JKW-KABUM-03-GA-001-034

🚧 This website is under continued development. We appreciate your patience!

Previous Text Back to Volume PageNext Text

Wylie title	rdzogs chen sde gsum dang 'brel ba'i zin bris sogs
Location	mkhyen brtse'i bka' 'bum Volume 3, sde tshan 1, Text 34, Pages 627-645 (Folios 314a6 to 323a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs chen sde gsum dang 'brel ba'i zin bris sogs. In 'jam dbyangs mkhyen brtse'i dbang po'i bka' 'bum, Vol. 3: 627-645. Khams sde dge rdzong sar dgon: Rdzong sar blo gros phun tshogs, 2020.
Genre	Dzogchen - rdzogs pa chen po  ·  Notes - zin bris

1 Texts in this Section (sde tshan or chos tshan)

34 627-645	རྫོགས་ཆེན་སྡེ་གསུམ་དང་འབྲེལ་བའི་ཟིན་བྲིས་སོགས། rdzogs chen sde gsum dang 'brel ba'i zin bris sogs Dzogchen - rdzogs pa chen po   ·   Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྗེ་བླ་མའི་དཀའ་གནད་སྟོན་པའི་ཟིན་བྲིས་གཞུང་དོན་སྒོ་བརྒྱ་འབྱེད་པའི་ལྡེའུ་མིག་པདྨའི་ཆུན་པོ་ཟབ་གཏེར་བདུན་ཅུ་རྩ་བདུན་པ་ལས་ཁོལ་བཏུས། སྐབས་དང་པོ་ལས། གང་ཟག་གཅིག་གི་རྒྱུད་ལ་སྡོམ་པ་གསུམ་ལྡན་དུ་བསྲུང་བ་རྣམ་པ་དྲུག་སྟེ། དེ་ཡང་རང་ལྡོག་མ་འདྲེས་པ་ནི། སྡོམ་པ་གསུམ་པོ་དེ་གང་ལས་བླང་བའི་ཡུལ་དང་། བསམ་པ་དང་། ཆོ་ག་ཐ་དད་པའི་སྒོ་ནས་ཇི་སྲིད་བླང་བའི་དུས་ཀྱང་སོ་སོར་ངེས་པས་ན། ཀུན་སློང་བྱང་ཆུབ་སེམས་ཀྱི་ལྡོག་པ་དང་། སྡོམ་པའི་ལྡོག་པ་གཉིས་ཡོད་པ་ལས། སྔ་མ་ཚེ་འཕོས་པའི་དབང་གིས་མི་བཏང་སྟེ། དེ་བྱང་སེམས་ཀྱི་སྡོམ་པའི་གཏོང་རྒྱུ་མ་ཡིན་པའི་ཕྱིར་རོ། །ཕྱི་མ་སྡོམ་པ་ཁས་བླངས་པའི་ལྡོག་ཆ་ནི་ཚེ་འཕོས་པའི་དབང་གིས་གཏོང་སྟེ། དགེ་སློང་ནི་སྡོམ་པ་དེ་ཇི་སྲིད་འཚོའི་མཐའ་ཅན་གྱི་སྡོམ་པ་ཡིན་པའི་ཕྱིར་རོ། །དགག་དགོས་ཡོངས་རྫོགས་ནི། དེ་ཡང་མི་ཚངས་པ་སྤྱོད་པ་ལྟ་བུ་ཐབས་མཁས་བརྟུལ་ཞུགས་ཀྱིས་སྤྱད་ན་ཉེས་པས་མི་གོས་པར་མ་ཟད་པར་ཚོགས་གཉིས་རྫོགས་པའི་རྒྱུར་འགྲོ་བ་སྟེ། དཔེར་ན་དུག་སྤོང་བ་དང་། སྨན་གྱི་སྦྱོར་བ་དང་། སྔགས་བཏབ་སྟེ་ཟ་བ་གསུམ་ཀ་མི་འཆི་བའི་རྒྱུར་མཚུངས་པས་དགོས་པ་འགྲུབ་པ་བཞིན་ནོ། །ངོ་བོ་གནས་འགྱུར་ནི། དཔེར་ན་ཟངས་རྡོ་བཞུས་པས་ཟངས་དང་། དེ་ལ་གསེར་འགྱུར་གྱི་རྩིས་བཏབ་པས་གསེར་དུ་འགྱུར་བ་བཞིན། ཉན་ཐོས་ལྟར་དམན་སེམས་ཀྱིས་བླངས་པའི་སོ་ཐར་གྱི་སྡོམ་པ་དེ་ཡང་བྱང་ཆུབ་སེམས་དཔའི་སྡོམ་པས་ཟིན་ན་དམན་སེམས་བཏང་ཡང་། རང་གི་ངོ་བོ་གཞན་གནོད་གཞིར་བཅས་སྤོང་བའི་སྡོམ་པའི་ཚུལ་ཁྲིམས་སུ་གནས་འགྱུར་ལ། དེ་གཉིས་དབང་ཐོབ་ན་མཉམ་པ་ཆེན་པོའི་ཐབས་ཀྱིས་ཟིན་པས་ཐ་མལ་གྱི་སྣང་ཞེན་ལྡོག་པ་ཆ་རེ་ཡོད་པ་དེ་གཏོང་ནས། སོ་ཐར་གྱིས་གཞན་གནོད་གཞིར་བཅས་སྤོང་བ་དང་། བྱང་སྡོམ་གྱིས་གཞན་ལ་ཕན་འདོགས་པའི་ལྡོག་ཆ་གཉིས་པོ་དེ་རྫས་གོང་འཕེལ་གྱི་ཚུལ་གྱིས་མཉམ་པ་ཆེན་པོའི་ཐབས་ཁྱད་པར་ཅན་གྱིས་ཟིན་པའི་སྔགས་ཀྱི་ཉེས་སྤྱོད་སྡོམ་པ་དང་། རིགས་ལྔ་སྤྱིའི་རྣམ་སྣང་གི་དམ་ཚིག་ཏུ་གནས་འགྱུར་བ་ཡིན་ནོ། །ཡོན་ཏན་ཡར་ལྡན་པ་ནི། སྔགས་སྡོམ་མ་ཉམས་པར་ཐུབ་ན། འོག་མ་གཉིས་ཞར་ལ་ཐུབ་པས་ལོགས་སུ་བསྲུང་མི་དགོས་པའོ། །སྡོམ་གསུམ་གནད་ཀྱིས་མི་འགལ་བ་ནི། ལྟ་བ་འཁོར་གསུམ་མི་རྟོག་པའི་ཤེས་རབ་དང་། བྱེད་པ་སྡོམ་པའི་ཐབས་མཁས་ཀྱིས་ཟིན་པའི་སྒོ་ནས་སྤྱོད་ན་འགལ་བ་མེད་དོ། །གསང་སྙིང་ལ། སྦྱོར་སྒྲོལ་བྱ་བ་སོགས༴ དུས་སྐབས་ཀྱི་གཙོ་བོར་གང་འགྱུར་སྤྱད་པ་ནི། གསང་འདུས་ལས། ཕྱི་རུ་ཉན་ཐོས་སྤྱོད་པ་སྤྱད། །ནང་དུ་འདུས་པའི་དོན་ལ་དགའ། །ཞེས་གསུངས་པ་ལྟ་བུའོ། །དེ་ཡང་སོར་སྡོམ་ནི་ངོ་བོ་གཞན་གནོད་གཞིར་བཅས་པ། བྱང་སེམས་ནི་དེའི་སྟེང་དུ་གཞན་ལ་ཕན་འདོགས་པའི་ཆ་དང་། སྔགས་སྡོམ་ནི་ཆོས་ཉིད་མཉམ་པ་ཆེན་པོའི་ཐབས་ཀྱིས་ཟིན་པའི་ཐབས་ཀྱི་ཆ་དེ་གསུམ་འཇོག་པ་ཡིན་ལ། ། ༈

གཟུགས་ཕུང་ལ་རགས་ཕྲ་ཤིན་ཏུ་ཕྲ་བ་གསུམ་ལས། དང་པོ་ནི་གཟུགས་ཕུང་དང་རྣམ་སྨིན་གྱི་རྟེན་དོན་གཅིག །ཕྲ་བ་ནི་བར་དོར་འཆར་འགྱུར་གྱི་ལུས་དང་རྣམ་སྨིན་གྱི་ལུས། ཤིན་ཏུ་ཕྲ་བ་ནི་གཟུགས་ཕུང་ཕྲ་རགས་ཐམས་ཅད་ཀྱི་འཆར་གཞི་གཉུག་མའི་ལུས་དེའོ། ། ༈ སྣང་མཆེད་ཐོབ་པ་ཉེར་ཐོབ་བཞིས་འོད་གསལ་དུ་འཇུག་པ་ལ། རིམ་བཞིན་སྟོང་པ། ཤིན་ཏུ་སྟོང་པ། ཆེས་སྟོང་པས་སྟོང་ཆེན་གསུམ། སྣང་བ་གསུམ་འགགས་པས་ཐམས་ཅད་སྟོང་པ་འོད་གསལ་ཞེས་སྦྱར་རོ།། །། ༈ མ་མོ་སྲིད་པའི་རྒྱུད་ལུང་ཟླ་གསང་ཐིག་ལེར། མ་མོ་ཐམས་ཅད་ཆགས་པ་ཆེ། །ཨ་བྷི་ཥེ་ཀ་ཙ་རི་ལས། །ལུས་ཀྱི་རྩ་རྣམས་བུམ་པས་ཏེ། །སྔགས་ནི་གསང་བ་ཞེས་སུ་བཤད། །ཁམས་ཀྱི་བདུད་རྩི་ཤེས་རབ་ཤེས། །སྙིང་པོ་གཡོ་བྱེད་བདེ་བ་ཆེ། །བུམ་པས་ས་དྲུག་རྫོགས་པ་ལ། །ས་བཞི་གསང་བའི་དབང་ཤེས་བྱ། །ཤེས་རབ་ཡེ་ཤེས་ས་གཉིས་སྤྱོད། །བདེ་ཆེན་ས་ལམ་གཅིག་ཅར་བགྲོད། །དང་པོ་བསྐྱེད་པའི་རིམ་པ་ལ། །གཉིས་པ་བདག་ཉིད་བྱིན་གྱིས་བརླབས། །གསུམ་པར་ལས་ཀྱི་འཁོར་ལོ་སྟེ། །བཞི་པར་རྡོ་རྗེའི་རྦ་རླབས་བསྟན། །དང་པོ་སྤྲུལ་སྐུའི་ཞིང་ཁམས་དབང་། །གཉིས་པ་ལོངས་སྐུའི་ཞིང་ཁམས་ལ། །གསུམ་པ་དེ་བཞིན་ཆོས་སྐུ་ལས། །བཞི་པར་ངོ་བོ་ཉིད་སྐུ་ཐོབ། །དང་པོ་ལུས་ཀྱི་དཀྱིལ་འཁོར་ཏེ། །གཉིས་པ་བྷ་གའི་དཀྱིལ་འཁོར་ཡིན། །གསུམ་པ་བྱང་ཆུབ་བདུད་ཀྱི་སེམས། །བཞི་པ་དུས་གསུམ་བདེ་གཤེགས་བཅུད། །དང་པོ་འཁོར་འདས་དབྱེར་མེད་ཡིན། །གཉིས་པར་མ་འདྲེས་ཡོངས་སུ་རྫོགས། །གསུམ་བཞིར་བདེ་སྟོང་ཆུང་དང་ཆེ། །ཞེས་དང་། རྡོ་རྗེ་ལུས་ཀྱི་དྲྭ་བ་ལས། སྤྲུལ་པའི་སྐུ་འབྱུང་ངོ་མཚར་ཆེ། །དེ་ནས་སྔགས་ཀྱི་ཡི་གེ་ནི། །ལོངས་སྤྱོད་རྫོགས་པ་རྨད་བྱུང་ཆོས། །སེམས་ཅན་ལུས་བཅུད་ཁམས་ཀྱི་བདེ། །དེ་ཉིད་མི་རྟོག་ཆོས་སྐུར་གནས། །ཡང་གསལ་རང་བཞིན་སྙིང་པོ་མེད། །དེ་ནི་ངོ་བོ་ཉིད་དུ་དག །ཅེས་དང་། ཉོན་མོངས་སྟོང་ཕྲག་བརྒྱད་ཅུ་ཡང་། །གཉེན་པོ་ཆོས་ཀྱི་སྒོ་བོ་སྤྲོ། །ཆོས་དང་གང་ཟག་བདག་ཉིད་ཀྱང་། །དེ་ལ་སྡེ་སྣོད་གསུམ་དུ་སྤྲོ། །ཉོན་མོངས་ལྔ་ལ་ཞེན་པ་ཡང་། །ཉོན་མོངས་ལམ་སློང་གསང་སྔགས་སྤྲོ། །མོས་པ་ཆུང་ངུའི་དོན་ཆེད་དུ། །སྦྱངས་པའི་ཡོན་ཏན་བཅུ་གཉིས་དང་། །གང་ཟག་ཆོས་ལ་བདག་ལྟ་ཞིང་། །རྩ་བ་ཡན་ལག་ཚུལ་ཁྲིམས་བསྲུང་། །ལུས་དག་ཡིད་གསུམ་དགེ་བཅུ་སྤྱོད། །བདེན་པ་བཞི་ཡི་དོན་བསྒྲུབས་ནས། །འབྲས་བུ་རྣམ་གཉིས་གྲུབ་པར་འདོད། །དམིགས་དབྱེའང་ཕྲ་བ་འདུལ་དོན་དུ། །འབྲེལ་ཅིང་འབྱུང་བ་རྟེན་འབྲེལ་སྐོར། །གང་ཟག་ཆོས་ལ་ཕྱོགས་གཅིག་རྟོགས། །རང་གོམས་ཤུགས་ཀྱིས་དཀའ་ཐུབ་བསྲུང་། །རྫུ་འཕྲུལ་སྤྱི་ཡིས་འགྲོ་དོན་སྤྱོད། །དགེ་བཤེས་མི་ལྟོས་སྔོན་གོམས་བསྒྲུབས། །ནེ་ཙོ་བསེ་རུ་ལྟ་བུར་གནས། །ཟབ་ཅིང་རྒྱ་ཆེན་འདུལ་བ་ནི། །བདེན་པ་གཉིས་ཀྱི་སྒོར་ཞུགས་ནས། །གང་ཟག་ཆོས་ལ་བདག་མེད་ཅིང་། །བྱང་ཆུབ་སེམས་ལྡན་བསླབ་པ་བསྲུང་། །ཚད་མེད་བསྡུ་བའི་དངོས་པོ་སྤྱོད། །ཕ་རོལ་ཕྱིན་བཅུ་བསྒྲུབ་པར་ལྡན། །ས་བཅུ་བགྲོད་ནས་སངས་རྒྱས་གནས། །བྱེད་སྤྱོད་འདུལ་བའི་དོན་ཆེད་དུ། །གོམས་གྱུར་སྒོམ་ལུགས་བྱིན་རླབས་སྐོར། །དོན་རྟོགས་བྱིན་རླབས་རྗེ་ཁོལ་ཚུལ། །རང་གི་རྩ་བ་ཡན་ལག་བསྲུང་། །ཕྲིན་ལས་ཁྲུས་དང་གཙང་སྦྲ་སྤྱོད། །དག་པ་གསུམ་དང་ལྡན་པར་བསྒྲུབ། །རིགས་གསུམ་མགོན་པོའི་ས་ལ་འགྲོ། །མཉམ་པས་འདུལ་བའི་དོན་ཆེད་དུ། །འཇུག་པའི་སྒོ་ཚུལ་སྤྱོད་པ་ནི། །བྱ་བའི་རྒྱུད་དང་མཐུན་པར་བྱེད། །ལྟ་བ་སྒྲུབ་ཐབས་འབྲས་བུ་ནི། །རྣལ་འབྱོར་རྒྱུད་ཀྱི་རྗེས་སུ་བསྒྲུབས། །གཉི་ག་རྒྱུད་ཅེས་གྲགས་པར་བཤད། །རིགས་བཞི་རྡོ་རྗེ་འཆང་སར་གནས། །ཟབ་མོས་འདུལ་བའི་དོན་ཆེད་དུ། །མངོན་པར་བྱང་ཆུབ་ལྔ་ཡི་སྒོར། །དོན་རྟོགས་ཀུན་རྫོབ་གྲོགས་པོར་བལྟ། །སྤྱི་དང་ཁྱད་པར་དམ་ཚིག་བསྲུང་། །ཕྲིན་ལས་བཞི་ལ་ཏིང་ངེས་སྤྱོད། །ཕྱག་རྒྱ་བཞི་དང་ལྡན་པར་བསྒྲུབ། །རིགས་ལྔའི་སངས་རྒྱས་འགྲུབ་པར་འདོད། །ཚོགས་ཀྱི་སྒྲུབ་པས་འདུལ་དོན་དུ། །ཏིང་འཛིན་རྣམ་གསུམ་སྒོར་ཞུགས་ནས། །དབྱེར་མེད་སྐྱེ་འགག་མེད་པར་བལྟ། །རྩ་བ་ལྔ་སོགས་ཡན་ལག་བཅས། །སྒྲོལ་དང་སྦྱོར་ལ་རབ་ཏུ་བརྩོན། །ཐབས་ཤེས་གཉིས་མེད་སྒྲུབ་པ་བཞི། །ཡི་གེའི་འཁོར་ལོ་ཚོགས་ཆེན་པོ། །མཉམ་པའི་སྤྱོད་པས་འདུལ་དོན་དུ། །ཡོངས་རྫོགས་ཏིང་འཛིན་སྒོར་ཞུགས་ནས། །དབྱིངས་དང་ཡེ་ཤེས་ཡབ་ལྔས་བལྟ། །སྤྱི་དང་ཁྱད་པར་ལྷག་པ་བསྲུང་། །མཚན་མར་སྤྱོད་མེད་སྣོད་བཅུད་སྤེལ། །མ་སྐྱེས་རྫོགས་པའི་ཚུལ་དུ་བསྒྲུབ། །པདྨ་ཅན་གྱི་ས་ལ་འགྲོ། །ཞེས་སོ། །ཆགས་པས་ཆགས་པ་གྲོལ་བྱེད་པ། །ལུས་ཀྱི་གཡས་གཡོན་དབུས་གནས་པ། །གཟུང་འཛིན་མེད་པའི་དངོས་པོ་སྟེ། །འདོད་ཆགས་ཞེ་སྡང་གཏི་མུག་དང་། །རླུང་དང་མཁྲིས་པ་བད་ཀན་དང་། །ཉིན་མོ་མཚན་མོ་མཚམས་ཀྱི་ཆ། །འདོད་གཟུགས་མེད་པའི་ཁམས་གསུམ་དང་། །རྒྱུ་ལམ་འབྲས་བུའི་རྣལ་འབྱོར་གསུམ། །སངས་རྒྱས་ཆོས་དང་དགེ་འདུན་དང་། །སྟོང་ཉིད་ཡེ་ཤེས་རྡོ་རྗེ་ཀུན། །ཕ་ལས་བྱུང་བའི་ག་བུར་ཕོ། །མ་ལས་བྱུང་བའི་སིཧླ་མོ། །རང་གི་སྐེད་པ་ཆང་དུ་བཤད། །སྲོག་གི་རྣམ་པ་འདི་གསུམ་དུ། །འཁོར་དང་མྱ་ངན་འདས་པ་འགྲུབ། །བཅུ་ཚན་གཉིས་དང་དེ་སྟེང་གསུམ། །རྒྱུས་འཚོ་ཀླད་པ་དེ་ན་ཡོད། །བརྒྱད་གཉིས་པས་ནི་སྐད་རྣམས་འབྱུང་། །དེ་ལ་ཟས་ཀྱི་ལོངས་སྤྱོད་གསོལ། །བཞི་གཉིས་རང་གི་སྙིང་ཡིན་ཏེ། །དེ་ལ་འཁོར་འདས་ཆོས་གནས་སོ། །བཅུ་ཚན་དྲུག་དང་དེ་སྟེང་བཞི། །མ་སྡེ་བུ་སྡེ་འདྲེས་པར་སྤྲུལ། །མེ་དང་རླུང་གི་གནས་ནི་འོག །དེ་ཡང་གྲུ་གསུམ་འོད་མའི་གཞུ། །གཡས་ཀྱི་ཉི་མ་དམར་ཞིང་དྭངས། །གཡོན་གྱི་ཟླ་བ་དཀར་ལ་གསལ། །དབུས་ཀྱི་ཀ་བ་བརྟན་པ་ནི། །པདྨའི་སྣལ་མ་ལྟ་བུར་ཕྲ། །ཆུ་ཤིང་སྙིང་པོ་འདྲ་བར་དྲང་། །ཏིལ་གྱི་མར་མེ་ལྟ་བུར་གསལ། །རྒྱ་སྐྱེགས་མེ་ཏོག་ཇི་བཞིན་དམར། །ཞེས་དང་། ལུས་ཀྱི་ཁོལ་བུ་ཕལ་ཆེར་རམ། །ཐམས་ཅད་སྣང་དངོས་བདེ་བ་ཕྱི། །ནང་གནས་སྤྱི་མགྲིན་སྙིང་ལྟེ་གསང་། །བདག་ཡུམ་གཟུང་འཛིན་རྟོག་གསུམ་འགོག །དེ་ཕྱིར་སྤང་བྱ་བྲལ་བ་ཡིན། །བདེ་བ་ཆུང་ཆེ་མི་རྟོག་དང་། །བདེ་སྟོང་དེ་ཡང་ལྷན་ཅིག་སྐྱེས། །སྐྲ་དཀར་བྲལ་དང་སྟོབས་རྫོགས་གསལ། །མཚན་དཔེ་ཚང་ཞིང་འཆི་མེད་པས། །ཡིད་བཞིན་སྤྲིན་གྱི་བདག་པོ་སྟེ། །ཚེ་ཡི་རིག་འཛིན་ཐོབ་པའོ། །ཞེས་བཤད། ཀློང་ཆེན་རབ་འབྱམས་རྒྱལ་པོའི་རྒྱུད་ལས། ཕྱོགས་རིས་ཀུན་དང་བྲལ་བ་ལ། །མཐའ་དང་དབུས་སུ་མི་དམིགས་ཏེ། །སྒྲོ་དང་སྐུར་པ་མེད་པའི་ཕྱིར། །བླང་དང་དོར་བ་ཡང་ནི་མེད། །རྒྱུ་འབྲས་ཀུན་ལས་འདས་པའི་ཕྱིར། །ཡེ་ནས་རྐྱེན་གྱིས་སྐྱེད་དུ་མེད། །རྒྱུ་རྐྱེན་བྲལ་བའི་ཆོས་ཉིད་ལ། །མུ་སྟེགས་ལྟ་བ་མདུད་པ་ཅན། །རྟག་ཆད་གཉིས་ཀྱི་ངན་སྤྱོད་ཀྱིས། །མཐའ་བྲལ་ལྟ་བ་མ་རྟོགས་ཏེ། །གཉིས་སུ་ཞེན་པ་ཕྱོགས་རིས་བདུད། །ཨ་ཏི་ཡོ་གའི་ལྟ་བ་ནི། །ཆོས་ཉིད་རྒྱ་ཆད་མེད་པ་ལ། །གཉིས་ཀ་གང་ཤར་རང་གྲོལ་བས། །མུ་སྟེགས་མ་སྤངས་རྫོགས་ཆེན་རྒྱན། །ཉན་ཐོས་ལྟ་བ་མདུད་པ་ཅན། །ཡུལ་སེམས་འབྲེལ་མེད་སྐད་ཅིག་བལྟ། །ཡོད་མེད་མཉམ་པའི་ཆོས་ཉིད་ལ། །མེད་པར་འདོད་པ་ཕྱོགས་འཛིན་བདུད། །ཨ་ཏི་ཡོ་གའི་ཆོས་ཉིད་ལ། །གཉིས་ཀ་གང་ཤར་རང་གྲོལ་བས། །ཉན་ཐོས་མ་སྤངས་རྫོགས་ཆེན་རྒྱན། །རང་རྒྱལ་ལྟ་བ་མདུད་པ་ཅན། །ཡུལ་སྟོང་གཅིག་ལ་ཤེས་པ་གཏད། །རྟེན་འབྲེལ་བཅུ་གཉིས་འབྱུང་ལྡོག་བྱེད། །འབྱུང་འཇུག་མཉམ་པའི་ཆོས་ཉིད་ལ། །ཡོད་པར་འདོད་པ་ཕྱོགས་འཛིན་བདུད། །ཨ་ཏི་མཉམ་པའི་ཆོས་ཉིད་ལ། །གཉིས་ཀ་གང་ཤར་རང་གྲོལ་བས། །རང་རྒྱལ་མ་སྤངས་རྫོགས་ཆེན་རྒྱན། །སེམས་ཙམ་ལྟ་བ་མདུད་པ་ཅན། །རང་གསལ་གཟུང་འཛིན་དག་པ་ལ། །རང་སྒོ་བདེ་བར་ལྟ་བ་སྟེ། །ཤེལ་སྒོང་དག་པའི་ཚུལ་ཤེས་པས། །བདག་མེད་གཉིས་འདོད་ཕྱོགས་འཛིན་བདུད། །གང་ཡང་འདྲ་བའི་ཆོས་ཉིད་ལ། །གཉིས་ཀ་གང་ཤར་རང་གྲོལ་བས། །སེམས་ཙམ་མ་སྤངས་རྫོགས་ཆེན་རྒྱན། །དབུ་མའི་ལྟ་བ་མདུད་པ་ཅན། །རིག་པ་ཀུན་རྫོབ་སྤྲོས་བཅད་ནས། །དོན་དམ་སྤྲོས་མེད་ངང་ལ་མཇལ། །བདེན་གཉིས་དོན་ལ་ཡིད་ཆེས་བལྟ། །གཉིས་མེད་མཉམ་པའི་ཆོས་ཉིད་ལ། །གཉིས་སུ་ལྟ་བ་ཕྱོགས་འཛིན་བདུད། །གཉིས་སུ་མེད་པའི་ཆོས་ཉིད་ལ། །གཉིས་ཀ་གང་ཤར་རང་གྲོལ་བས། །དབུ་མ་མ་སྤངས་རྫོགས་ཆེན་རྒྱན། །ཀྲྀ་ཡའི་ལྟ་བ་མདུད་པ་ཅན། །ཀུན་རྫོབ་སྣང་བ་རིགས་གསུམ་ལ། །དོན་དམ་དག་པའི་མཐའ་དང་བྲལ། །རྗེ་ཁོལ་ཚུལ་དུ་ལྟ་བར་བྱེད། །བཟང་ངན་མཉམ་པའི་ཆོས་ཉིད་ལ། །གཉིས་སུ་འཛིན་པ་ཕྱོགས་འཛིན་བདུད། །ཆོས་ཉིད་མཉམ་པའི་དོན་འདི་ལ། །གཉིས་ཀ་གང་ཤར་རང་གྲོལ་བས། །ཀྲྀ་ཡ་མ་སྤངས་རྫོགས་ཆེན་རྒྱན། །ཨུ་པའི་ལྟ་བ་མདུད་པ་ཅན། །ལྟ་སྤྱོད་གོང་འོག་རྗེས་སུ་འབྲེང་། །གཅིག་ལ་ཞེན་ཅིང་གཅིག་ལ་སྤྱོད། །གཉིས་འཛིན་ཁ་དྲག་ཕྱོགས་འཛིན་བདུད། །གཉིས་ཀའི་ཚུལ་དུ་ལྟ་བྱེད་པ། །གོང་འོག་མཉམ་པའི་ཆོས་ཉིད་ལ། །གཉིས་ཀ་རང་ཤར་རང་གྲོལ་བས། །ཨུ་པ་མ་སྤངས་རྫོགས་ཆེན་རྒྱན། །ཡོ་གའི་ལྟ་བ་མདུད་པ་ཅན། །དོན་དམ་སྣང་ལ་རང་བཞིན་མེད། །ཀུན་རྫོབ་དག་པའི་བྱིན་རླབས་བལྟ། །མཚན་མེད་མཉམ་པའི་ཆོས་ཉིད་ལ། །ལྟར་སྣང་ཕྱོགས་སུ་འཛིན་པའི་བདུད། །སང་སང་འདྲ་བའི་ཆོས་ཉིད་ལ། །གཉིས་ཀ་གང་ཤར་རང་གྲོལ་བས། །ཡོ་ག་མ་སྤངས་རྫོགས་ཆེན་རྒྱན། །མ་ཧཱའི་ལྟ་བ་མདུད་པ་ཅན། །ཐབས་དང་ཤེས་རབ་སྐོར་ཞུགས་ནས། །བདེན་པ་དབྱེར་མེད་སྤྱོད་ཡུལ་བྲལ། །ཆོས་ཉིད་མཉམ་པའི་དོན་འདི་ལ། །སྤྱོད་ཡུལ་བྲལ་བ་ཕྱོགས་འཛིན་བདུད། །གཉིས་ཀ་གང་ཤར་རང་གྲོལ་བས། །མ་ཧཱ་མ་སྤངས་རྫོགས་ཆེན་རྒྱན། །ཨ་ནུའི་ལྟ་བ་མདུད་པ་ཅན། །དབྱིངས་དང་ཡེ་ཤེས་སྒོར་ཞུགས་ནས། །ཀུན་ཏུ་བཟང་པོ་བཟང་མོ་གཉིས། །གཉིས་སུ་མེད་པའི་བདེ་ཆེན་ལྷ། །ཡོད་ཀྱང་མཉམ་པའི་ཆོས་ཉིད་ལ། །གཉིས་མེད་ཕྱོགས་སུ་ལྷུང་བའི་བདུད། །རྒྱ་ཆད་མེད་པའི་ཆོས་ཉིད་ལ། །གཉིས་ཀ་གང་ཤར་རང་གྲོལ་བས། །ཨ་ནུ་མ་སྤངས་རྫོགས་ཆེན་རྒྱན། །བྱ་བྲལ་ངང་དུ་ཀུན་རྫོགས་པས། །མ་སྤངས་རང་སར་གྲོལ་བའི་ཀློང་། །སངས་རྒྱས་སྐུ་དང་སེམས་ཅན་ལུས། །ཇི་ལྟར་སྣང་བ་རྫོགས་ཆེན་རྒྱན། །ཞེས་སོ།། །། ༈ རྟ་མགྲིན་དགོངས་པ་ལུང་སྟོན་པའམ། དབང་ཆེན་འདུས་པའི་རྒྱུད་ལས། །ཆོས་དང་གང་ཟག་བདག་ཏུ་འཛིན། །རྡུལ་ཕྲན་ཕྲ་བ་ཉན་ཐོས་ཅན། །ཕྱི་ནང་རྟེན་ཅིང་འབྲེལ་འབྱུང་དང་། །ལུགས་འབྱུང་དེ་ལྡོག་རང་སངས་རྒྱས། །དོན་དམ་བློ་ཡི་ངང་སྟོང་ཞིང་། །ཀུན་རྫོབ་སྒྱུ་མར་སྣང་བ་དེས། །དབྱེ་གཞི་ལ་སོགས་རྣམ་པ་ཡིས། །བྱང་ཆུབ་སེམས་དཔའ་ཕལ་ཆེན་ཏེ། །དག་པ་ཡེ་ཤེས་ཆོས་ཉིད་དུ། །རིགས་གསུམ་མགོན་ལ་སྤྱོད་པ་བལྟ། །འོག་སྤྱོད་གོང་མ་བལྟ་བ་ཡི། །ཨུ་པ་ཡ་ཞེས་དེ་ལྟར་སྣང་། །རྣམ་པར་སྣང་མཛད་ཆེན་པོ་ཡིས། །རྡོ་རྗེ་དབྱིངས་ཀྱི་རྣལ་འབྱོར་ལྷ། །ལོངས་སྤྱོད་རྫོགས་པའི་སྐུ་དག་ལ། །བདེན་པ་དབྱེར་མེད་མ་ཧཱ་ཡིན། །རྩོལ་བྲལ་དབྱེར་མེད་ཤིན་ཏུ་རྫོགས། །འདི་ནི་སྤྲུལ་པ་དམ་པ་ཡིས། །དབྱིངས་དང་ཡེ་ཤེས་གཉིས་སུ་མེད། །འོག་ཏུ་གྱུར་དང་སྟེང་ན་སྤྱོད། །མཐོ་དམན་ཐེག་པའི་གཏན་ཚིགས་ནི། །ཁྱད་པར་ཆེ་ལ་གཅིག་པའི་ཚུལ། །ཀུན་བཏགས་འཁོར་བའི་རང་བཞིན་ནི། །གཞན་དབང་དེ་བཞིན་གཤེགས་པ་སྟེ། །ཡོངས་སུ་གྲུབ་པ་ཆོས་ཀྱི་སྐུ། །རྒྱུ་འདུན་འདོད་པས་འབྲས་བུ་འཕགས། །རང་སེམས་མངོན་སུམ་ལྷ་སྐུར་འབེབས། །རྗེས་ཀྱི་ཤེས་པ་ལྷ་སྐུར་བཏགས། །རྫོགས་པ་ཨ་ནུ་ཡོ་ག་ཡིན། །ཞེས་དང་། ཀླུ་དང་རུས་སྦལ་གཙང་བ་དང་། །ལྷས་བྱིན་དང་ནི་གཞུ་ལས་རྒྱལ། །ཅེས་དང་། ཡུལ་སེམས་རབ་ཏུ་རྟོགས་གྱུར་ན། །གང་བལྟས་ཀ་དག །པདྨ་དབང་གི་ལྷ། །ཇི་ལྟར་སྤྱོད་ཀྱང་སྐྱོན་མེད་པས། །དབང་ཆེན་ཞེས་ནི་དེ་ལ་བྱ། །ཞེས་དང་། གང་ཟག་ཉེ་ལམ་བསྒྲུབ་འདོད་པས། །གནས་ཁང་ཤིན་ཏུ་མུན་ནག་པར། །རྡོ་རྗེ་གཙུག་ཏོར་ལྷུན་གྲུབ་ལྟ་སྟངས་ཀྱིས། །ངེས་པ་ཁོ་ན་གྲུབ་པ་སྟེ། །ཞེས་དང་། དམིགས་པ་ཕྲ་བའི་རིག་པས་ནི། །གཙོ་བོའི་བསྙེན་པ་འབུམ་དུ་བྱ། །འཁོར་རྣམས་ལ་ནི་ཁྲི་ཡིན་ཏེ། །དགེ་སློང་རྡོ་རྗེ་འཛིན་པས་བྱ། །ཞེས་དང་། རྡོ་རྗེས་སྣོད་དང་ལྡན་པ་རྣམས། །དག་ཆུས་སེམས་ཀྱི་དྲི་མ་བཀྲུ། །གོས་གཙང་གོན་ལ་གཙང་ཁང་འཇུག །རས་ཀྱི་ཡོལ་བས་བཅད་པར་བྱ། །ཞེས་དང་། སྐུད་དང་ལེགས་པ་ཚད་ལྡན་པ། །གསང་དེའི་རྡོ་རྗེ་མདུད་པས་གསུམ། །མེ་ཏོག་གཏོར་ཞིང་དཔུང་གཡོན་བཅིང་། །ཞེས་དང་། སོ་ཤིང་བཟང་པོའི་ཕུར་བུ་དེ། །བྱིན་རླབས་ལག་གཏད་སློབ་མས་དོར། །ཞེས་དང་། ཕྱོགས་བལྟས་དཱུརྦའི་སྔགས་གདན་ལ། །ཉལ་ནས་ཇི་ལྟར་མཐོང་བ་སྨྲ། །གོང་དེའི་རྣམ་པ་བླ་མས་བཤད། །གོས་བཟང་བགོས་པའི་ཤིཥྱ་ཡིས། །ཐལ་སྦྱར་འཇུག་པར་གསོལ་བ་གདབ། །ཅེས་དང་། དགོས་པའི་ལོངས་སྤྱོད་ཚང་བ་ནི། །འབྱོར་ལྡན་ཡོ་བྱད་ཚོགས་ཡིན་ཏེ། །ཞེས་སོགས་གསུངས། འདི་ལ་དཔལ་རྡོ་རྗེ་ཕྲེང་བའི་མངོན་པར་བརྗོད་པའང་ཟེར་རོ། །ཡང་། ཁྲུ་གང་སོར་ནི་བཅུ་གཉིས་པ། །དཀར་ཞིང་ཟླུམ་པ་ཞི་བ་ལ། །ཁྲུ་དོ་ཟབས་སུ་དེ་ཕྱེད་སེར། །དམར་པོ་ཟླ་བ་ཕྱེད་པ་དབང་། །གསོད་པ་བོར་ནི་ཉི་ཤུ་པ། །གྲུ་གསུམ་ས་གཞི་ནག་པོ་བྱ། །དྲི་ཞིམ་དཀར་སེར་དམར་པོ་དང་། །དུག་དང་ཁྲག་དང་དུར་སོལ་བྱུགས། །འཁོར་ལོ་རིན་ཆེན་པདྨ་དང་། །རྒྱ་གྲམ་རིམ་པ་བཞིན་དུ་བྲི། །ཞི་བ་རྒྱས་པ་དབང་དང་དྲག །ཤར་ལྷོ་ནུབ་དང་བྱང་དུ་བསད། །དགང་གཟར་དབྱིབས་དང་ཚད་ལྡན་པ། །གྲུ་བཞི་ཟླུམ་པོ་ཟླ་གམ་དང་། །ཟུར་གསུམ་རྣམས་སུ་ལྡན་པར་བྱ། །བླུགས་གཟར་རྡོ་རྗེ་ཕྱེད་པས་མཚན། ། ༈ ཚེས་གཅིག་ཞི་དང་བཅོ་ལྔ་རྒྱས། །བཅུ་བདུན་དབང་ལ་ཉི་ཤུ་དགུ། །དྲག་པོ་སྲོད་ཞི་སྔ་དྲོ་རྒྱས། །དགོང་དབང་ཉིན་མཚན་གུང་ལ་བསད། །དབྱར་དགུན་སྟོན་དཔྱིད་དུས་ཤེས་བྱ། །དཀར་པོ་རིན་ཆེན་དམར་ནག་གོས། །གཅེར་བུ་རབ་ཏུ་བྱ་བ་དང་། །དཀར་འཇམ་དམར་དང་རོ་རས་བཏིང་། །བྱམས་དང་སྙིང་རྗེ་བཏང་སྙོམས་དགའ། །ཉ་ཕྱིས་དུང་ཕོར་རིན་ཆེན་གསེར། །ཟངས་གཞོང་ཐོད་པ་ནང་དུ་བཤམས། །བྱང་ཆུབ་སེམས་སྒོམ་རྒྱལ་རིགས་དང་། །སྨད་འཚོང་གདོལ་པའི་མེ་སྦར་ཏེ། །ཞེས་དང་། ཀུན་གཞི་རྣམ་དག་ཧོམ་ཁུང་དུ། །ཉོན་མོངས་ལྔ་ཡི་ཡམ་ཤིང་ལ། །ཡེ་ཤེས་ལྔ་ཡི་མེ་སྦར་ན། །ཡེ་ཤེས་བསོད་ནམས་ཚོགས་རྫོགས་སོ། །བྷ་ག་ཡངས་པའི་ཐབ་ཁུང་དུ། །ཕུང་པོ་ལྔ་ཡི་བདག་ཉིད་ལ། །མར་དང་གཟར་བུའི་བྱ་ཐབས་ཀྱིས། །བསྙེན་པ་ཕུལ་བའི་ལས་བྱས་ན། །ནམ་ཡང་འདུ་འབྲལ་མེད་པ་ཡིས། །གསང་བའི་སྦྱིན་སྲེག་འགྲུབ་པ་ཡིན། །ཞེས་སོ། །རྔོག་མ་ལེབ་བརྒན་གྱི་རྒྱུད་ལས། ཡེ་ནས་སྣང་སྲིད་སྣོད་དང་བཅུད། །ལྟ་བའི་གཏོར་མ་ཆེན་པོར་གནས། །ཆོས་ཅན་མཚན་མར་སྣང་བ་ཀུན། །ཡེ་ནས་ཆོས་ཉིད་མཚན་མ་མེད། །ཆོས་ཅན་ཆོས་ཉིད་དབྱེར་མེད་པ། །རྣལ་འབྱོར་དབང་ཕྱུག་ཡི་དམ་ལྷ། །ལྟ་བ་འདི་ལ་གནས་པ་ཡི། །རྣལ་འབྱོར་དབང་ཕྱུག་ཆེན་པོ་རྣམས། །ཡེ་ནས་སྣང་སྲིད་སྣོད་དང་བཅུད། །ལྟ་བའི་གཏོར་མ་ཆེན་པོར་གནས། །ཞེས་དང་། མཚན་མ་རྫས་ཀྱི་གཏོར་མ་ཡང་། །ཕྱི་ནང་གསང་བ་དེ་ཁོ་ན། །ཞེས་དང་། །གཏོར་སྣོད་མནན་ལ་བྲོ་ཡིས་སྦྱངས། །ཞེས་དང་། ཕྱི་ཡི་རཀྟ་མཚལ་ལ་སོགས། །འབྱུང་བ་དམར་པོར་སྣང་བ་དང་། །ནང་གི་རཀྟ་སེམས་ཅན་ཀུན། །སྣ་ཚོགས་པ་ཡི་ཁྲག་རྣམས་སྦྱར། །གསང་བའི་རཀྟ་ཆེན་པོ་ནི། །འབྲས་བུ་ལྔ་བསྒྲལ་བུད་མེད་ཁྲག །དེ་ཁོ་ན་ཉིད་ཆོས་ཀྱི་དབྱིངས། །མཐར་འཛིན་ལྟ་ངན་བརླག་པར་མཛད། །དབང་ཆེན་བདེ་གཤེགས་སྤྱི་དྲིལ་པདྨ་གསང་བ་རྔོག་མ་ལེབ་བརྒན་གྱི་རྒྱུད་ཀྱི་ལེའུ་བཅུ་དྲུག་པ་ལས། སེམས་ཀྱི་རྣལ་འབྱོར་ཐོབ་པ་ཡི། །ཡན་ལག་ཅེས་སུ་བསྟན་པ་ཡང་། སོ་སོར་སྤོང་དང་བསམ་གཏན་དང་། །དབུགས་དགག་གཏོང་དང་གཟུང་བ་དང་། །རྗེས་སུ་དྲན་དང་ཏིང་འཛིན་ནི། །སྦྱོར་བ་ཡན་ལག་དྲུག་ཅེས་བྱ། །ཞེས་སོགས་ཤིན་ཏུ་ཞིབ་པ་དང་། ལེའུ་བཅུ་བཞི་པར་ས་ལམ་བགྲོད་ཚུལ་ལམ་འབྲས་དང་ལྷག་པར་མཐུན་པ་ཡོད། ། ༈ ཧེ་རུ་ཀ་གལྤོའི་རྒྱུད་ལས། མཐའ་དྲུག །སྒོ་བཞི། ལུང་དགུ། སྐབས་བཅོ་བརྒྱད། །དཀྱིལ་འཁོར་དགུ། ཡོ་བྱད་གཉིས། རྒྱ་མཚོ་བཞི། ལུང་ཆེན་དགོས་པ་བཞི། སྒྲུབ་ཆེན་བདུན། སྣང་བ་གསུམ་སོགས་བསྟན། ཤེས་རབ་དང་ནི་ཏིང་ངེ་འཛིན། རྣལ་འབྱོར་ཀུན་གྱི་ཡོ་བྱད་ཡིན། །ཞེས་སོ། །རྒྱུ་ནི་ཁམས་གསུམ་སེམས་ཅན་ལ། །ཉོན་མོངས་པ་ཡི་སྣང་བ་དང་། །ལམ་དུས་རྣལ་འབྱོར་པ་རྣམས་ལ། །ཉམས་ཀྱི་སྣང་བ་འཆར་བ་དང་། །འབྲས་བུ་བདེ་གཤེགས་སྐུ་གསུང་ཐུགས། །མི་ཟད་རྒྱན་གྱི་འཁོར་ལོར་སྣང་། །སྣང་བ་གསུམ་གྱི་བདག་ཉིད་དུ། །ཆོས་རྣམས་མ་ལུས་འདུས་པ་ཡིན། །ཞེས་དང་། འདིར་སྐུ་རྒྱུད་སངས་རྒྱས་མཉམ་སྦྱོར། གསུང་རྒྱུད་བདེ་མཆོག་འཁོར་ལོ། ཐུགས་ཀྱི་རྒྱུད་ཧེ་རུ་ཀ་གལྤོར་བསྟན་ཏོ། ། ༈

