཆེར་བྱུང་བ་པོ་ཏཱ་ལའི་རྩེ་ནས་བུད་མེད་ཅིག་གིས་ཁམས་ཀྱི་བླ་མ་མདོ་སྡེ་ཞེས་པ་དེའི་སྨན་སྟེར་ན་ཡམས་ནད་འདི་མྱུར་དུ་རྒྱུན་འཆད་པར་འགྱུར་རོ་ཞེས་ལུང་བསྟན་པ་ལྟར་རྩད་ཆོད་དེ་སྨན་རྩིས་ཁང་དུ་གདན་དྲངས་ནས་སྨན་སྦྱོར་མཛད་དེ་ཐམས་ཅད་ལ་སྨན་བཏང་བས་འབྲུམ་ནད་རྒྱུན་ཆད་པ་དང༌། ཕྱིས་ཁམས་ནས་ཀྱང་སྨན་ཕྱག་ལེན་བསྟར་བས་ཚེ་ཟད་རེ་གཉིས་མ་གཏོགས་འཆི་མ་མྱོང་ཞེས་ཀུན་གྱིས་གླེང་བ་དེའི་ཚ་བོ་ཚེ་རིགས་འཛིན་པ་འཇུ་མགོན་པོ་དར་རྒྱས་ཞེས་པ་སྐྱེད་ཡབ་དང༌། ཆོ་འབྲང་སྨུག་པོ་གདོང་གི་མི་བརྒྱུད་ཆོས་འབྱོར་དང་དཔའ་རྩལ་སོགས་འགྲན་ཟླ་བྲལ་བ་སྐྱེ་བོ་ཕལ་གྱི་སྨོན་གནས་སུ་གྱུར་པ་དགེ་རྩེ་ཞེས་རུས་ཚན་ཆེ་ཞིང་མི་ཆེ་ཁ་གྲགས་འཛོམ་པ་ས་སྐྱོང་སྡེ་དགེའི་ཕྱི་བློན་གྱི་ཁོངས་སུ་གཏོགས་པའི་དཔོན་ཕྲན་དུ་མ་ཡོད་པའི་དཔོན་རུ་དཔོན་ཆོས་དར་གྱི་བུ་མོ་སྲིང་ཆུང་ཞེས་པ་སྐྱེད་ཡུམ་སྟེ། དེ་ལྟར་རིགས་རུས་ཆོ་འབྲང་ཕུན་སུམ་ཚོགས་པར་རབ་བྱུང་བཅུ་བཞི་པའི་ནང་ཚན་ཟིལ་གནོན་ཞེས་པ་མེ་ཕོ་རྟ་ཡི་ལོ་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་ཡ་ཆུའི་དིང་ཆུང་ཞེས་པར་ངོ་མཚར་བའི་ལྟས་དང་བཅས་ཏེ་སྤྲུལ་པའི་པདྨོ་བཞད། རྗེ་ཉིད་ཀྱི་ཁུ་བོ་དབོན་བླ་མ་སྒྲུབ་མཆོག་པདྨ་དར་རྒྱས་ཀྱིས་མི་ཕམ་རྒྱ་མཚོ་ཞེས་པའི་མཚན་གྱི་ཅོད་པན་དཔྱང༌། རྗེ་ཉིད་འཁྲུངས་པ་དང་རྟེའུ་རྐྱང་བུ་སྟོབས་ལྡན་ཞིག་ཀྱང་བཙས་པ་ཉིད་ཀྱི་ཆིབས་རྟ་ཡིན་ཞེས་ཞལ་བདག་མཛད་པ་དང༌། དེ་མཚུངས་འབྲི་ཡི་བེའུ་རྒལ་པའི་སྤུ་དཀར་པོ་སེང་གེ་ཁྱི་ཚུགས་སུ་གནས་པའི་གཟུགས་གསལ་ཅན་ཞིག་ཀྱང་ཡོད་པར་གསུངས། སྐུ་ན་ཕྲ་མོའི་དུས་ནས་ཡི་དམ་འཇམ་དཔལ་ཞི་དྲག་དང༌། ཆོས་སྐྱོང་གེ་སར་གཉིས་ལས་བསམ་རྒྱུ་མེད་པ་ཞིག་ཡོད་པ་དང༌། བྱིས་པའི་ཞལ་ལས་བེའུ་སྐྱེས་པ་ཚུན་ཆད་ཐུགས་ལ་གསལ་བའི་དྲན་པ་མངའ། མདའ་གཞུ་དང་གོ་མཚོན་ལ་ཐུགས་ཤིན་ཏུ་དགྱེས་ཤིང་སྐུའི་ཉེར་སྤྱད་མདའ་གཞུ་འབྲལ་སྤང་དུ་བསྣམས་པ་དང༌། ཐུགས་དཔའ་བརྟུལ་སྙིང་སྟོབས་ཤིན་ཏུ་ཆེ་བར་གྲགས། དགུང་གྲངས་བཅུ་གཉིས་པའི་ཐོག་ཡུལ་དེའི་སྤྱི་ལུགས་ལྟར། འོག་མིན་ཨོ་རྒྱན་སྨིན་གྲོལ་གླིང་པའི་ཆོས་བརྒྱུད། ཞེ་ཆེན་བསྟན་གཉིས་དར་རྒྱས་གླིང་གི་དགོན་ལག་ཏུ་གྱུར་པ་འཇུ་མོ་ཧོར་གསང་སྔགས་ཆོས་གླིང་དུ་ཆོས་ཞུགས་གནང་སྟེ་གྲྭ་བཙུན་དཀྱུས་མའི་ཚུལ་དུ་བཞུགས་ཤིང༌། དགུང་གྲངས་དྲུག་བདུན་སྐོར་ནས་སྡོམ་གསུམ་རྣམ་ངེས་བཅས་ཐུགས་འཛིན་མཛད། དང་པོ་ཉིད་ཀྱི་ཨ་ཁུ་པདྨ་དར་རྒྱས་ནས་སྐུ་པང་དུ་བཞག་སྟེ་རྩིས་སྐར་ནག་གི་སྔོན་འགྲོ་གསན་ནས་ཐུགས་སུ་ཆུད། བཤེས་གཉེན་དམ་པ་གྲགས་པ་རྒྱལ་མཚན་ཞེས་རྗེ་བླ་མ་ཉིད་ཀྱི་གསུང་ལས། བདག་ཅག་ཐོག་མའི་དགེ་བའི་བཤེས་གཉེན་ཆེན་པོ་བསླབ་པ་གསུམ་གྱི་རྣམ་ཐར་ཕུལ་དུ་བྱུང་ཞིང༌། བདེ་བ་ཅན་དུ་རྒྱལ་བའི་སྲས་ཀྱི་སྤྱོད་པ་ལ་སློབ་པའི་རྒྱུ་ཚོགས་ལ་མངའ་དབང་ཡང་དག་པར་འབྱོར་པ། བཀའ་དྲིན་མཚུངས་པ་མ་མཆིས་པའི་དགེ་སློང་གྲགས་པ་རྒྱལ་མཚན་དཔལ་བཟང་པོ་ཞེས་བསྔགས་བརྗོད་གནང་བ། ཐམས་ཅད་མཁྱེན་གཟིགས་མཁྱེན་བརྩེའི་དབང་པོའི་ཞལ་སློབ་སྒྲུབ་གནས་ཀྱི་རྒྱལ་པོ་པདྨ་ཤེས་ཕུག་གི་མཚོ་རྒྱལ་གཟིམ་ཕུག་ཏུ་བླ་མའི་ཐུགས་སྒྲུབ་བར་ཆད་ཀུན་སེལ་གྱི་བླ་མ་ལོངས་སྐུའི་ཆ་ལག་འོད་དཔག་མེད་ཞིང་སྦྱོང་གི་ཆོ་ག་ལ་བརྟེན་ནས་བྱང་ཆུབ་སེམས་དཔའི་སྨོན་ལམ་གྱི་རྒྱལ་པོ་བཟང་སྤྱོད་འབུམ་ཕྲག་གསུངས་ནས་སྐུ་འཕོས་མ་ཐག་བདེ་བ་ཅན་དུ་བྱོན་པར་གྲགས་པ་གང་ལས་སྡོམ་གསུམ་རྣམ་ངེས་གསན་སྦྱང་མཛད། དགུང་གྲངས་བཅུ་སྐོར་ནས་འབྲི་ཀློག་ཐོགས་མེད་དུ་མཁྱེན། སྐུ་ཆུང་དུས་གནག་ཕྱུགས་ཀྱི་རྫི་བོར་ཕེབས་པའི་སྐབས་ཀྱང་རྡོ་ལེབ་ལ་ཕྱག་བྲིས་མང་པོ་གནང༌། ཚིག་བཅད་ཀྱང་མང་པོ་ཐོགས་མེད་དུ་རྩོམ་ནུས་པར་གསུངས། འོག་ནས་རྒྱས་པར་འཆད་འགྱུར་ལྟར་ཤེས་བྱ་རིག་པའི་གནས་ཆེ་ཆུང་སོགས་ཕ་མཐའ་ཡས་པའི་ཐོས་པའི་རྒྱ་མཚོ་ཆེན་པོར་མཁྱེན་དཔྱོད་ཀྱི་གྲུ་གཟིངས་སྐྱེས་སྦྱངས་བརྩོན་པའི་བ་དན་གཡོ་བཞིན་པར་ཞུགས་ཏེ་མདོ་སྔགས་ཀྱི་གཞུང་ལུགས་ཀྱི་སྒྲོ་འདོགས་ཆོད་པར་སྦྱངས་ནས་རྣམ་དག་ལྟ་སྒོམ་སྤྱོད་པའི་གཅེས་ནོར་ཐམས་ཅད་བདག་གིར་བཞེས། ཚིག་དོན་གསན་པ་ཙམ་མ་ཡིན་པར་ནང་དུ་རྒྱལ་བ་དགྱེས་བསྐྱེད་སྐྱེས་བུ་གསུམ་གྱི་ལམ་གྱི་ཉིང་ཁུའི་གསན་པ་དེའི་དོན་དམ་གནད་མ་ལུས་པ་འགལ་མེད་གནད་དུ་བསྡོམས་ནས་ཚུལ་གཉིས་ཤིང་རྟའི་ལམ་སྲོལ་གཅིག་ཏུ་དྲིལ་ཏེ་མི་འཕྲོག་པའི་མཁྱེན་རབ་ཀྱིས་ཐུགས་རྒྱུད་ཆོས་དང་གཅིག་ཏུ་བསྲེས་ཏེ་འདྲེས་པར་མཛད་པའི་ཐ་མར་གདོད་ནས་གོམས་པའི་ཡེ་ཤེས་ཆེན་པོའི་གསང་མཛོད་རྙེད་དེ་ཆོས་ཐམས་ཅད་ཀྱི་གནསྃ་ལུགྃས་རྒྱལ་བའི་དགོངས་པ་མ་ནོར་བ་སྒྲ་ཇི་བཞིན་མངོྃན་སུྃམ་དུྃ་གཟིགས་པར་གྱུར་པས་འཁྲུལ་པའི་མུན་སྤྲུལ་བརྟོལ་ནས་ངེས་པ་དོན་གྱི་འཇམ་དཔལ་གཞོན་ནུའི་ཐུགས་ཀློང་དུ་བཞུགས་པ་དཔྃལ་ལྡནྃ་བླྃ་མྃའི་ཞབྃས་ལྃ་གསོྃལ་བྃ་འདེབྃས། །གཉིས་པ་རྒྱས་པར་བཤད་པ་ལ་གཉིས། བསྟན་དང་སྟོན་པ་ལ་ངེས་ཤེས་སྐྱེས་པའི་ཚུལ་དང༌། དེའི་བསྟན་པ་ལ་གསན་བསམ་སྒོམ་པ་མཛད་ཚུལ་དང་ཞར་བྱུང་ཐ་མའི་མཛད་ཚུལ་བསྟན་པའོ། །དང་པོ་ལ་བཞི་ལས། །དང་པོ་ནི། རྗེ་འདི་ཉིད་ཀྱི་སྐུའི་སྐྱེ་བ་ཐམས་ཅད་དུ་དམ་པའི་ཆོས་ཚོལ་བ་དང༌། ཆོས་ཀྱི་མཛོད་བསགས་པ་དང༌། དེ་ཉིད་གཞན་ལ་སྟོན་པ་ཆོས་ཀྱི་སྒྲོན་མེ་སྦར་བ་རྣམས་རྣམ་ཐར་གྱི་གཙོ་བོ་ཡིན་པའི་མཐུས་རྒྱལ་སྲས་ཞི་བ་ལྷས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང༌། །བཅས་ཏེ་ཡུན་རིང་གནས་གྱུར་ཅིག །ཅེས་རྗེས་སུ་བསྔགས་པ་ལྟར་བསྐལ་བཟང་རྣམ་འདྲེན་བཞི་པ་སྟོན་པ་ཐུབ་པའིྃ་དབང་པོའི་རིང་ལུགས་ལུང་རྟོགས་ཀྱི་བསྟན་པ་རིན་པོ་ཆེ་བཀའ་དང་བསྟན་བཅོས་ཀྱིས། མདོ་སྔགས་བསྟནྃ་པྃ་ཡོངས་རྫོགས་ཀྱི་སྙིང་པོར་གྱུར་པ་ནི་ཐེག་དགུའི་ཡང་རྩེ་འོད་གསལ་རྡོ་རྗེ་སྙིང་པོ་ནང་རྒྱུད་ཡོ་ག་གསུམ་གྱི་གནད་བསྐྱེད་རྫོགས་རྫོགས་པ་ཆེན་པོ་བཀའ་གཏེར་གྱི་ལམ་ཁྱད་པར་དྲུག་གིས་འཕགས་ཤིང་རྒྱལ་བའི་ཆོས་མཛོད་ཟབ་ཅིང་རྒྱ་ཆེ་བ་ཐམས་ཅད་དེ་ལ་རྫོགས་པར་མཁྱེན་ནས། རིན་ཐང་ཤེས་པའི་སྐྱེས་བུའི་ཡིད་བཞིན་ནོར་བུ་རྙེད་པ་ལྟར་གྱུར་ནས། རིང་ལུགས་འདི་ལ་ཐོས་བསམ་སྒོམ་པ་དཔྱིས་ཕྱིན་པ་ཞིག་བྱེད་དུ་ནམ་འོང་དགོངས་ནས་ཉིན་དང་མཚན་མོའི་དུས་ཀུན་ཏུ་མཛད་སྤྱོད་གཞན་ལ་ཐུགས་མི་འཇུག་པ་དཔེར་ན་བུ་གཅིག་པུ་ཡིས་མ་བརྗེད་པ་མེད་པ་བཞིན་དྲན་ཏེ་ཐོས་བསམ་སྒོམ་པ་ལ་རིངས་པ་བྱང་ཆུབ་སེམས་དཔའ་ཆེན་པོ་རྟག་ཏུ་ངུའི་ཤེས་རབ་ཀྱི་ཕ་རོལ་ཏུ་ཕྱིན་པ་ཚོལ་བ་ལྟ་བུ་སྟེ། རྗེ་ཉིད་ཀྱི་བཀའ་འཕྲོས་ལས། ཕྲན་ཆུང་དུས་མདོ་སྔགས་ཀྱི་གཞུང་རྣམས་ཤེས་འདོད་ཀྱི་རེ་བ་ཤིན་ཏུ་ཆེ་ཡང་འཆད་ཉན་མཛད་པའི་སློབ་དཔོན་ནི་གང་ནས་སྟབས་མ་འགྲིགས། མི་ཚེ་ཡུད་ཙམ་དེ་སྟོང་པར་ཟད་བོར་སྙམ་སྟེ་སེམས་ལ་སྡུག་བསྔལ་མང་པོ་བྱུང་ཞེས་གསུངས་པ་ལྟར་རོ། །དེ་ལྟ་བུའི་སྐུ་ན་ཚོད་ཕྲ་ཡང་དམ་པའི་ཆོས་ཁོ་ན་དོན་དུ་གཉེར་བའི་ངོ་མཚར་གྱི་ཐུགས་བསྐྱེད་མངའ་བའི་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཞིང་འདིའི་སྟོན་པའི་རྣམ་ཐར་རྗེས་སུ་དྲན་པའི་ཚུལ་ནི། སློབ་དཔོན་མཐོ་བཙུན་གྲུབ་རྗེས། བདག་ནི་སྟོན་པ་གཞན་སྤངས་ཏེ། །བཅོམ་ལྡན་ཁྱོད་ལ་སྐྱབས་མཆིས་པ། །དེ་ཅིའི་སླད་དུ་ཞེ་ན་ཁྱོད། །སྐྱོན་མི་མངའ་ལ་ཡོན་ཏན་ལྡན། །ཞེས་དང༌། རྗེ་ཉིད་ཀྱིས་ཀྱང༌། བདག་ཅག་སྙིགས་མའི་འགྲོ་བ་མགོན་མེད་རྣམས། ཐུགས་རྗེས་ལྷག་པར་བཟུང་བའི་བཀའ་དྲིན་གྱིས། །ཞིང་དང་དུས་འདིར་རིན་ཆེན་རྣམ་གསུམ་གྱིས། །སྣང་བ་ཇི་སྙེད་ཁྱོད་ཀྱི་ཕྲིན་ལས་ཉིད། །དེ་ཕྱིར་སྐྱབས་མཆོག་མཚུངས་མེད་གཅིག་པུ་རུ། །ཡིད་ཆེས་དད་པས་སྙིང་ནས་གསོལ་འདེབས་ན། །ཞེས་གསུངས་པ་ལྟར། དབང་རྣོན་ཆོས་ཀྱི་རྗེས་སུ་འབྲང་བའི་བློ་ལྡན་དག་གི་ཆོས་སྣང་བའི་སྒོ་དད་པ་དང་སྙིང་རྗེ་ལྷན་སྐྱེས་སུ་མངའ་ཞིང༌། དེ་ཡང་མ་ནོར་བའི་སྐྱབས་བསླུ་བ་མེད་པ་ལ་འདུས་པ་ཆོས་ཉིད་ཡིན་པས་ས་གསུམ་སྐྱེ་དགུའི་རྣམ་འདྲེན་ཕྱོགས་དུས་ཀྱི་རྒྱལ་བ་སྲས་དང་བཅས་པ་རྣམས་དང༌། ཁྱད་པར་དུ་ཡང་མི་མཇེད་ཞིང་གི་བསྐལ་བཟང་སངས་རྒྱས་སྟོང་གི་བཞི་པ་རྩོད་དུས་སྙིགས་མའི་སེམས་ཅན་ལ་ཐུགས་སྙིང་རྗེ་ཆེན་པོའི་སྨོན་ལམ་ཆེན་པོ་ལྔ་བརྒྱ་བཏབ་ནས་རྗེས་སུ་བཟུང་བས་པདྨ་དཀར་པོ་ལྟ་བུར་བསྔགས་པའི་འདྲེན་པ་མཉམ་མེད་ཤཱཀྱའི་རྒྱལ་པོའི་རྣམ་ཐར་དང་བཀའ་དྲིན་སངས་རྒྱས་ཀུན་ལས་ཁྱད་པར་དུ་འཕགས་པའི་ངོ་མཚར་གྱི་རྒྱུ་མཚན་མཁྱེན་པས་དེ་ཡི་མཚན་ཙམ་ཐོས་པས་ཐུགས་རྒྱུད་དད་པས་འཁུལ་ཏེ་མོས་གུས་མཆི་མ་འཁྲུགས་པ་འབྱུང་བ་ནི་ཤིན་ཏུ་ངོ་མཚར་རྨད་དུ་བྱུང་བ་སྟེ། འཇམ་མགོན་བླ་མ་མཆོག་གི་ཞལ་ནས། དེས་ན་བོད་དུ་བསྟན་པ་གནས་པ་འདི་མཁན་ཆེན་ཉིད་ཀྱི་ཐུགས་བསྐྱེད་དང་སྨོན་ལམ་ཁོ་ནའི་མཐུ་ལས་བྱུང་བ་གོར་མ་ཆག་ཀྱང༌། གང་ཟག་སོ་སོའི་སྣང་བ་ལ་རང་རང་གི་བླ་མ་རེས་དགོན་པ་རེ་མཛད་པའི་སྟབས་ཀྱིས་བྱུང་བར་སེམས་པ་ནི། སྐྲ་ལ་གྲི་འཇུ་བ་དང་གོས་ལ་ཚོན་འཛིན་པ་ཚུན་ཆད་སངས་རྒྱས་ཀྱི་ཕྲིན་ལས་ཡིན་ཀྱང་སུས་མི་ཤེས་པ་དང་འདྲའོ། །ཞེས་གསུངས་པ་ལྟར། སྙིགས་དུས་སྟོན་པའི་རྗེས་འཇུག་ཁས་འཆེ་བའི་མཁས་དང་གྲུབ་པར་རློམས་པ་རྣམས་ཐུབ་དབང་མཆོག་གི་མཚན་ཆེ་བ་དང་བཅས་ཏེ་བརྗོད་པའང་དཀོན་པར་སྣང་བས་དེ་ལྟ་བུ་མ་ཡིན་པའི་རྒྱུ་མཚན་ཚུལ་བཞིན་མཁྱེན་པ་དཔལ་ལྡན་བླ་མའི་ཞབས་ལ་གསོལ་བ་འདེབས། །གསུམ་པ་བསྟན་པ་ལ་ཕྱག་རྗེས་མངའ་བ་སྐྱེས་བུ་ཁྱད་པར་ཅན་རྗེས་སུ་དྲན་པའི་ཚུལ་ནི། མཛོད་ལས། སྟོན་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པ་བྱེད་པ་ཁོ་ནའོ། །ཞེས་གསུངས་པ་ལྟར་ལྷ་དང་བཅས་པའི་འཇིག་རྟེན་ན་འགྲན་ཟླ་མེད་པའི་སྟོན་པ་ཐུགས་རྗེ་ཅན་དེ་དང་དེའི་རིང་ལུགས་ལུང་རྟོགས་ཀྱི་བ་སྟན་པ་རིན་པོ་ཆེ་ད་ལྟའི་བར་འཛིན་སྐྱོང་སྤེལ་བའི་ཤཱཀྱའི་རྒྱལ་པོ་དེ་ཡི་སྲས་རྒྱ་གར་འཕགས་པའི་ཡུལ་དུ་ཤིང་རྟ་ཆེན་པོ་གཉིས། འཛམ་གླིང་མཛེས་པའི་རྒྱན་དྲུག །རྨད་དུ་བྱུང་བའི་སློབ་དཔོན་ཆེན་པོ་གཉིས། བོད་དུ་ལོ་ཆེན་བཻ་རོ་ཙ་ན། སྐ་ཅོག་ཞང་གསུམ། སོ་ཟུར་གནུབས་གསུམ། ས་སྐྱ་པཎ་ཆེན། བུ་དོལ་ཇོ་ནང་སོགས་ཉི་ཟླ་ལྟར་གྲགས་པའི་མཁས་མཆོག་རྣམས་ཀྱི་བཀའ་དང་བསྟན་བཅོས་ཀྱི་དགོངས་པ་འགྲེལ་བའི་ཟབ་རྒྱས་ཀྱི་དགོངས་པ་ཟླ་མེད་པ་དབུ་མ་དང༌། འདུལ་མངོན། ཕར་ཕྱིན་གྱི་གསང་ཆེན་རྒྱུད་སྡེ་རྒྱ་མཚོའི་རིང་ལུགས་ལོག་རྟོག་འཁྲུལ་པའི་དྲི་མ་མེད་པ་མཚུངས་མེད་རྒྱལ་བ་དགྱེས་པའི་ལམ་བཟང་གསལ་བར་མཛད་པ་དང༌། ཁྱད་པར་བོད་ཡུལ་མཐའ་འཁོབ་མུན་པའི་གླིང་དུ་རྒྱལ་བསྟན་ཉིན་བྱེད་འདྲེན་པའི་ཐུགས་བསྐྱེད་དང་སྨོན་ལམ་མཛད་པ་རྨད་དུ་བྱུང་བ་སངས་རྒྱས་གཉིས་པ་མཁན་སློབ་ཆོས་ཀྱི་རྒྱལ་པོ་རྣམ་པ་གསུམ་སྟེ། མཆོག་གྱུར་བདེ་ཆེན་གླིང་པའི་ཟབ་གཏེར་རིགས་གསུམ་སྙིང་ཐིག་གི་ཁོག་དབུབ་ལས། བཅོམ་ལྡན་མགོན་པོ་ཀུན་ཏུ་གཟིགས༔ རྒྱལ་སྲས་གཙོ་བོ་འཇམ་པའི་དབྱངས༔ བོད་ཡུལ་བསྟན་པ་སྤེལ་བའི་ཕྱིར༔ ཆོས་རྒྱལ་མཆོག་གི་རྣམ་པར་སྣང༔ འོད་ཟེར་ཀུན་འཕགས་དཔལ་བརྩེགས་རྒྱལ༔ པདྨ་གར་དབང་སྤྱན་རས་གཟིགས༔ འཛམ་གླིང་གདུལ་བྱའི་སྣང་ངོ་རུ༔ མཚོ་སྐྱེས་རྡོ་རྗེར་ལྷུན་གྱིས་གྲུབ༔ དཀྱིལ་འཁོར་ཁྱབ་བདག་རྡོ་རྗེ་འཆང་༔ གསང་བ་ཀུན་འཛིན་མཐུ་སྟོབས་བདག༔ བོད་ཁམས་ཐུབ་བསྟན་སྣང་མཛད་པ༔ བྱང་ཆུབ་སེམས་དཔའ་ཞི་བ་འཚོ༔ བདག་ཅག་གསུམ་ནི་རིགས་གསུམ་གྱི༔ སེམས་དཔའ་མཆོག་དང་དབྱེར་མེད་ཅིང་༔ འདས་དང་མ་འོངས་ད་ལྟའི་དུས༔ འགྲོ་འདུལ་ཕྲིན་ལས་ལྷུན་གྱིས་གྲུབ༔ དངོས་དང་སྐུ་ཡི་བཀོད་པ་གཞན༔ སྔགས་དང་ཡེ་ཤེས་རོལ་མོ་ནི༔ བྱུང་དང་འབྱུང་འགྱུར་སྣོད་ལྡན་ལ༔ རྡོ་རྗེའི་སྔགས་རྒྱུད་ཅིར་ཡང་སྣང་༔ ཞེས་གསུངས་པ་ལྟར་ལུང་སྡེ་སྣོད་གསུམ་གྱི་འཆད་ཉན་དང༌། ལམ་བསླབ་པ་གསུམ་གྱི་ཉམས་ལེན་གྱིས་མི་ནུབ་པར་ཕྱོགས་དུས་ཀུན་ཏུ་སྤེལ་བར་ཐུགས་ཀྱིས་གཡར་དམ་བཅས་པ་ནི་མདོ་ལས། ཇི་ལྟར་བསྐལ་པ་བྱེ་བ་སྟོང་བརྗོད་ཀྱང༌། །སངས་རྒྱས་ཡེ་ཤེས་མཐའ་ཡོད་མ་ཡིན་ལྟར། །དེ་བཞིན་གཤེགས་པའི་དམ་པའི་ཆོས་འཛིན་པའི། །བསོད་ནམས་དེ་ཡང་ཚད་ཡོད་མ་ཡིན་ནོ། །ཞེས་དང༌། དཀོན་མཆོག་ཏཱ་ལའི་མདོ་ལས། །གང་དག་སངས་རྒྱས་ཆོས་ལ་དད་གུས་ལ། །དེ་དག་རྒྱལ་བར་མཆོད་པ་རྒྱ་ཆེན་བྱེད། །གང་དག་རྒྱལ་ལ་མཆོད་པ་ཆེ་བྱེད་པ། །དེ་དག་སངས་རྒྱས་དད་པ་བསམ་མི་ཁྱབ། །གང་དག་རྒྱལ་བའི་ཆོས་ལ་དད་གུས་པ། །དེ་དག་རྒྱལ་བར་ཆོས་ཉན་ངོམས་པ་མེད། །གང་དག་རྒྱལ་བའི་ཆོས་ཉན་མི་ངོམས་པ། །དེ་དག་ཆོས་ལ་མོས་པ་བསམ་མི་ཁྱབ། །གང་དག་རྟག་ཏུ་དགེ་འདུན་དད་གུས་པ། །དེ་དག་མི་ལྡོག་དགེ་འདུན་དད་པ་ཡིན། །གང་དག་མི་ལྡོག་དགེ་འདུན་རབ་དད་པ། །དེ་དག་དད་པའི་སྟོབས་ཀྱིས་མི་ལྡོག་འགྱུར། །གང་དག་དད་པའི་སྟོབས་ཀྱིས་མི་ལྡོག་པ། །དེ་དག་དབང་པོ་རྣོ་ཞིང་རབ་ཏུ་གསལ། །གང་དག་དབང་པོ་རྣོ་ཞིང་རབ་གསལ་བ། །དེ་དག་སྡིག་པའི་གྲོགས་པོ་རྣམ་པར་སྤང༌། །གང་དག་སྡིག་པའི་གྲོགས་པོ་རྣམ་སྤང་བ། །དེ་དག་ཆོས་ལྡན་གྲོགས་ཀྱིས་ཡོངས་སུ་བཟུང༌། །གང་དག་ཆོས་ལྡན་གྲོགས་ཀྱིས་ཡོངས་བཟུང་བ། །དེ་དག་དགེ་བ་རྒྱ་ཆེར་གསོག་པར་བྱེད། །གང་དག་དགེ་བ་རྒྱ་ཆེན་གསོག་བྱེད་པ། །བདག་ཉིད་ཆེན་པོ་དེ་དག་སྐུ་སྟོབས་ལྡན། །བདག་ཉིད་ཆེན་པོ་སྐུ་སྟོབས་གང་ལྡན་པ། །དེ་དག་མོས་པའི་ཁྱད་པར་རྒྱ་ཆེན་བྱེད། །གང་དག་མོས་པའི་ཁྱད་པར་རྒྱ་ཆེ་བ། །དེ་དག་རྒྱལ་བ་ཀུན་གྱིས་རྟག་བྱིན་རློབ། ཅེས་སོགས་རྒྱ་ཆེར་གསུངས་པ་ལྟར་རོ། །བཞི་པ་དེའི་རིང་ལུགས་ཀྱི་ཆེ་བ་དྲན་པས་སྤེལ་བ་དམ་བཅས་ཚུལ་ནི། ཡབ་སྲས་མཇལ་བའི་མདོ་ལས། མི་ཁོམ་བརྒྱད་པོ་ཐམས་ཅད་རབ་སྤང་ཞིང༌། །དལ་བ་ཕུན་ཚོགས་རྙེད་དཀའ་ཐོབ་གྱུར་ནས། །བདེ་གཤེགས་བསྟན་ལ་དད་པ་རྙེད་གྱུར་པའི། མཁས་པ་རྣམས་ཀྱི་རིག་པའི་རྣལ་འབྱོར་སྤྱོད། །ཅེས་གསུངས་པ་བཞིན། སྐྱེས་བུ་ཆེན་པོ་གང་དུ་སྐུ་སྐྱེ་བའི་མྱུ་གུ་བཟུང་བ་དེའི་ཚེའི་དམ་པའི་ཡོན་ཏན་ནི་རྒྱ་མཚོའི་ཀློང་གི་ནོར་བུའི་ཁ་དོག་བཞིན་སྐུའི་ན་ཚོད་ཀྱི་མེ་ཏོག་ནར་མ་སོན་པ་གཞོན་ནུའི་གཟུགས་ཀྱིས་ཕྲ་མོར་གྱུར་པ་ལྟར་ཡོན་ཏན་ཀྱང་བདག་གིས་ཐོས་བསམ་སྒོམ་པ། འཆད་རྩོད་རྩོམ་པ་སོགས་ཐབས་ཀྱི་སྒོ་གང་གིས་སྲིད་ཞིའི་རྣམ་འདྲེན་རྨད་བྱུང་འཕགས་བོད་དུ་བྱོན་པ་མཁས་གྲུབ་མཆོག་དེ་དག་གིས་རྗེས་འཇུག་གི་དོན་དུ་བཞག་པའི་རིང་ལུགས་དྲི་མ་མེད་པ་ནི་མ་ཕམ་པས། ཆོས་རྣམས་ཐམས་ཅད་བཀའ་དང་བསྟན་བཅོས་ཏེ། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་གསུངས་པ་ཉིད་ཡིན་པས་བཀའ་དྲིན་རྗེས་སུ་གཟོ་བའི་ཕྱིར་དུ་སྲིད་ཞིའི་གཅེས་ནོར་རྒྱལ་བའི་བསྟན་པ་རིན་པོ་ཆེ་ཉིད་ཡིན་ཏེ། སྤེལ་མར་བསྟོད་པ་ལས། བགྲོད་པ་གཅིག་དང་ཐབས་བདེ་དང༌། །ལེགས་པར་འགྲེལ་དང་ཉེས་པ་དང༌། །ཐོག་མ་བར་དང་མཐར་དགེ་བ། །ཁྱེད་ཀྱིས་བསྟན་འདྲ་གཞན་ལ་མེད། །ཅེས་གསུངས་པ་ཉིད་རང་ནོར་རང་གིས་ངོ་ཤེས་པས་དགོས་པ་དང་ཕན་ཡོན་ཆེ་ཞིང་གཡར་དམ་བཅས་པ་བཞིན། ཐུབ་བསྟན་སྤྱི་དང་ཁྱད་པར་དུ་གསང་ཆེན་སྔ་འགྱུར་བཀའ་གཏེར་གྱི་ཤིང་རྟ་ཆོས་ཀྱི་རྒྱལ་པོ་རོང་ཀློང་གཉིས་ཀྱི་ཞལ་སྐྱིན་དུ་བཞུགས་པའི་ཚུལ་འཆད་འགྱུར་ལྟ་བུའི་རྣམ་ཐར་མཚུངས་མེད་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་དེའི་བསྟན་པ་ལ་གསན་བསམ་སྒོམ་པ་ཇི་ལྟར་མཛད་ཚུལ་ལ་གསུམ། དང་པོ་ཐོས་པས་ཤེས་བྱ་རིག་པའི་ཆོས་ཐམས་ཅད་ཐུགས་སུ་ཆུད་ཚུལ། བར་དུ་བསམ་པས་རྒྱལ་བའི་དགོངས་པ་ཟབ་རྒྱས་ཐུགས་རྒྱུད་དང་འདྲེས་ཚུལ། མཐར་སྒོམ་པས་རིག་འཛིན་གྲུབ་པའི་རྒྱལ་སར་གཤེགས་ཚུལ་ལོ། །དང་པོ་ཐོས་པའི་རྒྱུ་སྐྱེས་སྦྱང་གི་བློ་གྲོས་ལྷན་སྐྱེས་སུ་མངའ་ཚུལ་དང༌། ཐུན་མིན་ལྷག་པའི་ལྷས་བྱིན་གྱིས་བརླབ་ཚུལ་གཉིས་ཀྱིས་མདོར་བསྟན། འབྲས་བུ་ཤེས་བྱ་རིག་པའི་གནས་ཐམས་ཅད་ཐུགས་སུ་ཆུད་ཚུལ་རྒྱས་པར་བཤད་པའོ། །དང་པོ་ནི། ཇི་སྐད་དུ། ཆུ་སྐྱར་ལས་ནི་ཆུ་ཤེས་དང༌། །དུ་བ་ལས་ནི་མེར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་པ་ལྟར་སྐུ་གསང་བ་ཟབ་མོའི་དབྱིངས་རྗེ་བཙུན་མཁྱེན་པའི་བདག་པོ་གཉིས་སུ་མེད་ཅིང༌། དེའི་སྒྱུ་འཕྲུལ་གྱི་རོལ་པ་ཐམས་ཅད་ཆོས་རབ་རྣམ་པར་འབྱེད་པའི་བློ་གྲོས་དང་སྤོབས་པ་བསམ་མི་ཁྱབ་པ་ཉི་མ་དང་འོད་ཟེར་བཞིན་ལྷུན་གྱིས་གྲུབ་པའི་མངོན་རྟགས་མ་སྦས་པར་གསལ་ཏེ་སྐུའི་སྐྱེ་བ་སྔོན་ནས་ཟབ་དང་རྒྱ་ཆེ་བའི་ཆོས་ལ་སྦྱངས་བའི་ལས་འཕྲོ་ལེགས་སྨོན་བཟང་པོ་བཞི་ལྡན་དུ་སད་པ་ཡིས་ཟབ་པ་སྟོང་པ་ཉིད་དང་རྒྱ་ཆེ་བ་ས་བཅུ་ལམ་ལྔ་སོགས་ཀྱི་དོན་རྒྱས་པར་སྟོན་པའི་མདོ་ཤེས་རབ་ཀྱི་ཕ་རོལ་དུ་ཕྱིན་པ་དང༌། ཏིང་འཛིན་རྒྱལ་པོ་སོགས་དང༌། སངས་རྒྱས་ཕལ་པོ་ཆེ། དཀོན་མཆོག་བརྩེགས་པ་སོགས་དང༌། རྒྱུད་ཀྱི་གཙོ་བོ་བདེ་གསང་འཇིགས་གསུམ་ལས་ཀྱི་འཁོར་ལོ། མདོ་སྒྱུ་སེམས་ཕྱོགས་ཀྱི་རྒྱུད་ལུང་མན་ངག་གི་དགོངས་དོན་དང་དེ་དག་གི་དགོངས་འགྲེལ་བསྟན་བཅོས་གྲགས་ཆེ་བ་དཔལ་མགོན་འཕགས་པ་ཀླུ་སྒྲུབ་ཀྱིས་གཏམ་ཚོགས། དབུ་མ་རིག་ཚོགས། བསྟོད་ཚོགས་བཅས་འཁོར་ལོ་གསུམ་གྱི་དགོངས་འགྲེལ་དང༌། རྒྱལ་ཚབ་ས་བཅུའི་དབང་ཕྱུག་གི་བྱམས་ཆོས་སྡེ་ལྔ། འཕགས་པ་ལྷའི་བཞི་བརྒྱ་པ། ཟླ་གྲགས་ཀྱི་འཇུག་པ། ཞི་བ་ལྷའི་སྤྱོད་འཇུག །མཁན་ཆེན་བྱང་ཆུབ་སེམས་དཔའི་དབུ་མ་རྒྱན་སོགས་དང༌། ཐོག་མེད་དང་དབྱིག་གཉེན་སྐུ་མཆེད་ཀྱི་མངོན་པ་གོང་འོག །སོ་ཐར་གྱི་མདོ་དང༌། ཡོན་ཏན་འོད་ཀྱི་འདུལ་བ་མདོ་རྩ། ཕྱོགས་ཀྱི་གླང་པོའི་ཚད་མ་ཀུན་བཏུས། ཆོས་ཀྱི་གྲགས་པའི་རྣམ་འགྲེལ་སོགས་ཀྱིས་མཚོན་བཅུ་ཕྲག་རིག་པའི་གནས་ཐམས་ཅད་ཀྱིས་དགོངས་དོན་ལ་བཤེས་གཉེན་གྱི་ངག་ཁྲིད་སོགས་གང་ལའང་མ་ལྟོས་པར་སྤྱན་གྱིས་བལྟས་པ་ཙམ་གྱིས་ཚིག་དོན་ཐམས་ཅད་དཀའ་ངལ་མེད་པ་བདེ་བླག་གིས་ཁོང་དུ་ཆུད་པས་ཤེས་བྱ་རིག་པའི་གནས་ཐམས་ཅད་གཟིགས་པའི་པཎྜི་ཏ་ཆེན་པོ་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཐུན་མིན་ལྷག་པའི་ལྷས་བྱིན་གྱིས་བརླབས་ཚུལ་ནི། བཀའ་ལས་ཕྲན་ལོ་ཆུང་དུས་གསར་རྙིང་གི་མཁས་གྲུབ་བཟང་ལ་མང་བར་བཞུགས་ཀྱང་རྒྱལ་སྲས་མཁས་པའི་ཁྱུ་མཆོག་དཔལ་སྤྲུལ་ཆོས་ཀྱི་དབང་པོའི་ཞལ་སྔ་ནས་སྤྱོད་འཇུག་ཤེར་ལེ་ཞིག་ཉིན་ཞག་ལྔ་ཙམ་ཐོབ་པ་ལས་རང་ཉིད་བསོད་ནམས་དམན་པས་བླ་མ་སུ་ལས་ཀྱང་དཔེ་ཆ་ཞུ་ཡུལ་དང་བསླབ་སྦྱང་སྟབས་མ་འགྲིགས་པ། སྡེ་དགེའི་མངའ་ཁུལ་གྱི་བླ་མ་ཐམས་ཅད་མཇལ་ཞིང་བྱོན་པས་རུ་དམ་རྫོགས་ཆེན་དགོན་དུ་གྲུབ་དབང་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་རང་ཡུལ་གྱི་མཇལ་ཞུས་མང་པོ་དང་ལྷན་ཅིག་ཕེབས་པས་གཞན་རྣམས་ལ་གང་ཡང་མ་གསུང༌། རྗེ་ཉིད་ན་བཟའ་ཡང་གཟན་ཤམ་མེད་པར་པགས་སློག་རས་དམར་གྱི་མཐའ་རྒྱན་ཅན་ཞིག་བཞེས་གྲི་ཆུང་ངུ་ཞིག་སྐུ་སྐེད་དུ་དྲངས་བཞིན་ཕེབས་པས་མདུན་དུ་ཕེབས་པར་ཕྱག་དབུ་ལ་བཞག་སྟེ་ཁྱེད་རང་དཔལ་ཆེན་འདུས་པའི་བསྙེན་པ་ཞིག་ཞོག་དང་ཁམས་གསུམ་དབང་དུ་འདུས། སྲིད་གསུམ་ཟིལ་གྱིས་གནོན། ཚེ་འདི་ལ་བདེ་སྡུག་འདྲེས་མ་འོང༌། དགུང་གྲངས་བརྒྱད་ཅུ་ཐུབ། མཚན་མི་ཕམ་ཕྱོགས་ལས་རྣམ་རྒྱལ་ཐོགས་ཞེས་དེར་ཡོད་ཀུན་གྱི་ཐོས་པར་གསུངས། ཕྱིས་རྗེ་བླ་མ་མཆོག་གིས་རྫོགས་ཆེན་མི་འགྱུར་ནམ་མཁའི་རྡོ་རྗེས་ཚེ་འདི་ལ་བདེ་སྡུག་འདྲེས་མ་འབྱུང་གསུངས་པ་དེ་ཇི་བཞིན་བྱུང༌། མི་ཚེ་ཕྱེད་ནད་ཀྱིས་མནར་སོང་ཞེས་གསུངས་ཀྱང་ཇི་ལྟར་ལུང་བསྟན་པ་བཞིན་འཁྲུངས་ཡུལ་འཇུ་ཉུང་རི་ཁྲོད་དུ་དཔལ་ཆེན་འདུས་པའི་བསྙེན་སྒྲུབ་མཛད་ཅིང་དེ་ཕྱིན་ཐུགས་དམ་གསང་བའི་ལྷ་མཆོག་མཛད་ཚུལ་ཐུགས་དམ་རྒྱུན་གྱི་རྩ་ཐོར་གསལ་བ་ལྟར་རོ། །སྐུ་ཚེའི་སྨད་རྨ་རྒྱལ་སྤོམ་རའི་མདུན་ཕེབས་ན་དགུང་གྲངས་བརྒྱད་ཅུ་བཞུགས་པ་རཏ་གླིང་ཚེ་གསང་བསྙེན་སྒྲུབ་སྐབས་གུ་རུ་པདྨ་རྒྱལ་པོའི་ལུང་བསྟན་ཚིགས་བཅད་ཕྱག་བྲིས་དངོས་ཞིག་མཇལ་ཞིང་རླུང་རྟ་ཤིན་ཏུ་མང་པོ་སྤར་བཏབ་ཀྱིས་རྨ་རྒྱལ་དུ་ཕེབས་དགོས་ཞེས་གསུངས་ཀྱང༌། རྨ་རྒྱལ་ལུང་པ་ཤིན་ཏུ་གྲང་ངར་ཆེ། འཚོ་བ་ཡང་དཀོན། ཇག་རྐུན་མང་པོའི་རྒྱུ་ལམ་ཡིན་སྟབས་འཁྲུངས་ཡུལ་པ་ཐམས་ཅད་ཀྱིས་བཤོལ་བས་ཕེབས་རྒྱུ་མ་བྱུང༌། སླར་ལུང་བསྟན་ཞིག་ཏུ་དགུང་གྲངས་དྲུག་ཅུ་རེ་བརྒྱད་དུ་བཞུགས་པའི་ལུང་བསྟན་འདུག་པ་དེ་བཞིན་འཚོ་གཞེས་མཛད་པ་ཡིན། འདི་སྐབས་གཏེར་ཆེན་མཆོག་གྱུར་གླིང་པས་རུ་དམ་གངས་ཀྱི་ར་བའི་གནས་ཞལ་ཕྱེས་ཏེ་གངས་ཁྲོད་ནས་ཡང་དག་སངས་རྒྱས་མཉམ་སྦྱོར་ཟབ་གཏེར་བཞེས་ཤིང༌། མི་འགྱུར་ནམ་མཁའི་རྡོ་རྗེ་དང༌། དཔལ་སྤྲུལ་རིན་པོ་ཆེ་སོགས་ཆོས་བདག་རྣམས་ལ་ཆོས་སྐྱེས་ཕུལ་ཞིང་གངས་རིའི་རྩེར། བསྐོར་ལམ་བཏོད་པ་མི་མང་གིས་བསྐོར་བའི་མཉམ་དུ་རྗེ་བླ་མ་ཡང་ཕེབས་པས་གངས་རིའི་སྟེང་དུ་ཨ་རུ་རའི་ཆར་པ་བབས་འདུག་པ། ཨ་རུ་ར་ཐུ་བ་གང་ཙམ་བསྣམས་པ་གསུངས། གཏེར་ཆེན་ལས་བར་ཆད་ལམ་སེལ། ཆོས་སྐུ་ཀུན་བཟང་སོགས་ལྗགས་ལུང་གསན་པའི་ཕྱག་བྲིས་མཇལ། སྨད་ཤོད་རྫོང་སར་དུ་ཕེབས་པ་འཁྲུངས་ཡུལ་གཅིག་པའི་བླ་མ་རྒྱལ་སྲས་གཞན་ཕན་མཐའ་ཡས་ཀྱི་གསོལ་དཔོན་པདྨ་དོན་ཡོད་དང་མཇལ་བས་ཐུགས་དགྱེས་ཚུལ་མཛད་པ། དབྱངས་འཆར་ཞིག་ཤེས་ན་སྙམ་ཡང་བསླབ་མཁན་དཀོན་ཚུལ་ཞུས་པས་སྤྲུལ་སྐུ་རིན་པོ་ཆེ་འཇམ་དབྱངས་མཁྱེན་བརྩེའི་དབང་པོ་འཁྲུངས་གཞིས་སུ་བཞུགས་པས་དེར་ཞུ་ཡིག་ཕུལ་གསུངས་ཏེ་ཕྱག་བྲིས་བཅས་བཏང་བྱུང་བས། རྗེ་བླ་མ་མཇལ་ནས་ཞུ་ཡིག་ཕུལ་བས་ཁྱེད་ལ་དབྱངས་འཆར་ཞིག་བསླབ་རྒྱུ་དང་འཇམ་དབྱངས་རྗེས་གནང་དགོས་ཟེར་འདུག་པ་དབྱངས་འཆར་ཞིག་ལོ་ཆུང་དུས་བསླབ་མྱོང་ཡང་ད་ནི་ཁ་གར་གྱུ་མི་ཤེས། ཡི་གེའི་ནང་དབྱངས་ཅར་ཟེར་འདུག་དབྱངས་ཅར་མ་རེད་དབྱངས་འཆར་རེད། འཇམ་དབྱངས་རྗེས་གནང་དགོས་ན་ཞག་ཤས་སྡོད་དང་བྱེད་ཆོག་གསུངས། ཉིན་ཁ་ཤས་མཚམས་འཇམ་དཔལ་སྨྲ་སེང་དམ་པའི་ལུགས་ཀྱི་རྗེས་གནང་ཁྲིད་ལུང་བཅས་བསྩལ། སྤྱིར་ཤེས་རབ་ཀྱི་ལྷ་ཞིག་སྒྲུབས་དང་དབྱངས་འཆར་སོགས་གཞུང་ལུགས་རྣམ་ལོས་ཤེས་འོང༌། གཞུང་རེ་རེ་བཞིན་མི་རེ་ལ་ཁྲིད་ཚོད་ག་ལ་ཡོད་ཅེས་གསུངས། ཚུར་ལམ་དཔལ་སྤུངས་སུ་ཕེབས་པས་མཁན་ཆེན་བླ་མ་བཀྲ་ཤིས་འོད་ཟེར་དང་མཇལ། འཇམ་མགོན་ཀོང་སྤྲུལ་རིན་པོ་ཆེའི་མདུན་ནས་དབྱངས་འཆར་རྩ་བ་ཞིག་མཁན་ཆེན་བླ་མས་བསྣམས་ནས་གནང་བྱུང་བས་དཔེ་མེད་ཐུགས་དགྱེས་ཚུལ་གྱིས་གཟིགས་ཤིང་འཇམ་དབྱངས་ལ་གསོལ་བ་བཏབ་པས་མི་ལ་རེ་མ་དགོས་ཙམ་གྱིས་ཤེས་སོང་གསུངས། དག་སྣང་དུ་དབྱངས་འཆར་གྱི་དཔེ་རྙེད་པའི་ཚུལ་འགྲེལ་ཆེན་གྱི་གཤམ་མཛད་བྱང་དུ་གསལ་བ་ལྟར་དང༌། དེ་ནས་བཟུང་རྗེ་བླ་མ་རྣམ་གཉིས་ཐུགས་ནང་ཤིན་ཏུ་གཤིན་པ་སྐུ་མཆེད་ལྟ་བུ་མཛད། དད་པ་ཅན་དག་གིས་རྗེ་བླ་མ་རིན་པོ་ཆེ་དང་མཁན་ཆེན་བཀྲ་ཤིས་འོད་ཟེར་གཉིས་ཐུགས་བརྒྱུད་གཅིག་པའི་ཞལ་བཞེས་ཀྱང་གནང་ཞེས་ཐོས། དེ་ནས་ཐམས་ཅད་མཁྱེན་གཟིགས་ཀུན་མཁྱེན་འཇམ་དབྱངས་བླ་མས་བརྡས་ལུང་བསྟན་པ་བཞིན་འཁྲུངས་ཡུལ་དུ་བྱོན་ཏེ། འཇུ་ཉུང་རི་ཁྲོད་འཆི་མེད་མཆོག་གྲུབ་གླིང་དུ་ཟླ་བ་བཅོ་བརྒྱད་ཀྱི་བར་དུ་འཇམ་དཔལ་སྨྲ་སེང་གི་སྒྲུབ་ཐབས་ཀུན་གཟིགས་མཁྱེན་བརྩེ་རིན་པོ་ཆེའི་གསུང་གྲུབ་པ་མཆོག་གི་ཞལ་ལུང་སྟེང་ནས་བསྙེན་སྒྲུབ་རིལ་བུའི་ལས་སྦྱོར་བཅས་མཐར་ཕྱིན་པ་མཛད་པ་དང༌། ཟུང་འཇུག་གྲུབ་པ་ལབ་སྐྱབས་མགོན་དབང་ཆེན་དགྱེས་རབ་རྡོ་རྗེའི་མདུན་དུ་བྱོན་ནས་རྗེ་དེའི་ཐུགས་དམ་ལྷག་པའི་ལྷ་འཇམ་དཔལ་དཀར་པོ་མ་ཏིའི་ལུགས་དང༌། རྟ་མགྲིན་ཡང་གསང་གི་རྗེས་གནང༌། ལྷ་རིགས་བདེ་ཆེན་རོལ་པ་རྩལ་གྱི་དག་སྣང་གེ་སར་རྡོ་རྗེ་ཚེ་རྒྱལ་གྱི་སྲོག་གཏད་གསན་ཞིང༌། སྐྱབས་མགོན་འདི་ཉིད་ཀྱི་ཐུགས་དམ་གཙོ་བོ་གཅིག་རྟ་མགྲིན་གསང་སྒྲུབ་ཡིན་ཅིང་དེའི་རྗེས་སུ་བཟུང་སྟེ་ལུང་བསྟན་ཀྱང་ཡོད་པར་སྣང་བས། ལབ་རི་ཁྲོད་དུ་སྐྱབས་མགོན་ཉིད་ཀྱི་མཛད་པའི་འཇམ་དཔལ་དཀར་པོའི་སྒྲུབ་ཐབས་ལ་བརྟེན་ནས་བསྙེན་སྒྲུབ་ཟླ་བ་དྲུག་ཏུ་མཛད་པས་བསྐྱེད་རིམ་གྱི་གསལ་སྣང་ཁྱད་པར་ཅན་བྱུང་ཞིང༌། ཐུགས་ཀའི་སྔགས་ཕྲེང་འཁོར་བའི་དམིགས་པ་བཟུང་ནས་དངོས་སྣང་ལའང་ས་གཞི་ཐམས་ཅད་འཁོར་ལོ་བཞིན་འཁོར་བའི་སྣང་བ་དང༌། ཐ་མལ་གྱི་སྣང་ཤེས་འགགས་པའི་གསལ་སྣང་ཁྱད་པར་ཅན་བརྙེས་པ་སོགས་གཞུང་ནས་བཤད་པའི་ཏིང་འཛིན་གྱིས་དུས་འདའ་བ་བྱུང་བས་བླ་མའི་བྱིན་རླབས་ཡིན་པ་འདྲ་གསུངས་པ་དང༌། འཇམ་དཀར་གྱི་རྗེས་གནང་གསན་སྐབས་དང་བསྙེན་སྒྲུབ་ཀྱི་མཐར་སྲན་མ་མ་ཤིའི་ལས་སྦྱོར་གནང་བས་གཞུང་ནས་བཤད་པའི་རྟགས་བྱུང་གསུངས། སྒྲུབ་ཐབས་དེ་ཐུགས་རྩིས་ཆེ་བར་མཛད་ནས་སྤར་དུ་བཀོད་པར་མཛད། སྐྱབས་མགོན་དབང་ཆེན་དགྱེས་རབ་རྡོ་རྗེ་ལ་ཡང་འཇམ་དབྱངས་ཀྱི་རྗེས་སུ་བཟུང་བ་ཡིན་པས་གཟིམ་ཆུང་འཇམ་དབྱངས་ཞལ་གཟིགས་ལྷ་ཁང་ཞེས་ཡོད་པར་སྣང༌། དོན་དུ་སྐྱབས་མགོན་ཉིད་ལ་སློབ་མ་འཇམ་དབྱངས་ཀྱི་མཚན་ཅན་བཞི་འབྱུང་ཞིང༌། དེ་ཐམས་ཅད་འཇམ་དབྱངས་ཀྱིས་རྗེས་སུ་བཟུང་བ་མཁས་གྲུབ་ཀྱི་དབང་པོ་བཞི་སངས་རྒྱས་ཀྱི་བསྟན་པ་ལ་བྱ་བ་མཛད་ནུས་འབྱུང་བའི་འཇམ་དཔལ་གྱིས་ལུང་བསྟན་པའི་ཡ་གྱལ་གཅིག་རྗེ་བླ་མ་ཉིད་ཡིན་པར་གསུངས། སྐྱབས་མགོན་ཉིད་རྒྱ་ནག་ཏུ་ཕེབས་པར་ནོར་གྱི་འགྲོ་དོན་ཆེ་བར་བྱུང་བས་ལབ་དགོན་དུ་སྟོན་པ་ཐུབ་དབང༌། འཇམ་དཔལ་དབྱངས། གུ་རུ་རིན་པོ་ཆེ། རྟ་མགྲིན། རྣམ་རྒྱལ་མཆོད་རྟེན་བཅས་སྟོང་སྐུ་ལྔ་དང༌། མཆོད་རྫས་སོགས་སྤུས་ནམ་ལྡན་པ་རྒྱ་གང་ཆེ་ལས་ཆོས་ཀྱི་འགྲོ་དོན་ཆེར་མ་བྱུང༌། མི་ཕམ་རིན་པོ་ཆེ་ཁྱེད་རང་ཕེབས་ན་ཆོས་ཀྱི་འགྲོ་དོན་རྒྱ་ཆེར་འབྱུང་བར་ལུང་བསྟན་པས་མཚོན་ཐུན་མོང་གི་སྣང་ངོར་མཚོན་བྱེད་ཙམ་དུ་བཤད་པ་ལས་ནམ་མཁའི་ཟླ་བ་དང་ཆུ་ཟླ་བཞིན་སྤྲུལ་གཞི་ཁྱད་པར་ཅན་སྲས་དང་བཅས་པའི་རྒྱལ་བ་ཀུན་གྱི་མཁྱེན་གཉིས་ཡེ་ཤེས་ཀྱི་སྐུ་གཅིག་ཏུ་སྐྱབས་གནས་ཀུན་གྱི་མཆོག་འཇམ་དཔལ་དམར་པོ་ལ་ཐུགས་དྲན་ཟིན་ཙམ་ནས་ཡིད་ཆེས་ཀྱི་དད་པའི་ངེས་ཤེས་ཐུགས་ལ་ལྷན་སྐྱེས་སུ་འཁྲུངས་ནས་སྐུའི་སྐྱེ་བ་ཐམས་ཅད་དུ་མི་འབྲལ་བ་སྙིང་གི་ཐིག་ལེར་རྟག་ཏུ་བསྒོམ་པ་བཞིན་འདུ་འབྲལ་མེད་པར་དགྱེས་པས་བཞུགས་པའི་མངོན་རྟགས་གསལ་བ་རྒྱལ་སྲས་ཞི་བ་ལྷ་ལ་འཇམ་དཔལ་དབྱངས་ཀྱིས། བུ་གཅིག་འདི་ནི་ང་ཡི་བསྟན་ཡིན་ཏེ། །ང་ནི་ཁྱེད་ཀྱི་དགེ་བའི་བཤེས་གཉེན་ཡིན། །ཞེས་སོགས་ཀྱིས་ཁབ་ནས་འབྱུང་བར་ལུང་བསྟན་པ་ལྟ་བུ་སྟེ་མདོར་ན་འཇམ་མགོན་ཟུར་ཕུད་ལྔ་པ་ཉིད་དཔལ་ལྡན་བླ་མའི་ཚུལ་དུ་བྱོན་པའི་ཞབས་ལ་གསོལ་བ་འདེབས། །གསུམ་པ་འབྲས་བུ་ཤེས་བྱ་རིག་པའི་གནས་ཐུགས་སུ་ཆུད་ཚུལ་ལ། སྐྱེས་སྦྱང་གི་རིགས་ཀྱི་རྟགས་མངའ་ཚུལ་སྤྱིར་བསྟན་པ་དང༌། བྱེ་བྲག་ཤེས་བྱ་རིག་པའི་གནས་ཐམས་ཅད་སྦྱང་བརྩོན་གྱིས་ཐུགས་སུ་ཆུད་ཚུལ་ལོ། །དང་པོ་ལའང་ཐེག་པ་ཆེན་པོའི་རིགས་ཀྱི་ཡོན་ཏན་ཐུགས་ལ་འཁྲུངས་ཚུལ་དང༌། ཆོས་རབ་རྣམ་འབྱེད་མཁྱེན་རབ་ཀྱི་པདྨོ་རྒྱས་པའི་ཚུལ་བསྟན་པའོ། །དང་པོ་ལའང་རྒྱ་ཆེ་བའི་བློ་དང་ཟབ་མོའི་བློ་གྲོས་མངའ་ཚུལ། སྙིང་རྗེ་ཆེན་པོའི་རིགས་ཀྱི་ཡོན་ཏན་རིམ་གྱིས་སད་པའི་ཚུལ་ལོ། །དང་པོ་ནི། བླ་མ་དང་ལྷག་པའི་ལྷའི་བྱིན་རླབས་ཟླ་གཞོན་གྱི་བདུད་རྩིས་ཇི་ཙམ་ནུས་པ་སད་པ་ནི། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང༌། །མོས་པ་དང་ནི་བཟོད་པ་དང༌། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་གསུངས་པ་ལྟར། གདོད་ནས་གོམས་པའི་ལྷན་སྐྱེས་ཐེག་པ་ཆེན་པོའི་རིགས་ཀྱི་ནུས་པའི་ཟླ་ཟེར་གྱིས་ཐུགས་ཀྱི་རྒྱ་མཚོ་ཆེན་པོར་རེག་པ་དེ་ཡི་ཚེ་རྒྱལ་བའི་དགོངས་པ་ཟབ་མོ་སྒྲ་ཇི་བཞིན་དང་ཇི་བཞིན་མ་ཡིན་པར་བསྟན་ཏེ་རྟོག་གེ་དང་ཕལ་པ་ཉན་རང་གི་བློར་འབད་པས་རྟོག་པར་དཀའ་བ་ཡི་ཐམས་ཅད་མཁྱེན་པའི་ལམ་གྱི་བསྒྲུབ་བྱ་བཟོ་གསོ་སྒྲ་ཚད་དང་ནང་དོན་མདོ་སྔགས་ཀྱི་རིག་པའི་གནས་ཆེ་ཕྲ་ཀུན་གྱི་གནད་གསང་གི་ཚིག་དོན་ལ་མི་འཕྲོག་པའི་མཁྱེན་རབ་དང་གཏིང་དཔོག་པའི་བློ་གྲོས་ཀྱི་མཐུ་ཡང་ཇི་ཙམ་ཟབ་ཅིང་རྒྱ་ཆེ་བ་དེ་ལྟ་དེ་ལྟར་ཟབ་པ་འཕེལ་བས་ཚིག་དོན་གྱི་གནད་མཐའ་དག་མི་བརྗེད་པ་དྲན་པའི་གཟུངས་སུ་སྨིན་པར་གྱུར་པས་ཆོས་ཀྱི་རྒྱ་མཚོ་འཕེལ་ཞིང་རྒྱས་པར་མཛད་ནུས་པའི་རིག་ཀྱི་བག་ཆགས་སད་པས་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཟབ་མོའི་དོན་རྟོགས་ཤིང་སད་པའི་ཚུལ་ནི། སྟོན་མཆོག་ཐམས་ཅད་མཁྱེན་པས་གདུལ་བྱའི་དོན་དུ་རྗེས་སུ་གདམས་པའི་ལུང་རྟོགས་དམ་པའི་ཆོས་ཀྱི་དོན་སྤྱི་དང༌། ཁྱད་པར་དུ་ཡང་ཀླུ་སྒྲུབ་ཀྱིས། རྟེན་ཅིང་འབྲེལ་བར་འབྱུང་འདི་རྒྱལ་བ་ཡི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །གང་གི་འདི་ནི་ཡང་དག་མཐོང་བ་དེའི། །སངས་རྒྱས་དེ་ཉིད་རིག་པ་རྣམ་མཆོག་ཡིན། ཞེས་དང༌། རྩ་ཤེས་ལས། གང་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ལྟར། ཐེག་ཆེན་འཕགས་པའི་རྟོགས་རིགས་ཟབ་ཆོས་བརྒྱད་ལྡན་དོན་དམ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཀུན་རྫོབ་ཕྱི་ནང་གི་རྒྱུ་འབྲས་རྟེན་ཅིང་འབྲེལ་འབྱུང་ཟུང་འཇུག་གི་དོན་ལ་ངོ་མཚར་རྨད་དུ་བྱུང་བ་རྒྱལ་བ་བདེན་པར་སྨྲ་བའི་གསུང་གི་གསང་མཛོད་ཀྱི་ཁྱད་ཆོས་ཡིན་པའི་ཡིད་ཆེས་ཀྱི་ངེས་པ་ཕྱིར་མི་ལྡོག་པ་སྙིང་གི་གཏིང་ནས་འཁྲུངས་པ་དཔལ་ལྡན་བླ་མའི་ཞབས་ལ་གསོལ་བ་འདེབས། །གསུམ་པ་འཕགས་པའི་རིགས་ཀྱི་རྟགས་སྙིང་རྗེ་ཆེན་པོའི་རིགས་སད་པའི་རྟགས་ནི། འཕགས་པ་ཆོས་ཡང་དག་པར་སྡུད་པ་ལས། བཅོམ་ལྡན་འདས་བྱང་ཆུབ་སེམས་དཔའ་ཆོས་རབ་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་གཅིག་རབ་ཏུ་བཟུང་ཞིང་རྟོགས་པར་བགྱིས་ན་སངས་རྒྱས་ཀྱི་ཆོས་ཐམས་ཅད་དེའི་ལག་ཏུ་མཆིས་པ་ལགས་སོ། །ཆོས་གཅིག་པོ་སྟེ་གང་ཞེ་ན། འདི་ལྟ་སྟེ། སྙིང་རྗེ་ཆེན་པོའོ། །བཅོམ་ལྡན་འདས་སྙིང་རྗེ་ཆེན་པོ་ནི་སངས་རྒྱས་ཀྱི་ཆོས་ཐམས་ཅད་བྱང་ཆུབ་སེམས་དཔའ་རྣམས་ཀྱི་ལག་མཐིལ་དུ་མཆིས་པ་ལགས་སོ། །བཅོམ་ལྡན་འདས་དཔེར་བགྱིས་ན་འཁོར་ལོའི་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིའོ། །བཅོམ་ལྡན་འདས་དཔེར་བགྱིས་ན་སྲོག་གི་དབང་པོ་མཆིས་ན་དབང་པོ་གཞན་རྣམས་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་དུ་སྙིང་རྗེ་ཆེན་པོ་མཆིས་ན་བྱང་ཆུབ་སེམས་དཔའི་ཆོས་གཞན་རྣམས་ཀྱང་འབྱུང་བར་འགྱུར་རོ། །ཞེས་སོགས་ཐེག་ཆེན་གྱི་མདོ་རྣམས་ནས་རྒྱ་ཆེར་བསྔགས་པ་ལྟར་ཆེད་དུ་དམིགས་པས་བསྒོམས་སྟེ་བཅོས་པ་མིན་ཀྱང་ནད་མཚོན་མུ་གེའི་སྡུག་བསྔལ་གྱི་རྒྱ་མཚོར་ཀུན་འབྱུང་ལས་ཉོན་གྱིས་རླུང་གིས་བར་མེད་དུ་གཡེང་བ་སྙིགས་དུས་ཀྱི་སྲིད་པའི་འགྲོ་བ་ཀུན་ཐབས་མཁས་ཐུགས་རྗེའི་ཞགས་པས་བཟུང་ཏེ་དུས་ནམ་དུ་ཡང་མི་གཏོང་སྙམ་པའི་སྙིང་རྗེ་རྒྱས་པ་བདག་ཅག་གི་རྣམ་འདྲེན་བཞི་པའི་མཆེད་ཟླར་གྲུབ་པ་ནི་བྱང་ཆུབ་སེམས་དཔའི་ཆེ་རྟགས་མ་ནོར་ལྷན་སྐྱེས་སུ་མངའ་བས་རྒྱ་མཚོའི་གཏིང་གི་ནོར་བུའི་འོད་མདངས་ཆུ་གཏེར་ལ་གསལ་བ་བཞིན་རྗེ་བཙུན་འཇམ་དཔལ་དཔའ་བོའི་ཡེ་ཤེས་སྒྱུ་མའི་ཆོ་འཕྲུལ་དུ་ངེས་པའི་རྟགས་གསལ་བར་མངའ་བ་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ཆོས་རབ་རྣམས་འབྱེད་ཀྱི་མཁྱེན་རབ་ཀྱི་པདྨོ་རྒྱས་པའི་ཚུལ་ལ་བསྟན་བཤད་གཉིས་ལས། དང་པོ་མདོར་བསྟན་ནི། ཙནྡན་དང་དྲི་བཞིན་སྐྱེས་ཐོབ་ཀྱི་ཆགས་ཐོགས་མེད་པའི་བློ་གྲོས་ཟབ་ཅིང་མྱུར་བ་དང་ལྷག་པའི་ལྷ་ཡབ་གཅིག་སྨྲ་བའི་ཉི་མ་བསྙེན་སྒྲུབ་ཀྱི་ཐུགས་རྒྱུད་བསྐུལ་བའི་སྦྱོར་བརྩོན་ལས་དངོས་གྲུབ་ཏུ་ཐོབ་པའི་མཐུས་སྐུ་ཡི་ན་ཚོད་མ་སྨིན་པའི་བྱིས་པ་ལྟར་ཕྲ་ཡང་ཤེས་བྱ་གནས་ལྔ་རིག་པའི་གཞུང་ཡན་ལག་དང་བཅས་པ། སློབ་དཔོན་གྱི་ཞལ་ཁྲིད་དང་དམ་པའི་སྦྱང་བརྩོན་གྱིས་ཡུན་རིང་བསྒྲིམ་མི་དགོས་པ་བྱིས་པ་སྐུ་རྩེད་མཛད་པའི་ཞར་བྱུང་ལས་ཐུགས་སུ་ཆུད་དེ་ཤེས་པའི་ཚུལ་ནི། རྨད་དུ་བྱུང་བའི་སློབ་དཔོན་ཆེན་པོ་ཞི་བ་ལྷ་དངོས་དཔལ་སྤྲུལ་ཆོས་ཀྱི་དབང་པོ་ལས་སྤྱོད་འཇུག་ཤེར་ལེ་ཞག་ལྔ་ལ་གསན་པས་ལེགས་པར་མཁྱེན་ཏེ་ཕྱིས་སུ་རྣམ་བཤད་ཀེ་ཏ་ཀ་བརྩམས་ནས་མཁས་པའི་གྲགས་སྙན་གྱིས་ཁྱབ་པའི་ཚེ་ཆོས་རྗེ་དཔལ་སྤྲུལ་རིན་པོ་ཆེས་ཀྱང་ཀེ་ཏ་ཀ་ལ་ཞིབ་གཟིགས་གནང་ནས་སྔར་ང་རྫོགས་ཆེན་ཤྲཱི་སེང་དུ་འདུག་སྐབས་བཤད་པ་དེ་སྒྲ་ཇི་བཞིན་དུ་བྱུང་འདུག་ཅེས་གསུངས་པ་དང༌། དགེ་བའི་བཤེས་གཉེན་ཆེན་པོ་འཇུ་དབོན་འཇིགས་མེད་རྡོ་རྗེ་ལས། ཤེར་ཕྱིན་སྡུད་པའི་རྩ་བའི་ལུང་ཙམ་ཞིག་གསན་ནས། དེ་འཕྲལ་ཕར་བཤད་པ་ཟླ་བ་གཅིག་ཏུ་མཛད་པ་དང༌། དགེ་ལུགས་འབུམ་གསར་དགེ་བཤེས་ངག་དབང་འབྱུང་གནས་ལས། དབུ་མ་འཇུག་པ་གསན་དུས་བཤད་ལུང་ཙམ་ལས་འོ་བརྒྱལ་མི་དགོས་ཚུལ་ཞུས་པར། བཤད་ལུང་གནང་འཕྲལ་ཉིད་ནས་རྒྱུགས་ཕུལ་གསུངས་པས། འཇུག་པའི་དབུ་ནས་མར་བཤད་པ་མཛད་པས། དགེ་བཤེས་ཀྱིས། ཕྲན་ནི་དགེ་བཤེས་ཀྱི་མིང་ཐོགས་ན་ཡང་འདིའི་བློ་གྲོས་ཀྱི་ཆ་ཤས་ཙམ་ཡང་མ་མཆིས་སོ་ཞེས་འཁོར་གྱི་དབུས་སུ་བསྔགས་པ་མཛད་པ་སོགས་སྐུ་འཁྲུངས་ནས་རིང་པོར་མ་ལོན་པར་མཁྱེན་རབ་ཀྱི་རྩལ་རྫོགས་པས་རྔོགས་ལོ་ཆེན་པོས། སྔོན་ཚེ་སྦྱངས་བས་སྐྱེ་བ་འདིར། །གཞུང་རྣམས་རྩེད་མོའི་ཞར་ལས་ཤེས། །ཞེས་དང༌། འཇམ་མགོན་ས་སྐྱ་པཎྜི་ཏས། སྐྱེ་བ་སྐྱེ་བ་རྣམས་སུ་ཡང་དང་ཡང༌། །མཁས་པ་མཁས་པ་རྣམས་ལས་སྔོན་སྦྱངས་བས། །ཚེ་འདིར་ལན་རེ་ཟུང་རེ་ཐོས་ཙམ་གྱིས། །གཞུང་ལུགས་ཀུན་ཤེས་ཀུན་དགའ་རྒྱལ་མཚན་དཔལ། །ཕྱོགས་ལས་རྣམ་རྒྱལ་ཕྱོགས་གླང་ཆོས་གྲགས་པས། །གཞུང་མདོ་རྣམ་འགྲེལ་གཞན་དང་བཅས་པ་རྣམས། །ལེགས་པར་རྟོགས་ཤིང་རྟོག་གེའི་ཚུལ་བྱས་ནས། །ཡང་དག་རིག་མཆོག་རིག་པའི་གཏེར་དུ་བསྒྲུབས། །ཞེས་གསུངས་པ་ལྟ་བུའོ། །གཉིས་པ་རྒྱས་པར་བཤད་པ་ལ། དང་པོ་བརྡ་སྤྲོད་གཞུང་ཐུགས་སུ་ཆུད་ཚུལ་ནི། འཇམ་དཔལ་དབྱངས་ཐུ་མིའི་ཞལ་ནས། བསླབ་པ་ཀུན་གྱི་གཞི་འཛིན་ཅིང༌། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། །ཞེས་གསུངས་པ་ལྟར་ཤེས་བྱ་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་མིང་ཚིག་བརྗོད་པས་རྗེས་སུ་མཚོན་དགོས་ཤིང༌། མིང་ཚིག་ཡི་གེའི་སྦྱོར་བ་ལས་འབྱུང་བས་ན་རྒྱ་གར་འཕགས་པའི་ཡུལ་གྱི་ནང་པ་སངས་རྒྱས་པའི་བསླབ་པ་གསུམ་དང༌། ཕྱི་རོལ་པའི་ངེས་བརྗོད། མཆོད་སྦྱིན། སྙན་ཚིག །སྲིད་སྲུང་སྟེ་རིག་བྱེད་ཡན་ལག་བཞི་རྗེས་སུ་བསྟན་ཕྱིར་ཚངས་པའི་ཡི་གེ་ལཉྩ་ན། ཀླུའི་ཡི་གེ་ཝར་ཏུའི་གཙོས་རྒྱ་ཆེར་རོལ་པའི་མདོ་ལས་གསུངས་པའི་ཡི་གེའི་རིགས་དྲུག་ཅུ་རྩ་བཞི་དང༌། བོད་གངས་ཅན་གྱི་ཡི་གེའི་མཆོག་ཐུ་མི་སཾ་བྷོ་ཊའི་ཕྱག་བྲིས་གཟབ་མའམ་དབུ་ཅན་དང༌། བོད་ཡིག་གཤར་མ་དང་ཤེས་བྱ་ཀུན་ཁྱབ་ནང་ལྟོས་གསུངས། མཆན། ལྡན་ལུགས་དང༌། ཡི་གེ་དེ་དག་བསྡེབས་པའི་ཚེ་མིང་གཞི་དང༌། སྔོན་རྗེས་ཀྱི་འཇུག་པ་སོགས་མདོར་ན་མིང་ཚིག་ཡི་གེའི་སྦྱོར་བ་ལས་བྱུང་བའི་ཚིག་གི་འཁྲུལ་པ་སྤོང་བྱེད་བརྡ་སྤྲོད་ཀྱི་གཞུང༌། ཀུན་གྱི་ཕྱི་མོ་ལྟ་བུ་ཙནྡྲ་པའི་གཞུང་ཀུན་མཁྱེན་མ་ཧཱ་པཎྜི་ཏ་སི་ཏུ་དྷརྨཱ་ཀ་རའི་འགྲེལ་ཆེན་གྱི་སྟེང་ནས་འཇམ་མགོན་ལོ་ཆེན་གུ་ཎའི་ཞལ་སྔ་ནས་གསན་སྦྱང་གི་སྒོ་ཕྱེས་ནས། ཀ་ལཱ་པ་དང༌། མཚོ་ལྡན་མའི་གཞུང་རྣམས་ཀྱི་ཚིག་དོན་ལུས་པ་མེད་པ་ཆགས་ཐོགས་བྲལ་བའི་བློ་གྲོས་ཀྱི་རྒྱ་མཚོར་ཡོངས་སུ་ཆུད་དེ། རྒྱ་བོད་ཀྱི་སྐད་གཉིས་ཤན་སྦྱར་ཞེས་པའི་སྒྲ་གཞུང་ཁྱད་འཕགས་དང༌། བརྡ་སྤྲོད་པ་དབྱངས་ཅན་ངག་གི་མེ་ལོང་ཞེས་ཀུན་བཤད་དང་པོ་ཡན་ཆད་ཚིགས་སུ་བཅད་པ། དེའི་ཡན་ལག་སོགས་བསྟན་བཅོས་གསར་རྩོམ་མཛད་འཕྲོ་ཅན་དང༌། མདོ་རྒྱུད་དབྱངས་འཆར་སོགས་མན་ངག་གི་གཞུང་ནས་གསུངས་པའི་ཐབས་ཤེས་དབྱངས་གསལ་སྡེབས་པའི་ཡི་གེའི་འཕྲུལ་འཁོར་ལ་བརྟེན་ནས་ཕན་གནོད་ཀྱི་ལས་རབ་འབྱམས་རྣོ་མྱུར་དུ་བྱེད་པའི་ངོ་མཚར་རྟེན་འབྲེལ་ཟབ་གནད་འཁྲུལ་མེད་རྟོགས་པས་དོན་གཉིས་སྒྲུབ་པར་མཛད་ཅིང་དེར་མ་ཟད་ཕྱག་བྲིས་ཀྱང་སྐུ་ན་གཞོན་དུས་གཞན་གྱི་ཡི་གེ་འབྲི་བ་ལ་གཟིགས་ནས་འབྲི་གནང་བ་ཙམ་ཡིན་ཀྱང་ཕྱིས་ཀུན་གཟིགས་མཁྱེན་བརྩེའི་དྲུང་ཆེན་འཇམ་དཔལ་ལེགས་པའི་བློ་གྲོས་ལས་ཡིག་གཟུགས་བསླབས་ཏེ་དབུ་མ་རྒྱན་གྱི་འགྲེལ་ཆེན་སོགས་ཚུགས་བྲིས་ཤིན་ཏུ་ལེགས་པར་ཕྱག་བྲིས་མཛད་པ་སོགས་བསླབ་སྦྱང་ཕྲན་ཚེགས་ལའང་འབད་བརྩོན་རྒྱ་ཆེར་གནང་ཚུལ་བསྟན་པས་མཚོན་ཤེས་བྱ་རིག་པའི་གནས་ཐམས་ཅད་ཐུགས་སུ་ཆུད་པའི་དཔལ་ལྡན་བླ་མའི་ཞབས་ལ་གསོལ་བ་འདེབས། །གཉིས་པ་ལུས་སྲོག་གསོ་བ་རིག་པའི་གནས་ཐུགས་སུ་ཆུད་ཚུལ་ནི། ཇི་སྐད་དུ། ལུས་དང་བྱིས་པ་མོ་ནད་གདོན་མཚོན་དུག །རྒས་པ་རོ་ཙའི་མན་ངག་ཡན་ལག་བརྒྱད། །ཅེས་གསུངས་པའི་ཡན་ལག་བརྒྱད་དང་ལུས་སེམས་སྡུག་བསྔལ་གྱི་ཚོར་བ་ལས་གསོ་བར་བྱེད་པའི་རིགྃ་པྃ་ཡིྃ་དོན་སྟོན་པའི་གཞུང་རྩ་བཤད་མན་ངག་ཕྱི་མའི་རྒྱུད་བཞི་དང༌། གཡུ་ཐོག་སྙིང་ཐིག་ཆ་ལག་དང་བཅས་པའི་དགོངས་དོན་བྱང་ཟུར་མཁས་པའི་རིང་ལུགས་ཀྱི་ཡན་ལག་གི་ལག་ལེན་མཐའ་དག་ཟུར་མཁར་ཕྱི་མའི་སློབ་བརྒྱུད་དངྃ༌། འཕགས་ཡུལ་རྒྱ་ནག་གི་སྨན་པ་མཁས་པའི་བཤད་རྒྱུན་ལག་ལེན་མཐོང་བརྒྱུད་ཀྱིས་གཏན་ལ་ཕབ་པའི་སྨན་རྒྱལ་གཉིས་པ་ཆོས་ཀྱི་འབྱུང་གནས་ཀྱི་གདན་ས་མདོ་ཁམས་ཤར་དཔལ་སྤུངས་ཐུབ་བསྟན་ཆོས་འཁོར་གླིང་དུ་དབོན་སྤྲུལ་རིན་པོ་ཆེ་ལས་རྒྱུད་བཞིའི་བཤད་ཁྲིད་ཆ་ཚང་དང༌། ཀུན་གཟིགས་མཁྱེན་བརྩེའི་དབང་པོ་ལས། གཡུ་ཐོག་སྙིང་ཐིག་གི་དབང་ཁྲིད་མན་ངག་དང་བཅས་པ། འཇམ་མགོན་ཀོང་སྤྲུལ་རིན་པོ་ཆེ་ལས། རིན་ཆེན་གཙོ་བཀྲུའི་ཕྱག་ལེན་སོགས་གསན་ནས་ཉམས་བཞེས་དང་ཕྱག་བཞེས་མཛད་པས་གསོ་རིག་གི་དགོངས་དོན་ཐམས་ཅད་མ་ནོར་བར་རྟོགས་ཏེ་ཕྱིས་དཔལ་སྤུངས་ནས་རྒྱུད་བཞིའི་བཤད་ཁྲིད་རྒྱས་པ་མན་ངག་ལན་ལེན་དང་བཅས་པ་བསླབ་པ་དང༌། སློབ་མའང་མཁས་པ་མང་དུ་བྱོན་པར་མ་ཟད་གསོ་རིག་གི་གཟའ་བཅོས། རྒྱུད་བཞིའི་དཀའ་མཆན། གཅེས་བཏུས་ཕན་བདེའི་བང་མཛོད་སོགས་སྨན་གྱི་བསྟན་བཅོས་དང༌། སྨན་ཕྲེང་བརྒྱ་རྩ། སྨན་གྱི་སྦྱོར་ཐབས་དུ་མ་གསར་དུ་མཛད་པས་སྔར་ཡོད་ཀྱི་སྨན་ལས་ཀྱང་ཕན་སྟོབས་ཆེ་བ་བྱུང་ཚུལ་ཟླ་ཤེལ་བདུད་རྩི་སྨན་གྱི་ནོར་བུ་ཞེས་ནད་བརྒྱ་སྨན་གཅིག་ཁོ་ནའི་ནུས་པ་ཡང་རིན་ཆེན་མང་སྦྱོར་སོགས་སྨན་ཆེན་རྣམས་དང་ཁྱད་མེད་པ་རྒྱ་བོད་འཚོ་མཛད་མཁས་དབང་ཀུན་གྱིས་བསྔགས་པ། མཛད་བྱང་དུ་དྷཱི་ཡིས་དྷཱ་ཀི་སྒྲུབ་པའི་དུས་སུ་བྲིས་ཞེས་གསུངས་པ་གྲུབ་ཐོབ་ཨོ་རྒྱན་པ་ལ་རྡོ་རྗེ་ཕག་མོས་དངུལ་ཆུ་བཙོ་བཀྲུའི་མན་ངག་གནང་བ་དང་ཁྱད་མེད་པས་མཚོན་པ་ལྟར་འཇམ་མགོན་ཀོང་སྤྲུལ་རིན་པོ་ཆེས་མི་ཕམ་འཇམ་པའི་དབྱངས་ཀྱི་སྨན་སྦྱོར་གསར་པ་འདི་དག་སྨན་གྱི་རོ་ནུས་ཞུ་རྗེས་ལ་བརྟགས་ནས་བརྩམས་པ་ཡིན་བཀའ་འཕྲོས་ལས་གསུངས་ཀྱང༌། དགོངས་གཏེར་ཀློང་བརྡོལ་གྱི་མན་ངག་ཡིན་པས་ཤིན་ཏུ་ཟབ་ཅེས་གསུངས་པ་བཞིན། སྟོན་པ་ཞལ་བཞུགས་དུས་རྡོ་འཇོག་གི་རྒྱལ་པོ་པདྨའི་སྙིང་པོའི་བླ་སྨན་རྒྱུན་ཤེས་བུའི་སློབ་མ་འཚོ་བྱེད་གཞོན་ནུ་གཉིས་པར་ཁམས་བོད་ཀུན་ཏུ་ཡོངས་སུ་གྲགས་པ་དོན་ལ་གནས་པའི་དཔལ་ལྡན་བླ་མའི་ཞབས་ལ་གསོལ་བ་འདེབས། །གསུམ་པ་གདུལ་བྱ་རྗེས་འཛིན་བཟོ་རིག་མཁྱེན་ཚུལ་ནི། ལུས་བཟོའི་གཙོ་བོ་སྐུ་གཟུགས་དང་ཐུགས་རྟེན་གྱི་ཐིག །འཁྲུལ་འཁོར་དང་དཀྱིལ་འཁོར་བྲི་བ། ཡུལ་གླིང་དཔེའི་ཡི་གེ་བྲི་བ། ཕྱག་མཚན་དང་ངག་སྒུགས་ཀྱི་ཚད། གསར་རྙིང་གི་རྒྱུད་ལས་གསུངས་པའི་སྟངས་སྟབས་དང་གར་དང་ཕྱག་རྒྱ། ངག་བཟོའི་མཆོག་འཆད་རྩོད་རྩོམ་པ། དབྱངས་ཀྱི་བྱེ་བྲག་མཆོག་དང་ཕལ་པ། ཡིད་བཟོའི་མཆོག་ཐོས་བསམ་སྒོམ་པ་དང༌། ཕལ་རིག་གནས་བཅོ་བརྒྱད། བརྟག་པ་བརྒྱད་ནས་སྣ་ཚོགས་བཟོ་ཡི་རིག་པའི་གནས་ཤེས་པར་བྱ་བ་རྒྱ་ཆེ་མུ་མེད་རྒྱ་མཚོ་ལྟ་བུ་ལའང་རྫས་ལས་ཐོབ་པའི་བསོད་ནམས་བདུན་སོགས་རྒྱལ་བའི་བསྟན་པ་དང་འཇིག་རྟེན་པའི་ཉེར་མཁོ་ཐམས་ཅད་དེ་ལས་འབྱུང་བར་མཁྱེན་ནས་ཕྱོགས་རེའི་ལམ་གྱིས་ཐུགས་མ་ཚིམ་པས་བློ་མཆོག་ངང་མོ་གཞོན་ནུ་དཀར་བའི་གར་དང་བཅས་ཏེ་བག་ཕེབས་པར་དལ་གྱིས་རོལ་ནས་ཚུལ་བཞིན་རྟོགས་པའི་ཕྱག་རྗེས་ཏེ་རྒྱུད་དང་དབྱངས་འཆར་གྱི་ཡི་གེའི་འཕྲུལ་འཁོར། ཆོས་སྐྱོང་གི་སྲོག་འཁོར་ཕྱག་གིས་འདུ་མཛད་པ་ལ་ཕུལ་དུ་ཕྱིན་པ་དང༌། བཟོ་རིག་གི་བསྟན་བཅོས་ཉེར་མཁོའི་ཟ་མ་ཏོག་དང༌། དཔལ་དུས་ཀྱི་འཁོར་ལོའི་འགྲེལ་ཆེན་དུ་ཀླ་ཀློ་འཇོམས་པའི་སྒྱོགས་ཀྱི་འཕྲུལ་འཁོར་དང༌། གླིང་བྲོ་བདེ་ཆེན་རོལ་མོ། གླུ་བྲོ་གླུ་མའི་རོལ་མོ། རྟེན་འབྲེལ་ལམ་ཡག །འདོད་པའི་བསྟན་བཅོས། ལུགས་ཀྱི་བསྟན་བཅོས་ས་གཞི་སྐྱོང་བའི་རྒྱན། ལུགས་ཀྱི་བསྟན་བཅོས་རྒྱས་བསྡུས་དུ་མ་སོགས་སྲིད་པ་འཕྲུལ་གྱི་ཇུ་ཐིག་གི་གཞུང་ཆེན་པོ་ཡན་ལག་དང་བཅས་པ། འཇམ་དཔལ་གྱི་རིག་སྔགས་ཨ་ར་པ་ཙའི་མོ་རྒྱས་བསྡུས། རྡོ་རྗེ་གཡུ་སྒྲོན་དང༌། དཔལ་ལྡན་ལྷ་མོའི་པྲ་སྒྲུབ། གེ་སར་གྱི་མདའ་མོ་བཙན་གྱི་མོ་མཐོང་གསལ་སྒྲོན་མེས་མཚོན། མོ་པྲ་རྩིས་ཀྱི་བླང་དོར་བརྟགས་པ་སོགས་བསྟན་འགྲོར་ཕན་བདེའི་བཙས་སུ་གསལ་བར་མཛད་པའི་ཚུལ་རྗེ་ཉིད་ཀྱི་གསུང་ལས། ནོར་འཁྲུལ་བསལ་ཕྱིར་གཞན་ལ་བརྩེ་བའི་ཕྱིར། །བླང་དོར་མཐོང་ཕྱིར་གཤེན་ལ་དད་པའི་ཕྱིར། །ཝེར་མ་དགྱེས་ཕྱིར་འཇིག་རྟེན་བདེ་བའི་ཕྱིར། །འབད་པ་དེ་ཡང་དོན་མེད་འགྱུར་མ་ལགས། །འཇམ་དབྱངས་བླ་མའི་དྲིན་ལས་ཤེས་བྱའི་ཚུལ། །གང་ལ་བལྟས་པས་དེ་ཡང་མདུན་དུ་བདར། །ལྷག་བསམ་འོད་དང་འགྲོགས་པའི་བློ་གྲོས་ཀྱི། །ཟླ་བ་འདི་དག་གང་དུ་འགྲོ་ཡང་མཛེས། །ཀྱེ་ཧོ་རྣམ་དཔྱོད་བཟང་པོའི་མིག་ཡངས་ལ། །དགྲ་བླ་ཝེར་མ་དགྱེས་པའི་བརྫུས་གཟུགས་ཀྱི། །འཕྲུལ་ཆེན་མདུད་པ་འདི་ན་བླང་དོར་བརྒྱ། །མ་འདྲེས་གསལ་པོར་འཆར་བ་གཟིགས་མོ་མཛོད། །གཤིན་གྲུ་རྒྱ་མཚོའི་ངོགས་སུ་ཞུགས་པ་ན། །སྣ་ཚོགས་ལྟད་མོ་ནམ་མཁའི་གཏོས་སུ་ཆེ། །སྒྱུ་མའི་རྩེད་འཇོ་མུ་མཐའ་མེད་པ་ཡིས། །འགྲོ་ཀུན་སྐྱོང་བའི་སྨོན་ལམ་ཡུན་རིང་བྱས། །ཡབ་གཅིག་ཉི་མ་འཆར་བའི་སྣང་བ་ཅན། །བདག་བློའི་ཨུཏྤལ་གཞོན་ནུ་སྐྱོངས་ཤིག་དང༌། །མཁའ་མཉམ་སྲིད་པའི་མཐའ་དང་ཤེས་བྱའི་མུ། །དུས་ཀྱི་ཡུན་ལ་སྐྱོ་བར་ང་མི་སེམས། །ཞེས་གསུངས་པ་དང་ཨ་ར་པ་ཙའི་མོ་ལ་རིག་སྔགས་ཀྱི་རྒྱལ་པོ་ཕྱི་ནང་གཞན་གསུམ་གྱི་ཁམས་དང་སྦྱར་བའི་འཕྲུལ་བསྡེབས་ཀྱི་མན་ངག་དཔལ་དུས་ཀྱི་འཁོར་ལོའི་དབྱངས་གསལ་གྱི་ཡི་གེའི་འཕྲུལ་འཁོར་དང་མཚུངས་པའི་དཔྱད་དོན་གྱི་མན་ངག་གསལ་བ་རྡོ་རྗེའི་གསུང་གི་ཉི་མ་བལྟས་པས་ཤེས་ནུས་པ་སོགས་མཁས་པ་གཞན་གྱིས་རྩལ་དུ་མ་བཏོན་པའི་ལེགས་བཤད་སྒྲ་དབྱངས་སྟོང་གི་ཉམས་འགྱུར་གྱི་མགྲིན་རྔ་ལྷག་པར་སྒྲོགས་པའི་ཚུལ་གྱིས་རྒྱལ་བསྟན་རིན་པོ་ཆེ་མཛེས་པའི་རྒྱན་དུ་གྲུབ་པ་དཔལ་ལྡན་བླ་མའི་ཞབས་ལ་གསོལ་བ་འདེབས། །བཞི་པ་དོན་ལ་འཁྲུལ་པ་ཚར་གཅོད་པ་ཚད་མའམ་གཏན་ཚིག་རིགས་པ་མཁྱེན་ཚུལ་ནི། རིགས་ལམ་འདི་ལ་སྔོན་སྦྱང་གི་བག་ཆགས་ཐུན་མིན་དུ་མངའ་བས་ཁྱད་པར་ཞེས་དམིགས་སུ་བཀར་ཏེ་དངོས་བསྟན་ལ་མེད་པའི་ཤེས་བྱ་ཇི་སྙེད་པའི་དོན་ལ་རང་བློ་ལྐོག་གྱུར་དུ་འདོད་པ་ལ་སོགས་པ་ལོག་པར་རྟོག་པའི་དབང་དུ་བྱས་ཏེ་གཞན་རིག་མངོན་སུམ། རང་རིག་ཚད་མས་འཁྲུལ་པ་ཚར་གཅོད་པའི་ཚུར་མཐོང་ཚད་མའི་རིག་པ་གསལ་བྱེད་ཀྱི་ཤིང་རྟ་ཆེན་པོ་ཕྱོགས་ཀྱི་གླང་པོའི་ཚད་མའི་མདོ་ཀུན་ལས་བཏུས་པ་དང༌། དཔལ་ཆོས་ཀྱི་གྲགས་པས་དེའི་དགོངས་འགྲེལ་རྩ་བ་ལུས་ལྟ་བུ་རྒྱས་པ་རྣམ་འགྲེལ། འབྲིང་པོ་རྣམ་ངེས། བསྡུས་པ་རིགས་པའི་ཐིག་པ། གྱེས་བ་ཡན་ལག་ལྟ་བུ་འབྲེལ་བ་བརྟག་པ། གཏན་ཚིགས་ཐིགས་པ། རྩོད་པའི་རིགས་པ། རྒྱུད་གཞན་གྲུབ་པ་བཞི་སྟེ་ཚད་མ་སྡེ་བདུན་དུ་གྲགས་པ་དང༌། མཁན་ཆེན་ཞི་བ་འཚོས་ཚད་མ་བསྡུས་པ། འཇམ་མགོན་ས་སྐྱ་པཎྜི་ཏ་ཆེན་པོའི་སྡེ་བདུན་མདོ་དང་བཅས་པའི་གསལ་བྱེད་ཚད་མ་རིག་པའི་གཏེར་རང་འགྲེལ་དང་བཅས་པ། སློབ་ཚོགས་རྒྱ་བོད་ཀུན་ཏུ་བྱུང་བའི་གཞུང་རྣམས་དང༌། རྒྱལ་དབང་ཀརྨ་པ་བདུན་པ་ཆོས་གྲགས་རྒྱ་མཚོའི་རིག་གཞུང་རྒྱ་མཚོ་སོགས་ཀྱི་དགོངས་དོན་བཀྲལ་བ་ལ་མཁས་དང་རིག་པའི་དབང་ཕྱུག་སུས་ཀྱང་འགྲན་ཟླ་མེད་པའི་བློ་གྲོས་དང་སྤོབས་པའི་གོ་ཆ་ཆེན་པོས་རིག་པའི་ཆུ་ཀླུང་འབུམ་ཕྲག་ཐུགས་ལ་འཁྱིལ་བས་ཚད་མ་རྣམ་འགྲེལ་གྱི་འགྲེལ་ཆེན་ལེགས་བཤད་སྣང་བའི་གཏེར་ཚད་མ་ཀུན་བཏུས་དང༌། རིག་གཏེར་གྱི་མཆན་འགྲེལ། བསྡུས་ཚད་རྩོད་རིག་སྨྲ་བའི་སྒོ་འབྱེད། དོན་རྣམ་ངེས་ཤེས་རབ་རལ་གྲི། བརྡ་ཤན་འབྱེད་ཐེ་ཚོམ་དྲྭ་བ་གཅོད་པའི་རལ་གྲི། ཀླ་ཀློའི་མུན་སེལ་ཉི་མ་སོགས་གཞུང་དང་འགྲེལ་བ་མང་དུ་མཛད་ཅིང༌། ཚད་མ་རྣམ་འགྲེལ་གཟིགས་སྐབས་མནལ་ལམ་དུ་ངོ་བོ་ས་སྐྱ་པཎྜི་ཏ་ཡིན་རྒྱུ་ལ། རྣམ་པ་རྒྱ་གར་གྱི་པཎ་གྲུབ་ཀྱི་ཆ་བྱད་ཅན་ཤངས་རྩེ་ཅུང་ཟད་གུག་པ་ཞིག་གིས་ཚད་མ་རྣམ་འགྲེལ་མི་ཤེས་རྒྱུ་ཅི་ཡོད་དགག་སྒྲུབ་གཉིས་རེད་གསུངས་ནས་ཚད་མ་རྣམ་འགྲེལ་གྱི་པོད་ཞིག་ཕྱག་ན་རལ་གྲི་བསྣམས་པས་དུམ་བུ་གཉིས་སུ་བྱས་ཏེ། དེ་ཉིད་ཀྱི་ཕྱག་ཏུ་བཞག་ནས་འདི་གཉིས་གཅིག་ཏུ་སྡོམ་གསུངས་པས། དེ་གཅིག་ཏུ་སྡོམ་མ་ཐག་རལ་གྲི་ཞིག་ཏུ་གྱུར་ཏེ་རྗེ་ཉིད་ཀྱི་མདུན་དུ་ཤེས་བྱའི་ཆོས་ཐམས་ཅད་ཡོད་པ་ལྟ་བུའི་སྣང་བ་ལ་རལ་གྲི་དེ་གཅིག་གཡུག་པས་ཐམས་ཅད་ཐོགས་མེད་དུ་དུས་གཅིག་ལ་ཆོད་སོང་བའི་ཐུགས་སྣང་གསལ་བར་བྱུང་བས་ཕྱིར་ཉིན་ནས་རྣམ་འགྲེལ་ལ་མི་ཤེས་པ་ཚིག་གཅིག་ཀྱང་མ་བྱུང་ཞེས་གསོལ་དཔོན་པདྨ་ལ་གསུངས་པ་བཞིན་ཕྱོགས་ཐམས་ཅད་ལས་རྣམ་པར་རྒྱལ་བའི་རིག་པར་སྨྲ་བའི་མཆོག་གྲུབ་པའི་སློབ་དཔོན་ཆོས་ཀྱི་གྲགས་པའི་མཁྱེན་རབ་ཀྱི་ཉིན་བྱེད་མ་སྨས་པར་སྙིང་ལ་ཤར་བ་མཁྱེན་རབ་ཀྱི་འདབ་སྟོང་རབ་ཏུ་གྲོལ་བའི་དཔལ་ལྡན་བླ་མའི་ཞབས་ལ་གསོལ་བ་འདེབས། །བཞི་པ་རིག་པའི་གནས་ཆུང་ཀུན་གྱི་ཡ་གྱལ་སྙན་ངག་སྨྲ་བའི་དབང་ཕྱུག་ཏུ་གྱུར་པའི་ཚུལ་ནི། ཆོས་རབ་རྣམ་འབྱེད་ཀྱི་བློ་གྲོས་ཕུན་སུམ་ཚོགས་པའི་དཔལ་དང་ལྡན་པ་ལ་ཡིད་ཀྱི་བརྟན་པ་དབང་མེད་འཕྲོག་སྟེ་མངའ་བར་བྱེད་པ་མཁས་ཚུལ་གསུམ་གྱི་མཆོག་རྩོམ་པ་བཟང་པོ་སྙན་ངག་གི་ལེགས་བཤད་ཚིག་དོན་ཕུན་སུམ་ཚོགས་པའི་ལེགས་བཤད་ལྷ་ཡི་བདུད་རྩི་ཟད་པ་མེད་པ་ཁའམ་ཞལ་གྱི་སྒོ་ནས་གཡོ་བའི་རོ་བཅུད་མྱོང་བས་དབྱངས་ཅན་མགྲིན་པར་ཆགས་པའི་རྣམ་དཔྱོད་ཅན་དུ་གྱུར་པའི་ཚུལ་སྙན་ངག་མེ་ལོང་གི་འགྲེལ་པ་དབྱངས་ཅན་དགྱེས་པའི་རོལ་མཚོ་ཞེས་སྔ་འགྲེལ་རྣམས་ལས་ཀྱང་ལྷག་པའི་ཚུལ་གཞུང་ཉིད་ལ་གཟིགས་པས་ཤེས་ནུས་ལ། སྤྱིར་གོང་དུའང་སྨོས་པ་ལྟར་སྐུ་གཞོན་དུས་ནས་ཚིགས་བཅད་གསུངས་པ་ལ་ཐོགས་པ་མེད་ཀྱང་རྗེ་ཉིད་ཀྱི་ཞལ་འཕྲོས་ལས། ངས་མཁས་པའི་རྣམ་དཔྱོད་ཁོ་ན་རྩལ་དུ་བཏོན་ནས་བརྩམས་ན་བཀའ་འགྱུར་དང་བསྟན་འགྱུར་གྱི་པོད་གྲངས་ཙམ་བྲིས་ཀྱང་ཤེས་མོད་དེ་བས་ད་ལྟ་བརྩམས་པ་འདི་རྣམས་གཞུང་སྔ་མ་རྣམས་སུ་མི་གསལ་བའི་ཟབ་གནད་ཁྱད་པར་ཅན་གསལ་བྱེད་དང༌། བསྟན་པ་སེམས་ཅན་གྱི་དོན་དུ་འགྱུར་ངེས་ཀྱི་དགོས་པ་གཟིགས་ནས་བྲིས་པ་མ་གཏོགས་མེད་ཅེས་གསུངས་པ་དང༌། ཞེ་ཆེན་རྒྱལ་ཚབ་རིན་པོ་ཆེ་འཇམ་དབྱངས་བློ་གྲོས་རྒྱ་མཚོ། མི་ཕམ་འཇམ་པའི་དབྱངས་དཀར་མོ་སྟག་ཚང་དུ་སྒྲུབ་པ་ལ་བཞུགས་པའི་སྐབས་སྐུ་མདུན་དུ་ཕེབས་ནས་བཀའ་བརྒྱད་ཀྱི་རྣམ་བཤད་ཅིག་མཛད་གྲུབ་པར་ཞུས་པས། ཞལ་ནས་རང་བཞིན་གྱིས་བསམ་མནོ་བཏང་སྟེ་བྲིས་ན་སུ་ལའང་བྲི་རྒྱུ་ཡོད་མོད། དེ་ལ་དགོས་པ་མེད། སྐབས་འགར་བླ་མ་དང་ལྷག་པའི་ལྷས་ཐུགས་རྗེ་ལ་བརྟེན་ནས་རང་བཞིན་གྱིས་སེམས་ལ་ཤར་ཏེ་བཟོ་བཅོས་སོགས་ཆེར་མ་དགོས་པར་འབད་མེད་དུ་བྲི་ཆོག་པ་ཞིག་ཡོད་དར་བས་དེ་ལྟར་བྱུང་ན་ལས་སླ་ཞིང་དགོས་པ་ཆེ་བ་ཞིག་ཡོད་པས་དེ་བར་རེ་ཞིག་སྒུག །ཁྱེད་ནས་ཀྱང་བླ་མ་དང་ཡི་དམ་ལ་གསོལ་བ་ཐོབ། ཆོས་སྲུང་ལ་ཕྲིན་བཅོལ་རེ་ཡང་གྱིས་ཞེས་བཀའ་ཕེབས་པ་འདི་ལ་གོ་རྒྱུ་གནད་ཆེན་ཞིག་ཡོད་པར་འདུག་གསུངས་པ་དང༌། ཀུན་གཟིགས་མཁྱེན་བརྩེའི་དབང་པོས་ཀྱང་མི་ཕམ་ལ་རྩོམ་པ་ག་ཚད་བསྐུལ་ཀྱང་དོན་དང་དགོས་པ་ཆེན་པོ་ཞིག་མ་མཐོང་བར་གང་བྱུང་དུ་ཚིགས་བཅད་གཅིག་བྲིས་མ་རེད་ཅེས་གསུངས་ཤིང༌། བཅུད་ལེན་གྱི་ཡན་ལག་བདུད་རྩིའི་བུམ་བཟང་ལས། །རིག་པའི་རྩལ་ལས་མ་བྲིས་ཐབས་མེད་བྱུང༌། །རང་བཟོ་མ་ཡིན་རྒྱལ་གསུང་དཔང་ཏུ་བཞག །འདྲ་བཅོས་མ་ཡིན་ལྷ་ཡི་བྱིན་རླབས་ཡིན། །དོན་མེད་མ་ཡིན་དོན་ཆེན་གཏེར་དང་ལྡན། །ཞེས་གསུངས་པ་རྣམས་དོན་གཅིག་ལ་གསུང་རྩོམ་གནང་བ་རྣམས་ཀྱི་ཁྱད་ཆོས་ཡོད་ཚུལ་ཡང༌། ཨ་ཛི་ཏས་བརྩམས་པ། ཚིག་གཅིག་གིས་ཀྱང་དོན་གྱི་རྣམ་འགྱུར་བརྒྱ། །གསལ་བར་མཐོང་བ་དྭངས་ཤེལ་མེ་ལོང་འདྲ། །ཟབ་མོའི་གནད་བརྒྱ་འགག་གཅིག་གིས་བཀྲོལ་བ། འཕྲུལ་འཁོར་མཁས་པས་གསང་ཐག་བཀྲོལ་བ་བཞིན། །ཚིག་གསལ་དོན་ཟབ་འཁྲུལ་བྲལ་ཐེ་ཚོམ་གྱི། །མདུད་པ་ཀུན་འགྲོལ་ཡིད་འོང་སྙན་ངག་ལྡན། །བློ་ལྡན་སུ་ཡིས་མཐོང་ཡང་ཡིད་འཕྲོག་པ། །ཁྱེད་ཀྱི་གསུང་དང་མཚུངས་པ་གཞན་མ་མཆིས། །བལྟས་ན་བློ་གྲོས་གསལ་བྱེད་ཉི་མ་འདྲ། །བསམ་ན་ཀུན་དགའི་དཔལ་སྦྱིན་ཟླ་བའི་ཚུལ། །རྟོགས་ན་མི་ལྡོག་ཡིད་ཆེས་རྒྱལ་གསུང་བཞིན། །དེ་ཕྱིར་ཁྱེད་གསུང་ཟོལ་མེད་དད་པས་བསྟོད། །ཅེས་མེ་རྟ་ཟླ་༡༢ཚེས་༡༢ལའོ། །ཞེས་མི་འཇིགས་སེང་གེའི་སྒྲ་བསྒྲགས་པ་ལྟ་བུའོ། །རྗེ་བླ་མའི་ཐུགས་ཟིན་སློབ་མའི་ཁྱུ་མཆོག་མཁན་ཆེན་ཀུན་དཔལ་ཞབས་ནས་ཀྱང༌། ཁྱེད་བློ་གསལ་རྣམས་དང་པོ་ཀུན་མཁྱེན་མི་ཕམ་རིན་པོ་ཆེའི་གཞུང་འགྲེལ་ལ་ཐོས་བསམ་གྱིས། དེ་ནས་མཁས་པ་གཞན་གྱི་གསུང་ལ་ལྟོས། སླར་ཡང་མི་ཕམ་རིན་པོ་ཆེའི་གསུང་ལ་ལྟོས་དང་མཁས་པ་སུས་གསུང་དང་མི་འདྲ་བའི་ཁྱད་ཆོས་མཇལ་བར་ངེས་ཞེས་གདམས་པ་མཛད་པ་ཡིན་ནོ། །གཉིས་པ་སྐར་ནག་གི་རྩིས་རིག་མཐའ་དག་མཁྱེན་ཚུལ་ནི། སྐུ་ན་ཆེས་གཞོན་པའི་སྐབས་སྐུ་ཞང་ལས་ནག་རྩིས་བསླབ་ཚུལ་བསྟན་ཏེ། སྐར་རྩིས་ཤེས་ན་གྲངས་ལ་མི་རྨོངས་ཞེས་ཕྱི་ནང་ཐུན་མོང་གི་སྤྱིར་རིག་པའི་གནས་ཆུང་གི་བྱེ་བྲག་གཞུང་དུ་ཡོངས་སུ་གྲགས་ཀྱང༌། ནང་པས་དཔལ་རྒྱུད་ཀྱི་རྒྱལ་པོ་དུས་ཀྱི་འཁོར་ལོ་ལས་གསུངས་པའི་དགོངས་པ་ལྟར་ཆེས་ཟབ་པའི་ངོ་མཚར་ཏེ། དོན་དམ་དེ་ཁོ་ན་ཉིད་སྟོང་པ་སྤྲོས་བྲལ་གྱི་གནས་ལུགས་དེ། འཁྲུལ་ཚུལ་མ་རིག་པས་བསླད་པའི་དབང་གིས་གཞལ་བྱ་ཡུལ་ཡུལ་ཅན་ནམ་ཕྱི་འཇིག་རྟེན་གྱི་ཁམས་དང༌། ནང་རྡོ་རྗེའི་ལུས་ཀྱི་གནས་ལུགས་རྩ་རླུང་ཐིག་ལེའི་བཀོད་པ་དང་འགྲོ་འོང༌། གཞན་སེམས་ཀྱི་ཁམས་སོགས་སམ། ཟླ་ཉི་སྒྲ་གཅན་གྱིས་མཚོན་པའི་གསུམ་ཆོས་སོགས་རགས་སྣང་མཐའ་ཡས་པ་སོ་སྐྱེ་རྣམས་ཀྱིས་བརྩི་བྱའི་གཞི་དང༌། འཇལ་བྱེད་རྟེན་འབྲེལ་འབྱུང་བའི་གྲངས་ཀྱི་རིགས་པ་ནི་བརྩི་བའི་ཚུལ་ལམ་རྩི་བྱེད་ཀྱི་གནད་ཐམས་ཅད་ལ་རང་བྱན་ཆུད་པ་དང༌། རྗེ་བཙུན་འཇམ་དབྱངས་ཏྲི་ཤའི་ཤིང་གི་ལྦ་བ་ལས་ཁྱེའུ་ལོ་བརྒྱད་ཀྱི་ཚུལ་དུ་བསྟན་ནས་ལྷ། ལྷ་མིན་སྡེ་བརྒྱད་མི་ཡི་འཁོར་ལ་བསྟན་པའི་སྤོར་ཐང་རྩིས་ཀྱི་གཙུག་ལག་གསུངས་ཏེ་གཏེར་དུ་སྦས་པ། འཕགས་པ་སྤྱན་རས་གཟིགས་ཀྱི་གུ་རུ་རིན་པོ་ཆེ་ལ་བསྐུལ་ནས་སློབ་དཔོན་ཆེན་པོ་ཚངས་པ་གདོང་བཞི་རུ་སྤྲུལ་ཏེ། ལྷ་མོ་རྣམ་རྒྱལ། ཀླུ་རྒྱལ་འཇོག་པོ་སོགས་ལ་བསྟན་ཏེ། གནས་པའི་རུས་སྦལ་ཆོས་ཀུན་གྱི་གནས་ལུགས་དེ་བཞིན་ཉིད། ཆགས་པའི་རུས་སྦལ་མཁའ་སོགས་འབྱུང་ལྔའི་དཀྱིལ་འཁོར་ལས་སྣོད་བཅུད་ཀྱི་འཇིག་རྟེན། སྲིད་པའི་རུས་སྦལ་སྤར་ཁའི་ལྷ་ཆེན་བརྒྱད་སོགས་ལེགས་ཉེས་ཀྱི་སྟངས་འཛིན་པས་བདེ་སྡུག་སྣ་ཚོགས་སུ་སྣང་བ་ལ་བླང་དོར་གྱི་མིག་འབྱེད་པའི་ཕྱིར་བརྩི་བྱ་འབྱུང་བ་ལྔ་ལ། རྩི་བྱེད་རང་བཞིན་གཞི་ཡི་གཙུག་ལག་དང༌། འབྱུང་བ་རང་རྒྱུད། སྣང་བ་ཡུལ། གཅོད་བྱེད་ཡིད། འཛིན་པ་སེམས་ཀྱི་གབ་རྩེ་བཞིས་བསྡུས་པའི་མ་རིག་འཁྲུལ་སྣང་གི་གཙུག་ལག་གཉིས་ཀྱི་སྒོ་ནས་ལྐོག་གྱུར་ལེགས་ཉེས་ལུང་བསྟན་པའི་འབྱུང་རྩིས་སམ་ནག་རྩིས་ཀྱི་རིག་པའི་གཞུང་ཟབ་ལ་རྒྱ་ཆེ་བ་རྒྱ་མཚོ་ཆེན་པོའི་འཇིང་གི་གབ་སྦས་མན་ངག་ཟབ་གནས་དང་བཅས་པ་ཆ་ཤས་ཙམ་ཡང་ལུས་པ་མེད་པ་བློ་གཏེར་རྡོ་རྗེ་རྣོན་པོའི་མཁྱེན་རླབས་ཀྱིས་ཚིག་དོན་མ་ལུས་མཐོང་བའམ་ཐུགས་སུ་ཆུད་དེ་དེ་ཡི་དགོངས་དོན་ཟབ་མོའི་མན་ངག་གི་གནད་གསལ་བར་བྱེད་པའི་དབྱངས་འཆར་གྱི་འགྲེལ་ཆེན། རྩིས་གཞུང་གཉིས་ཀྱི་སྔོན་འགྲོ་དང་ནག་རྩིས་ཀྱི་བརྗེད་བྱང་སོགས་བཞུགས་ཏེ། དེ་དག་ཀྱང་སྤྱོད་འཇུག་ལས། །རྒྱལ་བའི་སྲས་ཀྱི་མི་བསླབ་པ། །དེ་ཉིད་གང་ཡང་ཡོད་མ་ཡིན། །དེ་ལྟར་གནས་པའི་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་གསུངས་པ་ལྟར་རྒྱལ་བའི་དབང་པོ་ཀརྨ་པ་རང་བྱུང་རྡོ་རྗེའི་ཕྱི་དུས་ཀྱི་འཁོར་ལོའི་དགོངས་པ་ཐུགས་སུ་ཆུད་དེ་རྩིས་ཀུན་བསྡུས་པའི་བསྟན་བཅོས། ནང་དུས་ཀྱི་འཁོར་ལོའི་དགོངས་པ་མངོན་དུ་གྱུར་པས་ཟབ་མོ་ནང་དོན། གཞན་དུས་ཀྱི་འཁོར་ལོའི་དགོངས་པ་མངོན་དུ་གྱུར་པས་སྙིང་པོ་བསྟན་པ་དང༌། རྣམ་ཤེས་ཡེ་ཤེས་འབྱེད་པའི་བསྟན་བཅོས་མཛད་པ་བཞིན། །སྐར་ནག་རྩིས་ཀྱི་སྦས་དོན་དབྱངས་འཆར་གྱི་ཐུན་མོང་མ་ཡིན་པའི་ཟབ་གནད་དང༌། དཔལ་དུས་ཀྱི་འཁོར་ལོའི་བསྡུས་པའི་རྒྱུད་ཀྱི་ཟབ་མོའི་གསང་བ་ཐམས་ཅད་གསན་བསམ་སྒོམ་གསུམ་གྱི་རང་ཕྱན་ཚུད་པས་མཁས་གྲུབ་སུས་ཀྱང་འགྲན་ཟླ་བྲལ་བའི་དཔལ་ལྡན་བླ་མའི་ཞབས་ལ་གསོལ་བ་འདེབས། །བརྩམ་འཕྲོས་ལུས །}} | ||
</onlyinclude> | </onlyinclude> | ||
Latest revision as of 08:10, 1 June 2024
🚧 This website is under continued development. We appreciate your patience!
| Wylie title | 'jam mgon bla ma mi pham 'jam dbyangs rnam rgyal rgya mtsho'i rnam thar gsol 'debs kyi 'grel ba mtsho byung dpal mo dgyes pa'i rgyud mang |  |
|---|---|---|
| Location | dil mgo mkhyen brtse bka' 'bum Volume 15, Text 6, Pages 267-299 (Folios 1a to 33b6) | |
| Author | དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ | |
| Less details More details | ||
| Associated People | མི་ཕམ་རྒྱ་མཚོ་ (mi pham rgya mtsho) | |
| Citation | Khyentse, Dilgo. 'jam mgon bla ma mi pham 'jam dbyangs rnam rgyal rgya mtsho'i rnam thar gsol 'debs kyi 'grel ba mtsho byung dpal mo dgyes pa'i rgyud mang. In Skyabs rje dil mgo mkhyen brtse rin po che'i bka' 'bum, Vol. 15: 267-299. Delhi: Shechen Publications, 1994. | |
| Genre | Biographies - Hagiography - rnam thar · Commentaries - 'grel pa · Supplications - gsol 'debs | |
| Colophon |
།བརྩམ་འཕྲོས་ལུས། | |
|
/brtsam 'phros lus/ | ||
