JKW-KABUM-07-JA-015-016

🚧 This website is under continued development. We appreciate your patience!

Previous Text Back to Volume PageNext Text

Wylie title	bkra shis dge legs mchog sbyin
Location	mkhyen brtse'i bka' 'bum Volume 7, sde tshan 15, Text 16, Pages 455-458 (Folios 77a3 to 78b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ནཱ་རོ་པ་ (Nāropa)
Citation	'jam dbyangs mkhyen brtse'i dbang po. bkra shis dge legs mchog sbyin. In 'jam dbyangs mkhyen brtse'i dbang po'i bka' 'bum, Vol. 7: 455-458. Khams sde dge rdzong sar dgon: Rdzong sar blo gros phun tshogs, 2020.
Genre	Invocation of Auspiciousness - bkra shis brjod pa
Cycle	ནཱ་རོ་མཁའ་སྤྱོད་མ་ (na ro mkha' spyod ma)
Deity	rdo rje rnal 'byor ma
Colophon	།ཅེས་པའང་གཞོན་ནུ་མཁྱེན་བརྩེའི་མིང་ཅན་གྱི་བློ་མཚོ་ལས་བྱུང་བ་མངྒལཾ།།
	ces pa'ang gzhon nu mkhyen brtse'i ming can gyi blo mtsho las byung ba mang+galaM/

1 Texts in this Section (sde tshan or chos tshan)

16 455-458	བཀྲ་ཤིས་དགེ་ལེགས་མཆོག་སྦྱིན། bkra shis dge legs mchog sbyin Invocation of Auspiciousness - bkra shis brjod pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བཀྲ་ཤིས་དགེ་ལེགས་མཆོག་སྦྱིན་ཞེས་བྱ་བ་བཞུགས་སོ། །རྡོ་རྗེ་འཆང་ཆེན་ཁ་སྦྱོར་བདུན་གྱི་གོ་འཕང་བརྙེས། །རྣལ་འབྱོར་མ་དཔལ་ཤེས་རབ་ཟག་མེད་བདེ་བས་མྱོས། །ནཱ་རོ་ཏ་པ་པཎ་གྲུབ་རྒྱ་མཚོའི་གཙུག་གི་ནོར། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཕམ་མཐིང་སྐུ་མཆེད་འཁོར་ལོ་སྡོམ་པའི་སྔགས་རིག་གྲུབ། །ཤེས་རབ་བརྩེགས་ནི་སྐད་གཉིས་སྨྲ་བའི་ཕ་རོལ་སོན། །བློ་གྲོས་གྲགས་པ་བར་དོར་མཆོག་གི་དངོས་གྲུབ་བརྙེས། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཀུན་དགའ་སྙིང་པོ་པད་དཀར་འཆང་བ་མི་ཡི་ཟོལ། །བསོད་ནམས་རྩེ་མོ་མཁའ་སྤྱོད་གྲོང་དུ་ཡུད་ཀྱིས་གཤེགས། །གྲགས་པ་རྒྱལ་མཚན་གསང་སྔགས་རྒྱ་མཚོའི་མཛོད་དུ་གྱུར། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ས་སྐྱ་པཎ་ཆེན་འཛམ་གླིང་འདི་ན་མཁས་པའི་ཕུལ། །འཕགས་པའི་མཚན་ཅན་ཁམས་གསུམ་འགྲོ་བའི་བླ་མར་གྱུར། །ཞང་སྟོན་ཆོས་རྗེ་ཟབ་རྒྱས་གདམས་པའི་དཔལ་ལ་རོལ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །པུཎྱ་ཤྲཱི་རྩེ་གཅིག་སྒྲུབ་པའི་སྲོག་ཤིང་འཛིན། །བསོད་ནམས་རྒྱལ་མཚན་ཐམས་ཅད་མཁྱེན་པར་ཡོངས་སུ་གྲགས། །སེང་གེའི་མཚན་ཅན་སྙན་བརྒྱུད་རྒྱ་མཚོའི་བཀའ་བབས་ཆེ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །རྒྱལ་བ་མཆོག་དབྱངས་ལུང་རྟོགས་ཡོན་ཏན་དཔལ་གྱིས་ཕྱུག །ནམ་མཁའི་མཚན་ཅན་མཁྱེན་རབ་མཐུ་སྟོབས་ཕ་མཐའ་ཡས། །བློ་གྲོས་རྒྱལ་མཚན་བརྩེ་བ་ཆེན་པོའི་རྣམ་འཕྲུལ་དངོས། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །རྡོ་རིང་པ་ནི་གྲུབ་རིག་བྱེ་བའི་གཙུག་ན་མཛེས། །ཚར་པ་ཆོས་རྗེ་རྩོད་པའི་དུས་ཀྱི་རྡོ་རྗེ་འཆང་། །མཁྱེན་བརྩེའི་དབང་ཕྱུག་འཇམ་དབྱངས་ངུར་སྨྲིག་བླ་གོས་ཅན། །བདེན་པ་དེས་ཀྱང་བདེ་མཆོག༴ བསླབ་གསུམ་རྒྱལ་མཚན་སྙན་བརྒྱུད་བསྟན་པའི་སྲོག་ཤིང་ཆེ། །དབང་ཕྱུག་རབ་བརྟན་རྡོ་རྗེ་འཛིན་པའི་འཁོར་ལོས་སྒྱུར། །བསོད་ནམས་མཆོག་ལྡན་ཟབ་རྒྱས་ཆོས་ཀྱི་མཛོད་གཅིག་པུ། །བདེན་པ་དེས་ཀྱང་བདེ་མཆོག༴ བསོད་ནམས་མཆོག་གྲུབ་རྒྱུད་སྡེ་རྒྱ་མཚོའི་ཕ་མཐར་སོན། །མཁྱེན་རབ་བྱམས་པ་གྲུབ་གཉིས་དཔལ་ལ་བདག་གིར་སྤྱོད། །ཀུན་དགའ་ལྷུན་གྲུབ་སྙིགས་དུས་བསྟན་པའི་གསལ་བྱེད་ཆེ། །བདེན་པ་དེས་ཀྱང་བདེ་མཆོག༴ གནས་གསར་ཆོས་རྗེ་སྨྲ་བའི་སེང་གེར་ཡོངས་སུ་གྲགས། །ཀུན་དགའ་བློ་གྲོས་མཁས་དང་གྲུབ་པའི་ཕ་རོལ་སོན། །ནམ་མཁའ་འཆི་མེད་ཡོངས་རྫོགས་བསྟན་པ་རྒྱ་མཚོའི་བདག །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བསྟན་པའི་ཉི་མ་རྡོ་རྗེ་བཙུན་མོ་མི་ཡི་ཟོལ། །ངག་གི་དབང་པོ་ཟབ་རྒྱས་སྙན་བརྒྱུད་རྒྱ་མཚོའི་བདག །ཀུན་དགའི་མཚན་ཅན་སྲས་བཅས་རྒྱལ་བའི་ཡེ་ཤེས་སྐུ། །བདེན་པ་དེས་ཀྱང་བདེ་མཆོག༴ རྩ་བའི་བླ་མ་རིགས་ཀུན་བདག་པོའི་རྣམ་རོལ་གྱིས། །དྲན་པ་ཙམ་གྱིས་མཁའ་སྤྱོད་དངོས་གྲུབ་སྟེར་བ་ལ། །རྣལ་འབྱོར་མ་དང་གཉིས་སུ་མེད་པར་ངེས་རྙེད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཆོས་སྐུའི་ངང་ལས་ལྷན་སྐྱེས་ལོངས་སྤྱོད་རྫོགས་སྐུའི་གཟུགས། །ཞིང་སྐྱེས་སྤྲུལ་པས་འགྲོ་བ་འདུལ་བའི་རྣམ་རོལ་ཅན། །སྔགས་སྐྱེས་མཁའ་སྤྱོད་དགའ་མའི་མཚན་བཟང་བསྒོམས་པ་ཡི། །བདེན་པ་དེས་ཀྱང་བདེ་མཆོག༴ གྲུབ་བརྙེས་རྣལ་འབྱོར་དབང་ཕྱུག་བྱེ་བ་གཤེགས་པའི་ཤུལ། །ཧེ་རུ་ཀཿདཔལ་ཉུང་ངུའི་རྒྱུད་ཀྱི་སྙིང་པོའི་ཕུལ། །བཀླགས་པ་ཙམ་གྱིས་གྲུབ་པའི་གསང་སྔགས་རབ་བཟླས་པའི། །བདེན་པ་དེས་ཀྱང་བདེ་མཆོག༴ ཁ་སྦྱོར་ཚོགས་གཉིས་རླུང་སེམས་དབུ་མར་འཆིང་བ་དང་། །བདེ་ཆེན་འབར་དང་འཛག་པའི་ཟློས་གར་ཅི་ཡང་རྩེན། །གསལ་སྟོང་བརྗོད་བྲལ་གཉུག་མའི་ངང་དུ་མཉམ་བཞག་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཐབས་ཤེས་ཕྱོགས་ཀྱི་ཌཱ་ཀི་འདུ་བའི་དུས་བཟང་པོར། །རྣལ་འབྱོར་མ་དཔལ་དཀྱིལ་འཁོར་སྒྲུབ་ཅིང་མཆོད་པ་དང་། །ཟག་མེད་བདུད་རྩི་ཚོགས་ཀྱི་འདུ་བས་མཉེས་བྱས་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །གནས་སྐབས་རྣམ་བཞིའི་ཕྲིན་ལས་ཀུན་ལ་དབང་འབྱོར་ཞིང་། །འཆི་ཚེ་མཁའ་སྤྱོད་གྲུབ་པའི་གྲོང་དུ་རོལ་པ་ལས། །མཐར་ཐུག་རྩ་རླུང་ཐིག་ལེ་ཨེ་ཝཾ་དབྱིངས་ཐིམ་ནས། །སྐུ་གསུམ་དབྱེར་མེད་གོ་འཕང་བརྙེས་པའི་བཀྲ་ཤིས་ཤོག །ཅེས་པའང་གཞོན་ནུ་མཁྱེན་བརྩེའི་མིང་ཅན་གྱི་བློ་མཚོ་ལས་བྱུང་བ་མངྒལཾ།། །། ༈