ཧེ་རུ་ཀ་འདུས་པ་ལས། ནུས་དང་ལྡན་པའི་ལྟས་ཐོབ་ནས། །རྣལ་འབྱོར་བདག་ཉིད་འཇུག་པར་བྱ། །ཞེས་དང་། སློབ་མ་དམ་ཚིག་ལྡན་པ་དེ། །ཞུགས་ནས་རང་གི་ཡེ་ཤེས་ཕབ། །ཆོ་ག་བཞིན་དུ་ནན་ཏན་བྱ། །དཀྱིལ་འཁོར་བཞི་ལ་རིམ་ཞུགས་ནས། །དབང་བཞི་རིམ་པ་བཞིན་དུ་སྦྱིན། །དེ་ནས་གང་ལ་གང་དགའ་བའི། །སྒྲུབ་པའི་གནས་ལ་སྦྱིན་པར་བྱ། །རང་རང་རྟོག་པ་ལས་བསྟན་པའི། །ཆོ་གའི་རིམ་པ་ལ་བརྟེན་ནས། །བརྩོན་འགྲུས་ཏིང་འཛིན་ལྡན་པ་ཡིས། །ཚེ་འདི་ཉིད་ལ་འགྲུབ་པར་འགྱུར། །ཞེས་དང་། ཧེ་ནི་དགྱེས་པ་ཆེན་པོ་སྟེ། །རུ་ནི་ཆགས་པ་བདེ་ཆེན་པོ། །ཀ་ནི་ཕྲིན་ལས་མཛད་པར་ཤར། །ལྟ་བ་མ་བཅོས་ཆོས་ཉིད་མཐོང་། །སྤྱོད་པ་བླང་དོར་དགག་སྒྲུབ་མེད། །ཅེས་དང་། གང་གིས་གང་ལ་གང་བསྐུར་བ། །རྒྱུད་དག་ནུས་པ་ཐོབ་ཕྱིར་དབང་། །ཞེས་དང་། སྟོང་པ་སྟོང་མིན་ཧེ་རུ་ཀཿ །བདེ་ཆེན་ཆོ་འཕྲུལ་སྣ་ཚོགས་གཟུགས། །ཞི་ལ་ཞི་དང་ཁྲོ་ལ་ཁྲོ། །ཆགས་ལ་ཆགས་དང་རྨོངས་ལ་རྨོངས། །ཞེས་དང་། མ་ལུས་མཁའ་ལྟར་ཁྱབ་པའི་སེམས། །རྟག་ཏུ་རང་གི་ངོ་བོས་སྟོང་། །མཐའ་དབུས་གཞི་རྩ་ལས་འདས་པ། །ཐབས་ཆེན་གསང་སྔགས་དང་བྲལ་བའི། །ཆེ་བའི་ཆེ་བ་ཟབ་མོ་འདི། །ལུང་དང་རིགས་པ་ལ་སོགས་པའི། །རྟོག་གེའི་སྤྱོད་ཡུལ་ནམ་ཡང་མེད། །ཅེས་དང་། ཧེ་ནི་བརྡལ་ཁྱབ་སྟོང་པའི་ངང་། །རུ་ནི་གཉིས་མེད་བདེ་བ་ཆེ། །ཀ་ནི་ཅིར་ཡང་རོལ་པ་ཉིད། །ཅེས་དང་། སྐུ་ནི་སྣང་བ་ཐམས་ཅད་དེ། །གསུང་ནི་བརྗོད་པ་ཀུན་ཉིད་དོ། །དྲན་རྟོག་ཐུགས་ལ་དབྱེར་མེད་པ། །མ་ལུས་སྐུ་གསུང་ཐུགས་སུ་རྫོགས། །ཆོས་རྣམས་མ་ལུས་སེམས་ཀྱི་རང་བཞིན་ཏེ། །དེ་ཉིད་རྟོག་ཅིང་སྤྱོད་པ་ལས་འདས་པ། །ཀུན་གྱི་ཡུལ་ལས་འདས་ཤིང་བརྗོད་དཀའ་བས། །གང་དུ་མ་མཐོང་མཚོན་པའི་ཡུལ་ལས་འདས། །ཞེས་དང་། མ་སྐྱེས་གྲངས་ལས་འདས་པའི་རང་བཞིན་ལ། །རྣམ་རྟོག་གྲངས་ལས་འདས་པའི་ཕྱག་རྒྱ་ཤར། །མཁའ་ལ་གཟའ་སྐར་ཆུ་ཡི་ཆུ་བུར་ལྟར། །ཇི་ལྟར་སྣང་ཡང་སྐྱེ་བ་མེད་པར་གཅིག །ཅེས་དང་། སྐུ་གསུང་ཐུགས་ཀྱི་མཚན་མ་ཇི་སྙེད་པ། །སེམས་ཅན་མོས་པའི་ཁྱད་པར་སྣང་བ་ཡིས། །ནུས་མཐུ་བྱིན་རླབས་སོ་སོར་སྣང་བ་ཡང་། །མ་སྐྱེས་སེམས་གྱི་ངང་ལས་གཞན་མ་མཐོང་། །ཞེས་དང་། གང་གིས་གང་ལ་ངེས་པའི་དོན་གསལ་ནས། །དམ་པ་ཡིན་པའི་རྟགས་ནི་གསལ་བར་འབྱུང་། །ཞེན་པ་ཆུང་དང་ཐ་མལ་ལས་རྒྱུན་ཆད། །གཟུངས་མ་རིགས་ཅན་འདུ་ཞིང་བྱིན་རླབས་ཆེ། །ལས་དང་བསམ་པ་འགྲུབ་ཅིང་བླང་དོར་མེད། །ཏིང་འཛིན་ཆུ་བོའི་རྒྱུན་གྱིས་ཀླུང་དུ་འཇུག །བསྔགས་པ་ཐོབ་ཅིང་རྩོད་པའི་འཇིགས་དང་བྲལ། །འདུ་ཤེས་མཚན་མ་དག་ཅིང་བྱ་བ་ཉུང་། །རང་བཞིན་དལ་ཞིང་འདུ་བྱེད་མཚན་མ་ཕྲ། །གང་ཞིག་དམ་པའི་དོན་དེ་རྟོགས་ཕྱིར་འཆད། །རྒྱལ་བའི་སྲས་པོ་རིག་པ་འཛིན་པ་སྟེ། །འཁོར་བའི་འཇིགས་བྲལ་མྱ་ངན་འདས་སྨོན་མེད། །ཅེས་དང་། མ་བཅོས་མི་གནས་དམིགས་དང་བྲལ། །བསམ་དཔྱོད་ཡིད་འཛིན་རྟོག་ལས་འདས། །ཅིར་ཡང་འདུ་ཤེས་མི་འཇུག་པ། །དེ་བཞིན་ཉིད་ཀྱི་ཏིང་འཛིན་བསྒོམ། །སྟོང་ཉིད་ཡེ་ཤེས་རང་གསལ་བའི། །ཕྱོགས་མེད་ནམ་མཁའི་རང་བཞིན་ལྟར། །སྙིང་རྗེ་ཆེན་པོས་ཁྱབ་པ་ལ། །ཀུན་ཏུ་སྣང་བ་བསྒོམ་པར་བྱ། །གཉིས་མེད་རིག་པ་རང་སྣང་བའི། །མ་ལུས་སྐྱེ་རྒྱུ་ཧཱུྃ་བསྒོམ་བྱ། །ཞེས་སོ། །ཨོཾ་ནི་རྒྱལ་བ་ཡབ་ཡུམ་བཅུ། །རུ་ལུ་གོང་མ་ཁྲོ་མོ་བརྒྱད། །རུ་ལུ་འོག་མ་ཕྲ་མེན་བརྒྱད། །ཧཱུྃ་ནི་ཕྱག་རྒྱ་སྒོ་མ་བཞི། །བྷྱོ་ནི་བྲན་མོ་ཉི་ཤུ་བརྒྱད། །ཧཱུྃ་ནི་བྱང་ཆུབ་སེམས་ཀྱི་ངང་། །འབར་བའི་དཀྱིལ་འཁོར་མ་ལུས་པའི། །བཟླས་པ་མཆོག་ནི་འདི་ལས་མེད། །རྒྱུད་ཕྱི་མ་ལས། ཨ་ཏི་པཱུ་ཧོཿཕྱག་གི་བརྡ། །པྲ་ཏིཙྪ་ཧོ་ལན་གྱི་བརྡ། །ཞེས་དང་། ཧོ་ནི་མཆོད་པ་སྟོབ་པའི་བརྡ། །ཞེས་དང་། པཱུ་ཛ་ཧོ་ནི་མཆོད་པ་སྟོབ། །ཅེས་དང་། ཕཊ་ཕཊ་སྤྲོ་བར་བསྟན་པ་སྟེ། །ཧཱུྃ་ཧཱུྃ་ཞེས་པ་བསྡུ་བའི་བརྡ། །ཞེས་དང་། ཁཱ་ཧི་གསོལ་ཅིག་ཅེས་པའི་བརྡ། །ཞེས་སོ། །མཚན་མ་བརྟན་པོ་བྱུང་བ་ན། །འཇིགས་དང་དགའ་བྲོད་ཀུན་སྤོངས་ཏེ། །གླུ་དང་གར་དང་རོལ་མོ་དང་། །གཡབ་མོ་གདུང་བའི་དབྱངས་དང་བཅས། །བཤགས་དང་མཆོད་ཅིང་བསྐུལ་བ་སྟེ། །དངོས་གྲུབ་འདོད་པར་གསོལ་གདབ་ཅིང་། །དམ་ཚིག་ཏིང་འཛིན་དྲག་བསྐུལ་བ། །ཐ་མའི་དུས་སུ་ཤེས་བྱ་སྟེ། །རྫས་ནི་སྐུ་ཡི་དངོས་གྲུབ་སྟེ། །རུ་ལུ་འོད་བཅས་གསུང་གི་དོན། །དཔལ་བེའུ་སེམས་དཔའ་ཐུགས་ཀྱི་མཆོག །ཁ་ཟས་ལོངས་སྤྱོད་བདུད་རྩི་ཆེ། །ཞེས་སོ། །འཇིག་རྟེན་ལས་འདས་པའི་མདོ་ཞེས་པར་གནས་ལུང་དགོངས་པ་རང་གྲོལ་དང་མཐུན་པར་ཡོད། བམ་བརྒྱད་ལས། ནམ་མཁའི་མཚན་ཉིད་སངས་རྒྱས་ཏེ། །མཚན་ཉིད་མེད་པས་ནམ་མཁའ་འདྲའོ། །བྱ་བ་མེད་པས་གྲོལ་བ་སྟེ། །བདུད་རྩི་མཆོག་ལ་ཕྱག་འཚལ་ལོ། །ཞེས་བཤད་པར་སྣང་ངོ་། །ཤྲཱི་པཪྤ་ཏར་བྲིས་པའོ།། །། ༈

[edit]

rdzogs chen sde gsum dang 'brel ba'i zin bris sogs/_ rje bla ma'i dka' gnad ston pa'i zin bris gzhung don sgo brgya 'byed pa'i lde'u mig pad+ma'i chun po zab gter bdun cu rtsa bdun pa las khol btus/__skabs dang po las/__gang zag gcig gi rgyud la sdom pa gsum ldan du bsrung ba rnam pa drug ste/__de yang rang ldog ma 'dres pa ni/__sdom pa gsum po de gang las blang ba'i yul dang /__bsam pa dang /__cho ga tha dad pa'i sgo nas ji srid blang ba'i dus kyang so sor nges pas na/__kun slong byang chub sems kyi ldog pa dang /__sdom pa'i ldog pa gnyis yod pa las/__snga ma tshe 'phos pa'i dbang gis mi btang ste/__de byang sems kyi sdom pa'i gtong rgyu ma yin pa'i phyir ro/__/phyi ma sdom pa khas blangs pa'i ldog cha ni tshe 'phos pa'i dbang gis gtong ste/__dge slong ni sdom pa de ji srid 'tsho'i mtha' can gyi sdom pa yin pa'i phyir ro/__/dgag dgos yongs rdzogs ni/__de yang mi tshangs pa spyod pa lta bu thabs mkhas brtul zhugs kyis spyad na nyes pas mi gos par ma zad par tshogs gnyis rdzogs pa'i rgyur 'gro ba ste/__dper na dug spong ba dang /__sman gyi sbyor ba dang /__sngags btab ste za ba gsum ka mi 'chi ba'i rgyur mtshungs pas dgos pa 'grub pa bzhin no/__/ngo bo gnas 'gyur ni/__dper na zangs rdo bzhus pas zangs dang /__de la gser 'gyur gyi rtsis btab pas gser du 'gyur ba bzhin/__nyan thos ltar dman sems kyis blangs pa'i so thar gyi sdom pa de yang byang chub sems dpa'i sdom pas zin na dman sems btang yang /__rang gi ngo bo gzhan gnod gzhir bcas spong ba'i sdom pa'i tshul khrims su gnas 'gyur la/__de gnyis dbang thob na mnyam pa chen po'i thabs kyis zin pas tha mal gyi snang zhen ldog pa cha re yod pa de gtong nas/__so