JKW-KABUM-18-TSHA-001-015

🚧 This website is under continued development. We appreciate your patience!

Previous Text Back to Volume PageNext Text

Wylie title	gzhan yang de lta bu'i legs 'bul sogs kyi skabs su gong gsham ci rigs bar yan lag bdun pa'i tshigs su bcad pa sbyor bar spro na
Location	mkhyen brtse'i bka' 'bum Volume 18, sde tshan 1, Text 15, Pages 181-189 (Folios 91a3 to 95a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gzhan yang de lta bu'i legs 'bul sogs kyi skabs su gong gsham ci rigs bar yan lag bdun pa'i tshigs su bcad pa sbyor bar spro na. In 'jam dbyangs mkhyen brtse'i dbang po'i bka' 'bum, Vol. 18: 181-189. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

15 181-189	གཞན་ཡང་དེ་ལྟ་བུའི་ལེགས་འབུལ་སོགས་ཀྱི་སྐབས་སུ་གོང་གཤམ་ཅི་རིགས་བར་ཡན་ལག་བདུན་པའི་ཚིགས་སུ་བཅད་པ་སྦྱོར་བར་སྤྲོ་ན། gzhan yang de lta bu'i legs 'bul sogs kyi skabs su gong gsham ci rigs bar yan lag bdun pa'i tshigs su bcad pa sbyor bar spro na Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

གཞན་ཡང་དེ་ལྟ་བུའི་ལེགས་འབུལ་སོགས་ཀྱི་སྐབས་སུ་གོང་གཤམ་ཅི་རིགས་བར་ཡན་ལག་བདུན་པའི་ཚིགས་སུ་བཅད་པ་སྦྱོར་བར་སྤྲོ་ན་འདི་ལྟ་སྟེ། ཨོཾ་སྭསྟི་པྲ་ཛ་བྷྱཿ གང་ཞིག་དམ་པའི་ཡོན་ཏན་རྨད་བྱུང་ཉི་གཞོན་གཡོ་བའི་ཐུར་མ་ཡིས། །དྭངས་བའི་བློ་གྲོས་ཨུཏྤལ་གསར་པའི་འདྲེན་བྱེད་རྣམ་པར་དབྱེ་བ་དང་། །ལྷན་ཅིག་ཐལ་མོའི་ཀུནྡཱའི་ཟུར་མིག་སྤྱི་ཏོར་རྩེ་མོར་ཟུམ་དང་བཅས། །ཞབས་མཐིལ་འཁོར་ལོའི་རེ་ཁ་མཆོག་ལ་རྟག་ཏུ་གུས་པས་དད་ཕྱག་སྟོབ། །སྲིད་པའི་ཁམས་འདིར་བདག་གིར་བཟུང་བའི་བླ་ན་ཡོད་པའི་མཆོད་སྤྲིན་དང་། །དེས་ཀྱང་མི་མཚོན་ཏིང་ངེ་འཛིན་གྱི་བཀོད་པ་ཕ་མཐའ་ཡས་པའི་དཔྱིད། །གྲོང་ཁྱེར་གསུམ་གྱི་དོགས་ལས་རིང་བརྒལ་ངོ་མཚར་བཀོད་པའི་མཛེས་སྡུག་ལ། །དབང་པོས་སྤྱན་སྟོང་གསར་དུ་སྤྲུལ་ནས་གཅིག་ཏུ་བལྟ་བའི་སྐབས་བཙལ་བཞིན། །ལམ་གསུམ་འགྲོ་བའི་བསིལ་བས་བཀྲུས་ཀྱང་ཅུང་ཟད་དག་པའི་ནུས་དབེན་ལ། །ལེགས་བྲིས་བདག་པོའི་སུག་པར་འཆང་བའི་རྩེ་བརྒྱའི་མཚོན་གྱི་བརྡར་བས་མིན། །དཀར་མིན་ལས་དང་ཀུན་རྟོག་མཛའ་བས་སྒྲིབ་གཉིས་དྲི་མ་འཕེལ་བའི་རྒྱུན། །སྟོབས་བཞིའི་ཆོ་ག་མཐའ་དག་རྫོགས་པས་ལྷག་མ་མེད་པར་བཅད་ལ་དབང་། །སློབ་དང་མི་སློབ་གོ་འཕང་ལ་གནས་སོ་སྐྱེ་དང་ནི་འཕགས་ཚོགས་ཀྱིས། །ལེགས་སྤྱད་མཆོག་གི་གོ་ཆ་བརྟུན་པས་སེམས་ཅན་རྣམས་ལ་སྨན་བགྱིད་པར། །རྗེས་སུ་ཡི་རང་དྭང་བ་སྟེར་ནས་བསོད་ནམས་བྱེ་བའི་ཕུང་པོ་ཡང་། །ངང་གི་རྒྱུད་ལ་མ་བྱིན་བླངས་པས་གྲངས་མེད་ལེགས་བྱས་ཆ་ཤས་རྫོགས། །གང་གིས་གཟོད་ནས་མངོན་སུམ་ཉིད་བརྙེས་འགོག་བདེན་རྟག་པ་དམ་པའི་དབྱིངས། །ལམ་བདེན་མིང་ཚིག་སྤྲིན་དུ་འཕོས་ལས་དབྱངས་ཀྱི་ཡན་ལག་ཡོངས་རྫོགས་པའི། །རྨད་བྱུང་གཏོང་བ་དམ་པའི་རིན་ཆེན་འགྲོ་འདིའི་བསོད་ནམས་བགོ་སྐལ་དུ། །ལྷུག་པར་སྩལ་བའི་དགའ་སྟོན་དམ་པས་ཕན་བདེའི་སྣང་བ་རྒྱས་པར་མཛོད། །མི་སྲུན་དུག་ཅན་མཆེ་བ་ལྟར་གཟིངས་སྙིག་མའི་འགྱུར་བས་ཐུགས་དྲངས་ཏེ། །ཞི་བ་དམ་པའི་ནགས་སུ་གཟིམས་ལ་དགྱེས་པའི་གོ་སྐབས་དབྱེ་སྲིད་ན། །དམྱལ་མེའི་དབུས་ཀྱང་པད་མཚོར་བཞིན་འཇུག་བྱང་ཆུབ་སེམས་དཔའི་ཐུགས་བསྐྱེད་གང་། །གྲགས་པའི་རི་མོ་ཙམ་དུ་ཟད་ཕྱིར་བསྐལ་པ་རྒྱ་མཚོར་ཞབས་བརྟན་གསོལ། །དེ་ལྟར་བསགས་ལས་བྱུང་བའི་དགེ་ཚོགས་ཛམྦུའི་རྐང་འཐུང་ལས་སྨིན་འབྲས། །ཆོས་དབྱིངས་མ་དྲོས་འཇིང་དུ་ལྷུང་དེས་བྱང་ཆུབ་དམ་པའི་གངྒཱ་སྐྱེས། །མཐའ་གཉིས་བརྒལ་བའི་ལང་ཚོ་དར་བས་འགྲོ་ཀུན་ཕན་བདེའི་དགའ་སྟོན་ལ། །ངོམ་པ་མེད་པར་ལོངས་སུ་སྤྱོད་པའི་དགེ་མཚན་བརྒྱ་ཕྲག་འབར་གྱུར་ཅིག །སརྦ་སུ་ཛ་ཡནྟུ། ཞེས་སམ། ཤྲཱི་བི་ཛ་ཡནྟུ། རྨད་བྱུང་ཡོན་ཏན་བྱེ་བའི་བསིལ་འོད་ཀྱིས། །ཐལ་མོའི་ཆུ་སྐྱེས་སྤྱི་བོར་ཟུམ་པ་དང་། །ཕྱོགས་རེས་བསྔགས་བརྗོད་མགྲིན་པའི་རྒྱུད་མངས་གང་། །འཁྲོལ་བས་ཤིན་ཏུ་གུས་པའི་དད་ཕྱག་སྟོབ། །དངོས་འབྱོར་བདོག་པ་ཕྲ་མོ་འདིས་མཚོན་ཏེ། །བདག་གཞན་དུས་གསུམ་དགེ་ཚོགས་ལོངས་སྤྱོད་དང་། །རི་གླིང་རྒྱ་མཚོར་བཅས་པའི་མཎྜལ་ཡང་། །དྭང་བའི་བློ་གྲོས་ཁོ་ནས་དབུལ་ལ་ཕྱོགས། གཟོད་ནས་བག་མེད་སེམས་ཀྱི་གཉིས་འཐུང་དབང་། །སྡིག་དང་ལྟུང་བའི་དྲེགས་པས་མྱོས་པ་གང་། །སྟོབས་བཞིའི་འདུལ་སྦྱོང་མཁས་པའི་བརྟུལ་ཞུགས་ཀྱིས། །སླད་ནས་དམ་པའི་ལམ་དུ་བདེ་བར་གཞུག །འཕགས་དང་སོ་སྐྱེའི་རྣམ་དཀར་ཟླ་ཤེལ་གསར། །གྲགས་སྙན་བདུད་རྩིར་བཅས་པའི་མཚར་སྡུག་ལ། །ཕྲག་དོག་ཨུཏྤལ་དམར་པོ་མི་ཟུམ་པར། །ཡི་རངས་ཀུནྡཱའི་འཛུམ་དཀར་སྙིང་དབུས་གྲོལ། །གནས་བརྒྱད་དག་པའི་གསུང་གི་གསང་བ་ཡིས། །མཐའ་ཀླས་སྡེ་སྣོད་རྒྱལ་རྔ་བརྡུངས་པའི་སྒྲས། །ལུས་ཅན་མ་རིག་གཉིད་ལ་གཡུར་བ་རྣམས། །ཞི་བསིལ་ཐར་པའི་ལམ་དུ་སད་པར་མཛོད། །མཐའ་ཀླས་ཞིང་ཁམས་རྒྱ་མཚོའི་མོས་ངོ་རུ། །གཟུགས་སྐུའི་སྒྱུ་འཕྲུལ་གཅིག་ཅར་སྣང་བའི་ཕྱིར། །དེང་འདིར་བདག་ཅག་བསོད་ནམས་བགོ་སྐལ་དུ། །ཐོབ་ཁྱོད་བསྐལ་པ་རྒྱ་མཚོར་བརྟན་པར་བཞུགས། །དེ་ལྟར་བསགས་པའི་ལེགས་བྱས་རྡུལ་དམར་ཀུན། །བཏུང་བས་མྱོས་པའི་ཐུན་མཚམས་སྤྲིན་གྱི་གྲོང་། །འཁོར་གསུམ་དག་པའི་མཁའ་ལ་བསྔོས་པའི་མཐུས། །བྱང་ཆུབ་སྙིང་པོའི་སྣང་བ་འདྲེན་གྱུར་ཅིག །སརྦ་དཱ་ཀ་ལྱཱ་ཎཾ་བྷཱུ་ཡཱཏ། ཞེས་སམ། ཤྲཱི་སུ་ཤྲེ་ཡོ་བྷ་བནྟུ། །གང་ཞིག་གཟོད་ནས་ཞི་བའི་སྙིང་པོ་རུ། །གྲུབ་པའི་ལང་ཚོ་རྒྱས་པའི་ཡེ་ཤེས་ཀྱང་། །སྲིད་ན་སྲིད་པ་བཞིན་དུ་སྣང་བ་ལ། །ཕྱོགས་རེའི་ཡོན་ཏན་དྲན་པའི་དད་ཕྱག་སྟོབ། །གཏོང་ལ་སྤྲོ་བ་མིན་པའི་ཀུན་རྟོག་གིས། །མ་བཅིངས་དངོས་འབྱོར་ཕྲ་མོ་འདིས་མཚོན་ཏེ། །ལེགས་བྲིས་གདེངས་ཅན་བདག་པོའི་དཔལ་འབྱོར་སོགས། །མཐའ་ཀླས་མཆོད་པའི་སྤྲིན་ཏུ་རྣམ་པར་བཀོད། །དམ་དུ་འཆོས་དང་རང་བཞིན་ལས་ཉམས་པའི། །སྡིག་ལྟའི་མིག་སྨན་ཚོན་གྱིས་བགོས་པ་ཡང་། །སྟོབས་བཞིའི་གྲུ་ཆར་གཡོ་བས་རྨད་བབ་སྟེ། །སླད་ནས་ཉེ་བར་བསྡམས་པའི་མཚར་སྡུག་བཟུང་། །མགོན་པོ་ཁྱོད་ཀྱི་བྱང་ཆུབ་སྤྱོད་མཆོག་དང་། །འཕགས་དང་སོ་སྐྱེས་རྣམ་དཀར་བསྐྲུན་པ་ལ། །སྙིང་ནས་རངས་པའི་འཛུམ་ཕྲེང་གྲོལ་བ་ཡིས། །ཟླ་མེད་བསོད་ནམས་བྱེ་བའི་འདུ་འགོད་བརྩམ། །མ་རིག་འཐིབ་བུའི་ནོན་པའི་འགྲོ་ཀུན་ལ། །རྣམ་གྲོལ་ཆོས་ཀྱི་བདུད་རྩིས་བྲན་པའི་མོད། །ལེགས་སྤྱོད་ཨུཏྤལ་རྒྱས་པའི་ཕང་པ་ནས། །རྣམ་གྲོལ་འབྲས་བུའི་ཁུར་གྱིས་དུད་མཛོད་ཀྱེ། །ཁྱད་པར་རིང་ནས་གཞན་ཕྱིར་དམིགས་པ་ཡི། །དམ་བཅའི་རི་མོ་བྲིས་དེ་རྗེས་དགོངས་ལ། །འགྲོ་འདིའི་བསོད་ནམས་མཆོད་སྡོང་དམ་པ་རུ། །འཆི་མེད་གྲུབ་པའི་དགའ་བས་སྙེམས་པར་མཛོད། །དེ་ལྟར་བསགས་ལས་བྱུང་བའི་དགེ་ཚོགས་ཀུན། །རྡུལ་བྲལ་ཆོས་ཀྱི་དབྱིངས་སུ་བསྔོས་པ་ལས། །སྐུ་གསུམ་དེད་དཔོན་མཆོག་ཏུ་བདག་གྱུར་ཏེ། །ཡིད་ཅན་སྲིད་པའི་མཚོ་ལས་སྒྲོལ་བར་ཤོག །སརྦ་སུ་ཤྲེ་ཡོ་ཀུརྦནྟུ། ཞེས་སམ། ཨོཾ་སྭསྟི་སིདྡྷཾ། །གང་ན་སྲས་བཅས་འདྲེན་པ་ཐམས་ཅད་ཀྱིས། །བསྔགས་པའི་མེ་ཏོག་དཀར་པོས་དབུགས་དབྱུང་བའི། །ནོར་བུའི་རྐང་སྟེགས་བཀྲ་བའི་ཞབས་སེན་ལ། །ཡན་ལག་མཆོག་གིས་བཏུད་པའི་དད་ཕྱག་སྟོབས། །དངོས་འཛིན་མདུད་པ་དམ་པོས་མ་བཅིངས་པའི། །བདོག་འབྱོར་ཉུང་ངུ་འདིས་མཚོན་སྲིད་ཞིའི་ཁམས། །རྒྱས་པར་འགེངས་པའི་རབ་འབྱམས་མཆོད་སྤྲིན་ནི། །ཡེ་ཤེས་གཟིགས་པ་དམ་པའི་མདུན་སར་བདར། །ཐོག་མ་མེད་ནས་འཁྲུལ་པའི་གཞན་དབང་གིས། །དམ་ལ་བཞག་པའི་སེམས་ཀྱི་གླང་པོ་ཡིས། །ལེགས་སྤྱོད་རྫིང་བུ་རྙོགས་པའི་སྡིག་ལྟུང་དྲི། །སྟོབས་བཞིའི་ཀེ་ཏ་ཀ་ཡི་དོགས་པས་སྦྱངས། །ཕྱོགས་བཅུ་དུས་བཞིའི་འཕགས་དང་སོ་སྐྱེ་ཡི། རྣམ་དཀར་རླབས་ཕྲེང་རྒྱས་པའི་ཆུ་གཏེར་ལ། །རྗེས་སུ་ཡི་རངས་ངང་མོའི་འགྲོས་མཛེས་ཀྱིས། །དོན་དུ་གཉེར་བའི་ཚུལ་ལ་གཅིག་ཏུ་འདུན། །སྨྲ་མཆོག་ངག་གི་རྒྱུད་མངས་ལས་འཕོས་པའི། །དབྱངས་བདུན་ཡན་ལག་རྫོགས་པའི་ཏམྦུ་རས། །ཡིད་ཅན་ཁམས་དབང་བསམ་པར་རྗེས་མཐུན་པའི། །ཆགས་བྲལ་ལམ་བདེན་དགའ་སྟོན་སྦྱིན་པར་མཛོད། །སྐད་ཅིག་རེར་ཡང་ཞིང་ཁམས་རྒྱ་མཚོ་ལ། །ཏིང་འཛིན་བྱེ་བས་སྙོམས་པར་འཇུག་མོད་ཀྱི། །དེང་འདིར་བདག་སོགས་མོས་པའི་གདུང་སེལ་དུ། །བསྐལ་བརྒྱར་ཆོས་ཀྱི་ཁྲི་ལ་གཡོ་མེད་གསོལ། །འདིས་མཚོན་དུས་གསུམ་དགེ་བའི་ཆུ་ཀླུངས་འབུམ། །བྱང་ཆེན་ཆུ་གཏེར་འཇིངས་སུ་ཞུགས་པ་ཡིས། །རྣམ་གྲོལ་རིན་ཆེན་རྡུལ་མང་འདྲེན་བཞིན་དུ། །ལྷར་བཅས་དགའ་བའི་དགའ་སྟོན་སྦྱིན་གྱུར་ཅིག །སརྦ་སུ་ཛ་ཡནྟུ། ཞེས་སམ། ཨོཾ་སྭསྟི། གང་གི་ཡོན་ཏན་ཕྱོགས་རེའི་རྣམ་ཐར་ལ། །བསྔགས་པའི་རྒྱུད་མངས་བསྒྲེངས་པས་ཕྱག་འཚལ་ཞིང་། །གྲངས་མེད་དངོས་འབྱོར་ཡིད་སྤྲུལ་མཆོད་པའི་སྤྲིན། །མཐའ་ཀླས་ནམ་མཁའི་ཕ་མཐའ་ཁྱབ་པར་འབུལ། །སྒྲིབ་གཉིས་ཚ་གདུང་སྟུག་པོས་ནོན་པ་ཡང་། །སྟོབས་བཞིའི་ཟླ་ཤེལ་བསིལ་བས་ཡོངས་སྦྱངས་ནས། །འཕགས་དང་སོ་སྐྱེའི་ལེགས་མཛད་སིམས་འོད་ལ། །ཡི་རངས་ས་ཡི་གདུ་བུའི་འདབ་རྒྱ་གྲོལ། །མགོན་ཁྱོད་གང་གིས་ཞི་བ་བརྙེས་པའི་ལམ། །འགྲོ་འདིའི་དཔྱིད་དུ་རྟག་པར་སྒྲོགས་བསྐུལ་ཞིང་། །མཚན་དཔེའི་དཀྱིལ་འཁོར་གཅིག་གིས་བསྐལ་པའི་བར། །བཞུགས་པའི་ཆོ་ག་ཡོངས་སུ་གྲུབ་མཛད་གསོལ། །དེ་ལྟར་བསགས་པའི་རྣམ་དཀར་འབྲས་བུའི་དཔྱིད། །ཆོས་དབྱིངས་ཞིང་ས་དམ་པར་བཏབ་པ་ལས། །རྣམ་གྲོལ་སྐུ་བཞིའི་སྙེ་མ་གཡུར་ཟ་བས། །ཕན་བདེའི་འདོད་དགུ་ལྷུག་པར་འཇོ་གྱུར་ཅིག །སརྦ་སུ་སིདྡྷི་རསྟུ། ཞེས་སམ། སུ་ཤྲཱི་སརྦ་ཛ་ཡནྟུ། །གང་གི་མཁྱེན་བརྩེ་ནུས་པ་ཡི། །ཡོན་ཏན་ཕྱོགས་རེའི་རྣམ་ཐར་ལ། །བསྔགས་པའི་མགྲིན་པ་མཐོར་བཏེགས་ནས། །ཞབས་ཀྱི་པདྨོར་དད་ཕྱག་སྟོབ། །དངོས་འབྱོར་ས་བོན་ཉུང་ངུ་ལས། །བརྩམས་ཏེ་ཡིད་སྤྲུལ་མཎྜལ་ནི། །མཐའ་ཀླས་བྲེས་བའི་མཆོད་སྤྲིན་གྱིས། །སྲིད་མཐའི་བར་དུ་བསྙེན་བཀུར་སྟོབ། །ཡང་སྲིད་མང་པོར་རྣམ་ཀུན་ཏུ། །གོམས་པའི་སྡིག་ལྟུང་རྒྱུར་བཅས་པ། །ཤིན་ཏུ་གནོང་པས་མཐོལ་བགྱིད་ཅིང་། །སླན་ཆད་བསྡམས་པའི་གཡར་དམ་ལེན། །སོ་སྐྱེ་དང་ནི་འཕགས་ཚོགས་ཀྱི། །ལེགས་བྱས་ཟླ་བའི་མ་མ་ལ། །ཡི་རངས་རྡུལ་གྱི་ཐིག་ལེ་ཡི། །འཛུམ་དཀར་གཡོ་བས་བྲན་པར་བགྱིད། །འདི་ན་རྨོངས་པའི་མུན་པ་ཡིས། །ལེགས་གསུངས་ཤུལ་ལམ་སྟོར་བ་ལས། །ཟབ་རྒྱས་ཆོས་ཀྱི་སྣང་བ་ཡིས། །ཐར་པའི་གྲོང་དུ་དཀྲི་མཛད་གསོལ། །ཁྱད་པར་ལུས་ཅན་བསོད་ནམས་ཀྱིས། ནོར་བུའི་རྐང་སྟེགས་བཀྲ་བ་དེར། །ཞབས་སེན་འཁོར་ལོ་བསྐལ་པ་བརྒྱར། །འཕོ་མེད་འཚོ་གཞེས་བརྟན་པར་མཛོད། །དེ་ལྟར་རྣམ་དཀར་ཆུ་ཡི་གཏེར། །ཡོངས་སུ་བསྔོ་བའི་མནྡཱ་རས། །བསྲུབས་ལས་རྣམ་གྲོལ་རི་བོང་འཛིན། །ཕན་བདེའི་དཔྱིད་དུ་རྫོགས་གྱུར་ཅིག །སརྦ་དཱ་སུ་ཤྲེ་ཡོ་དེ་ཧི། །ཞེས་སམ། ཤྲཱི་མཱཾ་གུ་རཽ་ན་མཱ་མི། །གང་ཞིག་དམ་པའི་ཡོན་ཏན་ལ། །ཡིད་རབ་དྭངས་བའི་དད་ཕྱག་དང་། །དངོས་འབྱོར་ཡིད་སྤྲུལ་མཆོད་སྤྲིན་ནི། །ཡེ་ཤེས་གཟིགས་པའི་མདུན་སར་བདར། །བག་མེད་སྡིག་དང་ལྟུང་བའི་སྒོ། །སྟོབས་བཞིའི་ར་བས་བཅད་པ་དང་། །འཕགས་དང་སོ་སྐྱེའི་རྣམ་དཀར་ལ། །མི་ཕྱེད་དགའ་བས་རྗེས་ཡི་རངས། །འདི་ན་ལྷར་བཅས་སྐྱེ་དགུ་ཡི། །བསོད་ནམས་ཞིང་མཆོག་ཁྱོད་ཉིད་ཕྱིར། །ཞི་བསིལ་བདུད་རྩི་སྦྱིན་དང་བཅས། །བསྐལ་པ་རྒྱ་མཚོར་ཞབས་བརྟན་མཛོད། །དེ་ལྟར་བསགས་ལས་བྱུང་བ་ཡི། །ཚོགས་ཟུང་བརླན་གྱིས་རབ་ཕྱེ་བའི། །ཡོངས་སུ་བསྔོ་བའི་མེ་ཏོག་གིས། །ཐར་པའི་འབྲས་བཟང་འཛིན་པར་ཤོག །སརྦ་དཱ་བི་མོཀྵཾ་ཀུ་སུ་མ་དེ་ཧི། ཞེས་པ་ལྟ་བུས་མཚོན་ཡུལ་དུས་གནས་སྐབས་དང་སྦྱར་ཏེ་རྒྱས་བསྡུས་སྐབས་དང་མཐུན་པར་བྱའོ། ། ༈

[edit]

gzhan yang de lta bu'i legs 'bul sogs kyi skabs su gong gsham ci rigs bar yan lag bdun pa'i tshigs su bcad pa sbyor bar spro na/ gzhan yang de lta bu'i legs 'bul sogs kyi skabs su gong gsham ci rigs bar yan lag bdun pa'i tshigs su bcad pa sbyor bar spro na 'di lta ste/__oM swasti pra dza b+h+yaH__gang zhig dam pa'i yon tan rmad byung nyi gzhon g.yo ba'i thur ma yis/__/dwangs ba'i blo gros ut+pal gsar pa'i 'dren byed rnam par dbye ba dang /__/lhan cig thal mo'i kun+dA'i zur mig spyi tor rtse mor zum dang bcas/__/zhabs mthil 'khor lo'i re kha mchog la rtag tu gus pas dad phyag stob/__/srid pa'i khams 'dir bdag gir bzung ba'i bla na yod pa'i mchod sprin dang /__/des kyang mi mtshon ting nge 'dzin gyi bkod pa pha mtha' yas pa'i dpyid/__/grong khyer gsum gyi dogs las ring brgal ngo mtshar bkod pa'i mdzes sdug la/__/dbang pos spyan stong gsar du sprul nas gcig tu blta ba'i skabs btsal bzhin/__/lam gsum 'gro ba'i bsil bas bkrus kyang cung zad dag pa'i nus dben la/__/legs bris bdag po'i sug par 'chang ba'i rtse brgya'i mtshon gyi brdar bas min/__/dkar min las dang kun rtog mdza' bas sgrib gnyis dri ma 'phel ba'i rgyun/__/stobs bzhi'i cho ga mtha' dag rdzogs pas lhag ma med par bcad la dbang /__/slob dang mi slob go 'phang la gnas so skye dang ni 'phags tshogs kyis/__/legs spyad mchog gi go cha brtun pas sems can rnams la sman bgyid par/__/rjes su yi rang dwang ba ster nas bsod nams bye ba'i phung po yang /__/ngang gi rgyud la ma byin blangs pas grangs med legs byas cha shas rdzogs/__/gang gis gzod nas mngon sum nyid brnyes 'gog bden rtag pa dam pa'i dbyings/__/lam bden ming tshig sprin du 'phos las dbyangs kyi yan lag yongs rdzogs pa'i/__/rmad byung gtong ba dam pa'i rin chen 'gro 'di'i bsod nams bgo skal du/__/lhug par stsal ba'i dga' ston dam pas phan bde'i snang ba rgyas par mdzod/__/mi srun dug can mche ba ltar gzings snyig ma'i 'gyur bas thugs drangs te/__/zhi ba dam pa'i nags su gzims la dgyes pa'i go skabs dbye srid na/__/dmyal me'i dbus kyang pad mtshor bzhin 'jug byang chub sems dpa'i thugs bskyed gang /__/grags pa'i ri mo tsam du zad phyir bskal pa rgya mtshor zhabs brtan gsol/__/de ltar bsags las byung ba'i dge tshogs dzam+bu'i rkang 'thung las smin 'bras/__/chos dbyings ma dros 'jing du lhung des byang chub dam pa'i gang+gA skyes/__/mtha' gnyis brgal ba'i lang tsho dar bas 'gro kun phan bde'i dga' ston la/__/ngom pa med par longs su spyod pa'i dge mtshan brgya phrag 'bar gyur cig__/sarba su dza yan+tu/__zhes sam/__shrI bi dza yan+tu/__rmad byung yon tan bye ba'i bsil 'od kyis/__/thal mo'i chu skyes spyi bor zum pa dang /__/phyogs res bsngags brjod