JKW-KABUM-02-KHA-001-013

🚧 This website is under continued development. We appreciate your patience!

Previous Text Back to Volume PageNext Text

Wylie title	bod yul gyi rdo rje'i gnas chen dag la bsngags pa'i gtam DA ki dgyes pa'i rol mo
Location	mkhyen brtse'i bka' 'bum Volume 2, sde tshan 1, Text 13, Pages 42-43 (Folios 21b1 to 21b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bod yul gyi rdo rje'i gnas chen dag la bsngags pa'i gtam DA ki dgyes pa'i rol mo. In 'jam dbyangs mkhyen brtse'i dbang po'i bka' 'bum, Vol. 2: 42-43. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

13 42-43	བོད་ཡུལ་གྱི་རྡོ་རྗེའི་གནས་ཆེན་དག་ལ་བསྔགས་པའི་གཏམ་ཌཱ་ཀི་དགྱེས་པའི་རོལ་མོ། bod yul gyi rdo rje'i gnas chen dag la bsngags pa'i gtam DA ki dgyes pa'i rol mo Discourses - gtam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

བོད་ཡུལ་གྱི་རྡོ་རྗེའི་གནས་ཆེན་དག་ལ་བསྔགས་པའི་གཏམ་ཌཱ་ཀི་དགྱེས་པའི་རོལ་མོ་ཞེས་བྱ་བ། ཀ༷་དམྤ་ཅན་རྔ་ཡབ་ཀྱིས་འཐོར་བའི། །ཁ༷་བའི་རྡུལ་བརྩེགས་ཀཻ་ལ་ཤ་རིའི་སྤོར། །ག༷་བུར་འཛིན་པ་གསར་པའི་ལང་ཚོ་ཅན། །ང༷་ཅག་གདུང་སེལ་ཌཱ་ཀིའི་ཚོགས་རྣམས་འདུད། ༡ །ཅ༷་ཅོ་བྲལ་བའི་མགྲིན་པའི་ཏམྦུ་ར། །ཆ༷་མཐུན་གསང་སྔགས་གླུ་རུ་འཇོ་བ་ཡིས། །ཇ༷་ཧོང་ལས་ལྡོག་ངེས་གསང་ཐེག་པའི་ལམ། །ཉ༷་རྒྱས་ཟླ་བཞིན་རྣལ་འབྱོར་རྣམས་ལ་སྩལ། ༢ །ཏ༷་ལའི་ཕྲེང་བས་བསྐོར་བའི་ས་འཛིན་དང་། །ཐ༷་དད་བྲག་རིའི་ཁང་བཟང་ཉམས་དགའ་བ། །ད༷་གཟོད་མ་ཡིན་གྲུབ་པ་མཆོག་རྣམས་ཀྱིས། །ན༷་མར་རྡོ་རྗེའི་གནས་སུ་བྱིན་གྱིས་བརླབས། ༣ །པ༷་སངས་སྤྲིན་བྲལ་མཁའ་ལ་ཆས་པ་ལྟའི། །ཕ༷་མཐའ་མི་མངོན་གསང་བ་གསུམ་གྱི་རྟེན། །བ༷་མཆོག་དཔག་བསམ་ཤིང་དང་ནོར་བུ་ལྟར། །མ༷་ལུས་འགྲོ་བའི་རེ་འདོད་བསྐང་ཕྱིར་གནས། ༤ །ཙ༷་རི་ཏྲ་དང་གངས་ཅན་ལྷུན་པོ་སོགས། །ཚ༷་གྲང་ཁུར་དུ་བཟོད་པས་བགྲོད་བྱས་ན། །ཛ༷་ཏིའི་མེ་ཏོག་དར་བའི་མཛེས་སྡུག་ལྟར། །ཝ༷་བཞིན་ཉུལ་བ་འབྲེལ་ཚད་དོན་གྱིས་ལྕི། ༥ །ཞྭ༷་ཐོད་ཁ་བའི་རྡུལ་གྱིས་རབ་འཆིང་ཞིང་། །ཟ༷་འོག་ལྟར་བཀྲའི་པདྨོ་གསར་པས་མཛེས། །འ༷་ཅག་སྙིང་ལ་སིམ་པ་སྟེར་བྱེད་ཅིང་། །ཡ༷་མཚན་རྨད་བྱུང་བཀོད་པ་སྣ་ཚོགས་སྟོན། ༦ །རཱ༷་ཧུ་ལ་དང་ཙ་ཏུརྨུ་ཁ་སོགས། །ལ༷་ཀླུང་ངེས་མེད་སྒྲུབ་པའི་གནས་མཆོག་དེར། །ཤ༷་ཁྲག་རྐྱེན་གྱིས་མ་བསྐྱེད་སྣང་སྟོང་གཟུགས། །ས༷་བཅུའི་ཀློང་ནས་ཐོགས་མེད་རོལ་གར་བསྒྱུར།༧ །ཧ༷་ཧའི་གད་མོ་འབྱིན་པའི་འབྱུང་པོའི་སྡེ། །སྤྲུལ་པའི་ཞིང་དེར་གནས་པའི་སྐྱེ་འགྲོ་ལ། །འཚེ་བར་མི་བགྱིད་རྣལ་འབྱོར་ཚོགས་རྣམས་ཀུན། །ཨ༷་དོན་སྐྱེ་མེད་རྟོགས་པའི་བོགས་འདོན་སྩལ། ༨ །ཀུན་ཏུ་བྱིན་གྱིས་བརླབས་པའི་གནས་ཀྱི་མཆོག །མཆོག་གི་དངོས་གྲུབ་སྒྲུབ་པའི་ཁང་བཟང་དེར། །དེ་བཞིན་ཉིད་དང་རྣལ་འབྱོར་གཉིས་ཀྱི་དོན། །དོན་སྒོམ་རྟོགས་པའི་ལང་ཚོ་རྒྱས་པར་མཛད། ༩ །བྷོ་ཊའི་ཡུལ་འདིར་གྲངས་མེད་གྲུབ་པའི་སར། །བྱིན་གྱིས་བརླབས་པའི་ངོ་མཚར་མཐོང་གྱུར་ནས། །བསྟོད་པའི་སྦྱོར་བ་རབ་སྙན་མུ་ཏིག་གི །ཕྲེང་བ་འདིས་ཀྱང་འགྲོ་ཀུན་དགའ་བསྐྱེད་ཤོག ༡༠ །གཙུག་ཕུད་ཐིག་ལེས་སྒེག་པའི་རྨ་བྱ་དང་། །སྤྲིན་སྒྲས་བསྐུལ་པའི་ཟློས་གར་ཇི་བཞིན་དུ། །རབ་ཏུ་དད་པའི་དབང་གྱུར་བདག་གི་ཡིད། །ཐར་པ་མཆོག་གི་ཨུཏྤལ་བཞད་སྙམ་བགྱིད། ༡༡ །དེས་ན་མཐུ་དེར་བརྟེན་པའི་དགེ་བའི་ཚོགས། །རབ་དཀར་དུང་དང་པད་རྩའི་རྗེས་འགྲོ་བ། །འདིས་མཚོན་ལེགས་བྱས་དགེ་བའི་ཕུང་པོ་ཀུན། །འགྲོ་རྣམས་ཐར་པའི་གོ་འཕང་འཁྲིད་ཕྱིར་བསྔོ། ༡༢།། །། ༈