thar gyis gzhan gnod gzhir bcas spong ba dang /__byang sdom gyis gzhan la phan 'dogs pa'i ldog cha gnyis po de rdzas gong 'phel gyi tshul gyis mnyam pa chen po'i thabs khyad par can gyis zin pa'i sngags kyi nyes spyod sdom pa dang /__rigs lnga spyi'i rnam snang gi dam tshig tu gnas 'gyur ba yin no/__/yon tan yar ldan pa ni/__sngags sdom ma nyams par thub na/__'og ma gnyis zhar la thub pas logs su bsrung mi dgos pa'o/__/sdom gsum gnad kyis mi 'gal ba ni/__lta ba 'khor gsum mi rtog pa'i shes rab dang /__byed pa sdom pa'i thabs mkhas kyis zin pa'i sgo nas spyod na 'gal ba med do/__/gsang snying la/__sbyor sgrol bya ba sogs=__dus skabs kyi gtso bor gang 'gyur spyad pa ni/__gsang 'dus las/__phyi ru nyan thos spyod pa spyad/__/nang du 'dus pa'i don la dga'/__/zhes gsungs pa lta bu'o/__/de yang sor sdom ni ngo bo gzhan gnod gzhir bcas pa/__byang sems ni de'i steng du gzhan la phan 'dogs pa'i cha dang /__sngags sdom ni chos nyid mnyam pa chen po'i thabs kyis zin pa'i thabs kyi cha de gsum 'jog pa yin la/___/__!_ gzugs phung la rags phra shin tu phra ba gsum las/_dang po ni gzugs phung dang rnam smin gyi rten don gcig__/phra ba ni bar dor 'char 'gyur gyi lus dang rnam smin gyi lus/__shin tu phra ba ni gzugs phung phra rags thams cad kyi 'char gzhi gnyug ma'i lus de'o/___/__!_ snang mched thob pa nyer thob bzhis 'od gsal du 'jug pa la/__rim bzhin stong pa/__shin tu stong pa/__ches stong pas stong chen gsum/__snang ba gsum 'gags pas thams cad stong pa 'od gsal zhes sbyar ro//___//__!_ ma mo srid pa'i rgyud lung zla gsang thig ler/__ma mo thams cad chags pa che/__/a b+hi She ka tsa ri las/__/lus kyi rtsa rnams bum pas te/__/sngags ni gsang ba zhes su bshad/__/khams kyi bdud rtsi shes rab shes/__/snying po g.yo byed bde ba che/__/bum pas sa drug rdzogs pa la/__/sa bzhi gsang ba'i dbang shes bya/__/shes rab ye shes sa gnyis spyod/__/bde chen sa lam gcig car bgrod/__/dang po bskyed pa'i rim pa la/__/gnyis pa bdag nyid byin gyis brlabs/__/gsum par las kyi 'khor lo ste/__/bzhi par rdo rje'i rba rlabs bstan/__/dang po sprul sku'i zhing khams dbang /__/gnyis pa longs sku'i zhing khams la/__/gsum pa de bzhin chos sku las/__/bzhi par ngo bo nyid sku thob/__/dang po lus kyi dkyil 'khor te/__/gnyis pa b+ha ga'i dkyil 'khor yin/__/gsum pa byang chub bdud kyi sems/__/bzhi pa dus gsum bde gshegs bcud/__/dang po 'khor 'das dbyer med yin/__/gnyis par ma 'dres yongs su rdzogs/__/gsum bzhir bde stong chung dang che/__/zhes dang /__rdo rje lus kyi drwa ba las/__sprul pa'i sku 'byung ngo mtshar che/__/de nas sngags kyi yi ge ni/__/longs spyod rdzogs pa rmad byung chos/__/sems can lus bcud khams kyi bde/__/de nyid mi rtog chos skur gnas/__/yang gsal rang bzhin snying po med/__/de ni ngo bo nyid du dag__/ces dang /__nyon mongs stong phrag brgyad cu yang /__/gnyen po chos kyi sgo bo spro/__/chos dang gang zag bdag nyid kyang /__/de la sde snod gsum du spro/___/nyon mongs lnga la zhen pa yang /__/nyon mongs lam slong gsang sngags spro/__/mos pa chung ngu'i don ched du/__/sbyangs pa'i yon tan bcu gnyis dang /__/gang zag chos la bdag lta zhing /_/rtsa ba yan lag tshul khrims bsrung /__/lus dag yid gsum dge bcu spyod/__/bden pa bzhi yi don bsgrubs nas/__/'bras bu rnam gnyis grub par 'dod/__/dmigs dbye'ang phra ba 'dul don du/__/'brel cing 'byung ba rten 'brel skor/__/gang zag chos la phyogs gcig rtogs/__/rang goms shugs kyis dka' thub bsrung /__/rdzu 'phrul spyi yis 'gro don spyod/__/dge bshes mi ltos sngon goms bsgrubs/__/ne tso bse ru lta bur gnas/__/zab cing rgya chen 'dul ba ni/__/bden pa gnyis kyi sgor zhugs nas/__/gang zag chos la bdag med cing /__/byang chub sems ldan bslab pa bsrung /__/tshad med bsdu ba'i dngos po spyod/__/pha rol phyin bcu bsgrub par ldan/__/sa bcu bgrod nas sangs rgyas gnas/__/byed spyod 'dul ba'i don ched du/__/goms gyur sgom lugs byin rlabs skor/__/don rtogs byin rlabs rje khol tshul/__/rang gi rtsa ba yan lag bsrung /__/phrin las khrus dang gtsang sbra spyod/__/dag pa gsum dang ldan par bsgrub/__/rigs gsum mgon po'i sa la 'gro/__/mnyam pas 'dul ba'i don ched du/__/'jug pa'i sgo tshul spyod pa ni/__/bya ba'i rgyud dang mthun par byed/__/lta ba sgrub thabs 'bras bu ni/__/rnal 'byor rgyud kyi rjes su bsgrubs/__/gnyi ga rgyud ces grags par bshad/__/rigs bzhi rdo rje 'chang sar gnas/__/zab mos 'dul ba'i don ched du/__/mngon par byang chub lnga yi sgor/__/don rtogs kun rdzob grogs por blta/__/spyi dang khyad par dam tshig bsrung /__/phrin las bzhi la ting nges spyod/__/phyag rgya bzhi dang ldan par bsgrub/__/rigs lnga'i sangs rgyas 'grub par 'dod/__/tshogs kyi sgrub pas 'dul don du/__/ting 'dzin rnam gsum sgor zhugs nas/__/dbyer med skye 'gag med par blta/__/rtsa ba lnga sogs yan lag bcas/__/sgrol dang sbyor la rab tu brtson/__/thabs shes gnyis med sgrub pa bzhi/__/yi ge'i 'khor lo tshogs chen po/__/mnyam pa'i spyod pas 'dul don du/__/yongs rdzogs ting 'dzin sgor zhugs nas/__/dbyings dang ye shes yab lngas blta/__/spyi dang khyad par lhag pa bsrung /__/mtshan mar spyod med snod bcud spel/__/ma skyes rdzogs pa'i tshul