mgrin pa'i rgyud mangs gang /__/'khrol bas shin tu gus pa'i dad phyag stob/__/dngos 'byor bdog pa phra mo 'dis mtshon te/__/bdag gzhan dus gsum dge tshogs longs spyod dang /__/ri gling rgya mtshor bcas pa'i maN+Dal yang /__/dwang ba'i blo gros kho nas dbul la phyogs/__gzod nas bag med sems kyi gnyis 'thung dbang /__/sdig dang ltung ba'i dregs pas myos pa gang /__/stobs bzhi'i 'dul sbyong mkhas pa'i brtul zhugs kyis/__/slad nas dam pa'i lam du bde bar gzhug__/'phags dang so skye'i rnam dkar zla shel gsar/__/grags snyan bdud rtsir bcas pa'i mtshar sdug la/__/phrag dog ut+pal dmar po mi zum par/__/yi rangs kun+dA'i 'dzum dkar snying dbus grol/__/gnas brgyad dag pa'i gsung gi gsang ba yis/__/mtha' klas sde snod rgyal rnga brdungs pa'i sgras/__/lus can ma rig gnyid la g.yur ba rnams/__/zhi bsil thar pa'i lam du sad par mdzod/__/mtha' klas zhing khams rgya mtsho'i mos ngo ru/__/gzugs sku'i sgyu 'phrul gcig car snang ba'i phyir/__/deng 'dir bdag cag bsod nams bgo skal du/__/thob khyod bskal pa rgya mtshor brtan par bzhugs/__/de ltar bsags pa'i legs byas rdul dmar kun/__/btung bas myos pa'i thun mtshams sprin gyi grong /__/'khor gsum dag pa'i mkha' la bsngos pa'i mthus/__/byang chub snying po'i snang ba 'dren gyur cig__/sarba dA ka l+yA NaM b+hU yAta/__zhes sam/__shrI su shre yo b+ha ban+tu/__/gang zhig gzod nas zhi ba'i snying po ru/__/grub pa'i lang tsho rgyas pa'i ye shes kyang /__/srid na srid pa bzhin du snang ba la/__/phyogs re'i yon tan dran pa'i dad phyag stob/__/gtong la spro ba min pa'i kun rtog gis/__/ma bcings dngos 'byor phra mo 'dis mtshon te/__/legs bris gdengs can bdag po'i dpal 'byor sogs/__/mtha' klas mchod pa'i sprin tu rnam par bkod/__/dam du 'chos dang rang bzhin las nyams pa'i/__/sdig lta'i mig sman tshon gyis bgos pa yang /__/stobs bzhi'i gru char g.yo bas rmad bab ste/__/slad nas nye bar bsdams pa'i mtshar sdug bzung /__/mgon po khyod kyi byang chub spyod mchog dang /__/'phags dang so skyes rnam dkar bskrun pa la/__/snying nas rangs pa'i 'dzum phreng grol ba yis/__/zla med bsod nams bye ba'i 'du 'god brtsam/_/ma rig 'thib bu'i non pa'i 'gro kun la/__/rnam grol chos kyi bdud rtsis bran pa'i mod/__/legs spyod ut+pal rgyas pa'i phang pa nas/__/rnam grol 'bras bu'i khur gyis dud