[edit]

bod yul gyi rdo rje'i gnas chen dag la bsngags pa'i gtam DA ki dgyes pa'i rol mo/__ bod yul gyi rdo rje'i gnas chen dag la bsngags pa'i gtam DA ki dgyes pa'i rol mo zhes bya ba/_kaX dam+pa can rnga yab kyis 'thor ba'i/_/khaX ba'i rdul brtsegs kai la sha ri'i spor/_/gaX bur 'dzin pa gsar pa'i lang tsho can/_/ngaX cag gdung sel DA ki'i tshogs rnams 'dud/_1__/caX co bral ba'i mgrin pa'i tam+bu ra/_/chaX mthun gsang sngags glu ru 'jo ba yis/_/jaX hong las ldog nges gsang theg pa'i lam/_/nyaX rgyas zla bzhin rnal 'byor rnams la stsal/_2__/taX la'i phreng bas bskor ba'i sa 'dzin dang /_/thaX dad brag ri'i khang bzang nyams dga' ba/_/daX gzod ma yin grub pa mchog rnams kyis/_/naX mar rdo rje'i gnas su byin gyis brlabs/_3__/paX sangs sprin bral mkha' la chas pa lta'i/_/phaX mtha' mi mngon gsang ba gsum gyi rten/_/baX mchog dpag bsam shing dang nor bu ltar/_/maX lus 'gro ba'i re 'dod bskang phyir gnas/_4__/tsaX ri tra dang gangs can lhun po sogs/_/tshaX grang khur du bzod pas bgrod byas na/_/dzaX ti'i me tog dar ba'i mdzes sdug ltar/_/waX bzhin nyul ba 'brel tshad don gyis lci/_5__/zhwaX thod kha ba'i rdul gyis rab 'ching zhing /_/zaX 'og ltar bkra'i pad+mo gsar pas mdzes/_/'aX cag snying la sim pa ster byed cing /_/yaX mtshan rmad byung bkod pa sna tshogs ston/_6__/rAX hu la dang tsa turmu kha sogs/_/laX klung nges med sgrub pa'i gnas mchog der/_/shaX khrag rkyen gyis ma bskyed snang stong gzugs/_/saX bcu'i klong nas thogs med rol gar bsgyur/7_/haX ha'i gad mo 'byin pa'i 'byung po'i sde/_/sprul pa'i zhing der gnas pa'i skye 'gro la/_/'tshe bar mi bgyid rnal 'byor tshogs rnams kun/_/aX don skye med rtogs pa'i bogs 'don stsal/_8__/kun tu byin gyis brlabs pa'i gnas kyi mchog__/mchog gi dngos grub sgrub pa'i khang bzang der/_/de bzhin nyid dang rnal 'byor gnyis kyi don/_/don sgom rtogs pa'i lang tsho rgyas par mdzad/_9__/b+ho Ta'i yul 'dir grangs med grub pa'i sar/_/byin gyis brlabs pa'i ngo mtshar mthong gyur nas/_/bstod pa'i sbyor ba rab snyan mu tig gi_/phreng ba 'dis kyang 'gro kun dga' bskyed shog__10_/gtsug phud thig les sgeg pa'i rma bya dang /_/sprin sgras bskul pa'i zlos gar ji bzhin du/_/rab tu dad pa'i dbang gyur bdag gi yid/_/thar pa mchog gi ut+pal bzhad snyam bgyid/_11__/des na mthu der brten pa'i dge ba'i tshogs/_/rab dkar dung dang pad rtsa'i rjes 'gro ba/_/'dis mtshon legs byas dge ba'i phung po kun/_/'gro rnams thar pa'i go 'phang 'khrid phyir bsngo/_12//___//_!_