du bsgrub/__/pad+ma can gyi sa la 'gro/__/zhes so/__/chags pas chags pa grol byed pa/__/lus kyi g.yas g.yon dbus gnas pa/__/gzung 'dzin med pa'i dngos po ste/__/'dod chags zhe sdang gti mug dang /__/rlung dang mkhris pa bad kan dang /__/nyin mo mtshan mo mtshams kyi cha/__/'dod gzugs med pa'i khams gsum dang /__/rgyu lam 'bras bu'i rnal 'byor gsum/__/sangs rgyas chos dang dge 'dun dang /__/stong nyid ye shes rdo rje kun/__/pha las byung ba'i ga bur pho/__/ma las byung ba'i sih+la mo/__/rang gi sked pa chang du bshad/__/srog gi rnam pa 'di gsum du/__/'khor dang mya ngan 'das pa 'grub/__/bcu tshan gnyis dang de steng gsum/__/rgyus 'tsho klad pa de na yod/__/brgyad gnyis pas ni skad rnams 'byung /__/de la zas kyi longs spyod gsol/__/bzhi gnyis rang gi snying yin te/__/de la 'khor 'das chos gnas so/__/bcu tshan drug dang de steng bzhi/__/ma sde bu sde 'dres par sprul/__/me dang rlung gi gnas ni 'og__/de yang gru gsum 'od ma'i gzhu/__/g.yas kyi nyi ma dmar zhing dwangs/__/g.yon gyi zla ba dkar la gsal/__/dbus kyi ka ba brtan pa ni/__/pad+ma'i snal ma lta bur phra/__/chu shing snying po 'dra bar drang /__/til gyi mar me lta bur gsal/__/rgya skyegs me tog ji bzhin dmar/__/zhes dang /__lus kyi khol bu phal cher ram/__/thams cad snang dngos bde ba phyi/__/nang gnas spyi mgrin snying lte gsang /__/bdag yum gzung 'dzin rtog gsum 'gog__/de phyir spang bya bral ba yin/__/bde ba chung che mi rtog dang /__/bde stong de yang lhan cig skyes/__/skra dkar bral dang stobs rdzogs gsal/__/mtshan dpe tshang zhing 'chi med pas/__/yid bzhin sprin gyi bdag po ste/__/tshe yi rig 'dzin thob pa'o/__/zhes bshad/__klong chen rab 'byams rgyal po'i rgyud las/__phyogs ris kun dang bral ba la/__/mtha' dang dbus su mi dmigs te/__/sgro dang skur pa med pa'i phyir/__/blang dang dor ba yang ni med/__/rgyu 'bras kun las 'das pa'i phyir/__/ye nas rkyen gyis skyed du med/__/rgyu rkyen bral ba'i chos nyid la/__/mu stegs lta ba mdud pa can/__/rtag chad gnyis kyi ngan spyod kyis/__/mtha' bral lta ba ma rtogs te/__/gnyis su zhen pa phyogs ris bdud/__/a ti yo ga'i lta ba ni/__/chos nyid rgya chad med pa la/__/gnyis ka gang shar rang grol bas/__/mu stegs ma spangs rdzogs chen rgyan/__/nyan thos lta ba mdud pa can/__/yul sems 'brel med skad cig blta/__/yod med mnyam pa'i chos nyid la/__/med par 'dod pa phyogs 'dzin bdud/__/a ti yo ga'i chos nyid la/__/gnyis ka gang shar rang grol bas/__/nyan thos ma spangs rdzogs chen rgyan/__/rang rgyal lta ba mdud pa can/__/yul stong gcig la shes pa gtad/__/rten 'brel bcu gnyis 'byung ldog byed/__/'byung 'jug mnyam pa'i chos nyid la/__/yod par 'dod pa phyogs 'dzin bdud/__/a ti mnyam pa'i chos nyid la/__/gnyis ka gang shar rang grol bas/__/rang rgyal ma spangs rdzogs chen rgyan/__/sems tsam lta ba mdud pa can/__/rang gsal gzung 'dzin dag pa la/__/rang sgo bde bar lta ba ste/__/shel sgong dag pa'i tshul shes pas/__/bdag med gnyis 'dod phyogs 'dzin bdud/__/gang yang 'dra ba'i chos nyid la/__/gnyis ka gang shar rang grol bas/__/sems tsam ma spangs rdzogs chen rgyan/__/dbu ma'i lta ba mdud pa can/__/rig pa kun rdzob spros bcad nas/__/don dam spros med ngang la mjal/__/bden gnyis don la yid ches blta/__/gnyis med mnyam pa'i chos nyid la/__/gnyis su lta ba phyogs 'dzin bdud/__/gnyis su med pa'i chos nyid la/__/gnyis ka gang shar rang grol bas/__/dbu ma ma spangs rdzogs chen rgyan/__/kr-i ya'i lta ba mdud pa can/__/kun rdzob snang ba rigs gsum la/__/don dam dag pa'i mtha' dang bral/__/rje khol tshul du lta bar byed/__/bzang ngan mnyam pa'i chos nyid la/__/gnyis su 'dzin pa phyogs 'dzin bdud/__/chos nyid mnyam pa'i don 'di la/__/gnyis ka gang shar rang grol bas/__/kr-i ya ma spangs rdzogs chen rgyan/__/u pa'i lta ba mdud pa can/__/lta spyod gong 'og rjes su 'breng /__/gcig la zhen cing gcig la spyod/__/gnyis 'dzin kha drag phyogs 'dzin bdud/__/gnyis ka'i tshul du lta byed pa/__/gong 'og mnyam pa'i chos nyid la/__/gnyis ka rang shar rang grol bas/__/u pa ma spangs rdzogs chen rgyan/__/yo ga'i lta ba mdud pa can/__/don dam snang la rang bzhin med/__/kun rdzob dag pa'i byin rlabs blta/__/mtshan med mnyam pa'i chos nyid la/__/ltar snang phyogs su 'dzin pa'i bdud/__/sang sang 'dra ba'i chos nyid la/__/gnyis ka gang shar rang grol bas/__/yo ga ma spangs rdzogs chen rgyan/__/ma hA'i lta ba mdud pa can/__/thabs dang shes rab skor zhugs nas/__/bden pa dbyer med spyod yul bral/__/chos nyid mnyam pa'i don 'di la/__/spyod yul bral ba phyogs 'dzin bdud/__/gnyis ka gang shar rang grol bas/__/ma hA ma spangs rdzogs chen rgyan/__/a nu'i lta ba mdud pa can/__/dbyings dang ye shes sgor zhugs nas/__/kun tu bzang po bzang mo gnyis/__/gnyis su med pa'i bde chen lha/__/yod kyang mnyam pa'i chos nyid la/__/gnyis med phyogs su lhung ba'i bdud/__/rgya chad med pa'i chos nyid la/__/gnyis ka gang shar rang grol bas/__/a nu ma spangs rdzogs chen rgyan/__/bya bral ngang du kun rdzogs pas/__/ma spangs rang sar grol ba'i klong /__/sangs rgyas sku dang sems can lus/__/ji ltar snang ba rdzogs chen rgyan/__/zhes so//___//__! rta mgrin dgongs pa lung ston