JKW-KABUM-21-ZHA-003-004

🚧 This website is under continued development. We appreciate your patience!

Previous Text Back to Volume PageNext Text

Wylie title	o rgyan snang ba mtha' yas la brten pa'i nyal sgom bde chen zhing du bgrod pa'i myur lam
Location	mkhyen brtse'i bka' 'bum Volume 21, sde tshan 3, Text 4, Pages 323-326 (Folios 8a5 to 9b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. o rgyan snang ba mtha' yas la brten pa'i nyal sgom bde chen zhing du bgrod pa'i myur lam. In 'jam dbyangs mkhyen brtse'i dbang po'i bka' 'bum, Vol. 21: 323-326. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs
Deity	o rgyan snang ba mtha' yas

1 Texts in this Section (sde tshan or chos tshan)

4 323-326	ཨོ་རྒྱན་སྣང་བ་མཐའ་ཡས་ལ་བརྟེན་པའི་ཉལ་སྒོམ་བདེ་ཆེན་ཞིང་དུ་བགྲོད་པའི་མྱུར་ལམ། o rgyan snang ba mtha' yas la brten pa'i nyal sgom bde chen zhing du bgrod pa'i myur lam Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོ་རྒྱན་སྣང་བ་མཐའ་ཡས་ལ་བརྟེན་པའི་ཉལ་སྒོམ་བདེ་ཆེན་ཞིང་དུ་བགྲོད་པའི་མྱུར་ལམ་ཞེས་བྱ་བ་བཞུགས་སོ། །ན་མོ་གུ་རུ་པདྨཱ་ཀ་རཱ་ཡ། དེ་ལ་འདིར་གསོལ་འདེབས་བསམ་པ་ལྷུན་གྲུབ་མའི་ཡིད་བཞིན་ནོར་བུ་ལྟ་བུའི་མན་ངག་གི་བྱེ་བྲག །སྣང་མཐའི་ཉལ་སྒོམ་ཉམས་སུ་བླང་བར་འདོད་ན། དགོངས་མོ་ཉལ་བའི་ཚེ་ཙོག་པུའམ་སེང་གེ་ཉལ་སྟབས་གང་རུང་གིས་འཁོད་ལ། སྐྱབས་ཡུལ་གསལ་བཏབ་ནས། བདག་སོགས་འགྲོ་ཀུན་དེང་ནས་བྱང་ཆུབ་བར། །ཨོ་རྒྱན་སྣང་མཐའ་ཡས་ལ་སྐྱབས་སུ་མཆི། །བདེ་ཆེན་པདྨོ་བཀོད་པའི་ཞིང་ཁམས་སུ། །ཁམས་གསུམ་འགྲོ་ཀུན་སྒྲོལ་བར་སེམས་བསྐྱེད་དོ། །ཞེས་སྐྱབས་སེམས་ལན་གསུམ་དང་། སེམས་ཅན་ཐམས་ཅད་གནས་སྐབས་མཐར་ཐུག་གི །བདེ་དང་ལྡན་ཞིང་སྡུག་བསྔལ་རྒྱུར་བཅས་བྲལ། །བདེ་ལས་ཉམས་མེད་ཉེ་རིང་ཆགས་སྡང་དང་། །བྲལ་བའི་བཏང་སྙོམས་ངང་ལ་གནས་གྱུར་ཅིག །ཅེས་ཚད་མེད་བཞི་བསྒོམས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨདྨ་ཀོ྅་ཧཾ། སྣང་སྲིད་ཐམས་ཅད་མི་དམིགས་སྟོང་པའི་ངང་། །སྣོད་བཅུད་རྣམ་དག་པདྨོ་བཀོད་པའི་ཞིང་། །མནན་ནེམ་བཏེགས་འཕར་གསེར་གྱི་ས་གཞི་ལ། །རིན་ཆེན་སྣ་ཚོགས་ལྗོན་པའི་དགའ་ཚལ་དང་། །ཡན་ལག་བརྒྱད་ལྡན་བདུད་རྩིའི་རྫིང་བུ་སོགས། །ཡིད་