[edit]

bla brgyud phyag 'tshal/ rje btsun rdo rje rnal 'byor ma nA ro mkha' spyod kyi bkra shis dge legs mchog sbyin zhes bya ba bzhugs so/__/rdo rje 'chang chen kha sbyor bdun gyi go 'phang brnyes/__/rnal 'byor ma dpal shes rab zag med bde bas myos/__/nA ro ta pa paN grub rgya mtsho'i gtsug gi nor/__/bden pa des kyang bde mchog la gnas bkra shis shog__/pham mthing sku mched 'khor lo sdom pa'i sngags rig grub/__/shes rab brtsegs ni skad gnyis smra ba'i pha rol son/__/blo gros grags pa bar dor mchog gi dngos grub brnyes/__/bden pa des kyang bde mchog la gnas bkra shis shog__/kun dga' snying po pad dkar 'chang ba mi yi zol/__/bsod nams rtse mo mkha' spyod grong du yud kyis gshegs/__/grags pa rgyal mtshan gsang sngags rgya mtsho'i mdzod du gyur/__/bden pa des kyang bde mchog la gnas bkra shis shog__/sa skya paN chen 'dzam gling 'di na mkhas pa'i phul/__/'phags pa'i mtshan can khams gsum 'gro ba'i bla mar gyur/__/zhang ston chos rje zab rgyas gdams pa'i dpal la rol/__/bden pa des kyang bde mchog la gnas bkra shis shog__/puN+ya shrI rtse gcig sgrub pa'i srog shing 'dzin/__/bsod nams rgyal mtshan thams cad mkhyen par yongs su grags/__/seng ge'i mtshan can snyan brgyud rgya mtsho'i bka' babs che/__/bden pa des kyang bde mchog la gnas bkra shis shog__/rgyal ba mchog dbyangs lung rtogs yon tan dpal gyis phyug__/nam mkha'i mtshan can mkhyen rab mthu stobs pha mtha' yas/__/blo gros rgyal mtshan brtse ba chen po'i rnam 'phrul dngos/__/bden pa des kyang bde mchog la gnas bkra shis shog__/rdo ring pa ni grub rig bye ba'i gtsug na mdzes/__/tshar pa chos rje rtsod pa'i dus kyi rdo rje 'chang /__/mkhyen brtse'i dbang phyug 'jam dbyangs ngur smrig bla gos can/__/bden pa des kyang bde mchog=__bslab gsum rgyal mtshan snyan brgyud bstan pa'i srog shing che/__/dbang phyug rab brtan rdo rje 'dzin pa'i 'khor los sgyur/__/bsod nams mchog ldan zab rgyas chos kyi mdzod gcig pu/__/bden pa des kyang bde mchog=__bsod nams mchog grub rgyud sde rgya mtsho'i pha mthar son/__/mkhyen rab byams pa grub gnyis dpal la bdag gir spyod/__/kun dga' lhun grub snyigs dus bstan pa'i gsal byed che/__/bden pa des kyang bde mchog=__gnas gsar chos rje smra ba'i seng ger yongs su grags/__/kun dga' blo gros mkhas dang grub pa'i pha rol son/__/nam mkha' 'chi med yongs rdzogs bstan pa rgya mtsho'i bdag__/bden pa des kyang bde mchog la gnas bkra shis shog__/bstan pa'i nyi ma rdo rje btsun mo mi yi zol/__/ngag gi dbang po zab rgyas snyan brgyud rgya mtsho'i bdag__/kun dga'i mtshan can sras bcas rgyal ba'i ye shes sku/__/bden pa des kyang bde mchog=__rtsa ba'i bla ma rigs kun bdag po'i rnam rol gyis/__/dran pa tsam gyis mkha' spyod dngos grub ster ba la/__/rnal 'byor ma dang gnyis su med par nges rnyed pa'i/__/bden pa des kyang bde mchog la gnas bkra shis shog__/chos sku'i ngang las lhan skyes longs spyod rdzogs sku'i gzugs/__/zhing skyes sprul pas 'gro ba 'dul ba'i rnam rol can/__/sngags skyes mkha' spyod dga' ma'i mtshan bzang bsgoms pa yi/__/bden pa des kyang bde mchog=__grub brnyes rnal 'byor dbang phyug bye ba gshegs pa'i shul/__/he ru kaHdpal nyung ngu'i rgyud kyi snying po'i phul/__/bklags pa tsam gyis grub pa'i gsang sngags rab bzlas pa'i/__/bden pa des kyang bde mchog=__kha sbyor tshogs gnyis rlung sems dbu mar 'ching ba dang /__/bde chen 'bar dang 'dzag pa'i zlos gar ci yang rtsen/_/gsal stong brjod bral gnyug ma'i ngang du mnyam bzhag pa'i/__/bden pa des kyang bde mchog la gnas bkra shis shog__/thabs shes phyogs kyi DA ki 'du ba'i dus bzang por/__/rnal 'byor ma dpal dkyil 'khor sgrub cing mchod pa dang /__/zag med bdud rtsi tshogs kyi 'du bas mnyes byas pa'i/__/bden pa des kyang bde mchog la gnas bkra shis shog__/gnas skabs rnam bzhi'i phrin las kun la dbang 'byor zhing /__/'chi tshe mkha' spyod grub pa'i grong du rol pa las/__/mthar thug rtsa rlung thig le e waM dbyings thim nas/__/sku gsum dbyer med go 'phang brnyes pa'i bkra shis shog__/ces pa'ang gzhon nu mkhyen brtse'i ming can gyi blo mtsho las byung ba mang+galaM//___//__!