pa'am/__dbang chen 'dus pa'i rgyud las/__/chos dang gang zag bdag tu 'dzin/__/rdul phran phra ba nyan thos can/__/phyi nang rten cing 'brel 'byung dang /__/lugs 'byung de ldog rang sangs rgyas/__/don dam blo yi ngang stong zhing /__/kun rdzob sgyu mar snang ba des/__/dbye gzhi la sogs rnam pa yis/__/byang chub sems dpa' phal chen te/__/dag pa ye shes chos nyid du/__/rigs gsum mgon la spyod pa blta/__/'og spyod gong ma blta ba yi/__/u pa ya zhes de ltar snang /__/rnam par snang mdzad chen po yis/__/rdo rje dbyings kyi rnal 'byor lha/__/longs spyod rdzogs pa'i sku dag la/__/bden pa dbyer med ma hA yin/__/rtsol bral dbyer med shin tu rdzogs/__/'di ni sprul pa dam pa yis/__/dbyings dang ye shes gnyis su med/__/'og tu gyur dang steng na spyod/__/mtho dman theg pa'i gtan tshigs ni/__/khyad par che la gcig pa'i tshul/__/kun btags 'khor ba'i rang bzhin ni/__/gzhan dbang de bzhin gshegs pa ste/__/yongs su grub pa chos kyi sku/__/rgyu 'dun 'dod pas 'bras bu 'phags/__/rang sems mngon sum lha skur 'bebs/__/rjes kyi shes pa lha skur btags/__/rdzogs pa a nu yo ga yin/__/zhes dang /__klu dang rus sbal gtsang ba dang /__/lhas byin dang ni gzhu las rgyal/__/ces dang /__yul sems rab tu rtogs gyur na/__/gang bltas ka dag__/pad+ma dbang gi lha/__/ji ltar spyod kyang skyon med pas/__/dbang chen zhes ni de la bya/__/zhes dang /__gang zag nye lam bsgrub 'dod pas/__/gnas khang shin tu mun nag par/__/rdo rje gtsug tor lhun grub lta stangs kyis/__/nges pa kho na grub pa ste/__/zhes dang /__dmigs pa phra ba'i rig pas ni/__/gtso bo'i bsnyen pa 'bum du bya/__/'khor rnams la ni khri yin te/__/dge slong rdo rje 'dzin pas bya/__/zhes dang /__rdo rjes snod dang ldan pa rnams/__/dag chus sems kyi dri ma bkru/__/gos gtsang gon la gtsang khang 'jug__/ras kyi yol bas bcad par bya/__/zhes dang /__skud dang legs pa tshad ldan pa/__/gsang de'i rdo rje mdud pas gsum/__/me tog gtor zhing dpung g.yon bcing /__/zhes dang /__so shing bzang po'i phur bu de/__/byin rlabs lag gtad slob mas dor/__/zhes dang /__phyogs bltas dUrba'i sngags gdan la/__/nyal nas ji ltar mthong ba smra/__/gong de'i rnam pa bla mas bshad/__/gos bzang bgos pa'i shiSh+ya yis/__/thal sbyar 'jug par gsol ba gdab/__/ces dang /__dgos pa'i longs spyod tshang ba ni/__/'byor ldan yo byad tshogs yin te/__/zhes sogs gsungs/__'di la dpal rdo rje phreng ba'i mngon par brjod pa'ang zer ro/__/yang /__khru gang sor ni bcu gnyis pa/__/dkar zhing zlum pa zhi ba la/__/khru do zabs su de phyed ser/__/dmar po zla ba phyed pa dbang /__/gsod pa bor ni nyi shu pa/__/gru gsum sa gzhi nag po bya/__/dri zhim dkar ser dmar po dang /__/dug dang khrag dang dur sol byugs/_/'khor lo rin chen pad+ma dang /__/rgya gram rim pa bzhin du bri/__/zhi ba rgyas pa dbang dang drag__/shar lho nub dang byang du bsad/__/dgang gzar dbyibs dang tshad ldan pa/__/gru bzhi zlum po zla gam dang /__/zur gsum rnams su ldan par bya/__/blugs gzar rdo rje phyed pas mtshan/___/__! tshes gcig zhi dang bco lnga rgyas/__/bcu bdun dbang la nyi shu dgu/__/drag po srod zhi snga dro rgyas/__/dgong dbang nyin mtshan gung la bsad/__/dbyar dgun ston dpyid dus shes bya/__/dkar po rin chen dmar nag gos/__/gcer bu rab tu bya ba dang /_/dkar 'jam dmar dang ro ras bting /__/byams dang snying rje btang snyoms dga'/__/nya phyis dung phor rin chen gser/__/zangs gzhong thod pa nang du bshams/__/byang chub sems sgom rgyal rigs dang /__/smad 'tshong gdol pa'i me sbar te/__/zhes dang /__kun gzhi rnam dag hom khung du/__/nyon mongs lnga yi yam shing la/__/ye shes lnga yi me sbar na/__/ye shes bsod nams tshogs rdzogs so/__/b+ha ga yangs pa'i thab khung du/__/phung po lnga yi bdag nyid la/__/mar dang gzar bu'i bya thabs kyis/__/bsnyen pa phul ba'i las byas na/__/nam yang 'du 'bral med pa yis/__/gsang ba'i sbyin sreg 'grub pa yin/__/zhes so/__/rngog ma leb brgan gyi rgyud las/__ye nas snang srid snod dang bcud/_/lta ba'i gtor ma chen por gnas/__/chos can mtshan mar snang ba kun/__/ye nas chos nyid mtshan ma med/__/chos can chos nyid dbyer med pa/__/rnal 'byor dbang phyug yi dam lha/__/lta ba 'di la gnas pa yi/__/rnal 'byor dbang phyug chen po rnams/__/ye nas snang srid snod dang bcud/__/lta ba'i gtor ma chen por gnas/__/zhes dang /__mtshan ma rdzas kyi gtor ma yang /__/phyi nang gsang ba de kho na/__/zhes dang /__/gtor snod mnan la bro yis sbyangs/__/zhes dang /__phyi yi rak+ta mtshal la sogs/__/'byung ba dmar por snang ba dang /__/nang gi rak+ta sems can kun/__/sna tshogs pa yi khrag rnams sbyar/__/gsang ba'i rak+ta chen po ni/__/'bras bu lnga bsgral bud med khrag__/de kho na nyid chos kyi dbyings/__/mthar 'dzin lta ngan brlag par mdzad/__/dbang chen bde gshegs spyi dril pad+ma gsang ba rngog ma leb brgan gyi rgyud kyi le'u bcu drug pa las/__sems kyi rnal 'byor thob pa yi/__/yan lag ces su bstan pa yang /__so sor spong dang bsam gtan dang /__/dbugs dgag gtong dang gzung ba dang /__/rjes su dran dang ting 'dzin ni/__/sbyor ba yan lag drug ces bya/__/zhes sogs shin tu zhib pa dang /__le'u bcu bzhi par sa lam bgrod tshul lam 'bras dang lhag par mthun pa yod/___/__!