འཕྲོག་ངོ་མཚར་བཀོད་པས་མཛེས་པའི་དབུས། །རང་མདུན་རྨ་བྱས་བཏེགས་པའི་རིན་ཆེན་ཁྲི། །སྣ་ཚོགས་པདྨ་ཟླ་བའི་དཀྱིལ་འཁོར་དབུས། །རྩ་བའི་བླ་མ་ཨོ་རྒྱན་སྣང་མཐའ་ཡས། །དམར་པོ་མཉམ་བཞག་བདུད་རྩིའི་ལྷུང་བཟེད་བསྣམ། །མཚན་དཔེའི་དཔལ་འབར་ཆོས་གོས་རྣམ་གསུམ་གསོལ། །ལོ་འདབ་མེ་ཏོག་འབྲས་བུ་ཕུན་ཚོགས་པའི། །བྱང་ཆུབ་ཤིང་ལ་སྐུ་རྒྱབ་བརྟེན་མཛད་ནས། །བདག་ལ་དགྱེས་ཤིང་འཛུམ་པས་བཞུགས་པ་ཡི། །འཁོར་དུ་སངས་རྒྱས་བྱང་ཆུབ་སེམས་དཔའ་དང་། །ཉན་རང་དགྲ་བཅོམ་དཔག་ཏུ་མེད་པས་བསྐོར། །ཀུན་ཀྱང་སྣང་སྟོང་ཟུང་འཇུག་འཇའ་ཚོན་ལྟར། །རང་བཞིན་ཡོངས་གྲུབ་ཆེན་པོར་གསལ་བར་གྱུར། །སྤྲོ་ན་བཟང་སྤྱོད་ལས་འབྱུང་བའི་ཡན་ལག་བདུན་པ་དང་། དེ་ཙམ་མི་ནུས་ན། སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །དངོས་འབྱོར་ཡིད་སྤྲུལ་ཀུན་བཟང་མཆོད་སྤྲིན་འབུལ། །ཐོག་མེད་ནས་བསགས་སྡིག་སྒྲིབ་ཉེས་ལྟུང་བཤགས། །གཞན་དོན་ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་རྟགས་པར་བཞུགས་གསོལ་འདེབས། །འདིས་མཚོན་དུས་གསུམ་བསགས་པའི་དགེ་རྩ་ཀུན། །བདག་དང་མཁའ་མཐས་གཏུགས་པའི་འགྲོ་བ་ཀུན། །བདེ་བ་ཅན་དུ་སྐྱེ་བའི་རྒྱུར་བསྔོ་ན། །ནམ་ཞིག་ཚེ་འདིའི་སྣང་བ་ནུབ་མ་ཐག །མགོན་པོ་དགྱེས་པའི་ཕྱག་གིས་མདུན་བདར་ནས། །དག་པའི་ཞིང་དེར་བརྫུས་ཏེ་སྐྱེས་ནས་ཀྱང་། །མྱུར་དུ་བྱང་ཆུབ་ལུང་བསྟན་ཐོབ་པར་ཤོག །དེ་ནས་མོས་གུས་གདུང་ཤུགས་དྲག་པོས། ནམ་ཞིག་ཚེ་ཟད་འཆི་བའི་དུས་བྱུང་ཚེ། །ཞེས་སོགས་ལན་ཇི་ལྟར་རིགས་པས་གསོལ་བ་བཏབ་ལ། དབུགས་ཕྱིར་འགྲོ་བ་ན་རང་གི་རྣམ་པར་ཤེས་པ་ཧྲཱིཿཡིག་གི་རྣམ་པ་སྣ་བུག་གཡས་ནས་ཐོན། མདུན་གྱི་ཨོ་རྒྱན་སྣང་བ་མཐའ་ཡས། ཤངས་བུག་གཡོན་དུ་ཞུགས། ཐུགས་ཀར་ཧྲིལ་གྱིས་གནས་པར་བསམས་ལ་སེམས་བཟུང་། རླུང་ནང་དུ་རྔུབ་པ་ན་ཧྲཱིཿཡིག་སླར་བྱུང་ཤངས་བུག་གཡས་ནས་ཐོན། རང་གི་སྣ་བུག་གཡོན་དུ་ཞུགས། སྙིང་གར་གནས་པར་བསམས་ལ་སེམས་བཟུང་། དེ་འདྲ་བ་ལན་ཇི་ལྟར་རིགས་པའི་མཐར། མདུན་བསྐྱེད་ཞིང་ཁམས་དང་བཅས་པ་འོད་དུ་ཞུ་ནས་རང་ལ་ཐིམ། རང་སྐད་ཅིག་གིས་ཨོ་རྒྱན་སྣང་བ་མཐའ་ཡས་འཁོར་ཞིང་གི་བཀོད་པ་དང་བཅས་པར་གསལ་ལ། ཨོཾ་ཨ་མི་ཏཱ་བྷཱ་ཧྲཱིཿ ཞེས་བཟླས་པ་དང་། འོད་ཟེར་གྱི་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་མཐར། བདག་གཞན་འཆི་བའི་དུས་བྱེད་གྱུར་པ་ན། སོགས་དང་། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །སོགས་སྨོན་ལམ་གྱིས་རྒྱས་གདབ་བོ།། །། ༈