mdzod kye/__/khyad par ring nas gzhan phyir dmigs pa yi/__/dam bca'i ri mo bris de rjes dgongs la/__/'gro 'di'i bsod nams mchod sdong dam pa ru/__/'chi med grub pa'i dga' bas snyems par mdzod/__/de ltar bsags las byung ba'i dge tshogs kun/__/rdul bral chos kyi dbyings su bsngos pa las/__/sku gsum ded dpon mchog tu bdag gyur te/__/yid can srid pa'i mtsho las sgrol bar shog__/sarba su shre yo kurban+tu/__zhes sam/__oM swasti sid+d+haM/__/gang na sras bcas 'dren pa thams cad kyis/__/bsngags pa'i me tog dkar pos dbugs dbyung ba'i/__/nor bu'i rkang stegs bkra ba'i zhabs sen la/__/yan lag mchog gis btud pa'i dad phyag stobs/__/dngos 'dzin mdud pa dam pos ma bcings pa'i/__/bdog 'byor nyung ngu 'dis mtshon srid zhi'i khams/__/rgyas par 'gengs pa'i rab 'byams mchod sprin ni/__/ye shes gzigs pa dam pa'i mdun sar bdar/__/thog ma med nas 'khrul pa'i gzhan dbang gis/__/dam la bzhag pa'i sems kyi glang po yis/__/legs spyod rdzing bu rnyogs pa'i sdig ltung dri/__/stobs bzhi'i ke ta ka yi dogs pas sbyangs/__/phyogs bcu dus bzhi'i 'phags dang so skye yi/__rnam dkar rlabs phreng rgyas pa'i chu gter la/__/rjes su yi rangs ngang mo'i 'gros mdzes kyis/__/don du gnyer ba'i tshul la gcig tu 'dun/__/smra mchog ngag gi rgyud mangs las 'phos pa'i/__/dbyangs bdun yan lag rdzogs pa'i tam+bu ras/__/yid can khams dbang bsam par rjes mthun pa'i/__/chags bral lam bden dga' ston sbyin par mdzod/__/skad cig rer yang zhing khams rgya mtsho la/__/ting 'dzin bye bas snyoms par 'jug mod kyi/__/deng 'dir bdag sogs mos pa'i gdung sel du/__/bskal brgyar chos kyi khri la g.yo med gsol/__/'dis mtshon dus gsum dge ba'i chu klungs 'bum/__/byang chen chu gter 'jings su zhugs pa yis/__/rnam grol rin chen rdul mang 'dren bzhin du/__/lhar bcas dga' ba'i dga' ston sbyin gyur cig__/sarba su dza yan+tu/__zhes sam/__oM swasti/__gang gi yon tan phyogs re'i rnam thar la/__/bsngags pa'i rgyud mangs bsgrengs pas phyag 'tshal zhing /__/grangs med dngos 'byor yid sprul mchod pa'i sprin/__/mtha' klas nam mkha'i pha mtha' khyab par 'bul/__/sgrib gnyis tsha gdung stug pos non pa yang /__/stobs bzhi'i zla shel bsil bas yongs sbyangs nas/__/'phags dang so skye'i legs mdzad sims 'od la/__/yi rangs sa yi gdu bu'i 'dab rgya grol/__/mgon khyod gang gis zhi ba brnyes