_ he ru ka galpo'i rgyud las/__mtha' drug__/sgo bzhi/__lung dgu/__skabs bco brgyad/__/dkyil 'khor dgu/__yo byad gnyis/__rgya mtsho bzhi/__lung chen dgos pa bzhi/__sgrub chen bdun/__snang ba gsum sogs bstan/__shes rab dang ni ting nge 'dzin/__rnal 'byor kun gyi yo byad yin/__/zhes so/__/rgyu ni khams gsum sems can la/__/nyon mongs pa yi snang ba dang /__/lam dus rnal 'byor pa rnams la/__/nyams kyi snang ba 'char ba dang /__/'bras bu bde gshegs sku gsung thugs/__/mi zad rgyan gyi 'khor lor snang /__/snang ba gsum gyi bdag nyid du/__/chos rnams ma lus 'dus pa yin/__/zhes dang /__'dir sku rgyud sangs rgyas mnyam sbyor/__gsung rgyud bde mchog 'khor lo/__thugs kyi rgyud he ru ka galpor bstan to/___/__!_ he ru ka 'dus pa las/__nus dang ldan pa'i ltas thob nas/__/rnal 'byor bdag nyid 'jug par bya/__/zhes dang /__slob ma dam tshig ldan pa de/__/zhugs nas rang gi ye shes phab/__/cho ga bzhin du nan tan bya/__/dkyil 'khor bzhi la rim zhugs nas/__/dbang bzhi rim pa bzhin du sbyin/__/de nas gang la gang dga' ba'i/__/sgrub pa'i gnas la sbyin par bya/__/rang rang rtog pa las bstan pa'i/__/cho ga'i rim pa la brten nas/__/brtson 'grus ting 'dzin ldan pa yis/__/tshe 'di nyid la 'grub par 'gyur/__/zhes dang /__he ni dgyes pa chen po ste/__/ru ni chags pa bde chen po/__/ka ni phrin las mdzad par shar/__/lta ba ma bcos chos nyid mthong /__/spyod pa blang dor dgag sgrub med/__/ces dang /__gang gis gang la gang bskur ba/__/rgyud dag nus pa thob phyir dbang /__/zhes dang /__stong pa stong min he ru kaH__/bde chen cho 'phrul sna tshogs gzugs/__/zhi la zhi dang khro la khro/__/chags la chags dang rmongs la rmongs/__/zhes dang /__ma lus mkha' ltar khyab pa'i sems/__/rtag tu rang gi ngo bos stong /__/mtha' dbus gzhi rtsa las 'das pa/__/thabs chen gsang sngags dang bral ba'i/__/che ba'i che ba zab mo 'di/__/lung dang rigs pa la sogs pa'i/_/rtog ge'i spyod yul nam yang med/__/ces dang /__he ni brdal khyab stong pa'i ngang /_/ru ni gnyis med bde ba che/__/ka ni cir yang rol pa nyid/__/ces dang /__sku ni snang ba thams cad de/__/gsung ni brjod pa kun nyid do/__/dran rtog thugs la dbyer med pa/_/ma lus sku gsung thugs su rdzogs/__/chos rnams ma lus sems kyi rang bzhin te/_/de nyid rtog cing spyod pa las 'das pa/__/kun gyi yul las 'das shing brjod dka' bas/_/gang du ma mthong mtshon pa'i yul las 'das/__/zhes dang /__ma skyes grangs las 'das pa'i rang bzhin la/__/rnam rtog grangs las 'das pa'i phyag rgya shar/__/mkha' la gza' skar chu yi chu bur ltar/__/ji ltar snang yang skye ba med par gcig__/ces dang /__sku gsung thugs kyi mtshan ma ji snyed pa/__/sems can mos pa'i khyad par snang ba yis/_/nus mthu byin rlabs so sor snang ba yang /__/ma skyes sems gyi ngang las gzhan ma mthong /__/zhes dang /__gang gis gang la nges pa'i don gsal nas/__/dam pa yin pa'i rtags ni gsal bar 'byung /__/zhen pa chung dang tha mal las rgyun chad/__/gzungs ma rigs can 'du zhing byin rlabs che/__/las dang bsam pa 'grub cing blang dor med/__/ting 'dzin chu bo'i rgyun gyis klung du 'jug__/bsngags pa thob cing rtsod pa'i 'jigs dang bral/__/'du shes mtshan ma dag cing bya ba nyung /__/rang bzhin dal zhing 'du byed mtshan ma phra/__/gang zhig dam pa'i don de rtogs phyir 'chad/__/rgyal ba'i sras po rig pa 'dzin pa ste/__/'khor ba'i 'jigs bral mya ngan 'das smon med/__/ces dang /__ma bcos mi gnas dmigs dang bral/__/bsam dpyod yid 'dzin rtog las 'das/__/cir yang 'du shes mi 'jug pa/__/de bzhin nyid kyi ting 'dzin bsgom/__/stong nyid ye shes rang gsal ba'i/__/phyogs med nam mkha'i rang bzhin ltar/__/snying rje chen pos khyab pa la/__/kun tu snang ba bsgom par bya/__/gnyis med rig pa rang snang ba'i/__/ma lus skye rgyu hU~M bsgom bya/__/zhes so/__/oM ni rgyal ba yab yum bcu/__/ru lu gong ma khro mo brgyad/__/ru lu 'og ma phra men brgyad/__/hU~M ni phyag rgya sgo ma bzhi/__/b+h+yo ni bran mo nyi shu brgyad/__/hU~M ni byang chub sems kyi ngang /__/'bar ba'i dkyil 'khor ma lus pa'i/__/bzlas pa mchog ni 'di las med/__/rgyud phyi ma las/__a ti pU hoHphyag gi brda/__/pra tits+tsha ho lan gyi brda/__/zhes dang /__ho ni mchod pa stob pa'i brda/__/zhes dang /__pU dza ho ni mchod pa stob/__/ces dang /__phaT phaT spro bar bstan pa ste/__/hU~M hU~M zhes pa bsdu ba'i brda/__/zhes dang /__khA hi gsol cig ces pa'i brda/__/zhes so/__/mtshan ma brtan po byung ba na/__/'jigs dang dga' brod kun spongs te/__/glu dang gar dang rol mo dang /__/g.yab mo gdung ba'i dbyangs dang bcas/__/bshags dang mchod cing bskul ba ste/__/dngos grub 'dod par gsol gdab cing /__/dam tshig ting 'dzin drag bskul ba/__/tha ma'i dus su shes bya ste/__/rdzas ni sku yi dngos grub ste/__/ru lu 'od bcas gsung gi don/__/dpal be'u sems dpa' thugs kyi mchog__/kha zas longs spyod bdud rtsi che/__/zhes so/__/'jig rten las 'das pa'i mdo zhes par gnas lung dgongs pa rang grol dang mthun par yod/__bam brgyad las/__nam mkha'i mtshan nyid sangs rgyas te/__/mtshan nyid med pas nam mkha' 'dra'o/__/bya ba med pas grol ba ste/__/bdud rtsi mchog la phyag 'tshal lo/__/zhes bshad par snang ngo /__/shrI paR+pa tar bris pa'o//___//__!_