[edit]

o rgyan snang mtha'i nyal sgom/__ o rgyan snang ba mtha' yas la brten pa'i nyal sgom bde chen zhing du bgrod pa'i myur lam zhes bya ba bzhugs so/__/na mo gu ru pad+mA ka rA ya/__de la 'dir gsol 'debs bsam pa lhun grub ma'i yid bzhin nor bu lta bu'i man ngag gi bye brag__/snang mtha'i nyal sgom nyams su blang bar 'dod na/__dgongs mo nyal ba'i tshe tsog pu'am seng ge nyal stabs gang rung gis 'khod la/__skyabs yul gsal btab nas/__bdag sogs 'gro kun deng nas byang chub bar/__/o rgyan snang mtha' yas la skyabs su mchi/__/bde chen pad+mo bkod pa'i zhing khams su/__/khams gsum 'gro kun sgrol bar sems bskyed do/__/zhes skyabs sems lan gsum dang /__sems can thams cad gnas skabs mthar thug gi__/bde dang ldan zhing sdug bsngal rgyur bcas bral/__/bde las nyams med nye ring chags sdang dang /__/bral ba'i btang snyoms ngang la gnas gyur cig__/ces tshad med bzhi bsgoms/__oM shU n+ya tA dz+nyA na badz+ra swa b+hA ba ad+ma ko\u0f85 haM/__snang srid thams cad mi dmigs stong pa'i ngang /__/snod bcud rnam dag pad+mo bkod pa'i zhing /__/mnan nem btegs 'phar gser gyi sa gzhi la/__/rin chen sna tshogs ljon pa'i dga' tshal dang /__/yan lag brgyad ldan bdud rtsi'i rdzing bu sogs/__/yid 'phrog ngo mtshar bkod pas mdzes pa'i dbus/__/rang mdun rma byas btegs pa'i rin chen khri/__/sna tshogs pad+ma zla ba'i dkyil 'khor dbus/__/rtsa ba'i bla ma o rgyan snang mtha' yas/__/dmar po mnyam bzhag bdud rtsi'i lhung bzed bsnam/__/mtshan dpe'i dpal 'bar chos gos rnam gsum gsol/__/lo 'dab me tog 'bras bu phun tshogs pa'i/__/byang chub shing la sku rgyab brten mdzad nas/__/bdag la dgyes shing 'dzum pas bzhugs pa yi/__/'khor du sangs rgyas byang chub sems dpa' dang /__/nyan rang dgra bcom dpag tu med pas bskor/__/kun kyang snang stong zung 'jug 'ja' tshon ltar/__/rang bzhin yongs grub chen por gsal bar gyur/__/spro na bzang spyod las 'byung ba'i yan lag bdun pa dang /__de tsam mi nus na/__skyabs gnas dkon mchog rgya mtsho'i tshogs rnams la/__/lus ngag yid gsum gus pas phyag 'tshal lo/__/dngos 'byor yid sprul kun bzang mchod sprin 'bul/__/thog med nas bsags sdig sgrib nyes ltung bshags/__/gzhan don chos kyi 'khor lo bskor du gsol/__/mya ngan mi 'da' rtags par bzhugs gsol 'debs/_/'dis mtshon dus gsum bsags pa'i dge rtsa kun/__/bdag dang mkha' mthas gtugs pa'i 'gro ba kun/__/bde ba can du skye ba'i rgyur bsngo na/__/nam zhig tshe 'di'i snang ba nub ma thag__/mgon po dgyes pa'i phyag gis mdun bdar nas/__/dag pa'i zhing der brdzus te skyes nas kyang /__/myur du byang chub lung bstan thob par shog__/de nas mos gus gdung shugs drag pos/__nam zhig tshe zad 'chi ba'i dus byung tshe/__/zhes sogs lan ji ltar rigs pas gsol ba btab la/__dbugs phyir 'gro ba na rang gi rnam par shes pa hrIHyig gi rnam pa sna bug g.yas nas thon/__mdun gyi o rgyan snang ba mtha' yas/__shangs bug g.yon du zhugs/__thugs kar hril gyis gnas par bsams la sems bzung /__rlung nang du rngub pa na hrIHyig slar byung shangs bug g.yas nas thon/__rang gi sna bug g.yon du zhugs/__snying gar gnas par bsams la sems bzung /__de 'dra ba lan ji ltar rigs pa'i mthar/__mdun bskyed zhing khams dang bcas pa 'od du zhu nas rang la thim/__rang skad cig gis o rgyan snang ba mtha' yas 'khor zhing gi bkod pa dang bcas par gsal la/__oM a mi tA b+hA hrIH__zhes bzlas pa dang /__'od zer gyi spro bsdus sangs rgyas kyi mdzad pa bsgrubs mthar/__bdag gzhan 'chi ba'i dus byed gyur pa na/__sogs dang /__rgyal ba'i dkyil 'khor bzang zhing dga' ba der/__/sogs smon lam gyis rgyas gdab bo//___//___!