pa'i lam/__/'gro 'di'i dpyid du rtag par sgrogs bskul zhing /__/mtshan dpe'i dkyil 'khor gcig gis bskal pa'i bar/__/bzhugs pa'i cho ga yongs su grub mdzad gsol/__/de ltar bsags pa'i rnam dkar 'bras bu'i dpyid/__/chos dbyings zhing sa dam par btab pa las/__/rnam grol sku bzhi'i snye ma g.yur za bas/__/phan bde'i 'dod dgu lhug par 'jo gyur cig__/sarba su sid+d+hi rastu/__zhes sam/__su shrI sarba dza yan+tu/__/gang gi mkhyen brtse nus pa yi/__/yon tan phyogs re'i rnam thar la/__/bsngags pa'i mgrin pa mthor btegs nas/__/zhabs kyi pad+mor dad phyag stob/__/dngos 'byor sa bon nyung ngu las/__/brtsams te yid sprul maN+Dal ni/__/mtha' klas bres ba'i mchod sprin gyis/__/srid mtha'i bar du bsnyen bkur stob/__/yang srid mang por rnam kun tu/__/goms pa'i sdig ltung rgyur bcas pa/__/shin tu gnong pas mthol bgyid cing /__/slan chad bsdams pa'i g.yar dam len/__/so skye dang ni 'phags tshogs kyi/__/legs byas zla ba'i ma ma la/__/yi rangs rdul gyi thig le yi/__/'dzum dkar g.yo bas bran par bgyid/__/'di na rmongs pa'i mun pa yis/__/legs gsungs shul lam stor ba las/__/zab rgyas chos kyi snang ba yis/__/thar pa'i grong du dkri mdzad gsol/__/khyad par lus can bsod nams kyis/__nor bu'i rkang stegs bkra ba der/__/zhabs sen 'khor lo bskal pa brgyar/__/'pho med 'tsho gzhes brtan par mdzod/__/de ltar rnam dkar chu yi gter/__/yongs su bsngo ba'i man+dA ras/__/bsrubs las rnam grol ri bong 'dzin/__/phan bde'i dpyid du rdzogs gyur cig__/sarba dA su shre yo de hi/__/zhes sam/__shrI mAM gu rau na mA mi/__/gang zhig dam pa'i yon tan la/__/yid rab dwangs ba'i dad phyag dang /__/dngos 'byor yid sprul mchod sprin ni/__/ye shes gzigs pa'i mdun sar bdar/__/bag med sdig dang ltung ba'i sgo/__/stobs bzhi'i ra bas bcad pa dang /__/'phags dang so skye'i rnam dkar la/__/mi phyed dga' bas rjes yi rangs/__/'di na lhar bcas skye dgu yi/__/bsod nams zhing mchog khyod nyid phyir/__/zhi bsil bdud rtsi sbyin dang bcas/__/bskal pa rgya mtshor zhabs brtan mdzod/__/de ltar bsags las byung ba yi/__/tshogs zung brlan gyis rab phye ba'i/__/yongs su bsngo ba'i me tog gis/__/thar pa'i 'bras bzang 'dzin par shog__/sarba dA bi mok+ShaM ku su ma de hi/__zhes pa lta bus mtshon yul dus gnas skabs dang sbyar te rgyas bsdus skabs dang mthun par bya'o/__/_!